Kujtim Cakrani, avokati i Ilir Metës, i ftuar në studion e “Off the Record” nga Andrea Danglli, në A2CNN, i cilësoi “kamikazë” gjyqtarët e GJKKO-së.

“Kjo mori masë ekstreme për dhëndrrin e Sali Berishës. Sot ka Presidentin Ilir Meta që po e mban në parburgim për 16 muaj dhe ne i bëjmë kërkesë zëvendësim mase, ajo thotë ti do intimidosh dëshmitarët. Do prishësh provat. Çfarë provash do prishë në 2009 zoti Meta? Vetëm Irena Gjoka e di. Problemi është se ata gjyqtarë aty, si Gjoka, si Erjon Çela e të gjithë me radhë janë të gjithë kamikazë. Nuk ka dyshim. Nuk është thjesht zonja Gjoka aty. Meta duhet ta përfundonte seancën paraprake në muajin shtator dhe ne sot jemi në fund të janarit. Kemi seancë nesër prapë dhe nuk e dimë a do zhvillohet apo jo. Mund të jetë me raport zonja Gjoka. Dhe kur i kërkojmë arsyen përse ti po e mban në paraburgim, ajo të rri e të shikon, rri dhe tre orë andej gjoja lexon dosjen dhe kthehet aty dy sekonda e thotë sepse ky prish provat”, tha avokati i Metës.

“Mua nuk më shqetëson fakti çfarë ka bërë ajo në Greqi. Mua më intereson që ajo është kthyer në kamikaze e pushtetit. Ky është thelbi i gjësë. Mua më shqetëson ana profesionale e saj, që ajo nuk merr vendime vetë. Më shqetëson fakti që Altin Dumani e ka nën hetim për këtë çështjen e Greqisë dhe Altin Dumani është njëri nga tre prokurorët që ka çuar kërkesën për zotin Meta. Si ajo do japi vendim kundër? Ja, kjo është drejtësia. Si mund të marrësh ti masa sigurie arrest me burg për Presidentin për vepër penale që pretendohet se ka ndodhur në vitin 2009. Prandaj them që ata janë kthyer në toga të kuqe të pushkatimit. Unë e kam dhe për zotin Veliaj. Nuk e kam vetëm për zotin Meta. Unë e kam dhe për zotin Ahmetaj. Zoti Ahmetaj të ishte sot në Shqipëri do kishte dy vite e gjysmë do rrinte në paraburgim. Ata bëjnë inkuizicion”, shtoi Cakrani.

Kuvendi do të shqyrtojë në seancën plenare të së enjtes marrëveshjen e ratifikimit të pranimit të Republikës së Shqipërisë, të përfaqësuar nga Kryeministri Edi Rama, në Kartën e Bordit të Paqes.

Karta garanton ruajtjen e sovranitetit të shteteve anëtare, duke parashikuar se asnjë dispozitë e saj nuk i jep Bordit juridiksion brenda territorit të një shteti anëtar dhe as nuk e detyron një shtet anëtar të marrë pjesë në një mision specific ndërtimi paqeje pa pëlqimin e shprehur të shtetit.

Në kreun e parë të projektligjit, parashikohet krijimi i Bordit të Paqes si një organizatë ndërkombëtare, me misionin për të ushtruar funksione të ndërtimit të paqes, stabilitetit dhe rindërtimit në territore të prekura nga konflikti, në përputhje me të drejtën ndërkombëtare dhe dispozitat e Kartës së tij themeluese.

Kreu II parashikon anëtarësimin në Bord nga shtetet anëtare, në bazë të ftesës nga kryetari dhe njoftimit formal të pëlqimit për të qenë të lidhur nga kjo Kartë,

“Shtetet mund të përfaqësohen në Bord nga Kreu i shtetit ose Kreu i qeverisë. Karta garanton ruajtjen e sovranitetit të shteteve anëtare, duke parashikuar se asnjë dispozitë e saj nuk i jep Bordit juridiksion brenda territorit të një shteti anëtar dhe as nuk e detyron një shtet anëtar të marrë pjesë në një mision specific ndërtimi paqeje pa pëlqimin e shprehur të shtetit”, thuhet në projektligj.

Në draftin e qeverisë, thuhet se  karta përbëhet nga 13 krerë që rregullojnë krijimin dhe funksionimin e tij.

Ndërsa çdo shtet anëtar ka një mandat trevjeçar nga data e hyrjes në fuqi të Kartës, subjekt i rinovimit nga Kryetari i Bordit të Paqes.

“Ky afat trevjeçar nuk zbatohet për shtetet anëtare, të cilat kontribuojnë më shumë se një miliard dollar amerikanë (1 000 000 000 USD) në fonde monetare (“cash”) brenda vitit të parë nga hyrja në fuqi e Kartës”, thuhet në draftin ligjor të qeverisë.

Kliko dokumentin

“Rrethi i kuq është platforma e Top Channel, për vendosjen e kamerave. Një nga viktimat që është pa autor dhe sot, ka qenë në platformën e Top Channel, Hekuran Deda. Mund të ishte vrarë një gazetar i Top Channel”, tha Hoxha.

Më tej ai ka shpjeguar  urdhrat e dhëna nga Komandanti i Gardës, teksa tha se të shtënat kanë ndodhur për 8 sekonda.

“Ai është një regjistrim që është bërë duke regjistruar komandantin e Gardës, ai zë dëgjohet aty, dhe urdhrat që jep ai në një kanal të veçantë. Është thënë që s’ka punuar sistemi  i regjistrimit në audio, që punon unë kam çuar dokumentin në SPAK, në fakt çdo gjë është bërë në radio.

Mua nuk më intereson pse e ka bërë ky person këtë regjistrim, ai i ka bërë një nder të madh vendit. Ajo që dëgjohet në bisedë është që komandanti i Gardës ka kontroll të plotë të situatës. Ai thotë që kur të kalohet teli me gjemba do të qëllohet, ndërkohë ata kanë qenë në bulevard. 8 sekonda ka të shtëna, po të ishte qëlluar më gjatë do të ishte bërë kasaphanë.

Vetëm Ziver Veizi është te porta, por prapë në bulevard, të tjerët janë në bulevard. Të gjithë viktimat nuk janë atje ku thotë ai që të qëllohet. Ti ke identifikuar një rrezik dhe po e neutralizon, por viktimat nuk kanë lidhje me ligjin për përdorimin e armëve.

Audioregjistrimi është burim që të çon te prova. Pse e nxori pas 13 vitesh? Ai që ka pasur materialin, ka pasur frikë. Ku ta dorëzonte atë provë?”, tha Hoxha.

“Italia mund të luajë një rol me rëndësi unike në zbatimin e planit të paqes në Lindjen e Mesme dhe në ndërtimin e perspektivës së dy shteteve. Gjithashtu nuk e konsideroj një zgjedhje të zgjuar nga ana e Italisë dhe Evropës që të përjashtojnë veten nga një organizatë që, megjithatë, është me interes”, tha kryeministri italian.

Nga Ylli Pata

Tragjedia e 21 janarit është një minë me sahat jo vetëm si çështje e drejtësisë, pra hetimit dhe dënimit të fajtorëve të atij që Gjykata e Strazburgut e ka quajtur “Krim Shtetëror”

21 janari 2011 është një ngjarjen politike në kuptimin e plotë të fjalës. Ngjarje politike jo vetëm për atë çfarë ndodhi ditën e tragjedisë dhe ditëve të tjera që pasuan 15 vjet më parë.

21 janari është një lakmues i rëndësishëm i sjelljes politike gjatë ketyre viteve, duke ardhur deri sot. Do të thotë se mënyra e përballjes politike me këtë çështje, ka qenë test për politikën shqiptare.

E në radhë të parë për Partinë Demokratike, e cila, në kohën e tragjedisë ka qenë në anën e autoritetit që kreu atë krim shtetëror. Në Partinë Demokratike, nuk ka një qëndrim unik për tragjedinë, edhe pse enturazhi i Sali Berishës ka tentuar të bllokojë sa më shumë një qëndrim të decentralizuar.

Presidenti i Republikës i kohës, Bamir Topi, i zgjedhur nga PD kur ishte në postin numër 2 të saj, ka shprehur disa herë publikisht, e mbi të gjitha në librin e tij “Nokturn”, të gjithë versionin dhe qëndrimin e tij. Ku hapur dënon krimin si sjellje e prapranueshme politike, duke qenë gjithmonë i hapur ndaj drejtësisë.

Ndërkaq, Lulzim Basha, ministri i Brendshëm i kohës, e më pas kryetari i Partisë Demokratike për disa vjet, ka shprehur hapur përkrahjen e tij që të bëhet drejtësi për ngjarjen, duke dënuar fajtorët e krimit shtetëror.

Ndërkaq, eksponentë të tjerë, pesha të rënda të politikës së PD-së, nuk kanë mbrojtur versionin e Sali Berishës.

I cili është i vetmi që po mban një qëndrim të njëjtë për ngjarjen; ku vrasjet i quan thjeshte një “zbatim ligji”. Për të vijuar më pas me akuzat ndaj Edi Ramës dhe PS-së si fajtore direkte për atë tragjedi.

Qëndrimi i Sali Berishës është qartësisht i sforcuar për të luajtur në pozitat e “të fortit” për të ndalur hapjen e dosjes që do ta fundoste përfundimisht.

Edhe rasti i daljes së të ashtuquajturës çështje e Irena Gjokës, që është qartazi një ndihmë e qarqeve të depp state të Athinës, konsiston në shantazhin ndaj prokurorëve të SPAK apo gyqtarëve të GJKKO nëse hapin “Kutinë e Pandorës” të 21 janarit.

Për të gjithë këtë betejë, Sali Berisha ka shpenzuar milina dollarë në lobime në SHBA dhe Europë për të krijuar opinion të rëndë anti-Rama. Për këtë betejë

po përdoret një enturazh mediatic edhe ky shumë kostoz për të hapur e ndezur xixat e betejave qoftë politike, qoftë në sulmin  prokurorëve dhe gjyqtarëve specialë.

I gjithë ky stërmundim i Sali Bershës, edhe pse vijon të pengojë drejtësinë për 21 janarin, politikisht nuk e ndihmon fare.

Madje, edhe pse SPAK mund ta lëndojë edhe më shumë mazhorancën në hetimet për korrupsion dhe abuzime, relativizimi që bën opozita nga ana tjetër duke mbrojtur Sali Berishën, nuk i bën fare keq kësaj mazhorance.

E cila nuk do të arrijë kurrë të fitojë terren politik, duke mbajtur këtë qëndrim abraziv dhe inatçor ndaj krimit shtetëror të 21 janarit.

E cila është realisht vija e kuqe që e mban larg pushtetit Partinë Demokratike, madje edhe opozitën. E cila në mjaft segmente të saj, tenton të përdorë versionet berishjane për tragjedinë.

Siç tha Adriatik Lapaj një natë, kur hodhi qesim në televizion kumbullën e “plumbave jo nga Garda” për të ndjerin Aleks Nika. Qëndrim që bëri efekt të menjëhershëm negativ, edhe pse Lapaj u tërhoq, falë edhe një qëndrimi mjaft të pjekur dhe të matur të Mark Nikës, xhaxhait të Aleksit.

Për këtë ngjarje, pa një katarsis real, përkatësisht ndarje të prerë nga mbrojtja politike apo mediatike, siç kanë qenë intervistat e pilotuara të ish-kreut të Gardës etj, publiku nuk do t’i afrohet kësaj opozite. Dhe normalisht e logjikisht s’ka përse afrohet. Pasi një politikan justifikon e mbron vrasjen e njerëzve të pafajshëm nga autoritetet e sigurisë, atëherë njerëzit kanë drojën dialektike se kjo mund të ndodhë përsëri. Amnistimi i Sali Berishës nga elektorati për 1997, kur e risolli në pushtet në 2005, edhe pse nddhi si ndodhi nuk ka gjasë të përsëritet.

21 janari është padyshim edhe një nga shtyllat kryesore të izolimit dhe ndëshkimit të Sali Berishës nga Bota Perëndimore, përkatësisht SHBA e BE me vulë të thatë, e BE me qëndrim diplomatik.

Insistimi për të gjetur një alibi apo relativizimi duke e krahasuar me kundërshtarin politik në lidhje me korrupsionin e zyrtarëve, së paku politikisht nuk ka pirë ujë.

Këtë e kanë treguar çdo zgjedhje, ku rrjedhja e elektoratit është e madhe dhe fuqia specifike e një partie qeverisëse e PD thuajse është shuar. Kundërshtimi i realitetit është fiks si historia e barit që ka përmendur Yuri Kim, e cila nuk ishte në SHqipëri në 2011-n, e as tani. Përkundrazi po merret me naftën e Venezuelës si drejtuese e gjigandit amerikan të hidrokarbureve…TemA

Sot shënohen 15 vjet nga tragjedia e 21 Janarit, një ngjarje e dhimbshme që la katër qytetarë të vrarë dhe të tjerë të plagosur në kryeqytet. Ndërkohë, debatet mbi drejtësinë për këtë ngjarje vazhdojnë.

Në “Real Story” në ABC News, avokati Idajet Beqiri kritikon ashpër SPAK-un, duke theksuar se institucioni ende nuk ka bërë drejtësi dhe është i ndikuar nga ish-kryeministri Sali Berisha.

“SPAK end nuk është në lartësinë e detyrës dhe po luan ndjenjat e një populli të tërë. Me atë që Shqipëria është në prag të integrimit në BE. Po e injorojnë këtë çështje jo se janë të paaftë, por se janë të kapur nga ish-kryeministri i vendit, sepse ka ende kontroll mbi SPAK. Berisha i mban të lidhur jo vetëm me dosje, por edhe me akte korruptive. Kemi të bëjmë me një krim që e pranon vetë autori i tij. Nuk mbyllet “21 Janari” dot është një krim i hapur. Duan ta mbyllin “21 Janarin”, por nuk e mbyllin dot është një krim i hapur që pa marrë ndëshkimin e duhur dhe pa marrë burgimin e përjetshëm siç e meriton Sali Berisha. Berisha e pranon vetë që ka bërë krim. I ka pranuar në një mënyrë apo në një tjetër në deklaratat e tij. Berisha e bëri gjak Shqipërinë”, tha Beqiri.

Burime i thanë Top Channel se deputetët e PD do të votojnë pro bërjes pjesë të Shqipërisë në Bordin e Paqes, me ftesë nga Presidenti Donald Trump.

“Pavarësisht shkeljes së të gjitha rregullave procedurale kushtetuese dhe të Rregullores së Kuvendin, si një provokim të ulët ndaj opozitës dhe qytetarëve shqiptar, nga njeriu që ngërçin e tij me SHBA dëshiron tia imponojë Shqipërisë apo të mashtrojë shqiptarët sikur kjo nuk ekziston, ne DO TË MARRIM PJESË nesër në seancë, si mbështetje ndaj përpjekjeve/angazhimit të Presidentit të SHBA për paqen dhe sigurinë globale”, thuhet në njoftimin e PD.

Kuvendi ka miratuar kërkesën e grupit parlamentar të PS për zhvillimin e seancës plenare ditën e enjte në ora 10:00, për miratimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes.

Kuvendi ka bërë publike agjendën e punimeve në mbështetje të urdhrit nr. 4, datë 21.1.2026 të Kryetarit të Kuvendit, z. Niko Peleshi,

Rendi i ditës është si më poshtë:

1. Njoftime.

(Neni 44, pika 3, të Rregullores së Kuvendit)

2. Projektligji “Për ratifikimin e marrëveshjes së pranimit të Republikës së

Shqipërisë, përfaqësuar nga Kryeministri Edi Rama, në Kartën e Bordit të

Paqes”. (Në mbështetje të neneve 78, 81 pika 1, 83, pika 1 dhe 2, dhe nenit 121, pika 1, të

Kushtetutës, si dhe neneve 55, 73-77 të Rregullores, shumicë absolute votash për

miratim)

Pyetje

Shprehet nismëtari

Shprehet Komisioni përgjegjës për Europën dhe Punët e Jashtme

Diskutime

(Shprehen grupet parlamentare)

Qeveria e Groenlandës ka publikuar sot në 21 janar broshurën “Përgatitu për krizën, mbijetoni pesë ditë”, e cila ofron këshilla të thjeshta dhe praktike sesi familjet mund të përgatiten për të përballuar vetë situata emergjente deri në pesë ditë.

Sipas njoftimit të qeverisë në Nuuk, hartimi i broshurës nisi vitin e kaluar, pas një serie ndërprerjesh të energjisë elektrike, disa të shkurtra e disa të gjata. Qëllimi është të forcohet siguria e popullsisë dhe të bëhet më solide përgatitja e shoqërisë në tërësi.

Broshura plotëson masat ekzistuese të përgatitjes dhe duhet të shihet si ndihmë për individët dhe si mbështetje për komunitetin. Ajo është realizuar në bashkëpunim midis ministrive, komunave, policisë së Groenlandës, Komandës Arktike dhe me kontributin e kompanive autonome. Këshillat janë diskutuar gjithashtu nga Komisioni i Përgatitjes së Groenlandës.

Ministri për peshkim, gjueti, bujqësi, vetë-mjaftueshmëri dhe mjedis Peter Borg, tha se broshura ka për qëllim, që banorët të jenë të përgatitur.

“Publikimi i broshurës me këshilla praktike dhe të thjeshta për familjet nuk do të thotë që presim një krizë. Ne e kemi përgatitur këtë për të marrë përgjegjësinë tonë dhe për të vepruar në kohë. Përgatitja sjell qetësi: kur mund të përballosh vetë situata emergjente dhe ke forcën për të ndihmuar të tjerët për disa ditë, bëhesh më i fortë.

Nëse ndjekim këto këshilla, do të bëhemi më të fortë si individë dhe si shoqëri. Popullsia mund të jetë e sigurt se mbrojtja jonë civile është gati dhe detyrat e saj do të kryhen nga profesionistë me njohuri teknike dhe përvojë, edhe në situata të jashtëzakonshme. Ne kemi një menaxhim efikas të krizave, përgjegjësi të qarta dhe bashkëpunim të fortë ndër-sektorial dhe ndër-autoritet”, tha ministri.

Groenlanda është kthyer në qendër të vëmendjes të debatit global. Presidenti i SHBA-ve Donald Trump ka thënë se Shtetet e Bashhkuara dëshirojnë ta blejnë ishullin arktik, ndërsa Europa ka reaguar ndaj Uashingtonit, duke ngrirë marrëveshjen tregtare.

Nga Augustin Palokaj

E vetmja gjë që mund të parashikohet për sjelljen e administratës amerikane në mandatin e dytë të presidentit Donald Trump është paparashikueshmëria. Këtë e kuptuan këtë fundjavë edhe liderët evropianë të përballur me kërcënimin e ri amerikan për tarifa shtesë për ato vende anëtare të NATO-s që shihen si pengesë për “marrjen në pronë” të Grenlandës nga Shtetet e Bashkuara të Amerikës.
Edhe pse Trumpi paralajmëroi këto masa ndëshkuese vetëm ndaj 8 vendeve evropiane të NATO-s, përfshirë edhe dy që nuk janë anëtare të Bashkimit Evropian, ky kërcënim nxiti përsëri presion ndaj evropianëve që t’i forcojnë radhët dhe të bashkohen për të reaguar ndaj masave të reja. Bashkimi Evropian e dënoi këtë paralajmërim si “të papranueshëm“ dhe “të dëmshëm për aleancën transatlantike“. Kështu BE-ja ka nisur përsëri të përgatisë masat reciproke. Se Trumpi nuk ka respekt ndaj asnjë aleati dëshmoi edhe përfshirja e Britanisë së Madhe në listën e vendeve të cilat ai do t’i sanksionojë. Nuk ka shumë kohë kur Trump fliste për “lidhjet e forta speciale dhe të pazëvendësueshme mes Amerikës dhe Britanisë“.

Krejt ky tensionim në raportet transatlantike erdhi pasi disa vende evropiane dërguan ushtarë në Grenlandë për stërvitje të koordinuara. Fjala ishte për vetëm disa dhjetëra ushtarë. Arsyeja nuk ishte për të përgatitur ndonjë konfrontim ushtarak me amerikanët, por pikërisht për të adresuar një shqetësim që e kanë shprehur Trumpi dhe bashkëpunëtorët e tij, se evropianët nuk janë të gatshëm e as nuk duan të garantojnë sigurinë e Grenlandës.

Luftë për Grenlandën mes aleatëve nuk do të ketë, sepse fundi i fundit asnjë ushtar i ndonjë vendi aleat nuk do t’ia kthejë pushkën ushtarëve amerikanë. Por, fundi i NATO-s mund të vijë shpejt dhe kjo do të ishte një fitore e paprovokuar e Rusisë, Kinës dhe të gjithëve që nuk e duan NATO-n.

Forcimi ushtarak i NATO-s, si rezultat i ngritjes dramatike të investimeve në mbrojtje nga anëtarët evropianë të saj, nuk do të ketë ndonjë vlerë nëse shuhet aleanca politike. Dhe kjo tash po ndodh pasi një shtet anëtar, më i fuqishmi, kërcënon me aneksim të shteteve të tjera. Presidenti amerikan Trump përsëri shihet si person që po rrezikon shkatërrimin e NATO-s dhe për këtë e kritikojnë edhe kongresistë dhe senatorë nga radhët e republikanëve. Për garantimin e integritetit territorial të vendeve anëtare dhe për ruajtjen e unitetit të NATO-s kanë bërë thirrje përmes deklaratave të përbashkëta shumë senatorë amerikanë, përfshirë edhe ata të cilët ditët e fundit kanë qëndruar në Danimarkë për të diskutuar rreth sigurisë në hapësirën arktike.

Kështu aleatët evropianë po përballen me faktin se nuk ka mjaftuar përkushtimi për t’i rritur investimet në mbrojtje në 5 për qind të bruto prodhimit vendor, siç kishte kërkuar Trumpi. Tash ai bën kërkesa që të marrë në pronësi territor që i takon një shteti aleat. Për BE-në nuk ka mjaftuar as marrëveshja të cilën e kishte arritur me presidentin Trump presidentja e Komisionit Evropian, Ursula von der Leyen, për uljen e tarifave për mallrat amerikane në BE. Tash Trumpi përsëri kërcënon me tarifa të reja. Pra, aleatët më nuk janë të sigurt se sa mund të llogarisin në Aleancën deri tash të pathyeshme transatlantike.
NATO ka ekzistuar për 77 vjet si Aleanca më e fortë ushtarake në botë pikërisht për shkak se ka pasur besim mes aleatëve dhe janë ndarë vlerat e përbashkëta. Kjo me mandatin e dytë të Trumpit ka ndryshuar. Prandaj as fundi i NATO-s nuk mund të përjashtohet më. Nuk duhet të habitemi pse Moska ndër të parat ka shprehur kënaqësi për këto çarje në raportet mes aleatëve në NATO.

Nuk është ndonjë sekret se pa SHBA-në, NATO as përafërsisht nuk do ta kishte fuqinë ushtarake që e ka tash. Por, në këtë fuqi të NATO-s, SHBA-ja bën pjesë me 80 për qind prandaj kanë të drejtë të kërkojnë rritje dramatike të investimeve në mbrojtje. Këtë e kanë kërkuar edhe paraardhësit e Trumpit. Por, ata asnjëherë nuk e kanë vënë në dyshim gatishmërinë për t’u dalë në mbrojtje aleatëve e lëre më t’i kërcënojnë ata, siç bën tash administrata Trump. Prandaj në situatën aktuale nuk janë të ekzagjeruar as pohimet për mundësinë e fundit të NATO-s.

Ne duam të besojmë që SPAK-u do ta çojë çështjen e 21 Janarit deri në fund, sepse kjo është shpresa e fundit që kjo tragjedi mos të mbetet pa ndëshkuar.

Kështu deklaroi në “Studio Live“ me Ermal Qorin në Report Tv, Zamira Veizi, mbesa e Ziver Veizit, i cili ishte një prej protestuesve që u vra nga plumbat e shtetit teksa protestonte kundër Sali Berishës më 21 janar të vitit 2011, para Kryeministrisë në Tiranë.

“Kemi një dhimbje më të madhe për arsye të drejtësisë munguar. Jemi skeptikë se 15 vite ishin mjaftueshëm për të vendosur drejtësi, por ka qenë e munguar”,- tha ajo.

“Është SPAK-u, që është organi i zhveshur nga politika që duhet të marrë një vendim të paanshëm dhe transparent për këtë çështje”,- shtoi ajo.

Mbesa e të vrarit nga plumbat e shtetit vlerësoi gatishmërinë e mazhorancës së sotme për zbardhjen e plotë të rrethanave dhe fakteve të masakrës së 21 janarit, ku në total u vranë 4 protestues, por theksoi zhgënjimin e saj për vonesën e dhënies së drejtësisë.

“Ne sigurisht që kemi pasur takime, sigurisht që mazhoranca është treguar e gatshme për të zbardhur këtë çështje. Kemi dëgjuar premtime, por fatkeqësisht ndodhemi pas 15 vitesh kur këto premtime nuk janë mbajtur. Drejtësia u premtua, por nuk u realizua, jemi në kushtet që nuk është vendosur në vend pas kaq shumë viteve”,- tha Zamira Veizi.

Mbesa e Ziver Veizit kërkon që pavarësisht vonesës 15-vjeçare, përgjegjësit e masakrës së 21 janarit duhet të dalin para drejtësisë dhe të ndëshkohen.

“Drejtësia nuk duhet të vonojë për 21 janarin. Është plagë e hapur jo vetëm për ne si familjarë, por për të gjithë shoqërinë. E vërteta duhet të dalë në dritë, përgjegjësit e asaj maskare duhet të dalin para drejtësisë, ky është mesazhi im”,- tha Zamira Veizi.

Vajza e presidentit të SHBA-së, Donald Trump, Ivanka Trump, ka mbërritur në Vlorë ditën e martë, në një vizitë që po shoqërohet me masa të forta sigurie dhe protokoll të pazakontë.

Mësohet se Ivanka Trump është akomoduar në një prej hoteleve luksoze në zonën e Ujit të Ftohtë, larg vëmendjes publike. Ndërkohë, gjatë lëvizjeve të saj në qytet, është zbatuar një strategji sigurie e rrallë për Vlorën: ndërrimi i automjetit në çdo ndalesë.

Kjo masë, sipas informacioneve në media, është marrë për të shmangur çdo rrezik të mundshëm dhe për të mos krijuar një itinerar të parashikueshëm, duke treguar nivel të lartë sigurie dhe diskrecioni.

Lëvizjet janë kryer në mënyrë të fragmentuar dhe pa paralajmërim, ndërsa çdo ndalesë është shoqëruar nga staf sigurie i specializuar.

Partia Demokratike ka vijuar turin e Foltoreve. Në fjalën e saj Jorida Tabaku theksoi se fokusi kryesor duhet të jenë shqetësimet e shqiptarëve.

Gjithashtu nënvizoi Partia Demokratike ka treguar se di t’i përgjigjet sfidave të kohës dhe se është e vendosur për të çuar rrugëtimin e nisur deri në fund.

“Duhet të flasim dhe të tregojmë guxim për të ndryshuar dhe përmirësuar Partinë Demokratike. Duhet t’i përgjigjemi sfidave që koha, duhet patjetër të fokusohemi të shqetësimet që kanë shqiptarët. Ne duhet t’i përgjigjemi sfidave të kohës, do të flasim për sistemin e kapur. A kemi gabuar ne? Po plot herë. A jemi rrëzuar? Po por jemi ngritur sërish në këmbë. Na duhet mbështetja juaj që këtë rrugëtim që kemi nisur ta çojmë deri në fund”, tha ajo.

Nga Lutfi Dervishi

Bota po ndryshon me shpejtësi të paprecedentë. Çdo ditë ka një lajm të madh dhe tronditës. Lufta në Ukrainë po hyn në vitin e pestë. Aleancat po lëkunden, dhe fuqi të mëdha po flasin gjithnjë e më pak për vlera dhe gjithnjë e më shumë për interesa. Rendi që njohëm pas Luftës së Dytë Botërore, dhe sidomos periudha (fatlume për shqiptarët) pas rënies së murit të Berlinit tashmë i përket historisë. Arkitekti i këtij rendi është sot kritiku më i rreptë i veprës që vetë ka ndërtuar.

SHBA, krijuesja kryesore e rendit pasluftës, sot shfaqet e pakënaqur me produktin e vet. Doktrina “America First”, e artikuluar qartë nga Presidenti Donald Trump, nuk është slogan elektoral, ajo e sheh globalizmin si humbje për interesin amerikan, Bashkimin Evropian si dështim në politikat e migracionit dhe NATO-n si një barrë të pabarabartë financiare. Kur aleatët kërcënohen me tarifa, kur pakënaqësia ndaj NATO-s vjen nga anëtari kryesor, dhe kur pretendimet territoriale vendosen në tavolinë, ajo që dje ishte e pamendueshme sot është e pashmangshme.

Shqipëria dhe shqiptarët kanë një borxh ekzistencial ndaj SHBA. Nga presidenti Wilson, (1919) që mbrojti shqiptarët në Konferencën e Paqes, te Bill Clinton (1999) për ndërhyrjen në Kosovë, e deri te George W. Bush (2008) për mbështetjen vendimtare për anëtarësimin në NATO. Kjo lidhje e ushqyer edhe nga gjysëm milioni shqiptarë që sot janë qytetarë amerikanë, është sa emocionale aq edhe strategjike.

Në të njëjtën kohë, Shqipëria është në rrugën e anëtarësimit në BE. Integrimi Euro- atlantik është projekti strategjik i dekadave të fundit. Anëtarësimi në familjen e BE nuk do të thotë thjesht më shumë fonde, por më shumë rregulla, institucione dhe stabilitet. Afro 2 milionë shqiptarë janë qytetarë të një prej vendeve të BE -së.

Dje, në Davos, Mark Carney i Kanadasë duke iu referuar esesë së Vaclav Havel (Fuqia e të pafuqishmëve) përdori metaforën e “vitrinës”, parullave që i mbajmë për t’u dukur korrektë, ndërsa realiteti pas xhamit është shumë më brutal. Te eseja e Havelit shitësi i perimeve që kishte vendosur në xham tabelën “proletare të të gjithë vendeve bashkohuni”, nuk besonte te komunizmi, por nuk donte të kishte telashe.

A ka ardhur koha të pyesim nëse tabela “integrimi euroatlantik”, në vitrinën tonë po shërben si kamuflazh për një dyqan që zbrazet dita-ditës.

Në një botë ku fuqitë e mëdha nuk kanë nevojë të ngrënë zërin për të diktuar, vendet e vogla kanë dy zgjedhje, ose bëhen shumë të zëshme dhe rrezikojnë të injorohen, ose bëhen mençurisht të heshtura dhe shohin “punën e vet” “kokëulur”. Shqipëria nuk ka as peshë për të ndryshuar fatet e globit apo rrjedhën e ngjarjeve, por ka detyrimin të luajë seriozisht për veten.

Aleatët historikë mbeten shtylla, por bota e re kërkon aleanca funksionale. Kërkon artneritete për energji, siguri, teknologji dhe ushqim. Këto janë fjalët kyçe të epokës së re.

Çfarë prodhon sot vendi? Sa jemi të varur nga importet?

Nëse, nesër, shpërthen një konflikt i gjerë, pyetjet do të jenë brutale. A kemi energji? A kemi ushqim? A kemi mbrojtje kibernetike? A kemi rezerva? A kemi pajisje ushtarake, armatim e municione? Çfarë do të prodhojmë në fushën e mbrojtjes?

Në këtë kontekst, koordinimi me Kosovën në fushën e energjisë, mbrojtjes, ushqimit dhe sigurisë është imperativ strategjik. Dy shtete të vogla, me të njëjtën hapësirë gjeopolitike dhe përballë të njëjtit rrezik, nuk mund të sillen si dy vëllezër që secili sheh oborrin e vet kur shtëpia është në flakë.

Shqipëria nuk ka luksin të zgjedhë mes Perëndimit dhe Perëndimit. Mund të vijë dita që duhet të marrë vendime dhe të zgjedhë, siç është rasti Bordit të Paqes, por ndërkohë në një kohë ku secili mendon “o mete për vete”, duhet të fillojmë të mendojmë më shumë për veten. Më mirë pa parulla në vitrinë dhe më shumë mall pas xhamit.

Nëse dyqani ynë mbetet bosh, në tryezën e madhe gjeopolitike do të na përdorin si kusur.
Për mbyllje, vlen të vihet re se sot skena ku përplasen debatet, mospajtimet dhe kontradiktat e rendit të ri global është zhvendosur në Davos, në Zvicër. Një vend që nuk është as anëtar i Bashkimit Evropian dhe as i NATO-s, dhe që u bë anëtar i Kombeve të Bashkuara vetëm në vitin 2002.

Sekretari i Përgjithshëm i NATO-s, Mark Rutte i ka dhënë të drejtë presidentit amerikan, Donald Trump lidhur me mbrojtjen e Arktikut nga Kina dhe Rusia.

Në një panel në Forumin Ekonomik të Davosit, Rutte u shpreh se Kina dhe Rusia janë gjthnjë e më aktive në Arktik.

“Sigurisht, shoh që ka tensione të tilla për momentin. Nuk ka dyshim. Përsëri, nuk do të komentoj për këtë, por mund t’ju siguroj se e vetmja mënyrë për t’u përballur me këtë është, në fund të fundit, diplomacia e menduar mirë. Pra, deklaratat e mia nuk do të shtojnë asgjë këtu.

Dhe kur bëhet fjalë për Arktikun, mendoj se Presidenti Trump ka të drejtë, udhëheqës të tjerë në NATO kanë të drejtë: ne duhet ta mbrojmë Arktikun. Ne e dimë që rrugët detare po hapen. Ne e dimë që Kina dhe Rusia janë gjithnjë e më aktive në Arktik. Ka tetë vende që kufizohen me Arktikun. Shtatë janë anëtare të NATO-s, këto janë Finlanda dhe Suedia, Norvegjia dhe Danimarka, Islanda, Kanadaja dhe SHBA-ja. Dhe ka vetëm një vend që kufizohet me Arktikun jashtë NATO-s, ajo është Rusia.

Dhe do të argumentoja se ekziston një vend i nëntë, që është Kina, e cila është gjithnjë e më aktive në rajonin e Arktikut. Pra, Presidenti Trump dhe udhëheqës të tjerë kanë të drejtë. Ne duhet të bëjmë më shumë atje. Ne duhet ta mbrojmë Arktikun nga ndikimi rus dhe kinez. Dhe kjo është pikërisht ajo që ambasadorët e NATO-s vendosën të bënin në shtator. Ne po punojmë për këtë, duke u siguruar që, së bashku, do ta mbrojmë rajonin e Arktikut”, theksoi sekretari Rutte.

Sipas Rutte, pa presionin e Trump, shumë ekonomi të mëdha evropiane, përfshirë Spanjën, Italinë dhe Belgjikën, nuk do të arrinin objektivin e shpenzimeve prej dy për qind të GDP-së për mbrojtje në vitin 2025.

Ai përmendi gjithashtu Poloninë si një aleat të ngushtë të SHBA-së dhe vuri në dukje sfidat në prodhimin e pajisjeve ushtarake.

Ndërkaq, presidenti amerikan, Donald Trump mbajti një fjalim në Forumin Ekonomik të Davosit. Trump e nisi me kritika për Europën, ku u shpreh kontinenti i vjetër nuk po shkon në drejtimin e duhur.

Presidenti deklaroi se ka respekt për popujt e Groenlandës dhe Danimarkës, por sipas tij, vetëm SHBA-të mund të garantojnë sigurinë e tyre. Ai theksoi se kërkon negociata të menjëhershme për blerjen e ishullit arktik duke përjashtuar mundësinë e ndërhyrjes ushtarake.

Kreu i PD, Sali Berisha zhvilloi foltoren e radhës në degën nr.2 në Tiranë. Pasi përfundoi fjalën e tij, Berisha u përball me kritika nga demokratët.

Një prej tyre i tha Berishës se PD nuk përfaqësohet nga figura të cilët kanë marrë vota, si Ilir Alimehmeti, i cili edhe pse ishte ndër më të votuarit, nuk u fut në Parlament.

“Politika së pari është përfaqësimi i interesave të grupeve të ndryshme shoqërore dhe kjo bëhet duke kandiduar njerëzit që i përfaqësuar këto interesa. Shoh me kënaqësi, në panel është zonja Tabaku, që u bë deputete falë votave personale në listën e hapur. Në PD ka edhe shumë njerëz të tjerë të aftë, që për mendimin tim, nuk janë vlerësuar mjaftueshëm. Keni zotin Alimehmeti, kni zotin Bardh Spahia, që vjen nga një familje e nderuar. E vetmja mënyrë që të rrimë të bashkuar, është duke vlerësuar këto figura që kanë arritur të fitojnë falë forcave të tyre”, theksoi ai.

Ndërkaq, një tjetër demokrat i vuri në dukje Berishës se me fjalimet që ai mban, kryeministri Edi Rama tallet. Demokrati i kërkoi Berishës të bëjnë greva.

“Për grevat që do bëjmë në datën 24 dhe të ardhmen, duhet një qëndresë. T’i vëmë kokën muhabetit, sa do rrimë, të ndërrohemi. Jo të ikim, të mbajmë fjalim dhe të ikim. Ai ashtu tallen me. Deputetët të shpërndahen, çfarë duhet këtu. Këtu kemi të nevojshëm vetëm Sali Berishën. E vumë një Lul Basha atje, liderin ta vëmë vetë, jo ta caktojmë me gisht“, u shpreh ai.

Një aksident rrugor është regjistruar këtë të mërkurë në Lezhë.

Drejtuesi i një automjeti ka humbur kontrollin e mjetit dhe është përplasur me një shtyllë ndriçimi, duke bërë që automjeti të përmbyset në rrugë.

Mësohet se makina drejtohej nga një i ri, i cili nuk ka pësuar dëmtime si pasojë e përplasjes së fortë.

Në vendngjarje kanë mbërritur shërbimet e policisë, të cilat po kryejnë verifikimet e nevojshme për zbardhjen e shkaqeve të aksidentit. Autoritetet po i nënshtrojnë drejtuesit të mjetit testit të alkoolit për të përcaktuar nëse ai ka qenë nën ndikimin e pijeve alkoolike në momentin e aksidentit.

Fatmirësisht, nga ngjarja nuk ka pasur persona të tjerë të lënduar apo kalimtarë të rastësishëm të përfshirë.

Kryesisht grurë e misër, për të bërë bukë apo makarona… gjatë vitit të shkuar u importuan më shumë se 374 mijë ton drithë. Sasia e drithit të hyrë gjatë 2025-ës u zgjerua me gati 40 mijë tonë në raport me 2024-n.

Zef Gjeta, pedagog për bujqësinë, u shpreh për A2CNN: “Rritja e importeve vjen për shkak të mungesës së prodhimit vendas. Kemi reforma, por jo akte konkrete. Nuk ka financime për bujqësinë”.

Ndryshimet në gjeografinë e tregtisë së jashtme, reduktimi i kostove të transportit dhe forcimi i lekut bënë që çmimi i drithit të importuar të ishte më i ulët. Ndonëse u importuan gati 40 mijë tonë më shumë grurë e misër, vlera e paguar për blerjen e tyre ishte gati e njëjtë me 2024-n, vit në të cilin u shpenzuan rreth 10 miliardë lekë.

Andi Haxhiymeri, administrator i një kompanie bloje, thotë: “Tani, drithi po vjen kryesisht nga Serbia. Më herët vinte nga Rusia e Rumania. Kostot rrjedhimisht janë më të ulëta”.

Pavarësisht se në nivele të papërfillshme, Shqipëria arriti vitin e shkuar të eksportonte 248 tonë drithë me vlerë 28 milionë lekë. Në raport me 2024-n, vit në të cili prodhimi vendas rezultoi i dobët, eksportet gati u dyfishuan.

“Kudo në botë prodhimi i grurit subvencionohet. Në Serbi, Kanada, Francë etj, prodhimi i grurit subvencionohet. Nuk mundet fermeri të marrë përsipër të gjithë procesin, tha Haxhiymeri.

Zef Gjeta tha: “Shteti ynë ka dështuar në drejtim të subvencioneve, ndaj jemi në këtë gjendje ku nuk prodhojmë, por importojmë”.

Përfshirë arat, kopshtet, livadhet, lëndinat, kullotat apo moçalet, në Shqipëri ka rreth 875 mijë hektarë tokë. Nga kjo, hapësira që përmban humus e lëndë minerale, thënë ndryshe toka bujqësore, vlerësohet në gati 700 mijë hektarë.

Por, nga viti në vit, sipërfaqja e mbjellë me grurë, misër, tërshërë, elb apo kultura të tjera bujqësore po rrudhet, ndërsa po zgjerohet hapësira e tokave të djerra.

Një incident ka ndodhur në rrjetin e ujësjellësit të Vlorës sot në 21 janar, duke shkaktuar përmbytje të bulevardit kryesor të qytetit. Gjatë orëve të mbrëmjes së sotme, një avari në sistemin e shpërndarjes së ujit ka çuar në shpërthimin e një tubi me diametër 500 cm, duke derdhur të gjithë ujin nga depozita e qytetit në Bulevardin “Ismail Qemali”. Ngjarja ka ndodhur rreth orës 18:00, pikërisht në kohën kur depozitat e ujit hapen për furnizimin e qytetit.

Si pasojë e presionit të lartë dhe sasive të mëdha të ujit, rruga kryesore e Vlorës është mbushur me ujë, duke shkaktuar vështirësi për qarkullimin e automjeteve dhe këmbësorëve. Pamjet nga vendi i ngjarjes tregojnë ujë të rrëmbyeshëm që ka ‘pushtuar’ trotuaret dhe karrexhatat, duke krijuar një situatë aspak normale për banorët.

Sipas njoftimit zyrtar nga Ndërmarrja e Ujësjellës-Kanalizimeve të Vlorës, çarja e tubit ka ndodhur si pasojë e punimeve që po kryen një firmë private për ndërtimin e një objekti publik pranë zonës. Autoritetet e ujësjellësit kanë bërë të ditur se po ndërhyjnë menjëherë për të vendosur tubin dhe se qyteti nuk do të ketë probleme serioze me furnizimin me ujë, raporton për Klan News, gazetarja Greta Haskaj.

Ngjarja e sotme është vetëm një nga seritë e problemeve të herëpashershme të rrjetit të ujësjellësit të qytetit të Vlorës, duke nxjerrë në pah nevojën për investime dhe mirëmbajtje më të mirë të infrastrukturës kritike.

Qeveria ka miratuar hartën e re të zonave që do të gëzojnë statusin e veçantë për zhvillimin e ekonomisë malore. Përmes tre vendimeve të firmosura nga Kryeministri Edi Rama, janë përcaktuar me koordinata të sakta territoret në Dibër, Tepelenë dhe Memaliaj, ku shteti kërkon të orientojë investimet strategjike.

Sipas vendimeve, në këto zona do të lejohen tri kategori kryesore aktivitetesh: zhvillim ekonomik, industrial dhe turistik.

Dibra, 16 zona zhvillimore

Pjesa më e madhe e hartës së re përqendrohet në veri të vendit. Në Bashkinë e Dibrës janë shpallur plot 16 zona zhvillimore, të cilat përfshijnë disa nga perlat natyrore të rajonit, por edhe zona me potencial bujqësor. Ndër to spikasin bjeshkët e Korabit (mbi 1100 ha), Bjeshkët e Gramës, Hinoskës dhe Zimurit; zona e Lurës dhe Lugina e Lumit Drin (rreth 970 ha); përfshirja e fshatrave karakteristikë si Rabdishti (mbi 1400 ha), i njohur për arkitekturën e gurit, si dhe zona në Selishtë e Luzni.

Fokusi te Kurveleshi dhe Memaliaj

Në jug të vendit, harta e zhvillimit përfshin sipërfaqe masive tokësore. Në Tepelenë, vëmendja kryesore është te zona e Kurveleshit (rreth 9600 ha) dhe zona e Qendër-Tepelenë, e cila kap një sipërfaqe prej mbi 19 mijë hektarësh. Këto zona pritet të shfrytëzohen kryesisht për agroturizëm dhe blegtori intensive.

Në Memaliaj, zonat prioritare përfshijnë Njësinë Administrative Buz (gati 6000 ha) dhe fshatrat e thellë si Arrëz e Madhe apo Rabie, të cilat prej vitesh vuajnë nga shpopullimi dhe mungesa e investimeve.

Çfarë do të thotë ky status?

Shpallja “Zonë me përparësi zhvillimin e ekonomisë malore” u hap rrugë zbatimit të lehtësirave që parashikon “Paketa e Maleve”. Kjo do të thotë se bizneset që do të ndërtojnë hotele, fabrika përpunimi apo njësi agroturistike në këto koordinata specifike, pritet të përfitojnë nga skema mbështetëse, reduktim taksash ose grante, me qëllim gjallërimin e jetës ekonomike në këto territore të vështira.

Vendimet hyjnë në fuqi menjëherë pas botimit në Fletoren Zyrtare dhe zbatimi i tyre do të monitorohet nga Ministria e Ekonomisë dhe Inovacionit në bashkëpunim me kadastrën.