Dashi

Nuk do jeni aspak ne humorin e duhur gjate kësaj dite dhe do përballeni me debate te forta me atë qe keni ne krah. Asgjë nuk do shkoje si e kishit menduar. Beqaret do hezitojnë paksa te takohen me dike, por ne fund do ju mbushet mendja plotësisht. Sektori i financave do iu nënshtrohet ndryshimeve rrënjësore. Gjendja do jete shume e mire se disa dite me pare.

Demi

Dite romantike kjo e sotmja për te gjithë ata qe janë ne një lidhje. Do dashuroheni ashtu si ta ndjeni me partnerin tuaj. Për beqaret nuk do ketë asnjë surprize, kështu qe serish do mbeten vetëm. Duhet te persin akoma edhe pak për te ndryshuar statusin. Financat do jene shume te çekuilibruara. Ndalni menjëherë çdo lloj shpenzimi sepse nuk e merrni dot me mend çfarë problemesh mund t’iu dalin.

Binjaket

Ëndrrat me te bukura te dashurisë do ju realizohen gjate kësaj dite. partneri do jete gati madje t’iu beje edhe disa premtime për te ardhmen. Beqaret do ndihen keq nga vetmia dhe mund te bëjnë ndonjë marrëzi. Kujdes! Ne planin financiar do kaloni sfida goxha te vështira, megjithatë me pak mund dhe përkujdes do mund t’ia dilni mbanë.

Gaforrja

Do jeni shume te kthjellet sot pe rate qe doni te bëni ne jetën sentimentale. Do flisni hapur me partnerin dhe ai do jete i gatshëm t’ua plotësojë dëshirat. Beqaret do jene me fat dhe do njihen me persona shume te veçante. Mos i lini këto mundësi t’iu shpëtojnë nga duart. Ne planin financiar do jeni te detyruar te merrni para hua ne mënyrë qe t’ia dilni.

Luani

Dite plot diell dhe ngjyra ko e sotmja për te dashuruarit. Do ja kaloni shume mire me atë qe keni ne krah dhe nuk do doni te ndaheni për asnjë çast. Beqaret do kenë shume ndryshime ne jetën sentimentale kështu qe duhet te bëhen gati. Financat nuk do jene ne gjendje te mire dhe kjo për shkak te shume shpenzimeve qe do ju duhet patjetër te kryeni.

Virgjeresha

Asnjë planet nuk do ndikoje drejtpërdrejt tek jeta juaj ne çift sot, prandaj gjerat do ecin me se miri. Do bëni çfarë te mundeni qe zjarri i pasionit te mos shuhet asnjë çast. Beqaret nuk do kenë asnjë takim mbresëlënës, por as nuk do mërziten qe do mbeten vetëm. Financat do jene te qëndrueshme. Mundohuni ta mbani për një kohe sa me te gjate këtë situate.

Peshorja

Marrëdhënia ne çift nuk do jete e keqe, përkundrazi do kaloni me tepër kohe pranë tij dhe do dashuroheni pa dorashka. Beqaret nuk duhet te joshin çdo person qe do ju dale para syve sepse mund te përballen me te papritura aspak te këndshme. Ne planin financiar tregohuni te arsyeshëm dhe largpamës. Po shpenzuat vetëm për t’ia plotësuar qejfin vetes, do vuani me vone.

Akrepi

Për çdo gjë do diskutoni gjere e gjate me partnerin tuaj sot. Lidhja juaj do jete aq e forte saqë askush nuk do munde dot ta prishe harmoninë. Beqaret do dashurohen pas një personi shume ndryshe nga ata, por qe kur te jete pranë do ndryshoje tërësisht. Situata financiare do jete goxha delikate dhe me vështirësi mund t’iu gjeni zgjidhje problemeve.

Shigjetari

Gjykojini mire gjerat sot para se te merrni vendime për jetën tuaj sentimentale. Po bëtë ndonjë gabim sado te vogël do i vuani pasojat me vone. Beqaret me ne fund do fillojnë një histori dashurie te qëndrueshme. Ne planin financiar duhet te tregoheni vigjilente. Po e kaluat me sukses ketë dite nuk do keni aspak probleme ne te ardhmen.

Bricjapi

Deri ne fund te ditës nuk duhet ta humbni shpresën se gjerat do përmirësohen mes jush dhe atij qe keni ne krah. Duhet vetëm pak durim dhe tolerance. Beqaret do kenë mundësi për te filluar një lidhje shume te bukur me një person qe do e njohin rishtazi. Situata financiare do vije duke u konsoliduar. Kjo do ju lejoje te kryeni edhe ndonjë shpenzim me tepër.

Ujori

Planetët do jene te pozicionuar mire sot ne jetën tuaj sentimentale. Do merrni vesh me partnerin dhe se bashku do mendoni te krijoni një te ardhme te lumtur. Beqaret do i mendojnë gjerat ne detaje prandaj nuk do kenë as guxim te fillojnë një lidhje. Financiarisht Merkuri do ju mbështesë. Gjendja do jete shume me e qëndrueshme sesa me pare.

Peshqit

Monotonia do mbizotërojë sot gjate gjithë ditës dhe ju nuk do përjetoni aspak emocionet qe aq shume keni pritur. Mundohuni me çdo mjet qe ta ndryshoni sa me pare gjendjen. Beqaret do kenë dashuri me shikim te pare ne orët e mesditës. Dite e ekuilibruar për financat. Do e dini mire sa te shpenzoni ne mënyrë qe t’iu mbeten para edhe për t’i hequr mënjanë.

Izet Shulku njihet si Tarzani i Dibrës. Videot e tij teksa futet në ujërat me akull, apo “noton” në dëborë janë bërë prej kohësh virale në rrjet. Ai jo vetëm i sfidon, por bashkëjeton me temperaturat e ulëta. “Këtu është -7, -8 gradë Celsius. Por për mua është totalisht një ambient i natyrshëm, temperatura optimale”, thotë ai në një intervistë për “Dita jonë” në A2 CNN.

Izeti tregon se është mësuar të përballojë të ftohtin në fillim të viteve 1990, kur jetonte në Greqi. “I binim malit tri herë përdhe, futeshim nëpër lumenj, nëpër borë, nëpër të ftohtë. Na është bërë kronike. Tani nuk presim tjetër veçse të bjerë borë që të futemi të zhytur në ujë me akull dhe në borë”, tregon ai.

Sa herë që hedh video në rrjetet sociale duke u zhytur në borë apo në akull, njerëzit kanë pafund komente për “Tarzanin”. E komplimentojnë dhe i thonë që është më i forti. “Unë hedh çdo ditë, çdo muaj video të reja. Më kanë parë që nuk i kam lënë pas dore aktivitetet fizike. Vrapoj çdo ditë, sot kam bërë 10 km. Nuk pres që të bjerë borë. Nëse s’ka borë këtu, ngjitem në male”.

Ai tregon se në asnjë moment nuk ka pasur probleme nga ky aktivitet. “Përkundrazi, sa më shumë zhytet trupi në ujë me akull, aq më shumë nxehet dhe merr energji pozitive”, tregon ai teksa zhytet “live” në borë. “Nuk e di çfarë është gripi. Nuk më ka zënë asnjëherë. Njerëzit nuk e kanë kuptuar ende çfarë energjie jep mali, uji, bora. Unë kam bërë shumë njerëz për vete që dalin nëpër male.

“Tarzani” shpjegon se nuk bën asnjëherë dush me ujë të ngrohtë. “Absolutisht jo. Dimër-verë vetëm ujë i ftohtë. Kemi llixhat e nxehta, por aty pranë është burimi i ujit të ftohtë. Shkojnë shumë turistë, sepse u ka bërë mirë për dhimbje kockash, gjunjësh, reumatizma. Trupi rigjenerohet totalisht”, thotë ai, përcjell A2 CNN.

Izeti tregon se në këtë stil jetese ka përfshirë edhe familjen. “Marr nusen, djalin, vajzën. Vajza studion në Tiranë dhe edhe atje del në natyrë. Është bërë sport familjar, shi, borë, çdo gjë. Akoma s’e kemi ndezur sobën. Natën ka qenë -15, mbrëmja -13, sot rreth -8”.

Ambasadorja e Shteteve të Bashkuara në Maqedoninë e Veriut, Angela Aggeler, dhe ambasadorja në Malin e Zi, Karen Reinke, kanë përfunduar mandatet e tyre, duke lënë pas një trashëgimi të bashkëpunimit të ngushtë dhe partneritetit të fortë mes dy vendeve dhe SHBA-ve.

Gjatë takimit të saj lamtumirës me Ministrin e Punëve të Jashtme të Maqedonisë së Veriut, Timco Mucunski, Ambasadorja Aggeler theksoi rëndësinë e rolit të vendit si një partner i besueshëm në avancimin e marrëdhënieve ekonomike, rritjen e shpenzimeve për mbrojtjen dhe bashkëpunimin mbi prioritetet e përbashkëta.

Ndërkohë, ambasadorja Reinke zhvilloi takime lamtumire me udhëheqësit më të lartë të Malit të Zi, duke përfshirë Presidentin Jakov Milatović dhe Zëvendëskryeministrat Ervin Ibrahimović, Filip Ivanović dhe Nik Gjeloshajn. Ajo theksoi partneritetin e ngushtë mes dy vendeve dhe SHBA-së gjatë mandatit të saj.

“Ambasadorja Reinke zhvilloi takime lamtumire me Presidentin Jakov Milatović dhe Zëvendëskryeministrat Ervin Ibrahimović, Filip Ivanović dhe Nik Gjeloshaj, teksa përfundon mandatit e saj në Malin e Zi, duke theksuar partneritetin e forte mes SHBA-ve dhe Malit të Zi”, thuhet në postimin e ambasadës amerikane në Podgoricë.

Nga Eduard Zaloshnja

Në sondazhin e fundit ‘Zëri i Shqiptarëve’, më rezultoi se po të ishin zhvilluar dje zgjedhje të parakohëshme, PD-ja do të merrte brenda vendit vetëm treçerekun e votave që mori në zgjedhjet e majit 2025, ndërsa PS-ja do të merrte 5/6 e votave që mori në ato zgjedhje brenda vendit.

Thënë ndryshe, PD-ja do të merrte brenda vendit vetëm 58 vota për çdo 100 vota të PS-së, ndërkohë që para tetë muajsh mori plot 66 vota për çdo 100 vota të PS-së (shihni grafikun e mëposhtëm). Si rezultat, PD-ja nuk do të siguronte dot as 50 mandatet parlamentare që ka aktualisht…

Më dramatike situata ishte për partitë e vogla. Dje ato do të merrnin brenda vendit vetëm 1/3 e votave që morën në zgjedhjet e majit 2025.

Thënë ndryshe, partitë e vogla do të merrnin brenda vendit vetëm 11 vota për çdo 100 vota të PS-së, ndërkohë që para tetë muajsh morën plot 26 vota për çdo 100 vota të PS-së.

Si rezultat, partitë e vogla nuk do të siguronin dot as mandatet e pakta parlamentare që kanë aktualisht (ndoshta vetëm ‘Lëvizja Bashkë’ e Qorit dhe PSD e Doshit, të cilat kanë elektorat të qendrueshëm, do të arrinin të rifuteshin në Kuvend).

David Petraeus, i njohur për eksperiencën e tij në Lindjen e Mesme, thotë se “Irani nuk ka qenë kurrë kaq i dobët si tani”. Sipas ish-drejtorit të CIA-s, kjo nuk do të thotë se një ndërhyrje ushtarake amerikane do të rrëzonte regjimin, por nëse presidenti amerikan Donald Trump nuk vepron pas vendosjes së linjave të tij të kuqe, mund të ketë pasoja shumë negative.

Më poshtë, intervista e tij për Corriere Della Sera

“Janë pa precedent. Ka pasur protesta edhe më parë, por këto duket se janë më të rëndësishmet në dekadat e fundit. Nuk do të thotë që ka një mundësi të qartë për rrëzimin e regjimit, sidomos sepse nuk duket se ka një organizim prapa tyre. Por janë më të rëndësishmet që mbaj mend së fundmi.”

Nga vjen ky vlerësim?

“Nga numri i protestuesve dhe, sidomos, nga represioni i tmerrshëm i forcave më brutale të regjimit. Flitet për 500-600 viktima, por kam dëgjuar edhe shifra që flasin për mijëra.”

Pse është kaq e fortë protesta këtë herë?

“Përveç problemeve të njohura politike dhe të drejtave të njeriut, protestat tregojnë dështimin pa precedent të shtetit iranian. Me ekonomi në krizë, inflacion, papunësi dhe mundësi të pakta në një vend ku të gjithë duhet të jetojnë mirë, qeveria e korruptuar dhe jo kompetente ka dështuar.”

Kjo e bën regjimin më të dobët se kurrë?

“Së fundmi ka pasur një degradim të jashtëzakonshëm të kapaciteteve mbrojtëse të Iranit, humbjen e aleatëve si Assad në Siri dhe të agjentëve që vepronin në rajon në emër të tij. Teherani është në një nga nivelet më të ulëta të historisë së tij. Ka disa nga rezervat më të mëdha të naftës dhe gazit, por nuk mund të sigurojë as energji elektrike për qytetarët. Populli është i lodhur dhe po flet. Kjo nuk do të thotë se regjimi nuk mund të mbijetojë, por rrëzimi i tij nuk është skenari bazë.”

Trump po mendon për ndërhyrje ushtarake. Cilat mund të jenë objektivat?

“Ka shumë opsione: ndihmë humanitare, iniciativa diplomatike si deklaratat e Këshillit të Sigurimit të OKB-së, G7 dhe Këshillit të Bashkëpunimit të Gjirit Persik. Mund të ketë sanksione, mbështetje për informimin e qytetarëve dhe operacione të inteligjencës. Më pas, veprime ushtarake të ndryshme: bllokada detare, goditje ndaj sektorit energjetik, bazave të milicisë Basij, ministrive, policisë dhe Gardës Revolucionare. Mund të goditen edhe kapacitetet raketore që mund të kërcënojnë bazat amerikane dhe izraelite.”

Një sulm i mirëfilltë mund të rrëzojë regjimin?

“Do të ishte e vështirë. Po flasim për forca masive: miliona njerëz në Gardën Revolucionare, Basij, ushtri, marinë dhe avionë. Mund të dëmtohen kapacitetet, por rrëzimi është i komplikuar, sepse këto aparate kanë interes direkt të mbajnë regjimin në fuqi dhe janë të përfshira thellë në institucionet dhe shoqërinë iraniane. Nuk është si në Egjipt kur ra Mubarak-u.”

A mund t’i shfrytëzojnë protestuesit sulmet amerikane?

“Nuk ka një opozitë të organizuar. Djali i Shahut, Reza Pahlavi, thotë se dëshiron të kthehet dhe inkurajon popullin, por nuk dihet nëse ka forcën dhe numrat që e ndihmuan Khamenei-n të vinte në pushtet.”

Trump tha se regjimi i Teheranit dëshiron të negociojë. Çfarë mendoni?

“Është një lojë për të fituar kohë dhe për të bindur SHBA-të të mos sulmojnë. Këto sinjale duhen pranuar, por nuk duhet ndjekur ndërkohë që regjimi po masakron qytetarët.”

Do të thotë që ndërhyrja është e pashmangshme?

“Pyetja është sa e gjerë do të jetë. Ka edhe elementin e linjës së kuqe të presidentit. Kur nuk kemi vepruar më parë në situata të ngjashme, si me Obamën pas përdorimit të armëve kimike në Siri, ose tërheqja nga Afganistani, kjo ka dobësuar fuqinë tonë të frikësimit. Kjo, sipas meje, ka ndikuar që Putin të sulmojë dhe më pas të pushtojë Ukrainën. Prandaj Trump nuk mund të qëndrojë i heshtur.”

Durana Tech Park, parku i parë teknologjik dhe shkencor në Shqipëri, ka nisur operimin si një qendër për zhvillimin e teknologjisë dhe shkencës në vend, duke ofruar mundësi për startup-et dhe bizneset inovative.

Sipas drejtoreshës së Durana Tech Park, Florenca Haxhi, në fazën fillestare, Durana Tech Park operon 100% virtualisht, ndërkohë që pas përfundimit të ndërtimit të infrastrukturës fizike, do të kalojë në një model hibrid.

Ky model i operimit kombinon elementet virtuale me ato fizike dhe është krijuar për të përmbushur kërkesat dhe nevojat e rezidentëve të parkut për hapësira fizike të specializuara.

Haxhi shprehet se kjo metodë është frymëzuar nga praktikat më të mira të parqeve teknologjike ndërkombëtare dhe siguron që investimi i qeverisë për parkun të jetë në përputhje me kërkesat e zhvillimit global të teknologjisë dhe inovacionit.

“Në fillim parku operon 100% virtualisht dhe më pas, me ndërtimin e parkut fizik do të operojë në mënyrë hibride. Kjo mënyrë operimi është bazuar në shumë modele të tjera që ekzistojnë në botë dhe siguron që investimi i kryer nga qeveria për parkun të jetë në koherencë të plotë me kërkesat dhe nevojat që kanë rezidentët e parkut për hapësirat fizike në park”, deklaroi Haxhi.

Durana Tech Park ka si qëllim të bëhet një pikë kyçe për mbështetje dhe zhvillim të sektorëve të teknologjisë dhe inovacionit në Shqipëri, duke krijuar mundësi për rritjen e aftësive teknologjike dhe zhvillimin e një ekosistemi të qëndrueshëm për bizneset e reja dhe startup-et.

Ky park operon në bazë të ligjit “Për krijimin, organizimin dhe funksionimin e parqeve teknologjike dhe shkencore”, të vitit 2022 dhe akteve nënligjore të cilat janë miratuar gjatë viteve 2024-2025.

Nga Redi Shtino

Sa më shumë i largohemi dhe e kontrollojmë në forma e mënyra të paimagjinueshme më parë, aq më shumë duket sikur harrojmë forcën e saj krijuese/ekstreme, që rishfaqet në mënyrë pothuajse ciklike, me të njëjtën madhështi/superioritet.

E certifikojnë ndryshimet klimatike, në nivel planetar.

E certifikon këtë rritja eksponenciale e rasteve të alergjive dhe depresionit, po në nivel planetar. Sëmundjet e mijëvjeçarit të tretë.

E për të mbetur në temën e depresionit, sigurisht që moti tek personat fotosensibël dhe jo vetëm, ka influencë decisive në frekuencën e përfshirjes në fazat depresive. Besoj se janë pak personat që nuk kanë njohur shijen, ndër ata që po lexojnë këto rreshta.

Me pak fjalë ky mot e këto reshje, na e kanë rifreskuar të gjithëve, kujt më shumë e kujt më pak. Përjashtoj këtu personat dhe familjet që gjenden të përmbytur.

Tërësisht tjetër histori.

Ndër këto tone/nota të veshura me ngjyrën e motit të këtij fillim viti e ndër faqet e ndryshme të mediave sociale ndesha në një koment, në FB, të Taulant Mukës.

Fajësonte dikë dhe disa, për nivelin e ulët/inekzistent të Universiteteve dhe Diplomave në vend si shkaktarë të situatës së krijuar me përmbytjet.

Më ktheu automatikisht back në vitet kur punohej për reformimin e sistemit të kërkimit shkencor. Vitet 2017-2018 dhe po me të njëjtën shpejtësi në përmbytjet e fundit të ndodhura jo shumë muaj më parë në Francë, Zvicër dhe Italinë e Veriut.

Mbaj mend që disa diskutime teknike fundore që lidheshin me reshjet dhe aftësitë organizuese të përballimit të tyre kishin si pikë referimi kyçe dhe konstante, sasinë e reshjeve për orë. Pra sasinë e kondensimit dhe derdhjes së reshjeve për njësi matëse kohore. Në qoftë se deti ngrihet dhe derdhet nëpërmjet qiellit mbi qytetet tona, askush normalisht nuk ngre hipoteza paraprake përgjegjësie, por llogjikon në kufijtë e fatkeqësisë natyrore, siç konsiderohen tërmetet, vullkanet e të tjera.

Të tilla janë fenomenet ekstreme të ndryshimeve klimatike sot.

Më erdhi instinktivisht të pyes Mukën, se si njeri i shkencës që është duhet t’i dispononte këto të dhëna teknike/specifike duke qenë se njerëzit e shkencës flasin me evidenca materiale dhe jo hipoteza eventuale, por nuk nxitova dhe kërkova të kuptoj paraprakisht evidencat e tij mbi lidhjen e situatës me nivelin universitar dhe të diplomave përkatëse. Duke shpresuar se e njoh mjaftueshëm situatën universitare në vend, kërkova të kuptoj më shumë lidhur me atë të vendeve të sipërpërmendura. Çfarë mund të kishte ndodhur vallë me Zvicrën, Francën dhe Italinë, vitet e fundit, në nivel universitar, që ndodhin përmbytje të tilla. Çfarë ka ndodhur që vitet e fundit këto fenomene janë kthyer me një frekuencë kaq të lartë?

Përgjigjja është po aq frekuente në të gjitha mediat sociale dhe tradicionale të këtyre vendeve, por mungon diçka.

Në asnjërën prej tyre nuk gjeta dikë që të fajësojë për këtë sistemin universitar apo cilësinë e diplomave të lëshuara, sepse po të ishte kaq e thjeshtë nuk do bëheshin samite, kongrese e konferenca pafund, në nivel global, për t’u përballur me impaktin e ndryshimeve klimatike në planet.

Kujt i duket normal kontrasti ekstrem ndërmjet dimrave super të thatë të viteve të fundit dhe reshjeve të këtij viti.

Përgjigjen sigurisht nuk e pres nga Muka që duhet ta lexojë dikush që të mund të tjerrë pëlhurën e tij penelopiane e që po merr gjithnjë e më shumë trajtat e Ahmetes me fantashkencën e ngjyrave dhe formave të ylberit.

Përgjigjen do ua kërkoj me shkrim Universiteteve publike e private të këtyre vendeve, që çojnë dëm fondet publike e nuk gjejnë zgjidhje për përmbytjet që i përfshijnë, kaq shpesh.

Me rastin e 113-vjetorit të krijimit të Policisë së Shtetit, Drejtori i Përgjithshëm i Policisë së Shtetit Ilir Proda, së bashku me Zëvendësministrin e Brendshëm, Xhemal Qefalia dhe me familjarë të Dëshmorëve të Policisë, vendosën kurora me lule, në memorialin përkujtimor të Dëshmorëve të Policisë së Shtetit, të rënë në krye ose për shkak të detyrës.

Proda shprehu mirënjohjen e pakufishme dhe ndërimet më të larta, për veprën e Dëshmorëve të Policisë së Shtetit, njëkohësisht Dëshmorë të Atdheut, gjaku i të cilëve qëndron në flamurin kombëtar dhe në themelet e kombit.

Në fjalën e tij gjatë ceremonisë, Proda deklaroi se sakrifica sublime dhe emir I çdo polici të rënë në krye të detyrës janë motive të forta për atë Policinë e Shtetit që të ruajë simbolin kombëtar, jetën dhe pronën e çdo qytetari.

“Sakrifica sublime dhe emri i secilit prej ish-kolegëve të rënë gjatë përballjes me krimin, janë motive të forta pse Policia e Shtetit është sot më e angazhuar se kurrë, për t’i ruajtur të denja simbolin kombëtar, jetën dhe pronën e çdo qytetari. Lavdi veprës dhe sakrificës së Dëshmorëve të Policisë së Shtetit!

I përjetshëm kujtimi i heronjve tanë”, deklaroi Proda.

Çarja e argjinaturës së lumit Seman në disa segmente ka shkaktuar përmbytje të rënda në fshatin Hasturkas, në njësinë administrative Libofshë, duke vënë nën ujë qindra hektarë tokë bujqësore dhe rreth 20 banesa. Situata është përkeqësuar gjatë natës, kur niveli i ujit ka vijuar të rritet, duke detyruar banorët të qëndrojnë në gatishmëri të plotë mes frikës dhe pasigurisë.

Përgjatë gjithë natës janë evakuuar 9 persona, të cilët janë strehuar tek të afërmit e tyre, ndërsa disa familje shprehen të shqetësuara për fatin e njerëzve të tyre me të cilët kanë humbur kontaktet për shkak të izolimit të zonës nga uji. Banorët tregojnë se përmbytja ka ardhur papritur, duke mos u lënë kohë të shpëtojnë orenditë shtëpiake apo bagëtitë.

Në zonë kanë mbërritur forcat e ushtrisë, të cilat po operojnë me varka, veçanërisht pranë zonës detare dhe stallave të bagëtive, për të evakuuar jo vetëm çobanët, por edhe krerët e bagëtive të mbetura të rrezikuara nga uji. Operacioni i evakuimit po zhvillohet në kushte të vështira, ndërsa prurjet e lumit vijojnë të mbeten të larta.

Banorët e Hasturkasit fajësojnë njëzëri institucionet përgjegjëse për mosmarrjen e masave në kohë, duke theksuar se argjinatura e Semanit ka qenë prej vitesh e amortizuar dhe problematike, pa ndërhyrje serioze për forcimin e saj. Sipas tyre, kjo situatë ishte e paralajmëruar dhe mund të ishte shmangur me investime parandaluese.

Ndërkohë, autoritetet lokale janë në terren për vlerësimin e dëmeve, ndërsa pritet që në orët në vijim të ketë një bilanc më të qartë të situatës dhe të pasojave që përmbytja ka lënë pas, si në bujqësi ashtu edhe në banesa.

Një tërmet me magnitudë mes 4 dhe 4.5 është regjistruar rreth orës 9:30 në provincën Forlì-Cesena. Pas disa minutash, një tjetër lëkundje me magnitudë mes 3.7 dhe 4.2 ka goditur zonën e Ravenës teksa banorët kanë dalë të frikësuar në rrugë.

Vlerësimet provizore u bënë nga Instituti Kombëtar i Gjeofizikës dhe Vullkanologjisë (INGV).

Në disa zona të qytetit të Forlìt, banorët kanë dalë në rrugë të frikësuar pas lëkundjeve.

Tërmeti është ndjerë në të gjithë rajonin e Romagnës. Për momentin raportohet frikë e madhe mes popullatës, por nuk ka njoftime për dëme.

Duket se Uashingtoni i ka rikthyer në agjendë veprimet ushtarake kundër Iranit, në një kohë kur po ndodh një shtypje gjithnjë e më vdekjeprurëse ndaj protestuesve në qytete dhe qyteza në të gjithë vendin.

Raporte të pakonfirmuara thonë se më shumë se 500 njerëz janë vrarë – edhe pse disa grupe për të drejtat e njeriut thonë se numri i viktimave mund të jetë disa herë më i lartë – gjatë shtypjes së kryengritjes.

Protestat e javëve të fundit janë shndërruar në njërën prej sfidave më të mëdha ndaj sundimit klerikal që nga Revolucioni Islamik i vitit 1979, përcjell A2.

Demonstratat u nxitën nga inflacioni i madh dhe rënia e shpejtë e monedhës kombëtare, por më pas u shndërruan në një protestë më të gjerë kundër autoriteteve të vendit.

Uashingtoni, por edhe Teherani kanë lënë të kuptohet se janë të hapur për bisedime. Por, presidenti amerikan, Donald Trump, ka thënë se SHBA-ja mund të ndërmarrë veprime gjithsesi, duke pasur parasysh raportet për veprime brutale kundër protestuesve.

“Ne mund të takohemi me ta. Një takim po organizohet, por mund të na duhet të veprojmë për shkak të asaj që po ndodh para takimit”, u tha Trump gazetarëve në bordin e avionit të Forcës Ajrore më 11 janar.

Ministri i Jashtëm i Iranit, Abbas Araqchi, tha më 12 janar: “Republika Islamike e Iranit nuk po kërkon luftë, por është plotësisht e përgatitur për luftë”.

Pra, cilat janë opsionet e Uashingtonit nëse diplomacia dështon?

Sulme të kufizuara

Nga ana pozitive, sulmet e kufizuara ndaj objektivave simbolike do të përfshinin më pak rrezik për Forcat e Armatosura Amerikane dhe për goditjen e civilëve.

Ato gjithashtu do të kryheshin më lehtë brenda kapaciteteve ushtarake të SHBA-së në rajon dhe përtej tij, dhe teorikisht mund të kryheshin pa përfshirjen e aleatëve të SHBA-së në Gjirin Persik.

Disa analistë kanë thënë se ky opsion ka disa mangësi, kryesisht sepse i mundëson regjimit të mobilizojë mbështetje patriotike dhe të largojë vëmendjen nga ankesat që ushqejnë demonstratat mbarëkombëtare, duke shkaktuar njëkohësisht pak dëme reale.

Gjithashtu, mund t’u dërgojë shenjë protestuesve se Uashingtoni nuk po iu del në ndihmë tyre kur po vriten dhe po arrestohen nga forcat iraniane të sigurisë.

Një shembull i një caku të tillë do të ishte një strukturë si kazermat e policisë, të paramilitarëve Basij ose të Gardës Revolucionare Islamike (IRGC).

Një fushatë e qëndrueshme

Një fushatë më e bashkërenduar sulmesh kundër IRGC-së do të mundë të kishte më shumë ndikim, veçanërisht nëse do të zgjerohej dhe do të përfshinte sulme ndaj objekteve raketore iraniane, komandës dhe kontrollit, si dhe forcave të tjera të sigurisë.

Një problem është se forcat detare amerikane aktualisht nuk ndodhen në rajon në numër dhe kapacitet të mjaftueshëm. Aeroplanmbajtësja më e afërt, USS Abraham Lincoln, ndodhet aktualisht në Detin e Kinës Jugore, ku po kryen stërvitje me municion të vërtetë. Ajo është disa ditë lundrim larg Gjirit Persik.

Forcat amerikane kanë baza ushtarake në rajon, në vende si Kuvajti, Emiratet e Bashkuara Arabe dhe Katari. Por, këto vende, sipas raportimeve, i kanë kërkuar Uashingtonit të mos ndërmarrë veprime ushtarake.

Shumëkush do të ishte i shqetësuar nga ndonjë kundërsulm iranian. Gjatë luftës 12-ditore në qershor, kur Izraeli dhe Shtetet e Bashkuara goditën programin bërthamor të Iranit, një sulm raketor iranian ndaj një baze ajrore në Katar shkaktoi shqetësim të madh.

Ai sulm ishte kryesisht simbolik, por Irani ka kërcënuar me hakmarrje ndaj çfarëdo sulmi të ri amerikan dhe këtë herë hakmarrja mund të jetë më e fortë. Eksportet e lëndëve djegëse fosile të aleatëve të SHBA-së në Gjirin Persik, që kalojnë përmes Ngushticës së Hormuzit, mund të ndërpriten. Edhe Izraeli mund të sulmohet, duke ngritur rrezikun e një konflikti më të gjerë rajonal.

“Gjendja e tanishme për Republikën Islamike është ekzistenciale. Kjo është një betejë… që synon drejtpërdrejt vetë natyrën dhe thelbin e regjimit”, tha për Radion Farda të Radios Evropa e Lirë Ali Mamouri, hulumtues në Universitetin Deakin në Australi.

“Nëse sulmohet, pothuajse me siguri do të kundërpërgjigjet me të gjitha kapacitetet që ka në dispozicion”, tha ai.

Forcat speciale, atentati

Pas rrëzimit të udhëheqësit të Venezuelës, Nicolas Maduro, a është lideri suprem i Iranit, Ali Khamenei, i radhës në listë e arrestimit nga forcat speciale amerikane?

Një operacion i tillë duket i pamundur. Forcat amerikane ishin të grumbulluara rreth Venezuelës në numër shumë më të madh dhe u ndihmuan gjithashtu nga burime inteligjence brenda regjimit, sipas raportimeve.

Një tjetër skenar mund të ishte atentati, duke e rrëzuar regjimin dhe duke nxitur një luftë për pushtet brenda Iranit. Kjo do të varej shumë nga të dhënat e shkëlqyera të inteligjencës.

Mangësi kryesore këtu do të ishte se rezultati është i paparashikueshëm dhe mund të çojë në kaos dhe gjakderdhje më të madhe. Megjithatë, një regjim i ri, madje edhe një i udhëhequr nga IRGC-ja, mund të jetë i gatshëm të bashkëpunojë me Uashingtonin.

“Mendoj se kjo është e mundshme”, tha për Radion Farda më 6 janar Michael Rubin, ish-zyrtar i Pentagonit dhe hulumtues i lartë në Institutin Amerikan të Ndërmarrjeve me seli në Uashington.

Bllokada, sulme kibernetike, armë zanore

Trump ka edhe opsione të tjera mbi tavolinën e tij në Zyrën Ovale.

“Është mjaft e mundshme që po shqyrtohen edhe opsione joushtarake. Këto mund të përfshijnë një bllokadë të plotë ekonomike ndaj Iranit për të parandaluar eksportet e tij të naftës drejt Kinës ose sulme kibernetike që ndërpresin sistemet e komunikimit dhe vendimmarrjes të agjencive iraniane të sigurisë”, i tha Radios Farda Ali Vaez, drejtor i projektit për Iranin në Grupin Ndërkombëtar të Krizave.

Sulmet kibernetike kanë ndodhur edhe më parë.

Në vitin 2021, stacionet e karburantit në Iran u vunë në shënjestër të një sulmi kibernetik, për të cilin Irani fajësoi Shtetet e Bashkuara dhe Izraelin pa paraqitur prova.

Sulme të ngjashme kanë ndodhur edhe më vonë.

Në vitin 2019, Irani pretendoi se kishte zbuluar një rrjet spiunazhi të CIA-s pas një sulmi kibernetik ndaj sistemeve të armëve. Mediat amerikane në atë kohë raportuan se ishte një sulm amerikan, duke cituar zyrtarë qeveritarë anonimë.

Mund të ketë gjithashtu opsione për sulme më pak konvencionale.

Pas operacionit amerikan në Venezuelë, zëdhënësja e Shtëpisë së Bardhë, Karoline Leavitt, shpërndau komente që pretendohet se janë bërë nga një person që i mbijetoi një sulmi me armë zanore.

“Ishte si një valë zanore jashtëzakonisht e fortë. Papritur ndjeva sikur koka po më shpërthente nga brenda. Të gjithëve na filloi gjakderdhja nga hunda. Disa po villnin gjak. Ramë përtokë, të paaftë për të lëvizur”, citohej të ketë thënë ai.

Megjithatë, ky raport nuk është konfirmuar në mënyrë të pavarur apo zyrtare.

Indrit Hoxha është thirrur në Prokurorinë e Posaçme Antikorrupsion.

Mësohet se Hoxha është thirrur në SPAK për shkak të financimit të Kuvendit të Rithemelimit.

Kuvendi i Rithemelimit u zhvillua në vitin 2021, i iniciuar nga ish-kryeministri Sali Berisha, në atë kohë demokratët ishin në konflikt për vulën dhe logon e PD, pasi kjo e fundit drejtohej nga Lulzim Basha.

Dyshohet se për të njëjtën çështje është pyetur dje edhe demokrati Belind Këlliçi.

UNESCO ka propozuar një projekt të posaçëm për mbrojtjen e shkrimit me dorë, i cili po rrezikohet gjithnjë e më shumë nga dominimi i shkrimit digjital dhe përdorimi masiv i tastierave dhe ekraneve.

Ekspertët theksojnë se shkrimi tradicional me dorë nuk është vetëm një aftësi e fituar, por një element thelbësor antropologjik në zhvillimin njerëzor. Megjithatë, me përhapjen e teknologjisë, kjo praktikë po zëvendësohet gradualisht nga shkrimi digjital, ndërsa mësimdhënia e bukurshkrimit ka humbur rëndësinë e saj në shumë sisteme arsimore.

Mësuesja e ciklit fillor, Mimoza Xhindi, shprehet se teknologjia ka ndikuar ndjeshëm në rënien e cilësisë së shkrimit te fëmijët.

“Ka humbur sensi i shkrimit të bukur. Dikur bënim diktim çdo ditë nga klasa e parë deri në të pestën. Sot fëmijët po humbasin sensin e formimit të duhur në shkollë. Mësuesit duhet të paktën 10 minuta në ditë t’u kushtojnë bukurshkrimit, sepse shkrimi tregon identitetin dhe kulturën njerëzore”, thotë ajo.

Sipas saj, projekti i UNESCO-s është një hap i domosdoshëm për ruajtjen e shkrimit me dorë, duke theksuar se teknologjia ofron informacion, por nuk e zëvendëson procesin e të menduarit dhe formimit përmes shkrimit tradicional.

Edhe mësuesja tjetër e ciklit fillor, Entela Bicja, nënvizon rëndësinë e shkrimit me dorë në procesin mësimor.

“Kur jap projekte, kërkoj që informacioni të përzgjidhet dhe të shkruhet me dorë. Kjo ndihmon që njohuritë të ruhen më gjatë në kujtesën e fëmijëve dhe zhvillon aftësitë motorike”, shprehet ajo.

Sipas mësuesve, shkrimi me dorë ka edhe një lidhje emocionale më të fortë krahasuar me shkrimin mekanik në tastierë, duke luajtur një rol të rëndësishëm në formimin intelektual dhe kulturor të fëmijëve.

Pekini ka bërë të ditur se pozicioni i Kinës kundër imponimit të tarifave është i qartë. Sipas zëdhënësit të ambasadës kineze në Uashington, luftërat tregtare nuk nxjerrin fitues.

“Pozicioni i Kinës kundër imponimit të pakufizuar të tarifave është i qëndrueshëm dhe i qartë. Luftërat tarifore dhe luftërat tregtare nuk kanë fitues, dhe shtrëngimi e presioni nuk mund të zgjidhin problemet. Ne kundërshtojmë fort çdo sanksion të paligjshëm unilateral dhe juridiksion me krah të gjatë, dhe do të marrim të gjitha masat e nevojshme për të mbrojtur të drejtat dhe interesat tona legjitime”, shkroi në rrjetin social ‘X’ zëdhënësi i ambasadës kineze në Uashtington.

Kjo deklaratë vjen pas njoftimit të Donald Trump ditën e hënë ku ai tha se “çdo vend që bën biznes me Republikën Islamike të Iranit do të paguajë tarifë 25% në çdo biznes me Shtetet e Bashkuara të Amerikës. Ky urdhër është përfundimtar dhe e pakthyeshëm.”

Ai e bëri të ditur në platformën e tij “Truth Social”, duke e bërë efektive menjëherë.

Ky veprim synon të rrisë presionin mbi Teheranin në mes të protestave masive kundër regjimit, ku raportohet se qindra demonstrues janë vrarë nga forcave të sigurisë.

Kina është partneri kryesor tregtar i Iranit (sidomos në blerjen e naftës, shpesh përmes ndërmjetësve), duke eksportuar miliarda dollarë mallra drejt Iranit çdo vit.

Tarifa e re mund të rrisë normat e tarifave për mallrat kineze në SHBA në nivele më të larta (potencialisht deri në 45% ose më shumë në disa raste), duke rrezikuar marrëveshjen e tregtisë së arritur vitin e kaluar mes dy superfuqive.

Kina e quan këtë “shtrëngim” dhe “presion” që nuk zgjidh problemet, duke paralajmëruar se do të mbrojë interesat e saj.

Vendet e tjera të prekura mund të përfshijnë Indinë, Turqinë, Emiratet e Bashkuara Arabe dhe të tjera që tregtojnë me Iranin.

Kjo ngjarje shton tensionet globale në një kohë kur Irani po përballet me trazira të mëdha, blackout digjital dhe kërcënime ushtarake nga SHBA-ja, ndërsa Trump ka thënë se preferon diplomacinë por nuk përjashton opsionet ushtarake.

Kryeministri Edi Rama ndodhet në Abu Dhabi, ku po merr pjesë në nisjen e Samitit të Javës së Zhvillimit të Qëndrueshëm.

Përmes një postimi në rrjetet sociale, Rama ka ndarë foto nga eventi, ku shihet në takim me presidentin e Emirateve të Bashkuara Arabe, Sheikh Mohammed bin Zayed Al Nahyan.

Kreu i qeverisë e cilësoi presidentin e Emirateve si një mik të madh të Shqipërisë, duke vlerësuar marrëdhëniet mes dy vendeve dhe rëndësinë e bashkëpunimit në fushën e zhvillimit të qëndrueshëm.

“Abu Dhabi – Nisja e Samitit të Javës së Zhvillimit të Qëndrueshëm, nën kujdesin e veçantë të Presidentit Sheikh Mohammed bin Zayed Al Nahyan, një mik i madh i Shqipërisë”, shkruan Rama në rrjetet sociale.

Ervin Salianji, i ftuar në emisionin “Të Paekspozuarit” në MCN TV, mohoi kategorikisht largimin nga Partia Demokratike, edhe pse Sali Berisha ka deklaruar se ai është “vetëpërjashtuar”. Salianji tha se do të qëndrojë në këtë parti dhe do të vijojë me lëvizjen e tij, e cila deri tani është përqafuar nga një numër i konsiderushëm i demokratëve.

Biseda: 

Ylli Rakipi: Nervozizmi i PD është shumë i madh, derisa ti të dalësh nga radhët, pastaj ata edhe mund të të thërrasin për bisedime. Nëse ti nuk del nga radhët, Salianji, sa të jesh aty do të jenë me dhimbje koke për shkak të gjendjes që kanë. Tani, ti mund t’ua heqësh dhimbjen e kokës vetëm duke ikur dhe unë jam i sigurtë se do të lavdërojnë. Ti çfarë do të bësh, o zotëri, se Berisha ta ka hequr vizën. Po ta hoqi Berisha vizën, Flamurit të heq 5 viza, ka aty të tjerë që të heqin 13 viza, bile edhe drejtori i Komunikimit, Alfred Lela, që është aty për të komunikuar me të gjithë njerëzit, të heq vizën. Tani çfarë do të bësh ti zotëri?

Ervin Salianji: Unë nuk iki nga PD, do të jem në PD dhe mua nuk më bëjnë dot presion.

Ylli Rakipi: Po ti je vetëpërjashtuar..

Ervin Salianji: As trysni, as joshje. Unë mendoj se PD duhet të arrijë në nivelin që kërkon shoqëria shqiptare që kërkon një opozitë me format tjetër, qoftë në komunikim, qoftë në përfaqësim dhe mënyrën se si duhet të ndërtojë kartën morale në çdo gjë përballë qeverisë. Unë kam ardhur për shkak të kontributit në politikë. Kam fituar gara, jam përplasur, më kanë vjedhur ca gara të tjera në 2014. Unë s’kam pyetur për Edi Ramën, jo për dikë që merr leje nga Edi Rama…

Kjo e martë shënon 113-vjetorin e krijimit të Policisë së Shtetit. Me këtë rast, Kryeministri Edi Rama ka vlerësuar rolin e Policisë, duke theksuar se ajo ka qenë dhe mbetet në shërbim të vendit dhe të qytetarëve.

“MIRËMËNGJES dhe me 113 vjet Policia e Shtetit, në shërbim të vendit dhe qytetarëve çdo ditë, ju uroj një ditë të mbarë”, shkruan Rama në rrjetin social Facebook.

Policia e Shtetit u krijua 113 vite më parë dhe konsiderohet një nga institucionet kyçe për rendin dhe sigurinë publike në vend.

Shtetet e Bashkuara të Amerikës kanë lëshuar një paralajmërim të ri sigurie për Iranin, duke u bërë thirrje qytetarëve të saj që ndodhen në vendin e Lindjes së Mesme të largohen sa më parë ose, nëse kjo nuk është e mundur, të strehohen në vende të sigurta. Sipas një njoftimi zyrtar të Departamentit Amerikan të Shtetit, protestat në mbarë Iranin po përshkallëzohen dhe situata e sigurisë mbetet e paqëndrueshme.

Autoritetet amerikane paralajmërojnë për rritje të masave të sigurisë nga ana e forcave iraniane, mbyllje të rrugëve kryesore, ndërprerje të transportit publik dhe bllokime të vazhdueshme të internetit. Këto masa po e vështirësojnë ndjeshëm lëvizjen dhe komunikimin, si për banorët vendas ashtu edhe për shtetasit e huaj.

Në njoftim thuhet gjithashtu se disa linja ajrore kanë kufizuar ose anuluar fluturimet nga dhe drejt Iranit, ndërsa disa kompani kanë pezulluar plotësisht shërbimet e tyre deri të premten, më 16 janar. Kjo situatë e bën edhe më të vështirë largimin ajror nga vendi.

Departamenti i Shtetit u rekomandon qytetarëve amerikanë të përgatiten për ndërprerje të gjata të internetit dhe të planifikojnë mënyra alternative komunikimi. Nëse kushtet e sigurisë e lejojnë, ata këshillohen të konsiderojnë largimin nga Irani përmes rrugëve tokësore, veçanërisht drejt Armenisë ose Turqisë.

Autoritetet amerikane theksojnë se situata mund të ndryshojë shpejt dhe u bëjnë thirrje qytetarëve të ndjekin me kujdes udhëzimet zyrtare dhe të qëndrojnë të informuar për zhvillimet më të fundit.

Paraqitja e Belind Këlliçi ditën e djeshme në SPAK u shoqërua me një përpjekje për ta relativizuar dhe zvogëluar peshën e kallëzimit penal, kështu që me qëllimin e ‘ndreqjes’ së biografisë Gazment Bardhi nxori këshilltarin e tij ligjor, Marash Logu, i cili u përpoq ta etiketonte si “mashtrim” raportimin e gazetës TemA se Këlliçi është kallëzuar për financim të paligjshëm të Kuvendit të Rithemelimit.

Sipas tij, padia paska të bëjë vetëm me falsifikimin e vulave dhe me asgjë tjetër, duke qenë në të njëjtën linjë me deklaratën e Këlliçit kur doli nga SPAK ‘për gjëra periferike’.

Mirëpo, po të shohësh bazën ligjore të kallëzimit penal të Bardhit ndaj Këlliçit dhe të tjerëve, del qartë se padia është më e gjerë dhe më e thellë

Çfarë përmban realisht baza ligjore e kallëzimit?

Në kallëzimin penal janë referuar një sërë dispozitash që, të marra së bashku, e shndërrojnë çështjen nga një debat formal për “vula”, në një hetim të plotë penal me pasoja serioze.

Së pari, referenca te neni 190 i Kodit Penal ndëshkon falsifikimin dhe përdorimin e vulave, stampave ose formularëve të subjekteve juridike, përfshirë partitë politike. Dënimi shkon nga 6 muaj deri në 5 vjet burg dhe vlen jo vetëm për falsifikuesin, por edhe për këdo që i përdor këto akte me vetëdije.

Por këtu çështja nuk mbyllet.

Referimi i nenit 75/a të Kodit të Procedurës Penale e vendos dosjen drejtpërdrejt në kompetencën e SPAK, çka nënkupton se kemi të bëjmë ose me funksionarë të lartë politikë, ose me elementë të korrupsionit dhe krimit të organizuar. Kjo nuk është thjesht për konsum politik, por ka pasojë të qartë juridike.

Më tej, nenet 280 dhe 283 të Kodit të Procedurës Penale detyrojnë prokurorinë: të regjistrojë procedimin penal sapo ka indicie për vepër penale dhe të kryejë menjëherë veprimet e para hetimore: sekuestrime dokumentesh, akte financiare, materiale digjitale dhe çdo provë që rrezikon të zhduket.

Kjo do të thotë se hetimi nuk kufizohet te vula, por shtrihet te pasojat juridike dhe financiare që ka prodhuar përdorimi i saj.

Në këtë kuadër, përfshirja e ligjit nr. 95/2016, konkretisht nenet 8, 9, 10 dhe vijues, që rregullojnë funksionimin e SPAK dhe BKH, e bën të qartë se kemi të bëjmë me: hetim të specializuar, ndjekje të transaksioneve financiare dhe verifikim të çdo akti që lidhet me organizimin dhe financimin e një strukture politike paralele.

Pse padia nuk është “vetëm për vula”

Në praktikën penale, vula e falsifikuar nuk është qëllim në vetvete. Ajo është mjeti. Pyetja që heton SPAK është:
Për çfarë u përdor ajo? Çfarë aktesh prodhoi? Çfarë pasojash financiare dhe juridike solli?

Nëse vula e falsifikuar ka shërbyer për: krijimin e një strukture politike, autorizime,vendime, apo mbledhje fondesh, atëherë hetimi hapet automatikisht drejt financimit të paligjshëm, fshehjes së burimeve dhe, potencialisht, pastrimit të parave. Kjo është arsyeja pse kallëzimi është ndërtuar mbi një bazë ligjore shumë më të gjerë se sa përpiqen ta paraqesin “gaztorët” e politikës, që ndryshe thonë në mëngjes, ndryshe veprojnë në drekë dhe ndryshe sillen në darkë..

Sa vite burg rrezikon realisht Këlliçi

Nëse merret në konsideratë e gjithë baza ligjore e kallëzimit të Gazment Bardhit ndaj Belind Këlliçit, kemi: Neni 190 i Kodit Penal (6 muaj deri në 5 vjet burg për falsifikim dhe përdorim vule), ndërsa nëse nga hetimi provohen elementë financiarë penalë (fshehje, maskim, përdorim fondesh), atëherë dënimet shkojnë nga disa vite burg deri në mbi 10 vjet, sipas veprës konkrete që individualizohet gjatë hetimit.

Pra, padia ndaj Këlliçit nuk është një çështje thjesht ‘politike’ e thënë ashtu në ajër si ato për ‘babin e Zenit’, por është një akuzë penale, e ndërtuar mbi një bazë të qartë ligjore, e cila sigurisht ka pasoja nëse do të merret në konsideratë nga gjykata./nl/TemA

Pamje të rënda të regjistruara nga një kamera sigurie tregojnë çastin dramatic, kur dy të rinj përfshihen nga një shpërthim i fuqishëm, teksa po kryenin veprime tepër të rrezikshme pranë fuçive metalike, që dyshohet se përmbanin mbetje nafte.

Ngjarja është regjistruar në 7 janar në Recife, kryeqyteti i shtetit Pernambuco në Brazil. Në video shihet njëri prej të rinjve duke qëndruar pranë një bidoni metalik të hapur, ndërsa tjetri ndodhet mbi një fuçi tjetër aty pranë. Sipas dyshimeve paraprake, brenda enëve kishin mbetur avuj ose substanca të ndezshme, të mjaftueshme për të shkaktuar shpërthim.

Në momentin që çakmaku afrohet pranë fuçisë, ndodh shpërthimi i menjëhershëm. Fuçia ngrihet në ajër me forcë të madhe, ndërsa të dy të rinjtë hidhen disa metra larg. Njëri prej tyre përplaset me kokë mbi bidonin ku kishte qenë i ulur më herët, duke pasur dëmtime serioze.

Autoritetet nuk kanë dhënë ende informacion zyrtar mbi gjendjen shëndetësore të të rinjve. Ndërkohë, pamjet kanë qarkulluar gjerësisht në rrjetet sociale, duke nxitur reagime të forta dhe duke u konsideruar si një shembull alarmues i pasojave që mund të sjellë neglizhenca ndaj materialeve të rrezikshme.