Sot, 30 janar, Departamenti i Drejtësisë Amerikane publikoi miliona faqe nga hetimi mbi Jeffrey Epstein, duke dhënë një pasqyrë të re mbi aktivitetet e tij dhe lidhjet me figura të njohura publike.

Zëvendës Prokurori i Përgjithshëm, Todd Blanche, mbajti një konferencë për media, duke shpjeguar se çfarë u fsheh ose u redaktua: informacioni i viktimave, foto dhe video eksplicite. Megjithatë, disa viktima thanë për CNN se emrat e tyre janë parë të shfaqen të pambuluara në dokumente.

Çfarë përmbajnë dokumentet

Hetimi mbi abuzimin: Një vajzë e mitur raportoi se Epstein e abuzoi seksualisht, pavarësisht se i kishte treguar për një ngacmim të mëparshëm.

I dënuari tjetër: Bashkëvuajtësi tjetër me Epstein në qelinë e burgut i tha hetuesve se kishte lutur Epsteinin të mos vriste veten.

Financat e Maxwell: Dokumentet përfshijnë fotografi nga shtëpia e Ghislaine Maxwell në New Hampshire, llogari bankare dhe një bilanc prej 773,775 dollarësh në mars 2019.

Heshtja e Epsteinit: Gjatë një depozitimi në 2016, Epstein përdori të drejtën e tij nga Amendamenti i Pestë për të mos inkriminuar veten kur u pyet për lidhjen me ish-Presidentin Clinton ose Fondacionin Clinton.

Email-e dhe ftesa publike: Howard Lutnick, sekretar i tanishëm i tregtisë, e ftoi Epstein në një event fondacioni për Hillary Clinton në 2015-ën. Nuk dihet nëse Epstein mori pjesë.

Po ashtu Kathy Ruemmler, ish-këshilltare e Obamës, mori një udhëtim me avion të klasit të parë të paguar nga Epstein në Evropë në 2015, dhe e shprehu admirimin e saj për të.

Elon Musk nga ana tjetër koordinonte një udhëtim në ishullin karibik të Epsteinit në 2013.

Publikimi i këtyre dokumenteve sjell në dritë detaje të reja mbi hetimet, lidhjet e Epstein dhe informacionet që viktimat kishin raportuar vite më parë.

Agjencia e brendshme e spiunazhit e Rusisë ka gjasa të jetë përgjegjëse për sulmet kibernetike të kryera në fund të muajit të kaluar ndaj 30 impianteve polake të energjisë së rinovueshme, një firme prodhuese dhe një fabrike që furnizon me ngrohje gati 500 mijë klientë, thanë të premten zyrtarët polakë.

Një raport i Ekipit Polak të Reagimit Emergjent për Kompjuterët mbi incidentin, të cilin një ministër polak e quajti më të rëndin e këtij lloji në vite, ua atribuon sulmet një grupi hakerësh nga Shërbimi Federal i Sigurisë i Rusisë, i njohur me akronimin rus FSB.

“Vlen të theksohet se kjo periudhë përkoi me temperatura të ulëta dhe stuhi dëbore që prekën Poloninë, pak para natës së Vitit të Ri,” thuhej në raport, citon Reuters.

Qëllimi i sulmit rus ishte të shkatërronte në mënyrë të pakthyeshme të dhënat e ruajtura në pajisjet brenda impiantit të kombinuar të ngrohjes dhe energjisë, por softueri i sigurisë e bllokoi atë pjesë të sulmit, sipas raportit.

Analiza të tjera ia vënë gjithashtu fajin inteligjencës ushtarake ruse

Polonia thotë se infrastruktura e saj kritike është bërë objekt i një numri gjithnjë në rritje sulmesh kibernetike nga Rusia që kur filloi lufta në Ukrainë në shkurt 2022. Moska mohon rregullisht përgjegjësinë për aktivitete kibernetike keqdashëse.

Raporti e lidhi incidentin me një operacion hakerimi të FSB-së të ndjekur nën disa pseudonime, përfshirë “Berserk Bear” dhe “Dragonfly.” Një raport i FBI-së më 20 gusht 2025 i lidhi këto grupe me njësinë e specializuar Center 16 të FSB-së.

Ndërsa grupi historikisht ka pasur “interes të madh” në sektorin e energjisë dhe aftësi për të sulmuar pajisje industriale, “ky është aktiviteti i parë shkatërrues i përshkruar publikisht që i atribuohet këtij grupimi,” thanë zyrtarët polakë të sigurisë kibernetike, duke iu referuar grupit të FSB-së.

Vendimi i raportit për sulmet mbështet pjesërisht një analizë të pavarur të publikuar javën e kaluar nga studiuesit e firmës së sigurisë kibernetike ESET me bazë në Sllovaki.

ESET tha se malware i përfshirë në sulmin polak përkoi me operacione të mëparshme shkatërruese kibernetike të lidhura me Rusinë, por e lidhi atë me një njësi hakerimi të inteligjencës ushtarake ruse të njohur si Sandworm, jo me FSB-në. ESET publikoi një raport të dytë të premten duke zgjeruar analizën e saj mbi malware, i cili sërish e lidhi atë me Sandworm, megjithëse paralajmëroi se aspekte të tjera të operacionit mund të jenë kryer nga grupe të ndryshme hakerimi.

John Hultquist, analist kryesor në Google Threat Intelligence Group, tha të premten se nëse sulmi është vërtet Berserk Bear, aktiviteti përfaqëson një përshkallëzim nga depërtimi i objektivave për spiunazh afatgjatë drejt veprimeve dëmtuese.

“Ata kanë mjetet, pyetja gjithmonë ishte nëse kishin motivimin,” tha Hultquist. “Tani, potencialisht bazuar në këtë atributim, na është provuar se ata e kanë motivimin, gjë që na vendos në një situatë shumë më serioze.”

Hultquist tha se situata duhet të ngrejë shqetësime për sigurinë e Lojërave Olimpike Dimërore, të planifikuara të nisin më 6 shkurt.

“Rusia më parë ka tentuar të ndërpresë ceremonitë e hapjes së Lojërave Olimpike Dimërore, dhe ata ishin jashtëzakonisht aktivë gjatë lojërave të fundit verore,” tha Hultquist. “Sulmet kibernetike ndërprerëse janë një kërcënim shumë real.”

Nga Adriatik Doçi

Duke pasur kohë të lirë në burg dhe disi i harruar nga aleati i tij Sali Berisha, Ilir Meta befas i është rikthyer pas 15 vitesh videos ku shfaqej me zë dhe figurë duke bërë pazar me pasuritë publike në zyrën e Dritan Prifit. Të vërtetën e videos me bllokun e zi të pazareve në dorë, që shënjoi fundin e tij moral si politikan, Meta e veshi me një mjegull konspirative, në përpjekje për t’ia mbivendosur historisë degraduese të ekspertimit të Ermal Beqirit, i cili e shpalli videon montazh (ndryshe nga eskpertiza e FBI), ekzpozimin e darkës me Berishën një natë para vendimit të Gjykatës së Lartë, ndikimit të Berishës tek kolegji penal që u tret nga Vetingu etj.

I vetmi mister, konspiracion dhe më konkretisht të vetmet video që nuk ka parë publiku, janë ato të Fahri Balliut dhe Shkëlzen Berishës duke bërë pazare, ashtu si Meta, në zyrën e Dritan Priftit, asokohe ministër ministër i Ekonomisë, Tregtisë dhe Energjetikës. Videon në të cilën Fahri Balliu shfaqet duke kërkuar dhe finalizuar favore në zyrën e Priftit, ndonëse e papublikuar, nuk është edhe aq sekret. Vidoja është parë nga një rreth i ngushtë gazetarësh dhe politikanësh.

Videoja komromentuese e Shkëlzenit është pretenduar nga Ilir Meta, i cili e përdor herë pas here si shantazh ndaj Sali Berishës, herë me kërcënime të drejtëpërdrejta dhe herë me mesazhe të koduara, si rrëfimi i ditëve të fundit nga burgu.

Në mars të vitit 2015, Sali Berisha pranoi publikisht në Kuvend se videoja Meta-Prifti ishte e vërtetë. Më shumë se sa një pendesë për ndërhyrjen për të shpëtuar Metën përmes Gjyjatës së Lartë në janar 2012, ishte pranimi i një të vërtete nga Berisha në shenjë hakmarrje ndaj Metës, dy vjet pasi ky i fundit braktisi koalicionin me PD-në, duke u bashkuar me Edi Ramën pas darkës së ngjalave, qê solli edhe rotacionin politik në 2013.

Është epike përplasja e ashpër mes Sali Berishës dhe Ilir Metës në seancën parlamentare të datës 5 mars 2015, ku akuzonin njëri-tjetrin për vrasje dhe korrupsion. Berisha i kërkonte Metës të jepte dorëheqjen si kryetar i Kuvendi, pasi akuzohej se kishte porositur vrasjen e deputetëve Tom Doshi dhe Mhill Futi.

Nga ana tjetër, Meta i tha se e kishte dhënë një herë dorëheqjen në janar 2011 për Shkëlzenin, duke aluduar se i biri i Berishës ishte në videot e Dritan Priftit në mënyrë komprometuese.

“Herën e parë, dorëheqjen e dhashë prej Shkëlzenit, se ai ishte në videon e Dritan Priftit, dhe ti e di shumë mirë…”, tha Meta.

Ky është momenti që Sali Berisha për herë të parë pranon se videoja e Meta-Prifti ishte autentike. Duke iu përgjigjur Metës, Berisha thotë se “Kjo alibi që kërkon, është e turpshme. Dorëheqjen e parë e dhe për bllokun e Monikës! Tani jep dorëheqjen e dytë! Për 700 mijë euro dhe dorëheqjen herën e parë”.

Ilir Meta vijoi shantazhin teksa autorizoi Spartak Brahon të publikonte videon me Shkëlzenin, seancën e ardhshme në Kuvendit, përmes një monitori. Dhe shantazhi funksionoi. Gazetarëve u shkoi kot përgatitja për seancën e ardhshme kur Braho, i njohur si ‘Çanta e zezë’, do të shfaqte videon në seancë plenare sipas porosisë së Metës.

Pas asaj seance, ‘akujt’ mes Berishës dhe Metës nisën të zbuteshin. Në verën e vitit 2016, ata e panë reformën në drejtësi si një rrezik të përbashkët, ku Berisha i kishe shpallur luftë publikisht, ndërsa Meta e kundërshtonte në prapaskenë.

Përplasja e fundit u shënua në maj 2017, ku Lulzim Basha ndërmori një fushatë akuzash ndaj LSI-së. Megjithatë, raportet mes Berishës dhe Metës mbetën të konsoliduara dhe vetëm disa muaj më pas, PD dhe LSI u bashkuan kundër qeverisë, duke zyrtarizuar edhe një aleancë më pas.

Nga vitit 2017, Berisha dhe Meta ka vijuar luftën në një front kundër qeverisë, zhvillimeve në drejtësi dhe sidomos ndaj ambasadorëve të Perëndimit në Tiranë. Në dy mars të 2020, Berisha mori pjesë në mitingun e organizuar nga Ilir Meta në oborrin e Presidencës, për rrëzimin e qeverisë, ndërsa në 2021 PD-LSI u kërkuan votën shqiptarëve për t’u besuar qeverisjen e vendit pas 25 prillit.

Pesë vjet më pas LSI-ja si një mutacion politik mes PS-PD nuk eksizton më. Ilir Meta duket se do të qëndrojë edhe disa vite në burg. Sali Berisha jo vetëm po natyralizohet me këtë realitet politik, por duket se ndihet edhe komod. Ndërkaq, Ilir Meta duket se nuk ka ndërmend të dorëzohet dhe të shkruajë librin me kujtime në qeli.

Dy ditë më parë, si për t’i zgjuar makthin e marsit 2015 Sali Berishës, Ilir Meta riktheu në vëmendje arsenalin e videove të papublikuara të Dritan Priftit, ku spikasin videot e Fahri Balliut dhe Shkëlzenit.

“Pra, rastësisht eksperti amerikan, gjatë kërkimit të tij në orën e dorëzuar nga “denoncuesi i korrupsionit”, gjeti plot video të tjera të tij, të cilat ai i kishte bërë “delete” duke menduar se ishin zhdukur përgjithmonë. Rekuperimi i tyre, përveç se ekspozonte plot politikanë, biznesmenë dhe gazetarë të përgjuar, jo vetëm në zyra, por edhe në shtëpi, evidentoi edhe një video ku dukeshin vërtet me sy 80 mijë euro që zotëria i merrte nga Zv/Ministri i tij në shtëpi”, rrëfen Meta.

Rastësi apo jo, dy ditë më vonë, çuni Fahri Balliut, Klevis Balliu, denoncoi (sot) ndalimin sipas tij arbitrar të ushtrimit të të drejtës së tij Kushtetuese për të inspektuar kushtet e Ilir Metës në burgun “Jordan Misja-313” në Tiranë.

Departamenti i Drejtësisë (DOJ) ka hapur një hetim për të drejtat civile lidhur me vrasjen e Alex Pretti-t nga agjentët federalë të emigracionit. Kështu ka njoftuar këtë të premte zëvendës prokurori i përgjithshëm i SHBA-ve.

Todd Blanche tha se nuk donte ta “tejkualifikonte” këtë hap, duke e quajtur “një hetim standard nga FBI kur ka rrethana si ato që pamë”.

Departamenti i Sigurisë Kombëtare (DHS) tha se FBI do të udhëheqë hetimin për vrasjen e Pretti-t në Minneapolis, me mbështetje nga Divizioni i të Drejtave Civile i Departamentit të Drejtësisë. Vdekja e tij ndodhi vetëm disa javë pasi Renee Good u vra nga oficerë federalë në të njëjtin qytet.

“Ne po shohim gjithçka që mund të hedhë dritë mbi atë ditë,” tha Blanche në një konferencë për shtyp.

Ai shtoi se hetimi do të përfshijë, “në masën që është e nevojshme“, avokatë nga divizioni i të drejtave civile.

Hetimi më parë po udhëhiqej nga dega e Hetimeve të Sigurisë Kombëtare e Imigracionit dhe Doganave (ICE).

Dy agjentë të përfshirë në vrasjen e infermierit janë vendosur në leje administrative ndërsa incidenti po hetohet, tha të enjten Dogana dhe Mbrojtja e Kufirit e SHBA (CBP).

Sipas një raporti paraprak të DHS-së dërguar Kongresit, dy oficerë qëlluan me armët e tyre ndaj Pretti-t gjatë një përleshjeje. Fillimisht autoritetet kishin pretenduar se Pretti kishte nxjerrë armën e tij.

Infermieri i kujdesit intensiv, 37-vjeçar, besohet se ishte bashkuar me protestat në qytet pas vrasjes së Renee Good nga një agjent i ICE-së në Minneapolis më 7 janar.

Vdekjet e tyre ndezën protesta të reja në shtet dhe shkaktuan zemërim publik në mbarë SHBA-të, si dhe kritika nga ligjvënës të të dyja partive.

Guvernatori i Minnesota-s Tim Walz dhe Kryetari i Bashkisë së Minneapolis Jacob Frey kanë kërkuar që agjentët federalë të tërhiqen plotësisht nga rajoni i kryeqytetit të shtetit.

Shteti gjithashtu i ka kërkuar një gjykatësi federal të ndalojë Operacionin Metro Surge, nismën e DHS-së për zbatimin e ligjit të emigracionit që filloi më 1 dhjetor dhe përfshin rreth 3 mijë oficerë.

Një pilot i një kompanie ruse ajrore, i cili realizoi me sukses një ulje emergjente duke shpëtuar jetën e 167 pasagjerëve dhe anëtarëve të ekuipazhit, tashmë rrezikon të paguajë vetë dëmet e avionit.

Ngjarja ndodhi në shtator të vitit 2023, kur kapiteni Sergei Belov, u detyrua të kryente një ulje emergjente në një fushë pranë një zone pyjore në rajonin e Novosibirskut, pasi avioni nuk arriti të mbërrinte në aeroport për shkak të konsumit të lartë të karburantit. Pavarësisht rrezikut, të gjithë personat në bord mbijetuan pa lëndime serioze.

Fillimisht, pilotët u cilësuan si heronj, por më pas u shkarkuan. Sot, Belov është bërë i pandehuri kryesor dhe përballet me një padi prej 1.3 milionë dollarësh, të ngritur nga vetë kompania ajrore, sipas agjencisë Nexta.

Avokatët e tij pretendojnë se vlerësimi i dëmeve është bërë me parregullsi, ndërsa dokumentacioni financiar nuk justifikon shumën e kërkuar.

Çfarë ndodhi gjatë fluturimit

Më 12 shtator 2023, ekuipazhi raportoi një defekt në sistemin hidraulik gjatë fluturimit nga Soçi drejt Omskut. Sipas autoriteteve ruse të aviacionit civil (Rosaviatsia) asnjë pasagjer nuk pati nevojë për ndihmë mjekësore.

Kompania ajrore mohoi zërat se kompania nuk ishte në gjendje të mirëmbante flotën për shkak të sanksioneve ndaj Rusisë.

Megjithatë, ekspertë të aviacionit kanë vënë në dyshim vendimin e uljes, duke theksuar se Airbus A320 ka tre sisteme hidraulike dhe një elektrik rezervë. Piloti Andrei Litvinov deklaroi për Gazeta.ru se “nuk kishte arsye reale për një ulje të tillë”, duke shtuar se vendimi mund të kishte rrezikuar jetët e njerëzve në bord dhe në tokë.

Deputetja e Partisë Demokratike, Jorida Tabaku, ka replikuar me raportuesin për Shqipërinë në Parlamentin Europian, Andreas Schieder, lidhur me vlerësimin e protestës së opozitës të 24 janarit dhe situatën e demokracisë në vend.

Në një intervistë për emisionin “ÇdoKënd” me Merita Haklaj, Tabaku theksoi se protesta është një mjet europian i shprehjes së pakënaqësisë dhe se problemi real nuk janë molotovët, por mbrojtja politike e korrupsionit.

“Nuk është mënyrë europiane të mbrosh korrupsionin. Protesta është mënyrë europiane për të thënë gjërat”, deklaroi Tabaku, duke shtuar se shqetësimi për çështjen e zëvendëskryeministres Belinda Balluku shkon përtej interesave të Partisë Demokratike.

Sipas saj, zvarritja e shqyrtimit të kërkesës së SPAK për heqjen e imunitetit përbën një precedent të rrezikshëm dhe një mburojë politike ndaj drejtësisë.

“Ky nuk është shqetësim vetëm i PD-së, por i gjithë shoqërisë dhe një pengesë serioze për integrimin europian. Imuniteti nuk është privilegj, por përgjegjësi”, theksoi Tabaku.

Ajo akuzoi mazhorancën se po zvarrit procesin me qëllim, duke cenuar kredibilitetin e SPAK dhe duke dërguar mesazhin se korrupsioni mund të mbrohet përmes forcës politike.

Ish-ambasadori Roland Bimo ka deklaruar se ngjarjet e fundit në Iran nuk janë thjesht rezultat i dinamikave të brendshme, por sipas tij, pas tyre qëndron edhe një dorë e jashtme që i “kurdis” zhvillimet.

Në emisionin “3D” të moderuar nga gazetari Alban Dudushi në RTSH 1 HD, Bimo tha se Irani gjendet sot në një pozitë më të favorshme se më parë, pasi demonstratat janë portretizuar nga regjimi i ajatollahëve si të nxitura nga jashtë, gjë që i ka dhënë mundësi pushtetit të forcojë unitetin e brendshëm.

“Ka një luftë propagandistike të jashtëzakonshme dhe në vijim me këto që ndodhën muajin e fundit, Irani është në një pozitë më të favorshme me çka qenë më parë para se të fillonin demonstratat.Në këtë këndvështrim, Irani dhe regjimi i ajatollahëve e gjen veten edhe më të fortë sepse demonstratat janë portretizuar nga regjimi si të shtyra nga jashtë. Si të tilla, sa herë që ka ndërhyrje nga jashtë, tentohet që populli të ketë një unitet rreth flamurit apo regjimit, sikurse ndodhi edhe në luftën 12-ditore në qershor.Mënyra se si janë zhvilluar ngjarjet që nga 28 dhjetori e deri sot, të bën të mendosh që ka një dorë të jashtme që e ‘kurdis’ ngjarjet në Iran.”

Një fond europian krize me më shumë se 430 miliardë euro kapacitet financiar mund të përdoret për të dhënë hua për shpenzime në mbrojtje. Kështu ka deklaruar për Reuters drejtuesi i Mekanizmit Europian të Stabilitetit (ESM), në një kohë kur Bashkimi Europian po përpiqet të forcojë aftësitë e tij ushtarake.

Pierre Gramegna, drejtor menaxhues i ESM-së, tha se fondi mund të ofrojë linja kredie për mbrojtjen pa kërkuar reforma të ashpra ekonomike në këmbim, me synimin për të shmangur stigmatizimin që shoqëron zakonisht kërkesat për ndihmë nga fondi emergjent i eurozonës.

“Në këto kohë trazirash gjeopolitike, që kanë sjellë rritje të shpenzimeve, përfshirë kostot e mbrojtjes për të gjitha vendet, duhet të përdorim potencialin e plotë të ESM-së,” deklaroi Gramegna.

Ai theksoi se linjat e kredisë për mbrojtje mund të përdoren nga vendet me financa të shëndosha, por me buxhete të tendosura, veçanërisht shtetet më të vogla të eurozonës.

“Ne kemi instrumente. Është në interesin më të mirë të Europës të përdorë potencialin e plotë”, shtoi ai, duke nënvizuar se marrëdhëniet mes Europës dhe Shteteve të Bashkuara po bëhen gjithnjë e më të vështira.

Çdo mbështetje e tillë financiare do të kishte rëndësi simbolike, pasi do të ripërdorte një fond të krijuar gjatë kulmit të krizës së borxheve në eurozonë, i cili kishte për qëllim parandalimin e kolapsit të ekonomive kombëtare, bankave dhe monedhës së përbashkët.

Qëndrimi armiqësor i presidentit amerikan, Donald Trump, ndaj Europës po i detyron liderët europianë të kërkojnë alternativa për të mbrojtur rajonin nga agresioni rus. Deklaratat e Gramegna-s sugjerojnë gatishmëri për të përdorur rezervat e mëdha europiane për të mbështetur vendet e eurozonës, veçanërisht shtetet baltike që kufizohen me Rusinë. Megjithatë, huatë duhet të miratohen fillimisht nga vendet e eurozonës që mbështesin ESM-në.

Vetëm vendet e eurozonës mund të përfitojnë nga këto hua, duke përjashtuar shtete që nuk përdorin euron, si Polonia. Aktualisht, misioni i ESM-së nuk përmend drejtpërdrejt mbrojtjen dhe çdo ndryshim i tillë kërkon miratimin e vendeve anëtare, përfshirë shtete neutrale ushtarakisht si Austria, Qiproja, Malta apo Irlanda.

Përpjekjet e Europës për të forcuar mbrojtjen janë intensifikuar katër vjet pas pushtimit të plotë të Ukrainës nga Rusia dhe janë bërë edhe më urgjente pasi Trump kërcënoi me tarifa tregtare vendet që kundërshtuan pretendimin e tij mbi Groenlandën, territor danez.

Gramegna la të kuptohet se ESM, i cili u krijua për të ndihmuar vende si Greqia gjatë krizës së borxheve, mund të ketë sërish një rol aktiv. Ai foli për përdorimin e linjave parandaluese të kredisë për mbrojtje, duke theksuar se ato janë të disponueshme dhe se duhet të “rizbulohet potenciali i këtij instrumenti”.

Ai sqaroi se huatë do të përdoren vetëm për shpenzime mbrojtjeje dhe nuk do të shoqërohen me kushte të rënda.

“Qëllimi është të shmanget lidhja e këtij mjeti me ristrukturimin e ekonomisë”, tha Gramegna.

Deklaratat e tij ringjallin idenë e një “linje mbështetjeje për mbrojtjen”, e propozuar më herët nga ish-kryeministri italian Enrico Letta, e cila do të lejonte huadhënie deri në 2% të prodhimit ekonomik të një vendi me norma të ulëta interesi.

Kryeministri i Kosovës, Albin Kurti, është treguar sërish i hapur për bashkëpunim me opozitën për kalimin e marrëveshjeve ndërkombëtare dhe zgjedhjen e Presidentit të ri.

Sa i përket zgjedhjes së Presidentit, Kurti konfirmoi komunikimin me Presidenten Vjosa Osmani, por sqaroi se ky proces vjen vetëm pas përmbushjes së disa hapave institucionalë.

Ai përmendi certifikimin e rezultatit, formimin e institucioneve të reja dhe kalimin e marrëveshjeve ndërkombëtare para se të fillojnë të merren me çështjen e Presidentit.

“Për formimin e qeverisë nuk do të kemi asnjë problem, por për dy të tretat e votave kur nevojiten në Kuvend, prej marrëveshjeve ndërkombëtare e deri te rizgjedhja e presidentes apo zgjedhja e presidentit, ne kemi nevojë për bashkëpunim me opozitën. Por, nga ana jonë gatishmëria dhe interesimi ekziston. Në muajin shkurt do ta shohim se a ka gatishmëri e interesim edhe nga opozita”, tha Kurti.

Para gazetarëve të premten, Kurti u pyet edhe për pjesëmarrjen e Kosovës në Bordin e Paqes. Ai nuk u tregua i drejtpërdrejtë, por foli për gatishmërinë e Kosovës për të kontribuar në ruajtjen e paqes: “Unë jam kryeministër në detyrë, nuk jam ende në mandatin tim të tretë, por kudo që ka nevojë për paqe në botë, ne dëshirojmë që të kontribuojmë, sepse kemi qenë përfitues të paqes në vendin tonë nëpërmjet forcave ndërkombëtare”.

Sa i përket dyshimeve për manipulim votash nga kandidatë të Lëvizjes Vetëvendosje, Kurti tha se fillimisht do të priten hetimet e sistemit të drejtësisë, ndërsa më pas çështja do të trajtohet në organet e partisë.

“Ekzistojnë proceset e sistemit të drejtësisë dhe ne jemi të hapur për të gjitha hetimet që do të zhvillohen. Është e rëndësishme të theksohet që nuk ka amnisti për asnjë keqbërës, për këdo i cili ka manipuluar gjatë evidentimit apo numërimit dhe hetimet le të shkojnë deri në fund”, tha Kurti.

Lidhur me aktgjykimin e Gjykatës Kushtetuese për zgjedhjen e Nenad Rashiq nënkryetar të Kuvendit, Kurti tha se ende nuk e ka arsyetimin e plotë dhe për këtë arsye nuk mund të japë qëndrim përfundimtar.

Ministrja e Shtetit për Administratën Publike dhe Antikorrupsionin, Adea Pirdeni mori pjesë në Dialogun Politik në Romë, mbi procesin e anëtarësimit të Shqipërisë dhe Malit të Zi në Bashkimin Evropian.

Në postimin e saj, ministrja theksoi se ky dialog shërbeu si një platformë për diskutime të thelluara mbi sfidat e procesit të negociatave, me fokus të veçantë në fushat e shtetit të së drejtës.

Pirdeni shprehu angazhimin e pandërprerë të Shqipërisë për të ruajtur ritmin e procesit të negociatave dhe për t’i qëndruar besnikë zotimit për mbylljen e negociatave në nivel teknik brenda vitit 2027.

“Sot në Romë, në Dialogun Politik mbi procesin e anëtarësimit të Shqipërisë dhe Malit të Zi në Bashkimin Evropian .Dialogu shërbeu si një platformë për diskutime të thelluara mbi sfidat e procesit të negociatave, me fokus të veçantë në fushat e shtetit të së drejtës .Theksova angazhimin e pandërprerë të Shqipërisë për të ruajtur ritmin e procesit të negociatave dhe për t’i qëndruar besnik zotimit për mbylljen e negociatave në nivel teknik brenda vitit 2027.” Shkrun ministrja ne rrjetet sociale.

U mbajt të enjten në Gjykatën Themelore në Prishtinë seanca për vrasjen e Liridona Ademajt. Të akuzuar për këtë çështje janë bashkëshorti i saj, Naim Murseli, si dhe Granit Plava dhe Kushtrim Kokalla.

Gjatë seancës gjyqësore në Gjykatën Themelore të Prishtinës, Naim Murseli mohoi çdo përfshirje në vrasjen e bashkëshortes së tij, Liridona Ademaj, duke theksuar se gjatë 11 viteve të martesës kishin pasur marrëdhënie të mira dhe një jetë të lumtur familjare.

“Ju betohem në dy fëmijët e mi që nuk kam qenë në makinë kur është vrarë Liridona Ademaj. Kam qenë së paku 20 metra larg, as unë dhe as fëmijët,” u shpreh ai para trupit gjykues, duke e mbështetur mbrojtjen e tij me betimin për fëmijët.

Çështja e vrasjes së Liridona Ademajt u trajtua gjerësisht në emisionin “Në Kohë Reale” të moderuar nga gazetari Flori Gjini, ku të ftuar ishin avokati i familjes Ademaj, Leutrim Syla, dhe drejtori i gazetës “Ekskluzive”, Pleurat Salihu.

Të dy sollën analiza të hollësishme mbi procesin gjyqësor dhe dëshmitë e dhëna nga i akuzuari kryesor, Naim Murseli.

Syla theksoi se gjykimi ka hyrë në fazën e dhënies së mbrojtjes dhe se deklaratat e Murselit nuk përputhen me provat materiale, duke i cilësuar si të pavërteta.

Avokati i familjes Ademaj u shpreh se për të afërmit e Liridonës është jashtëzakonisht e vështirë të dëgjojnë deklaratat e Naim Murselit, të cilat i cilësoi si gënjeshtra të thëna me gjakftohtësi, pavarësisht provave materiale që e kundërshtojnë versionin e tij.

“Familjarët e Liridonës e kanë shumë të vështirë të dëgjojnë një gënjeshtar tipik, i cili me aq gjakftohtësi, përkundër provave materiale, jep një version të tillë. Megjithatë, ata janë më të qetë sepse janë më të bindur se Naim Murseli do të dënohet me burgim të përjetshëm”, tha avokati.

Megjithatë, sipas tij, familjarët ndihen më të qetë sepse janë gjithnjë e më të bindur se Murseli do të dënohet me burgim të përjetshëm, pasi çdo provë e paraqitur në gjykatë vërteton përtej çdo dyshimi rolin e tij si bashkëkryes në këtë vepër penale.

“Tani ka filluar dhënia e mbrojtjes së Naim Murselit, ku nga salla janë larguar Granit Plava dhe Kushtrim Kokalla. Mbrojtja e Murselit ka përfunduar me marrjen në pyetje sepse është lënë i lirë të flasë për ngjarjen gjatë seancës së pyetjeve. Tani radhën e ka prokuroria për ta marrë në pyetje të tërthortë, por edhe ne si palë e dëmtuar dhe mbrojtës të tjerë për të vazhduar me të akuzuarit e tjerë”, tha Syla.

Ai shtoi se është e pritshme që një i akuzuar që nuk pranon fajësinë të japë versione të tjera, por sipas tij, provat materiale e kundërshtojnë çdo deklaratë të Murselit.

Nga ana tjetër, Pleurat Salihu komentoi se dëshmitë e Murselit nuk janë bindëse dhe shpesh bien ndesh me faktet e paraqitura.

“Unë e kam ndjekur gjithë dëshmitë e Murselit dhe nuk kisha dashur të them ndonjë epitet, por ato që ai ka deklaruar ato ditë, përfundimisht ai gjithçka mund të jetë por vetëm njeri nuk është. Ai betohet që nuk ka qenë i pranishëm, por po të marrim deklaratën e fëmijës që thotë se në momentin që kanë qëlluar me armë, babi e ka shtrënguar mamin, atëherë dihet që fëmija thotë të vërtetën, ndërsa ky thotë që nuk ka qenë i pranishëm. Gjithashtu, në provat e fundit shihet shumë mirë që lëviz me veturë dhe ka kontakte me Kushtrim Kokalla. Më pas kemi edhe deklaratën e personit që ka shitur armën. Ai po tenton, i këshilluar nga mbrojtja e tij, ta zvarrisë këtë çështje sikur të mos ketë gisht. Ai pretendon se do të bindë trupin gjykues dhe po tenton të shtyjë procesin, gjë që u pa qartë kur mbrojtja kërkoi ekzaminimin e vendit të vrasjes pas dy vitesh, kur terreni ka ndryshuar”, tha Salihu.

Ai shtoi se Murseli po përpiqet të hedhë poshtë edhe deklaratat e dy të tjerëve që kanë bashkëpunuar për të vrarë bashkëshorten e tij.

“Ky ose nuk është normal ose është një shpirt lig që të deklarojë këto. Ai nuk po kërkon të lehtësojë veten dhe familjen e Liridonës nga kjo ngjarje, por po tenton të marrë një dënim më të ulët”, përfundoi Salihu.

Rezervat valutore të Bankës së Shqipërisë kanë arritur në nivelet më të larta historike, duke kapur vlerën e 7.3 miliardë eurove në fund të dhjetorit 2025. Të dhënat zyrtare tregojnë se, krahasuar me fillimin e vitit 2024, kur totali i rezervës ishte 5.6 miliardë euro, rritja ka qenë me më shumë se 30 për qind.

Në përbërjen e rezervave vërehet një shtim i dukshëm i arit, i cili ka arritur në 430 milionë euro, nga vetëm 204 milionë në fillim të periudhës së raportimit.

Po ç’domethënie ka kjo?

Ari konsiderohet aset strehë në periudha pasigurie financiare, inflacioni dhe tensione gjeopolitike, ndaj rritja e tij rrjedhimisht ulë varësinë nga valutat dhe tregjet financiare. Forcimi i rezervave valutore rrit aftësinë e bankës qendrore për të stabilizuar kursin e këmbimit, për të përballuar goditje të jashtme dhe për të garantuar mbulimin e importeve dhe detyrimeve të jashtme, duke vepruar si një “jastëk financiar” për ekonominë shqiptare, shpjegon Lapsi.al. Rritja e çmimit të arit në tregjet ndërkombëtare reflektohet edhe në rezervën e Bankës sonë Qëndrore.

Një sasi qumështi për bebe i llojit Aptamil me përmbajtje toksike është importuar nga Gjermania dhe është hedhur për shitje në treg.

Agjencia e sigurisë ushqimore bën thirrje qytetarëve që mund ta kenë blerë, ta kthejnë menjëherë ku e kanë vlerë.

Kryeministri Rama thotë se nuk do të tolerohet asnjë shkelje që cënon sigurinë e ushqimeve, si kusht i panegociueshëm për integrimin Europian.

Ashtu siç A2CNN ka paralajmëruar prej kohësh, ndryshimet në Policinë e Shtetit vijojnë të ndodhin hap pas hapi.

Kësaj radhe, dorëheqjen e ka dhënë drejtori i Policisë së Dibrës, Artion Duka. Me urdhër të Ilir Prodës, është caktuar përkohësisht në detyrën e Drejtorit të Drejtorisë Vendore të Policisë Dibër, Armir Gjikolaj.

Edhe pse Policia e Shtetit informon se Duka është dorëhequr për arsye familjare, në të vërtetë shkaqet janë të tjera. Kujtojmë që prej kohësh Drejtoria e Përgjithshme e Policisë së Shtetit ka vendosur në test të gjithë drejtorët e policisë në çdo qark lidhur me performancën dhe rezultatet. Vlerësimi po bëhet nga drejtoria e Standarteve nën mbikëqyrjen e drejtorit të përgjithshëm.

Një muaj më parë, Ilir Proda shkarkoi nga posti i drejtorit të Policisë Lezhë, Altin Menën për performancë të dobët. Pas shkarkimit të Menës, detyrën e mori drejtuesi Islor Islami. Nën drejtimin e Islamit në një afat kohor të shkurtër Policia e Lezhës zhvilloi dy goditje të rëndësishme, zbuloi një kazino brenda në qytet dhe një godinë trekatëshe pranë autostradës ku kultivohej kanabis nën hundën e policisë.

Ndryshimi i drejtorit të Policisë së Dibrës nuk do të jetë i fundit, në muajt në vijim pritet të ketë ndryshime në drejtim edhe në qarqet e tjera të vendit. Në proces vlerësimi performance janë Qarku i Fierit, Beratit dhe Gjirokastrës.

Ndërkohë, vijon të mbetet pezull gara për drejtorët e departamenteve në Drejtorinë e Përgjithshme të Policisë. Në nëntor 2025, ish drejtuesja e BKH, Aida Hajnaj bëri padi në Gjykatën Administrative, ku kërkonte pezullimin e garës së policisë për drejtorë departamentesh derisa gjykata të shpallë vendimin. Ajo kërkon të kthehet si zv.drejtoreshë e përgjithshme e policisë, ose drejtoreshë departamenti. Më datë 10 shkurt do të mbahet seanca, për të vendosur edhe zgjidhjen e ngërçit.

Në tetor 2025, Proda hapi garën për dy departamente, për Kufirin dhe Migracionin dhe për Marrëdhëniet Ndërkombëtare. Për departamentin e Marrëdhënieve Ndërkombëtare ka aplikuar drejtuesi aktual, oficeri i karrierës Pëllumb Seferi, nën drejtimin e të cilit janë kryer ekstradimet më të bujshme nga Dubai të personazheve të botës së krimit, duke thyer edhe mitin e ekstradimeve nga Emiratet Arabe.

Departamenti i Marrëdhënieve ndërkombëtare cilësohet si departamenti me rezultatet më të larta ndër vite në policinë e Shtetit.

Ndërkohë, vijon të mbetet e pa hapur gara për drejtorin e Departamentit të Policisë Kriminale, post i cili mbahet nga Neritan Nallbati. Ende nuk dihen arsyet e mos hapjes së garës, ku ligji për Policinë e Shtetit e përcakton qartë që duhet hapur garë.

Presidenti i Republikës, Bajram Begaj, ka deklaruar se Shqipëria do të përfaqësohet me dinjitet në Lojërat Olimpike Dimërore Milano–Cortina. Kreu i shtetit theksoi se pjesëmarrja e sportistëve shqiptarë në këtë ngjarje madhore ndërkombëtare është dëshmi e progresit dhe ambicies së vendit në arenën sportive. 

Begaj tha se suksesi matet me përkushtimin, profesionalizmin dhe pasionin e sportistëve, duke shtuar se ata janë shembull frymëzimi për të rinjtë shqiptarë dhe dëshmi se ëndrrat nuk kanë kufij. 

“Ju do të përfaqësoni vendin tuaj, do të mbani ambicien e Shqipërisë, ku deri dje ishim vizitorë të largët. Tani renditemi me dinjitet në vende që kanë rekorde në lojërat dimërore dhe duhet të na bëjnë krenarë. Nuk matet me kilometra katrorë të pistave të skive, por matet me madhësinë e zemrës së atyre sportistëve. 

Ju jeni katërshja që keni thyer traditën e pjesëmarrjes në organizime të cilat për ne më parë nuk imagjinoheshin. 

Shqipëria renditet krah vendeve me traditë ndërvjeçare sepse ju besuat te stërvitja, profesionalizmi dhe te pasioni juaj. Ju jeni dëshmia se ëndrrat e të rinjve nuk kanë kufij.” 

Të paktën 25 persona u vranë kur militantë të dyshuar të grupit Boko Haram sulmuan një qytet në veri të Nigerisë.

Ky është sulmi islamist më vdekjeprurës i raportuar që nga dita e Krishtlindjes, kur presidenti amerikan Donald Trump urdhëroi bombardime ajrore.

Siç shkruan Reuters, viktimat ishin punëtorë që kishin udhëtuar drejt qytetit Sabon Gari në shtetin verilindor të Borno-s për të punuar në një kantier ndërtimi, kur persona të armatosur sulmuan të enjten dhe hapën zjarr.

Aliyu Ndume, një senator që përfaqëson rajonin, tha se ishte “i tronditur dhe i pikëlluar” nga vrasja e bashkëqytetarëve të tij.

Në një sulm tjetër militant, po të enjten në Borno, të paktën nëntë ushtarë dhe dy anëtarë të një force civile ndihmëse u vranë nga luftëtarë që sulmuan një bazë ushtarake para agimit. Gjithsej 16 persona u plagosën.

Borno, ku luftëtarët e Boko Haram dhe të Islamic State West Africa Province (ISWAP) kanë intensifikuar sulmet ndaj autokolonave ushtarake dhe civilëve, mbetet epiqendra e kryengritjes islamiste 17-vjeçare.

Nigeria, e goditur nga sulme islamiste dhe rrëmbime masive, është nën presion shtesë për të rikthyer sigurinë, pasi Trump e akuzoi vitin e kaluar se nuk po mbron të krishterët.

Forcat amerikane goditën atë që e përshkruan si objektiva terroristë më 25 dhjetor. Autoritetet nigeriane thonë se po bashkëpunojnë me Uashingtonin për të përmirësuar sigurinë.

O’Hara e filloi karrierën e saj në komedi në vitet 1970 dhe ndihmoi në krijimin e emisionit kanadez të skeçeve SCTV. Ajo hyri në kinema në vitet 1980 me rolin e saj të parë në ekranin e madh në komedinë romantike Nothing Personal me Donald Sutherland dhe në vitin 1985 ajo pati një rol në komedinë e zezë të Martin Scorsese, After Hours.

O’Hara luajti nënën e Macaulay Culkin në komedinë e suksesshme të vitit 1990, Home Alone, një rol që ajo e riinterpretoi edhe për vazhdimin e vitit 1992.

Ajo filloi të punonte me Christopher Guest në vitin 1996, duke luajtur role kryesore në dokumentarin mockup “Waiting for Guffman” dhe duke luajtur në tre filma të tjerë të tij: “Best in Show”, “A Mighty Wind” dhe “For Your Consideration”.

O’Hara ishte parë së fundmi në serialin komik fitues të çmimeve The Studio.

Virusi vdekjeprurës  “Nipah” që ka vënë në alarm disa vende aziatike për shkak të një vatre të vogël të shfaqur në Indi, nuk ka rrezik imediat për Shqipërinë. Shefja e kontrollit të sëmundjeve infektive në ISHP  Prof.Silva Bino sqaron se vurusi nuk përhpet në rrugë ajrore  por përmes kontakteve të ngushta  mes njerzve dhe nga ushqimet e kafshët e infektuara. Bino tregon shenjat dhe këshillon udhëtarët drejt këtyre vendeve të marrin informacion.

Një virus pa vaksinë, pa trajtim specific që monitorohet nga OBSH dhe potencialisht vdekjeprurës .

Quhet “Nipah” dhe është shfaqur në Indi me dy persona të infektuar në Bengalin perendimor dhe 200 të karantimuar.

Alarmi  ka bërë që disa vende aziatike të forcojnë masat e kontrollit në aeroporte por përaphja e tij mbetet minimael. Shefja e sëmundjeve infektive Silva Bino thotë se vendi ynë nuk paraqet rrezik imediat për këtë lloj virusi.

“Rreziku i futjes dhe përhapjes së këtij virusi në vendin tonë është tepër minimal. Janë minimale sepse qarkullimi i tij në Bengalin Perëndimor është i pakët. Numri i udhëtarëve që shkojnë në këtë vend është minimal. Ekosistemi ynë, ai europian, nuk përbën rrezik për transmetimin e këtij virusi. Transmetimi i këtij virusi vjen nga lakuriqët e natës, kafshët shtëpiake dhe jo vetëm, ushqimet si dhe nga kontaktet e ngushta mes njerëzve.”

Transmetimi I këtij virusi vjen nga lakuriqët e natës, kafshëve shtëpiake dhe jo vetëm,  ushqimeve si dhe nga kontaktet e ngushta mes njerzve.

“Transmetimi nga njeriu tek njeriu ndodh nëpërmjet kontaktit të ngushtë dhe nëpërmjet spërklave. Nuk është një virus që qëndron për një kohë të gjatë në ajër, sikurse është virusi i Fruthit, Covid apo gripi. Është një virus i rrezikshëm sepse shkakton patologji të rënda, ka vdekshmëri të lartë, por është i rrezikshëm sepse transmetohet nëpërmjet disa rrugëve transmetuese.”

Sëmundja që shkakton virusi nuk ka shenja specifike e për rrejdhojë vështirë të diagnstikohet pa teste laboratorike

““Lidhet me temperaturë, dhimbje koke, dhimbje muskulare, dhimbje fyti apo marrje mendsh dhe të vjella. Pastaj kalon në shenjat e tjera respiratore që mund të shkojnë deri në insuficiencë akute respiratore dhe inflamacion të trurit.”

Profesoreshë Bino rrezikshmëria e udhëtareve ndaj këtyre vendeve mbetet tepër e ulët por rekomandon këshillimin përpara se ata të nisen.

Nga Vilant Xhori

Dy ditë më parë, në Asamblenë Parlamentare të Këshillit të Europës, Sali Berishës iu pre fjala nga drejtuesja e seancës me një formulë sa teknike aq edhe simbolike: “Mikrofoni juaj është i fikur. Nuk keni më përkthim.” Në pamje të parë, një incident procedural. Në thelb, një metaforë e saktë e pozitës ku ndodhet sot politikisht: një figurë që flet, por nuk dëgjohet më; që kërkon të rikthejë vëmendjen ndërkombëtare, por përballet me heshtjen institucionale. Ashtu si mikrofoni i fikur në Strasburg, edhe përpjekjet për të lehtësuar “non Grata” përmes lobimit kanë hasur në të njëjtin mur: mungesën e vullnetit politik për të dëgjuar dhe përkthyer një narrativë bazuar në një histori politike që tashmë nuk kërkon më as dëgjim dhe as përkthim..

Pra, shpallja “non grata” e Sali Berishës nga Shtetet e Bashkuara të Amerikës nuk përbën as një episod të përkohshëm të diplomacisë amerikane, as një keqkuptim teknik që mund të korrigjohet përmes kontratave lobuese apo strategjive të marketingut politik. Ajo është, në thelb, një akt thellësisht politik, i mbështetur mbi parime normative që lidhen me shtetin e së drejtës, luftën kundër korrupsionit dhe mbrojtjen e institucioneve demokratike. Pikërisht për këtë arsye, përpjekjet për ta paraqitur këtë vendim si të kthyeshëm përmes ndërhyrjeve financiare jo vetëm që dështojnë praktikisht, por zbulojnë edhe një keqkuptim thelbësor të natyrës së vetë “non grata”-s si instrument i politikës së jashtme amerikane.

Në marrëdhëniet ndërkombëtare, “non grata” nuk është një sanksion formal juridik, por një gjykim politik mbi një bilanc sjelljesh. Ajo nuk i referohet një episodi të izoluar apo një vendimi të momentit, por një historie të gjatë veprimesh që, sipas vlerësimit të ShBA-së, kanë cenuar besimin publik, kanë minuar demokracinë, kanë dobësuar pavarësinë institucionale dhe kanë forcuar kulturën e pandëshkueshmërisë. Në këtë kuptim, “non grata” e Berishës është më shumë një pasqyrë e një modeli qeverisjeje sesa një ndëshkim personal.

Ajo që e bën situatën edhe më domethënëse është fakti se, pas shpalljes “non grata”, sjellja politike e z. Berisha nuk ka reflektuar as pendesë, as ndryshim kursi. Përkundrazi, ajo ka konsoliduar pikërisht ato tipare që e kanë justifikuar vendimin fillestar. Në vend të transparencës eshte zgjedhur errësira,  në vend të respektimit te organave të drejtësisë është zgjedhur shantazhimi i tyre, në vend të respektimit të standarteve demokratike vashdohet me minimin e tyre dhe pse?

Së pari, përpjekjet për lobim në Shtetet e Bashkuara, të shoqëruara me pagesa milionëshe dhe të realizuara përmes strukturave jo gjithmonë transparente, kanë prodhuar më shumë dyshime sesa sqarime. Në vend që të kontribuonin në zbardhjen e së vërtetës, këto kontrata kanë nxjerrë në pah një problem themelor: mungesën e qartësisë mbi burimin e fondeve. Në një kontekst ku afera si Gërdeci apo Kompleksi Partizani janë bërë simbole të ndërthurjes së pushtetit politik me interesat private, errësira financiare nuk është thjesht çështje procedurale, por substancë politike. Lobimi, në këtë prizëm, nuk shfaqet si instrument transparence, por si tentativë për të reduktuar një problem moral dhe ligjor në një çështje imazhi.

Së dyti, një nga arsyet kyçe të shpalljes “non grata” ka qenë presioni sistematik mbi drejtësinë. Sot, kjo arsye jo vetëm që mbetet e vlefshme, por është bërë edhe më e dukshme. Diskursi publik i përdorur ndaj SPAK-ut dhe institucioneve të reja të drejtësisë është i mbushur me kërcënime, delegjitimim dhe përpjekje për frikësim. Kjo gjuhë nuk është thjesht retorikë elektorale; ajo është shprehje e një refuzimi të hapur të parimit të ndarjes së pushteteve dhe e një frike ekzistenciale nga llogaridhënia.

Së treti, po aq serioz është edhe minimi i demokracisë, veçanërisht brenda Partisë Demokratike. Sali Berisha ka ndërtuar një model të centralizuar dhe personal të ushtrimit të pushtetit, ku pluralizmi i brendshëm, konkurrenca e ideve dhe rinovimi politik perceptohen si kërcënime dhe jo si vlera. Ky model ka prodhuar një opozitë të ngurtësuar, të kapur pas së shkuarës, e paaftë për të ofruar vizion alternativ dhe për të përmbushur funksionin e saj kushtetues. Rasti i Ervin Salianjit është ilustrues: në vend që të trajtohet si pjesë e një procesi normal të qarkullimit të elitave politike, ai shndërrohet në target për t’u përjashtuar, duke dërguar një mesazh të qartë se mendimi i pavarur dhe sfida ndaj autoritetit personal nuk tolerohen. Filozofi dhe politikani francez Alexis de Tocqueville do ta quante këtë një formë të “tiranisë së butë”, ku frika zëvendëson bindjen.

Në këtë prizëm, “non grata” e Berishës është një çështje parimesh dhe standardesh, jo negociatash financiare. Heqja e saj përmes lobimit do të dërgonte një mesazh thellësisht të rrezikshëm: se korrupsioni mund të mbulohet me para, se drejtësia mund të frikësohet me shantazh dhe se demokracia mund të sakrifikohet në emër të interesave personale. Për sa kohë që këto sjellje vazhdojnë dhe mungon çdo formë reflektimi apo llogaridhënieje reale, shpallja “non grata” jo vetëm që mbetet e justifikuar, por shndërrohet në një domosdoshmëri morale dhe politike.

“Boll me molotovë”, ishte ky mesazhi i raportuesit për Shqipërinë Andreas Schieder.

Avokati Idajet Beqiri, “skanoi” deklaratat e raportuesit të Parlamentit Evropian për Shqipërinë, Andreas Schieder, duke thënë se qëndrimet ishin të qarta.

Në një intervistë në “Tirana Live” në ABC News, avokati theksoi se armiku më i madh i Shqipërisë është kreu i PD Sali Berisha, duke e akuzuar këtë të fundit si përgjegjës kryesor të shkatërrimit të vendit.

“Në Shqipëri të vetmit që e mbrojnë Berishë janë afro 3 mijë kriminelë që ka në organizatën e tij kriminale. Por ato janë njerëz që kanë përfituar prej tij, kanë vrarë prej tij dhe janë të detyruar që të mblidhen pas komandës së tij. Pra ata e besojnë dhe i shkojnë nga pas. Por Shqipëria dhe shqiptarët i kanë kthyer kurrizin. Ai ngelet misionar i Serbisë…”, shtoi më tej avokati Idajet Beqiri.