Tensionet në Los Anxhelos janë përshkallëzuar pasi mijëra protestues dolën në rrugë duke kundërshtuar dislokimin e trupave të Gardës Kombëtare nga presidenti Donald Trump të dielën.

Protestuesit bllokuan një autostradë të rëndësishme dhe ua vënë zjarrin disa makinave vetëdrejtuese, ndërsa forcat e rendit përdorën gaz lotsjellës, plumba gome dhe shpërthime verbuese për ta kontrolluar turmën.

Shumë protestues u shpërndanë pas rënies së natës, kur policia e shpalli tubimin e tyre të paligjshëm, i cili është paralajmërim për ndërhyrjen dhe arrestimin e atyre që nuk largohen.

Disa nga ata që nuk u larguan hodhën gjësende drejt policisë mbrapa një barrikade të improvizuar që shtrihej përgjatë një rruge, ndërsa të tjerë gjuajtën copa betoni, gurë, skuterë elektrikë dhe fishekzjarrë drejt oficerëve të Patrullës së Autostradës së Kalifornisë dhe mjeteve të tyre të parkuara në autostradën 101 në drejtim të jugut. Oficerët u strehuan nën një mbikalim.

Protestat e së dielës në Los Anxhelos, një qytet me 4 milionë banorë, u përqendruan në disa blloqe në qendër të qytetit.

Kjo ishte dita e tretë dhe më e ashpër e demonstratave kundër vendimit të Trumpit për luftimin e imigracionit në rajon, ndërsa vendosja e 300 trupave të Gardës Kombëtare shkaktoi zemërim dhe frikë te shumë banorë.

Garda u dërgua në Los Anxhelos në veçanti për t’i mbrojtur ndërtesat federale, përfshirë qendrën e ndalimit në qendër të qytetit, ku u përqendruan protestuesit.

Shefi i Policisë së Los Anxhelosit, Jim McDonnell, tha se oficerët ishin “dominuar” nga protestuesit e mbetur. Ai shtoi se në mesin e protestuesve ka edhe provokatorë të rregullt që marrin pjesë në demonstrata për të nxitur trazira.

Dhjetëra persona u arrestuan gjatë fundjavës së protestës. Një person u ndalua të dielën për hedhjen e një koktej molotovi ndaj policisë dhe një tjetër për përplasjen e motoçikletës drejt një vargu oficerësh.

Trump iu përgjigj McDonnellit në Truth Social, duke i kërkuar t’i arrestojë protestuesit me maska në fytyrë.

“Duket shumë keq në LA. SJELLINI TRUPAT!!!” shkroi ai.

Përleshjet u përshkallëzuan me mbërritjen e trupave të Gardës Kombëtare
Trupat e Gardës mbërritën të pajisur me armë të gjata dhe mburoja kundër turmës, ndërsa protestuesit brohorisnin “turp” dhe “shkoni në shtëpi”.

Njëkohësisht, Departamenti i Policisë së Los Anxhelosit (LAPD) qëlloi me municion për kontrollimin e turmës për të shpërndarë protestuesit, për të cilët tha se u mblodhën në mënyrë të paligjshme. Pjesa më e madhe e grupit më pas bllokoi trafikun në autostradën 101 derisa oficerët e patrullës shtetërore i larguan ata nga rruga deri në orët e pasdites.

Aty pranë, të paktën katër makina vetëdrejtuese, Waymo, u vunë në zjarr, duke krijuar re të mëdha tymi të zi dhe shpërthime herë pas here teksa makinat elektrike digjeshin. Në mbrëmje, policia lëshoi një urdhër për shpërndarje të turmës dhe mbylli disa blloqe në qendër të Los Anxhelosit.

Guvernatori demokrat i Los Anxhelosit, Gavin Newsom, kërkoi nga Trump t’i tërheqë trupat e Gardës në një letër të dielën pasdite, duke e quajtur dislokimin “shkelje serioze të sovranitetit të shtetit”.

Kjo është hera e parë në dekada që Gardë Kombëtare shtetërore aktivizohet pa kërkesën e guvernatorit.

Newsom dhe kryetarja e bashkisë së Los Anxhelosit, Karen Bass, fajësuan vendimin e Trumpit për të dislokuar Gardën për përshkallëzimin e protestave, duke e quajtur vendimin e tij veprim që synon të nxisë tensione. Ata u kanë bërë thirrje protestuesve të qëndrojnë paqësorë.

“Ajo që po shohim në Los Anxhelos është kaos i provokuar nga administrata”, tha ajo në një konferencë shtypi pasdite. “Kjo ka të bëjë me një agjendë tjetër, jo me sigurinë publike”.

Por, McDonnell, shefi i LAPD-së, tha se protestat po ndjekin një model të njohur të trazirave civile, me intensifikim në ditën e dytë dhe të tretë.

Mbërritja e Gardës Kombëtare pasoi dy ditë protestash që nisën të premten në qendër të Los Anxhelosit, dhe më pas u përhapën të shtunën në Paramount, një qytet me shumicë latine në jug të qytetit, dhe në Comptonin fqinj.

Agjentët federalë arrestuan emigrantë në qarkun e modës të Los Anxhelosit, në një parking të Home Depot-it dhe në disa vende të tjera të premten.

Sipas autoriteteve federale, numri i përgjithshëm i emigrantëve të arrestuar në zonën e Los Anxhelosit këtë javë kaloi 100. Shumë të tjerë u arrestuan gjatë protestave, përfshirë një udhëheqës të njohur sindikate, i akuzuar për pengim të policisë.

Protestat nuk arritën përmasat e demonstratave të mëparshme që sollën Gardën Kombëtare në Los Angeles, siç ishin rebelimet e Watts, Rodney King dhe protestat e vitit 2020 kundër dhunës policore, për të cilat Newsom kërkoi ndihmën e trupave federale.

Hera e fundit që Garda Kombëtare u aktivizua pa lejen e një guvernatori ishte në vitin 1965, kur presidenti Lyndon B. Johnson dërgoi trupa për të mbrojtur një marshim për të drejtat civile në Alabama, sipas Qendrës Brennan për Drejtësi.

Në një dekret të shtunën, Trump përmendi një dispozitë ligjore që e lejon atë të dislokojë forcat federale kur ka “një rebelim ose rrezik për rebelim kundër autoritetit të Qeverisë së Shteteve të Bashkuara”.

Ai tha se kishte autorizuar dislokimin e 2.000 pjesëtarëve të Gardës Kombëtare. REL/

The post Përshkallëzohen protestat në Los Anxhelos, teksa Trump dislokon Gardën Kombëtare appeared first on Sot News | Lajme.

Klevis Balliu, deputet i Partisë Demokratike, i ftuar në studion e “Off the Record”, u pyet nëse do të ishte dakord me një grevë urie brenda Parlamentit si pjesë e strategjisë së opozitës.

“Unë mendoj që ne duhet të provojmë gjithçka. Nuk duhet përjashtuar asgjë. Thjesht, duhet ta mendojmë mirë çdo akt që do të ndërmarrim dhe duhet të bëjmë plane afatgjatë për aksionin tonë politik. Mendoj që thelbësore në këtë kohë është informimi i ndërkombëtarëve për krimin elektoral të Edi Ramës dhe lidhjet që ka ai me krimin e organizuar”, tha Balliu.

Në vijim ai shtoi se “ka një dezinformim nëpërmjet disa kulisave të PS që vetëm gjezdisin nëpër botë për të dezinformuar aleatët e vendit tonë. Kjo qasje duhet kombinuar edhe me aksione të tjera”. Kur u pyet se çfarë do të ndodhë gjatë verës, Balliu tha se “ne kemi bërë protesta gjatë verës, por nuk është misioni i opozitës vetëm të bëjë protesta”.

“Opozita nuk do bëjë dot asgjë nëse shoqëria nuk mbështet një plan për të sjellë zgjedhjet e lira dhe të ndershme. Të bëjë çfarë të dojë opozita. Demokracitë lindin nga revolta qytetare në çdo vend”, sqaroi Balliu.

The post Nga protestat te greva e urisë në Kuvend, Balliu ‘zbulon’ strategjinë e PD-së kundër Ramës appeared first on Sot News | Lajme.

Pamje që rikujtojnë Amerikën Latine të viteve ’70 janë regjistruar në rrugët e Los Anxhelosit, ku agjentët e Imigracionit (ICE) janë përballur me protestuesit gjatë një sërë aksionesh për arrestimin dhe deportimin e emigrantëve të paligjshëm. Operacionet, të mbështetura me gaz lotsjellës, plumba jo vdekjeprurës, armë dhe uniforma ushtarake, u zhvilluan në zona si Home Depot në distriktin Westlake dhe në Fashion District.

Agjentët kishin në shënjestër biznese të dyshuara për punësim të emigrantëve pa dokumente. Protestuesit, të shumtë në numër dhe me pankarta “Arsimim, jo depërtim”, i rrethuan ata, duke shkaktuar përplasje të ashpra. Më shumë se 40 persona u arrestuan, mes tyre edhe një sindikalist. Sipas dëshmitarëve, një prej operacioneve është zhvilluar edhe në një shkollë në Koreatown.

Policia e qytetit refuzoi të marrë pjesë në operacion, ndërsa Konsullata e Përgjithshme e Meksikës ofroi ndihmë ligjore për shtetasit e saj të ndaluar. Drejtoresha e organizatës CHIRLA, Angelica Salas, deklaroi se “komuniteti është nën sulm dhe i terrorizuar”. Kryebashkiakja Karen Bass i cilësoi aksionet si shkelje të parimeve të qytetit dhe nxitje të frikës në komunitet.

Presidenti Donald Trump, përmes një postimi në Truth Social, lajmëroi ndërhyrjen e qeverisë federale për të “zgjidhur problemin e revoltave dhe plaçkitësve”, duke kritikuar ashpër autoritetet lokale. Zyrtarët e administratës paralajmëruan edhe dërgimin e Gardës Kombëtare me 2 mijë trupa.

Tensionet janë përhapur në të gjithë vendin, me protesta në qytete si San Diego, Çikago, Minneapolis, Atlanta e Houston. Aktivistë amerikanë, përfshirë qytetarë të bardhë, po formojnë zinxhirë njerëzorë për të mbrojtur emigrantët, ndërsa ICE është detyruar të tërhiqet në disa raste, nën presionin e qytetarëve dhe kamerave.

Ndërkohë, rasti i Kilmar Abrego Garcia ka shkaktuar zemërim: ai ishte deportuar gabimisht në Salvador pa gjyq, pavarësisht një urdhri mbrojtjeje. I rikthyer tashmë në SHBA, ai mbahet në burg në Tennessee. Fotoja e publikuar nga Trump, që e lidhte atë me një bandë kriminale, rezultoi të ishte false. Një nga hetuesit e çështjes ka dhënë dorëheqjen, duke e akuzuar administratën për motivime politike pas padisë.

The post SHBA/ Protesta dhe përplasje për bastisjet kundër emigrantëve, Trump urdhëron dërgimin e 2 mijë ushtarëve appeared first on Sot News | Lajme.

Mijëra qytetarë protestuan në rrugët e Sofjes kundër planit të qeverisë për kalimin e Bullgarisë në eurozonë. Protestuesit, të organizuar nga partia e djathtë ekstreme “Ringjallja”, mbanin flamuj kombëtarë dhe pankarta me mbishkrimin “Larg duart nga monedha jonë!”, duke shfaqur kundërshtimin e tyre ndaj zëvendësimit të levës me euron.

Tensionet u reflektuan edhe në parlament, ku deputetët e “Ringjalljes” bllokuan foltoren dhe përshkallëzuan situatën me përplasje fizike. Një nga udhëheqësit e kësaj partie, Tsoncho Ganev, shtyu deputetin Yavor Bozhankov nga partia “Vazhdojmë Ndryshimin”, duke shkaktuar kaos në sallën plenare.

Këto zhvillime pasojnë miratimin nga Komisioni Europian dhe Banka Qendrore Europiane të raportit të konvergjencës që konstaton se Bullgaria i ka përmbushur kushtet ekonomike për të hyrë në eurozonë në fillim të vitit 2026. Me këtë hap, Bullgaria do të bëhej vendi i 21-të anëtar i zonës së përbashkët monetare.

Pavarësisht përpjekjeve për integrim që prej hyrjes në BE në vitin 2007, mbështetja publike për euron ka rënë ndjeshëm. Sipas sondazhit të fundit të Eurobarometrit, rreth gjysma e bullgarëve shprehen skeptikë për adoptimin e monedhës së përbashkët, duke ngritur shqetësime për ndikimin e saj në rritjen e çmimeve.

The post ‘Larg duart nga monedha jonë!’/ Protesta në Bullgari, qytetarët kundër kalimit në euro appeared first on Sot News | Lajme.

Presidenti amerikan ka nisur një sulm të ashpër ndaj Harvardit.

Masa më e fundit e njoftuar dje nga administrata Trump ishte t’u kërkonte autoriteteve federale të hartonin një listë të kontratave që kanë nënshkruar me Harvardin dhe të informonin “nëse ato mund të anulohen ose të ridrejtohen diku tjetër”. Sipas shtypit amerikan, shuma totale e këtyre kontratave arrin në 100 milionë dollarë.

“Trump = tradhtar”, shkruhej në një nga pankartat që mbanin protestuesit, mes thirrjeve studentët e huaj, të cilët republikani dëshiron t’i pengojë të studiojnë në universitetet amerikane me arsyetimin se disa vijnë nga vende “që nuk janë aspak miqësore me SHBA-në”.

Megjithatë, një gjyqtar federal në Massachusetts pezulloi përkohësisht anulimin e certifikimit të Sistemit të Informacionit për Studentët dhe Vizitorët e Shkëmbimit (SEVIS) të Harvardit për vitin akademik 2025-26, i cili ishte kërkuar nga Sekretarja e Sigurisë Kombëtare të SHBA-së, Christie Noem.

The post Protesta në SHBA, studentët dalin kundër presidentit amerikan për pezullimin e vizave studentore appeared first on Sot News | Lajme.

Evi Kokalari, aktivistja shqiptaro-amerikane, ka reaguar lidhur me tensionet dhe përplasjet që u krijuan mes disa eksponentëve të PD-së dhe mbështetësve të tyre me gazetarë, që ishin duke raportuar atë se çfarë po ndodhte në bulevardin ‘Zogu I’ në Tiranë, në një kohë kur më pak se 1 km më tutje po zhvilloheshin punimet e Komunitetit Politik, ku merrnin pjesë liderët europianë.

Kokalari, nisur incidenteve që ndodhën në protest, shkruan në rrjetin social se përfundimisht PD-ja e Sali Berishës është parti dhune.

“Përfundimisht PD-ja e Berishës është parti dhune. Me morri shumë kohë ta kuptoja dhe besoja, por ishte e qartë pse Berisha nuk e kancelloi kurrë 8 Janarin. Të gjitha shancet ishin që aty do kishte dhunë, por Berisha atë donte. Naiviteti im që i shpjegoja që dyert e blinduara nuk hapen me ‘locksmith’ të zakonshem dhe shtyllat e çimentove që donin të përdornin për të hapur dyert.

Atë ditë, përveç demokratëve janë helmuar dhe gazetarët dhe kameramanët që ja kërkonte detyra të rrinin aty dhe të raportonin.

Sot e kësaj dite, se kam dëgjuar kurrë Berishen apo dhe të tjerë në atë parti ti kërkojnë falje demokratëve që ishin prezent dhe as gazetarëve që nuk i kishin asnjë borxh asnjërës palë.

Pastaj dhuna vazhdoi në Parlament. Tashti që humbën pikërisht se janë ky nivel i ulët, i kthehen gazetarëve, meshkuj dhe femra, duke i sulur dhe protestuesit që me të drejtë janë të mërzitur nga kjo humbje e thellë.

Jam pa fjalë, dhe uroj që demokratët e ndershëm të PD-së së rithemelimit të reagojnë dhe t’ju kërkojnë falje gazetareve për çfarë ndodhi sot.

Nuk e meritojnë”, shkruan Kokalari.

The post “Humbën se janë nivel i ulët”, Kokalari “shpërthen” ndaj Berishës:Kurrë s’i kërkuan falje as demokratëve, as gazetarëve appeared first on Sot News | Lajme.

Ndërkohë që po zhvillohet protesta e opozitës, disa nga deputetët e Partisë Demokratike kanë refuzuar të flasin për kamerën e Euronews Albania ndërkohë që media ka shkuar për të pasqyruar protestën.

Është e paprecedentë ndërkohë që shkon për të pasquruar një protestë të tyre, për të ngritur edhe shqetësimet që demkratët kanë, gazetarët sulmohen nga eksponent politik dhe pjesëmarrës në protestë.

I pari ishte deputeti demokrat Edi Paloka i cili i kërkoi gazetares Sara Demushi të mos e intervistojë, e madje i kërkoi asaj largimin e kamerës. Pas tij në mënyrë të ngjashme reagoi edhe Aldo Bumçi i cili u shpreh se nuk u pyet nëse donte të fliste për Euronews Albania, ndaj nuk pranoi të fliste.

The post E paprecedentë/ Edi Paloka dhe demokratët sulmojnë gazetarët në protestë appeared first on Sot News | Lajme.

Një grusht i vogël militantësh të Sali Berishës kanë zgjedhur që të protestojnë ditën që në Tiranë mbahet Samiti i Komunitetit Politik Europian, që solli në kryeqytet të gjithë liderët e Europës. Protesta vjen pas pretendimeve të Partisë Demokratike për vjedhjen e zgjedhjeve.

“Një masakër zgjedhor si ajo e 11 majit nuk do njihet kurrë nga PD dhe opozita. OSBE vuri në dukje që në Shqipëri ka patur një masakër zgjedhore, përdorimi i administratës, i bandave kriminale”, tha Flamur Noka.

Berisha iu bashkua protestës pas vizitës në Bruksel, ku ishte i vetëm për të denoncuar në një takim vjedhjen e zgjedhjeve.

Protesta po mbahet në Bulevardin e Ri pranë  Ministrisë së Drejtësisë, vetëm 400 metra nga zona ku zhvillohej Samiti. Në protestë u shfaqën eksponentë të tjerë të Partisë Demokratike, si Flamur Noka, Gazment Bardhi, Agron Gjekmakaj, Klevis Balliu, Belind Këlliçi apo edhe Jorida Tabaku.

The post Nga Brukseli në protestë/ Berisha gjen vetëm pak të zemëruar në shesh, vetëm një grusht militantësh me PD appeared first on Sot News | Lajme.

Drejtuesi politik i PD në Qarkun e Tiranës Belind Këlliçi tha se ‘kryeministri Rama nuk do të gëzojë mandatin e vjedhur dhe se Partia Demokratike ka prova që zgjedhjet e 11 majit janë manipuluar’.

Sipas tij ky është një problem i shqiptarëve dhe theksoi gjithashtu se në Shqipëri kanë vdekur institucionet zgjedhore dhe zgjedhjet e lira.

“Rama nuk do ta gëzojë mandatin e vjedhur. Partia Demokratike ka prova për manipulimin e zgjedhjeve. Ne do të solidarizojmë cilido shqiptar për vjedhjen e zgjedhjeve në 11 maj. Ky është një problem i shqiptarëve dhe mund të them se këtu kanë vdekur institucionet zgjedhore dhe zgjedhjet e lira.” tha ai.

Më tej Këlliçi shtoi se Partia Demokratike nuk do të tërhiqet pasi është një betejë jetë a vdekje dhe se kreu i qeverisë i ka zhytur duart thellë në rezultatet fituese në zgjedhjet e 11 majit.

“Ne nuk do të tërhiqemi nga kjo betejë pasi është një betejë jetë a vdekje. Rama i zhyti duart aq thellë sa mori atë rezultat.” përfundoi Këlliçi.

 

The post “Kjo është një betejë jetë a vdekje”, PD ngre akuza të rënda: Rama i zhytur në manipulim, s’do e gëzojë fitoren appeared first on Sot News | Lajme.

Pas më shumë se pesë muajsh protestash, studentët në Serbi kanë kërkuar shpërbërjen e menjëhershme të Kuvendit dhe shpalljen e zgjedhjeve të parakohshme parlamentare, duke sfiduar si Qeverinë ashtu edhe opozitën.

Studentët protestues e arsyetuan kërkesën e tyre përmes një njoftimi në Instagram se “pushteti nuk po tregon as iniciativën më të vogël” për t’i përmbushur kërkesat e tyre.

Përgjegjësia për vdekjen e 16 njerëzve nga rrëzimi i një strehe betoni në stacionin hekurudhor në Novi Sad, si dhe ndjekja penale e atyre që kanë sulmuar studentë dhe pjesëmarrës të tjerë gjatë protestave, janë ndër kërkesat kryesore që studentët ua kanë paraqitur institucioneve të Serbisë.

“Konstatojmë se rrënjët e korrupsionit të pushtetit kanë depërtuar thellë në institucionet shtetërore, duke pamundësuar ushtrimin e pavarur të detyrave nga këto institucione”, thuhet në deklaratën e studentëve, e publikuar më 5 maj.

Në rast se mbahen zgjedhje, studentët kanë bërë të ditur se nuk do të paraqesin listë kandidatësh, por do të mbështesin ato parti apo lista që, sipas tyre, mund të formojnë një qeveri që do t’i përmbushë kërkesat e tyre.

Si po reagon opozita ndaj kërkesës së studentëve?

Shumica e partive opozitare kanë shprehur mbështetje për studentët protestues dhe për kërkesën e tyre për zgjedhje të parakohshme parlamentare.

Partia Demokratike (DS) ka deklaruar se është e gatshme të ofrojë “çdo ndihmë për një listë universitare-studentore”, por vetë nuk do të garojë në ato zgjedhje. Megjithatë, DS-ja thekson se “në Serbi nuk ekzistojnë kushte për zgjedhje të lira dhe të ndershme”.

Fronti i gjelbër majtist (ZLF) e konsideron të arsyeshme kërkesën për zgjedhje të reja, duke thënë se “Partia Përparimtare Serbe (SNS) ka humbur çdo legjitimitet për të udhëhequr vendin”. Ata theksuan se qëllimi i tyre kryesor është rrëzimi i pushtetit aktual.

Mbështetje për këtë kërkesë kanë dhënë edhe lëvizja Kreni-promeni (Lëviz-Ndrysho), Kryengritja Ekologjike dhe Partia Socialdemokrate (SDS).

“E vetmja mënyrë për të dalë nga kjo situatë e rëndë dhe jashtëzakonisht e rrezikshme është mbajtja e zgjedhjeve të parakohshme parlamentare”, ka shkruar Boris Tadiq, kryetar i SDS-së, në rrjetin social X.

Kryetari i Partisë së Re Demokratike të Serbisë (NDSS), Millosh Jovanoviq, ka deklaruar se është “dëm i madh nëse është hequr dorë nga ideja e një Qeverie tranzitore”.

“NDSS ende beson se kjo është e vetmja zgjidhje e mundshme, që mund të realizohet vetëm nëpërmjet bashkimit të të gjithë qytetarëve me bindje opozitare”, tha Jovanoviq për agjencinë Beta.

Lëvizja Popullore e Serbisë, nën udhëheqjen e Miroslav Alleksiq, ka qenë për zgjedhje të parakohshme edhe para kërkesës së studentëve.

Deri në përfundim të këtij artikulli, Partia e Lirisë dhe e Drejtësisë (SSP) nuk është prononcuar për zgjedhjet e mundshme të parakohshme.

Si po reagon pushteti?

Partia Përparimtare Serbe (SNS) nuk i është përgjigjur pyetjes së Radios Evropa e Lirë për kërkesën e studentëve.

Kryetarja e Kuvendit, Ana Bërnabiq, ka shkruar në rrjetin X se “kërkesat origjinale të studentëve” kanë të bëjnë me prokurorinë dhe gjyqësorin, dhe jo me pushtetin legjislativ apo ekzekutiv.

“Ato institucione nuk ndryshohen nëpërmjet zgjedhjeve parlamentare”, ka shkruar Bërnabiq.

Ajo ka vënë në dyshim edhe kërkesën e studentëve për shpalljen e konkursit për anëtarët e rinj të Këshillit të Entit Rregullator për Mediat Elektronike (REM), për të cilin komisioni përkatës parlamentar ka njoftuar se do të mbahet më 8 maj.

“Nëse tani kërkoni shpërbërje urgjente dhe të pakushtëzuar të Kuvendit, përse e keni bllokuar RTS-në për 15 ditë?”, ka shkruar Bërnabiq në rrjetin X.

Studentët kanë bllokuar ndërtesat e RTS-së për dy javë, duke kërkuar shpalljen e një konkursi të ri për përzgjedhjen e anëtarëve të Këshillit të REM-it.

Komisioni për Informim i Kuvendit ka nisur këtë procedurë më 28 prill, dhe siç është bërë e ditur, njoftimi publik do të publikohet më 8 maj në Fletoren Zyrtare.

Kryetari i Partisë Socialiste të Serbisë (SPS), Ivica Daçiq, partner i koalicionit të SNS-së, ka deklaruar se nuk sheh arsye për zgjedhje të parakohshme.

“Qeveria ka një shumicë të qëndrueshme parlamentare. Nuk jam për ngjarje të jashtëzakonshme, por për zgjedhje të rregullta – dhe këtë nuk e kam fshehur kurrë”, ka thënë Daçiq për TV Pink.

Opozita “në provë”

Analisti politik Boshko Jakshiq i ka thënë Radios Evropa e Lirë se kërkesa e studentëve është “epilog logjik dhe i pritshëm i ngjarjeve të muajve të fundit”.

Sipas tij, kjo kërkesë është “një provë e madhe” për opozitën.

“Nëse partitë opozitare nuk janë të gatshme të lënë mënjanë identitetet e tyre dhe të bashkohen në një front të vetëm, ato që nuk e bëjnë këtë, apo shprehin rezerva, mund të përjashtohen nga skena politike”, ka thënë Jakshiq.

Rruga deri te kërkesa për zgjedhje

Pas shembjes së strehës në stacionin hekurudhor në Novi Sad më 1 nëntor, shpërthyen protesta në shumë qytete të Serbisë.

Protestat udhëhiqen nga studentët që për më shumë se pesë muaj kanë bllokuar fakultetet duke kërkuar drejtësi për vdekjen e 16 njerëzve.

Studentët kanë marrë mbështetje nga profesorët, punëtorët e arsimit, bujqit, avokatët, aktorët dhe një pjesë e qytetarëve.

Ndërkohë, Serbia ka emëruar një kryeministër të ri. Kuvendi i Serbisë më 16 prill ka votuar për një qeveri të re, e cila udhëhiqet nga endokrinologu dhe profesori i Fakultetit të Mjekësisë në Beograd, Gjuro Macut.

Qeveria e re u formua pas dorëheqjes së Millosh Vuçeviqit në fund të janarit, i cili u tërhoq nga posti pas incidentit ku anëtarë të SNS-së, partisë që ai udhëheq, rrahën një studente në Novi Sad.

Në mes të prillit, me nismën e presidentit Aleksandar Vuçiq, u formua në Beograd “Lëvizja për popullin dhe shtetin”. Vuçiq i paraqiti kërkesat e tij institucioneve për “rivendosjen e rendit në shtet” dhe “respektimin e plotë të Kushtetutës”.

Zgjedhjet e fundit parlamentare u mbajtën në dhjetor 2023, pas muajsh protestash pas dy masakrave në maj, ku humbën jetën 19 njerëz, shumica fëmijë dhe të rinj.

Sipas vëzhguesve vendorë dhe ndërkombëtarë, zgjedhjet u shoqëruan me një sërë parregullsish dhe opozita i cilësoi si “të pandershme” dhe “të manipuluara”.

Pas akuzave, Misioni i ODIHR-it i OSBE-së dha 25 rekomandime për përmirësimin e kushteve të zgjedhjeve.

U formua edhe një grup punues me përfaqësues të pushtetit, opozitës dhe shoqërisë civile.

Nemanja Nenadiq, drejtor programor i “Transparency Serbia”, tha për REL se në vitin 2025 nuk është mbajtur asnjë mbledhje e këtij grupi.

“Jo vetëm që nuk janë mbajtur mbledhje, por struktura nuk ekziston më siç ishte planifikuar fillimisht”, tha ai.

Ai shtoi se kjo ndodhi pasi përfaqësuesit e opozitës dhe të OJQ-ve, përfshirë “Transparency Serbia”, vendosën të largohen për shkak të mungesës së përgjigjeve nga ana e pushtetit.

Nenadiq paralajmëron se tani ka rreziqe të reja për barazinë e garës zgjedhore dhe përdorimin e burimeve publike në fushata.

“Partia në pushtet ka mbajtur aktivitete të rëndësishme pa i prezantuar si të vetat, por duke përfshirë strukturat shtetërore”, tha ai.

Si shembull, ai përmendi tubimin e prillit të organizuar nga presidenti Vuçiq për promovimin e “Lëvizjes për popullin dhe shtetin”.

“Edhe sot nuk dihet kush ishte organizatori zyrtar i atij tubimi”, tha ai.

Përmirësimi i kushteve zgjedhore ishte gjithashtu temë e takimeve të komisionares për zgjerim të BE-së, Marta Kos, në Beograd, ku ajo bëri thirrje për reforma dhe përmbushje të obligimeve ndaj BE-së.

Në raportin e fundit, raportuesi i Parlamentit Evropian për Serbinë, Tonino Picula, ka theksuar rëndësinë e zbatimit të plotë të rekomandimeve të ODIHR-it përpara çdo zgjedhjeje të re./REL

The post Kërkesa e studentëve në Serbi për zgjedhje të parakohshme, provë për pushtetin dhe opozitën appeared first on Sot News | Lajme.

Studentët protestues në Serbi po kërkojnë zgjedhje të parakohshme, si mënyrën e vetme për të dalë nga kriza politike që ka përfshirë vendin pas muajsh protestash kundër korrupsionit dhe pasigurisë publike.

Në një deklaratë të publikuar në rrjetet sociale nga organizatorët e protestave, theksohet se votimi i parakohshëm është zgjidhja e vetme për të rikthyer besimin në institucionet e vendit. Ky reagim vjen pas tragjedisë së 1 nëntorit, kur tenda prej betoni e stacionit të trenit në Novi Sad u shemb duke shkaktuar vdekjen e 16 personave. Stacioni ishte rinovuar dy herë më parë, por hetimet dhe kritikat publike theksojnë se korrupsioni dhe mosrespektimi i rregullave të sigurisë ishin faktorët kryesorë të aksidentit fatal.

Fatkeqësia shkaktoi një valë të fuqishme protestash, të udhëhequra nga studentë dhe aktivistë të shoqërisë civile, të cilat kanë fituar mbështetje masive nga qytetarët, duke mobilizuar qindra mijëra njerëz në të gjithë vendin. Kërkesat kryesore janë vendosja e drejtësisë, transparenca dhe rivendosja e sundimit të ligjit.

Megjithatë, kërkesa për zgjedhje të parakohshme është hedhur poshtë nga kryetari i Partisë Progresive Serbe në pushtet dhe ish-kryeministri Milos Vuçeviç, i cili paralajmëroi se shpërbërja e parlamentit dhe caktimi i zgjedhjeve të reja do të sillte “katastrofë” për vendin.

The post Protestat në Serbi, studentët kërkojnë zgjedhje të parakohshme pas katastrofës në Novi Sad appeared first on Sot News | Lajme.

Studentët në Serbi, po bëjnë thirrje për zgjedhje të parakohshme parlamentare për të kapërcyer krizën.

“Ne kërkojmë shpërbërjen e menjëhershme të Asamblesë Kombëtare dhe shpalljen e zgjedhjeve të parakohshme parlamentare në përputhje me nenin 109 të Kushtetutës së Republikës së Serbisë!” Besojmë se demokracia është e vetmja mënyrë e duhur për të zgjidhur një krizë politike të këtyre përmasave, prandaj i bëjmë thirrje popullit të mbështesë listën që do t’u besohet studentëve që janë të përjashtuar nga të gjitha institucionet e arsimit të lartë në territorin e Serbisë, në mënyrë që peshorja e drejtësisë të anojë nga e vërteta”, njoftuan studentët në rrjetet sociale, ndërsa u bënë thirrje gjithashtu të gjithë qytetarëve t’i besojnë listës politike që studentët do të mbështesin në zgjedhje.

The post Studentët kërkojnë zgjedhje të parakohshme parlamentare/ Protesta në Serbi… appeared first on Sot News | Lajme.

Studentët e Universitetit të Beogradit e kanë bllokuar ndërtesën e Radiotelevizionit të Serbisë (RTS), transmetuesit publik, për ditën e tetë radhazi duke pretenduar se ky medium nuk raporton në mënyrë objektive për protestat e tyre. Studentët kërkojnë që të shpallet konkurs i ri për anëtarët e Këshillit të Organit Rregullativ për Mediat Elektronike (REM).

Ndërkohë, RTS-ja ka njoftuar se, për shkak të rrethanave të vështira të punës, është e detyruar ta përshtatë skemën programore, dhe se ka bërë kallëzim penal në Prokurorinë Publike Themelore në Beograd kundër personave të panjohur organizatorëve të bllokadës, dhe se ka kërkuar reagim nga institucionet ndërkombëtare.

Prokuroria e Lartë Publike në Beograd ka njoftuar opinionin se, në rast se ndodh ndonjë vepër penale, kryesit do të identifikohen dhe ndiqen penalisht në përputhje me ligjin. Studentët kanë qëndruar para RTS-së pandërprerë edhe gjatë katër ditëve të festës së Pashkëve. Atyre u janë bashkuar atje edhe studentë nga qytete të tjera të Serbisë. Veçanërisht vëmendjen e kanë tërhequr studentët nga Novi Pazari, qytet në Serbi me shumicë boshnjake.

Që nga nëntori i vitit të kaluar, studentët e universiteteve shtetërore në Serbi i kanë bllokuar dhjetëra fakultete dhe kanë organizuar protesta të vazhdueshme, duke kërkuar përgjegjësi dhe ndjekje penale në lidhje shembjen e strehës në stacionin hekurudhor në Novi Sad, si pasojë e të cilës humbën jetën 16 njerëz.

Gjatë bllokadës, RTS-ja po e përshtat programin e tij, duke transmetuar filma artistikë apo dokumentarë në vend të programeve të mëngjesit ose emisioneve të tjera. Emisionet kryesore informative po realizohen si një seri kronikash të regjistruara, pa prezantues në studio, duke përfshirë edhe pamje të përzgjedhura nga televizione të tjera.

Redaksia e RTS-së ka bërë thirrje disa herë për t’i dhënë fund bllokadës, duke deklaruar se bllokimi i objekteve dhe pengimi i punonjësve të shërbimit publik në punën e tyre përbën presion të papranueshëm ndaj një mediumi në të cilin qytetarët kanë besuar për vite me radhë.  Gjithashtu, transmetuesi publik ka njoftuar se në rrjetet sociale dhe në sipërfaqe publike po shpërndahen dhe ekspozohen fotografi të redaktorëve dhe gazetarëve të tyre, të cilët paraqiten si armiq të popullit.

Një pjesë e punonjësve të Radiotelevizionit të Serbisë tha më 22 prill se e kupton pakënaqësinë ndaj disa vendimeve redaktuese në programin informativ të televizionit, dhe se nuk dëshiron të identifikohet me to, por se gjithashtu dëshiron që bllokimi i Shërbimit Publik të përfundojë sa më shpejt që të jetë e mundur, në mënyrë që të fillojë puna dhe të ndryshohet RTS-ja.

Studentët që po mbajnë bllokadën kanë deklaruar se transmetuesi publik serb “punon kundër të gjithëve neve”, dhe se Rregullatori i Shërbimeve Mediale nuk ekziston.

Studentët e Universitetit të Beogradit po ashtu i kanë dërguar një letër Komisionit për Kulturë dhe Informim të Kuvendit të Serbisë, në të cilën kanë njoftuar se bllokada dhe protesta para RTS-së do të vazhdojnë derisa Komisioni të shpallë thirrjen publike për zgjedhjen e anëtarëve të Këshillit të REM-it.

Që nga nëntori i vitit 2024, Këshilli i Organit Rregullativ për Mediat Elektronike (REM) nuk është funksional, pasi anëtarëve u ka përfunduar mandati, duke pamundësuar kështu marrjen e shumë vendimeve të këtij institucioni.

Presidenti i Serbisë, Aleksandar Vuçiq, ka dënuar bllokadën studentore në Radiotelevizionin e Serbisë dhe ka bërë thirrje që institucionet përkatëse të ndërmarrin masa të ndryshme në ditët në vijim për të rivendosur rendin dhe qetësinë publike. Ai i ka akuzuar studentët dhe qytetarët që i mbështesin ata në bllokimin e RTS-së se po përpiqen me dhunë ta rrëzojnë shtetin dhe themelet e tij.

Pushteti në Serbi, përndryshe, protestat për rrëzimin e strehës i përshkruan si një revolucion me ngjyra që ka për qëllim rrëzimin e dhunshëm të shtetit. Kryetarja e Kuvendit të Serbisë, Ana Bërnabiq, ka deklaruar të dielën se bllokimi i RTS-së përbën vepër penale, dhe ka shprehur shpresën që të gjitha institucionet kompetente do ta bëjnë punën e tyre.

Bërnabiq ka përsëritur se kërkesat e studentëve janë vetëm një pretekst për ardhjen në pushtet të opozitës. Bashkimi Evropian, ndërkohë, ka njoftuar se është i vetëdijshëm për bllokimin e RTS-së dhe se po e ndjek nga afër situatën e brendshme politike në Serbi. BE-ja ka bërë thirrje për sundim të ligjit dhe institucione të forta, përgjegjëse dhe demokratike.

Kjo nuk është hera e parë që bllokohen shërbimet publike mediale në Serbi. Studentët e Beogradit dhe Novi Sadit u mblodhën papritur më 10 mars para objekteve të mediave publike dhe ua bllokuan të gjitha hyrjet, duke kërkuar raportim objektiv për protestat. Ajo bllokadë zgjati rreth 20 orë./REL

The post Protesta në Beograd, studentët bllokojnë ndërtesën e transmetuesit publik për të tetën ditë radhazi appeared first on Sot News | Lajme.

Mijëra protestues u mblodhën ditën e djeshme në Uashington dhe në qytete të tjera të Shteteve të Bashkuara për të shprehur pakënaqësinë ndaj politikave të Presidentit Donald Trump. Të fokusuar kryesisht në çështje si deportimet, pushimet masive nga puna në administratën federale dhe qëndrimet në lidhje me luftërat në Gaza dhe Ukrainë, protestuesit u ngritën me pankarta dhe thirrje të forta për drejtësi.

Në qendër të Uashingtonit, përballë Shtëpisë së Bardhë, qytetarë nga shtresa të ndryshme të shoqërisë protestuan me pankarta ku lexohej: “Punëtorët duhet të kenë pushtetin”, “Jo mbretërimit”, “Ndalo armatosjen e Izraelit” dhe “Proces i rregullt ligjor”.

Një pjesë e protestuesve dolën në mbështetje të emigrantëve që administrata Trump ka deportuar ose tenton të deportojë. Ata shprehën gjithashtu solidaritet me punonjësit e pushuar nga institucionet federale dhe me universitetet që, për shkak të politikave të reja, mund të humbasin fondet shtetërore.

“Ndërkohë që Trump dhe administrata e tij aktivizojnë makinerinë e deportimit, ne do të organizojmë rrjete dhe forma rezistence për të mbrojtur fqinjët tanë”, tha një protestues gjatë tubimit pranë Shtëpisë së Bardhë.

Një tjetër segment i protestës mbajti flamuj palestinezë dhe shallë keffiyeh, duke kërkuar “Liri për Palestinën” dhe duke nderuar viktimat e luftës në Gaza. Në të njëjtën kohë, nuk munguan edhe ata që i kërkonin qeverisë amerikane një qëndrim më të vendosur ndaj agresionit të Rusisë në Ukrainë.

Sipas raportimeve, protestuesit shprehën shqetësimin e tyre edhe për dobësimin e strukturave të qeverisë federale. Prej marrjes së mandatit në janar, Presidenti Trump, në bashkëpunim me Elon Musk, ka pushuar nga puna mbi 200 mijë punonjës dhe ka ndërmarrë hapa për të shpërbërë disa agjenci shtetërore, duke ngjallur reagime të forta në opinionin publik.

The post Protesta në SHBA kundër politikave të Trump/ Qytetarët në rrugë për emigracionin, luftërat dhe shkarkimet nga puna appeared first on Sot News | Lajme.

Arrestimi i kryebashkiakut të Stambollit, Ekrem Imamoglu, ka shkaktuar reagime të forta ndërkombëtare, përfshirë edhe protesta në Berlin. Qindra qytetarë u mblodhën në Kishën Përkujtimore në Berlin-Charlottenburg, duke kërkuar lirimin e tij dhe duke dënuar veprimet e autoriteteve turke.

Sipas gazetës gjermane Borkener Zeitung, shumë prej protestuesve mbanin maska me fytyrën e Imamoglu si shenjë solidariteti, ndërsa të tjerë ishin veshur me të bardha, duke përcjellë mesazhin e tij për reformë dhe drejtësi.

Arrestimi i Imamoglu ka ngritur shqetësime për lirinë politike në Turqi, ndërsa komuniteti ndërkombëtar po ndjek nga afër zhvillimet dhe reagimet e qeverisë turke ndaj opozitës.

The post Arrestimi i kryebashkiakut të Stambollit, mbështetësit e tij organizojnë protesta edhe në Berlin appeared first on Sot News | Lajme.

Qindra grenlandezë dolën në rrugë të shtunën për të protestuar kundër presidentit amerikan Donald Trump, për të marrë kontrollin e ishullit të tyre.

Pamjet treguan turmat e mbledhura në kryeqytetin, Nuuk, duke valëvitur flamurin e Grenlandës dhe duke mbajtur pankarta me mesazhe të tilla si “Respektoni sovranitetin e Grenlandës”, “Ne nuk jemi për shitje’, etj.

Jens-Frederik Nielsen, kreu i partisë së qendrës së djathtë Demokraatit që fitoi zgjedhjet parlamentare të kësaj jave, iu bashkua kryeministrit në largim Mute B. Egede për të udhëhequr protestuesit drejt konsullatës së SHBA në periferi të Nuuk.

“Ne duam të jemi vetvetja dhe autonomia dhe liria jonë nuk do të vihen kurrë në debat,” tha Nielsen gjatë mitingut.

“Nuk ka asnjë shans më të vogël që unë të flas me Trumpin që Grenlanda të bëhet pjesë e SHBA. Grenlanda do të jetë Grenlandë,” tha ai.

Duke folur për gazetën grenlandeze Sermitsiaq të shtunën, Egede e quajti qasjen e presidentit amerikan “plotësisht të papranueshme”.

Çfarë ka thënë Trump për Grenlandën?

Gjatë muajve të fundit, Trump ka shprehur vazhdimisht interesin e tij për të marrë kontrollin e Grenlandës.

Presidenti amerikan e ngriti sërish idenë të enjten gjatë një takimi me shefin e NATO-s Mark Rutte në Shtëpinë e Bardhë.

Kur u pyet nga një gazetar për një aneksim të mundshëm, Trump tha: “Unë mendoj se do të ndodhë”.

Ai vazhdoi duke thënë se territori ishte themelor për sigurinë kombëtare të SHBA-së, duke theksuar se SHBA tashmë ka baza ushtarake atje.

Ishulli i rëndësishëm strategjik i Arktikut është shtëpia e vetëm 57,000 banorëve dhe është një territor vetëqeverisës i Danimarkës.

The post Groenlandezët thonë ‘Jo!’ për aneksimin e ishullit nga Trump, qindra protestues ‘pushtojnë’ rrugët appeared first on Sot News | Lajme.

Eksperti i sigurisë Bedri Elezi ka komentuar protestat e studentëve në Beograd për të cilat u shpreh se ato do të vijojnë deri në rrëzimin e Aleksandër Vuçiç nga pushteti për ti hapur rrugë zgjedhjeve të reja dhe një tjetër qeverie.

I ftuar në një intervistë televizive, ai tha se grupet kriminale janë të fuqishme në Serbi dhe se ato duhet të largohen, teksa theksoi se ka organizata terroriste të cilat duan që protesta të eskalojë në nivel ballkanik.

Sipas tij struktura të shërbimit sekret janë të përfshira në këto protesta dhe se kemi dhe përplasje mes protestuesve dhe institucioneve serbe.

“Në fakt shumë interesante se si po zhvillohen protestat në Serbi dhe është Një sinjal serioz se ato protesta nuk do pushojnë derisa Vuçiç të hapë krahun dhe të krijohen kushtet për zgjedhje te reja që të kemi një pushtet tjetër.

Në Vuçiç nuk është i gatshëm ta bëjë këtë do përballet me beteja serioze. Ne jemi të bindur se këto protesta të fuqishme do arrijnë ta rrëzojnë Vuçiç sepse siç shihet nga momenti në moment këta studentë të rinj janë të gatshëm të mos dorëzohen por të riorganizohen dhe të vijojnë me këtë nismë deri në rrëzimin e tij.

Është parë se kërkesat e tyre janë të qarta dhe njëjta. Njëkohësisht të rinjtë serbë e kanë parë se grupet kriminale të përfshihrë në jetën politike të Serbisë duhet të largohen që vendi të vijojë rrugën drejt BE dhe pse siç duket ka elementë që në këto protesta janë përfshirë nga një strukturë e pushtetit në Serbi.

Ne kemi informacion apo më mirë dyshojmë së përfshirja e kësaj strukture ka dhe qëllimin që të shfrytëzojë këtë situatë të rëndë që situata të dalë jashtë kontrollit për të cenuar dhe sigurinë e vendeve të tjera.

Ne kemi informacione, madje është diskutuar në komunitete të ndryshme se struktura të caktuara të shërbimit sekret Dia janë të fuqishëm sepse kanë qenë në organizmin e këtyre protestave por me njerëz të tjerë të prezantuara si struktura të moderuara që qëndronin pas këtyre protestave. Ata kanë për synim eskalimin e situatës në Ballkan, prandaj themi se pas këtyre janë nënkontraktorë të shërbimeve serbe që njihen për të tilla veprime dhe organizime.

Kemi njëlloj përplasje të protestuesve me institucionet e Serbisë, njëkohësisht kemi njëlloj hezitimi të organizatorëve të protestës për të përfshirë opozitën serbe e cila duket më e interesuar për të vijuar me integrimin e Serbisë.”

The post Protestat masive në Beograd, eksperti: Sinjal serioz, tregojnë se studentët nuk do tërhiqen deri në rrëzimin e Vuçiç appeared first on Sot News | Lajme.

Shtatë persona janë proceduar penalisht për shkak të protestës së organizuar nga Partia Demokratike dhe Aleanca për Mbrojtjen e Teatrit para bashkisë së Tiranës.

Sipas policisë, protestuesit kanë bllokuar rrugën dhe penguar qarkullimin e mjeteve përfshirë dhe ato të transportit publik dhe emergjencës duke vendosur një automjet në mes të rrugës.

Dje ishte protesta e 41-të e zhvilluar para Bashkisë së Tiranës. Kjo protestë ashtu siç edhe protestat e tjera kanë si qëllim që kryebashkiaku Erion Veliaj të largohet nga detyra pas zbardhjes së dosjes “5D”.

NJOFTIMI I POLICISË:

Tiranë

Specialistët për Hetimin e Krimit në Komisariatin e Policisë Nr.1, në vijim të veprimeve hetimore e procedurale të kryera nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, proceduan penalisht në gjendje të lirë shtetasit:

A.L, 24 vjeç, E.V, 33 vjeç, B.K, 38 vjeç, A.K,53 vjeç, K.B, 36 vjeç, E.E, 35 vjeç dhe G.S, 56 vjeç, të gjithë banues në Tiranë.

Procedimi penal në ngarkim të këtyre shtetasve filloi pasi, më datë 10.01.2025, rreth orës 11:00 gjatë tubimit të zhvilluar nga Aleanca për Mbrojtjen e Teatrit, para Bashkisë Tiranë, kanë bllokuar rrugën dhe penguar qarkullimin e mjeteve përfshirë dhe ato të transportit publik dhe emergjencës duke vendosur një automjet në mes të rrugës.

Materialet procedurale i kaluan Prokurorisë, për veprime të mëtejshme.

The post Bllokuan rrugën në protestën para bashkisë Tiranë ditën e djeshme, e pësojnë keq 7 persona appeared first on Sot News | Lajme.

Studentët serbë zhvilluan një tjetër protestë sot në Beograd, duke paralizuar qarkullimin në kryeqytet.

Të mbledhur në kryqëzimin kryesor të Mostarit, ata shfaqën moton e tyre “Ejani në Mostar, nëse keni guxim”, e cila ishte promovuar ditë më parë si thirrje për veprim.

Protesta filloi para Pallatit të Drejtësisë, ku studentëve iu bashkuan edhe akademikë. Fakultetet e Vozhdovcit bllokuan autostradën që lidh këtë zonë me Beogradin e Ri, ndërsa pjesa tjetër e studentëve bllokoi të gjitha rrugët hyrëse dhe dalëse të kryqëzimit të Mostarit. Kjo shkaktoi ndërprerjen e qarkullimit në të gjithë zonën, duke krijuar kaos të plotë.

Protestuesit po kundërshtojnë korrupsionin në radhët e qeverisë dhe kërkojnë dorëheqjen e presidentit Aleksandar Vuçiç. Ata kanë theksuar vendosmërinë e tyre për të mos hequr dorë nga kërkesat, përfshirë përcaktimin e përgjegjësisë për një tragjedi në Novi Sad, ku humbën jetën 15 persona dhe u plagosën rëndë dy të tjerë pas shembjes së një stacioni hekurudhor të rindërtuar.

Protesta u shoqërua me fishkëllima, thirrje dhe slogane si “Të gjithë në bllokada”, duke treguar qëndresën e tyre përballë autoriteteve.

The post Protestë e fuqishme studentore në Beograd, bllokohet kryqëzimi kryesor i kryeqytetit serb appeared first on Sot News | Lajme.

Në Serbi, situata është tensionuar pas një tragjedie që ndodhi në Novi Sad, ku një shembje e strehës së jashtme të një ndërtesë të Stacionit Hekurudhor shkaktoi vdekjen e 15 personave. Pothuajse 60 fakultete shtetërore ndaluan punën në shenjë solidariteti dhe iu bashkuan protestave studentore, duke kërkuar drejtësi për viktimat dhe ndëshkimin e përgjegjësve për incidentin, si dhe ata që sulmuan qytetarët dhe studentët gjatë protestave.

Një ngjarje tjetër që ka ndodhur kohët e fundit ka tensionuar më shumë situatën, pasi një video që po qarkullon në rrjetet sociale tregon një shofer të një makine Audi që thyen bllokimin e rrugës dhe tenton të shtypë protestuesit pa ulur shpejtësinë.

Kjo ngjarje është vetëm një nga shumë të ngjashmet që janë raportuar në ditët e fundit, ku shoferë automjetesh kanë tentuar të godasin protestuesit që bllokonin rrugët.

Protestuesit po akuzojnë korrupsionin dhe punimet e dobëta të kryera në ndërtesën e stacionit hekurudhor, e cila ka kaluar disa rinovime të dyshimta në vitet e fundit si pjesë e projekteve që përfshijnë kompanitë shtetërore kineze. Ata kërkojnë që Presidenti Aleksandar Vučić dhe të tjerët përgjegjës për shembjen e çatisë, të përballen me drejtësinë. Deri tani, autoritetet kanë arrestuar 13 persona, përfshirë një ministër që më vonë u lirohet, duke rritur mosbesimin e publikut ndaj procesit të hetimeve.

Protestat e organizuara kanë sfiduar pushtetin e Vučić, të cilit i bëhet akuza për një sundim gjithnjë e më autokratik, ndërsa kërkesat për drejtësi dhe transparencë janë bërë më të zëshme.

Ivanjica
Direktan pokušaj ubistva ljudi na blokadama pic.twitter.com/FBp7aT6lab

— Bora (@BoraKonj) December 27, 2024

“>

The post Video/ E rëndë në Serbi, tentohen të shtypen me makinë protestuesit anti-Vuçiç appeared first on Sot News | Lajme.