Qeveria portugeze ka reaguar pas vrasjes së turistit 20-vjecar në Ksamil.

Sipas mediave vendase, qeveria shprehet se po monitoron rastin e vrasjes së turistit portugez në Shqipëri.

Raquel Trindade, nga zyra e Ministrit të Punëve të Jashtme, thotë se nuk ka informacion zyrtar për atë që ka ndodhur dhe as informacion për hetimet.

“Ministria e Punëve të Jashtme po ndjek rastin e këtij shtetasi portugez që vdiq në Shqipëri dhe, nëpërmjet ambasadës së saj në Romë dhe gjithashtu konsullatës së nderit në Tiranë, po bashkëpunojmë me autoritetet lokale”, komentoi zyrtarja, e cila konfirmoi për Renascença se, “për momentin”, ende nuk dihet saktësisht se çfarë ka ndodhur.

“Ne e dimë nga shtypi lokal se ka pasur arrestime, por për momentin nuk kemi ende informacion përmes rrjetit tonë”, shton Raquel Trindade, e cila siguron se Ministria e Punëve të Jashtme “do të vazhdojë të monitorojë atë që është e nevojshme, si me autoritetet lokale ashtu edhe me familjet”.

Bullgaria ka rritur masat e sigurisë në Bazën Ajrore Bezmer pas një raporti në media të mërkurën se forcat iraniane kishin vlerësuar objektiva të mundshme ushtarake në Evropën Juglindore.

Ministri i Brendshëm Ivan Demerdzhiev tha se Bullgaria kishte marrë “të gjitha masat e mundshme” në bazë në koordinim me ministrinë e mbrojtjes, raportoi agjencia bullgare e lajmeve BTA.

“Ne po e monitorojmë vazhdimisht situatën dhe zhvillimet dhe do të vazhdojmë të marrim masa paraprake që janë shumë më të gjera dhe intensive sesa niveli i kërcënimit i treguar nga informacioni i disponueshëm në këtë moment”, tha Demerdzhiev.

Komentet erdhën ndërsa raportet thanë se forcat iraniane vlerësuan sulme të mundshme ndaj aseteve ushtarake amerikane në vendet e Evropës Juglindore, përfshirë Bullgarinë, e cila muajin e kaluar miratoi përdorimin e bazës ajrore Bezmer nga avionët amerikanë të furnizimit me karburant.

Më 22 korrik, parlamenti i Bullgarisë autorizoi deri në tetë avionë furnizimi me karburant ajror KC-135 të Forcave Ajrore Amerikane dhe deri në 250 personel ushtarak amerikan që të stacionohen në Bezmer nga 24 korriku deri më 1 tetor.

Vendosja ka për qëllim të mbështesë operacionet e SHBA-së në Lindjen e Mesme.

Humbja e parakohshme e 15-vjeçarit Alvi Muhaxhiri, i cili u shua si pasojë e aksidentit tragjik të ndodhur gjatë natës, ka lënë pas një dhimbje të papërshkrueshme për miq, familjarë e të gjithë njerëzit e tij të afërm.

Shkolla ku ai kryente studimet ka bërë një dedikim prekës për të miturin, duke shkruar se ikja e tij e parakohshme ka lënë një boshllëk të madh, ndërsa shpreh ngushëllime ndaj familjarëve për këtë tragjedi.

“Me hidhërim të thellë e zemër të thyer mësuam lajmin për ndarjen e parakohshme nga jeta të nxënësit tonë të dashur Alvi  Muhaxhiri.  Ikja e tij kaq e shpejtë la një boshllëk të madh në bankat e shkollës sonë dhe në zemrat e të gjithë mësuesve e shokëve të tij.

Në këto momente të vështira, i shprehim ngushëllimet më të sinqerta familjarëve. Zoti ju dhëntë forcë për të përballuar këtë dhimbje të papërshkrueshme.  Kujtimi dhe buzëqeshja e tij do të mbeten përherë të gjalla në shkollën tonë. U prehtë në paqe shpirti yt Alvi! “, thuhet në reagim.

Në aksidentin tragjik humbën jetën edhe çifti i sapomartuar, Kleo Vrioni dhe partnerja e tij italiane Sara Brugentelli. Të plagosur mbetën Rejsi Vrijoni, 25 vjeç, dhe Klevis Dervishi, 16 vjeç.

Një shtëpi private është djegur nga zjarri që ra në zonën e rrugës “Njazi Meta”, poshtë zonës së QSUT-së në Tiranë.

Në vendngjarje mbërritën menjëherë forcat zjarrfikëse, të cilët vunë flakët nën kontroll.

Nuk raportohet për persona të lënduar, megjithatë një tym i dendur u raportua në zonë deri në momentin e fikjes së flakëve
Dyshimet e para janë se zjarri mund të ketë nisur nga një shkëndijë elektrike.

Dinamo City është gati për një tjetër sfidë të rëndësishme europiane. Skuadra e drejtuar nga Ilir Daja do të luajë nesër në mbrëmje ndeshjen e parë të play-off-it të UEFA Conference League ndaj Pafos, në “Elbasan Arena”, në orën 21:00.

Pas një paraqitjeje fantastike ndaj Audës, ku triumfoi me rezultatin 4-0 në “Elbasan Arena” dhe përmbysi humbjen 1-0 të ndeshjes së parë në Letoni, Dinamo City siguroi kualifikimin në play-off dhe tashmë është vetëm një hap larg fazës së ligës së UEFA Conference League.

Blutë vijnë në këtë përballje me besim të lartë, pas një tjetër mbrëmjeje të suksesshme në arenën europiane. Përballë do të jetë Pafos, në një sfidë që pritet të jetë një tjetër provë e fortë për skuadrën shqiptare. Dinamo City do të kërkojë të shfrytëzojë faktorin fushë dhe mbështetjen e tifozëve për të marrë një rezultat sa më pozitiv në ndeshjen e parë të këtij raundi.

Presidenti rus Vladimir Putin ka pranuar se fushata me dronë e Ukrainës kundër rafinerive dhe infrastrukturës së saj të naftës po ndikon në ekonomi.

Ai mbeti sfidues ndaj ekonomisë së Rusisë, duke pretenduar: “Të dhënat statistikore tregojnë se performanca ekonomike, ndonëse modeste në përgjithësi, mbetet pozitive.”

Prokuroria Speciale dhe Instituti i Mjekësisë Ligjore thanë se në Zubin Potok, në lokacionet ku dyshohet se ka varre masive, bazuar në vlerësimet preliminare janë identifikuar mbetje kockore që dyshohet se u përkasin të paktën 23 individëve.

“Identifikimi i plotë do të bëhet pas përfundimit të ekzaminimeve mjeko-ligjore dhe procedurave përkatëse”, u tha në njoftim.

Kryeministri në detyrë i Kosovës, Albin Kurti, më herët kishte deklaruar se mbetjet mortore të gjetura në Kalludër të Vogël, mund t’u përkasin grupit të 23 shqiptarëve që ishin zhdukur në atë pjesë të Kosovës në vitin 1999.

Ky grup, i njohur si “grupi i intelektualëve të Mitrovicës” është i zhdukur që nga 19 prilli i vitit 1999. Në mesin e tyre kishte mjekë, profesorë, avokatë dhe profile të tjera.

Gërmimet në Zubin Potok nisën më 28 korrik dhe gërmimet janë kryer në Kalludër të Vogël, Jakubë dhe në një lokacion tjetër në këtë komunë, në veri të Kosovës.

Gërmimet nisën pas një hetimi dyvjeçar lidhur me dyshimet për krime lufte.

Më 15 gusht, autoritetet kishin njoftuar se në Kalludër ishin gjetur mbetje eshtërore të të paktën tre personave.

“Aktualisht, lidhur me këtë rast janë duke u hetuar tre persona J.R., M.J dhe M.B. nën dyshimin për kryerjen e veprës penale ‘Krime lufte kundër popullsisë civile’, të cilët ndodhen në masën e paraburgimit”, tha Prokuroria Speciale e Kosovës.

Njëri nga të arrestuarit, sipas autoriteteve, dyshohet se në kohën e luftës kishte qenë pjesë aktive e Armatës Jugosllave.

Sipas Institutit të Krimeve të Kryera Gjatë Luftës në Kosovë, 1.577 persona vazhdojnë të jenë të zhdukur nga lufta e viteve 1998-1999, ndërsa janë dokumentuar gjithsej 12.230 viktima të luftës.

Kosova ka kërkuar vazhdimisht nga Serbia bashkëpunim për zbardhjen e fatit të personave të zhdukur dhe qasje në arkivat ushtarake që sipas autoriteteve mund të ndihmojnë në identifikimin e lokacioneve të varreve të mundshme./REL

“Jam vetëdorëzuar, i prisja që të vinin”. Kështu është shprehur para Gjykatës së Tiranës Ylli Zalla, i cili u arrestua pas disa muajsh në arrati dhe sot u njoh me masën e sigurisë “arrest në burg”.

Gjatë seancës gjyqësore, 49-vjeçari ka mohuar se përbën rrezikshmëri të lartë shoqërore, ndërsa ka pretenduar se ndodhet nën kërcënim për jetën.

“Duan të më vrasin. Policia më ka futur në hasmëri me…”, mësohet të ketë deklaruar Zalla para gjykatës, duke iu referuar edhe sulmit me tritol ndaj banesës së tij, ngjarje pas së cilës ai publikoi një video.

Mbrojtja ka kërkuar një masë më të lehtë sigurie, duke kundërshtuar argumentin se 49-vjeçari paraqet rrezikshmëri të lartë shoqërore.

Sipas avokatëve, armët dhe municionet e sekuestruara gjatë arrestimit janë gjetur në një zonë me ferra, pas banesës së tij, dhe nuk kanë qenë të ruajtura apo të ambalazhuara në mënyrë që të tregonin përdorim të menjëhershëm.

Megjithatë, Gjykata e Tiranës ka vendosur masën e sigurisë “arrest në burg” për Zallën.

Drejtimi i mjetit mbi limitin e shpejtësisë së rrugës dyshohet se çoi në aksidentin e mëngjesit të kësaj të mërkure ku humbën jetën 3 të rinj në Durrës.

Shpejtësia duket se është një ndër shkeljet e rrezikshme që pavarësisht ashpërsimit të masave vijon të përsëritet në shifra mjaft të larta. Vetëm një javë blutë në të gjithë vendin kanë pezulluar më shumë se 1500 patenta vetëm për këtë shkelje. Ekspertët tregojnë se shpejtësia, shoqëruar dhe me mungesë sinjalistike, rezulton fatale. “Shpejtësia s’i jep kohë drejtuesit të manovrojë. Ajo rrugë ka kthesa të rrezikshme. Duhet më shumë sinjalistikë”, tha eksperti Gëzim Hoxha.

Me qëllim parandalimin e aksidenteve para 2 javësh ndryshuan dhe disa nene të Kodit Rrugor. Mes tyre heqja përjetë e patentës për përsëritësit e kapur me alkool, ndërsa përdorimi i celularit mund të sjellë pezullimin e patentës. Me ndryshimet e reja gjobat për manovrat e rrezikshme arrijnë në 60 mijë lekë. Megjithatë sipas ekspertëve këto masa nuk mjaftojnë.

“Pas çdo aksidenti duhet bërë një hetim i thelluar: makina, rruga, sinjalistika, drejtuesi, pastaj të hartohen rregullore e VKM”, tha eksperti Gëzim Hoxha.

Pavarësisht ndryshimeve të herëpashershme të Kodit Rrugor apo të fushatave nga Policia Rrugore për të parandaluar aksidentet, numri i viktimave në rrugë çdo vit vijon të jetë shqetësues.

Një aksident i rëndë ka ndodhur ditën e sotme në zonën turistike të Komanit, ku dy mjete lundruese të llojit skaf janë përplasur me njëra-tjetrën në afërsi të Lumit të Shalës.

Siç raportohet nga informacionet e para nga terreni, nga përplasja mes dy mjeteve dyshohet se kanë mbetur të plagosur 5 persona.

Njoftimi i policisë:

Si pasojë e përplasjes, janë dëmtuar 5 shtetas, të cilët ndodhen jashtë rrezikut për jetën, ndërsa shtetasit e tjerë që ndodheshin në mjetet lundruese nuk kanë pësuar dëmtime.

Grupi hetimor po kryen veprimet për sqarimin e plotë të rrethanave të ngjarjes.

Në deklarimet paraprake përballë grupit hetimor, Sokrat Vata, autori i dyshuar i vrasjes së turistit portugez, ka shpjeguar dinamikën e ngjarjes.

Vata ka pretenduar përballë hetuesve se sherri ka nisur fillimisht mes turistëve, të cilët kanë qenë edhe nën efektin e alkoolit. Sipas tij, atyre u është kërkuar të ruanin qetësinë, pasi në lokal ndodheshin edhe persona të tjerë.

Por, duke qenë se situata nuk është qetësuar, ka nisur përplasja fizike mes tyre. Vata ka theksuar se thikën me të cilën është goditur 21-vjeçari nuk e kishte me vete, por pretendon se ajo ishte në dorën e viktimës.

Momenti i goditjes me thikë të 21-vjeçarit nuk është fiksuar nga kamerat e sigurisë, për shkak të distancës së largët dhe errësirës.

Sipas policisë, 21-vjeçari portugez kishte ardhur në Shqipëri së bashku me disa miq të tij dhe kishte qëndruar prej gati një jave në vendin tonë.

Ndërkohë, familjarët e 21-vjeçarit ende nuk janë paraqitur në polici për të kryer procedurat për tërheqjen e trupit.

Sipas hetimeve, ngjarja e rëndë që çoi në vrasjen e 20-vjeçarit portugez në Ksamil ka nisur rreth orës 05:15 të mëngjesit të 18 gushtit, në ambientet e lokalit “Principote”, dhe më pas ka vijuar në plazhin “Paradise”.

Sipas Policisë, Sokrat Lipan, alias Sokrat Vata, 29 vjeç, dyshohet se gjatë konfliktit e ka goditur disa herë me thikë 20-vjeçarin portugez. Ndërkohë, David Heurtevent, 29 vjeç, i shpallur në kërkim, dyshohet se e ka goditur viktimën me grushte. Të dy janë të dyshuar për veprën penale “vrasje me dashje në bashkëpunim”.

Përpara përdorimit të thikës, në konflikt dyshohet se janë përfshirë edhe katër kamerierë të lokalit “Principote”: Serxhi Selimi, Ervis Bunci, Ildi Cekani dhe Murat Zhabina. Sipas hetimeve të policisë, ata kanë goditur me grushte 20-vjeçarin dhe më pas janë larguar nga vendi i ngjarjes.

Në ambientet e lokalit ndodheshin edhe Miosid Matushaj, punonjës policie, Luciano Seferi, 44 vjeç, punonjës i IEVP Fier, Romeo Shehu, punonjës i Policisë Bashkiake Gjirokastër, si dhe Kristi Koshi, të cilët kishin funksionin e bodyguard-ëve.

Sipas hetimeve, këta persona nuk kanë ndërhyrë për të parandaluar përshkallëzimin e konfliktit dhe nuk kanë njoftuar policinë pas ngjarjes. Për këtë arsye, ata akuzohen për moskallëzim të krimit, ndërsa Miosid Matushaj akuzohet edhe për mosmarrje të masave për ndërprerjen e gjendjes së paligjshme.

Edhe pronari i lokalit “Principote”, Bekim Bulica, ndodhej në ambientet e subjektit në momentin e konfliktit. Sipas policisë, ai është larguar pa kallëzuar ngjarjen dhe për këtë arsye është shpallur në kërkim për moskallëzim të krimit.

Hetimet vijojnë për të dokumentuar të plotë dinamikën e konfliktit dhe përgjegjësitë e secilit prej personave të përfshirë apo të pranishëm në momentin e ngjarjes.

Autori u arrestua pak orë më vonë në tentativë për tu larguar drejt Tiranës, në Levan të Fierit, i fshehur në bagazhin e një makine, që drejtohej nga 1 vajzë turke.

Ministria e Mbrojtjes – përditësim mbi situatën e zjarreve

(19 Gusht 2026 – ora 14:00)

Ministria e Mbrojtjes informon se deri në orën 14:00, në territorin e vendit janë regjistruar 6 vatra zjarri, nga të cilat 4 mbeten aktive dhe 2 janë nën monitorim.

Në terren janë angazhuar 126 forca operacionale vendore, ndërsa Forcat e Armatosura mbështesin operacionet me 90 efektivë dhe 2 helikopterë të Forcës Ajrore.

Vatrat aktive kryesore janë:

* Dajt, Tiranë – vijon operacioni me 50 efektivë të FA, 15 forca të MZSH dhe 5 forca të AZM. Nuk ka rrezik për zonat e banuara.

* Priskë, Tiranë – forcat e MZSH vijojnë punën pas riaktivizimit të vatrës; nuk ka rrezik për banesat.

* Lufaj, Mirditë – vatra mbetet aktive me intensitet të ulët; në terren janë 8 forca të Shërbimit Pyjor dhe 4 zjarrfikës me 1 automjet zjarrfikës. Nuk ka rrezik për zonat e banuara.

* Tërbun, Pukë – operacioni vijon me forcat në terren për hapjen e korridoreve ndarëse, pas përfundimit të ndërhyrjes nga ajri. Situata konfirmohet nën kontroll dhe nuk ka rrezik për zonat e banuara.

Situata paraqitet në përmirësim edhe në Gurë-Lurë, ku zjarri është shuar dhe zona mbahet në monitorim, ndërsa në Qafë Helmes vatra është izoluar dhe vijojnë operacionet me forcat lokale.

Strukturat e Mbrojtjes Civile vijojnë angazhimin dhe monitorimin në terren, me situatën përgjithësisht të stabilizuar dhe pa rrezik të raportuar për zonat e banuara.

DURRËS– Detaje të reja dalin nga ekspertiza për aksidentin tragjik në Durrës, ku humbi jetën çifti i sapomartuar Kleo Vrioni dhe Sara Brugentelli dhe një i mitur 15 vjeç.

Sipas konkluzioneve të ekspertëve, automjeti në momentet para aksidentit ka qenë duke lëvizur me një shpejtësi prej rreth 114 km/orë.

Nga rindërtimi i dinamikës së ngjarjes rezulton se, në momentin e marrjes së kthesës, drejtuesi ka humbur kontrollin mbi automjetin.

Fillimisht, goma e parë në krahun e pasagjerit ka goditur bordurën, duke bërë që automjeti të humbiste më tej stabilitetin.

Pas përplasjes me bordurën, makina është përmbysur dhe më pas ka shkuar zvarrë rreth 40 metra, deri në ndalimin e saj.

Një tjetër element i rëndësishëm i ekspertizës lidhet me gjendjen e drejtuesit. Analizat toksikologjike kanë konfirmuar se ai kishte konsumuar alkool.

Ndërkohë, dy të tjerë ndodhen në spitalin e Traumës në kryeqytet.

Policia e Tiranës parandaloi sot zhvillimin e konfliktit ndërmjet disa të miturve, ndërsa procedoi penalisht në gjendje të lirë 28 të mitur, disa prej të cilëve posedonin armë të ftohta.

Policia njoftoi se pas marrjes së informacionit në rrugë operative se disa grupe të miturish do të konfliktoheshin me njëri-tjetrin, në Kombinat, kanë organizuar menjëherë punën dhe kanë ndërhyrë për parandalimin e konfliktit.

Sipas policisë, në bazë të informacionit, shërbimet e Policisë kanë lokalizuar në rrugën “Llambi Bonata”, disa të mitur të ndarë në grupe, të cilët dyshohet se do të konfliktoheshin me njëri-tjetrin. Shërbimet e Policisë kanë ndërhyrë menjëherë dhe i kanë shoqëruar të miturit, në ambientet e Komisariatit të Policisë Nr. 6.

Policia bëri me dije se gjatë kontrollit fizik, disave prej tyre iu gjetën armë të ftohta (thika), kaçavida, si dhe disa maska, të cilat janë sekuestruar në cilësinë e provës materiale.

Veprimet procedurale me të miturit u kryen në prani të prindërve dhe psikologëve dhe pas komunikimit me prokurorin, nisi procedimi në gjendje të lirë për 28 shtetas të mitur, të moshave 13-17 vjeç.

Materialet procedurale iu referuan Prokurorisë, për veprime të mëtejshme.

Policia e kryeqytetit ka sekuestruar 3 automjete luksoze, me vlerë rreth 450 mijë euro, të dyshuara të vjedhura në Gjermani. Bëhet fjalë për një Mercedes-Benz G-Class 63 AMG, me vlerë rreth 200 mijë euro, një Mercedes-Benz GT 63 AMG, me vlerë rreth 150 mijë euro dhe një Mercedes-Benz S-Class 580e, me vlerë rreth 100 mijë euro.

Për këtë rast janë shpallur në kërkim dy shtetas, F. D., 24 vjeç dhe K. V., 22 vjeç, të dyshuar se kanë trafikuar automjetet në Shqipëri me qëllim shitjen e tyre.

Ndërkohë, janë proceduar penalisht në gjendje të lirë tre persona të moshës 41, 27 dhe 39 vjeç, të cilët u konstatuan duke drejtuar automjetet në momentin e sekuestrimit.

Policia vijon punën për kapjen e dy personave të shpallur në kërkim, dokumentimin e plotë të aktivitetit të dyshuar kriminal dhe identifikimin e bashkëpunëtorëve.

Njoftimi i policisë Tiranë

Vijon operacioni policor i koduar “Stolen line”, kundër trafikimit në Shqipëri, të automjeteve luksoze të vjedhura jashtë shtetit.

Sekuestrohen 3 automjete luksoze, me vlerë totale rreth 450 000 euro, të dyshuara të vjedhura në Gjermani.

Procedohen penalisht 3 shtetas, të cilët i drejtonin automjetet në momentin e konstatimit.

Identifikohen dhe shpallen në kërkim 2 shtetas, të dyshuar se kanë trafikuar automjetet në Shqipëri.

Si rezultat i punës hetimore, të kryer në kuadër të operacionit “Stolen line”, me objektiv goditjen e rasteve të trafikimit në Shqipëri, të automjeteve luksoze, të vjedhura jashtë shtetit, specialistët e Seksionit për Hetimin e Trafiqeve të Paligjshme konstatuan një tjetër rast në këtë fushë.

Në vijim të veprimeve procedurale u sekuestruan 3 automjete luksoze, konkretisht 1 automjet tip “Mercedes Benz G-Class 63 AMG”, me vlerë rreth 200 000 euro, 1 automjet tip “Mercedes Benz GT 63 AMG”, me vlerë rreth 150 000 euro, dhe 1 automjet tip “Mercedes Benz S-Class 580e”, me vlerë rreth 100 000 euro.

Në lidhje me këtë rast u identifikuan dhe u shpallën në kërkim shtetasit F. D., 24 vjeç, dhe K. V., 22 vjeç, të dyshuar se kanë trafikuar në Shqipëri automjetet, me qëllim shitjen e tyre.

Gjithashtu, u proceduan penalisht në gjendje të lirë shtetasit E. H., 41 vjeç, S. U., 27 vjeç, dhe K. B., 39 vjeç, të cilët u konstatuan duke drejtuar automjetet në momentin e sekuestrimit të tyre.

Punohet për kapjen e 2 shtetasve të shpallur në kërkim, si dhe për dokumentimin e plotë të veprimtarisë kriminale dhe identifikimin e bashkëpunëtorëve të tyre.

Materialet procedurale iu referuan Prokurorisë, për veprime të metejshme.

Lideri i opozitës Sali Berisha e quajti sot ‘vrasje pothuajse shtetërore’ vrasjen e turistit 20 vjeçar portugez në orët e para të 18 gushtit pas një debati në një lokal plazhi në Ksamil, në jug të Shqipërisë.

“Në Sarandë, shteti dhe krimi janë një”, tha Berisha sot në një konferencë për median.

Pjesë nga deklarata e Berishës

Vrasja e 20-vjeçarit portugez, turist në Ksamil, është një akt sipas të dhënave, pothuaj vrasje shtetërore.

E them këtë në kuptimin, jo se ai u ekzekutua nga njerëz me uniformë, por në kuptimin e vërtetë se industria turistike në Sarandë është në kthetrat e krimit.

Në Sarandë, shteti dhe krimi janë një.

Ligji nuk ekziston.

Në Sarandë, dhe jo vetëm, flitet gjerësisht për një ekonomi të bazuar në trafiqe droge, njerëzore etj, e cila gëlon nga darka në mëngjes në lokalet e natës, të cilat funksionojnë gjer në agim.

Në plazhet e pushtuara, ku nuk gjendet një metër plazh publik, por të gjitha të dominuara nga të fortit që shesin shezlonget qindra euro.

Por vrasja e turistit portugez ka edhe një karakter konkret shtetëror, sepse në këtë akt makabër, e quaj makabër, erdhi të bëjë pushimet tek ne ai, dhe tani ai përcillet në arkivol, në këtë akt makabër. Bashkëpunëtorë ishin të paktën 3 punonjës me uniformë.

Kjo dëshmon se cila është shkalla e lartë e inkriminimit të rojeve të sigurisë në këto lokale.

Ata në vend se të parandalonin krimin, e fshehën për orë të tëra krimin, në mos, hetimi do tregojë, ndoshta edhe morën pjesë në masakrimin e 20-vjeçarit portugez.

Një turist mund të humbasë jetën në një vend, mund të ndodhë dhe të marrë goditje fatale, por turistit portugez i ndodhën këto në një mjedis ku rojet e sigurisë ishin punonjës shtetërorë dhe kjo dëshmon se cila është shkalla e lartë e inkriminimit.

Dhe njëherë, ata punonjës kishin detyrë ta parandalonin, nuk mund të them se futën apo jo thika në trupin e turistit, por ata bënë një krim të shëmtuar sepse e fshehën krimin.

E fshehën krimin e shëmtuar!

Dhe shëmtia vazhdon më tej kur krerët e narkoshtetit rrahin gjoksin për sukses se u kap vrasësi pas shumë e shumë orësh në vend se duhet të skuqeshin me turp për aktin që ndodhi në duart e shtetit.

Portugezin, pra, e vrau mjedisi kriminal i krijuar nga narkoshteti në Sarandë, Ksamil dhe më gjerë.

E vrau mjedisi i dominuar nga të fortët e shtetit. Thika ishte vetëm mjeti, instrumenti i këtij mjedisi.

Sot, ambasada të vendeve partnere kryesorë njoftojnë qytetarët e tyre, apo u tregojnë listën e lokaleve në të cilat nuk duhet të shkojnë.

Që të gjitha këto kanë licenca.

Por ato vazhdojnë punën pa asnjë lloj shqetësimi sepse janë të miqve të qeverisë.

Saranda njohu dy ngjarje, kjo është më tragjikja, por më parë u shkelmua oficeri i policisë, dy javë më parë u vra tjetri në derë të shtëpisë aty, de facto rendi është në duart e krimit.

Dënoj me forcën më të madhe dhe njëherë shpreh ngushëllime familjes. Çdo shqiptar duhet t’i shprehë ngushëllime kësaj familje.

I biri i saj erdhi në Shqipëri për pushim, kthehet në arkivol nga banda shtetërore.

Marsi Korreshi, SYRI TV: Z. Berisha, kush duhet të mbajë përgjegjësi direkte për përgjakjen e sezonit turistik në vend dhe çfarë masash mendoni se duhen marrë për të parandaluar këtë situatë?

Sali Berisha: Pa diskutim që në plan të parë është drejtori i Përgjithshëm i Policisë dhe linja e tij.

Por të garantoj që, Saranda dhe i gjithë bregu, ka tentakulat e Edi Ramës dhe drejtuesve të tjerë të partisë së krimit në parlament, në qeveri dhe kudo.

Nuk ka diskutim që policia ka përgjegjësi absolute në këtë rast, por këta përgjegjësi nuk ndjejnë.

Aty, organet e sigurisë në këto lokale janë të përbërë nga rrogëtarë shteti që sillen si banditë që nuk pyesin për asgjë.

Turizmi, siç tregon ky rast dhe raste të tjera, është kryesisht në duart e krimit dhe antiligjit.

Marsi Korreshi: Çfarë pasojash mendon se sjellin pikërisht këto ngjarje që ju denoncuat, përgjakja e sezonit, tek turizmi drejtpërdrejt në Shqipëri?

Sali Berisha: Natyrisht, pasojat janë shumë negative. Pasojat janë një emër i keq për Shqipërinë si vendi ku vriten turistët. Nuk ka më keq se kaq.

Banorë të Bashkisë së Patosit, po zhvillojnë sot një protestë kundër vendimit të qeverisë për riorganizimin territorial dhe shkrirjen e Bashkisë Patos.

Protestuesit kundërshtojnë përfshirjen e Patosit në Bashkinë Fier, duke kërkuar që Patosi të vijojë të funksionojë si njësi e veçantë administrative.

Ata argumentojnë se Bashkia Patos ka kapacitete të mjaftueshme financiare dhe administrative për të përballuar shpenzimet e saj dhe nuk është një nga bashkitë që mbështeten në mënyrë të vazhdueshme me fonde nga qeveria.

Sipas banorëve, ndryshimi i statusit të Bashkisë Patos mund të sjellë pasoja për administrimin e territorit, ofrimin e shërbimeve publike dhe zhvillimin e zonave rurale që aktualisht janë pjesë e saj.

Banorët theksojnë se Patosi është ndër bashkitë që arrijnë të mbulojnë shpenzimet e tyre me të ardhurat e krijuara dhe e konsiderojnë këtë një argument të fortë kundër përfshirjes së saj në një bashki tjetër.

Protesta vjen në kuadër të debatit për reformën e re territoriale, ndërsa banorët kërkojnë që vendimmarrja për të ardhmen administrative të Patosit të marrë në konsideratë edhe specifikat ekonomike, sociale

49-vjeçari Ylli Zalla, i cili u arrestua dy ditë më parë në fshatin Zallë të Fushë-Krujës, është lënë në burg nga Gjykata e Tiranës. Ai ka mohuar përfshirjen në atentatin e Rinasit ku u vranë Gilmando Dani e Muçi Shaljani, ngjarje për të cilën ishte i dyshuar në fillim, duke thënë se “është përgojuar kot.” Ekspertiza e kryer më vonë nuk tregoi lidhje të Zallës me atentatin. Gjithashtu, Zalla ka pretenduar se armët e gjetura në banesën e tij s’i përkasin atij.

Zalla u kap të hënën, i fshehur në një ndërtesë rreth 500 metra larg shtëpisë së tij, i armatosur me një kallashnikov dhe tre krehra me fishekë.

Para arrestimit, të shtunën në banesën e tij shpërtheu një sasi tritoli, vetëm me dëme materiale, pasi askush nuk ishte në shtëpi, por policia ka dyshuar se personi që mund ta ketë vendosur atë, të jetë vetë Zalla, edhe pse ky i fundit mohoi të kishte gisht.

Vetëm një ditë përpara se të përfundonte në pranga, ai publikoi në rrjetet sociale një video ku akuzonte policinë dhe bandat se donin ta vrisnin.

Policia kishte tentuar disa herë të arrestonte Ylli Zallën, dhe arriti ta vë në pranga vetëm të hënën e 17 gushtit, me angazhimin e efektivë nga Tirana e Kruja dhe forcat speciale RENEA. Për lokalizimin e tij u përdorën edhe dronë të specializuar “Bayraktar”.

Ylli Zalla ishte në kërkim pasi në banesën e tij janë gjetur në 4 raste, arsenale me armë, që dyshohet se përdorej për furnizimin e grupeve kriminale.

Ndërsa për armët e sekuestruara, ai tha se nuk ishin të tijat, por të një reparti ushtarak.

Kleo Vrioni dhe Sara Brugentelli, janë dy të rinjtë që humbën jetën në aksidentin tragjik të ndodhur gjatë natës në Manzë të Durrësit.

25-vjeçari shqiptar dhe bashkëshortja e tij italiane 26 vjeçe ishin martuar vetëm pak ditë më parë dhe ndodheshin në Shqipëri për pushime.

Çifti ndodhej në automjetin tip BMW kur dyshohet se Vrioni humbi kontrollin e mjetit dhe u përplas me një strukturë betoni. Përplasja rezultoi fatale për të dy, ndërsa jetën humbi edhe 15-vjeçari Alvi Muhaxhiri.

Në aksident mbetën të plagosur edhe Rejsi Vrijoni, 25 vjeç, dhe Klevis Dervishi, 16 vjeç. Ky i fundit ndodhet në gjendje të rëndë shëndetësore.

Ministria e Mbrojtjes informon se gjatë 24 orëve të fundit janë raportuar 25 vatra zjarri, nga të cilat 4 mbeten aktive dhe 1 është nën monitorim.

Në operacionet e shuarjes janë angazhuar 350 forca operacionale dhe 26 automjete zjarrfikëse, ndërsa Forcat e Armatosura kanë mbështetur me 140 efektivë, 3 helikopterë dhe 2 avionë Air Tractor.

Vatrat kryesore aktive janë në Dajt dhe Priskë, Tiranë, Lufaj, Mirditë dhe Tërbun, Pukë.

Në Dajt operacioni vijon me 50 efektivë të FA, 15 zjarrfikës dhe 5 forca të AZM, pa rrezik për zonat e banuara.

Në Tërbun vijon angazhimi i gjerë i strukturave vendore, vullnetarëve dhe FA, me mbështetjen e 2 helikopterëve, ndërsa edhe këtu nuk ka rrezik për banesat.

Situata paraqitet në përmirësim edhe në disa prej vatrave të ditëve të fundit: Gurë-Lura, Bruçi në Mat, Tharri në Mirditë dhe zjarri në Selenicë janë shuar plotësisht, ndërsa në Qafë Helmes vijon monitorimi dhe operacionet me forcat lokale.

Strukturat e Mbrojtjes Civile vijojnë punën dhe monitorimin në terren, me fokus izolimin e plotë të vatrave aktive dhe mbrojtjen e zonave të banuara.