Gjermania do të mbështesë rreth 400 familje të prekura nga përmbytjet e fundit në Shqipëri.

Lajmin e ka bërë të ditur Ambasada gjermane në Tiranë, e cila ka shkruar në një postim në rrjetet sociale se përmes Fondit Start ka vënë në dispozicion 250 mijë paund për një organizatë joqeveritare Britanike.

Po ashtu në njoftim bëhet e ditur se mmasat përfshijnë ndihma sanitare dhe higjienike, strehimin emergjent dhe artikujt jo-ushqimorë, masat mbrojtëse (duke përfshirë mbrojtjen nga dhuna gjinore), sigurinë ushqimore dhe nevojat jetike.

Njoftimi i Ambasadës Gjermane në Tiranë:

Ndihmë e Shpejtë Pas Përmbytjeve në Shqipëri

Pas përmbytjeve të rënda të javëve të fundit, Fondi Start, i mbështetur nga Gjermania, vë në dispozicion në mënyrë të menjëhershme 250.000 £ për OJQ-në World Vision UK. Kjo do të mbështesë afërsisht 400 familje (rreth 1,800 persona) në rajonet më të prekura të Shqipërisë – duke përfshirë Durrsin (Sukth, Katund i Ri, Kënetë, Rrashbull, Porto Romano si dhe Shkozetin, Nishtullën). Masat përfshijnë ndihma sanitare dhe higjienike, strehimin emergjent dhe artikujt jo-ushqimorë, masat mbrojtëse (duke përfshirë mbrojtjen nga dhuna gjinore), sigurinë ushqimore dhe nevojat jetike.

Për më tepër, përmes mbështetjes sonë të gjerë për zhvillimin e sistemeve të paralajmërimit të hershëm (përmes projektit ALBAdapt të GIZ), ne kontribuojmë që ngjarjet ekstreme të motit të mund të parashikohen më mirë në të ardhmen, duke i mundësuar njerëzve të marrin masa parandaluese.

Prej dates 1 janar ka hyrë në fuqi sistemi i ri i sigurimit të makinave i njohur si bonus malus, që do të zbatohet nga shoqëritë e sigurimit që parashikon aplikimin e primit të diferencuar bazuar në risqet që mbart çdo i siguruar.

Përmes këtij sistemi të ‘penalizuar’ janë drejtuesit problematikë të mjeteve, të cilët kanë historik negativ me aksidentet, që do të paguajnë më shumë për sigurimin e makinës. Kurse shoferët e rregullt, do të përfitojnë sigurim më të lirë.

Në përllogaritjen e primit të sigurimit përveç historikut të aksidenteve do të merret në konsideratë edhe Fuqia motorike, mosha e shoferit, eksperienca e tij në drejtimin e makinës, përdorimi i mjetit, qarku i regjistrimit të mjetit si dhe vjetërsia e makinës.

Për ta bërë edhe më të qartë funksionimin e këtij sistemi, Autoriteti i Mbikqyrjes Financiare (AMF) ka publikuar në faqen e saj zyrtare në internet edhe një artikull ku jep detaje mbi faktorët që ndikojnë në primin (çmimin) e sigurimit.

1.Çfarë nënkupton dhe kujt i aplikohet faktori i riskut “Historiku i dëmeve”?

Faktori i riskut “Historiku i dëmeve”, i cili zbatohet në përcaktimin e primit të sigurimit të detyrueshëm motorik, përfaqëson historikun e dëmeve të të siguruarit dhe merr në konsideratë të gjitha dëmet e raportuara, përfshirë edhe rastet kur shkaktari i aksidentit nuk është i shënuar në policën e sigurimit.

Bazuar në rregulloren e miratuar nga Autoriteti, nr. 156, datë 19.09.2024, “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit”, të gjithë faktorët e riskut zbatohen në përllogaritjen e primit të sigurimit për kategorinë e autoveturave të produktit të sigurimit të detyrueshëm motorik, MTPL e brendshme.

2.Si funksionon faktori “Historiku i dëmeve”?

Faktori i riskut “Historiku i dëmeve”, i cili zbatohet për të gjithë drejtuesit që kanë në pronësi mjete të kategorisë së autoveturave, duke u bazuar në numrin e dëmeve të raportuara, ndahet në tre klasa:

• Klasa e parë përfshin të siguruarit të cilët nuk kanë raportuar asnjë dëm gjatë vitit, të cilët përfitojnë ulje të primit të sigurimit;
• Klasa e dytë përfshin të siguruarit me një dëm të raportuar, për të cilët aplikohet rritje në primin e sigurimit, ndërsa
• Të siguruarit me dy ose më shumë dëme të raportuara gjatë tre viteve të fundit, përfshihen në klasën e tretë, në të cilën aplikohet rritja e primit të sigurimit është edhe më i lartë se në klasën II.

3.Cilët janë faktorët e riskut dhe si ndikojnë në primin e sigurimit?

Rregullorja nr. 156, datë 19.09.2024, “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit”, e miratuar nga Autoriteti, përcakton faktorët e riskut që përfshihen në përllogaritjen e primit të sigurimit për kategorinë e autoveturave të produktit të sigurimit të detyrueshëm motorik, MTPL e brendshme, si dhe metodologjinë e përdorur në aplikimin e këtyre faktorëve.

Bazuar në këtë rregullore, shoqëria e sigurimit, në përllogaritjen e primit të sigurimit, zbaton këta faktorë kryesorë risku:

• Historiku i dëmeve. Ky faktor merr në konsideratë të gjitha dëmet e raportuara, përfshirë edhe rastet kur shkaktari i aksidentit nuk është i shënuar në policën e sigurimit. Një historik pa dëme reflektohet me ulje të primit të sigurimit (përfitim), ndërsa një historik me dëme reflektohet me rritje të primit të sigurimit (penalizim).
• Fuqia motorike. Ky faktor reflekton ndikimin e fuqisë motorike në nivelin e primit, ku mjetet me fuqi më të vogël motorike përfitojnë një prim më të ulët sigurimi se mjetet me fuqi më të madhe motorike.
• Mosha e të siguruarit. Të siguruarit e grupmoshës 18 – 21 vjeç tarifohen më tepër se të siguruarit e grupmoshave të tjera.
• Eksperienca në drejtimin e mjetit motorik. Të siguruarit e ndryshëm nga 18–21 vjeç dhe që kanë eksperiencë drejtimi deri në dy vite tarifohen më tepër se të siguruarit e tjerë.
• Përdorimi i mjetit. Mjetet në pronësi të subjekteve tarifohen më tepër se mjetet në pronësi të individëve.
• Qarku i regjistrimit të mjetit. Mjetet e regjistruara në qarqet Berat, Dibër dhe Kukës tarifohen më pak se mjetet e regjistruara në qarqet e tjera.
• Vjetërsia e mjetit. Mjetet e reja, të prodhuara në vitet e fundit, tarifohen më pak se mjetet e vjetra.

4.Ku e gjej tabelën e koeficientëve dhe përllogaritësin?

Shoqëria e sigurimit publikon në faqen zyrtare të internetit koeficientët e faktorëve të riskut, të shoqëruar me shembuj zbatimi në praktikë.
Gjithashtu, në funksion të rritjes së transparencës dhe mbrojtjes së konsumatorit, të gjitha shoqëritë e sigurimit kanë krijuar e publikuar mjete online (tools) për përllogaritjen e primit të sigurimit.

Më poshtë gjenden lidhjet për çdo shoqëri sigurimi:

• Albsig sh.a.: Koeficientët  |  Përllogaritësi
• Ansig sh.a.: Koeficientët  |  Përllogaritësi
• Atlantik sh.a.: Koeficientët  |  Përllogaritësi
• Eurosig sh.a.: Koeficientët  |  Përllogaritësi
• Insig sh.a.: Koeficientët  |  Përllogaritësi
• Intersig VIG sh.a.: Koeficientët  |  Përllogaritësi
• Sigal IG sh.a.: Koeficientët  |  Përllogaritësi
• Sigma VIG sh.a.: Koeficientët  |  Përllogaritësi

5.Si ta kontrolloj historikun e dëmeve?

Mund ta kontrollosh tek shoqëria e sigurimit, duke kërkuar pasqyrën e historikut të dëmeve dhe klasën Historiku Dëmeve që të është aplikuar.

6.Historiku lidhet me mjetin apo drejtuesin?

Referuar Rregullores nr. 156, datë 19.09.2024, faktori i riskut “Historiku i dëmeve” do të zbatohet si për të siguruarin në emër të të cilit është i siguruar mjeti motorik , ashtu edhe për shkaktarin e aksidentit edhe në rastet kur ai nuk është i shënuar në policën e sigurimit.

7.Ku ankohen qytetarët?

Për çdo parregullsi qytetarët mund të ankohen pranë:
a) Pranë shoqërisë së sigurimit
b) Nëse nuk zgjidhet, tek AMF: amf@amf.gov.al

Shërbimet gjermane të autobusëve dhe hekurudhave të udhëtarëve mund të pezullohen në të gjithë vendin të hënën, pasi sindikata kryesore e shërbimeve publike “Verdi” thirri një grevë pothuajse kombëtare në një mosmarrëveshje me punëdhënësit komunalë dhe shtetërorë mbi kushtet e punës, raporton Reuters.

“Mund të supozohet se transporti publik do të ndërpritet në sistemet e transportit të prekura”, tha Verdi të premten, duke shtuar se rreth 100.000 punonjës ishin thirrur në grevë.

Sindikata po kërkon kushte më të mira pune në transportin publik lokal, duke përfshirë orare më të shkurtra pune, pushime më të gjata dhe paga më të larta për turnet e natës dhe të fundjavave.

Në disa rajone, negociatat për pagat totale janë duke vazhduar.

Kristjan Asllani është zyrtarisht pjesë e Beshiktash me klubin e njohur që ka nisur procedurën e regjistrimin të tij të menjëhershëm në Federatën Turke të Futbollit.

Lojtari udhëtoi në orët e para të mëngjesit drejt Stambollit, kreu vizitat mjekësore dhe bëri edhe foto e rasti me fanellën e klubit turk.

Por për regjistrimin e tij, duhet mbyllur ana burokratike, pasi fillimisht duhet ndërprerë huazimi nga Torino, e pastaj Interi duhet të lejojë transferimin te klubi turk.

Megjithatë, mediat turke bëjnë të ditur se Beshiktash i ka bërë gjërat gati dhe ka lajmëruar zyrtarisht se Asllani do të jetë pjesë e ekipit në vijimin e sezonit, në mënyrë pritet që ai të regjistrohet menjëherë sapo të mbërrijë dokumentacioni.

Kësisoj, Asllani do të bëhet pjesë e klubit turk që në ndeshjen e nesërme, atë që Beshiktash luan në Stamboll kundër Konyaspor.

Ditën e martë, më 3 shkurt, Parlamenti do të zhvillojë seancën e radhës plenare.

Sipas urdhrit të kreut të Kuvendit, Niko Peleshi, në Rendin e Ditës janë parashikuar 14 pika.

Një nga çështjet është diskutimi mbi ndryshimet në Komisionin e Posaçëm për Reformën Administrativo-Territoriale. Mazhoranca socialiste kërkon ndryshimin e formulës së përbërjes së komisionit, duke kaluar nga ndarja 50 me 50 në një raport 9 anëtarë për mazhorancën dhe 8 për opozitën.

Po ashtu, propozohet ndryshim edhe në drejtimin e komisionit. Në axhendën e seancës përfshihen gjithashtu diskutime për ndryshimet në ligjin “Për barnat narkotike dhe lëndët psikotrope”, si dhe në ligjin “Për mbrojtjen nga diskriminimi”.

Në Rendin e Ditës janë gjithashtu projektligji “Për parandalimin e konfliktit të interesave në ushtrimin e funksioneve publike”, si dhe projektvendimi “Për ngritjen e Nënkomisionit për Zhvillim të Qëndrueshëm”, në përbërje të Komisionit të Përhershëm Parlamentar për Burimet Natyrore, Infrastrukturën dhe Zhvillimin e Qëndrueshëm.

Rendi i ditës

Në mbështetje të urdhrit nr. 9, datë 30.1.2026 të Kryetarit të Kuvendit, z. Niko Peleshi, rendi i ditës është si më poshtë vijon:

1. Miratimi i procesverbalit të seancës plenare të datës 22.1.2026. (Neni 44, pika 2, të Rregullores së Kuvendit)

2. Njoftime. (Neni 44, pika 3, të Rregullores së Kuvendit)

3. Interpelancë me Ministrin e Drejtësisë, z. Besfort Lamallari, kërkuar nga deputeti Tedi Blushi. (Neni 80 i Kushtetutës, neni 96 i Rregullores së Kuvendit)

4. Projektligji “Për ratifikimin e marrëveshjes së financimit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, Francës dhe Komisionit Evropian, për programin e bashkëpunimit (Interreg VI-C) Interreg Europe 2021-2027”. (Në mbështetje të neneve 78, 83, pika 1, dhe 121, pika 1, të Kushtetutës, dhe neneve 55, 73-77 të Rregullores, shumicë absolute votash për miratim) Pyetje Shprehet nismëtari Shprehet Komisioni përgjegjës për Ekonominë, Punësimin dhe Financat Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Europën dhe Punët e Jashtme Dhënie mendimi Komisioni për Bujqësinë, Ushqimin dhe Zhvillimin Rural Diskutime (Shprehen grupet parlamentare) Koha e votimit

5. Projektligji “Për ratifikimin e marrëveshjes ndryshuese nr. 1, me shkëmbim letrash, të marrëveshjes së financimit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, Republikës së Kosovës, përfaqësuar nga Zyra e Kryeministrit, dhe Komisionit Evropian, për programin e bashkëpunimit ndërkufitar Shqipëri–Kosovë, 2021–2027, ratifikuar me ligjin nr. 12/2024”. (Në mbështetje të neneve 78, 83, pika 1, dhe 121, pika 1, të Kushtetutës, dhe neneve 55, 73-77 të Rregullores, shumicë absolute votash për miratim) Pyetje Shprehet nismëtari Shprehet Komisioni përgjegjës për Ekonominë, Punësimin dhe Financat Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Europën dhe Punët e Jashtme Dhënie mendimi Komisioni për Çështjet e Brendshme dhe Mbrojtjen Dhënie mendimi Komisioni për Bujqësinë, Ushqimin dhe Zhvillimin Rural Diskutime (Shprehen grupet parlamentare) Koha e votimit

6. Projektligji “Për ratifikimin e marrëveshjes ndryshuese nr. 1 të rishikuar, me shkëmbim letrash, të marrëveshjes së financimit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, Malit të Zi dhe Komisionit Evropian, për programin IPA të bashkëpunimit ndërkufitar Mali i Zi – Shqipëri 2021–2027, ratifikuar me ligjin nr. 9/2024”. (Në mbështetje të neneve 78, 83, pika 1, dhe 121, pika 1, të Kushtetutës, dhe neneve 55, 73-77 të Rregullores, shumicë absolute votash për miratim) Pyetje Shprehet nismëtari Shprehet Komisioni përgjegjës për Ekonominë, Punësimin dhe Financat Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Europën dhe Punët e Jashtme Dhënie mendimi Komisioni për Çështjet e Brendshme dhe Mbrojtjen Diskutime (Shprehen grupet parlamentare) Koha e votimit

7. Projektligji “Për ratifikimin e marrëveshjes ndryshuese nr. 1, të rishikuar, me shkëmbim letrash, të marrëveshjes së financimit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, Republikës së Maqedonisë së Veriut, përfaqësuar nga Sekretariati për Çështjet Evropiane, dhe Komisionit Evropian, për programin IPA të bashkëpunimit ndërkufitar Maqedonia e Veriut – Shqipëri, 2021 – 2027, ratifikuar me ligjin nr. 71/2024”. (Në mbështetje të neneve 78, 83, pika 1, dhe 121, pika 1, të Kushtetutës, dhe neneve 55, 73-77 të Rregullores, shumicë absolute votash për miratim) Pyetje Shprehet nismëtari Shprehet Komisioni përgjegjës për Ekonominë, Punësimin dhe Financat Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Europën dhe Punët e Jashtme Dhënie mendimi Komisioni për Çështjet e Brendshme dhe Mbrojtjen Diskutime (Shprehen grupet parlamentare) Koha e votimit

8. Projektligji “Për disa shtesa dhe ndryshime në ligjin nr. 8874, datë 29.3.2002, “Për kontrollin e lëndëve që përdoren për fabrikimin e paligjshëm të lëndëve narkotike dhe psikotrope””. (Në mbështetje të neneve 78 dhe 83, pika 1, të Kushtetutës, dhe neneve 55, 68 dhe 73-77 të Rregullores, shumicë e thjeshtë votash për miratim) Pyetje Shprehet nismëtari Shprehet Komisioni përgjegjës për Shëndetësinë dhe Mirëqenien Sociale Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Europën dhe Punët e Jashtme Dhënie mendimi Komisioni për Bujqësinë, Ushqimin dhe Zhvillimin Rural Diskutime (Shprehen grupet parlamentare) Koha e votimit

9. Projektligji “Për disa shtesa në ligjin nr. 7975, datë 26.7.1995, “Për barnat narkotike dhe lëndët psikotrope”, të ndryshuar. (Në mbështetje të neneve 78 dhe 83, pika 1, të Kushtetutës, dhe neneve 55, 68 dhe 73-77 të Rregullores, shumicë e thjeshtë votash për miratim) Pyetje Shprehet nismëtari Shprehet Komisioni përgjegjës për Shëndetësinë dhe Mirëqenien Sociale Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Europën dhe Punët e Jashtme Dhënie mendimi Komisioni për Bujqësinë, Ushqimin dhe Zhvillimin Rural Diskutime (Shprehen grupet parlamentare) Koha e votimit

10. Projektligji “Për disa shtesa dhe ndryshime në ligjin 10221, datë 04.02.2010 “Për mbrojtjen nga diskriminimi”. (Në mbështetje të neneve 78, 81, pika 1 dhe 83, pika 1, të Kushtetutës, si dhe neneve 55, 68 dhe 73-77 të Rregullores, shumicë e thjeshtë votash për miratim) Pyetje Shprehet nismëtari Shprehet Komisioni përgjegjës për të Drejtat e Njeriut dhe Mjetet e Informimit Publik Dhënie mendimi Komisioni për Çështjet Ligjore dhe Administratën Publike Diskutime (Shprehen grupet parlamentare) Koha e votimit

11. Projektligji “Për parandalimin e konfliktit të interesave në ushtrimin e funksioneve publike”. (Në mbështetje të neneve 81 dhe 83, pika 1, të Kushtetutës, dhe neneve 55, 68 dhe 73-77 të Rregullores, shumicë e thjeshtë votash për miratim) Pyetje Shprehet nismëtari Shprehet Komisioni përgjegjës për Çështjet Ligjore dhe Administratën Publike Dhënie mendimi Komisioni për Ekonominë, Punësimin dhe Financat Dhënie mendimi Komisioni për Europën dhe Punët e Jashtme Dhënie mendimi Komisioni për Drejtat e Njeriut dhe Mjetet e Informimit Publik Diskutime (Shprehen grupet parlamentare) Koha e votimit

12.Projektvendimi “Për ngritjen e Nënkomisionit për Zhvillim të Qëndrueshëm në përbërje të Komisionit të Përhershëm Parlamentar për Burimet Natyrore, Infrastrukturën dhe Zhvillimin e Qëndrueshëm”. (Në mbështetje të nenit 78, pika 1, të Kushtetutës dhe neneve 19, pika 2, 21, pika 1, dhe 55, pika 1, të Rregullores së Kuvendit, shumicë e thjeshtë votash për miratim) Koha e votimit

13.Projektvendimi “Për ndryshimin e vendimit nr. 75, datë 27.10.2025 “Për ngritjen e Komisionit të Posaçëm për Reformën Administrativo-Territoriale në Republikën e Shqipërisë”, i ndryshuar. (Në mbështetje të neneve 77, pika 1, dhe 78, pika 1, të Kushtetutës dhe të neneve 24 dhe 55, pika 1, të Rregullores së Kuvendit, shumicë e thjeshtë votash për miratim) Koha e votimit

14.Diskutime për çështje jashtë rendit të ditës. (Në mbështetje të nenit 45 të Rregullores së Kuvendit: Çdo deputet mund të flasë jo më shumë se 5 minuta dhe nëse diskuton në emër të grupit parlamentar, jo më shumë se 8 minuta. Koha e diskutimeve për çështje jashtë rendit të ditës nuk mund të jetë më shumë se 60 minuta.)

Presidenti i Republikës Bajram Begaj i ka dorëzuar mbrëmjen e sotme flamurin ekipit të sportistëve shqiptarë që do të garojnë në Lojërat Okimpike Dimërore Milano–Cortina.

Kreu i shtetit theksoi se pjesëmarrja e sportistëve shqiptarë në këtë ngjarje madhore ndërkombëtare është dëshmi e progresit dhe ambicies së vendit në arenën sportive.

Sipas Begajt, suksesi matet me përkushtimin, profesionalizmin dhe pasionin e sportistëve, duke shtuar se ata janë shembull frymëzimi për të rinjtë shqiptarë dhe dëshmi se ëndrrat nuk kanë kufij.

“Ju do të përfaqësoni vendin tuaj, do të mbani ambicien e Shqipërisë, ku deri dje ishim vizitorë të largët. Tani renditemi me dinjitet në vende që kanë rekorde në lojërat dimërore dhe duhet të na bëjnë krenarë. Nuk matet me kilometra katrorë të pistave të skive, por matet me madhësinë e zemrës së atyre sportistëve.

Ju jeni katërshja që keni thyer traditën e pjesëmarrjes në organizime të cilat për ne më parë nuk imagjinoheshin.

Shqipëria renditet krah vendeve me traditë ndërvjeçare sepse ju besuat te stërvitja, profesionalizmi dhe te pasioni juaj. Ju jeni dëshmia se ëndrrat e të rinjve nuk kanë kufij”, tha ndër të tjera gjatë fjalës së tij Presidenti Begaj.

Vijojnë të jenë të shumtë individët që po plotësojnë Deklaratën Vjetore të të Ardhurave me qëllim përfitimin e kompensimit për arsimimin e fëmijëve.

Bazuar në disa shembuj konkretë të publikuar nga Monitor, shuma e kompensimit ndryshon në varësi të të ardhurave vjetore dhe shuma e zbritur e shpenzimeve që ndryshon sipas numrit të fëmijëve në ngarkim, përfshirë edhe shpenzimet fikse për arsim me vlerë maksimale 100 mijë lekë nëse të ardhurat janë nën 1.2 mln lekë në vit.

Për rastin me të ardhura bruto vjetore mbi 1,2 mln lekë në vit me 1 fëmijë në ngarkim, kompensimi për arsimin 62 euro në vit.

Në rastin e individit më të ardhura mbi 2 mln lekë në vit me dy fëmijë në ngarkim të moshës nën 18 vjeç, pas zbritjes së shpenzimeve për fëmijët me vlerë 96 mijë lekë, tatimi i mbipaguar apo kompensimi është në vlerën e rreth 12 mijë lekëve.

Për individët që paguhen mbi 200 mijë lekë në muaj dhe i kap tatimi prej 23%, kompensimi është 11,040 lekë për fëmijë.

Shuma maksimale e kompensimit e përfituar sipas shembujve rezulton për individët me të ardhura nën 1,2 mln lekë që përfitojnë edhe shpenzimet për fëmijët në ngarkim dhe për arsimin me vlerë 100,000 lekë.

Sipas shembullit kompensimi për një individ me të ardhura nën 1,2 mln lekë që ka 2 fëmijë në ngarkim arrin rreth 250 euro.

Për të gjithë individët që rezultojnë me tatim të mbipaguar pasi kanë plotësuar DIVA brenda 3 muajve pas përfundimit të afatit të deklarimeve do të dorëzojnë në tatime kërkesën me qëllim përfitimin e kompensimit. Procedura për dorëzimin e kërkesave pritet të sqarohet nga tatimet.

Shembull 1

Të ardhura mbi 1,2 mln lekë në vit 1 fëmijë në ngarkim

Konkretisht në DIVA-n e plotësuar dhe dorëzuar të individit A, rezulton se të ardhurat e tij vjetore për vitin 2025 ishin në vlerën e 1,470 mijë lekë. Tatimi i paguar gjatë vitit është 144,424 lekë.

Individit i janë zbritur të ardhurat nga punësimi:

– Zbritje nga të ardhurat nga punësimi sipas nenit 22, pika 1, germat a, b dhe c me vlerë 360 mijë lekë në vit (apo 30 mijë lekë në muaj).

– Shumë kompensimi për çdo fëmijë në ngarkim të tij më pak se 18 vjeç në vlerën 48 mijë lekë.

Në DIVA pasqyrohet se baza e të ardhurave të tatueshme pas zbritjes arrin në vlerën e 1 mln lekëve. Llogaritja e tatimit vjetor të paguar është 138,184 lekë.

Tatimi i mbipaguar rezulton në vlerën e 6,240 lekëve.

E llogaritur nga Vlera e Tatimit Vjetor të paguara 144,424 lekë- 138,184 lekë= 6,240 lekë.

Shembulli 2

Të ardhura mbi 2,2 mln lekë në vit 2 fëmijë në ngarkim

Për të ardhurat vjetore bruto me vlerë 2,232,140 lekë, rezulton se për vitin 2025 është paguar tatimi me vlerë 255,796 lekë.

Në rastin në fjalë individi ka në ngarkim 2 fëmijë të moshës nën 18 vjeç dhe përfiton zbritje të shpenzimeve me vlerë 96,000 lekë.

Pas zbritjes së shpenzimeve tatimi i ri i llogaritur është 243,391 lekë.

Tatimi i mbipaguar apo kompensimi është në vlerën e 12,405 lekë.

Shembulli 3

Të ardhura nën 1,2 mln lekë në vit, 2 fëmijë në ngarkim

Sipas të dhënave të DIVA-s të plotësuar dhe dorëzuar të individit C të ardhurat bruto vjetore për vitin 2025 ishin 1,189,374 lekë.

Tatimi i paguar vjetor gjatë vitit 2025 është në vlerën e 107,820 lekëve.

Individi C ka dy fëmijë të moshës 5 dhe 9 vjeç, ku një prej tyre ndjek arsimin fillor në shkollë private.

Përveç zbritjes së shpenzimeve për fëmijët në ngarkim me vlerë 96,000 lekë individi përfiton edhe zbritje shpenzimi prej 100,000 për arsimin e fëmijëve duke qenë se të ardhurat nuk kalojnë kufirin e 1.2 mln lekëve në vit, pra janë nën 1.2 mln lekë në vit dhe disponon dokumentacionet justifikuese, në këtë rast faturat e shkollës private për shpenzimet e arsimit të fëmijës.

Pas vendosjes së këtyre të dhënave sistemi ka gjeneruar automatikisht tatimin e mbipaguar, apo kompensimin me vlerë 25,481 lekë.

Konkretisht nisur nga të dhënat në DIVA, individi ka përfituar:

-Zbritje nga te ardhurat nga punësimi sipas nenit 22, pika 1, germat a, b dhe c me vlerë 360,000 lekë

-Shumë kompensimi për çdo fëmijë në ngarkim të tij më pak se 18 vjeç me vlerë 96,000 lekë (kjo shumë u gjenerua automatikisht nga sistemi pas vendosjes së numrit të fëmijëve).

-Shpenzime për arsimin e fëmijëve me vlerë 100,000 (vlera u shtua nga deklaruesi gjatë plotësimit të DIVA, pasi disponon dokumentacionin justifikues të shpenzimeve në rast kontrolli nga tatimet dhe të ardhurat bruto vjetore janë nën 1.2 mln lekë)

Pas zbritjes së shpenzimeve totali i të ardhurave bruto arrin 633,374 lekë.

Tatimi i rillogaritur pas zbritjes së shpenzimeve është në vlerë 82,339 lekë.

Tatimi i mbipaguar rezulton: 107,820 lekë (tatimi i paguar për 2025) – 82,339 lekë (tatimi i rillogaritur pas zbritjes së shpenzimeve) = 25,481. /Monitor

Aksidenti i rëndë, i regjistruar në Savigliano të Italisë, u mori jetën dy të rinjve shqiptarë.

Përplasja e fortë mes makinës ku udhëtonin të rinjtë dhe një kamioni rezultoi me pasoja fatale, sidomos për dy familjet shqiptare.

Ndërkohë është bërë i mundur edhe identifikimi i dy të rinjve shqiptarë: Blendi Syla dhe Robert Daçi, të dy rreth 20 vjeç.

“Me dhimbje të thellë njoftoj ndarjen e parakohshme nga jeta të nipit tim Blendi Syla 20 vjeç, i cili humbi jetën tragjikisht si pasojë e një aksidenti në Itali. Familja Çekaj informon se, për momentin, data dhe ora e ceremonisë së varrimit nuk janë përcaktuar, pasi pritet kthimi i trupit në Shqipëri. Sapo të kemi informacion të konfirmuar, do t’ju njoftojmë në vijim.

Falënderojmë të gjithë të afërmit, miqtë dhe dashamirësit për ngushëllimet dhe mbështetjen në këto momente të vështira. I paharruar qoftë kujtimi i tij.Zoti e pastë në paqe shpirtin e tij”, shkruan një i afërm i Blendi Sylës në një postim në rrjetet sociale.

Kujtojmë se si pasojë e aksidentit kanë mbetur të plagosur edhe tre persona të tjerë, të cilët ndodhen në spital.

Ministrja për Europën dhe Punët e Jashtme, Elisa Spiropali, priti ditën e sotme në një takim, Ambasadorin e Italisë në Shqipëri, Marco Alberti, me fokus koordinimin e përgatitjeve për mbajtjen në Tiranë të Forumit të Korridorit VIII.

Spiropali e cilëson këtë projekt “një arterie strategjike që sjell me vete potencial ndërlidhjeje infrastrukturore me rëndësi politike, ekonomike, të sigurisë rajonale e europiane.”

Ministrja njoftoi se kjo platformë e nivelit të lartë do të mbahet në 18 shkurt në Tiranë me prezencën e Ministrave të Jashtëm të Italisë, Bullgarisë, Maqedonisë së Veriut dhe Rumanisë.

Mbajtja e këtij forumi në Tiranë, konfirmon sipas Ministres së Jashtme, vendosmërinë e Shqipërisë për forcimin e bashkëpunimit politik, ekonomik dhe operacional përgjatë Korridorit VIII, nga Adriatiku në Detin e Zi.

Postimi i Spiropalit:

“Me Ambasadorin e Italisë në Shqipëri, Marco Alberti, koordinojmë përgatitjet për mbajtjen në Tiranë të Forumit të Korridorit VIII, arteries strategjike që sjell me vete një potencial ndërlidhjeje infrastrukturore me rëndësi politike, ekonomike, të sigurisë rajonale e europiane.

Kjo platformë e nivelit të lartë që do të mbahet në 18 shkurt në Tiranë me prezencën e Ministrave të Jashtëm të Italisë, Bullgarisë, Maqedonisë së Veriut dhe Rumanisë, konfirmon vendosmërinë e Shqipërisë për forcimin e bashkëpunimit politik, ekonomik dhe operacional përgjatë Korridorit VIII, nga Adriatiku në Detin e Zi“.

Deputeti i Partisë Demokratike Klevis Balliu është ndaluar të inspektojë kushtet në Burgun e sigurisë së lartë 313, duke e cilësuar veprimin si shkelje të hapur të ligjit dhe pengim të kontrollit institucional.

Sipas Balliut, inspektimi kishte për qëllim verifikimin e trajtimit të të gjithë të burgosurve dhe të paraburgosurve, përfshirë edhe ish-presidentin Ilir Meta, për të cilin ka pasur shqetësime publike mbi kushtet e trajtimit.

“Sot u ndalova në mënyrë të paligjshme gjatë ushtrimit të detyrës sime për inspektimin e kushteve në Burgun 313. Ky veprim përbën një shkelje të hapur të ligjit dhe një pengim të kontrollit institucional.

Qëllimi i këtij inspektimi ishte verifikimi i kushteve të trajtimit të të gjithë të burgosurve dhe të paraburgosurve, pa përjashtim, përfshirë këtu edhe Presidentin Ilir Meta, për të cilin janë shprehur publikisht edhe zyrtarë të tjerë se kushtet që nga momenti i arrestimit deri te trajtimi i tij kanë qenë të padrejta. Kjo ishte pjesë e detyrimit ligjor për mbrojtjen e të drejtave themelore të njeriut.

Inspektimi i kushteve në institucionet e vuajtjes së dënimit është një detyrim ligjor dhe jo një favor i administratës. Ndalimi im tregon një mungesë të theksuar transparence dhe përpjekje për të fshehur problematika serioze.

Fatkeqësisht, Shqipëria po shndërrohet në një rast unik ku institucionet shtetërore, në vend që të zbatojnë ligjin, e shkelin atë.

Kjo nuk është një çështje personale, por një problem serioz i shtetit të së drejtës. Për këtë arsye, do të ndjek çdo rrugë ligjore dhe institucionale për të garantuar respektimin e ligjit dhe të të drejtave të njeriut për çdo të burgosur”, tha për mediat deputeti demokrat.

Një operacion antidrogë, i zhvilluar në Athinë, ka çmontuar një rrjet të trafikut të narkotikëve.

Në qendër të goditjes ka qenë një organizatë narkotrafiku greko-shqiptare, që kryente aktivitetin e saj në zonën përreth Kampusit të Universitetit Zografou.

Sipas mediave greke, në operacion janë arrestuar 4 persona, mes tyre 2 shqiptarë.

Gjatë këtij operacioni, autoritetet greke kanë sekuestruar edhe 6 kilogramë kanabis, 20,000 euro dhe telefona celularë.

Sipas informacioneve, aksioni është në vazhdim e sipër.

Nga “La Repubblica” –

Flota detare që Donald Trump po përqendron rreth Iranit ka ende mungesa të disa elementëve kyçë, siç janë kryqëzorët, por po fillon të marrë një potencial ofensiv të rëndësishëm. Pesha më e madhe e një sulmi të mundshëm do të bjerë mbi Marinën Amerikane, e cila aktualisht ka të dislokuara të paktën 12 anije dhe disa nëndetëse. Aeroplanmbajtësja Lincoln disponon bombardues F-35, të cilët për shkak të karakteristikave të tyre të “padukshmërisë” ndaj radarëve mund të bëhen maja e sulmit.

Thelbësorë janë edhe avionët EF-18 Growler, si ata në bord të anijes kryesore, ashtu edhe përforcimet që kanë kaluar Atlantikun këto orë: ata janë të pajisur për të verbuar radarët dhe neutralizuar mbrojtjen kundërajrore. Jo rastësisht, presidenti ka lavdëruar punën e këtyre avionëve, të quajtur në zhargon Wild Weasel, gjatë sulmit në Caracas. Aeroplanmbajtësja ka gjithashtu 35 F-18 Super Hornet që mund të shërbejnë si mbrojtje ose të godasin objektiva tokësorë.

Shtatë shkatërruesit e klasës Arleigh Burke, tre në skuadrën e Lincoln, të tjerët mes Detit të Kuq dhe Mesdheut, janë të pajisur me raketa cruise Tomahawk, të cilat që nga viti 1991 kanë kontribuar gjithmonë në goditjen e parë të operacioneve të mëdha amerikane. Çdo raketë mbart 450 kilogramë eksploziv në një distancë mbi 2 mijë kilometra, duke fluturuar me rreth 900 kilometra në orë.

Ato konsiderohen të sakta, por mund të godasin vetëm objektiva të fiksuar: komandat e Gardës Revolucionare, ndërtesa qeveritare, depo ushtarake, aeroporte e porte, fabrika armësh. Edhe nëndetëset me propulsim bërthamor, që qëndrojnë të fshehura pa u lokalizuar, kanë dhjetëra Tomahawk: nuk është e qartë nëse në zonë është zhvendosur një nga katër nëndetëset e klasës Ohio, të transformuara në baza raketash me plot 154 cruise.

Shtatë avionë luftarakë do të shërbejnë gjithashtu si mburojë kundër kundërpërgjigjeve iraniane. Ditët e fundit janë transferuar në Jordani dhe Arabinë Saudite një bateri anti-raketë Thaad, që neutralizon armët balistike jashtë atmosferës, dhe një Patriot Pac 3, e aftë t’i rrëzojë vetëm në fazën përfundimtare të trajektores. Sipas CNN, një tjetër kompleks Thaad mund të arrijë në rajon, për të integruar kupolën mbrojtëse të shtetit hebre.

Skuadriljet e Forcave Ajrore të pranishme në zonë mund të kryejnë vetëm misione mbrojtëse: monarkitë sunite janë kundër hapjes së një sfide të re me teokracinë iraniane. Ato janë përqendruar në bazat saudite dhe jordane, duke eliminuar praninë e avionëve në aeroportet e Emirateve, Kuvajtit dhe Katarit, shumë të ekspozuar ndaj kundërpërgjigjeve.

Bëhet fjalë kryesisht për Strike Eagles, versioni i fundit i legjendarit F-15 që mbart 10 tonë armë. Në dy përplasjet me Iranin në vitin 2024, ata ishin vendimtarë për të krijuar një barrierë kundër dronëve dhe raketave cruise të drejtuara drejt Izraelit, duke i rrëzuar me raketa ajër-ajër, kundërtank dhe breshëri nga topi i bordit.

Në këtë listë të makinerive vdekjeprurëse përfshihen edhe bombarduesit B-2 Spirit që ngrihen direkt nga Shtetet e Bashkuara. Ata janë të vetmit në gjendje të përdorin bombat gjigante “shkatërruese bunkeri” që depërtojnë në strehimet e blinduara të gërmuara nën kodra ose male. Në qershor u përdorën për të shkatërruar laboratorët e programit bërthamor; tani po mendohet një mision për të tentuar të eliminojnë drejtuesit e Republikës Islamike, duke përfshirë edhe Udhëheqësin Suprem Ali Khamenei.

Pentagoni ka edhe mjete të tjera për një aksion surprizë: nga komando të Navy Seals te sistemet ende sekrete me të cilat u thye mbrojtja e Maduros. Bëhet fjalë për topa akustikë, që paralizojnë njerëzit; sisteme me impulse elektromagnetike që ndalin dronët dhe raketat; sulme kibernetike “taktike” që çojnë në kolaps kompjuterët e avionëve, anijeve dhe radarëve.

Gardianët e Revolucionit po përgatiten të përgjigjen me kërcënimin më të vjetër: mbylljen e Ngushticës së Hormuzit, nga ku kalon një e pesta e naftës së planetit. Ata kanë njoftuar një stërvitje detare që do të zhvillohet të dielën dhe të hënën, ku do të përdoren municione reale. Një mesazh tepër i qartë.

Është ndarë nga jeta në moshën 63-vjeçare koreografi i njohur lezhjan Gazmend Golemi.

Lajmin e hidhur e ka bërë me dije djali i tij përmes një postimi në rrjetin social Facebook.

Sipas njoftimit të familjes, Golemi u nda nga jeta mëngjesin e sotëm në spitalin e Firences, Itali, pas një sëmundjeje të rëndë.

Koreografi Gazmend Golemi u ngjit për herë të parë në skene në moshën 6 vjeçare, e që prej asaj kohe arti koreografik u bë pjesë e pandashme e jetës së tij.

Gjatë këtyre viteve  ai ka nxjerr dhjetëra grupe valltaresh të cilët kanë qenë pjesë në aktivitet kulturore brenda dhe jashtë vendit, duke u vlerësua dhe me çmime.

Trajneri i Manchester City, Pep Guardiola bëri një deklaratë publike në një aktivitet në Barcelonë të enjten në mbrëmje.

Tekniku katalanas u shfaq në një koncert solidariteti i veshur me një rrobë palestineze dhe foli hapur për dhimbjen dhe zemërimin e tij kur pa imazhet e fëmijëve që vuajnë në Rripin e Gazës.

Guardiola, përshkroi dhimbjen që ndjen pasi pa imazhet e dy viteve të fundit në mediat sociale dhe televizion.

“Shoh një fëmijë midis rrënojave që pyet veten ‘ku e ka nënën?’ pa e ditur ende të vërtetën. Gjithmonë mendoj: Çfarë po u shkon ndërmend? Besoj se i kemi lënë vetëm, i kemi braktisur”, tha 55-vjeçar.

Trajneri katalanas nuk hezitoi të përdorte gjuhë të ashpër për udhëheqjen politike botërore, duke e përshkruar qëndrimin e tyre si “frikacak”.

“Ndoshta sepse ata që janë në pushtet janë frikacakë. Ata dërgojnë të rinj të pafajshëm për të vrarë njerëz të tjerë të pafajshëm. Ne duhet të bëjmë një hap përpara. Kjo është një deklaratë për Palestinën, por mbi të gjitha një deklaratë për njerëzimin”, theksoi ai mes duartrokitjeve.

Për shkak të pranisë së tij në këtë ngjarje, Guardiola nuk mori pjesë në konferencën e caktuar për shtyp të premten përpara derbit të së dielës me Tottenham.

Manchester City kishte përmendur “arsye personale”, me asistentin e tij, Pep Leinders, që zuri vendin e tij para gazetarëve.

Zv.kryeministrja dhe ministrja e Infrastrukturës dhe Energjisë, Belinda Balluku ka paraqitur një rekurs në Gjykatën e Lartë ku kërkon rrëzimin e vendimit të GJKKO për bllokimin e daljes jashtë vendit.

Siç mëson TCH, në rekursin e depozituar në Gjykatën e Lartë, avokatët e Ballukut ka përdorur si mbrojtje rastin “Ymeri”, në çështjen e Arben Ahmetaj ku Kushtetuesja vendosi që telefoni i sekuestruar nuk mund të merrej si provë pasi nuk kishte më parë një vendim gjykate.

Telefoni në fakt i përkiste Onejda Ymerit, e cila ditën që u thirr në kuadër të hetimeve ndaj ish-zëvendëskryeministrit  iu bllokua dhe telefoni.

Ky precedent është marrë si shembull nga mbrojtja e zv.kryeministres dhe ministres Belinda Balluku, të dhënat për të cilën u përftuan nga telefoni i Ervis Berberit, që është bërë shkak për hapjen e disa fraksioneve hetimore një ndër to edhe tenderat ku Balluku ka marrë statusin e të pandehurës dhe mbahet në masën ndalim për të dalë jashtë vendit.

Momenti i dytë që ndalen avokatët e Ballukut është arsyetimi se nuk ka asnjë rrezik që Belinda Balluku të arratiset nga Shqipëria dhe ndaj duhet hequr masa e ndalimit për të dalë jashtë vendit.

Si provë sillen tre udhëtimet mbas muajit tetor 2025 kur Belinda ishte thirrur për tu pyetur nga SPAK dhe ku ju komunikua akuzë . Një ndër këto udhëtime është edhe udhëtimi në Zvicër.

Por në pritje për një vendim nga Gjykata Kushtetuese dhe nga këshilli i mandateve, SPAK ka kryer sekuestro dhe këqyrje të shumta mes tyre edhe biznesmenësh të përmendur në tendera.

Ndaj Ballukut, SPAK ngriti aktakuzë më 31 tetor 2025, nën dyshimet se ka bërë shkelje gjatë dhënies së tenderëve.

Balluku i ka mohuar akuzat si “hedhje balte, insinuata, gjysmë të vërteta dhe gënjeshtra”, duke u shprehur se do të bashkëpunonte plotësisht me drejtësinë.

Ajo ishte pezulluar nga detyrat zyrtare dhe i ishte pamundësuar largimi nga shteti, por vendimi i SPAK-ut për pezullim u rrëzua nga Gjykata Kushtetuese.