Administrata Trump po pezullon të gjithë përpunimin e vizave për vizitorët nga 75 vende duke filluar nga 21 janari.

Kështu raporton Fox News, duke cituar një memo nga Departamenti i Shtetit të SHBA-ve.

Lista e plotë e vendeve përfshin:

Afganistanin, Shqipërinë, Algjerinë, Antigua dhe Barbudën, Armeninë, Azerbajxhanin, Bahamas, Bangladeshin, Barbadosin, Bjellorusinë, Belizen, Butanin, Bosnjën, Brazilin, Burmën, Kamboxhian, Kamerunin, Kepin e Gjelbër, Kolumbinë, Bregun e Fildishtë, Kubën, Republikën Demokratike të Kongos, Dominikën, Egjiptin, Eritrenë, Etiopinë, Fixhin, Gambinë, Gjeorgjinë, Ganën, Grenadën, Guatemalën, Guinenë, Haitin, Iranin, Irakun, Xhamajkën, Jordaninë, Kazakistanin, Kosovën, Kuvajtin, Kirgistanin, Laosin, Libanin, Liberinë, Libinë, Maqedoninë, Moldavinë, Mongolinë, Malin e Zi, Marokun, Nepalin, Nikaraguanë, Nigerinë, Pakistanin, Republikën e Kongos, Rusinë, Ruandën, Shën Kitsin dhe Nevisin, Shën Luçinë, Shën Vincenti dhe Grenadinet, Senegalin, Sierra Leonen, Somalinë, Sudanin e Jugut, Sudanin, Sirinë, Tanzaninë, Tajlandën, Togon, Tunizinë, Ugandën, Uruguain, Uzbekistanin dhe Jemenin.

Përfaqësuesit e Departamentit të Shtetit nuk iu përgjigjën menjëherë një kërkese për koment mbi memorandumin e raportuar, të cilin Fox News tha se u drejton ambasadave amerikane të refuzojnë vizat sipas ligjit ekzistues ndërsa departamenti rishikon procedurat e tij. Nuk është dhënë ende një afat kohor.

Pezullimi vjen në mes të një goditjeje të gjerë ndaj emigracionit të ndjekur nga presidenti republikan i SHBA-ve, Donald Trump, që kur mori detyrën janarin e kaluar.

Në nëntor, Trump kishte premtuar të “pezullonte përgjithmonë” migracionin nga të gjitha “Vendet e Botës së Tretë” pas një të shtëne pranë Shtëpisë së Bardhë nga një shtetas afgan që vrau një pjesëtar të Gardës Kombëtare.

Altin Ndoci është i burgosuri që u arratis ditën e djeshme nga spitali në Durrës, pasi ishte dërguar për trajtim mjekësor. Ndërsa as tani, më shumë se 24 orë më pas, nuk ka asnjë informacion për vendndodhjen e tij.

Ndoci është një emër i njohur për autoritetet, teksa është përmendur edhe nga i penduari i drejtësisë, Nuredin Dumani.

Ky i fundit në dëshminë e tij do të deklaronte se Altin Ndocin dhe Talo Çelën i ka dashur të vrarë, pasi donin ti eleminonin vëllain.

I penduari i drejtësinë Nuredin Dumani, në seancën e 25 shkurtit 2025, do ti përgjigjej pyetjeve të avokatëve të të pandehurve në proces ku mes të tjerash ka përmendur edhe emrin e të arratisurit tashmë, Altin Ndoci.

Dumani do të deklaronte se pas konflikteve që pati me Talo Çelën dhe Altin Ndocin ka dashur që këta të dy të vriteshin, por jo nga dora e tij.

Pyetje-përgjigjet mes avokatit Qani Hasa dhe Nuredin Dumanit:

Avokati Qani Hasa: Kur je njohur me Talo Çelën dhe në ç‘rrethana?

Dumani: Talon e kam njohur në fund 2009, fillim 2010. E kam njohur nga Ilirjan Feçi.

Hasa: Keni pasur momente të qëndroni në banesën e tij.

Dumani: Po, kam qenë, por edhe ka qenë tek shtëpia ime. Talo jetonte vetëm.

Hasa: A kishte vëllezër?

Dumani: Po kishte dy.

Hasa: A kishe informacion me lëvizjet e Bujar Çelës, vëllait?

Dumani: Po, ishte në shërbim të Talos. Kamuflohej taksixhi.

Hasa: Kur e ke njohur Erion Alibej?

Dumani: Janar-shkurt 2020.

Hasa: Ç’marrëdhënie krijuat?

Dumani: Shoqërore. E kam takuar gjithmonë tek shtëpia e tij.

Hasa: Keni thënë që ai kishte zbuluar ata që i vranë vëllanë dhe se do hakmerrej. Kur e vendosët se do hakmerreshit?

Dumani: Në fillim për Erion Alibej më ka vënë në dijeni Elio Bitri, se po interesohej për mua. Jemi takuar disa herë me Bitrin. Më tha që Erion Alibej mendon se ju keni gjuajtur. Unë e mohova, se nuk kisha lidhje. Unë duke qenë i sigurt që nuk kisha lidhje dhe as vëllai kam kërkuar takim. Elio komunikonte me Arjan Spahiun, që nuk ishte në Shqipëri në atë kohë. Më ka kërkuar Elio një natë. Erdhi Elio më mori. Takuam Arjan Spahiun. Më bëri kontroll fizik, pasi do takonim mikun e tij. Me një Mercedes shkuam tek një pallat ku takova Erion Alibeajn.

Hasa: Në cilin moment vendosët të hakmerreshit drejt vrasësve të vellait të Alibeaj?

Dumani: Pas konfliktit që pata me Talo Çelën dhe Altin Ndocin doja të vriteshin ata, por jo nga dora jonë. Kjo më interesonte, pasi Altin Ndoci deshi të vrasë vëllanë tim, por ju bllokua arma. Unë doja ta ndihmoja të shkonin ata, jo ti vrisja unë. Pasi u takuam vendosa ta ndihmoja.

Hasa: kur u bë kjo bisedë?

Dumani: Pasi qëndruam 2-3 orë. Që herën e parë.

Hasa: Keni thënë që hartuat një listë?

Dumani: Pasi mësova që Alibeaj po hetonte për Talo Celën dhe pata një bisedë me Fatmir Troplinin vendosëm që do godisnim ne të Durrësit. Unë kisha parë lëvizjet e Dorian Shkozës. E shikoja që më vinte pas me makina të ndryshme.

Vllaznia triumfoi minimalisht ndaj Egnatias, në supersfidën e javës së 19-të në Superiore.

Sukses i rëndësishëm për shkodranët ndaj rivalëve direktë, në garën për titull. Një gol i shënuar nga Kallaku në minutën e 27-të, vendosi takimin.

Në fraksionin e dytë, rrogozhinasit gjetën barazimin me Buric, por goli i anulua për pozicion jashtë loje.

Në ndeshjen tjetër, Elbasani u ndal në shtëpi në një barazim 1-1 me Flamurtarin.

Pavarësisht humbjes, Egnatia mbetet në krye të renditjes me 37 pikë, Elbasani 34 ndërsa Vllaznia ngjitet në vendin e tretë me 33 pikë të grumbulluara.

LEXO EDHE: GOLI/ Tirana e nis 2026 me këmbë të mbarë, mposht Bylisin në sfidën për mbijetesë

Ministri i Brendshëm i Venezuelës, Diosdado Cabello njoftoi të martën sekuestrimin e një ngarkese masive droge prej 6,850 kilogramësh.

“Me këtë rezultat, shteti venezuelian ka arritur në një total prej 7,148 kilogramësh të sekuestruara” vetëm në 13 ditët e para të janarit.

Cabello specifikoi se operacioni rezultoi në sekuestrimin e 6,850.41 kilogramëve substanca të paligjshme. Dërgesa përbëhej nga 14,199 pako marihuanë (6,758.66 kg) dhe 81 pako kokainë (91.75 kg).

“Ky është një goditje e madhe ndaj narrativës që thotë se Venezuela lehtëson trafikimin. As kokaina, as marihuana, as ndonjë drogë që shteti mund ta ndalojë gjatë rrugës nuk do të kalojë këtu”, deklaroi Cabello, duke theksuar se çdo konfiskim përfaqëson “heqjen e një pengese” të strukturës logjistike kriminale.

Cabello deklaroi se operacione janë kryer edhe në Zulia, shumica e të cilave lidhen me sekuestrimin e drogës.

Procedura e parë që ai përmendi ishte arrestimi i tre personave që kishin 75 pako marihuanë dhe 39,450 kilogramë të së njëjtës substancë.

Operacioni i dytë ishte arrestimi i tre personave të tjerë që posedonin 50 pako dhe 50 kilogramë marihuanë në shtetin e Zulias.

Ai specifikoi se personat e përfshirë në të dyja rastet kanë lidhje me “mafian shqiptare që vepron nga Ekuadori” dhe se ai, si ministër, mban “një luftë të vërtetë kundër trafikut të drogës”.

Ernest Muçi e nis vitin 2026 aty ku la atë 2025.

Lojtari i Kombëtares vazhdon të shënojë në Turqi, teksa sot ka lënë shenjën e tij edhe në Kupë.

Dy gola dhe një asist nga ana e Muçit, për përmbysjen 1 me 6 ndaj Istanbulspor.

Në ndeshjen e raundit të dytë, me grup të përbashkët, që luhej në fushën e Istanbulspor, ishte pikërisht sulmuesi shqiptar ai i cili tundi rrjetën me një diagonale të shkëlqyer në minutën e 41-të.

Një gol fantastik i cili bëri që në tribuna të shpërthenin brohoritjet “Muçi, Muçi” mes tifozëve të skuadrës së Trabzonspor për të cilët sulmues shqiptar është kthyer shumë shpejt një idhull, ndonëse ka pak muaj në radhët e kësaj skuadre.

Asisti më pas solli përmbysjen te Trabzonspori në minutën e 57-të.

Muçi nuk u mjaftua me kaq, pasi realizoi edhe një supergol tre minuta më pas.

LEXO EDHE: E ardhmja e Ernest Muçit/ Presidenti i Trabzonspor thyen heshtjen. Ç’pritet për yllin e Kombëtares

Pas arratisjes së Altin Ndocit qetësia ka marrë fund në burgun ‘hotel’ të Durrësit. 206 të dënuarit dhe të paraburgosurit që ndodhen aktualisht në këtë institucion do të futen në “sitë” për të vlerësuar rrezikshmërinë e tyre.

Ministri i Drejtësisë, Besfort Lamallari ka urdhëruar Drejtorin e Përgjithshëm të Burgjeve të hartojë një plan të ri dhe të rishpërndajë nëpër seksione të burgosurit, bazuar në rrezikun shoqëror që kanë.

Pika më e rëndësishme e urdhrit, transferimi i të gjithë personave me rrezikshmëri, që deri tani qëndronin në burgun e dalluar për ‘komoditetin e tij’, në një prej shtatë burgjeve të sigurisë së lartë në vend.

Në një seksion të veçantë në Durrës, aktualisht ndodhen 27 personazhe të botës së krimit, të konsideruar të rrezikshmërisë së lartë, mes 54 të dënuarve dhe 152 të paraburgosurve gjithsej. Altin Ndoci ishte një prej tyre, ndërsa dallon edhe Lulzim Berisha.

Burgu i Durrësit njihet edhe si “burgu i VIP-ave”

Në këtë institucion kanë vuajtur dënimin ish-ministri i Mjedisit Lefter Koka, ish-deputeti Alqi Bllako dhe ish-kryetari i Bashkisë së Durrësit Vangjush Dako, të cilët tashmë kanë fituar lirinë.

Aktualisht, në Burgun e Durrësit vijojnë të qëndrojnë kryebashkiaku i Tiranës Erion Veliaj, ish-deputeti Jurgis Çyrbja, ish-ministri i Shëndetësisë Ilir Beqaj, ish-zyrtarë të tjerë të lartë të akuzuar nga SPAK dhe në proces gjykimi.

Gjatë kontrolleve të zhvilluara herë pas here në këtë institucion janë gjetur edhe telefona celularë, të fshehur në ambientet e jashtme të burgut.

Shqipëria ka 20 institucione të vuajtjes së dënimit, 7 nga të cilët të sigurisë së lartë, si: Peqini, Fieri, Drenova, Burreli dhe dy burgjet e Tiranës, 313 dhe 325.

Policia e Shtetit vijon kërkimet për kapjen e të paraburgosurit Altin Ndoci i cili u arratis nga ambientet e spitalit të Durrësit të martën.

Policia po organizon aksione të shumta për gjetjen e tij, ku janë kryer kontrolle jo vetëm në Durrës, por edhe në disa zona të Tiranës dhe Fushë-Krujës.

Familjarët e të arratisurit thonë se nuk kanë dijeni për vendndodhjen e Altin Ndocit.

Ai konsiderohet person me rrezikshmëri të lartë shoqërore dhe akuzohet nga SPAK për vrasje, pjesëmarrje në grup kriminal, etj.

Ndoci është në gjykim si pjesë e dosjes “Plumbi i Artë” për masakrën e Bradasheshit, ku mbeti i vrarë vëllai i Erion Alibejt, Endrit Alibejt, xhaxhai i tij Arben Dylgjeri, si dhe një shtetas turk.

Ai u arrestua në vitin 2020, i akuzuar si pjesmarrës në vrasjen e vëllezërve Besmir dhe Viktor Haxhia në Durrës, si dhe për pjesmarrje në vrasjen e Dorjan Shkozës dhe Anxhelo Avdisë, po në Durrës, por më pas mori pafajësi nga gjykata.

LEXO EDHE: Grabitje, drogë, vrasje me pagesë/ “Karriera” e pasur e Altin Ndocit, që duket sikur e “ka përpirë dheu”

Zbulohet ora se kur do të nisë protesta kombëtare, e thirrur nga Partia Demokratike, më datë 24 janar, para kryeministrisë.

Në mbledhjen e kreut të PD-së Sali Berisha me drejtuesit politikë, është caktuar që, protesta të nisë në orën 17:00.

Edhe në konferencën e sotme para gazetarëve Berisha bëri sërish thirrje për pjesëmarrje masive në protestën e 24 janarit.

“PD u bën thirrje shqiptarëve, sot më shumë se kurrë të flasin me zemërimin e tyre, të flasin me guximin e tyre, të flasin me ndjenjat e dashurisë së tyre për këtë vend dhe të ardhmen e shqiptarëve me datën 24 janar në protestën kombëtare të thirrur nga opozita për këtë qëllim”, tha ndër të tjera Berisha.

LEXO EDHE: “Kush ka financuar Rithemelimin është pyetur”, Berisha reagon për hetimet e SPAK: Është politik, Basha i dha Escobarit listën me biznese që sponsorizuan

Zbardhet agjenda e mbledhjes së kryeministrit Edi Rama me Grupin Parlamentar të Partisë Socialiste, që zhvillohet këtë të premte (16 janar) duke nisur nga ora 10:00.

Fjalën hapëse do e ketë Kryeministri Rama që do pasohet nga fjala e Kryetarit të Kuvendit Niko Peleshi e më pas të Kryetarit të Grupit parlamentar të PS, Taulant Balla.

Agjenda e plotë:

– 10:00 Hapja e Mbledhjes

– Fjala e Kryeministrit, Kryetarit të PSSH, Edi Rama.

– Fjala e Kryetarit të Kuvendit, Niko Peleshi.

– Fjala e Kryetarit të Grupit Parlamentar të PSSH, Taulant Balla.

Raporti i Veprimtarisë së Komisioneve Parlamentare

– Komisioni për Ekonominë, Punësimin dhe Financat, Milva Ekonomi ( Koha 10 min.)

– Komisioni për Çështjet Ligjore dhe Administratën Publike, Ulsi Manja ( Koha 10 min.)

– Komisioni për Çështjet e Brendshme dhe të Mbrojtjes, Bledar Çuçi ( Koha 10 min.)

– Komisioni për Bujqësinë, Ushqimin dhe Zhvillimin Rural, Blendi Klosi (Koha 10 min.)

– Komisioni për Burimet Natyrore, Infrastrukturën dhe Zhvillimin e Qëndrueshëm, Anila Denaj ( Koha 10 min.)

– Komisioni për Edukimin, Shkencën dhe Sportet Evis Kushi ( Koha 10 min.)

– Komisioni për Shëndetësinë dhe Mirëqenien Sociale Eduard Shalsi ( Koha 10 min.)

– Komisioni për të Drejtat e Njeriut dhe Mjetet e Informimit Publik, Iris Luarasi ( Koha 10 min.)

– Komisioni për Kulturën, Turizmin dhe Diasporën, Erion Malaj ( Koha 10 min.)

– Komisioni për Europën dhe Punët e Jashtme, Igli Hasani ( Koha 10 min.)

– Komisioni për Nismat Qytetare, Bashkëpunimin dhe Mbikëqyrjen Institucionale, Fatmir Xhafaj (Koha 10 min.)

– Komisioni Posaçëm për Realizimin e Reformës Zgjedhore, Damian Gjiknuri (Koha 10 min.)

– Komisioni Posaçëm për Reformën Administrativo-Territoriale Arbjan Mazniku ( Koha 10`)

– Raporti nga Sekretari i Grupit mbi pjesëmarrjen e deputetëve në Seancat Plenare, Komisionet dhe Mbledhjet e Grupit.

13:30 Konkluzione

– Fjala e Kryetarit të Grupit Parlamentar të PSSH, Taulant Balla.

– Fjala e Kryeministrit, Kryetarit të PSSH, Edi Rama.

Të pranishëm në mbledhje do të jenë edhe ministrat.

Ambasada e Shteteve të Bashkuara në Tiranë u është drejtuar me një mesazh të drejtpërdrejtë të gjithë atyre që kërkojnë të udhëtojnë drejt Amerikës.

Përmes rrjeteve sociale, ambasada sqaron se çfarë lejohet dhe nuk lejohet nëse keni një vizë B1/B2 (viza turistike).

Theksi i veçantë është vënë te përgjegjësia individuale e udhëtarit për të mos abuzuar me qëllimin e vizës.

“Është përgjegjësia juaj ta përdorni vizën tuaj në mënyrë korrekte,” thuhet në njoftim, duke pasuar me një listë të detajuar të aktiviteteve që lejohen dhe nuk ndalohen.

Nëse keni vizë B1/B2, jeni të lirë të shkoni për:

• Turizëm, pushime dhe blerje;
• Vizita familjare ose shoqërore;
• Takime biznesi dhe konferenca.

Ambasada tërheq vëmendjen veçanërisht për ata që synojnë të punojnë apo të lindin fëmijë në SHBA.

Ndalohen rreptësisht:

• Turizmi i lindjes (për t’i dhënë fëmijës pasaportë amerikane);
• Puna me pagesë nga biznese amerikane;
• Studimet universitare;
• Performancat e paguara.

Arredimi dhe rikualifikimi urban i superstradës Tiranë – Durrës, nga kthesa e Kamzës, deri në urën e Limuthit parashikohet të kushtojë rreth 1.4 mld lekë.

Autoriteti Rrugor Shqiptar ka bërë gati tenderin që përfshin fazat I, II dhe III, ku aktualisht po punohet për zgjerimin e këtij aksi të rëndësishëm rrugor.

Ndërkaq, brenda këtij muaji pritet të hapen për qarkullimin e automjeteve korsitë e reja që janë ndërtuar në segmentin që nis pas kthesës së Kamzës dhe përfundon te mbikalimi i Rinasit.

Më hërët përfaqësues të ARRSH-së kanë deklaruar se kjo të varet shumë nga koha sepse një mot i ftohtë nuk e favorizon shtresën e asfaltit të fundit që ka ngelur, por pritshëmritë janë që të mos ketë pengesa.

Hapja për qarkullimin e automjeteve do të bëhet përpara afatiti kontraktual, pasi njëra prej tyre e ka afatin deri në maj dhe tjetra e ka në shtator të këtij viti.

Ndërkohë, kontrata e tretë është nënshkruar gjatë 3-mujorit të fundit të vitit 2025, por synohet që brenda vitit të ketë rezultate konkrete. Kjo fazë përfshin ndërtimin e nyjes që lidh rrugën e Laknasit me projektin e zgjerimit të autostradës, teksa në dokumentet e tenderit specifikohej se zona ku kërkohet të realizohet ky projekt është një zonë me zhvillim të lartë industrial dhe së fundmi edhe me zhvillim të rëndësishëm urban.

Pas përfundimit, autostrada do të ketë 8 korsi në total, nga 4 në secilin drejtim, ndërsa shpejtësia e lejuar do të variojë nga 90 -140 km në orë.

Nga Corriere Della Sera –

“Shtetet e Bashkuara kanë nevojë për Groenlandën për arsye të sigurisë kombëtare. NATO bëhet shumë më e fuqishme dhe më efektive me Groenlandën në duart e Shteteve të Bashkuara. Çdo gjë më pak se kaq është e papranueshme.”

Këto janë fjalët e presidentit amerikan Donald Trump, të publikuara në rrjetin e tij social Truth, dhe janë të drejtpërdrejta.

Ato nuk duket se lënë shumë hapësirë manovrimi për samitin e parashikuar sot mes zëvendëspresidentit të tij JD Vance, sekretarit të Shtetit Marco Rubio, ministrit të Jashtëm danez Lars Løkke Rasmussen dhe homologes së tij groenlandeze Vivian Motzfeldt.

Groenlanda, shpjegon më tej Trump, “është jetike për Golden Dome që po ndërtojmë. NATO duhet të na hapë rrugën për ta marrë atë. Nëse nuk e bëjmë ne, do ta bëjnë Rusia ose Kina, dhe kjo nuk do të ndodhë!”.

Fjalë që rikthehen te pikat, siguria kombëtare dhe kërcënimi që paraqesin Rusia dhe Kina, të cilat presidenti amerikan i kishte ngritur edhe më parë, por që, të përsëritura në prag të takimit të sotëm, tingëllojnë si një sinjal shumë i qartë.

Presidenti amerikan e ka ashpërsuar edhe më tej tonin në rrjetin e tij Truth.

“NATO: thuajini Danimarkës t’i largojë që tani! Dy slitë me qen nuk mjaftojnë! Vetëm SHBA mund ta bëjë!”, ka shkruar Trump, duke iu referuar përpjekjeve të Rusisë dhe Kinës për të depërtuar në Groenlandë.

“Nuk i nënvlerësojmë deklaratat për Groenlandën, tha Macron, i cituar nga zëdhënësja e qeverisë Maud Bregeon, nëse sovraniteti i një vendi evropian dhe aleat shkelet, pasojat zinxhir do të ishin të paprecedenta. Franca po e ndjek situatën me vëmendjen maksimale dhe veprimi i saj do të jetë në solidaritet të plotë me Danimarkën dhe sovranitetin e saj.”

Po ashtu, presidentja e Komisionit Evropian, Ursula von der Leyen, në një deklaratë për shtyp në Bruksel tha: “Për mua është e rëndësishme që groenlandezët ta dinë se ne i respektojmë dëshirat dhe interesat e tyre dhe se mund të mbështeten tek ne.”

Ajo shtoi se Arktiku dhe siguria në atë zonë është një çështje që prek edhe Bashkimin Evropian.

“Groenlanda është pjesë e NATO-s dhe ne e dimë se NATO është forumi që bashkon interesat e ndryshme të aleatëve”, përfundoi ajo.

Fjalët e Trump, megjithatë, e ngushtojnë edhe më shumë hapësirën e manovrimit për negociatat.

Tirana e nis me këmbë të mbarë vitin 2026 në Kategorinë Superiore.

Skuadra bardheblu mori një fitore të çmuar teksa mposhti Bylisin në transfertë me rezultatin 1-0 në atë që konsiderohet si sfida e mbijetesës me kryeqytetasit që regjistruan fitoren e dytë në këtë sezon në kampionat.

Momenti që vendosi fatin e kësaj ndeshjeje u regjistrua në pjesën e dytë, pasi e para përfundoi me barazimin 0-0. Gjatë këtij fraksioni të dytë të lojës, arbitri Enea Jorgji akordoi një 11 metërsh për Tiranën pas verifikimit në sistemin VAR.

Te pika e bardhë shkoi Rafael i cili nuk gaboi duke e dërguar topin në rrjetë për t’i dhënë avantazhin 1-0 Tiranës që rezultoi të ishte edhe rezultati përfundimtar i sfidës.

Por edhe pas kësaj fitoreje Tirana mbetet në vendin e fundit me 13 pikë pas 19 ndeshjesh, ndërsa Bylis mbetet me 18 pikë në vendin e 8 të renditjes.

Drejtoria e Përgjithshme e Burgjeve ka urdhëruar një kontroll urgjent në qelinë e të burgosurit Fatmir Pjetri, i cili vuan dënimin në burgun e Burrelit.

Pjetri njihet si pjesë e bandës së ashtuquajtur të “Babagjyshëve”, ndërsa masa është marrë pas një zhvillimi të papritur në rrjetet sociale.

Shkak për kontrollin është bërë publikimi në profilin e tij në Instagram i një audioregjistrimi, ku Pjetri akuzon Drejtorinë e Burgjeve se nuk e ka lejuar të botojë një roman të shkruar prej tij, me arsyetimin se përmban akte dhune.

Autoritetet po hetojnë rrethanat e këtij publikimi dhe mënyrën se si regjistrimi audio është realizuar dhe shpërndarë nga brenda institucionit të vuajtjes së dënimit.

Sipas burimeve zyrtare, kontrolli synon të zbulojë nëse janë shkelur rregullat e sigurisë dhe nëse janë përdorur mjete të palejuara komunikimi.

Kujtohet se në vitin 2025, Fatmir Pjetri ka tentuar të arratisej nga burgu 313, çka e bën edhe më të ndjeshme situatën aktuale për autoritetet penitenciare.

Fatmir Pjetri ka qenë pjesë e një grupi kriminal ‘Babagjyshët’, që gjatë periudhës Janar-Dhjetor të vitit 2013 dhe në vazhdim, në qytetet e Tiranës, Laçit, Fushë-Krujës, Kuçovës dhe Durrësit kanë grabitur me armë disa argjendari në këto qytete.

Grabitja që bëri më shumë bujë ishte ajo në një qendër tregtare në Tiranë, ku të maskuar si babagjyshë pjesëtarët e grupit kriminal realizuan grabitjet.

Kina ka raportuar një valë të fortë eksportesh gjatë vitit 2025, me një sufiçit rekord prej 1 trilion dollarësh, ndërsa prodhuesit e saj përgatiten për 3 vite të tjera nën administratën Trump, e cila synon të ngadalësojë gjigantin prodhues duke zhvendosur porositë amerikane drejt tregjeve të tjera.

Qëndrueshmëria e Pekinit përballë tensioneve të rinovuara tarifore që nga rikthimi i Donald Trump në presidencë në janar të kaluar ka inkurajuar firmat kineze të fokusohen tek Azia Juglindore, Afrika dhe Amerika Latine për të kompensuar tarifat amerikane.

Me Kinën që shikon tek eksportet për të zbutur efektet e krizës së pronave dhe kërkesës së dobët të brendshme, sufiçiti rekord rrezikon të prekë më tej ekonomitë që janë të shqetësuara për praktikat tregtare të Kinës, kapacitetin e saj të tepruar prodhues dhe varësinë e madhe nga produktet kyçe kineze.

Sufiçiti i përgjithshëm për vitin arriti në 1.189 trilion dollarë, një shifër që është e barabartë me GDP-në e një ekonomie ndër 20 më të mëdhatë në botë, si Arabia Saudite, sipas të dhënave të doganave të publikuara të mërkurën, 14 janar, duke kaluar për herë të parë nivelin e trilionit në nëntor.

“Rritja globale e tregtisë duket e pamjaftueshme dhe ambienti i jashtëm për zhvillimin e tregtisë së jashtme të Kinës mbetet i ndërlikuar dhe serioz”, ka deklaruar Wang Jun, zv.ministër në administratën doganore kineze, gjatë një konference shtypi të mërkurën.

Megjithatë, Wang shtoi se me partnerë tregtarë më të diversifikuar, aftësia e Kinës për të përballuar rreziqet është rritur ndjeshëm dhe se “parimet themelore për tregtinë e jashtme të Kinës mbeten të forta”.

Eksportet nga ekonomia e dytë më e madhe në botë u rritën me 6.6% në dhjetor krahasuar me të njëjtën periudhë të vitit të kaluar, krahasuar me një rritje prej 5.9% në nëntor. Analistët e anketuar nga Reuters kishin parashikuar vetëm një rritje prej 3%.

Importet u rritën me 5.7%, pas një rritjeje prej 1.9% muajin e mëparshëm, duke tejkaluar gjithashtu pritshmëritë për 0.9%.

Yuani kinez qëndroi i qëndrueshëm pas publikimit të të dhënave, ndërsa investitorët në bursë mirëpritën shifrat më të mira se pritshmëria. Indeksi kryesor Shanghai Composite dhe indeksi i aksioneve të mëdha CSI300 u rritën mbi 1% gjatë mëngjesit.

Suficitet mujore të eksportit mbi 100 miliardë dollarë janë regjistruar shtatë herë gjatë vitit të kaluar, krahasuar me vetëm një herë në 2024, duke treguar se masat e Trump-it nuk kanë dëmtuar dukshëm tregtinë kineze me botën, edhe nëse kanë ngadalësuar eksportet drejt SHBA-së.

Ekonomistët presin që Kina të vazhdojë të fitojë pjesë tregu globale këtë vit, falë kompanive kineze që po krijojnë qendra prodhimi jashtë vendit për të përfituar nga tarifat më të ulëta ndaj SHBA-së dhe BE-së, si dhe nga kërkesa e fortë për çipe dhe elektronikë me cilësi më të ulët.

Industria e makinave kineze shënoi një rritje të eksportit prej 19.4%, me 5.79 milionë automjete të dërguara vitin e kaluar, ndërsa eksportet e EV-ve (makinat elektrike) u rritën 48.8%. Kina pritet të mbetet eksportuesi më i madh i makinave në botë për vitin e tretë radhazi, pas arritjes së këtij rekordi për herë të parë në 2023 duke kaluar Japoninë.

Megjithatë, Pekini ka treguar shenja që duhet të moderonte eksportet industriale për të ruajtur suksesin, duke qenë gjithnjë më i vetëdijshëm për pabarazitë në ekonomi dhe për imazhin negativ që po krijojnë volumin e lartë i eksportit.

Pas raportimit të suficitit prej trilion dollarësh në nëntor, kryeministri kinez Li Qiang u shpreh javën e kaluar në televizionin kombëtar për “zgjerimin proaktiv të importeve dhe promovimin e zhvillimit të balancuar të importeve dhe eksporteve”.

Kina gjithashtu hoqi subvencionet e tipit taksë për eksportet në industrinë e saj të energjisë diellore, një pikë e gjatë e tensioneve me vendet e BE-së.

Në dhjetor, ligjvënësit miratuan ndryshime në ligjin e tregtisë së jashtme pas dy leximeve, në vend të tre të zakonshme, si një sinjal për anëtarët e një marrëveshjeje të madhe trans-Paqësore se Kina është gati të zhvendoset nga subvencionet industriale drejt një tregtie më të lirë dhe më të hapur.

Edhe pse ekziston një armëpushim tarifor njëvjeçar që Trump dhe presidenti kinez Xi Jinping nënshkruan në fund të tetorit, tarifat amerikane prej 47.5% mbi mallrat kineze janë ende shumë mbi nivelin prej rreth 35%, që analistët thonë se mundëson fitim për kompanitë kineze që eksportojnë në SHBA.

Të gjithë personazhet kryesore të dosjes AKSHI, të cilët deri më tani kanë përfituar fonde publike përmes paracaktimit të fituesve dhe fryrjes së kostove në tendera, ishin përgatitur që nga 1 janari 2026 të mos paguanin asnjë lek taksa për qindra miliona euro që vijonin të merrnin nga buxheti i shtetit.

Skyweb.al ka zbuluar skemën e ndërtuar për këtë qëllim, e cila parashikonte kalimin formal të aktivitetit drejt Durana Tech Park, përmes krijimit të kompanive të reja me emra të ndryshëm, por me të njëjtët pronarë dhe administratorë që qëndrojnë pas subjekteve të përfshira në dosjen e AKSHI-t.

Skema lidhet drejtpërdrejt me ndryshimet fiskale që hynë në fuqi nga viti 2026. Pas presionit ndërkombëtar, qeveria u detyrua të hiqte privilegjin e tatim-fitimit 5 për qind për kompanitë e teknologjisë së informacionit, duke rikthyer normën standarde.

Në këtë fazë, për të shmangur pagesën e taksave, u aktivizua mekanizmi i parqeve teknologjike, i parashikuar në ligjin e vitit 2022, i cili garanton përjashtime totale nga tatim-fitimi, TVSH-ja dhe taksat mbi pagat për një periudhë 10–15 vjeçare.

Ligji ndalon transferimin e një veprimtarie ekzistuese në park vetëm për përfitim fiskal. Por, rezulton se kjo pengesë u anashkalua përmes regjistrimit të subjekteve të reja, ndërsa aktiviteti real, personat kyç dhe interesat ekonomike mbetën të pandryshuara.

Nga analiza e listës së kompanive të regjistruara në Durana Tech Park rezulton se disa prej tyre lidhen drejtpërdrejt ose indirekt me emra të hetuar nga SPAK në dosjen AKSHI.

Në disa raste, pronarë ose administratorë të kompanive të reja rezultojnë të jenë të njëjtët persona që drejtojnë ose përfaqësojnë subjektet në qendër të hetimeve për tenderat e AKSHI-t.

Të njëjtët emra me kompani të ndryshme

Nga shqyrtimi i listës së plotë të subjekteve të regjistruara në Durana Tech Park rezulton se një pjesë e konsiderueshme e tyre lidhen drejtpërdrejt ose indirekt me Ergys Agasin, Ermal Beqirin dhe rrethin e tyre të afërt.

Sipas verifikimeve të redaksisë, në disa raste lidhjet janë të dokumentuara përmes personave që shfaqen si pronarë ose administratorë në kompani të reja, por që paralelisht mbajnë role kyçe në subjekte të përfshira në dosjen AKSHI.

Një nga rastet është kompania KronoTech, e regjistruar në Durana Tech Park, e cila në dokumente rezulton me pronare Arjola Koromanin. E njëjta është administratore edhe e kompanisë Soft & Solution, subjekt i cili ndodhet në qendër të hetimeve për tenderët e AKSHI-t.

Në një tjetër rast, kompania Test & Tech figuron me pronar Ergys Agasin dhe me administratore Ina Cikon.

Ina Ciko është njëkohësisht administratore edhe e kompanisë EA Solution, në pronësi të Agasit, e përfshirë gjithashtu në dosjen e AKSHI-t.

Ciko ka lidhje familjare me Elon Cikon, pjesë e rrethit të afërt të Ergys Agasit dhe administrator i kompanisë EA Logistic.

Ndërkohë, Gëzim Hoxha, ndaj të cilit SPAK ka vendosur masë sigurie në kuadër të hetimeve për skandalin AKSHI dhe që dyshohet si pjesë e skemës së tenderëve, ka regjistruar në Durana Tech Park dy kompani, CyberMind dhe Box Artificial Logic.

Nga ana tjetër, vetë Ermal Beqiri ka regjistruar po ashtu kompaninë Data Storm në Durana Tech Park.

Të gjitha këto subjekte janë regjistruar gjatë muajve të fundit të vitit 2025, në një periudhë kur grupi i përfshirë po përgatitej të kalonte aktivitetin drejt Durana Tech Park, me të njëjtët aktorë, por përmes kompanive të reja, për shkak se ligji ndalon transferimin formal të një veprimtarie ekzistuese.

Një burim i tha redaksisë se SPAK duhet të verifikojë nëse këto kompani kanë ushtruar aktivitet tregtar real gjatë kësaj periudhe dhe të analizojë marrëveshjet e lidhura mes tyre dhe Durana Tech Park, për të përcaktuar nëse kemi të bëjmë me një skemë të mirëorganizuar shmangie taksash.

Plani i mirëmenduar i grupit në fjalë u prish nga hetimet për dosjen AKSHI. SPAK ka shtrirë tashmë hetimet e dosjes AKSHI dhe te Durana Tech Park pikërisht prej këtyre kompanive.

Altin Ndocin nuk e kishte lënë në harresë organizata Çopja.

Ky fragment shkruhet në dosjen e Çopjave teksa i dyshuari po përballej me drejtësinë për episode të tjera dhe të tjerë që gjendeshin jashtë flasin në SKY ECC se si ta lirojnë gjuajtësin sepse kishin mbetur pa qitës.

Përpara se Altin Ndoci ta bënte fakt arratisjen gati 5 vjet nga këto biseda në SKY ECC, anëtarët e organizatës Çopja ku dyshohet se ai bën pjesë shfaqeshin shumë të shqetësuar për arrestimin tij.

Ndoci lakohet me nofkën “kokë çami” dhe siç përmend SPAK anëtarët flasin jo vetëm si ta lirojnë me çdo kusht, por edhe të mbulonin shpenzimet familjare deri dhe pagesat për avokatët.

SPAK e cilëson këtë metodë tipike mafioze që synonte heshtjen dhe që për ti thënë se organizata nuk e kishte lënë në harresë, në këtë dosje Altin Ndoci tashmë i arratisur akuzohet për vrasjen e trefishtë në Bradashesh të Endri Alibej, Arben Dylgjerin dhe të një shtetasi turk, e po ashtu për vrasjen e Kelvis Brahos.

Altin Ndoci shfaqet, sipas SPAK, kur refuzon planin 1 milionë eurosh për të vrarë Erjon Alibej, në kohën që ai ishte në paraburgim sepse kjo sipas tij që ishte e pamundur. Por edhe si i përfshirë në grabitjen e gati 5 milionë eurove në pistën e Rinasit.

Çështja ndaj organizatës Çopja është në seancë paraprake dhe aty dyshohet se ka rolin e krahut të armatosur të të dyshuarve kryesore.

Për herë të parë përballja me SPAK e Altin Ndocit ishte për vrasjen e Besmir dhe Viktor Haxhisë dhe Anxhelo Avdisë dhe Dorian Shkozës. Ky hetim që solli dhe arrestimin e Ndocit nisi nga rrëfimi i Klevis Allës.

Për katër SPAK vrasjet u tërhoq sepse kishte hapur një kuti tjetër nga rrëfimet e Nuredin Dumanit. Në këto seanca Altin Ndoci paraqitej gjakftohtë dhe shpesh akuzat i ka hedhur poshtë përmes avokates.

I përshkruar si i burgosur i rrezikshëm, dhe me një dosje të hapur, Ndoci hyn tani te të kërkuarit e SPAK, që ndryshe nga ata që nuk i ka kapur, Ndocin e kishte në qeli dhe u arratis.

Policia ka kryer kontrolle në Durrës, Kavajë, Elbasan dhe Tiranë por pa rezultat.

Ilir Vrenozi ka lënë garën e Big Brother VIP Albania 5.

Ai ka vendosur që të largohet nga shtëpia, pasi thotë se nuk ndihet mirë dhe nuk e përballon dot.

“Nuk e përballoj dot jam i sëmurë”, i tha ai Stenaldos, teksa kanë shpërthyer të dy në lot duke u përshëndetur.

Indrit Cerloj, Drejtor i IEVP Durrës është shkarkuar nga detyra nga Ministria e Drejtësisë, një ditë pas arratisjes së të paraburgosurit Altin Ndoci.

Shkarkimi i tij vjen rreth 24 orë pasi fillimisht u pezullua.

Ndërkohë zinxhiri komandues i IEVP Durrës, mbeten të pezulluar.

Konkretisht:

• z. Afrim Zeqiraj – Shef i Policisë;

• z. Dezdemon Pazaj – Shef i Policisë IEVP Durrës (i komanduar);

• znj. Ylfete Sema – Shefe e Shërbimit të Kujdesit Shëndetësor;

• z. Aulon Quku – Kryeinfermier;

• z. Dorjan Saraçi – Punonjës i Policisë së Burgjeve;

• z. Sali Ferrollari – Punonjës i Policisë së Burgjeve;

• z. Preng Marvataj – Punonjës i Policisë së Burgjeve;

• z. Fatjon Braçi – Punonjës i Policisë së Burgjeve;

• z. Idajet Calamaj – Punonjës i Policisë së Burgjeve;

• z. Aranit Çela – Punonjës i Policisë së Burgjeve;

• znj. Violeta Uka – Punonjëse e Policisë së Burgjeve.

LEXO EDHE: Arratisja spektakolare e Altin Ndocit, reagon Drejtoria e Burgjeve: IEVP Durrës nuk na ka informuar për shoqërimin e tij në spital

Ndërsa Saudi Pro League po merret me mundësinë e pezullimit katër ndeshjesh të Cristiano Ronaldos, emri i Lionel Messit po rikthehet në qendër të vëmendjes në Lindjen e Mesme.

Anmar Al Haili, president i Al-Ittihad-it, ka riafirmuar obsesionin e tij për të nënshkruar me argjentinasin, duke deklaruar se është i gatshëm t’i ofrojë një kontratë historike, pa precedent në sportin profesional.

Një “çek i bardhë” për numrin 10

Ekzekutivi saudit u shpreh qartë se paratë nuk janë pengesë për të parë kampionin e botës të veshur me fanellën e verdhezi. Al Haili tha se nëse Messi do ta pranojë ofertën, ai do të mund të zgjedhë personalisht pagën dhe kohëzgjatjen e kontratës, madje duke sugjeruar edhe një marrëdhënie “për gjithë jetën” me klubin.

“Fitimi financiar nuk ka rëndësi për mua; dua Messin sepse ai është lojtari më i mirë në histori,” pranoi presidenti i klubit.

Megjithatë, më herët Messi kishte refuzuar oferta të tjera nga Arabia Saudite, por shpresa për një marrëveshje mbetet ende e gjallë, me Al-Ittihad që duket i vendosur të bëjë gjithçka për të bindur ‘yllin’ argjentinas.

Kujtojmë që pjesë e Al Ittihad-it, momentalisht, është edhe mbrojtëis i Kombëtares Shqiptare, Mario Mitaj, pa harruar emra të tjerë të mëdhenj të futbollit si Benzema, N’kante, Fabinho etj.