Viti 2025 shënoi një nga periudhat më të trazuara dhe kontradiktore në jetën publike të Elon Musk, njeriut më të pasur në botë.

Nga korridoret e pushtetit në Uashington te krizat në kompanitë e tij dhe përplasjet personale të bujshme, Musk u shndërrua në një figurë që polarizoi opinionin publik amerikan dhe ndërkombëtar më shumë se kurrë më parë.

Nga “miku i parë” i Trump te përplasja publike

Pas rolit të tij si donatori kryesor republikan në zgjedhjet e vitit 2024, Musk u përfshi drejtpërdrejt në administratën Trump si drejtues de facto i të ashtuquajturit “Department of Government Efficiency” (DOGE). Që në ditët e para, prania e tij u shoqërua me kaos dhe reagime të forta.

Gjatë ceremonisë së inaugurimit presidencial, një gjest i Musk u interpretua nga shumëkush si përshëndetje fashiste, duke nxitur dënime nga organizata për të drejtat e njeriut dhe komunitete hebraike. Kontroversat u thelluan më tej me mbështetjen e tij për parti të ekstremit të djathtë në Evropë dhe deklarata që minimizonin krimet e së kaluarës naziste.

DOGE, nën drejtimin e Musk, ndërmori shkurtime masive në administratën federale, përfshirë programe humanitare ndërkombëtare. Këto vendime u shoqëruan me padi ligjore dhe kritika të ashpra nga ekspertë, të cilët paralajmëruan për pasoja serioze humanitare.

Marrëdhënia e ngushtë me Trump u shemb publikisht në qershor, kur Musk e akuzoi presidentin në rrjetin X për lidhje me dosjet Epstein, një postim që më vonë u fshi, por që shënoi pikën e thyerjes mes dy figurave më të fuqishme të së djathtës amerikane.

Biznese miliardëshe, por nën presion

Ndërkohë, perandoria ekonomike e Musk përjetoi kontraste të forta.

SpaceX siguroi kontrata të reja qeveritare dhe miratime për rritjen e lëshimeve raketore, pavarësisht incidenteve të përsëritura me raketën Starship.

Tesla, në anën tjetër, u përball me rënie globale të shitjeve, protesta, zjarrvënie ndaj makinave dhe hetime të shumta për sigurinë e teknologjisë Autopilot. Megjithatë, aksionarët miratuan një paketë shpërblimi rekord për Musk, që teorikisht mund ta çojë atë drejt statusit të trilionerit të parë në histori.

Një goditje e rëndë erdhi në fund të vitit 2025 nga autoritetet e Kalifornisë, të cilat akuzuan Teslën për mashtrim të konsumatorëve dhe paralajmëruan ndalim të shitjeve nëse kompania nuk korrigjon pretendimet për teknologjinë e saj.

X, inteligjenca artificiale dhe kritikat për ekstremizëm

Në fushën e teknologjisë digjitale, Musk konsolidoi kompanitë X dhe xAI, duke integruar chatbot-in Grok në rrjetin social. Por Grok u përfshi në skandale për përhapje teorish konspirative dhe deklarata antisemitike, duke ngritur shqetësime serioze, edhe pse xAI arriti të sigurojë një kontratë prej 200 milionë dollarësh me Departamentin e Mbrojtjes së SHBA-ve.

Jeta personale dhe konfliktet publike

Paralelisht me betejat politike dhe ekonomike, jeta personale e Musk vazhdoi të ishte në qendër të vëmendjes.

Në vitin 2025 u bë publik fakti se ai kishte 14 fëmijë, ndërsa marrëdhëniet e tensionuara me vajzën e tij transgjinore u reflektuan edhe në media të mëdha amerikane.

Musk u përfshi gjithashtu në përplasje publike me politikanë, gazetarë, akademikë dhe figura të kulturës, përfshirë shkrimtaren Joyce Carol Oates, duke forcuar imazhin e një miliarderi të fuqishëm, por thellësisht konfliktual.

Një vit me pasoja afatgjata

Siç vëren The Guardian, pavarësisht elementeve shpesh absurde të dramave që e shoqëruan, viti 2025 ishte thellësisht i rëndësishëm për Musk.

Ai tregoi se si një individ i vetëm, me pasuri dhe ndikim të jashtëzakonshëm, mund të ndikojë drejtpërdrejt politikën, ekonominë dhe diskursin publik global.

Elon Musk e mbylli vitin me një pasuri të vlerësuar rreth 600 miliardë dollarë, por edhe me një trashëgimi politike dhe shoqërore që vazhdon të ngjallë debate të forta… një figurë po aq e fuqishme sa edhe e paparashikueshme.  / abcnews.al /

Rusia akuzoi të enjten Ukrainën se ka vrarë të paktën 24 persona, përfshirë një fëmijë, në një sulm me dron gjatë natës së Vitit të Ri, duke goditur një hotel dhe një kafene ku civilët po festonin, në një zonë të kontrolluar nga Rusia në rajonin jugor të Khersonit.

Akuzat u bënë fillimisht nga Vladimir Saldo, guvernatori i vendosur nga Rusia në këtë rajon, i cili deklaroi se tre dronë ukrainas goditën vendin e festimeve në Khorly, një fshat bregdetar. Sipas tij, sulmi ishte i qëllimshëm dhe i drejtuar ndaj civilëve, duke shtuar se shumë persona “u dogjën të gjallë”.

Ministria e Jashtme ruse tha se sipas informacioneve paraprake, 24 persona u vranë dhe rreth 50 të tjerë u plagosën, përfshirë gjashtë të mitur që po trajtohen në spital. Në një deklaratë zyrtare, ministria e cilësoi sulmin si “krim lufte” dhe “akt terrorist”, duke theksuar se dronët kishin në shënjestër zona ku civilët ishin mbledhur për të festuar ndërrimin e viteve.

Ushtria ukrainase nuk reagoi menjëherë ndaj kërkesave për koment. Ukraina ka akuzuar vazhdimisht Rusinë për vrasjen e civilëve në sulmet e saj ndaj qyteteve ukrainase.

Zëdhënësja e Ministrisë së Jashtme ruse, Maria Zakharova, fajësoi gjithashtu mbështetësit perëndimorë të Ukrainës për ngjarjen. Sulmi u dënua ashpër edhe nga politikanë të lartë rusë, përfshirë kryetarët e të dy dhomave të parlamentit rus.  / abcnews.al /

Nga informacionet më të fundit, bëhet me dije se është zhbllokuar rruga ku kishte ndodhur aksidenti i autobotit me gaz, pasi është hequr ky i fundit nga rruga.

Aksidenti ndodhi dy ditë më parë dhe, pavarësisht përpjekjeve, është arritur të hiqet këtë pasdite, ndërsa do të fillojë qarkullimi i mjeteve normalisht në këtë pikë kufitare.

Gjatë ditëve që dogana ishte e bllokuar, qarkullimi u drejtua në doganën e Tushemishtit dhe atë të Goricës.

Njoftimi zyrtar:

”Pika e Kalimit Kufitar Qafë Thanë

Nga kontakti i vazhdueshëm me autoritetet e policisë kufitare të Maqedonisë së Veriut, jemi njoftuar se, aksi rrugor “Strugë-Qafë Thanë”, i cili ishte i bllokuar që në datën 30.12.2025, për shkak të një aksidenti rrugor, aktualisht është zhbllokuar.

Lëvizja e mjeteve dhe e shtetasve, po kryhet lirisht si në hyrje dhe në dalje të Republikës së Shqipërisë, duke respektuar procedurat e verifikimit kufitar.

Ju faleminderit!“

Rreth 500 mijë njerëz filluan të mblidheshin në ditën e parë të vitit të ri, në Urën e Galatës në Stamboll për një marshim në mbështetje të Palestinës. Duke shënuar mëngjesin e hershëm të ditës së parë të vitit, protestuesit u mblodhën me pjesëmarrjen e rreth 400 organizatave të shoqërisë civile nën sloganin “Nuk trembemi, nuk do të heshtim, nuk do ta harrojmë Palestinën”, duke kërkuar fundin e gjenocidit në Palestinë.

Përpara ngjarjes, qytetarët u mblodhën para namazit të sabahut në disa xhami të mëdha në Stamboll, përfshirë Xhaminë e Madhe të Aja Sofisë, Sultanahmetin, Fatihun, Sulejmanijen dhe Xhaminë e Re Eminonu.

Shumë pjesëmarrës u panë duke mbajtur flamuj turq dhe palestinezë ndërsa mblidheshin në oborret e xhamive për të treguar solidaritet me Palestinën. Pavarësisht motit të ftohtë, pjesëmarrja ishte e lartë. Masa të gjera sigurie u vendosën, veçanërisht në sheshin “Sultanahmet”, ku pjesëmarrësve iu ofruan edhe pije të nxehta.

Pas namazit të sabahut, protestuesit u nisën në këmbë drejt Urës së Galatës, të shoqëruar nga disa ministra, zyrtarë të lartë dhe figura të listuara në protokollin zyrtar. Ngjarja filloi në orën 8:30 të mëngjesit sipas orës lokale në Urën e Gallatës.

Një banderolë e madhe që përshkruante “Hanzala”, figura ikonike e krijuar nga karikaturisti i ndjerë palestinez Naji al-Ali dhe e lidhur ngushtë me kauzën palestineze, ishte varur në një ndërtesë pas platformës kryesore të shtypit.

Programi përfshinte performanca të veprave nga artistë dhe muzikantë të njohur ndërkombëtarisht, përfshirë këngëtarin libanezo-suedez Maher Zain, artistin turk Esat Kabakli dhe grupin “Yuruyus”.

Policia në Holandë u përball me dhunë të paprecedentë gjatë natës së ndërrimit të viteve, duke u sulmuar me fishekzjarre dhe eksplozivë, sipas raportimeve nga oficerët. Gjatë orëve të para të Ditës së Vitit të Ri, një kishë e shekullit të 19-të në Amsterdan, Vondelkerk, shpërtheu në flakë, megjithatë shkaku i zjarrit nuk është zbuluar ende.

Vondelkerk, e ndërtuar në vitin 1872 dhe një atraksion turistik që ndodhet përballë parkut më të madh të qytetit, Vondelpark, ka pësuar dëme të mëdha, përfshirë shembjen e kullës 50 metra të lartë. Megjithatë, autoritetet kanë thënë se struktura e kishës pritet të mbijetojë, edhe pse çatia është dëmtuar rëndë.

Në pjesë të tjera të Holandës, një 17-vjeçar dhe një 38-vjeçar humbën jetën për shkak të incidenteve me fishekzjarre. Po ashtu, në Bielefeld, Gjermani, dy 18-vjeçarë humbën jetën pas shpërthimit të fishekzjarreve të bëra vetë.

Kreu i Sindikatës së Policisë Holandeze, Nine Kooiman, deklaroi se ajo vetë ishte sulmuar me fishekzjarre dhe eksplozivë gjatë turnit të saj në Amsterdam. Ajo e quajti këtë nivel dhune “të paprecedentë”. Raportet për sulme ndaj policisë dhe zjarrfikësve ishin të shumta në të gjithë vendin.

Në qytetin e Breda, në jug të Holandës, bomba molotov u hodhën ndaj policisë, ndërsa në Rotterdam, spitali i syve i qytetit tha se kishte trajtuar 14 pacientë, përfshirë 10 të mitur, për lëndime në sy.

Ngjarjet e dhunshme shënuan një përshkallëzim të rrezikshëm të incidentëve me fishekzjarre, një problem që po bëhet gjithnjë e më i pranishëm në Holandë. Autoritetet kanë njoftuar një ndalim të fishekzjarreve jozyrtarë që do të hyjë në fuqi në vitin 2026, pas një shpenzimi rekord prej 129 milionë eurosh për fishekzjarre këtë vit.

Ky vit i ri ka sjellë një atmosferë të tensionuar, duke përfshirë tragjedi, sulme ndaj forcave të sigurisë dhe dëme të mëdha materiale, duke vënë në dukje nevojën për masa më të rrepta për të ndaluar dhunën dhe përdorimin e fishekzjarreve të rrezikshme në të ardhmen.  / abcnews.al /

Pavarësisht se Partia Laburiste mori detyrën në korrik 2024 me premtimin për të “shkatërruar bandat” dhe reduktuar kalimet me anije të vogla, rreth 65,000 njerëz kanë arritur në Britaninë e Madhe që nga ajo kohë. Në vitin 2025, 41,472 migrantë kaluan Kanalin në anije të vogla, duke shënuar numrin e dytë më të lartë vjetor të regjistruar ndonjëherë.

Asnjë migrant nuk kaloi gjatë natës së ndërrimit të viteve, konfirmoi të enjten Zyra e Brendshme, me kalimin e fundit të regjistruar më 22 dhjetor. Kjo do të thotë se numri total i arritjeve gjatë vitit 2025 ishte 9% më pak se rekordi i të gjitha kohërave, që ishte 45,774 arritje në vitin 2022.

Për vitin 2025, numri ishte 13% më i lartë se në 2024, kur 36,816 migrantë kryen udhëtimin, dhe 41% më i lartë se në vitin 2023, kur numri ishte 29,437.

Gjysma e parë e vitit 2025 pa një numër rekord prej 19,982 personash që mbërritën, por ritmi u ngadalësua gjatë dy muajve të fundit të vitit, dhe pati periudha të gjata kur nuk kishte asnjë migrant që arrinte, duke përfshirë një periudhë 28-ditore nga 15 nëntori deri më 12 dhjetor.

Mesatarisht, 62 persona udhëtuan në çdo anije të vogël që mbërriti në 2025, një rritje nga 53 në vitin 2024 dhe 49 në vitin 2023.

Organizatat bamirëse kanë vlerësuar se të paktën 36 persona kanë vdekur gjatë përpjekjeve për të kaluar, përfshirë një vajzë tetëvjeçare dhe nënën e saj, të cilat u shtrinë nën një anije në maj, sipas raportimeve nga Mirror.

Numri i madh i arritjeve në vitin 2025 ka shtuar presion mbi qeverinë e Sir Keir Starmer, e cila mori detyrën me një premtim të përsëritur për të “shkatërruar bandat” dhe për të zvogëluar kalimet. Prej korrikut 2024, pothuajse 65,000 migrantë kanë arritur.

Komandanti i Sigurisë Kufitare të MB, Martin Heëitt, i ngarkuar me frenimin e kalimeve në Kanal, u shpreh në tetor se numri i arritjeve në vitin 2025 ishte “frustruese”, por puna për të mbyllur këtë rrugë trafikimi “do të kërkojë kohë”.

Qeveria ka prezantuar dhe njoftuar ndryshime të ligjeve për të ndaluar kalimet, përfshirë:

Ligji i Sigurisë Kufitare, Azilit dhe Migracionit, i cili u bë ligj në dhjetor, dhe që krijon vepra të reja kriminale dhe lejon përdorimin e pushtetit të ngjashëm me ato kundër terrorizmit për të luftuar bandat e trafikut të njerëzve.

Planet për ato që Sekretarja e Brendshme Shabana Mahmood i ka quajtur “ndryshimet më të rëndësishme në sistemin tonë të azilit në kohët moderne” me qëllim që të pengojnë ardhjen e migranteve në Britani dhe të bëjnë më të lehtë deportimin e tyre.

Përshtatjen e statusit të refugjatëve në një status përkohësor, me rishikime të rregullta për sigurinë e vendit të tyre të origjinës, dhe një pritje prej 20 vjetësh për statusin përfundimtar.

Por qeveria përballet me një luftë të re me deputetët e saj për t’i kaluar këto masa, pasi disa parlamentarë të Partisë Laburiste i quajnë ato “turp” dhe përdorin retorikën e Nigel Farage dhe Reform UK.

Nga 1 janari, qytetarët në Kinë do të paguajnë një taksë shitjeje prej 13% për mjetet kontraceptive, ndërsa shërbimet e kujdesit për fëmijët do të përjashtohen nga taksa, si pjesë e përpjekjeve të qeverisë për të rritur normat e lindshmërisë në ekonominë e dytë më të madhe në botë.

Reforma e sistemit tatimor, e shpallur në fund të vitit të kaluar, heq shumë përjashtime që ishin në fuqi që nga viti 1994, kur Kina zbatonte ende rregullin e rreptë të një fëmije. Gjithashtu, nga TVSH-ja përjashtohen shërbimet që lidhen me martesën dhe kujdesin për të moshuarit, si pjesë e një pakete më të gjerë masash që përfshin zgjatjen e lejes prindërore dhe dhënien e ndihmave financiare.

Përpjekje për të rritur lindshmërinë dhe të rinjtë të martohen

Përballë plakjes së popullsisë dhe një ekonomie të ngadaltë, Pekini po përpiqet të inkurajojë të rinjtë të martohen dhe çiftet të kenë më shumë fëmijë. Sipas të dhënave zyrtare, popullsia e Kinës është tkurrur për të tretin vit radhazi, me vetëm 9.54 milionë foshnja të lindura në vitin 2024, rreth gjysma e lindjeve të regjistruara një dekadë më parë, kur Kina nisi të lehtësonte kufizimet për numrin e fëmijëve.

Kritika për taksën mbi kontraceptivët

Megjithatë, vendosja e taksës mbi kontraceptivët, përfshirë prezervativët, pilulat dhe pajisjet e kontrollit të lindjeve, ka ngjallur shqetësime për shtatzëni të padëshiruara dhe rritje të rrezikut të HIV-it, si dhe ironi në rrjetet sociale. Disa theksojnë se rritja e çmimit të prezervativëve nuk mjafton për t’i bindur njerëzit të kenë fëmijë.

Një përdorues ironizoi: “Do blej prezervativë për gjithë jetën që tani”. Të tjerë theksuan se njerëzit e kuptojnë mirë dallimin mes çmimit të një prezervativi dhe kostos së rritjes së një fëmije.

Kina, një nga vendet më të shtrenjta për të rritur fëmijë

Sipas një raporti të vitit 2024 nga Instituti i Kërkimeve të Popullsisë YuUa në Pekin, Kina është një nga vendet më të shtrenjta për të rritur fëmijë, për shkak të kostove të arsimit në një mjedis shumë konkurrues dhe vështirësive që kanë gratë në balancimin e punës me prindërimin. Ngadalësimi ekonomik, i ndikuar edhe nga kriza e pronave që ka goditur kursimet, i ka bërë familjet, veçanërisht të rinjtë, më të pasigurt për të ardhmen.

“Kam një fëmijë dhe nuk dua më”, thotë Daniel Luo, 36 vjeç, nga provinca Henan. Ai shton se rritja e çmimit të prezervativëve nuk e shqetëson, pasi kostoja shtesë vjetore është e përballueshme. Por Rosy Zhao, një studente nga Xi’an, paralajmëron se për studentët dhe personat me vështirësi financiare, kjo mund t’i shtyjë të “marrin rrezik”, duke e quajtur këtë pasojën më të rrezikshme të politikës.

Opinione të ndryshme nga ekspertët

Ekspertët janë të ndarë në lidhje me ndikimin e taksës. Demografi Yi Fuxian nga Universiteti i Uisconsin-Madison thotë se ideja që taksa mbi prezervativët do të ndikojë ndjeshëm në lindshmëri është e ekzagjeruar dhe se qeveria po kërkon të mbledhë të ardhura shtesë përballë borxhit dhe krizës së tregut të banesave. Ndërkohë, analistja Henrietta Levin nga CSIS e sheh masën si simbolike dhe paralajmëron se politikat mund të dështojnë, nëse perceptohen si tepër ndërhyrëse në jetën personale.

Sfida globale për rritjen e lindshmërisë

Kina ka kaluar nga politika e një fëmije në politika nxitëse për lindshmëri, por përballet me sfida të thella sociale: kosto të larta jetese, presion të madh mbi gratë, rënie të martesave dhe ndryshime në mënyrën se si të rinjtë ndërveprojnë. Këto trende nuk janë unike për Kinën, por shihen edhe në vende si Japonia dhe Koreja e Jugut, duke e bërë rritjen e lindshmërisë një sfidë globale.

Nuk mungoi as këtë 1 janar tradita shumëvjeçare e zhytjes në lumin Tiber në Romë. Qytetarët sfiduan temperaturat e ulëta.

Temperaturat e ulëta që pushtuan Europën në festat e fundvitit nuk i ndalën italianët që të respektonin traditën 80-vjeçare për t’u zhytur në lumin Tiber në Romë.

Këtë vit ishin tre zhytësit Simone Sarabeja, Valerio Shira dhe Marko Fois që dhuruan spektakël për të pranishmit që ishin aty për të ndjekur shfaqjen.

Në zhytjen vjetore, këtë herë edhe më të guximshmit nga qytetarët e thjeshtë sfiduan frikën dhe temperaturat duke iu bashkuar kësaj tradite për t’u hedhur nga ura në qendër të kryeqytetit italian.

Zhytja në lumin Tiber në ditën e parë të vitit është një ngjarje që zhvillohet në Romë që prej vitit 1947.  / abcnews.al /

Ky është moment i shpërthimit të zjarrit në një resort turistik në Zvicër duke shkaktuar një tragjedi të rëndë me viktima e të plagosur. Nga pamjet,  zjari ka shpërthyer rreth orës 01:30 të mëngjesit në lokalin “Le Constellation”, një bar-restorant shumë i frekuentuar nga të rinjtë në zonën turistike të Crans-Montana, teksa njerëzit po festonin vigjiljen e vitit të ri.

Sipas burimeve policore dhe spitalore, bilanci paraprak flet për rreth 40 persona të vdekur dhe afërsisht 100 të plagosur, shumica me djegie të rënda.

The moment fire in Swiss ski resort breaks out on New Year’s Eve.

The fire has left dozens of people feared dead and more than 100 injured pic.twitter.com/6tsZH5uVcZ

— Sky News (@SkyNews) January 1, 2026

Read More...

Danimarka është bërë vendi i parë në botë që ndalon plotësisht shpërndarjen e letrave, duke i dhënë fund një tradite rreth 400-vjeçare të shërbimit postar. Shërbimi postar shtetëror PostNord do të dorëzojë letrën e fundit, pasi përdorimi i postës fizike ka rënë ndjeshëm si pasojë e digjitalizimit të shpejtë të shoqërisë daneze.

Të dhënat tregojnë se në vitin 2024, PostNord ka dorëzuar mbi 90 për qind më pak letra krahasuar me vitin 2000, një rënie drastike që e ka bërë shërbimin postar tradicional të paqëndrueshëm ekonomikisht. Në vend të letrave, qytetarët danezë sot komunikojnë kryesisht përmes platformave digjitale, si email-et, mesazhet elektronike dhe rrjetet sociale, ndërsa edhe institucionet shtetërore përdorin pothuajse ekskluzivisht komunikimin online.

Si pjesë e këtij tranzicioni, PostNord ka filluar heqjen e rreth 1.500 kutive postare në të gjithë vendin. Këto kuti janë shitur për bamirësi dhe kanë zgjuar interes të madh te qytetarët, duke u kthyer në simbole nostalgjie të një epoke që po mbyllet. Dërgimi i letrave tashmë do të bëhet përmes pikave të dorëzimit në dyqane, ndërsa transporti do të kryhet nga kompania private DAO. PostNord do të vazhdojë të ofrojë shërbime për dërgimin e pakove, për shkak të rritjes së vazhdueshme të tregtisë elektronike.

Danimarka është ndër vendet më të digjitalizuara në botë, çka ka bërë që posta fizike të mos jetë më thelbësore për funksionimin e shoqërisë. Megjithatë, organizatat që mbrojnë të drejtat e të moshuarve kanë shprehur shqetësim se ky ndryshim mund të ndikojë negativisht te qytetarët që nuk kanë aftësi digjitale ose qasje të plotë në teknologji.

Ekspertët e komunikimit vlerësojnë se, ndonëse letra po zhduket si mjet i përditshëm komunikimi, ajo po merr një vlerë të re simbolike dhe emocionale, duke u përdorur kryesisht për mesazhe personale dhe intime. Rasti i Danimarkës pritet të shërbejë si shembull për vende të tjera, të cilat mund të ndjekin të njëjtën rrugë në vitet e ardhshme, ndërsa epoka digjitale vazhdon të transformojë mënyrën se si njerëzit komunikojnë.  / abcnews.al /

Protestat në Iran, që shpërthyen për shkak të krizës ekonomike dhe inflacionit të lartë, kanë shkaktuar dhunë dhe viktima në disa qytete të vendit. Të enjten, disa persona u vranë dhe u plagosën gjatë përleshjeve mes forcave të sigurisë dhe protestuesve në qytetin Lordegan në perëndim të Iranit. Agjencia për të drejtat e njeriut Hengaw raportoi se forcat e sigurisë qëlluan mbi protestuesit, duke vrarë dhe plagosur disa prej tyre.

Protestat, të cilat filluan për shkak të rritjes së çmimeve dhe kushteve të vështira ekonomike, u përshkallëzuan edhe në qytetet e tjera. Në qytetin Kuhdasht, një anëtar i njësisë paramilitare Basij, e cila është e lidhur me Gardën Revolucionare, u vra, dhe 13 ushtarë të tjerë u plagosën. Po ashtu, një protestues u vra në Isfahan, ndërsa raportohet se janë arrestuar dhjetëra protestues në qytete të tjera, përfshirë Marvdasht dhe provincat Kermanshah dhe Khuzestan.

Ky përshkallëzim i dhunës vjen në një kohë të tensionuar për Iranin, i cili po përballet me një inflacion të lartë prej 40% dhe sanksione të ashpra ndërkombëtare. Përballë trazirave, qeveria iraniane ka ofruar një mundësi për dialog me sindikatat dhe shitësit, por ka theksuar gjithashtu përgjigjen e fortë ndaj protestuesve, duke arrestuar dhe përdorur forcë.

Protestat kanë zgjuar një valë reagimesh online, ndërsa shumë iranianë kanë kundërshtuar versionin e autoriteteve lidhur me ngjarjet, duke shpërndarë video që tregojnë pasojat e dhunës ndaj protestuesve.

/ abcnews.al /

Papa Leoni XIV e nisi Vitin e Ri me një meshë, gjatë së cilës përsëriti thirrjen për paqe, duke veçuar vendet e përgjakura nga konflikti.

Liturgjia e ditës shënoi si Solemnitetin e Marisë, Nënës së Zotit, ashtu edhe Ditën Botërore të Paqes.

Ati I Shenjtë solli në vëmendje edhe Vitin Jubile për besimtarët katolikë, që mbyllet më 6 janar të 2026.

“Në këtë ditë, le të lutemi të gjithë së bashku për paqen: së pari, midis kombeve të përgjakura nga konflikti dhe vuajtjet, por edhe brenda shtëpive tona, në familjet e plagosura nga dhuna ose dhimbja. Në agimin e vitit të ri, Liturgjia na kujton se për secilin prej nesh, çdo ditë mund të jetë fillimi i një jete të re, falë dashurisë bujare të Zotit, mëshirës së Tij dhe përgjigjes së lirisë sonë. Është bukur ta shohësh vitin që vjen në këtë mënyrë: si një udhëtim të hapur për t’u zbuluar”

Papa pranoi se shumë njerëz dhe organizata në mbarë botën tashmë i janë përkushtuar përfundimit të dhunës dhe kanë krijuar nisma të panumërta për ndërtimin e paqes.

Pas një sezoni të ngjeshur Krishtlindjesh, Leoni XI ka disa ditë pushim para se të kremtojë festën e Epifanisë së kishës më 6 janar dhe të mbyllë zyrtarisht Vitin e Shenjtë 2025.  / abcnews.al /

Teksa gjithë bota priste vitin e ri me spektakël dhe fishekzjarrë, vendet e goditura nga lufta nuk e shënuan dot me festë këtë ditë të shënuar. Ukraina sërish nuk gjeti qetësi. Rusia sulmoi rajonin e Odesës në Ukrainë gjatë natës deri të enjten, duke synuar infrastrukturën civile. Në Ukrainën perëndimore, disa dhjetëra dronë goditën gjithashtu infrastrukturën në Volin.

Forcat Ajrore Ukrainase thanë se kishin rrëzuar ose goditur 176 nga 205 dronë që synonin vendin gjatë natës.

Në urimin e tij të fundvitit presidenti ukrainas Volodymyr Zelensky tha se një marrëveshje paqeje që synon t’i japë fund luftës midis Moskës dhe Kievit është 90% gati, por 10% e mbetur do të përcaktojë fatin e paqes, fatin e Ukrainës dhe Europës.

Nga ana tjetër Presidenti rus Vladimir Putin shprehu besim në fitoren përfundimtare të vendit të tij në luftimet gati katërvjeçare kundër Ukrainës. Pavarësisht përparimit në negociatat e paqes, të cilat ai nuk i përmendi, Putin riafirmoi besimin e tij në suksesin e Rusisë në konflikt.

Një vit të ri festiv nuk pati edhe për palestinezët, të cilët ditën e parë të 2026 e shënuan duke kërkuar ndihma për familjet e tyre.

Erërat e forta goditën tendat e dobëta që qëndronin mes grumbujve të rrënojave të ndërtesave të dëmtuara dhe të shkatërruara nga dy vjet luftë në enklavë.

Në javët e fundit, shirat e rrëmbyeshëm kanë përmbytur kampet e improvizuara, duke e bërë jetën e përditshme edhe më të vështirë për palestinezët e zhvendosur.  / abcnews.al /

Më 1 janar, Bullgaria ka hyrë zyrtarisht në Zonën e Euros, duke shënuar një moment historik me një shfaqje të monedhave të euros në fasadën e Bankës Qendrore në Sofje dhe fishekzjarre që ndriçuan qiellin. Nga mesnata, euro zëvendësoi levën si monedhën e vendit, duke e çuar këtë monedhë në histori.

Ky moment i rëndësishëm do të bëjë që më shumë se 350 milionë evropianë tani të përdorin euron. Bullgaria është bërë anëtari i 21-të i Zonës së Euros, pas Kroacisë që iu bashkua në janar 2023.

Përveç ndryshimit të monedhës, statusi i ri do të thotë gjithashtu që Bullgaria do të ketë një vend në Këshillin Drejtues të Bankës Qendrore Evropiane, i cili është përgjegjës për vendosjen e normave të interesit për të gjithë Zonën e Euros.

Megjithatë, bullgarët kanë mendime të përziera për këtë ndryshim duke u shqetësuar se përdorimi i euros mund të rrisë çmimet, ndërsa disa të tjerë shprehin dyshime ndaj një shteti politik që është në krizë. Pasi qeveria dha dorëheqjen muajin e kaluar pas protesta të gjera kundër rritjes së taksave.

Pavarësisht këtyre shqetësimeve, kalimi në euro shënon një hap të rëndësishëm për Bullgarinë, ndërsa ajo integrohet më tej në kornizën ekonomike të Bashkimit Evropian.

/ abcnews.al /

Islanda ka përjetuar Krishtlindjen më të nxehtë të regjistruar ndonjëherë, duke shënuar një tjetër sinjal alarmi për pasojat e ngrohjes globale. Sipas Zyrës Meteorologjike Islandeze, më 24 dhjetor temperatura në qytetin Seyðisfjörður, në lindje të vendit, arriti në 19,8 gradë Celsius, pothuajse 20°C, një vlerë jashtëzakonisht e lartë për këtë periudhë të vitit. Zakonisht, temperaturat mesatare të dhjetorit në Islandë variojnë nga -1°C deri në 4°C.

Rekorde të tjera u shënuan po atë ditë edhe në zona përreth, ku në Bakkagerði u regjistruan 19,7°C. Rekordi i mëparshëm për muajin dhjetor ishte vendosur në vitin 2019. Meteorologët shpjegojnë se ky fenomen u shkaktua nga masa ajri të ngrohta me origjinë tropikale, tërhequr mbi vend nga një sistem i fortë presioni të lartë, i cili pengoi depërtimin e ajrit të ftohtë.

Ekspertët theksojnë se Islanda po ngrohet me shpejtësi për shkak të ndryshimeve klimatike të shkaktuara nga aktiviteti njerëzor. Gjatë këtij viti, vendi ka përjetuar valë të forta të të nxehtit, shkrirje të akullnajave dhe ndryshime të dukshme në ekosisteme. Madje, për herë të parë janë konstatuar edhe mushkonja në Islandë, një dukuri e panjohur më parë. Studimet tregojnë se rajoni Arktik po ngrohet katër herë më shpejt se pjesa tjetër e planetit, dhe Islanda është një nga shembujt më të qartë të këtij ndryshimi dramatik.

Read More...

Pas 12 muajve të gjatë konfliktesh, trazirash politike dhe sfidash ekonomike, bota mirëpriti vitin e ri 2026 me spektakël fishekzjarresh.

Nga Zelanda e Re në Shtetet e Bashkuara, qytetarët shijuan shfaqjet shumëngjyrëshe me shpresën e një viti me të qetë e më të begatë.

Egjipti ofroi pamje spektakolare, me fishekzjarret që ndriçuan qiellin sipër piramidave historike. Ndërkohë në Dubai, në ndërtesën me të lartë në botë Burj Kahlifa, dritat dhe fishekzjarret shënuan ndërrimin e viteve.

Spektakël shumëngjyrësh ofruan edhe Londra e Parisi, ku qytetarë të shumtë ishin mbledhur për të pritur vitin e ri 2026.

Ndërkohë në anën tjetër të oqeanit, ndërrimi i viteve u prit gjithashtu me feste. Në Nju Jork në Times Sqaure u numërua mbrapsht derisa akrepat trokitën 12.

Më tej në Las Vegas viti i ri 2026 u prit me spektakël fishekzjarresh dhe me qindra njerëz që ishin mbledhur nëpër rrugë dhe sheshe.

Kështu bota mbylli një vit të gjatë sfidash, që ndryshuan politikën globale dhe sollën ndryshime rrënjësore, teksa shpresa e të gjithëve është që 2026 t’u japë fund konflikteve dhe të jetë një vit me paqësor./abcnews.al

Ka qenë elita e elitës.

Pas Majlinda Kelmendit, ishin Nora Gjakova dhe Distria Krasniqi që ngritën flamurin e Kosovës në majat më të larta olimpike, ndërsa kampionia 33-vjeçare vendosi ta mbyllte karrierën.

Flasim për Nora Gjakovën, që zgjodhi ditën e fundit të vitit 2025 për të lajmëruar largimin nga sporti.

Xhudistja e nivelit maksimal, u shpall kampione olimpike në Lojrat e mbajtura në Tokio në 2021, ndërsa duhej të kishin qenë në 2020.

Në peshën deri 57 kg ajo mundi në finale francezen Sizik me rezultatin 10-0.

Gjakova ka fituar të artat olimpike po ashtu si Kelmendi dhe Krasniqi, duke qenë të vetmet në histori për Kosovën, një arritje e jashtëzakonshme për një vend që hyri në konkurrim vetëm në 2016 në Rio de Zhaneiro.

Në 2018, pati suksesin tjetër të madh, titullin kampione e Europës në Izrael, gjithnjë në peshën deri 57 kg kur mundi në finale gjermanen Tereza Shtol.

Në kampionatet botërore arriti medaljen e bronzit, pra vendin e tretë në 2021 në Budapest, ndërsa podiumet janë të shumta.

Gjakova ka gjithsej 35 medalje ndërkombëtare, pra olimpike, botërore, europiane, në Mastersat botërorë, në Grand Slem e Gran Pri, me 12 të arta, 9 argjendi dhe 14 bronzi.

Në mesazhin në rrjetet sociale, xhudistja e shquar falenderoi këtë sport që e bëri të njohur, trajneri Driton Kuka, shtetin e Kosovës, dhe të gjithë shqiptarët.

Ajo ka qenë kolonele e forcave të armatosura të Shqipërisë, pas vendimit të qeverisë.

Ashtu si Majlinda Kelmendi, Gjakova do të vazhdojë me sportin si trajnere./abcnews.al

Një vit përballjesh zgjedhore, me drejtësinë, ndërsa Shqipëria prek ëndrrën europiane. Viti 2025 tregoi dy fytyra të Shqipërisë, e para që do të punojë, dhe e dyta që do të kthehet pas.  Dhe në mes drejtësia e cila u bë protagonistja kryesore në politikën shqiptare.

Një nga momentet kryesore të këtij viti ishte arrestimi i kryebashkiakut të Tiranës, Erion Veliaj. Akuzat për korrupsion e shpërdorim detyre çuan Veliajn në qeli, duke lënë Bashkinë më të madhe të vendit pa kryebashkiak të zgjedhur në detyrë.

Kjo goditje erdhi vetëm pak muaj para zgjedhjeve parlamentare. Kryesocialisti Edi Rama për të synuar mandatin e katërt, doli me sloganin “Shqipëria 2030 në BE”

Kurse Berisha flamurin e kësaj fushate e gjeti nga SHBA. Nën moton e huazuar “Shqipëria Madhështore” .Ai kontraktoi fushatuesin e fitores së Presidentit Donald Trump, Chris La Civita.

La Civita: We will Make Albania Great Again

Megjithatë, entuziazmi ra shpejt. La Civita ishte kontraktuar vetëm për të bërë fushatën, e jo për ti zgjidhur hallet personale Berishës me SHBA. Kontrata e tij vlejti 1.4 milionë dollarë, por doktori nëpërmjet një kompanie anonime në Amerikë, pagoi 6 milionë dollarë për të hequr non-=gratën e për të kaluar oqeanin. As njëra as tjetra nuk ndodhi.

Partitë politike përveshën mëngët drejt zgjedhjeve. PS ndryshoi fytyrën, të rinjtë në listë të mbyllur, veteranët në listë të hapur. Një skemë kjo që formatoi 80% të përfaqësuesve socialist në parlament, kurse PD bëri primare, por doktori listën e hartoi vetë, përmbysi votën e demokratëve, siguroi besnikët në listë të mbyllur dhe la rebelët në listë të hapur ose jashtë listave.

Edhe këto zgjedhje lindën filizat e rinj, Shehaj prezantoi një Mundësi, Qori Lëvizjen Bashkë, kurse Lapaj me Shabanin, Shqipëria Bëhet. Nuk munguan as të rinjtë e vjetër, Lulzim Basha me euroatlantikët, Alibeaj dhe Dash Shehin Djathtas për Zhvillim.

Fushata u nda në dy kampe, Rama premtoi pasaportën europiane.

Kurse Berisha me premtime spektakolare dhe shumë gafa.

Fushata bipolare, ndau palët edhe në raport me drejtësinë.

Por kjo fushatë zbuloi edhe yjet e reja. Zegjine Caushi, 26-vjeçarja nga Roskoveci tentoi një romancë në distancë me kundërshtarin e saj, Gazment Bardhi.

Nga demokratët spikati Ilir Vrenozi, opozitari i rrjeteve sociale që doktori e pagëzoi me titullin superstari. Të tjerë, si Xhelal Mziu apo Bledion Nallbati u munduan të lënë shenjë më grushta, kurse Tomor Alizoti me deklarata kanibale, edhe pse mbetën vetëm deklarata.

Nuk mbetën pas as videot komike të djalit të Fahriut.

Risia më e madhe e këtyre zgjedhjeve do të ishte vota e Diasporës. Si hera e parë, me kontestime. Problemet me shpërndarjen e zarfeve në Greqi, dhe pagesa e DHL shtuan dyshimet por për kreun e KQZ ky ishte suksesi më i madh.

“THuajse nota 10, këto ishin zgjedhje për një vend kandidat për në BE”

Shqiptarët e shprehën qartë vullnetin e tyre. PS fitoi bindshëm, duke iu besuar 83 mandate në parlament. PD pësoi një rënie drastike në 50 mandate, kurse partitë e reja nuk ia dolën të thyejnë hegjemoninë e të vjetërve.

PD fitoi vetëm në dy qarqe veriore, Kukës e Shkodër, kurse PS në 10 të tjera. Fitorja më e thellë u regjistrua në Fier, nën drejtimin e Belinda Ballukut socialistët fituan 12 mandate, kurse demokratët me Gaz Bardhin vetëm 4. Edhe në Vlorë, PS fitoi 9 mandate kundrejt 3 të demokratëve.

Humbja katastrofale megjithatë, nuk mjaftoi që Berisha të jepte doreëheqjen duke shkelur edhe nenin që vetë kishte premtuar, nenin Basha.

5 ditë më pas, më 16 maj Tirana u bë de fakto qendra e Europës. 47 liderë europianë dhe jo vetëm u mblodhën në kryeqendrën e Shqipërisë për Samitin Politik Europian, kurse Berisha me një pakicë të vetën protestuan por askush nuk u dha vëmendjen.

Me fitoren bindëse, qeveria nuk mori pushimet e verës. Kryeministri Edi Rama filloi operacionin çlirimi nga ndërtimet pa leje në Tiranë dhe gjithë Shqipërinë. Kjo nismë solli edhe përplasjet e para me drejtësinë, Rama u ankua në ILD, KLP dhe KLGJ për një prokurore dhe disa gjyqtarë administrativë të ciltët jepnin vendime për të penguar punën.

Nga krahu tjetër, Berisha nisi akuzat për farsë, por kandidatët e tij jofitues si Ilir Alimehmeti, Aulon Kalaja dhe të tjerë, nisën të ankohet për farsë brenda PD. Procesi i rinumërimit nuk ndryshoia sgjë, përveçse faktoi se ata që kishin vjedhur më shumë vota, ishin komisionerët demokratë.

Në shtator, qeveria e re dhe opozita e vjetër. Ram vendosi një record Guinnes për Shqipërinë, i pari vend në botë me një ministre nga Inteligjenca Artificiale, Diella, e cila merret me prokurimet publike apo përshpejton përkthimin e përshtatjen e legjislacionit të BE në Shqipëri për një kohë më të shkurtër.

Kurse opozita mbeti e vjetër, të vetmet risi janë dy ish-magjistratë, Gjin Gjoni i cili hoqi dorë nga Vetingu dhe Arian Ndoja, ish-prokurori i atentatit me rrumin e shijakut në Shkozet, i shkarkuar nga Vetingu dhe së fundmi, Gjykata ka urdhëruar SPAK ta hetojë për fshehje pasurie e pastrim parash.

Shqipëria vulosi një record të ri në BE. I vetmi vend kandidat I cili arriti brenda  13 muajve të hapë gjithë grupkapitujt e negociatave.

Këshilli Bashkiak, me vota të PS dhe PD dhe propozim të përbashkët shkarkuar Erion Veliajn si kryebashkiak, pas 8 muajsh në qeli. Presidenti Begaj shpalli zgjedhjet e parakohshme më 9 nëntor, për Tiranën dhe 5 bashki të tjera pa kryetar.

Veliaj u ankua në Kushtetuese, Gjykata fillimisht pezulloi dekretin e Begajt vetëm për Tiranën, më pas shfuqizoi zgjedhjet për TIranën duke lënë Veliajn kryebashkiak ndonëse nga burgu. SPAK refuzoi disa herë ti japë leje për të kryer detyrën në liri.

Më 31 tetor, ndërroi jetë ish-kryeministri dhe ish-kryetari i parë i PS, Fatos Nano pas një betejë disa vjeçare me sëmundje në mushkëri. Qeveria shpalli një ditë zie, ai u nderua me homazhe shtetërore në Pallatin e Kongreseve nga familja dhe personalitete të shquara të politikës dhe jo vetëm, nga të gjitha trevat shqiptarë. Nano u varros në Sharrë.

Më 9 nëntor, në zgjedhjet e pjesshme lokale në 5 bashki, Vlorë, Berat, Tepelenë, Mat dhe Cërrik, PS arriti një fitore 5-0 përballë të pavarurve të opozitës.

Për herë të parë, Shqipëria dhe Italia u ulën në një mbledhje të përbashkët qeveritare në Romë. 16 marrëveshje u nënshkruan, por më e rëndësishmja ishte garancia e kryeministres italiane Xhorxhia Meloni se do të ishte avokate e Shqipërisë në BE edhe për vendet si Greqia të cilat vendosin veto.

SPAK hapi dosjen 21 janari, duke thirrur për të dëshmuar ish-kryeministrin Sali Berisha. Një dosje e cila mund të trondisë liderin e PD dhe opozitës.

Veç kësajj, brenda PD rifilloi rebelizmi. Vetëm 5 muaj nga lirimi, Ervin Salianji nisi një tur foltoresh me demokratë të pakënaqur apo kritikë ndaj lidershipit. Doktori shumë shpejt ia dha përgjigjen.

Zv.kryeministrja Belinda Balluku u mor nën hetim nga SPAK dhe u pezullua nga detyra me vendim të GJKKO si dhe iu hoq pasaporta. Qeveria reagoi duke u ankuar në GJykatë Kushtetuese, e cila me pranimin e kërkesës për shqyrtim, e riktheu në detyrë Ballukun.

Më pas, GJKKO kërkoi heqjen e imunitetit për zv.kryeministren në parlament, por kryeministri Rama bëri të qartë se fillimisht do të pritet vendimi i Gjykatës Kushtetuese për masën e parë.

Pavarësisht zhurmës së madhe dhe betejave qoftë elektorale apo me drejtësinë, dy partitë më të mëdha politike e mbyllën në sintoni këtë vit 2025. Opozita i dha firmat Endrit Shabanit, kurse PS e zgjodhi avokat. Rama mori Shabanin, kurse Berishës i mbeti Lapaj në shesh, duke përçarë kështu edhe ata të rinj të cilët besonin se Shqipëria Bëhet./abcnews.al