Gjendja shëndetësore e Mbretit të Norvegjisë, Harald V, është përkeqësuar, ka njoftuar Pallati Mbretëror, ndërsa monarku 89-vjeçar vazhdon të qëndrojë i shtruar në Spitalin Universitar të Oslos, Rikshospitalet. Mbreti po merr trajtim me antibiotikë për një infeksion bakterial në qarkullimin e gjakut.

Sipas Pallatit Mbretëror, pavarësisht përkeqësimit të gjendjes, Harald V ka pranuar të marrë trajtim. Megjithatë, ai do të qëndrojë në spital dhe do të jetë në pushim mjekësor nga detyrat mbretërore deri në një njoftim të mëtejshëm.

Mbreti u shtrua në spital rreth një javë më parë dhe që prej atëherë detyrat e tij janë marrë përsipër përkohësisht nga djali i tij, Princi i Kurorës Haakon, 53 vjeç, i cili po shërben si regjent.

Harald V, i cili është në fron që prej vitit 1991, është përballur me disa probleme shëndetësore vitet e fundit. Në javët e fundit ai është trajtuar me kortizon për një sëmundje të rrallë të gjakut, anemi hemolitike. Kjo gjendje shkakton pakësimin e qelizave të kuqe të gjakut dhe mund të sjellë lodhje dhe vështirësi në frymëmarrje.

Në vitin 2024, familja mbretërore norvegjeze njoftoi se, për shkak të moshës, Mbreti Harald do të reduktonte në mënyrë të përhershme angazhimet e tij publike. Po atë vit, atij iu vendos një stimulues kardiak, pasi ishte sëmurë gjatë një qëndrimi në Malajzi.

Viti 2026 ka qenë veçanërisht i vështirë për familjen mbretërore norvegjeze. Bashkëshortja e Princit të Kurorës Haakon, Princesha e Kurorës Mette-Marit, iu nënshtrua një transplanti të mushkërive në qershor, pasi ishte diagnostikuar në vitin 2018 me një formë të rrallë të fibrozës pulmonare.

Vetëm dy ditë pas transplantit, djali i Mette-Marit, Marius Borg Høiby, u dënua me katër vjet burg pasi u shpall fajtor për dy akuza për përdhunim. Hoiby, 29 vjeç, kishte mohuar akuzat më të rënda dhe avokatët e tij kanë deklaruar se do ta apelojnë vendimin.

Familja mbretërore është përballur gjithashtu me polemika pas publikimit të dokumenteve që zbuluan kontakte të shpeshta të Mette-Marit me financierin amerikan Jeffrey Epstein, i cili ishte dënuar për vepra seksuale dhe më vonë u bë një nga figurat më të diskutuara të skandaleve seksuale ndërkombëtare.

Mette-Marit më vonë i kërkoi falje Mbretit dhe Mbretëreshës së Norvegjisë për marrëdhënien e saj trevjeçare me Epstein dhe pranoi se kishte treguar “gjykim të dobët”. Në një intervistë televizive kombëtare, ajo tha gjithashtu se do të kishte dashur të mos e kishte takuar kurrë.

Ndërsa Mbreti Harald vazhdon të marrë trajtim në spital, Princi i Kurorës Haakon pritet të vijojë të ushtrojë funksionet e regjentit deri në rikthimin e monarkut në detyrat e tij, në varësi të gjendjes së tij shëndetësore.

Një 30 vjecar është shpallur në kërkim nga policia e Pukës, pasi nuk iu bind urdhrit të policisë për të ndaluar. Në njoftimin zyrtar policia thotë se 30 vjecari ishte i armatosur.

“Gjatë kontrollit të territorit në fshatin Kodërbojë, me qëllim evidentimin dhe goditjen e rasteve të kultivimit të bimëve narkotike, shërbimet e Komisariatit të Policisë Pukë, më datë 22.08.2026, konstatuan një parcelë ku ishin kultivuar 120 bimë të dyshuara narkotike.

Gjithashtu, në afërsi të parcelës, konstatuan një shtetas të armatosur, i cili, pasi ka konstatuar praninë e punonjësve të Policisë, është larguar me shpejtësi, duke mos iu bindur urdhrit të punonjësve të Policisë për të ndaluar.

Një prej punonjësve të Policisë qëlloi në ajër, me qëllim paralajmërimin e tij për të ndaluar, por personi i armatosur, duke përfituar nga terreni i vështirë, ka mundur të largohet.

Në vijim të veprimeve hetimore, u bë i mundur identifikimi i tij, konkretisht shtetasi K. L., 30 vjeç, banues në fshatin Kodërbojë, Pukë, i cili u shpall në kërkim.

Ky shtetas dyshohet se kishte kultivuar bimët narkotike të konstatuara në parcelë dhe i ruante ato i armatosur me armë zjarri.

Vijojnë kontrollet për lokalizimin dhe kapjen e 30-vjeçarit.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Kultivimi i bimëve narkotike”.” thuhet në njoftim.

Një operacion ‘blic’ është zhvilluar nga drejtoria e burgjeve në IEVP Fushë-Krujë.

Burimet thanë për ABC News se është sekuestruar një aparat celular që dyshohet se i përket Ramazan Rrajës.

Sipas burimeve celulari i është dorëzuar për ekspetizë në SPAK për t’u kqyrur në laboratorin dixhital.

Operacioni vazhdon pasi dyshohet se janë fshehur dhe aparate të tjerë celular.

Qeveria po përgatit një platformë të re dixhitale, të quajtur “Pasqyra Albania”, e cila synon të modernizojë dhe përmirësojë mënyrën e trajtimit të problematikave të raportuara nga qytetarët.

Sipas planit të prezantuar gjatë mbledhjes së qeverisë, platforma do të funksionojë përmes dy seksioneve kryesore: “Flamingo Mirror” dhe “Radar”.

“Flamingo Mirror” do t’u mundësojë qytetarëve të raportojnë dhe ankohen për problematika që nuk janë zgjidhur nga administrata shtetërore. Ndërkohë, “Radar” do të shërbejë si një sistem gjurmimi, përmes të cilit qytetari do të mund të ndjekë në kohë reale statusin e ankesës së tij.

Procesi i gjurmimit pritet të nisë brenda 48 orëve nga paraqitja e kërkesës, ndërsa objektivi i qeverisë është që problematikat e qytetarëve të marrin zgjidhje brenda dy javësh. Shkeljet e afateve do të monitorohen dhe do të jenë të evidentueshme përmes sistemit.

Platforma e re synon të jetë një version më i avancuar i portalit të bashkëqeverisjes “Shqipëria që duam”, duke e vendosur theksin te transparenca dhe ndjekja e përgjegjësive të administratës.

Mbledhja e kryeministrit Rama me ministrat në Pogradec ka nisur në orën 11:00 dhe pritet të përfundojë rreth orës 14:00. Çdo ministër ka në dispozicion rreth 15 minuta për të raportuar mbi punën e dikasterit përkatës, përfshirë edhe të dhënat mbi prokurimet për periudhën janar-gusht 2026.

Një tjetër element i diskutimeve lidhet me mënyrën e komunikimit publik të ministrave dhe promovimin e punës së tyre në media.

Mbledhja zhvillohet pak ditë përpara fillimit të shtatorit, kur kryeministri Edi Rama pritet të thërrasë Asamblenë e Partisë Socialiste. Në këtë mbledhje pritet të raportohen edhe ndryshimet e mundshme në kabinetin qeveritar dhe në strukturat drejtuese të Partisë Socialiste.

Read More...

33 vatra zjarri janë raportuar gjatë 24 orëve të fundit në territorin e Shqipërisë, ndërsa 6 prej tyre vijojnë aktive dhe 10 të tjera po mbahen nën monitorim.

Sipas Ministrisë së Mbrojtjes, në terren janë angazhuar 214 forca operacionale dhe 30 automjete zjarrfikëse. Në operacione janë përfshirë edhe Forcat e Armatosura me 60 efektivë, 3 automjete zjarrfikëse, një ekskavator të rëndë, 3 helikopterë dhe 2 avionë “Air Tractor”.

Ndërhyrjet vijojnë në disa qarqe, me fokus në Tiranë, Dibër, Lezhë, Shkodër dhe Durrës.

Në Malin e Dajtit vijon puna për shuarjen e vatrave aktive, ndërsa autoritetet bëjnë me dije se nuk ka rrezik për zonat e banuara.

Në zonën Gojan–Gjegjan–Tërbun, në Bashkinë Pukë, situata është vënë nën kontroll dhe nuk paraqitet rrezik për banesat. Ndërkohë, vatra në Prozhëm vijon të jetë aktive dhe ekipet po punojnë për izolimin e saj.

Në qarkun Dibër mbeten aktive vatrat në Ballenjë dhe Qafë të Helmës, ndërsa ajo në Bërshi është nën mbikëqyrje.

Në Mirditë, vatra në Shtuf vijon aktive, ndërsa zjarret në Lufaj dhe Tenë janë izoluar dhe po monitorohen.

Agjencia Kombëtare e Mbrojtjes Civile, në bashkëpunim me prefekturat, bashkitë dhe strukturat e tjera të sistemit të mbrojtjes civile, vijon monitorimin e situatës në të gjithë vendin.

Prioritet mbetet izolimi dhe shuarja e plotë e vatrave aktive, parandalimi i riaktivizimeve dhe mbrojtja e jetës, banesave dhe pasurisë së qytetarëve.

Presidenti i Këshillit Evropian, Antonio Costa, dhe kryeministri britanik, Andy Burnham, mbërritën të hënën (24 gusht) në Kiev për të marrë pjesë në festimet e 35‑vjetorit të pavarësisë së Ukrainës.

Të pranishëm ishin edhe kryeministri i Luksemburgut Lik Frieden, presidentja moldave Maia Sandu dhe presidenti estonez Alar Karis, siç bëri të ditur Ministri i Jashtëm ukrainas Andriy Sibiha, duke postuar foto të zyrtarëve në stacionin e trenit të kryeqytetit.

Ndërkohë, Komisioni Evropian miratoi një fond shtesë prej 6.1 miliardë eurosh për Ukrainën, i destinuar për blerjen e sistemeve të mbrojtjes ajrore, raketave, municioneve dhe radarëve.
Kjo paketë vjen përveç 16 miliardë eurove të miratuara më herët, nga të cilat 8.35 miliardë euro janë disbursuar tashmë.

“Ndërsa Rusia intensifikon sulmet e saj, ne po ndërmarrim veprime për të ndihmuar Ukrainën të mbrojë popullin e saj dhe qiellin e saj. Evropa qëndron me Ukrainën dhe ne do t’i ofrojmë asaj atë që i nevojitet, kur të ketë nevojë”, tha presidentja e KE-së, Ursula von der Leyen.

Prania e udhëheqësve dhe konferenca e aleancës së të vullnetshëmve po zhvillohen në një moment kur presidenti Volodymyr Zelensky pritet të kërkojë përforcim të mbrojtjes ajrore.

Ai theksoi se dërgesat e raketave për sistemet Patriot janë përgjysmuar që nga viti 2023: Ukraina mori 675 raketa atë vit, krahasuar me 364 në vitin 2025, ndërsa për vitin 2026 parashikohen vetëm 264 raketa, megjithëse Kievi kërkon të paktën 300 përpara dimrit. Zelensky paralajmëroi se Rusia është e aftë të prodhojë rreth 100 raketa balistike në muaj.

Dy persona janë arrestuar në Tiranë, të dyshuar për përfshirje në ngjarjen e ndodhur më 23 gusht në lagjen “1 Maji” në Kuçovë, ku u qëllua me armë zjarri në drejtim të një automjeti të parkuar.

Në kuadër të operacionit u arrestuan një 32-vjeçar dhe një 49-vjeçar, të dy banues në Kuçovë.

Gjatë kontrollit të banesës së 49-vjeçarit, në tarracë u gjetën dhe u sekuestruan një armë zjarri dhe disa fishekë, që dyshohet se kanë lidhje me ngjarjen.

32-vjeçari akuzohet për “Mbajtja pa leje e armëve dhe municionit”, “Kanosja” dhe “Shkatërrimi i pronës”, ndërsa 49-vjeçari për “Përkrahja e autorit të krimit” dhe “Veprime që pengojnë zbulimin e të vërtetës”.

Ndërkohë, një 65-vjeçar është proceduar në gjendje të lirë për veprën penale “Veprime që pengojnë zbulimin e të vërtetës”.

Materialet procedurale i janë referuar Prokurorisë për veprime të mëtejshme.

Për vite me radhë, shkolla e së ardhmes u imagjinua si një klasë pa letër: nxënës me tabletë në dorë, tabela interaktive, libra elektronikë dhe aplikacione edukative. Digjitalizimi shihej si hapi i natyrshëm i arsimit.

Sot, megjithatë, kjo qasje po rishikohet. Teknologjia nuk po braktiset, por po ndryshon mënyra se si përdoret. Pyetja nuk është më nëse shkolla duhet të jetë digjitale, por kur teknologjia ndihmon realisht nxënësin dhe kur kthehet në shpërqendrim.

UNESCO vëren një ndryshim të rëndësishëm në politikat arsimore: në vitin 2023, vetëm 24% e vendeve kishin kufizime kombëtare për përdorimin e telefonave celularë në shkolla, ndërsa deri në mars 2026 kufizime të tilla ekzistonin në 114 sisteme arsimore, ose rreth 58% të vendeve në botë.

Kjo nuk do të thotë rikthim te shkolla para internetit. Qasja e re është më e balancuar: libri i printuar, leximi dhe shkrimi mbeten baza, ndërsa mjetet digjitale përdoren aty ku sjellin një përfitim të qartë pedagogjik.

Libri i printuar rikthehet në qendër
Suedia ka qenë ndër vendet më të avancuara në përdorimin e teknologjisë në arsim. Por përdorimi i gjerë i tabletëve dhe mjeteve digjitale ka sjellë diskutime mbi përqendrimin, leximin dhe efektivitetin e të nxënit.

Sipas një artikulli të Protothema, në testimin PIRLS 2021, nxënësit suedezë shënuan 544 pikë në të kuptuarit e leximit, krahasuar me 555 pikë në vitin 2016. Suedia mbetet mbi mesataren ndërkombëtare, ndërsa nuk ka prova shkencore që rënia të jetë shkaktuar nga tabletët. Pandemia, pabarazitë sociale dhe faktorë të tjerë mund të kenë ndikuar gjithashtu.

Edhe të dhënat e PISA 2022 ngrenë shqetësime për shpërqendrimin. Në Suedi, 36.9% e nxënësve deklaruan se në orët e matematikës nxënësit shpërqendrohen nga përdorimi i pajisjeve digjitale në shumicën ose në të gjitha orët, krahasuar me 30.5% në vendet e OECD-së.

Norvegjia po përballet me një debat të ngjashëm. Në PISA 2022, rezultatet e saj ranë ndjeshëm krahasuar me vitin 2018: 33 pikë në matematikë, 23 në lexim dhe 12 në shkencë. Përqindja e nxënësve me rezultate të ulëta u rrit në lexim nga 19% në 27% dhe në matematikë nga 19% në 31%.

Megjithatë, këto të dhëna nuk provojnë se ekranet shkaktuan rënien e rezultateve. Ato kanë nxitur, ndër të tjera, një rishikim të mënyrës se si teknologjia përdoret në shkolla dhe një forcim të rolit të librit fizik dhe aftësive bazë.

Çfarë ndodh kur lexojmë në letër?
Një meta-analizë e madhe, që përfshiu 54 studime dhe më shumë se 171 mijë pjesëmarrës, ka gjetur se të kuptuarit e tekstit ishte mesatarisht më i mirë kur teksti lexohej në letër sesa në ekran.

Kjo nuk do të thotë se fëmijët nuk mund të mësojnë nga ekrani. Por kur qëllimi është kuptimi i thellë i një teksti të gjatë dhe kompleks, libri i printuar mund të ketë avantazh.

Një nga arsyet është struktura fikse e faqes. Libri nuk ndryshon format, nuk shfaq njoftime, nuk ofron lidhje që të çojnë në një tjetër faqe dhe nuk ka të njëjtin potencial për stimuj paralelë. Kjo mund ta ndihmojë nxënësin të krijojë një lloj “ harte mendore” të tekstit.

Në ekran, nga ana tjetër, leximi mund të jetë më i shpejtë dhe më sipërfaqësor, veçanërisht kur teksti është i gjatë dhe kërkon përqendrim të vazhdueshëm.

Edhe te fëmijët më të vegjël është vërejtur një avantazh i librit fizik. Një meta-analizë me 1,812 fëmijë të moshës 1 deri në 8 vjeç tregoi se, kur një libër digjital dhe një libër i printuar kishin të njëjtën përmbajtje, fëmijët e kuptonin më mirë historinë kur e lexonin në formatin fizik.

Edhe lapsi ka rëndësi
Shkrimi me dorë mund të ketë një avantazh tjetër: është më i ngadaltë.

Një eksperiment i njohur krahasoi marrjen e shënimeve me laptop dhe me dorë. Studentët që shkruanin me dorë dolën më mirë në pyetjet që kërkonin kuptim konceptual.

Arsyeja e mundshme është se shkrimi me dorë e detyron nxënësin të zgjedhë, përmbledhë dhe përpunojë informacionin, ndërsa tastiera e bën më të lehtë regjistrimin pothuajse fjalë për fjalë të asaj që dëgjohet.

Por letra nuk është gjithmonë më e mirë
Kjo është pika që shpesh humbet në debatin për “rikthimin te letra”.

Një tablet mund të shërbejë si bibliotekë digjitale, laborator fizike, simulator, hartë interaktive, mjet planifikimi, platformë për të mësuar në mënyrë të personalizuar ose teknologji ndihmëse për nxënësit me aftësi të kufizuara.

OECD ka konstatuar se nxënësit që përdornin pajisje digjitale për aktivitete mësimore deri në rreth një orë në ditë kishin, mesatarisht, rezultate më të larta në matematikë sesa ata që nuk i përdornin fare për këto qëllime.

Pra, teknologjia ka vlerë kur bën diçka që libri nuk mund ta bëjë: simulon, vizualizon, jep reagim të menjëhershëm, krijon ndërveprim ose ofron mbështetje të personalizuar.

Për tekste të shkurtra, kërkim të shpejtë, shpjegime multimediale dhe simulime, ekrani mund të jetë mjeti më i përshtatshëm.

Për përqendrim të gjatë, lexim kompleks, nxjerrje përfundimesh dhe kuptim të thellë, libri dhe lapsi mund të jenë zgjedhja më e mirë.

Prandaj pyetja nuk duhet të jetë “letër apo ekran?”, por:
“Cili mjet i shërben më mirë objektivit konkret të të nxënit?”

Ngjarje e rëndë në orët e fundit të së dielës në Malishevë ka tronditur vendin.

Jetlira Foniqi 25 vjeç shtatzënë humbi jetën ndërsa bashkëshorti i saj Egzon Bytyqi 26 vjeç mbeti i plagosur pas të shtënave me armë zjarri në dhomë ne  tyre të gjumit në fshatin Kërvasi.

Prokuroria Themelore në Gjakovë ka njoftuar lidhur me rastin që ka ndodhur në fshatin Kërvasari, Malishevë, ku sipas të dhënave fillestare një 25-vjeçare, bashkëshortja e personit të dyshuar, si pasojë e plagëve nga arma e zjarrit ka humbur jetën në QKUK.

Ndërkaq sipas njoftimit, i dyshuari 26-vjeçar, po ashtu ka pësuar plagë të rënda nga arma e zjarrit, i cili është dërguar për trajtim mjekësor dhe sipas njoftimit nga QKUK, i njëjti është në gjendje të rëndë dhe kritike për jetën.

Prokurori i Shtetit, ka dalë në vendin e ngjarjes dhe me urdhër të prokurorit, trupi i pajetë i viktimës është dërguar në Institutin e Mjekësisë Ligjore në Prishtinë, për kryerjen e autopsisë.

Nga Prokurori i Shtetit rasti është iniciuar për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”.

Ukraina pret 30 miliardë euro nga Bashkimi Evropian (BE) për të financuar mbrojtjen e saj. Kështu tha Presidenti Volodimir Zelenski para gazetarëve në Kiev: “Ato duhen për mbrojtjen e gjithë vendit.” Sot buxheti i mbrojtjes ka një hendek prej rreth 23 miliardë eurosh.

Paratë duhen për pagat e ushtarëve, për dëmshpërblimet e familjeve të të rënëve dhe për shpenzime të tjera. Veç kësaj, Ukrainës i nevojiten para edhe për prodhimin e dronëve. “Kërkohet një shumë e konsiderueshme. Për këtë çështje po punoj me francezët dhe gjermanët”, tha Zelenski.

Zelenski njofton përparime në terren
Njëkohësisht Presidenti vuri në dukje sukseset në front. Që nga fillimi i vitit forcat e armatosura kanë rimarrë 820 kilometra katrorë. Rajoni i Dnipropetrovskut ndodhet tashmë gati plotësisht nën kontrollin ukrainas. Vetëm rreth dhjetë kilometra katrorë me tri vendbanime janë ende jashtë kontrollit të plotë të Kievit. Këto të dhëna nuk mund të verifikohen në mënyrë të pavarur.

Zelenski pranoi po ashtu se Rusia ka pushtuar rreth 990 kilometra katrorë territor ukrainas që nga fillimi i vitit. Ai beson se trupat ukrainase do të rimarrin edhe zona të tjera deri në fund të vitit. Një dorëzim vullnetar të Donbasit ai e përjashtoi sërish. Moska kishte kërkuar tërheqjen nga ky rajon lindor si kusht për armëpushim.

Paralajmërim për zgjedhje gjatë luftës
Ministri i Mbrojtjes, Mihajlo Fedorov, u shkarkua në korrik dhe kërkoi zgjedhje qysh gjatë luftës. Zelenski e hodhi poshtë me ashpërsi këtë kërkesë. “Zgjedhjet në këtë moment do të ishin si një cunam për shtetin dhe do ta përçanin Ukrainën”, tha Presidenti. “Prandaj strategjia ime është ta udhëheq vendin deri në fund të luftës dhe të ruaj një shtet të pavarur e sovran.”

Rreth një muaj pas largimit, Fedorovi bëri thirrje të gjendet një “mekanizëm ligjor, i sigurt dhe realist” për zgjedhje, pavarësisht pushtimit rus. “Demokracia nuk duhet të mbahet peng nga Rusia”, tha 35-vjeçari në një mesazh video. Një plan konkret ai nuk paraqiti.

Miliona njerëz do ta kishin të vështirë të votonin
Një zgjedhje në kohë lufte ngre probleme praktike. Si do të votojnë ushtarët në front, miliona refugjatë ukrainas jashtë vendit dhe njerëzit në zonat e pushtuara nga Rusia? Kësaj i shtohet edhe rreziku i dezinformimit rus. Zelenski tha se deri tani askush nuk ka shpjeguar si mund të organizohen zgjedhje të sigurta në këto kushte.

Që nga nisja e pushtimit rus në shkurt 2022 në fuqi është ligji i luftës. Ai i mban zgjedhjet të pezulluara. Mandati i rregullt i Zelenskit si president përfundoi në maj 2024. Instituti Ndërkombëtar i Sociologjisë në Kiev zhvilloi një sondazh në korrik dhe gusht. Vetëm 15 për qind e të pyeturve mbështetën zgjedhjet para përfundimit të luftës.

Fedorovi u shkarkua më 15 korrik gjatë një riformatimi të qeverisë, pas vetëm gjashtë muajsh në detyrë. Largimi i tij nxiti protesta disaditore. Vetëm në Kiev dolën në rrugë mijëra njerëz. Disa mbështetës të tij u distancuan më pas nga nisma e tij për zgjedhje.

“Koalicioni i të vullnetshmëve” diskuton ndihmën e mëtejshme
Të hënën mblidhet sërish “Koalicioni i të vullnetshmëve” (grupi i shteteve që mbështetin ushtarakisht Ukrainën). Takimi bie në ditën e pavarësisë së Ukrainës dhe zhvillohet në format hibrid. Në krye të tij janëkancelari gjerman Friedrich Merz , presidenti francez Emmanuel Macron dhe kryeministri britanik Andy Burnham. Merr pjesë edhe Zelenski.

Bisedimet do të përqendrohen te forcimi i mbështetjes për Ukrainën dhe te vijimi i punës për garancitë e sigurisë. Këto duhet të ndihmojnë për një paqe të qëndrueshme në rast armëpushimi./DW

Grupi serb i hakerëve pretendon se ka sulmuar FinInfo dhe një institucion shëndetësor në Kroaci.

Një grup hakerësh nga Serbia ka pretenduar se ka sulmuar platformën kroate FinInfo.hr, si dhe një institucion të paidentifikuar shëndetësor, duke publikuar mijëra të dhëna në një forum në “dark web”.

Specialisti kroat i sigurisë kibernetike, Leon Juraniç, bashkëthemelues dhe drejtor teknik i kompanisë ThreatLeap, ka bërë të ditur se sistemi i kompanisë së tij ka zbuluar dy publikime të grupit serb të hakerëve INF Group, raporton Index.hr

Sipas Juraniq, grupi pretendon se ka depërtuar në sistemin e FinInfo.hr dhe ka publikuar rreth 34 mijë të dhëna nga baza e saj.

Në një publikim tjetër, hakerët pretendojnë se kanë sulmuar edhe një institucion shëndetësor, emri i të cilit nuk është bërë publik. Ata pretendojnë se kanë siguruar rreth 9 mijë të dhëna, mes të cilave informacione të ndjeshme, përfshirë diagnoza dhe të dhëna të pacientëve.

INF Group, për të cilin raportohet se vepron nga Serbia, kishte marrë së fundmi përgjegjësinë edhe për një tjetër incident kibernetik, ku u publikua një bazë me të dhëna të qytetarëve kroatë. Grupi kishte pretenduar se të dhënat vinin nga sistemi kroat i drejtësisë, duke paralajmëruar se ky ishte “vetëm fillimi”.

Ndërkohë, Instituti Kroat i Sigurimeve Pensionale (HZMO) kishte njoftuar se kishte eliminuar një incident të sigurisë kibernetike në aplikacionin HZMO Live – Kontakt centar dhe kishte rikthyer komunikimin e sigurt me përdoruesit.

Hakerët kishin pretenduar se posedonin të dhëna si emra, mbiemra, numra personalë identifikimi (OIB), numra telefoni dhe adresa elektronike./Telegrafi

Një zjarr që shkatërroi një fabrikë jahtesh në Bosnje-Hercegovinë ka çuar në arrestimin e katër personave, mes tyre edhe djalit minoren të ministrit të Kulturës të Kantonit të Sarajevës, Kenan Magoda. Sipas hetimeve paraprake, ngjarja dyshohet se lidhet me krimin e organizuar, ndërsa autoritetet po përpiqen të zbardhin se kush e porositi sulmin.

Flakët përfshinë më 21 gusht fabrikën “Derubis Yachts” në qytetin e Vitezit, duke shkaktuar dëme të mëdha materiale. Bashkëpronarja e kompanisë, Lejla Kraljević, deklaroi menjëherë pas ngjarjes se ishte e bindur se bëhej fjalë për një zjarrvënie të qëllimshme, dyshim që u përforcua edhe nga hetimet e policisë.
Brenda pak ditësh, hetuesit identifikuan katër të dyshuar, mes tyre dy të mitur. Ministri Kenan Magoda konfirmoi se njëri prej tyre është djali i tij dhe tha se nuk do të kërkojë asnjë trajtim të veçantë.

“Nëse pretendimet e bëra sot rezultojnë të vërteta dhe nëse vërtetohet përgjegjësia e fëmijës tim, si baba do të kërkoj që ai të përballet me pasojat më të rënda që parashikon ligji”, shkroi Magoda.

Sipas mediave boshnjake një nga të arrestuarit ka pranuar se grupi ishte paguar për të kryer zjarrvënien nga Almedin Ćato, një person me precedentë të shumtë penalë. Sipas raportimit, ai njihet nga policia si person që rekruton të mitur për të kryer veprime kriminale. Megjithatë, motivi i sulmit ndaj fabrikës mbetet ende i paqartë.

Rasti ka marrë edhe përmasa politike, pasi vjen vetëm pak javë para zgjedhjeve të 4 tetorit në Bosnje-Hercegovinë. Opozita ka akuzuar partitë në pushtet, ndërsa kritika ndaj ministrit Magoda kanë ardhur edhe nga figura pranë koalicionit qeverisës. Mes tyre është edhe regjisori fitues i çmimit “Oscar”, Danis Tanović, i cili tha se sektori i kulturës në Kantonin e Sarajevës nuk ka qenë kurrë në gjendje më të keqe dhe u bëri thirrje njerëzve të kulturës të ushtrojnë presion për mënyrën se si zgjidhet ministri i ardhshëm i Kulturës.

Mbi 50 plumbat janë zbrazur në furistraden me të cilën udhëtonin dy shtetasit Prelë Gjoni, 82 vjeç dhe djali i tij Lekë Gjoni 57 vjeç që mbetën të vrarë ndërsa Lazër Bashi që u ndodh rastësisht në automjet u plagos.

Dy viktimat po ktheheshin nga shtëpia e vjetër në Dukagjin drejt Shkodrës kur ende pa dalë nga rruga e fshatit Xhan, dy shtetas ende të paidentifikuar qëlluan në drejtim të tyre duke lënë të vdekur babë e bir dhe duke plagosur një tjetër. I plagosuri u dërgua në spitalin e Shkodrës dhe më pas drejt Tiranës për mjekim të specializuar ndërsa ndodhet në gjendje jashtë rrezikut për jetën.

Lazër Bashi i shpëtoi mrekullisht këtij atentati ndërsa ndodhej në pjesën e pasme të fouristradës.
Menjëherë në vendngjarje mbërritën dhjetra forca policie dhe efektivët e RENEA duke nisur kontrolle në zonë për identifikimin e më pas gjetjen dhe kapjen e autorëve.

Policia ka konstatuar në vendngjarje mbi 50 gëzhoja plumbash ndërsa janë përdorur dy armë, një automatik kallashnikov dhe një MP5 duke konfirmuar se të paktën dy persona kanë qëlluar në drejtim të fouristadës ku ndodheshin dy viktimat. Të afërmit e viktimave kanë treguar për policinë se Prelë dhe Lekë Gjoni nuk kishin konflikte dhe sipas tyre nuk kanë asnjë ide se kush mund të jenë autorët e vrasjes. Ndërsa policia ka nisur hetimet në dy pista për ndonjë konflikt të vjetër si dhe pista tjetër është divorci i Lekë Gjonit disa muaj më parë, me bashkëshorten e tij me te cilën ka 4 fëmijë. Familjarët konfirmuan se një ditë para vrasjes babë e bir kishin shkuar në banesën e vjetër ku mbajnë disa bletë dhe se po ktheheshin normalisht drejt Grudës në Shkodër ku banojnë. Lekë Gjoni punonte me një kamion dhe ditët e fundit kishte ngarkuar materiale ndërtimi për një banesë në fshatin Gjuraj të Dukagjinit dhe po ashtu kishte edhe një eskavator bashkë me një shtetas tjetër të zonës që po ashtu punonin. Për policinë nuk njihej si person problematik ndërsa nuk ka informacione për konflikte të jashtme të mundshme. Policia vijon hetimet bashkë me prokurorinë për zbardhjen e plotë të ngjarjes ndërsa lidhja e provave me autorët e mundshëm mbetet e vështirë për shkak të terrenit të thyer malor, mungesës së sinjalit telefonik atje dhe faktit që rrugët dhe pyjet nuk kanë monitorim nga kamera sigurie. Ngjarja mendohet se ka ndodhur rreth orës 16:00 ndërsa policia mori njoftim për vrasjen në orën 17:20 pas një telefonate nga banorët e zonës për ngjarjen e rëndë ndërsa në vendngjarje efektivët mbërritën rreth orës 19:00 për shkak të largësisë duke i dhënë kohë autorëve mjaftueshëm që të largohen pa lënë gjurmë.

Mengjesi i kesaj te hene ka shenuar nje shtim te konsiderueshem te fluksit te levizjeve ne PKK Kakavije.

Emigrantet qe kane qene me pushime ne Shqiperi kane nisur kthimin drejt vendeve ku jetojne e punojne duke shkaktuar fluks dhe rradhe ne piken me te madhe doganore me shtetin grek. Pala shqiptare eshte duke punuar me tre sportele ne dalje dhe dy ne hyrje nderkohe qe pala greke funksionon vetem me nje sportel ne hyrje cka ben qe levizja te jete mjaft e ngadalte.

Ne 24 oret e fundit shërbimet e policise ne Kakavijë kanë përpunuar 11534 shtetas në hyrje-dalje, nga të cilët 3932 në hyrje dhe 7602 në dalje, si dhe 3228 mjete në hyrje – dalje, nga të cilat 1046 në hyrje dhe 2182 në dalje.

Roja bregdetare e Tunizisë ka nxjerrë nga uji njëmbëdhjetë trupa, pasi një varkë që transportonte emigrantë tunizianë u mbyt gjatë fundjavës teksa po shkonte drejt Italisë, ndërsa tre persona të tjerë rezultojnë ende të zhdukur, njoftoi të dielën Garda Kombëtare.

Ekipet e rojës bregdetare, ushtrisë dhe mbrojtjes civile, të mbështetura nga dy helikopterë, vazhduan kërkimet për personat e zhdukur.

Varka, e cila u nis herët të enjten me 15 persona në bord shumica e të cilëve të rinj u mbyt pranë bregdetit tunizian dhe deri më tani vetëm një person është shpëtuar i gjallë, deklaroi të shtunën kreu i një grupi për të drejtat e emigrantëve.

Burri që mbijetoi tha se kishte qëndruar në det të hapur për 48 orë para se të shpëtohej nga një anije tregtare.

Mes personave në bord ndodheshin shtatë anëtarë të së njëjtës familje dhe një burrë me bashkëshorten e tij shtatzënë, deklaroi për Reuters kreu i Observatorit Tunizian për të Drejtat e Njeriut.

Të gjithë emigrantët ishin nga zona e Ben Guerdane-s, në juglindje të Tunizisë, dhe dhjetëra të rinj u mblodhën mbrëmjen e së shtunës në qytetin pranë kufirit me Libinë për të kërkuar përshpejtimin e operacioneve të kërkimit. Policia përdori gaz lotsjellës për të shpërndarë protestuesit.

Rruga e Mesdheut qendror, që niset nga bregdeti i Afrikës së Veriut, është një nga rrugët më vdekjeprurëse të emigracionit në botë, e përdorur nga emigrantë nga Afrika dhe Lindja e Mesme që përpiqen të arrijnë në Evropë, shpesh me varka të tejmbushura ose të pasigurta për lundrim.

Human Rights Watch, Amnesty International dhe dhjetëra grupe të tjera humanitare dhe të të drejtave të njeriut deklaruan muajin e kaluar se një marrëveshje migracioni midis Tunizisë dhe Bashkimit Evropian kishte nxitur dhe normalizuar abuzime të rënda ndaj migrantëve dhe azilkërkuesve në Tunizi.

Grupet i bënë thirrje BE-së që të pezullojë financimin për aktivitetet e migracionit dhe të kontrollit të kufijve që përfshijnë forcat e sigurisë tuniziane.

Ministrat e kabinetit qeveritar mblidhen këtë të hënë, më 24 gusht, në kuadër të një “retreat”-i të dedikuar analizës së punës së bërë gjatë pjesës së parë të mandatit të katërt.

Takimi pritet të shërbejë për një bilanc të punës së çdo dikasteri, me fokus te rezultatet e arritura, problematikat e evidentuara dhe detyrat që mbeten për t’u realizuar në periudhën në vijim.

Mbledhja e qeverisë zhvillohet një ditë pas takimit të kryeministrit Edi Rama me drejtuesit politikë të qarqeve dhe kryetarët e komisioneve parlamentare në Pogradec. Takimi i së dielës zgjati rreth shtatë orë dhe u përqendrua në përgatitjet për fazën e ardhshme të punës së mazhorancës.

Gjatë diskutimeve, Rama prezantoi edhe disa prej mekanizmave të rinj që synojnë ndryshimin e mënyrës së trajtimit të kërkesave të qytetarëve, mes tyre “Pasqyra unike”.

Sipas kryeministrit, synimi është që çdo kërkesë apo problematikë e qytetarëve të mund të ndiqet në kohë reale, duke bërë të monitorueshme edhe përgjegjësitë e institucioneve dhe respektimin e afateve.
“Retreat”-i i ministrave pritet të përcaktojë tashmë prioritetet dhe objektivat kryesore të qeverisë për sezonin e ri politik.

Një aksident automobilistik është regjistruar mëngjesin e kësaj të hëne në aksin e autostradës Levan-Tepelenë.

Në aksident janë përfshirë tre automjete, të cilat janë përplasur me njëra-tjetrën. Përplasja ka shkaktuar lendimin e një shtetasi që ndodhej në një prej makinave.

I dëmtuari është transportuar në Spitalin Rajonal të Fierit, ku ka marrë ndihmën e parë mjekësore.
Në vendngjarje kanë mbërritur forcat e policisë dhe shërbimet e qarkullimit rrugor, të cilat kanë ndërhyrë për menaxhimin e trafikut dhe normalizimin e lëvizjes së automjeteve.

Aksi Levan-Tepelenë ka fluks të lartë qarkullimi, veçanërisht gjatë kësaj periudhe, për shkak të lëvizjes së emigrantëve drejt pikave kufitare.

Ndërkohë, në vendin e ngjarjes kanë shkuar edhe ekspertët kriminalistikë, të cilët po kryejnë veprimet procedurale për të përcaktuar rrethanat dhe shkaqet e aksidentit.

Një aksident me dy mjete lundruese Jet Ski ka ndodhur në liqenin e Kukësit, rreth orës 18:15.

Sipas policisë, një 29-vjeçar, duke drejtuar një Jet Ski ku ndodhej edhe një 46-vjeçar, është përplasur aksidentalisht me një tjetër mjet lundrues që po drejtohej drejt bregut për t’u ankoruar.

Si pasojë e përplasjes, kanë mbetur të dëmtuar lehtë drejtuesi i njërit prej mjeteve dhe pasagjeri që ndodhej me të. Të dy janë dërguar në spitalin e Prizrenit dhe ndodhen jashtë rrezikut për jetën.

Policia ka sekuestruar dy mjetet lundruese, ndërsa grupi hetimor, nën drejtimin e Prokurorisë, vijon punën për zbardhjen e plotë të rrethanave të aksidentit.

Për rastin, drejtuesi 29-vjeçar është proceduar penalisht për veprën penale “Plagosja e lehtë nga pakujdesia”.

Një grua ka mbetur e vrarë dhe një burrë është plagosur rëndë nga të shtënat me armë zjarri në Malishevë, raporton Klan Kosova.

Sipas informacioneve që ka siguruar KlanKosova.tv nga Qendra Klinike Universitare e Kosovës, gruaja që vdiq ishte shtatzënë në javën e 34 të shtatzënisë.

Ndërkaq, burri është në gjendje shumë të rëndë dhe jo stabile. Sipas informacioneve,i njëjti është i intubuar dhe i kyçur në respirator, ndërsa po i nënshtrohet ekzaminimeve të nevojshme.