Gazeta Si – Pas më shumë se një viti seancash paraprake, Gjykata e Posaçme Kundër Korrupsionit dhe Krimit të Organizuar (GJKKO) ka vendosur të mos e kalojë për gjykim dosjen e njohur si “SASPAC”, duke ia rikthyer atë Prokurorisë së Posaçme (SPAK) për plotësim hetimesh.

Vendimi u mor këtë të hënë, ndërsa gjykata vlerësoi se hetimet nuk janë të plota dhe kërkoi kryerjen e veprimeve shtesë hetimore për të gjithë personat e marrë të pandehur në këtë procedim, përfshirë ish-ministrin e Shëndetësisë dhe ish-drejtorin e agjencisë SASPAC, Ilir Beqaj.

Sipas vendimit të GJKKO-së, prokurorja e çështjes, Elida Kaçkini, do të ketë afat deri më 30 tetor për të plotësuar hetimet e kërkuara nga gjykata.

Aktualisht, për këtë dosje në masën e sigurisë “arrest në burg” vijojnë të mbeten vetëm Ilir Beqaj dhe Ermal Kurtulaj.

Beqaj po gjykohet në Gjykatën e Posaçme për “vjedhje duke shpërdoruar detyrën” dhe “grup kriminal” në dosjen “Sterilizimi”. Paralelisht, ai është i pandehur në dosjen “SASPAC”, ku akuzohet për një sërë veprash penale, përfshirë “korrupsionin” dhe “pastrimin e parave”, çështje që ndodhet në fazën e shqyrtimit paraprak. 

The post ‘SASPAC’ / GJKKO i kthen SPAK-ut dosjen ndaj Ilir Beqajt për plotësim hetimesh appeared first on Gazeta Si.

Gazeta Si – Dubai po i shndërron banorët e tij në ambasadorë të turizmit për qytetin, në një përpjekje për të nxitur turizmin, i cili është prekur rëndë nga lufta në Iran.

Qeveria vendore ka nisur “Dubai Invite”, një program që ofron përfitime me vlerë mbi 3.000 dirhamë – e barabartë me rreth 700–720 euro – për ata që ftojnë miq ose familjarë, të cilët jetojnë jashtë vendit.

Si funksionojnë bonuset – Shpërblimi nuk është një shumë monetare, por përbëhet nga tri paketa për çdo rezident, të cilat ofrojnë përfitime të tilla si përvoja gastronomike dhe degustim verërash, qëndrime në hotele dhe hyrje në atraksionet e qytetit.

Promocioni vlen për qëndrimet midis 20 korrikut dhe 31 tetorit; çdo rezident mund të ftojë deri në pesë persona njëherësh, me një kufi maksimal prej tri ftesash në total.

Kush mund të marrë pjesë – Të drejtën për të marrë pjesë e kanë shtetasit dhe rezidentët e Emirateve të Bashkuara Arabe (EBA) të moshës 18 vjeç e lart, të cilët zotërojnë një kartë identiteti të vlefshme të Emirateve (Emirates ID).

Regjistrimi është i thjeshtë: pjesëmarrësit duhet të plotësojnë formularin në faqen zyrtare të “Visit Dubai” dhe të japin detaje rreth personit të ftuar, si emri, numri i pasaportës, kombësia, data e lindjes, lidhja me rezidentin dhe muaji i planifikuar i mbërritjes.

Të ftuarit nuk duhet të jenë rezidentë të EBA-s dhe duhet të zotërojnë një vizë turistike të vlefshme për Dubain, që mbulon periudhën midis 20 korrikut dhe 31 tetorit 2026.

Megjithatë, ekziston një kufizim: çdo vizitor mund të nominohet vetëm një herë. Nëse një vizitor është regjistruar tashmë nga një rezident tjetër, një nominim i dytë nuk do të sjellë dhënien e shpërblimit.

Programi po gëzon popullaritet të madh mes rezidentëve të Dubait; mediat vendase raportuan mbi 10,000 aplikime brenda 48 orëve të para.

Rënia e turizmit – Gazeta britanike “The Guardian”, e lidh nisjen e kësaj nisme me rënien e turizmit të shkaktuar nga konflikti në Azinë Perëndimore dhe nga sulmet me dronë e raketa iraniane ndaj qytetit të Emirateve.

Rekordi i vendosur në vitin 2025 – kur qyteti priti pothuajse 20 milionë turistë (një rritje prej 5% krahasuar me vitin 2024) – tashmë duket si një kujtim i largët.

Për shkak të tensioneve të vazhdueshme rajonale, shumë itinerare fluturimi janë devijuar dhe turistët i kanë shmangur rrugët apo ndalesat që përfshijnë Dubain.

Hotelet dhe bizneset kanë regjistruar një rënie të të ardhurave me 50%. Disa nga hotelet më të famshme të qytetit janë mbyllur, duke prekur fuqinë punëtore; kriza në këtë sektor ka detyruar një shkurtim të vendeve të punës me 15-20%.

Për të shmangur mbylljen dhe për të tërhequr klientë, disa hotele kanë vendosur të ofrojnë ulje prej 45% në tarifat standarde.

Transmetuesi britanik BBC, intervistoi Mamoun Hmiden, drejtorin operativ të platformës së rezervimeve “Wego”, i cili deklaroi se shkalla e zënies së hoteleve në Dubai ka rënë në 15–20 për qind të niveleve normale.

Sipas Hmiden-it, pasiguria lidhur me konfliktin ka bërë që shumë udhëtarë t’i shtyjnë ose t’i anulojnë qëndrimet e tyre në rajon, duke i detyruar hotelet e ndryshme të ulin çmimet për të tërhequr klientë.

Ndërkohë, hoteli “Burj Al Arab” ka përshpejtuar punimet e rinovimit të planifikuara më parë, duke njoftuar një mbyllje 18-mujore.

Përshtati: Gazeta “Si”

The post Turizmi në krizë, Dubai jep 700 euro për banorët që ftojnë miq dhe familjarë appeared first on Gazeta Si.

Pas një viti katastrofikisht të keq me dëborë, kërkesa nga fermerët dhe qytetet e ka zbrazur rezervuarin në 1% të kapacitetit, duke i lënë pelikanët pa shumë ushqim.

The post Një nga rezervuarët më të mëdhenj të Arizonës po zhduket appeared first on Gazeta Si.

Gazeta Si – Mes imazheve të shumta të zjarreve që kanë përfshirë rajonin e Gironde-s në Francën jugperëndimore që nga e mërkura, njëri prej tyre ka tërhequr vëmendje të veçantë për shkak të fuqisë së tij shprehëse dhe ndikimit të fortë vizual.

Fotoja shfaq një burrë dhe një grua të ulur nën një çadër plazhi në plazhin Moutchic, buzë liqenit Lacanau, ndërsa në sfond duken një shtëllungë gjigante tymi dhe një qiell në ngjyrë portokalli.

Imazhi është publikuar nga media të mëdha ndërkombëtare, përfshirë “The Guardian”, “The New York Times” dhe “The Wall Street Journal” (e cila e zgjodhi atë për faqen e parë të botimit të saj të shtypur të datës 25 korrik).

Fotoja u shkrep më 24 korrik nga Maximilien Lamy i agjencisë “Agence France-Presse” – i cili nuk është as fotograf profesionist, por punon si redaktor.

Ai e realizoi foton me iPhone-in e tij ndërsa ndodhej në plazh me të bijën. “Kur mbërritëm në Moutchic, u përballëm me një skenë apokaliptike. Vura re atë çift dhe paradoksin që mishëronin: dukeshin sikur po vështronin një botë që digjej”, i tha Lamy gazetës “Le Nuovel Obs”. “Ata ishin ulur në shezlongë, por po aq lehtësisht mund të kishin qenë në divanin e tyre para televizorit”.

Kur fotoja nisi të qarkullonte në rrjetet sociale, disa përdorues e kritikuan çiftin që dukej kaq i qetë përballë një skene kaq dramatike.

Megjithatë, Lamy u bëri thirrje njerëzve të mos i gjykonin: “Ata janë me pushime, nuk janë në ndonjë rrezik të menjëhershëm dhe – në çdo rast – nuk ka asgjë tjetër që mund të bëjnë. A do të kishim vepruar ne vërtet ndryshe?”.

Për disa, fotoja solli ndër mend kopertinën e famshme të albumit Crisis? What Crisis? – albumi i katërt në studio i grupit Supertramp – e cila shfaq një burrë të ulur në shezlong mes një peizazhi të shkretë industrial.

The post Çifti francez bën plazh përballë zjarreve dramatike! appeared first on Gazeta Si.

Nga Gazeta ‘Si’- Kryeministri Edi Rama shprehu solidaritet me Francën dhe Spanjën, të cilat prej ditësh luftojnë me pasojat katastrofike të zjarreve.

Ai u shpreh se Shqipëria është gati të japë kontributin e saj modest në kuadër të Bashkëpunimit Europian të Mbrojtjes Civile.

“Dua t’ju përcjell shprehje solidariteti të gjithë kolegëve tuaj në Francë dhe Spanjë.

Ne e kemi bërë edhe në të shkuarën falë jush, dhe jemi gati ta bëjmë përsëri nëse na kërkohet të japim ndihmën tonë modeste në kuadër të bashkëpunimit europian të mbrojtjes civile dhe të përgjigjemi në raste se na kërkohet, siç jemi përgjigjur vjet dhe parvjet edhe më parë kur fqinjët tanë kanë qenë në hall të madh dhe siç na janë përgjigjur dhe miqtë europianë, kur ne kemi qenë në të njëjtin hall, sepse zjarri nuk njeh kufij, por dhe solidariteti i njerëzve që luftojnë kundër zjarreve nuk njeh kufij”, tha Rama.

Gjatë fjalës së tij, Rama u shpreh se Shqipëria është përgatitur për të përballuar sfidën që sjellin zjarret.

Ai theksoi se deri në fund të vitit, flotës së helikopterëve do t’i shtohen edhe tre helikopterë të rinj dhe se procedura për marrjen e tyre, tashmë ka përfunduar.

“Ky sezon do jetë një provë për atë çfarë jemi përgatitur. Kemi sot në dispozicion kapacitete teknologjie më të mëdha që kemi pasur ndonjëherë, me 5 helikopterë, të gatshëm, të cilët në çdo moment nevoje mund të bëhen gjashtë, sepse helikopterët operacionale janë 9, por kanë edhe misionet e tjera, si misionet e shpëtimit, si misionet për shëndetin.

Ndërkohë që kemi mbyllur procedurën për tre avionë, të cilët do të vijnë në fund të vitit dhe do jenë pronë e shtetit shqiptar. Gjithçka ka përfunduar si procedurë’, theksoi Rama.

Kreu i qeverisë tha se ka propozuar që punonjësit e Ministrisë së Mbrojtjes, që angazhohen në punën për shuarjen e zjarreve të shpërblehen menjëherë me një pagë ekstra, ndërsa u bëri thirrje të gjithë bashkive të veprojnë njësoj, edhe me forcat e tyre zjarrfikëse.

The post Spanja dhe Franca nën pushtetin e flakëve, Rama: Do të ndihmojmë nëse na kërkohet appeared first on Gazeta Si.

Nga Gazeta ‘Si’- Zjarret masive pyjore në jugperëndim të Francës dhe Spanjën qendrore kanë detyruar evakuimin e më shumë se 270 mijë personave, ndërsa autoritetet po përballen me përhapjen e shpejtë të flakëve të favorizuara nga temperaturat e larta dhe erërat e forta.

Ushtria franceze është angazhuar në operacionet e emergjencës, ndërsa qeveria spanjolle ka shpallur gjendjen e emergjencës kombëtare.

Megjithëse fluturimet drejt Bordeaux dhe Madridit vijojnë normalisht, autoritetet u kanë bërë thirrje turistëve të ndjekin udhëzimet e emergjencës.

Ministrja franceze për partneritete ndërkombëtare, Éléonore Caroit, deklaroi se shumica e rajoneve të Francës mbeten të sigurta dhe u kërkoi vizitorëve të mos anulojnë udhëtimet, por të informohen vazhdimisht për situatën.

Dhjetëra turistë kanë rrëfyer për BBC momentet dramatike të evakuimit. Ata përshkruajnë alarmet që i zgjuan në mes të natës, kolonat e makinave që lëviznin pranë flakëve gjigante dhe qindra persona që prisnin në plazhe apo në qendra strehimi me valixhet në duar.

Një prej tyre është 21-vjeçari Zac Morrison nga Londra, i cili ndodhej me familjen në gadishullin Cap Ferret. Ai tha se mori disa mesazhe emergjence gjatë natës që urdhëronin evakuimin e menjëhershëm.

“Ushtria franceze shkonte derë më derë. Ishte diçka si në një film, na u desh të merrnim gjithçka. Njerëz të tjerë kanë fjetur në shkolla dhe depo dhe në plazhe ka pasur njerëz që presin vetëm lejen”, i tha ai BBC.

Sipas tij, familja u largua nga një zonë e rrezikuar vetëm për t’u përballur me një tjetër vatër zjarri, ndërsa shumë të evakuuar kaluan natën në plazhe, shkolla dhe depo të improvizuara si strehimore.

Edhe David Morton nga Gloucestershire përjetoi të njëjtën situatë. Ai tregoi se brenda pak minutash familja e tij u detyrua të largohej nga kampingu në Cap Ferret, ndërsa gjatë rrugës iu afruan flakëve.

“Në telefonat tanë kishte një mesazh që thoshte se duhej të evakuoheshim menjëherë dhe të ngisnim makinën në të vetmen rrugë që dilte nga gadishulli”, tha ai.

Në komunën Biscarrosse, Rebecca Papin tha se pa aeroplanë zjarrfikës dhe helikopterë që luftonin flakët gjatë natës, por nuk mori urdhër evakuimi. Të nesërmen në mëngjes zbuloi se qyteti ishte zbrazur pothuajse plotësisht, ndërsa rrugët ishin bllokuar nga zjarri dhe hiri binte nga qielli si borë.

Shumë familje kanë vendosur të ndryshojnë destinacionet e pushimeve. Mark Dorey nga Leeds u evakuua nga një kamping pranë Parentis-en-Born së bashku me familjen dhe kaloi natën në një palestër me qindra persona të tjerë përpara se të zhvendosej në rajonin Dordogne për të vazhduar pushimet në një zonë më të sigurt.

The post Zjarret në Francë dhe Spanjë prekin turistë të shumtë: Ishte si film! appeared first on Gazeta Si.

Gazeta Si – Rozalinda Plaka, 24-vjeçarja që u mor peng nga ish-i fejuari i saj, Refit Buzi, i cili i vrau prindërit dhe më pas u vetëvra, ka dhënë dëshminë e saj para policisë lidhur me ngjarjen në Roskovec të Fierit.

Ajo ka rrëfyer fejesën me Buzin, arsyet e ndarjes dhe më pas ngjarjen tragjike të ndodhur ditën e premte. Sipas saj, jeta e çrregullt që bënte 35 vjeçari e kishte çuar në marrjen e vendimit për t’u ndarë.

“Në vitin 2020 kemi shpallur fejesën dhe kemi krijuar hyrje-dalje familjare. Lidhja jonë ka vazhduar deri në vitin 2024, kohë në të cilën unë kam kërkuar të ndahem nga ai, por Refiti nuk ka pranuar. Arsyeja ka qenë sepse ai kishte një jetë të çrregullt, nuk ishte i përqendruar te lidhja jonë, kishte qenë jashtë shtetit në burg dhe të gjitha këto nuk më përshtateshin mua”, – rrëfeu e reja.

Ajo tregoi se prindërit e saj nuk kishin qenë dakord që në fillim për lidhjen e saj me Buzin. Sa i takon ngjarjes tragjike, Rozalinda tregoi se kishte qenë duke fjetur kur kishte dëgjuar të shtënën me armë gjahu dhe se në momentin që kishte dalë jashtë dhomës, kishte parë babain e saj të shtrirë në tokë.

“Kam qenë duke fjetur gjumë në dhomën time, kurse prindërit e mi kanë qenë në dhomën e tyre. Kam dëgjuar zhurmë të fortë që më është dukur si krismë arme dhe kam dalë në korridor të shikoj se çfarë kishte ndodhur. Kur dola kam parë shtetasin Refit Buzi në korridor, me një armë të gjatë si ato të gjahut në dorë, si dhe kam parë babain tim Kosta Plaka të shtrirë përmbys te hyrja e dhomës, i mbuluar me gjak”,- shpjegon 24-vjeçarja.

E reja tha se kishte tentuar t’i merrte armën, por më pas autori e kishte nxjerrë me forcë nga banesa për ta çuar më pas në vendin ku e mbajti peng për disa orë.

“Unë i kam kapur armën dhe po e mbaja, por Refiti bërtiste: ‘Do t’ju vras të gjithëve’. Më shtyu dhe më qëlloi me grusht, theu derën e dhomës sime dhe aty jam plagosur me copa xhami në trup. Më mori me forcë e më hipi te makina. Momenti kur më mori me forcë nga shtëpia deri kur kam hipur në makinë nuk më kujtohet, sepse kam qenë shumë e tronditur”.

Gjatë negociatave me policinë, Rozalinda ka treguar se Buzi ishte zbathur pasi këpucët ia kishte dhënë asaj.

Sipas saj, gjatë negociatave prokurori e ka pyetur: “Vetëdorëzohu, pse je zbathur?”, ndërsa ai është përgjigjur: “I hoqa, ia dhashë… Ia dhashë asaj t’i veshë, se e mora zbathur”.

Policia po vijon me hetimet për të zbardhur rrethanat e plota të ngjarjes së rëndë të ndodhur në Roskovec të Fierit, ku 35 vjeçari vrau nënën dhe babain e ish-të fejuarës e më pas i dha fund jetës.

Prindërit e autorit pretendojnë se djali i tyre i kishte dërguar para ish-të fejuarës nga Anglia dhe se pas ndarjes, 24-vjeçarja nuk kishte pranuar t’ia kthente.

The post Ish-i fejuari i vrau prindërit, 24-vjeçarja rrëfen orët e pengmarrjes nga banesa në makinë appeared first on Gazeta Si.

Nga Gazeta ‘Si’- Pas një pritjeje 12-vjeçare, Mali Olimp, shtëpia mitike e perëndive të Greqisë së lashtë, është përfshirë zyrtarisht në Listën e Trashëgimisë Botërore të UNESCO-s.

Mali më i lartë i Greqisë u shpall pjesë e listës si një pasuri e përzier kulturore dhe natyrore, duke u vlerësuar njëkohësisht për rëndësinë e tij historike, mitologjike dhe biodiversitetin e jashtëzakonshëm.

Vendimi u mor gjatë mbledhjes së Komitetit të Trashëgimisë Botërore të UNESCO-s në Busan, Koreja e Jugut.

Një simbol i mitologjisë greke

Në mitologjinë greke, Mali Olimp konsiderohet vendi ku banonte Zeusi, mbreti i 12 perëndive olimpike. Me një lartësi prej 2.918 metrash, ai është mali më i lartë i Greqisë dhe prej vitit 2014 ishte në listën paraprake të vendeve të propozuara për statusin e UNESCO-s.

Kreu i delegacionit grek në UNESCO, Georgios Koumoutsakos, e cilësoi vendimin si një hap të rëndësishëm për mbrojtjen e malit.

“Ky vendim riafirmon angazhimin tonë për të mbrojtur Malin Olimp për brezat e sotëm dhe të ardhshëm. Siç na kujton mitologjia greke, është gjithmonë më mirë të jesh në marrëdhënie të mira me perënditë,” deklaroi ai.

Edhe kryebashkiaku i rajonit, Evangelos Geroliolios, tha se statusi i ri sjell një përgjegjësi edhe më të madhe për ruajtjen e mjedisit dhe biodiversitetit të zonës.

Çfarë përfiton Mali Olimp?

Përfshirja në Listën e Trashëgimisë Botërore u jep vendeve të përzgjedhura mbështetje ndërkombëtare për ruajtjen dhe menaxhimin e tyre.

UNESCO ofron asistencë teknike, këshillim dhe, në raste të caktuara, mbështetje financiare për mbrojtjen e monumenteve dhe peizazheve me vlerë universale.

Në këtë listë bëjnë pjesë edhe monumente të njohura si Akropoli i Athinës, Muri i Madh i Kinës, Piramidat e Gizës dhe Taj Mahali.

Edhe plazhet e zbarkimit në Normandi u futën në listë

Krahas Malit Olimp, UNESCO përfshiu në listë edhe plazhet e zbarkimit të Aleatëve në Normandi, ku më 6 qershor 1944 u zhvillua operacioni “D-Day”, një nga momentet vendimtare të Luftës së Dytë Botërore.

Në listë u përfshinë pesë plazhet historike – Omaha, Utah, Sword, Gold dhe Juno – si edhe shkëmbi Pointe du Hoc, ku zbarkuan mbi 150 mijë ushtarë aleatë. Rreth 4 mijë ushtarë humbën jetën gjatë operacionit që hapi rrugën për çlirimin e Evropës nga pushtimi nazist.

UNESCO e cilësoi këtë zonë një “peizazh kulturor të jashtëzakonshëm”, i formuar jo vetëm nga ngjarjet e vitit 1944, por edhe nga kujtesa historike që ato mbartin.

Trashëgimia botërore vazhdon të zgjerohet

Në të njëjtën mbledhje u miratuan edhe kandidatura të tjera, përfshirë kryeqytetet e lashta japoneze Asuka dhe Fujiwara, si edhe peizazhin Boma-Badingilo në Sudanin e Jugut, i cili u bë vendi i parë i këtij shteti afrikan që hyn në Listën e Trashëgimisë Botërore.

Pas vendimit unanim për Malin Olimp, autoritetet greke e cilësuan njohjen si një sukses historik, veçanërisht pasi drafti fillestar i UNESCO-s kishte lënë të kuptohej se kandidatura mund të shtyhej për shqyrtim të mëtejshëm.

Në vend të kësaj, mali legjendar mori mbështetjen e plotë të komitetit dhe u bë zyrtarisht pjesë e trashëgimisë me vlerë universale./ The Guardian

The post Shtëpia e perëndive greke hyn në UNESCO: Mali Olimp merr statusin e Trashëgimisë Botërore appeared first on Gazeta Si.

Gazeta Si – Gjykata e Tiranës vendosi t’u ndalojë daljen jashtë shtetit dy protestuesve të arrestuar, Orion Peçi dhe Artemisa Islamaj.

Gjyqtarja lë në fuqi kërkesën e prokurorisë. Mbi ta rëndojnë akuzat, kundërshtimi i forcave të policisë dhe prishja e qetësisë publike.

Peçi dhe Islamaj u arrestuan pas protestës së të premtes para Parlamentit, ku gjithashtu u proceduan në gjendje të lirë 30 persona të tjerë. Gjatë tubimit u dëmtuan 6 punonjës policie. Policia deklaroi se në një qese që mbante Islamaj u sekuestruan kapsolla. 

Ndërkohë, qindra qytetarë janë mbledhur mesditën e kësaj të hëne para komisariatit nr.1 në Tiranë duke kërkuar lirimin e protestuesve të arrestuar gjatë protestës së sotme para Kuvendit.

Me thirrjet “lironi shqipet”, qytetarët kërkuan që policia të mos mbante në qeli qytetarë të cilët sipas tyre nuk kanë bërë asnjë veprim të dhunshëm.

Mes të arrestuarve është edhe Arben Kola, njëri prej organizatorëve të protestës.

The post Gjykata vendos ndalimin për dalje jashtë shtetit për dy protestues të arrestuar appeared first on Gazeta Si.

Nga Gazeta ‘Si’- Në Itali, vendi që prej dekadash konsiderohej simbol i dietës mesdhetare, gjithnjë e më shumë fëmijë dhe adoleshentë po përballen me obezitetin.

Sipas Organizatës Botërore të Shëndetësisë (OBSH), fëmijët italianë janë ndër më mbipeshët në Europë, ndërsa situata është veçanërisht shqetësuese në jug të vendit.

Në disa zona të rajonit të Kampanias, mbi 40% e fëmijëve 8-9 vjeç janë mbipeshë ose obezë. Në periferi të Napolit, Ponticelli është kthyer në një nga zonat me normat më të larta të obezitetit infantil.

“Ha vazhdimisht”

Një prej tyre është 17-vjeçari Salvatore, i cili peshon 170 kilogramë dhe mezi ecën. Ai nuk mund të lidhë vetë lidhëset e këpucëve, ndërsa skuteri i tij Vespa nuk përballon peshën.

“Ha vazhdimisht,” thotë nëna e tij, Anna.

Salvatore pret t’i nënshtrohet një operacioni bariatrik në spitalin Betania në Ponticelli, por mjekët kanë vendosur se pesha e tij është aq e lartë sa ndërhyrja për momentin do të ishte shumë e rrezikshme.

Në vend të operacionit, atij i është përshkruar një injeksion për humbje peshe me GLP-1, që synon të ulë oreksin dhe ta ndihmojë të humbasë kilogramë përpara ndërhyrjes.

Pacientët po bëhen gjithnjë e më të rinj

Kirurgia Sonja Chiappetta, e cila prej 15 vitesh trajton pacientë me obezitet të rëndë, thotë se panorama ka ndryshuar ndjeshëm.

“Dikur shumica e pacientëve ishin rreth të pesëdhjetave. Sot po shoh të njëjtët pacientë kur janë vetëm 16 ose 17 vjeç. Kjo është e frikshme,” shprehet ajo.

Operacioni që kryhet në klinikën e saj heq deri në 90% të stomakut, duke kufizuar ndjeshëm sasinë e ushqimit që mund të konsumojë pacienti. Kërkesa për këtë ndërhyrje është rritur ndjeshëm në jug të Italisë.

Dieta mesdhetare nuk është më ajo që ishte

Italia u bë e famshme për dietën mesdhetare, të pasur me perime, bishtajore, vaj ulliri, drithëra integrale dhe peshk.

Megjithatë, sipas studiuesit Valter Longo nga Universiteti i Kalifornisë Jugore, sot vetëm rreth 10% e italianëve e ndjekin ende këtë regjim ushqimor.

Ai e përshkruan dietën moderne italiane me “pesë P-të”: Pizza, Pasta, Patata, Proteina, Pane (bukë).

Në supermarketet dhe piceritë italiane dominojnë ushqimet ultra të përpunuara, ndërsa picat shpesh shërbehen me patate të skuqura, salçiçe dhe produkte të skuqura.

Prindërit shpesh nuk e kuptojnë problemin

Pediatri Roberto Berni Canani thotë se shumë prindër nuk e kuptojnë se fëmijët e tyre janë mbipeshë.

“Vijnë për kollë, dhimbje barku apo probleme të tjera, por nuk e kuptojnë se pesha është shkaku kryesor,” shprehet ai.

Një prej pacienteve të tij është Francesca, 10 vjeç, e cila peshon 60 kilogramë. Ajo ha bukë me Nutella në mëngjes, ëmbëlsira gjatë ditës dhe makarona në drekë, ndërsa refuzon të hajë perime.

Prindërit e saj nuk e konsiderojnë peshën problem, pasi vajza merret me gjimnastikë artistike dhe kërcim.

Sipas mjekut, problemi nuk qëndron tek një vakt i vetëm, por tek modeli i të ushqyerit: ushqime me shumë kalori gjatë gjithë ditës, pije me sheqer dhe mungesa e frutave e perimeve.

Edhe kultura luan rol

Mësuesit në Napoli tregojnë se mentaliteti tradicional shpesh e bën më të vështirë ndërgjegjësimin.

“Nëse një fëmijë është pak topolak dhe me faqe të kuqe, shumë njerëz mendojnë se është i shëndetshëm,” thotë mësuesja Francesca Pecce.

Shkollat po përpiqen të ndryshojnë këtë perceptim përmes programeve të edukimit ushqimor. Mbi 17 mijë nxënës në 25 shkolla do të marrin pjesë në kurse për ushqyerjen e shëndetshme, ndërsa edhe familjet do të përfshihen në këtë proces.

Megjithatë, jo të gjithë besojnë se informacioni mjafton.

“Shokët e mi e dinë çfarë është e shëndetshme. Thjesht nuk u intereson,” thotë një 18-vjeçar nga Napoli.

Italia e njeh obezitetin si sëmundje kronike

Në vitin 2025, Italia u bë vendi i parë në botë që miratoi një ligj kombëtar që e njeh obezitetin si sëmundje kronike, progresive dhe me rikthim, duke e konsideruar rezultat jo vetëm të zakoneve individuale, por edhe të faktorëve biologjikë, socialë dhe mjedisorë.

Rajoni i Kampanias po teston masa të reja për të frenuar fenomenin, përfshirë edhe një studim mbi një dietë që imiton agjërimin. Në të do të marrin pjesë 300 adoleshentë mbipeshë, të cilët do të ndjekin periodikisht një regjim shumë të kufizuar kalorik për të nxitur një “rivendosje metabolike”.

Megjithatë, jo të gjithë specialistët janë dakord me këtë qasje.

Pediatri Berni Canani paralajmëron se kufizimet e forta ushqimore tek adoleshentët mund të rrisin rrezikun e çrregullimeve të të ngrënit, anoreksisë dhe problemeve me perceptimin e trupit.

Ndërkohë, Salvatore shpreson që të humbasë mjaftueshëm peshë për t’iu nënshtruar operacionit dhe të mund të veshë për herë të parë pas shumë vitesh një kostum banje pa u ndjerë në siklet. Historia e tij pasqyron sfidën me të cilën po përballet një brez i tërë fëmijësh italianë, gjithnjë e më larg dietës mesdhetare që dikur e bëri vendin të famshëm./ BBC

The post Pica, makarona, patate, proteina- Si u bënë fëmijët italianë kaq mbipeshë appeared first on Gazeta Si.

Gazeta Si – Mëngjesin e kësaj të hëne, (27 korrik 2026), Andrea Pirlo njoftoi se nuk ishte më “kandidat për postin e trajnerit” të kombëtares italiane të futbollit.

Prej ditësh, mediat kryesore dhe gazetarët sportivë e kishin konsideruar emërimin e tij si trajneri i ardhshëm i Italisë si pothuajse të sigurt, edhe pse ende nuk ishte konfirmuar zyrtarisht.

Megjithatë, që nga e shtuna, kishte pasur diskutime të shumta lidhur me marrëveshjen e sponsorizimit të Pirlos me “Fonbet”, një kompani ruse bastesh sportive.

Në një mesazh të postuar në Instagram, Pirlo la të kuptohej se kjo ishte arsyeja pse nuk do ta merrte drejtimin e kombëtares.

Pirlo, 47 vjeç, ka qenë një lojtar i nivelit botëror – përfshirë edhe në kombëtare – por ende nuk ka arritur rezultate të rëndësishme si trajner.

Ai u përball me kritika jo thjesht për promovimin e një marke bastesh – një praktikë e zakonshme në futboll – por konkretisht për promovimin e një kompanie ruse. Pirlo shërben si “ambasador global” për “Fonbet”, agjencinë kryesore ruse të basteve.

Sipas mediave italiane, mes aksionerëve kryesorë të kompanisë, është Sergey Lomakin, një oligark rus, i cili është gjithashtu president dhe pronar i “United FC” – ekipi i ligës së Emirateve të Bashkuara Arabe që Pirlo ka drejtuar që nga sezoni i kaluar.

Në një postim në Instagram dhe pa e përmendur shprehimisht Lomakinin, Pirlo deklaroi: “Partneriteti profesional që qëndron në qendër të polemikave të fundit lindi gjatë punës sime në Emiratet e Bashkuara Arabe dhe është i natyrës thjesht tregtare dhe sportive”.

Në fund të muajit maj, Pirlo vizitoi Moskën së bashku me ish-futbollistin Marco Materazzi për të ndjekur finalen e Kupës së Rusisë dhe për të marrë pjesë në një ditë festimesh e ndeshjesh miqësore të organizuara nga “Fonbet”.

Dyshja pozoi për foto zyrtare, bëri “selfie” dhe dha autografe – e gjitha kjo ndërkohë që Rusia po kryente një nga fushatat më të rënda të bombardimeve ndaj Kievit që nga fillimi i luftës.

Pirlo dhe Materazzi u përballën me kritika për pjesëmarrjen në këtë aktivitet, i cili përfshinte gjithashtu një performancë të këngëtarit Shaman, një mbështetës i hapur i pushtimit të Ukrainës.

“Fonbet” njihet për lidhjet e tij me regjimin rus të udhëhequr nga presidenti Vladimir Putin; pas pushtimit rus të Ukrainës, klubet evropiane të futbollit që kishin marrëdhënie biznesi me kompaninë – përfshirë AC Milan – i ndërprenë ato lidhje.

Pirlo ishte mesfushori më i mirë italian i dekadave të fundit; ai luajti për vite me radhë te Milani dhe Juventusi, duke fituar çdo trofe të rëndësishëm, përfshirë Kupën e Botës të vitit 2006 me kombëtaren.

Ai e nisi karrierën si trajner te Juventusi në vitin 2020, por qëndroi vetëm një sezon – i pari pas nëntë vitesh që klubi i tij i dikurshëm nuk arriti të fitonte titullin kampion.

Pas shkarkimit, ai drejtoi skuadrën turke Fatih Karagümrük, më pas Sampdorian në Serinë B (ku gjithashtu u shkarkua) dhe së fundmi United FC në divizionin e dytë të Emirateve të Bashkuara Arabe.

Megjithatë, emërimi i mundshëm i Pirlos – i mbështetur kryesisht nga drejtori teknik Paolo Maldini – kishte ngjallur kritika të shumta.

Vetë Maldini ishte emëruar në fillim të korrikut nga Giovanni Malagò, i cili kishte marrë detyrën në fund të qershorit si presidenti i ri i FIGC-së, federatës që drejton futbollin italian dhe rrjedhimisht, kombëtaren.

Përvoja e tij si trajner është e kufizuar dhe kryesisht e pasuksesshme; megjithatë, kombëtarja – e cila sapo kishte humbur mundësinë për t’u kualifikuar në Kupën e Botës për herë të tretë radhazi – ka nevojë për një ristrukturim rrënjësor dhe për një lloj udhëheqjeje që është vërtet vizionare dhe e aftë.

The post ‘Bastet ruse’, Andrea Pirlo nuk do jetë trajneri i kombëtares italiane appeared first on Gazeta Si.

Nga Gazeta ‘Si’- Ndërsa Franca dhe Spanja po përballen me disa nga zjarret më të mëdha të viteve të fundit, ekspertët kanë ngritur alarmin për një fenomen të rrallë dhe tejet të rrezikshëm që mund t’i përkeqësojë edhe më shumë flakët: pyrocumulonimbus, të njohura edhe si “retë e zjarrit”.

Këto re krijohen nga vetë zjarret dhe janë forma më ekstreme e reve të gjeneruara nga flakët, duke krijuar sisteme moti që mund të ushqejnë më tej përhapjen e tyre.

Çfarë janë “retë e zjarrit”?

Pyrocumulonimbus (PyroCb) janë re gjigante stuhish që formohen si pasojë e një zjarri shumë të madh.

Zjarret intensive çlirojnë sasi të mëdha nxehtësie dhe energjie, duke krijuar kolona tymi që ngrihen me shpejtësi në atmosferë. Kur kjo masë ajri arrin lartësi të mëdha, presioni i ulët atmosferik e ftoh atë dhe lagështia kondensohet, duke formuar re.

Nëse zjarri është mjaftueshëm i fuqishëm, këto re mund të shndërrohen në pyrocumulonimbus, të cilat arrijnë deri në 10-15 kilometra lartësi, duke depërtuar edhe në stratosferë. NASA i ka përshkruar ato si “dragoi i reve që nxjerr zjarr”.

Sipas Rick McRae, profesor në Universitetin e Uellsit të Ri Jugor në Australi, këto janë “stuhi të plota që krijohen brenda kolonës së tymit të zjarrit” dhe ndikojnë në një vëllim të jashtëzakonshëm të atmosferës.

Pse janë kaq të rrezikshme?

Formimi i këtyre reve mund të krijojë erëra shumë të forta, të cilat përshpejtojnë përhapjen e zjarreve.

Përveç kësaj, ato mund të prodhojnë edhe rrufe, të cilat mund të ndezin vatra të reja zjarri shumë kilometra larg.

Sipas ekspertëve, kjo e bën sjelljen e flakëve shumë më të paparashikueshme dhe rrit ndjeshëm rrezikun për ekipet zjarrfikëse.

“Vetë prania e kësaj reje është një tregues se zjarri është jashtëzakonisht i rrezikshëm dhe se evakuimi i popullsisë është plotësisht i justifikuar”, thotë McRae.

Sa të zakonshme janë?

Fenomeni u vu re fillimisht në Australi në fillim të viteve 2000 dhe studiuesit besojnë se po bëhet gjithnjë e më i shpeshtë.

Retë pyrocumulonimbus janë formuar edhe gjatë zjarreve masive në Kaliforni në vitin 2022.

Në Francë, nëse konfirmohet, do të ishte hera e parë që regjistrohet një fenomen i tillë.

Pse po shfaqen më shpesh?

Ekspertët lidhin shtimin e këtyre reve me ndryshimet klimatike, të cilat po krijojnë kushte gjithnjë e më të favorshme për zjarret ekstreme.

“Nuk bëhet fjalë vetëm për rritjen e temperaturave. Ndryshimet klimatike po ndryshojnë atmosferën, kushtet meteorologjike dhe shumë procese të tjera”, shpjegon McRae.

Modelet klimatike tregojnë se këto fenomene pritet të bëhen edhe më të shpeshta dhe më intensive në të ardhmen.

Zjarret aktuale në Evropë po ndodhin në kulmin e sezonit turistik, pas valëve të njëpasnjëshme të të nxehtit dhe mungesës së reshjeve që prej muajit maj, çka ka tharë ndjeshëm sipërfaqet pyjore.

Meteorologët paralajmërojnë se një tjetër valë e fortë të nxehti mund të godasë Francën gjatë kësaj jave, me temperatura që në disa zona mund të arrijnë deri në 40°C, duke rritur edhe më tej rrezikun për zjarre dhe formimin e “reve të zjarrit”./ The Guardian

The post Çfarë është një ‘re zjarri’ dhe si i kanë përkeqësuar ato zjarret në Europë? appeared first on Gazeta Si.

Nga Gazeta ‘Si’- Parlamenti i Shqipërisë miratoi mëngjesin e kësaj të hëne, me 75 vota pro, kalimin me procedurë të përshpejtuar të marrëveshjes së huasë ndërmjet Shqipërisë dhe Shteteve të Bashkuara të Amerikës, në kuadër të Financimit të Jashtëm Ushtarak (FMF).

Marrëveshja, e sjellë nga qeveria të premten, parashikon një hua në shumën 302 milionë dollarë amerikanë, e cila do të përdoret për nevojat e Forcave të Armatosura dhe forcimin e kapaciteteve mbrojtëse të vendit.

Në nisje të seancës plenare, kryetari i Kuvendit, Niko Peleshi, njoftoi për futjen e marrëveshjes në rendin e ditës për miratim me procedurë të përshpejtuar.

“Në rendin e ditës është miratimi, në parim, i marrëveshjes së huas direkte ndërmjet Republikës së Shqipërisë, përfaqësuar nga Ministria e Financave, dhe Shteteve të Bashkuara të Amerikës, përfaqësuar nga Agjencia e Bashkëpunimit për Sigurinë e Mbrojtjes (DSCA), në kuadër të Financimit të Jashtëm Ushtarak (FMF), me një hua në shumën totale prej 302,000,000 (treqind e dy milionë) dollarësh amerikanë”, tha Peleshi.

Sipas tij, çdo deputet që dëshiron të njihet me deklaratën e konfidencialitetit të marrëveshjes duhet fillimisht ta firmosë atë dhe më pas mund të ketë akses në përmbajtjen e saj.

Gjatë prezantimit të marrëveshjes në Kuvend, kreu i Grupit Parlamentar të Partisë Socialiste, Taulant Balla, tha se huaja prej 302 milionë dollarësh përbën një hap të rëndësishëm për forcimin e kapaciteteve mbrojtëse të Shqipërisë dhe përforcon partneritetin strategjik me SHBA-në.

“Shqipëria shihet sot si një aleate e besueshme dhe një faktor stabiliteti në rajon. Sot vjen një marrëveshje për ratifikim me një vlerë prej 302 milionë dollarësh, kjo shumë do të përdoret për Forcat e Armatosura. Është edhe garancia që jep kjo marrëveshje. Kredia ka një afat deri në 12 vjet për t’u shlyer. Financimi do të disbursohet gradualisht për nevoja konkrete”, tha Balla.

Pas tij, fjalën e mori kreu i Grupit Parlamentar të Partisë Demokratike, Gazment Bardhi, i cili kritikoi mënyrën e procedimit të marrëveshjes, duke pretenduar se deputetët nuk janë njohur paraprakisht me përmbajtjen e saj.

“Na keni ftuar të diskutojmë për një marrëveshje për të cilën na njoftuat tani që mund ta marrim. Ndërkohë rregullorja të detyron t’ia shpërndash deputetëve. Mendoni se Kuvendin do ta shndërroni si grupin tuaj parlamentar, ku Rama ju ka thënë se jeni vetëm kartona, nuk duhet të mendoni, por vetëm të votoni. Kjo s’mund të jetë rregull për Kuvendin, aq më tepër për opozitën”, tha Bardhi.

Ai deklaroi se opozita e mbështet marrëveshjen në parim, por kritikoi qeverinë për vonesat, sipas tij, në përmbushjen e detyrimeve ndaj NATO-s.

“Jemi pro marrëveshjes që rrit investimet në fushën e sigurisë dhe përmbush detyrimet e vendit tonë ndaj NATO-s. Do ta votonim pro marrëveshjen, por ju në vend të NATO-s dhe partneritetit me SHBA zgjodhët inceneratorët. Nuk do të kishim nevojë të merrnim një hua të tillë”, tha Bardhi.

Ai propozoi që marrëveshja të shqyrtohej fillimisht në komisionet parlamentare dhe më pas të votohej në një seancë tjetër.

Pas njoftimit në sallën e Kuvendit, marrëveshja pritet të kalojë për shqyrtim në komisionet parlamentare, ndërsa deputetët do të rikthehen në një seancë të dytë plenare, të planifikuar në orën 15:00.

Marrëveshja

Më 19 qershor, Këshilli i Ministrave miratoi në parim marrëveshjen e huas me vlerë 302 milionë dollarë, e cila do të nënshkruhet ndërmjet Ministrisë së Financave të Shqipërisë dhe Agjencisë Amerikane për Bashkëpunimin në Sigurinë e Mbrojtjes (DSCA).

Sipas vendimit të qeverisë, fondet do të përdoren për projekte që synojnë forcimin e kapaciteteve mbrojtëse dhe përshpejtimin e modernizimit të Forcave të Armatosura.

Miratimi i marrëveshjes erdhi pak ditë pasi ministri i Mbrojtjes, Ermal Nufi, zhvilloi një vizitë zyrtare në Washington, ku u takua me drejtoreshën në detyrë të DSCA-së, Mary Beth Morgan.

“Në vizitën time në Washington u takova me Mary Beth Morgan, me të cilën diskutuam avancimin e projekteve me interes të përbashkët. Partneriteti ynë strategjik me Shtetet e Bashkuara mbetet një shtyllë kyçe për modernizimin e Forcave të Armatosura shqiptare, forcimin e kapaciteteve mbrojtëse dhe rritjen e kontributit të vendit tonë në NATO”, pati deklaruar ministri Nufi.

Megjithëse nuk janë bërë ende publike detaje mbi sistemet apo pajisjet që do të financohen përmes kësaj huaje, marrëveshja konsiderohet një hap i rëndësishëm në përmbushjen e objektivave të NATO-s për rritjen e kapaciteteve ushtarake të Shqipërisë.

The post Parlamenti kalon me procedurë të përshpejtuar huanë 302 milionë dollarë nga SHBA appeared first on Gazeta Si.

Gazeta Si – Një sherr masiv është regjistruar në orët e vona të mbrëmjes të së dielës në zonën e pedonales, në plazhin e Durrësit.

Sipas informacioneve paraprake, tre të rinj kanë mbetur të plagosur me thikë pas një konflikti të çastit me dy persona të tjerë.

Të plagosurit janë identifikuar si F.B., 19 vjeç, L.C., 20 vjeç dhe U.C., 18 vjeç. Dy prej tyre, 18 dhe 20 vjeç, ndodhen nën kujdesin e mjekëve, ndërsa i treti ka marrë lëndime të lehta dhe nuk ka pasur nevojë për asistencë mjekësore.

Sipas policisë, të tre ndodhen jashtë rrezikut për jetën. Nga hetimet paraprake rezulton se konflikti ka ndodhur mes tre të rinjve dhe shtetasit L.Ç., 19 vjeç, si edhe një 15-vjeçari, të dy të dyshuar si autorë të plagosjes.

Policia vijon kontrollet për kapjen e autorëve të dyshuar, ndërsa grupi hetimor, nën drejtimin e Prokurorisë, po punon për dokumentimin e plotë të rrethanave të ngjarjes dhe identifikimin e autorit tjetër të përfshirë.

The post Durrës, plagosen tre të rinj pas një konflikti me thika appeared first on Gazeta Si.

Gazeta Si – Të paktën tre persona u vranë me armë zjarri dhe disa të tjerë mbetën të plagosur gjatë një festivali në qendër të Seattle-it, në Shtetet e Bashkuara të Amerikës.

Kryetarja e bashkisë, Katie Wilson, deklaroi se një person është arrestuar (fillimisht ajo kishte raportuar dy arrestime).

Policia bëri të ditur se po kërkon edhe një individ tjetër; ata shtuan se po përpiqen ende të përcaktojnë saktësisht se çfarë ndodhi, por dyshojnë se dy individët kanë qëlluar ndaj njëri-tjetrit.

Të shtënat ndodhën pasditen e vonë të së dielës (në orët e vona drejt së hënës, sipas orës shqiptare) në “Seattle Center” – një hapësirë ​​e madhe publike në qendër të qytetit – gjatë festivalit të ushqimit “Bite of Seattle”.

Të pranishëm ishin mijëra njerëz. Ekipet e urgjencës mbërritën pas orës 18:00, pas njoftimeve për të shtëna; ata u përpoqën të reanimonin dy persona, por të dy u shpallën të vdekur në vendngjarje.

Të plagosurit u dërguan në spital; njëri prej tyre u shtrua në gjendje të rëndë dhe më pas ndërroi jetë.

The post Të paktën 3 persona vriten me armë zjarri në një festival në Seattle appeared first on Gazeta Si.

Gazeta Si – Një fillim i papritur sëmundjeje – që përfshinte marramendje ose ndonjë gjendje tjetër të përgjithshme të keqe – preku pothuajse të gjithë ekuipazhin, duke detyruar një ulje emergjente.

Kjo ndodhi të shtunën, më 25 korrik, në bordin e fluturimit transatlantik AA719, i cili ishte nisur nga Aeroporti i Romës Fiumicino me destinacion Aeroportin Ndërkombëtar të Filadelfias në Pensilvani.

Faqe të ndryshme interneti për aviacion dhe udhëtime, përfshirë “Simple Flying”, raportuan incidentin, duke vënë në dukje se Boeing 787-9 “Dreamliner” i “American Airlines” u devijua në Dublin të Irlandës për t’u ofruar ndihmë asistentëve të prekur.

Avioni kishte fluturuar në ajër për rreth tre orë – rreth orës 12:40 të mesditës – kur pilotët vendosën papritur të devijonin në Dublin, duke raportuar një emergjencë mjekësore të paspecifikuar në bord tek kontrolli i trafikut ajror.

Sipas njoftimeve, gjashtë nga nëntë asistentët e fluturimit në detyrë në bordin e 787 u ankuan se nuk ndiheshin mirë, duke shfaqur simptoma të ndryshme.

Në një deklaratë për “Simple Flying”, linja ajrore përmendi një “erë të pakëndshme në bord” dhe konfirmoi se paramedikët takuan avionin pas uljes. Gjithashtu, thuhet se u ekzaminua edhe një pasagjer.

Avioni u ul i sigurt në pistën 28L të Dublinit, rreth gjashtë orë pas nisjes nga Roma dhe u prit në portën e zbritjes nga ekipet mjekësore të urgjencës.

“American Airlines” deklaroi se në bord ndodheshin gjithsej 12 anëtarë të ekuipazhit (nëntë stjuardë dhe tre pilotë) dhe 281 pasagjerë; pasagjerëve iu ofrua akomodim për natën dhe më pas u rirezervuan në fluturime të ndryshme për ditën pasuese.

Megjithatë, faqja e lajmeve të aviacionit “Simple Flying” sugjeron se sëmundja e ekuipazhit mund të ketë ardhur si pasojë e një problemi teknik specifik për këtë model avioni.

Modeli 787 Dreamliner përdor kompresorë elektrikë për të marrë ajër nga jashtë përmes hyrjeve të dedikuara dhe sipas raportimeve, incidentet që përfshijnë emetimin e tymrave apo gazrave janë dukuri e zakonshme.

Mundësi të tjera përfshijnë defektet elektrike, keqfunksionimet e pajisjeve në bord ose derdhjet e lëndëve kimike gjatë proceseve të pastrimit.

The post Anëtarët e ekuipazhit sëmuren, fluturimi drejt SHBA-ve devijohet në Dublin appeared first on Gazeta Si.

Gazeta Si – Në kuadër të një hetimi të koordinuar nga Drejtoria e Qarkut Antimafia të Brescias, policë të njësive të Guardia di Finanza në Brescia – konkretisht Komanda Operacionale Ajrore-Detare dhe SCICO – bashkëpunuan me autoritetet spanjolle dhe portugeze për të kapur në Oqeanin Atlantik një mjet lundrues të shpejtësisë së lartë (tip “go-fast”), të pajisur me trup të ngurtë dhe anë pneumatike (RHIB), si dhe për të sekuestruar mbi 2,6 tonë kokainë.

Gjatë operacionit u arrestuan katër persona që ndodheshin në bord: dy spanjollë, një shtetas nga Gjibraltari dhe një shtetas shqiptar (ky i fundit me vendbanim në Mantua dhe banesë në provincën e Brescias). Mjeti lundrues u kap pranë brigjeve të Lisbonës nga Policia Detare Portugeze.

Objektivi u monitorua vazhdimisht përmes mjeteve ajrore të trupës – të pajisura me teknologji të avancuar të mbikëqyrjes detare – të cilat ishin dislokuar në Gadishullin Iberik në kuadër të operacioneve të Bashkimit Evropian për kontrollin e kufijve të jashtëm.

Ngarkesa e sekuestruar ka një vlerë të vlerësuar në tregun me shumicë prej rreth 78 milionë eurosh; nëse do të kishte mbërritur në destinacion, ajo do të kishte gjeneruar një vlerë totale tregu prej rreth 500 milionë eurosh.

Hetimet konfirmuan se grupet e krimit të organizuar përdorin mjete lundruese të shpejtësisë së lartë (“go-fast”) me gjatësi nga 10 deri në 16 metra, të pajisura me disa motorë të jashtëm me fuqi të lartë, të afta për të arritur shpejtësi që tejkalojnë 70 nyje (milje detare në orë).

The post Kapen 2.6 tonë kokainë pranë brigjeve të Lisbonës, mes të arrestuarve një shqiptar appeared first on Gazeta Si.

Gazeta Si – Greva e punonjësve grekë ka pezulluar punën në katër pikat kufitare me Shqipërinë. Departamenti i Policisë Kufitare dhe Migracionit njofton se në pikën doganore të Kakavijës dhe Tre Urat në Përmet ka ndërprerë lëvizjen e automjeteve në të dy krahët, që ka nisur prej orës 07:00 dhe do të zgjasë deri në 11:00 me orën shqiptare.

Ndërsa në dy pikat e tjera kufitare, atë të Kapshticës dhe në Qafë-Botë pezullimi i hyrje daljeve nisi prej orës 05:00 të mëngjesit dhe zgjati deri në orën 09:00. Njoftohet se në Kapshticë ka rifilluar lëvizja e automjeteve.

Dhjetëra automjete të vogla, autobusë dhe kamionë kishin krijuar radhë në anën shqiptare në pritje të hapjes së pikës kufitare greke. Menjëherë pas rifillimit të lëvizjes, autoritetet nisën nga puna ndërsa radha vijon të jetë e gjatë për shkak të fluksit të krijuar gjatë orëve të pezullimit.

Pas përfundimit të grevës, lëvizja në pikën kufitare ka rifilluar me përparësi mjetet e vogla dhe autobusët.

The post Greva në Greqi, pezullohet puna për 4 orë në pikat kufitare me Shqipërinë! Rinis lëvizja në Kapshticë appeared first on Gazeta Si.

Nga Gazeta ‘Si’- Kreu i Partisë Mundësia, Agron Shehaj, u rikthye në foltoren e Kuvendit pas një muaji mungesë, pas vendimit të Byrosë së Kuvendit ndaj tij, duke e cilësuar si “skandal” ndalimin e hyrjes së tij në seancën e kaluar.

Në fjalën e tij, Shehaj akuzoi mazhorancën se po e trajton Kuvendin si pronë të saj dhe se Rregullorja po zbatohet në mënyrë arbitrare.

“Ajo që ndodhi herën e kaluar ishte një skandal i vërtetë. Në mënyrë arbitrare ndalohet hyrja e një deputeti të opozitës në sallë. E dija që nuk do të mund të hyja në Kuvendin e korrupsionit dhe të atyre që prej 35 vitesh ua kanë nxirë jetën qytetarëve, por doja që të gjithë ta shihnin se si silleni ju dhe çfarë bëni me Rregulloren. E trajtoni Kuvendin sikur të ishte pronë e juaja”, tha ai.

Shehaj u ndal edhe te mbledhja e zgjeruar e grupit parlamentar të Partisë Socialiste, duke e cilësuar atë si një zhvillim “patetik” dhe duke sulmuar drejtpërdrejt kryeministrin Edi Rama.

“Nuk më lejuat të hyja në sallë sepse këtu do të vinte Rama. Ai nuk mund të përfundonte në radhën e fundit si një njeri i lodhur, ndërkohë që qytetarët prej dy muajsh kanë dalë në protestë duke kërkuar dorëheqjen e tij. U plak brenda ditës”, deklaroi Shehaj.

Sipas tij, kryeministri shmang përballjen me opozitën dhe zgjedh t’u drejtohet vetëm deputetëve të mazhorancës.

“Rama nuk përballet me opozitën, por mbledh partinë dhe praktikisht u flet vetëm juve. Ky është skandali”, u shpreh ai.

Duke iu referuar atmosferës në mbledhjen e socialistëve, Shehaj tha se deputetët e PS-së qëndronin “me kokën ulur”, ndërsa akuzoi kryeministrin për tallje me një qytetare me aftësi ndryshe.

“Ishit të gjithë me kokën poshtë. Në mënyrë të pafytyrë u tall me një zonjë të pamundur. Taulant Balla zgërdhihej, ndërsa Rama e imitonte atë me paturpësi. Pse të mos protestojë ajo?”, deklaroi Shehaj.

The post Shehaj rikthehet në Kuvend me akuza ndaj Ramës appeared first on Gazeta Si.

Me nisjen e pushimeve verore, kompania “Baltic Travel” ka konstatuar se shumë familje dhe çifte që po planifikojnë udhëtimet e tyre po zgjedhin gjithnjë e më shumë pushime me kohë më të shkurtër fluturimi brenda Europës, të mbështetur edhe nga një raport i ri që tregon se vizitorët britanikë po orientohen drejt destinacioneve më afër vendit të tyre, shkruan media britanike “Business Insider”.

Kërkimet e fundit tregojnë se të gjitha destinacionet ndërkombëtare më në trend, të kërkuara nga vizitorëve britanikë, janë europiane, duke reflektuar një ndryshim në sjelljen e turistëve, të cilët duan udhëtime më të shkurtra, përvoja më autentike dhe kulturore, si dhe vende ku mund të mos kenë qenë më parë.

Ndryshimi i zakoneve të udhëtimit ndikon në rezervimet e pushimeve verore 2026

Ndërsa tendenca e përgjithshme tregon një rritje të kërkesës për pushime brenda Europës, një tjetër gjetje e rëndësishme është se rritja më e madhe po vihet re në destinacione në zhvillim ose vende më pak tradicionale, pasi gjithnjë e më shumë turistë po kërkojnë pushime, shpesh larg resorteve me sistem “all-inclusive”.

Të dhënat tregojnë se, kërkimet për paketa pushimesh në Kroaci janë rritur me 273% krahasuar me një vit më parë.

Ndërsa kërkimet për pushime në Shqipëri janë rritur me 92%.

Të dyja vendet kanë regjistruar ndër kërkesat më të larta nga turistët dhe, në mënyrë interesante, të dyja njihen për peizazhet natyrore, vijat bregdetare të bukura dhe aktivitetet e ndryshme, si ecjet malore dhe sportet ujore.

Për pushuesit britanikë, koha më e shkurtër e fluturimit ka ndikuar gjithashtu në tërheqjen ndaj këtyre destinacioneve, pasi vizitorët kanë më shumë fleksibilitet për të rezervuar pushime të shkurtra në fundjavë ose pushime njëjavore.

Destinacionet e njohura europiane si Italia, Portugalia dhe Spanja kanë vazhduar të kenë rezultate të mira, por specialistët e udhëtimeve kanë vënë re se shumë pushues po kërkojnë gjithnjë e më shumë të eksplorojnë zona më pak të njohura.

Pse turistët britanikë po kërkojnë destinacione të reja pushimi?

Bregdeti Adriatik i Kroacisë po shndërrohet me shpejtësi në një nga destinacionet më të kërkuara të pushimeve në Europë, falë ujërave të kristalta, qyteteve historike, fshatrave të vegjël plot hijeshi dhe mundësisë për të vizituar disa ishuj gjatë të njëjtit udhëtim.

Në të njëjtën kohë, Riviera Shqiptare ka ndërtuar gradualisht një reputacion gjatë viteve të fundit, falë plazheve té saj të pastra, vargmalet mahnitëse dhe raportin e shkëlqyer cilësi–çmim. 

Një element i përbashkët është se të dyja vendet ofrojnë një alternativë ndaj disa prej resorteve më të mbipopulluara të Mesdheut.

“Po shohim një interes të jashtëzakonshëm nga turistët, që duan më shumë nga pushimet e tyre dhe që kërkojnë peizazhe të jashtëzakonshme dhe mot të ngrohtë brenda një kohe relativisht të shkurtër udhëtimi”, tha drejtoresha ekzekutive e “Baltic Travel”, Birthe Nielsen.

“Shumë prej tyre duan përvoja, jo vetëm diell, qoftë duke shijuar plazhe më të qeta me fëmijët e tyre, duke bërë ecje nëpër qafa malore dhe lugina, apo duke kaluar pushimet duke vizituar butikë, kafene dhe tregje në qytete të vjetra historike”, shtoi ajo.

Nuk është surprizë që Kroacia dhe Shqipëria janë bërë shumë më të njohura, pasi janë vende lehtësisht të arritshme nga Britania e Madhe, por që ofrojnë diçka ndryshe nga ajo që është zakonshme!”

Pritshmëri për ndryshime të vazhdueshme në prioritetet e turistëve

Në të gjithë sektorin e turizmit, kërkesa për pushime me distanca të shkurtra, ka ardhur duke u rritur vazhdimisht, pasi turistët po kërkojnë gjithnjë e më shumë, komoditet krahas përvojave autentike të udhëtimit. 

The post ‘Business Insider’: Shqipëria pushton interesin e turistëve britanikë: Kërkesat për pushime rriten me 92% appeared first on Gazeta Si.