Nëse konfirmohet, ky do të ishte një hap i mëtejshëm në përshkallëzimin e sfidës ushtarake të Kremlinit: një garë drejt hapësirës që, ndryshe nga ajo e viteve ’60, nuk ka të bëjë me eksplorimin, por me dominimin ushtarak përtej atmosferës së Tokës. Jo rastësisht, edhe NATO që prej vitit 2019 ka miratuar një “strategji hapësinore”, duke e konsideruar hapësirën një fushë të re të konfliktit. Kontrolli i Tokës nga lart do të thotë avantazh strategjik.

Sipas raportit të inteligjencës perëndimore, skenari parashikon lëshimin në orbitë të satelitëve të vegjël, të aftë për të shpërndarë mikroprojektilë vetëm disa milimetra të mëdhenj, praktikisht të padukshëm për sistemet aktuale të mbikëqyrjes. Modeli krahasohet me dronët që mbajnë brenda tyre dronë më të vegjël, të cilët lëshohen në momentin e duhur. Analistët, megjithatë, mbeten skeptikë për kontrollin e trajektores së këtyre mbetjeve, të cilat mund të përplasen pa dallim me satelitë të tjerë.

Rusia ka zhvilluar edhe më parë programe raketore për të goditur objekte në hapësirë, ndaj nuk përjashtohet që një studim i tillë të jetë realisht në zhvillim. Por për momentin, dyshimet mbi efektivitetin e kësaj arme mbeten të mëdha. Ajo që duket e qartë është se fronti i ri i luftës është zhvendosur shumë lart, mes yjeve./kb

Një punonjës i kompanisë ajrore “Air Albania” ka denoncuar së fundmi, atë që tashmë po shihet hapur si rrëshqitja e kompanisë drejt falimentimit.

Sipas tij, situata financiare është jashtë kontrollit dhe pasojat më të rënda po i vuajnë punonjësit dhe qytetarët.

Punonjësi bën me dije se stafi i Air Albania ka rreth katër muaj pa marrë paga, ndërsa sigurimet shoqërore nuk janë paguar prej më shumë se një viti e gjysmë. Ai thotë se kjo gjendje ka krijuar pasiguri të plotë për qindra familje që varen nga kjo punë.

Sipas informacionit të dhënë, disa nga avionët e kompanisë janë tërhequr ose sekuestruar nga kompanitë pronare për shkak të qirave mujore të papaguara. Një avion tjetër i marrë me qira nga një kompani bullgare ka mbetur përkohësisht në përdorim, por edhe atij i është hequr licenca e operimit pasi nuk plotësonte kushtet minimale të kërkuara nga Autoriteti i Aviacionit Civil.

Pavarësisht këtij realiteti, Air Albania vijon të shesë bileta online, ndërkohë që fluturime të shumta anulohen në moment të fundit. Sipas denoncimit, pasagjerët shpesh mbeten pa asnjë sqarim dhe, në shumë raste, pa rimbursim të parave, duke u lënë në mëshirë të fatit.

Punonjësi denoncon gjithashtu se anulime të fluturimeve ndodhin edhe për arsye jo komerciale, pasi avionët përdoren për udhëtime zyrtare qeveritare, ndërsa pasagjerët e zakonshëm mbeten të bllokuar dhe pa zgjidhje.

Ky denoncim përforcon një sërë ankesash të publikuara më herët, ku dhjetëra pasagjerë kanë raportuar anulime të përsëritura, mungesë totale informacioni, zyra të mbyllura dhe një kaos komunikimi mes Air Albania dhe Turkish Airlines për fluturimet e përbashkëta.

Situata e krijuar po ngre pikëpyetje serioze mbi funksionimin real të kompanisë ajrore, e cila u promovua me bujë si “linja kombëtare”, por sot duket se po shembet mbi kurrizin e punonjësve dhe qytetarëve.

Sekretariati i Etikës do të mblidhet mëngjesin e kësaj të marte në orën 10:00, për të shqyrtuar kërkesën e Partisë Socialiste për masa disiplinore ndaj 29 deputetëve të partisë demokratike.

PS ka kërkuar të merren masa disiplinore ndaj 29 deputetëve demokratë pas tensioneve dhe incidenteve të ndodhura gjatë seancës plenare të 18 dhjetorit, në Kuvend, me argumentin se veprimet e deputetëve kanë qenë të mirëorganizuara dhe kanë përfshirë akte dhune dhe incidente të rënda.

Sipas qëndrimit të mazhorancës, aktet e dhunës nuk ishin spontane, por të organizuara nga drejtues të Partisë Demokratike, duke përfshirë Sali Berishën, Flamur Nokën dhe Gazment Bardhin.

Në kërkesë, mazhoranca kërkon ndëshkime disiplinore që variojnë nga 10 deri në 60 ditë përjashtim nga seancat plenare dhe nga punimet e komisioneve parlamentare për deputetët e përfshirë.

Deputetët për të cilët kërkohen masa disiplinore:

Përjashtim për 60 ditë nga seancat plenare dhe komisionet parlamentare:

1-Belind Këlliçi

2-Fidel Kreka

3-Albana Vokshi

4-Ledina Alolli

5-Denisa Vata (për futje dhe përdorim të lëndëve piroteknike në sallën e Kuvendit)

6-Klevis Balliu

7-Flamur Noka (për moszbatim të masave disiplinore, dëmtim të pajisjeve të Kuvendit dhe veprime të dhunshme ndaj Gardës së Republikës)

Përjashtim për 30 ditë nga seancat plenare dhe komisionet parlamentare:

1-Elda Hoti (për dëmtim të pajisjeve dhe mosrespektim të Kodit të Sjelljes)

2-Gazment Bardhi

3 Sali Berisha (për shkelje të përsëritura të rendit të seancës, përdorim të gjuhës joparlamentare dhe pengim të zhvillimit normal të punimeve parlamentare)

Përjashtim për 10 ditë nga seancat plenare dhe komisionet parlamentare:

1-Besart Xhaferri

2-Xhelal Mziu

3-Bledjon Nallbati

4-Luçiano Boçi

5-Saimir Korreshi (për pengim të zhvillimit të seancës dhe akte dhune)

6-Edi Paloka

7-Ina Zhupa

8-Klodiana Çapja

9-Oerd Bylykbashi

10-Enno Bozdo

11-Tomorr Alizoti

12-Ivi Kaso

13-Gent Strazimiri

14-Luan Baçi

15-Bledi Himçi

16-Greta Bardeli

17-Manjola Luku

18-Flamur Hoxha

19-Kliti Hoti

Confindustria Albania – Shoqata e Industrialistëve Italianë në Shqipëri, që përfaqëson rreth 170 biznese italiane e të përbashkëta, ka shprehur qëndrimin e saj të ashpër zyrtar kundër projektligjit të ri të Kodit Penal, i hedhur së fundmi për konsultim publik nga Ministria e Drejtësisë, duke paralajmëruar se nëse miratohet në ketë formë do të rrezikojë paralizimin e investimeve të huaja.

Confindustria Albania ndryshimet në Kodin Penal i cilëson të panevojshëm, të cilat rrisin ndjeshëm riskun ligjor për bizneset dhe cenojnë klimën e investimeve në vend.

“Nuk rezultoi dhe as konstatohet se ekziston ndonjë boshllëk në legjislacion penal, që të justifikojë nevojën për të shkuar drejt hartimit dhe miratimit të një kodi të ri penal. Mbi të gjitha vërehet se nga hartuesit e projektit të Kodit të ri Penal nuk është bërë një analizë shteruese e ndikimit të faktorëve ekonomikë dhe socialë në lidhje me rëndimin me penalizime të reja, siç propozohet, për veprat penale të kryera nga personat juridikë”, nënvizohet në qëndrim.

Një nga shqetësimet kryesore lidhet me kriminalizimin e tepruar të veprimeve me natyrë administrative, si shkeljet tatimore formale, mangësitë në dokumentacion apo shkelje të brendshme në shoqëritë tregtare, të cilat deri më tani janë trajtuar përmes masave administrative ose civile. Sipas Confindustria Albania, kjo qasje rrit presionin penal mbi biznesin dhe krijon pasiguri në ushtrimin e aktivitetit ekonomik.

Confindustria Albania shpreh gjithashtu kundërshtime ndaj zgjerimit të përgjegjësisë penale për personat juridikë, duke vënë në dukje se projekti parashikon përgjegjësi edhe për vepra penale që, sipas saj, nuk mund të lidhen logjikisht me natyrën e personit juridik. Kjo, sipas Confindustria Albania, bie ndesh me parimet themelore të së drejtës penale dhe praktikat e vendeve të Bashkimit Europian, ku përgjegjësia penale e personave juridikë është e kufizuar në fusha të caktuara si korrupsioni, krimi i organizuar dhe veprat kundër mjedisit.

Një tjetër problem që ngrihet është edhe mungesa e harmonizimit të draftit me legjislacionin ekzistues dhe praktikën gjyqësore, si dhe mbivendosja me ligjin “Për mbrojtjen e konkurrencës”, veçanërisht përmes tentativës për të kriminalizuar pozitën dominuese në treg. Sipas Confindustria Albania, kjo mund të paralizojë investimet, të rrisë arbitraritetin në zbatim dhe të dëmtojë konkurrencën e lirë.

“Kriminalizimi i një sjellje që kërkon analiza komplekse ekonomike krijon pasiguri të thellë juridike, duke bërë që sjellje të zakonshme të biznesit si përqendrimet të mund të interpretohen si vepra penale. Gjithashtu, integrimi i përgjegjësisë penale mbi përqendrimet e ndërmarrjeve rrezikon të paralizojë investimet, të zbehë transaksionet dhe të dobësojë klimën konkurruese të tregut për shkak të rrezikut të shtuar të ndjekjes penale, në çdo rast ku çdo ndërmarrje mund të rrisë pjesëmarrjen e saj në treg. Në praktikë, kjo krijon mbivendosje ligjore, konflikte interpretimi ndërmjet autoriteteve dhe një rrezik të lartë arbitrariteti në zbatim”, theksohet ndër të tjera në qëndrimin e Cofindustria Albania.

Në përfundim, Confindustria Albania vlerëson se projektiligji i ri i Kodit Penal, në formën aktuale, rrit ndjeshëm riskun ligjor për bizneset dhe përbën pengesë për zhvillimin ekonomik të vendit. Rekomandohet që drafti të mos përparojë dhe që fokusi të jetë përmirësimi i Kodit Penal ekzistues përmes një procesi të thelluar, gjithëpërfshirës dhe të mirëkonsultuar institucionalisht.

Drafti paraprak më herët është kundërshtuar edhe nga Profesionistët e Aleancës të Profesionistëve të Lirë (APL). Nëpërmjet një letre dërguar ish ministrit të Drejtësisë Ulsi Manja APL kërkoi rishikim të kujdesshëm të dispozitave problematike, duke theksuar nevojën për respektim të parimit të proporcionalitetit dhe mbrojtje të lirive ekonomike dhe lirisë së fjalës.

Duke ngritur shqetësimin për zgjerimin e panevojshëm të ndërhyrjes penale në fusha që tradicionalisht janë trajtuar nga e drejta civile apo administrative, APL solli në vëmendje disa nene që sipas tyre mund të sjellin pasoja negative në marrëdhëniet mes bizneseve.

Drafti paraprak i kodit të Ri Penal më herët është publikuar në faqen zyrtare të Ministria së Drejtësisë.

Kodi Penal është miratuar në janar 1995, pothuajse 28 vite më parë. Në kohën e miratimit ky kod kishte 362 nene, ndërsa Kodi i Ri i propozuar ka mbi 600 nene. Sipas Ministrisë së Drejtësisë vit pas viti, Kodi i është nënshtruar mbi 30 herë amendimeve dhe shtesave të vazhdueshme, për t’iu përgjigjur nevojës së tranzicionit shoqëror dhe ekonomik që ka kaluar Shqipëria.

Ministria e Drejtësisë thekson se si pasojë e këtyre ndërhyrjeve në Kod është konstatuar ndjeshëm një mungesë e harmonizimit të përmbajtjes së Kodit Penal, veçanërisht përsa i përket llojeve dhe masave të dënimeve penale për çdo vepër penale bazuar në rrezikshmërinë e saj.

Qëndrim Zyrtar i Confindustria Albania për projektin e ri të Kodit Penal të Republikës së Shqipërisë

1.Vlerësim i përgjithshëm dhe mungesa e nevojës për një Kod të ri

Confindustria Albania shpreh shqetësimin në lidhje me projektin e Kodit Penal të hedhur kohët e fundit për konsultim publik. Kodi Penal, siç dihet, është një akt me rëndësi themelore për sistemin juridik, ekonomik dhe politik të vendit. Në lidhje me këtë projekt, kemi zhvilluar diskutime të gjera me juristë dhe avokatë, përfaqësues të shoqërive anëtare që Confindustria Albania përfaqëson. Nisur nga këto diskutime, na rezulton se ky draft nuk vjen si pasojë e ndonjë nevoje apo kërkese reale të sistemit penal apo i problemeve në zbatimin e Kodit Penal aktual. Përkundrazi, mendimi i përgjithshëm është se sistemi penal me Kodin Penal ekzistues, si një shtyllë e këtij sistemi, ka funksionuar në mënyrë të qëndrueshme dhe ka manifestuar rezultate pozitive, duke përfshirë këtu edhe trajtimin e çështjeve që lidhen me personat juridikë. Argumenti i përsëritur nga autorët e projektit të ri të Kodit Penal se “ndryshimet e shpeshta në Kodin aktual kërkojnë hartimin e një Kodi të ri” nuk është i bazuar dhe i qëndrueshëm. Ndryshimet ligjore janë reflektim i ndryshimeve në jetën sociale, politike dhe ekonomike të vendit. Projekti i Kodit të ri Penal sjell një varg ndryshimesh të rëndësishme thelbësore dhe strukturore. Nuk mendojmë se është kjo që kërkohet në këtë moment. Në këtë moment kërkohet forcimi dhe konsolidimi i zbatimit të Kodit ekzistues.

Ndryshimet rrënjësore apo të shumta në këtë moment nuk do të kontribuonin në forcimin e sistemit penal. Përkundrazi, kjo lloj qasjeje cenon sigurinë juridike, parashikueshmërinë ligjore dhe besimin e subjekteve ekonomike në sistemin e drejtësisë. Nga diskutimet rezultoi e qartë se mungojnë arsyet, faktorët apo motivet që të nxisin apo të shtyjnë për bërjen e një kodi të ri penal. Gjithashtu, nuk rezultoi dhe as konstatohet se ekziston ndonjë boshllëk në legjislacion penal, që të justifikojë nevojën për të shkuar drejt hartimit dhe miratimit të një kodi të ri penal. Mbi të gjitha vërehet se nga hartuesit e projektit të Kodit të ri Penal nuk është bërë një analizë shteruese e ndikimit të faktorëve ekonomikë dhe socialë në lidhje me rëndimin me penalizime të reja, siç propozohet, për veprat penale të kryera nga personat juridikë.

2. Kriminalizimi i tepruar i veprimeve dhe akteve administrative

Një shqetësim thelbësor i Confindustria Albania lidhet me tendencën për të kriminalizuar veprime dhe akte që kanë natyrë të theksuar administrative dhe që deri më tani janë trajtuar me mjete administrative ose civile. Shembuj të tillë janë:

• Shkeljet në fushën e tatimeve dhe mbajtjes së dokumentacionit tatimor;
• Kërkesat e parregullta apo mosmbajtja e regjistrave;
• Shkelje të kryera në shoqëritë tregtare;
• Shkelje të karakterit formal që nuk përbëjnë rrezik penal, por vetëm mangësi administrative.

Kjo qasje rënduese penale përbën një rrezik për klimën e biznesit, pasi vendos presion penal mbi aktivitetin tregtar dhe sjell pasiguri në ushtrimin e veprimtarisë ekonomike. Në këtë kuadër, theksojmë se projektkodi nuk ruan një raport të drejtë ndërmjet përgjegjësisë administrative dhe asaj penale. Përveç ruajtjes së një raporti të drejtë dhe proporcional ndërmjet këtyre përgjegjësive, jemi të mendimit se në zbatimin e përgjegjësisë penale ndaj personave juridikë duhet të evitohet ndëshkimi i biznesit në vetvete ose i punonjësve që lidhen me të. Në radhë të parë, fokusi duhet të jetë krijimi i një klime të shëndetshme bashkëpunimi dhe ndërveprimi ndërmjet organeve publike, si: tatimet, doganat, konkurrenca, etj, nga njëra anë, dhe biznesit nga ana tjetër.

3. Presion i shtuar penal ndaj personave juridikë

Në projektin e Kodit të ri Penal është vërejtur shtim i konsiderueshëm i veprave penale për të cilat mund të përgjigjet personi juridik (ose më saktë përfaqësuesit ligjorë të tij). Ky zhvillim:

• është përtej logjikës juridike të dallimit ndërmjet personit fizik dhe juridik;
• ngarkon padrejtësisht shoqëritë tregtare me përgjegjësi që nuk u takojnë;
• krijon mundësi për interpretime arbitrare gjatë zbatimit nga organet kompetente.

Në disa dispozita, projekti parashikon që personi juridik mund të dënohet për vepra penale absurde, si p.sh. vrasja, plagjiatura apo keqtrajtimi i kafshëve, çka është në kundërshtim me parimet themelore të përgjegjësisë penale dhe të funksionimit të shoqërive tregtare. Gjithashtu, konstatojmë se shumë vepra penale parashikojnë si rrethanë cilësuese apo rënduese rastin kur vepra penale kryhet nga personi juridik.

Ndërkohë që disa prej figurave të veprave penale nuk kuptohet se si mund të kryhen nga personi juridik, për disa të tjera mendojmë se parashikime të tilla e rëndojnë në mënyrë joproporcionale pozitën e personave juridikë dhe janë të paqarta. Për më tepër, konstatojmë dispozita ku gjykatës i jepet një diskrecion i tepruar për vendimmarrje mbi bazën e “rrethanave konkrete”, duke cenuar sigurinë dhe parashikueshmërinë ligjore. Prej vitesh Bashkimi Evropian është i orientuar drejt përgjegjësisë penale të personave juridikë, por e kufizuar kjo në fusha, si: korrupsioni, krimi i organizuar apo veprat penale kundër ambientit.

Ekspertët e Confindustria Albania vlerësojnë që përgjegjësia penale e personave juridikë duhet të kufizohet vetëm për vepra penale të lidhura drejtpërdrejt me aktivitetin ekonomik dhe përfitimin në dobi të shoqërisë, në përputhje me standardet dhe praktikat e mira të vendeve të Bashkimit Evropian. Është e rëndësishme të theksohet se për veprat penale të kryera nga personi juridik ekziston tashmë një ligj i posaçëm siç është ligji nr. 9754, datë 14.6.2007, “Për përgjegjësinë penale të personave juridikë”, i cili mendojmë se rregullon në mënyrë të mjaftueshme dhe të duhur përgjegjësinë penale për personat juridikë në rastin e kryerjes së një vepre penale.

4. Mungesa e harmonizimit me ligjet ekzistuese dhe praktikat gjyqësore

Në kuadër të një shteti demokratik, një ligj penal duhet të priret nga përqafimi i parimeve moderne të drejtësisë penale dhe jo atyre që tregojnë qasje represive ndaj biznesit dhe konkurrencës së lirë. Projekti i Kodit të ri Penal nuk merr në konsideratë parimet bazë të drejtësisë penale dhe asaj civile kur bëhet fjalë për normimin e përgjegjësisë penale të personit juridik, parime këto të konsoliduara nga doktrina dhe jurisprudenca moderne e vendeve perëndimorë prej më shumë se 100 vjetësh. Në veçanti, në shumë figura të veprave penale konstatohet shkelja e parimeve të përgjithshme të së drejtës, të tilla si: parimi i specialitetit, parimi i proporcionalitetit, parimi i humanizmit, apo edhe vetë parimi i ligjshmërisë.

Kodi aktual së bashku me ligjin “Për përgjegjësinë penale të personave juridikë” dhe ligjin “Për shoqëritë tregtare” kanë krijuar një kuadër të qartë dhe të integruar për trajtimin e çështjeve penale që lidhen me subjektet tregtare. Në praktikë ky sistem ka prodhuar rezultate të qëndrueshme, të konfirmuara edhe nga vendimet e Gjykatës së Lartë. Konkretisht, praktika gjyqësore që është zhvilluar së fundmi nga ana e Kolegjeve Penale të Gjykatës së Lartë tregon se kur merret në analizë përgjegjësia penale e personit juridik, duhet të udhëhiqemi nga disa rregullime specifike që nuk i gjejmë në rregullat që sanksionojnë përgjegjësinë penale të individit (për referencë vendimi nr. 154, datë 16.05.2023, Kolegji Penal i Gjykatës së Lartë). Projekti i Kodit të ri Penal nuk e merr parasysh këtë përvojë dhe për më tepër injoron parimet bazë të ndarjes ndërmjet përgjegjësisë civile dhe asaj penale të organeve të personit juridik. Ai shfaq mospërputhje të dukshme me logjikën dhe terminologjinë e ligjeve tregtare dhe nuk reflekton njohuri të mjaftueshme për funksionimin e shoqërive tregtare. Ndër të tjera, një problem i veçantë dhe i rëndësishëm është integrimi në Kodin Penal i një dispozite të re që mund të kriminalizojë pozitën dominuese në treg.

Kjo dispozitë përbën mbivendosje të drejtpërdrejtë dhe të pajustifikuar me ligjin nr. 9121, datë 28.7.2003, “Për mbrojtjen e konkurrencës”, i ndryshuar, i cili tashmë rregullon në mënyrë të specializuar abuzimin me pozitën dominuese, marrëveshjet e ndaluara dhe kontrollin e përqendrimeve.

Kriminalizimi i një sjellje që kërkon analiza komplekse ekonomike krijon pasiguri të thellë juridike, duke bërë që sjellje të zakonshme të biznesit si përqendrimet të mund të interpretohen si vepra penale. Gjithashtu, integrimi i përgjegjësisë penale mbi përqendrimet e ndërmarrjeve rrezikon të paralizojë investimet, të zbehë transaksionet dhe të dobësojë klimën konkurruese të tregut për shkak të rrezikut të shtuar të ndjekjes penale, në çdo rast ku çdo ndërmarrje mund të rrisë pjesëmarrjen e saj në treg. Në praktikë, kjo krijon mbivendosje ligjore, konflikte interpretimi ndërmjet autoriteteve dhe një rrezik të lartë arbitrariteti në zbatim.

5. Ndikimi negativ në klimën e investimeve dhe në sigurinë juridike

Projekti, në formën aktuale, rrit ndjeshëm riskun ligjor për bizneset dhe cenon klimën e investimeve në Shqipëri. Në vend që ta thjeshtojë dhe modernizojë legjislacionin penal, ai e komplikon, e zgjat në mënyrë të panevojshme dhe krijon pasiguri për subjektet ekonomike. Për pasojë, Confindustria Albania e konsideron projektin si represiv ndaj funksionimit normal të kompanive, pengesë për zhvillimin ekonomik dhe rrezik për përkeqësimin e klimës së biznesit në vend.

6. Rekomandim për procesin e mëtejshëm

Duke marrë parasysh rëndësinë themelore të Kodit Penal, çdo rishikim i tij duhet të ndodhë vetëm mbi bazën e një analize të thelluar, me konsultim të gjerë institucional, akademik dhe ekonomik, dhe jo përmes një projekti të papjekur e të nxituar.

Confindustria Albania rekomandon që:

• Drafti aktual të mos përparojë në këtë formë;
• Të synohet përmirësimi i Kodit ekzistues, jo zëvendësimi i tij total./Monitor

Superiorja ditën e sotme do të luajë ndeshjet e fundit për këtë vit kalendarik, sfida të vlefshme për javën e 18-të. 2 duele mjaft delikate dhe shumë të luftuara do të luhen paralelisht në orën 18:00.

Vëmendja do të jetë në Tiranë dhe Durrës. Në “Arenën e Demave” do të luhet derbi mes Partizanit dhe Dinamos, me ekipet që do të përplasin “brirët” për 3 pikët.

Ndërkohë në “Niko Dovana” përballë njëra – tjetrës do të vihen Teuta dhe Egnatia. Një duel që merr vëmendjen, pasi ekipet synojnë të mbyllin këtë vit me fitore.

Në tregun e këmbimit valutor shqiptar, një dollar amerikan do të blihet sot me 81.5 lekë dhe do shitet me 82.7 lekë.

Ndërkohë monedha evropiane euro do blihet me 96 lekë dhe do shitet me 96.8 lekë.

Franga zvicerane sot në tregun shqiptar do blihet me 102.8 lekë dhe do shitet me 103.8 lekë.

Ndërsa paundi britanik do blihet me 109.4 lekë dhe do shitet me 110.5 lekë.

DASHI

Kjo është një javë (dhe periudhë) shumë emocionuese. Dashi ndjen nevojën për të ndërmarrë veprime, për të ndryshuar ritmin, për t’i provuar diçka vetes para të tjerëve. Qielli ju ftojnë të merrni përsipër një projekt që e keni lënë të papërfunduar: tani keni më shumë forcë, më shumë qartësi. Në dashuri, jeni të drejtpërdrejtë, ndoshta tepër: kini kujdes me fjalët tuaja, sepse ato mund të lëndojnë më shumë se heshtja. Beqarët duan pasion të vërtetë, jo masa gjysmake.

DEMI

Sipas horoskopit të Paolo Fox (e martë, 23 dhjetor 2025), është një kohë rindërtimi të ngadaltë por të fortë. Ke përjetuar tensione ose pengesa, por tani qielli kërkon durim dhe besim. Gjërat e mira po piqen, edhe nëse nuk janë ende të dukshme. Në dashuri, ke nevojë për siguri: nëse një marrëdhënie është e vërtetë, ajo forcohet; nëse është e brishtë, mund të ndihesh i lodhur duke e mbajtur të gjithën vetëm.

BINJAKËT

Kjo është një periudhë e gjallë, kurioze dhe mendore. Binjakët janë përsëri në qendër të vëmendjes, me ide brilante dhe dëshirë për lëvizje. Por kini kujdes të mos shpërqendroheni: shumë gjëra në të njëjtën kohë mund t’ju lodhin. Në dashuri, jeni simpatik dhe komunikues, por paksa të pakapshëm. Ata që ju duan duan më shumë prani, më pak fjalë. Beqarët mund të bëjnë takime stimuluese, veçanërisht përmes miqësive ose mjediseve të reja.

GAFORRJA

Një fazë delikate, por e rëndësishme. Emocione të forta, rishfaqje kujtimesh, nevojë për mbrojtje. Qielli ju ftojnë të mos mbylleni në vetvete, por të ndani atë që ndjeni. Në dashuri, ekziston një dëshirë për të vërtetën: ata që janë në një lidhje duhet të sqarojnë diçka, ata që janë beqarë duhet të ndalojnë së menduari për të kaluarën. Puna kërkon guxim: mos e nënvlerësoni veten, sepse jeni më të vlefshëm nga sa mendoni. Është koha të besoni më shumë në veten tuaj.

LUANI

Sipas horoskopit të Paolo Fox (e martë, 23 dhjetor 2025), pas një periudhe vështirësish ose pritjeje, tani mund të dilni përsëri në qendër të vëmendjes. Qielli ju mbështet në marrjen e vendimeve të guximshme. Në dashuri, jeni pasionantë, bujarë, por edhe krenarë: kini kujdes që të mos e shndërroni një diskutim në një sfidë. Beqarët janë magnetikë. Në punë, është koha e duhur për t’u bërë të dukshëm, për të bërë pyetje dhe për të dhënë sugjerime. Mos kini frikë të merrni rreziqe.

VIRGJËRESHA

Po kaloni një periudhë reflektimi të thellë. Po riorganizoni jetën tuaj, duke pastruar mendjen dhe emocionet tuaja. Është e lodhshme, por e nevojshme.
Në dashuri, jeni më kërkues: dëshironi qartësi, stabilitet dhe konkretësi. Ata që nuk mund t’i ofrojnë këto mund të distancohen. Në punë, jeni të saktë dhe të besueshëm, por duhet të mësoni të delegoni dhe të mos e ngarkoni veten me gjithçka. Parajsa kërkon ekuilibër.

PESHORJA

Kjo është një kohë për të bërë vetë-kërkim. Peshoret ndiejnë nevojën për të rizbuluar harmoninë, veçanërisht në marrëdhënie. Disa marrëdhënie kanë nevojë për ribalancim, të tjera për ripërcaktim. Në dashuri, jeni më të ndjeshëm se zakonisht: kini kujdes të mos e teproni me idealizimin. Beqarët duhet ta lënë veten të befasohen, pa pritshmëri të tepërta.

AKREPI

Sipas horoskopit të Paolo Fox (e martë, 23 dhjetor 2025), po e ndërroni lëkurën tuaj, po lini pas dore atë që nuk ju përfaqëson më. Është një periudhë e fuqishme, por emocionalisht sfiduese. Në dashuri, dëshironi gjithçka ose asgjë: pasione të forta, lidhje autentike. Kini kujdes nga xhelozia ose heshtjet ndëshkuese. Puna i shpërblen ata që guxojnë: nëse keni një ide, ndiqeni atë pa frikë. Qielli është në anën tuaj.

SHIGJETARI

I dashur Shigjetar, je i etur të lëvizësh, të eksplorosh dhe të ndryshosh perspektivën tënde. Qielli të fton të shikosh larg përpara, jo të kënaqesh me rehatinë. Në dashuri, je i sinqertë, i drejtpërdrejtë dhe ndoshta pak i paduruar: ji i qartë për atë që dëshiron vërtet. Beqarët mund të përjetojnë flirtime stimuluese. Hapen rrugë të reja në vendin e punës, veçanërisht për ata që punojnë jashtë vendit, në studime ose në komunikim.

BRICJAPI

Kjo është një kohë përgjegjësie, por edhe kënaqësie. Po ndërtoni diçka të rëndësishme, hap pas hapi. Ka shumë punë të vështirë, por rezultatet po vijnë. Në dashuri, jeni më të hapur se zakonisht, edhe nëse keni vështirësi të shprehni ndjenjat tuaja. Ata përreth jush duhet të kuptojnë heshtjet tuaja. Në punë, jeni të vendosur: kjo është koha e duhur për të konsoliduar një pozicion ose për të bërë një zgjedhje afatgjatë.

UJORI

Sipas horoskopit të Paolo Fox (e martë, 22 dhjetor 2025), keni nevojë për një ndryshim peizazhi, për të thyer modelin, për t’u ndjerë i lirë. Qielli favorizon inovacionin. Në dashuri, jeni të paparashikueshëm: ata që ju duan duhet t’ju ndjekin pa u përpjekur t’ju mbajnë prapa. Beqarët tërhiqen nga njerëzit që mendojnë jashtë kornizave. Puna kërkon ide të reja: guxoni, eksperimentoni, por qëndroni konkretë.

PESHQIT

Intuitë të forta, ëndrra intensive, emocione të thella. Qielli ju fton të dëgjoni intuitën tuaj, por pa humbur veten. Në dashuri, jeni romantikë, të ëmbël, por të prekshëm: mbroni zemrën tuaj, zgjidhni ata që ju respektojnë vërtet. Në punë, keni nevojë për më shumë qartësi: organizoni energjitë tuaja më mirë, sepse keni talent, por duhet të besoni më shumë në të.

Ditën e sotme vendi ynë do të ndikohet nga kushte atmosferike të kryesisht të paqëndrueshme. Sipas Shërbimit Meteorologjik Ushtarak moti parashikohet me vranësira mesatare deri të dendura. Reshjet e shiut pritet të bëhen prezente në orët e mëngjesit fillimisht përgjatë vijës bregdetare dhe gradualisht do të shtrihen në të gjithë vendin.

Reshjet parashikohet të jenë me intensitet kryesisht të ulët e lokalisht reshje shiu në formën e shtrëngatave afatshkurtra kryesisht përgjatë ultësirës perëndimore dhe në jugperëndim të vendit. Në Alpe e relievet malore në verilindje-lindje-juglindje duke filluar prej orëve të pasdites reshje bore me intensitet të ulët.

Mjegull e dendur/mjegullinë përgjatë zonave luginore në orët e mëngjesit si dhe në momentin e reshjeve të shiut dhe dëborës.

Era do të fryjë me drejtim nga kuadrati i veriut me shpejtësi mesatare 7 m/sek, përgjatë vijës bregdetare e zonave luginore era fiton shpejtësi deri në 12m/s .