Shefja e politikës së jashtme të Bashkimit Evropian, Kaja Kallas, është shprehur kundër krijimit të një ushtrie evropiane, duke deklaruar se kjo ishte një ide jashtëzakonisht e rrezikshme.

Gjatë fjalës së saj në një konferencë sigurie në Norvegji, Kallas tha se përparësia kryesore në çdo krizë ushtarake duhet të jetë ruajtja e një strukture të qartë komanduese. Ajo u shpreh se krijimi i një ushtrie të veçantë evropiane përkrah forcave të NATO-s mund të çojë në konfuzion gjatë krizave globale.

“Nëse jeni tashmë pjesë e NATO-s, atëherë nuk mund të krijoni një ushtri të veçantë përveç ushtrisë që keni tashmë. Sepse në kushtet e krizës, ajo që është më e rëndësishmja është zinxhiri i komandës: kush i jep urdhra kujt. Dhe nëse keni ushtrinë evropiane dhe pastaj keni ushtrinë e NATO-s, kjo është jashtëzakonisht e rrezikshme. Kjo është arsyeja pse them se duhet të forcojmë mbrojtjen evropiane, e cila është gjithashtu pjesë e NATO-s. Është vërtet plotësuese për NATO-n. Le të mos e nxjerrim NATO-n nga dritarja”, tha Kallas.
Kallas hodhi poshtë pretendimet për përçarje brenda NATO-s, duke këmbëngulur se bashkëpunimi midis aleancës dhe BE-së ishte forcuar.

“Nuk pajtohem që ka një përçarje. Ne po përpiqemi t’i ndihmojmë shtetet tona anëtare të rrisin shpenzimet e tyre të mbrojtjes dhe gjithashtu ta bëjmë këtë së bashku me të gjitha shtetet e tjera anëtare dhe gjithashtu me vende si Norvegjia, në mënyrë që të jemi gati. Dhe 23 anëtarë të Bashkimit Evropian janë gjithashtu pjesë e NATO-s, kështu që në të vërtetë ne po bashkëpunojmë me NATO-n. Është përveç asaj që po bën NATO, dhe ne vërtet punojmë krah për krah”, tha ajo.
E pyetur nëse ishte dakord me qëndrimin e Rutte-s se Evropa nuk mund të ishte e pavarur pa SHBA-në, Kallas pranoi se ende kishte punë për t’u bërë në këtë aspekt.

“Epo, tani për tani situata është e tillë, por ne po punojmë për të qenë më të pavarur edhe kur bëhet fjalë për sigurinë, sepse është e qartë se dobësitë tona janë dobësitë tona. Kjo është arsyeja pse po punojmë për të investuar më shumë në mbrojtje, gjithashtu në aftësi, dhe për ta konsideruar atë evropiane, jo vetëm kombëtare”, tha Kallas./mxh

Kancelari i Gjermanisë, Friedrich Merz është shprehur se Evropa duhet të bëhet më e pavarur nga aleati i saj i vjetër, Shtetet e Bashkuara të Amerikës.

Duke folur në selinë e Deutsche Boerse Group, e cila operon Bursën e Frankfurtit, Merz u shpreh se siguritë e vjetra nuk vlejnë më.

“Ne duhet të bëhemi më sovranë dhe të pavarur, veçanërisht në aspektin e teknologjisë”, thotë Merz.
Kancelari gjerman tha se Evropa duhet të përshtatet me një pjesë të re të realitetit me të cilin bota po përballet.

“Marrëdhëniet transatlantike kanë ndryshuar. Askush në këtë sallë nuk e thotë këtë me më shumë keqardhje sesa unë, por nostalgjia dhe kujtimet e kohërave të mira të kaluara nuk ndihmojnë”, u shpreh ai.
Kërcënimet e Presidentit të SHBA-së, Donald Trump, se vendi i tij mund të aneksojë Groenlandën, një territor autonom i aleatit evropian të NATO-s, Danimarkës, kanë tronditur së fundmi udhëheqësit evropianë.

Presidenti francez Emmanuel Macron i cilësoi deklaratat e Trump si një thirrje zgjimi strategjik për të gjithë Evropën dhe komisioneri i energjisë i BE-së, Dan Jorgensen, paralajmëroi se blloku rrezikonte të bëhej i varur nga importet e gazit natyror të lëngshëm të SHBA-së./mxh

Katër persona janë shpallur në kërkim lidhur me atentatin e ndodhur mbrëmjen e djeshme në fshatin Rrilë të Lezhës, ku një person mbeti i plagosur me armë zjarri.

Policia ka bërë me dije se vijojnë hetimet për zbardhjen e plotë të ngjarjes, ndërsa deri tani është ekzekutuar urdhri i ndalimit për një efektiv policie, i cili dyshohet për veprën penale “Shpërdorimi i detyrës”. 24-vjeçari ka qëlluar me armë zjarri në drejtim të autorëve.

Më tej njoftohet se po punohet për kapjen e katër shtetasive G. N., E. N., K. N. dhe M. N., të dyshuar për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit dhe municionit dhe lëndëve shpërthyese”.

Njoftimi i policisë:

Lezhë

Vijojnë veprimet e thelluara hetimore për zbardhjen dhe dokumentimin e plotë ligjor të ngjarjes së ndodhur në Rrilë.

Në lidhje me ngjarjen e ndodhur më datë 01.02.2026, rreth orës 21:00, në fshatin Rrilë, Njësia Administrative Shënkoll, bashkia Lezhë, ku mbeti i plagosur me armë zjarri një shtetas, Grupi i Posaçëm Hetimor i DVP Lezhë, nën drejtimin e Prokurorisë, ka vijuar intensivisht hetimet me qëllim zbardhjen e ngjarjes, dokumentimin ligjor, identifikimin dhe kapjen e autorëve.

Në vijim të veprimeve u ekzekutua urdhri i ndalimit, i lëshuar nga Prokurori, për shtetasin B. K., 24 vjeç, banues në fshatin Dragushë, Njësia Administrative Dajç, Bashkia Lezhë, i dyshuar për veprën penale “Shpërdorimi i detyrës”.

Nga tërësia e veprimeve hetimore e procedurale, ka rezultuar se si të dyshuar në këtë ngjarje janë përfshirë shtetasit G. N., E. N., K. N. dhe M. N., të cilët janë shpallur në kërkim.

Grupi i posaçëm hetimor, nën drejtimin e Prokurorisë Lezhë, vijon punën për dokumentimin e plotë ligjor të ngjarjes.

Për shkak të hetimeve, nuk jepen të dhëna të tjera.

Vijon puna për lokalizimin dhe kapjen e personave të shpallur në kërkim.

Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Lezhë, në ngarkim të shtetasve G. N., E. N., K. N. dhe M. N., të dyshuar për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit dhe municionit dhe lëndëve shpërthyese”, si dhe në ngarkim të shtetasit B. K., i dyshuar për veprën penale “Shpërdorimi i detyrës”./mxh

Ish-prokurori Eugen Beçi i ftuar në A2 CNN ka folur për raporitet e politikës me drejtësinë. Beçi tha se mazhoranca në momentin që i ka punët mirë me drejtësinë, fillon dhe e sulmon, e njëjta gjë dhe nga opozita.

Ish-prokurori u shpreh se si mazhoranca dhe opozita ishin ata që u dakordësuan me 140 vota për drejtësinë që sulmojnë sot, kur miratuan reformën në drejtësi.

Më tej, Beçi tha se në momentin kur goditen nga drejtësia, mazhoranca dhe opozita afrohen me njëra-tjetrën.

“Është një histori e vjetër në Shqipëri, problemi i qasjes së politikës me drejtësinë. Duket se mazhoranca në momentet që nuk e ka oreksin e mirë me drejtësinë, e sulmon. Gjithashtu, edhe opozita bën po të njëjtën gjë dhe të dyja palët harrojnë që momenti të cilin ato u dakordësuan me 140 vota plot puthje, plot përqafime, ishte momenti më i rëndësishëm për ata që të kuptonin që nesër nuk mundet të flisnin më tej. Ishte momenti më i rëndësishëm që ata të kuptonin që të nesërmen, kur t’u vinte në derën e tyre një problem që ata e quajnë të padrejtë, nuk mundet të sulmonin në këtë formë. Deri para pak kohësh, ne shikonim një mazhorancë që e lëvdonte më tepër sesa duhet drejtësinë dhe një opozitë që e shante më tepër sesa duhet drejtësinë. Duket se rolet nuk është se janë ndryshuar, por opozita dhe mazhoranca duket sikur po i qasen dhe po i afrohen njëra-tjetrës vetëm në momentin kur ato sulmohen nga drejtësia”, tha Beçi./mxh

Kreu i LZHK-së, Dashamir Shehi ka folur mbrëmjen e sotme lidhur me protestat e opozitës dhe aludimet për një ngujim. Shehi tha në emisionin “Now me Erla Mëhillin” në Euronews, se opozita fillimisht duhet të punojë për Reformën Zgjedhore dhe atë Territoriale.

Sipas tij kjo duhet bërë sa më shpejt që në zgjedhjet e ardhshme lokale të shkohet me një shpërndarje shpërndarje të re administrative edhe me një ligj të ri zgjedhor.

“Nuk ma merr mendja se do të ngujohet njeri. Thjesht do të jetë mitingu i radhës. Kjo opozitë ka për detyrë të bëjë disa reforma. Të bëjë zhurmë për këto reforma. Këto janë më të rëndësishme. Pjesa që duhet të bënte opozita dhe që se ka bërë, ndryshimin në ligjin zgjedhor. Ra dakord për një ligj të pisët që e dënoi me vdekje opozitën. E para duhet të rrëzojë këtë ligj, e dyta të rrëzojë marrëveshjen e 2008, që e ka bërë kryeministrin njeriun e plotfuqishëm. E treta a di gjë kjo opozitë se çfarë do të bëhet për pushtetin lokal?
Deri kur të bëhen zgjedhjet partiake, dhe më pas do të fillojë stili i vjetër i politikës, që opozita merret vesh me Edi Ramën. Ishalla kanë fuqi ngrenë një mal me çadra. Por fillimisht bëni këto që keni në dorë vetë. Propozoni ndryshimin e reformës. Keni mandat brenda komisionit zgjedhor dhe keni të drejtën e vetos. Këto i dhanë Edi Ramës diasporën dhe Rama iu dha listën e mbyllur. Kjo ishte marrëveshja që u mbyll brenda ditës. Tani them most ë bëhet prap ky teatër i pisët. Tani duhet të bëjnë një reformë të qartë, se cili është objektivi. Domethënën të bëhet një reformë që qytetarëve tu rikthehet te sistemi zgjedhor. Opozita duhet tu bëjë të qartë qytretarëve se çfarë mendojnë për reformën administrative. Kjo duhet bërë që në zgjedhjet lokale të hyhet me një shpërndarje të re administrative edhe me një ligj të ri zgjedhor”, tha Shehi./mxh

Deputeti i Lëvizjes “Bashkë”, Redi Muçi në një dalje televizive ka thënë se partia e tij vijon të jetë kundër çdo bashkëpunimi me Berishën.

Muçi tha se ftesa e Berishës për partitë e reja është thjesht një interes i dmeokratëve për të rifituar një lloj legjitimiteti.

Deputeti i Lëvizjes “Bashkë” deklaroi se ekzistojnë dy faktorë që lidhin Berishën dhe Ramën, reforma zgjedhore dhe ndryshimet kushtetuese.

Më tej, Muçi tha se ndryshimet e Kodit Zgjedhor nuk avantazhojnë partitë e reja.

“Qëndrimi ynë ka qenë gjithmonë kundër çdo bashkëpunimi ku faktori përbashkues është Sali Berisha dhe Partia Demokratike. E konsiderojmë këtë thjesht si manovër të radhës të Partisë Demokratike për të rifituar një lloj legjitimiteti. Është interes që lidh Berishën me partitë e reja. Por, për ne janë dy faktorë që lidhin Berishën me Ramën. E para, lidhet me kufizimin nëpërmjet ndryshimeve kushtetuese, të veprimit të drejtësisë ndaj figurave kryesore, siç janë Rama dhe Berisha; E dyta, Reforma Zgjedhore, që Berisha dhe Rama duan të kufizojnë numrin e deputetëve dhe vetë të bëhen senatorë të përjetshëm. Rrjedhimisht, ne besojmë që Kodi Zgjedhor, i hartuar nga Rama dhe Berisha, nuk do të avantazhojnë partitë e reja”, tha Muçi./mxh

Presidenti amerikan Donald Trump ka njoftuar se tarifat me Indinë do të ulen në 18%. Kjo vjen pasi kryeministri Narendra Modi ra dakord të ndalojë blerjet e naftës ruse.

Trump theksoi se ka biseduar me Modin mëngjesin e sotëm ku kanë folur për shumë tema, përfshirë tregtinë dhe përfundimin e luftës në Ukrainë.

Në një reagim në platformën X, presidenti amerikan theksoi se “Kjo do të ndihmojë në përfundimin e luftës në Ukrainë”.

Trump pretendoi se India është zotuar gjithashtu të blejë energji, teknologji dhe produkte të tjera amerikane me vlerë mbi 500 miliardë dollarë./mxh

Giacomo Vrioni pritet të jetë përforcimi i radhës i Cesena-s në repartin ofensiv. Sulmuesi shqiptar është aktualisht agjent i lirë pas përfundimit të eksperiencës në MLS.

Përpara zyrtarizimit, ai do t’i nënshtrohet vizitave mjekësore dhe më pas pritet të bashkohet me klubin e Serie B. Te Cesena, Vrioni do të gjejë edhe Kristian Shpendin, duke u bërë një tjetër italo-shqiptar në skuadër.

Karriera e tij ka kaluar në disa kampionate europiane dhe në Shtetet e Bashkuara. Eksperienca e fundit në MLS u kushtëzua nga dëmtimet, që i kufizuan minutazhin.

Vrioni ka luajtur më herët në Serie A me Juventusin dhe në Serie B me Venezian. Firma me Cesena-n mund të shërbejë edhe si mundësi për rikthim në Kombëtaren shqiptare./mxh

Izraeli “është gati për çdo situatë “, kështu deklaroi Benjamin Netanyahu në një fjalim në Knesset.

Kjo deklaratë e tij vjen pas një përplasje me Iranin dhe mes përgatitjeve të SHBA-së për një sulm të mundshëm ndaj regjimit Iranian.

“Kushdo që na sulmon do të përballet me pasoja të rënda”, paralajmëroi kryeministri izraelit.

Irani ka nga ana tjetër paralajmëruar se nëse sulmohet nga SHBA-të, do të përgjigjet me hakmarrje të ashpër kundër objektivave izraelite dhe amerikane në rajon./mxh

Toka quhet shpesh “planeti blu” për shkak të ngjyrës së oqeaneve, që mbulojnë rreth ¾ të sipërfaqes së saj. Kjo ide u forcu edhe nga fotografia historike e sondës Voyager në 1990, e bërë nga orbitën e Neptunit, rreth 6 miliardë km larg, ku Toka dukej si një pikë e kaltër, e njohur si “Pale Blue Dot”.

Por dikur oqeanet nuk ishin të kaltërta. Një studim i publikuar në revistën Nature tregon se para 4–2.5 miliardë vitesh, uji i parë i Tokës ishte i gjelbër. Shkak ishin bakteret e hershme fotosintetike, të quajtura edhe alga të gjelbra, të cilat pasuronin ujërat. Një tjetër faktor ishte përqendrimi i lartë i hekurit, që i jepte oqeaneve këtë ngjyrë. Me kalimin e kohës, hekurit u zvogëlua dhe shpërnda në atmosferë, ndërsa ndryshimet në fotosintezë sollën gradualisht ngjyrën blu të sotme.

Sipas shkencëtarëve, nëse aktiviteti vullkanik do të rritej ndjeshëm dhe do të çlironte më shumë squfur, ngjyra e oqeaneve mund të ndryshonte përsëri dhe gradualisht të merrte nuanca vjollcë. Megjithatë, ky transformim do të kërkonte miliona vite për t’u realizuar./mxh

Policia Kufitare e Korçës ka konstatuar dhe ndaluar 16 emigrantë të paligjshëm të moshës dhe nacionaliteteve të ndryshme, të cilët ishin strehuar në një ndërtesë të braktisur në fshatin Qatrom.

Sipas informacioneve paraprake, emigrantët ishin fshehur në një ndërtesë në afërsi të teqesë së Qatromit, ndërsa gjatë ndërhyrjes së policisë u konstatua se njëri prej tyre kishte probleme shëndetësore, pasi kishte ndrydhur këmbën. Menjëherë pas njoftimit nga policia kufitare, në vendngjarje mbërriti ambulanca për t’i dhënë ndihmën e parë mjekësore.

Burime bëjnë me dije se kontrollet janë shtuar nga Policia Kufitare e Korçës, me qëllim jo vetëm evidentimin e emigrantëve të paligjshëm, por edhe identifikimin e personave që ndihmojnë këta shtetas për të lëvizur drejt Tiranës apo qyteteve të tjera të vendit.

Kontrollet në zonë vijojnë, ndërsa emigrantët po dërgohen drejt Drejtorisë së Kufirit dhe Migracionit në Korçë për veprime të mëtejshme./mxh

Vijojnë paraqitjet pozitive të futbollistëve kuqezi që aktivizohen me klubet e tyre, duke konfirmuar formën e mirë dhe rolin e rëndësishëm në skuadrat respektive në kampionatet europiane.

Qazim Laçi ishte protagonist në Turqi me Rizesporin, duke dhënë asist në barazimin 2-2 ndaj Basaksehir. Mesfushori i Kombëtares asistoi në golin e dytë të shënuar nga Mihaila në minutën e 68-të, duke regjistruar asistin e katërt sezonal në 19 ndeshje kampionati.

Laçi numëron gjithashtu edhe 3 gola këtë sezon, duke qenë një nga elementët më konstantë të skuadrës së tij.

Paraqitje shumë të mirë zhvilloi edhe Taulant Seferi me Bodrumspor. Sulmuesi shqiptar shënoi një gol në fitoren e thellë 3-0 ndaj Serik Spor, duke arritur kuotën e 12 golave në 22 ndeshje kampionati, ndërsa ka dhuruar edhe 4 asiste.

Titullare me klubet e tyre këtë javë ishin gjithashtu Thomas Strakosha, Mario Mitaj, Berat Gjimshiti, Ylber Ramadani, Juljan Shehu dhe Jasir Asani, të cilët vijojnë të japin kontribut të rëndësishëm.

Paraqitjet e futbollistëve kuqezi jashtë vendit mbeten një sinjal pozitiv për Kombëtaren, teksa forma dhe aktivizimi i rregullt në nivele të larta rrit konkurrencën dhe alternativat në prag të sfidave të radhës ndërkombëtare./mxh

Gazetari Mentor Kikia ka folur mbrëmjen e sotme lidhur me protestën kombëtare që pritet të zhvillojë opozita më 10 shkurt.

I ftuar në Euronews Albania, Kikia u shpreh se opozita duhet të jetë e kursyer në objektivat që deklaron, pasi sipas tij ndikon në dekurajimin e qytetarëve që e mbështesin.

Ndër të tjera shtoi se protesta e 10 shkurtit do të jetë e njëjtë me atë të 24 janarit.

“Do të duhet që objektivat e opozitës të jenë real. Kur targeton objektivin themelor se do bjerë qeveria, këtë e kemi dëgjuar 10 vjet rresht. Do të duhet të jemi realist, se ccfarë do të synojë me këtë protestë. Nesë protesta e 24 janarit, prodhoi lajm ndërkombëtar, kjo ishte fitore e opozitës. Pushteti i socialistëve është i stabilizuar. I kemi dëgjuar premtimet, ne nuk futemi në zgjedhje me Edi Ramën. U futën në zgjedhje dhe humbën. Opozita duhet të jetë e kursyer në deklarimin e këtyre objektivave sepse kur nuk realizohen prodhojnë dekurajim tek qytetarët që të ndjekn. Mund të ketë grevë urie, por nuk ka nevojë të vësh afatin se brenda një muaji do të ikë kjo qeveri. Sepse kjo shndërrohet më pas në një luftë nervash. 10 shkurti do të jetë një protestë e ngjashme me atë të datës 24 janar. Me intensitet më të madh. Besoj se sërish do të shkohet po në të njëjtat terma, tension lajm, incidente, deklarata”, tha Kikia./mxh

Vendimi i Komisionit Qendror të Zgjedhjeve për të mos miratuar listën e kandidatëve për deputetë të Listës Serbe është “në kundërshtim me të drejtën e qytetarëve për të zgjedhur në mënyrë demokratike përfaqësuesit e tyre”.

“Çdo përpjekje për të shkelur këtë parim bazë minon partneritetin mes Shteteve të Bashkuara dhe Kosovës”, tha për Radion Evropa e Lirë një zëdhënës i Ambasadës amerikane në Prishtinë.

Më 31 janar, KQZ-ja shpalli rezultatet përfundimtare të zgjedhjeve të parakohshme parlamentare të 28 dhjetorit. Por, gjatë mbledhjes, anëtarët e Komisionit miratuan listat e kandidatëve të të gjithë partive, përveç Listës Serbe – partisë kryesore të serbëve në Kosovë që ka mbështetjen e Beogradit.

Tre anëtarë të KQZ-së votuan për, dy kundër nga Lëvizja Vetëvendosje, dhe anëtarët tjerë abstenuan. Lista Serbe më 2 shkurt është ankuar në Panelin Zgjedhor për Aneksa dhe Parashtresa për këtë vendim të KQZ-së. Igor Simiç nga ky subjekt tha se vendimi është i “paligjshëm, antiserb dhe diskriminues”, duke shtuar se pret që PZAP ta “shfuqizojë atë”.

Ndërkaq kryediplomati serb, Marko Gjuriç, e ka dënuar ashpër vendimin e institucionit kryesor për organizimin e zgjedhjeve në Kosovë. Gjuriç e ka cilësuar këtë vendim si një tjetër sulm serioz ndaj të drejtave të popullit serb në Kosovë.

“Në vend të shtensionimit dhe rikthimit të besimit, ne jemi dëshmitarë të hapave të rinj që thellojnë mosbesimin dhe konfirmojnë se heqja sistematike e të drejtës së votës së serbëve mbetet praktikë dhe jo përjashtim”, shkroi Gjuriç në X.

Gjatë mbledhjes, vetë kreu i KQZ-së, Kreshnik Radoniçi, e cilësoi si “të pakuptimtë” mosmiratimin e përbërjes së Listës Serbe nga anëtarët e Komisionit, duke argumentuar se kishte kaluar afati për ankesa pasi votat veçse janë rinumëruar dhe, sipas ligjeve, nuk parashihen ankesa për një proces të tillë.

Ndërkaq, Eugen Cakolli nga Instituti Demokratik i Kosovës (KDI), deklaroi se KQZ-ja kreu shkelje, fillimisht duke shpallur rezultate pa u konsumuar afati ligjor për ankesa, dhe më pas duke shpallur rezultate “të pjesshme”.

“Ajo që ndodhi sot është absurde. Cilido anëtar që votoi kundër ose abstenoi, nëse kishte dyshime reale për rezultatet, ishte ai që duhej të ankohej. Situata nuk zgjidhet me votim politik brenda KQZ-së dhe as duke bllokuar ose lejuar rezultate sipas interesave të momentit”, tha ai.

LVV-ja e kryeministrit në detyrë, Albin Kurti, që ka fituar zgjedhjet e dhjetorit, edhe më herët kishte tentuar që ta pengonte Listën Serbe që të merrte pjesë në zgjedhje. Por, PZAP-i vazhdimisht ka rrëzuar vendimet e KQZ-së.

Në Kuvendin e Kosovës, dhjetë vende janë të rezervuara për komunitetin serb. Lista Serbe në zgjedhjet e dhjetorit fitoi nëntë, ndërsa një e siguroi Nenad Rashiç nga Partia për Liri, Drejtësi dhe Mbijetesë. LVV-ja këmkëmbëngul në qëndrimin e saj se Lista Serbe është “dorë e zgjatur e Beogradit”.

Si një nga arsyet përse nuk dëshiron bashkëpunim me të, përmend faktin se ajo nuk është distancuar kurrë nga ish-nënkryetari i saj, Millan Radoiçiç, i cili ka marrë përgjegjësinë për sulmin e armatosur në Banjskë, në shtator të vitit 2023. Partia e Kurtit shprehet e hapur për bashkëpunim me Rashiçin dhe këmbëngul që pozitat në Qeverinë apo Kuvendin e Kosovës, të cilat me Kushtetutë u takojnë përfaqësuesve të komunitetit serb, t’i jepen pikërisht partisë së tij.

Por, Gjykata Kushtetuese e Kosovës konstatoi javën e kaluar se nënkryetari i Kuvendit nga radhët e komunitetit serb, mund të emërohet vetëm nga partia më e madhe parlamentare e këtij komuniteti, që në këtë rast është Lista Serbe. Shpallja e rezultateve nga KQZ vjen pas përfundimit të rinumërimit të plotë të votave të rregullta, pasi u gjetën mospërputhje në votat e kandidatëve për deputetë.

Vetëm pas përfundimit të afateve për ankesa në PZAP dhe në Gjykatën Supreme, KQZ mund të certifikojë rezultatet dhe të hapë rrugë për formimin e institucioneve të reja të vendit./mxh

Last Updated on 02/02/2026 by Monika

Kryetari i Partisë Demokratike, Sali Berisha ka mbajtur fjalën e tij në foltoren e radhës përpara Kryeministrisë.

Berisha tha se qytetarët shqiptarë nuk pajtohen me këtë regjim që po i plaçkit çdo ditë. Kryedemokrati tha se rruga përpara nuk është e lehtë, por janë më të vendosur se kurrë në misionin e tyre.

Sa u takon protestave, Berisha tha se do të organizohen deri në fitore, pasi sipas tij zëri i opozitës ka tronditur regjimin në themel.

“Qytetarët shqiptarë nuk pajtohen kurrë me një regjim që i plaçkit çdo ditë, me një regjim që i ka shndërruar portet dhe Shqipërinë në platformë kryesore të helmeve të drogës.

Në këtë vend ata që i besojnë Shqipërisë jemi ne. Rrugën përpara nuk e kemi të lehtë, por e kemi të qartë si rrezja e diellit. Misionin nuk e kemi të lehtë por jemi më të vendosur se kurrë.

Shqipëria dhe fati ynë janë një. Do të dalim në prtesta gjer në fitore se ne i besojmë Zotit, por dhe Shqipërisë, se kjo tokë ëhstë e bekuar. Shqipëria është e bukura e dheut dhe mund të bëhet vendi i ëndrrës shqiptare. Zëri ynë ka tronditur në themel këtë regjim. Edi Rama sot është më i diskredituar se kurrë”, tha Berisha./mxh

Deputeti Eno Bozdo ka ndarë detaje nga diskutimet në mbledhjen e Grupit Parlamentar të Partisë Demokratike.

Në reagimin e tij në rrjetet sociale, Bozdo shprehet se në mbledhje u trajtuan çështje organizative për protestën e 10 shkurtit dhe koordinimi i strukturave në çdo degë.

Gjithashtu bën me dije se u trajtuan çështje që lidhen me qëndrimet politike dhe teknike të PD-së për reformën territoriale dhe atë zgjedhore.

Postimi i plotë:

Sot, në mbledhjen e Grupit Parlamentar të Partisë Demokratike, u trajtuan çështjet organizative për protestën e 10 shkurtit dhe koordinimi i strukturave në çdo degë.

U theksua nevoja që deputetët të intensifikojnë komunikimin me qytetarët, duke shfrytëzuar çdo platformë për të përcjellë qëndrimet tona.

Trajtuam gjithashtu çështje të rëndësishme që kanë lidhje me qëndrimet tona politike dhe teknike për reformën territoriale dhe atë zgjedhore!/mxh

Last Updated on 02/02/2026 by Monika

Edhe këtë të hënë Partia Demokratike ka organizuar “Foltoren” e radhës para Kryeministrisë.

Fillimisht fjalën e kanë nisur qytetarët, të cilët kanë shprehur shqetësimet e tyre, kundër korrupsionit dhe keqqeverisjes Rama.

Më herët PD organizoi protestën kombëtare, ku mijëra qytetarë iu bashkuan duke protestuar kundër korrupsionit.

Protesta e 24 janarit, u shoqërua me përplasje me policinë, ku u hodh masivisht gaz lotsjellës./mxh

Olivia Dean u konfirmua si një nga emrat më të rëndësishëm të vitit në Grammy Awards 2026, duke fituar çmimin Best New Artist. Artistja, e cila u bë masivisht e njohur nga shpërthimi i këngëve të saj në TikTok, e shoqëroi këtë moment me një mesazh të qartë identiteti dhe mirënjohjeje.

Në fjalën e saj të falënderimit, Dean vuri theksin te historia e familjes dhe rrënjët e saj, duke thënë se është aty “si mbesa e një emigrante” dhe se suksesi i saj është fryt i guximit të brezave para saj një mënyrë për të kujtuar se prapa “yjeve të rinj” shpesh fshihet një histori sakrifice dhe qëndrueshmërie.

Sipas profilit të saj publik, në qendër të kësaj historie qëndron gjyshja nga nëna, Carmen, e cila mbërriti në Mbretëria e Bashkuar në fillim të viteve ’50, si pjesë e brezit që njihet gjerësisht si “Windrush” valë punëtorësh nga ish-kolonitë britanike që shkuan për të ndihmuar vendin në rindërtimin pas Luftës së Dytë Botërore. Në vijim, artistja shpesh ka përmendur edhe figurën e nënës së saj, Christine, e angazhuar në politikë dhe e lidhur me Women’s Equality Party, si një shembull i qartë i aktivizmit dhe këmbënguljes së grave në familjen e saj.

Kjo prapavijë shpjegon pse Dean e ka pasur të natyrshme të flasë hapur për origjinën e saj Guajana-Xhamajka dhe të mos e trajtojë suksesin vetëm si “fat” të rrjeteve sociale, por si vazhdimësi e një identiteti që ajo e mbron me krenari.

Dean nuk e shmang etiketën “feministe” përkundrazi, e përdor si busull artistike. Muzika e saj frymëzohet nga zëra të mëdhenj të black music, si Lauryn Hill dhe Aretha Franklin, por ajo e sjell këtë trashëgimi në një pop modern, të kapshëm, ku këndvështrimi është vendimtar: këngët e dashurisë shkruhen nga pozicioni i një gruaje që nuk është “nën” askënd, por e vetëdijshme për vlerën, kufijtë dhe dëshirat e saj.

Kjo duket edhe te titujt që kanë bërë xhiron e reels-eve: Man I Need dhe So Easy (To Fall In Love). Ato tingëllojnë si këngë që të ngelen në kokë, por në thelb mbajnë një ide: pyetjen nëse personi përballë është vërtet i duhuri jo thjesht “a më do”, por “a më meriton”.

Përtej muzikës, ajo që e ka bërë Dean të duket si një “zbulim i plotë” është prania skenike. Ajo lëviz me siguri dhe finesë, e mbështetur nga vite përvoje (edhe si koriste), duke pasur nevojë për pak elementë për të mbajtur publikun: zërin, interpretimin dhe qartësinë e fjalës.

Artistja ka lënë të kuptohet gjithashtu se dëshiron që koncertet të mos jenë thjesht argëtim: në shfaqjet e saj synon të shpërndajë materiale informuese për të drejtat e grave dhe të ruajë çmime më të aksesueshme të biletave për të nxitur pjesëmarrjen e komuniteteve lokale një aktivizëm i ri, më shumë në veprime e detaje sesa në slogane.

Dhe kur u pyet dikur për mënyrën si zgjedh veshjet për skenën, ajo e përmblodhi me një frazë të thjeshtë: “Nëse shkëlqen, mjafton.” Pas Grammy-ve, duket se jo vetëm veshjet por vetë Olivia Dean është ajo që po shkëlqen më fort./mxh

Policia italiane po përgatitet për Lojërat Olimpike Dimërore Milano-Cortina 2026, duke vendosur në vijën e parë njësitë me qentë dhe ekipet e shpërthimit të bombave për sigurinë e zonave olimpike.

Njësitë me qentë janë të trajnuara përmes një programi të specializuar që lidh çdo qen me trajnerin e tij. Policia thotë se ekipet lejohen të operojnë vetëm kur partneriteti midis qenit dhe trajnerit arrin një nivel të plotë koordinimi.

Këto njësitë punojnë në katër fusha: mbështetje dhe mbikëqyrje të rendit publik, zbulim të narkotikëve, zbulim të eksplozivëve dhe kërkim-shpëtim, si në hapësira të hapura, ashtu edhe nën rrënoja.

Bashkë me to operojnë edhe oficerët e shpërthimit të bombave, të cilët kryejnë inspektime parandaluese dhe procedura pastrimi në ngjarje të mëdha, përfshirë Lojërat e 2026‑s.

Policia italiane thotë se puna e përbashkët e njësive me qentë dhe teknikëve të bombave është një shtyllë kryesore e sistemit të sigurisë në Milano-Cortina, me qëllim mbrojtjen e sportistëve, delegacioneve dhe spektatorëve./mxh

Kalimi kufitar i Rafah në Gaza u hap sërish për qindra palestinezë, të hënën, më 2 shkurt, një hap i rëndësishëm në zbatimin e armëpushimit që synon t’i japë fund luftës.

Ky është i vetmi kalim për këmbësorë drejt Egjiptit, i cili kishte qëndruar i mbyllur pothuajse dy vjet. Hyrja në kalim bëhet me kufizime të rrepta, por lejon largimin ose rikthimin e banorëve të Gazës.

Rafah dikur ishte një qytet me rreth 250 mijë banorë, por që nga konfliktet e mëparshme Izraeli e ka shkatërruar dhe zbrazur plotësisht. Sot, kalimi mbetet rruga e vetme për të dalë jashtë për shumicën e mbi 2 milion banorëve të Gazës.

Video nga vendi tregon vullnetarët e Kryqit të Kuq duke ndihmuar qytetarët të hipin në automjetet pranë kalimit, i cili ka qëndruar pothuajse i mbyllur gjatë shumicës së kohës së luftës.

Rihapja e këtij kalimi është një nga hapat kryesorë të fazës fillestare të armëpushimit, të ndërmjetësuar nga SHBA në tetor, dhe konsiderohet vendimtare për qasjen e palestinezëve në botën e jashtme./mxh