Një 23-vjeçar është arrestuar nga Policia e Korçës pasi vodhi pesë targa të automjeteve.

Gjatë kontrollit në banesën e këtij shtetasi, u gjetën 5 targat e vjedhura, të cilat u sekuestruan në cilësinë e provës materiale.

Vijon puna për dokumentimin e plotë të veprimtarisë kriminale të këtij shtetasi.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme./abcnews.al

Ushtria e Tajlandës ka akuzuar Kamboxhian për shkelje të një marrëveshjeje armëpushimi të nënshkruar rishtazi, të arritur pas javësh përleshjesh vdekjeprurëse që detyruan gati një milion njerëz të largoheshin nga shtëpitë e tyre.

Në një deklaratë, ushtria tajlandeze ka thënë se më shumë se 250 mjete ajrore pa pilot (UAV) u zbuluan duke fluturuar nga ana kamboxhiane të dielën në mbrëmje.

Armëpushimi ka hyrë në fuqi në mesditë sipas kohës lokale të shtunën. Të dyja palët kanë rënë dakord të ngrinin vijat e frontit aty ku janë tani, të ndalonin përforcimet dhe të lejonin civilët që jetonin në zonat kufitare të ktheheshin sa më shpejt të ishte e mundur.

Vendimi është parë si një përparim, i cili erdhi pas ditësh bisedimesh midis të dy vendeve, me inkurajim diplomatik nga Kina dhe SHBA-ja.

Në një deklaratë të hënën, Ushtria Mbretërore Tajlandeze ka thënë se veprimet e Kamboxhias “përbëjnë provokim dhe shkelje të masave që synojnë uljen e tensioneve”, duke shtuar se ato ishin “në kundërshtim” me kushtet e armëpushimit.

Gjithashtu ka shtuar se “mund të duhet të rishqyrtojë” lirimin e 18 ushtarëve kamboxhianë të mbajtur në Tajlandë që nga korriku. Kamboxhia nuk ka komentuar ende. Reagimi vjen vetëm disa orë pasi ministri i Jashtëm i Kinës, Wang Yi, vlerësoi armëpushimin “e fituar me vështirësi”, dhe presidenti i SHBA-së, Donald Trump, vlerësoi “përfundimin e shpejtë dhe të drejtë”.

Kryeministri izraelit Benjamin Netanyahu do të takohet me Donald Trump në Florida të hënën, me presidentin e SHBA-së që po shtyn për të kaluar në fazën tjetër të planit të brishtë të armëpushimit në Gaza.

Takimi vendimtar në resortin luksoz Mar-a-Lago të Trump vjen ndërsa disa zyrtarë të Shtëpisë së Bardhë kanë frikë se si Izraeli ashtu edhe Hamasi po ecin ngadalë në fazën e dytë të armëpushimit të tyre.

Trump, i cili tha se Netanyahu kishte kërkuar bisedimet, thuhet se është i etur të njoftojë – që në janar – një qeveri teknokratike palestineze për Gazën dhe vendosjen e një force ndërkombëtare stabilizimi.

Zëdhënësja e qeverisë izraelite Shosh Bedrosian tha se Netanyahu do të diskutojë fazën e dytë, e cila përfshin sigurimin që “Hamasi të çarmatoset, Gaza të çmilitarizohet”.

Por Netanyahu do të përpiqet gjithashtu ta zhvendosë fokusin te Irani gjatë takimit të tij të pestë në Shtetet e Bashkuara me Trump këtë vit, mes raporteve se ai do të shtyjë për më shumë sulme amerikane ndaj programit bërthamor të Teheranit.

Netanyahu do të ngrinte gjithashtu çështjen e “rrezikut që Irani paraqet jo vetëm për rajonin e Lindjes së Mesme, por edhe për Shtetet e Bashkuara”, tha Bedrosian përpara se të fluturonte me kryeministrin izraelit.

Vizita e Netanyahut kulmon disa ditë të tensionuara diplomacie ndërkombëtare në Palm Beach, ku Trump priti homologun ukrainas Volodymyr Zelensky të dielën për bisedime mbi përfundimin e pushtimit rus.

Armëpushimi në Gaza në tetor është një nga arritjet kryesore të vitit të parë të Trump në pushtet, por administrata e tij dhe ndërmjetësit rajonalë duan të ruajnë vrullin.

Koha e takimit të Netanyahut është “shumë domethënëse”, vlerëson Gershon Baskin, bashkëkryetari i komisionit të ndërtimit të paqes Aleanca për Dy Shtete, i cili ka marrë pjesë në negociata të fshehta me Hamasin.

“Faza e dytë duhet të fillojë”, i tha ai AFP-së, duke shtuar se “mendoj se amerikanët e kuptojnë se është vonë sepse Hamasi ka pasur shumë kohë për të rivendosur praninë e tij”.

Parlamenti i sapozgjedhur i Irakut u mblodh të hënën për seancën e tij të parë që nga zgjedhjet kombëtare të mbajtura në nëntor, duke hapur zyrtarisht rrugën për nisjen e procesit të formimit të një qeverie të re.

Gjatë kësaj seance të parë, deputetët pritet të zgjedhin kryetarin e parlamentit dhe dy nënkryetarët. Më pas, brenda 30 ditëve nga mbajtja e seancës konstituive, ligjvënësit duhet të zgjedhin presidentin e ri të vendit.

Presidenti i zgjedhur do t’i japë mandatin për formimin e qeverisë bllokut më të madh parlamentar, një proces që në Irak zakonisht zgjat me muaj për shkak të negociatave mes forcave politike.  / abcnews.al /

Presidenti amerikan Donald Trump dhe presidenti rus Vladimir Putin do të zhvillojnë “shumë shpejt” një tjetër bisedë telefonike, ka njoftuar Kremlini, pas takimit që Trump pati mbrëmë në Florida me presidentin e Ukrainës, Volodymyr Zelenskyy.

Zëdhënësi i Kremlinit, Dmitry Peskov, tha se dy liderët tashmë kanë zhvilluar një telefonatë, të cilën Trump e ka cilësuar si “produktive”, dhe se një bisedë e re pritet pas diskutimeve të presidentit amerikan me palën ukrainase.

Sipas Kremlinit, Moska ende nuk është në dijeni të rezultateve konkrete të negociatave mes Shteteve të Bashkuara dhe Ukrainës, ndërsa nuk ka asnjë plan për një telefonatë mes Zelenskyyt dhe Putinit.

I pyetur nëse Kremlini pajtohet me vlerësimin e Trump se paqja është më afër dhe bisedimet po hyjnë në fazën përfundimtare, Peskov u përgjigj shkurt: “Sigurisht.”

Megjithatë, Kremlini ka përsëritur kërkesat e tij që Ukraina të tërheqë trupat nga rajoni i Donbasit, si kusht për ndalimin e luftimeve.  / abcnews.al /

Tre oficerë policie dhe gjashtë anëtarë të Shtetit Islamik u vranë në përplasje me armë gjatë një operacioni në Turqinë veriperëndimore.

Tetë oficerë të tjerë dhe një roje nate u plagosën, u tha gazetarëve Ministri i Brendshëm Ali Yerlikaya. (Ali Jerlikaja)

Ngjarja ndodhi në provincën Yalova (Jalova), në jug të Stambollit, ndërsa policia bastisi një shtëpi ku fshiheshin militantët.

5 gra dhe 6 fëmijë që ndodheshin në banesën e terroristëve u evakuuan në mënyrë të sigurt, ndërsa forcat speciale nga provinca fqinje e Bursës u dërguan për të përforcuar operacionin.

Ndërsa konfrontimi u përhap në rrugë, pesë shkolla në zonë u mbyllën. Autoritetet gjithashtu ndërprenë furnizimin me gaz natyror dhe energji elektrike si masë paraprake, ndërsa civilëve dhe automjeteve iu ndalua hyrja në lagje.

Siç raportojnë mediat turke, policia kreu operacione edhe në 108 vendndodhje të tjera në gjithsej 15 rajone.

Javën e kaluar, policia turke nisi dhjetëra bastisje, duke ndaluar 115 militantë të grupit ekstremist të cilët dyshohet se po planifikonin sulme gjatë festimeve të Krishtlindjeve dhe Vitit të Ri.

Zyrtarët thanë se grupi kishte bërë thirrje për veprime, veçanërisht kundër komuniteteve jo muslimane, gjatë festave.

ISIS ka kryer një seri sulmesh vdekjeprurëse në Turqi vitet e fundit, duke përfshirë të shtënat në një klub nate në Stamboll gjatë festimeve të Vitit të Ri më 1 janar 2017, ku u vranë 39 persona.  / abcnews.al /

Në Kinë, aty ku vargmalet kanë ndarë qytete dhe komunitete prej shekujsh, infrastruktura moderne po riformëson hartën. Në provincën e Xinjiang është hapur për qarkullim tuneli Tianshan Shengli, i cilësuar si tuneli rrugor më i gjatë në botë, me një gjatësi prej 22.13 kilometrash.

Tuneli është pjesë kyçe e autostradës G0711 Urumqi–Yuli, e cila ka hyrë gjithashtu në funksion dhe lidh drejtpërdrejt veriun dhe jugun e Xinjiangut. Me hapjen e saj, udhëtimi mes Urumqit, qytetit më të madh në veri, dhe Korla, qendra kryesore urbane e jugut, është zvogëluar nga rreth shtatë orë në afro tre orë.

Inxhinieri nën kushte ekstreme: Si u ndërtua tuneli që sfidoi malet?

Autostrada, e ndërtuar për pesë vite, ka një gjatësi prej 324.7 kilometrash dhe ka kushtuar rreth 46.7 miliardë juanë (mbi 6.6 miliardë dollarë). Ndërsa vetëm projekti i tunelit të autostradës ka kushtuar 3.8 miliardë dollarë.

Ky projekt  përfaqëson një sfidë të jashtëzakonshme inxhinierike: tuneli arrin një thellësi maksimale prej 1,112 metrash nën tokë dhe kalon nëpër 16 zona të çarjeve gjeologjike. Për ndërtimin e tij, inxhinierët dhe 3000 punëtoret e angazhuar në projekt janë përballur me presion të lartë shkëmbor, aktivitet sizmik, temperatura ekstreme dhe kushte të vështira mjedisore.

Për të përballuar terrenin brutal të maleve Tianshan, inxhinierët kinezë zhvilluan një sistem inovativ të quajtur “tre tunele dhe katër puse vertikale”. Në vend të një galerie të vetme, u hapën tre tunele paralele: një tunel kryesor dhe dy ndihmës anësorë.

Këto tunele ndihmëse shërbyen për vlerësime të vazhdueshme gjeologjike përpara gërmimit kryesor, për akses të sigurt të punëtorëve dhe makinerive, si dhe për ventilim dhe evakuim emergjent. Katër puset vertikale, disa prej tyre mbi 700 metra të thella, lidhnin drejtpërdrejt tunelin me sipërfaqen, duke lejuar punime nga disa pika njëkohësisht dhe duke përshpejtuar ndërtimin.

Projekti konsiderohet një hap strategjik për zhvillimin ekonomik dhe lidhjen infrastrukturore të Xinjiangut, duke treguar edhe një herë se ambicia kineze ‘shpon’ dhe malet.

Një vajzë 15-vjeçare dhe nëna e saj kanë humbur jetën në Itali brenda pak orësh nga njëra-tjetra.

Dyshimet e para lidhen me një helmim të mundshëm nga ushqimi, i cili dyshohet se është shkaktuar nga një darkë me peshk e konsumuar gjatë festave të Krishtlindjeve. Nga ana tjetër edhe babai i vajzës, 55 vjeç, ndodhet ende i shtruar në Spital.

Vajza, Sara Di Vita, ndërroi jetë të shtunën në mbrëmje, ndërsa nëna, dhe nëna e e saj, Antonella Di Ielsi, vdiq disa orë më vonë, në mëngjesin e së dielës.

Prokuroria e Campobasso-s ka urdhëruar kryerjen e autopsisë për të sqaruar shkaqet e vdekjes.

Sara Di Vita jetonte në Pietracatella, në provincën e Campobasso-s, dhe ndiqte shkollën e mesme klasike në kryeqytetin e Molise-s. Prej disa ditësh ajo dhe anëtarë të tjerë të familjes ndiheshin keq dhe ishin paraqitur në urgjencën e spitalit. Fillimisht u dyshua për helmim nga ushqimi, por situata nuk u vlerësua si e rëndë dhe familja u dërgua në shtëpi.

Të shtunën pasdite, gjendja shëndetësore e vajzës u përkeqësua ndjeshëm. Ajo u shtrua në kujdes intensiv, ku ndërroi jetë rreth orës 22:30. Nëna u shtrua gjithashtu në spital, por vdiq të dielën në mëngjes. Babai shfaqi simptoma të ngjashme dhe mbetet nën kujdes mjekësor. E vetmja anëtare e familjes që nuk u sëmur ishte motra 20-vjeçare.

Sipas mediave vendase, e gjithë familja u ndje keq pas darkës së Krishtlindjeve, gjatë së cilës u konsumua peshk, ushqime deti dhe midhje. Në darkë morën pjesë edhe persona të tjerë, të cilët nuk shfaqën simptoma. Pas disa orësh, babai, nëna dhe vajza filluan të ndiheshin keq dhe iu drejtuan urgjencës dy herë, por u kthyen në shtëpi. Vetëm në mbrëmjen e së shtunës, për shkak të dhimbjeve dhe ngërçeve të forta, familja u rikthye në spital.

Vetëm autopsia pritet të përcaktojë nëse vdekjet janë shkaktuar nga helmimi ushqimor apo nga ndonjë intolerancë e rëndë ndaj ushqimit.

“Jemi të tronditur, është një tragjedi që na lë pa fjalë. Qyteti është në mosbesim. Shpreh ngushëllimet e mia dhe të gjithë komunitetit për familjen”, deklaroi kryebashkiaku i Pietracatella-s, Antonio Tommasone.

Antonella Di Ielsi punonte së bashku me bashkëshortin e saj, kontabilist, Gianni Di Vita, i cili në të kaluarën ka mbajtur edhe poste politike lokale, përfshirë atë të kryetarit të bashkisë së Pietracatella-s.

Dy persona kanë humbur jetën në Suedi pas një stuhie të fuqishme dimërore që ka përfshirë vendet nordike, duke shkaktuar ndërprerje të udhëtimeve dhe mungesë energjie elektrike.

Instituti Suedez i Meteorologjisë dhe Hidrologjisë lëshoi alarme për erëra të forta në pjesën veriore të vendit, teksa u godit nga stuhia Johannes.

Sipas BBC, një person rreth të 50-ave humbi jetën pasi u godit nga një pemë në resortin e skive Kungsberget në jug të vendit, raportuan mediat lokale dhe policia; ndërsa kompania rajonale e energjisë Hemab tha se një nga punonjësit e saj vdiq në një aksident “në terren”.

Dhjetëra mijëra banesa në Suedi, Norvegji dhe Finlandë kanë mbetur pa energji elektrike. Në Suedi, mbi 40,000 banesa u prekën nga ndërprerjet e energjisë dhe shumë shërbime hekurudhore u anuluan, raportoi agjencia suedeze e lajmeve TT.

Disa fluturime, shërbime hekurudhore dhe tragete në pjesë të ndryshme të vendeve nordike janë anuluar.

Rrugët dhe shërbimet hekurudhore janë gjithashtu të ndërprera për shkak të kushteve të stuhisë.

Ish ambasadori i Kosovës në Shqipëri, Syle Ukshini thotë se sipas exit polleve të para në Kosovë, Albin Kurti nuk e formon i vetëm qeverinë.

Në një intervistë për “Newsroom” në ABC News, Ukshini u shpreh se Kurti duhet të jetë më pragmatist dhe të kërkojë aleatë.

“Nëse këto rezutate mbeten, narrativa e Kurtit fiton, por tregon edhe dobësi të opozitës. LDK po bie vazhdimisht që prej koalicionin që ka pasur me LVV. Zgjedhjet nuk janë për vetvete dhe për parti politike, për ta drejtuar Kosovën. Nëse nuk e krijon, Kurti duhet të tregohet më pragmatist dhe duhet të kërkojë aleat përtej LDK. Zgjedhja e presidentit kërkon shumë vota. Nuk e di nëse LVV e projekton PDK si armikun kryesor të saj. Zgjidhja mund të bëhet me një koalicion LVV-LDK dhe Aleanca. Gara nuk po bëhet për program, por për individë. Është meritë e Albin Kurtit, sepse Kurti e ka djegur Fatmir Limajn. Nëse Kurti e bën këtë lëvizje taktike, djek taktikisht LDK dhe AAK, përçan opozitën.”, theksoi ai./abcnews.al 

Në Pikën Kufitare të Kakavijes drejtues të strukturave të Policisë Kufitare dhe Policisë së Rendit kanë inspektuar zbatimin e masave të përcaktuara në planin e posaçëm për fundvitin.

Dy drejtuesit e strukturave të Policisë së Shtetit inspektuan  masat  e marra nga forcat blu në Kakavije për evitimin e radhëve të pritjes dhe garantimin e rendit dhe sigurisë publike në doganën e Kakavijës.

Drejtori i Departamentit për Kufirin dhe Migracionin, Saimir Muçaj foli per bashkepunimin me palën greke për përpunimin e fluksit të shtuar përgjatë periudhës të festave të fundvitit.

Janë shtuar sportelet dhe numri i punonjësve të Policisë, veçanërisht në Pikat e Kalimit Kufitar me Greqinë dhe në pikat e tjera me fluks të lartë, ku prej dy javësh punohet me kapacitet të plotë logjistik dhe njerëzor.

Dhimitraq Ziu, Drejtor i Departamentit për Rendin dhe Sigurinë Publike theksoi se Shërbimet e policisë së Rendit do të jene në gadishmëri edhe natën e ndërrimit të viteve.

Efektivët e Shqiponjave, Reneas dhe Forcës Kombëtare do të jenë në gadishmëri për t’ju përgjigjur situatave

Gjatë kësaj periudhe është shënuar një rritje e qarkullimit ndërkufitar rreth 10.5% krahasuar me vitin e kaluar, jo vetëm të shtetasve shqiptarë, por edhe të vizitorëve të huaj./abcnews.al

Për ta ky rast nuk ekziston.

Al Itihad nuk është në dijeni se ka ndonjë mundësi që Mario Mitaj të largohet në janar apo kurdo qoftë.

Zëdhënësi I klubit, Rijad Al Mazhar i ka hedhur poshtë lajmet mediatike se shqiptari mund të transferohet në janar.

Gjithsesi, gazetat në kryeqytetin e Arabisë Saudite shkruajnë se Al Itihad është në bisedime me Lacion për mbrojtësin portugez, Nunjo Tavares, që luan në pozicionin e Mitajt.

Po ashtu, për yllin kuqezi po bëhen kritika për gabime gjatë ndeshjeve, që mund t’i kushtojnë ekipit, edhe pse paraqitja e tij përgjithësisht është mjaft e mirë.

Lajmet dolën që Mitaj mund të largohet nga Arabia Saudite në janar.

Ky njoftim u dha nga gazetari saudit, Mohamed Al Bakr, që njoftoi se kampionët saudite janë në bisedime për transferimin e mbrojtësit të Shqipërisë, ndonëse nuk jepet emri i klubit që e kërkon.

Gazetari thekson se ky lajm nuk do t’u pëlqejë tifozëve, dhe duket I habitshëm sepse Mitaj është kthyer në një lojtar kyç të ekipit nga kryeqyteti Riad.

Al Itihad ia bleu kartonin para një vit për rreth 4 milionë euro, ndërsa besohet se do të fitojë shumë më tepër në rast se mbrojtësi shqiptar largohet.

Mitaj fitoi vjet titullin kampion dhe Kupën e Mbretit në Arabinë Saudite, duke qenë ndër më të mirët, ndonëse pati dëmtim në fillim të vitit, dhe vazhdon të jetë protagonist./abcnews.al

Banorëve të Vlorës parashikohet t’u kthehet uji i pijshëm në çezma pasditen e të dielës.
Drejtori i Ujësjellësit thotë se po punohet për të riparuar defektin në rrjetin e furnizimit me ujë, i ndodhur më 26 dhjetor.
“Sot kemi ndryshuar edhe mënyrën e zgjidhjes së problemit; rreth orës 5–6 pasdite të nisë furnizimi nga stacionet drejt Lungomares, më pas qyteti…”

Spitali apo institucione të tjera me rëndësi të veçantë prej dy ditësh në Vlorë po furnizohen me ujë përmes boteve.
“Në dispozicion kemi vënë disa bote të ujësjellësit për institucione si spitale apo institucione të tjera shtetërore.”

Defekti ka ndodhur në një prej tubacioneve kryesore të qytetit, investim i kryer në vitet 2009–2010.
Zgjidhjet e aplikuara për ta rikthyer situatën në normalitet deri tani, sipas drejtorit të ujësjellësit, nuk kanë rezultuar efikase.

Si rezultat i kontrolleve të vazhdueshme për lokalizimin dhe kapjen e shtetasve në kërkim, bazuar edhe në informacionet e siguruara në rrugë operative, specialistët për Hetimin e Krimeve të Komisariatit të Policisë Malësi e Madhe kanë kapur dhe ndaluar shtetasin: Aleksander Malaj 57 vjeç, banues në Bajzë.

Ky shtetas ishte shpallur në kërkim pasi Gjykata e Juridiksionit të Përgjithshëm i kishte caktuar masën e sigurisë “Arrest në burg”, për veprat penale “Kultivimi i bimëve narkotike” dhe “Prodhimi dhe shitja e narkotikëve”.

Ai dyshohet si bashkëpunëtor për kultivimin e 780 bimëve narkotike kanabis, në Bajzë, të cilat janë gjetur dhe asgjësuar nga shërbimet e Policisë, më datë 18.09.2025.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.  / ABCNEWS.AL /

Në vijim të zbatimit të planit të masave për parandalimin dhe goditjen e tregtimit të kundërligjshëm të lëndëve piroteknike, në prag të festave të fundvitit, shërbimet e Komisariatit të Policisë Sarandë kanë vijuar kontrollet në subjekte tregtare.

Si rezultat i këtyre kontrolleve, gjatë kontrollit të ushtruar në dy subjekte tregtare në qytetin e Sarandës, u konstatuan 982 fishekzjarre dhe 250 kuti me kapsolla, të cilat mbaheshin për tregtim në kundërshtim me ligjin.

Lëndët piroteknike u sekuestruan në cilësinë e provës materiale, ndërsa materialet procedurale u referuan në Prokurori dhe nisi procedimi penal në ngarkim të shtetasve L. M., 26 vjeç dhe M. H., 55 vjeç, banues në Sarandë.  / abcnews.al /

Ylli francez Brigitte Bardot ka ndërruar jetë në moshën 91-vjeçare.

Bardot u bë e famshme me filmin “And God Created Woman” (1956), të shkruar dhe drejtuar nga bashkëshorti i saj atëherë, Roger Vadim. Për dy dekada, ajo u shndërrua në ikonën e asaj që njihej si “sex kitten” e Francës.

Në fillim të viteve 1970, Bardot la kinemanë dhe u angazhua në mënyrë aktive në politikë dhe mbrojtjen e kafshëve, duke themeluar Fondacionin Brigitte Bardot në vitin 1986.

Lindur në Paris më 1934-ën në një familje të pasur katolike, Bardot nisi karrierën si balerinë dhe modele, duke u shfaqur në kopertinën e revistës Elle që në moshën 15-vjeçare. Pasi filloi të merrte role të vogla në film, ajo takoi Roger Vadim, me të cilin u martua në 1952-in. Filmi që i hapi rrugën për famën ndërkombëtare ishte “And God Created Woman”, ku Bardot interpretoi një adoleshente të lirë në Saint-Tropez, duke u bërë menjëherë ikonë botërore.

Përveç karrierës në kinema, Bardot pati edhe një karrierë muzikore, duke regjistruar këngë të njohura, përfshirë versionin origjinal të “Je T’Aime … Moi Non Plus” të Serge Gainsbourg.

Megjithatë, presioni i famës e bëri të largohej nga skena e filmit, duke u tërhequr plotësisht në 1973-in pas filmit historik “The Edifying and Joyous Story of Colinot”.

Si aktiviste, Bardot u angazhua në mbrojtjen e kafshëve, duke protestuar kundër gjuetisë së fokave dhe vrasjes së delfinëve, si dhe duke kritikuar trajtimin e kafshëve në shumë vende të botës.

Pas viteve 2000, ajo gjithashtu bëri deklarata politike të forta, duke mbështetur partinë e ekstremit të djathtë francez, Front National, dhe duke bërë komente që ngjallën debat mbi emigracionin dhe çështje të tjera sociale.

Bardot u martua katër herë dhe pati një jetë personale të komentuar gjerësisht nga media, romanca me emra të njohur si Jean-Louis Trintignant dhe Serge Gainsbourg.

Brigitte Bardot do të mbahet mend si një ikonë e kinemasë franceze, një figurë kulturore e paharrueshme dhe një aktiviste për kafshët.

Pothuajse tre metra dëborë kanë mbuluar resortin e skive Prato Nevoso, duke regjistruar një nga nivelet më të larta të reshjeve të dëborës të regjistruara këtë vit në Evropë.

Fenomeni tashmë konsiderohet historik, pasi thellësia e dëborës tejkalon shumë mesataren për sezonin.

Reshjet intensive dhe të vazhdueshme të dëborës së ditëve të fundit e kanë transformuar rajonin malor të Piemontes në një peizazh të bardhë, me rrugë, çati dhe objekte të ‘varrosura’ nën dëbore. Imazhet nga Prato Nevoso po bëjnë xhiron e mediave evropiane, duke shkaktuar tronditje dhe shqetësim.

Autoritetet lokale janë në gatishmëri të shtuar, pasi sasitë e mëdha të borës rrisin rrezikun e ortekëve dhe e bëjnë të vështirë aksesin në zonat malore. Në disa vende, u kërkua ndërhyrja e makinave për pastrimin e borës, ndërsa banorëve dhe vizitorëve u dhanë rekomandime që të shmangin udhëtimet e panevojshme. Pavarësisht rreziqeve, reshjet e paprecedentë të dëborës konsiderohen një zhvillim pozitiv për turizmin dimëror. Prato Nevoso, një nga vendpushimet më të njohura të skive në Italinë veriore, tani ka kushte ideale për ski dhe snowboarding, të cilat pritet të tërheqin një numër në rritje vizitorësh në periudhën e ardhshme.

Megjithatë, ekspertët theksojnë se ngjarje të tilla ekstreme të motit janë pjesë e një modeli më të gjerë të paqëndrueshmërisë klimatike në Evropë, ku reshjet e dendura të dëborës alternohen me periudha moti jashtëzakonisht të butë.

Prato Nevoso mbetet në qendër të vëmendjes, si për spektaklin e tij natyror mbresëlënës, ashtu edhe për sfidat e menaxhimit të një sasie kaq të madhe dëbore në një kohë të shkurtër.

/abcnews.al /

Pasi kishte penguar qarkullimin e automjeteve të tjera në fshatin Hajmel, gjatë një aktiviteti festiv, punonjësit e Policisë së Forcave të Posaçme “Shqiponja” kanë shkuar menjëherë në vendngjarje dhe janë përballur me kundërshtim verbal nga shtetasi A. P. Gjatë kontrollit fizik, këtij shtetasi iu gjet një sasi lënde narkotike, ndërsa gjatë kontrollit në banesë iu gjetën dhe u sekuestruan municione luftarake.

Në përfundim të veprimeve procedurale, Oficeri i Policisë Gjyqësore i Prokurorisë bëri arrestimin e shtetasit A. P., 42 vjeç, banues në Dejë, për veprat penale “Kundërshtimi i punonjësit të policisë së rendit publik”, “Mbajtja pa leje dhe prodhimi i armëve, municionit dhe lëndëve shpërthyese”, si dhe “Prodhimi dhe shitja e narkotikëve”.  / abcnews.al /

New York-u është përfshirë nga stuhia e fuqishme dimërore “Devin”, me reshjet më të mëdha të dëborës që regjistrohen në më shumë se tre vjet.

Udhëtimet ajrore kanë marrë një goditje të madhe, pasi mbi 1,500 fluturime janë anuluar deri të premten.

Guvernatorja e New York-ut, Kathy Hochul, shpalli gjendjen e jashtëzakonshme përpara stuhisë, ndërsa Shërbimi Kombëtar i Motit paralajmëroi për kushte të rrezikshme udhëtimi dhe reshje dëbore deri në 20 cm në disa zona.

Ndërkohë, moti i keq ka goditur edhe Kaliforninë Jugore. Tre ditë reshje të dendura shiu shkaktuan përmbytje dhe rrëshqitje dheu, duke detyruar banorët e vendpushimit malor Wrightwood të largojnë baltën dhe të vlerësojnë dëmet. Numri i të vdekurve nga moti i keq ka arritur në katër.

Shirat e rrëmbyer shoqëroheshin me erëra të forta që rrëzuan pemë dhe linja elektrike, duke përmbytur mbarë rajonin e Los Angelesit. Shtëpitë dhe automjetet në Wrightwood u mbuluan nga balta, ndërsa banorët vazhdojnë pastrimin dhe rikuperimin e dëmeve.  / abcnews.al /

 

View this post on Instagram

 

A post shared by ABC News Albania (@abcnewsal)

Një tërmet me magnitudë 7.0 goditi Tajvanin, ka njoftuar Shërbimi Meteorologjik i Tajvanit.

Tërmeti me thellësi 73 kilometra u ndje në Tajvanin verior dhe dridhi ndërtesat në kryeqytetin Taipei, njoftoi agjencia meteorologjike, duke e klasifikuar tërmetin si të kategorisë katër, që do të thotë se mund të ketë dëme të vogla.

Qeveria e Taipeit tha se nuk u raportuan dëme të mëdha menjëherë pas tërmetit.

Më shumë se 3,000 shtëpi në Yilan mbetë-n për pak kohë pa energji elektrike.

Ndryshe, Tajvani është i prirur ndaj tërmeteve.

Kjo pasi ai ndodhet pranë kryqëzimit të dy pllakave tektonike.

Më shumë se 100 persona humbën jetën në një tërmet në Tajvanin jugor në vitin 2016, ndërsa një tërmet me magnitudë 7.2 ballë vrau më shumë se 2,000 persona në vitin 1999.