Partia Demokratike u shpreh pro anëtarësimit të Shqipërisë në Bordin e Paqes, por është kundër që shqyrtimi i vendimit të qeverisë të bëhet me procedurë të përshpejtuar.
Gjithashtu, PD ka depozituar një amendament ku thotë se vendi ynë duhet të përfaqësohet në bord me Presidentin, jo me Kryeministrin.

Kryetari i grupit parlamentar të PD, Gazment Bardhi, propozoi që t’i kërkohet Presidentit autorizimi që marrëveshja të hyjë në fuqi menjëherë dhe më pas ta miratojmë. “E kemi marrë plotfuqishmërinë nga Presidenti”, iu përgjigj Taulant Balla. 

Seanca për votimin e anëtarësimit në Bordin e Paqes do të vijojë në orën 12:00.

Gjykata e Posaçme e Shkallës së Parë Kundër Korrupsionit dhe Krimit të Organizuar ka njoftuar se nuk do të marrë pjesë këtë të enjte në seancën e parashikuar për t’u zhvilluar në Gjykatën Kushtetuese, për ankimimin që i ka bërë Kryeministri Rama vendimit të saj për pezullimin e Belinda Ballukut nga detyra e ministres së Infrastrukturës dhe Energjisë.

“Ju informojmë se GJKKO nuk do të marrë pjesë në këtë seancë plenare pasi vlerëson se nuk mund të legjitimohet si palë në gjykimin kushtetues me kërkues Kryeministrin e Republikës së Shqipërisë.

Në një shtet demokratik të së drejtës, të bazuar në parimin e sundimit të ligjit dhe të ndarjes së pushteteve, një gjykatë nuk mund të thirret dhe as të legjitimohet si palë në një gjykim kushtetues për të bërë parashtrime apo për të mbrojtur një vendim të dhënë prej saj. Pjesëmarrja e GJKKO-së si palë e interesuar në Gjykatën Kushtetuese do të cenonte parimin e ndarjes së pushteteve dhe pavarësinë e brendshme të pushtetit gjyqësor”.

GJKKO i ka kthyer përgjigje Gjykatës Kushtetuese, duke parashtruar arsyet ligjore për të cilat kjo gjykatë nuk mund të legjitimohet si palë në gjykimin kushtetues me kërkues Kryeministrin e Republikës së Shqipërisë.

Në parashtrimin me shkrim që ka dërguar në Kushtetuese, GJKKO thotë se “kompetenca e gjyqtarit është kufiri i fundit që përcakton fushën e juridiksionit, brenda të cilit ai është i detyruar që të procedojë për zgjidhjen e një çështjeje të caktuar. Problemet e zbatimit dhe të interpretimit të ligjit, duke përfshirë edhe dispozitat për kompetencën, u takojnë në parim gjykatave të pushtetit gjyqësor”.

Sipas saj “fillimisht çdo çështje e ushtrimit të juridiksionit gjyqësor mbi një çështje konkrete zgjidhet brenda pushtetit gjyqësor dhe pasi të shterohen mjetet e brendshme juridike zgjidhet nga Gjykata Kushtetuese”.

Gjithashtu GJKKO thotë se “për sa kohë një çështje konkrete penale është e varur përpara juridiksionit gjyqësor të zakonshëm nuk mund të ndërhyhet nga autoritet të tjera shtetërore pa cenuar nenin 145 të Kushtetutës”.

Presidenti amerikan Donald Trump mbajti një fjalim të gjatë në Forumin Ekonomik Botëror, duke rritur shqetësimet për thellimin e përçarjeve mes SHBA-së dhe aleatëve evropianë.

Mes akuzave, talljeve dhe kërcënimeve të nënkuptuara, Trump ofroi vetëm një moment qetësimi: tha se nuk do të përdorë forcë ushtarake për të marrë Groenlandën, shkruan CNN.

1. Trump për Groenlandën: “Nuk do të përdor forcë”

Deklarata më e rëndësishme për evropianët ishte e qartë: Trump përjashtoi përdorimin e forcës për Groenlandën. Kjo uli tensionet dhe u prit pozitivisht edhe nga tregjet. Megjithatë, ai këmbënguli se synon pronësinë e plotë të territorit gjysmë-autonom të Danimarkës, duke paralajmëruar se do të “kujtojë” ata që i rezistojnë.

2. Argument historik dhe sulm ndaj Danimarkës

Trump e quajti Danimarkën “mosmirënjohëse”, duke pretenduar se SHBA-ja e mbrojti gjatë Luftës së Dytë Botërore dhe se gaboi që ia ktheu Groenlandën. Ai deklaroi se vetëm SHBA-ja mund ta sigurojë territorin, duke vënë në dyshim aftësitë mbrojtëse të aleatëve të NATO-s.

3. Ankesa dhe sulme ndaj aleatëve

Presidenti amerikan sulmoi disa vende evropiane, përfshirë Zvicrën, Francën dhe Kanadanë. Ai talli liderë, kërcënoi me tarifa dhe deklaroi se shumë vende “jetojnë falë SHBA-së”.

Po ashtu, Trump ringjalli sulme të brendshme politike, përfshirë ndaj Rezervës Federale dhe përfaqësueses Ilhan Omar, me deklarata të ashpra për emigracionin dhe “kulturën perëndimore”.

4. Sallë e mbushur, reagim i ftohtë

Edhe pse salla ishte plot, audienca u bë gjithnjë e më e heshtur dhe e parehatshme teksa fjalimi zgjatej. Argumentet për Groenlandën dhe sulmet ndaj Evropës shkaktuan mosbesim dhe nervozizëm; disa pjesëmarrës u larguan para përfundimit.

5. Një Evropë që Trump “nuk e njeh”

Në thelb të fjalimit ishte bindja e Trump se Evropa ka humbur rrugën, sidomos për shkak të emigracionit dhe politikave ekonomike. Ai tha se kontinenti është “i panjohshëm” dhe se pa SHBA-në, Evropa nuk do të funksiononte, deklarata që lanë gjurmë të forta në marrëdhëniet transatlantike.

Fjalimi i Trump në Davos thelloi ndarjet me Evropën. Edhe pse përjashtoi forcën për Groenlandën dhe foli për një “marrëveshje afatgjatë”, toni përçarës dhe kërkesat maksimale lanë më shumë pyetje sesa qartësi për të ardhmen e aleancës perëndimore.

Nëse keni dashur gjithmonë të vizitoni Maldivet, por ju mungon koha dhe buxheti, kompania ajrore “Ryanair” mundëson fluturime të lira drejt alternativave evropiane ku mund të shijoni plazhe po aq të bukura, shkruan Natalie King në një artikull të botuar në të përditshmen “Mirror”.

Linja ajrore me kosto të ulët “Ryanair” ka lançuar një numër linjash të reja, përfshirë drejt Shqipërisë, që po bëhet gjithnjë e më popullore në mesin e turistëve britanikë, falë ngjashmërisë së plazheve të saj që shpesh krahasohen me Maldivet.

“Ryanair” do të ofrojë 20 linja të reja për në Tiranë, duke e rritur numrin e linjave të saj në qytet në 43.

Nga pranvera, turistët do të jenë në gjendje të vizitojnë qytetin shqiptar nga Liverpuli, Birminghami dhe Dublini, me fluturime që zgjasin pak më shumë se tre orë.

Fluturimet janë të disponueshme nga Liverpuli dhe Dublini për 23 £  vajtje), me temperatura maksimale që arrijnë 26 gradë Celsius gjatë majit maj.

Shqipëria po bëhet një destinacion popullor për turistët që kërkojnë të pushojnë në diell me një buxhet të kufizuar, në pranverë.

Nëse jeni duke kërkuar pushime në plazh, ju rekomandojmë të udhëtoni në Shqipëri!

Ksamili në jug të vendit është një nga zonat më të njohura të plazhit dhe mund të merrni një autobus direkt për në vendpushim nga aeroporti, i cili zgjat pak më pak se katër orë.

Ksamili është një fshat bregdetar që ndodhet midis një lagune dhe detit Jon, me Korfuzin përballë tij.

Plazhet e tij me rërë të bardhë, deti bruz dhe ishujt e vegjël, të krahasuara me Maldivet, mund të eksplorohen me varkë.

Për një përvojë të plotë në stilin e Maldiveve, rezervoni një ditë në vendpushimin “Pema e Thatë”, ku mund të merrni me qira kabina.

Gjithashtu do të gjeni disa kasolle plazhi me rrjeta mbi ujë, ku mund të uleni dhe të relaksoheni, duke parë valët e buta të detit poshtë.

Mund të porosisni një birrë për rreth 2,25 paund dhe ta pini ndërsa shijoni pamjet.

Durrësi është rreth gjysmë ore larg nga Tirana dhe është një qytet port që ndodhet në një zonë të gjatë bregdeti me rërë.

Plazhi i Durrësit ka një shëtitore të rrethuar me palma dhe ujëra të kaltra, dhe ndodhet vetëm disa minuta larg qendrës historike të qytetit.

Gjithashtu, do të gjeni Plazhin e Currilave, pranë portit. Ju mund të merrni me qira një shezlong dhe të uleni në një nga baret dhe restorantet e plazhet, që krijojnë një atmosferë të gjallë.

Durrësi është gjithashtu i famshëm për amfiteatrin e tij romak, dhe pjesë të kësaj strukture të shekullit II janë ende “në këmbë”, përfshirë shkallët prej guri.

Një nga pamjet më ikonike të qytetit është Kulla Veneciane e shekullit V e Durrësit, një fortifikim mesjetar ku mund të shijoni pamje spektakolare bregdetare nga kullat e saj të vjetra të rojeve.

Ia vlen gjithashtu të vizitoni Muzeun Arkeologjik, një muze arkeologjik lokal plot me objekte që datojnë mijëra vjet më parë.

Tirana është gjithashtu një destinacion magjepsës për pushime në qytet.

Sheshi Skënderbej është një vend i shkëlqyer për të nisur turin. Do të gjeni ndërtesa të tilla si Xhamia e Et’hem Beut e shekullit XVII, e vendosur pranë Teatrit të Operas në stilin sovjetik, dhe Muzeut Historik Kombëtar – i cili është i zbukuruar me një mural të madh që përshkruan njerëz që luftojnë për lirinë e vendit.

Gjithashtu mund të vizitoni Bunk’Art 2 unik – një muze i vendosur brenda një bunkeri bërthamor të epokës komuniste.

Zbritni shkallët e pjerrëta dhe do të hyni në një botë gjithëpërfshirëse ku mund të mësoni rreth historisë magjepsëse të Shqipërisë dhe si ishte jeta gjatë dekadave të saj si një shtet i fshehtë komunist.

Për ditën e enjte vendi ynë do të ndikohet nga kushte atmosferike të paqëndrueshme.

Moti parashikohet me vranësira mesatare deri të dendura si dhe intervale të herëpashershme me kthjellime.

Përgjatë ultësirës perëndimore dhe zonave bregdetare reshje shiu të herëpashershme me intensitet kryesisht të ulët. Këto reshje në periudha tepër afatshkurtra në formën e shtrëngatave. Mjegull e dendur/mjegullinë në zonat luginore në orët e mëngjesit si dhe në momentin e reshjeve të shiut. Në zonën e Alpeve reshje dëbore me intensitet të ulët kryesisht në orët e mëngjesit dhe ato të mbrëmjes vonë.

Era do të fryjë me drejtim verilindje – juglindje, me shpejtësi mesatare 7 m/s, përgjatë vijës bregdetare dhe zonat luginore era me shpejtësi deri në 16 m/s.

Deti – Valëzimi forcës 2-4 ballë.

Dashi

Me vullnet dhe dëshirë mund të arrini ta përmirësoni situatën ne jetën tuaj sentimentale. Nëse nga ana tjetër i lini gjërat të rregullohen vete, nuk keni për të arritur askund. Beqarët do afrohen me tepër me disa persona të cilët kanë kohë që i joshin. Në planin financiar duhet të ruani gjakftohtësinë në mënyrë qe t’i zgjidhni sa më shpejt problemet.

Demi

Duhet t’ua vini veshin mire sot këshillave që do iu japë partneri sepse vetëm ne këtë mënyrë mund ta përmirësoni gjendjen ndërmjet jush. Beqarët do kenë disa takime, por asnjeri nga personat nuk do i përmbushë te gjitha kërkesat. Mos kërkoni perfeksionin. Financiarisht do njihni momente të vështira, të cilat vetëm me maturi dhe kujdes do i kaloni.

Binjakët

Do filloni te bëni projekte afatgjata gjatë kësaj dite me partnerin tuaj sepse tashme ndiheni të sigurte që ai është personi me të cilin doni të kaloni gjithë jetën. Beqaret do jene pasionante dhe gati të fillojnë edhe aventura kalimtare dhe të çmendura. Në planin financiar do i kaloni vështirësitë dhe do ndiheni më të qetë. Nuk do e keni të vështirë të kryeni shpenzimet më të nevojshme.

Gaforrja

Do ndiheni të lire të bëni atë që dëshironi gjate kësaj dite dhe gjërat do shkojnë më së miri. Do dashuroheni plot pasion me partnerin. Nëse zemra juaj është e lirë mos i refuzoni disa ftesa që do ju bëhen. Mundësi të tilla rralle vijnë në jetë. Financat do jenë përgjithësisht të mira. Nëse tregoheni të matur me shpenzimet gjendja do mbetet e qëndrueshme.

Luani

Të dashuruarit do bashkëpunojnë me njeri-tjetrin dhe do mundohen te zgjidhin problemet e hershme. Me dëshirë dhe optimizëm gjithçka mund të rregullohet. Beqarët do kenë shume sukses në dashuri dhe e gjithë jeta do ju ndryshojë në një moment të vetëm. Financat do jenë mjaft delikate kështu që shmangni çdo lloj çmendurie nëse nuk doni të mbeteni pa para.

Virgjëresha

Tregohuni sa më spontane në jetën tuaj në çift gjatë kësaj dite dhe bëni atë që ndjeni. Do e shihni që do përjetoni me tepër kënaqësi. Beqarët do kenë mundësi pa fund për aventura, por nuk do ndihen gati dhe do preferojnë të qëndrojnë vetëm. Financat do jenë mjaft delikate dhe gabimi me i vogël mund të sjellë probleme të paimagjinueshme.

Peshorja

Duhet të ndryshoni rrënjësisht sjelljen tuaj përkundrejt partnerit gjatë kësaj dite në mënyrë që edhe gjerat t’iu ecin mire. Kokëfortësia dhe mungesa e tolerancës nuk ju çon askund. Beqarët ka mundësi të njihen me persona interesante gjatë mbrëmjes. Financat do jenë goxha më të mira se disa ditë më parë, prandaj mund të kryeni investime dhe transaksione.

Akrepi

Ditë shumë normale dhe pa ndonjë emocion të veçantë kjo e sotmja për ata që janë në një lidhje. Merrini gjërat ashtu si t’iu vijnë. Beqarët do takohen me disa persona të urtë dhe tolerantë me të cilët mund të krijojnë një lidhje afatgjate. Në planin financiar do keni fat me shumicë kështu që nuk duhet të shqetësoheni aspak. Gjendja do jetë mjaft e mirë.

Shigjetari

Jeta juaj në çift do jetë e mrekullueshme gjatë kësaj ditë. Do merreni vesh për çdo gjë me atë që keni në krah dhe nuk do hidhni asnjë hap pa rënë të dy dakord. Beqarët më mirë të qëndrojnë edhe sot vetëm sepse në të kundërt mund të përballen me zhgënjime. Për financat do përkujdeseni tej mase dhe gjendja do vije duke u përmirësuar.

Bricjapi

Ditë e mrekullueshme për çiftet. Do e përforconi edhe me shumë lidhjen që keni krijuar dhe do e shihni me optimizëm edhe të ardhmen. Beqarët do jenë të parezistueshëm prandaj do marrin plot ftesa e propozime. Ka mundësi që shumë shpejt statusi të ndryshoje. Financat nuk do jenë në gjendjen më të mirë të mundshme kështu që kryejini me kujdes shpenzimet.

Ujori

Problemet e se shkuarës mund të rishfaqen serish ne jetën tuaj ne çift sot dhe do ua prishin qetësinë që ekzistonte. Tregohuni shume të kujdesshëm me gjithçka që do thoni. Beqarët nuk do e kërkojnë dashurinë sepse edhe ashtu si janë ndihen mire. Në planin financiar do e ruani gjithë kohës ekuilibrin. Nuk do keni vështirësi për të kryer shpenzimet e domosdoshme.

Peshqit

Ditë shumë delikate dhe e mbushur me probleme te mëdha kjo e sotmja për te dashuruarit. Asgjë nuk ka për të shkuar si e kishit menduar dhe kjo për shkak te pamaturisë dhe këmbënguljes suaj boshe. Beqarët do kenë një dite normale dhe pa takime vendimtare. Në planin financiar mundohuni të mos kryeni çmenduri edhe sikur gjendja të jetë e mirë.

Aksioni policor i disa ditëve më parë për goditjen e një aktiviteti mashtrues call center-ash në Tiranë zbuloi skemën e grabitjes së miliona eurove që orkestrohej në një ndërtesë në zemër të Tiranës.

Gazetari Eni Ferhati shpjegon në emisionin “Opinion” në Tv Klan vështirësinë e zbulimit të skemave të tilla për shkak të mungesës së gjurmimit. Gjithashtu, ai shpjegon zinxhirin që këto call center mashtruesë ndjekin për të marrë paratë e kujtdo që zgjedh t’u besojë me idenë për të fituar para.

Eni Ferhati: Gjurmohen kryesisht mosha të treta, pra pleq të pasur të cilët telefonohen një ditë dhe mendojnë realisht që kursimet që kanë mund t’i shumëfishojnë. Futen në një platformë që është fake e gjitha. Ti i shikon realisht që po rriten paratë në llogarinë tënde.

Blendi Fevziu: Pra ata kanë ndërtuar edhe një platformë të rreme që ti ndjek grafikun sesi të shkon.

Eni Ferhati: Ti mendon që po fiton para. Ka pasur raste që moshat e treta u kanë dhënë të drejtën që të kenë akses te llogaria bankare dhe në moment janë zhdukur 500, 600 mijë euro. Nuk besoj që e ekzagjeroj nëse them që në vitin 2016 ne kishim kanabizim të Shqipërisë, sot kemi foreksizim.

Gazetari Taulant Kopliku, i ftuar në emisionin “Opinion” në Tv Klan, tregoi skemën sesi mashtrohen europianët, përmes call center-ave në Shqipëri.

Kopliku u shpreh se mashtrime bëjnë vetëm disa call-center dhe jo të gjithë. Ai tregoi se edhe kur ka arrestime, më shumë bëhen, pas investigimeve të emisioneve të huaja, sesa nga autoritetet shqiptare.

“Disa call center mashtrues ofrojnë “investime” në bursa, që do të thotë vjedhje dhe mashtrim. Dikush në Itali ngriti alarmin se dikush në Shqipëri po mashtron. Le Iene ka bërë investigime të rëndësishme për këtë fushë mashtrimi. Call center-at në Shqipëri përmendin kompani të mëdha italiane, më pas telefonata i kalohej një operatori që ishte në Shqipëri dhe kështu niste zhvatja me 250 euro në fillim, më pas i tregohej se i janë rritur shumat. Një person mund të jetë mashtruar me 200 mijë, 500 mijë euro. Në total bëhen 30 milionë euro të vjedhura qytetarëve europianë, sepse call center-at mashtrues kanë afër 10 punonjës. Nga investigimi i Le Iene, mund të them se personi i infiltruar punoi në Tiranë vetëm në dy ditë sepse kuptoi se mund ta zbulonin, por dhe me kaq ditë dokumentoi skemën e mashtrimit. Ka pasur kallëzime tek autoritetet italiane nga ana e qytetarëve atje, por nuk ecin përpara këto kallëzime, sepse ka raste që shumat nuk janë të mëdha”, tha gazetari Kopliku.

Policia e kryeqyetit ka goditur një sërë call center-ash, që mashtronin qytetarë euiropianë, duke i gënjyer se po investonin në bursa. Dhjetë persona u arrestuan në një operacion të ditëve të fundit në Tiranë, që kishte në fokus call center-a, të cilët mashtrojnë të huajt.

Presidenti amerikan, Donald Trump, njoftoi se nuk do të vendosë tarifat që ishin planifikuar të hynin në fuqi më 1 shkurt për Groenlandwn.

Në një postim në Truth Social, Trump tha se pas një “takimi shumë produktiv” me Sekretarin e Përgjithshëm të NATO-s, Mark Rutte, është krijuar “korniza e një marrëveshjeje të ardhshme për Grenlandën”.

“Bazuar në një takim shumë produktiv që kam zhvilluar me Sekretarin e Përgjithshëm të NATO-s, Mark Rutte, kemi formuar kornizën e një marrëveshjeje të ardhshme në lidhje me Groenlandën dhe, në fakt, me të gjithë Rajonin Arktik. Kjo zgjidhje, nëse finalizohet, do të jetë shumë e favorshme për Shtetet e Bashkuara të Amerikës dhe për të gjitha vendet anëtare të NATO-s. Bazuar në këtë mirëkuptim, nuk do të vendos tarifat që ishin planifikuar të hynin në fuqi më 1 shkurt. Po zhvillohen gjithashtu diskutime shtesë lidhur me “Kupolën e Artë” (The Golden Dome) sa i përket Groenlandës. Informacione të mëtejshme do të bëhen të ditura ndërsa diskutimet përparojnë. Zëvendëspresidenti JD Vance, Sekretari i Shtetit Marco Rubio, i Dërguari i Posaçëm Steve Witkoff dhe të tjerë, sipas nevojës, do të jenë përgjegjës për negociatat, ata do të raportojnë drejtpërdrejt tek unë. Faleminderit për vëmendjen tuaj ndaj kësaj çështjeje!”, shkroi Trump.

Ai bëri me dije se diskutimet mbi çështjen e “Kupolës së Artë” në lidhje me Grenlandën vazhdojnë, ndërsa negociatat do të udhëhiqen nga Zëvendës-Presidenti JD Vance, Sekretari i Shtetit Marco Rubio dhe Përfaqësuesi Special Steve Witkoff, të cilët do t’i raportojnë direkt presidentit.

“Informacione të mëtejshme do të bëhen të disponueshme ndërsa diskutimet vazhdojnë”, përfundoi Trump.

Sindikata spanjolle e makinistëve të trenave SEMAF ka thirrur një grevë tre-ditore mbarëkombëtare për datat 9, 10 dhe 11 shkurt, duke kërkuar masa për sigurinë hekurudhore, pas dy aksidenteve që e kanë zhytur vendin iberik në zi.

Në deklaratën e saj, sindikata sqaroi se greva ka të bëjë me “të gjithë makinistët e trenave nga kompanitë e ndryshme në sektor”.

Ministri i Transportit, Oscar Puente, komentoi, në një konferencë për shtyp, se greva nuk i duket atij si “mënyra më e mirë për të arritur kërkesat e tyre” dhe shprehu shpresën se ajo do të anulohet, duke deklaruar se ai “i dëgjon” punëtorët.

SEMAF thekson në deklaratën e saj se punëtorët në sektor kishin denoncuar “gjendjen e keqe” të rrjetit në pjesë të ndryshme të tij, por “ata nuk morën përgjigje, as nuk pati ndonjë ndërhyrje për muaj, madje vite”.

Prandaj, sindikata synon të kërkojë përgjegjësi penale “nga ata që kanë detyrimin të sigurojnë sigurinë e infrastrukturës hekurudhore”.

Shtetet e Bashkuara të Amerikës nuk duan dhe nuk do të përdorin forcën për të marrë Groenlandën, ishullin e vetëqeverisur danez që Shtetet e Bashkuara e kanë konsideruar jetik për sigurinë e tyre kombëtare. Ky ishte mesazhi që dha Presidenti Amerikan Donald Trump përgjatë fjalimit të tij në Forumin e Davosit në Zvicër, teksa sulmoi vendet e Bashkimit Europian duke thënë se Unioni 27 anëtarësh nuk po shkon në drejtimin e duhur me emigracionin që kanë shkatërruar Perëndimin.

“Groenlanda është një territor i gjerë, pothuajse tërësisht i pabanuar dhe i pazhvilluar, i pambrojtur në një vendndodhje kyçe strategjike midis Shteteve të Bashkuara, Rusisë dhe Kinës. Ka vetëm një fakt të qartë, asnjë komb apo grup kombesh nuk është në gjendje të sigurojë Groenlandën përveç Shteteve të Bashkuara. Kjo është arsyeja pse po kërkoj negociata të menjëhershme për të diskutuar përsëri blerjen e Groenlandës nga Shtetet e Bashkuara, ashtu siç kemi fituar shumë territore të tjera gjatë historisë sonë, siç kanë bërë shumë nga kombet evropiane. Ndoshta nuk do të arrijmë asgjë nëse nuk vendos të përdor forcën për marrjen e këtij territori, sinqerisht do të ishim të pandalshëm, por unë nuk do ta bëj diçka të tillë”, tha Trump.

Donald Trump tha se Shtetet e Bashkuara do të ndërtojnë në Groenlandë sistemin më të madh të mbrojtjes ajrore, një version të Iron Dome, ndërsa arsyetoi marrjen e këtij territori nga Shtetet e Bashkuara si shpërblim për gjithçka që Uashingtoni ka bërë për NATO-n, veçanërisht me administratën e tij.

“Ne japim kaq shumë dhe marrim kaq pak në këmbim, dhe unë kam qenë kritik i NATO-s për shumë vite, megjithatë kam bërë më shumë për të ndihmuar NATO-n sesa çdo president tjetër deri më tani. Nuk do ta kishit NATO-n nëse unë nuk do të përfshihesha në mandatin tim të parë. Trashëgova një luftë, një katastrofë, po flas për Ukrainën. Jemi mijëra kilometra larg, të ndarë nga një oqean gjigant dhe kjo është një luftë që nuk duhej të kishte filluar kurrë dhe nuk do të kishte filluar nëse zgjedhjet presidenciale të SHBA-së të vitit 2020 nuk do të ishin manipuluar”, shtoi Trump.

Presidenti Amerikan Donald Trump deklaroi në fjalimin e tij se Shtetet e Bashkuara po punojnë si me Rusinë ashtu edhe me Ukrainën për t’i dhënë fund edhe luftës në Ukrainë, në atë që është kthyer në konfliktin më të ashpër në Europë që prej Luftës së Dytë Botërore.

Edhe pak javë na ndajnë nga momenti më vendimtar i Kombëtares Shqiptare. Në muajin mars kuqezinjtë i pret faza e playoffit të Botërorit të këtij viti dhe tashmë trajneri Sylvinho ka nisur prej ditësh punën e tij pas pushimeve dimërore teksa atë dhe futbollistët e pret një mision historik, kualifikimin për herë të parë në fazën finale të një botërori. Trajneri kuqezi ka folur për FSHF TV duke folur për shumë tema që kanë të bëjnë me skuadrën tonë kuqezi dhe objektivat e saj

Intervista e plotë e trajnerit Sylvinho të dhënë për FSHF TV

Si do ta analizoje ose do ta përkufizoje vitin tënd 2025 me Kombëtaren Shqiptare?

Fillimisht, urime të gjithëve, vit të mbarë, gëzuar! Kënaqësi të flas me ju. Nëse duhet të kthehem pas në kohë, unë jam i kënaqur me atë që kemi bërë, flasim për 8 ndeshje në kualifikueset e Botërorit, kemi fituar gjashtë, barazuar dy dhe dy humbje. Dy prej tyre miqësore, të cilat i kemi fituar. Ne gjithmonë kemi besuar në këtë skuadër. Duhet të them dhe diçka tjetër të rëndësishme, lojtarët tanë, sa herë që dalin në fushë, lënë aty gjithçka, 100%, me shpirt dhe zemër. Ata përfaqësojnë shumë mirë njerëzit tanë dhe jam krenar për ta edhe për këtë gjë.

Cilat momente do t’i konsideroje të vështira dhe cilat shumë pozitive gjatë kualifikueseve?

Është një udhëtim i gjatë, e dini të gjithë ju, në Kombëtare ndodh kjo, janë 8 ndeshje në 9-10 muaj. Një udhëtim i gjatë që gjeneron stres. Mendoj se një moment shumë i vështirë për ne ka qenë një barazim në Letoni, kemi barazuar një ndeshje të vështirë, por kur bëhet fjalë për një objektiv, një ëndërr, ajo duhej fituar. Aty ka qenë një moment i vështirë për t’u riprogramuar, ishte qershor, për t’u riprogramuar, për të bërë disa llogari dhe aty krijohet ideja që duhet të rikuperosh këto pikë në një ndeshje të ardhshme dhe në vijim ishte Serbia praktikisht. Ka qenë shumë e vështirë ta riprogramoje atë moment.

Të gjithë e dimë që vendi i parë në grupin kualifikues për Botërorin ishte jashtëzakonisht i vështirë për t’u arritur, por sa i përket vendit të dytë, cili do të ishte sipas teje momenti vendimtar për kualifikimin në fazën “play-off”?

Pas një momenti shumë të vështirë siç thashë më parë, në Letoni, më pas në shtator kemi mundur Letoninë, në tetor kemi mundur Serbinë në transfertë dhe në nëntor Andorrën po në transfertë. Ai ka qenë momenti që kam parë një skuadër më të maturuar, pas 3 vitesh që kam parë kualifikueset e Europianit dhe një Europian të rëndësishëm dhe të bukur. Mund të them që tashmë jemi mësuar të luajmë ndeshje të rëndësishme, deçizive, qoftë ndaj Italisë apo ndaj një skuadre pak më modeste. Këta lojtarë kanë filluar të kuptojnë dhe të luajnë ndeshje me kombëtare të rëndësishme, deçizive. Ata kanë bërë shumë mirë, në të treja ndeshjet radhazi, nuk ka qenë e lehtë, kemi fituar dhe kjo na ka sjellë në play-off. Sipas meje, ata tre muaj kanë qenë shumë të bukur.

Në shortin e “play-off”-it, Shqipëria do të përballet me Poloninë në transfertë. Si e vlerëson këtë short?

Unë isha atje. I them gjithmonë Presidentit që nuk mund të shkojmë bashkë në një short, ose duhet të shkojë njëri apo tjetri dhe sigurisht duhet të shkojë Presidenti. Në një formë shakaje, sigurisht, sepse është gjithmonë një short i vështirë.

Nuk ka shumë opsione për të zgjedhur aty. Flasim për dy ndeshje, të gjithë vijnë aty në 100%-in e tyre. Herë pas here dëgjoj këtu që mund të ketë një skuadër e dobët apo e lehtë për t’u mundur. Unë si trajner që e jetoj futbollin prej një dekade, nuk jam dakord, futbolli ka ndryshuar, shikohet çdo gjë, në 90 minuta mund të ndodhë çdo gjë. Atëherë, Polonia është një skuadër e fortë, e njohim mirë, ata kanë një proçes, ne kemi një tjetër, tani do të luhet, mund të ndodhë gjithçka.

Poloninë e njohim nga ndeshjet kualifikuese për Euro 2024. Duke bërë një krahasim mes Polonisë dhe Shqipërisë në vitin 2023 dhe në 2025/2026, si i sheh të dyja ekipet në këtë moment?

Për futbollin, tre muaj pas ndryshon çdo gjë, tani po flasim për 2-3 vite më parë. Ata kanë një skuadër shumë të mirë, lojtarë të mëdhenj. Pak njerëz e dinë ose e kujtojnë që e njëjta Poloni, 4 vite më parë shkonte në play-off për Botërorin e 2022-shit. Ndeshjen e parë nuk e kanë luajtur, sepse ishte ndaj Rusisë, por në ndeshjen e dytë kanë mundur Suedinë në finale me rezultatin 2-0. Është një skuadër me lojtarë të rëndësishëm, janë të mësuar dhe e njohin mirë fazën play-off, kanë marrë pjesë edhe në Botëror. Nga ana jonë, kemi një skuadër që është përmirësuar shumë, siç e thashë, është një skuadër që tashmë është mësuar të luajë ndeshje të vështira, deçizive, përveç vështirësisë, se të gjitha janë të tilla, por ndeshje deçizive. Janë 90 minuta, ku e di që duhet të gabosh sa më pak dhe që çdo gjë është e rëndësishme, pasi gabimi më minimal mund të të bëjë shumë dëm. Unë besoj shumë në skuadrën tonë, në lojtarët dhe punën tonë. Mungojnë ende 2-3 muaj, uroj të shkojmë atje me forcën tonë maksimale.

Në kuadër të përgatitjeve për ndeshjen e marsit, si e ke planifikuar punën me stafin teknik? A ke planifikuar takime me lojtarët e Kombëtares?

Kemi nga të gjitha. Prej një jave që jemi në Tiranë ka filluar të zhvillohet puna. Unë kam mësuar shumë nga puna me Kombëtaren dhe nuk mund të gabohet në riorganizimin e punës. Në këto momente jemi këtu për të riparë shumë gjëra që kemi bërë mirë dhe jo mirë në vitin e fundit. Tani, komunikohet me lojtarët tanë, sigurisht që do të vijë momenti për të parë ndeshje, për të studiuar kundërshtarin, por edhe për të bërë vizita te lojtarët tanë. E gjithë kjo është në program, tani duhet ta zhvillojmë në 6-7 javët e ardhshme, duhet të punojmë mirë dhe sigurisht do të vizitojmë 3-4-5 lojtarë gjatë kësaj periudhe.

Mes objektivit dhe ëndrrës, në çfarë pike mendon se ndodhet sot Shqipëria sa i përket pjesëmarrjes në Botëror?

Kjo është një zyrë pune. Unë kam një zyrë tjetër, por këtu punohet dhe jam mësuar t’i them stafit që këtu është një hapësirë pune, sidomos në një Kombëtare ku punohet shumë brenda zyrës. Këtu është një diskutim i vogël me dikë nga stafi, sigurisht në sensin pozitiv, për sa i përket ëndrrës dhe objektivit. Unë mendoj se ne kemi arritur një ëndërr dhe tani duhet të shkojmë drejt objektivit.

Kryeministri Edi Rama ka mbërritur këtë mbrëmje në Vlorë, ku pritet të zhvillojë një takim me vajzën e Presidentit amerikan, Ivanka Trump.

Vizita zhvillohet nën masa të shtuara sigurie. Ndërkohë pak më parë ka mbërritur në Vlorë një tjetër delegacion në qytet, ku mendohet se ka qenë një përfaqësues i lartë i SHBA-së.

Vajza e presidentit të SHBA-së, Ivanka Trump mbërriti në Vlorë paraditën e sotme. Ajo ka ndalur në zonën e hidrovorit në Akerni, një territor i njohur për potencialin e tij të lartë në zhvillimin e turizmit elitar dhe investimeve strategjike.

E shoqëruar nga arkitektë të njohur dhe nën masa të rrepta sigurie, me praninë e forcave të shumta të policisë, Trump ka inspektuar nga afër vijën bregdetare dhe hapësirat përreth hidrovorit në Akerni. Vizita është përqendruar në vlerësimin e terrenit, infrastrukturës ekzistuese dhe mundësive që kjo zonë ofron për projekte të ardhshme zhvillimore.

Zona e Akernisë, e konsideruar prej kohësh si një nga pikat me potencial të madh për investime të rëndësishme turistike, ofron kushte natyrore të favorshme dhe një pozicion strategjik, çka e bën atë tërheqëse për projekte afatgjata në fushën e turizmit dhe zhvillimit ekonomik. Vizita e tyre ka ngjallur interes dhe vëmendje të madhe, duke përforcuar idenë se kjo zonë mund të shndërrohet në një pikë kyçe për investime të ardhshme.

Apeli i GJKKO-së ka ndryshuar masën e caktuar për ish-zyrtarin e Bashkisë së Tiranës, Taulant Tusha.

Gjykata e Apelit të Posaçëm ka ndryshuar masën e arrestit me burg për, ish-zyrtarin e Bashkisë Tiranë, Taulant Tusha duke e lënë atë në “arrest shtëpie”.

Vendimi i Apelit të Posaçëm është përcjellë edhe në burgun e Fierit.

Presidenti amerikan Donald Trump i ka bërë kërkesë zyrtare edhe Selisë së Shenjtë në Vatikan që të bëhet pjesë e Bordit të Paqes për rindërtimin e Gazës dhe zonave të tjera të botës. Lajmi u bë i ditur nga Sekretari i Shtetit të Vatikanit, kardinali Pietro Parolin.

“Më duket se e lexova diku që edhe Italia po reflekton mbi këtë çështje. Edhe ne e kemi marrë këtë ftesë. Papa e ka marrë dhe po shohim se çfarë do të bëjmë. Besoj se është një çështje që kërkon pak kohë për tu marrë në konsideratë dhe për t’u dhënë një përgjigje” tha Parolin në një eveniment të organizuar nga Observatori për Mendimin e Pavarur në Romë.

Megjithatë, Parolin nënvizoi se Vatikani nuk është në gjendje të kontribuojë ekonomikisht për Bordin e Paqes për Gazën.

“Ne nuk marrim pjesë nga pikëpamja ekonomike, as nuk jemi në gjendje ta bëjmë”, tha Parolin. “Sigurisht, pikërisht për këtë pikë nuk do të dija ç’të përgjigjesha, por qartazi ndodhemi në një situatë të ndryshme nga vendet e tjera, ndaj edhe vlerësimi do të jetë ndryshe. Por unë besoj se kërkesa nuk do të jetë që të marrim pjesë ekonomikisht, sepse nuk jemi në gjendje ta bëjmë”.

Në lidhje me tensionet mes SHBA-ve dhe Europës, Parolin tha se po krijohet një klimë që përkeqëson situatën në nivel global dhe se “është e rëndësishme që të zbuten tensionet nëpërmjet diskutimeve dhe jo polemikave.”

Nga Davosi, Trump tha sot se “e do shumë Europën, por nuk i pëlqen drejtimi që ajo ka marrë.”

Por Parolin mendon se Trump para së gjithash duhet të respektojë të drejtën ndërkombëtare.

“E çfarë mund të them unë për këtë? Është këndvështrimi i tij: mjafton të respektohet e drejta ndërkombëtare, mendoj se kjo është e rëndësishmja, përtej ndjenjave personale që janë të ligjshme. Të respektohen rregullat e bashkësisë ndërkombëtare” u përgjigj Parolin.

Pjesë e Bordit të Paqes për Gazën do të jetë edhe Shqipëria dhe Kosova si shtete anëtare themeluese. Aderimi i vendit tonë në këtë Bord u miratua të mërkurën nga Këshilli i Ministrave ndërsa kuvendi pritet ta ratifikojë atë në seancën plenare të së enjtes.

Këshilli i Ministrave ka vendosur miratuar disa emërime dhe lirime nga detyra në institucione të rëndësishme shtetërore. Vendimet prekin poste drejtuese në ministri, prefektura, si edhe në institucione qendrore. Erlind Sulo është emëruar zëvendësministër i Infrastrukturës dhe Energjisë.

Nga detyra është liruar Piro Misha, drejtori i Bibliotekës Kombëtare.  Emiljan Jani, prefekt i Qarkut të Durrësit po ashtu është liruar nga kjo detyrë duke u zëvendësuar nga Adrian Gurra.

Nertil Jole është liruar nga detyra si prefekt i Qarkut të Korçës, ai u zëvendësuar nga Florinda Zegullaj. Sipas vendimit të këshillit të ministrave, nga detyra është liruar edhe Shkëlqim Hajdari, i cili mbante detyrën e inspektorit të Përgjithshëm.

Parlamenti Europian ka vendosur të pezullojë marrëveshjen tregtare me Shtetet e Bashkuara, duke shtyrë miratimin e saj.

Bernd Lange, kryetar i Komitetit të Tregtisë Ndërkombëtare të Parlamentit Europian, e njoftoi këtë në një konferencë për shtyp në Strasburg, duke zyrtarizuar vendimin e shpallur dje nga Manfred Weber, president i Grupit të PPE-së, në marrëveshje me socialistët dhe liberalët.

Me kërcënimet e reja tarifore, “Donald Trump e ka shkelur” paktin e nënshkruar në Skoci në korrik, theksoi Lange.

Rreth orës 10:00 të ditës së mërkurë, e shoqëruar nga forca të shumta policie dhe me eskortën e saj, ka mbërritur në qytetin e Vlorës Ivanka Trump, vajza e presidentit të Shteteve të Bashkuara të Amerikës, Donald Trump.

Pas takimit të zhvilluar në një nga hotelet e qytetit të Vlorës, dhëndri dhe vajza e presidentit të SHBA-së, Jared Kushner dhe Ivanka Trump, janë ndalur në zonën e hidrovorit në Akerni, një territor i njohur për potencialin e tij të lartë në zhvillimin e turizmit elitar dhe investimeve strategjike.

Të shoqëruar nga arkitektë të njohur dhe nën masa të rrepta sigurie, me praninë e forcave të shumta të policisë, Trump dhe Kushner kanë inspektuar nga afër vijën bregdetare dhe hapësirat përreth hidrovorit në Akerni. Vizita është përqendruar në vlerësimin e terrenit, infrastrukturës ekzistuese dhe mundësive që kjo zonë ofron për projekte të ardhshme zhvillimore.

Zona e Akernisë, e konsideruar prej kohësh si një nga pikat me potencial të madh për investime të rëndësishme turistike, ofron kushte natyrore të favorshme dhe një pozicion strategjik, çka e bën atë tërheqëse për projekte afatgjata në fushën e turizmit dhe zhvillimit ekonomik. Vizita e tyre ka ngjallur interes dhe vëmendje të madhe, duke përforcuar idenë se kjo zonë mund të shndërrohet në një pikë kyçe për investime të ardhshme.

Sipas informacioneve paraprake, Kushner pritet të qëndrojë gjatë gjithë ditës së sotme në Vlorë, ndërsa temat e diskutimit, siç e përmendëm më sipër, lidhen drejtpërdrejtë me projektet e pritshme zhvillimore në qytet dhe zonat përreth, me theks të veçantë në Zvërnec dhe Ishullin e Sazanit, të konsideruara si zona me potencial të lartë strategjik dhe turistik.

Kjo është hera e dytë që dhëndri i Presidentit amerikan Donald Trump viziton Vlorën, ç’ka tregon një interes të vazhdueshëm për këtë zonë dhe për projektet që mund të zhvillohen në të ardhmen.

Presidenti amerikan Donald Trump planifikon të takohet të enjten në Davos me presidentin e Ukrainës, Volodymyr Zelensky.

Sipas raportimeve, gjatë ditë së sotme Zelensky ndodhej në Kiev, ndërsa Trump mbajti fjalim në Forumin Ekonomik Botëror në Davos. Gjatë fjalimit të tij, Trump deklaroi se kishte në plan të takohej me Zelenskyn më vonë gjatë ditës.

“Jam në kontakt me Presidentin Zelensky dhe mendoj se ai dëshiron të bëjë një marrëveshje”, tha Trump.

Më vonë, duke iu përgjigjur pyetjeve të gazetarëve gjatë një takimi dypalësh me përfaqësuesit e Zvicrës, presidenti amerikan konfirmoi se takimi do të zhvillohet të enjten.

Dy liderët pritet të vazhdojnë diskutimet lidhur me përpjekjet për t’i dhënë fund luftës në Ukrainë.

Takimi vjen në të njëjtën ditë kur i dërguari i posaçëm i Trump për çështjet ndërkombëtare, Steve Ëitkoff, dhe dhëndri i tij, Jared Kushner, do të udhëtojnë drejt Moskës për takime me presidentin rus Vladimir Putin.

“Unë besoj se ata janë në një pikë ku mund të bashkohen dhe të arrijnë një marrëveshje. Nëse nuk e bëjnë këtë, janë budallenj”, tha Trump, duke iu referuar Zelenskyt dhe Putinit, gjatë fjalimit të tij.

Norvegjia dhe Suedia kanë refuzuar t’i bashkohen Komitetit për Paqe të presidentit amerikan Donald Trump, ndërsa sipas raportimeve të mediave, as Italia nuk do të marrë pjesë në të, njoftojnë agjencitë e lajmeve.

Zyra e kryeministrit norvegjez njoftoi sot se Norvegjia nuk do t’i bashkohet Komitetit për Paqe të propozuar nga presidenti amerikan.

“Propozimi amerikan ngre disa çështje që kërkojnë dialog më të thelluar me Shtetet e Bashkuara. Prandaj, Norvegjia nuk do t’u bashkohet dispozitave të propozuara për Komitetin e Paqes dhe nuk do të marrë pjesë në ceremoninë e nënshkrimit në Davos”, tha sekretari i shtetit Kristoffer Thoner për AFP.

Edhe Suedia e ka refuzuar iniciativën e Trumpit.

“Suedia nuk do të marrë pjesë në iniciativën e presidentit Donald Trump për Komitetin e Paqes në formën në të cilën teksti është paraqitur deri tani”, u tha kryeministri Ulf Kristersson gazetarëve në Davos.

As Italia nuk do të marrë pjesë, njoftoi gazeta italiane Corriere della Sera.

Sipas shkrimit të gazetës sot, Italia nuk do të marrë pjesë në iniciativën e Trumpit nga frika se anëtarësimi në një grup të tillë të udhëhequr nga lideri i vetëm i një vendi do të shkelte kushtetutën italiane.

Kryeministrja italiane, Giorgia Meloni, e cila përndryshe ka marrëdhënie të mira me Trumpin, me gjasë nuk do të shkojë në Davos. Qeveria italiane nuk iu përgjigj kërkesës për koment.

Komiteti i propozuar do të drejtohej përjetë nga Trump, dhe do të fillonte me zgjidhjen e konfliktit në Rripin e Gazës, e më pas edhe luftërat e tjera. Anëtarët do të duhej të paguanin një miliard dollarë amerikanë për anëtarësim të përhershëm.

Sipas kushtetutës italiane, Italia mund t’u bashkohet organizatave ndërkombëtare që sigurojnë “paqe dhe drejtësi mes kombeve” vetëm “mbi baza të barabarta me shtetet e tjera”, gjë që nuk përputhet me primatin amerikan në komitetin e ri, shpjegon gazeta, pa përmendur burimin e raportimit.

Ftesa për t’iu bashkuar iniciativës u janë dërguar rreth 60 shteteve, duke përfshirë Kosovën dhe Shqipërinë.