Ministri i Jashtëm rus, Sergei Lavrov akuzoi këtë të mërkurë Presidentin ukrainas Volodymyr Zelensky se fsheh arsye të tjera pas së cilave nuk do një marrëveshje të shpejtë paqeje mes dy vendeve.
Sipas agjencisë shtetërore ruse të lajmeve ‘Ria Novosti’, Lavrov e ka lidhur këtë arsyetim me karrierën politike të Zelensky-t.
“Nuk dëshiron të përfundojë një marrëveshje paqeje, pasi kjo do të thoshte fundi i karrierës së tij politike”,-u shpreh Lavrov.
Zelensky ka thënë se dëshiron një marrëveshje, por nuk është i përgatitur të pranojë kushtet ruse, të cilat ai thotë se janë të barabarta me dorëzimin dhe nuk është i gatshëm t’i lëshojë Moskës territor që ushtria e saj nuk e ka pushtuar në fushën e betejës./mxh
Zbardhet Drafti Ligjor për Amnistinë Penale, një nismë që synon të zbusë dënimet për një pjesë të të dënuarve dhe të lehtësojë integrimin e tyre në shoqëri.
Sipas draftit, Kuvendi i Shqipërisë po shqyrton mundësinë që disa kategori të të dënuarve të përjashtohen nga vuajtja e dënimit ose ndjekja penale për veprat penale të kryera deri më 31 dhjetor 2025.
Ligji synon të përfshijë të gjithë personat që janë të dënuar me vendim gjyqësor të formës së prerë për dënime deri në tre vjet burg për burrat dhe deri në katër vjet për gratë, përfshirë edhe ato forma alternative të dënimit si gjoba ose shërbimi në komunitet.
Për personat që ende kanë pjesë të dënimit për të vuajtur, drafti parashikon përjashtim nga vuajtja e burgut nëse u mbeten deri në tre vjet burrave dhe deri në katër vjet grave. Përveç kësaj, amnistia do të përfshijë të moshuarit, duke nisur nga 60 vjeç për burrat dhe 50 vjeç për gratë, si dhe personat që ishin të mitur kur kryen veprën penale.
Megjithatë, ligji përcakton qartë kufizimet për përfituesit. Nuk përfitojnë amnisti personat që i janë shmangur drejtësisë, si ata të arratisur ose të fshehur, dhe të dënuarit për krime të rënda, përfshirë krime kundër jetës dhe njerëzimit, krime seksuale, terrorizëm, vepra që cenojnë rendin kushtetues, autoritetin e shtetit, mjedisin, ekonominë dhe pasurinë, si dhe veprat penale që lidhen me zgjedhjet dhe demokracinë. Për më tepër, amnistia nuk do të prekë personat me burgim të përjetshëm dhe ata të cilët gjykohen ose janë në hetim nga Gjykata kundër Korrupsionit dhe Krimit të Organizuar.
Drafti gjithashtu parashikon një lehtësim të dënimit për ata që nuk përfitojnë amnisti të plotë. Për burrat, dënimi mund të ulet me një vit, ndërsa për gratë dhe të miturit kjo ulje shkon deri në një vit e gjysmë. Për çështjet penale që janë ende në hetim ose gjykim, ligji parashikon mundësinë që ndjekja penale të pezullohet, por gjithmonë duke respektuar kufizimet për krimet e rënda dhe shmangiet nga drejtësia.
Qëllimi i këtij ligji është të rrisë efiçencën e sistemit të drejtësisë, të ofrojë mundësi rehabilitimi dhe integrimi për të dënuarit, duke respektuar parimet e humanizmit dhe interesit publik, si dhe mbrojtjen e interesit më të lartë të fëmijëve. Drafti parashikon që ligji të hyjë në fuqi 15 ditë pas botimit në Fletoren Zyrtare./mxh
Shërbimi i karabinierëve të stacionit të Viserba të Riminit në Itali ka arrestuar një 42?vjeçar shqiptar, i cili u kthye në mënyrë të paligjshme në Itali edhe pse kishte një urdhër dëbimi të ekzekutuar më parë.
Shqiptari u arrestua gjatë një patrullimi në një rrugë dytësore të lagjes Torre Pedrera, ku karabinierët ndaluan një makinë me targa të huaja në të cilën udhëtonin dy burra. Përpara oficerëve, shqiptari paraqiti patentë dhe pasaportë origjinale shqiptare, por nuk mund të sqaronte pse ishte në territorin italian, pasi nuk kishte leje qëndrimi të vlefshme.
Sipas mediave italiane, pas një kontrolli fillestar që ngriti dyshime mbi identitetin e tij, shqiptari u dërgua në komisariat për verifikime më të thelluara, ku u zbulua se 42?vjeçari kishte qenë më parë subjekt i një urdhri dëbimi nga Questura e Barit në vitin 2023, me ndalim të ri?hyrjes në Itali.
Për të shmangur këtë ndalim, ai ishte kthyer në Shqipëri dhe ishte martuar duke marrë mbiemrin e bashkëshortes së tij. Me këtë identitet të ri ai siguroi dokumente të reja dhe me to hyri ilegalisht përsëri në Itali, duke shpresuar se nuk do të identifikohej nga autoritetet./mxh
Dosjet e reja të publikuara nga autoritetet amerikane për Jeffrey Epstein zbulojnë një dimension të panjohur deri tani: interesin e fortë dhe sistematik të tij për Greqinë gjatë viteve të krizës ekonomike.
Sipas qindra email-eve dhe dokumenteve të brendshme, Epstein, i cili u vetëvra në burg në vitin 2019 ndërsa priste gjyqin për trafik seksual, e shihte Greqinë si një “laborator financiar” për spekulime dhe investime me rrezik të lartë.
Në korrespondencën e tij, ai merrte informacion të drejtpërdrejtë nga banka ndërkombëtare, si JPMorgan dhe Deutsche Bank, për blerjen e bonove shtetërore greke, aksioneve bankare dhe produkteve financiare të lidhura me rimëkëmbjen e ekonomisë greke.
Në një email të vitit 2011, një drejtues i JPMorgan i propozon blerjen e obligacioneve greke me interes mbi 11 për qind, ndërsa Epstein përgjigjet shkurt: “ma kujto javën tjetër”, duke lënë të kuptohet se po shqyrtonte seriozisht bastin mbi borxhin grek.
Por interesi i tij nuk ishte vetëm financiar. Epstein kërkonte informacione politike në nivelet më të larta: nga referendumi i vitit 2015, te largimi i Varoufakis dhe skenarët për një dalje të mundshme të Greqisë nga eurozona.
Në arkiva rezulton se fjala “Greqi” përmendet mbi 1.500 herë, kryesisht në periudhën 2012–2015, kulmi i krizës.
Paralelisht, Epstein interesohej edhe për antikitetet greke, për familje të mëdha armatorësh të diasporës dhe madje për ndërtimin e një vile “në stil grek” në ishullin e tij privat në Karaibe.
Ekspertët theksojnë se dosjet nuk provojnë përfshirje kriminale të personave të përmendur, por zbulojnë qartë mënyrën se si elita globale e shihte krizën greke: jo si tragjedi sociale, por si mundësi për fitim dhe ndikim.
Një tjetër faqe e errët në historinë e Epstein, këtë herë, me sytë nga Athina./mxh
Katër persona, përfshirë dy shtetas kinezë janë arrestuar në Francë pas dyshimeve për spiunazh për Kinën.
Zyra e prokurorit të Parisit, njoftoi se departamenti i krimit kibernetik ka hapur një hetim gjyqësor për rastin.
Sipas njoftimit, thuhej se dy shtetasit kinezë kishin hyrë në territorin francez me qëllim mbledhjen e të dhënave satelitore nga rrjeti “Starlink” dhe të dhënave nga subjekte jetësore, veçanërisht ato ushtarake , me qëllim transmetimin e tyre në vendin e tyre të origjinës, përkatësisht Kinën./mxh
Forcat gjermane morën komandën e trupave të NATO-s në Lituani të mërkurën, ndërsa aleanca forcon praninë e saj në vendet kufitare me Rusinë.
Brigada e 45-të e Armatosur e Ushtrisë Gjermane, e njohur si “Brigada e Lituanisë”, mori drejtimin e grupit multinacional të betejës nga forcat lituaneze në një ceremoni të zhvilluar në Kaunas.
Brigada do të udhëheqë njësitë nga Belgjika, Republika Çeke, Luksemburgu, Holanda dhe Norvegjia, si dhe trupat gjermanë dhe lituanezë.
Ky është vendosja e parë e përhershme jashtë vendit për Ushtrinë Gjermane që nga Lufta e Dytë Botërore. Brigada e Lituanisë u aktivizua në maj të vitit 2025 dhe pritet të arrijë një forcë prej 5,000 ushtarësh kur të jetë plotësisht formuar.
Sekretari parlamentar gjerman për Mbrojtjen, Sebastian Hartmann, gjatë ceremonisë tha se pritet që brigada të jetë e vendosur plotësisht brenda dy vjetësh.
Forcat e NATO-s kanë forcuar praninë e tyre në anën lindore të aleancës pas pushtimit rus të Ukrainës në vitin 2022./mxh
Ky vit qenka plot lajme të mira, veçanërisht për Cardi B dhe Stefon Diggs.
Ky i fundit la të kuptohet se një fejesë e mundshme është në plan.
Gjatë një konference për shtyp të Super Bowl 2026, të hënën ai u pyet nëse Cardi B do ta merrte unazën e saj pasi ai të fitonte të tijën në ndeshjen e madhe të së dielës.
“Është në planet e mia, ndoshta, apo jo? Apo jo?” u përgjigj ai me të qeshur.
“Por fillimisht duhet ta marr unë timen,” shtoi Stefon Diggs, skuadra e të cilit do të përballet me Seattle Seahawks në Super Bowl LX të dielën.
Edhe pse Cardi B ende nuk ka komentuar mbi deklaratat, gjërat duket se po shkojnë shumë mirë për çiftin.
Në një moment tjetër gjatë eventit, ai foli për paraqitjen e fundit të Cardi B në “Saturday Night Live”.
“Nuk di shumë për muzikën, por e di që ajo është një nga më të mirat,” tha ai për People.
“Dua ta shoh të vazhdojë të rritet dhe të bëhet versioni më i mirë i vetes. E di që është gati të nisë turneun, kështu që ka shumë punë përpara,” shtoi sportisti.
Turneu i Cardi B po afrohet, dhe ai nuk ka ndërmend ta lërë të vetëm. Gjatë asaj periudhe ai do të jetë në pushim, dhe kjo do të jetë hera e parë që do të marrë pjesë në kaq shumë koncerte.
Ai paralajmëroi se do të jetë mbështetësi më i madh i saj, madje që tani ka filluar të mendojë për shprehjet e pankartave që do të krijojë për të.
Thashethemet për një romancë mes tyre filluan në shkurt të vitit 2025, por lidhjen e bënë zyrtare pak muaj më vonë në Instagram.
Pak kohë më vonë ata njoftuan se ishin në pritje të një fëmije, një djalë i cili lindi në nëntor të vitit të shkuar.
Cardi aktualisht është në proces divorci me reperin Offset, me të cilin ka tre fëmijë./mxh
Babai i Nicola Peltz, Nelson Peltz, ka folur shumë pak për konfliktin mes vajzës së tij, dhëndrit dhe pjesës tjetër të familjes Beckham.
Gjatë një interviste në eventin WSJ Invest Live në Florida, ai u pyet për Nicola-n.
Në vend që t’i jepte më shumë material medieve mbi konfliktin, vendosi të përgjigjej me humor:
“A ka dalë familja ime kohët e fundit në medie? Nuk e kam vënë re fare.”
Ai shtoi se kishte vetëm një këshillë për dhëndrin dhe vajzën pas gjithë skandalit dhe ajo ishte heshtja.
“Këshilla ime është të qëndroni sa më larg medieve,” tha ai.
Duke marrë parasysh se konflikti u bë publik pikërisht nga dhëndri i tij në rrjetet sociale, zbatimi i kësaj këshille tashmë duket i pamundur.
“Vajza ime dhe familja Beckham janë një histori krejt tjetër dhe nuk është për t’u trajtuar këtu sot. Por mund t’ju them se vajza ime është e mrekullueshme, dhëndri im Brooklyn është i mrekullueshëm dhe dëshiroj shumë që ata të kenë një martesë të gjatë dhe të lumtur së bashku.”
Konflikti mes çiftit dhe familjes Beckham mori gjithë vëmendjen pak javë më parë, kur Brooklyn vendosi të fliste publikisht për disa nga dramat që përfliteshin prej kohësh.
Ai konfirmoi thashethemet që qarkullonin, madje nuk hezitoi të përmendte të tjera ngjarje, ku fajtorë kryesorë bëri Victoria-n dhe David-in.
Sipas tij, prindërit kurrë nuk e kishin dashur Nicola-n dhe gjithmonë ishin përpjekur të shkatërronin martesën mes tyre. Kjo ishte arsyeja kryesore pse nuk dëshironte të pajtohej me ta.
Që prej atij rrëfimi, shumë pak njerëz jashtë familjes kanë folur mbi ngjarjen, por familja Beckham ende nuk ka reaguar.
E vetmja gjë që mund të themi është se Brooklyn nuk mbështetet nga asnjë prej familjarëve, të paktën këtë kanë treguar daljet e fundit të tyre, ku vëllezërit dhe motra e tij janë shfaqur shumicën e kohës krah prindërve./mxh
Presidenti i Kinës, Xi Jinping, dhe Presidenti i Rusisë, Vladimir Putin, kanë vlerësuar marrëdhëniet mes dy vendeve gjatë një bisede përmes video-konference, të zhvilluar të mërkurën, në prag të përvjetorit të katërt të luftës së Rusisë në Ukrainë.
Sipas transmetimit të televizionit shtetëror rus, Putin tha se marrëdhëniet Moskë-Pekin përbëjnë një faktor të rëndësishëm stabilizues në një kohë trazirash në rritje në skenën globale. Ai vlerësoi gjithashtu partneritetin e ngushtë energjetik mes dy vendeve, duke e cilësuar atë si strategjik dhe me përfitime të ndërsjella.
Nga ana e tij, Presidenti kinez Xi Jinping u shpreh se Kina dhe Rusia duhet të hartojnë një “plan të madh” për forcimin e mëtejshëm të marrëdhënieve dypalëshe, të cilat, sipas tij, po ecin në drejtimin e duhur. Ai bëri thirrje për intensifikimin e kontakteve në nivelet më të larta dhe për forcimin e bashkëpunimit praktik në fusha të ndryshme.
Kina dhe Rusia shpallën një partneritet strategjik “pa kufij” pak ditë para se Moska të niste ofensivën ushtarake në Ukrainë, në shkurt të vitit 2022, një bashkëpunim që ka marrë rëndësi të shtuar në kontekstin e tensioneve globale dhe izolimit të Rusisë nga Perëndimi./mxh
“The Devil Wears Prada”, rikthehet pas njëzet vitesh dhe pritet të publikohet më 1 maj. Aktorët kanë punuar prej muajsh, dhe tani që xhirimet përfunduan, Meryl Streep ndihet më e lumtur dhe jo pa arsye.
Shqetësimi i saj më i madh gjatë punës ishin takat e larta, të cilat kishte qenë e detyruar t’i vishte për 16 javë. E lodhur nga kjo, ajo me humor tha se kishte filluar të dyshonte nëse po vuante nga PTSD.
Shpejgim: PTSD është një çrregullim psikologjik që shfaqet pas përjetimit të një ngjarjeje traumatike dhe shoqërohet me ankth, kujtime të forta dhe stres të vazhdueshëm.
“Si një person që ka mbajtur pozicionin e saj për 20 vite, ajo ruajti stilin, por e përshtati, ashtu siç bëjmë me kohën,” i tha Streep revistës Vogue për gardërobën e personazhit të saj në vitin 2026.
“Por pothuajse kisha PTSD nga veshja e takave të larta për 16 javë. Ndihem sikur duhet të më vlerësojnë me Medaljen e Lirisë,” u shpreh ajo me humor.
Më tej, ajo foli për rikthimin tek garderoba ikonike e Miranda Priestly-t. Sipas saj, veshjet nuk kishin ndryshuar thuajse fare, jo sepse ishin të vjetra, por sepse stili kishte qëndruar i njëjtë, thjesht i ishte përshtatur kohës. Këtë eksperiencë ajo e përshkroi si të ishte duke provuar disa rroba të së shkuarës me shpresën se sërish do t’i bënin.
“Ishte si të kërkoje në dollap dhe të gjeje diçka, duke menduar: ‘A më bën akoma?’”/mxh
Beyoncé raportohet se ka humbur mbi 12 milionë ndjekës në Instagram, ndërsa bashkëshorti i saj, reperi i njohur Jay-Z, mbi 100 mijë ndjekës, pas publikimit të dokumenteve të reja të Departamentit Amerikan të Drejtësisë që lidhen me çështjen e Jeffrey Epstein.
Emri i Jay-Z përmendet në këto dokumente, të cilat përfshijnë edhe një deklaratë të paprovuar nga një grua që pretendon se është sulmuar seksualisht nga producenti i diskredituar Harvey Weinstein në rezidencën e Jeffrey Epstein në Florida, ndërsa Jay-Z dyshohet se ka qenë i pranishëm.
Sipas një formulari të FBI-së të datës korrik 2019, gruaja emri i së cilës ngelet anonim në dokumente ka deklaruar se ngjarja e pretenduar ka ndodhur në vitin 1996. Ajo ka pohuar se ishte “rrëmbyer” nga banesa e saj nga një person i panjohur dhe më pas ishte zgjuar në prani të Harvey Weinstein dhe Shawn Carter (Jay-Z), ndërsa Weinstein dyshohet se e ka sulmuar seksualisht. Këto akuza nuk janë verifikuar dhe nuk përbëjnë prova penale.
Dokumentet e publikuara nuk përmbajnë akuza zyrtare apo ngritje padish ndaj Jay-Z, dhe përmendja e emrit të tij nuk nënkupton fajësi.
Por pas publikimit të këtyre materialeve, në rrjetet sociale janë shtuar reagimet dhe spekulimet mbi ndikimin në imazhin publik të reperit i cili së bashku me bashkëshorten janë spekuluar gjithmonë për teori të ndryshme konsipirative. Raportohet se disa figura të njohura dhe marka të mëdha mund të kenë hequr ndjekjen ndaj tij. Aktualisht, Jay-Z ka rreth 1 milion ndjekës në Instagram.
Ndërkohë, Beyoncé, Lindsay Lohan, Diddy, Ivanka Trump dhe Kris Jenner vazhdojnë ta ndjekin reperin. Në rrjet janë përhapur gjithashtu spekulime se Kim Kardashian, Rihanna, Apple Music dhe NFL mund të kenë hequr ndjekjen, megjithëse nuk është e qartë nëse këto llogari e kanë ndjekur më parë apo nëse vendimi lidhet drejtpërdrejt me publikimin e dokumenteve.
Deri tani, as Beyoncé dhe as Jay-Z nuk kanë reaguar publikisht lidhur me këto pretendime./mxh
Kryeministri britanik Keir Starmer ka deklaruar se ndjen keqardhje për emërimin e Peter Mandelson si ambasador i Mbretërisë së Bashkuar në Shtetet e Bashkuara, duke e akuzuar atë se ka gënjyer në mënyrë të përsëritur për lidhjet e tij me financierin amerikan Jeffrey Epstein, i dënuar për krime seksuale.
Duke folur në Parlament, Starmer tha se zbulimi se një ministër kabineti kishte rrjedhur informacione të ndjeshme në kulmin e krizës financiare të vitit 2008 ishte “tej mase zemërues”. Sipas tij, Mandelson kishte tradhtuar vendin, Parlamentin dhe Partinë Laburiste, duke fshehur për vite me radhë thellësinë e marrëdhënies së tij me Epstein.
Kryeministri konfirmoi se materialet lidhur me këtë çështje i janë referuar policisë dhe se tashmë ka nisur një hetim penal për dyshime mbi shpërdorim detyre. Ai shtoi se ka urdhëruar përgatitjen e një projektligji për heqjen e titullit fisnik të Mandelson dhe për masa më të gjera ligjore ndaj anëtarëve të diskredituar të Dhomës së Lordëve.
Starmer bëri të ditur gjithashtu se, me miratimin e Mbretit Charles, Mandelson është hequr nga lista e Këshilltarëve të Kurorës, duke argumentuar se ai ka dëmtuar rëndë reputacionin e këtij institucioni.
Ndërkohë, liderja e opozitës, Kemi Badenoch, pyeti kryeministrin nëse kishte dijeni për vazhdimin e miqësisë së Mandelson me Epstein edhe pas dënimit të këtij të fundit. Starmer u përgjigj se ajo që nuk dihej ishte “thellësia dhe shtrirja reale” e kësaj marrëdhënieje, e cila, sipas tij, ishte keqinterpretuar qëllimisht për vite me radhë.
Autoritetet britanike po hetojnë akuzat se Mandelson ka rrjedhur informacione të ndjeshme për tregjet financiare drejt Epstein. Pas shpërthimit të skandalit, Mandelson ka dhënë dorëheqjen nga Dhoma e Lordëve dhe është larguar edhe nga Partia Laburiste, duke deklaruar se e bëri këtë për të shmangur “turpërime të mëtejshme”.
Skandali u thellua pas publikimit të dokumenteve të reja që hedhin dritë mbi lidhjet e ngushta të Mandelson me Epstein, përfshirë mesazhe dhe pretendime për përfitime financiare, duke shkaktuar një nga krizat më të forta politike për qeverinë britanike muajt e fundit./mxh
Presidenti rus Vladimir Putin po abuzon me bisedimet për armëpushim për të vazhduar sulmet ndaj infrastrukturës civile në Ukrainë. Kështu deklaroi zëdhënësja e Komisionit Evropian për Politikën e Jashtme dhe Sigurinë, Anitta Hipper.
Sipas saj, nuk ka asnjë palë që dëshiron më shumë paqen sesa Ukraina, ndërsa Bashkimi Evropian po punon vazhdimisht për arritjen e saj përmes mbështetjes së vazhdueshme politike, ushtarake dhe financiare. Hipper theksoi se BE-ja është donatori kryesor për Ukrainën, duke kontribuar deri tani rreth 193 miliardë euro, si dhe duke u angazhuar për garanci sigurie përmes të ashtuquajturit “Koalicioni i të Vullnetshmëve”.
“Putin mund ta përfundojë këtë luftë menjëherë, por nuk po tregon asnjë shenjë se dëshiron ta bëjë këtë. Ai po keqpërdor edhe diskutimet për armëpushim për të sulmuar vazhdimisht infrastrukturën civile dhe për të vrarë civilë të pafajshëm”, u shpreh Hipper.
Deklaratat vijnë në të njëjtën ditë kur negociatorë nga Ukraina dhe Rusia nisën një raund të dytë bisedimesh të ndërmjetësuara nga Shtetet e Bashkuara në Abu Dhabi, në përpjekje për t’i dhënë fund konfliktit më të madh në Evropë që nga Lufta e Dytë Botërore.
Bisedimet zhvillohen pasi Presidenti ukrainas Volodymyr Zelenskiy akuzoi Rusinë se ka shfrytëzuar një armëpushim të përkohshëm për energjinë, të mbështetur nga SHBA, për të grumbulluar municione dhe për të ndërmarrë sulme masive, përfshirë një sulm me numër rekord raketash balistike më 3 shkurt.
Ndërkohë, pavarësisht presionit të vazhdueshëm nga administrata amerikane për arritjen e një kompromisi mes Kievit dhe Moskës, palët mbeten ende larg marrëveshjes për pikat kyçe të konfliktit, i cili nisi me pushtimin rus të Ukrainës në vitin 2022./mxh
Rusia do të veprojë me kujdes dhe përgjegjësi pas skadimit të traktatit të ri START me Shtetet e Bashkuara, që kufizon arsenalet bërthamore strategjike të dy vendeve. Kështu deklaroi për gazetarët ndihmësi i Kremlinit, Yuri Ushakov.
Sipas Ushakov, Presidenti Vladimir Putin ka theksuar se traktati START skadon më 5 shkurt dhe se Moska i kishte propozuar Uashingtonit që më 22 shtator 2025 zgjatjen për një vit të kufijve kryesorë sasiorë, si një masë vullnetare vetëpërmbajtjeje. Megjithatë, Rusia ende nuk ka marrë një përgjigje zyrtare nga pala amerikane.
Putin ka nënvizuar se, në këto rrethana, Rusia do të veprojë në mënyrë të matur dhe të përgjegjshme, duke u bazuar në një analizë të thelluar të situatës së përgjithshme të sigurisë.
Ndërkohë, Kremlini bën të ditur se Moska mbetet e hapur për zgjidhje të negociuara, me qëllim garantimin e stabilitetit strategjik.
Deklaratat u bënë në Moskë, ndërsa marrëveshja START, e cila ka qenë një nga shtyllat kryesore të kontrollit të armëve bërthamore mes Rusisë dhe SHBA-së, pritet të skadojë brenda pak orësh./mxh
Dy ish-emisarë të Bashkimit Evropian për dialogun Kosovë-Serbi, Federica Mogherini dhe Miroslav Lajçak, janë përfshirë në skandale që kanë tërhequr vëmendjen ndërkombëtare.
Mogherini, ish-Përfaqësuese e Lartë e BE-së për Punët e Jashtme (2014–2019) dhe aktualisht drejtuese e kolegjit pasuniversitar “College of Europe”, u arrestua në dhjetor 2025 në Bruksel, bashkë me zyrtarë të tjerë të lartë, si pjesë e një hetimi mbi një skemë të dyshuar mashtrimi që lidhej me fondet për trajnime diplomatike diplomatike. Hetimi përfshiu ambientet e kolegjit dhe zyrat e Shërbimit Diplomatik të BE-së.
Lajçak, ish-dërguar i posaçëm për dialogun Kosovë-Serbi, dha dorëheqje pas publikimit të dokumenteve nga SHBA-të që zbardhnin shkëmbime mesazhesh të tij lidhur me Jeffrey Epstein. Ai ka pranuar se komunikimi ishte i papërshtatshëm dhe e ka përshkruar atë si “gjykim të dobët”, por nuk e konsideron akt kriminal. Bashkimi Evropian ka theksuar se kjo nuk e komprometon procesin e dialogut Kosovë-Serbi, që ai e ndërmjetësoi për pesë vjet.
Skandalet nënvizojnë sfidat e transparencës dhe përgjegjësisë në diplomacinë evropiane, ndërsa hetimet për Mogherinin dhe kritikat ndaj Lajçak vazhdojnë. Rastet e tyre pasqyrojnë ndikimin e figurave të larta evropiane dhe ndjeshmërinë e rolit të tyre në proceset ndërkombëtare./mxh
Cristiano Ronaldo , i cili po i afrohet ditëlindjes së 41-të, thuhet se nuk është i lumtur në Al Nassr dhe mund të largohet nga klubi i Ligës Profesionale Saudite në qershor.
Sipas gazetës portugeze Record, sulmuesi ndihet i keqtrajtuar nga Fondi i Investimeve Publike (PIF), i cili zotëron Al Nassr së bashku me Al Hilal, Al Ittihad dhe Al Ahli.
Ronaldo beson se PIF po bllokon transferimet kyçe të Al Nassr për të penguar shanset e tyre për titull, pavarësisht se skuadra është vetëm një pikë prapa liderëve të ligës, Al Hilal.
Ai përmendi shembuj të tillë si transferimi i Karim Benzemas nga Al Ittihad në Al Hilal dhe nënshkrimi i sulmuesit të ri Georges Ilenikhena nga Monaco nga Al Ittihad, ndërsa Al Nassr shtoi vetëm mesfushorin irakian Abdulkareem nga Al Zaëraa në afatin kalimtar.
Në shenjë proteste, ai refuzoi të luante në fitoren e fundit 1-0 të Al Nassr ndaj Al Riyadh në ligë.
Sipas Fabrizio Romanos, Ronaldo pasi e bojoktoi ndeshjen dje (e hënë), sot ai nuk ka dal në stërvitje.
Kontrata e tij përfshin një klauzolë lirimi prej 50 milionë eurosh që mund të lehtësojë një largim, me destinacione të mundshme që përfshijnë Major League Soccer (MLS) ose një rikthim në Evropë./mxh
Kur Izraeli dhe Shtetet e Bashkuara kryen një fushatë intensive të bombardimeve në Iran vitin e kaluar, rrjeti i bashkëpunëtorëve dhe partnerëve të armatosur rajonalë të Iranit qëndroi kryesisht në heshtje.
Por, i ashtuquajturi bosht i rezistencës pritet të hyjë në lojë dhe të mbështesë Iranin nëse presidenti amerikan, Donald Trump, jetëson kërcënimet e tij dhe autorizon një veprim ushtarak kundër Republikës Islamike, thonë ekspertët.
Irani e sheh një konflikti të ri të mundshëm me SHBA-në si kërcënim ekzistencial, ndryshe nga lufta e qershorit 2025, tha Hamidreza Azizi, bashkëpunëtor në Institutin gjerman për Çështje Ndërkombëtare dhe të Sigurisë.
Kjo nënkupton se Teherani është “gati të futet plotësisht në lojë dhe të përdorë çdo kapacitet që ka, në kuptim të kapaciteteve të veta ushtarake, dhe në të njëjtën kohë kapacitetin asimetrik të boshtit të rezistencës” për të siguruar mbijetesën e tij, tha Azizi.
Veçse ka sinjale që aleatët e Iranit në Irak, Liban dhe Jemen po përgatiten për luftë në rast të një sulmi të SHBA-së ndaj Teheranit.
Irani ka shpenzuar dekada duke e ndërtuar boshtin, që është një rrjet i bashkëpunëtorëve të armatosur dhe grupeve militante të mbështetura nga Teherani në Lindjen e Mesme. Anëtarët e boshtit përfshijnë Hezbollahun e Libanit, rebelët Huthi të Jemenit dhe milicitë proiraniane në Irak.
Ky rrjet ka qenë element kyç i strategjisë frenuese të Teheranit kundër kërcënimeve të perceptuara nga Shtetet e Bashkuara dhe kryesisht nga Izraeli.
Por, aleanca ka pësuar goditje të mëdha në vitet e fundit. Qeveria e presidentit sirian, Bashar al-Assad, aktorja e vetme shtetërore në këtë rrjet përveç Iranit, u rrëzua në dhjetor të vitit 2024.
Hezbollahu, ndërkaq, është dobësuar jashtëzakonisht shumë pas luftës njëvjeçare me Izraelin, gjatë së cilës u vra udhëheqësi i kamotshëm i grupit, Hassan Nasrallah.
Megjithatë, pavarësisht kapaciteteve të dobësuara ushtarake, rrjeti mund t’i ofrojë fuqi shtesë zjarri Iranit në rast të një konflikti me SHBA-në, thonë ekspertët.
Gjatë luftës 12-ditore me Iranin në qershor, Izraeli dhe më pas SHBA-ja bombarduan objektet kyç bërthamore dhe ushtarake iraniane. Teherani u përgjigj duke gjuajtur qindra raketa balistike dhe dronë drejt Izraelit, armikut të tij të përbetuar, si dhe duke shënjestruar një bazë amerikane në Katar.
Anëtarët e boshtit të rezistencës të Iranit nuk u përfshin në këtë konflikt të shkurtër.
“Irani nuk e tërhoqi këmbëzën gjatë luftës së qershorit”, tha Azizi. “Atëbotë, Irani erdhi në përfundim se mund ta menaxhonte vet konfliktin. Nuk deshi ta zgjeronte konfliktin dhe deshi që t’i jepte fund atij sa më shpejt që ishte e mundur”.
Por, një konflikt i ri i mundshëm me SHBA-në mund të ndryshojë kalkulimet e Iranit, thanë ekspertët.
Udhëheqja klerikale e Iranit ndodhet në pikën e saj më të dobët në dekada, duke u përballur me trazira dhe kolaps ekonomik në vend si dhe me një grumbullim masiv ushtarak amerikanë pranë kufijve të Iranit. Duke luftuar për mbijetesë, sundimtarët e Iranit janë të gatshëm të përdorin të gjitha mjetet në arsenalin e tyre, sipas ekspertëve.
“Ne veçse po shohim sinjale që boshti i rezistencës – çfarëdo që ka mbetur nga ai – po aktivizohet”, tha Azizi.
Udhëheqësi i Hezbollahut tha më 26 janar se grupi po përgatitet për “një agresion të mundshëm dhe është i vendosur të mbrojë” veten, por nuk tregoi se si do të reagojë nëse Irani sulmohet.
Hezbollahu, që për një kohë të gjatë ka qenë bashkëpunëtori më i fuqishëm i Iranit, vazhdon të jetë kërcënim i madh, thanë ekspertët.
“Hezbollahu është goditur rëndë, por nuk është eliminuar”, tha Sascha Bruchmann, analist për çështje ushtarake dhe të sigurisë në Institutin Ndërkombëtar për Studime Strategjike me seli në Londër. “Ai ka humbur një pjesë të madhe të kapaciteteve të tij strategjike, një pjesë të konsiderueshme të arsenalit të raketave, punëtorive për prodhimin e dronëve dhe tunelet përgjatë kufirit me Izraelin që i përdorte për sulm, por ai mbetet një milici e fuqishme”.
Në Irakun fqinj, milicitë proiraniane kanë nisur një fushatë për rekrutimin e luftëtarëve, përfshirë edhe sulmuesve vetëvrasës.
Udhëheqësi i Kataib Hezbollah, që është një nga milicitë, lëshoi një deklaratë të ashpër më 25 janar, duke i bërë thirrje luftëtarëve të tij të përgatiten për luftë.
I themeluar më 2007, Kataib Hezbollah është një nga anëtarët më të fuqishëm të Forcave të Mobilizimit Popullor (PMF), një organizatë ombrellë e grupeve të armatosura, kryesisht shiite, të mbështetura nga Irani, që është pjesë e Ushtrisë së Irakut që nga viti 2016. PMF është një aktor i rëndësishëm ushtarak dhe politik në Irak.
“Përfshija e Irakut në këtë konflikt mund t’i kushtojë politikisht”, tha Bruchmann. “Por, të gjitha bastet bien poshtë nëse [udhëheqësi suprem i Iranit, ajatollah Ali] Khamenei vritet ose nëse regjimi beson se po rrëzohet, pasi disa nga milicitë shiite irakiane kanë shpallur besnikëri ndaj Khameneit”.
Në Jemen, rebelët Huthi kanë kërcënuar se do të tërhiqen nga një marrëveshje armëpushimi që u arrit me SHBA-në vitin e kaluar. Rebelët jemenas u pajtuan të ndalnin sulmet e tyre me raketa dhe dronë ndaj transportit ndërkombëtar në Detin e Kuq. Në këmbim, SHBA-ja u zotua për ndalim të sulmeve ajrore që kishin për shënjestër grupin.
Colin Clarke, drejtor ekzekutiv i Qendërs Soufan, një institut kërkimor me seli në Nju Jork, tha se nëse boshti i rezistencës do të mbetet sërish i heshtur pas një sulmi tjetër kundër Iranit, ai mund të “rrezikojë të humbasë rëndësinë”.
“Këta bashkëpunëtorë janë dizajnuar si mekanizma pengues për ta mbrojtur regjimin, prandaj përdorimi i tyre në kohë krize do të dukej thelbësor”, tha ai./mxh
Pas muajsh polemikash, skandalesh publike dhe përmbajtjesh shpërthyese, rrjetet sociale të Fabrizio Corona-s janë mbyllur. Meta ka çaktivizuar llogaritë e ish-paparacit dhe të formatit të tij online “Falsissimo”, duke konfirmuar se masa është marrë për “shkelje të shumta të Standardeve të Komunitetit”.
Në vitin e fundit, Fabrizio Corona është shndërruar në një nga figurat më destabilizuese të showbiz-it italian, pasi bëri publike krizën martesore mes Fedez dhe Chiara Ferragni-t, duke publikuar video, audio, mesazhe private dhe prapaskena të marrëdhënies së çiftit më të famshëm të Italisë.
Zbulimet e Corona-s kanë thyer narrativën publike të “familjes perfekte” dhe kanë shkaktuar një stuhi mediatike, me pasoja të rënda në imazhin publik të Ferragni-t dhe në marrëdhënien e saj me sponsorët dhe opinionin publik. Ky episod shënoi pikën e kthesës, duke e vendosur Corona-n sërish në qendër të vëmendjes kombëtare.
Paralelisht me çështjen Fedez–Ferragni, Corona ka intensifikuar sulmet ndaj asaj që ai e ka quajtur “sistemi mediatik i Alfonso Signorini-t”, duke akuzuar ish-moderatorin e Grande Fratello-s se disa të rinj kanë përfituar hyrjen në program në këmbim të favoreve seksuale. Një nga ish-konkurrentët, Antonio Medugno, deklaroi në “Falsissimo” se kishte përjetuar afrime të padëshiruara në vitin 2021 dhe formalizoi kallëzimin për dhunë seksuale dhe zhvatje.
Në disa episode të “Falsissimo”, Corona ka përdorur gjuhë të ashpër dhe akuza personale, të cilat janë konsideruar nga palët e përmendura si shpifje dhe shkelje e rëndë e të drejtave personale. Këto përmbajtje kanë çuar në ankesa ligjore, të dërguara drejtpërdrejt te platformat online.
Pse iu mbyllën profilet
Meta ka sqaruar se heqja e profileve nuk lidhet me një urdhër penal të menjëhershëm, por me shkelje të përsëritura të rregullave të platformës, që përfshijnë:
– përmbajtje potencialisht shpifëse
– publikim materialesh private pa pëlqim
– shkelje të privatësisë dhe dinjitetit personal
– përdorim të përsëritur të gjuhës agresive dhe denigruese
Vendimi është marrë pas sinjalizimeve të shumta dhe vlerësimeve të brendshme, në përputhje me politikat e kompanisë.
Pak ditë para mbylljes së profileve, Gjykata Civile e Milanos kishte vendosur një masë ndaluese ndaj disa përmbajtjeve të “Falsissimo”, duke i kërkuar Corona-s të ndalojë publikimin e materialeve që cenojnë reputacionin e Alfonso Signorini-t. Megjithatë, Meta ka theksuar se veprimi i tyre është autonom dhe i bazuar në standardet e platformës, jo thjesht në vendimin gjyqësor.
Reagimi i Corona-s
Përmes avokatit të tij, Corona e ka cilësuar vendimin si “censurë” dhe ka folur për një rrezik serioz për lirinë e shprehjes, duke pretenduar se mbyllja e profileve është pasojë e presioneve të fuqive mediatike dhe ekonomike që janë ndier të kërcënuara nga zbulimet e tij./mxh
Nëse ke hyrë ndonjëherë në shtëpinë e një burri dhe ke menduar se duket sikur nuk ka ndodhur asgjë interesante që nga viti 2012, ka shumë mundësi që ai të bëjë një jetë… shumë të mërzitshme. Jo domosdoshmërisht në kuptimin e keq të fjalës, por në atë mënyrën e qetë të të jetuarit, të parashikueshme dhe pa asnjë surprizë.
Mbetet në dorën tënde nëse kjo është diçka që e vlerëson te një burrë ose jo, gjithsesi, ja 11 detaje në shtëpinë e një burri që tregojnë se ai bën një jetë të tillë:
1. Enët e kuzhinës janë shumë bazike
Nëse në kuzhinë ka vetëm minimumin e domosdoshëm, ka gjasa që ai të mos jetë i interesuar të eksperimentojë me receta apo shije të reja. Erëza bazë, enë standarde dhe receta të njëjta, gjithçka tregon një rutinë të qëndrueshme dhe pa surpriza.
2. Dekori i shtëpisë është i përgjithshëm
Burrat që jetojnë jetë të sigurta dhe të parashikueshme, shpesh zgjedhin ambiente neutrale. Pa elementë trendi apo objekte që “bien në sy”, shtëpia e tyre reflekton qetësi, qëndrueshmëri dhe rehati.
3. Televizori është pika qendrore
Kur hapësira është e ndërtuar rreth televizorit, e jo rreth mikpritjes për shembull, kjo mund të tregojë një jetë më të izoluar. Por jo domosdoshmërisht të keqe, filmat dhe serialet shpesh janë mënyra më e thjeshtë për t’u çlodhur pas një dite të ngarkuar.
4. Çdo dhomë është vetëm funksionale
Nëse shtëpia duket më shumë si vend për “të mbijetuar” sesa për të shijuar jetën, ka gjasa që rutina e tij të jetë e pandryshueshme. Mungojnë hapësirat spontane, personale apo sociale, gjithçka është praktike.
5. Shtëpia duket sikur ka mbetur në kohë
Mobilje të vjetra, objekte familjare dhe sende të ruajtura prej vitesh tregojnë një lidhje me të shkuarën dhe mungesë interesi për ndryshime. Për këta burra, ajo që kanë është e mjaftueshme.
6. Nuk ka kafshë shtëpiake apo bimë
Pa kafshë dhe pa bimë, jeta në shtëpi mbetet thuajse në vijë të drejtë. Këta burra nuk kanë nevojë për përshtatje apo për të treguar kujdes të vazhdueshëm ndaj një individi tjetër, gjithçka ndjek rregullat e tij dhe vetëm të tijat.
7. Ka një librari të pasur
Ironikisht, një jetë “e mërzitshme” mund të jetë shumë e pasur nga brenda. Burrat që lexojnë shumë dhe kalojnë kohë vetëm, shpesh janë më empatikë dhe më të lidhur me botën sesa duken në pamje të parë.
8. Mobiljet janë zgjedhur për rehatinë e tij
Nëse gjithçka në shtëpi është menduar për komoditetin personal dhe jo për mysafirët, kjo tregon se ai vlerëson vetminë dhe qetësinë. Dhe e vërteta është se vetmia e zgjedhur me vetëdije është jashtëzakonisht e shëndetshme.
9. Mungon arti
Një shtëpi pa piktura, fotografi apo objekte personale shpesh reflekton mungesë shprehjeje emocionale. Megjithatë, nëse ai krijon art, por e mban për vete, kjo mund të jetë e vlefshme për mirëqenien e tij.
0. Dhoma e gjumit duket si hotel
Dhoma shërben vetëm për gjumë: çarçafë perfektë, ndriçim i matur dhe asgjë personale. Një hapësirë e pastër, e kontrolluar dhe e pandarë me askënd tjetër.
11. Banjoja ka vetëm gjërat bazë
Pa produkte trendi, pa rutina të ndërlikuara. Vetëm ato që i duhen vërtet. Një rutinë e qëndrueshme, e cila sipas studimeve, lidhet edhe me mirëqenie mendore më të mirë./mxh
Login
