Astronomët kanë zbuluar një planet të ri, potencialisht të banueshëm, rreth 146 vite dritë larg, me madhësi të ngjashme me Tokën dhe me kushte që ngjajnë me Marsin.

Planeti i quajtur HD 137010 b, rrotullohet rreth një ylli të ngjashëm me Diellin dhe vlerësohet të jetë 6% më i madh se Toka.

Një ekip ndërkombëtar shkencëtarësh nga Australia, Britania e Madhe, SHBA-të dhe Danimarka e identifikoi planetin duke përdorur të dhëna të mbledhura në vitin 2017 nga teleskopi hapësinor i Nasa-s, Kepler, gjatë misionit të tij të zgjeruar, të njohur si K2.

Dr. Chelsea Huang, kërkuese në Universitetin e Jugut të Queensland-it (USQ) në Australi, tha se orbita e planetit është e ngjashme me atë të Tokës, rreth 355 ditë. Shkencëtarët besojnë se planeti ka “rreth 50% gjasa të ndodhet në zonën e banueshme” të yllit që e rrethon.

“Çfarë e bën veçanërisht emocionues këtë planet me madhësi tokësore është se ylli i tij ndodhet vetëm rreth 150 vite dritë larg sistemit tonë diellor”, tha Huang, një nga bashkëautorët e studimit.

Ylli tjetër më i afërt me një planet të mundshëm të banueshëm rreth një ylli të ngjashëm me Diellin, Kepler-186f, ndodhet katër herë më larg dhe është 20 herë më i dobët. HD 137010 b u zbulua kur kaloi shkurtimisht përpara yllit të tij, duke shkaktuar një zbehje të vogël të dritës.

Ky sinjal i dobët u identifikua fillimisht nga një ekip shkencëtarësh qytetarë, përfshirë autorin kryesor të studimit, Dr. Alexander Venner, kur ai ishte ende nxënës i shkollës së mesme.

“Kam kontribuar në këtë projekt shkencor qytetar, të quajtur Planet Hunters, kur isha në shkollën e mesme, dhe ishte një pjesë e madhe e mënyrës se si u futa në kërkimin shkencor”, tha Venner, i cili më pas përfundoi doktoraturën në USQ.

“Ishte një përvojë e jashtëzakonshme të kthehesha te ky projekt dhe të zbuloja një zbulim kaq të rëndësishëm.”

Reagimi i parë i ekipit ndaj zbulimit ishte: “Kjo nuk mund të jetë e vërtetë”, tha Huang. “Por ne kontrolluam gjithçka dy herë dhe tre herë … dhe është një shembull tipik i tranzitit të një planeti.”

Ndriçimi dhe afërsia e yllit që rrethon planeti e bëjnë atë “të arritshëm për t’u vëzhguar nga gjenerata e ardhshme e teleskopëve,” shtoi Huang. “Jam e sigurt se do të jetë objektivi i parë për t’u studiuar kur teknologjia të jetë e gatshme.”

Ylli rreth të cilit rrotullohet HD 137010 b është më i ftohtë dhe më i zbehtë se Dielli ynë, që do të thotë se temperatura e sipërfaqes së planetit mund të jetë më e ngjashme me Marsin dhe potencialisht nën -70°C. Dr. Sara Webb, astrofizikane në Universitetin Swinburne, e cila nuk ishte pjesë e studimit, tha se zbulimi është “shumë emocionues”, por nevojiten më shumë të dhëna për të klasifikuar planetin kandidat si një ekzoplanet të konfirmuar.

“Është zbuluar vetëm një tranzit, dhe zakonisht në shkencën planetare kërkohet standardi i artë i tre tranziteve.”

Faktin që planeti ngjan me Tokën është një mundësi emocionuese, por Webb shtoi se ai mund të jetë gjithashtu “diçka që quhet super-borë. Në thelb, një botë e madhe e akullt që potencialisht ka shumë ujë, por shumica e tij është e ngrirë.”

Megjithëse planeti “është shumë afër në krahasim me galaktikën tonë,” Webb tha se “nëse do të përpiqeshim të shkonim atje, do të na duheshin dhjetëra mijëra, madje qindra mijëra vjet duke udhëtuar me shpejtësitë aktuale që mundemi.”/kb

Firma amerikane e kapitalit privat, Carlyle Group, ka arritur marrëveshje për t’i blerë shumicën e aseteve të huaja të Lukoilit, të vlefshme rreth 22 miliardë dollarë. Kompania e dytë më e madhe e naftës në Rusi u detyrua t’i shesë këto asete për shkak të sanksioneve amerikane. Kjo vjen në një moment kur negociatorët rusë, ukrainas dhe amerikanë po përpiqen të arrijnë një marrëveshje për t’i dhënë fund luftës në Ukrainë. As Lukoil dhe as Carlyle nuk treguan çmimin e shitjes së aseteve. Tani pritet miratimi nga agjencia amerikane që administron sanksionet.

Thesari i SHBA-ve i kishte dhënë Lukoilit afat deri më 28 shkurt për ta shitur portofolin e tij global.

“Qasja e Carlyle ndaj LUKOIL International do të fokusohet në sigurimin e vazhdimësisë operative, ruajtjen e vendeve të punës, stabilizimin e bazës së aseteve dhe mbështetjen e performancës së sigurt e të besueshme në të gjithë portofolin, duke sjellë mbikëqyrje të dedikuar dhe kapacitete operimi ndërkombëtare”, tha firma amerikane në një deklaratë.

Lukoil tha në një deklaratë se ishte pajtuar me Carlyle për ta shitur njësinë e saj LUKOIL International, e cila mbikëqyr asetet e huaja të kompanisë. Këto përfshijnë operacione në Evropë, Lindjen e Mesme, Afrikë, Azinë Qendrore dhe Meksikë, dhe variojnë nga aksione kontrolluese në fushën e madhe naftëmbajtëse West Qurna 2 në Irak, deri te rafineritë në Bullgari dhe Rumani.

Rusia, e cila përbën rreth një të dhjetën e prodhimit botëror të naftës, është përballur me një sërë sanksionesh ndaj kompanive të saj kryesore qëkurse presidenti Vladimir Putin dërgoi dhjetëra mijëra trupa në Ukrainë në shkurt të vitit 2022. Në tetor, këto sanksione u zgjeruan për të përfshirë Lukoilin dhe prodhuesin më të madh rus të naftës, Rosneft, si pjesë e përpjekjeve të presidentit amerikan Donald Trump për ta detyruar Moskën të ulet në tavolinën e bisedimeve për t’i dhënë fund luftës.

E themeluar në Uashington, Carlyle është firmë globale investimesh me 474 miliardë dollarë asete dhe me dekada përvojë në investimin dhe operimin e aseteve energjetike në tregjet ndërkombëtare./kb

Kryeministri Edi Rama, ka zhvilluar një intervistë me një gazetar të Le Monde, e cila është pasqyruar në një artikull, ku ai cilësohet “një politikan jo i zakonshëm”.

“Një portret që ndërthur politikën, artin, gjuhën frënge dhe vizionin europian të vendit”, shkruan Le Monde.

Intervista është realizuar në ambientet e Kryeministrisë, në kopshtin e Edenit, ku gazetari francez përshkruan një atmosferë larg klisheve të pushtetit.

Që në hyrje, Rama shfaqet si një lider atipik: një kosh basketbolli i varur në mur, vizatime shumëngjyrëshe dhe piktura personale që dëshmojnë për lidhjen e tij të pandarë me artin dhe sportin.

Le Monde ndalet edhe te rrugëtimi i Ramës me gjuhën frënge, të cilën ai e ka mësuar gjatë rinisë, në Cité Internationale des Arts në Paris. Sipas kryeministrit, ajo mbetet një gjuhë që e bën të ndihet “si në shtëpi”, edhe pse sot anglishtja dominon marrëdhëniet ndërkombëtare.

I pyetur për stilin e tij të veshjes, shpesh të komentuar për atletet e bardha edhe në evente zyrtare, Rama thekson se nuk bëhet fjalë për imazh apo strategji komunikimi, por për autenticitet.

“Ka të bëjë me të qenurit vetvetja. Pse duhet të ndryshoj për t’u dukur sikur jam pjesë e një shfaqjeje? Jam unë, dhe kaq”, është shprehur kreu i qeverisë.

Në intervistë trajtohet edhe rritja e ndjeshme e turizmit, veçanërisht e turistëve frankofonë në Shqipëri.

Rama shprehet se Shqipëria tashmë po flet vetë përmes bukurisë së saj, pa paragjykimet e së shkuarës, duke u shfaqur si një vend europian, mikpritës dhe me harmoni fetare.

Në fund të bisedës, kryeministri përmbledh me metafora identitetin e vendit.

Tirana, sipas tij, është “dëshira për të ardhmen”dhe Shqipëria është “dashuria për të tjerët”.

Le Monde e mbyll intervistën duke e përshkruar Edi Ramën si një lider që mbetet vetvetja, mes pikturës, sportit dhe një vizioni të qartë europian. Shqipërinë e përshkruan si një vend që po prezantohet gjithnjë e më shumë përmes bukurisë së saj, në të gjitha stinët dhe qytetet.

Më poshtë, intervista e plotë:

Gazetari: Z. Kryeministër, para se të fillojmë intervistën, po ju rrëfehem diçka po mendoja nëse duhet të ndërroja atletet. Që kur ju pashë duke mirëpritur krerët e shteteve në samitin evropian në Tiranë, mendova se nuk po i përmbaheshit saktësisht kodit klasik të veshjes. Ky stil i pazakontë, a është një mënyrë për të projektuar një imazh modern, ndryshe nga perceptimi tradicional për Shqipërinë?

Edi Rama: Jo. Ka më shumë të bëjë me të qenurit vetvetja. Përndryshe, nuk do të isha vetvetja. Pse duhet të ndryshoj për t’u paraqitur sikur jam pjesë e një shfaqjeje? Jam unë, dhe kaq. Megjithatë, gjërat po ndryshojnë. Ka edhe të tjerë që po fillojnë të veshin atlete.

Gazetari: A është njohja e gjuhës frënge një aset në funksionin tuaj si kreu i qeverisë, veçanërisht në marrëdhëniet ndërkombëtare?

Edi Rama: Frëngjishtja nuk është më gjuha e marrëdhënieve ndërkombëtare. Më vjen keq ta them, por kjo është anglishtja. Megjithatë, të flasësh frëngjisht më bën të ndihem vërtet si në shtëpi. Është një ndjesi që të lejon ta përjetosh thellë një kulturë, e cila përndryshe humbet në anglisht ose në shqip. Prandaj, kur kemi fatin ta eksplorojmë drejtpërdrejt, është diçka vërtet e jashtëzakonshme.

Gazetari: Gjatë udhëtimit tonë kemi vënë re një rritje të ndjeshme të numrit të turistëve, mes tyre edhe shumë frankofonë. Si e shpjegoni këtë interes të madh për Shqipërinë?

Edi Rama: Jam shumë i lumtur, sepse më në fund Shqipëria është në gjendje t’u flasë francezëve që e vizitojnë përmes bukurisë së saj. Ata e admirojnë vendin pa paragjykimet që për një kohë të gjatë e kanë shoqëruar në sytë e botës, të Evropës dhe të Francës. Ata zbulojnë një vend evropian, që e do Francën, një vend të bukur dhe mikpritës, ku fetë bashkëjetojnë në harmoni të plotë dhe ku, pavarësisht diversitetit fetar, ekziston një unitet i fortë në përkatësinë evropiane dhe në dëshirën për t’u anëtarësuar në Bashkimin Europian.

Gazetari: Z. Kryeministër, nëse do t’ju duhej ta përkufizonit Tiranën me një fjalë, cila do të ishte ajo?

Edi Rama: Dëshira për të ardhmen.

Gazetari: Po Shqipërinë?

Edi Rama: Dashuria për të tjerët./kb

Kryetari i Partisë Demokratike, Sali Berisha, në konferencën e zhvilluar ditën e sotme ka folur për vizitën e tij në Strasburg.

Kryedemokrati deklaroi se ndërkombëtarët po presin me padurim protestën e dytë të opozitës.

Protestë për të cilën Berisha tha se qytetarët do të flasin shumë shpejt dhe opozita do të informojë për atë të cilën e quajti protestën më të fuqishme që ka njohur Shqipëria.

“Natyrisht krahas mbledhjeve, në grup, krahas fjalimeve, ndërhyrjeve, diskutimeve, ne patëm dhe takime të rëndësishme me drejtues të komisioneve, me personalitete drejtues të Asamblesë Parlamentare të Këshillit të Europës. Takime në të cilat ne gjetëm mirëkuptim të plotë. Jehona e protestës ishte e fuqishme. Pritej nga miqtë tanë protesta e dytë, po me aq insistim sa ç’pritet nga të gjithë opozitarët shqiptarë. Dhe unë jam këtu për të dënuar me forcën më të madhe aktin e Edi Ramës, aktin puçist, me të cilin ai bllokoi, me të cilin ai për të mbrojtur veten e tij, bllokoi Parlamentin dhe nuk lejoi shqyrtimin e dosjes. Qytetarët do të flasin shumë shpejt dhe ne do të informojmë për protestën më të fuqishme që ka njohur Tirana dhe Shqipëria në ditët në vijim.

Opozita është në këmbë, është e vendosur të përballet dhëmb për dhëmb me këtë regjim të turpshëm. Me këtë regjim kriminal. Me këtë regjim kleptokratik. Me këtë narko-regjim.

Ndaj dhe ftoj opozitën dhe opozitarët ta vazhdojmë këtë betejë gjer në fitoren tonë. Shpresa e vetme është opozita dhe ajo nuk do zhgënjejë”, tha Berisha./Kb

Transferohet drejt spitalit të Traumës në Tiranë, kalimtari i lënduar trë ditë më parë në “përleshjen” mes babit dhe të bijës. Sipas familjarëve të tij, Onard Memlika, është në gjendje të rëndë dhe ndodhet aktualisht në reanimacionin e spitalit të Traumës.

I riu mbeti i plagosur pasi ndërhyri në sherrin mes 56-vjeçarit Mikel Ndoj dhe vajzës së tij 24-vjeçare, e cila po ashtu mbeti e plagosur. Ai ishte vetëm një kalimtar i rastësishëm që u përpoq të shuante sherrin, por fatkeqësisht mbeti vetë i plagosur.
Në njoftimin zyrtar, policia e Durrësit bëri të ditur të hënën, se të dy të plagosurit ishin në spitalin rajonal, jashtë rrezikut për jetën, por duket se me kalimin e ditëve gjendja e 35-vjeçarit është përkeqësuar./kb

Gazetari Elton Tozaj denoncon në polici se në derën e banesës ka gjetur një bidon me benzinë dhe një sasi të lëndës djegëse të përhapur në tokë.

Sipas deklarimeve të tij në komisariat, gazetari Tozaj pretendon se lënda djegëse i është vendosur në formë kërcënimi nga persona si të dyshuar të lidhur me paligjshmëri që ai i ka denoncuar publikisht me emra.

Në Gjykatën Themelore të Prishtinës dëshmoi sot në 29 janar Naim Murseli, i dyshuari për organizimin e vrasjes së gruas së tij, Liridona Ademaj. Para trupit gjykues, Murseli deklaroi se gjatë gjithë viteve të martesës kishte pasur një marrëdhënie të mirë me të ndjerën dhe se ajo nuk kishte shprehur kurrë pakënaqësi në raportin e tyre.

“Me Liridonën u fejuam në vitin 2010 dhe u martuam më 11 dhjetor 2011. Kemi 12 vite martesë dhe dy fëmijë. Marrëdhënia jonë ka qenë shumë e mirë, e lumtur. Liridona ishte një grua e mrekullueshme, nënë e përkushtuar dhe bashkëshorte e devotshme. Jetonim në Suedi, ku ajo mori edhe shtetësinë suedeze pas tre vitesh”, tha Murseli.

Naim Murseli u soll në gjykatë nën masa të rrepta sigurie dhe me pranga në duar, së bashku me Granit Plavën dhe Kushtrim Kokallën, të dyshuar gjithashtu për përfshirje në këtë krim.
Gjyqi ndaj tre të akuzuarve, të dyshuar për planifikimin dhe kryerjen e vrasjes së Liridona Ademajt, ka përfunduar për këtë seancë. Seanca e radhës është caktuar për më 11 shkurt në Gjykatën Themelore të Prishtinës./kb

Një sinjal alarmi i ri është ndezur për një virus të njohur më parë. Bëhet fjalë për virusin Nipah, i cili po trondit Azinë Juglindore. Autoritetet indiane kanë konfirmuar dy raste të reja infektimi, duke shkaktuar një reagim të menjëhershëm në vendet fqinje.

Tajlanda, Singapori, Hong Kongu dhe Malajzia kanë forcuar tashmë kontrollet në kufij dhe kanë aktivizuar protokollet e mbikëqyrjes për atë që Organizata Botërore e Shëndetësisë (OBSh) e konsideron një patogjen me “potencial të lartë epidemik dhe pandemik”.

Pacientët e infektuar në Indi janë punonjës shëndetësorë dhe ndodhen në terapi intensive. Qeveria ka bërë të ditur se 196 personat që kishin pasur kontakt me ta rezultuan negativë ndaj virusit. Ministria e Shëndetësisë thekson se të dhënat aktuale nuk tregojnë ndonjë rrezik për sigurinë e qytetarëve dhe familjeve të tyre.

Nipah nuk është një virus i zakonshëm. Identifikuar për herë të parë në fund të viteve ’90, ai ka një shkallë shumë të lartë vdekshmërie. Megjithatë, ndryshe nga disa patogjenë të tjerë të njohur kohët e fundit, nuk transmetohet me të njëjtën lehtësi.

Infektimi ndodh kryesisht në dy mënyra: përmes konsumimit të ushqimeve të kontaminuara, si fruta ose lëng palme të prekur nga lakuriqët e infektuar, dhe përmes kontaktit të ngushtë nga njeriu tek njeriu, një rrezik që zakonisht prek vetëm personelin shëndetësor ose ata që kujdesen për të sëmurët pa mbrojtje adekuate.

Pacientët e infektuar me Nipah shfaqin fillimisht simptoma të ngjashme me gripin, si ethe, nauze, dhimbje fyti, dhimbje muskujsh dhe kokëdhembje. Më pas mund të zhvillojnë komplikacione më serioze, si pneumoni jo tipike me vështirësi në frymëmarrje dhe kollë, ose më shpesh, encefalit akut me përparim të shpejtë dhe shkallë të lartë vdekshmërie.

OBSh e ka renditur virusin Nipah mes dhjetë sëmundjeve prioritare, së bashku me patogjenë si Covid-19 dhe Zika, për shkak të potencialit të tij epidemik. Disa epidemira janë regjistruar në Bangladesh që nga viti 2001, ndërsa shpërthime sporadike janë raportuar në Indi.

Në Itali, po ashtu si në pjesë të tjera të botës, ekziston shqetësimi që Nipah të përhapet deri këtu. “Aktualisht nuk ka rrezik për Itali”, qetëson Gobbi. “Shanset që epidemia të arrijë tek ne janë shumë, shumë të vogla.” Edhe për ata që planifikojnë të udhëtojnë në zonat e prekura, rreziku mbetet “jashtëzakonisht i ulët”.

Fjala kyçe është kujdesi dhe vetëdija. Ata që shkojnë në këto zona duhet të jenë të vetëdijshëm për shpërthimin dhe të ndjekin masat bazë të parandalimit, si shmangia e ushqimeve që mund të jenë prekur nga kafshët e egra. “Është shumë e rëndësishme të vazhdojmë monitorimin”, paralajmëron Gobbi. “Autoritetet lokale po bëjnë gjithçka për të kontrolluar epideminë, por viruset mutojnë, duhet të qëndrojmë gjithmonë vigjilent.”

Situata bëhet më delikate pasi, aktualisht, nuk ekzistojnë as vaksina dhe as trajtime specifike për Nipah. Parandalimi dhe reagimi i shpejtë mbeten armët e vetme. Ndërsa Azia forcon kufijtë dhe monitoron situatën, Europa e ndjek nga larg me kujdes, por pa panik. Nipah mbetet një “monitor i veçantë”: një armik i rrezikshëm për ata që infektohen, por fatmirësisht ende i kufizuar në përhapje globale./kb

Ministria për Evropën dhe Punët e Jashtme ka përshëndetur paraqitjen në Kongresin e Shteteve të Bashkuara të Amerikës të projektligjit “Preshevo Valley Discrimination Assessment Bill”, një iniciativë që kërkon nga Departamenti i Shtetit raportim të detajuar mbi trajtimin e pakicave etnike nga Serbia, me fokus të veçantë te shqiptarët në Luginën e Preshevës. Ky projektligj konsiderohet një njohje institucionale e problematikave serioze që përballen shqiptarët në këtë rajon, duke përfshirë çështjet e pasivizimit të adresave, diskriminimit në arsimin dhe punësimin, si dhe kufizimeve në pjesëmarrjen qytetare.

Sipas Ministrisë së Jashtme të Shqipërisë, akti përfaqëson një hap domethënës në trajtimin serioz dhe transparent të të drejtave të pakicave shqiptare në nivel ndërkombëtar, duke dërguar një sinjal të fortë se Shtetet e Bashkuara vlerësojnë rëndësinë e respektimit të të drejtave të komunitetit shqiptar dhe mbështesin përpjekjet për paqe dhe stabilitet në Ballkanin Perëndimor.

“Ky projektligj tregon se sfidat e shqiptarëve në Luginën e Preshevës nuk janë të padukshme dhe se komuniteti ndërkombëtar ndjek me vëmendje situatën në këtë rajon”, deklaron Ministria, duke nënvizuar se iniciativa e Kongresit mund të shërbejë si nxitje për dialog konstruktiv me autoritetet serbe dhe për avancimin e të drejtave të shqiptarëve në çdo aspekt të jetës së përditshme.

Ministria u shpreh se mbështetja e SHBA-së dhe kontributi i Kongresit Amerikan përmes këtij projektligji nuk është vetëm një akt simbolik, por një instrument konkret për forcimin e paqes dhe stabilitetit rajonal, duke siguruar se zëri i shqiptarëve të Luginës së Preshevës dëgjohet dhe do marrë vëmendjen që meriton në arenën ndërkombëtare./kb

Një model i ri i inteligjencës artificiale nga DeepMind i Google, i quajtur AlphaGenome, po hap rrugë për të kuptuar më mirë ADN-në dhe ndikimin e saj në sëmundje dhe zhvillimin e barnave.

Ky sistem mund të ndihmojë shkencëtarët të zbulojnë pse ndryshimet e vogla në ADN rrisin rrezikun për sëmundje si hipertensioni, dementia apo obeziteti, dhe mund të përshpejtojë studimin e kancerit dhe sëmundjeve gjenetike.

Gjenomi njerëzor përbëhet nga tre miliardë shkronja të kodit ADN (A, C, G dhe T). Vetëm 2% e tij kodojnë proteinat që trupi ka nevojë, ndërsa pjesa tjetër, e quajtur “gjenomi i errët”, ka një rol kyç në rregullimin e gjeneve dhe është vendi ku gjenden shumë mutacione të lidhura me sëmundjet.

AlphaGenome mund të analizojë deri në një milion shkronja njëkohësisht dhe të parashikojë jo vetëm vendndodhjen e gjeneve, por edhe ndikimin e gjenomit të errët në shprehjen dhe përpunimin e tyre. Ai mund të parashikojë edhe efektin e ndryshimit të një shkronje të vetme në ADN.
“Ky model mund të na ndihmojë të kuptojmë mutacionet që shkaktojnë sëmundje të rralla dhe të përshpejtojë zbulimin e barnave të reja”,thotë Natasha Latysheva, inxhiniere në DeepMind.

AlphaGenome është testuar në qindra mijëra eksperimente dhe konsiderohet një “arritje teknike e jashtëzakonshme” në fushën e inteligjencës artificiale për gjenomikë.

Ky model mund të përdoret në të ardhmen edhe për biologjinë sintetike dhe terapitë gjenetike, duke hapur rrugë për epokën e re të kërkimit shkencor me Inteligjencë Artificiale./kb

Ministrja e Ekonomisë dhe Inovacionit, Delina Ibrahimaj, mori pjesë në prezantimin e “Librit të Bardhë”, një aktivitet të organizuar nga Shoqata e Investitorëve të Huaj (FIAA), ku theksoi rëndësinë e këtij dokumenti si një udhërrëfyes strategjik për politikën ekonomike dhe bashkëpunimin me komunitetin e biznesit.

Ministrja Ibrahimaj vuri në dukje se “Libri i Bardhë” është një instrument kyç për hartimin e ligjeve dhe politikave bazuar në rekomandimet e komunitetit të biznesit, duke siguruar që vendimmarrja e qeverisë të jetë e orientuar nga nevojat reale të tregut dhe standardet e Bashkimit Evropian.

“Ky është Libri im i dytë i Bardhë, në të cilin jam pjesë, dhe jam shumë e lumtur që mund të kontribuoj në përfshirjen e rekomandimeve për sektorë dhe fusha të ndryshme të politikave në punën tonë të përbashkët. Libri i ri i Bardhë do të jetë një udhërrëfyes shumë i dobishëm për vitet që vijnë”, deklaroi Ministrja Ibrahimaj.

Ajo gjithashtu theksoi se viti 2025 ka shënuar rezultate pozitive për ekonominë shqiptare, me rritje të investimeve, eksporteve dhe punësimit, si dhe ulje të papunësisë dhe rritje të numrit të bizneseve që operojnë në vend. Ministrja Ibrahimaj theksoi se këto rezultate tregojnë një klimë të favorshme për biznesin dhe forcën adaptuese të komunitetit të tij.

Ministrja nënvizoi edhe sfidat për vitin 2026, duke përmendur procesin e integrimit në BE, zbatimin e reformave të planifikuara dhe nevojën për bashkëpunim të ngushtë me komunitetin e biznesit për të arritur standardet e tregut të përbashkët evropian. Ajo informoi se MEI po punon për dokumente strategjike, si programi i eksporteve dhe programi industrial, që do të udhëheqin zhvillimin e sektorëve ekonomikë në përputhje me politikën industriale të BE-së.

“Ne do të jemi aty për të ndihmuar komunitetin e biznesit të arrijë standardet e kërkuara, të rrisim produktivitetin dhe konkurrueshmërinë. Komuniteti i biznesit, shqiptar dhe i huaj, do të jetë mbështetësi ynë kryesor në këtë rrugëtim”,shtoi Ministrja Ibrahimaj.

Ajo përfundoi duke falënderuar FIAA-n dhe të gjithë aktorët e përfshirë për punën e tyre në dhënien e rekomandimeve të bazuara në kërkime, duke siguruar që MEI do të strukturojë punën për ndjekjen e këtyre rekomandimeve në vitet në vijim./kb

Prokuroria hungareze ka ngritur akuzë ndaj kryebashkiakut të Budapestit, Gergely Karácsony dhe ka propozuar gjobë ndaj tij për organizimin e Pride në kryeqytet në qershorin e kaluar, pavarësisht një ndalimi nga autoritetet.

Aktakuza bazohet në një mesazh video të publikuar nga Karácsony në rrjetet sociale më 16 qershor 2025, ku ai konfirmonte se bashkia do të organizonte Budapest Pride pas dymbëdhjetë ditësh. Më 19 qershor, policia e Budapestit ndaloi tubimin, duke përdorur si justifikim ligjin mbi mbrojtjen e fëmijëve, i cili në praktikë është përdorur për të kufizuar të drejtat LGBT. Megjithatë, Karácsony konfirmoi zhvillimin e Pride.

Prokuroria akuzon kryebashkiakun për shkelje të lirisë së tubimit dhe i propozon gjykatës që t’i vendosë një gjobë pa zhvillimin e një procesi të rregullt gjyqësor.

“Ky është çmimi që duhet paguar në këtë vend nëse luftojmë për lirinë tonë dhe të të tjerëve”, tha Gergely Karácsony. “Kushdo që mendon se mund të më ndalojë, të më trembë, ose të pengojë mua dhe qytetin tim, gabon rëndë.”

Presidenca qipriote e BE-së synon që të mbyllë deri në tre kapituj me Shqipërinë brenda muajit qershor. Paraprakisht po punohet për arritjen e konsensusit mbi raportin e vlerësimit të përkohshëm për grup kapitullin e parë, themeloret.

Kushti kryesor për të vijuar procesin e negociatave me vendin tonë është zbatimi i standarteve në sundimin e ligjit.

Kjo do të lejonte mbylljen e kapitujve të parë negociues. Paraprakisht, qëllimi kryesor drejt të cilit po punojmë është arritja e konsensusit mbi raportin e vlerësimit të përkohshëm për grup-kapitullin e parë, themeloret, që më pas do të hapte rrugën për të mbyllur kapitujt e parë nën presidencën tonë. Ne shohim potencial për të mbyllur dy deri në tre kapituj me Shqipërinë deri në fund të muajit qershor gjatë presidencës qipriote”, u shpreh zv/ministja për Çështjet Evropiane e Qipros, Marilena Raouna.

Gjatë raportimit në Komisionin e Jashtëm të Parlamentit Evropian për Malin e Zi, zv/ministja për Çështjet Evropiane e Qipros, Marilena Raouna, tha se parashikojnë të mbyllin rreth gjashtë kapituj, në varësi të procesit të reformave.

“Për Malin e Zi, të bëhet shteti i 28-të anëtar deri në vitin 2028 është një objektiv ambicioz, por realist, nëse ky shtet vijon rrugën e reformave.
Ngritja e grupit të punës ad hoc për hartimin e traktatit të pranimit të Malit të Zi është një përparësi e presidencës tonë. Ne parashikojmë që të jemi në gjendje të mbyllim rreth gjashtë kapituj, varësisht nga procesi i reformave. Po punojmë në mënyrë intensive për formimin e grupit punues ad hoc për traktatin e pranimit.
Kjo do të ishte hera e parë pas Kroacisë që ne, si BE, do të ngrinim një grup punues ad hoc për traktatin e pranimit me një shtet kandidat nga rajoni. Ky traktat do të jetë i rëndësishëm nga një këndvështrim simbolik për mesazhin që po u dërgojmë edhe shteteve të tjera kandidate të përfshira në procesin e zgjerimit”.

Raouna tha se duhet ecur shpejt me integrimin e shteteve ballkanike, pasi në këtë rajon ka aktorë të tjerë, përveç BE-së, që kanë politika neo-ekspansioniste.

“Ballkani Perëndimor është Evropë. E kemi thënë këtë për vite me radhë. Tani është momenti kur duhet të hapet më në fund dera. Aktorë që nuk ndajnë interesat tona, aktorë që kanë politika neo-ekspansioniste, janë tashmë në rajon, ndaj popujt e Ballkanit Perëndimor po shikojnë nga ne”./kb

Last Updated on 29/01/2026 by Kesjana

Autoritetet amerikane kanë filluar të zbatojnë një program të ri kontrolli në pikat kufitare ndërkombëtare, të quajtur Verifikim i Përmirësuar. Kjo iniciativë forcon masat e sigurisë dhe u jep autoriteteve mundësinë të rishikojnë pajisjet elektronike të udhëtarëve për aktivitete të dyshimta.

Sipas politikave të reja migratore, vizat dhe lejet e qëndrimit mund të revokohen nëse në pajisjen tënde gjendet informacion që konsiderohet kërcënim për sigurinë kombëtare. Këto masa mbështeten në një urdhër ekzekutiv që u firmos vitin e kaluar, i cili ashpërson kushtet e hyrjes për migrantët dhe turistët. 

Që nga ardhja e tij në presidencë, Donald Trump ka intensifikuar politikat migratore me qëllim frenimin e emigracionit ilegal. Këto dispozita i lejojnë autoriteteve kufitare të inspektojnë udhëtarët dhe të refuzojnë hyrjen nëse hasin diçka të dyshimtë. 

🔎 Kontrolli i pajisjeve

Agjencia e Doganave dhe Mbrojtjes Kufitare (CBP) e SHBA-së thotë se telefonat celularë dhe kompjuterët mund të kontrollohen nga autoritetet në kufi. Këto inspektime mund të ndodhin edhe për persona me leje qëndrimi ligjore, veçanërisht nëse zbulohet përhapja e përmbajtjeve të paligjshme. 

Autoritetet paralajmërojnë se gjetja e aktiviteteve të dyshimta mund të çojë në ngritje raporti dhe shpesh në humbje të vizës, ndërsa refuzimi i kontrollit mund të shpjerë në bllokim të pajisjeve. 

Përmbajtjet që konsiderohen rrezik përfshijnë:

• Mesazhe ose email-e në lidhje me kërkim pune pa autorizim të duhur,
• Referenca për studime pa vizë studenti,
• Informacion i lidhur me armë, droga ose elementë të tjerë të konsideruar kërcënim.  /kb

Stafi i Ambasadës Amerikane në Kopenhagen ka hequr 44 flamuj të vendosur në nder të ushtarëve danezë që humbën jetën në Afganistan.

Flamujt ishin vendosur në trotuar nga aktivistë të panjohur pas kritikave të presidentit amerikan Donald Trump ndaj kontributeve ushtarake të vendeve aleate.

Në një intervistë për Fox News javën e kaluar, Trump tha se ushtarët aleatë në Afganistan “qëndronin pak më prapa, larg vijës së frontit”, një koment që shkaktoi reagime të forta nga kryeqytetet evropiane.

Kryeministrja daneze Mette Frederiksen e quajti deklaratën e Trump “të papranueshme”.

Ndërkohë, qyteti i Kopenhagenit theksoi se trotuari ku ishin vendosur flamujt i përket komunës, por kutitë me lule ku ata ishin vendosur janë pronë e ambasadës si pjesë e masave të sigurisë kundër terrorizmit.

Line Barfoed, kryetare për çështjet mjedisore e qytetit, e përshkroi heqjen e flamujve si “mungesë respekti”. “Flamujt shënonin përpjekjet e jashtëzakonshme të ushtarëve danezë gjatë viteve”, tha ajo.

Një zëdhënës i ambasadës ka deklaruar për mediat se “nuk kishte asnjë qëllim dashakeq në heqjen e flamujve” dhe shtoi se nëse stafi i ambasadës do të kishte ditur arsyen pse janë vënë, flamujt nuk do të ishin prekur. Megjithatë, sipas mediave, stafi i sigurisë ishte informuar për këtë.

Danimarka ishte një nga vendet aleate me numrin më të lartë të ushtarëve të rënë në Afganistan, dhe veteranët danezë kanë protestuar së fundmi pranë ambasadës.

Marrëdhëniet diplomatike midis Kopenhagenit dhe Washingtonit kanë qenë të tensionuara kohët e fundit, pas përpjekjes së Trump për të marrë nën kontroll Groenlandën./kb

Ministri i Mbrojtjes, Pirro Vengu ka dhënë një deklaratë për mediat nga Kryesia e Kuvendit. Vengu u shpreh se bashkitë e vendit duhet të kënë vëmendje të theksuar te fondet për dëmshpërblimet e personave të prekur nga fatkeqësitë natyrore.
Ministri bëri me dije më tej se fondet e Emergjencave Civile do të jenë më të mëdha për bashkitë e vogla. Lidhur me dëmshpërblimin nga përmbytjet e fundit në vend, ai tha se pritet informacioni i plotë nga Agjencia Kombëtare e Mbrojtjes Civile në mënyrë që të vijohet me ndarjen e fondit.

“Kemi në buxhet domethënës në funksion të digave, pritave lumore, kanaleve të ujërave të larta për ccdo bashki. Prandaj ritheksojmë vëmendjen që bashkitë duhet të kenë në këtë process sepse kemi financime shumë të dobishme për ta.

Ne kemi një zinxhir reagimi ndaj emergjencave që është e njëjtë me të gjithas vendet e BE-së. Zinxhiri sipas standardeve europian parashikon përgjegjësi për reagimin imediat nga bashkia dhe më pas në nivel qarku, më pas ndërhyrje nga ministria. Fondet e Eemergjencave Civile po rriten ndjeshëm sidomos për bashkitë me më pak buxhete. Bashkitë e vogla do të marrin më shumë fonde për mjete dhe për rrogat e punonjësve. Kanalet e kullimit duhet të pastrohen vazhdimisht. Do vijojmë me ripyllëzimin për parandalimin e përmbytjeve. Do vijojmë me paketë financiare për dëmshpërblimin e përmbytjeve. Ka bashki me nivel të ndryshëm vlerësimi s ai përket dëmeve. Do vijojmë me reformën e mënyrës se si kompensohen për dëmet.

Sipas ligjit dhe standardit europian, grupet e konstatimit të dëmeve organizohen dhe drejtohen nga bashkitë dhe monitorohet procesi nga prefektura dhe nga agjencia e mbrojtjes civile që bën vlerësimin përfundimtar. 60 bashki e kanë përfunduar procesin. Agjencia Kombëtare e Mbrojtjes Civile bën gati informacionin e plotë për te Ministria e Financave dhe më pas përgatitet fondi”, tha Vengu. /Kb

Skandali i korrupsionit po trondit kryesinë e ushtrisë kineze. Gjatë fundjavës u njoftua se një nga dy nënkryetarët e Komisionit Qendror Ushtarak, Zhang Youxia, si dhe një gjeneral tjetër i nivelit të lartë, Liu Zhenli, po hetoheshin për “shkelje të rënda disiplinore”. Në terminologjinë e propagandës kineze, kjo do të thotë se të dy u liruan nga detyrat e tyre për shkak të korrupsionit.

Presidenti i tij është Xi Jinping, i cili është gjithashtu President i Kinës dhe Sekretar i Përgjithshëm i Partisë Komuniste në pushtet. Nga këto tri funksione, udhëheqja e komisionit ushtarak konsiderohet më e fuqishmja.

Edhe themeluesi i shtetit, Mao Ce Dun, mendonte kështu: pushteti politik vjen nga gryka e një pushke. Për shkak të kësaj, në vitin 2005, Presidenti i atëhershëm, Jiang Zemin, ia dorëzoi kontrollin e komisionit ushtarak pasardhësit të tij Hu Jintao me një vonesë të konsiderueshme – gjashtë muaj pasi ai dha dorëheqjen nga dy postet e mbetura.

Gjeneral me përvojë lufte

Gjenerali Zhang është i vetmi në atë treshe udhëheqëse që arriti të ngrihej nga një ushtar i zakonshëm në gradën më të lartë të oficerit në forcat e armatosura. Ai u bashkua me ushtrinë në vitin 1968 në moshën 18 vjeç. Në vitet 1979 dhe 1984, ai komandoi një regjiment dhe, ashtu si një gjeneral tjetër i rrëzuar, Liu Zhenli, mori pjesë në luftën kufitare kundër Vietnamit.

Pas fitores, Zhang u nderua. Më vonë ai shërbeu si komandant i përgjithshëm i ushtrisë në Kinën verilindore, përpara se të merrte një post komandues të ushtrisë në Pekin.

“Rasti është mjaft i habitshëm,” thotë shkencëtari politik Ying-Yu Lin i Universitetit Tamkang të Tajvanit. “Komisioni ushtarak tani nuk ka askënd në udhëheqjen e tij me përvojë lufte. Kjo është e dyshimtë.”

Presidenti Xi dhe zëvendësdrejtuesi i dytë janë oficerë politikë pa asnjë përvojë luftimi. 75-vjeçari Zhang, si delegat ushtarak, është gjithashtu anëtar i rrethit më të ngushtë të udhëheqjes së partisë, Byrosë Politike me 25 anëtarë të PK-së.

Ai ishte ndoshta i preferuari i Xi Jinping, pasi ngritja në detyrë e tij nuk përputhej me praktikën e zakonshme. Në moshën 72 vjeç në atë kohë, ai duhej të dilte në pension në vitin 2022. Por thuhet se ka edhe një afërsi familjare: Babai i Zhang shërbeu së bashku me babanë e Xi dhe vinte nga e njëjta provincë.

Një shkelje e dukshme e besimit

“Tani Xi Jinping padyshim nuk i beson më atij,” supozon shkencëtari politik Lin. “Të gjitha spekulimet se pse Zhang ra nga favori – qoftë korrupsion, ryshfet apo edhe akuza se ai po spiunonte për shërbimet e inteligjencës së huaj, siç raportohet nga media amerikane – janë të parëndësishme nëse besimi mbetet, e nëse jo, krimi është vetëm një formalitet.”

Lin beson se Xi dëshiron të riformësojë strukturën e lidershipit. Zyrtarët politikë tashmë i janë nështruar rregullit dhe pabesia është ndëshkuar. Tani gjeneralët kanë hyrë në fokusin e tij.

Që në tetor, autoritetet kineze njoftuan fillimin e hetimeve për korrupsion kundër nëntë përfaqësuesve ushtarakë. Kina nuk ka zhvilluar luftë për dekada të tëra, por sidomos me manovrat detare përgjatë bregdetit të saj të Paqësorit, ajo po demonstron gjithnjë e më shumë fuqinë e saj ushtarake në mënyrë që të shtyjë praninë e fortë të SHBA-së. Në vitin 2025, shpenzimet ushtarake arritën në rreth 220 miliardë euro./DW/kb

Deputetja e Partisë Demokratike, njëkohësisht zëvendëspresidentja e EPP Women, Albana Vokshi, ka folur në Asamblenë Parlamentare të Këshillit të Europës në Strasburg, lidhur me largimin e të rinjve nga Shqipëria.

“Në Shqipëri, studentët dhe të rinjtë kanë bërë histori. Në vitet 1990, ata u ngritën dhe rrëzuan diktaturën komuniste. Historia na mëson cila është fuqia e rinisë. Kur rinia ngrihet, regjimet bien! Kur rinia largohet, demokracia gërryhet!

Sot, Shqipëria po përballet me eksod të rinisë. Sipas Eurostat-it, vetëm në dekadën e fundit, 1.1 milionë shqiptarë janë larguar drejt vendeve të BE-së. 78% e azilkërkuesve shqiptarë janë nën moshën 34 vjeç. 80% e studentëve, 59% e maturantëve dhe 95% e atyre që studiojnë jashtë vendit duan të largohen dhe të mos kthehen më.

Raporti i fundit i Tranzicionit i Bankës Europiane për Rindërtim dhe Zhvillim, i publikuar disa javë më parë, e konfirmon këtë alarm. Shqipëria ka humbur 40% të popullsisë së saj përmes emigracionit dhe një e katërta e qytetarëve me arsim të lartë janë larguar. Kjo nuk është një krizë ekonomike, kjo është një krizë e demokracisë! Sepse kur të rinjtë largohen, ata nuk marrin me vete vetëm aftësitë e tyre, por edhe zërin e tyre, votën e tyre dhe fuqinë për t’i mbajtur institucionet përgjegjëse.

Pasoja është thellësisht shqetësuese. Zgjedhjet në vendet tona po vendosen gjithnjë e më shumë nga ata që mbeten, jo nga ata që do të jetojnë në të ardhmen. Në zgjedhjet e fundit në Shqipëri, mbi 42% e votuesve ishin pensionistë.

Të rinjtë largohen sepse u mungon shpresa; sepse ndihen të përjashtuar politikisht dhe të papërfaqësuar; sepse administrata publike është e kapur nga rrjete patronazhi dhe jo nga merita; sepse nuk përballojnë dot strehimin, nuk gjejnë punë dinjitoze, nuk përballojnë koston e lartë të jetesës dhe varfërinë në rritje të të rinjve. Emigrimi i të rinjve dhe plakja e popullsisë janë tashmë një kërcënim i drejtpërdrejtë për stabilitetin ekonomik dhe shoqëror të Shqipërisë.

Kjo Asamble e ka dhënë përgjigjen! Nëse duam që të rinjtë të qëndrojnë, duhet t’u japim dinjitet, mundësi dhe një zë të vërtetë, që ata të mos largohen nga vendi, por të dëgjohen dhe të kontribuojnë për të ardhmen e vendit”, u shpreh Vokshi. /Kb

Në pikën e kalimit kufitar të Qafë-Thanës, më e madhja në juglindje të vendit që lidh Shqipërinë me Maqedoninë e Veriut, kamionët vijojnë të qëndrojnë të bllokuar për shkak të protestës në ditën e tretë të saj.

Kryesisht bëhet fjalë për mjete të tonazhit të rëndë me targa të Maqedonisë së Veriut. Bllokada është planifikuar të zgjasë rreth 7 ditë, ndërsa nëse kërkesat nuk plotësohen, Shoqata e Kamionistëve ka paralajmëruar mundësinë e zgjatjes së protestës.

Situata në doganën e Qafë-Thanës vijon të jetë normale dhe pa problematika. Në palën maqedonase kamionët vijojnë të jenë të vendosur në radhë.

Shoqata e Transportuesve të Maqedonisë së Veriut ka nisur bllokadën në rreth 10 pika kufitare, me pjesëmarrjen e rreth 370 kamionistëve. Ata protestojnë kundër zbatimit të sistemit të ri elektronik të hyrje-daljeve në zonën Schengen, duke kërkuar rritjen e afatit të lejuar për qëndrimin e tyre.

Autoritetet maqedonase kanë shprehur mbështetje për shqetësimet e transportuesve dhe po kërkojnë zgjidhje, ndërsa protesta pritet të ketë ndikim të ndjeshëm ekonomik në rajon./kb

Last Updated on 29/01/2026 by Kesjana