Presidenti i Republikës, Bajram Begaj, ndodhej këtë të hënë, 19 janar, për një vizitë zyrtare në Moldavi, nga ku u prit dhe nga homologia e tij, Maia Sandu.

Fokusi i diskutimeve ishte thellimi i marrëdhënieve dypalëshe, sigurinë rajonale, situatën e ndërlikuar gjeopolitike dhe unitetin evropian përballë këtyre sfidave.

“Shqipëria mbështet popullin moldav në ndërtimin e një të ardhmeje demokratike, të begatë dhe evropiane, në një kontekst gjeopolitik dhe sigurie mjaft sfidues të shënuar nga agresioni i paprovokuar dhe i pajustifikuar rus kundër Ukrainës dhe kërcënimet e sigurisë që burojnë prej tij”, – u shpreh Presidenti i Republikës.

Krerët e dy shteteve rikonfirmuan angazhimin e përbashkët për anëtarësimin në Bashkimin Evropian.

Në konferenën e mbajtur për gazetarët, Presidenti Begaj dhe Presidentja Sandu konfirmuan angazhimin për bashkëpunim nëpërmbushjen sa më shpejtë të agjendës evropiane, me synimin anëtarësimin në Bashkimin Evropian përmes progresit të bazuar në meritë dhe reforma.

“Shqipëria beson se zgjerimi i Bashkimit Evropian mbetet një nga instrumentet më efektive për garantimin e sigurisë, stabilitetit, begatisë dhe paqes së qëndrueshme në Evropë. Shqipëria shpreh mbështetjen e plotë për anëtarësimin e Moldavisë në Bashkimin Evropian”, tha Begaj.

Ndërsa shprehu mbështetje ndaj Presidentes Sandu për politikat proevropiane në drejtimin e  shtetit, Presidenti Begaj vlerësoi qëndrimin e Moldavisë përballë ndikimeve keqdashëse, presioneve dhe fushatave dezinformuese, si dhe angazhimin epalëkundur për ndërtimin e një shteti demokratik, pjesë integrale të familjes evropiane.

Në këtë frymë, ai theksoi se Shqipëria synon thellimin e bashkëpunimit duke shfrytëzuar mekanizmat e krijuar në kuadër të Memorandumit të Mirëkuptimit për Integrimin Evropian të nënshkruar së fundmi.

“Shqipëria qëndron pranë Moldavisë si mike, si partnere dhe si aspirante e përbashkët për anëtarësim në Bashkimin Evropian. Së bashku, ne kontribuojmë për një Evropë më të fortë, më të sigurt dhe të bashkuar, të ndërtuar mbi vlerat e demokracisë, lirisë dhe përgjegjësisë së përbashkët për të ardhmen tonë”, u shpreh Presidenti Begaj.

Kreu i Shtetit theksoi, gjithashtu, angazhimin për thellim të marrëdhënieve në fushat ku ka potencial për bashkëpunim më të thelluar në fusha të tjera me interes të ndërsjellë.

Një vëmendje të veçantë Presidenti Begaj i kushtoi gjatë kësaj vizite Kosovës. Presidenti vlerësoi mbështetjen e dhënë nga Moldavia në lidhje me aplikimin e Kosovës për t’u bërë anëtare e Këshillit të Evropës dhe kontributin me trupa në misionin e KFOR-it.

“Në këtë frymë të bashkëpunimit, Shqipëria shpreson se Moldavia, kur ta gjykojë të arsyeshme, do të rishqyrtojë edhe çështjen e njohjes së Kosovës. Ne i dimë problemet e brendshme që ekzistojnë, të lidhura me Transnistrian, por gjithsesi, është një çështje që ne mendojmë se do të sillte paqe, stabilitet, bashkëpunim rajonal dhe besim te demokracia”, deklaroi Presidenti Begaj.

Në agjendën e sotme të Presidentit ishin edhe takimi me një përfaqësi nga Parlamenti i Moldavisë, drejtuar nga Kryetari Igor Grosu, me të cilët u diskutua për thellimin e bashkëpunimit mes institucioneve të dy shteteve si edhe me përfaqësues të diasporës shqiptare në Moldavi.

Një i dënuar shqiptar, në burgun e Korydallos, Greqi, është vrarë këtë të hënë, 19 janar, si pasojë e një sulmi me thikë nga një i burgosur tjetër.

Sipas mediave greke, ngjarja ndodhi në ambientet e brendshme të burgut, kur autori, me origjinë greke, sulmoi shqiptarin me një objekt të mprehtë të improvizuar si thikë.

I lënduari nuk arriti t’u mbijetonte plagëve.

Ende nuk janë bërë të ditura identitetet e viktimës e të autorit nga mediat fqinje, por raportohet se të dy ishin të dënuar për vrasje.

Kryeministri Edi Rama ka reaguar pas një qëndrimi të organizatës Safe Journalists që sipas tij keqinterpreton qëndrimin e tij ndaj RTSH-së.

Në reagimin e tij, Rama e konsideron deklaratën si një përpjekje mashtruese që shtrembëron thelbin e fjalimit të tij. “Po bëhet një model i pafat i kësaj epoke të përtacisë së shfrenuar për të dëgjuar atë që thonë të tjerët në të vërtetë,” shkruan ai.

Kryeministri thekson se vërejtjet e tij nuk kanë asnjë lidhje me “lidhjen e financimit ose ekzistencës së RTSH-së me miratimin politik” dhe çdo interpretim të tillë e quan “të pasaktë dhe mashtrues”.

Ai thekson se media e shërbimit publik duhet të vlerësohet përmes reformave transparente dhe të bazuara ligjërisht, dhe jo përmes retorikës politike, veçanërisht në kontekstin e procesit të anëtarësimit të Shqipërisë në Bashkimin Europian, ku liria e medias dhe pavarësia institucionale janë standarde kyçe.

Reagimi i Kryeministrit Edi Rama: 

Po bëhet një model për të ardhur keq i kësaj epoke të re të përtacisë së shfrenuar ndaj dëgjimit të asaj që të tjerët realisht thonë, që të përballemi me deklarata si ajo e bashkëngjitura, të cilat pasqyrojnë një keqkuptim thellësisht të shtrembëruar të qëndrimit tim lidhur me Transmetuesin Publik Shqiptar.

I ftoj autorët e kësaj deklarate keqorientuese ta lexojnë ose ta dëgjojnë me kujdes fjalimin tim dhe të bëjnë një përpjekje të sinqertë për të kuptuar thelbin. Vërejtjet e mia nuk kanë të bëjnë absolutisht aspak me “lidhjen e financimit apo të ekzistencës së RTSH-së me miratimin politik”. Çdo interpretim i tillë është thjesht i pasaktë dhe keqorientues.

Mbrojtja e informacionit nis me mos përhapjen e dezinformimit.

Ditët e fundit në media sociale ka marrë dhenë lajmi se disa harta të rralla i janë shtuar muzeut të Krujës. 

Lajmit i ka bërë jehonë dhe kryeministri Rama në Facebook. 

Më poshtë postimi i plotë: 

“Muzeut Kombëtar “Gjergj Kastrioti Skënderbeu” në Krujë i është shtuar një tjetër pasuri me vlerë kombëtare dhe europiane: harta origjinale e Bartolomeo Paretos, e vitit 1455, një nga dëshmitë më të rralla të hartografisë europiane të shekullit XV, e cila e vendos emrin e Skënderbeut si toponim në qendër të Ballkanit, duke dëshmuar se figura e tij kishte një rëndësi të madhe në oborret mbretërore të Europës dhe të botës së krishterë”- shkruan Rama në Facebook. 

Është zbardhur momenti i arratisjes së Altin Ndocit, teksa ishte dërguar në spitalin e Durrësit për një kontroll mjekësor. 

Në dosjen hetimore, të siguruar nga Top Channel, thuhet se Altin Ndoci realizoi arratisjen teksa po priste për një rikontroll brenda asaj ditë ne spitalin e Durrësit. 

Gjatë kësaj kohe, ai ankohej për dhimbje veshkash dhe ka shkuar katër herë në tualet. Në momentin sapo efektivët i kanë hapur zgarën e hekurit për te tualeti, i paraburgosuri Altin Ndoci e ka goditur me grusht në mes të kraharorit punonjësin e policisë Fatjon Baçi dhe ai ka rënë mbi kolegun e tij Sali Ferrollari dhe të dy janë rrëzuar përtokë. 

Më pas i paraburgosuri Altin Ndoci ka ikur me vrap nëpër korridor dhe dy punonjësit e policisë janë ngritur dhe kanë filluar të vrapojnë pas tij, por që në një moment Fatjon Baçi ka rrëshqitur nëpër shkallë dhe pasi është ngritur përsëri dhe kanë vazhduar ndjekjen deri tek dalja. 

Sapo ka dalë tek dera kryesore Fatjon Baçi ka nxjerrë armën e shërbimit dhe ka gjuajtur një herë në tokë për ta trembur të arratisurin dhe për ta bërë të dorëzohet, por ai ka vazhduar të largohej me vrap. 

Në dosje thuhet më tej se punonjësit e policisë kanë dalë deri tek rruga kryesore dhe disa banorë aty përreth u kanë thënë se i arratisuri kishte ikur në drejtim të kodrës, me një makinë të zezë. Më pas Fatjon Baçi ka tentuar të telefonojë 129, por nuk i janë përgjigjur, ndërsa Sali Ferrollari ka kontaktuar me Sp. Informacionit në IEVP Durrës, thuhet në dosje. 

Spanja shpalli tri ditë zi kombëtare, njoftoi kryeministri Pedro Sanchez, i cili shtoi edhe se do të kishte një ”transparencë absolute” për shkakun e aksidentit që shkaktoi 39 viktima dhe 170 të plagosur.

Një tren, i cili ishte nisur dje nga Malaga në orën 18:40 me destinacion stacionin Puerta de Atocha të Madridit, me 317 pasagjerë, nxori nga shinat tre vagonët e tij të fundit duke u përplasur me një tjetër tren Renfe që shkonte në Huelva, i cili gjithashtu doli nga shinat.

Përplasje fatale e trenave të shpejtësisë së lartë në Spanjë ka shkaktuar sipas raportimeve 39 viktima dhe 170 të plagosur, ku 24 prej tyre janë në gjendje të rëndë, nga të cilët katër janë të mitur.

Një numër i madh forcash shpëtimi mbërritën në vendngjarje duke u përpjekur të nxjerrin  njerëzit e bllokuar nga rrënojat.

Sipas ministrit spanjoll të Transportit, Oscar Puente, linja ku ndodhi tragjedia ishte modernizuar së fundmi.

Ndërkaq më shumë se 200 trena janë prekur nga pezullimi i trafikut hekurudhor në linjat me shpejtësi të lartë midis Madridit dhe qyteteve andaluziane të Seviljes, Kordobës, Malagës dhe Huelvës.

Gjykata e Apelit në Tiranë la në ‘arrest në burg’ Xhino Agon duke lënë në fuqi vendimin e 05.12.2025 te Gjykatës së Shkallës Parë Juridiksionit të Përgjithshëm Elbasan. 

Por siç bënë me dije burime për Top Channel, Apeli ndryshoi vetëm njërën pikë, në lidhje me vleftësimin e arrestimit në flagrancë për personin nën hetim. 

Xhino Ago që e shpalli të paligjshëm mbasi nuk është prangosur në flagrancë. Ago dyshohet si bashkëpunëtor në vrasjen e Mondi Mëhalla. 

“Një javë vendimtare, e mbushur me shanse, pasion dhe vendime që mund të ndryshojnë rrënjësisht rrjedhën e jetës.” Kështu e përshkroi astrologia Chrysanthi Kalogeri klimën e kësaj jave në emisionin “Shije Shtëpie” në TV Klan, ku solli parashikimin e horoskopit për secilën shenjë.

Pas Hënës së re shumë dinamike, energjitë janë në limite; nga njëra anë hapen dyer për përfitime financiare, bashkëpunime dhe fillime të reja, ndërsa nga ana tjetër shtohet intensiteti emocional, posesiviteti dhe rreziku i vendimeve impulsive. Sipas astrologes, kjo është një javë ku asgjë nuk është bardh e zi, gjithçka varet nga mënyra se si secili zgjedh të veprojë dhe nga harta personale astrologjike. Kush do të dijë ta menaxhojë drejt këtë energji, mund të dalë fitues në çdo drejtim.

“Është një periudhë shumë interesante kjo javë, e cila krijon kushte për të përfituar në çdo drejtim. Ai që do të dalë i fituar ka të bëjë me mënyrën se si do t’i trajtojmë gjërat, por ka të bëjë edhe me hartën personale të secilit. Paralelisht do të ketë edhe zhvillime emocionale, të cilat do t’i përjetojmë në mënyrë pasionante; do të jemi më tepër posesivë, ku kjo mund të kalojë në një xhelozi të tepruar dhe mund të sjellë pasoja dhe ngjarje që mund të jenë të vështira. Pra, është një periudhë me shumë shanse kjo javë, por çdo gjë varet nga mënyra se si ne do t’i trajtojmë gjërat. Më tepër gjërat janë në limite, qoftë në sferën pozitive, qoftë në atë negative. Sot jemi një ditë pas Hënës së re, e cila u zhvillua dje dhe ishte shumë dinamike nga çdo pikëpamje”, tha astrologia.

Dashi: Një periudhë shumë e rëndësishme për ju dhe për jetën tuaj sociale, por edhe për jetën tuaj personale. Përveç periudhës dhe javës që jemi, ku do të keni shanse të bëni takime dhe kontakte shumë të rëndësishme dhe këto do t’ju sjellin bashkëpunime financiare. Disa nga ju do të kenë një ngritje në detyrë dhe disa prej jush do të keni një fillim të ri në sferën profesionale. Njëkohësisht do të keni mundësinë që të ndryshoni disa plane që do të kenë të bëjnë me realizimin e qëllimeve dhe synimeve. Fokusohuni te financat dhe veproni me kujdes.

Demi: Është shenja e cila ndikohet drejtpërdrejt nga kjo periudhë dhe më të ndikuar janë të lindurit në dhjetëditëshin e fundit të shenjës; të ndikuar janë edhe të lindurit në ditët e fundit të shenjës, të cilët u ndikuan shumë nga Hëna e re e djeshme. Janë në një fazë që realizojnë ndryshime dhe vendosin për të ardhmen. Shumë të ndikuar do të jenë në sferën profesionale dhe në jetën e tyre sociale. Shumë të ndikuar do të jenë edhe të lindurit në dhjetëditëshin e parë të shenjës dhe sidomos të lindurit në pesë ditët e para, ku një person do të ndikojë fuqimisht për të realizuar ndryshime thelbësore dhe rrënjësore në jetën sociale dhe në sferën profesionale. Ndryshime do të kenë edhe në jetën personale; disa prej tyre do të mbyllin përfundimisht një kapitull, për të nisur një të ri.

Binjakët: Janë shumë të ndikuar në këtë periudhë, sidomos të lindurit në dhjetëditëshin e parë të shenjës. Do të kalojnë një vështirësi ose diçka që mund të mos ju pëlqejë; do të marrin një lajm jo shumë të mirë nga larg. Çdo ndryshim që bëhet tani, bëhet për të mirën e tyre. Pra, do të kenë shanse në jetën e tyre personale, do të njohin një person të ri, i cili do t’ua ndryshojë jetën. Gjithashtu do të kenë shanse për të ndryshuar planet thelbësore për të ardhmen; pra, në çdo drejtim gjërat janë pozitive për ju dhe nuk përjashtohet mundësia për të bërë një bisedë dhe një bashkëpunim.

Gaforrja: Hëna e re, e cila u zhvillua dje, ndikon totalisht në marrëdhëniet dhe bashkëpunimet. Sidomos të lindurit në dhjetëditëshin e tretë të shenjës dhe në ditët e fundit të shenjës, nuk përjashtohet mundësia që në këto ditët e para të javës të bëni bashkëpunime të forta për të ardhmen, të realizohet një dëshirë e juaja. Do të krijohet një njohje e re në jetën tuaj. Do të bëni një udhëtim që do t’ju shërbejë qëllimeve tuaja, por edhe do t’ju sjellë afër me të dashurit tuaj. Është momenti që të fokusoheni në jetën financiare dhe të zgjidhni problemet ekzistuese.

Luani: Ishit shumë të ngarkuar dhe vazhdoni të jeni shumë të ngarkuar në përditshmërinë tuaj, por përmes kësaj ngarkese patët edhe të ardhura. Duke filluar që dje, në datën 17, dhe duke filluar nga fundi i janarit, por edhe në fillim të shkurtit, do të keni shanse unike në fushën e marrëdhënieve dhe të bashkëpunimeve. Kjo javë, sidomos për ju të lindurit në dhjetëditëshin e parë të shenjës, do të keni ndryshime rrënjësore dhe thelbësore në akset kryesore të jetës, gjëra që kanë të bëjnë me punën, familjen, shtëpinë, por edhe me bashkëpunimet. Mund të keni një ndarje dhe një humbje, por këto do të jenë kushte shumë të mira për të ndryshuar rrënjësisht jetën tuaj.

Virgjëresha: Vazhdoni të kaloni një periudhë shumë të mirë. Do të përfitoni në jetën emocionale, krijuese dhe në bashkëpunimet tuaja. Paralelisht, duke filluar që këtë javë dhe në vazhdim, duhet të fokusoheni më tepër në punën dhe përditshmërinë tuaj. Të jeni të kujdesshëm në punë dhe t’i trajtoni gjërat me qetësi dhe të evitoni diçka që ju implikon në një situatë të errët ose acarimi. Kujdes për shëndetin dhe për përditshmërinë.

Peshorja: Gjendeni përpara një ndryshimi rrënjësor. Jeni ju ata që do të zgjidhni përfundimisht disa çështje, do të mbyllni përfundimisht disa probleme dhe këto do të bëhen për të shkuar një hap më poshtë dhe kjo do të ndikojë pozitivisht në jetën tuaj. Fillon një periudhë shumë interesante në sferën emocionale dhe në atë të dashurisë, por edhe në çështje që kanë të bëjnë me fëmijët dhe që kërkojnë më shumë kujdes. Kjo javë do të na çojë në marrjen e vendimeve dhe do të kemi qartësi për marrjen e këtyre vendimeve. Kujdes, mos ndërmerrni asnjë risk financiar. Larg pasionit të tepërt dhe përfitoni nga shanset që shfaqen.

Akrepi: Nga më të ndikuarit janë edhe përfaqësuesit e shenjës së Akrepit dhe kryesisht të lindurit në dhjetëditëshin e fundit të shenjës, por edhe të lindurit në ditët e para të shenjës. Ju do të keni zgjidhje që kanë të bëjnë me të afërmit tuaj, me njerëzit e rrethit tuaj; njëkohësisht do të bëni biseda, kontakte të cilat kanë për qëllim investimet. Nga ana tjetër do të keni takime, të cilat do të kenë për synim anën tuaj emocionale. Shumë të kujdesshëm duhet të jeni në ndryshimet thelbësore që do të keni në familje, por edhe në akset kryesore të jetës. Do të merrni vendime dhe do të mbyllni një kapitull, për të hapur një të ri.

Shigjetari: Kjo javë favorizon kushtet për zhvillime në sferën financiare, të cilat mund të kenë të bëjnë me finalizimin e një projekti apo të një synimi që keni në lidhje me një pronë. Në punë dhe në përditshmëri realizohen disa ndryshime gjatë kësaj jave. Kjo javë është e përshtatshme për ju për të realizuar sa më shumë kontakte dhe biseda, por paralelisht të merrni vendime serioze dhe shumë të rëndësishme, ku gjërat do të jenë më të qarta.

Bricjapi: Jeni akoma në atë fazën tuaj dinamike. Keni edhe këtë javë mundësi për të bërë zhvillime dhe përparime në çdo fushë të jetës tuaj, të merrni vendime serioze. Gjatë kësaj jave fokusohuni më shumë në sferën financiare. Kapni shanset dhe mos e teproni me iniciativa që nesër-pasnesër do t’ju nxjerrin jashtë zonës së komfortit.

Ujori: Kjo periudhë ju përket juve. Afërdita ka kaluar në shenjën tuaj dhe keni shanse për të arritur shumë gjëra në jetën emocionale, personale dhe të realizoni ato që doni në lidhje me familjen apo shtëpinë. Është një fazë shumë aktive, ku të lindurit në ditët e para do ta shikojnë jetën e tyre të ndryshojë totalisht, rrënjësisht, dhe do të ndryshoni edhe vetë ju si karakter. Përfitoni nga çdo shans që paraqitet dhe përfitoni nga ndryshimet dhe fokusohuni në sferën financiare duke bërë hapa të matur dhe të sigurt.

Peshqit: Pjesa e parë e javës ju krijon shanse shumë të mira për të takuar njerëz të përshtatshëm që do t’ju nxjerrin nga një vështirësi dhe një pengesë që ju keni hasur, të cilët do të bëhen bashkëpunëtorët tuaj, ku mund të krijoni edhe një lidhje emocionale. Që nesër filloni një periudhë, ku duhet të veproni më shumë në intimitet dhe të jeni më tepër të fokusuar në jetën intime. Kujdesuni më tepër për shëndetin dhe evitoni çdo prapaskenë.

Ish-deputeti Lefter Maliqi ka folur në studion e News24 mbi aksionin e opozitës dhe protestën kombëtare të paralajmëruar nga Partia Demokratike më 24 janar, duke theksuar se vetëm largimi i kryeministrit Edi Rama dhe ngritja e një qeverie teknike mund të garantojnë zgjedhje të lira dhe të ndershme. 

Sipas Maliqit, protesta e 24 janarit duhet të shënojë një kthesë të fortë në mënyrën e reagimit opozitar. Ai u shpreh se vendimmarrja duhet të merret pikërisht në këtë datë, duke mos përjashtuar skenarë si ngritja e çadrave, greva e urisë apo forma të tjera presioni të vazhdueshëm ndaj qeverisë. 

“Nëse protesta do të jetë si të mëparshmet, me fjalime dhe drita të ndezura për disa orë, kjo qeveri nuk bie,” deklaroi Maliqi, duke shtuar se një regjim i tillë, sipas tij, nuk mund të përballet me protesta simbolike apo të shkurtra. Ai shprehu skepticizëm për suksesin e opozitës përballë zgjedhjeve të ardhshme lokale, duke theksuar se korrupsioni është shndërruar tashmë në sistem. 

Ish-deputeti u shpreh në favor të protestave me orë të zgjatura dhe përhapjes së tyre në të gjitha qytetet e Shqipërisë, duke e konsideruar të domosdoshëm një zemërim popullor mbarëkombëtar. Maliqi deklaroi gjithashtu se mbështet skenarin e grevës së urisë, duke theksuar se deputetët duhet të jenë të parët që japin shembullin. 

“Jam i pari që futem në grevë urie, nëse deputetët që kanë përfituar nga votat e qytetarëve futen në grevë. Kjo do të motivojë edhe opozitarët dhe demokratët të qëndrojnë,” u shpreh ai. 

Mes skenarëve të tjerë, Maliqi përmendi rrethimin e Kryeministrisë, protestat në çdo qark të vendit, madje edhe marshimin drejt Surrelit, ku ndodhet banesa e kryeministrit Rama, duke theksuar se, sipas tij, “Rama nuk ikën me të mirë”. 

Avokati i Safet Bajrit është paraqitur sot për të tërhequr dosjen hetimore të SPAK, e cila për shkak të volumit të madh është transportuar me karrocë. 

Safet Bajri, së bashku me Behar Bajrin, Astmer Bilalin dhe Eria Agon, akuzohen nga SPAK për vrasjen e Fatbardh Licit. 

Sipas Prokurorisë së Posaçme, motivi i vrasjes lidhet me dyshimet e Behar Bajrit se Ibrahim Lici kishte ekzekutuar një anëtar të grupit të tyre, ish-policin Boran Bërçana, më 15 korrik 2018. 

“Gjykata Kushtetuese është një seksion i organizatës së Partisë Socialiste. Komenti i parë. Atë çështje, Gjykata Kushtetuese e trajtoi pas 8 muajve paraqitje, në një kohë kur çdo çështje që ka të bëjë me qeveritarëve, e trajton brenda 2-3 javëve. Gjykata Kushtetuese në një vendim të koduar partiak, shpalli jokushtetuese ndaj meje, por nuk e shfuqizoi atë.

Ndërkohë nga ai vendim ka pasoja edhe sot. Pra, duke pretenduar që nuk është më në fuqi, por në fuqi janë pasojat e tij. Vendimi në çdo doktrinë, vendimi duhej shfuqizuar. Mori një vendim në favor të ‘Lubisë’ dhe lubive të tjera që do të shkojnë aty.

Vendimeve të tjera i hapi rrugë që t’i shfuqizojë. Vendimin tim nuk e shfuqizojë me pretendimin që nuk është në fuqi. Pasoja e atij vendimi është fakti që unë jam sot përpara jush”, tha ndër të tjera Berisha.

Edhe personazhet publike kanë nevojë për një strehë ku mund të jenë thjesht fëmijë. Në një intervistë ndryshe për emisionin “Aromë gruaje” në RTSH, Linda Rama ka folur hapur për mënyrën se si përballon lëndimet e padrejta dhe vendin ku gjen paqe.

Për herë të parë, ajo rrëfeu se në momentet e vështira, instinkti e çon drejt prindërve të saj, të cilët i cilëson si “aleatë të pakushtëzuar”.

Zonja Rama tregoi se kur ndihet e lënduar nga padrejtësitë, imazhi i parë që i vjen është ai i nënës dhe mbrojtjen e gjen te babai.

“Ka momente që më del parasysh mami im kur lëndohem padrejtësisht. Dua të shkoj te mamaja dhe babai im. Strukem te babi dhe ndjehem e mbrojtur. Shkoj atje dhe ata edhe në heshtje më kuptojnë. Nuk më gjykojnë,” u shpreh ajo.

Tangoja e prindërimit

Duke përshkruar dinamikën e familjes së saj, Linda Rama përdori metaforën e një tangoje të luajtur bukur mes dy prindërve me karaktere plotësuese: babai mbështetës dhe nëna kërkuese.

“Mamaja ime është një grua me inteligjencë të veçantë. Babai më ka mbështetur shumë, ndërsa mamaja ishte kërkuese. E luanin shumë bukur këtë tango të dy,” tha ajo.

Sipas saj, prindërit e saj tashmë e kanë fituar “medaljen” dhe është një bekim që fëmijët t’ua njohin këtë meritë sa ata janë ende gjallë.

“NATO i ka thënë Danimarkës për 20 vjet se duhet të largojë kërcënimin rus nga Groenlanda. Danimarka nuk ka qenë në gjendje ta bëjë këtë. Tani është koha dhe do të bëhet”, shkroi Trump.

Në të njëjtën linjë, sekretari amerikan i Thesarit, Scott Bessent, deklaroi për NBC se “evropianët projektojnë dobësi, ndërsa SHBA-të projektojnë forcë”, duke shtuar se sipas Trumpit, siguria globale nuk mund të garantohet pa përfshirjen e Groenlandës në SHBA.

Në një përshkallëzim të mëtejshëm, Trump duket se e lidhi çështjen e Groenlandës edhe me vazhdimin e mbështetjes amerikane për Ukrainën, duke paralajmëruar se pa ombrellën e sigurisë së SHBA-së, situata në Ukrainë do të shembej.

Debati për Groenlandën pritet të dominojë axhendën politike evropiane, ndërsa liderët e BE-së përgatiten për një samiti të jashtëzakonshëm këtë javë, ndërkohë që kryeministri britanik Keir Starmer pritet të mbajë një konferencë të posaçme për shtyp.

Ministrat danezë dhe të Groenlandës do të zhvillojnë gjithashtu një takim me sekretarin e përgjithshëm të NATO-s, Mark Rutte, i cili konfirmoi se ka diskutuar situatën e sigurisë në Arktik me Trump, duke pranuar se çështja mbetet e hapur.

Zhvillimi më shpërthyes i ditës lidhet me një letër të dërguar nga Trump kryeministrit të Norvegjisë, Jonas Gahr Støre, vërtetësia e së cilës është konfirmuar nga vetë kryeministri norvegjez. Në letër, Trump shkruan se, për shkak se Norvegjia nuk i ka dhënë Çmimin Nobel për Paqen, ai nuk ndihet më i detyruar të mendojë vetëm për paqen, por për interesat e SHBA-së.

Trump përsëriti gjithashtu kërcënimet ndaj Danimarkës, duke vënë në dyshim sovranitetin e saj mbi Groenlandën: “Danimarka nuk mund ta mbrojë atë tokë nga Rusia apo Kina. Nuk ka dokumente të shkruara që justifikojnë pronësinë. Bota nuk është e sigurt nëse SHBA-të nuk kanë kontroll të plotë dhe total të Groenlandës”, shkruan Trump, duke e mbyllur letrën me firmën “President DJT”.

Deklaratat e fundit pritet të thellojnë tensionet diplomatike mes SHBA-së dhe aleatëve evropianë, ndërsa Groenlanda shndërrohet gjithnjë e më shumë në një pikë kyçe të përplasjes gjeopolitike në Arktik.

Indrit Cërloj, ish-drejtori i burgut është lënë në burg, ndërsa mjekja e institucionit Ylfete Sema është lënë në ‘arrest shtëpie’ në lidhje me arratisjen e Altin Ndocit. 

Pas përfundimit të seancës së sotme, avokatët mbrojtës dhanë një prononcim për mediat, ku ndër të tjera theksuan se do të ankimojnë vendimin për klientët e tyre. 

“Ishte caktuar më parë masa e arrestit në burg dhe gjykata vendosi vazhdimin e kësaj mase. Jemi dakord që është ngjarje e rëndë, ka cenuar sigurinë e sistemit të drejtësisë, por përgjegjësia është personale, individuale dhe çmojmë se kemi të bëjmë me interpretim të gabuar të ligjit në lidhje me detyrën që ka një drejtor. Akuza që ka drejtori i IEVP është ka firmosur një shkresë nga sektori i shëndetësisë që do shkonte për vizitë një i paraburgosur, dhe e pyesin ‘pse nuk e ke verifikuar nëse e ka bërë vizitën apo jo mjeku i IEVP’. Kjo është gjithë akuza që ka drejtori, ne do ta ankimojmë rastin”, u shpreh avokati i Cërlojt, Ndriçim Troplini. 

Kryetari i Partisë Demokratike, Sali Berisha, u paraqit paraditen e kësaj të hëne në SPAK, në kuadër të masës “detyrim paraqitje” për dosjen “Partizani”. 

Pas daljes së tij, ai foli për gazetarët, ku u ndal te operacioni i SPAK te një call center në Tiranë, për të cilin tha se ishte dekonspiruar. 

Berisha deklaroi se në këtë qendër të goditur nga SPAK, sipas tij, qytetarëve evropianë u vidheshin rreth 30 milionë euro në muaj. 

“Çfarë pashë aty unë: call center. Kishin hapur call center forex, komandohej nga Altin Troplini. Dështuan operacionin dyvjeçar. Nuk e dështuan plotësisht, sepse nuk arritën, por dekonspiruan operacionin dyvjeçar të një grupi gazetarësh, më të shquarit në Evropë në llojin e tyre. Ky treg është një nga tregjet më kriminale në Ballkan, në Evropë dhe në botë. Janë 200 sipërmarrje, të cilat ditë e natë vjedhin qytetarët e huaj me mashtrim. Mashtrojnë qytetarët dhe call center-i, i cili u kontrollua, sipas hetimit që kanë bërë me agjentët e vet, vidhte në muaj të paktën 30 milionë euro me mashtrim”, tha Berisha. 

Sipas tij, kjo veprimtari nuk goditet nga policia, pasi zyrtarët e policisë paguhen për të mbyllur sytë ndaj këtyre qendrave. 

“Kjo veprimtari kriminale është absolutisht e gjitha nën mbikëqyrjen e narkopolicisë, njësoj si dikur për çdo rrënjë kanabisi paguhej tarifa prej 300 eurosh, kur ato ishin të shëndetshme dhe jepnin një mijë euro fitim. Çdo qendër, për çdo kompjuter, paguan tarifë zyrtarëve të policisë, të cilët mbyllin sytë ndaj këtyre vjedhjeve që ushtrohen në këto qendra.” 

Berisha u ndal edhe një herë te skema e këtyre call center-ave dhe më pas tha se në Shqipëri dekonspirohet çdo gjë. 

“Viktimave u thuhet: ‘Sill shumën se do marrësh kaq, ke humbur në bursë, do ta gjejmë ne kaq’, e të tjera me radhë. Kjo veprimtari e shtetit mafioz, ju e patë kati i trembëdhjetë, ku agjentët e Le Iene kanë punuar dy vite aty dhe u kanë dhënë çdo informacion ekipit që hetonte. Kanë foto dhe dokumente ata. Kur shkuan, e gjetën dhomën të boshatisur, sepse i kishin hequr të gjithë kompjuterët, çka vërteton edhe një herë deklaratën e prokurorit të antimafias së Napolit, i cili thotë se Shqipëria është më keq se narkoshtet, sepse të dekonspirojnë çdo gjë. Është e pamundur të përfundosh një hetim”, tha ai. 

Një ngjarje e rëndë është regjistruar dje në spitalin e Shkodrës.

Burime zyrtare nga policia bënë me dije se një 16-vjeçare ka humbur jetën në spital, ndërsa dyshohet se shkak është bërë një arrest kardiorespirator.

“Dje, në Spitalin Rajonal Shkodër, një 16-vjeçare, ka humbur jetën.
Paraprakisht dyshohet për shkak të arrestit kardiorespirator. Grupi hetimor po kryen veprimet në drejtimin e Prokurorisë, për të përcaktuar shkakun e humbjes së jetës.”, sqaron policia.

Ish-kryeministri Sali Berisha do të paraqitet sot në GJKKO në kuadër të respektimit të masës së sigurisë ‘detyrim paraqitje’. 

Teksa kjo është e hëna e tretë e muajit, Berisha duhet të paraqitet siç e përcakton procedura, ndërsa ndaj tij po hetohet për çështjen e privatizimit të ish-kompleksit Partizani. 

Gjykata e Durrësit ka lënë në fuqi masën ‘arrest me burg’ për ish-drejtorin e Burgut të Durrësit, Indrit Cërloj, i cili u arrestua tre ditë më parë. Gjykata e Durrësit caktoi ndaj tj më 16 janar masën e sigurisë ‘arrest në burg’ për Cërlojn, i cili akuzohet për shpërdorim detyre në rastin e arratisjes së Altin Ndocit. kjo masë u la në fuqi edhe sot.

Ndërkohë masa ‘arrest shtëpie’ u la në fuqi dhe për mjeken Ylvete Sema, 65 vjeçe.

Pak ditë më parë, Ministri i Drejtësisë, Besfort Lamallari firmosi shkarkimin e Indrit Cërloj nga drejtor i IEVP Durrës. Vendimi erdhi një ditë pas arratisjes së të paraburgosurit Altin Ndoci teksa ky i fundit ishte dërguar për kontroll mjekësor në spitalin e qytetit.

Pas kësaj ngjarje, u krye menjëherë pezullimin e nga detyra të të gjithë zinxhirit komandues të IEVP Durrës.

Nga verifikimet paraprake rezulton se IEVP Durrës për shoqërimin e planifikuar nuk ka raportuar në Drejtorinë e Përgjithshme të Burgjeve as planifikimin dhe as realizimin e vizitës mjekësore, në kundërshtim me aktet nënligjore në fuqi. Gjithashtu, rezulton se nuk janë respektuar procedurat standarde për shoqërimin e të paraburgosurve dhe të dënuarve.

Kreu i PD, Sali Berisha foli sot për protestën e opozitës në 24 Janar, para Kryeministrisë. Gjatë bashkëbisedimit me ndjekësit në rrjetet sociale, Berisha tha se opozita nuk synon të marrë pushtet me dhunë. 

Ai shtoi se beson tek një kryengritje paqësore dhe të qëndrueshme prej të cilës mund të cilës mund të ndryshojë pushtet. 

“Ne besojmë se me një kryengritje paqësore të qëndrueshme, është plotësisht e mundur largimi i tyre nga pushteti. Ndaj dhe duhet të krijojmë një bindje të gjerë, tek qëndrestarët, opozitarët, tek të gjithë ata që duan të shpëtojnë Shqipërinë nga kjo e keqe; se një kryengritje e zgjatur, paqësore është jetike dhe vendimtare për fatin e Shqipërisë, për shpëtimin nga kjo bandë, organizatë kriminale të vendit.
Po bëjmë përgatitjet tona dhe besojmë se shumë shpejtë qytetarët, opozitarët do të jenë të gatshëm për këtë akt, proces, lëvizje.” – u shpreh, mes të tjerash, Berisha. 

Reagimi i saj vjen pas publikimit gjatë ditës së djeshme të disa mesazheve në rrjete sociale, të cilat, sipas familjes Meçaj, janë të manipuluara dhe nuk pasqyrojnë realitetin. Xhuli Meçaj thekson se familja e saj këmbëngul në hetim të plotë dhe transparent të ngjarjes, duke shtuar se askush nuk duhet të paragjykohet përpara vendimit të drejtësisë.

“Ne nuk mbajmë përgjegjësi për disfatat që vajza ka pasur në jetë, por nuk mund të lejojmë që ato të kthehen në trauma për familjen tonë,” është shprehur Meçaj, duke nënvizuar se përhapja e akuzave dhe interpretimeve të pabazuara po rëndon padrejtësisht mbi familjen e saj.

Ajo ka theksuar gjithashtu se familja Meçaj ruan respekt maksimal për familjen Lamaj, pavarësisht situatës së rëndë të krijuar. Sipas saj, dhuna ndaj një të moshuari është e pafalshme dhe e dënueshme moralisht dhe ligjërisht, por familja nuk kërkon hakmarrje dhe as përshkallëzim të konfliktit.

“Ne nuk e dëshirojmë hakmarrjen. Kërkojmë vetëm drejtësi dhe zbardhje të së vërtetës,” ka deklaruar Xhuli Meçaj, duke apeluar për ndalimin e gjuhës së urrejtjes dhe presionit publik mbi palët e përfshira.

Ndërkohë, pritet që institucionet përgjegjëse të vijojnë hetimet për të sqaruar rrethanat e plota të ngjarjes, ndërsa familjarët kërkojnë që çështja të mos shndërrohet në një “gjyq publik”, por të trajtohet sipas ligjit.