Nga Gazeta ‘SI’ – Ministri i Mbrojtjes, Pirro Vengu ka prezantuar sot para deputetëve në komisione, projektligjin e ri që i hap rrugë prodhimit, importit dhe eksportit të armëve të zjarrit e municioneve.

Ministri Vengu tha se KAYO, kompania shtetërore për armët, ka nënshkruar 6 kontrata me privatët për të prodhuar municione, mjete, uniforma, dronë etj.

Vengu thekson se parashikohet që armatimet e para “Made in Albania” të prodhohen brenda këtij viti.

“Kemi 6 kontrata të nënshkruara për krijimin e 6 kompanive të përbashkëta shtet privat përmes kompanisë KAYO. 6 kontratat parashikojnë prodhimin  e municioneve, mjeteve dhe pajisjeve personale, uniformave, armatimit të lehtë, dronëve, sistemeve antidronë dhe mjetet e emergjencave civile. Jemi ë përfundim të negociatave me Fincantierin për ndërtimin e kantierit detar të Pashalimanit për të pasur mundësi jo vetëm të prodhojmë mjetet tona, jo vetëm t’i mirëmbajmë, por dhe të prodhojmë për vendet e tjera.  Presim që produktet e para Made in Albania, prodhimet e para të fillojnë këtë vit. Kemi hyrë në fazën që duam të sigurojmë zinxhirin e furnizimit të qëndrueshëm për të gjitha nënproduktet në mënyrë që të jemi në përputhje dhe me standardet e NATO-s”, tha Vengu.

Ministri bëri me dije gjithashtu se, janë në fazën përfundimtare negociatat me kompaninë “Fincantieri” për ringritjen e kantierit detar të Pashalimanit, në bashkëpunim me gjigantin italian.

“Ky projekt synon jo vetëm prodhimin dhe mirëmbajtjen e anijeve për Forcat e Armatosura shqiptare, por edhe prodhimin dhe riparimin e mjeteve për nevojat e vendeve aleate”, tha Vengu.

Gjatë diskutimeve, në përgjigje të pyetjes së deputetit të Partisë së Lirisë, Edmond Haxhinasto, ministri u ndal te shqetësimet që lidhen me ndjeshmërinë e kësaj fushe, veçanërisht rrezikun e keqpërdorimit ose mosrespektimit të procedurave ligjore, çka mund të krijojë hapësira për importe ilegale apo të pakontrolluara, duke dëmtuar sistemin e gjurmueshmërisë dhe duke sjellë probleme edhe në rastet e eksporteve.

Duke iu përgjigjur këtyre shqetësimeve, ministri Vengu tha se janë ndërmarrë masa konkrete për forcimin e mekanizmave ligjzbatues përmes bashkëpunimit me doganat dhe Autoritetit të Kontrollit Shtetëror të Eksporteve (AKShE) e cila bashkëpunon ngushtë me Policinë e Shtetit, SPAK dhe Byronë Kombëtare të Hetimit (BKH), në raste me ndjeshmëri të veçantë.

The post Vengu: Shqipëria nis brenda vitit prodhimin e armëve dhe municioneve. Bashkëpunim me SPAK appeared first on Gazeta Si.

Nga Gazeta ‘SI’ – Gjatë muajit dhjetor 2025, INSTAT tregon se më shumë se 714 mijë shqiptarë dolën nga Shqipëria, rreth 11% më shumë se një vit më parë. Për të njëjtën periudhë, që përkon me atë të festave të fundvit, 844 mijë shqiptarë erdhën në atdhe, me rritje 7%.

INSTAT tregon se gjatë fundvitit, ka qenë po ashtu i lartë numri i të huajve që erdhën në Shqipëri, 698 mijë me rritje vjetore 6.8%. Në total, gjatë dhjetorit, në Shqipëri u regjistruan mbi 1.5 milionë hyrje ose 7% më shumë se dhjetori i 2024-s. Njëkohësisht u regjistruan mbi 1.35 mln dalje.

Të ndarë sipas rajoneve, 97% e shtetasve të huaj që hynë në Shqipëri ishin nga Europa, ku ajo Jugore zë 85% të hyrjeve nga kontinenti, ndjekur nga Evropa Perëndimore me 6% dhe Europa Veriore me 4%.

Qëllimi i hyrjes së shtetasve të huaj ishte kryesisht personal në 97% të rasteve, por hyrjet për biznes dhe aktivitete profesionale shënuan një rritje prej 13%.

The post Festat e fundvitit/ Mbi 844 mijë shqiptarë u kthyen në Atdhe appeared first on Gazeta Si.

Tregjet europiane ranë lehtë të premten e 23 janarit, ndërsa investitorët po përpunojnë zhvillimet nga Forumi Ekonomik Botëror në Davos, përfshirë fjalimin kritik të presidentit ukrainas Volodymyr Zelenskyy ndaj Europës.

Indeksi pan-europian Stoxx 600 ishte 0.09% në territor negativ, ndërsa bursat kryesore shfaqën luhatje të përziera. CAC 40 në Francë u rrit lehtë, FTSE 100 në Londër shënoi gjithashtu rritje, ndërsa FTSE MIB në Itali dhe IBEX 35 në Spanjë ranë. DAX gjerman u rrit me 0.14%.

Por ari preku një çmim të ri rekord duke kaluar vlerën e 4.9 mijë dollarëve për onz. Kriptomonedha më e famshme në botë, Bitcoin, u godit dhe ra në 89 mijë dollarë.

Të enjten, aksionet europiane u mbyllën në rritje pasi presidenti amerikan Donald Trump deklaroi se ishte arritur një “marrëveshje kornizë” lidhur me Groenlandën dhe hoqi dorë nga vendosja e tarifave për disa vende europiane. Lëvizja u përshëndet nga drejtues biznesi në Europë, ndërsa JP Morgan e cilësoi situatën “shumë pozitive për biznesin”.

Në fjalimin e tij në Davos, Zelenskyy kritikoi ashpër liderët europianë, duke i akuzuar se po tregohen të paqartë dhe të përçarë përballë kërcënimeve gjeopolitike. Ai tha se Europa po përpiqet të bindë Trump-in të ndryshojë qëndrim, në vend që të bashkohet dhe të mbrojë veten. Zelenskyy njoftoi gjithashtu se në Emiratet e Bashkuara Arabe do të zhvillohen takime trepalëshe mes Ukrainës, Rusisë dhe SHBA-së për përfundimin e luftës.

Ndërkohë, investitorët po ndjekin me vëmendje zhvillimet rreth të ashtuquajturit “Bordi i Paqes”, i kryesuar nga Trump, i cili fillimisht ishte konceptuar për Gazën, por që Trump sugjeron se mund të marrë një rol rival ndaj OKB-së, një ide që ka shqetësuar aleatët amerikanë. Trump hoqi gjithashtu ftesën për kryeministrin kanadez Mark Carney për t’iu bashkuar bordit.

Trump deklaroi se SHBA ka një “armadë” anijesh që po lëvizin drejt Iranit, në mes të shtypjes së dhunshme të protestave nga autoritetet iraniane. “Preferoj që të mos ndodhë asgjë, por po i monitorojmë nga afër,” tha ai.

Çmimi i naftës Brent u rrit me 0.94% të premten, ndërsa aksionet e sektorit të naftës dhe gazit u rritën me rreth 0.9%.

Në frontin e kompanive, Ericsson njoftoi një program riblerjeje aksionesh me vlerë 15 miliardë korona suedeze (rreth 1.7 miliardë dollarë). Kompania raportoi fitime operative më të larta se pritshmëritë për tremujorin e fundit të vitit 2025, çka bëri që aksionet e saj të rriteshin deri në 11% në hapje të tregut.

CEO i Ericsson, Börje Ekholm, tha se tregu i rrjeteve radio pritet të mbetet i qëndrueshëm në vitin 2026, ndërsa kompania planifikon rritje investimesh në sektorin e mbrojtjes.

The post Zhvillimet në Davos, bien aksionet europiane. Shtrenjtohen karburantet appeared first on Gazeta Si.

Nga Gazeta ‘SI’- Me anë të një udhëzimi të sapomiratuar, qeveria e Shqipërisë parashikon vënien në funksion të Sistemit Inteligjent të Transportit (SIT), një kuadër i ri digjital që synon transformimin e mënyrës se si monitorohet, menaxhohet dhe kontrollohet trafiku rrugor në vend.

Dokumenti, parashikon që çdo person në territorin e Shqipërisë të ketë akses në kohë reale në informacion mbi trafikun, rrugët, incidentet, parkimet, si dhe elementë të tjerë që synojnë ta bëjnë udhëtimin “më të saktë” dhe “më inteligjent”.

Sipas udhëzimit, qeveria hap rrugën që menaxhimi i këtij sistemi t’i delegohet edhe subjekteve private, të cilat do të kenë në administrim dhe përpunim të gjithë informacionin që lidhet me një pikë kritike si infrastruktura rrugore dhe transporti.

Në listën e funksioneve përfshihen parkimi inteligjent, menaxhimi dinamik i trafikut dhe madje komunikimi makinë-makinë dhe makinë-rrugë (C-ITS). Ky komunikim do të kryhet nëpërmjet njësisë së “platformës”, të cilën shoferët duhet ta vendosin brenda ose jashtë mjetit, për të aksesuar SIT. Udhëzimi thotë se garanton ruajtjen e anonimitetit të përdoruesve, por mbetet e paqartë se si do të garantohen realisht mbrojtja e të dhënave personale dhe siguria e informacionit delikat të qytetarëve.

Një nga elementët kyç të dokumentit është krijimi i Pikës Kombëtare të Aksesit, e administruar nga Autoriteti Rrugor Shqiptar (ARRSH), duke e kthyer atë në të vetmen nyjë shtetërore që do të aksesojë të gjitha të dhënat nga trafiku e infrasruktura.

The post Qeveria do të digjitalizojë edhe rrugët, i hap rrugë privatit për të menaxhuar trafikun appeared first on Gazeta Si.

Kryenegociatori i Kosovës, Besnik Bislimi, tha se është arritur pajtim me Serbinë për funksionalizimin e komisionit të përbashkët për zbatimin e marrëveshjes për personat e zhdukur gjatë luftës në Kosovë.

Pas rundit të ri të dialogut në Bruksel, Bislimi deklaroi se tani mbetet që përfaqësuesit e delegacioneve të Kosovës dhe Serbisë të takohen “në javët në vijim dhe të përcaktojnë prioritetet e para për punën e komisionit të përbashkët”.

Marrëveshja u arrit pas disa orësh bisedimesh që ndërmjetësi evropian në dialog, Peter Sorensen, zhvilloi veç e veç me Bislimin dhe kryenegociatorin e Serbisë, Petar Petkoviç.

Në fund të këtyre takimeve, në orët e mbrëmjes u mbajt një takim i përbashkët, në të cilin marrëveshja u formalizua.

Rundi i ri i dialogut u zhvillua pas vizitës së Sorensenit në Prishtinë dhe Beograd javën e kaluar.

Ky komisioni i përbashkët për personat e pagjetur është pjesë e Deklaratës së përbashkët për personat e zhdukur, për të cilën u pajtuan kryeministri i Kosovës, Albin Kurti dhe presidenti i Serbisë, Aleksandar Vuçiç, më 2023.

Palët u pajtuan për zbatimin e plotë të deklaratës së përbashkët për personat e zhdukur gjatë një takimi trepalësh mes kryenegociatorëve në dhjetor 2024 në Bruksel.

Për çështjen e themelimit të komisionit për personat e zhdukur, palët kishin diskutuar edhe gjatë një rundi bisedimesh më 11 shtator të vitit 2025. Megjithatë, ai rund bisedimesh kishte përfunduar pa asnjë rezultat.

Në luftën e zhvilluar në Kosovë më 1998-99, janë vrarë mbi 13.000 civilë dhe mijëra të tjerë janë zhdukur.

Afër 1.600 persona vazhdojnë të jenë ende të pagjetur – pjesa më e madhe e tyre shqiptarë.

Takimi i 22 janarit ishte i pari në kuadër të dialogut për normalizimin e marrëdhënieve ndërmjet Serbisë dhe Kosovës këtë vit.

Gjatë vizitës së tij në Prishtinë më 14 janar, Sorensen tha lidhur me dialogun se “kam shpresa se viti 2026 do të na japë atë që viti 2025 nuk na e dha”.

“Çfarë do të bëjmë ne është të sigurohemi që palët të ulen dhe të bisedojnë. Duhet ta gjejmë një mënyrë që kjo të ndodhë”, theksoi Sorensen në Prishtinë.

Ai tha se do të punojë për të gjetur një mënyrë që dy vendet fqinje të zhvillojnë bisedime të nivelit të lartë, në përpjekje për t’i normalizuar marrëdhëniet.

Kosova dhe Serbia nuk kanë zhvilluar takim të nivelit të lartë që nga viti 2023, pas rritjes së tensioneve mes tyre për shkak të një sulmi nga një grup serbësh të armatosur ndaj Policisë së Kosovës në veriun e banuar me shumicë serbe në shtator të atij viti.

Kurti – i cili pritet të jenë në krye të qeverisë së vendit edhe për një mandat të tretë katërvjeçar – e ka kushtëzuar vazhdimin e dialogut me dorëzimin e të dyshuarit për sulmin në Banjskë të Zveçanit që la një rreshter të vrarë, Millan Radoiçiç.

Radoiçiq ishte nënkryetar i Listës Serbe, partisë më të madhe të serbëve të Kosovës kur ndodhi sulmi dhe e mori përgjegjësinë për të. Beogradi nuk ka pranuar t’ia dorëzojë Kosovës atë, dhe thuhet se ai endet i lirë në Serbi.

Edhe Serbia ka kushtet e veta në dialog, siç e ritheksoi edhe Petkoviq pas takimit me Sorensenin më 16 janar në Beograd.

Kryenegociatori serb tha se përparimi në dialogun e ndërmjetësuar nga blloku varet nga gatishmëria e Kosovës për ta themeluar një asociacion të komunave me shumë serbe.

Kosova dhe Serbia veçse arritën marrëveshje për rrugën drejt normalizimit, e njohur si Marrëveshja e Ohrit, më 2023, por nuk janë duke e zbatuar atë.

Ndër pikat e marrëveshjes është edhe themelimi i Asociacionit të komunave me shumicë serbe në Kosovë, por Prishtina nuk ka ndërmarrë hapa për ta përmbushur këtë kërkesë./REL

The post Bislimi: Është arritur pajtim me Serbinë për komisionin për personat e zhdukur appeared first on Gazeta Si.

Lista e plotë e nominimeve për çmimet Oscar 2026 është këtu!

Këtë vit, gjithsej 201 filma ishin në garë për çmimin “Filmi më i Mirë”, por vetëm 10 u kualifikuan. Gjithashtu, nominimet përfshijnë për herë të parë dhe një kategori të re: Kasti më i Mirë.

Conan O’Brien do të rikthehet për të prezantuar drejtpërdrejt ceremoninë e ndarjes së çmimeve Oscar, e cila do të zhvillohet më 15 mars.

Lista e plotë e nominimeve:

Filmi më i Mirë:

Bugonia

F1

Frankenstein

Hamnet

Marty Supreme

One Battle After Another

The Secret Agent

Sentimental Value

Sinners

Train Dreams

Aktori më i Mirë:

Timothée Chalamet – Marty Supreme

Leonardo DiCaprio – One Battle After Another

Ethan Hawke – Blue Moon

Michael B. Jordan – Sinners

Wagner Moura – The Secret Agent

Aktorja më e Mirë:

Jessie Buckley – Hamnet

Rose Byrne – If I Had Legs I’d Kick You

Kate Hudson – Song Sung Blue

Renate Reinsve – Sentimental Value

Emma Stone – Bugonia

Aktori më i Mirë në rol dytësor:

Benicio del Toro – One Battle After Another

Jacob Elordi – Frankenstein

Delroy Lindo – Sinners

Sean Penn – One Battle After Another

Stellan Skarsgård – Sentimental Value

Aktorja më e Mirë në rol dytësor:

Elle Fanning – Sentimental Value

Inga Ibsdotter Lilleaas – Sentimental Value

Amy Madigan – Weapons

Wunmi Mosaku – Sinners

Teyana Taylor – One Battle After Another

Regjisori më i Mirë:

Chloé Zhao – Hamnet

Josh Safdie – Marty Supreme

Paul Thomas Anderson – One Battle After Another

Joachim Trier – Sentimental Value

Ryan Coogler – Sinners

Skenari origjinal:

Blue Moon

It Was Just an Accident

Marty Supreme

Sentimental Value

Sinners

Skenari i përshtatur: 

Bugonia

Frankenstein

Hamnet

One Battle After Another

Train Dreams

Filmi i animuar:

Arco

Elio

KPop Demon Hunters

Little Amélie or the Character of Rain

Zootopia 2

Filmi i shkurtër i animuar:

Butterfly

Forevergreen

The Girl Who Cried Pearls

Retirement Plan

The Three Sisters

Filmi ndërkombëtar:

The Secret Agent – Brazil

It Was Just an Accident – France

Sentimental Value – Norway

Sirat – Spain

The Voice of Hind Rajab – Tunisia

Filmi me metrazh të shkurtër:

Butcher’s Stain

A Friend of Dorothy

Jane Austen’s Period Drama

The Singers

Two People Exchanging Saliva

Kasti më i Mirë:

Hamnet

Marty Supreme

One Battle After Another

The Secret Agent

Sinners

Kinematografia:

Frankenstein

Marty Supreme

One Battle After Another

Sinners

Train Dreams

Produksioni:

Frankenstein

Hamnet

Marty Supreme

One Battle After Another

Sinners

Montazhi:

F1

Marty Supreme

One Battle After Another

Sentimental Value

Sinners

Muzika:

Bugonia

Frankenstein

Hamnet

One Battle After Another

Sinners

Kënga origjinale:

“Dear Me” – Diane Warren: Relentless

“Golden” – KPop Demon Hunters

“I Lied to You” – Sinners

“Sweet Dreams of Joy” – Viva Verdi!

“Train Dreams” – Train Dreams

Sound:

F1

Frankenstein

One Battle After Another

Sinners

Sirat

Efektet vizuale:

Avatar: Fire and Ash

F1

Jurassic World: Rebirth

The Lost Bus

Sinners

Grimi dhe flokët:

Frankenstein

Kokuho

Sinners

The Smashing Machine

The Ugly Stepsister

Kostumografia:

Avatar: Fire and Ash

Frankenstein

Hamnet

Marty Supreme

Sinners

Dokumentari:

The Alabama Solution

Come See Me in the Good Light

Cutting Through Rocks

Mr. Nobody Against Putin

The Perfect Neighbor

Dokumentari me metrazh të shkurtër:

All the Empty Rooms

Armed Only with a Camera: The Life and Death of Brent Renaud

Children No More: “Were and Are Gone”

The Devil Is Busy

The post Oscar 2026 – Lista e plotë e nominimeve appeared first on Gazeta Si.

Donald Trump ka paditur JP Morgan dhe shefin e saj ekzekutiv, Jamie Dimon, për të paktën 5 miliardë dollarë (3.7 miliardë paund), pasi pretendon se banka i ka mbyllur llogaritë për arsye politike.

Sipas raportimeve në SHBA, padia akuzon gjigantin bankar se ka mbyllur në mënyrë të padrejtë llogarinë bankare të presidentit për motive politike.

Padia u depozitua të enjten nga avokati i presidentit amerikan në një gjykatë në Miami, Florida.

Gjatë fundjavës, Trump shkroi në një postim në Truth Social: “Do ta padis JP Morgan Chase brenda dy javëve të ardhshme për DEBANKIMIN e gabuar dhe të papërshtatshëm që më bëri pas protestës së 6 janarit, një protestë që doli e drejtë për ata që protestonin – Zgjedhjet ishin TË MANIPULUARA!”

Depozitimi i padisë vjen një ditë pasi Dimon i quajti planet e Trump për vendosjen e një tavani mbi tarifat e kartave të kreditit një “katastrofë”.

Trump ka propozuar një plan për të kufizuar përkohësisht normat e interesit të kartave të kreditit në SHBA në 10%, duke filluar nga 20 janari dhe për një periudhë njëvjeçare.

I pyetur për këtë plan në Forumin Ekonomik Botëror, Dimon u shpreh: “Do të ishte një katastrofë ekonomike, dhe nuk po e them këtë për shkak të biznesit tonë, ne do ta përballonim gjithsesi.”

Një zëdhënës i JP Morgan deklaroi: “Ndërsa na vjen keq që Presidenti Trump na ka paditur, ne besojmë se kjo padi nuk ka bazë. Ne respektojmë të drejtën e Presidentit për të na paditur dhe të drejtën tonë për t’u mbrojtur,  për këtë shërbejnë gjykatat. JPMC nuk mbyll llogari për arsye politike apo fetare.

“Ne mbyllim llogari vetëm kur ato paraqesin rrezik ligjor ose rregullator për kompaninë. Na vjen keq kur detyrohemi ta bëjmë këtë, por shpesh rregullat dhe kërkesat rregullatore na çojnë drejt këtyre vendimeve.

“Kemi kërkuar si nga kjo administratë ashtu edhe nga administratat e mëparshme të ndryshojnë rregullat dhe rregulloret që na vendosin në këtë situatë dhe mbështesim përpjekjet e administratës për të parandaluar politizimin e sektorit bankar.”

JP Morgan rritet në bursë pavarësisht padisë së Trump

Aksionet e JP Morgan janë rritur pavarësisht lajmit. Aksioni i JP Morgan ishte rreth 1.2% më i lartë në orët e para të pasdites në Nju Jork, pasi padia u depozitua sot në emër të presidentit.

Një zëdhënës i bankës tha se ajo beson se “padia nuk ka asnjë bazë” dhe se “nuk mbyll llogari për arsye politike apo fetare”.

The post Trump padit gjigandin JP Morgan për 5 mld dollarë: Më mbyllën llogaritë për motive politike! appeared first on Gazeta Si.

Nga Gazeta ‘SI’- Sot është vënë në funksion sistemi e-Tax, përmes të cilit mund të plotësohet Deklarata Vjetore e të Ardhurave Personale (DIVA). Ky shërbim u shërben jo vetëm individëve që janë të detyruar ligjërisht ta dorëzojnë deklaratën, por edhe atyre që synojnë të përfitojnë nga kompensimi për shpenzimet e arsimit të fëmijëve.

Detyrimi për plotësimin e DIVA-s përfshin individët që realizojnë të ardhura vjetore mbi 1.2 milionë lekë, personat me më shumë se një punësim, si edhe ata që kanë siguruar të ardhura të padeklaruara mbi 50 mijë lekë në vit nga burime si qiraja, honorarët apo aktivitete të tjera.

Një risi e këtij viti është mundësia që DIVA të plotësohet edhe nga individët që aplikojnë për përfitimin e kompensimit për arsimin e fëmijëve.

Individët që e deklarojnë për herë të parë të ardhurat vjetore mund të aplikojnë lehtësisht duke hyrë në faqen zyrtare të tatimeve, në seksionin e-Shërbime për individët, përmes identifikimit në platformën e-Albania.

The post Hapet aplikimi për deklarimin DIVA: Mund të përfitoni dhe kompensim për fëmijët appeared first on Gazeta Si.

Tregjet globale u ngritën lehtë të enjten, dollari qëndroi në vend dhe çmimi i arit u ul pas deklaratës së Presidentit amerikan Donald Trump, i cili hodhi poshtë idenë e marrjes me forcë të Groenlandës dhe hoqi kërcënimet e tarifave ndaj tetë vendeve europiane.

Reagimi pozitiv ndaj ndryshimit të qëndrimit të Trumpit çoi në rritje mbi 1% të indeksit pan-europian STOXX,  gjatë hapjes së tregjeve, pas një dite të mërkurë që kishte shënuar performancën më të mirë të Wall Street-it, në dy muaj.

“Unë nuk kam nevojë të përdor forcën, nuk dua ta përdor dhe nuk do ta përdor,” tha Trump në Davos, duke iu referuar një sulmi për të siguruar Groenlandën. Më pas, në platformën e tij Truth Social, ai shtoi se SHBA dhe NATO kishin një kuadër për një marrëveshje për Groenlandën dhe se nuk do të vendosë nga 1 shkurt tarifat 10% mbi importet nga tetë aleatët europianë.

Dollari pati një rritje fillestare pas këtyre deklaratave, por po binte sërish në Europë. Euroja u afrua sërish pranë 1.17 dollarëve, krona daneze qëndroi e qëndrueshme ndaj dollarit dhe euros, ndërsa ari u largua nga rekordi i tij prej 4.829 dollarë për onz.

Michael Metcalfe i State Street komentoi: “Mësimi i vitit të kaluar ishte se tregjet janë të afta të kapërcejnë këtë lloj paqëndrueshmërie të nxitur nga lajmet gjeopolitike,” duke shtuar se normat e interesit dhe fundamentet ekonomike amerikane duhet të kthehen në qendër të vëmendjes. Indeksi i frikës VIX ra ndjeshëm, ndërsa Bonot amerikane 10-vjeçare, të cilat ishin shitur duke rritur rendimentin në nivelin më të lartë që nga gushti, panë një kthim në kërkesë.

Rendimentet 10-vjeçare të Gjermanisë filluan pa ndryshime në 2.87%, ndërsa rendimentet 30-vjeçare të Japonisë, që kishin rritur shqetësime për financat e vendit dhe zgjedhjet e shpejta muajin tjetër, u ulën në 3.67%. Bonot ukrainase gjithashtu u rikuperuan fuqishëm pas deklaratave të dërguarit amerikan Steve Witkoff se kishte “shumë përparim” në bisedimet për paqen përpara takimit midis Trump dhe presidentit ukrainas Volodymyr Zelenskiy në Davos.

The post Tregjet qetësohen pas zmbrapsjes së Trump mbi Groenlandën appeared first on Gazeta Si.

Epoka e dizajnit të brendshëm me atë bezhën e trishë, ka mbaruar zyrtarisht. Në vitin 2026, do të përqafojmë një kaleidoskop ngjyrash tërheqëse, në shtëpi dhe jo vetëm. Një numër gjithnjë e më i madh njerëzish po zgjedhin kombinime shumëngjyrëshedhe shijojnë ngjyrat neon sa herë që mundet.

Nëse dëshironi të shtoni ngjyra në shtëpinë tuaj këtë vit, qoftë duke shtuar një qilim ose llambë të re, apo duke pikturuar guximshëm një mur të tërë, lexoni më poshtë për një përmbledhje të ngjyrave që dizajnerët e hapësirave të brendshme parashikojnë se do të jenë kudo muajt e ardhshëm.

David Flack i Flack Studio në Melbourne, pret të shohë më shumë ngjyra të bazuara në të kuqe të thellë dhe kafe toke këtë vit. “Ngjyrat e ngrohta dhe të baltosura ndihen si një përqafim i ngrohtë, mund të zënë një hapësirë më të madhe dhe krijojnë lidhje me ngjyrat përreth shtëpisë,” thotë ai. Mund të jetë një ton i thellë i tokës së kuqe, ose një kafe e errët e pasur. Flack ndjen se këto ngjyra më të errëta “thellojnë hapësirat” dhe “shtojnë peshë vizuale.”

Më natyrale dhe më tërheqëse se jeshilja trazovaçe e pistakios nuk gjen. Pistachio-chartreuse është një nga ngjyrat që Marie Trohman dhe Ashley Drost nga Proem Studio në Los Angeles, janë të entuziazmuara këtë vit. Kjo nuancë është e gjallë dhe argëtuese, dhe “tërheq syrin shumë shpejt,” thotë Trohman. Përdorimi i ngjyrave mund të duket frikësues, por mund ta integroni hapësirën tuaj me detaje të vogla që tërheqin vëmendjen, si një qilim ose jastëkë.

Bluja e zbutur e qiellit është një opsion qetësues që Trohman po përdor në renovimin e shtëpisë së saj. “Kjo ngjyrë është interesante sepse është e butë. Shkon me çdo neutral që njerëzit kanë përdorur gjatë katër viteve të fundit, ku bezha ishte mbizotëruese, dhe është shumë fleksibël. Për më tepër, shkon shumë mirë me tonet e drurit.”

Dizajnerja e brendshme nga Austin, Annie Downing, pajtohet se ngjyrat e tokës janë në trend. Një nuancë e veçantë që ajo pëlqen? Okra e verdhë-portokalli. “Shton një ndjesi të ngrohtë, të jetuar në një dhomë dhe shkon bukur me antikuarët dhe elementë modernë,” thotë Downing.

Dizajnerë të shumtë thanë se e kuqja dhe burgundia janë ngjyrat e tyre të preferuara, të cilat pritet të shfaqen në shumë brendësi këtë vit. Downing është adhurues i të kuqes të vërtetë dhe të ndezur: “Mendoj se këtë vit do të shohim më shumë guxim me ngjyrat: më pak zgjedhje të sigurta, më shumë personalitet.”

Ngjyra limoni-vanilje është një mënyrë për të përdorur të bardhën më butë dhe për të nxjerrë në pah ngjyrat më të forta dhe të errëta në kombinim. Flack thotë se i pëlqen një nuancë e verdhë e lehtë, e frymëzuar nga vitet 1950, për një efekt të befasishëm: “Më pëlqen një neutral me një nuancë të çuditshme të ngjyrës përmes tij, si rozë, e bardhë, limoni i bardhë, ose madje një e bardhë e baltosur.”

The post Ngjyrat që do të dominojnë në shtëpi në 2026 appeared first on Gazeta Si.

Nga Gazeta ‘SI’- Shoqata e Ndërmjetësve të Pasurive të Paluajtshme, NAREA, ka reaguar me shqetësim pas kontrolleve të fundit tatimore në agjencitë imobiliare. Në një njoftim për mediat, NAREA shprehet se po “demonizohet” një sektor me mijëra të punësuar, ndërsa po qarkullojnë informacione të pavërteta.

“Profesionistë, të cilët si rrjedhojë e kërkimit të lajmit të bujshëm artificial dhe të klikimeve me çdo kusht, sot vuajnë pasojat e kësaj fushate denigruese. Kjo ndikon negativisht në perceptimin e publikut mbi rolin dhe detyrat e agjentit, cënon imazhin e tij dhe frymën e bashkëpunimit,” tha drejtori i NAREA-s, Reinaldo Pipiria.

Ai thekson gjithashtu se tregu ka pësuar deformime nga hyrja e agjentëve informale dhe konkurrenca e padrejtë, për shkak të moszbatimit të ligjit për ndërmjetësimin imobiliar, duke kërkuar më shumë komunikim nga institucionet mbi planin e kontrolleve.

Administrata Tatimore ka nisur prej një jave kontrolle intensive në agjencitë imobiliare dhe sektorin e ndërtimit, duke raportuar disa abuzime. Në vetëm 9 agjenci të inspektuara janë evidentuar punonjës të padeklaruar, paga jo reale dhe raste evazioni fiskal.

The post Mësymja e Tatimeve tek agjencitë imobiliare, Shoqata: Po na demonizojnë! appeared first on Gazeta Si.

Nga Gazeta ‘SI’ – Një marrëveshje e re e Shqipërisë me Italinë për anijet ushtarake, ka trazuar ujërat e Turqisë.

Italianët, vitin e shkuar fituan të drejtën të rikonstruktojnë, modernizojnë dhe mirëmbajnë kantierin e Pashalimanit, aty ku forcat turke janë prezente që prej 1998-s.

Opozita turke, i ka kërkuar parlamentit atje të japin llogari për lëvizjet e Shqipërisë dhe nëse Turqia do të largohet nga baza detare që përdor për operacione.

Ministri turk i Mbrojtjes, Yaşar Güler, i është përgjigjur opozitës, se Shqipëria nuk ka bërë asnjë kërkesë zyrtare për të ndërprerë praninë e Turqisë në Pashaliman dhe se Ankaraja nuk ka ndërmarrë asnjë plan për të tërhequr personelin e saj.

“Aludimet në këtë drejtim janë krejtësisht të pabazuara,” tha ministri, duke iu përgjigjur spekulimeve se prania turke mund të rrezikohet pas një marrëveshjeje të fundit midis Shqipërisë dhe Italisë për modernizimin dhe zhvillimin e portit.”

Zyrtarët turq theksuan se aktivitetet e modernizimit në bazë, të nisura në vitin 1998, vazhdojnë dhe se personeli i Komandës së Forcave Detare turke vazhdon të shërbejë atje, duke ofruar këshillim dhe trajnim për Marinën Shqiptare. Ministria e përshkroi misionin si një shtyllë kryesore të partneritetit të mbrojtjes midis dy vendeve.

Mediat turke shkruajnë se përgjigja e qeverisë tenton të minimizojë rëndësinë e marrëveshjeve të fundit të sigurisë midis Shqipërisë dhe Italisë, duke argumentuar se ky bashkëpunim lind nga afërsia gjeografike dhe nga obligimet e përbashkëta nën NATO. Ministria theksoi se këto iniciativa janë “të pavarura në natyrë” nga roli i Turqisë në Pashaliman dhe nuk e dobësojnë pozicionin e Ankarasë.

Sipas marrëveshjeve dypalëshe ekzistuese, Marina turke ka të drejtën të përdorë objektin për operacionet e veta në Detin Jon dhe Adriatik. Turqia vazhdon të sigurojë mbështetje financiare dhe logjistike thelbësore për trajnimin e personelit dhe ristrukturimin e Forcave të Armatosura Shqiptare në përputhje me standardet e NATO-s.

Për të forcuar praninë e saj në Shqipëri, Turqia njoftoi në dhjetor 2025 se do të dhurojë një Airbus A319-115J, avion qeveritar i konfigurimit shtetëror me vlerë 11.9 milion dollarë, Forcave të Armatosura Shqiptare sipas një marrëveshjeje dypalëshe. Marrëveshja mban nënshkrimin e Ministrit të Mbrojtjes Shqiptare, Pirro Vengu, dhe është e datës 22 tetor 2025.

Sipas një marrëveshjeje të fundvitit 2025, gjiganti italian i ndërtimit të anijeve, Fincantieri, hyri në një bashkëpunim me kompaninë shtetërore shqiptare KAYO. Qëllimi është të rivitalizohet kantieri i Pashalimanit në një qendër moderne prodhimi, e aftë të ndërtojë dhe mirëmbajë anije lundruese deri në 80 metra për Marinën Shqiptare dhe tregun ndërkombëtar.

Pritet që marrëveshja të gjenerojë të ardhura vjetore prej 400 milion eurosh deri në vitin 2031, me fokus të menjëhershëm ndërtimin e shtatë anijeve patrullimi të reja për Shqipërinë.

The post Anijet italiane në Shqipëri trazojnë ujërat e Turqisë appeared first on Gazeta Si.

Nga Gazeta ‘SI’ – Deputeti socialist Erion Braçe është rikthyer në komisionin e Ekonomisë duke ripërsëritur një kërkesë të vjetër të tij; kontrollin e investimeve të huaja në vend.

Braçe përmendi si shqetësim financimet nga Rusia, që sipas tij kanë prekur Italinë dhe Shqipëria është e radhës.

“Agresioni rus ka ardhur në kufijtë tanë. Ka një trefishim të kontrollit të ndërmarrjeve italiane, për gjashtë muajt e fundit të vitit që shkoi në Itali, në Itali, që ka një kontroll shumë efikas sesa ne që s’kemi asgjë në këtë rast. Kanë ardhur në Itali, por kontrollin e kompanisë italiane që pastaj ja ku e kam bregun përballë. Për të ushtruar aktivitetin e tyre edhe që ne jemi atraktiv për ta, vazhdojmë të jemi atraktiv për ta, do të thotë, kontroll, edhe mbi ekonominë tonë. Që do të thotë na duhet instrumenti që s’e kemi për kontrollin e fluksit të kapitaleve të huaja që hyjnë në territorin e Republikës së Shqipërisë, veçanërisht nga vende jo-mike. Besoj t’i kemi një kohë të dytë për të diskutuar pikërisht për këtë problematikë dhe patjetër, bashkë me qeverinë të hartojmë gjërat e duhura për t’i dhënë vëmendje”, tha Braçe.

Nisur nga operacioni i fundit në kryeqytet, ku zbulua një skemë gjigande e mashtrimit në platforma, e njohur si Forex, deputeti i PS-së ka kërkua më shumë vigjilencë dhe monitorim.

“Ka tre vite që ngremë shqetësimin e platformat mashtruese FOREX, po bëhemi gazi i botës, dhe një seri institucionesh që bëjnë pas nga AMF, tatimet, Inteligjenca financiare apo policia të bëjnë pas e të mos bëjnë asgjë. Duhet të zbulohen me 2 investigime të huaja e vendase. këta individë janë në zemër të Tiranës, në ambientet e luksit, në sy të të gjithëve. Janë këto palaço që kriminalizojë vendin dhe imazhin e financiar të këtij vendi”, kërkoi socilisti Braçe përballë deputetëve të tjerë në komision.

The post Erion Braçe: Qeveria të kontrollojë investimet e huaja. Rrezikun rus e kemi në kufi… appeared first on Gazeta Si.

Nga Gazeta ‘SI’ – Administrata Tatimore ka shpallur një “ofensivë” ndaj sektorit të ndërtimit dhe ka vënë në shënjestër rreth 9 mijë biznese aktive (gjysma e të cilave operojnë në Tiranë), nga kontrollet e të cilëve zbuloi skemat më të zakonshme të evazionit fiskal.

Nëndeklarimi i pagave, ulja e vlerës reale të pronës, çmimet e referencës dhe shitjet në cash, i, këto janë vlerësuar si shkeljet më të zakonta në këtë sektor.

Shifrat e raportuara nga Tatimet flasin për një situatë alarmante ku nga 64 mijë punonjës që ka gjithsej ky sektor, rreth 55% e tyre rezultojnë me rroga të deklaruara deri në 50 mijë lekë, ndërsa pagën mesatare të vendit e kalojnë vetëm 10% e të punësuarve. Këto paga vlerësohen si të nëndeklaruara qëllimisht për të shmangur tatimin në burim prej 15% dhe sigurimet shoqërore.

Konflikti i interesit dhe shkeljet ligjore shtrihen edhe te marrëdhëniet e ndërlikuara me nënkontraktorët, ku plani zbulon skema të mirëfillta të fryrjes së shpenzimeve përmes përdorimit të faturave fiktive për materiale ndërtimi, me qëllim uljen artificiale të fitimit të tatueshëm.

Në këtë kuadër, Administrata Tatimore ka nisur një bashkëpunim të ngushtë me Inspektoratin e Punës dhe Institutin e Sigurimeve Shoqërore për të kryer kontrolle të befasishme në kantiere. Këto grupe të përbashkëta inspektimi do të krahasojnë në kohë reale numrin e punëtorëve që gjenden fizikisht në objekt me listëpagesat zyrtare të dorëzuara në sistem. Sipas kësaj logjike të re kontrolli, çdo metër kub beton i hedhur në kantier duhet të përputhet matematikisht me faturat e blerjes së lëndës së parë dhe me fuqinë punëtore të deklaruar për realizimin e atij volumi punimesh.

The post Tatimet ‘ofensivë’ ndaj ndërtuesve: Ulin vlerën e pronës dhe shesin me para në dorë! appeared first on Gazeta Si.

Ari arriti një nivel rekord të mërkurën, ndërsa Donald Trump po udhëtonte për në Forumin Ekonomik Botëror në Davos për të biseduar rreth synimit të tij për Groenlandin, çështje që ka shkaktuar krizën më të madhe në dekada në aleancën transatlantike.

Çmimi i metalit kaloi 4.800 dollarë dhe po i afrohet vlerës 4.900.

Ari u rrit mbi 2%, teksa investitorët kërkonin një “strehë” nga tensionet gjeopolitike. Megjithatë, tregjet e gjera financiare stabilizuan situatën, dhe aksionet në Ëall Street pritet të rimarrin një pjesë të humbjeve të mëdha të së martës.

Tru,p pritet të mbajë fjalimin e tij më vonë gjatë ditës, por do të arrijë me vonesë pasi aeroplani i tij, Air Force One, u detyrua të kthehej në Uashington për shkak të problemeve teknike.

Trump deklaroi të martën se ai kishte “rënë dakord për një takim mes palëve të ndryshme” në Davos për të diskutuar tensionin rreth Groenlandës.

Para nisjes, ai gjithashtu tha se “nuk mund të ketë kthim pas” në planin e tij për të marrë nën kontroll Groenlandën nga Danimarka. Kur u pyet se sa larg do të shkojë në përpjekjet e tij për ishullin Arktik, presidenti amerikan u përgjigj: “Do ta zbuloni vetë.”

Qeveritë europiane kanë hezituar të reagojnë ndaj kërcënimit të Trump për të vendosur tarifa prej 10% mbi tetë shtete europiane që së fundmi dërguan personel ushtarak në territorin Arktik./FT

The post Ari arrin çmim rekord, ndërsa Trump arrin në Davos appeared first on Gazeta Si.

Konsumatorët në të gjithë botën po ndihen të pezmatuar kohët e fundit.

Në 20 vende të monitoruara nga Ipsos, një kompani sondazhesh, ndjesia nuk është përmirësuar që prej vitit 2022, kur çmimet u rritën fort dhe menjëherë, ndjekur nga normat e interesit. Kërcënimet globale të Donald Trump kanë një pjesë të meritave.

Por edhe pse të mërzitur, konsumatorët nuk janë dukur kurrë më të bukur. McKinsey, një firmë konsulence, gjeti se shpenzimet mbi produktet e bukurisë, në të gjithë botën, nga kujdesi për lëkurën, flokët, parfumet dhe makiazhet, arritën 440 mld dollarë në 2024-n, me rritje vjetore 7%. Mesa duket, kjo reflekton tendencën e konsumatorëve për të shpenzuar gjatë periudhave të vështira – një fenomen që Leonard Lauder, një biznesmen e i bukurisë, e quajti si “efekti i buzëkuqit”.

Stéphane de La Faverie, drejtuesi i kompanisë Estée Lauder sot, thotë se njerëzit blejnë produktet e tyre, për t’u ndjerë më “konfidentë”.

Por rritja e shpenzimeve në fakt ka një prapaskenë më të errët.

Konsumatorët, të fiksuar pas rrjeteve sociale, nuk janë ndjerë kurrë më shumë nën presion për t’u dukur bukur përballë figurave të famshme që janë dobësuar me ilaç dhe janë zbukuruar me ndërhyrje kozmetike. Rezultati? Një turrje e konsumatorëve të rinj drejt firmave të bukurisë, që po e çon këtë industri në maja.

Industria e bukurisë nuk shënjestron më vetëm gratë në një moshë të caktuar. Shumë burra tashmë shpenzojnë pa ngurrim për produkte bukurie dhe jo vetëm xhel flokësh e krem pas rruajtjes.

Edhe produktet e kujdesit që duken si makiazh janë rritje, p.sh kremërat hidratues që të japin një ngjyrim në fytyre si fondatina, apo korrektorët që mbulojnë shenjat lokale dhe xheli për ngrirjen e vetullave.

Shitësit e këtyre produkteve, si Sephora, po punësojnë asistentë meshkuj që ta bëjnë këtë industri më të prekshme për të gjithë. Shumë meshkuj në rrjetet sociale, kryesisht nga Korea e Jugut, që është e fiksuar me bukurinë, kanë ndihmuar në thyerjen e tabuve. “Nëse burrat duan të vendosin make-up, është shumë në rregull, ta bëjnë!”, thotë Priya Venkatesh, drejtuese e Sephora.

Probleme po vijnë nga të rinjtë, që shohin produkte në rrjetet sociale, nga shkëlqyesi i buzëve tek kremërat anti-plakje, dhe i kërkojnë prindërve të tyre t’ua blejnë. Brezi i baby-boomers, të lindurit midis 1946-1964, nisën të përdornin produktet e bukurisë pas moshësh 18-vjeç, por nipërit e tyre, që i përkasin brezit Alpha, po nisin që nga mosha 8, sipas gjetjeve.

Kështu, kërkesa konsumatore po ndryshon. Në rastin e kujdesit për lëkurën, që zë 2/5 e shpenzimeve të bukurisë, konsumatorët po zbulojnë efektet shkencore të përbërësve të tyre si retinoli, që ndihmon në ngadalësimin e plakjes.

Marka të tilla si The Ordinary, themeluar një dekadë më parë, tani ofrojnë produkte me përqendrime të larta të përbërësve të tillë me çmime relativisht të ulëta. Kavanozat rozë me emra romantikë kanë dalë jashtë mode; tani preferohen shishet e thjeshta me etiketa klinike. Gjithashtu po rritet përdorimi i suplementëve si pilulat e kolagjenit (ndonjëherë të quajtura “produkte të bukurisë për t’u konsumuar”) dhe pajisjeve si maskat LED për fytyrën.

Burrat dhe gratë po mbështeten gjithashtu më shumë te shërbimet e bukurisë, ku shpenzuan pothuajse 150 miliardë dollarë në 2024, sipas McKinsey. Këto shpesh përfshijnë substanca dhe pajisje që konsumatorët nuk mund t’i marrin vetë. Ka botoks për të lëmuar lëkurën, fillerë hialuronikë për ta mbushur atë dhe peelingë kimikë për ta ndriçuar. Laserët mund të heqin ose trashin flokët. Mbi 20 milion procedura jo-kirurgjikale u kryen në 2024, duke shënuar një rritje prej gati 40% krahasuar me 2020, sipas Shoqatës Ndërkombëtare të Kirurgjisë Plastike Estetike, një grup industrie.

Me të vërtetë, linja midis bukurisë dhe mjekësisë është bërë gjithnjë e më e paqartë. Sarah Chapman, një specialistë fytyre për personazhe si Gigi Hadid dhe Victoria Beckham, thotë se klinika e saj në Londër është zgjeruar për të përfshirë dermatologë që shkruajnë receta dhe profesionistë të tjerë mjekësorë që testojnë gjakun dhe jashtëqitjen e klientëve për të përcaktuar shkaqet themelore të problemeve të lëkurës. Ajo thotë se klientët tashmë vijnë tek ajo për të dukur më të shëndetshëm, jo thjesht për të hequr rrudhat dhe njollat.

Fokusimi tek klientët e rinj dhe produktet shpesh është udhëhequr nga marka të reja të bukurisë. Rrjetet sociale u kanë mundësuar atyre të ndërtojnë bizneset pa shpenzuar shuma të mëdha për marketing. Charlotte Tilbury, themeluesja e një marke britanike make-up, thekson se rritja e kompanisë së saj gjatë dekadës së fundit është nxitur nga rrjetet sociale, duke i quajtur ato “vitrinën tonë më të madhe”. Të tjerë kanë ndjekur këtë model. Bubble, një markë për kujdesin e lëkurës e themeluar në 2020, ka përdorur rrjetet sociale për të fituar ndjekës të rinj adoleshentë. Në parfume, kërkesa tek të rinjtë është rritur gjithashtu nga marka të reja si Sol de Janeiro, e cila ka rilançuar parfume si “mist” (shishe me spërkatje), dhe Kayali, e cila udhëzon blerësit të “shtresëzojnë” produktet për efekt më jetëgjatë… thënë ndryshe të blejnë më shumë.

Shumë nga këto marka të reja nuk përbëjnë aq kërcënim sa një mundësi për kompanitë ekzistuese, të cilat janë të etura të blejnë marka të bujshme që i ndihmojnë të rriten. Në maj, e.l.f. Beauty, një kompani amerikane kozmetikash, bleu markën e make-up-it të Hailey Bieber, bashkëshortes së Justin, për deri në 1 miliard dollarë. Estée Lauder ka blerë The Ordinary, dhe në qershor, L’Oréal, kompania më e madhe e bukurisë në botë, bleu një pjesë të madhe të aksioneve të Medik8, një markë rivale “e bazuar në shkencë”. Vitin e kaluar, gjiganti francez gjithashtu rriti në 20% aksionet e tij në Galderma, një prodhues zviceran i injeksioneve estetike dhe produkteve të tjera dermatologjike, dhe tha se do të blinte degën e bukurisë të Kering, një konglomerat luksoz. P&G dhe Unilever, dy konglomerate të produkteve për konsumatorë me degë të mëdha bukurie, gjithashtu kanë qenë aktive në blerje të reja.

Shkalla e madhe i jep firmave më të mëdha të industrisë fuqinë ndaj tregtarëve dhe burimet financiare për fushata të mëdha marketingu. Duke qenë nën presion në Kinë nga marka vendase si Proya dhe Mao Geping, kompanitë perëndimore kanë investuar për të konsoliduar pozitat e tyre në tregjet amerikane dhe europiane. Ato shpresojnë që “Instagram Face”- fytyra pa pore, e mbushur dhe përsosmërisht perfekte, të mos dalë shpejt nga moda.

Marrë nga The Economist, përgatiti Gazetasi.al

The post Pse industria e bukurisë po lulëzon appeared first on Gazeta Si.

Nga Gazeta ‘SI’ – Konsumatorët në Shqipëri vijojnë të jenë të pambrojtur, ndërkohë që shteti humb miliona lekë në vit nga informaliteti në tregtinë elektronike. Sipas gjetjeve të Kontrollit të Lartë të Shtetit (KLSH), rreth 90% e blerjeve online në vend paguhen me para në dorë, duke krijuar një kanal të gjerë për evazion fiskal.

Porositë online shpesh u dorëzohen klientëve pa asnjë faturë tatimore, pasi shumë prej këtyre “bizneseve online” nuk janë të regjistruara në asnjë institucion shtetëror dhe operojnë plotësisht “në të zezë”.

KLSH konstaton se Drejtoria e Përgjithshme e Tatimeve nuk disponon një mekanizëm efikas për monitorimin e faqeve të shitjes online, duke u mjaftuar vetëm me kontrolle sporadike, të cilat nuk prekin thelbin e problemit.

Të dhënat e mbledhura nga KLSH tregojnë se gjatë vitit 2024, nga rreth 382 miliardë lekë të ardhura të mbledhura nga Tatimet, vetëm 323 milionë lekë janë deklaruar nga bizneset online – ose vetëm 0.08% e totalit.

Një tjetër problem serioz që i lë qytetarët tërësisht të brishtë përballë mashtrimeve është mungesa e kontrolleve dhe e kompetencave të Inspektoriatit të Mbikëqyrjes së Tregut, i cili nuk ka tagër të mbyllë faqet online që operojnë pa NIPT.

Këto faqe, të regjistruara kryesisht me domenin “.al”, administrohen nga AKEP, por sipas KLSH-së mungon koordinimi ndërinstitucional mes AKEP-it, Tatimeve dhe institucioneve të tjera përgjegjëse.

Raporti trajton gjithashtu blerjet në platforma ndërkombëtare si Shein, Temu apo AliExpress, ku theksohet se blerësit, por edhe vetë kompanitë, i ndajnë porositë në disa dërgesa për të mos kaluar pragun prej 22 eurosh dhe për të shmangur taksat doganore. Ky fenomen është i vështirë të verifikohet në çdo moment për shkak të volumit të lartë të punës në administratën doganore.

Sipas raportit, Doganat nuk janë të përgatitura për fluksin në rritje të porosive online, ndërkohë që numri i stafit ka mbetur i pandryshuar. Dogana e aeroportit të Rinasit, e vetmja që trajton postën e shpejtë, nuk disponon asnjë skaner për verifikimin e produkteve apo për goditjen e kontrabandës.

Në përfundim, KLSH rekomandon ngritjen e një Task-Force për tregtinë elektronike, ku institucionet të bashkëpunojnë dhe të shkëmbejnë informacion në mënyrë të vazhdueshme: Tatimet të informohen mbi aktivitetin e Postës, Posta të ndjekë të dhënat e Doganave dhe anasjelltas.

Po ashtu, kërkohet që Drejtoria e Përgjithshme e Tatimeve, në bashkëpunim me Ministrinë e Financave, të hartojë dhe zbatojë një profil të dedikuar risku për tatimpaguesit që operojnë në tregtinë elektronike, duke e integruar atë në sistemin e analizës së riskut, me qëllim përzgjedhjen sistematike për kontroll të subjekteve që ushtrojnë aktivitet tregtar online.

The post 90% e blerjeve online në Shqipëri, pa faturë. Shteti humb miliona nga informaliteti appeared first on Gazeta Si.

Nga Gazeta ‘SI’ – Në muajt e fundit të vitit 2025, shqiptarët e patën më të vështirë për të marrë kredi, për shkak të kushteve më të shtrënguara nga bankat tregtare, të paktën në segmentin e asaj për banesa.

Kjo, sipas vrojtimit të Bankës së Shqipërisë, për tremujorin e katërt 2025, ndodhi si pasojë e perceptimit të rrezikut në rritja nga bankat mbi tregun imobiliar. Po ashtu, bankat raportuan se kufizimet uniforme të vendosura nga Banka e Shqipërisë në korrik 2025, mbi raportin e kredisë ndaj vlerës së pasurisë (LTV) dhe raportin e shërbimit të borxhit ndaj të ardhurave (DSTI) për kreditë e reja për pasuri të paluajtshme, vepruan në kahun shtrëngues të standardeve të kreditimit.

Shtrëngimi i kushteve të kredisë u pasqyrua si kërkesë më e lartë për kolateral në raport me shumën e huasë.

Por, për të njëjtën periudhë, tetor-dhjetor 2025, edhe nga ana e qytetarëve pati një rënie të kërkesës për kredi, si për banesa dhe për konsum. Sipas bankave, kjo tregon një lloj hezitimi mbi zhvillimet e mundshme në tregun e pasurive të patundshme.

Shkalla e miratimit të kredive për individët u raportua më e lartë në tremujorin e fundit. Kjo rritje u ndikua kryesisht nga cilësia e portofolit ekzistues të kredive dhe historiku i marrëdhënieve të kredimarrësve me bankat.

Në tremujorin e parë të vitit 2026, bankat presin që kërkesa për kredi të rritet, si për kreditë për blerjen e banesave, ashtu edhe për kreditë konsumatore.

The post Ngec kredia për banesa: Bankat në vend perceptojnë rrezik në tregun imobiliar appeared first on Gazeta Si.

Ideja se bankat qendrore duhet të kenë një pavarësi të caktuar është po aq e vjetër sa edhe vetë banka qendrore. “Dua që banka të jetë mjaftueshëm në duart e qeverisë, por jo shumë,” mendoi Napoleon Bonaparte në vitin 1806 për Bankën e Francës, e krijuar atëherë.

Provoni t’ia thoni këtë Presidentit Donald Trump. Ai ka kaluar vitin e kaluar duke shtyrë Rezervën Federale (banka qendrore e SHBA) që të ulë normat e interesit më shpejt. Fushata u intensifikua më 11 janar, kur Jerome Powell, kreu i Fed, tha se Departamenti i Drejtësisë kishte dorëzuar thirrje ligjore bankës qendrore.Powell tha se tani rrezikohet me një aktpadi penale lidhur me një konflikt të gjatë mbi koston e riparimit të selisë së bankës qendrore.

Veprimet e administratës Trump janë sulmi më i dukshëm ndaj pavarësisë së bankave qendrore në dekada, pjesërisht sepse Fed është banka qendrore më e rëndësishme. Por jo vetëm në Amerikë politikanët po ndërhyjnë në politikën monetare. Në mbarë botën, një marrëveshje dekadash e cila, në përgjithësi, ka sjellë inflacion më të ulët dhe stabilitet më të madh ekonomik, nuk mund të merret më si e garantuar.

Versioni modern i pavarësisë së bankave qendrore u shfaq pas Luftës së Dytë Botërore. “Marrëveshja Thesari-Fed” e vitit 1951 liroi bankën qendrore të Amerikës nga detyrimi për të mbajtur të ulur kostot e huamarrjes së qeverisë, siç kishte bërë gjatë luftës. Në Gjermani, Bundesbank-u mori lirinë për të mbajtur inflacionin nën kontroll dhe për të shmangur përsëritjen e devalvimit të monedhës Weimar në vitet 1920. Suksesi i saj relativ gjatë viteve 1970 e bëri atë model për pjesën tjetër të kontinentit.

Lëvizja fitoi terren në vitet 1980, ndërsa hulumtimet teorike dhe empirike forcuan argumentin për pavarësinë. Politikanët, thuhet, tundohen nga politika monetare vetëshkatërruese në kërkim të punësimit të lartë, për të zvogëluar borxhet dhe për të fituar zgjedhje. Objektivat si punësimi i plotë dhe kostoja e ulët e huamarrjes, të cilat i bëjnë të gjithë më mirë, janë më të lehta për t’u arritur nëse politika i delegohet një bankieri konservator qendror, ndoshta edhe një “të çmendur obsesiv pas inflacionit”.

Rezultati ka qenë një triumf i ekonomisë së aplikuar. Ndërsa pavarësia rritej, inflacioni binte. Ekonomistët festuan një “moderim të madh”, ku recesionet bëheshin më të rralla. Recesioni i madh pas krizës financiare globale të viteve 2007-09 ishte i vështirë për t’u fajësuar tek politika monetare. Ai i shkurtër gjatë pandemisë nuk kishte lidhje me të. Ndalimi i bankave qendrore të pavarura nga vendet e pasura ka transformuar tregjet në zhvillim. Në vitet 1990, diferenca mes inflacionit vjetor në ekonomitë e varfra dhe të pasura ishte 6.2 pikë përqindjeje. Në vitet 2020, ajo është 1.4 pikë.

Ky triumf tani është në rrezik. Shumë qeveri të botës së pasur janë bërë kaq të varura nga borxhet dhe kaq të mësuara me deficitin, sa efekti i politikës monetare mbi buxhetet e tyre është bërë i madh. Nëse ato tërheqin pavarësinë e bankës qendrore, ajo do të ketë vështirësi për të mbijetuar në tregjet në zhvillim, ku nuk ka rrënjë të thella.

Trump nuk është i vetmi populist në pushtet me pikëpamje të forta mbi politikën monetare. Takaichi Sanae, kryeministre e Japonisë që nga tetori, më parë kishte kritikuar rritjet e normave të interesit si “budallallëk”. Tregjet e obligacioneve u lëkundën ndjeshëm pas emërimit të saj. Megjithëse Banka e Japonisë ka pavarësi formale, ajo që qeveria mendon për politikën monetare ka rëndësi. Në vitet 2010, përpjekja e Abe Shinzo, kryeministër atëherë, për të ndalur deflacionin e ngulitur përfshinte një marrëveshje me bankën, që zgjeronte ndjeshëm stimulimin monetar jo-konvencional.

Kjo rezultoi të ishte politika e duhur në një kohë të çmimeve në rënie. Sot, Japonia përballet me problemin e kundërt. Në dhjetor, shqetësimet për inflacionin çuan bankën qendrore të rrisë normat në nivelin më të lartë në 30 vjet. Megjithëse retorika e zonjës Takaichi është zbutur në detyrë, politika fiskale dhe monetare tani janë në kundërshtim. Borxhi neto i Japonisë është 130% e GDP-së, kështu që rritje të tjera të normave të interesit do të shtrydhin shpejt buxhetin e qeverisë, duke kërkuar shtrëngim fiskal, jo lehtësim.

Në vende të tjera, populistët monetarë nuk janë në pushtet, por presin në pritje. Në Britani, të dy grupet populiste, e djathta Reform UK që kryeson sondazhet dhe e majta Greens, kundërshtojnë faturën e lartë të interesit të qeverisë. Sepse Banka e Anglisë bleu shumë obligacione gjatë krizës financiare, një pjesë e madhe e kësaj fature tani kalon përmes bilancit të saj. Blerjet e obligacioneve u paguan me krijimin e parave të reja, në efekt, depozita të reja tek banka qendrore. Interesi i paguar mbi këto “rezerva” është rritur ndjeshëm.

Shfuqizimi i interesit mbi rezervat, do të ishte në efekt një taksë mbi huadhënësit, duke i privuar ata nga të ardhurat, ndërsa ata mbeten përgjegjës për interesin mbi depozitat. Kjo do të kthente bankën qendrore në një makinë parash për qeverinë, e cila mund të kërkonte më shumë blerje obligacionesh për të ulur kostot e përgjithshme të interesit. Kjo mund të mos ishte problem nëse “Old Lady” (Banka e Anglisë) do të ruante pavarësinë e saj. Megjithatë, të djathtët thoNë se “gjithçka duhet të jetë për debat” kur vjen puna tek banka qendrore, përfshirë mbikëqyrjen qeveritare të vendimeve për normat e interesit.

Zona e euros përballet me një kërcënim të ngjashëm. Pavarësia e Bankës Qendrore Europiane (BQE) është e garantuar me traktat, duke e bërë atë më të izoluar nga politika se çdo bankë qendrore tjetër e madhe. Edhe pse borxhet e përgjithshme të zonës së euros, 88% e GDP-së, janë më shumë ose më pak të menaxhueshme, parashikohet të rriten ndërsa qeveritë shpenzojnë për mbrojtje dhe për shoqëri të shpejtë që plaken, duke u përballur me populistët që kundërshtojnë çdo prerje buxheti.

Kjo rrit rrezikun e një krize tjetër borxhi ku BQE duhet të mbështesë qeveritë më të ngarkuara me borxhe. Banka qendrore ka luajtur tashmë këtë rol në vitet 2010 dhe përsëri gjatë pandemisë. Në vitet 2010, ajo ecën mbi një vijë të hollë, duke garantuar se do të bënte “çfarëdo që të nevojitej” për të ruajtur euron, ndërsa ruante mjaftueshëm ndikim për të detyruar qeveritë të rregullojnë buxhetet e tyre. Inflacioni i ulët në fillim të pandemisë i lejoi ECB-së të justifikonte ndërhyrjet në tregun e obligacioneve si stimuj ekonomikë të domosdoshëm; rastësisht, kjo favorizoi vendet më të varura nga borxhi.

 
Në botën e sotme me inflacion, mbështetja e vendeve të ngarkuara me borxhe është më e vështirë për t’u justifikuar. Kjo mund të rrisë ndikimin e bankës qendrore mbi shtetet e pakujdesshme, sidomos sepse nacionalistët në Evropën veriore do të donin më pak shtypje parash, jo më shumë. Nga ana tjetër, vendi më problematik tani është Franca, me borxhe mbi 115% të GDP-së dhe një deficit vjetor prej 5% të GDP-së. Madhësia e madhe e ekonomisë franceze, si ajo e Italisë, një tjetër borxhli i madh, do ta bënte atë një kundërshtar të fuqishëm në lojën e “chicken”. “Nuk do të mund të shmangim një diskutim me BQE për borxhin francez,” i tha The Economist vitin e kaluar Jordan Bardella, një favorit presidencial nga ekstremi i djathtë National Rally. Minimalisht, banka do të ishte kapur në mes të një tjetër përplasjeje politike.

Në vendet në zhvillim, rasti kryesor i fundit i regresit ka qenë Indonezia. Qeveria e saj nuk është në borxhe, por po grabit bilancin e bankës qendrore gjithsesi. Në shtator, Banka e Indonezisë njoftoi se kishte rënë dakord të “ndante barrën” e financimit të projekteve të preferuara të qeverisë, duke rritur interesin që paguan mbi depozitat e ministrisë së financave. Banka ka blerë gjithashtu obligacione qeveritare nga e para dhe zotëron rreth një të katërtën e stokut në rupi Në vendet e pa-reformuara si Ghana, Turqia dhe Nigeria, bankierët qendrorë kanë përballuar ndjekje penale ose probleme të tjera ligjore në vitet e fundit.

Fakti që edhe Powell ndodhet në një situatë të ngjashme tregon se si është përkeqësuar situata në SHBA. Edhe një kundërpërpjekje e suksesshme, e cila filloi me videon e guximshme të kryetarit të Fed që denonconte hetimin mbi riparimet, mund të sjellë vetëm një lehtësim të përkohshëm. Trump do të emërojë së shpejti një zëvendësues për Powell, i cili përfundon mandatin në maj. Një nga favoritët është Kevin Hassett. Ai ka aftësi serioze ekonomike, por është anëtar i ekipit të Trump. Edhe nëse presidenti zgjedh një teknokrat të vërtetë, perspektiva e ndëshkimeve personale si ato ndaj Powell duhet të trondisë politikanët monetarë. Po ashtu një vendim i Gjykatës Supreme për të lejuar presidentin të shkarkojë Lisa Cook, një guvernatore të Fed të akuzuar për parregullsi në dokumente të mëparshme të kredive hipotekore (të cilat ajo i mohon), do të ishte po aq shqetësues. Gjyqtarët do tëdëgjojnë argumentet në këtë rast më 21 janar.

Ndoshta të gjithë këta do të trembin tregjet e obligacioneve. Megjithatë, yield-i i thesarit amerikan me afat 10-vjeçar është më shumë ose më pak i njëjtë me atë që ishte para se Powell të fliste. Kjo mund të reflektojë guximin e tij të ri dhe miqtë e tij më të zëshëm. Disa senatorë republikanë kanë thënë se do të bllokojnë emërimet e Trump në Fed deri sa çështja ndaj Powell të zgjidhet. Trump mohoi nxitjen e hetimit.

Një shpjegim tjetër për qetësinë e tregjeve është politika e dhimbshme e inflacionit. Një argument kundër nevojës për banka qendrore të pavarura është se inflacioni zemëron votuesit si pak gjëra të tjera. Jimmy Carter e pagoi çmimin në 1980, ashtu si Kamala Harris në 2024.

“Kriza e përballueshmërisë” mbetet një makth i përhershëm për qeveritë. Një gjë që po ndalon zonjën Takaichi të ndërhyjë më shumë duket se është se politika monetare më e lirë do të dobësonte jenin, gjë e papëlqyeshme nga publiku i lodhur nga importet e shtrenjta. Ndoshta. Por mbështetja tek vetëpërmbajtja e politikanëve është një bast i madh. Të qëndrosh tek bankat qendrore të pavarura, të cilat kanë treguar herë pas here se janë kompetente, është padyshim basti më i sigurt./TheEconomist

The post Politika po tenton të kontrollojë Bankat Qendrore kudo në botë… appeared first on Gazeta Si.

Kërcënimet e Donald Trump ndaj Europës për kontrollin e Groenlandës kanë zhytur bursat.

Të martën e 20 janarit, aksionet e S&P 500 ranë 112 pikë, ose 1.61%, Nasdaq 100  humbi 505.25 pikë, ose 1.97%, dhe Dow Jones ra 728 pikë, ose 1.47%. Aksionet europiane matur nga Stoxx Europe 600 ranë me 1.4%.

Dollari u dobësua përballë valutave kryesore dhe euro u rrit me 0.7%, jeni japonez me 0.2% dhe paundi britanik me 0.4%.

Tronditjen e ndjenë edhe monedhat virtuale, me Bitcoin që ra me 2.1% në vlerën e 90.99 mijë dollarëve dhe Ether me 3.6% në 3 mijë dollarë.

Nga ana tjetër, asetet e sigurta si Ari u rritën fort, 1.3%, duke prekur çmimin e 4.732 dollarë për onz dhe nafta Brent u rrit me 0.2% në 64 dollarë për fuçi.

Trump njoftoi të shtunën se tarifat shtesë 10% mbi importet do të hynin në fuqi më 1 shkurt për mallrat nga Danimarka, Norvegjia, Suedia, Franca, Gjermania, Holanda, Finlanda dhe Britania e Madhe, të gjitha vendet që tashmë janë subjekt i tarifave të vendosura nga SHBA-ja.

Tarifat do të rriteshin në 25% më 1 qershor dhe do të vazhdonin deri në arritjen e një marrëveshjeje për blerjen e Grenlandës nga SHBA-ja, shkroi Trump në një postim në Truth Social. Liderët e Grenlandës, një territor autonom i Danimarkës, dhe Danimarka kanë insistuar se ishulli nuk është për shitje.

The post Kërcënimet e Donald Trump fundosin bursat dhe rrisin çmimin e arit appeared first on Gazeta Si.