Në disa akse rrugore të vendit ka pasur rënie gurësh, inerte dhe prezencë të ujit, për shkak të reshjeve të shiu gjatë natës.

Përmes një njoftimi, Autoriteti Rrugor Shqiptar (ARRSH), thotë se ka problematika në disa akse rrugore.

Në Qafë Dushk-Sevaster (km 10-11): qarkullimi po kryhet me një korsi për shkak të ngushtimit të rrugës, në Valare-Erind-Çajup (km 7+600) ka rrëshqitje aktive dhe aksi është  i bllokuar.

ARRSH njofton se në aksin Korçë-Dardhë (km 9+00), ka pasur shkarje anësore e trupit të rrugës, ndërsa në aksin Përmet-Tre Urat (Ura e Petranit), pati shkarje masive aktive dhe zgjerim të çarjes rreth 10 cm.

Ndërkaq, rrëshqitje dherash ka pasur edhe në Librazhd-Qafë Thanë, ku pastrimi në proces. Në aksin Dushaj-Lekbibaj, ka rënë masivi shkëmbor në orët e para të mëngjesit dhe qarkullimi vijon me kujdes.

Sipas ARRSH, është duke u punuar për të bërë të mundur pastrimin e rrugëve.

Gjithashtu, ARRSH apelon drejtuesit e mjeteve që të bëjnë kujdes të shtuar.

Njoftimi i ARRSH

Situata e akseve rrugore

Gjatë natës kanë vazhduar reshjet e shiut në të gjithë territorin e vendit, duke sjellë rënie gurësh, inertesh dhe prezencë uji në trup të rrugës.

Reshje dëbore ka pasur në zonën veriore, në lartësi mbi 1100 m, konkretisht në akset: Bogë-Theth, Hani i Hotit-Vermosh, Surel-Qafë Priskë-Qafë Mollë, Elbasan-Gjinar, Ibë-Krrabë-Elbasan, Qafë Mali-Fierzë?

Akset që kanë pasur probleme:

Qafë Dushk-Sevaster (km 10-11): qarkullimi me një korsi për shkak të ngushtimit të rrugës.

Valare-Erind-Çajup (km 7+600): rrëshqitje aktive, aksi i bllokuar në këtë vend po punohet për hapjen.

Korçë-Dardhë (km 9+00): shkarje anësore e trupit të rrugës, situata po monitorohet.

Përmet-Tre Urat (Ura e Petranit): shkarje masive aktive, zgjerim i çarjes rreth 10 cm.

Librazhd-Qafë Thanë: rrëshqitje dherash, pastrimi në proces.

Skuraj-Peshkopi: rënie gurësh dhe inertesh, pastrim nga grupet e punës.

Dushaj-Lekbibaj: rënie masivi shkëmbor në orët e para të mëngjesit, qarkullimi vijon me kujdes.

Shkalla e Zezë (Gjirokastër): rrugë njëkalimshme, kërkohet vëmendje e shtuar.

Llogara: ka mjegull të denudur.

Kontraktorët me mjete dhe punëtorë janë në terren pa ndërprerje për të bërë pastrimin e akseve rrugore.

Drejtuesit e mjeteve të kenë kujdes të shtuar gjatë drejtimit të mjetit, të reduktojnë shpejtësinë për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore.

Qeveria e Venezuelës ka nisur lirimin e të burgosurve politikë, në një hap që zyrtarët e përshkruan si një “gjest dashamirës”.

Ministria e Jashtme e Spanjës njoftoi se pesë shtetas të saj janë liruar. Mes tyre është aktivistja e njohur për të drejtat e njeriut me origjinë venezuelase-spanjolle, Rocío San Miguel, konfirmoi familja e saj për mediat amerikane.

Ky hap vjen pas marrjes nën pranga të presidentit venezuelas, Nicolás Maduro, nga autoritetet amerikane në një operacion në kryeqytetin Caracas të shtunën, ku ai akuzohet për trafik droge në New York.

Presidenti amerikan Donald Trump shkroi në rrjetin social Truth Social se lirimi i të burgosurve politikë, që është një kërkesë e gjatë e SHBA-ve, ishte “një gjest shumë i rëndësishëm dhe i mençur” nga Venezuela. Ai shtoi se lirimi i tyre ishte një shenjë e “kërkimit të paqes” dhe për këtë arsye kishte anuluar një “valë të dytë sulmesh” që pritej kundër vendit.

Jorge Rodríguez, kreu i Asamblesë Kombëtare të Venezuelës dhe vëllai i presidentes së përkohshme Delcy Rodríguez, njoftoi në televizionin shtetëror se “një numër i konsiderueshëm” do të lirohet menjëherë, pa specifikuar saktësisht numrin ose identitetin e të burgosurve.

Qindra të burgosur politikë ndodhen në burgjet venezuelase, ndërsa deri më tani besohet se janë liruar vetëm disa prej tyre. Jorge Rodríguez tha se qeveria e përkohshme po i lironte ata në interes të “unitetit kombëtar dhe bashkëjetesës paqësore”. Rocío San Miguel, kritike e zëshme e Maduron dhe eksperte për mbrojtjen e të drejtave, ishte e para e konfirmuar si e liruar. Familja e saj i tha New York Times se ajo ishte dërguar në ambasadën spanjolle në Caracas.

Ajo u arrestua në vitin 2024 dhe akuzohej për përfshirje në një komplot për vrasjen e presidentit të atëhershëm, duke u përballur me akuza për tradhti, komplot dhe terrorizëm. Arrestimi i saj tronditi aktivistët e të drejtave të njeriut dhe, për shkak se vendndodhja e saj ishte e panjohur, u konsiderua nga Zyra e Kombeve të Bashkuara për të Drejtat e Njeriut si një “zhdukje e mundshme e detyruar”.

Organizatave venezuelase për të drejtat e njeriut, disa prej të cilave kanë anëtarë ose themelues në burg, e mirëpritën lajmin me kujdes.

Edhe pse një nga bashkëpunëtorët kryesorë të Maduron, administrata e përkohshme e Delcy Rodríguez ka treguar gatishmëri për të bashkëpunuar me SHBA që nga marrja nën pranga e liderit të tyre dhe deklarimet e mëdha për të ardhmen e Venezuelës. Rreth 50 deri në 80 të burgosur besohet të mbahen në burgun e famshëm El Helicoide, që sipas Presidentit Trump do të mbyllet pas arrestimit të Maduron.

Ky burg është bërë ndërkombëtarisht i njohur për mbajtjen e kundërshtarëve politikë, me raporte nga grupet e të drejtave të njeriut për tortura, duke përfshirë rrahje dhe elektrokutim.

Njoftimi vjen pak ditë pasi Presidenti Trump tha se kishte “dhënë urdhër për mbylljen e atij burgu”, i cili ishte bërë një nga simbolet më të njohura të shtypjes politike në vend.

Grupi venezuelas për të drejtat e njeriut Provea paralajmëroi se mbyllja e pritur e El Helicoide nuk duhet të shpërqendrojë vëmendjen nga vendet e tjera të mbajtjes që vazhdojnë të funksionojnë në vend.

Kryetarja e opozitës dhe fituese e Çmimit Nobel për Paqe, Maria Corina Machado, e cila ka disa aleatë të ngushtë në burg, ka kërkuar me insistim lirimin e tyre.

Në një intervistë për Fox News, Trump tha se Machado pritej të vinte në SHBA “javën e ardhshme”. Machado i kishte thënë më herët mikpritësit Sean Hannity se dëshironte t’i dorëzonte presidentit amerikan Çmimin e saj Nobel për Paqe. Pyetur nëse Trump do ta pranonte këtë, ai u përgjigj se “do të ishte një nder i madh”.

Opozita dhe grupet e të drejtave të njeriut në Venezuelë kanë thënë prej vitesh se qeveria përdorte arrestimet për të shtypur disidentët dhe për të heshtur kritikët.

Që nga zgjedhjet e diskutueshme të vitit 2024, opozita ka pohuar se procedurat ligjore ndaj aktivistëve, gazetarëve dhe kundërshtarëve politikë janë shtuar.

Prokurori i Përgjithshëm Tarek Saab dhe zyrtarë të tjerë të qeverisë vazhdimisht kanë mohuar që Venezuela mban të burgosur politikë, duke argumentuar se të arrestuarit janë ndaluar për krime të vërteta.

Personeli diplomatik dhe i sigurisë nga njësia për Çështjet e Venezuelës në Departamentin e Shtetit të SHBA-së, kanë udhëtuar sot për në kryeqytetin e vendit.

Mediat e huaja bëjnë të ditur se sipas një zëdhënësi të Departamentit, ata janë në Karakas për të vlerësuar rifillimin e mundshëm të operacioneve të Ambasadës.

SHBA-të urdhëruan stafin e ambasadës së tyre të largoheshin nga Venezuela në vitin 2019.

Kujtojmë se disa ditë më parë, ushtria e Shteteve të Bashkuara të Amerikës kreu një operacion ushtarak në Venezuelë, i cili u finalizua me kapjen e Presidentit ne detyrë, Nicolas Maduro.

Partia Demokratike do të mbledhë nesër Kryesinë në ora 13:00.

Kjo mbledhje do të fokusohet në aksionin opozitar dhe sesi do të vazhdojë ai, si dhe në lidhje me zhvillimet e fundit politike në vend.

PD njofton se edhe gjatë mbledhjes së nesërme, diskutimi në lidhje me aksionin opozitar do të ‘rrotullohet’ drejt synimit të krijimit të një qeverie teknike.

Gjatë ditës së sotme opozita mbajti një tryezë me aktorë të opozitës dhe përfaqësues të shoqërisë civile, ku u diskutua në lidhje me hapat e ardhshëm të aksionit opozitar.

U mbajt këtë mbrëmje protesta e tretë radhazi para Bashkisë së Durrësit, ku u mblodhën dhjetëra qytetarë që akuzojnë pushtetin vendor dhe kryebashkiaken Emirjana Sako për mosmarrjen e masave të nevojshme me qëllim shmangien e përmbytjes së qytetit, problem që ndodh sa herë ka reshje shiu të dendura dhe periodike.

Protestuesit kërkojnë vlerësimin e saktë dhe të plotë të dëmeve që u janë shkaktuar nga përmbytjet dhe menjëherë pas këtij procesi, shpërndarjen e dëmshpërblimit të merituar. Shumë prej tyre pretenduan se nuk kanë marrë ende dëshmpërblimet e humbjeve të shkaktuara nga moti i keq vitin e kaluar, por edhe më parë.

Ndryshe nga tubimi i djeshëm, protestuesit nuk tentuan të hyjnë me forcë në godinën e Bashkisë, duke deklaruar se kjo protestë është paqësore, por vetëm pak minuta më pas filluan të hedhin domate dhe shpërthejnë kapsolla drejt Bashkisë. Për shpërthimin e lëndëve pirotenike Forcat Shqiponja shoqëruan një person, në ndihmë të të cilit, përfaqësues të PD-së u nisën drejt rajonit të policisë.

Në Durrës është regjistruar gjithashtu dhe viktima e parë nga përmbytjet. Kryesisht problematikat më të mëdha janë regjistruar në zonën e Kënetës, Katund i Ri dhe Sukth si pasojë e daljes së rumin Erzen nga shtrati ku janë përmbytur dhjetëra hektarë tokë dhe shtëpi.

Më shumë se 50 protestues janë vrarë në Iran që nga fillimi i protestave antiqeveritare më 28 dhjetor, tha një organizatë joqeveritare.

“Të paktën 51 protestues, përfshirë nëntë fëmijë nën moshën 18 vjeç, u vranë dhe qindra të tjerë u plagosën gjatë 13 ditëve të para të protestave në të gjithë Iranin”, tha organizata Iran Human Rights me seli në Norvegji .
Një numërim i mëparshëm e kishte çuar numrin e të vdekurve në 45.

Ndërprerja e internetit zgjat më shumë se 24 orë

Ndërkohë, “mbyllja e internetit në të gjithë vendin” e imponuar nga autoritetet iraniane në përgjigje të protestave në Iran ka hyrë në orën e 24-të, tha sot grupi i monitorimit të sigurisë kibernetike Netblocks.

“Kanë kaluar 24 orë që kur Irani vendosi një mbyllje të internetit në të gjithë vendin, me lidhjen e internetit të rënë në 1% të nivelit të saj të zakonshëm”, shkroi organizata joqeveritare në rrjetet sociale X.

Djali i ish-Shahut i bën thirrje ‘urgjente’ Trumpit që të ndërhyjë

Ndërkohë, djali i ish-shahut të Iranit dhe figurës së opozitës në mërgim i bëri thirrje sot Donald Trump të ndërhyjë pa vonesë në Republikën Islamike, ku po rritet një lëvizje për të sfiduar qeverinë.
“Z. President, ky është një apel urgjent dhe i menjëhershëm në të cilin kërkoj vëmendjen, mbështetjen dhe veprimin tuaj”, shkroi Reza Pahlavi në rrjetet sociale.

“Jini të gatshëm të ndërhyni për të ndihmuar popullin iranian”.

Reza Pahlavi, i cili jeton pranë Uashingtonit, nuk specifikoi se çfarë lloj ndërhyrjeje pret nga presidenti i SHBA-së, por e justifikoi kërkesën e tij me vendimin e autoriteteve iraniane për të ndërprerë aksesin në internet në vend dhe shtypjen e protestuesve. “I bëra thirrje popullit të dalë në rrugë për të luftuar për lirinë e tyre dhe për të mbingarkuar forcat e sigurisë me numrin e tyre. Kjo është ajo që bënë mbrëmë”, tha ai.
“Kërcënimet tuaja ndaj këtij regjimi kriminal i kanë mbajtur larg edhe elementët e këqij të regjimit. Por koha po mbaron. Populli do të kthehet në rrugë brenda një ore. Kërkoj ndihmën tuaj”, shtoi ai, duke iu drejtuar Donald Trump.

Presidenti amerikan kërcënoi dje se do ta “godasë Iranin shumë rëndë” nëse autoritetet do të reagonin duke vrarë protestuesit.

Pas dy javësh të një lëvizjeje fillimisht të lidhur me koston e jetesës, vala e pakënaqësisë po fiton terren dhe po paraqet një sfidë serioze për Republikën Islamike, e cila ka qenë në pushtet që nga viti 1979.

Nuk ka asgjë që mund ta ndalojë Donald Trump, e madje as ligji ndërkombëtar.

I pyetur në një intervistë për Nju Jork Times, nëse ka ndonjë kufizim në fuqitë e tij globale, Trump e bëri të qartë se ai vepron si dëshiron.

“Morali im, mendja ime është e vetmja gjë që mund të më ndalojë. Nuk kam nevojë për ligjin ndërkombëtar”, tha Trump.

Kur u pyet më tej nëse administrata e tij duhej t’i përmbahej ligjit ndërkombëtar, Trump tha po, por e bëri të qartë se ai vetë është arbitri kur kufizime të tilla zbatohen për shtetet e bashkuara.

Kreu I shtëpisë së bardhë nuk hoqi dorë as nga ambicia e tij për të marrë Groenlandën.

Ai madje pranoi se kjo situatë mund të çojë në një moment në një zgjedhje, mes NATO-s ose ishullit në kontroll të Danimarkës.

Trump përsëriti se Groenlanda është shumë e rendësishme për Shtetet e Bashkuara dhe pronësia e saj është psikologjikisht e nevojshme për sukses.

Qeveritë e Danimarkës dhe të Groenlandës i hedhin poshtë propozimet e Trump për të blerë ose pushtuar ishullin.

Kryeministrja daneze Frederiksen tha javë se një përpjekje ushtarake për të pushtuar Groenlandën do të shënonte fundin e NATO.

Vende europiane si Franca, Gjerania, Spanja, Italia apo Mbretëria e Bashkuar e kanë bërë të qartë se Groenlanda I përket vetëm popullit të saj. Kryeministrja italiane Georgia Meloni theksoi se Trump nuk do te ndërhyjë usharakisht në ishull, por nëse e bën, ajo nuk do e mbështesë.

Erëra të forta goditën Francën dhe Britaninë të premten, ndërsa stuhia Goretti përfshiu Evropën Veriore, duke lënë qindra mijëra familje pa energji elektrike.

Në Francë, rreth 380 mijë familje mbetën pa energji, kryesisht në rajonin e Normandisë dhe në Bretanjë, njoftoi kompania e shpërndarjes së energjisë Enedis.

Gjatë natës, në rajonin Manche në veriperëndim të Francës u regjistruan shkulme ere mbi 150 km/orë, ndërsa në Barfleur u shënua një rekord prej 213 km/orë. Si pasojë, operatori hekurudhor SNCF pezulloi qarkullimin e trenave mes Parisit dhe rajonit të Normandisë.

Në Britani, sipas National Grid, rreth 57 mijë shtëpi mbetën pa energji elektrike, pasi stuhia Goretti solli reshje të tjera dëbore pas një jave me temperatura ngrirëse.

Qindra shkolla pritet të mbyllen në të gjithë Skocinë dhe në disa zona të Anglisë qendrore, e cila është goditur veçanërisht rëndë nga Goretti

Forcat e Armatosura vijojnë angazhimin në terren për menaxhimin e situatës së shkaktuar nga reshjet intensive të shiut që kanë përfshirë vendin. Në një njoftim të shpërndarë për mediat bëhet e ditur se efektivët e Komandës Mbështetëse dhe Regjimentit të Këmbësorisë së Jugut të Forcës Tokësore, janë të dislokuar në zonat e prekura nga përmbytjet, me fokus mbrojtjen e jetës së qytetarëve.

Aktualisht, mbi 155 efektivë, 37 mjete dhe 7 motopompa janë angazhuar në qarqet Vlorë, Fier, Durrës dhe Gjirokastër, si dhe në çdo zonë ku ka qenë e nevojshme ndërhyrja, me qëllim garantimin e sigurisë së banorëve dhe menaxhimin e situatave emergjente.

Në Vlorë, janë angazhuar 37 efektivë, 4 mjete dhe 3 gomone dhe një ambulancë me 2 efektivë mjekësorë.

Në Durrës janë angazhuar 61 efektivë, 17 mjete, 5 gomone, 7 agregate motopompe, nga të cilat 4 janë me fuqi të lartë thithëse, 1 me fuqi të mesme dhe 2 me fuqi të vogël.

Në Gjirokastër janë angazhuar 27 efektivë me 4 mjete. Në zonën e urës së Mifolit në fshatin Ferras, në Fier po punojnë 23 forca, 34 mjete dhe 1 motovarkë.

Sakaq, në Kurbin u zhvillua një operacion xhenierik për të pastruar rrugët me 3 efektivë dhe 2 mjete.

Forcat e Armatosura, nën koordinimin e Agjencisë Kombëtare të Mbrojtjes Civile, vijojnë punën në terren për garantimin e sigurisë së banorëve dhe mbajtjen e situatës nën kontroll.

Presidenti kolumbian, Gustavo Petro thotë se ekziston një kërcënim real ushtarak i SHBA-ve kundër Kolumbisë.

Petro deklaroi se Shtetet e Bashkuara po i trajtojnë kombet e tjera si pjesë të një “perandorie” amerikane. Deklarata e Petros, vjen pasi Trump kërcënoi Kolumbinë se mund të ndërhyjë ushtarakisht.

Trump dhe Petro zhvilluan një bisedë telefonike të mërkurën në mbrëmje, pas së cilës presidenti amerikan tha se do të takohej me homologun e tij kolumbian në Shtëpinë e Bardhë.

Por të enjten, toni i Petros la të kuptohej se marrëdhëniet nuk ishin përmirësuar ndjeshëm.

Presidenti Trump shpesh e ka fajësuar emigracionin për krimin dhe trafikimin në SHBA, duke e përdorur atë për të justifikuar operacionet e zbatimit të ligjit në shkallë të gjerë, dhe ka akuzuar vende si Kolumbia dhe Venezuela se nuk po bëjnë mjaftueshëm për të luftuar trafikimin e drogës.

Që kur u kthye në Shtëpinë e Bardhë, presidenti amerikan ka dërguar agjentë të ICE-së në qytete anembanë vendit. Agjencia zbaton ligjet e imigracionit dhe kryen hetime për imigracionin pa dokumente. Ajo gjithashtu luan një rol në largimin e emigrantëve pa dokumente nga SHBA-ja.

Një ngjarje e rëndë është regjistruar në kryeqytetin e Hondurasit, Tegucigalpa, kur Gladys Aurora López, deputete e Partisë Kombëtare, u plagos rëndë nga një pajisje shpërthyese që shpërtheu vetëm disa centimetra larg kokës së saj.

Ngjarja ndodhi të enjten gjatë një interviste për mediat, kur López po fliste para kamerave dhe papritmas një objekt rrethor u hodh drejt saj. Pajisja goditi pjesën e pasme të qafës së saj dhe shpërtheu në flakë, duke shkaktuar panik në turmë dhe duke lënduar edhe disa persona të tjerë që ndodheshin pranë.

López mbijetoi, por pësoi dëmtime serioze, duke përfshirë djegie dhe dëmtime në dëgjim. Shumë nga të pranishmit gjithashtu pësuan lëndime të lehta. Sulmi ndodhi në një kohë të tensionuar politikisht, gjatë një rinumërimi të kontestuar të votave pas fitore së ngushtë të Nasry Asfura në presidencialet e nëntorit.

Presidenti i Kongresit, Luis Redondo, urdhëroi menjëherë një hetim dhe kërkoi shqyrtimin e kamerave të sigurisë dhe regjistrimeve të 911 për të identifikuar autorin. Ndërkohë, presidenti i zgjedhur Asfura bëri thirrje për qetësi, duke theksuar se “kjo nuk duhet të ndodhë, pavarësisht motivit”.

Kreu i grupit parlamentar të Partisë Kombëtare, Tomás Zambrano, e përshkroi sulmin si një akt dhune të papranueshëm dhe akuzoi partinë në pushtet për krijimin e një klime armiqësore ndaj opozitës. Ai bëri thirrje që Forcat e Armatosura dhe Policia Kombëtare të mbrojnë ligjvënësit dhe sigurinë e Kongresit, duke paralajmëruar se Honduras po hyn në një nga periudhat më kritike politike në historinë moderne të vendit.

Sipas parashikimit të motit, Durrësi pritet të përballet me erëra të forta në orët në vijim. Autoritetet lokale u kanë bërë thirrje banorëve që të shmangin lëvizjet e panevojshme dhe të tregojnë kujdes maksimal.

“Sipas parashikimeve meteorologjike, qyteti ynë pritet të përballet me erëra të forta.

Duke filluar nga ora 16:00 e ditës së sotme, era nga drejtimi jugor do të intensifikohet, duke arritur shpejtësi deri në 25 m/sek, situatë që do të zgjasë deri në orët e para të mëngjesit të së shtunës.

U bëjmë thirrje qytetarëve të shmangin lëvizjet e panevojshme dhe të tregojnë kujdes maksimal. Ju lutemi ndiqni njoftimet zyrtare për sigurinë tuaj dhe të familjarëve. Strukturat tona do të jenë në gatishmëri të plotë për çdo problematikë që mund të paraqitet”-thuhet në njoftim.

Historiania dhe analistja ushtarake, Dr. Victoria Taylor, ka shpjeguar më shumë rreth raketës hipersonike Oreshnik që Rusia qëlloi drejt Lvivit gjatë natës.

“Putinit i pëlqen shumë të përdorë atë element hipersonik dhe kur diskutojmë për këto lloj raketash balistike, sigurisht që e bën përgjimin e tyre tepër të vështirë”, i tha ajo prezantueses sonë Samantha Uashington.

“Ajo që e bën edhe më të vështirë është fakti që fragmentohet edhe gjatë fluturimit, kështu që është një bishë mjaft e paparashikueshme”, shtoi ajo.

Nuk është hera e parë që rusët e kanë vendosur atë. E bënë për herë të parë në nëntor të vitit 2024.

“Kjo nuk është një teknologji krejtësisht e re,” shtoi Taylor, shkruan Shqiptarja.com

“Por në të njëjtën kohë është e rëndësishme të merret në konsideratë fakti që është tepër i shpejtë dhe tani për tani sistemet mbrojtëse perëndimore nuk janë të orientuara posaçërisht për t’u përballur me të”, përfundoi ajo.

Udhëheqësi suprem i Iranit, Ajatollah Ali Khamenei, ka kërcënuar presidentin amerikan Donald Trump, duke parashikuar se ai do të “rrëzohet”, ndërsa e ka fajësuar SHBA-në për protestat masive antiqeveritare që po tronditin Iranin prej gati dy javësh.

Në demonstratat më të mëdha deri tani, mijëra qytetarë dolën në rrugë në disa qytete kryesore, duke brohoritur slogane si “vdekje diktatorit” dhe duke djegur ndërtesa shtetërore. Protestat shpërthyen nga zemërimi për rritjen e kostos së jetesës, por janë shndërruar në thirrje të hapura për fundin e regjimit teokratik. Sipas Netblocks, autoritetet iraniane vendosën një bllokadë totale të internetit, e cila zgjati mbi 12 orë, në përpjekje për të shtypur protestat.

Në fjalimin e tij të parë lidhur me trazirat, të transmetuar nga televizioni shtetëror, Khamenei i quajti protestuesit “vandalë” dhe “sabotatorë”, duke deklaruar se Republika Islamike “nuk do të tërhiqet”. Ai akuzoi Trumpin se ka “duart e lyera me gjakun e mbi një mijë iranianëve” dhe tha se presidenti amerikan do të pësojë fatin e dinastisë perandorake të rrëzuar në vitin 1979.

Nga ana tjetër, Trump deklaroi se “entuziazmi për përmbysjen e regjimit iranian është i jashtëzakonshëm”, duke paralajmëruar se SHBA-ja do të reagojë ashpër nëse autoritetet iraniane vrasin protestuesit.

Protestat janë raportuar në Teheran, Tabriz, Mashhad, Isfahan dhe në rajonet kurde, duke përbërë sfidën më të madhe për regjimin iranian që nga trazirat e viteve 2022-2023 pas vdekjes së Mahsa Amini.

Kryetari i Komitetit të Zgjerimit të NATO-s në Austri, Gunther Fehlinger lëshoi një paralajmërim të ashpër ndaj SHBA-së mes pretendimeve se Donald Trump mund të vendosë marrjen e Groenlandës, duke mos përjashtu edhe ndërhyrje ushtarake atje.

Në një video të publikuar në rrjetet sociale, Fehlinger tha se nëse SHBA do të aneksonte Groenlandën, të gjitha bazat amerikane në Europë do të konfiskoheshin dhe SHBA “do të duhet të largohej.”

“Nëse merrni Groenlandë, ne do të marrim çdo bazë amerikane nga Aviano në Ramstein, nga Rumania e të gjitha bazat e tjera ushtarake, do të konfiskohen, dhe ju do të humbisni pozitat që ka pasur fuqia amerikane që nga Lufta e Dytë Botërore. Nëse merrni Groenlandën, duhet të largoheni”, shprehet Gunther Fehlinger, Kryetari i Komitetit të Zgjerimit të NATO-s në Austri.

Videoja e politikanit austriak u shpërnda përmes platformave X dhe Reddit. Ai ishte duke iu përgjigjur pjesërisht një postimi të parë si provokues të podkasteres së MAGA, Katie Miller, e cila shpërndau online një imazh të Groenlandës së mbuluar me një grafik të flamurit të SHBA-së,  të shoqëruar me mbishkrimin “Shumë shpejt”.

Duke iu drejtuar drejtpërdrejt Miller-it, ai shtoi se “ne mund ta mbrojmë veten shumë mirë, dhe mund ta bëjmë këtë pa strehën bërthamore amerikane, pa trupat amerikane në Evropë dhe pa bazat amerikane. Liderë të tjerë europianë kanë reaguar ndaj pretendimeve se SHBA kërkon ishullin e madh në Arktik, dhe disa prej tyre kanë theksuar se një veprim i tillë nga administrata Trump mund të cojë në shpërbërjen e aleancës ushtarake të NATO-s.

Prokuroria e Posaçme kundër Korrupsionit dhe Krimit të Organizuar, më datë 08.01.2026, ka paraqitur kërkesën për gjykimin e procedimit penal nr. 196 të vitit 2024, në ngarkim të të pandehurve: Benet Beci, Adela Ruko, Edlira Mitrushi, Jonid Kazani, Yllka Nishku, Premtim Dauti, Rudin Gjoni, të akuzuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim, parashikuar nga nenet 258 dhe 25 të Kodit Penal.

Objekt i këtij hetimi është një procedurë prokurimi e zhvilluar nga Korporata Elektroenergjitike Shqiptare sh.a., me objekt “Zhvillimi Strategjik i Sektorit Energjitik (Projekt Kërkimor)”, me nr. REF-46463-12-18-2019, me fond limit 69,500,000 (gjashtëdhjetë e nëntë milionë e pesëqind mijë) lekë.

Hetimi është nisur kryesisht mbi bazën e referimit të akteve nga hetues të Byrosë Kombëtare të Hetimit (BKH).

Nga aktet e administruara ka rezultuar se, gjatë zhvillimit të kësaj procedure prokurimi, janë evidentuar rrethana fakti për veprën penale të shkeljes së barazisë së pjesëmarrësve në tendera apo ankande publike, në lidhje me veprimet e kundërligjshme të titullarit të autoritetit kontraktor, anëtarëve të njësisë së prokurimit dhe anëtarëve të komisionit të vlerësimit të ofertave. Këto veprime kanë konsistuar në përllogaritjen e fondit limit, hartimin e termave të referencës, përcaktimin e kritereve në dokumentacionin standard të tenderit, si dhe në fazën e vlerësimit të ofertave.

Konkretisht, nga analizimi i provave të siguruara përmes përdorimit të teknikave të posaçme të hetimit, provave materiale të sekuestruara gjatë kontrollit në banesën e personit të marrë si i pandehur në një procedim tjetër, shtetasit Evis Berberi (bashkëshorti i të pandehurës Adela Ruko), si dhe nga kryerja e veprimeve të tjera hetimore në kuadër të këtij hetimi, ka rezultuar se:

I pandehuri Benet Beci, në detyrën e Administratorit të Korporatës Elektroenergjitike Shqiptare sh.a., në cilësinë e titullarit të autoritetit kontraktor, në bashkëpunim me anëtarët e njësisë së prokurimit, të pandehurit Jonid Kazani, Edlira Mitrushi, Yllka Nishku, si dhe me anëtarët e komisionit të vlerësimit të ofertave, të pandehurit Adela Ruko, Rudin Gjoni, Premtim Dauti, kanë paracaktuar dhe krijuar avantazhe dhe privilegje të padrejta për shoqërinë fituese të kësaj procedure prokurimi, “Consulting & Management Albania” sh.p.k.

Në këtë procedurë prokurimi janë evidentuar veprime në kundërshtim me nenet 1, 2, 20, 24 dhe 46 të ligjit nr. 9643, datë 20.11.2006, “Për prokurimin publik”, i ndryshuar, si dhe me nenet 28 dhe 61 të VKM nr. 914, datë 29.12.2014, “Për miratimin e rregullave të prokurimit publik”.

Donald Trump u shpreh se SHBA-ja do të nisë sulme tokësore kundër karteleve të drogës në Meksikë, ndërsa paralajmëroi se i vetmi kufi ndaj fuqisë së tij globale është “vetëm morali i tij”.

Kjo shpallje e një aksioni ushtarak kundër narkoterroristëve vetëm vetëm pak ditë pas kapjes së liderit venezuelian Nicolas Maduro.

“Tani do të fillojmë me goditjet tokësore ndaj karteleve. Janë kartelet që po e drejtojnë Meksikën; është shumë e trishtueshme të shohësh se çfarë i ka ndodhur atij vendi,” tha Trump për Fox Neës. Më herët, shefi i Shtëpisë së Bardhë qe mburrur me fuqitë e tij të mëdha në politikën e jashtme, kur u pyet mbi limitet e asaj çfarë ushtria amerikane mund të bënte në rajon.

“Morali im. Mendja ime. Është e vetmja gjë që mund të më ndalojë,” i tha ai The Neë York Times. Trump ka sugjeruar se Groenlanda, Kuba dhe Kolumbia mund të jenë shënjestrën e radhës në listën e tij të operacioneve amerikane, duke zemëruar NATO-n dhe udhëheqës botërorë nga kryeministri britanik Keir Starmer deri te presidenti francez Emmanuel Macron.

Trump dhe bashkëpunëtorët e tij kanë flirtuar që prej fushatës zgjedhore me idenë e pushtimit ose sulmit ndaj karteleve të drogës në Meksikë. Ai i ka akuzuar  trafikantët e drogës nga Amerika Qendrore për vdekjet e 250,000 deri në 300,000 amerikanëve çdo vit, duke fajësuar ndikimin e karteleve dhe trafikimin e fentanilit.

Fill pas kapjes së Maduros, Trumpi i kishte lëshuar një paralajmërim Meksikës që të vinte rregull brenda kufijve të saj, por shtoi se fatkeqësisht, kartelet atje janë shumë të forta.

Reshjet intensive të shiut dhe dëborës, të shoqëruara me temperatura të ulëta kanë krijuar problematika të shumta në disa qarqe të vendit, duke ndikuar në qarkullimin rrugor, furnizimin me energji elektrike dhe sigurinë e banorëve, kryesisht në zonat malore dhe pranë lumenjve.

Qarku Gjirokastër paraqet situatën më problematike.

Në Bashkinë Gjirokastër ka prezencë dëbore në njësinë administrative Picar, ndërsa lumi Drino në aksin Gjirokastër–Tepelenë i është afruar trupit të rrugës, gjë që ka kërkuar ndërhyrje të menjëhershme për forcimin e argjinaturës. Në disa fshatra: Odrie, Lunxhëri dhe Zagori po ndërhyhet në disa akse rrugore të bllokuara dhe në një urë të vogël në aksin Krinë–Tranoshisht–Saraqinishtë.

Në Bashkinë Dropull, ura e Glinës mbetet problematike, ndërsa po punohet për lirimin e akseve: Pogon–Dropull, Zagori-Libohovë të bllokuar nga dëbora.

Puna e forcave në terren po vijon edhe në aksin Përmet–Dogana e Tre Urave është i bllokuar si dhe në njësinë administrative Frashër dhe disa fshatra përreth, ku ka problematika për shkak të reshjeve të dëborës.

Në Bashkinë Memaliaj ka problematika të shkaktuar nga lumi Vjosë në tokat bujqësore, ndërsa në Tepelenë qarkullimi në aksin Tepelenë–Gjirokastër realizohet vetëm me një korsi në zonën “Shkalla e Zezë”.

Qarku Lezhë është përfshirë nga reshje dëbore edhe në zona të ulëta, përfshirë qytetin e Lezhës. Strukturat përgjegjëse janë në gatishmëri për mbajtjen hapur të akseve rrugore. Është përfunduar riparimi i argjinaturës së dëmtuar në lumin Drojë.

Qarku Vlorë paraqet një përmirësim sa i përket rënies së prurjeve në lumin Vjosë. Nënkalimi në fshatin Bishan është i bllokuar, por nuk raportohen banesa të përmbytura, vetëm prezencë uji në oborre.

Qarku Elbasan po përballet me dëborë dhe ngrica në zonat malore të bashkive Elbasan dhe Peqin, ku disa akse rurale janë bllokuar nga dëbora dhe rrëshqitjet e dherave. Mjetet dhe punonjësit janë në terren për normalizimin e situatës.

Qarku Dibër mbetet një nga zonat më të prekura gjithashtu. Forcat e emergjencave civile po punojnë në disa akse me prezencë të akullit apo rrëshqitje dherash. Ekipet e OSHEE po punojnë për rikthimin e energjisë në njësitë administrative Bulqizë, Klos, Dibër dhe Lurë. Disa segmente rrugore janë aktualisht të pakalueshme, por forcat e policisë janë në terren për të orientuar qarkullimin.

Forcat e Armatosura, strukturat e mbrojtjes civile, policia e shtetit, shërbimet bashkiake, nën koordinimin e Agjencisë Kombëtare të Mbrojtjes Civile dhe Ministrisë së Mbrojtjes janë të angazhuara në terren me mjete dhe personel për përballimin e situatës dhe rikthimin e normalitetit.

U bëhet thirrje banorëve të zonave të prekura të shmangin lëvizjet e panevojshme, të respektojnë udhëzimet e autoriteteve dhe të raportojnë çdo emergjencë pranë strukturave përkatëse.

Kryetari i Partisë Demokratike, Sali Berisha, tha se Shqipëria është kthyer sot në një rrezik për Europën për shkak të narkoshtetit që ka ndërtuar Kryeministri Edi Rama.

Në fjalën e tij gjatë Dëgjesës Publike me partitë opozitare, aktorë të shoqërisë civile, përfaqësues të sindikatave, organizatave, medias dhe intelektualë publikë, Berisha shtoi se vendi ynë po renditet sot krah Kolumbisë sa i përket trafikut të drogës.

“Sot Shqipëria, vendi ynë i dashur, vlerësohet si një rrezik, si një narkoshtet, rrezik për Europën. Ky narkoshtet u krijua nga qeveria aktuale dhe Edi Rama për qëllimet më ogurzeza ndaj Shqipërisë dhe shqiptarëve. Ju rikujtoni këtu vitin e zi 2015, kur Shqipëria u mboll nga Pogoni e Kakavija gjer në kufi me Plavë e Guci me mijëra plantacione kanabisi. Se si propaganda qeveritare u servirte shqiptarëve kanabisin si një drejtim i ri zhvillimi, pasurimi. Politikë kjo që u kundërshtua- e vërteta është- nga njerëz të përgjegjshëm në atë qeveri, konkretisht ish-zëvendëskryeministri. Paralajmëroi Edi Ramën se ky është shkatërrim i ekonomisë, kurse ai insistoi se kjo është para, dhe paraja është e dobishme. Asnjë vend, asnjë komb tjetër ndoshta në Europë, se në Amerikën Latine e kanë provuar, nuk kanë provuar si shqiptarët se sa toksike është paraja e drogës, paraja e karteleve”, tha Berisha.

“Se sa shkatërrimtare është për ligjin, për demokracinë, për jetën, për ekonominë e një vendi kjo para. Dhe sot ne përfundojmë një vend aleat i NATO-s, rrezik për Europën. Duhet të njohim një meritë historike presidentit Donald Trump që shpalli kartelet e drogës organizata terroriste. Sepse në fakt për fuqinë e tyre shkatërrimtare, ato krahasohen dhe tejkalojnë organizatat më të fuqishme terroriste. Në këtë kuadër të karteleve organizata terroriste, Shqipëria mund të renditet e dyta pas Venezuelës ose krahas Kolumbisë. Shqipëria zyrtare është sot koka e karteleve më të fuqishme të drogës në Europë për dy arsye. Së pari, sipas OKB, Shqipëria është eksportuesi kryesor i kanabisit në BE. Së dyti, zhvillimet e këtyre dy viteve të fundit kanë faktuar në mënyrë të pakundërshtueshme se trafikantët shqiptarë, kartelet shqiptare të kokainës përcaktojnë çmimin e këtij helmi në Europë. Dhe çmimin e përcakton ai që sjell më shumë. Ai që është aksionari më i madh. Dhe aksionari më i madh janë bashkëpunëtorët e Edi Ramës, Franc Çopja dhe grupe të tjera që ne as i dimë. Por unë vetëm një të dhënë do u jap ju.

Në Paraguaj, një trafikant i quajtur Diego Benitez, i cili disponon në vit 350 ton kokainë, bashkëpunon me 41 klane shqiptare. Ju garantoj se po kaq famëzi sa ç’janë në Europë klanet shqiptare të drogës me mbështetje nga qeveria, edhe në SHBA, edhe në Australi, edhe në Azi dhe vende të tjera. Koha do e provojë këtë. Ata janë bërë sot transportuesit kryesorë të kokainës, miliarderët më të shumtë të kokainës”.

Ushtria ruse tha se kishte lëshuar raketën hipersonike Oreshnik ndaj një objektivi në Ukrainë, si kundërpërgjigje ndaj sulmit të pretenduar me dronë kundër një prej rezidencave të Putinit muajin e kaluar.
Kjo është hera e dytë që Rusia përdor raketën me rreze të mesme Oreshnik, për të cilën shefi i Kremlinit ka thënë se është e pamundur të interceptohet dhe se ka shpejtësi dhjetë herë më të madhe se ajo e zërit. Raketa është në gjendje të mbajë testata bërthamore dhe, sipas Ministrisë së Mbrojtjes në Rusi, është përdorur për të goditur infrastrukturë kritike në Ukrainë.

“Ministria e Mbrojtjes raportoi se kishte përdorur raketa me rreze të gjatë veprimi, me precizion të lartë, si dhe sistemin më të fundit Oreshnik. Objektet u shënjestruan gjithashtu nga dronë luftarakë. U goditën fabrikat që kishin prodhuar dronët e përdorur kundër rezidencës së presidentit rus. Për më tepër, u shkatërruan objektet energjetike që punonin për Forcat e Armatosura të Ukrainës. Ministria e Mbrojtjes paralajmëron se asnjë sulm terrorist nga regjimi i Kievit nuk do të mbetet pa përgjigje”.

Ukraina e konfirmoi sulmin, duke thënë se ai kishte ndodhur në perëndim të vendit, pranë kufirit me Bashkimin Europian. Sipas ministrit të Jashtëm në Kiev, raketa Oreshnik, e cila iu afrua shumë kufirit me BE-në dhe NATO-n, ka kërcënuar rëndë sigurinë europiane dhe u kërkoi partnerëve të shtojnë presionin ndaj Moskës.

Ukraina hodhi sërish poshtë pretendimet se kishte shënjestruar rezidencën e Putinit, duke i cilësuar ato si justifikime absurde. Guvernatori i rajonit të Lvivit, në Ukrainën perëndimore, tha se sulmet e fundit kishin dëmtuar infrastrukturë kritike, ndërsa raportime të paverifikuara sugjerojnë se objekt i sulmit me raketën Oreshnik mund të ketë qenë një strukturë nëntokësore për depozitimin e gazit.

Ndërkohë, një tjetër sulm rus në Kiev, gjatë ditës së premte, u mori jetën të paktën 4 personave, plagosi rreth 20 të tjerë dhe shkaktoi dëme të konsiderueshme në infrastrukturë.