Politologu Roland Bejko u shpreh kritik ndaj qëndrimit të opozitës lidhur me Reformën Territoriale.

Gjatë intervistës në emisionin “Real Story” në ABC News, Bejko tha se qëndrimi i Berishës është i njëjtë me ato të kaluarat dhe se po bën sërish po të njëjtin gabim.

“Sjellja që po bën opozita sot është e njëjta me 2014 dhe e njëjta sjellje që e mbajti PD larg kësaj reforme. Qëndrimi i Berishës është identik i njëjtë me sot. Por ti nuk mund ta fitosh dot luftën nëse nuk shkon në luftë… Nuk mund të bëhet dy herë i njëjti gabim. Zanafilla e kësaj humbje që ka PD filluan pikërisht këtu, tek bojkoti i parë…Kjo reformë në atë kohë është bërë enkas në shërbim elektoral të PS. Dhe ndarja administrative është bërë sipas leverdisë elektorale…Po të ishte opozita pjesëmarrëse në komision dhe nëse duam të gjykojmë sot nëse ka qenë apo jo e suksesshme kjo reformë duhet të nisemi nga pyetje përse u bë reforma? Njëra prej arsyeve ishte të shkurtoheshin shpenzimet financiare, që jo vetëm nuk u shkurtuan, por edhe u shtuan. Në Komision drejtori i Ministrisë së Financave, dha shifrat dhe numri në administratë ishte shtuar…Pse duhet reforma dhe opozita të jetë? Sepse të gjitha reformat e rëndësishme dhe duan qëndrueshmëri në kohë…Ajo që thotë Berisha do dalim jashtë dhe do e bëjmë vetë reformën është budallik…”, tha ai.

Franca do ta përfshijë në ligj fundin e të ashtuquajturave “të drejta bashkëshortore”, ose idenë se martesa nënkupton një detyrim për të kryer marrëdhënie seksuale.

Një projektligj i miratuar të mërkurën në Asamblenë Kombëtare shton një klauzolë në kodin civil të vendit për të bërë të qartë se martesa nuk krijon një “detyrim për marrëdhënie seksuale”.

Ligji i propozuar gjithashtu e bën të pamundur përdorimin e mungesës së marrëdhënieve seksuale si argument në një divorc të bazuar mbi fajin. Edhe pse ka gjasa të mos ketë ndikim të madh në gjykata, mbështetësit shpresojnë që ligji të ndihmojë në parandalimin e përdhunimit brenda martesës.

“Duke lejuar që një e drejtë apo detyrim i tillë të vazhdojë, ne kolektivisht po japim miratimin tonë për një sistem dominimi dhe grabitjeje nga burri ndaj gruas,” tha sponsorizuesja e projektligjit, deputetja e të Gjelbërve Marie-Charlotte Garin, citon BBC. “Martesa nuk mund të jetë një flluskë ku pëlqimi për seks konsiderohet përfundimtar dhe i përjetshëm.”

Ligji do të fshijë një paqartësi që ka vazhduar pavarësisht se nuk ka pasur asnjë përmendje të qartë të “detyrimit bashkëshortor” në tekstet ligjore.

Aktualisht, kodi civil francez i përkufizon detyrimet e martesës si “respekt, besnikëri, mbështetje dhe ndihmë,” dhe thotë se çiftet angazhohen për një “bashkësi jetese”.

Askund në tekstet ligjore nuk përmendet “e drejta bashkëshortore”,  pra e drejta seksuale. Origjina e këtij nocioni gjendet në ligjin kishtar mesjetar.

Megjithatë, gjyqtarët në çështje moderne divorci, herë pas here, i kanë dhënë një interpretim të gjerë konceptit të “bashkësisë së jetesës” duke përfshirë edhe marrëdhëniet seksuale.

Në një rast të famshëm në vitin 2019, një grua u gjet se kishte refuzuar marrëdhënie seksuale me bashkëshortin e saj për disa vite, dhe ai më pas u lejua të merrte një divorc të bazuar mbi fajin, duke nënkuptuar fajin e saj. Por gruaja e çoi çështjen në Gjykatën Evropiane për të Drejtat e Njeriut (ECHR), e cila vitin e kaluar dënoi Francën që lejoi refuzimin seksit të merrej si bazë për një divorc. Kjo u përshëndet si një përparim i rëndësishëm nga aktivistet feministe.

Vendimi i ECHR-së e ka bërë praktikisht të pamundur që ndonjë gjykatës francez divorci të japë një vendim të ngjashëm, prandaj ligji i ri synon kryesisht të qartësojë situatën, me ndryshimin që ka gjasa të mos ketë ndikim të madh në gjykata.

Për aktivistët, nocioni se gratë kanë një “detyrim” të pranojnë seksin me burrat e tyre është diçka që ende ekziston në disa pjesë të shoqërisë dhe duhet të sfidohet.

Në Francë, si në shumicën e vendeve të tjera, përdhunimi brenda martesës tani është i sanksionuar me ligj, ndërsa para vitit 1990 burrat mund të argumentonin se martesa nënkuptonte pëlqim.

Që nga nëntori i vitit të kaluar, përkufizimi ligjor i përdhunimit në Francë është zgjeruar gjithashtu për të përfshirë nocionin e mos-pëlqimit.

Më parë, përdhunimi përkufizohej si një akt seksual i kryer me “dhunë, detyrim, kërcënim ose befasi”. Tani është çdo akt ku nuk ka “pëlqim të informuar, specifik, paraprak dhe të revokueshëm”. Heshtja ose mungesa e reagimit nuk nënkuptojnë pëlqim, thotë ligji.

Analisti Ergys Mërtiri tha në “Real Story” se reforma territoriale e pak viteve më parë ka dështuar, sepse nuk u bë në interes të qytetarëve, por të interesave politikës. 

“Mua më duket se problemi i madh është që rëndësi që i është dhënë efektit politik, interesave që lidhen me reformën territoriale, e kanë nxjerrë në plan të dytë nevojën që kanë qytetarët. 

Pyetja e parë është se pse po ndryshohet. Pse po ribëhet? Kjo do të thotë se ka dështuar e para”, tha ai. 

Ai theksoi se territori i vendit është ndarë deri tani në bazë të parimeve elektorale dhe jo të interesave bazike të qytetarëve. 

“E para ka dështuar, sepse nuk është parë në funksion të qytetarëve, por në funksion të interesave për të ndarë votat në terren, ku marrim një deputet më shumë apo një më pak. 

Qëllimi është ta ndajmë territorin në atë mënyrë, që të marrim më shumë vota”, theksoi ai. 

Pajković dhe Vukšić dhanë dorëheqjet brenda disa javësh nga njëri-tjetri, pas shpërndarjes së materialeve të papërshtatshme që supozohet të tregojnë Pajković duke kryer akt seksual me Vukšić, i cili është i martuar.

Në një deklaratë të saj, Pajković inkurajoi “çdo grua” të kundërshtojë idenë që ato duhet të heshtin për situata të tilla dhe akuzoi Vukšić për shantazh me videon, të cilën ajo tha se nuk e dinte deri në shpërndarjen e saj.

“Kur u ekspozova ndaj dhunës ekstreme që postova në rrjetet sociale, ku personi i parë pranë presidentit të vendit, ish-përfaqësuesi i lartë i Agjencisë së Sigurisë Kombëtare, me insistim dhe gjatë gjithë bisedës më tha që nuk do të kisha asnjë vend ku të fshihesha dhe asnjë vend ku të jetoja në Malin e Zi”, tha Pajković.

Ajo shtoi se largimi i saj ishte për arsye personale, por e akuzoi Vukšić për kërcënimin me videon, duke e detyruar atë të mbante gojën mbyllur. Sipas Pajković, Vukšić e kërcënoi me dëmshpërblim nëse ajo nuk pranon kërkesat e tij.

“Për shembull, kur dikush po ju shantazhon… Kur dikush më i fuqishëm kërkon një favor apo sjellje që nuk dëshironi, dhe nëse refuzoni, do të dorëzoheni tek dikush që është mishërimi i pushtetit më të lartë të shtetit,” tha ajo.

Të dy palët kanë mohuar akuzat dhe kanë paraqitur ankesa penale. Pajković ka bërë një ankesë për shpërndarjen e paautorizuar të materialeve të papërshtatshme, duke përfshirë një foto të saj. Ajo gjithashtu ka pretenduar se ka marrë kërcënime nga një linjë fikse brenda zyrës së presidentit.

Në një mesazh të regjistruar, një zë thuhet të ketë paralajmëruar që “i gjithë Mali i Zi do ta shohë” materialin që komprometon Pajković.

Pas shpërndarjes së materialeve, Vukšić dha dorëheqjen në fund të dhjetorit, gjithashtu duke përmendur arsye personale. Ai mohoi çdo përgjegjësi për shkeljen e privatësisë së Pajković dhe shpërndarjen e videove të diskutueshme, duke theksuar se ai e pa materialin për herë të parë vetëm kur ai filloi të qarkullonte në mënyrë të paligjshme në rrjetet sociale.

Vukšić gjithashtu e akuzoi Pajković për vjedhjen e telefonit që supozohet të kishte regjistruar kërcënimet e tij dhe për përpjekje për të shantazhuar atë që të tërhiqte kandidaturën e tij për postin e gjyqtarit në Gjykatën Kushtetuese.

Ndërkohë që ende mbetet e paqartë kush e publikoi videon seksuale, shpërndarja e pornografisë hakmarrëse është një krim i rëndë në Malin e Zi. Ata që dëshmohen fajtorë mund të përballen me dënime deri në pesë vjet burg.

Presidenti amerikan Donald Trump ka thirrur këtë të enjte në një mbledhje kabinetin e tij, e cila u transmetua online dhe përfundoi pa pyetje nga gazetarët dhe pa komente nga sekretarja e Sigurisë së Brendshme Kristi Noem apo Prokurorja e Përgjithshme Pam Bondi.

Siç shkruan CNN, mbledhja duket se synonte të shmangte debatet mbi situatën në Minnesota, pas vdekjes së dy qytetarëve amerikanë nga agjentët federalë, dhe pas kontrollit të FBI-së në një zyrë zgjedhore në Georgia lidhur me humbjen e Trump në zgjedhjet e vitit 2020.

Gjatë mbledhjes, demokratët votuan për të bllokuar një paketë të madhe financimi që përfshinte Departamentin e Sigurisë së Brendshme dhe disa agjenci të tjera, ndërsa negociatat me republikanët dhe Shtëpinë e Bardhë vazhdojnë për të vendosur kufizime në përpjekjet e Trump për zbatimin e ligjit të emigracionit.

Qeveria amerikane rrezikon një pezullim të pjesshëm në fund të javës nëse ligjvënësit nuk arrijnë marrëveshje për paketën e financimeve.

Senatorët bllokojnë ligjin e madh të shpenzimeve

Një grup senatorësh nga të dyja partitë bllokuan një ligj të madh shpenzimesh, ndërsa negociatat e fundit vazhdojnë për të shmangur një pezullim të pjesshëm të qeverisë, që mund të jetë i kushtueshëm.

Demokratët, pas incidentit fatal të Alex Pretti nga agjentët federalë në Minneapolis, kërkojnë ndryshime në politikat e Departamentit të Imigracionit dhe Doganave (ICE) dhe refuzuan të miratojnë paketën e gjashtë ligjeve të financimit. Shtatë senatorë konservatorë iu bashkuan për të bllokuar paketën, në një votim që përfundoi me rezultatin 45-55.

Demokratët kërkojnë që financimi për Departamentin e Sigurisë së Brendshme të ndahet nga pjesa tjetër e paketës në mënyrë që të rinegociohet. Nëse nuk arrihet kjo marrëveshje, disa agjenci kyçe si Mbrojtja, Shëndetësia, Punësimi, Arsimi, Transporti dhe Zhvillimi Urban mund të mbeten pa fonde të premten në mesnatë. Edhe në rast arritjes së marrëveshjes, ligji duhet të kalojë miratimin në të dyja dhomat e Kongresit, çka mund të shtyjë miratimin final deri të hënën.

Trump: Shpresojmë të shmangim pezullimin e qeverisë!

Presidenti Trump u shpreh optimist se Kongresi do të shmangë pezullimin e qeverisë. Ai deklaroi:

“Shpresojmë që të mos ketë pezullim. Mendoj se jemi afër. Demokratët nuk besoj se duan ta shohin gjithashtu.”, u shpreh ai, duke shtuar se të dyja palët po diskutonin për një marrëveshje të mundshme për të ndarë financimin e Sigurisë së Brendshme nga pjesa tjetër e paketës ligjore dhe për ta financuar për një periudhë të shkurtër.

Pas tre ditësh “bllokadë” për shkak të protestës së kamionistëve maqedonas, nga ora 20:00 e mbrëmjes së sotme nis zhbllokimi i plotë i pikës kufitare të Qafë Thanës dhe i të gjitha pikave të tjera kufitare mes Shqipërisë dhe Maqedonisë së Veriut.

Bllokada u organizua nga Shoqata e Transportuesve të Maqedonisë së Veriut, me pjesëmarrjen e rreth 370 kamionistëve në 10 pika kufitare, në kundërshtim të sistemit të ri elektronik të hyrje-daljeve në zonën Schengen.

Zgjidhja erdhi pas ndërhyrjes së Komisionit Evropian, i cili do të lëshojë viza për transportuesit.

Ministri i Transportit i Maqedonisë së Veriut, Aleksandar Nikolloski, bëri të ditur se Brukseli ka pranuar kërkesat dhe do të sjellë një strategji të re për shoferët profesionistë. Megjithatë, transportuesit shprehen se regjimi i vizave është i vjetëruar, por janë të gatshëm ta pranojnë zgjidhjen në mungesë të alternativave.

Kryetari i Grupit Parlamentar të Partisë Demokratike, Gazment Bardhi, deputetja dhe kryetarja e Komisionit për Median dhe të Drejtat e Njeriut, Jorida Tabaku, si dhe deputeti i Partisë Demokratike, Ivi Kaso, zhvilluan një takim me raporterin për Shqipërinë në Parlamentin Evropian, Andreas Schieder.

Gjatë takimit, përfaqësuesit e opozitës shprehën shqetësimin e tyre të thellë lidhur me situatën politike dhe institucionale në Shqipëri. Ata ngritën shqetësimi për mbylljen sistematike të hapësirave për opozitën në Kuvendin e Shqipërisë.

Përfaqësuesit e PD-së theksuan se ndërprerja e fjalës së opozitës gjatë seancave plenare është kthyer në një praktikë të zakonshme, ndërsa mekanizmat parlamentarë për kontrollin e qeverisë janë dobësuar ndjeshëm ose janë bërë jofunksionalë.

“Paraqitëm shqetësimi për mbylljen sistematike të hapësirave për opozitën në Kuvendin e Shqipërisë. Theksuam se ndërprerja e fjalës së opozitës gjatë seancave plenare është kthyer në praktikë të zakonshme, ndërsa mekanizmat parlamentarë për kontrollin e qeverisë janë dobësuar ndjeshëm ose janë bërë jofunksionalë.

Në këtë kontekst, nënvizuam degradimin e rolit të Kuvendit, i cili po shndërrohet gjithnjë e më shumë në një institucion formal, pa debat real dhe pa respekt për pluralizmin politik.

Raporteri për Shqipërinë në Parlamentin Europian, z. Andreas Schieder, u informua në mënyrë të detajuar mbi këto zhvillime dhe u njoh me shqetësimet e opozitës lidhur me pasojat që këto praktika kanë për procesin e integrimit evropian të vendit dhe për standardet demokratike që kërkon Bashkimi Evropian.

Në emër te Partisë Demokratike, konfirmuam angazhimin për mbrojtjen e demokracisë, funksionimin e institucioneve dhe respektimin e shtetit të së drejtës, si parakushte themelore për rrugën evropiane të Shqipërisë”, shkruan ndër të tjera Bardhi.

Gjatë ditës së sotme edhe kryetari i Kuvendit, Niko Peleshi, u takua me raportuesin e Parlamentit Evropian për Shqipërinë. Gjatë takimit u diskutua mbi ecurinë e procesit të anëtarësimit, arritjet për vijimin e reformave, veçanërisht në fushat e sundimit të ligjit, reformës në drejtësi dhe luftës kundër korrupsionit dhe krimit të organizuar.

Shefja e Politikës së Jashtme të BE-së i ka kërkuar SHBA-së të përmbahet nga sulmet ndaj Iranit, pasi ministri i Jashtëm i Teheranit akuzoi bllokun për “ndezjen e flakëve” të “luftës totale” duke e listuar Trupën e Gardës Revolucionare Islamike (IRGC) si një grup terrorist.

“Kur bëhet fjalë për sulme, atëherë mendoj se rajoni nuk ka nevojë për një luftë të re”, u tha gazetarëve Kaja Kallas, shefja e politikës së jashtme të BE-së, pas një takimi të ministrave të BE-së në Bruksel të enjten.

Kallas shtoi se futja në listën e zezë e IRGC-së – një njësi ushtarake elitare që i përgjigjet drejtpërdrejt Udhëheqësit Suprem Ali Khamenei – do të ushtronte “më shumë presion” mbi regjimin islamik pas shtypjes brutale të protestave këtë muaj, të cilat disa vlerësojnë se kanë vrarë dhjetëra mijëra njerëz.

Komentet e saj erdhën ndërsa ministri i Jashtëm i Iranit, Abbas Araghchi, dënoi përcaktimin e së enjtes të IRGC-së si një “marifet PR” që synonte të maskonte “rënien e rëndë” të BE-së.

“Disa vende po përpiqen aktualisht të shmangin shpërthimin e një lufte të përgjithshme në rajonin tonë”, shkroi ai në mediat sociale. “Asnjëra prej tyre nuk është evropiane. Në vend të kësaj, Evropa është e zënë duke i ndezur flakët”.

Araghchi, i cili do të udhëtojë për në Ankara të premten për bisedime me homologun e tij turk mbi krizën në rritje, paralajmëroi gjithashtu se një “luftë e përgjithshme” kundër Iranit, një nga prodhuesit më të mëdhenj të naftës në botë, do të ishte “thellësisht dëmtuese” për BE-në duke shkaktuar një rritje të çmimeve të energjisë.

Presidenti i SHBA-së Donald Trump paralajmëroi të mërkurën se një “armadë masive” po shkon drejt Iranit dhe se “sulmi i ardhshëm” i Uashingtonit do të ishte “shumë më i keq” sesa bombardimi i Amerikës ndaj objekteve bërthamore dhe ushtarake të Iranit qershorin e kaluar.

“Ashtu si me Venezuelën”, SHBA-të “janë të gatshme dhe të afta të përmbushin me shpejtësi misionin e tyre, me shpejtësi dhe dhunë, nëse është e nevojshme”, shkroi Trump në platformën e tij Truth Social.

CNN raportoi gjithashtu herët të enjten në mëngjes se Trump po shqyrton “një sulm të ri të madh” ndaj udhëheqësve, institucioneve qeveritare dhe centraleve bërthamore të Iranit.

Raporti, i cili citoi zyrtarë të paidentifikuar, tha se Trump nuk kishte marrë ende një vendim përfundimtar nëse do të niste një sulm.

Më 1 shkurt, afërsisht në orën 23:10, hëna e dytë e plotë e vitit, e njohur tradicionalisht si “Hëna e Borës”, do të ndriçojë qiellin, veçanërisht në shenjën krenare dhe të zjarrtë të Luanit, duke ndikuar fuqishëm në tre shenja të zodiakut. 

Energjia e saj ndihet në ditët që i paraprijnë dhe zgjat deri ditën tjetër. Prandaj nuk është për t’u habitur që kjo ngjarje astrologjike zgjon emocione të forta dhe na motivon të veprojmë. 

Ndërsa Venusi, Mërkuri dhe Dielli në Ujor na shtyjnë të planifikojmë, të mendojmë dhe të distancohemi, hëna e plotë në Luan na bën thirrje që më në fund të ndërmarrim veprime. Guximi, vetëbesimi dhe nevoja për t’u parë janë në qendër të vëmendjes dhe për tre shenja, kjo hënë shënon një pikë kthese të rëndësishme në jetën e tyre. 

Hëna e plotë e shkurtit – Tre shenja të zodiakut të thirrura për të marrë vendime të guximshme 

Dashi 

Energjia e zjarrtë e Luanit rrit entuziazmin tuaj natyror për veprim, ndërsa stanjacioni nuk ekziston për ju. Tani është koha e duhur për të ndërmarrë një hap të guximshëm, edhe nëse nuk është planifikuar në mënyrë të përsosur. Mund t’i thoni “po” një mundësie në punë ose “jo” diçkaje që ju kufizon. Motoja e Dashit është “më mirë i guximshëm sesa i rehatshëm”, duke marrë parasysh se energjia e hënës së plotë ju mbështet. 

Luani 

Koha juaj ka ardhur. Hëna e plotë në shenjën tuaj vepron si një dritë prozhektorësh, pasi shihni qartë se çfarë dëshironi dhe çfarë nuk ju përshtatet më. Në vitin 2026, nuk fshiheni pas pritjeve apo idealeve, por ndiqni rrugën tuaj. Qoftë një punë, një marrëdhënie apo një qëllim personal, merrni një vendim që ju bën të dukshëm, dhe guximi juaj qëndron në mbrojtjen e vetes pa pasur nevojë t’u shpjegoni të tjerëve ose të justifikoni veten. 

Akrepi 

Me Diellin, Merkurin dhe Afërditën në shenjën tuaj, ju keni një aftësi të lindur për të analizuar dhe planifikuar. Megjithatë, hëna e plotë në Luan ju bën thirrje që t’i lini emocionet tuaja të dalin në sipërfaqe dhe më pas të ndërmerrni veprime. Ju merrni një vendim që mund të mos jetë plotësisht logjik, por është absolutisht i vërtetë. Mund të nënkuptojë të tregoni hapur se si ndiheni ose të zgjidhni një rrugë që nuk shpjegohet lehtë, por që ju bën të ndiheni mirë. 

“Për mua është gjallë. Por çdo gjë ndodh në këtë vend. Ne kemi parë edhe filma. Dikush thotë që pse nuk del vajza të flasë diku. Tani është 21 vjeçe. Si nuk i dërgon fjalë nënës së vetë. Në atë moshë që ka qenë, trysnia që është shtuar mbi të, frika që ka përjetuar, kanë bërë që një pjesë e kujtesës t’i eliminohet. Nga ana tjetër, mos të harrojmë që përdorin dhe medikamente të ndryshme që ta heqin kujtesën. Kjo është një enigmë  në kuptimin e parë të fjalës. Nuk ka shpjegim të mos reagonte. Duhet të reagonte patjetër.

Mendoj se është aspekti i harresës ekstreme, që ajo nuk di që Bukuria është nëna e saj. Nuk flas për probleme që mund të lidhen me frustrimin e saj.

Në Greqi, ku mendohet se ka jetuar, thuajse 1/3 e asaj popullsie janë shqiptarë. Edhe Gjermani e njëjta gjë. Mendohet se ka shkuar nga Greqia në Gjermani.

SPAK-u do i shkojë deri në fund. Çdo version është hedhur. Janë edhe ato mendjet e prishura që e kanë ngrënë arinjtë ose ndonjë kafshë e egër, por do ishte gjetur diçka. Të gjitha janë përralla. Këto më bëjnë të besoj që vajza jeton”, u shpreh avokati.

Kievi dhe Moska kanë shkëmbyer mijëra trupa që nga fillimi i luftës në shkurt 2022. Shkëmbimi i fundit i ngjashëm kishte ndodhur në nëntor të vitit të kaluar, kur Rusia ktheu 1,000 trupa ukrainas dhe mori 30 në këmbim. Ndërkohë, nuk ka pasur shkëmbime të të burgosurve të luftës që nga tetori 2025, me palët që akuzojnë njëra-tjetrën për vonesa.

Teksa afrohet përvjetori i katërt i pushtimit të plotë rus, përpjekjet diplomatike për një marrëveshje paqeje vazhdojnë. Javën e kaluar, negociatorë nga Rusia, Ukraina dhe SHBA u takuan në Emiratet e Bashkuara Arabe, në bisedimet e para trepalëshe që nga nisja e konfliktit.

Megjithëse bisedimet janë cilësuar konstruktive, çështje kyçe mbeten të pazgjidhura, përfshirë kërkesën e Rusisë që Ukraina të heqë dorë nga 25% e rajonit të Donetskut që ende ndodhet nën kontrollin e Kievit.

Të paktën pesë persona humbën jetën në rajonin e Kharkivit pasi një dron rus goditi një tren pasagjerësh, ndërsa Rusia ka intensifikuar sulmet ndaj infrastrukturës kritike, duke lënë shumë zona pa energji dhe ngrohje në mes të dimrit.

Deputeti i Partisë Demokratike, Ervin Salianji, ka reaguar përmes një postimi pas një takimi të zhvilluar në Himarë, duke kritikuar ashpër drejtimin aktual të Partisë Demokratike dhe mënyrën e funksionimit të strukturave të saj.

Salianji thekson se Partia Demokratike duhet të jetë modeli i epërsisë morale përballë qeverisë, por sipas tij, kjo po cenohet nga shkatërrimi i garave të brendshme, emërimi i drejtuesve pa u konsultuar me anëtarësinë dhe përjashtimi i anëtarëve e drejtuesve lokalë nga vendimmarrja.

Deputeti bën të ditur se në Himarë ka zhvilluar një takim me sekretarin e degës së PD-së, dy ish-kryetarë të degës, ish-kandidaten për kryetare bashkie dhe përfaqësues të ish-të përndjekurve politikë, për të dëgjuar shqetësimet e demokratëve lidhur me proceset e fundit në këtë degë, të cilat ai i cilëson si farsë.

Postimi i Salianjit në Facebook:

Partia Demokratike duhet të jetë modeli i epërsisë morale përballë qeverisë.
Nëse Edi Rama dhe qeveria e tij kanë shkretuar Shqipërinë përmes keqqeverisjes, është e papranueshme që lidershipi që sot drejton demokratët të shkatërrojë garat, të pilotojë kryetarë pa pyetur anëtarësinë dhe, aq më keq, ta përjashtojë anëtarët dhe drejtuesit e strukturave nga vendimmarrja.
Sot isha në Himarë, së bashku me sekretarin e degës, dy ish-kryetarët e degës, ish-kandidaten për Bashkinë dhe drejtuesin e ish-të përndjekurve politikë, për të dëgjuar shqetësimet reale të demokratëve lidhur me farsën që është zhvilluar në këtë degë. Ajo që po ndodh në Himarë është e papranueshme për çdo demokrat që beson te parimet dhe te vota e lirë.
Demokratët vendosin. Demokratët duhet të dëgjohen.
Ata janë pronarët e Partisë Demokratike dhe sakrifikuesit më të mëdhenj përballë regjimit. Pa respekt për anëtarësinë, nuk ka opozitë morale; pa demokraci të brendshme, nuk ka besueshmëri përballë qytetarëve.

Arratisja e Altin Ndocit nga burgu i Durrësit më 13 janar 2026 nuk duket si një incident i rastësishëm, por si një operacion i planifikuar në detaje, që ngre pikëpyetje serioze mbi sigurinë e sistemit penitenciar dhe përgjegjësinë institucionale të Ministrisë së Drejtësisë dhe Drejtorisë së Përgjithshme të Burgjeve.

Vetëm pak ditë pas një inspektimi zyrtar nga Ministri i Drejtësisë Besfort Lamallari ku fliste për masa të forta sigurie, një ndër të paraburgosurit më të rrezikshëm të vendit u arratis përmes një skenari që sot po cilësohet si arratisje e planifikuar në detaje.

“Pas shpinës time ndodhet dritarja e qelisë së Altin Ndocit, e cila tashmë nuk është qelia e tij dhe brenda saj ndodhen punonjësit dhe drejtuesi i burgut të Durrësit personat përgjegjës të cilët duhet të mban të burgosur Altin Ndocin. Tashmë rolet kanë ndryshuar për ironi të fatit, Altin Ndoci ndodhet i lirë, ndërsa punonjësit e burgut të Durrësit dhe drejtuesi i saj ndodhen brenda në qelinë ku ishte më parë 34-vjeçari”, kwshtu nis episodi i fundit i emisionit Newsroom, ku gazetari Igli Çelmeta kronologjinë e plotë të kësaj ngjarje.

Por si ndodhi arratisja?

Fillimisht Altin Ndoci u shoqërua nga burgu i Durrësit drejt Spitalit Rajonal të qytetit, duke pretenduar se kishte probleme shëndetësore.

Sipas rindërtimit të ngjarjes, janë vërejtur një sërë shkeljesh që ngrenë dyshime të forta: Ai u transportua pa pranga, u shoqërua nga vetëm dy punonjës policie, qëndroi rreth 3 orë në spital pa marrë trajtim real mjekësor, dhe u largua pasi goditi dy efektivë dhe doli me vrap nga kati i tretë, duke hipur në një automjet që e priste jashtë.

“Altin Ndoci pretendonte se kishte probleme me veshkat dhe po priste të merrte ndihmë mjekësore. Ai qëndroi aty deri në orën 13 e 2 minuta. Edhe pse nuk mori ndihmë mjekësore, ai i izlouar në dhomë ka pasur informacion për çfarë e priste jashtë. Dy janë skenarët, ose Altin Ndoci ditën që do të arratisej kishte gjetur një mënyrë komunikimi me celular me personat që e prisnin me makinë, ose nga dritarja e tualetit, në të cilin shkoi 5 herë pa makinën Audi që ishte jashtë spitalit dhe më pas vendosi të qëllonte policin e burgut dhe të ikte me vrap. Pasi shkoi për të pestën herë në tualet sapo del ai qëllon me grusht në krahëror një nga dy policët që ruante, bazuar në dëshminë e tyre. Me vrap ai nis arratisjen nga spitali për të zbritur nga kati i tretë”, konkludon emisioni Newsroom duke vijuar:

“Sapo dera e dhomës me kafaz hekuri u hap, sipas dosjes së prokurorisë, 38-vjeçari, i pa prangosur, qëlloi me grusht në kraharor policin e parë Fatjon Baçi. “Ai ra mbi kolegun Sali Ferrollari, dhe të dy u rrëzuan në tokë”, thuhet në dosje. Me të paraburgosurin që u iku me vrap nga kati i tretë i spitalit, njëri nga policët, i njëjti që mori goditjen, u vu në ndjekje, por sërish rrëzohet, këtë herë në shkallët e infektivit”, thuhet në dosjen e prokurorisë.

Një tjetër element në dosje, ngre një dyshim të fortë mbi kryeinfermierin. Për Altin ndocin, ai ka biseduar me mjekun kardiolog, thuhet në dosje,  kur në fakt mjekja e burgut rekomandoi konsultë me një kirurg.  Sipas këtij komunikimi i cili nuk është i qartë nëse është kryer vërtetë apo kryeinfermieri e ka krijuar të gjithën për të lënë më gjatë Altin Ndocin në spital, kardiologu kishte rekomanduar mjekim dhe rikontroll pas 2 orësh”, thuhet më tej në emision.

Burimet, kanë konfirmuar për gazetarin Igli Çelmeta se makina që dyshohet se e ndihmoi në arratisje është filmuar nga kamerat e sigurisë në itinerarin Durrës–Rrogozhinë, ndërsa destinacioni final i të arratisurit mbetet ende i paqartë.

Deri më tani, grupi hetimor po verifikon një sërë shkeljesh serioze proceduriale, përfshirë: Dalje nga burgu pa protokoll të plotë sigurie, vizita mjekësore të dyshuara si fiktive, dyshime për telefon celular dhe komunikim të paligjshëm brenda qelisë, mospërputhje në raportimet mjekësore, si dhe mundësinë e bashkëpunimit nga persona të brendshëm të institucionit.

Po ashtu, rezulton se Ndoci kishte kryer 5 vizita spitalore vetëm në tre muajt e fundit, një frekuencë që sot shihet si pjesë e një plani të parapërgatitur.

Arratisja ka rikthyer debatin mbi efektivitetin real të kontrolleve të Ministrisë së Drejtësisë, pasi inspektimi i fundit, edhe pse nga vetë Ministri i Drejtësisë nuk arriti të parandalojë një nga incidentet më të rënda të viteve të fundit.

Ekspertët e sigurisë theksojnë se rasti i Altin Ndocit nuk është vetëm përgjegjësi e nivelit të ulët operativ, por pasojë e dobësive strukturore dhe menaxheriale në sistemin e burgjeve.

Ndërsa hetimet vazhdojnë për të zbuluar nëse arratisja ishte e paguar, e ndihmuar apo e toleruar, një fakt mbetet i qartë: sistemi që duhej ta mbante pas hekurave dështoi.

Rasti i Altin Ndocit po shihet gjithnjë e më shumë jo si një incident i izoluar, por si simptomë e një krize më të thellë në menaxhimin e sigurisë në burgje./A2

Udhëtimet ndër rajonale të pasagjerëve në mbarë Kinën gjatë fluksit të Festës së Pranverës 2026, i njohur edhe si “chunyun”, pritet të arrijnë një rekord prej 9.5 miliardësh, tha të enjten Komisioni Kombëtar i Zhvillimit dhe Reformës, rregullatori ekonomik i vendit.

Gjatë fluksit 40-ditor të udhëtimeve, i cili zgjat nga 2 shkurti deri më 13 mars, udhëtimet me automjete autonome do të jenë mjeti kryesor i transportit, duke përbërë rreth 80% të totalit.

Rrjeti kombëtar hekurudhor parashikohet të trajtojë 540 milionë udhëtime pasagjerësh ndërsa sektori i aviacionit civil vlerësohet të menaxhojë 95 milionë udhëtime pasagjerësh gjatë kësaj periudhe.

Shkalla e përgjithshme dhe kulmi ditor i vëllimeve të pasagjerëve të hekurudhave dhe aviacionit civil pritet të tejkalojnë kulmet historike, tha Li Chunlin, zëvendësdrejtor i Komisionit Kombëtar të Zhvillimit dhe Reformës, në një konferencë për shtyp të enjten.

Përsa i përket kapacitetit të transportit, rrjeti hekurudhor pritet të operojë mbi 14 mijë trena pasagjerësh gjatë ditëve më të ngarkuara, me kapacitetin e pasagjerëve që rritet me 5.3% nga viti në vit, sipas Li.

Sektori i aviacionit civil po përqendrohet në rritjen e fluturimeve drejt aeroporteve kryesore dhe destinacioneve të njohura turistike. Gjatë fluksit të udhëtimeve, pritet të garantohen mesatarisht 19.400 fluturime në ditë, duke përfaqësuar një rritje vjetore prej 5%.

Reformat e drejtësisë të mbështetura nga Shtetet e Bashkuara dhe Bashkimi Evropian në Ballkanin Perëndimor, të promovuara prej vitesh si themel i shtetit të së drejtës dhe parakusht për integrimin evropian, po vihen gjithnjë e më shumë në pikëpyetje.

Në një analizë të thelluar, autori Luka Petrović, analist politik në Gjermani dhe bashkëpunëtor i organizatave ndërkombëtare për të drejtat e njeriut, argumenton se këto reforma kanë dështuar të prodhojnë drejtësi funksionale dhe kanë favorizuar, në shumë raste, centralizimin e pushtetit dhe përdorimin selektiv të ligjit.

Duke u ndalur te përvojat e Malit të Zi, Serbisë dhe veçanërisht Shqipërisë, shkrimi ngre shqetësimin se presioni për rezultate të shpejta dhe “të dukshme” ka zëvendësuar standardet demokratike, duke e kthyer reformën në drejtësi në një mjet politik më shumë sesa në garanci për qytetarët.

Më poshtë shkrimi i plotë: 

Gjeopolitika perëndimore dhe korrupsioni në Ballkan: Si përpjekjet e SHBA-së dhe BE-së për reformën në drejtësi nxitën centralizimin e pushtetit dhe dështimin e drejtësisë

Nga Luka Petrović*

Integrimi evropian në Ballkanin Perëndimor mbetet një proces i hapur dhe thellësisht i kontestuar. Pavarësisht përpjekjeve të vazhdueshme të qeverive të rajonit për të dëshmuar përparim, nismat reformuese shpesh dështojnë të përkthehen në ndryshime domethënëse institucionale. Ky tension është veçanërisht i dukshëm në fushat e shtetit të së drejtës dhe luftës kundër korrupsionit, ku përputhshmëria formale dhe performanca e jashtme kanë marrë gjithnjë e më shumë përparësi ndaj thelbit demokratik.

Gjatë disa dekadave të fundit, Shtetet e Bashkuara kanë luajtur një rol qendror në formësimin e zhvillimeve politike dhe institucionale në Ballkan. Ky angazhim ka prodhuar rezultate të përziera dhe shpesh ka qenë i sinkronizuar me agjendën e zgjerimit të Bashkimit Evropian, veçanërisht në vende si Mali i Zi, Serbia dhe Shqipëria. Megjithatë, ndonëse marrëdhëniet diplomatike mbeten të forta, rezultatet e reformave kanë qenë shumë më pak bindëse.

Në të gjithë rajonin, kandidatët për anëtarësim në BE vazhdojnë të përballen me dobësi të rrënjosura institucionale, keqpraktika politike dhe korrupsion. Një faktor kontribuues lidhet me vetë procesin e anëtarësimit. Në praktikë, ai shpesh ka theksuar rezultatet e zbatimit—arrestime, akuza penale dhe ndërtimin e shpejtë të institucioneve të reja—në dëm të garancive procedurale dhe procesit të rregullt ligjor. Ky dilemë nuk është unike për zgjerimin e BE-së. Çdo shtet që synon hyrjen në regjime ndërkombëtare ligjore ose ekonomike, qoftë BE, GJPN (ICC) apo OBT (WTO), përballet me presione të ngjashme. Kur institucionet janë të brishta, qeveritë mund t’i drejtohen përputhshmërisë performative, duke i dhënë përparësi veprimeve të dukshme mbi reformat e qëndrueshme.

Nga perspektiva e Brukselit dhe Uashingtonit, Ballkani Perëndimor ka përfaqësuar prej kohësh si një mundësi strategjike ashtu edhe ekonomike. Anëtarësimi në NATO për vende si Mali i Zi dhe Shqipëria e përforcoi këtë perceptim, duke i pozicionuar ato si pararendëse për anëtarësim eventual në BE. Administrata të njëpasnjëshme amerikane, përfshirë ato të presidentëve Obama dhe Biden, kanë mbështetur në heshtje reforma ambicioze në sektorin e drejtësisë në Shqipëri, me synim përafrimin e institucioneve vendase me standardet ligjore evropiane. Këto përpjekje, të mbështetura nga Departamenti Amerikan i Shtetit, institucionet e BE-së dhe organizata si Fondacioni “Open Society”, synonin forcimin e qeverisjes demokratike dhe frenimin e korrupsionit. Megjithatë, si me shumë nisma reformuese të drejtuara nga jashtë, kombinimi i stimujve dhe zgjedhjeve të dizajnit institucional prodhoi pasoja që nuk u parashikuan dhe nuk u adresuan plotësisht.

Reforma në drejtësi në Ballkan ka hasur vazhdimisht pengesa strukturore. Në disa raste, modelet e reformës të mbështetura nga aktorë të huaj kanë favorizuar autoritete të forta prokuroriale të izoluara nga mbikëqyrja demokratike. Në vend që të forconte llogaridhënien, ky konfigurim ka tërhequr kritika në rritje për mundësimin e drejtësisë selektive dhe persekutimit politik. Ndjekja e kredibilitetit të reformave jashtë vendit, në disa raste, ka përkuar me një konsolidim të heshtur të pushtetit brenda vendit.

Përvojat e Malit të Zi dhe Serbisë pasqyrojnë këto dinamika më të gjera. Vlerësimet e BE-së kanë vënë në dukje se Mali i Zi ka bërë pak përparim në reformën në drejtësi, pavarësisht zbatimit të Strategjisë së Reformës në Drejtësi dhe planeve përkatëse të veprimit. Ngërçi politik, dialogu i dobët institucional dhe llogaridhënia e kufizuar gjyqësore vazhdojnë, edhe pas krijimit të organeve të reja kundër korrupsionit. Në Serbi, pezullimi i financimit të USAID-it në fillim të vitit 2025 nxori në pah se si narrativat e reformës mund të ripërdoren shpejt për kontroll politik të brendshëm. Veprimet qeveritare kundër OJQ-ve kritike ndaj transparencës dhe të drejtave të njeriut—të justifikuara me pretendime për ndërhyrje të huaj—ngritën shqetësime në BE dhe theksuan brishtësinë e angazhimeve për shtetin e së drejtës kur ndryshojnë stimujt e jashtëm.

Shqipëria ofron ndoshta ilustrimin më të qartë të këtyre tensioneve. Krijimi i Strukturës së Posaçme kundër Korrupsionit dhe Krimit të Organizuar (SPAK) pas ndryshimeve kushtetuese të vitit 2016 u promovua gjerësisht si gur themeli i rinovimit gjyqësor. Aktorë si nga SHBA-ja ashtu edhe nga BE-ja u përfshinë ngushtë në formësimin dhe mbështetjen e procesit, me mbi 27.5 milionë dollarë ndihmë amerikane të drejtuara drejt sektorit të drejtësisë në Shqipëri. Pritshmëria ishte që një organ i fortë dhe i pavarur prokurorial të përballej më në fund me korrupsionin e nivelit të lartë.

Në vend të kësaj, reformat prodhuan një arkitekturë gjyqësore të shënuar nga pabarazi. SPAK-u doli si një institucion i fuqishëm, i drejtuar nga prokuroria, që operon me kontrolle të kufizuara dhe mbikëqyrje minimale demokratike. Shqetësimet e hershme se Shqipëria po bëhej një terren testimi për një interpretim të zgjeruar të pavarësisë prokuroriale fillimisht u hodhën poshtë. Me kalimin e kohës, megjithatë, këto paralajmërime kanë fituar terren. Kritikët argumentojnë gjithnjë e më shumë se autoriteti i SPAK-ut ushtrohet në mënyra që pasqyrojnë leverdi politike dhe pritshmëri të jashtme, më shumë sesa drejtësi të paanshme.

Struktura e stimujve rreth reformës antikorrupsion ndihmon në shpjegimin e këtij rezultati. E matur sipas standardeve të BE-së dhe perceptimeve ndërkombëtare, suksesi shpesh barazohet me veprime të dukshme zbatimi. Arrestimet me profil të lartë gjenerojnë tituj dhe sinjalizojnë angazhim, edhe kur hetimet mbeten të paqarta dhe shqyrtimi gjyqësor i kufizuar. Analistë dhe vëzhgues të shoqërisë civile kanë ngritur shqetësime se ndjekjet penale zbatohen në mënyrë të pabarabartë, duke synuar figura politikisht të cenueshme ndërsa të tjerë mbeten të paprekur.

Këto shqetësime janë amplifikuar nga një model i paraburgimit të zgjatur para gjykimit në disa çështje të profilit të lartë. Paraburgimi i ish-presidentit Ilir Meta nxiti akuza për ndjekje të politizuar, ndërsa arrestimi i kryebashkiakut etnik grek Fredi Beleri ngriti alarme tek mbrojtësit e të drejtave të pakicave. Më së shumti, çështja e kryebashkiakut të Tiranës, Erion Veliaj, ka ardhur të simbolizojë mangësi më të gjera procedurale brenda sistemit të drejtësisë në Shqipëri.

Veliaj është mbajtur në paraburgim për gati një vit për akuza të lidhura me korrupsionin, pavarësisht mungesës së një aktakuze të finalizuar dhe kërkesave të përsëritura për masa alternative. Në nëntor 2025, Gjykata Kushtetuese e Shqipërisë vendosi se shkarkimi i tij nga detyra ishte antikushtetues, duke e rikthyer formalisht si kryetar bashkie. Megjithatë, ai ka mbetur në paraburgim, i paaftë për të ushtruar mandatin e tij. Analistë ndërkombëtarë të së drejtës kanë paralajmëruar se mbajtja e zgjatur në paraburgim e një zyrtari të zgjedhur pa gjykim rrezikon të minojë përfaqësimin demokratik dhe besimin publik në pavarësinë e gjyqësorit.

Ndërsa fajësia ose pafajësia mund të përcaktohen vetëm përmes një procesi të drejtë gjyqësor, mënyra e trajtimit të çështjes ka përforcuar shqetësimet se paraburgimi po përdoret gjithnjë e më shumë si zëvendësim i procesit të rregullt ligjor. Në kontekstin e anëtarësimit në BE, praktika të tilla rrezikojnë të ngatërrojnë zbatimin e dukshëm me reformën e vërtetë të shtetit të së drejtës, duke e turbulluar dallimin mes llogaridhënies dhe oportunitetit.

Një ndryshim në politikën amerikane në fillim të vitit 2025 shënoi një pikë kthese të mëtejshme. Vendimi i presidentit Trump për të pezulluar operacionet e USAID-it dhe për të ndalur financimin e programeve të reformës në drejtësi në Shqipëri, përfshirë mbështetjen për SPAK-un, sinjalizoi një pranim të nënkuptuar se nismat e mëparshme ishin shndërruar në mjete të politizuara dhe jo në mekanizma për drejtësi institucionale. Ndërsa tërheqja e financimit në vetvete nuk mund të zgjidhë problemet themelore, ajo theksoi brishtësinë e modeleve të reformës të drejtuara nga jashtë.

Ballkani Perëndimor—dhe Shqipëria në veçanti—ka pa dyshim nevojë për reforma të thella dhe të qëndrueshme në drejtësi. Megjithatë, përparimi nuk varet nga numri i arrestimeve apo krijimi i institucioneve të fuqishme, por nga respektimi i parimeve demokratike. Kufizimet e paraburgimit para gjykimit, shqyrtimi i rregullt gjyqësor, transparenca në vendimmarrjen prokuroriale dhe përputhja me standardet evropiane të procesit të rregullt ligjor janë thelbësore. Pa këto garanci, reforma rrezikon të minojë vetë shtetin e së drejtës që pretendon të avancojë.

*Luka Petrović është analist politik me origjinë nga Ballkani, me bazë në Gjermani, i fokusuar në Ballkanin Perëndimor, marrëdhëniet ndërkombëtare dhe të drejtat e njeriut. Ai ka studiuar Marrëdhënie Ndërkombëtare në Universitetin Ludwig Maximilian të Mynihut (LMU). Interesat e tij kërkimore përfshijnë politikën rajonale, shoqëritë pas-konfliktit dhe angazhimin e BE-së në Evropën Juglindore. Luka ka kontribuar me kërkime dhe analiza për OJQ të mëdha ndërkombëtare, përfshirë Amnesty International, Human Rights Watch dhe Komitetin Ndërkombëtar të Kryqit të Kuq (ICRC), me fokus në monitorimin e të drejtave të njeriut, mbrojtjen e pakicave dhe komunitetet e prekura nga konfliktet në Ballkan.

Linku i shkrimit: https://neweasterneurope.eu/2026/01/29/western-geopolitics-and-balkan-corruption-how-us-and-eu-justice-reform-efforts-fuelled-power-centralization-and-failed-justice/

Ka përfunduar këtë pasdite seanca gjyqësore në Gjykatën e Posaçme kundër Korrupsionit dhe Krimit të Organizuar  për çështjen që lidhet me Ilir Metën dhe Monika Kryemadhin.

Gjatë seancës, avokati mbrojtës i Ilir Metës, Kujtim Cakrani, ka lexuar rreth gjysmën e mbrojtjes, nga një total prej 270 faqesh.

Procesi është shoqëruar edhe me debate mes palëve gjatë zhvillimit të seancës, duke reflektuar tensionet që shoqërojnë çështjen.

Leximi i plotë i mbrojtjes pritet të vijojë në seancat e ardhshme, ndërsa GJKKO do të vendosë për ecurinë e mëtejshme të procesit gjyqësor.

Çështja Meta–Kryemadhi lidhet me hetimet SPAK ndaj ish-Presidentit të Republikës, Ilir Meta, dhe ish-kryetares së Partisë së Lirisë, Monika Kryemadhi, për akuza që përfshijnë korrupsion, pastrim parash dhe mosdeklarim të pasurisë.

Hetimet kanë si bazë disa episode të dyshuara, përfshirë çështjen CEZ-DIA dhe lobimin në Shtetet e Bashkuara. Të dy të pandehurit i kanë mohuar akuzat, duke i cilësuar ato si politike, ndërsa procesi po shqyrtohet nga GJKKO.

Ish-deputeti i PD-së Edmond Spaho ka kritikuar Partinë Demokratike për bojkotimin e komisionit për reformën Zgjedhore dhe Territoriale. Spaho shkruan se braktisja e komisioneve është më e rëndë se djegia e mandateve dhe mosmarrja pjesë në proces zgjedhor.

“Per te ardhur keq qe PD nuk meson ose nuk do qe te mesoje nga historia e saj.

Bojkoti i reformes territoriale ne vitin 2014 eshte zanafilla e renjes dhe  kryegabimi i 13 vjeteve te fundit ne opozite, me i rende edhe se djegja e mandateve dhe mospjesmarrja ne zgjedhjet vendore.

Mospjesmarrja ne reformen territoriale ne vitin 2014 lejoi PS ta modeloje ndarjen territoriale ne funksion te strategjise se saj elektoriale. Qe nga ajo kohe PD nuk ka fituar asnje pale zgjedhje vendore dhe te pergjithshme.

Kete gafe te rende politike, PD ka mundesi ta korregjoje ne nje fare mase, me dakordesine e tanishme me PS per te rishikuar reformen territoriale. Rishikimi i reformes territoriale ka qene dhe mbetet kerkesa me permanente e PD gjate 13 viteve ne opozite.

PD refuzon te marre pjese dhe fillon lojrat e bajate te cilat asnjehere nuk i kane dhene rezultat.

Kjo sjellje politike eshte veteshkaterruese dhe per kete ne rradhe te pare mban pergjegjesi Kryetari i Partise, i cili ende nuk pranon qe bojkoti dhe rruga jane kanceri qe ka kapur PD qe me krijimin e saj dhe qe e nxjerrin ate jashte sistemit”, shkruan Edmond Spaho.

Në postimin e tij, Balla:“Bufi është mësuar që përroin psiqik ta zbrazë për minuta pafund në foltoren e Kuvendit. Ndërkohë që në Asamblenë Parlamentare apo parlamentet e Europës koha është 1-2 minuta. Shikojeni si ja ndërpret fjalën drejtuesja e seancës. Është koha që këto rregulla t’i kemi edhe në Kuvend. E paimagjinueshme në Europë diskutime 10 minuta”, thekson Balla.

Përfaqësuesit demokratë, Hoakin Kastro dhe Xhazmin Kroket, kanë takuar 5-vjeçarin nga Ekuadori dhe babanë e tij në një qendër ndalimi për emigrantët në Teksas të Shteteve të Bashkuara.

Ata u ndaluan disa ditë më parë nga forcat e antiemigracionit në Minesota, një rast i cili ka ngjallur zemërim lidhur me veprimet e administratës Trump.

Imazhi i fëmijës u bë shpejt viral në rrjete sociale, në të cilin shfaqej 5-vjeçari, i frikësuar nga agjentët e armatosur rëndë, ndërsa në kokë mbante një kapuç. Babai i Liam Ramos, u tha ligjvënësve demokratë se djali i tij flinte shumë, nuk konsumon ushqim dhe kërkonte mamanë, bashkë me kapuçin.

Tensione ka pasur edhe jashtë qendrës së ndalimit të emigrantëve të paligjshëm në Teksas, ku policia amerikane është përplasur me protestuesit. Ndërkohë, një gjykate amerikane pezulloi dëbimin e vogëlushit nga SHBA.

Me fokus në uljen e mbërritjeve të parregullta dhe rritjen e kthimeve të emigrantëve të paligjshëm apo azilkërkuesve, Komisioni Evropian prezantoi sot Strategjinë e tij për Azilin dhe Menaxhimin e Migracionit, e cila do të përcaktojë politikën e tij në këtë fushë për pesë vitet e ardhshme. 

Sipas Komisionit Evropian, strategjia e re mbështetet në progresin e arritur në vitet e fundit, pasi kalimet e paligjshme të kufirit janë ulur me më shumë se 50%, krahasuar me vitin 2023. 

Vetëm në vitin 2025, hyrjet e parregullta në BE u ulën me më shumë se 25%, sipas të dhënave të Frontex, me rënien më të madhe të regjistruar në Rrugën Ballkanike dhe flukset tani përqendrohen kryesisht në Mesdhe, veçanërisht nga Libia. 

“Prioriteti është i qartë: të zvogëlohen dhe të mbahen të ulëta mbërritjet e parregullta”, tha Magnus Brunner, Komisioner për Çështjet e Brendshme dhe Migracionin, duke prezantuar të ardhmen e politikës së BE-së për migracionin dhe azilin. “Abuzimi i jep migracionit një emër të keq – ai minon besimin e publikut dhe në fund të fundit dobëson aftësinë tonë për të ofruar mbrojtje dhe minon përpjekjet tona për të tërhequr talente. “Kjo është arsyeja pse, shtoi ai, “ne duhet të kontrollojmë në mënyrë efektive kufijtë tanë, të zvogëlojmë migracionin e parregullt dhe të parandalojmë abuzimin e sistemeve tona”. 

Strategjia konfirmon vullnetin e BE-së për të zbatuar një politikë “të drejtë dhe të qëndrueshme” për migracionin dhe azilin, e cila, siç theksohet, do të menaxhojë në mënyrë efektive flukset e migracionit në bashkëpunim me partnerët ndërkombëtarë, duke mbetur besnike ndaj vlerave evropiane. 

Sipas Komisionit, vetëm rreth një e katërta e atyre që u është urdhëruar të largohen nga BE-ja aktualisht kthehen në vendet e tyre të origjinës, duke e bërë urgjente forcimin e sistemit të kthimit. Këtu përfshihet edhe Shqipëria. 

Në të njëjtën kohë, Komisioni nënvizon se Evropa “duhet të vendosë se kush vjen në BE”, duke parandaluar abuzimet me sistemin e azilit. Kjo është arsyeja pse strategjia përqendrohet në forcimin e kthimeve të azilkërkuesve të refuzuar. 

Parlamenti Evropian tashmë po shqyrton një propozim për një rregullore për të krijuar një Sistem të Përbashkët Evropian të Kthimit, i cili parashikon, ndër të tjera, mundësinë e ngritjes së qendrave të kthimit jashtë kufijve të BE-së, si dhe sanksione më të rrepta, të tilla si periudha më të gjata paraburgimi, për ata që refuzojnë të largohen. Këto masa janë kritikuar nga Organizatat e të Drejtave të Njeriut, por mbështeten nga një numër në rritje i Shteteve Anëtare. 

Në të njëjtën kohë, Komisioni po promovon forcimin e kufijve të jashtëm, me zbatimin e sistemeve të reja të menaxhimit dixhital, siç janë Sistemi i Hyrjes/Daljes (EES) dhe ETIAS, kontrollet e detyrueshme kufitare dhe një mandat të përforcuar për Frontex-in. 

Theks i veçantë i vihet edhe të ashtuquajturës “diplomaci e migracionit”, duke zhvilluar partneritete gjithëpërfshirëse me vendet e origjinës dhe tranzitit të migrantëve. Në këtë kontekst, BE-ja po ndjek marrëveshje me vendet e Afrikës së Veriut, si Tunizia, Egjipti dhe Mauritania, ndërsa negociatat janë duke u zhvilluar edhe me Marokun. 

Në këmbim të mbështetjes financiare dhe investimeve, këtyre vendeve u kërkohet të kufizojnë largimet dhe të ripranojnë shtetasit e tyre që janë të pranishëm në mënyrë të parregullt në BE. 

Përveç kësaj, Komisioni Evropian ka miratuar një strategji të re për politikën e vizave, duke synuar ta përdorë atë si një mjet për presion diplomatik. BE-ja po shqyrton shtrëngimin e rregullave në mënyrë që të kufizojë lëshimin e vizave për vendet që refuzojnë të bashkëpunojnë në kthimin e migrantëve. Amendamentet përkatëse pritet të propozohen deri në fund të vitit. 

Në të njëjtën kohë, Komisioni kërkon të forcojë migrimin e ligjshëm, duke u përqendruar në tërheqjen e fuqisë punëtore dhe talenteve për të përmbushur nevojat e tregut evropian të punës dhe për të rritur konkurrueshmërinë, duke zgjeruar Partneritetet e Talenteve dhe duke thjeshtuar procedurat e njohjes së kualifikimeve. 

Në të njëjtën kohë, Komisioni po promovon masa për të lehtësuar lëvizshmërinë ligjore të studentëve, studiuesve dhe punëtorëve me kualifikim të lartë. 

Për të zbatuar strategjinë, Komisioni Evropian propozon të ndajë 81 miliardë euro sipas Kornizës Financiare Shumëvjeçare të ardhshme, për fushën e punëve të brendshme dhe financimin e veprimeve të BE-së në nivel ndërkombëtar.