Beteja e papritur e Calum McFarlane me Pep Guardiolën riktheu kujtimet e finales së Kupës së Ligës 2021, kur Ryan Mason, trajneri i përkohshëm 29-vjeçar i Tottenhamit, u përball me detyrën e rëndësishme për të tejkaluar një nga menaxherët më të mëdhenj në historinë e futbollit. Për Mason, barra shtesë ishte thatësira 13-vjeçare e Spurs pa trofe; për McFarlane, në debutimin e tij si menaxher i…
Dhjetë persona janë shpallur fajtorë nga një gjykatë në Paris për ngacmim kibernetik ndaj Brigitte Macron, bashkëshortes së Presidentit francez Emmanuel Macron. Të pandehurit akuzoheshin për përhapjen e pretendimeve të rreme rreth gjinisë dhe seksualitetit të saj, si dhe për bërjen e “komenteve dashakeqe” lidhur me diferencën 24-vjeçare në moshë mes çiftit. Këta persona u dënuan me burgim me…
Këngëtarja britanike dhe ish-anëtarja e Little Mix, Jesy Nelson, ka bërë publike se vajzat e saj binjake janë diagnostikuar me një sëmundje të rrallë gjenetike, Spinal Muscular Atrophy (SMA) tip 1, e cila prek rëndë muskujt e trupit.
Në një video emocionale në Instagram, Nelson tregoi se Ocean Jade dhe Story Monroe, të lindura para kohe në javën e 31-të, kanë pasur vështirësi në lëvizje dhe ushqyerje, çka i çoi mjekët drejt ekzaminimeve të thelluara në spitalin Great Ormond Street në Londër. Aty ajo u informua se vajzat “ndoshta nuk do të ecin kurrë” dhe se do të përballen me aftësi të kufizuara.
Këngëtarja theksoi se SMA është një sëmundje shumë serioze, e cila pa trajtim mund të jetë fatale brenda dy viteve të para të jetës. Ajo u shpreh mirënjohëse që vajzat kanë marrë trajtimin e nevojshëm, pasi sipas saj “pa të, ato do të vdisnin”.
Pavarësisht situatës së vështirë, Jesy Nelson u shpreh optimiste, duke besuar se vajzat e saj do të “sfidojnë çdo parashikim”. Ajo tha se e bëri publike historinë për të ndërgjegjësuar prindërit e tjerë dhe për të ndihmuar në diagnostikimin sa më të hershëm të fëmijëve me këtë sëmundje./mxh
Kreu i “Shqipëria Bëhet”, Adriatik Lapajt së bashku me mbështetësit e tij është rikthyer para Kryeministrisë.
Pas tensioneve të regjistruara mesditën e kësaj të diele, ku gjatë protestës të organizuar nga vetë ai u përplas me efektivët e Policisë, Lapaj ka treguar që nuk do të ndalet.
Ndonëse efektivët i hoqën çadrën e vendosur poshtë zyrës së kreut të qeverisë, ai ka vendosur që të ngrejë një tjetër dhe të vijojë qëndresën e tij e cila është futur në ditën e 28-të.
“Nuk e mendoja që do të rezistoja kaq gjatë. Nuk e mendoja që njerëzit do të marroseshin, në thonjëza, dhe do të vinin të flinin këtu.
Ai e di vetë sa e vështirë është sepse ka ngritur vetë çadër.
Dhe është shqetësuar shumë dhe nuk na lejon ne të vendosin çadra këtu.
Nëse secili nga ju mendon vetëm për vete, oborrin e vet, rrogën e vet, një ditë në një mënyrë ose tjetrën do të jeni subjekt i këtij dhunimi”, u shpreh Lapaj./mxh
Ndeshja erdhi vetëm pak ditë pas shkarkimit të trajnerit Enzo Maresca, ndërsa skuadra londineze u drejtua nga Calum McFarlane, i cili debutoi me një rezultat pozitiv për “Blues”.
Manchester City kaloi në avantazh në fund të pjesës së parë, kur Tijjani Reijnders realizoi një gol të bukur me të majtën. Megjithatë, Chelsea reagoi në minutat e fundit të takimit, me Enzo Fernandez që shënoi nga afër, duke barazuar shifrat përballë skuadrës së Pep Guardiolës.
Ndeshja u mbyll me rezultatin Manchester City 1-1 Chelsea, me londinezët që largohen nga Etihad me një pikë të rëndësishme, ndërsa “Qytetarët” e shohin veten 6 pikë larg Arsenalit kryesues./mxh
Disa persona të armatosur kanë sulmuar një fshat në Nigeri, duke vrarë të paktën 30 persona dhe duke plaçkitur dyqane.
Autoritetet shtetërore thanë se sulmuesit dolën nga një pyll pranë fshatit Kasuwan-Daji të shtunën dhe i vunë flakën tregut lokal, plaçkitën dyqane dhe rrëmbyen një numër të papërcaktuar njerëzish.
Sulmet dhe rrëmbimet nga bandat e armatosura kriminale, të njohura si banditë, kanë qenë problem në Nigeri për vite me radhë, por raportet në rajonet perëndimore dhe qendrore janë shtuar më shumë kohët e fundit.
Abdullahi Rofia, një zyrtar i Agjencisë Shtetërore të Menaxhimit të Emergjencave të Nigerit, konfirmoi raportimet se fshatarët u rrethuan dhe u vranë.
Zëdhënësi i policisë shtetërore të Nigerit, Wasiu Abiodun, tha se një ekip emergjence është vendosur për të ndihmuar të plagosurit dhe forcat e sigurisë po punojnë për të shpëtuar të rrëmbyerit./mxh
Në një deklaratë mbi Venezuelën, të mbështetur nga 26 nga 27 shtetet anëtare të BE-së, përfaqësuesja e politikës së jashtme të bllokut, Kaja Kallas, ka bërë thirrje për “qetësi dhe përmbajtje nga të gjithë aktorët”.
Vendet e BE-së kërkuan gjithashtu që “parimet e së drejtës ndërkombëtare dhe Karta e OKB-së duhet të mbështeten”, veçanërisht nga anëtarët e Këshillit të Sigurimit të OKB-së.
Trafikimi i drogës duhet të trajtohet “në respekt të plotë të… integritetit territorial dhe sovranitetit”, shton deklarata. Gjithashtu, bëhet thirrje që të respektohet vullneti i popullit venezuelian.
Kjo duket të jetë një kritikë paksa e maskuar ndaj qasjes së SHBA-së, ndërsa forcat e saj pushtuan Venezuelën për të kapur Nicolas Maduron.
Deklarata nuk u mbështet nga Hungaria, kryeministri i së cilës i ekstremit të djathtë, Viktor Orban, është një aleat i ngushtë i Trump./mxh
Dy persona kanë humbur jetën pasi rrufeja goditi një grup prej rreth 150 personash që ishin mbledhur për festivalin “Di Trupa” në fshatin Matibestad, në Afrikën e Jugut.
Sipas raportimeve të shërbimeve shëndetësore të Afrikës së Jugut, 13 persona janë në gjendje kritike.
Bëhet me dije se shumica e personave kanë pësuar djegie të lehta të shkaktuara nga goditja e rrufesë./mxh
Pesë qeveri të majta në Amerikën Latine, Brazili, Kili, Kolumbia, Meksika dhe Uruguai, së bashku me Spanjën, kanë publikuar sot një deklaratë të përbashkët, në të cilën kundërshtojnë “çdo përpjekje për kontroll” të Venezuelës, një ditë pas operacionit ushtarak të Shteteve të Bashkuara.
Në deklaratë, gjashtë vendet shprehin shqetësimin e tyre për stabilitetin rajonal pas bombardimeve ajrore të ushtrisë amerikane dhe arrestimit të presidentit venezuelian Nicolás Maduro dhe bashkëshortes së tij, Cilia Flores. Ata janë transferuar me forcë në SHBA dhe pritet të dalin të hënën para gjykatës në Nju Jork, nën akuzën e “narkoterrorizmit”.
“Shprehim shqetësimin tonë ndaj çdo përpjekjeje për kontroll qeveritar, administrim apo pronësi të jashtme mbi burimet natyrore ose strategjike të Venezuelës”, thuhet në deklaratën e publikuar nga Ministria e Jashtme e Kolumbisë.
Reagimi vjen pasi presidenti amerikan Donald Trump deklaroi të shtunën se do t’u lejojë kompanive amerikane të naftës të shfrytëzojnë burimet energjetike të Venezuelës, e cila zotëron rreth 17% të rezervave botërore të naftës bruto.
Trump po ashtu deklaroi se Shtetet e Bashkuara do të “administrojnë vendin derisa të jetë e mundur një tranzicion i sigurt, i përshtatshëm dhe i kujdesshëm”, një deklaratë që ka nxitur reagime të forta ndërkombëtare dhe shqetësime për sovranitetin e Venezuelës./mxh
Një incident i ri është regjistruar në detin Baltik. Kryeministrja e Letonisë, Evika Silinia ka deklaruar ditën e sotme se një kabllo optike që i përket një kompanie private është dëmtuar, ndërsa kanë nisur hetimet për zbardhjen e incidentit.
Kablloja lidh Lituaninë dhe Letoninë dhe ende nuk dihet se çfarë e ka shkaktuar incidentin, tha Qendra Kombëtare e Menaxhimit të Krizave e Lituanisë në një deklaratë.
Rajoni i Detit Baltik është në gatishmëri të lartë pas një sërë ndërprerjesh të kabllove të energjisë, lidhjeve të telekomunikacionit dhe tubacioneve të gazit që kur Rusia pushtoi Ukrainën në vitin 2022 dhe aleanca ushtarake e NATO-s ka rritur praninë e saj me fregata, avionë dhe dronë detarë.
Incidenti i fundit bëhet publik pesë ditë pasi policia finlandeze sekuestroi një anije mallrash që po udhëtonte nga Rusia për në Izrael, me dyshimin për sabotim të një kablloje telekomunikacioni nënujor që shtrihej nga Helsinki përmes Gjirit të Finlandës deri në Estoni./mxh
Torino është rikthyer te fitorja në Serinë A, duke mundur Hellas Verona me rezultatin e pastër 3-0 në transfertë.
Kristjan Asllani nuk u aktivizua për asnjë minutë në këtë takim. Mosaktivizimi i tij ka shtuar zërat për një largim të mundshëm nga skuadra granata që në merkaton e janarit.
Sipas raportimeve, mesfushori shqiptar mund të rikthehet te Interi, klub që zotëron kartonin e tij. Në fushë, Torino e zhbllokoi ndeshjen me golin e Giovani Simeones në minutën e 10-të.
Casadei shënoi golin e dytë në minutën e 87-të. Goli i tretë u realizua nga Njie, pas asistit të Ardian Ismajlit.
Me këtë fitore, Torino ngjitet në vendin e 11-të me 23 pikë, ndërsa Verona mbetet e 18-ta me 12 pikë./mxh
Christopher Nkunku mbetet në orbitën e Fenerbahçes, teksa po rikuperohet nga një problem në kavilje që e mbajti jashtë në ndeshjen ndaj Cagliarit.
Klubi turk, i drejtuar nga Giacomo Tedesco, synon ta afrojë sulmuesin francez për të luftuar për kreun e kampionatit, aktualisht i udhëhequr nga Galatasaray.
Fenerbahçe po përpiqet të shfrytëzojë raportin e mëparshëm mes Tedesco dhe Nkunku nga koha te Leipzig. Megjithatë, lojtari nuk është plotësisht i bindur për një transferim në kampionatin turk. Milani është i hapur për largimin, por kërkon të amortizojë investimin e bërë gjatë verës.
Oferta fillestare prej 25 milionë eurosh konsiderohet e pamjaftueshme. Shifra e pranueshme për mbylljen e marrëveshjes vlerësohet rreth 35 milionë euro. Vendimi përfundimtar do të varet nga oferta e Fenerbahçes dhe dëshira e lojtarit./mxh
Rey Manaj dëshiron të largohet nga Sharjah në Emiratet e Bashkuara Arabe dhe po kërkon një rikthim në Turqi.
Sulmuesi shqiptar ka kontaktuar drejtuesit e Sivasspor, klub nga i cili u transferua gjatë verës për 2 milionë euro.
Aktualisht, Sivasspor militon në kategorinë e dytë turke. Manaj ka zhvilluar 16 ndeshje me Sharjah, duke shënuar 6 gola. Megjithatë, ai dëshiron të mbyllë më herët aventurën në Emirate.
Sipas mediave turke, lojtari pritet të udhëtojë personalisht në Turqi për bisedime. Qëllimi është gjetja e një formule transferimi të pranueshme për të gjitha palët. Vështirësia kryesore mbetet situata financiare e Sivasspor./mxh
Një shqiptar është vënë në pranga në Itali pasi iu kap një sasi e madhe lënde narkotike. Sipas raportimeve të mediave italiane, në banesën e 33-vjeçarit shqiptar është gjetur dhe sekuestruar 30 kilogramë kokainë, 4 kilogramë heroinë dhe 80 kilogramë hashash.
Kjo është sasia më e madhe e sekuestruar ndonjëherë në zonën e Teramos, një “treg”i konsoliduar për trafikimin e të gjitha llojeve të drogës dhe që kontrollohet nga klanet shqiptare.
Gjatë kontrolleve në kuadër të operacionit për arrestimin e shqiptarit, oficerët gjetën një bllok ku ishin të shënuar disa emra dhe numra telefoni. Bëhet me dije se shqiptari nuk ka precedentë të mëparshëm penalë, ndërsa po hetohet nëse ka persona të tjerë të përfshirë në ngjarje./mxh
Një zyrtar i lartë venezuelian ka deklaruar sot se qeveria e përkohshme e vendit do të qëndrojë në mbështetje të presidentit Nicolas Maduro. Ky i fundit ndodhet në një qendër paraburgimi në Nju Jork duke pritur paraqitjen në gjykatë të hënën për akuza për drogë, pasi presidenti i SHBA-së Donald Trump urdhëroi arrestimin e tij.
“Këtu, uniteti i forcës revolucionare është më se i garantuar, dhe këtu ka vetëm një president, emri i të cilit është Nicolas Maduro Moros. Askush të mos bjerë pre e provokimeve të armikut”, tha Ministri i Brendshëm Diosdado Cabello në një audio të ndarë nga partia socialiste në pushtet PSUV të dielën, ndërsa bëri thirrje për qetësi.
Zëvendëspresidentja Delcy Rodriguez, e cila shërben gjithashtu si ministre e naftës, ka marrë përsipër detyrën si udhëheqëse e përkohshme e vendit.
Për shkak të lidhjeve të saj me sektorin privat dhe njohurive të thella për naftën, burimin kryesor të të ardhurave të vendit, Rodriguez është konsideruar prej kohësh si anëtarja më pragmatike e rrethit të ngushtë të Maduros.
Qeveria e Venezuelës ka thënë për muaj të tërë se fushata e Trump është një përpjekje për të marrë në zotërim burimet e mëdha natyrore të vendit, veçanërisht naftën e tij, dhe zyrtarët kanë marrë shumë parasysh komentet e Trump të së shtunës mbi këtë temë, kur ai tha se kompanitë e mëdha të naftës amerikane do të hynin në vend.
“Jemi të indinjuar sepse në fund gjithçka u zbulua — u zbulua se ata duan vetëm naftën tonë”, shtoi Cabello, i cili ka lidhje të ngushta me ushtrinë.
Kompania shtetërore e naftës e Venezuelës PDVSA po u kërkon disa prej ndërmarrjeve të saj të përbashkëta të ulin prodhimin e naftës bruto duke mbyllur fushat e naftës ose grupet e puseve për shkak të një paralize të eksportit, thanë për Reuters tre burime pranë vendimit./mxh
Një aksident i rëndë me pasojë humbjen e jetës së një këmbësori është regjistruar sot në lagjen numër katër, në rrugën “Mars 91”, paralelisht me zonën e portit.
Sipas informacioneve paraprake, këmbësori është përplasur nga një automjet teksa po lëvizte në rrugë dhe si pasojë e plagëve të marra ka ndërruar jetë në vendngjarje.
Menjëherë pas aksidentit, në vend kanë mbërritur shërbimet e Policisë dhe autoambulanca, ndërsa zona është rrethuar për të kryer veprimet procedurale.
Policia ka shoqëruar dhe ndaluar drejtuesin e mjetit, ndërkohë që grupi hetimor po punon për të zbardhur rrethanat dhe shkaqet e aksidentit, si dhe për të përcaktuar përgjegjësitë ligjore.
Hetimet vijojnë për të sqaruar nëse aksidenti ka ardhur si pasojë e shkeljes së rregullave të qarkullimit rrugor, shpejtësisë apo faktorëve të tjerë./mxh
Presidenti amerikan Donald Trump ka bërë publike një listë me të dhëna mbi përfitimin e ndihmave sociale nga familjet migrante që jetojnë në Shtetet e Bashkuara, të ndara sipas vendeve të origjinës.
Lista është publikuar në rrjetin social “Truth Social” dhe përfshin dhjetëra shtete nga e gjithë bota, mes tyre edhe Kosova dhe Shqipëria.
Sipas këtyre të dhënave, rreth 46 për qind e familjeve me origjinë nga Kosova që jetojnë në Shtetet e Bashkuara rezultojnë përfituese të ndihmave sociale nga shteti amerikan. Ndërkohë, për familjet emigrante nga Shqipëria, kjo përqindje është 41.3 për qind.
Të dhënat kanë ngjallur reagime dhe diskutime, duke qenë se Shtetet e Bashkuara janë parë tradicionalisht si vendi i mundësive dhe i integrimit ekonomik për emigrantët. Megjithatë, lista sugjeron se një pjesë e konsiderueshme e familjeve migrante vazhdojnë të mbështeten te programet e asistencës sociale./mxh
Last Updated on 04/01/2026 by Monika
Greqia ka hapur sërish hapësirën e saj ajrore pas një mbylljeje të përkohshme. Autoriteti Helenik i Aviacionit Civil në njoftimin e fundit ka bërë me dije se problemi që erdhi nga infrastruktura e telekomunikacionit është zgjidhur.
Gjithashtu njoftohet se trafiku ajror ka nisur si normalisht, ndërsa bëhet me dije se shkaqet e problemit teknik po hetohen nga Inxhinierët Elektronikë të Autoritetit të Aviacionit Helenik.
Njoftimi i Autoritetit Helenik të Aviacionit:
Problemi teknik që ndodhi njëkohësisht në frekuenca të shumëfishta në formën e zhurmës, me origjinë, sipas informacioneve fillestare, nga infrastruktura e telekomunikacionit dhe komunikimet e prekura brenda FIR të Athinës, tani është rivendosur plotësisht.
Frekuencat dhe sistemet operative të linjave telefonike të komunikimit u rikthyen në funksionim të plotë që nga ora 17:00 sipas orës lokale, dhe njoftimi përkatës i NOTAM u pezullua.
Kapaciteti i hapësirës ajrore dhe rrjedha e trafikut ajror u rikthyen në nivele normale që nga ora 17:45. Siguria e fluturimit u sigurua plotësisht në të gjitha fazat e menaxhimit të incidentit, në përputhje me standardet ndërkombëtare.
Shkaqet rrënjësore të problemit teknik, i cili nuk është regjistruar në të kaluarën në këtë masë dhe formë, janë nën hetim të plotë nga Inxhinierët Elektronikë të Autoritetit të Aviacionit Helenik, në përputhje me procedurat e përcaktuara.
Në të njëjtën kohë, kontrollet po vazhdojnë në të gjitha stacionet e transmetimit, ndërsa një fluturim kontrolli i spektrit të frekuencave po kryhet nga një avion i Autoritetit të Aviacionit Helenik, me ndihmën e EETT.
Autoriteti i Aviacionit Helenik po punon ngushtë me operatorin e komunikimeve OTE për të dokumentuar plotësisht incidentin dhe për të marrë masa parandaluese./mxh
Ambasadori i Danimarkës në Shtetet e Bashkuara të Amerikës ka bërë sot thirrje që të respektohet integriteti territorial i Groenlandës.
Thirrja e ambasadorit vjen pas një postimi në platformën “X” nga gruaja e zëvendësshefit të stafit të Shtëpisë së Bardhë, Stephen Miller, e cila postoi një foto të hartës së Groenlandës të mbuluar me ngjyrat e flamurit amerikan. Katie Miller e shoqëroi foton me mbishkrimin: “SË SHPEJTI”.
“Një kujtesë miqësore për Shtetet e Bashkuara dhe Mbretërinë e Danimarkës: ne jemi aleatë të ngushtë dhe duhet të vazhdojmë të punojmë së bashku si të tillë”, tha ambasadori danez në Shtetet e Bashkuara, Jesper Moller Sorensen, në përgjigje të postimit në “X” të Katie Miller.
“Dhe po, ne presim respekt absolut për integritetin territorial të Mbretërisë së Danimarkës”, shtoi më tej ai.
Presidenti i SHBA-së, Donald Trump, ka deklaruar disa herë se Groenlanda, një territor danez me autonomi të gjerë, duhet të bëhet pjesë e Shteteve të Bashkuara, duke përmendur arsye sigurie dhe interes në burimet minerale të ishullit.
Groenlanda dhe Danimarka i kanë hedhur poshtë pretendimet e Trump. Tensionet midis dy vendeve u përshkallëzuan pas vendimit të Trump në fund të dhjetorit për të emëruar guvernatorin e Luizianës, Jeff Landry, si të dërguar special në Grenlandë./mxh
Pas arrestimit të tij, presidenti i Venezuelës, Nicolás Maduro, është vënë re duke u shfaqur me veshje të ndryshme në çdo paraqitje publike, duke nxitur komente dhe spekulime në media. Megjithatë, arsyeja e këtij ndryshimi nuk lidhet me zgjedhje stilistike, por me kushtet e udhëtimit dhe ndryshimet ekstreme të klimës gjatë transferimit të tij.
Menjëherë pas arrestimit, Maduro u dërgua në një anije luftarake amerikane, ku edhe u publikuan pamjet e para pas operacionit të forcave speciale Delta. Në këto pamje, ai shihet i veshur me një xhaketë sportive gri dhe një bluzë të bardhë. Burime pranë operacionit bëjnë të ditur se në momentin kur komandot amerikane e nxorën nga dhoma ku ndodhej së bashku me bashkëshorten e tij, Cilia Flores, ai ishte veshur lehtë, duke mbajtur vetëm bluzën e bardhë, në përputhje me temperaturat e larta në Venezuelë.
Ditën e arrestimit, në Caracas temperaturat arritën rreth 26 gradë Celsius, më të larta se mesatarja e muajit janar, e cila zakonisht sillet rreth 22 gradë. Kjo shpjegon edhe veshjen e lehtë të Madurros në fazën e parë të ndalimit.
Situata ndryshoi gjatë udhëtimit drejt Shteteve të Bashkuara. Me afrimin në New York, Maduro u pa me bluzë me mëngë të gjata, kapuç dhe më pas xhaketë të zezë, për t’u përshtatur me temperaturat shumë të ulëta. Në momentin e mbërritjes, termometri në qytet shënonte deri në -6 gradë Celsius, ndërsa klima e lagësht dhe dimri i ashpër e bëjnë të ftohtin të ndihet edhe më ekstrem, veçanërisht për persona të mësuar me klimë të ngrohtë dhe të thatë.
Sipas studimeve shkencore, përfshirë një studim të Universitetit të Uiskonsinit, kalimi i menjëhershëm nga një klimë e ngrohtë në një klimë të ftohtë rrit rrezikun për sëmundje të frymëmarrjes, si kollë, teshtima, dhimbje fyti dhe lodhje. Për këtë arsye, autoritetet kanë lejuar që ai të vishet më trashë, me pulovër, xhaketë dhe kapuç, për të ruajtur shëndetin gjatë paraburgimit.
Ndërkohë, pantallonat dhe këpucët e Madurros nuk kanë ndryshuar. Ai mban çorape të trasha të bardha dhe papuçe, veshje standarde për të gjithë të arrestuarit në Shtetet e Bashkuara. Kjo praktikë synon të reduktojë rrezikun e dëmtimeve dhe të parandalojë përhapjen e baktereve në ambientet e përbashkëta të paraburgimit./mxh
Login