Negociatorët ukrainas dhe rusë u takuan në Abu Dhabi për të trajtuar çështjen jetike të territorit, pa asnjë shenjë kompromisi, ndërsa sulmet ruse e zhytën Ukrainën në krizën e saj më të thellë energjetike të luftës katërvjeçare.

Kievi është nën presion në rritje nga SHBA-të për të arritur një marrëveshje paqeje në luftën e shkaktuar nga pushtimi i Rusisë qe nga shkurti 2022, me Moskën që kërkon që Kievi të lëshojë të gjithë zonën e saj lindore industriale të Donbasit përpara se të ndalojë luftimet.

Presidenti ukrainas Volodymyr Zelenskiy tha se mosmarrëveshja territoriale do të jetë një përparësi kryesore e bisedimeve në Emiratet e Bashkuara Arabe.

Bisedimet, që pritet të zgjasin dy ditë, zhvillohen në një sfond të sulmeve të intensifikuara ruse në sistemin energjitik të Ukrainës, të cilat kanë ndërprerë energjinë elektrike dhe ngrohjen në qytete të mëdha si Kievi, ndërsa temperaturat janë nën zero gradë.

Gazetari Arbër Hitaj, i ftuar në emisionin “3D” në RTSH, ka analizuar domethënien gjeopolitike të nismës së re për “Bordin e Paqes”, duke e vendosur atë përballë krizës së besimit që ka përfshirë Organizatën e Kombeve të Bashkuara.

Sipas Hitaj, ky zhvillim është një lajm pozitiv si për Shqipërinë, ashtu edhe për Kosovën, veçanërisht duke parë dështimin e OKB-së për t’u reformuar pas rënies së Murit të Berlinit dhe shpërbërjes së Bashkimit Sovjetik.

Hitaj argumentoi se OKB-ja ka humbur rolin e saj si ndërmjetësues efikas, duke u përfshirë shpesh në skandale financiare dhe duke dështuar në zgjidhjen e konflikteve.

“Ka pasur dhe skandale financiare. Një test ishte p.sh. konflikti mes Kamboxhias me Tajlandën. OKB nuk bëri asnjë ndërmjetësim, u desh ndërhyrja e Trump. Kritika ka pasur dhe për disa organizata të OKB-së në Gaza,” theksoi gazetari.

Kosova e barabartë në tryezë

Pika më e fortë e analizës së Hitajt ishte përfitimi diplomatik i Kosovës. Sipas tij, pjesëmarrja në Bordin e Paqes i jep Prishtinës atë që OKB-ja ia mohon: barazinë në tavolinë.

“Edhe Kosova do ulet si e barabartë. Është një njohje de facto që i jepet Kosovës, pasi në OKB ende nuk njihet. Është një akt simbolik dhe diplomatik njohjeje. Kjo për Kosovën është kapërcim i madh pozitiv,” u shpreh ai.

Për sa i përket Shqipërisë, Hitaj e vlerësoi si një zhvillim pozitiv faktin që vendi është ndër themeluesit e këtij Bordi në Ballkan, duke siguruar vëmendjen e SHBA-së. Ai sqaroi se kjo nismë nuk bie ndesh me aspiratën evropiane.

“Shqipëria mund të jetë dhe në Bord dhe të aspirojë për në BE. Të kesh vëmendjen e SHBA është pozitive,” përfundoi Hitaj, duke shtuar se nisma është ende në hapat e parë dhe mbetet për t’u parë se çfarë forme përfundimtare do të marrë.

Ministri i Turizmit, Kulturës dhe Sportit, Blendi Gonxhja, zhvilloi sot në 23 janar një takim me kryetarin e Bashkisë së Madridit, José Luis Martínez-Almeida, gjatë pjesëmarrjes së tij në Panairin Ndërkombëtar të Turizmit #FITUR në Madrid, një nga ngjarjet më të mëdha dhe më prestigjioze në fushën e turizmit në botë.

Takimi mes dy zyrtarëve u fokusua në bashkëpunimin ndërkombëtar për promovimin e turizmit, shkëmbimin e përvojave dhe mundësive për zhvillimin e projekteve të përbashkëta, që mund të sjellin përfitime të ndërsjella për Shqipërinë dhe Spanjën.

“Kënaqësi të takoja Kryetarin e Bashkisë së Madridit, José Luis Martínez-Almeida, gjatë #FITUR, në një panair lider që mbetet një platformë kyçe për dialogun dhe bashkëpunimin ndërkombëtar në fushën e turizmit”, shkruan Gonxhja në rrjetet sociale.

Ky takim vjen në një moment kur Shqipëria synon të rrisë prezencën e saj në tregjet ndërkombëtare të turizmit dhe të promovojë destinacionet e saj kulturore, historike dhe natyrore si një alternativë atraktive për turistët nga Evropa dhe më gjerë. Zyrtarët e të dy vendeve diskutuan gjithashtu mundësitë për organizimin e aktiviteteve kulturore të përbashkëta, shkëmbimin e eksperiencave në menaxhimin e destinacioneve turistike dhe nxitjen e turizmit urban dhe kulturor.

Administrata e Presidentit Donald Trump po shqyrton një nga lëvizjet më agresive të dekadave të fundit ndaj Kubës: vendosjen e një bllokade të plotë detare për të ndaluar çdo import nafte në ishull.

Lajmi, i bërë i ditur nga burime për mediat amerikane, sinjalizon një përshkallëzim të shpejtë të strategjisë së Uashingtonit për të nxitur ndryshimin e regjimit në Havanë përmes “asfiksisë” ekonomike.

Rubio, arkitekti i linjës së ashpër

Sipas burimeve të informuara, kjo iniciativë mbështetet fuqishëm nga Sekretari i Shtetit, Marco Rubio, i njohur për qëndrimet e tij radikale ndaj qeverisë kubane. Brenda administratës, energjia po shihet si “pika e dobët” që mund të çojë në rrëzimin e regjimit.

“Energjia është mjeti për të mbytur dhe shkatërruar regjimin kubanez,” deklaroi një nga burimet për Politico, duke bërë të qartë se qëllimi është paralizimi total i funksionimit të shtetit komunist.

Përtej bllokadës me Venezuelën

Nëse miratohet, ky hap do të ishte shumë më i rëndë se sanksionet e shpallura vetëm një javë më parë, të cilat ndalonin specifikisht importet e naftës që Kuba merrte nga Venezuela. Një bllokadë e plotë detare do të nënkuptonte përdorimin e forcave ushtarake detare të SHBA-së për të ndaluar çdo anije çisterne, pavarësisht origjinës, që tenton të ankorohet në portet kubane.

Deri më tani, Presidenti Trump nuk ka marrë një vendim përfundimtar, por opsioni i bllokadës mbetet në tavolinë si një mjet presioni ekstrem. Kritikët paralajmërojnë se një lëvizje e tillë mund të shkaktojë një krizë humanitare të paprecedentë në ishull, ndërsa mbështetësit e shohin si rrugën e vetme për t’i dhënë fund diktaturës shumëvjeçare.

Gjykata e Masave Shtrënguese në Sion ka marrë vendimin e diskutueshëm për të liruar nga qelia Jacques Moretti-n, pronarin e hotelit “Constellation” në Crans-Montana, vendi ku humbën jetën 40 persona gjatë natës së ndërrimit të viteve.

Vendimi, i marrë mbrëmjen e sotme (23 Janar 2026), ka shkaktuar reagime të ashpra diplomatike nga Italia, pasi një pjesë e madhe e viktimave ishin shtetas italianë.

Liria me 200 mijë franga

Gjykatësit vendosën se Moretti mund të hetohet në gjendje të lirë pas pagesës së një garancie pasurore prej 200,000 frangash zvicerane. Sipas burimeve gjyqësore, shuma u pagua nga një “mik i ngushtë” i të akuzuarit, i cili ka kërkuar të mbetet anonim.

Gjykata argumentoi se rreziku i arratisjes është rivlerësuar dhe mund të menaxhohet përmes masave të tjera shtrënguese, duke refuzuar kërkesën e Prokurorisë për t’i vendosur byzylyk elektronik. Masat e vendosura përfshijnë:

Ndalimin absolut të largimit nga Zvicra.

Dorëzimin e pasaportës dhe dokumenteve të identitetit.

Detyrimin për t’u paraqitur çdo ditë në stacionin e policisë.

Hetimet për masakrën

Jacques Moretti dhe bashkëshortja e tij, Jessica Maric, janë nën hetim për vepra të rënda penale: vrasje të shumëfishtë, plagosje dhe zjarrvënie. Prokuroja e Përgjithshme e Valais, Beatrice Pilloud, konfirmoi se për momentin vetëm menaxherët janë nën hetim, por rrethi mund të zgjerohet. Deri më tani, rreth 130 persona (të plagosur dhe familjarë të viktimave) janë regjistruar si palë civile në proces.

Zemërim në Romë: “Fyerje për viktimat”

Lajmi i lirimit të Morettit është prituri me indinjatë të thellë nga qeveria italiane.

Kryeministrja Giorgia Meloni reagoi ashpër në rrjetin social “X”:

“Jam e indinjuar nga lajmi. E konsideroj një fyerje për kujtimin e viktimave të tragjedisë së Vitit të Ri dhe për familjet e tyre që vajtojnë. Qeveria italiane do t’i mbajë përgjegjëse autoritetet zvicerane.”

Në të njëjtën linjë ishte edhe Zv/Kryeministri Antonio Tajani, i cili e cilësoi vendimin si një “zemërim të vërtetë ndaj dhimbjes së familjeve”, ndërsa lideri i Lega-s, Matteo Salvini, postoi foton e pronarëve të hotelit me diçiturën e shkurtër: “Turp!”.

Nga Gordon Brown, Project Syndicate

Vendimi i Presidentit Donald Trump për t’i tërhequr Shtetet e Bashkuara nga 66 organizata ndërkombëtare synon, në dukje, të shkurtojë shpenzimet e panevojshme, por përfshirja e agjencive që mbështesin vajzat dhe gratë nënvizon arbitraritetin dhe ndjesinë e hakmarrjes pas një hapi të tillë. Pasojat për njerëzit në mbarë botën do të jenë shkatërrimtare.

Më 27 janar, tërheqja e dytë e Presidentit amerikan Donald Trump nga Marrëveshja e Parisit për klimën do të hyjë përfundimisht në fuqi. Kjo vjen pas njoftimit të tij më 7 janar se Shtetet e Bashkuara do të largohen edhe nga 66 organizata të tjera ndërkombëtare, përfshirë 31 entitete të Kombeve të Bashkuara dhe 35 organizma jashtë OKB-së, të cilat administrata Trump i konsideron tashmë të papranueshme.

Asnjëherë më parë një udhëheqës kombëtar nuk i ka prerë në shkallë të tillë lidhjet me komunitetin ndërkombëtar brenda një muaji të vetëm. Po aq e paprecedentë është edhe deklarata e hapur: “Nuk kam nevojë për të drejtën ndërkombëtare”, siç u shpreh Trump gjatë një intervistë për New York Times disa javë më parë. Ai shtoi se vetëm ai do të luante rolin e arbitrit për të vendosur se kur këto kufizime do të zbatoheshin për SHBA-në dhe se pushteti i tij do të kufizohej vetëm nga “moraliteti i tij”.

Groenlanda, me të drejtë, është kthyer në një çështje shqetësuese për shkak të kërcënimeve amerikane për ta marrë atë. Por kjo anashkalon faktin se ndërkaq njerëz po vdesin si pasojë e brutalitetit amerikan. Gjatë vitit të kaluar, administrata Trump shkurtoi ndjeshëm fondet për ndihmën humanitare globale dhe programet shëndetësore, gjë që, sipas Qendrës për Zhvillim Global, ka gjasa të rezultojë në rreth një milion vdekje më shumë çdo vit. Një studim i Institutit të Shëndetit Global të Barcelonës dhe organizatave të tjera zbuloi se shkurtimet e ndihmës nga SHBA-ja dhe Evropa së bashku mund të shkaktojnë deri në 22.6 milionë vdekje shtesë – përfshirë 5.4 milionë fëmijë nën moshën pesë vjeç – në vendet në zhvillim deri në vitin 2030. Duke qenë se zhvillimet e fundit nënkuptojnë shkurtime edhe më të thella të mbështetjes ndërkombëtare, këto shifra me siguri do të duhet të rishikohen në rritje.

Sigurisht, e dinim tashmë se administrata do të vinte në shënjestër institucione globale si UNESCO, Organizata Botërore e Shëndetësisë, Agjencia e OKB-së për Refugjatët, Agjencia e OKB-së për Ndihmën dhe Punët për Refugjatët Palestinezë në Lindjen e Afërt, si dhe Fondi i Kombeve të Bashkuara për Popullsinë (UNFPA). Por, mbi të gjitha tani e dimë se Amerika do të bëhet vendi i parë që braktis vetë kornizën për arritjen e marrëveshjeve mbi ndryshimet klimatike, Konventën Kornizë të OKB-së për Ndryshimet Klimatike, nga e cila do të dalë pas një viti.

Ndërkohë, askush nuk duhet të dyshojë se mandati i Bordit të ri të Paqes të Trumpit do të ketë pasoja të mëdha. Kjo përpjekje për të ofruar një alternativë ndaj përpjekjeve të OKB-së për paqebërje dhe paqeruajtje, të cilat vazhdimisht kanë qenë të nënfinancuara, përfaqëson një ndryshim madhor në politikën e kahershme amerikane.

Sulmi ndaj agjencive të përkushtuara ndaj sundimit ndërkombëtar të ligjit, nga i cili Amerika ka përfituar prej kohësh – përfshirë Komisionin e së Drejtës Ndërkombëtare, Komisionin e Venecias të Këshillit të Evropës, Institutin Ndërkombëtar për Demokraci dhe Asistencë Zgjedhore, si dhe Institutin Ndërkombëtar për Drejtësi dhe Sundimin e Ligjit – ndjell lajme të këqija rreth ligjshmërisë së veprimeve të ardhshme të SHBA-së. Kjo duket gjithashtu shumë larg shpjegimit zyrtar se qëllimi është ulja e shpenzimeve dhe kundërshtimi i agjendës “ëoke”.

Dalja nga agjencitë që mbështesin barazinë gjinore dhe mbrojtjen e të drejtave të vajzave dhe grave vështirë se mund të justifikohet duke i etiketuar ato si “programe ideologjike” në kundërshtim me sovranitetin amerikan, siç thuhet në deklaratën zyrtare. Duhet pyetur se si një agjenci si UN Women mund të konsiderohet “e panevojshme” dhe “shpërdoruese”, kur ajo ka ndihmuar më shumë se 80 vende të hartojnë buxhete të ndjeshme ndaj gjinisë dhe kur agjencia e saj motër, UNFPA, mbështet shëndetin amësor.

Vendimi për t’u tërhequr nga entitete brenda sistemit të OKB-së që fokusohen te mbështetja e vajzave dhe grave viktima të luftërave civile, ndryshimeve klimatike dhe krizave të tjera shkon drejt hakmarrjes së pastër. Këto përfshijnë Education Cannot Ëait (të cilin unë e kam drejtuar më parë), një fond që u siguron arsim miliona fëmijëve refugjatë; Zyrën e Përfaqësuesit Special të Sekretarit të Përgjithshëm për Dhunën Seksuale në Konflikt (OSRSG-SVC); dhe Përfaqësuesin Special të Sekretarit të Përgjithshëm për Dhunën ndaj Fëmijëve (SRSG-VAC). Nëse këto organizata nuk financohen mjaftueshëm, disa nga gratë dhe vajzat në gjendje më vulnerabël në botë do të përballen me rrezik më të lartë dhune dhe vdekshmërie amësore.

“Është e papranueshme  ti’u dërgojmë këtyre institucioneve gjakun, djersën dhe pasurinë e popullit amerikan, kur kanë pak ose aspak rezultate,” shpjegoi Sekretari amerikan i Shtetit, Marco Rubio. Por të pretendosh se qytetarët amerikanë janë ata që vuajnë nga agjencitë e përqendruara në lehtësimin e vuajtjeve të vajzave dhe grave në vendet me të ardhura të ulëta është krejtësisht e pasinqertë. Kjo sugjeron se njohja nga Deklarata e Pavarësisë e “jetës, lirisë dhe kërkimit të lumturisë” si të drejta të patjetërsueshme ende vlen vetëm për burrat.

Këto agjenci – OSRSG-SVC dhe UN ËWomen – financojnë strehimore, ofrojnë ndihmë ligjore dhe mbështetje psikosociale për gratë e cenueshme. Ato punojnë për t’i dhënë fund martesave të minorenëve dhe gjymtimit gjenital të detyruar. Në shumë zona konflikti në botë, gratë e zhvendosura do të humbasin tani aksesin në hapësira të sigurta, në një kohë kur raportet tregojnë se dhuna seksuale e lidhur me konfliktin u rrit me 25% nga viti 2023 në 2024.

Duke e parë mbrojtjen e fëmijëve si thelbësore për arritjen e Objektivave të Zhvillimit të Qëndrueshëm të OKB-së deri në vitin 2030, SRSG-VAC punon krah për krah me OBSH-në për të përmirësuar rezultatet shëndetësore për gratë dhe fëmijët. Në mënyrë të ngjashme, UNFPA dhe OBSH financojnë nisma që synojnë të ulin përhapjen e HIV-it, një nga shkaqet kryesore të vdekjes te gratë dhe vajzat në moshë riprodhuese.

Ky sulm ndaj të drejtave shkon përtej mbrojtjes së sigurisë dhe shëndetit të grave. Arsimi i vajzave do të pësojë një nga goditjet më të mëdha dhe më të rënda. Numri i vajzave jashtë shkollës – tashmë 122 milionë në mbarë botën – do të rritet, duke shkaktuar efekte zinxhir. Për shembull, Education Cannot Ëait bashkëpunon me UNICEF-in për të siguruar shkollimin e vajzave në shtete të brishta, jo vetëm për t’u dhënë atyre më shumë mundësi për të lulëzuar, por edhe për të parandaluar martesat e hershme të detyruara.

Administrata Trump gabimisht supozon se amerikanët dhe shtetasit e huaj mbështesin çmontimin e organizatave ndërkombëtare. Por shumica dërrmuese e njerëzve duan që vendet të punojnë së bashku për të adresuar problemet e përbashkëta. Në një sondazh të fundit të opinionit publik, i zhvilluar në 34 vende që mbulonin çdo rajon, më shumë se 90% e të anketuarve thanë se bashkëpunimi ndërkombëtar ishte thelbësor për shëndetin global, mbrojtjen e të drejtave të njeriut dhe parandalimin e konflikteve. Vetëm 5–6% e të anketuarve, dhe jo më shumë se 7% në asnjë rajon, besojnë – siç duket se beson administrata Trump – se një bashkëpunim i tillë është “në përgjithësi humbje kohe dhe burimesh”.

Për më tepër, në kundërshtim me raportet për skepticizëm në rritje ndaj multilateralizmit, të anketuarit shpesh shprehën më shumë besim te organizatat ndërkombëtare sesa te qeveritë e tyre. Besimi te OBSH-ja qëndron në 60% globalisht (duke u rritur në 85% në Afrikën Subsahariane), ndërsa besimi te OKB-ja është 58%.

Gjasat janë q rezultatet do të ishin të ngjashme nëse të anketuarit do të pyeteshin për vlerën e organizatave ndërkombëtare që promovojnë mundësitë për vajzat dhe gratë, të cilat janë themeli i një bote më të mirë. Braktisja e vajzave dhe grave, veçanërisht në kontekste krize, nuk është maturi financiare; kostot ekonomike do të rëndojnë për vite, në mos për dekada dhe breza. Është një dështim moral spektakolar dhe na turpëron të gjithëve.

Juristi Neritan Alibali, i ftuar në emisionin “3D” të Alban Dudushit në RTSH, ka bërë një analizë të detajuar të zhvillimeve të fundit rreth “Bordit të Paqes” dhe marrëdhënies së Kryeministrit Edi Rama me administratën e re amerikane të Donald Trump.

Sipas Alibalit, rikthimi i Ramës në qendër të vëmendjes ndërkombëtare nuk është i rastësishëm, por rezultat i një lëvizjeje të mirëllogaritur lobimi, që vjen pas një periudhe ku opozita kishte fituar terren për shkak të skandaleve qeveritare.

Alibali vlerëson se Rama ka arritur të shfrytëzojë lidhjet personale për të siguruar qasje te Trump.

“Duke e veçuar çështjen nga folklori dhe teoritë konspirative, Rama ka lëvizur leva të lobimit të nivelit të lartë dhe ka arritur të puqë ftesën nga Trump me vizitën e vajzës së tij,” u shpreh juristi.

Analisti theksoi se Kryeministri po e përdor këtë moment për kapital politik të brendshëm, duke ironizuar opozitën me premtimin se firmosja e aderimit në Bordin e Paqes do të bëhet në Zyrën Ovale.

“Rama mund të gënjejë vazhdimisht, por me deklarata duke ironizuar opozitën, se do ta firmos në Shtëpinë e Bardhë, po e krijon si spektakël që të përfitojë sa më shumë politikisht,” tha Alibali.

Sipas Alibalit, narrativa e opozitës se Rama “u ndalua të firmoste” është e dobët.

“Nëse e firmos Bordin e Paqes në Shtëpinë e Bardhë, është një lloj triumfalizmi i tij, një lloj fitoreje e Ramës. I takon opozitës që të ridimensionojë qëndrimin e saj ndaj Ramës dhe administratës amerikane,” përfundoi Alibali.

Një aksident ka ndodhur mbrëmjen e kësaj të premteje në qytetin e Beratit, ku dy makina njëri tip ‘Mercedes Benz’ dhe tjetri tip ‘Toyota’, janë përplasur me njëra-tjetrën.

Si pasojë e aksidentit janë plagosur lehtë çifti i bashkëshortëve që udhëtonin në mjetit tip ‘Benz’, të cilët janë transportuar drejt Spitalit Rajonal Berat, për të marrë mjekim.

Në vendngjarje kanë shkuar forcat e Policisë Rrugore, që po kryejnë edhe këqyrjen e vendit të aksidentit, për të përcaktuar dinamikën dhe shkaqet e tij.

Partia Demokratike do të dalë sërish në protestë ditën e nesërme, 24 Janar, në Tiranë, në një tubim që pritet të nisë në orën 17:00 përpara Kryeministrisë.

Politologu Ermal Hasimja tha se pritet një formë shprehjeje e rëndësishme e opozitës.

Në një lidhje të drejtpërdrejtë në edicionin qendror të lajmeve në televizionin kombëtar Vizion Plus me moderator Erion Zeqiraj, z.Hasimja deklaroi se sfida kryesore e opozitës është që të jetë bindëse, frymëzuese dhe mobilizuese te vetë aktivistët dhe militantët e saj, e pastaj te elektorati në tërësi.

Sipas politologut, e vetmja zgjidhje në situatën ku ndodhet PD-ja, është bashkëpunimi midis partive të ndryshme të opozitës.

Ermal Hasimja u ndal dhe tek ftesa e Presidentit Donald Trump për Kryeministrin Edi Rama, duke e cilësuar si një ftesë automatike e shpërndarë me të njëjtën formë dhe përmbajtje në rreth 100 vende të ndryshme.

INTERVISTA E PLOTË:

Nesër Partia Demokratike dhe opozita do të zhvillojnë një protestë për të kërkuar largimin e Kryeministrit Edi Rama dhe numrit dy të qeverisë, Belinda Balluku. Ju ishit pjesë e një takimi që Berisha zhvilloi me shoqërinë civile dhe biznesin për organizimin e kësaj proteste. A besoni se kjo protestë do të arrijë qëllimin?

Ermal Hasimja: Unë kam qenë në të gjitha tryezat, përfshirë edhe protestat dhe takimet e Adriatik Lapajt. Kam shkuar vazhdimisht sepse mendoj që është e rëndësishme që e gjithë kjo energji e shpërndarë e opozitës të koordinohet dhe të bashkëpunohet. Për sa i përket protestës që pritet, mendoj se është natyrisht një formë shprehjeje e rëndësishme e opozitës, duke pasur parasysh që ajo nuk i ka të gjitha mundësitë e garantuara demokratikisht në parlament. Kjo është një mënyrë për të ngritur dhe për të trashur zërin, gjë që bëhet përmes elementit të numrave. Vetë PD-ja e ka vendosur këtë si bast tashmë, nuk janë më protestat e zakonshme të së hënave, por pritet një angazhim i madh dhe ka pritshmëri të larta nga vetë Partia Demokratike.

Ju kishit idenë e vendosjes së 200 çadrave para Kryeministrisë. A besoni se një protestë mjafton apo duhet një lëvizje e qëndrueshme? A janë numrat domethënës në këtë protestë të nesërme, apo është më domethënëse një vazhdimësi e protestave?

Ermal Hasimja: Argumenti im ishte se te çështja e protestës ndaj qeverisë dhe protestimit në tërësi, nuk është thjesht çështje kreativiteti. Nëse do të ishte puna vetëm për kreativitet, mund të marrësh 200 çadra kampingu e t’i vendosësh para Kryeministrisë, duke bërë atë që bën Lapaj por në përmasa më të mëdha, meqenëse PD-ja e ka atë mundësi. Por çështja nuk është thjesht këtu. Sfida kryesore e opozitës nuk është gjetja e një ideje gjeniale që të komunikojë në mënyrën e duhur, sfida është që të jetë bindëse, frymëzuese dhe mobilizuese, në radhë të parë te vetë aktivistët dhe militantët e saj, e pastaj te elektorati në tërësi. Ky ishte sugjerimi im, një konkluzion në të cilin arrijnë edhe të tjerët. Kjo rrugë nuk është e thjeshtë dhe është relativisht e gjatë. Gjërat kanë arritur në këtë pikë për shkak të një rutine dhe disa arsyeve të forta, për të zgjidhur problemin, duhen zgjidhur edhe këto arsye. Shpresoj që PD-ja dhe opozita shqiptare në tërësi t’ia dalin të jenë më frymëzuese dhe bindëse.

Z.Hasimja, a është kjo opozitë, Partia Demokratike, frymëzuese sot? Duke pasur parasysh edhe protestat e veçuara, si ato të z.Lapaj apo z.Shehaj, a mos duhet të ishin edhe këto të bashkuara në një opozitë të fortë për të arritur qëllimin e largimit të Edi Ramës?

Ermal Hasimja: Bashkimi është fjalë e madhe, sepse bëhet fjalë për parti politike që kanë interesa të ndryshme në një pjesë, por kanë edhe objektiva të përbashkët. Prandaj unë do të përdorja konceptin e bashkëpunimit dhe jo të bashkimit. Mendoj se bashkëpunimi është i domosdoshëm dhe duhet të ndodhë patjetër. Çdo lloj strategjie brenda partive të opozitës që parasheh tkurrjen, zhdukjen apo eklipsimin e të tjerëve për të mbetur i vetëm me legjitimitetin dhe peshën e opozitës, është një strategji sa e pamundur, aq edhe afatgjatë. E vetmja zgjidhje në këtë rast është bashkëpunimi midis partive të ndryshme të opozitës. Ky është qëndrimi që kam pasur prej kohësh dhe vazhdoj t’a përsëris.

Një nga tezat kryesore të PD-së ka qenë se Kryeministri Edi Rama ka humbur mbështetjen e SHBA-së dhe administratës së Presidentit Donald Trump. A tregoi të kundërtën ftesa që Kryeministri mori për të qenë pjesë e Bordit të Paqes?

Ermal Hasimja: Jo, ajo ftesë për Ramën ishte një ftesë automatike e shpërndarë me të njëjtën formë dhe përmbajtje në rreth 100 vende të ndryshme. Është një ftesë që nuk ka lidhje me situatën në Shqipëri dhe nuk përmban ndonjë lloj legjitimiteti. Nëse duam të kuptojmë qëndrimin e SHBA-së, mjafton të shohim deklaratat e përfaqësueses kryesore amerikane sot në Shqipëri. Në çdo aktivitet ajo thotë saktësisht të njëjtën gjë, Shqipëria duhet të luftojë kundër narkotrafikut dhe korrupsionit. Sidomos narkotrafiku është një problem i madh me baza shqiptare nga mafia shqiptare, i cili përjetohet edhe në SHBA sepse atje është tregu i drogës. Ky është qëndrimi që duhet pasur parasysh.

Dhjetëra milionë amerikanë po përgatiten për një stuhi të fortë dimërore që do të përfshijë Shtetet e Bashkuara, nga Rrafshnaltat e Mëdha në zonat qendrore deri te metropolet e Bregut Lindor, e shoqëruar nga fenomene të rrezikshme moti.

Shërbimi Kombëtar i Motit i SHBA-së (NWS) paralajmëroi sot se stuhia do të sjellë reshje të dendura dëbore, akumulim katastrofik të akullit dhe temperatura polare me erëra të rrezikshme, duke e përshkruar si një stuhi të madhe në vëllim dhe të gjatë në kohëzgjatje.

“10 ditët e ardhshme të dimrit do të jenë më të këqijat në 40 vitet e fundit në Shtetet e Bashkuara. Mendoni si të organizoheni, çfarë mund të bëni, dhe kujdesuni për ata që kanë nevojë për ndihmë kjo nuk është shaka” u shpreh meteorologu Ryan Moy.

Ai shtoi se qytetarët duhet të jenë të përgatitur për ndërprerje të zgjatura të energjisë elektrike dhe temperatura jashtë prej -18 gradë Celsius.

Në Teksas, shumë qytetarë kujtojnë stuhinë dimërore të vitit 2021, kur dështimi i rrjetit elektrik la miliona familje pa energji për ditë dhe shkaktoi vdekjen e të paktën 200 personave.

Reshje të dendura dëbore janë regjistruar tashmë në pjesët veriperëndimore të Teksasit dhe Oklahomës. Më shumë se 150 milionë amerikanë janë paralajmëruar për mot të keq, ndërsa të paktën 14 shtete dhe Distrikti i Kolumbias kanë shpallur gjendje të jashtëzakonshme.

Në të njëjtën kohë, rreth 1,800 fluturime për nesër janë anuluar në të gjithë vendin, përfshirë 1,200 fluturime nga dhe për në Dallas, Teksas, sipas faqes FlightAware.

Guvernatorja e Nju Jorkut, Kathy Hochul, u bëri thirrje rreth 20 milionë banorëve që të mos e nënvlerësojnë të ftohtin.

“Pesë ose gjashtë minuta jashtë mund të jenë fjalë për fjalë të rrezikshme për shëndetin tuaj”, tha ajo.

Në një lokal në qytetin e Kukësit, shtetasit Ç. M. dhe E. M. (kushërinj me njëri-tjetrin), dyshohet se, së bashku me 3 shtetas të tjerë, gjatë një konflikti për motive të dobëta, kanë goditur me shkop bejsbolli dhe kanë tentuar të vrasin me armë zjarri shtetasin S. I.

Shtetasi S. I. është dëmtuar si pasojë e goditjeve me shkop bejsbolli dhe ndodhet në spital, nën kujdesin e mjekëve.

Është ngritur menjëherë grupi hetimor dhe, nën drejtimin e Prokurorisë Kukës, po vijon puna për zbardhjen dhe dokumentimin e plotë ligjor të këtij rasti, si dhe për kapjen e autorëve dhe të personave të tjerë të përfshirë në këtë konflikt.

Kur një burrë i hollë, me flokë bjonde që kujtojnë Rommelin, ngjitet në podium në një sallë të vogël të mbushur, mbretëron heshtja. “Duhet të flasim për remigrimin”, thotë ai në mikrofon, dhe audienca shpërthen në duartrokitje.

Bëhet fjalë për Maximilian Maerkl, liderin e grupit Identitar gjerman, i cili duket se nuk ka frikë të prekë një temë të ndaluar: vetëm dy vite më parë, fjala “remigrim” nxiti miliona gjermanë të dilnin në rrugë.

Disa javë më parë shpërtheu si bombë lajmi për një takim të ri mbi të njëjtën temë, këtë herë të organizuar nga deputeti i Afd, Steffen Kotré, dhe gruaja e tij, Lena Kotré, deputete në landin Brandenburg. Dhe me të njohurin Martin Sellner si mysafir nderi. Gazeta jonë kontaktoi me ta për detaje, por për një kohë ata nuk u përgjigjën.

Më pas Lena Kotré konfirmoi se takimi do të mbahej, por në një vend tjetër dhe “të mos njoftohej askujt”. Ndërkohë, të dy figurat e ekstremit të djathtë gjerman u përballën me kritika të ashpra, dhe drejtuesit e Afd, Tino Chrupalla dhe Alice Weidel, i detyruan të anulojnë takimin.

Por surpriza erdhi më pas: Martin Sellner organizoi ai vetë takimin, po atë ditë, në një vend tjetër dhe me komunikim të selektuar. Lena Kotré konfirmoi se do të marrë pjesë. Një provokim kryesisht ndaj drejtuesve të partisë së saj.

Takimi u zhvillua në orën pesë pasdite në një show-room të falimentuar, një ndërtesë e bardhë e vjetëruar mes një pompe karburanti dhe një hipermarketi, pranë daljeve të autostradës për Cottbus, njëqind kilometra në juglindje të Berlinit. Temperatura brenda sallës së vogël ishte e acartë, por mysafirët e përzgjedhur pak gazetarë dhe rreth njëqind aktivistë u pritën nga një Martin Sellner me xhaketë dhe kravatë dhe Lena Kotré, me flokët bjonde të mbledhura dhe sy të ftohtë pas syzeve rrethore. Jashtë, një dhjetëshe protestuesish që kishin mësuar për takimin brohorisnin “jashtë nazistët” dhe vendosën muzikë me volum të lartë.

Sellner mori mikrofonin: “Mirësevini në 2026, vitin e rrëzimit të barrierave sanitare, multilateralizmit dhe globalizmit!” Ai është magnet për ekstremistët e djathtë dhe një problem për Afd. Shërbimet gjermane e konsiderojnë “ekstremist të djathtë”, ai është përjashtuar përkohësisht ose përfundimisht nga disa vende, përfshirë Mbretërinë e Bashkuar dhe SHBA-të dhe ishte në kontakt me sulmuesin neonazist të Christchurch, për një kohë edhe në Gjermani. Aktivisti i njohur ka synime që sfidojnë kufijtë e ligjshmërisë dhe Afd po përpiqet të shmangë që të dënohet.

Megjithatë, këtë mbrëmje ai dhe Kotré duan të zgjerojnë diskutimin, duke shndërruar remigrimin në një sinonim të “milionëve” rikthimeve. Sellner njoftoi se sapo ka themeluar “Institutin për Remigrimin”, një komision ndërkombëtar për të promovuar idenë e deportimeve masive. Ai konfirmoi se janë në kontakt edhe me përfaqësues të partive italiane Lega dhe Fratelli d’Italia.

Kotré, zyrtarisht “përgjegjëse politike për remigrimin” në Afd Brandenburg, ishte më e matur: “Jam këtu për të përfaqësuar pozicionin e partisë sime”, tha ajo, që zyrtarisht synon vetëm rikthimin e migrantëve me urdhër largimi, rreth 224 mijë persona.

“Megjithatë, do të doja të diskutoheshin edhe opsione të tjera: personalisht do të rishikoja kërkesat për azil të dhjetë viteve të fundit për të vendosur kush duhet të kthehet.” Ndërsa për Sellner, sipas tij, duhet të largohen edhe ata “jo të asimiluar”, dhe ndoshta edhe ata me pasaportë gjermane. Kotré shprehu se “duhet të flitet për këtë”.

Pas takimit, ajo iu përgjigj pyetjes për “privatizimin e remigrimit”, një slogan të përdorur në fushatën e saj elektorale: “Nëse shteti nuk arrin të rikthejë emigrantët, shërbimi duhet të privatizohet.” Pyetjes nëse modeli i saj është shërbimi brutal amerikan ICE, ajo shmangu përgjigjen e drejtpërdrejtë, por shtoi: “Mund të them se shumë njerëz më kanë…”.

Kuzhinieri që gatoi për Ivanka Trump ka folur në emisionin “Rreze Dielli” në Report Tv, në lidhje me menunë që u përzgjodh në darkën e shumëpërfolur. Ai shpjegoi si u përzgjodh dhe cilat ishin metodat e veçanta të gatimit të pjatave.

“Ishte një emocion i rrallë, nuk ishte darkë e zakonshme. Menuja e përzgjedhur u gatua me një proçedurë të veçantë, u ndoq metoda kosher, ku ndalohen produkte shtazore, ndalohet skuqja në tigan”, shpjegoi Henri.

Kuzhinieri tha se paraprakisht u njoftova nga stafi.

“U lajmëruam në mesditë rreth orës 12.00, paraprakisht erdhi një person nga stafi i Ivanka Trump i cili na tha se ndalohet mishi, ndalohet skuqja, enët duhet të ishin shumë të pastra, na bënë të ishim në maksimumin e disiplinës”, shpjegoi shefi i kushinës.

Fejzulla tha se u realizuan disa pjata.

“Ata donin sallatë jeshile me perime të zonës, Paccheri të zierë e marinuar me borzilok dhe vaj ulliri. Ishin receta të thjeshta, sepse ndalohej skuqia si dhe fileto peshku me perime. Ishte e vështirë si metodë gatimi, por me produkte të thjeshta dhe natyrale”, tha ai.

Shefi i kuzhinës Fejzulla shpjegoi se në tryezë ishin në total 60 veta, nga të cilët 50 ishin arkitektë. Darka zgjati një orë e gjysëm, në fund të pranishmit shijuan edhe frutat e stinës nga zona e Vlorës.

“Përshtypjet i mora nga salla, më thanë që ishin shumë të mira. Ivanka ishte e thjeshtë, shumë modeste”, përfundoi shefi i kuzhinës Henri Fejzulla.

Policia e Lushnjës ka finalizuar operacionin e koduar “Pitstop”, duke goditur një rast shfrytëzimi për prostitucion të një shtetaseje të huaj.

Gjatë operacionit, u arrestua në flagrancë shtetasi S. M., 19 vjeç, banues në Karbunarë e Madhe, i cili dyshohet se për rreth dy muaj ka shfrytëzuar për prostitucion një shtetase braziliane 25-vjeçare, të cilën e kishte strehuar fillimisht në ambiente të ndryshme dhe më pas në banesën e tij.

Shtetasja braziliane ushtronte prostitucionin në ambiente të tjera dhe ndaj saj ka nisur procedimi penal për veprën “Ushtrimi i prostitucionit”.

Gjatë veprimeve policore janë sekuestruar edhe dy telefona celularë, ndërsa materialet procedurale i janë referuar Prokurorisë për veprime të mëtejshme.

Bashkimi Europian ka reaguar me kujdes, por edhe me vendosmëri, pas tërheqjes së presidentit amerikan Donald Trump nga kërcënimet për Groenlandën.

Presidentja e Komisionit Europian, Ursula von der Leyen, deklaroi se BE-ja arriti t’i rezistojë presionit amerikan duke qëndruar e bashkuar, e fortë, por pa përshkallëzim. Ajo theksoi se Brukseli synon të thellojë bashkëpunimin me Shtetet e Bashkuara dhe partnerët e tjerë për sigurinë në Arktik, përfshirë investime në pajisje mbrojtëse të përshtatura për këtë rajon dhe ndërtimin e një akullthyese europiane.

Në një tjetër deklaratë, von der Leyen tha se diskutimet treguan qartë se Europa duhet të punojë gjithnjë e më shumë për pavarësinë e saj strategjike.

“Ishte shumë e qartë në diskutime se ne ia dolëm duke qenë të vendosur, por jo përshkallëzues, dhe mbi të gjitha shumë të bashkuar. Por gjithashtu pati një diskutim të qartë se ne duhet të punojmë gjithnjë e më shumë për një Europë të pavarur,” shtoi ajo.

Ndërkohë, Presidenti i Këshillit Europian, Antonio Costa, e përshëndeti vendimin e Uashingtonit për të mos vendosur tarifa të reja ndaj Europës, duke e cilësuar atë si një hap pozitiv.

“Njoftimi i djeshëm se nuk do të ketë tarifa të reja amerikane ndaj Europës është pozitiv. Vendosja e tarifave shtesë do të ishte e papajtueshme me marrëveshjen tregtare mes Bashkimit Europian dhe Shteteve të Bashkuara,” tha ai.

Costa paralajmëroi se BE-ja do të mbrojë interesat e saj nëse përballet me presion apo shantazh ekonomik.

“Qëllimi mbetet stabilizimi efektiv i marrëdhënieve tregtare mes Bashkimit Europian dhe Shteteve të Bashkuara. Në të njëjtën kohë, BE-ja do të mbrojë interesat e saj, shtetet anëtare, qytetarët dhe kompanitë e saj kundër çdo forme shtrëngimi, dhe ka mjetet për ta bërë këtë, nëse dhe kur të jetë e nevojshme”.

Liderët europianë u shprehën të gatshëm të vazhdojnë bashkëpunimin me SHBA-të edhe për çështje globale, përfshirë paqen në Ukrainë dhe situatën në Gaza, megjithëse shprehën rezerva për disa elementë të planit amerikan për administrimin e përkohshëm të Gazës.

Ivanka Trump, vajza e Presidentit amerikan Donald Trump nuk i kursen fjalët e mira për Shqipërinë duke i bërë marketingun më të mirë të mundshëm në sytë e gjithë botës. Pas pamjeve të mrekullueshme të natyrës shqiptare që ndau më herët, të shoqëruara dhe më një këngë të njohur shqiptare, Ivanka Trump ka postuar sërish një pamje mbresëlënëse nga bregdeti shqiptar, por këtë herë i ka shtuar dhe një prekje fjalësh. “Shqipëria është magjike”, shkruan në anglisht vajza e Presidentit të SHBA-ve.

Kujtojmë se prej së mërkurës, Ivanka Trump ka zhvilluar një vizitë në Shqipëri, duke nisur nga Vlora, ku u takua me një grup arkitektësh si dhe me kryeministrin Edi Rama. Në fokus të vizitës mbeten investimet në Shqipëri, kryesisht në bregdet. Mbrëmjen e kaluar ajo ka mbërritur dhe në kryeqytet, ku është pritur nga kryeministri Edi Rama.

Presidenti Donald Trump deklaroi të enjten se mavijosja e madhe në dorën e majtë iu shkaktua pasi u përplas me një mobilje në Zvicër.

“Më ra te tavolina”, i tha ai Samatha Waldenberg të CNN gjatë një interviste në Air Force One.

Shtëpia e Bardhë kishte dhënë një deklaratë të ngjashme më herët të enjten, duke njoftuar se Trump kishte goditur dorën te tavolina e nënshkrimit gjatë një eventi të Bordit për Paqen në Davos, Zvicër. “Gjatë eventit të Bordit për Paqen sot në Davos, Presidenti Trump goditi dorën te cepi i tavolinës së nënshkrimit, duke shkaktuar mavijosje”, tha sekretarja e shtypit Karoline Leavitt në një deklaratë.

Trump tha se doza e lartë e aspirines e bën atë më të prirur për mavijosje, diçka që mjeku i tij e ka përmendur më parë.

“Do të thoja, merrni aspirinë nëse doni zemrën tuaj të shëndetshme, por mos e merrni nëse nuk doni të keni pak mavijosje”, tha Trump në Air Force One. “Unë marr aspirinë të madhe, dhe kur merrni aspirinë të madhe, ju thonë se mavijoseni. Mjeku tha: ‘Nuk duhet ta merrni, zotëri, jeni shumë i shëndetshëm.’ Unë thashë: ‘Nuk po rrezikoj’.”

Një zyrtar i Shtëpisë së Bardhë ndau fotografi të presidentit në Davos të mërkurën dhe të enjten, duke i treguar CNN: Fotografitë e djeshme dhe të mëngjesit tregojnë qartë se nuk kishte mavijosje.

Në fillim të eventit të Bordit për Paqen, video e Trump nuk tregonte mavijosje të rëndë në dorë. Megjithatë, mavijosja u bë e dukshme rreth 10 minuta më vonë, pasi ai u ul te tavolina dhe nënshkroi disa dokumente.

Trump ka pasur prej kohësh mavijosje në dorën e djathtë, gjë që CNN ka raportuar se daton para kthimit të tij në Shtëpinë e Bardhë. Por ajo tërhoqi më shumë vëmendje pasi ai filloi ta mbulonte me makijazh të rëndë dhe fashë, duke e mbrojtur nga kamerat me dorën tjetër. Mavijosja në dorën e majtë, e vërejtur në fund të vitit të kaluar, ngriti pyetje shtesë për shëndetin e tij.

Në një intervistë për Wall Street Journal të publikuar më herët këtë muaj, Trump tha se merr një dozë më të lartë ditore aspirine sesa rekomandojnë mjekët, duke argumentuar se “aspirina ndihmon për hollimin e gjakut.”

Mjeku i presidentit, Dr. Sean Barbabella, i tha Journal se Trump merr 325 miligramë aspirinë në ditë, duke thënë se kjo e bën të mavijoset lehtë. Sipas Mayo Clinic, një dozë e ulët aspirine, që “mund të ndihmojë në parandalimin e sulmit në zemër ose goditjes në tru,” varion nga 75 në 100 miligramë, dhe zakonisht rekomandohet 81 miligramë. Mayo Clinic thekson gjithashtu se për terapinë me aspirinë, doza ditore “zakonisht varion nga” 75 deri në 325 miligramë.

Vëllai i ish-deputetit socialist, Arben Ndoka, Gëzim Ndoka, është ndaluar nga policia e Lezhës, pas një sherri të ndodhur në një lokal.

Pas ndalimit Gëzim Ndoka është lënë i lirë pasi prokuroria ka vendosur që të hetohet në gjendje të lirë. Vijon të jetë ende në kërkim djali i tij, Kevin Ndoka.

Sherri ndodhi në një lokal në Lezhë më datë 12 janar, ku të lënduar mbetën dy kushërinjtë Gjergj dhe Nikolin Marku. Dy kushërinjtë kallëzuan në polici se babë e bir, Gëzim dhe Kevin Ndoka i dhunuan në lokal.

Ish deputeti Arben Ndoka është një ndër 27 personat e dërguar për gjykim nga SPAK, në lidhje me operacionin “Revanshi”, i akuzuar për tentativë vrasje.

Juristi i njohur, Bledar Dervishaj ka komentua seancën e zhvilluar në Gjykatën Kushtetuese, sa i takon kërkesës së Kryeministrit, Edi Rama për vendimin e GJKKO për pezullimin nga detyra të Zv.Kryeministres, njëherësh Ministër i Infrastrukturës dhe Energjisë.

Referuar qëndrimit të mbajtur në këtë seancë nga Prokuroria e Posaçme, Dervishaj shkruan në reagimin e tij se ajo nuk u ngrit në nivel Kushtetues dhe se argumentet e paraqitura vlejnë vetëm për gjykatat e zakonshme, dhe jo përpara trupës kushtetuese.

Çështja objekt shqyrtimi përpara Gjykatës Kushtetuese, vijon më tej Dervishaj, nuk ka asnjë lidhje me argumentet e dhëna nga SPAK, ndërsa e mbyll reagimin e tij duke thënë se Prokuroria ka hyrë në një terren që nuk e zotëron dot.

Postimi i Dervishaj

Mbrojtja që Prokuroria e Posacme i bëri sot veprimtarisë së saj dhe vendimit të GJKKO-së, nuk u ngrit në nivel Kushtetues, por thjesht dhe vetëm tek rreziku i helmimit/prishjes së provave, etj. Këto lloj argumentesh vlejnë vetëm për gjykatat e zakonshme, por jo përpara trupës kushtetuese.

Çështja obekt shqyrtimi përpara Gj.Kushtetuese ska asnjë lidhje me argumentet e dhëna nga Spak.

Çështja objekt gjykimi është krejt tjetër gjë, terren të cilin SPAK nuk e zotëron dot, pavarësisht se e ka shkelur keq në rastin konkret.