Komisioni i Mbrojtjes pranë Këshillit të Lartë të Prokurorisë ka miratuar kërkesën e kreut të SPAK, Klodian Braho, për shtimin e masave të mbrojtjes ndaj prokurorit Altin Dumani.
Kërkesa vjen në një kohë kur presioni ndaj Dumanit është rritur, për shkak të një sërë hetimesh të rëndësishme që mbajnë firmën e tij gjatë periudhës kur ai ishte kryeprokuror i SPAK.
Sipas vendimit të komisionit, përveç Altin Dumanit, janë miratuar masa mbrojtëse edhe për disa prokurorë të tjerë të Strukturës së Posaçme, mes të cilëve edhe prokurori Dritan Prençi. /Euronews/
Kelmendi në Malësi të Madhe është një nga perlat e Veriut të Shqipërisë, me resurse të jashtëzakonshme dhe potencial për turizëm gjatë gjithë vitit.
Por emigrimi masiv po e zbeh këtë zonë, duke lënë pas fshatra të zbrazur dhe një boshllëk të dukshëm në komunitet. Përkunden qindra te rinjve qe kane emigruar ne Amerike, disa te rinj kane vendosur te qëndrojnë duke ndërtuar bujtina e duke mbajtur turizmin gjalle por serish plaga e emigracionit nuk ndalet.
Gazmend Pepaj i ka thënë “jo” emigrimit. Ai, së bashku me familjen, pret dhe përcjell turistë edhe pse dimri është më i vakët dhe numri i vizitorëve pak më i ulët.
Kelmendi është gjithashtu i pasur me bime medicinale, të cilat kanë vlera të mëdha shëndetësore dhe përbëjnë një tjetër atraksion për turistët e interesuar pas natyrës dhe shëndetit.
Rruga drejt fshatrave turistikë qëndron e hapur gjatë gjithë dimrit, dhe me rikthimin e dëborës, kthehen edhe vizitorët e pasionuar pas natyrës së paprekur, për të përjetuar madhështine e alpeve. /Tch/
Kryetari i Partisë Demokratike Turke të Kosovës (KDTP), Fikrim Damka ka reaguar pas rezultateve zyrtare të shpallura nga Komisioni Qendror Zgjedhor (MSK).
Damka përmes një postimi në rrjetin social në Facebook i uroi suksese për mandatin e deputetit Fatma Taçit dhe Ergul Mazrekut.
Ai beson se Taçi dhe Mazreku do të paraqesin një përfaqësim të fortë në Kuvend në përputhje me të drejtat dhe përfitimet e shoqërisë turke.
"Përgëzoj përzemërsisht Ergul Mazrekun dhe Fatma Taçin që u zgjodhën deputet nga partia jonë sipas rezultateve zyrtare të Komisionit Qendror të Zgjedhjeve (MSK). I uroj suksese në këtë përgjegjësi të rëndësishme dhe të lartë që po ndërmarrin; sinqerisht besoj se do të vendosin përfaqësim të fortë në përputhje me të drejtat dhe përfitimet e popullit tonë. Parimi themelor që gjithmonë e kemi mbrojtur si Parti Demokratike Turke e Kosovës është përfaqësimi i fuqishëm i vullnetit të popullit tonë nën një kulm partiak në Kuvend. Në këtë drejtim, ne e kemi konsideruar si parim të domosdoshëm që dy deputete nga partia jonë të marrin pjesë në Kuvend dhe të sigurojnë se përfaqësimi i femrës është i garantuar", ka thënë Damka.
Sipas tij, lufta e tyre zhvillohet mbi parime dhe jo mbi individë.
"Përfaqësim i fortë, përfaqësim i drejtë dhe strukturë politike në të cilën pjesëmarrja aktive e grave në politikë ka qenë gjithmonë prioritet për ne; dhe do të vazhdojë të jetë prioritet në vazhdim. Shpresoj që mandati i ri legjislativ të jetë i dobishëm për popullin, shoqërinë dhe vendin tonë.Damka duke theksuar se parimi thelbësor i KDTP-së është që vullneti i shoqërisë turke të përfaqësohet fuqishëm nën kulmin e një partie në Kuvendin e Kosovës, tha se në këtë kuadër dy deputete nga partia duhet të marrin pjesë në Kuvend dhe të sigurojnë përfaqësimin e femrës parim i domosdoshëm", ka shkruar Damka. /Telegrafi/
Edhe sot ka vazhduar aksioni i Drejtorisë së Inspekcionit për largimin e shitësve ilegal që ushtronin veprimtari tregtare në rrugë dhe trotuare në zonën e tregut.
Kjo u bë e ditur përmes një postimi në faqen zyrtare të Komunës së Mitrovicës, ku ndër të tjera shkruhet se aksioni po zhvillohet nën udhëheqjen e Drejtorit të Inspekcionit, Mujë Igrishta, së bashku me inspektorët komunalë, në bashkëpunim me Policinë dhe KRM “Uniteti”.
“Drejtoria e Inspekcionit është e vendosur që të lirojë të gjitha hapësirat publike në gjithë qytetin dhe nuk do të tolerohet asnjë formë e uzurpimit të tyre nga shitësit ilegalë”, thuhet në njoftim.
Ndërkaq, drejtori Igrishta ka thënë se: “Aksione të tilla do të vazhdojnë edhe në ditët në vijim, me qëllim vendosjen e rendit, garantimin e sigurisë dhe respektimin e ligjit”. /Telegrafi/
Ushtarë shumëkombësh nga Grupi i Përbashkët i Mbështetjes Logjistike (JLSG) dhe Batalioni Rezervë Taktik zhvilluan një trajnim për mbështetje të lëvizshmërisë në kampin Novosellë.
Sipas një postimi në rrjetin social në Facebook thuhet se aktiviteti u përqendrua në koordinimin me Detashmentin e Mbështetjes Mobile (MSD) dhe përdorimin e Njësisë K9 për detyra sigurie dhe zbulimin e mjeteve shpërthyese në kushte reale stërvitore.
"Trajnimi forcoi gatishmërinë taktike, ndërveprueshmërinë dhe kohezionin, duke mbështetur aftësinë e KFOR-it për të operuar në mënyrë efektive në përputhje me mandatin e tij", thuhet në njoftim. /Telegrafi/
Kryetari i Lidhjes Demokratike të Kosovës (LDK), Lumir Abdixhiku, ka mbajtur një fjalim gjatë Kuvendit të punës së partisë, duke iu drejtuar delegatëve dhe duke folur për përgjegjësinë, sfidat dhe rolin e LDK-së në politikën e Kosovës.
Abdixhiku tha se partia ka përgjegjësi historike dhe se është koha që të japë përgjigje edhe për vetveten.
“Heshtja në jetën politike është një barrë e rëndë. Njeriu e kupton që ka momente që duhet të ndalet, jo pse është i dobët, por sepse ka përgjigje për të dhënë nga ata që e besuan. Nata e zgjedhjeve ishte një prej atyre momenteve që nuk ishte vetëm një rezultat politik, por një pasqyrë e përgjegjësisë”, tha ai.
Kryetari i LDK-së theksoi se përgjegjësia merret vetëm brenda Kuvendit të partisë dhe vendimmarrja i takon delegatëve.
“Kam zgjedhur të dal para jush jo sepse është e lehtë, por sepse është e domosdoshme. Njeriu nuk matet vetëm kur gjithçka shkon mirë, por edhe kur gjuha i dridhet pak”, shtoi ai.
Abdixhiku vuri në dukje se rezultatet e fundit nuk erdhën nga një gabim i vetëm, por si pasojë e një grumbullimi të sfidave gjatë kohës, duke theksuar nevojën për të reflektuar dhe për t’u përballur me realitetin.
“Sot jemi këtu për t’i thënë gjërat në sy”, tha ai.
Ai theksoi pozicionin unik të LDK-së në Kosovë: “LDK mbetet e vetmja parti politike në vend, themeluesi i së cilës nuk jeton. Në këtë rrugëtim jemi ndryshe nga çdo parti tjetër në Kosovë. LDK ka provuar dhe krijuar lidership demokratik. Në demokraci, lidershipi nuk është dhuratë, por provë dhe barrë e madhe, mbi të gjitha garë mes të njëjtëve”.
Abdixhiku nënvizoi gjithashtu transparencën dhe përkushtimin e partisë: “Në cilën parti tjetër mbledhja konsultative transmetohet drejtpërdrejt në 32 kanale? LDK është parti e popullit, në lindje, në konstrukt dhe në të ardhme. Prijësi i LDK-së është i ndryshueshëm, por principi mbetet i njëjtë. Problemi nuk ka qenë njeriu, por roli i kryetarit dhe përgjegjësitë që ky detyrë mbart”.
Ai shtoi se partia duhet të funksionojë çdo ditë dhe jo vetëm gjatë zgjedhjeve: “Rregullimi i brendshëm i partisë ka nevojë për një organizatë që funksionon çdo ditë. Po aq e rëndësishme është disiplina politike. Kritikët që e shndërrojnë helmin e vazhdueshëm në shkatërrim nuk kanë vend këtu. Kush nuk respekton shumicën e kësaj partie nuk është i mirëpritur”.
Abdixhiku foli edhe për sfidat zgjedhore të fundit: “vitin 2025, partia fitoi sërish 7 komuna, përfshirë kryeqytetin, një arritje me peshë simbolike. Humbja e një komune të vogël u ndje shumë. Nëse nuk dimë ta kthejmë suksesin në moral, nuk mund të arrijmë shumicën. Nevojiten ndryshim dhe rezistencë për ta arritur atë”.
Ai po ashtu tha se LDK nuk është themeluar si shoqëri aksionare dhe nuk është pronë e askujt.
Abdixhiku, ka kërkuar nga delegatët e Kuvendit të Punës së LDK-së, votëbesimin e tyre për të parin e partisë.
“Të dashur delegatë, me përgjegjësi të plotë ia ofroj për shqyrtim Kuvendit të LDK-së dorëheqjen time nga detyra e kryetarit, për ta vendosur përballë këtij Kuvendi çështjen e votëbesimit”, tha ai.
Ai shprehu gatishmërinë për t’u nënshtruar vendimeve të Kuvendit dhe duke reflektuar mbi përgjegjësinë e tij ndaj partisë dhe qytetarëve.
“Çfarëdo vendimi që do të merrni, do ta respektoj me qetësi, dinjitet dhe besim. Besoj te vendimi dhe pjekuria politike e LDK-së”, tha Abdixhiku.
Ai rikujtoi natën e zgjedhjeve dhe debatet brenda partisë: “Në natën e zgjedhjeve, kur paralajmërova Kuvendin e partisë, pati zëra brenda LDK-së që kërkuan dorëheqjen time. ‘Lëshoj vendin tim’, më thanë, dhe më pas u kthye në ultimatum. Në fund, pas këtij ultimati, u shpall ideja se akti i dorëheqjes ishte i kryer dhe Kuvendi nuk do të vendoste më për ne”.
Duke ndier peshën e madhe të përgjegjësisë, Abdixhiku shtoi: “Jo në pak raste e kam ndjerë të parevokueshme. Me 42 vite që kam, kam një jetë përpara për të nisur me familjen time dhe me ju. Kam dëgjuar zëra që kërkonin përballje përmes debatit të hapur. Këtë çështje nuk e kam mbajtur për vete, por ia kam kthyer Kuvendit. Kuvendi ka legjitimitetin për të vendosur – dhe për mua. I nënshtrohem vullnetit të përgjithshëm të Kuvendit. Le të flas Kuvendi, jo si akt formal, por si akt përgjegjësie”.
Abdixhiku gjithashtu theksoi se ka momente kur në jetën e një partie fjala duhet të jetë më e matur se emocionet.
“Më lejoni të flas jo për atë që kam qenë, por për mënyrën se si kam shërbyer në këtë detyrë. Ndihem keq që nuk kam arritur ta çoj partinë në nivelin më të lartë të mundshëm”, tha ai.
Në fund tha se me vullnetin e këtij Kuvendi do të përcaktohet përcaktohet fati i secilit prej tyre.
“Shumë sy kanë qenë të kthyer nga kjo karrige këtu. Me vullnetin tuaj këtu përcaktohet fati i secilit prej nesh. Nga ky moment i kaloj punimet te Kuvendi... do të ulem sërish si një nga 355 delegatët e këtij kuvendi”. /Telegrafi/
Anëtari i Kuvendit të Lidhjes Demokratike të Kosovës (LDK), Driton Selmanaj, ka theksuar se brenda partisë duhet të refuzohet qasja e qëndrimeve "bllanko" të degëve, duke nënvizuar se vendimmarrja u takon delegatëve individualisht.
Sipas Selmanajt, dega e LDK-së në Prizren ka rreth 16 delegatë dhe secili prej tyre ka bindjen e vet personale për të vlerësuar se cila është rruga më e mirë që duhet të ndjekë LDK-ja.
“Ne i kemi vlerësuar bashkë, por vendimi mbetet individual dhe unë e respektoj maksimalisht qëndrimin e secilit delegat”, ka deklaruar Selmanaj.
Ai u shpreh i bindur se LDK-ja edhe në momentet e saj më delikate, ka ditur të gjejë mekanizma të brendshëm për rregullim dhe reflektim të drejtë, veçanërisht në situatat kur është përballur me sfida në zgjedhjen e kryetarit të partisë.
“Gjithmonë LDK-ja e ka zgjedhur situatën më të mirë”, tha ai, duke shtuar se aktualisht mungesa e një agjende të qartë nuk është shenjë e mirë.
Sipas Selmanajt, deri mbrëmë duhej të ishte e qartë nëse do të votohej për votëbesim apo do të shqyrtohej dorëheqja.
Ai theksoi se shqyrtimi i dorëheqjes do të ishte antistatutor nëse hyn në një cikël të tillë, pasi statuti i LDK-së nuk e parasheh këtë procedurë, duke ritheksuar besimin e tij në demokracinë e brendshme të partisë.
Selmanaj kujtoi se LDK-ja ka vendosur standard në Kosovë që pas rezultateve të dobëta zgjedhore të ketë proces vlerësimi të brendshëm.
“Nuk jemi të kënaqur me këto rezultate. Nëse nuk kemi arritur ta transmetojmë idenë e mirë të LDK-së te qytetarët, atëherë faji nuk është i tyre, por i vetë LDK-së”, u shpreh ai.
Duke folur për udhëheqjen e partisë, Selmanaj vlerësoi lart të kaluarën dhe trashëgiminë politike të Avdullah Hotit, duke e cilësuar atë si një vlerë të madhe për LDK-në, por theksoi se kjo nuk përjashton kandidaturat e tjera.
“Kjo është e mira e LDK-së, të ketë debate dhe kundërshti”, tha Selmanaj, duke përfunduar se partisë i nevojitet një dinamikë pak më ndryshe në të ardhmen. /Telegrafi/
Eugen Cakolli nga Instituti Demokratik i Kosovës (KDI) ka reaguar pas shpalljes së rezultateve të 28 dhjetorit për Kuvendin e Kosovës nga Komisioni Qendror i Zgjedhjeve (KQZ).
Cakolli përmes një postimi në rrjetin social në Facebook ka shkruar se shpallja e këtyre rezultateve është shkelje, pasi siç tha “nuk është konsumuar afati ligjor për ankesa”.
“Përtej shkeljes fillestare – shpalljes së rezultateve pa u konsumuar afati ligjor për ankesa – sot KQZ shkoi edhe një hap më tej dhe formalizoi një praktikë tërësisht të kundërligjshme, duke shpallur rezultate ‘të pjesshme’, pra, jo për të gjitha subjektet politike. Rezultatet zgjedhore janë akt i vetëm dhe prodhojnë pasoja për të gjithë njëkohësisht. Ligji nuk njeh rezultate përfundimtare për një parti të veçantë, as vendime të ndara sipas subjekteve apo kandidatëve. Po aq e rëndësishme, kundërshtimi i rezultateve nuk mund të mbetet opinion politik i papërcaktuar, pa asnjë pretendim konkret për shkelje ligjore”, ka shkruar Cakolli.
Ai tha se ajo që ndodhi sot është absurde.
“Cilido anëtar që votoi kundër ose abstenoi, nëse kishte dyshime reale për rezultatet, ishte ai që duhej të ankohej. Situata nuk zgjidhet me votim politik brenda KQZ-së dhe as duke bllokuar ose lejuar rezultate sipas interesave të momentit. Por duke e ditur se çfarë do të ishte epilogu ligjor nga një ankesë potenciale në PZAP apo Supreme, disa zgjodhën ta shtyjnë edhe një episod të kësaj shfaqjeje të pakuptimtë politike”.
Sipas tij, KQZ po sillet sikur ka kompetencë të vendosë kush hyn në fazën pas shpalljes dhe kush jo.
“E për këtë, përgjegjësi mban edhe Kryesuesi i KQZ-së që lejoi ndarjen artificiale të rezultateve pa asnjë bazë ligjore. E mbi të gjitha, problemi kryesor nuk është vetëm dita e sotme, por precedenti që po krijohet. Nëse sot rezultatet shpallen në mënyrë selektive, nesër mund të vonohen ose të certifikohen në mënyrë selektive. Kështu procesi zgjedhor pushon së qeni proces ligjor dhe shndërrohet në menaxhim politik të rezultateve. Dhe kjo është arbitraritet institucional, pa asnjë dilemë”, ka shkruar Cakolli. /Telegrafi/
Anëtari i Partisë Demokratike të Kosovës (PDK) në Komisionin Qendror të Zgjedhjeve, Arianit Elshani, ka ngritur sot në mbledhjen e KQZ-së çështjen e afateve për paraqitjen e ankesave lidhur me procesin e rinumërimit të votave.
Elshani ka pyetur nëse publikimi dhe miratimi i rezultateve përfundimtare është në përputhje me Ligjin për Zgjedhjet dhe rregullat e KQZ-së, duke theksuar se në këtë mënyrë mund t’u mohohet e drejta e ankesës subjekteve politike, kandidatëve dhe qytetarëve.
“Publikimi i rezultateve përfundimtare dhe miratimi i tyre a është në përputhje me ligjin dhe rregullat zgjedhore të KQZ-së, duke e ditur se në njëfarë forme po ua mohojmë të drejtën e ankesës subjekteve politike, kandidatëve dhe qytetarëve në raport me administrimin e procesit të ditës së djeshme, për të cilin afati i ankesave zgjat deri nesër”, ka thënë Elshani.
Në përgjigje të kësaj, kryetari i KQZ-së, Kreshnik Radoniqi, sqaroi se dispozitat ligjore për të cilat u referua Elshani kanë të bëjnë me administrimin e procesit në Qendrat Komunale të Numërimit (QKN) dhe në Qendrën e Numërimit dhe Rezultateve (QNR).
Ai shpjegoi se në QKN bëhet numërimi i votave për kandidatë dhe verifikimi i votave për subjektet politike, ndërsa në QNR administrohet procesi i numërimit të votave me postë, të personave me nevoja të veçanta, të përfaqësive diplomatike dhe votave me kusht.
Radoniqi theksoi se e drejta për ankesa në këto faza tashmë ka kaluar, pasi procesi përkatës ka përfunduar, duke shtuar se KQZ për herë të parë ka marrë vendim që para shpalljes së rezultateve të rinumërohet i gjithë procesi i zhvilluar në QNR.
“E drejta për tu ankuar në QKN dhe QNR është kaluar tashmë se kjo çështje ka përfunduar, ndërsa ne që asnjëherë më parë në proceset zgjedhore kemi marrë vendim para shpalljes së rezultatit të rinumërohen i tërë procesi që është zhvilluar në QNR. Pra e kemi përmirësuar tërë procesin e administrimit në QKN. Tanimë ligji nuk jep ndonjë dispozitë të veçantë për proces ankimor në procesin e rinumërimit, por të drejtën nuk ia humbim askujt për parashtrimin e ankesave lidhur me rinumërimin dhe në shpalljen e rezultatit. Natyrisht gjatë rinumërimit nuk ka pas asnjë vërejtje nga asnjë vëzhgues lidhur me procesin e rinumërimit”, ka thënë ai.
Ai bëri të ditur se procesi i rinumërimit ka zgjatur 18 ditë dhe se gjatë gjithë kësaj kohe nuk ka pasur asnjë vërejtje nga vëzhguesit lidhur me mënyrën e zhvillimit të tij.
“Nëse e shikojmë a do të ketë të drejtë ankese...ankesat parashtrohen 48 orë nga shkelja e supozuar. I gjithë procesi i rinumërimit ka zgjatur 18 ditë dhe kanë mbetur edhe dy ditë të kaluara që mund të parashtrojë dikush ankesë, por asnjë vërejtje gjatë këtij procesi të rinumërimit nuk është dhënë. Nëse e prolongojmë ende, shumë procese shtyhen më vonë, pra s’mund t’i arrijmë disa afate. Ne s’e mohojmë të drejtën e ankesës sepse pas shpalljes së rezultateve palët kanë të drejtë ankese brenda 48 orëve në PZAP”, ka thënë Radoniqi. /Telegrafi/
Në Komisionin Qendror të Zgjedhjeve (KQZ) është ndarë procesi i votimit për shpalljen e rezultateve zgjedhore, pasi anëtarët e Lëvizjes Vetëvendosje deklaruan se nuk do të votojnë për Listën serbe, ndërsa anëtari i Partisë Demokratike të Kosovës njoftoi se do të abstenojë.
Anëtari i Vetëvendosjes në KQZ, Sami Kurteshi, para hedhjes në votim të shpalljes së rezultateve, deklaroi se do të votojë kundër Listës serbe dhe kandidatëve të saj individualisht.
Pas këtyre deklarimeve, kryetari i KQZ-së, Kreshnik Radoniqi, tha se duhet të ndahet votimi për Listën Serbe dhe për Partinë Demokratike Turke të Kosovës (KDTP), për të cilën ishte paraqitur ankesë se nuk ka respektuar kuotën gjinore.
Anëtarët e KQZ-së votuan për shpalljen e rezultateve për të gjitha subjektet e tjera politike, me përjashtim të Listës serbe dhe KDTP-së.
Megjithatë, Radoniqi e hodhi në votim edhe Listën serbe e cila mori vetëm tri vota pro, dy kundër dhe tjerat abstenime.
Pas përfundimit të votimit, Radoniqi u shpreh: “M’falni, po s’ka kuptim kjo punë”.
Ndërkohë, për shpalljen e rezultateve për KDTP-në votuan pro nëntë anëtarë të KQZ-së.
Radoniqi bëri të ditur se subjektet politike dhe kandidatët e pakënaqur me shpalljen e rezultateve kanë të drejtë ankese në Panelin Zgjedhor për Ankesa dhe Parashtresa (PZAP) brenda 48 orëve, nga ora 11:00 e ditës së sotme deri në orën 11:00 të ditës së hënë. /Telegrafi/
Komisioni Qendror i Zgjedhjeve (KQZ) sot ka shpallur rezultatet përfundimtare të zgjedhjeve të 28 dhjetorit 2025 për Kuvendin e Kosovës.
Anëtarët e KQZ-së i kanë miratuar listat e kandidatëve të të gjitha partive, përveç asaj të Listës Serbe. Tre anëtarë kanë votuar për, dy kundër nga Lëvizja Vetëvendosje, dhe anëtarët tjerë kanë abstenuar.
Kryetari i Komisionit Qendror të Zgjedhjeve (KQZ), Kreshnik Radoniqi ka treguar se nga sa ulëse kanë fituar partitë politike në Kuvendin e Kosovës.
Ai njoftoi se Lëvizja Vetëvendosje i ka fituar 51.10 për qind të votave, apo 57 ulëse në Kuvendin e Kosovës, Partia Demokratike e Kosovës, 20.19 për qind të votave apo 22 ulëse, Lidhja Demokratike e Kosovës, 13.24 për qind të votave apo 15 ulëse, dhe Aleanca për Ardhmërinë e Kosovës, 5.50 për qind të votave apo gjashtë ulëse.
Ndërkaq, nga ulëset e rezervuara për minoritetin serb, nëntë ulëse i ka fituar Lista Serbe, partia më e madhe e serbëve të Kosovës, dhe një ulëse, Partia për Liri, Drejtësi dhe Mbijetesë.
Ndërkaq, lidhur me çështjen e KTDP-së në diskutim u përfshi edhe Sami Kurteshi nga LVV-ja.
Ai tha se zgjedhja e dy kandidatëve për deputet nga KTDP-ja është e jashtëligjshme dhe nuk do ta votojë.
Ndërsa kryetari i KQZ, Radoniqi tha se këtë çështje e kanë biseduar dhe më herët dhe palët mund të bëjnë ankesë pas shpalljes së rezultateve.
“Sa i përket çështjes së KTDP e kemi diskutuar këtë çështje, po ligji thotë, por sipas meje dhe Kushtetueses kemi të bëjmë me dy ulëse, ku në Kuvend kërkohet plotësimi i kuotës gjinore. Këtë çështje e ka trajtuar Kushtetuesja në një vendim të kaluar. Propozoj që pas shpalljes këtë çështje ta ushtroni me ankesë...pjesa tjetër i mbetet KTDP në PZAP”, tha Radoniqi. /Telegrafi/
Shtatë persona janë identifikuar kur prej tyre tre janë arrestuar pasi dyshohet se që në bashkëpunim me njëri-tjetrin, kontrabandonin veshje nga Kina dhe nga Turqia, i magazinonin në Tiranë dhe i shitnin duke shmangur detyrimet tatimore.
Sipas një njoftimi të Policisë së Shtetit bëhet e ditur se për të dyshuarit e tjerë janë duke vijuar hetimet.
“Finalizohet nga Drejtoria për Hetimin e Krimit Ekonomik dhe Financiar në DPPSh, operacioni i koduar “Brand 3”. Identifikohen 7 shtetas, të cilët në bashkëpunim me njëri-tjetrin, kontrabandonin veshje nga Kina dhe nga Turqia, i magazinonin në Tiranë dhe i shitnin duke shmangur detyrimet tatimore. Vihen në pranga 3 nga këta shtetas, procedohen penalisht 4 të tjerët. Vijojnë hetimet për identifikimin dhe kapjen e shtetasve të tjerë të përfshirë në këtë veprimtari kriminale”, thuhet në njoftim.
Tutje në njoftim bëhet e ditur se janë sekuestruar 17 valixhe me veshmbathje të markave të shtrenjta dhe 2 automjete.
“Si rezultat i hetimeve të shpejta të kryera nga Sektori për Hetimin e Krimit Ekonomik dhe Financiar në Drejtorinë për Hetimin e Krimit Ekonomik dhe Financiar në DPPSh, bazuar në informacionet e siguruara për një rast të kontrabandës së mallrave dhe shitjes së tyre në informalitet, është organizuar dhe finalizuar operacioni i koduar ‘Brand 3’. Si rezultat, u identifikuan 7 shtetas, të cilët në bashkëpunim me njëri-tjetrin, kontrabandonin veshje nga Kina dhe Turqia, i magazinonin në Tiranë dhe më pas i shitnin duke shmangur detyrimet tatimore”, thuhet tutje në njoftim.
Po ashtiu siç bëhet e ditur në njoftim këta shtetas u kapën në flagrancë gjatë operacionit, duke transportuar me 2 automjete, 17 valixhe me veshmbathje të markave të shtrenjta, të dyshuara të kontrabanduara, të cilat u sekuestruan në cilësinë e provës materiale.
“Në përfundim të veprimeve: u arrestuan shtetasit: S. B., 69 vjeç, B. Ll., 72 vjeç dhe A. B., 57 vjeç; nisi procedimi penal për shtetasit: R. Ll., 45 vjeç, I. B., 39 vjeç, E. B., 23 vjeç dhe Z. M., 65 vjeç”.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Shkelja e të drejtës së pronësisë industriale”, “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Mospagimi i taksave dhe i tatimeve” dhe “Fshehja e të ardhurave”. /Telegrafi/
Mbrëmjen e së premtes në fshatin Meliq të Hanit të Elezit një mur mbrojtës është shembur duke rënë mbi një veturë, në të cilën ishte drejtuesi i automjetit.
Në raportin 24 orësh bëhet e ditur se personi i lënduar është dërguar për trajtim mjekësor në QKUK, ndërkaq në vendin e ngjarjes kanë dalë policia, zjarrfikësit dhe emergjenca.
“Është raportuar se një muri mbrojtës i rrugës së lartcekur është shembur dhe si pasojë ka zënë një automjet në të cilën gjendej viktima mashkull kosovar. Në vendin e ngjarjes kanë dalë policia, zjarrfikësit, emergjenca të cilët kanë nxjerrë viktimën nga vetura dhe është dërguar në QKUK për tretman mjekësor”, thuhet në raport.
Tutje siç thuhet në raport është njoftuar prokurori si dhe AME dhe me rekomandim të tyre familjet afër vendit të ngjarjes janë evakuuar, ndërsa një patrullë policore mbeten në sigurim të vendit të ngjarjes deri në zhvillimet e radhës. /Telegrafi/
Lidhja Demokratike e Kosovës sot, më 31 janar do të mbajë Kuvendin e partisë, ku pritet të vendoset rreth udhëheqjes së partisë.
Pas rezultatit në zgjedhjet e 28 dhjetorit, ku LDK-ja siguroi vetëm 15 vende në Kuvend, kryetari i kësaj partie Lumir Abdixhiku ka thënë se të ofrojë dorëheqjen në Kuvend dhe pastaj u mbetet kuvendarëve të vendosin nëse do ta pranojnë apo jo.
Ndryshe, sot 355 delegatët e LDK-së do të mblidhen sot për të diskutuar për ofrimin e dorëheqjes së kryetarit, Lumir Abdixhiku.
Kuvendi nis në orën 12:00.
Kryetari aktual i kësaj partie, Lumir Abdixhiku pak ditë para Kuvendit shkroi “Në jetë duhet pasur vullnet e durim, të mirat vijnë pastaj. Ata që besojnë, qëndrojnë. Koha i vendos gjërat në vend”.
E në këtë rrjedhë, më 25 janar, anëtari i Kryesisë së LDK-së, ish-kryeministri Avdullah Hoti, ka shpall kandidaturën e tij për kryetar të kësaj partie më 25 janar.
Hoti është zotuar se nëse merr besimin për ta udhëhequr LDK-në, do të drejtojë një proces gjithëpërfshirës dhe transparent, në përputhje të plotë me Statutin e partisë, duke garantuar pjesëmarrje aktive të të gjitha strukturave dhe forumeve.
Ai ka theksuar se synimi i tij është ndërtimi i një LDK-je të hapur, të drejtë dhe konkurruese, ku avancimi bazohet në meritë, integritet dhe përkushtim, me fokus të veçantë në përfshirjen e profesionistëve, grave dhe të rinjve.
Ambicie të tilla janë konsideruar legjitime nga bashkëpartiakë të Hotit, megjithatë theksojnë se ky është një proces tjetër që derivon nga vota pro apo kundër Abdixhikut.
Ndryshe, ditë më parë është përfolur se edhe ish-kryetari i Prishtinës, Ismet Beqiri sot në Kuvendin e LDK-së do ta bëjë publike kandidaturën e tij për kryetar të partisë. /Telegrafi/
Komisioni Qendror i Zgjedhjeve (KQZ) ka bërë të ditur se sot do të shpallen rezultatet nga zgjedhjet e jashtëzakonshme parlamentare të 28 dhjetorit 2025.
Kjo u bë e ditur përmes një njoftimi për media nga KQZ-ja.
“Ju njoftoj se sot (e shtunë, 31.01.2026, ora 10:00) Komisioni Qendror i Zgjedhjeve mban mbledhjen e radhës me rendin e ditës të cilin e gjeni të bashkangjitur. Hyrje: Kreshnik Radoniqi, Kryesues i mbledhjes së KQZ-së; 2. Shpallja e rezultateve përfundimtare për Zgjedhjet e parakohshme për Kuvendin e Republikës, së Kosovës, të mbajtura me datën 28.12.2025. 3. Të ndryshme”, thuhet në njoftim.
Mbledhja e KQZ-së do të jetë e hapur për publikun dhe mediat.
Ndryshe, që nga mbajtja e zgjedhjeve më 28 dhjetor 2025, autoritetet e zbatimit të ligjit kanë zhvilluar intervista me qindra persona, kanë ndaluar dhjetëra të tjerë dhe kanë vazhduar hetimet nën dyshimet për manipulim të votave të kandidatëve për deputetë në disa komuna të vendit.
Si pasojë e këtyre dyshimeve, Komisioni Qendror i Zgjedhjeve (KQZ) mori vendim për rinumërim të plotë të votave për kandidatët në të gjitha komunat e Kosovës, ndërsa votat për subjektet politike nuk u përfshinë në këtë proces dhe mbetën të pandryshuara.
Megjithë parregullsitë dhe vjedhjet e votave brenda partive politike, ndarja e mandateve të deputetëve për subjektet politike ka mbetur e njëjtë, pa ndryshime në përbërjen e përgjithshme të Kuvendit.
Deri më tani, pasojat konkrete nga këto manipulime kanë rezultuar vetëm me largimin nga Kuvendi të deputetit të komunitetit turk, Fikrim Damka, vendi i të cilit është zëvendësuar nga bashkëpartiaku i tij, Ergul Mazrek.
Sipas hetimeve, manipulimi i votave dyshohet se është kryer në dy forma kryesore: përmes shtimit të votave drejtpërdrejt në sistem nga numëruesit, në rastet kur qytetarët kanë votuar më pak se 10 kandidatë, si dhe përmes transferimit të votave nga një kandidat tek tjetri brenda së njëjtës parti politike.
Këto parregullsi kanë çuar në nisjen e hetimeve në disa komuna, ku një numër komisionarësh dhe vëzhguesish kanë përfunduar në paraburgim, ndërsa prokuroria ende nuk ka ftuar për intervistim deputetët emrat e të cilëve kanë spikatur me dallime të mëdha votash, megjithëse nuk është përjashtuar mundësia që edhe ata të përfshihen në procedurat hetimore në vijim. /Telegrafi/
Nën udhëheqjen e Kryeprokurorit Blerim Isufaj, është mbajtur takimi i parë i Kolegjiumit të Prokurorëve Special për këtë vit, ku është bërë vlerësimi i punës së Prokurorisë Speciale gjatë vitit 2025 dhe janë përcaktuar prioritetet për vitin 2026.
Sipas njoftimit thuhet se në takim është theksuar se gjatë vitit 2026 fokusi kryesor do të jetë rritja e efikasitetit në hetime, me theks të veçantë në rastet e korrupsionit dhe krimit të organizuar.
“Kryeprokurori Isufaj vlerësoi angazhimin e prokurorëve dhe kërkoi përkushtim edhe më të madh në funksion të sundimit të ligjit, forcimit të performancës dhe rritjes së besimit të qytetarëve në sistemin e drejtësisë”, thuhet në njoftim. /Telegrafi/
Prokuroria Speciale e Kosovës ka konfirmuar se ministri në detyrë i Shëndetësisë, Arben Vitia, është intervistuar në lidhje me një rast që është në trajtim nga prokuroria.
Lajmin për Telegrafin e ka konfirmuar zëdhënësja e Prokurorisë Speciale, Nora Luta.
Sipas tij, me qëllim të ruajtjes së integritetit të procesit hetimor, në këtë fazë nuk mund të ndajnë më shumë informacione.
“Arben Vitia, me autorizim të Prokurorisë Speciale është intervistuar lidhur me një rast që kjo prokurori e ka në trajtim. Me qëllim të ruajtjes së integritetit të procesit hetimor, në këtë fazë nuk mund të ndajmë më shumë informacione”, ka thënë Luta.
Po ashtu edhe Vitia para mediave konfirmoi lajmin që është intervistuar duke mos dhënë detaje.
Ndërkaq, zëdhënësja e Prokurorisë Speciale, Luta ka konfirmuar edhe intervistimin e deputetes së zgjedhur nga radhët e LVV-së, Fitore Pacolli duke mos dhënë detaje shtesë.
Ndryshe, ish-ministri i Bujqësisë, Pylltarisë dhe Zhvillimit Rural, Faton Peci, është intervistuar gjatë ditës së sotme nga Prokuroria Speciale e Kosovës.
Lajmin për Telegrafin e ka konfirmuar zëdhënësja e Prokurorisë Speciale të Kosovës, Nora Luta.
Sipas tij, Peci është intervistuar në cilësinë e të pandehurit në rastin e granteve, i cili është në trajtim nga Prokuroria Speciale e Republikës së Kosovës. /Telegrafi/
Agjencia e Ushqimit dhe Veterinarisë ka bërë të ditur se bazuar në raportet zyrtare të ADIS dhe Organizatës Botërore për Shëndetin e Kafshëve (WOAH), në Republikën e Maqedonisë së Veriut është konfirmuar prania e sëmundjes Lija e dhenve dhe dhive në zonën MKD – Lipkovo.
Sipas një njoftimi për media bëhet e ditur se në përputhje me Ligjin për Veterinarinë Nr. 2004/21, ndalohet importi i kafshëve të gjalla të llojit të deleve dhe dhive, si dhe i nënprodukteve të tyre (lëkura dhe leshi), përfshirë edhe produktet me origjinë nga këto kafshë që nuk janë të trajtuara termikisht ose që kanë origjinë nga Republika e Maqedonisë së Veriut.
"Kjo masë hyn në fuqi menjëherë dhe do të mbetet në zbatim deri në një vlerësim të mëtejshëm të situatës nga autoritetet përkatëse ndërkombëtare, si dhe nga Agjencia e Ushqimit dhe Veterinarisë e Republikës së Kosovës. Publiku dhe operatorët ekonomikë do të informohen me kohë për çdo ndryshim eventual", thuhet në njoftim. /Telegrafi/
Komisioni i Pavarur i Mediave (KPM) ka përmbyllur procesin e monitorimit të ofruesve të shërbimeve mediale audiovizuale (OSHMA) të cilat kanë mbuluar fushatën e Zgjedhjeve të Parakohshme 2025.
Sipas njoftimit për media bëhet e ditur se monitorimi ka pasur për qëllim vlerësimin e performancës së OSHMA-ve në pajtim me Kreun VIII “Mediat gjatë fushatës së zgjedhjeve” të Ligjit Nr. 08/L-228 për Zgjedhjet e Përgjithshme dhe Rregulloren KPM-2024/03 për Obligimet e Ofruesve të Shërbimeve Mediale gjatë Fushatës Zgjedhore.
"Zgjedhjet e jashtëzakonshme parlamentare u mbajtën më 28 dhjetor 2025, ndërsa fushata zgjedhore zgjati nga data 17 deri më 28 dhjetor 2025 (ora 07:00), para hapjes së vendvotimeve. Në zgjedhje morën pjesë 24 subjekte politike të certifikuara (SCP), prej të cilave 19 parti politike, 2 koalicione, 2 iniciativa qytetare dhe 1 kandidat i pavarur".
Po ashtu siç thuhet në raport: "Zyra Ekzekutive e KPM-së, para fillimit të fushatës, hartoi Planin e Veprimit për Zgjedhjet e Jashtëzakonshme Parlamentare 2025 në Republikën e Kosovës, i cili përcaktoi aktivitetet e Zyres Ekzekutive të KPM-së në përputhje me mandatin ligjor të përcaktuar me Ligjin Nr. 04/L-44 për KPM-në, Ligjin Nr. 08/L-228 për Zgjedhjet e Përgjithshme dhe Rregulloren KPM-2024/03 për obligimet e ofruesve të shërbimeve mediale gjatë fushatës zgjedhore".
Në raport shpjegohet se periudha para fushatës përfshiu aktivitete të KPM-së për komunikim dhe sensibilizim të të licencuarve, me qëllim njoftimin e tyre mbi detyrimet gjatë procesit zgjedhor.
"Gjatë kësaj kohe, KPM organizoi dy takime me të licencuarit për të diskutuar mbi procesin zgjedhor, përkatësisht detyrimet e mediave sipas Ligjit Nr. 08/L-228 dhe akteve nënligjore të KPM-së, duke përfshirë veçanërisht Rregulloren e re të KPM-së 2024/03, lidhur me obligimet e ofruesve të shërbimeve mediale gjatë fushatës.
Gjatë fushatës zgjedhore dhe deri në mbylljen e vendvotimeve, KPM monitoroi dhe vlerësoi pajtueshmërinë e të licencuarve me legjislacionin në fuqi dhe identifikoi shkeljet e mundshme. Për shkak të mungesës së kuorumit të Komisionit të KPM-së, nuk u mor asnjë vendim për shkeljet e konstatuara nga Zyra Ekzekutive. Periudha paszgjedhore u fokusua në përgatitjen e raportit preliminar dhe atij përmbledhës, që reflekton veprimet e KPM-së dhe gjetjet e monitorimit të të licencuarve gjatë fushatës".
Tutje në raport thuhet se në përgjithësi, OSHMA-të e përfshira në monitorim ofruan hapësirë dhe mbuluan kryesisht aktivitetet zgjedhore të subjekteve politike LVV, PDK, LDK dhe AAK.
"Ndërkaq, subjekteve të tjera të certifikuara nuk u ofrua mundësia e njëjtë për hapësirë “pa pagesë” gjatë fushatës, për çka Zyra Ekzekutive e KPM-së ka njoftuar OSHMA-të dhe i ka udhëzuar të veprojnë në pajtim me Rregulloren KPM-2024/03. Gjatë periudhës monitoruese, shkeljet më të zakonshme të konstatuara përfshinë: mosidentifikim të duhur të reklamimit politik, përfshirje dhe përdorim të fëmijëve në spote politike, sponsorizim të emisioneve politike, reklamim me ekran të ndarë, vendosje të produkteve në emisione të çështjeve aktuale dhe shkelje të heshtjes zgjedhore", thuhet në raportin e KPM-së. /Telegrafi/
Pas deklaratës së ish ministritë të Bujqësisë, Faton Pecit i cili tha se shumë shpejt do t’i drejtohet organeve të drejtësisë me një kallëzim penal kundër kallximit të rrejshëm penal siç e quajti ai “ish deputetit me vota të vjedhura të mërgatës, Paris guri”, reagoi ky i fundit.
Guri përmes një postimi në rrjetin social në Facebook ka thënë se e mirëpret edhe kallëzimin penal të tij ndaj tij për kinse fushatë të orkestruar kundër tij.
Ai po ashtu tha se shpreson që ky intervistim të mos mbetet me kaq, por të vazhdohet deri në dënimin e merituar për të dhe për të gjithë ata që i kanë futur duart në buxhetin e shtetit.
“E përshëndes veprimin e Prokurorisë së Kosovës për intervistimin e Ministrit të Bujqësisë, Faton Peci, pas kallëzimit penal që ia kemi bërë për keqpërdorim të detyrës zyrtare dhe keqpërdorim të buxhetit të shtetit. Shpresoj që ky intervistim të mos mbetet me kaq, por të vazhdohet deri në dënimin e merituar për të dhe për të gjithë ata që i kanë futur duart në buxhetin e shtetit”, ka shkruar Guri.
“I vetmi orkestrim në atë rast ka qenë orkestrimi i tij për të shpërndarë paratë e buxhetit te familjarët e eksponentëve të VV-së. Sa i përket vjedhjes së votave, vetëm një rikujtim për Pecin: Taulant Kelmendi – 918 vota të vjedhura, Arbër Rexhaj – 623 vota të vjedhura, Rea Krasniqi – 540 vota të vjedhura, Albin Kurti – 485 vota të vjedhura, Dafina Elshani – 433 vota të vjedhura, Paris Guri – 564 vota të hequra deri më tash. Mezi po e pres ftesën e Prokurorisë dhe përballjen me ty në gjykatë. S’ka me u ndale asnjëherë duke i denoncu të gjitha hajnitë që i keni bër”, ka shkruar Guri. /Telegrafi/
Login
