Ministri i Mjedisit dhe Planifikimit Hapësinor, Muhamet Hoxha realizoi një takim pune me drejtorin e Shërbimit për Sistemin Informativ, Jeton Suma, me ç'rast në fokus të takimit ishte menaxhimi i të dhënave gjeohapësinore për zonat e mbrojtura dhe mjedisin.

Gjatë diskutimeve, u ritheksua se mbrojtja e mjedisit përfaqëson një prioritet thelbësor institucional dhe se hartimi dhe zbatimi i politikave publike në këtë fushë duhet të realizohet në mënyrë rigoroze, në përputhje të plotë me ligjin.

“Në këtë kontekst, roli i drejtorisë së Shërbimit është thelbësor dhe strategjik, sepse kjo drejtori është përgjegjëse për mbledhjen, përpunimin dhe shkëmbimin e të dhënave gjeohapësinore, si dhe për forcimin e bashkëpunimit institucional me strukturat përkatëse brenda dhe jashtë Ministrisë së Mjedisit dhe Planifikimit Hapësinor, duke e bërë këtë një prioritet të qartë institucional”, thuhet në njoftimin e lëshuar nga Ministria e Mjedisit dhe Planifikimit Hapësinor.

Lidhja Demokratike e Maqedonisë vlerëson se viti i ardhshëm do të jetë vit i reformave të thella, i hapjes së portave të Bashkimit Evropian për Maqedoninë dhe i rezultateve të larta.

Në urimin e Vitit të Ri drejtuar qytetarëve, nga partia thonë se për çdo çështje aktuale do të ndërtojnë dhe do ta komunikojnë publikisht qëndrimin e tyre.

"Do të afirmojmë nevojën për reforma të thella në sistemin gjyqësor, miratimin e një ligji për luftën kundër krimit të organizuar dhe formimin e një Agjencie të pavarur kundër formave të rënda të kriminalitetit, depolitizimin e institucioneve, miratimin e një Kodi të ri Zgjedhor me të cilin Maqedonia do të jetë një njësi e vetme zgjedhore dhe krijimin e kushteve për garë të barabartë zgjedhore pa shpenzim të mjeteve nga Buxheti, si dhe zbatimin e programeve konkrete për mbrojtjen e mjedisit jetësor dhe përcaktimin e një pensioni minimal. Për të rinjtë do të iniciojmë që ata të vendosin vetë për të ardhmen e tyre, në mënyrë që të krijojnë dhe të veprojnë këtu, në atdheun tonë, thuhet në urimin e Vitit të Ri nga Aleanca Demokratike.

Për festa dhe për fundvit, çmimet në tregun e Bit Pazarit janë rritur, ankohen qytetarët. Ata njëherësh apelojnë që të merren masa që të ulen çmimet, sidomos në prag të festave, ku qytetarët kanë nevojë më shumë të blejnë dhe të festojnë në shtëpitë e tyre.

“Çmimet edhe para festave kanë qenë kështu të larta, edhe para, edhe pas festave. Çmimet janë të larta, kështu është tek ne, edhe rrymën e kemi shtrenjtë.”, – tha një qytetar.

“Janë rritur pak çmimet. Çmimet në krahasim me vitet e kaluara janë më të larta, papunësi e madhe, çka vjen prej jashtë është më e shtrenjtë.”, – tha një qytetar tjetër.

“Normalisht çmimet para Vitit të Ri gjithnjë shtrenjtohen. Të gjitha janë më shtrenjtë, edhe frutat edhe perimet.”, – u shpreh një qytetar.

“Apeloj që të ulen çmimet, që të jetojmë një jetë më normale, sepse gjithçka është shtrenjtë.”, – u shpreh një qytetar tjetër.

Tregtarët, nga ana tjetër, thonë se nuk kanë shitje mjaftueshëm edhe pse jemi në prag të fundit të vitit dhe festave më pas.

“Po, çmimet janë rritur shumë, jo pak. Po pritet në këtë shtet, nuk ka asgjë të sigurt, kur thonë se nuk ka rritje të çmimeve, përkundrazi rriten edhe më shumë, çka do të bëjmë nuk e dimë. Po, blejnë shumë pak, jo si më parë.”, – tha një tregtar.

“Qytetarët blejnë, por jo si duhet. Çmimet u duken të larta dhe me të drejtë e kanë.”, – tha një tregtar tjetër.

Përderisa çmimet në vazhdimësi rriten, qytetarët janë në pritje të masave konkrete nga Qeveria për vitin e ardhshëm. /rtvm2

Në prag të Vitit të Ri, presidentja Gordana Siljanovska Davkova sot i ka vizituar fëmijët në Klinikën për sëmundje të fëmijëve në Shkup dhe të Institutit për sëmundje të mushkërive tek fëmijët – Kozle.

Presidentja në publikimin në profilin e saj në Fejsbuk potencoi se në sytë e fëmijëve ka parë shpresë të sinqertë për shërim të shpejtë, ndërsa në fjalët e mençura vendosshmëri për ballafaqim me sëmundjen.

“Është ndjenjë e bukur me paketë në dorë të flasësh me miq të rinj për Babadimrin, për lojë, për mësim dhe argëtim. Ia vlen të përpiqesh t’ua largosh mendjen nga spitali për një moment dhe t’i bindësh se do të jenë në shtëpi natën e Vitit të Ri të ardhshëm. Ndihesh i dobishëm kur një fëmijë të kërkon një numër telefoni për të të telefonuar ose kur të thotë dëshirën e tij më të madhe, e ju uroni të njëjtën gjë për të. Jam jashtëzakonisht mirënjohëse për takimin e sotëm, i cili do të më kujtojë balerinat vizatimore të Ajlas dhe Tijanas”, shkroi Siljanovska Davkova.

Personelit mjekësor u ka shprehur mirënjohje për sakrificën, humanitetin, përkushtimin dhe kujdesin e tyre për gjënë më të çmuar – shëndetin e fëmijëve

Aleanca për Shqiptarët e Ziadin Selës ka reaguar ndaj përzgjedhjes së Mitko Stefkovskit në krye të Këshilllit Komunal në Strugë.

"Ka qenë e qartë që në fillim se asnjë ndryshim nuk do të vinte me këtë lloj koalicioni për Strugën dhe qytetarët e saj. Kandidatura e ashtuquajtur e pavarur aspak nuk ishte e tillë, kishte shumë parakushte që fatkeqsisht i shohim çdo ditë tek plotësohen…Nëse “ndryshimi” është Merko dhe OBRM-PDUKM, kjo nuk quhet ndryshim po vazhdimësi”, thuhet në reagimin e ASH-së.

Sipas Selës me këtë vendim të sotit kjo nuk është zero korrupsion por është vazhdim i korrupsionit.

"Nëse kompromisi sot i arrire bëhet mbi kurrizin e drejtësisë dhe llogaridhënies nga pushtetarët e deri djeshem të komunës së Strugës, kjo nuk është zero korrupsion, por shumëfishim dhe vazhdim i korrupsionit. Nëse zgjedhja e një kandidati të VMRO-së për kryesues të këshillit e kamufloni me bashkëjetesë ndërmjet komuniteteve etnike dhe demokraci, atëherë lind pyetja: pse Buteli, me mbi 50 për qind trup votues shqiptar, nuk e ka kryesuesin e këshillit shqiptar? Pse Bervenica jo? Dhe pse, sipas së njëjtës logjikë, nuk kryesohet Këshilli i Qytetit të Shkupit nga një shqiptar”, ka shtruar pyetje Ziadin Sela.

Nga ASH thonë se nga sot këshilli i komunës së Strugës nuk udhëhiqet në gjuhën shqipe!

Ministrja Vesna Janevska dhe punonjësit e Ministrisë së Arsimit dhe Shkencës u shprehin mirënjohje nxënësve, studentëve, mësimdhënësve, profesorëve, bashkëpunëtorëve profesionalë, prindërve dhe të gjithë atyre që punojnë me përkushtim për arsim më të mirë dhe më cilësor, për angazhimin e tyre gjatë vitit 2025, dhe ju urojnë arritje edhe më të mira në Vitin e Ri 2026, njoftoi MASH.

“Nxënësit dhe studentët tanë janë gëzimi dhe krenaria e këtij vendi. Ata e meritojnë çdo përpjekje tonën për të mësuar më shumë, për të fituar aftësi të dobishme dhe kompetenca jetësore që do t’u mundësojnë të jenë qytetarë të pavarur, kreativë dhe të përgjegjshëm. Për të gjithë ata, gjatë këtij viti që po mbaron, e kemi rritur dhe forcuar mbështetjen, duke krijuar kushte për përfshirjen në arsim të sa më shumë fëmijëve, në përputhje me mundësitë e tyre.Me mbështetjen e sektorit qytetar, kemi futur arsimin fillor formal për fëmijët që janë në trajtim më të gjatë mjekësor, ndërsa një kujdes i veçantë është kushtuar edhe nxënësve me nevoja të veçanta arsimore”, shkruan në urimin e Janevskës dhe MASH-it me rastin e Vitit të Ri.

Thekson se janë siguruar tekste shkollore dhe programe të reja mësimore në disa klasa dhe janë përgatitur disa dokumente strategjike që “përcaktojnë zhvillimin e mëtejshëm të sferave arsimore dhe shkencore”.

“Kemi bërë hap përpara në digjitalizimin e arsimit dhe shërbimeve. Për t’i përdorur teknologjitë e reja si mjet për njohuri, pa rreziqe, kemi promovuar Udhëzuesin për Inteligjencën Artificiale, me mbështetje të madhe nga komuniteti akademik.Kemi përmirësuar kushtet infrastrukturore, duke investuar në mënyrë të barabartë në të gjitha rajonet e vendit. Shkolla të reja, objekte të rindërtuara salla të reja sportive, dhe së shpejti edhe rikonstruimi i konvikteve shtetërore për studentë. Shkenca është bërë fushë prioritare, ku janë investuar më shumë mjete deri tani, për të mbështetur realizimin e projekteve me interes kombëtar”, bën të ditur MASH.

Shton se mësimdhënësit dhe profesorët tanë morrën paga më të larta, iu hapëm mundësi të reja për zhvillim karriere, avancuam trajnimet, të gjitha me qëllim që magjinë e njohurive ta sjellin më me sukses në klasa dhe auditorë dhe ta ndajnë atë me të rinjtë.

“Vazhdojmë edhe në vitin 2026. Me dëshira për shëndet, suksese dhe mirëqenie, urojmë që Viti i Ri 2026 të jetë vit i njohurive, shpresës dhe bashkimit”, dhuhet në urimin e MASH-it.

Gjykata Themelore Penale e Shkupit shpalli vendimin në rastin me nr. 98/25, i cili ka të bëjë me abuzimet e kryera nga punonjësit e në burgun e “Shkupit”. Gjykata i shpalli të akuzuarit fajtorë për veprat penale për të cilat u ngarkoheshin, duke vlerësuar të gjitha rrethanat lehtësuese dhe rënduese.

Ish-drejtori i Burgut të Shkupit në Shuto Orizare, Filip Andov – Sokol, është dënuar me tetë muaj burg për veprën penale të shpërdorimit të pozitës dhe autoritetit zyrtar. Gjykata përcaktoi se vepra penale është kryer në bashkëpunim dhe në kohëzgjatje të zgjatur.

I akuzuari P.A., gjithashtu për shpërdorim të pozitës dhe autoritetit zyrtar, u dënua me një dënim me kusht prej gjashtë muajsh burgim, i cili nuk do të ekzekutohet nëse nuk kryen një krim të ri brenda dy viteve nga data e plotfuqishmërisë së vendimit.

I akuzuari Gj.R. u shpall fajtor për krimin e kryerjes së pakujdesshme të detyrës në shërbim dhe u dënua me një dënim me kusht prej tre muajsh burgim, me një periudhë prove prej një viti. I njëjti sanksion, një dënim me kusht prej tre muajsh burgim me një periudhë prove prej një viti, iu shqiptua nga gjykata edhe të pandehurit S.P. për të njëjtin krim.

Për të akuzuarin T.N., i cili u akuzua për shpërdorim të pozitës dhe autoritetit zyrtar dhe për punë të pakujdesshme në shërbim, gjykata caktoi një sanksion të vetëm – dënim me kusht prej tetë muajsh burgim, i cili nuk do të zbatohet nëse nuk kryen një krim të ri në tre vitet e ardhshme.

I akuzuari E.O. u dënua për punë të pakujdesshme në shërbim dhe u dënua me dënim me kusht prej gjashtë muajsh burgim, me një periudhë prove prej dy vitesh, ndërsa i pandehuri K.V. mori një dënim me kusht prej tre muajsh burgim me një periudhë prove prej një viti.

Vendimi nuk është përfundimtar dhe palët kanë të drejtë ankese në Gjykatën e Apelit të Shkupit.

Në shkollën fillore “Mihaill Grameno” të fshatit Bllacë sikurse në të gjitha shkollat e tjera fillore dhe të mesme dita e fundit e këtij gjysmëvjetori nuk ishte thjesht një mbyllje procesi, por një festë suksesi. Mësuesja Azemine Saiti Avdiu tha se ky gjysmëvjetor ishte plot sfida, mësime të reja dhe suksese të arritura me përkushtim. Ndërsa zilja e fundit njoftoi fillimin e pushimeve dimërore nxënësit duket se morën lirinë e plotë për të shijuar pushimet pa peshën e detyrave të rënda.

“Jemi të kënaqur nga puna jonë dhe nga mësimnxënia e nxënësve. Gjithçka ka vijuar ashtu siç e kemi planifikuar, ka qenë i suksesshëm. Unë personalisht nuk i kam angazhuar aq tepër, vetëm me nga një lektyrë të vogël, leximin ta ushtrojnë më tepër në pushim kurse pjesa tjetër mbetet të jenë pak më të liruar mos të kenë angazhime të tepërta. Edhe ata le të festojnë pak, le të jenë më të lirë. Tash nxënësit i lexojnë vetëm ato që i kanë obligative kurse në aktivitete të lira nuk merren aq me lexim, nëse nuk i angazhojmë ne mbeten aty ku i lëmë”, tha Azemine Saiti Avdiu, mësuese.

Për një pjesë të nxënësve, ky gjysmëvjetor ka qenë një udhëtim zbulimesh. Për disa, ndryshimi ka qenë më i ndjeshëm, siç është kalimi nga cikli klasor në atë lëndor.

“Kemi mësuar shumë gjëra të reja, kemi bërë shumë ushtrime të bukura dhe jemi kënaqur. Cila ka qenë lënda më e preferuar ose ku je angazhuar më shumë me detyra dhe mësime? Matematika”, u shpreh një nxënës.

“Shumë mirë ishte por ishte edhe një ndryshim i madh sepse nga klasa e pestë kalova në klasë të gjashtë ku na u shtuan shumë lëndë dhe shumë mësues por kur mëson i’a del. Çfarë ishte më e vështirë në klasën e gjashtë kur përnjëherë u ballafaquat me më shumë lëndë, më shumë angazhime? Nuk ishte shumë rëndë sepse kam punuar edhe në shtëpi por gjuhët e huaja ishin më të rënda por mësuesit ishin të qartë dhe kemi kuptuar”, tha Azemine Saiti Avdiu, mësuese.

“Unë do ti kaloj pushimet dimërore, do të shkoj do të vizitoj vende, ka me kaluar me familjen time dhe ka me lexu lektyrën që ma dha mësuesja “Borëbardha”. Unë kam mësuar shumë mirë edhe të shkruaj edhe të lexoj”, tha një tjetër nxënës.

Për pushimet dimërore, nxënësit kanë plane të ndryshme. Ata bëjnë apel që bashkëmoshatarët të shmangin qëndrimin e tepërt në telefon dhe të shfrytëzojnë kohën e lirë për lexim, lojë dhe shoqërim.

“Unë për pushimet dimërore do të kaloj kohë me familjen”, u shpreh një nxënëse.

“Do të lexoj ndonjë lektyrë apo ndonjë libër. Të pëlqen leximi? Po, më pëlqen dhe lexoj lektyra në kohë të lirë. Telefonin a e përdor? E përdori por jo shumë shpesh”, tha një tjetër nxënëse.

“Unë ju bëj apel të gjithë fëmijëve të mos qëndrojnë në telefon, të lexojnë lektyra që u kanë dhënë mësuesit. Me shokët keni bërë plane, keni ble ndonjë top për të luajtur futboll ose basketboll? Po, kemi blerë top dhe këto tre javë që i kemi pushim do të luajmë me shokët”, deklaroi një nxënës.

Pushimet dimërore do të zgjasin tre javë, ndërsa nxënësit pritet t’i kthehen bankave shkollore në 20 janar, të pushuar dhe më të motivuar për vazhdimin e vitit shkollor. /Alsat.mk

Në seancën e sotme të Qeverisë, Bekim Sali nga koalicioni VLEN është emëruar zëvendëskryeministër i parë.

Sali në rrjetin social Facebook shkruan se emërimi në këtë pozitë nuk është vetëm funksion por edhe përgjegjësi dhe obligim moral.

Statusi i plotë:

“Me ndjenjë të thellë përgjegjësie dhe përulësie, kam nderin t’ju njoftoj se në seancën e sotme të Qeverisë jam emëruar në pozitën e Zëvendëskryeministrit të Parë.

Ky emërim për mua nuk është thjesht një funksion apo titull. Është një barrë e madhe besimi, një obligim moral dhe kombëtar për të qenë në shërbim të secilit qytetar, pa dallim, deri në realizimin e plotë të projekteve që janë jetike për të gjithë qytetarët.

Kjo qeveri, për gati dy vjet, ka dëshmuar se kur ka vullnet dhe përkushtim, ka edhe rezultate. Punësimi dhe avancimi i mijëra të rinjve e të rejave, ndarja e mjeteve për ndërtimin e Kampusit të Universitetit “Nënë Tereza”, mbështetja financiare për çdo komunë, zgjidhja e çështjes së Medresesë, rritja dhe zhvillimi ekonomik – janë vepra konkrete që flasin më shumë se fjalët.

Por, rruga përpara nesh është ende e gjatë. Kemi shumë projekte për të realizuar dhe sfida për të përballuar. Koha nuk pret. Prandaj do të punojmë me zell, përkushtim dhe motiv të lartë, që çdo premtim i dhënë para qytetarëve të shndërrohet në punë konkrete dhe rezultate të prekshme.

Me besim në Zotin, në njerëzit tanë dhe në të ardhmen që po ndërtojmë së bashku, uroj që puna jonë të jetë e mbarë dhe që në fund të kësaj rruge të dalim faqebardhë para qytetarëve dhe para historisë”, ka shkruar Bekim Sali.

Kujtojmë se Sali në këtë pozitë vjen në vend të Izet Mexhiti i cili në zgjedhjet e 19 tetorit u zgjodh kryetar i Komunës së Çairit.

Prodhimi industrial në periudhën janar-nëntor të vitit 2025, në krahasim me të njejtën periudhë të vitit të kaluar shënon rritje prej 1,9 për qind, kumtoi Enti Shtetëror i Statistikës.

Në nëntor të këtij viti, megjithatë, krahasuar me nëntorin e vitit 2024, pati një rënie prej 2,8 për qind.

Prodhimi industrial në sektorin e Minierave dhe Gurores në nëntor të vitit 2025, krahasuar me nëntorin e vitit 2024, shënon rënie me 4,7 për qind, në sektorin e Prodhimit shënohet rënie prej 2,0 për qind, ndërsa në sektorin e Furnizimit me energji elektrike, gaz, avull dhe Ajër të Kondicionuar shënohet ulje prej 8,6 për qind.

Sipas grupeve kryesore industriale, prodhimi në muajin nëntor të vitit 2025, krahasuar me muajin e njejtë të vitit paraprak, shënon rënie tek Energjia për 8,5 për qind, Produktet kapitale për 2,1 për qind, Prodhime të qëndrueshme për konsum të gjërë për 18,6 për qind dhe Prodhime jo të qëndrueshme për konsum të gjërë për 8,7 për qind, derisa rritje vërehet te Produktet intermediare përveq energjisë për 7,7 për qind.

Kryetari i Komunës së Tetovës, Bilall Kasami, ka njoftuar se transporti publik i qytetit do të jetë falas për të gjithë ata qytetarë që kanë shlyer obligimet ndaj Komunës.

Kasami poashtu ka sqaruar se si mund të përfitojnë edhe institucionet nga kyvendim i Komunës.

Njoftimi i plotë:

Sot në Këshillin Komunal u votua një vendim me rëndësi për qytetarët tanë!

Transporti publik bëhet FALAS për të gjithë ata që kanë shlyer obligimet ndaj Komunës.

Nga ky vendim do të përfitojnë edhe nxënësit e shkollave fillore dhe të mesme. Gjithashtu edhe të gjitha shoqatat dhe institucionet që do të nënshkruajnë një momerandum bashkëpunimi me Komunën e Tetovës.

Një hap konkret për të shpërblyer përgjegjësinë qytetare, për të lehtësuar lëvizjen dhe për të ndërtuar një qytet më të drejtë për të gjithë.

Qeveria e Maqedonisë së Veriut, miratoi Propozim-Ligjin për Prokurorinë Publike, i cili prezantohet si pjesë kyçe e agjendës reformuese për sundimin e ligjit.

Me këtë zgjidhje ligjore synohet forcimi i pavarësisë dhe efikasitetit të sistemit prokurorial në vend.

Risia kryesore e ligjit është ndryshimi i procedurës për zgjedhjen e kryeprokurorit. Parashihen kritere të qarta dhe një sistem meritash, me qëllim që procesi të jetë i liruar nga presionet politike.

“Në ligj janë inkorporuar rekomandimet relevante, në mënyrë që procesi të jetë i çliruar nga ndikimet politike dhe të bazohet ekskluzivisht në profesionalizëm, integritet dhe kredibilitet profesional”, bëjnë të ditur nga Qeveria.

Gjithashtu, ligji parashikon afate të sakta për avancimin e prokurorëve, si dhe një parim të ri për përgjegjësi disiplinore, që pritet të sjellë më shumë parashikueshmëri dhe llogaridhënie në punë.

Në muajin nëntor të vitit 2025, krahasuar me muajin e njëjtë të vitit të kaluar, shkalla reale e qarkullimit në grupin e Tregtisë me pakicë të ushqimit, pijeve dhe duhanit është rritur për 6.5%, bën të ditur Enti Shtetëror i Statistikave.

Në tregtinë me pakicë në muajin nëntor të vitit 2025, krahasuar me muajin nëntor të vitit 2024, parë sipas grupeve dhe klasave, shkalla e qarkullimit në grupet: Tregtia me pakicë e ushqimit, pijeve dhe duhanit është rritur nominalisht për 13.7%, dhe në terma real për 6.5%, Tregtia me pakicë e produkteve jo-ushqimore, përveç karburantit, është rritur nominalisht për 5.6%, dhe në terma realë për 1.5%, Tregtia me pakicë, përveç karburantit, është rritur nominalisht për 9.5% dhe në terma real për 3.9% dhe Tregtia me pakicë e karburanteve për automjete është zvogëluar realisht për 5.7%, dhe në terma nominalë për 6.9%.

Me kontrollet e kryera dhe mospërputhjet e identifikuara para festave të Vitit të Ri dhe Krishtlindjeve, janë shqiptuar 60 gjoba me vlerë mbi 33 mijë euro në kundërvlerë denarë për operatorë dhe persona përgjegjës në to. Janë lëshuar edhe paralajmërime përkatëse dhe janë lëshuar vendime me urdhëresa për largimin e mospërputhjeve të identifikuara. Janë shkatërruar mbi 624 kilogramë ushqim i pasigurt, nga të cilët 567 kilogramë produkte mishi, kumtoi sot pasdite Agjencia e Ushqimit dhe Veterinarisë.

“Në prag të festave të Vitit të Ri dhe Krishtlindjeve, shërbimet inspektuese të AUV-it, me qëllim sigurimin e një niveli të lartë të mbrojtjes së shëndetit të konsumatorëvem përveç atyre të rregullta, po kryejnë edhe kontrolle të përforcuara, të jashtëzakonshme, tek të gjithë operatorët e ushqimit. Theksi i kontrolleve gjatë kësaj periudhe kohore u vu tek operatorët që organizojnë festime para Vitit të Ri dhe Vitit të Ri dhe në mishtore, mishtro me punëtori dhe dyqane të tjera të specializuara për ushqim me origjinë shtazore, ku ka kërkesë dhe konsum të shtuar të ushqimit gjatë kësaj periudhe”, shpjeguan nga AUV.

Në territorin e gjithë vendit janë kryer gjithsej 423 inspektime në objekte hotelierike dhe restorante dhe 228 kontrolle të jashtëzakonshme te operatorët e ushqimit me origjinë shtazore.

“Mospërputhjet e përgjithshme të përcaktuara nga kontrollet kanë të bëjnë me moszbatimin e ekzaminimeve të detyrueshme shëndetësore të punonjësve, mospërputhjet lidhur me kërkesat higjienike dhe mikrobiologjike për sigurinë e ushqimit dhe ujit, subjektet juridike të paregjistruara si operatorë ushqimorë në AUV. U gjetën ushqime të pasigurta dhe ushqime të skaduara te disa operatorë, u përcaktua magazinim dhe përzgjedhje joadekuate e ushqimit, azhurnim jo i rregullt i të dhënave për Higjienën e Mirë, Praktikën e Mirë të Prodhimit dhe HACCP, moszbatim i dezinfektimit, dezinsektim dhe deratizimit në objekte, si dhe mosmarrje të mostrave nga ushqimi për testime laboratorike, produkte pa deklarata dhe me deklarata të paplota dhe të paqarta dhe mospërputhje të tjera të vogla, për të cilat janë lëshuar vendime përkatëse”, theksuan nga AUV.

Nga Agjencia apeluan që, në prag të festave të Vitit të Ri, të blihen ushqime nga objekte të miratuara dhe të regjistruara që kanë zbatuar sisteme sigurie ushqimore, t’i kushtohet vëmendje etiketimit të produkteve, si dhe vendit ku ato ruhen.

“Në amvisëritë, është e rëndësishme t’i kushtohet vëmendje higjienës, përgatitjes së ushqimit dhe ruajtjes së tij në temperaturën e duhur”, theksuan nga AUV.

Me 27 vota pro, Këshilli Komunal ka miratuar buxhetin e Komunës së Tetovës për vitin 2026. Propozim-buxheti kap vlerën mbi 44 milionë euro, nga të cilat rreth 17 milionë euro janë të dedikuara për projekte kapitale.

Kryetari i Komunës së Tetovës, Bilall Kasami, theksoi se buxheti për vitin 2026 është më i madh krahasuar me vitin paraprak dhe se bëhet fjalë për një buxhet zhvillimor.

“Për herë të parë, rreth 40 për qind e buxhetit është e dedikuar për investime kapitale. Në buxhetet e mëparshme, 70 deri në 80 për qind shkonin për paga dhe shpenzime operative. Ky buxhet parasheh ndërtimin e shkollave të reja, pishina, rrugë, kanalizim, ujë të pijshëm dhe projekte të tjera në interes të drejtpërdrejtë të qytetarëve”, deklaroi Kasami.

Ai sqaroi se janë paraparë mbi 200 mijë euro për projektimin dhe depërtimin e një rruge të re në fshatin Shipkovicë, e cila do të jetë pjesë e lidhjes rrugore Tetovë-Prizren.

“Në Shipkovicë do të ndërtohet një qarkore, në mënyrë që rruga të mos kalojë përmes fshatit, pasi rruga ekzistuese nuk i plotëson kushtet. Janë ndarë mbi 200 mijë euro për projektimin dhe depërtimin e kësaj qarkoreje. Segmenti nga Tetova deri në Shipkovicë i plotëson kushtet, ndërsa pjesa nga Shipkovica drejt fshatrave të tjera do të zgjerohet”, shtoi Kasami.

Gjatë seancës, këshilltarët e Aleanca Kombëtare për Integrim akuzuan se edhe për vitin 2026 është paraparë një buxhet i konsiderueshëm për punësime, të cilat i cilësuan si punësime të militantëve partiakë. Këto akuza u hodhën poshtë nga kryetari Kasami, i cili deklaroi se në Komunën e Tetovës askush nuk merr pagë pa kryer punë.

Ndonëse u paralajmërua se punimet për autostradën Shkup-Bllacë do të nisin në fund të dhjetorit, megjithatë kjo nuk do të ndodh. Para tre javësh, zëvendësministrja e Transportit, Kaltrina Zekolli Shaqiri në Click Plus tha se vetëm kushtet klimatike mund t’i prolongojnë punimet.

“Kanë aplikuar diku 11 kompani të vendit dhe ndërkombëtare, rrethi është zvogëluar në tre kompani që i plotësojnë kushtet më shumë. Ajo që më gëzon është se ofertat janë brenda buxhetit të paraparë.

Madje disa shifra janë shumë më të kapshme sesa i kemi paramenduar ne se do t’i shohim kur t’i hapim. Mund të them se për shumë pak, apo brenda muajit do të fillojnë punimet në këtë rrugë. Këtë e them dhe uroj që kushtet klimatike mos të na vështirësojnë për të ngecur ndoshta për në janar-shkurt apo në pranverën e hershme për të filluar me energji të re dhe ritëm të plotë”, tha Kaltrina Zekolli.

Sot jemi 29 dhjetor, punimet nuk kanë nisur, jo për shkak kushteve klimatike, por siç sqarojnë nga kabineti i zëvendësministres arsyet e vonesës, janë procedurat burokratike të institucionit financiar dhe periudhës së festave të fundvitit.

“Siç dihet, ky projekt financohet pjesërisht me grant dhe pjesërisht me kredi nga kjo bankë, ndërsa vonesa ka ardhur si pasojë e procedurave burokratike të institucionit financiar dhe periudhës së festave të fundvitit. Nga ana jonë institucionale, të gjitha procedurat janë përfunduar dhe aktualisht presim vetëm miratimin final nga banka. Besojmë se shumë shpejt do të krijohen kushtet për fillimin e punimeve”, deklaroi Zekolli.

Ndryshe për këtë autostradë janë kryer vetëm 2 kilometrat e para, por as ato nuk munden të lëshohen në përdorim, derisa nuk ndërtohet edhe pjesa tjetër prej 10 kilometrave. Për realizimin e autostradës janë paraparë rreth 240 milionë euro, apo afërsisht 24 milionë euro për çdo kilometër. /tv21

Kryetari aktual i OBRM-Popullore, Ljubço Georgievski, shprehet se nuk e kupton pse autoritetet aktuale maqedonase janë kundër “propozimit francez”, kur ai e ka shfuqizuar politikën rigide bullgare.

“Para nesh është një propozim i Bashkimit Evropian, që ne e quajmë ‘propozimi francez’, i cili është shumë i qartë, shumë i saktë dhe nuk e kuptoj pse shkohet kundër atij propozimi”, thotë Georgievski në një intervistë për portalin “Racin”.

“Nuk guxojmë të harrojmë se ai ‘propozim francez’, praktikisht dhe de facto, ishte shfuqizim i një pozicioni rigid të politikës bullgare me atë qëndrimin e pakëndshëm se deri në vitin 1945 keni qenë bullgarë, ndërsa nga viti 1945 jeni maqedonas, që ishte miratuar nga parlamenti bullgar. Në Maqedoni i jepet shumë pak rëndësi faktit se ‘propozimi francez’ praktikisht e shfuqizoi këtë ide. Ai e anuloi atë qëndrim, sepse për ‘propozimin francez’ u votua gjithashtu edhe në parlamentin bullgar dhe, në vend që kjo të interpretohej si fitore, ne e interpretojmë si humbje. Nuk e di për çfarë arsyesh, ndoshta fillimisht për arsye të politikës ditore, por më pas kjo u bë pjesë e bllokadës sonë. Bullgaria evoluoi nga ajo pozitë dhe shohim se pas propozimit francez, qëndrimet provokuese nga politikanët bullgarë janë reduktuar në minimum. Tani edhe futja e bullgarëve në Kushtetutë na paraqitet si problem. Edhe protokolli na është problem, e deri te pozicioni më i ri që po e dëgjojmë muajt e fundit, ku ne u imponojmë kushte Bashkimit Evropian dhe Bullgarisë. Tani ne jemi ata që vendosim kushte ndaj BE-së, nëse duam të ecim përpara. E gjithë kjo tregon se ata që janë kryesorët dhe përgjegjësit për rrugën tonë drejt BE-së në këtë moment, nuk kanë një politikë serioze për ta kaluar këtë pikë të fundit dhe për të filluar integrimin tonë final evropian, përveç nëse po ndodh diçka pas skenave që ne nuk e dimë”, thotë Georgievski.

Kuvendi miratoi kërkesën e Qeverisë për shpalljen e konkursit publik për përzgjedhjen e kryeprokurorit të shtetit i cili duhet të vijë në vend të Lupço Kocevskit të dorëhequr pak para se të shkarkohej. Ditëve në vijim Kuvendi duhet të shpallë konkursin publik ndërsa dorëzimi i kandidaturave do të duhet të bëhet në afat prej 15 ditëve.

Kandidatët duhet të kenë së paku 300 kredi, të kenë provimin e jurisprudencës, përvojë të pandërprerë pune prej së paku 10 viteve si prokuror apo gjykatës. Në këtë pozitë për momentin si ushtruese detyre është Anita Topollova Isajllovska derisa të zgjidhet kryeprokurori i ri. Këshilli i Prokurorëve do të përgatisë mendim për secilin nga kandidatët e paraqitur dhe do ta dorëzojë në Qeveri. Prokurori i ri duhet të zgjidhet me shumicë të thjeshtë prej 61 votave.

Më 22 dhjetor, prokurorja Anita Topalova-Isajllovska u zgjodh njëzëri si kandidatja e vetme e propozuar në seancën e Këshillit të Prokurorëve Publikë si ushtruese detyre, duke zëvendësuar prokurorin publik republikan Ljupço Kocevski, i cili dha dorëheqjen javën e kaluar, pak para se të shkarkohej nga Parlamenti.

Kujtojmë se, më 16 dhjetor, ish-prokurori publik shtetëror Ljupço Kocevski njoftoi se kishte paraqitur dorëheqje të parevokueshme nga detyra. Ai informoi seancën parlamentare në të cilën do të shqyrtohej propozimi i Qeverisë për shkarkimin e tij nga detyra.

Në Parlament nuk pati asnjë debat sepse, siç informoi kryetari i Parlamentit, Afrim Gashi, shqyrtimi i kësaj pike bëhet i pakuptimtë, duke marrë parasysh dorëheqjen e paraqitur të Kocevskit.

Kandidati për kryetar të komunës së Gostivarit nga koalicioni VLEN, Nevzat Bejta, në konferencën e sotme për shtyp akuzoi udhëheqësinë e mëparshme lokale për keqpërdorim të 450 mijë eurove të shpenzuara për furnizime publike.

Sipas tij, tenderi për shtrimin me pllaka të bekatonit, me vlerë 500 mijë euro dhe ajo punë, siç tha ai nuk vlen më shumë se 50 mijë euro. Përveç kësaj, kompania e cila e kreu punën nuk është nga Gostivari.

“Kjo lloj rritje e çmimeve ka qenë një praktikë e zakonshme gjatë tetë viteve të fundit. Shtrimi me pllaka bekatoni në kohën time kushtonte 13 euro për “metër katror”, tani me rritjen e çmimeve të tregut kushton 15 euro. Këto u ndërtuan me një çmim për metër katror prej 450-500 euro. Sipas informacioneve të mia, një punë me vlerë afërsisht 50 mijë euro është paguar 450 mijë euro”, tha kandidati për kryetar, Nevzat Bejta.

Bejta tha se anëtarët e partisë së Taravarit të cilët drejtuan qytetin e varfëruan atë, ndërsa qytetarët janë të revoltuar nga një menaxhim i tillë i komunës.

"Në këto tetë vjet, ai e ka shkatërruar dhe varfëruar buxhetin e Gostivarit. E ka shkatërruar infrastrukturën dhe kemi rrugë dhe rrugica plot me gropa. Pastërtia në qytet është në nivelin më të ulët të mundshëm. Ata kanë shkatërruar kulturën, sportin dhe arsimin”, tha Bejta.

Bejta paralajmëroi se ndër projektet e para të cilat do të realizohen në mandatin e ri janë një urë me katër korsi dhe zgjerimi i bulevardit “Vëllezrit Gjinoski” nga udhëkryqi me “Rrugën e Dibrës” deri në Gjykatën themelore.

Të dielën në ora 11:20 në bulevardin “Iliria” në Tetovë, pjesëtarë të policisë së Tetovës kanë privuar nga liria personin A.I.(23) nga Tetova. Gjatë kontrollit me radar është konstatuar se ai drejtonte automjetin e udhëtarëve “Audi” me targa të Tetovës me shpejtësi prej 103 kilometra në orë në vendin ku shpejtësia maksimale e lejuar është 50 kilometra në orë.

Gjatë ditës së diel në ora 11:50 në rrugën rajonale Zhelinë-fshati Jegunoc, pjesëtarë të policisë së Tetovës kanë privuar nga liria personin I.R.(41) nga fshati Sllatinë. Gjatë kontrollit me radar është konstatuar se ai drejtonte automjetin e udhëtarëve “BMW” me targa të Tetovës me shpejtësi prej 104 kilometra në orë në vendin ku shpejtësia maksimale e lejuar është 50 kilometra në orë.

Po ashtu të dielën në ora 12:18 në bulevardin “Iliria” në Tetovë, pjesëtarë të policisë së Tetovës kanë privuar nga liria B.T.(23) nga Tetova. Gjatë kontrollit me radar është konstatuar se ai drejtonte automjetin e udhëtarëve ” Golf” me targa të Tetovës me shpejtësi prej 111 kilometra në orë në vendin ku shpejtësia maksimale e lejuar është 50 kilometra në orë.

Të dielën në ora 12:58 në rrugën Tetovë-Gostivar, në pikën e pagesës rrugore Gostivar, pjesëtarë të policisë së Gostivarit kanë privuar nga liria personin N.B. (25) nga Shqipëria. Gjatë kontrollit me radar është konstatuar se ajo drejtonte automjetin e udhëtarëve “Golf” me targa kombëtare të Kosovës me shpejtësi prej 189 kilometra në orë në vendin ku shpejtësia maksimale e lejuar është 80 kilometra në orë.

Të dielën në ora 14:44 në rrugën Tetovë – Gostivar, në pikën e pagesës rrugore Gostivar, pjesëtarë të policisë së Tetovës kanë privuar nga liria personin R.V.(19) nga fshati Vicë Gjatë kontrollit me radar është konstatuar se ai drejtonte automjetin e udhëtarëve “Golf” me targa të Tetovës me shpejtësi prej 156 kilometra në orë në vendin ku shpejtësia maksimale e lejuar është 80 kilometra në orë. Pas dokumentimit të plotë të ngjarjes, ndaj tyre do të ngrihen padi sipas nenit 297-a të Kodit Penal – “drejtim i pakujdesshëm i mjetit motorik”.