Shtëpia e Bardhë ka deklaruar se Shtetet e Bashkuara të Amerikës janë në koordinim të plotë me autoritetet e përkohshme në Venezuelë pas operacionit ushtarak që çoi në kapjen e ish-presidentit Nicolás Maduro dhe bashkëshortes së tij, Cilia Flores, më 3 janar.

Në një konferencë për shtyp sekretarja e shtypit e Shtëpisë së Bardhë, Karoline Leavitt, tha se “Ne vazhdojmë të jemi në koordinim të ngushtë me autoritetet e përkohshme, dhe vendimet e tyre do të vazhdojnë të diktohen nga Shtetet e Bashkuara të Amerikës.”

Ajo shtoi se SHBA-ja po monitoron qeverinë e përkohshme të udhëhequr nga Delcy Rodríguez, e cila u betua si presidente e përkohshme pas largimit të Maduro-s.

Ndërkaq Maduro aktualisht ndodhet në paraburgim në New York, ku u deklarua i pafajshëm ndaj akuzave për narko-terrorizëm dhe trafik droge.

Operacioni amerikan ka shkaktuar reagime të forta ndërkombëtare, me aleatë si Rusia, Kina dhe disa vende evropiane që e kanë dënuar si shkelje të ligjit ndërkombëtar.

SHBA-ja po ushtron presion për kontroll mbi rezervat e naftës venezueliane, duke sekuestruar cisterna dhe duke lehtësuar disa sanksione për të lejuar eksportin drejt tregut amerikan teksa administrata Trump ka sinjalizuar se do të “drejtojë” Venezuelën deri në një tranzicion të sigurt.

Në kuadër të përafrimit të legjislacionit me Bashkimin Evropian, qeveria shqiptare ka propozuar një paketë ndryshimesh thelbësore në ligjin për tregjet e kapitalit. Projektligji i ri, i propozuar nga Ministria e Ekonomisë dhe Inovacionit dhe i hartuar nga Autoriteti i Mbikëqyrjes Financiare (AMF), synon të rregullojë mënyrën se si bëhet marrja në kontroll e shoqërive me ofertë publike, duke rritur sigurinë për investitorët dhe mbrojtjen për aksionarët e vegjël.

Standarde të reja për “çmimin e drejtë”

Një nga risitë kryesore të projektligjit është mekanizmi i mbrojtjes së çmimit. Sipas ndryshimeve, nëse një blerës (ofertues) blen aksione me një çmim më të lartë jashtë ofertës publike gjatë kohës që oferta është aktive, ai do të detyrohet ligjërisht të rrisë çmimin e ofertës për të gjithë aksionarët e tjerë.

Gjithashtu, Autoritetit të Mbikëqyrjes Financiare i jepet kompetenca për të ndërhyrë dhe rregulluar çmimin në rrethana të jashtëzakonshme, si në raste manipulimi tregu apo marrëveshjesh të fshehta, duke garantuar transparencë maksimale.

Thyerja e barrierave të votimit

Për të lehtësuar investimet strategjike dhe për të shmangur “blindimin” e bordeve drejtuese, projektligji prezanton rregullin e njohur si “breakthrough”.

“Kjo do të thotë se gjatë një oferte për marrje në kontroll, kufizimet statutore të votës apo aksionet me të drejta të shumëfishta vote nuk do të kenë efekt; çdo aksion do të llogaritet si një votë e vetme.”, thekson projektligji.

Kjo masë synon të fuqizojë aksionarët për të vendosur lirisht mbi fatin e shoqërisë së tyre.

Lehtësi për investitorët e huaj

Për herë të parë, Shqipëria do të aplikojë parimin e “njohjes reciproke” me vendet e Bashkimit Evropian. Një dokument oferte i miratuar nga një rregullator i BE-së apo Zonës Ekonomike Evropiane (ZEE) do të njihet automatikisht në Shqipëri, pa pasur nevojë për miratime burokratike shtesë.

Sipas relacionit shpjegues të Ministres Delina Ibrahimaj, “ky ndryshim pritet të ulë kostot e pasigurisë dhe t’i bëjë kompanitë shqiptare më tërheqëse për fondet dhe bankat investuese evropiane, duke i integruar ato de facto në ekosistemin financiar të BE-së.”

Transparencë digjitale

Ndryshimet parashikojnë gjithashtu që të dhënat e ofertave të publikohen në formate të lexueshme nga makina (machine-readable) dhe të jenë të aksesueshme në Pikën e Vetme të Aksesit Evropian (ESAP).

“Kjo do të bëjë që tregu shqiptar të jetë i dukshëm dhe i monitorueshëm nga investitorët ndërkombëtarë në kohë reale.”, thuhet në projektligj.

Projektligji pritet të kalojë së shpejti për miratim në Kuvend, duke shënuar një hap tjetër në maturimin e tregut financiar në vend, i cili aktualisht vuan nga numri i ulët i emetuesve dhe likuiditeti i kufizuar.

Rritja e tensioneve ndërkombëtare, shkrirja e akullnajave dhe një ekonomi botërore në ndryshim e kanë vendosur papritur Groenlandën në qendër të tabelës së shahut global. Presidenti i SHBA-së, Donald Trump, ka rikthyer vëmendjen te ishulli i pasur me minerale, duke kërkuar të sigurojë kontrollin mbi portën që mbron qasjet e Arktikut dhe Atlantikut të Veriut drejt Amerikës së Veriut.

Por, ndërsa Uashingtoni llogarit strategjitë, Groenlanda – një territor vetëqeverisës i Danimarkës dhe shtëpia e 56,000 banorëve, kryesisht Inuit – ka bërë të qartë qëndrimin e saj. Si qeveria lokale ashtu edhe Kopenhaga zyrtare kanë hedhur poshtë propozimet e Trump, duke theksuar se e ardhmja e ishullit u përket njerëzve të tij.

Pse ky ishull gjigant, 80% e të cilit ndodhet mbi Rrethin Arktik, është bërë papritur kaq jetik për sigurinë globale?

Pozicioni gjeografik i Groenlandës është “as-i nën mëngë”. E vendosur pranë bregut verilindor të Kanadasë, ajo ka qenë thelbësore për mbrojtjen e Amerikës së Veriut që nga Lufta e Dytë Botërore. Në atë kohë, SHBA-të pushtuan ishullin për të parandaluar rënien e tij në duart e nazistëve.

Sot, ndryshimi është klima. Shkrirja e akullit po hap rrugë të reja detare në Veriperëndim, duke krijuar mundësi për tregti, por edhe duke rindezur konkurrencën e ashpër me Rusinë dhe Kinën. Groenlanda është gjithashtu rojtarja e të ashtuquajturës “Hapësira GIUK” (Groenlandë-Islandë-Mbretëri e Bashkuar), pika kyçe ku NATO monitoron lëvizjet e flotës ruse në Atlantik.

Kina dhe Rusia, rivalët në horizont

Në vitin 2018, Kina e shpalli veten një “shtet pranë Arktikut”, duke synuar ndërtimin e një “Rruge Polare të Mëndafshit”. Kjo lëvizje u prit me skepticizëm dhe refuzim nga SHBA.

“A duam që Oqeani Arktik të transformohet në një Det të ri të Kinës Jugore?” pyeti retorikisht Sekretari amerikan i Shtetit, Mike Pompeo.

Nga ana tjetër, Rusia po rizgjon fantazmat e Luftës së Ftohtë. Moska ka restauruar infrastrukturën e vjetër sovjetike, ka hapur baza të reja që nga viti 2014 dhe ka forcuar Flotën e saj Veriore. Retorika bërthamore e Rusisë dhe lufta në Ukrainë i kanë shtuar shqetësimet e liderëve evropianë për një militarizim të mundshëm të Arktikut.

Interesi Amerikan dhe prania aktuale

Edhe pa aneksim, SHBA ka një prani masive në ishull. Baza Hapësinore Pituffik (dikur Thule) në veriperëndim është sytë dhe veshët e NATO-s për paralajmërimin e raketave dhe mbikëqyrjen hapësinore.

Thomas Crosbie, profesor në Kolegjin Mbretëror Danez të Mbrojtjes, argumenton se kontrolli i drejtpërdrejtë nuk do t’i sillte SHBA-së avantazhe shtesë.

“Shtetet e Bashkuara nuk do të kenë asnjë avantazh nëse flamuri i tyre valëvitet në Nuuk,” tha ai. “Ata tashmë gëzojnë të gjitha avantazhet që dëshirojnë si aleatë të besuar.”

Danimarka përgjigjet me investime ushtarake

Përballë presionit, Danimarka po forcon sovranitetin e saj. Qeveria ka njoftuar një paketë investimi prej 2.3 miliardë dollarësh për të rritur mbikëqyrjen në Arktik. Kjo përfshin blerjen e dronëve me rreze të gjatë, satelitëve dhe tre anijeve të reja detare.

Në terren, sovraniteti mbrohet edhe nga njësia elitare “Patrulla e Slitave Sirius”, e cila patrullon shkretëtirën e akullt, si dhe nga Komanda e Përbashkët Arktike me seli në Nuuk.

Gjuetia për mineralet e rralla

Përveç sigurisë, Groenlanda fsheh një thesar nëntokësor. Ishulli është i pasur me minerale të rralla – përbërësit kyç për telefonat, bateritë dhe teknologjinë e së ardhmes. Perëndimi e sheh Groenlandën si shpresën për të thyer monopolin kinez mbi këto burime, edhe pse klima e ashpër dhe rregullat strikte mjedisore e bëjnë nxjerrjen e tyre një sfidë të madhe inxhinierike dhe financiare.

Në këtë lojë të madhe gjeopolitike, Groenlanda nuk është më thjesht një ishull i akullt, por kufiri i ri i sigurisë botërore.

Shkrimtarja Lea Ypi ka njoftuar mes notash zhgënjimi largimin e saj përfundimtar nga Shqipëria.

Përmes një postimi në rrjetet sociale, Lea Ypi është shprehur se do të mbajë me vete çdo takim të këtyre ditëve, fjalët nxitëse, vërejtjet, komentet e kritikat e të rinjve.

Ypi shtoi gjithashtu se kishte përshtypjen se bota sot i ngjan labirintit të minotaurit, ku sipas saj, gjithkush kërkon shpëtim nga përbindëshat e dukshëm e të padukshëm.

Postimi i Lea Ypit:

Mirupafshim Shqipëri.

Llaçin e shpifjeve dhe pluhurin e konspiracioneve biografike, ideologjike, gjeopolitike, sociale, materiale e sa e sa të tjera më kanë dëgjuar veshët e parë sytë për veten këto ditë, ti kam lënë në derë. Në fund të fundit hiçi dixhital e mediatik mbi diçka duhet ngritur që atij grushti logosh ku tek asgjëja çlirohet vetmia, trishtimi, mllefi, dështimi, varfëria e mendimit, shfrytëzimi, paburrëria, ti mbushet mendja se mbase diçka është.

Por emocionet e takimeve të këtyre ditëve me qindra njerëz të vërtetë, lexues të gjithfarë brezave, bindjesh politike, përvojash historike, me aq shumë pyetje, vërejtje, komente, kritika, fjalë nxitëse, të rinj e të reja me guxim për tu parë në sy e për tu përballur pa u fshehur në lloj lloj pseudonimesh e maska karnavalesh, shkëmbimet tona rreth fateve të botës e të këtij katundit tonë, skutave të historisë, dritës që hedh arti në kërkim të së vërtetës – të gjitha këto i mbaj me vete.

Kam përshtypjen se bota sot i ngjan labirintit të minotaurit ku gjithkush kërkon shpëtim nga përbindëshat e dukshëm e të padukshëm. Ndoshta secili nga ne e mban në dorë një pjesë nga filli i Ariadnes, mjafton që duart të bashkohen dhe njerëzit të rigjejnë kuptimin e të qenit njeri.

Faleminderit të gjithë atyre që në këtë skutën shqiptare të labirintit shtrënguan dorën time.

Krahas ndërhyrjeve në infrastrukturë dhe përpjekjeve për largimin e ujit, vëmendja e qeverisë është përqendruar edhe te kujdesi shëndetësor për banorët e izoluar apo të prekur nga përmbytjet.

Kryeministri Edi Rama, përmes një postimi në rrjetet sociale, ka ndarë pasditen e sotme disa momente nga puna e bluzave të bardha në terren. Kreu i qeverisë ka nënvizuar se strukturat mjekësore janë në gatishmëri të plotë, veçanërisht në zonën e Durrësit, e cila është goditur më rëndë nga reshjet intensive.

“Mjekët dhe ekipet shëndetësore në shërbim të banorëve në zonat e prekura nga moti,” shkruan Rama në diçiturën që shoqëron fotot.

Në pamjet e publikuara, shihen mjekë dhe infermierë të cilët, të pajisur me mjete të përshtatshme për motin e keq, po vizitojnë banorët në banesat e tyre, duke ofruar asistencë mjekësore dhe duke shpërndarë medikamente për ata që e kanë të pamundur të lëvizin drejt qendrave shëndetësore për shkak të prezencës së ujit.

Shumë burime iraniane dhe arabe raportojnë se Shtetet e Bashkuara të Amerikës po përgatiten për të ndërmarrë sulme ajrore në shkallë të gjerë kundër Iranit, ku pritet të përfshihet edhe Izrael. Në të njëjtën kohë, Irani shpreh shqetësimin se këto sulme mund të çojnë në kolapsin e sistemit të tij të mbrojtjes ajrore dhe, për këtë arsye, po shqyrton mundësinë e goditjeve parandaluese ndaj bazave amerikane të dislokuara në Lindjen e Mesme, si dhe ndaj Izraelit.

Këto informacione raportohen në Twitter nga “Daily Iran News”, “Current Report” dhe “Visioner”.

Më herët, Australia u ka bërë thirrje qytetarëve të saj të largohen menjëherë nga territori iranian.

Ndërkohë, ushtria e Rusia po kryen me urgjencë evakuimin e stafit të ambasadës ruse në Izrael, së bashku me familjet e tyre, duke i kthyer ata në Rusi. Ky është fluturimi i tretë që Rusia ka realizuar në 24 orët e fundit për evakuimin e personelit diplomatik nga Izraeli.

Sipas disa raportimeve, ka indicie se Rusia është informuar paraprakisht për zhvillime të mundshme në terren.

BIG NEWS – Many Iranian and Arab sources report that the United States is preparing to launch large-scale air strikes against Iran, in which Israel would also take part. At the same time, Iran fears that such strikes could lead to the collapse of its air defense… pic.twitter.com/j0iU1TsRHc

— Visioner (@visionergeo) January 6, 2026

Në vendin tonë, sot në 7 janar 2026, kanë rënë reshje të dendura. Shi i dendur ka rënë në Tiranë dhe në qytete të tjera të Shqipërisë.

Nga reshjet e shumta, mësohet se dhe lumi Lana rrezikon të dalë nga shtrati.

Lumi Lana në zonën e Pallatit me Shigjeta ka dalë disa herë nga shtrati, kur moti ka qenë me shi të dendur.

Ndërkaq, fatmirësisht, në kryeqytet nuk ka trafik të dendur automjetesh dhe nuk ka pasur problematika.

Shtetet e Bashkuara kanë sekuestruar dy cisterna ruse nafte. Mediat ndërkombëtare raportojnë se bëhet fjalë për cisternat Marinera dhe Sophia. E para u ndalua në Atlantikun e Veriut, e dyta në Karaibe. Të dyja u sanksionuan nga SHBA-ja, duke përmendur “aktivitete të paligjshme” si shkak të bllokadës.

Moska u përgjigj menjëherë: “Hyrja në anijen Marinera nga forcat amerikane shkel Konventën e OKB-së të vitit 1982 mbi Ligjet e Detit”, denoncoi Ministria Ruse e Transportit, duke shtuar: “Më 24 dhjetor 2025, cisterna kishte marrë një leje të përkohshme për të lundruar nën flamurin kombëtar të Federatës Ruse, të lëshuar në bazë të legjislacionit rus dhe ligjit ndërkombëtar”.

E bllokuar në brigjet e Evropës kontinentale, Marinera, më parë Bella 1, akuzohet nga Shtëpia e Bardhë për shkelje të sanksioneve të SHBA-së dhe transportim të naftës bruto iraniane. Ajo kishte qenë prej kohësh në shënjestër të Uashingtonit, me një përpjekje për t’u hipur në anije muajin e kaluar, por anija ndryshoi kurs, si dhe emrin dhe flamurin e saj (nga gujanezë në rus). Operacioni u drejtua nga Departamenti i Sigurisë Kombëtare i SHBA-së. Përpjekjet e Rusisë  për  të mbrojtur anijen ishin të kota, pasi Kremlini kishte dërguar anije detare dhe një nëndetëse për të “shoqëruar” Marinera-n.

Ndërkohë anija tjetër e naftës e sekuestruar  M/T Sophia, sipas mediave amerikane, po valëviste në mënyrë të rreme flamurin e Kamerunit, megjithëse në të vërtetë ishte rus. Sipas Uashingtonit, Sophia ishte gjithashtu pjesë e të ashtuquajturës “flotë në hije” dhe i nënshtrohej sanksioneve njësoj si Marinera. Sipas Komandës Jugore të SHBA-së, Roja Bregdetare e SHBA-së po e shoqëron anijen Sophia në SHBA.

Ndërkohë duke pasur parasysh klimën në rritje të tensionit në Venezuelë dhe nga frika e një eksodi të emigrantëve drejt territorit të saj, Kolumbia ka vendosur mbi 30,000 anëtarë të Forcave të Armatosura përgjatë kufirit me Republikën Bolivariane. Masa, e urdhëruar nga Presidenti Gustavo Petro, përfshin përdorimin e tankeve, patrullave dhe një Poste të Unifikuar Komanduese në Cucuta , gjithashtu në përgjigje të kthimit të mundshëm të grupeve të armatosura si disidentët ELN dhe FARC.

Kryeministri Edi Rama do të mbledhë të të premten (9 janar) kabinetin qeveritar, mbledhja e parë e zhvilluar për këtë vit.

Mbledhja pritet të nisë në orën 10:00, ndërsa po ashtu, të premten është parashikuar të mblidhet edhe grupi parlamentar socialist.

Ky takim vjen në kuadër të rifillimit të punimeve parlamentare, ku pritet të diskutohen çështje të rëndësishme të agjendës politike dhe legjislative.

Është zgjidhur situata për rreth 350 pasagjerë shqiptarë që udhëtonin nga Bergamo dhe Bologna në Itali drejt Aeroportit të Rinasit dhe mbetën të bllokuar në aeroportin e Brindizit.

Lajmi u bë i ditur nga kryetari i Grupit Parlamentar të PS dhe Drejtuesi Politik për Diasporën, Taulant Balla, i cili njoftoi se është organizuar transporti me autobus nga aeroporti i Brindizit drejt Portit dhe më pas udhëtimi drejt Shqipërisë.

Ndërhyrja ka ardhur pas ankesave të pasagjerëve.

“Ka marrë një zgjidhje halli për rreth 350 pasagjerë që mbetën të bllokuar në Brindisi. Është organizuar transporti me autobus drejt Portit dhe më pas drejt Shqipërisë”, shprehet Balla në reagimin e tij.

Reshjet e dendura të shiut që kanë përfshirë jugun e vendit kanë krijuar situata të vështirë në Qarkun e Gjirokastrës pasditen e sotme (7 janar 2026). Prefekti i Qarkut ka bërë të ditur përmes një raporti zyrtar të orës 16:00 se është dashur ndërhyrja për evakuimin e banorëve në zonat e rrezikuara të qytetit, ndërsa disa akse rurale janë bllokuar.

Evakuime në lagjen muzeale

Pika më kritike në qytetin e Gjirokastrës paraqitet në lagjen karakteristike “Manalat”, pranë shkollës “Naim Frashëri”. Për shkak të rrezikut nga rrëshqitjet apo dëmtimet e banesave nga uji, Bashkia ka kërkuar dhe realizuar evakuimin e disa familjeve. Banorët janë larguar nga shtëpitë e tyre dhe aktualisht janë strehuar pranë të afërmve, në pritje të qetësimit të situatës.

Bllokim total në Zagori, probleme me dritat

Ndërsa qendra e Libohovës paraqitet e qetë, situata është krejt tjetër në zonën e thellë malore të Zagorisë. Raportohet se aksi që lidh Çajupin me Sheperin është bërë i pakalueshëm për shkak të rrëshqitjeve masive të dherave. Fshatrat Topovë dhe Zhej rezultojnë aktualisht të bllokuar. Përveç izolimit rrugor, banorët e Zagorisë po përballen edhe me mungesën e energjisë elektrike për shkak të defekteve në rrjet.

“Shkalla e Zezë” vetëm me një korsi

Drejtoria Vendore e Policisë bën thirrje për kujdes maksimal në aksin nacional Tepelenë – Gjirokastër. Në pikën e njohur si “Shkalla e Zezë”, një segment problematik historik, lëvizja është kufizuar në vetëm një korsi. Prezenca e gurëve dhe dherave ka detyruar policinë të kufizojë qarkullimin për të shmangur aksidentet.

Vjosa “fryhet” frikshëm

Të dhënat hidrologjike tregojnë një rritje të ndjeshme të nivelit të lumit Vjosë. Në matjet e fundit në Memaliaj, niveli ka arritur në 6.3 metra, një kuotë që sinjalizon gatishmëri të lartë, ndërsa në Përmet niveli është 4.5 metra.

Autoritetet lokale dhe grupet e emergjencës ndodhen në terren për të monitoruar situatën.

Edison Ypi – Zonja Kryetare, “Sukseset” e të tjerëve fillojnë e mbarojnë përgjithësisht brenda sallave të mbledhjeve dhe konfencave, mes llafeve, urimeve, lajkave hipokrite që i bëjnë njëritjetrit. Sukseset tuaja, Zonja Kryetare, jo me llafe por me vepra, janë të gjitha jashtë mbledhjeve dhe mburrjeve, në qytet, nëpër fusha, kodra, serra, terraca, vreshta, ullishta. Cila shkollë, cili libër të ka mësuar të preferosh serrat para sallave, punën para llafeve ?

Majlinda Bufi – Shkolla dhe librat kanë rëndësinë e vet të padiskutueshme. Por këto që thoni ju nuk i kam mësuar as nga shkolla as nga librat, por nga Jeta, vrazhdësia e Jetës, kokfortësia e realitetit, kërkesa e çdo pune, nevojat e çdo rasti, halli i çdo individi, që janë një kaleidoskop shumëngjyrësh mahnitës të cilit ja vlen t’ja dedikosh jetën.

Edison Ypi – Mënyra juaj e pjesëmarrjes direkte ku janë punët për tu bërë dhe hallet e njerëzve për tu zgjidhur, veç vulletit të mirë, kërkon lodhje, pra shëndet, dhe sigurisht dhe kohë. Ku e gjen Kryetarja e Roskovecit gjithatë kohë ? A i njeh Kryetarja nji për nji banorët mbi 40 vjeç të Roskovecit dhe fshatrave ?

Majlinda Bufi – Dëshira ime është t’i njoh të gjithë, tu ndodhem pranë të gjithëve për ti ndihmuar dhe orientuar, nga bebe deri në vdekje, nga djepi deri në varr, çka është e pamundur. Megjithatë bëj sa mundem, sa kam takat. Veç të lutem, shifrën 40 bëje të paktën 20.
Sa për kohën, meqënse jam inxhiniere, pra meqënse kam shkollim dhe formim racional, inxhinierik, e di se koha nuk rredh uniformisht. Koha shkon e vjen, zgjatet e shkurtohet, sipas rrethanave, shpejtësive, energjive. Pavarësisht se jo të gjithë e besojnë, fakti është se me vullnet të mirë pafundësia tkurret sa çasti, çasti zgjatet sa pafundësia.

Edison Ypi – Me ose pa dashje, nga aftësia ose pamundësia, shumica e qyteteve të vogla, edhe pse në ‘to është investuar, janë përmirësuar në shumë aspekte. Por, fatkeqësisht, bashkë me ndryshimet dramatike demografike, tendenca e përgjithëshme është për t’i kthyer qytetet e vogla në fshatra turistikë me pak banorë. Roskoveci është i vetmi vend nga Vermoshi në Konispol, me siguri dhe më gjerë, ku ndërkohë që gjithkund tjetër bëjnë qytetin fshat, ti ke bërë fshatin qytet. Prej çdo qyteti e fshati ikin se vinë. Roskoveci është i vetmi ku më tepër vijnë se ikin. Si ja arrite kësaj çudie, si e mundësove këtë paradoks ? Përtej çdo modestie, të lutem.

Majlinda Bufi – Në këtë mes s’ka çudi as paradoks. As brenda apo jashtë modestisë. Nëse çka thatë është e vërtetë, ndoshta ndodh sepse zbatoj me rreptësi kritetin universal të gjetjes së njeriut të duhur punën e përshtatëshme dhe punës së duhur njeriun e nevojshëm. Por, tepër e rëndësishme kjo, pa prekur, pa kufizuar, pa paksuar, Lirinë individuale të secilit, që është kushti themelor i mbarëvajtjes së gjithçkaje, gjithmonë paralel me respektimin rigoroz të kompetencave të secilit.

Edison Ypi – Talenti yt për të ushtruar pushtet efikas, real, të matshëm, të balancuar, a ka ndonjë fillesë farefisnore ? Ndonjë gjysh, stërgjysh, dajë, xhajë, teze, hallë, nga të cilët ke trashëguar pasionin në fjalë ?

Majlinda Bufi – Ndoshta pasionin për teknologjinë e kam trashëguar nga një gjysh mullixhi.

– Sa orë gjumë fle Kryetarja ?

Majlinda Bufi – Kurrë më tepër se 5 orë në 24 orë. Edhe të djelave, ditëve të pushimit apo festave, aq.

Edison Ypi – Je vegjetarjane apo mishngrënëse ? Çfarë ha Kryetarja ?

Majlinda Bufi- Jam vegjetariane. Ha jeshilllëqe, lakra, spinaqra, sallatra, supra.

Edison Ypi – Më thuaj emrin e një personazhi për ta simpatizuar, një filmi për tu parë, titullin e një libri për ta lexuar që Kryetarja e Roskovecit ja rekomandon lexuesve të gazetës Panorama.

Majlinda Bufi – Shtetari i suksesshëm, fitimtari i sprovave, përballuesi i sfidave të kësaj kohe të vështirë, Edi Rama është Ai që rekomandoj të njihet sa më mirë dhe të ndihmohet sa më tepër prej të gjithëve, të mëdhenj e të vegjël, të rinj e të vjetër.

Filmi që rekomandoj për ta parë është “Forrest Gump”. Për të evituar spjegime paraprake moralistike të panevojshme, arsyen pse e rekomandoj këtë film lexuesit e nderuar të Panoramës le ta mësojnë kur ta shohin. Sa i përket librit për tu lexuar, këtë herë po rekomandoj poezinë “Trashëgimi” nga Lasgush Poradeci për ta mësuar përmendësh:

Trashëgimi

Ju më lini tu flas unë
Tu them fjalë vjershërie
Në bunacë e në furtunë
Të këndoj siç më ka hije

Hija ime nuk di dhunë
Di veç frymëzim Lirie
Dhe di punë, punë, punë
Mund pa fund për Art magjie

Që tu them për ç’kam kënduar
Në kuvend të përvëluar
Ja një këngë mjeshtërie
Ja një iskër bukurie

Dhe ta shoh të pasqyruar
Vetëveten fije fije
Fije fije poezie
Që mban erë Shqipërie

Edison Ypi – Punë të mbarë mes bukurive të Roskovecit të magjishëm. Susksese të mëtejshme në të mirë të vendit. Faleminderit që gjete kohën për kafen dhe intervistën.

Europa përpiqet të shfaqë muskujt e diplomacisë në një kontekst të dominuar nga gjeopolitika grabitqare e Donald Trump.

Nga samiti i “të Gatshmëve” i mbajtur dje në Paris, dalin përparime të dukshme në frontin e garancive për sigurinë e Ukrainës si nga ana amerikane ashtu edhe nga ajo evropiane. Një skizofreni negociuese, ajo e evropianëve të përballur me kërcënimet amerikane për pushtimin e Groenlandës, mbi të cilën presidenti francez Emmanuel Macron i bie shkurt në konferencë për shtyp: “Nuk kam arsye të dyshoj”  tek amerikanët.

Siç thekson kancelari gjerman Friedrich Merz, marrëveshja synon të shmangë gabimet e marrëveshjeve të Minskut mes rusëve dhe ukrainasve të nënshkruara pas aneksimit të Krimesë dhe të shkelura vazhdimisht nga të dyja palët: “synojmë një armëpushim që, ndryshe nga Minsku, të bazohet mbi garanci të forta”.

Për Volodymyr Zelenskyn është e rëndësishme që Uashingtoni “është i gatshëm të na ndihmojë në monitorim dhe parandalim”, fjalë kyçe për të siguruar një paslufte paqësore për Ukrainën. Nga presidenti ukrainas erdhi një koment i lehtësuar mbi karakterin “detyrues” të angazhimeve të marra dje, të cilat duhet të vulosen nga Kongresi amerikan por edhe nga parlamentet evropiane. Për të konfirmuar soliditetin e rezultateve, një nga pikat kryesore është një “sistem monitorimi i armëpushimit i vazhdueshëm dhe i besueshëm që do të koordinohet nga SHBA-të me pjesëmarrje ndërkombëtare”, thuhet në deklaratën përfundimtare.

Sa i përket kontingjentit ushtarak ndërkombëtar, i udhëhequr nga evropianët dhe i premtuar tashmë në samitin e Berlinit, kanë dalë sërish dallimet mes të Gatshmëve. Sigurisht amerikanët do të garantojnë mbështetje thelbësore në frontin logjistik dhe të inteligjencës që pjesërisht “mungon” tek evropianët, siç ka pranuar Macron. Ndërkohë ushtarët “do të mbrojnë ajrin, tokën dhe ujin” (njëzet e gjashtë vende kishin dhënë miratimin për dërgimin e trupave në tetor) dhe do të sigurojnë gjithashtu “rigjenerimin e forcave të armatosura ukrainase”.

Në bazë të një angazhimi të përfshirë në një deklaratë trepalëshe me Ukrainën, “Franca dhe Mbretëria e Bashkuar do të krijojnë qendra ushtarake në Ukrainë për të trajnuar dhe zëvendësuar ushtarët ukrainas”, ka sqaruar kryeministri britanik Keir Starmer.

Edhe Spanja nuk e ka përjashtuar dërgimin e trupave. Kancelari Friedrich Merz, i udhëhequr dukshëm nga Parisi dhe Londra, ka zbuluar se trupa të mundshme gjermane do të stacionohen “në një vend kufitar të NATO-s”. Sigurisht, në çdo rast kjo do të diskutohet “pas një armëpushimi”. Por në atë pikë, ka theksuar ai, “nuk përjashtoj asgjë”. Giorgia Meloni, përkundrazi, e përjashton që tani.

Merz ka kujtuar se Gjermania mbetet kontribuesi financiar më bujar i Ukrainës dhe se parimi që ka dominuar edhe bisedimet e djeshme ka qenë ai i forcimit të ushtrisë ukrainase. E cila do të mund të vazhdojë të mbështetet në 800 mijë burra, siç kishte dalë tashmë nga samiti i Berlinit dhe në kontrast me planin famëkeq të Witkoff-it me 28 pika, që kërkonte nga Kievi ta reduktonte në 600 mijë.

Ndërkohë, ndërsa të Gatshmit mblidheshin për samitin gjigant, më në fund një komunikatë e nxori nga izolimi Danimarkën. Nëse SHBA-të do të pushtonin Groenlandën, do të përfundonte “gjithçka, edhe NATO”, kishte thënë kryeministrja daneze Frederiksen, dhe për dy ditë të gjata ishte dalluar mbi hezitimet evropiane duke iu kundërvënë Trumpit me fjalë të qarta.

Dje shtatë liderë evropianë, mes tyre Meloni, Merz, Starmer dhe Macron, arritën të shkruajnë e bardha mbi të zezën se “Groenlanda i përket popullit të saj. I takon Danimarkës dhe Groenlandës, dhe vetëm atyre, të vendosin mbi çështjet që kanë të bëjnë me Danimarkën dhe Groenlandën”. Më mirë vonë se kurrë.

Shkrim nga La Repubblica

Semestri i dytë i procesit mësimor në Kosovë është shtyrë për më 12 janar në të gjitha komunat e vendit për shkak të reshjeve dhe kushteve të vështira të motit që kanë përfshirë vendin që nga e hëna.

“Si pasojë e përmbytjeve dhe situatës së rënduar në shumicën e komunave, qarkullimit të vështirësuar për shkak të reshjeve të vazhdueshme, të cilat pritet të vazhdojnë edhe gjatë ditëve në vijim është vendosur që pushimi dimëror të vazhdojë edhe për dy ditë në nivel vendi” thuhet në njoftimin e Ministrisë së Arsimit, Shkencës, Teknologjisë dhe Inovacionit  të Kosovës.

Reshjet e mëdha të nisura që nga e hëna kanë shkaktuar përmbytje dhe kanë dëmtuar banesa, infrastrukturën dhe kanë krijuar vështirësi në qarkullim,  ndërsa dhjetëra banorë janë evakuuar.

Sipas Agjencisë së Menaxhimit Emergjent Fushë-Kosova, Rahoveci, Klina, Mitrovica, Vushtrria, Skënderaji, Gjakova dhe Malisheva janë komunat më të prekura nga përmbytjet, ndërsa kjo e fundit shpalli gjendjen e jashtëzakonshme.

Ndërkohë Kompania Rajonale e Ujësjellësit “Mitrovica” njoftoi se për shkak të niveleve të larta të turbullirave në burimet e furnizimit me ujë, impiantet për trajtimin e ujit të pijshëm nuk janë në gjendje të operojnë në mënyrë të sigurtë, ndaj beri thirrje që uji të mos përdoret për t’u konsumuar.

Aldrich Ames, një agjent  i CIA-s për më shumë se 30 vjet, i cili u dënua me burgim të përjetshëm për spiunazh për Moskën, vdiq në moshën 84 vjeç të hënën njoftuan autoritetet amerikane.

Ish-oficeri i kundërzbulimit, i cili po vuante një dënim me burgim të përjetshëm pa mundësi lirimi me kusht, vdiq të hënën në Institucionin Federal Korrektues në Cumberland, Maryland, ka raportuar CBS News.

Ames ishte burgosur më 28 prill 1994 pasi e kishte pranuar se i kishte shitur informacione sekrete Bashkimit Sovjetik dhe më vonë Rusisë.

Ai kompromentoi më shumë se 100 operacione klandestine dhe zbuloi identitetin e më shumë se 30 agjentëve që spiunonin për Perëndimin – duke çuar në vdekjen e të paktën 10 aseteve të inteligjencës së CIA-s.

Reshjet e dendura të shiut kanë shkaktuar përmbytje dhe probleme në qarkun e Vlorës. Lumi Vjosa ka arritur në kuotën 6.8 metër dhe ka dalë nga shtrati në zonën e tregut pranë Urës së Mifolit, pranë tregut të gjësë së gjallë.

Gazetarja e Klan News Greta Haskaj raporton se dy banesa janë shembur, por fatmirësisht nuk raportohet për të lënduar. Rruga Kotë-Sevaster në fshatin Vajzë është e bllokuar pas një shkarjeje, ndërsa autoritetet këshillojnë përdorimin e rrugëve alternative.

15 shtetas shqiptarë, shumica nga qyteti i Durrësit, janë bllokuar që prej ditës së djeshme në portin e Brindizit, në Itali. Sipas informacionit të siguruar, qytetarët kanë deklaruar se autoritetet italiane i kanë larguar me forcë nga aeroporti, ku ata po prisnin për të udhëtuar drejt Rinasit.

Grupi i qytetarëve ka thënë gjithashtu se janë njoftuar nga autoritetet se aeroporti do të mbyllej për 24 orë dhe se nuk kishte fluturime drejt Tiranës. Pas këtij njoftimi, ata pretendojnë se janë nxjerrë jashtë ambienteve të aeroportit dhe janë udhëzuar të shkojnë në port për të pritur tragetin.

Situata paraqitet shqetësuese, pasi mes qytetarëve të bllokuar ka edhe persona të sëmurë, të cilët kanë nevojë për kujdes dhe asistencë. Ata kërkojnë sensibilizimin e institucioneve shqiptare dhe italiane për zgjidhjen e menjëhershme të situatës dhe kthimin e tyre në Shqipëri.

Autoriteti Rrugor Shqiptar (ARRSH) ka reaguar për situatën e krijuar nga reshjet e dendura të shiut dhe dëborës në territorin e vendit.

Sipas njoftimit zyrtar, gjatë natës reshjet kanë vazhduar në të gjithë vendin, me intensitet më të lartë në juglindje, ndërsa në veri kanë pushuar në orët e para të mëngjesit.

Reshje dëbore janë regjistruar në segmentet Bogë–Theth dhe Qafë Mali–Fierzë, duke sjellë vështirësi në qarkullimin e mjeteve.

ARRSH bën të ditur se disa akse rrugore kanë pasur probleme me rënie gurësh dhe inertesh në trup të rrugës, ndërsa kontraktorët me mjete dhe punëtorë janë në terren pa ndërprerje për pastrimin e tyre.

“Në rajonin verior, vështirësi janë evidentuar në segmentet Bajram Curri–Valbonë, Dushaj–Lekbibaj, Sopot–Kam, Qafë Mali–Fierzë, Ura e Fanit, Rrëshen–Shpal, Shpal–Fushë Arrëz, Hani i Hotit–Dogana Vermosh, Sevaster–Kalivaç, Kukës–Shishtavec, Shpal–K/Hadroj, Kukës–Krumë, Skuraj–Burrel dhe Peshkopi–Vasije. Ndërkohë, në rajonin jugor janë raportuar probleme në akset Lazart, Kardhiq–Delvinë dhe Lekël–Këlcyrë.”- bwhet e ditur nga njoftimi.

Sipasojw e situatws sw krijuar, autoriteti njofton se kontraktorët janë në terren 24/7 me mjete dhe punëtorë për pastrimin e akseve rrugore dhe garantimin e qarkullimit.

Po ashtu, ARRSH t kanë intensifikuar monitorimin e situatës për të ndërhyrë menjëherë në rast nevoje.

ARRSH u bën thirrje drejtuesve të mjeteve që të kenë kujdes të shtuar gjatë drejtimit për shkak të lagështisë në rrugë, të reduktojnë shpejtësinë dhe të pajisen me goma dimërore e zinxhir kur udhëtojnë në zonat malore ku ka prezencë dëbore.

Kryeministri Edi Rama thotë se opozita gabon duke e bërë përgjegjëse qeverinë e tij për përmbytjet në Durrës dhe qytetet e tjera të vendit.

Në një postim ironik në X, Rama thotë se është habitur si nuk po e fajësojnë edhe për përmbytjet në vendet e tjera të rajonit.

“Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf”, shkruan Rama.

Prej ditës së martë, i gjithë vendi është përfshirë nga moti i keq, që ka shkaktuar përmbytje, bllokim dhe prishje rrugësh dhe probleme të tjera për jetën e qytetarëve.

Partia Komuniste e Kubës, në një postin në rrjetin X ka publikuar emrat e fotot e 32 truprojave kubanezë të Nicolas Maduro që u vranë nga amerikanët gjatë bastisjes së 3 janarit.

“Viktima të një akti të ri kriminal agresioni dhe terrorizmi shtetëror, të kryer kundër Republikës Bolivariane simotër të Venezuelës nga Shtetet e Bashkuara, 32 kubanë kanë humbur jetën në luftime dhe pas rezistencës së ashpër”, shkroi Partia Komuniste Kubane në X, duke publikuar foto të rojeve kubane të vrarë gjatë kapjes së udhëheqësit venezuelian në Karakas.