Orë pa gjumë, një gotë alkooli, apo një shpërqendrim nga celulari shpesh janë arsye për aksidente fatale sidomos në raste festash.

Edhe këtë fillim viti situate e aksidenteve nuk është aspak pozitive. Në vetëm 5 ditët e para të këtij viti janë shënuar 5 aksidente me 8 viktima. 

3 të rinj nga mosha 24-27 vjeç humbën jetën në orët e para të 2026 në aksin Gjirokastër-Tepelenë pasi makinat e tyre u përplasën me njëra tjetrën. Një ditë më vonë në Lezhë një çift bashkëshortësh humbën jetën pasi makina e tyre u përplas me një tjetër në aksin Lezha- Mabë. Ndërsa një familje me 4 anëtarë mes tyre 2 fëmijë mbetën të lënduar.  Aksidente të tjera me vdekje janë shënuar në Durrës dhe në Elbasan ku viktima kanë mbetur 3 këmbësorë. 

“Trafiku i rënduar bën që çdo përdorues ta ketë të vështirë të ruajë statusin e vet në rrugë.  Ndryshimi i korsisë në mënyrë jo korrekte dhe mënyra e lëvizjes jo në përputhje me karakteristikat teknike dhe gjometrike të rrugës dhe shpejtësisë së lejuar sjellin aksidente rrugore”, u shpreh eksperti rrugor,  Artur Sulce. 

 Ky bilanc tragjik i javës së parë të janrit duhet të shërbejë si një alarm për autoritetet por edhe për çdo drejtues mjeti që ta shohin rrugët jo  thjesht asfalt dhe semaforë, por terren ku duhet të lëvizësh duke zbatuar rregullat që mbrojnë jetën tonë. 

Delcy Rodríguez është betuar zyrtarisht si presidente e përkohshme e Venezuelës.

Betimi i detyrës u administrua të hënën pasdite nga vëllai i saj, Presidenti i Asamblesë Kombëtare Jorge Rodríguez.

Pas arrestimit të Maduros, Rodriguez do të shërbejë se presidente e vendit duke marrë përsipër të gjithë aktivitetin që më parë ishte në dorë të Maduros. 

“Maduron e shiti zëvendësja e tij”/ Rodriguez përgatiti terrenin që t’i zinte vendin, ja pse nuk pati kundërreagim 

Operacioni amerikan “Vendosmëria Absolute”, që çoi në kapjen e presidentit venezuelian Nicolás Maduro, nuk u mbështet vetëm te forca ushtarake dhe inteligjenca, por edhe te negociata të fshehta në majat e pushtetit në Karakas. 

Pikërisht këtu përqendrohen dyshimet më të forta: te roli i mundshëm i zëvendëspresidentes Delcy Rodríguez. 

Sipas burimeve amerikane dhe spekulimeve që qarkullojnë në qarqe diplomatike, CIA kishte vendosur kontakte të drejtpërdrejta me figura kyçe të regjimit, duke siguruar bashkëpunim nga brenda. Emri i Delcy Rodríguez del vazhdimisht si hallka kryesore që mund të ketë hapur rrugën për rrëzimin e Maduros, në emër të pragmatizmit politik dhe kontrollit të dëmeve. 

Media amerikane kanë raportuar më herët se Rodríguez kishte tentuar të ndërtonte ura besimi me Uashingtonin, përmes ndërmjetësimit të Katarit, duke u paraqitur si një interlocutore e besueshme për të ardhmen e Venezuelës. Sipas “New York Times”, administrata Trump ishte impresionuar nga mënyra se si ajo kishte menaxhuar sektorin e naftës dhe e shihte si një alternativë të mundshme për tranzicionin e pushtetit. 

Në këtë kontekst, interpretimi më i përhapur është se Delcy Rodríguez mund t’i ketë ofruar SHBA-së atë që kërkonte më shumë: Maduron si “trofe” politik, në këmbim të hapjes së rrugës për marrëveshje të reja energjetike dhe mbijetesës së një pjese të elitës në pushtet. 

Ndërkohë, operacioni në terren u zhvillua me lehtësi të pazakontë. Pavarësisht rrethimeve të shumta të sigurisë rreth Maduros, bastisja e Delta Force u krye pothuajse pa rezistencë, duke forcuar dyshimet se struktura e komandës ishte paralizuar qëllimisht nga brenda. 

Edhe pse asnjë provë zyrtare nuk e konfirmon publikisht këtë skenar, fakti që Maduro u kap kaq shpejt dhe pa një reagim real nga aparati i tij i sigurisë ka ngritur një pyetje që po dominon diskutimin politik në Venezuelë: a u rrëzua Maduro nga armiku i jashtëm apo u sakrifikua nga njerëzit më të afërt të tij? 

“Fatkeqësisht, mendoj se presidenti amerikan duhet të merret seriozisht kur thotë se dëshiron Groenlandën”, tha Frederiksen për transmetuesin publik DR të hënën. “E kam bërë të qartë qëndrimin e Danimarkës dhe Groenlanda ka deklaruar vazhdimisht se nuk dëshiron të jetë pjesë e SHBA-së.”

Në intervistën e saj, Frederiksen e përshkroi presionin e Trump mbi Danimarkën dhe Groenlandën si “të papranueshëm” dhe vuri në dukje mbështetjen e vazhdueshme nga partnerët evropianë.

“Nëse Shtetet e Bashkuara sulmojnë një vend tjetër të NATO-s, gjithçka ndalet”, shtoi ajo.

Trump emëroi Guvernatorin e Luizianës, Jeff Landry, si të dërguar të posaçëm në Grenlandë muajin e kaluar. Landry ka shprehur publikisht mbështetje për integrimin e Grenlandës në Shtetet e Bashkuara.

Ndërkohë, Ministri i Jashtëm gjerman, Johannes Vandeful, tha se Grenlanda i përket Danimarkës dhe sugjeroi që NATO mund të diskutojë forcimin e mbrojtjes së saj nëse është e nevojshme.

Franca tha se Grenlanda i përket popullit të saj, dhe një zëdhënës i Komisionit Evropian tha se Bashkimi Evropian do të vazhdojë të mbrojë parimin e sovranitetit kombëtar.

Në një distancë gjeografike rreth 9 mijë kilometër dhe pak ndonjë lidhje historike apo tregtare të fortë, zhvillimet në Venezuelë nuk do përbënin ndonjë interes në Shqipëri në kushte të tjera.

Por, sot bota është më e lidhur se kurrë. Diçka që ndodh larg, përcillet shpejt në tregje… në mënyrë të drejtpërdrejtë apo tërthorazi.

Maksim Caslli, ekspert i tregjeve të investimeve, shprehet për A2CNN: “Edhe pse Shqipëria dhe Venezuela ndodhen në anë të kundërt të globit dhe nuk kanë marrëdhënie tregtare të mëdha, zhvillimet atje nuk janë më aq larg nga ne. Sot, tregjet janë të lidhura globalisht, dhe çdo ndryshim, qoftë politik apo ekonomik, mund të ketë efekt të ndjeshëm, direkt ose tërthorazi, tek ekonomia shqiptare”.

Shqipëria shkëmben pak mallra me Venezuelën. Të dhënat nga Instituti i Statistikave tregojnë se deri në nëntor importet nga shteti në Amerikën e Jugut ishin në vlerën e më pak se 38 mijë eurove. Disi më lart janë eksportet, vlera e të cilave përllogaritet në pak më shumë se 255 mijë dollarë.

“Varësia e vendit tone nga importet e huaja e bën Shqipërinë më të ekspozuar ndaj çfarëdo lëvizjeje në arenën ndërkombëtare. Për të shmangur efektet negative të këtyre tronditjeve është e domosdoshme të forcohet prodhimi dhe oferta vendase, që të ketë më shumë stabilitet dhe mbrojtje ndaj rreziqeve të jashtme”, tha Caslli.

Megjithatë, fakti që Shqipëria është ndër vendet me varësinë më të lartë nga importi e bën atë të ekspozuar ndaj zhvillimeve gjeopolitike. Që efektet mos të ndihen të forta, ekspertët vlerësojnë se duhet forcuar ekonomia vendase.

“Analistët e tregjeve vlerësojnë se arrestimi apo deportimi i presidentit venezuelan nuk pritet të ndikojë ndjeshëm çmimet globale të naftës. Edhe pse situata politike mund të shkaktojë shqetësim në media, tregu i naftës ka treguar qëndrueshmëri, dhe çmimet mbeten relativisht të njëjta, duke luhatur vetëm pak në raport me fuçinë”, shprehet Caslli.

Analistë të tregjeve vlerësojnë se arrestimi dhe deportimi i presidentit të Venezuelës, Nikolas Maduro nga Shtetet e Bashkuara të Amerikës nuk pritet të ndikojë fortë në tregje në përgjithësi dhe as te ai i naftës në veçanti. Çmimi i naftës së papërpunuar ka mbetur thuajse në të njëjtat shifra, në rreth 57 dollarë për fuçi.

Kreu i “Shqipëria Bëhet”, Adriatik Lapaj ka vijuar protestën, përpara Kryeministrisë.

Lapaj ka bërë thirrje që qytetarët të bashkohen dhe të protestojnë kundër regjimit, të dënojnë korrupsionin dhe vjedhjet e kryeministrit Rama dhe ministrave…

“Rama e ka vendosur precedentin e çadrës nuk e kam vendosur unë. Këtij i duket Republika si pronë private. Ramës po themi që ka vjedhur republikën bashkë me kolegët. Nuk e them unë e thotë gjykata. Një muaj rresht është thyer ndonjë lule këtu nga ne, ndonjë xham, po kur bëjmë proteste ne nuk duhet të lejohemi… Unë mendoj që në këtë vend ka shumë për të protestuar…Kauza është që këta nuk mund të na tallin. Nuk mund të na vjedhin dhe të na dalin në mbrëmje gala dhe ndërkohë problemi janë ata që reagojnë…”, tha ai.

Kryetari i Grupit Parlamentar të Partisë Socialiste, Taulant Balla, në vijim të reagimeve të tij pas “foltoreve” opozitare, sot përveç ironisë mbi pjesëmarrjen e ulët i rikujton Berishës se po afron përvjetori i 15-të i masakrës së 21 janarit në bulevard.

“Njëri nga hyzmeqarët sulmoi pa dashje kryebufin ndërsa fliste për krimet e Maduros, iu referua krimit të vrasjes së protestuesve nga diktatori i Venezuelës në 2019. Ke plotësisht të drejtë. Kush ka dhënë urdhër të qëllohet mbi popullin, duhet të përballet me drejtësinë. 15 vjetori i 21 Janarit 2011 po afron dhe kambanat bien më shumë se kurrë”

Në postimin e pamjeve, në rrjetet sociale Balla shkruan se protesta nuk i ka prishur aspak “rehatinë e festave” mbështetësve të Berishës, duke ironizuar mungesën e pjesëmarrjes dhe duke e krahasuar tubimin me “një dasmë te Rogneri”.

“Ndoshta ca e ngatërruan dasmën me atë fejesën dje në drekë. Ose do i ketë rënë pak rëndë gjeli i detit dhe bakllavaja. Se s’ka mundësi.”

“Agjencitë policore kombëtare, shtetërore dhe bashkiake duhet të ndërmarrin menjëherë kërkimin dhe kapjen në të gjithë territorin kombëtar të çdo personi të përfshirë në promovimin ose mbështetjen e sulmit të armatosur nga Shtetet e Bashkuara të Amerikës kundër territorit të Republikës (…) me qëllim ndjekjen penale të tyre”, thuhet në tekst, të miratuar nga presidentja tani në detyrë, Delcy Rodríguez.

Dekreti ishte përgatitur dhe shpallur në fund të shtatorit, disa javë pas fillimit të vendosjes detare amerikane në Karaibe, por përmbajtja e tij ishte e panjohur, pasi ishte përditësuar me ngjarjet e fundjavës. Masa ka fuqinë e ligjit dhe do të mbetet në fuqi për 90 ditë, me një zgjatje të mundshme për 90 ditë të tjera.

Kushtetuta e Venezuelës përcakton që, në gjendje të jashtëzakonshme, një dekret i garanton presidentit pushtet pothuajse të plotë politik, ekonomik dhe shoqëror mbi vendin. Kjo është hera e parë që kjo dispozitë është përdorur që nga miratimi i Kushtetutës aktuale në vitin 1999, e cila thotë se mund të dekretohet në rast të një konflikti që “rrezikon seriozisht sigurinë e kombit, qytetarëve të tij ose institucioneve të tij”.

Janari nis me gjithë seriozitetin e vitit 2026, por me aspekte pozitive për të na ndihmuar të vendosim rregull në jetën e përditshme. “Fillimi i mbarë, gjysma e punës”, shprehet Meri Shehu në programin “Rudina” në Tv Klan duke na parapërgatitur për parashikimin e muajit. Energjinë e shenjës së Bricjapit do ta ndiejmë ngado sepse do të duam të jemi të disiplinuar, të drejtpërdrejtë dhe të ndërmarrim veprime.

Lëvizja më e rëndësishme planetare është përmbyllja e ciklit të Neptunit te 12 shenjat që pas 14 vitesh largohet nga Peshqit. Data 20 do të jetë gjithashtu e rëndësishme sepse planetët do të nisin të kalojnë në Ujor dhe do të na bëjnë më socialë, sjellin argëtimin e ndoshta pak ‘dramë’ për disa shenja.

Për të na njohur me parashikimin për muajin e parë të vitit, astrologia bën renditjen nga shenja me më pak fat te më fatlumja.

Meri Shehu: Viti 2026 është një nga vitet më të rëndësishme, fillimi i mbarë, gjysma e punës kështu që të shikojmë si do ta fillojmë janarin. Janari fillon me një hënë të plotë në Gaforre që në datën 3, u fut Mërkuri në Bricjap në datën 1, na dha seriozitet për t’i marrë punët me hapa të rregullt, praktikë, pa fjalë të mëdha dhe me veprime korrekte. Është një muaj shumë i rëndësishëm sepse Neptuni del përfundimisht nga Peshku pas një cikli 165-vjeçar në 12 shenjat, futet në Dash në datën 26 dhe ne që jetojmë në këtë kohë fizike, nuk do ta përjetojmë më vendosjen e tij në Peshk. Duhet ta shijojmë deri në datën 26 Neptunin në Peshk për atë që do të na japë e na ka dhënë në 14 vitet e fundit. Kjo do të favorizojë Dashët, Shigjetarët dhe Luanët. Problematik do të jetë për Bricjapin, Gaforren dhe Peshoren sepse i ngatërron gjërat dhe ndonjëherë bën që të mos shihen qartë.

12. Dashi

Me Neptunin në shenjën e tyre do të kenë një vit shumë interesant. Të tjera mendojnë e të tjera thonë kështu që mos të ngatërrohen shumë sepse Neptuni të jep një optikë pak të vështirë. Do ta nisin mirë muajin janar sepse Mërkuri në Bricjap u jep tendenca të mira pune. Hëna e plotë në Gaforre u jep një lajm të mirë në familje, por në datën 18 marrin një lajm për fillime të reja pune, sidomos për ata që nuk e kanë gjetur, do të shohin një ndryshim spektakolar. Në gjysmën e parë të muajit do të mendojnë seriozisht për jetën personale e punën

11. Gaforrja

Përjetuan një hënë të plotë në datën 3, janë ndier mirë, pozitive, sikur dëshirat po u plotësohen, por në fund të muajit hyn Neptuni në Dash dhe e shohin ndryshe jetën, mjafton të mos bëhen utopike sepse ekziston tendenca të vetëzhgënjehen. Ajo që mund t’u japë shumë fat janë punët që lidhen me detin ose turizmin. Ka një hënë të re përballë shenjës së tyre në datën 18 që sjell ndryshime në jetën personale ose në bashkëpunime dhe do ta ndiejnë mirë.

10. Peshorja

Ndikohen nga Neptuni dhe jeta e tyre do të marrë një cikël të ri të avancuar, megjithatë vetëm nëse merren me art do të ecin përpara. Do të marrin shumë gjëra me Neptunin në Dash dhe do t’i idealizojnë gjërat e situatat. Familja do të jetë kryesorja dhe kontaktet me jashtë në gjysmën e dytë të janarit.

9. Luani

Kaq shumë planetë në Bricjap në 15-ditëshin e parë të janarit do t’i bëjnë të merren shumë me punën dhe jetën e përditshme ku çdo gjë do të ndryshojë. Data 3 me hënën e plotë në Gaforre u dha një ndjeshmëri të madhe psikologjike e shpirtërore dhe kanë nevojë të merren shumë me veten ose me njerëzit e dashur. Pas datës 20 fillon argëtimi.

8. Binjakët

Do të merren shumë me çështjet ekonomike, në 2026 do të gjëmojnë paratë kudo ku janë dhe do ta nisë vrullshëm. Deri në datën 18 do të ecin mirë dhe më pas do të shohin për të hapur një aktivitet të ri. Pas datës 20 do të jenë aktivë në sferën personale.

7. Akrepi

Ka një ndikim të mirë që në datën 3 nga hëna e plotë në Gaforre sidomos për komunikimet me jashtë, vënien e qëllimeve të rëndësishme, studimeve, projekteve dhe një udhëtim vërtet shumë i rëndësishëm në jetën e tyre. Shumë planetë në Bricjap tregojnë një rrugëtim të ri, nisin një veprimtari të re, takime të rëndësishme dhe ngrihen në një nivel intelektual. Me shumë planetë në Ujor pas datës 18 do të merren me çështjet familjare që dalin në plan të parë.

6. Peshqit

Ikën Neptuni nga shenja e tyre pas një cikli të gjatë që i ka ndihmuar, u ka dhënë ëndrra e shpresa dhe tani shkon te çështjet ekonomike, ndaj do të merren me to në mënyrë fantaziste që as i kishin menduar. Do të fitojnë ose humbin shumë.

5. Shigjetari

Janë në një moment shumë të fuqishëm ekonomik, duan të prodhojnë para. Deri në datën 18 do të jenë një mekanizëm prodhimi parash. Hëna e plotë në Gaforre do të japë një ndikim të fuqishëm në çështjet ekonomike. Pas datës 18 do të mbledhin të mirat materiale, por me shumë planetë në Ujor do të dalin, do të argëtohen dhe do të kenë ide të reja.

4. Demi

Favorizohen shenjat e tokës deri në datën 20. Atje ku do të synojnë do të kenë rezultate pozitive dhe në datën 18 hapet një veprimtari e re, një kontakt i ri psikologjik, shpirtëror apo një fushë e re dhe do të ndihen mirë. Hëna e plotë në Gaforre u jep një mundësi bashkëpunimi dhe takime erotike të mira. Do të marrin vendime erotike gjatë janarit, pas datës 20.

3. Virgjëresha

Nga shumë planetë në Bricjap favorizohen deri në datën 18, do të kenë lajme të mira në jetën personale, stabilitet ekonomik dhe fillim të ri të bukur, viti hapet me një hënë të re në Bricjap që thotë se jeta do të ndryshojë në planin personal e të krijimtarisë. Në janar mund të planifikojnë një fëmijë ose një aktivitet që ka të bëjë me talentin e tyre.

2. Bricjapi

Ka shumë planetë në Bricjap, por hëna e plotë përballë shenjës së tyre u jep vëmendje partnerëve dhe disa problematikave me ligjin që duhet të përfundojnë. Deri në datën 18 do ta ndiejnë veten zot të fillimit të vitit, muajit dhe ta nisin mbarë. Do të merren shumë me çështjet ekonomike, por kujdes pas datës 26 sepse kundërshtohen nga Neptuni.

1.Ujori

Pavarësisht se ka shumë planetë në Bricjap, do të marrin stafetën pas datës 17-18 dhe do ta kenë aleat Neptunin në Dash, nuk do të fantazojnë shumë, por do t’i bëjnë dëshirat realitet. Deri në atë datë duket sikur s’kanë gjë në dorë, por më pas nis një periudhë shumë e fuqishme.

Policia e Fushë-Krujës dhe Tiranës janë vënë në ndjekje të një personi, i cili dyshohet se ka kryer të paktën 3 vjedhje me dhunë përgjatë pak orëve. Sipas burimeve për ABC News, i riu, i cili rezulton me precedent të mëparshëm penal, ka marrë një taksi në zonën e Tajvanit në Tiranë dhe ka kërkuar të shkojë në Fushë-Krujë. Sapo është afruar drejt Tapizës, me anë të një arme zjarri ka kërcënuar taksistin dhe ka marrë drejtimin e makinës vetë, ndërsa këtë të fundit e ka lënë në një zonë të largët; i ka marrë edhe paratë dhe celularin taksistit.

Më pas ka shkuar pranë një pike karburanti në afërsi të Milotit dhe, sërish me kërcënimin e armës së zjarrit, i ka marrë punonjësit paratë e xhiros ditore.
Më pas ka lënë mjetin në afërsi të një xhamie në Fushë-Krujë dhe është arratisur i armatosur, ndërkohë që është ende në kërkim.
Burimet thanë se i riu është identifikuar plotësisht nga policia dhe po vijojnë kërkimet. Në bazë të verifikimeve rezulton se i riu ka qenë i dënuar më herët dhe ka precedent penal në fushën e mashtrimit.

Në foltoren e Berishës nuk mungojnë as shenjat e adhurimit të liderit. 

Një ndër militantëve të sotëm që u ngjit në Foltore e krahasoi Berishën me diellin (e partisë) dhe u shpreh i gëzuar shyqyr që e kemi. 

“Ja dielli. Doktor të rrosh…! Shyqyr që e kemi!” – u shpreh militanti duke u drejtuar nga Berisha. 

Ndërkohë që brenda gjykatës federale të Manhatanit, Nicolas Maduro u deklarua i pafajshëm, jashtë gjykatës u mblodhën turma të mëdha njerëzish.

Dy grupe me qëndrime të kundërta protestuan paralelisht: njëra palë brohoriti kapjen e Maduro-s, ndërsa pala tjetër protestoi kundër ndalimit të tij dhe kërkoi lirimin.

Protestuesit u panë duke valëvitur flamuj venezuelianë dhe duke brohoritur slogane si: “Kush jemi ne? Venezuela! Çfarë duam? Liri!”. Disa mbanin pankarta me mbishkrimin “Liri për të burgosurit tanë politikë në Venezuelë”, ndërsa të tjerë shfaqnin banderola ku shkruhej “Liri për Presidentin Maduro”. Në protestë u vu re edhe një pankartë me mbishkrimin “Trump për Mbret”.

Sipas prokurorisë amerikane, Maduro akuzohet se ka udhëhequr “banda kriminale të sponsorizuara nga shteti” dhe ka korruptuar institucione shtetërore për të lehtësuar importimin e sasive të mëdha të kokainës në Shtetet e Bashkuara. Akuzat përfshijnë gjithashtu çështje që lidhen me armë dhe bashkëpunim kriminal ndërkombëtar.

Paraqitja e sotme në gjykatë konsiderohet një moment kyç në një proces që pritet të jetë i gjatë dhe me ndikim të madh politik e diplomatik, ndërsa zhvillimet në Nju Jork po ndiqen me vëmendje të lartë nga komuniteti ndërkombëtar.

Kreu i PD, Sali Berisha, nga Foltorja para Kryeministrisë ka lëshuar akuza ndaj kryeministrit Edi Rama duke e cilësuar atë më keq se Maduro dhe duke e paralajmëruar se do të ketë të njëjtin fat si ai. 

Sali Berisha: Viti 2026 ngjason në histori me vitin e rrëzimit të diktaturave njëra pas tjetrës, narkodiktaturat dhe autokracitë sociale. 

Ky është më keq se Maduro, kontrollon me Franc Çopajn çmimin e kokainës. 

Ky njëlloj si Maduro ka shndërruar zgjedhjet në farsë elektorale, ka marrë mandatet e opozitës, është njëlloj si Maduro sepse ky është I lidhur me kartelet më të fuqishme të drogës në Evropës. Ky është më keq se Maduro, kontrollon me Franc Copajn çmimin e kokainës në Evropë, ky është sa Maduro për shqiptarët sepse nëse Maduro ka përzënë 20% të popullatës, Ramaduro ka përzënë 40% të popullatës. Ky është më keq se Maduro, sepse ky preferon verëra 33 mijë euro shishe. 

Dhe me Lindat e tij vjedh qindra mln euro nga AKSHI. Olsi i Ramaduros instalonte fabrikën e parë të drogës në Xibrakë. E kuptoni pse thoshte në artikull se jam Maduro. Jo jo je Ramaduro. 

Opozita vijon me protesta duke kërkuar largimin e kryeministrit Edi Rama, por për ish-deputetin socialist Petro Koçi, tubimet e tyre nuk kanë domethënie politike. I ftuar në emisionin “Tema e Ditës” me Arbër Hitaj në RTSH, Koçi u shpreh se kreu i PD-së, Sali Berisha, dhe drejtuesi i Lëvizjes “Shqipëria Bëhet”, Adriatik Lapaj, po sillen “si gangsterë”.

“Protestat opozitare nuk janë domethënëse ndaj të cilave të ketë reagime që pastaj të shënojnë zhvillime të cilat mund të ndryshojnë status quon. Zoti Berisha dhe Lapaj si një kopje e tij, nuk mund të tronditin momentin politik në të cilin ndodhet Shqipëria. Të dy këto  personazhe janë me profil gangsterësh”, tha ai.

Sipas ish-deputetit, opozita po përhap thashetheme për qeveri teknike dhe zgjedhje të parakohshme, por pa bazë reale. Ai theksoi se zgjedhjet e fundit treguan se opozita ishte e pafuqishme për të ndryshuar ekuilibrat elektoralë.

“Nuk ka arsye, këto lloj temash në formë thashetheme hapen herë pas here, ne e dimë që ky është një zakon i vjetër i opozitës. Ne nuk kemi një zhvillim i cili të jetë thelbësor dhe të ndryshojë peshoren elektorale në vend. Sapo janë bërë zgjedhjet dhe opozita u provua që ishte e pafuqishme për të ndikuar dhe ndryshuar këtë peshore elektorale. Opozita mendon si të jetë e fortë dhe jo e shëndetshme. Nuk mendojnë si të ndryshojë imazhin, kredibilitetin moral dhe politik, programet, zgjidhjet që mund të ofrojë etj., që unë besoj se mund të ishin efektive nëse do preknin çështje themelore të funksionimit të shtetit, por jo që duan të heqin atë që është në pushtet që ta zëvendësojnë vetë. Kjo është një fabul që nuk mund të ecë përpara”, theksoi ai.

Ndalur te drejtësia, Koçi tha se Prokuroria e Posaçme (SPAK) është një nga “pasaportat’ kryesore të vendit për integrimin europian, një qëllim për të cilin, siç tha ai, duhet të punojë edhe mazhoranca edhe opozita. Megjithatë, ai shtoi se kjo e fundit po punon në drejtim të kundërt. Ai paralajmëroi se çdo ide për qeveri teknike do të dëmtonte procesin e negociatave.

“SPAK është një nga pasaportat kryesore të procesit të integrimit europian të Shqipërisë. Maxhoranca e ka shumë të qartë këtë gjë. E gjithë energjia e politikës sot duhet të fokusohet te integrimi europian. Aksioni strategjik që ka Shqipëria është integrimi europian i vendit dhe çdo qëndrim, qoftë i opozitës qoftë i mazhorancës, që e vë në dyshim këtë gjë, patjetër që do të krijonte pasoja. Edhe ideja e një qeverie teknike bie ndesh me procesin e integrimit europian sepse nëse do krijohej një qeveri ndryshe e imagjinoni çdo të ndodhë me ekipet e negocimit, hapat e ndërmarrë, do ta ndërpriste procesin. Opozita nuk është se po punon në favor të integrimit, po punon në disfavor sepse ata bëjnë një kalkulim që është dritëshkurtër. Ata mendojnë që integrimi europian i vendit do konsiderohet meritë e maxhoracës dhe jo atyre. Por edhe nëse është ashtu, për interesin e Shqipërisë nuk do kishte asgjë të keqe”, u shpreh ai.

Nicolás Maduro Guerra, djali i presidentit të rrëzuar të Venezuelës, Nicolás Maduro, tha të hënën se babai i tij u “rrëmbye” nga Shtetet e Bashkuara dhe bëri thirrje për “solidaritet ndërkombëtar” me të në mënyrë që ai të mund të kthehet në vendin e Amerikës së Jugut. 

Maduro Guerra i bëri këto deklarata gjatë seancës së inaugurimit të Asamblesë Kombëtare të Venezuelës, e mbajtur dy ditë pasi Maduro dhe gruaja e tij, Cilia Flores, u kapën në një operacion ushtarak amerikan në Karakas. Gjatë fjalimit të tij, Maduro Guerra tha se operacioni shkelte sovranitetin e Venezuelës dhe paralajmëroi se kjo mund të ndodhte në një vend tjetër. 

“Nëse e normalizojmë rrëmbimin e një kreu shteti, asnjë vend nuk është i sigurt. Sot është Venezuela, nesër mund të jetë çdo komb që refuzon të nënshtrohet. Ky nuk është një problem rajonal, është një kërcënim i drejtpërdrejtë për stabilitetin global, për njerëzimin dhe për barazinë sovrane të kombeve”, tha ai. 

“Njerëz të botës, po ju them: solidariteti ndërkombëtar me Nicolás-in, me Venezuelën, nuk është një gjest politik opsional, është një detyrë etike dhe ligjore. Heshtja përballë këtyre shkeljeve implikon ata që heshtin dhe dobëson sistemin ndërkombëtar që të gjithë pretendojnë se e mbrojnë”, tha ai. 

Maduro Guerra iu referua gjithashtu përfshirjes në aktakuzën e fundit të SHBA-së kundër babait të tij, Flores dhe të tjerëve, të cilët akuzohen për trafik droge dhe vepra penale me armë. Maduro Guerra i hodhi poshtë akuzat. 

“Unë dhe familja ime po persekutohemi”, tha ai. 

Arrestimi i Maduros dhe gruas së tij u zhvillua sot me momente dramatike. 

Zhurma e prangave në këmbët e Maduros dëgjohej qartë përpara se ai të hynte në sallën e gjyqit, ku ai u kthye, tundi kokën dhe dukej sikur i tha “buenos días” disa personave në sallë. 

Momenti më i tensionuar erdhi në fund të seancës, kur një qytetarë filloi t’i bërtiste në spanjisht se do të “paguante” për atë që kishte bërë. 

Maduro iu kthye dhe iu përgjigj në spanjisht, duke u përshkruar si një “president i rrëmbyer” dhe një “i burgosur lufte”, para se të shoqërohej jashtë i prangosur, duke kaluar pas gruas së tij përmes derës së pasme të oborrit. 

Të hënën paradite, presidenti kinez Xi Jinping u takua në Pekin me kryeministrin irlandez Micheal Martin, që ndodhet për një vizitë shtetërore në Kinë.

Gjatë takimit, presidenti Xi u shpreh që Kina është e gatshme të forcojë shkëmbimet strategjike, të thellojë besimin e ndërsjellë politik dhe të zgjerojë bashkëpunimin pragmatik me Irlandën, për t’u sjellë të dy popujve përfitime dhe për të nxitur zhvillimin e marrëdhënieve Kinë-BE.

Ai theksoi më tej që Kina do të vazhdojë të promovojë zhvillimin cilësor dhe të zgjerojë hapjen me botën e jashtme. Pala kineze është e gatshme të forcojë bashkëpunimin me palën irlandeze në fushën ekonomiko-tregtare, të inteligjencës artificiale, të ekonomisë digjitale, të mjekësisë etj., dhe të promovojë investimet e dyanshme, për të ndarë së bashku mundësitë dhe për të arritur zhvillimin e përbashkët.

Nga ana e tij, kryeministri Micheal Martin u shpreh se Irlanda i përmbahet politikës së “një Kine” dhe është e gatshme të thellojë bashkëpunimin me Kinën në fushën e tregtisë, investimeve, teknologjisë, biomjekësisë, energjisë së përtëritshme, inteligjencës artificiale, arsimit etj. Irlanda do të thellojë kontaktet me Kinën për të mbrojtur ligjin ndërkombëtar dhe tregtinë e lirë. Zhvillimi i qëndrueshëm i marrëdhënieve BE-Kinë ka rëndësi të madhe, vuri në dukje Martin, duke shtuar që Irlanda do të luajë një rol konstruktiv për nxitjen e zhvillimit të shëndetshëm të marrëdhënieve BE-Kinë

Ka nisur protesta e radhës e Partisë Demokratike përpara Kryeministrisë. 

Në fjalën e tij Luçiano Boçi u shpreh kritik ndaj qeverisë Rama, duke thënë se kryeministri ka sjellë vetëm korrupsion për shqiptarët. 

“Kemi dëgjuar shumë opinione për platformën tonë, dhe u themi se nuk jemi këtu për spektakël politik, por jemi për të kërkuar llogaridhënie e drejtësi në mungesë të institucioneve. Jemi këtu për të transmetuar dhe për të mbrojtur të vërtetat tona sepse janë të vërteta të qytetarëve. Sot 46 % e tyre janë rrezik varfëri apo në rrezik përjashtimi social. Qytetarët mbajnë mbi supe peshën e korrupsionit”, ka thënë ai. 

Gjithashtu ai theksoi se shqiptarët janë grabitur, ndërsa vetë jetojnë në luks. 

Boçi holli edhe akuza ndaj zëvendëskryeministres Belinda Balluku, duke thënë se kryeministri Edi Rama po e mbron sepse është i frikësuar për vetë fatin e tij. 

“Me të gjitha grabitjet dhe vjedhjet është e vërteta e qytetarëve, dhe talljet që u bën Rama me shpurën dhe lugën bosh që u bën me tigra si barake dhe satelit orbital. Qytetarët e kanë kuptuar se sot po kërkon ti shkatërrojë familjen. Ballukët, Agasët, Mirlindat bëjnë vallen e vdekjen mbi fatet shqiptarëve dhe vetë notojnë në luks të shfrenuar. Të vërtetat tona janë të vërtetat e Sali Berishës dhe të PD”. 

Presidenti i Venezuelës, Nicolas Maduro, dhe gruaja e tij kanë lënë sallën e gjyqit pas seancës dëgjimore, e cila zgjati rreth 30 minuta.

Maduro është urdhëruar të paraqitet për seancën e tij të radhës në gjykatë më 17 mars.

Ndërsa po zhvilloheshin diskutime për një datë të përshtatshme, avokati mbrojtës i Maduros theksoi “çështjet me ligjshmërinë e rrëmbimit ushtarak”.

Ai gjithashtu tha se ka disa probleme shëndetësore dhe mjekësore dhe kërkon një formular që mund të plotësohet “në mënyrë që të marrë ndihmën e duhur mjekësore gjatë paraburgimit”.

Avokati mbrojtës i Cilia Flores tha gjithashtu se ajo ka disa probleme shëndetësore. “Ajo ka mavijosje të rënda në brinjë dhe do të na duhet vëmendja e duhur”, thotë Mark Donnelly.

Maduro u ndal dhe u kthye nga galeria përpara se të shoqërohej jashtë sallës së gjyqit së bashku me gruan e tij.

Nicolas Maduro dhe gruaja e tij, Cilia Flores, u paraqiten për herë të parë në gjykatën federale për t’u përballur me akuzat për narkoterrorizëm.

Ata akuzohen për konspiracion narko-terrorizmi, komplot për importimin e kokainës, posedimi i mitralozëve dhe pajisjeve shkatërruese, konspiracion për të poseduar mitraloz dhe pajisje shkatërruese.

Gjykatësi Alvin Hellerstein u shpreh në fillim të seancës se puna e tij është të sigurohet që ky të jetë një gjyq i drejtë.

Maduro qëndroi në këmbë ndërsa iu kërkua të konfirmojë emrin e tij në gjykatë.

Gjykatësi vazhdoi duke i thënë Maduros se “do të ketë një kohë dhe një vend për të gjithë këtë” përpara se ta përsërisë pyetjen e tij.

Maduro përgjigjet duke konfirmuar emrin e tij. Në fjalët e tij të para publike që kur u soll në SHBA, Maduro i thotë gjykatës se është presidenti i Venezuelës dhe se u kap nga shtëpia e tij në Karakas.

“Nuk jam fajtor, jam një njeri i mirë, jam ende president i vendit tim”, vazhdon ai.

Vëmendja në gjykatë tani kthehet te gruaja e Nicolas Maduros, Cilia Flores, së cilës i kërkohet të ngrihet në këmbë dhe të konfirmojë emrin e saj.

“Po, unë jam Cilia Flores Maduro, unë jam zonja e parë e Venezuelës”, i thotë ajo gjykatës.

Ky është një ton i ngjashëm me Maduron, i cili e përshkroi veten si presidenti i Venezuelës në sallën e gjyqit.

Flores gjithashtu nuk pranon fajësinë për akuzat.

Analisti politik Arben Meçe, i ftuar në “Tirana Live” në ABC News, ka komentuar zhvillimet e fundit në opozitë dhe sjelljen politike të Sali Berishës, duke i cilësuar ato si të përsëritura dhe jashtë normales.

Sipas Meçes, opozita ndodhet në një fazë ezaurimi, ndërsa veprimet dhe deklaratat e Berishës nuk prodhojnë më shpresë apo alternativë për qytetarët, por synojnë vetëm krijimin e përditshëm të një ngjarjeje mediatike.

Ai theksoi se Partia Demokratike është e uzurpuar nga një “sekt”, çka po pengon mendimin opozitar dhe përfaqësimin real të qytetarëve, duke nënvizuar se ndryshimi në opozitë do të vijë vetëm me largimin e Berishës nga drejtimi i PD-së.

“Do të vazhdojë çdo ditë e njëjta skemë. Nuk e di se çfarë po prodhon. Nuk gjen më asnjë mekanizëm për të analizuar sjelljet e Berishës. Nuk ka një njeri normal që të dalë 3 herë në konferenca shtypi dhe thotë gjithmonë të njëjtat gjëra. Sot ngaqë s’kishte se çfarë të thoshte, në dyert e SPAK ka thënë çudira. Në këtë kuadër dhe në këtë logjikë, produkti do të jetë ky që pamë sot. Shenjat tregojnë që ‘sekti Berishian’ është i ezauruar në Shqipëri.

Opozita duhet të prezentë ndaj qytetarit, jo ndaj medias. Kjo situatë, e kësaj proteste/foltoreje nuk është normale. Vetëm një psikoanalist mund të zbërthejë këto veprime anormale të Berishës. Rëndësi për Berishën ka që çdo ditë të prodhojë një ngjarje. Nuk duhet të gëzojmë që kemi këtë opozitë. Nuk është në favorin tonë kjo opozitë. Uzurpimi i opozitës nga një sekt sjell këtë produkt. PD është një sekt, që nuk mbështetet nga asnjë moral. Berisha nuk, prodhon asnjë fije shprese tek qytetari shqiptar dhe po ndrydh mendimin opozitar. Ndryshimi do të vijë ditën që Berisha do largohet nga drejtimi i PD”, tha Meçe.