Në shtëpitë shqiptare, ekranet janë bërë shoqëruesit e përhershëm të fëmijëve. Një vajzë 12-vjeçare mund të mësojë teknika make-up-i përmes videove 30-sekondëshe, ndërsa një djalë 13-vjeçar mëson për “suksesin” nga influencerë që tregojnë makina luksoze e jetë të përsosur.

Në prapaskenë, funksionon një sistem që nuk fle: algoritmi, që mëson çdo klikim, çdo ndalesë, çdo shikim të përsëritur. Ai përcakton se çfarë video shohim, çfarë muzike dëgjojmë, madje edhe si ndiejmë.

Sa më shumë kohë kalon një përdorues, aq më shumë vlerë krijon për platformën. Kjo është arsyeja pse çdo përmbajtje është e shpejtë, e lehtë për t’u konsumuar, e ndërtuar për të dhënë kënaqësi të menjëhershme.

TikTok, për shembull, është bërë “mësuesi i parë” për miliona të rinj në botë, një mësues pa fytyrë, pa përgjegjësi, por me ndikim të jashtëzakonshëm në mënyrën si ata e shohin veten dhe botën.

YouTube, ndërkohë, është kthyer në një univers paralel. Nga videot e animuara për më të vegjlit, te “vlogjet” e jetës së përsosur për adoleshentët, ai ofron një realitet ku gjithçka është e bukur, e shpejtë dhe e arritshme…në pamje të parë.

Por, pas ekranit qëndron një kurth i heshtur: çdo klikim ushqen një cikël të pafund reklamash, përmbajtjesh të ngjashme, rekomandimesh që rrallë çojnë në mësim të vërtetë, por gjithmonë në më shumë konsum.

Kjo kulturë e menjëhershme po formëson një brez që kërkon gjithçka “tani”: veshjet më të fundit, telefonin e ri, suksesin e shpejtë. Në tregjet shqiptare, kjo reflektohet në mënyrën si fëmijët dhe adoleshentët ndikojnë vendimet e blerjes në familje.

Lodra që bëhen virale në rrjete shiten brenda ditësh. Influencerët po kthehen në forca reale marketingu, duke krijuar valë trendesh që dikur i diktonin reklamat televizive apo modat e huazuara nga jashtë.

Por ndikimi më i thellë është në formimin e identitetit. Në vend që ta ndërtojnë përmes përvojës reale, marrëdhënieve shoqërore apo përpjekjeve personale, fëmijët po e projektojnë veten përmes filtrave, reagimeve dhe pëlqimeve.

“Sa më pëlqejnë?”, “si dukem?”, “sa ndjekës kam?” janë pyetje që për shumë prej tyre kanë zëvendësuar pyetjet që dikur nxisnin mendimin kritik: “çfarë di?”, “çfarë dua të bëhem?”, “çfarë më bën të lumtur?”.

Psikologët paralajmërojnë se kjo zhvendosje po ul durimin, aftësinë për t’u përqendruar dhe gatishmërinë për të përballuar dështimin, sepse algoritmi nuk njeh dështim, vetëm “scroll” të pafund.

Në Shqipëri, situata është më komplekse për shkak të mungesës së edukimit digjital.

Shkollat rrallë ofrojnë programe që shpjegojnë se si funksionojnë algoritmet, si të mbrohet privatësia, apo si të menaxhohet koha online. Shumë prindër ndihen të humbur mes teknologjisë që ndryshon çdo muaj dhe sjelljeve që nuk i njohin dot më.

Ndërsa influencuesit, shpesh të rinj që vetë janë rritur online, po marrin rolin e “udhërrëfyesve” të brezit të ri, duke ofruar modele jete që shpesh janë të shkëputura nga realiteti ekonomik e social shqiptar.

Disa mësues dhe ekspertë po nxisin përfshirjen e edukimit digjital në kurrikula, për të mësuar fëmijët si të kuptojnë dhe sfidojnë algoritmet, jo vetëm t’u nënshtrohen atyre.

Edhe në ekosistemin e startup-eve shqiptare po lindin nisma që synojnë ta përdorin teknologjinë për të zhvilluar mendimin kritik dhe kreativitetin.

Aplikacione edukative, platforma për lexim interaktiv apo lojëra që nxisin bashkëpunimin real janë shenjat e para të një kundërkulture që synon ta rikthejë fëmijërinë në duart e njeriut, jo të sistemit.

Sipas të dhënave të AKEP, numri i përdoruesve aktivë të rrjeteve sociale në Shqipëri është rritur me mbi 20% vetëm gjatë dy viteve të fundit. TikTok-u, që fillimisht u perceptua si aplikacion argëtimi, është kthyer sot në motor të identitetit kulturor të adoleshentëve.

Në prapaskenë, funksionon një logjikë e thjeshtë: sa më shumë kohë qëndron një përdorues në ekran, aq më shumë vlerë krijon për platformën.

Çdo “scroll”, çdo ndalesë e syrit, çdo klikim – regjistrohet, analizohet dhe përdoret për të ndërtuar një profil emocional e konsumator.

TikTok-u, sipas ekspertëve të medias, është bërë “mësuesi i parë” i fëmijëve, një mësues që nuk mban asnjë përgjegjësi për përmbajtjen që shpërndan, por ka ndikim më të fortë se shkolla, prindërit apo shoqëria.

Në thelb të këtij transformimi qëndron ajo që quhet ekonomia e vëmendjes, një garë e heshtur për sekondat e syrit njerëzor./monitor /kb

Last Updated on 03/01/2026 by Kesjana

Kryeministri Edi Rama sot në 3 janar ka postuar në rrjetet sociale, pamje nga Muzeu i Ikonografisë në Berat.

Rama shprehet se ata që vizitojnë këtë muze janë shtuar në numër.

Sipas kreut të qeverisë, Muzeu i Ikonografisë në Berat gjatë vitit 2025 është vizituar nga mbi 100 mijë persona.

“Mirëmëngjes. Me këtë lajm të bukur nga Berati, ku për të dytin vit radhazi, në 2025, Muzeu Kombëtar i Ikonografisë ka kaluar shifrën domethënëse prej mbi 100 mijë vizitorësh, ju uroj një fundjavë të mbarë”, shkruan Rama.

Qeveria shqiptare prej kohësh ka në fokus rritjen e turizmit, si një degë e rëndësishme e zhvillimit të ekonomisë./kb

OpenAI dhe Anthropic, kundër zhvilluesve të aplikacioneve: sindroma e Kronosit në teknologji. A do t’i gllabërojnë laboratorët aplikacionet që funksionojnë mbi modelet e tyre?, shkruan The Economist.

Në botën zakonisht të mbushur me thashetheme të Silicon Valley, po ndodh diçka e çuditshme. Është e vështirë të gjesh një sipërmarrës të Inteligjencës Artificiale gjenerative, që të thotë ndonjë fjalë të keqe për dikë tjetër.

Ndoshta kjo lidhet me moshën. Shumë prej atyre që po nisin startup-et e tyre të IA-së kanë lindur pas filmave distopikë të fantashkencës si “The Matrix” (1999) dhe janë ende mjaft të rinj për të besuar se Inteligjenca Artificiale do të jetë një forcë e mirë për të gjithë. Për ta, edhe fjala “frenemy” (armik-mik) tingëllon shumë e ashpër.

Megjithatë, përtej kësaj harmonie të dukshme, po shfaqet një dinamikë konkurruese që do të bëhet gjithnjë e më e fortë.

 

Merrni shembull startup-et si Anysphere, aplikacioni Cursor i së cilës ndihmon zhvilluesit e softuerëve të shkruajnë kode programimi; Harvey, që ofron Inteligjencë Artificiale për firmat ligjore; dhe OpenEvidence, që bën të njëjtën gjë për mjekët (dhe që më 20 tetor siguroi 200 milionë dollarë financim me një vlerësim prej 6 miliardë dollarësh).

 

Këto aplikacione po rriten me shpejtësi duke përdorur modelet e mëdha gjuhësore (LLM) që ofrohen nga kompani si OpenAI, krijuesja e ChatGPT-së, dhe Anthropic, krijuesja e Claude.

 

Ata paguajnë për t’i përdorur këto modele, por ndryshe nga laboratorët e IA-së, nuk shpenzojnë miliarda në ndjekje të superinteligjencës. Kjo e bën rrugën e tyre drejt fitimit më të lehtë.

 

Ndërkohë, vlerësimet e larta për laboratorët e IA-së që shpenzojnë shumë para, 500 miliardë dollarë për OpenAI dhe 183 miliardë për Anthropic, tregojnë se, teksa modelet e tyre bëhen më të afta, investitorët besojnë se një ditë ata do të përvetësojnë fitimet e startup-eve që varen prej tyre.

 

Mendoni për laboratorët si Kronosin, titanin e mitologjisë greke që përpiqej të hante fëmijët e vet (ose si Amazon, titan i tregtisë elektronike, që prodhon produkte për të nënçmuar ata që shiten mirë në platformën e saj). Pyetja, si në mitin e Kronosit, është: a do të mundin të mbijetojnë të vegjlit dhe të luftojnë?

 

Vrasja e “fëmijëve” mund të ketë filluar tashmë. Startup-et janë shumë të sjellshme për të ngritur alarmin. Por Ed Zitron, autor i një buletini therës për IA-në, raportoi më 20 tetor se Anthropic kishte shpenzuar një pjesë të madhe të të ardhurave të saj këtë vit dhe vitin e kaluar për Amazon Web Services, një nga ofruesit e saj të teknologjisë cloud.

 

Si pasojë, tha ai, kompania prezantoi plane të reja shërbimi që rritën kostot për klientët e mëdhenj si Cursor, për të mbushur boshllëkun financiar. Anthropic thotë se paketat e shërbimit janë praktikë standarde në gjithë industrinë.

 

Kërcënimi shkon përtej çmimeve. Laboratorët e mëdhenj të IA-së po përpiqen të arrijnë Inteligjencën e përgjithshme Artificiale (AGI), e cila do t’i bënte modelet e tyre të afta të kryenin shumicën e detyrave që mund t’i bëjnë njerëzit, duke përfshirë edhe përputhjen apo tejkalimin e aftësive të zhvilluesve të aplikacioneve. Për momentin, mund të ketë ende hapësirë për të gjithë.

 

Por shenjat janë të qarta. Mjafton të shohësh fushën e programimit, ku aplikacionet me IA gjenerative janë përhapur më shpejt. Si Anthropic ashtu edhe OpenAI kanë zhvilluar mjete kodimi që rivalizojnë, me dallime të vogla, ato të Cursor-it.

 

Themeluesit e startup-eve mbeten çuditërisht optimistë. Ata besojnë se ekuilibri i fuqisë do të mbetet fort në favorin e tyre për të ardhmen e afërt.

 

Në mënyrë domethënëse, shumë prej tyre janë skeptikë ndaj AGI-së, megjithëse në mënyrë të rezervuar (njëri prej tyre i kërkoi The Economist të mos e përmendte me emër si dyshues, nga frika se mund të përjashtohej nga skena shoqërore e San Franciskos).

 

Ata argumentojnë se, në vend të AGI-së, aftësia që bizneset realisht kanë nevojë për të nxitur përdorimin më të gjerë të IA-së gjenerative është “Inteligjenca Artificiale e specializuar”, pra IA që fokusohet në një fushë të caktuar, si ligji apo mjekësia. Pikërisht aty shpresojnë të ruajnë avantazhin konkurrues.

 

Kompania Sierra, që prodhon “agjentë” të IA-së që bashkëpunojnë me njerëzit në shërbimin ndaj klientit, përdor një ilustrim për të shpjeguar këtë dinamikë. Ajo tregon majën e një ajsbergu: kjo është pjesa e tregut që shërbehet nga LLM-të (modelet e mëdha gjuhësore).

 

Poshtë saj ndodhen një mori procesesh të ndërlikuara biznesi që përfaqësojnë sfida dhe mundësi shumë më të mëdha

 

Asnjëra prej tyre nuk është e përgjithshme. Vlera, thotë bashkëthemeluesi i Sierra-s, Bret Taylor (i cili është edhe kryetar i bordit të OpenAI-së), gjendet te “gjërat më të mërzitshme, më të zakonshme… të fshehura në prapaskenën e një kompanie, që janë të ngadalta, të kushtueshme dhe me pasoja të mëdha”.

 

Për t’u mbështetur, zhvilluesit e aplikacioneve po eksperimentojnë me modele të reja të të ardhurave. Ata e pranojnë se, ndryshe nga valët e mëparshme të zhvillimit të softuerëve, sa më shumë të rriten dhe sa më shumë të përdorin LLM-të, aq më të larta do të jenë kostot e tyre shtesë. Për t’i kompensuar këto kosto në rritje, u nevojiten teknika të reja.

 

Njëra prej tyre është përdorimi i një sërë modelesh, përfshirë ato me burim të hapur, për të drejtuar pyetjet më të thjeshta atje ku përpunimi është më i lirë. Një tjetër është tarifimi i klientëve në bazë të rezultateve, e jo të përdorimit. Për shembull, Harvey mund të përballojë të përdorë modelet më të mëdha sepse firmat ligjore janë të gatshme të paguajnë për saktësi të përsosur.

 

Argumentet

 

Për më tepër, zhvilluesit e aplikacioneve argumentojnë se sa më gjatë të qëndrojnë në treg, aq më shumë të dhëna të specializuara do të grumbullojnë agjentët e tyre, duke përmirësuar performancën, njësoj si makinat me vetëdrejtim që bëhen më të besueshme sa më shumë kilometra përshkojnë.

 

Kjo pritet t’i bëjë ata më “ngjitës” për klientët, duke krijuar një hendek konkurrues që laboratorët e IA-së do ta kenë të vështirë ta kapërcejnë. Cursor, për shembull, përdor të dhëna në kohë reale për të përditësuar modelin e vet çdo dy orë, gjë që, sipas kompanisë, përmirëson përvojën e kodimit të klientëve.

 

Harvey shkon përtej dokumenteve standarde si marrëveshjet e konfidencialitetit të gjeneruara nga IA. Ai synon detyra shumë më komplekse, si ndihma në koordinimin e disa firmave ligjore gjatë një bashkimi gjigant, diçka që modelet e përgjithshme do ta kenë më të vështirë ta imitojnë.

Megjithatë, krijuesit e aplikacioneve kanë edhe mangësitë e tyre. Specializimi mund ta bëjë më të vështirë zgjerimin përtej një fushe të caktuar, si ligji, mjekësia apo shërbimi ndaj klientëve, duke kufizuar madhësinë e tregut potencial.

Modelet e përgjithshme mund të shtrihen më gjerë. Pastaj është çështja e rekrutimit. Si kompani shumë më të vogla se laboratorët e IA-së, zhvilluesit e aplikacioneve do ta kenë të vështirë të konkurrojnë në luftën e kushtueshme për talentet më të mira të IA-së. Por të gjithë do të kenë nevojë për zhvillues të nivelit të lartë për të ndërtuar agjentët më të mirë.

Megjithatë, edhe teksa laboratorët e IA-së bëhen më grabitqarë, edhe ata kanë një problem. Ka kaq pak dallim midis tyre dhe është kaq e lehtë që kompanitë e softuerëve të kalojnë nga një ofrues LLM-sh te një tjetër, saqë rrezikojnë të bëhen mallra të zakonshme.

Kjo e ka shtyrë bankën HSBC të vlerësojë në një raport të fundit se deri në vitin 2030, ofruesit e LLM-ve do të kenë vetëm 30% të tregut global prej 1.3 trilionë dollarësh për shërbimet IT të përmirësuara nga IA-ja. Pjesa tjetër do t’u përkasë zhvilluesve të softuerëve që përdorin LLM-të.

Kjo është sindroma e Kronosit. Në mitologjinë greke, Zeusi, djali më i vogël i Kronosit, mbijetoi dhe shpëtoi vëllezërit e motrat e tij. Pas një beteje të gjatë, babai i tyre u dëbua në nëntokë. Nuk është e thënë që ky të jetë fati i OpenAI apo Anthropic. Por gjithashtu, fuqia e pakufizuar e laboratorëve të IA-së nuk është e paracaktuar./ Monitor/kb

Aksi rrugor Tropojë–Valbonë është funksional. Shërbimet e Policisë dhe të mirëmbajtjes së rrugës janë në terren.

Në pjesët ku ka prezencë akulli vijon kriposja, ndërsa në një pjesë kanë filluar reshjet e shiut.

Policia Rrugore apelon drejtuesit e mjeteve të moderojnë shpejtësinë, të rrisin vigjilencën gjatë drejtimit të mjetit dhe të ndjekin udhëzimet e Policisë Rrugore.

Last Updated on 03/01/2026 by Kesjana

Viti 2025 shënoi një kthesë interesante në mënyrën si e jetojmë, e shfaqim dhe e ndajmë jetën tonë. Gjërat që dikur konsideroheshin “status”, sot duken të zakonshme, ndërsa ajo që vlerësohet gjithnjë e më shumë është qetësia, privatësia dhe natyralja. Me hyrjen në vitin 2026, disa trende duken se e kanë konsumuar ciklin e tyre dhe po mbeten pas.

Modeli i ekspozimit të vazhdueshëm online po humbet terren. Postimet e përditshme, rrëfimet personale dhe jeta “live” për publikun nuk duken më aspiruese, por të lodhshme. Shumë përdorues po zgjedhin të jenë më selektivë, ose të padukshëm.

Fundi i mani-së së shisheve gjigante

Hidratimi mbetet prioritet, por shishet voluminoze të ujit, dikur simbol i stilit “wellness”, po shihen gjithnjë e më pak si trend dhe më shumë si teprim. ChatGPT dhe mjetet e tjera të AI nuk janë më surprizë. Përkundrazi, përdorimi i tyre për detyra bazike po ngre pyetje mbi kreativitetin dhe përpjekjen personale, duke e kthyer autenticitetin në vlerë të shtuar.

Rënia e entuziazmit për injeksionet e dobësimit

Pas një viti debatesh, efektesh anësore dhe pritshmërish të paplotësuara, interesi masiv për injeksionet për humbje peshe po zbehet. Diskutimi publik po zhvendoset drejt shëndetit afatgjatë dhe jo zgjidhjeve të shpejta.

Labubu dhe objektet “must-have”

Kukullat që u shndërruan në obsesion koleksionistësh në 2025-ën po humbasin vlerën simbolike. Kur çdo gjë bëhet e aksesueshme, magjia zhduket.

Bukuria pa filtra ekstremë

Standardet e bukurisë po ndryshojnë sërish. Pamjet e stërpunuara po zëvendësohen nga tipare më reale, ndërhyrje më të lehta – ose aspak – dhe një qasje më e sinqertë ndaj trupit. 2026 duket se po nis si një vit i pastrimit, më pak trende, më shumë zgjedhje personale./kb

Last Updated on 03/01/2026 by Kesjana

Dy persona janë vrarë dhe disa të tjerë u plagosën të premten nga ortekët e dëborës në Alpet italiane. Autoritetet lokale kanë deklaruar se erërat e forta kanë penguar operacionet e shpëtimit.

Orteku i parë goditi Luginën Maira jugperëndimore të Alpeve, pranë kufirit francez në rajonin italian të Piemontes, duke vrarë një person dhe duke plagosur dy të tjerë. Një nga të plagosurit është në gjendje kritike.

Një ortek i dytë ndodhi pranë Pragelato, një vendpushim i njohur skish rreth 60 kilometra në perëndim të Torinos. Një grua që ishte bllokuar arriti të lirohej, por nuk ishte në gjendje të lëvizte për shkak të lëndimeve të saj.

Ekipet e shpëtimit po punonin për ta nxjerrë atë, me helikopterët që ishin përsëri të kufizuar për shkak të kushteve të këqija të motit. Autoritetet thanë se po monitoronin raportet për një ortek të tretë në Piemonte, por nuk u dhanë detaje menjëherë.

Ndërkohë, në rajonin verilindor italian të Venetos, një ortek në shpatin Vaio Gabene në Dolomitet e Vogla vrau një skiator 50-vjeçar, sipas medias italiane ANSA. Ekipet e shpëtimit mbërritën me helikopter në vendin ku ishte bllokuar 50-vjeçari, por nuk arritën ta shpëtonin atë. /Kb

Last Updated on 03/01/2026 by Kesjana

Duke filluar nga 1 janar 2026, ka nisur aplikimi i sistemit bonus-malus në sigurimin e detyrueshëm motorik për përgjegjësitë ndaj palëve të treta.

Sistemi bonus-malus nënkupton prime më të shtrenjta sigurimi, krahasuar me ato aktuale, për ata drejtues mjetesh që kanë shkaktuar dëme dhe prime më të ulëta për drejtuesit që nuk kanë shkaktuar dëme.

Megjithatë, sipas ekspertëve të tregut, ndryshimi do të jetë shumë më i madh në rastin e drejtuesve që kanë shkaktuar dëme (malus), ndërkohë që zbritja për drejtuesit pa histori dëmesh (bonus) pritet të jetë në përmasa modeste.

Në vitin 2024, AMF miratoi rregulloren “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit”. Kjo rregullore hyri në fuqi në 1 janar 2025, por në vitin e parë të zbatimit ndër faktorët e riskut nuk u përfshi parimi bonus-malus, duke u shtyrë për në vitin 2026.

Në përllogaritjen e primit të sigurimit, kompanitë ndjekin disa faktorë kryesorë risku, si historiku i dëmeve, përfshirë edhe rastet kur shkaktari i aksidentit nuk është i shënuar në policën e sigurimit; fuqia motorike e mjetit; mosha e të siguruarit; eksperienca në drejtimin e mjetit motorik; përdorimi i mjetit nga një subjekt apo nga një individ; qarku i regjistrimit të mjetit dhe vjetërsia e mjetit.

Aplikimi i sistemit bonus-malus është i parashikuar në ligjin “Për sigurimin e detyrueshëm në sektorin e transportit”, që ka hyrë në fuqi qysh në vitin 2021. Megjithatë, ligji e parashikon si të drejtë të kompanive të sigurimit, por jo një detyrim. Zbatimi i parimit bonus-malus u bë i mundur vetëm pas miratimit të rregullores “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit”.

Edhe me miratimin e kësaj rregulloreje, tregu i këtij produkti nuk po shfaq konkurrencë të mirëfilltë dhe primet e sigurimit janë pothuajse të njëjta në të gjitha kompanitë.

Ndarja e tregut të sigurimit të detyrueshëm motorik për përgjegjësitë ndaj palëve të treta është pothuajse e pandryshuar edhe këtë vit. Sipas informacionit nga Autoriteti i Mbikëqyrjes Financiare (AMF) për 9-mujorin 2025 tregu i këtij produkti kryesohet nga Sigal, me 20.64% të primeve të shkruara bruto, nga 20.6% që mbante një vit më parë. Ndjek Eurosig, me 15.19% (nga 15.25% një vit më parë) dhe Sigma, me 14.59% (nga 14.6% një vit më parë).

Edhe për kompanitë e tjera, ndryshimi i pjesës së tregut është i papërfillshëm krahasuar me të njëjtën periudhë të një viti më parë.

Problemi i konkurrencës në tregun e TPL-ve u ngrit edhe këtë vit gjatë raportimeve në Kuvendin e Shqipërisë nga AMF dhe Autoriteti i Konkurrencës. Deputetët nënvizuan se ngrirja e ndarjes së tregut mes kompanive për këtë produkt është një fakt që tregon qartë mungesën e konkurrencës efektive./Marrë nga Monitor.al/kb

Last Updated on 03/01/2026 by Kesjana

Dashi

Planetët do ju përkëdhelin mjaft gjate kësaj dite dhe do ju bëjnë te ndiheni me se miri. Do e shprehni pa dorashka dashurinë qe ndjeni për njeri-tjetrin. Beqaret do ndihen gati te fillojnë histori dashurie edhe pse personat nuk do ua mbushin 100% mendjen. Për financat do jete një dite goxha e favorshme. Mund te kryeni disa investime me tepër nëse dëshironi.

Demi

Asgjë e veçante nuk do ndodhe gjate kësaj dite ne jetën tuaj sentimentale. Merrini gjerat si t’iu vijnë dhe atë çfarë do ju thotë zemra. Beqaret do kenë veçse disa takime interesante, asgjë me shume sesa aq. Duhet ende edhe pak durim. Ne planin financiar mos kërkoni te pasuroheni menjëherë sepse nuk do ja dilni dot. Sakrificat mund t’iu dëmtojnë.

Binjaket

Ka rrezik qe gjerat te mos shkojnë ashtu si ju i keni ëndërruar sot ne jetën tuaj sentimentale. Nuk do ketë momente pasionante sepse partneri do jete si stresuar për një çështje pune. Beqaret gjithashtu duhet te presin edhe pak për dashurinë e madhe. Nëse kryeni shpenzime te tejskajshme financat do dobësohen tej mase. Ruajeni gjithë kohës maturinë.

Gaforrja

Jeta juaj ne çift nuk do shkoje ashtu si ju e kishit menduar gjate kësaj dite. Ndonjëherë atmosfera mund te behet mbytëse. Beqaret duhet te tregohen sa me te hapur dhe te pranojnë ftesat qe do ju bëhen. Se çfarë do bëjnë me pas e kane vete ne dore. Për financat duhet te merreni me seriozisht. Me pak maturi dhe kujdes gjendja do filloje te përmirësohet.

Luani

Do e dashuroni plot pasion personin qe keni ne krah gjate kësaj dite dhe atmosfera do behet elektrizuese. Zemra do rrahe edhe me fort. Beqaret do kalojnë një dite pozitive edhe pse dashurinë ende nuk do e gjejnë. Miqtë nuk do i lënë asnjë çast te mërziten. Ne planin financiar do keni goxha vështirësi dhe probleme. Duhet shume kujdes për t’ia dale mbanë.

Virgjeresha

Do merren vendime te mëdha gjate kësaj dite ne jetën tuaj sentimentale. Do diskutoni gjere e gjate me personin qe dashuroni dhe do bini ne një mendje. Klima yjore do jete e turbullt për ata qe janë vetëm. As sot nuk pritet te mbërrijë princi i kaltër. Financat do fillojnë dalëngadalë te përmirësohen. Do ndiheni me mire kur te kryeni ndonjë shpenzim.

Peshorja

Do kërkoni qe gjithçka te behet si doni ju gjate kësaj dite, prandaj mund te kini disa mosmarrëveshje me partnerin. Mundohuni te tregoheni sa me realiste dhe te bëni lëshime. Beqaret do mahniten nga je person dhe nuk do mendohen dy here për te filluar një lidhje. Ne fakt ky do jete një gabim. Financat do jene me te ekuilibruara se disa dite me pare.

Akrepi

Mos përfitoni nga fakti qe partneri ka shume besim tek ju për te bere gjera qe ai ne fakt nuk i dëshiron. Mund ta ktheni situatën përmbys dhe do keni probleme. Për beqaret do ketë goxha surpriza, kështu qe duhet te bëhen gati. Gjendja e te ardhurave nuk do jete aspak e mire. Nuk do i rezistoni dot tundimit për te shpenzuar pafund.

Shigjetari

Dite e qete dhe e qëndrueshme kjo e sotmja për ata qe janë ne një lidhje. Harmonia, mirëqenia dhe flegrua do mbizotërojë ne jetën e tyre. Beqaret nuk duhet te dekurajohen nëse nuk ju pranohen ftesat, por duhet ta kërkojnë diku tjetër dashurinë. Financat do jene gjithë kohës te stabilizuara. Nuk do jete problem edhe po kryet ndonjë investim me tepër.

Bricjapi

Dita e sotme do jete shume e veçante për ata qe janë ne një lidhje. Do kuptoheni mjaft mire me atë qe keni ne krah dhe do i ndreqni edhe problemet e se shkuarës. Beqaret do ndihen mire me statusin qe kane dhe nuk do e kërkojnë princin e kaltër. Nëse tregoheni te arsyeshëm me financat, gjendja do jete mjaft e ekuilibruar.

Ujori

Priten shume vështirësi gjate kësaj dite ne jetën tuaj sentimentale. Nuk do merreni vesh aspak me personin qe keni ne krah dhe kjo do sjelle debate te forta. Beqaret duhet te përfitojnë sa te mundin nga ftesat qe do ju bëhen, jo t’i neglizhojnë ato. Financat do jene ne gjendje te qëndrueshme, por nuk duhet te kryeni çmenduri me shpenzimet.

Peshqit

Marsi nuk do krijoje me probleme gjate kësaj dite ne jetën tuaj sentimentale, kështu qe mund te dashuroheni ashtu si ta ndjeni. Beqaret me mire te mos bëjnë plane ne mënyrë qe te mos zhgënjehen me vone. Pritet te ketë disa takime te rëndësishme gjithsesi. Ne planin financiar nuk duhet te nxitoheni për asgjë. Vetëm ndihme e specialisteve mund t’iu shpëtojë./kb

Si pasojë e reshjeve të shiut të shoqëruara me ngrica, në Rrugën e Kombit janë krijuar vështirësi në qarkullimin e automjeteve. Për shkak të kushteve të pafavorshme atmosferike, janë regjistruar tre aksidente rrugore, ku janë përfshirë rreth 15 automjete, mes tyre një mikrobus dhe një autoambulancë e koncesionarit.

Si pasojë e aksidenteve, janë dëmtuar gjashtë persona, të cilët kanë marrë ndihmën e nevojshme mjekësore në spitalin e Rrëshenit dhe ndodhen jashtë rrezikut për jetën.
Ndërkohë, në terren kanë ndërhyrë shërbimet e Policisë Rrugore dhe punonjësit e kompanisë së mirëmbajtjes, të cilët po hedhin kripë në segmentet problematike për të normalizuar qarkullimin. Autoritetet u bëjnë thirrje drejtuesve të mjeteve të lëvizin me kujdes, të respektojnë sinjalistikën rrugore dhe të përshtatin shpejtësinë me kushtet e motit./kb

Paga e plotë e presidentes së Bankës Qendrore Evropiane, Christine Lagarde, është 50 për qind më e lartë se paga e saj e deklaruar. Kështu bëjnë me dije burime ekskluzive për prestigjiozen analize të Financial Times.

Kreu i autoritetit monetar të Evropës fitoi gjithsej rreth 726,000 euro në vitin 2024, sipas llogaritjeve të FT, rreth 56 për qind më e lartë se paga “bazë” prej 466,000 eurosh e zbuluar nga BQE në raportin e saj vjetor.

Kjo do të thotë që znj. Lagarde fiton gati katër herë më shumë se kryetari i Rezervës Federale të SHBA-së, Jay Poëell, paga e të cilit përcaktohet nga ligji federal i SHBA-së dhe aktualisht është e kufizuar në 203,000 dollarë (172,720 euro).

Ndërsa paga e plotë e znj. Lagarde është modeste krahasuar me drejtuesit ekzekutivë të kompanive të mëdha të BE-së, analiza ekspozon se sa i kufizuar mbetet zbulimi i pagave në BQE. Banka qendrore nuk i nënshtrohet të njëjtave rregullave të rrepta si kompanitë e listuara në bllok, të cilat diktojnë se ato duhet të japin një “pamje të plotë dhe të besueshme të shpërblimit” të secilit prej drejtorëve të tyre.

Fabio De Masi, eurodeputet dhe kryetar i partisë së majtë populiste gjermane BSË, tha se ishte “skandaloze” që drejtori ekzekutiv i Deutsche Bank, Christian Seëing, “i ofron publikut informacion më të detajuar në lidhje me pagën e tij sesa Madame Lagarde”. Seëing fitoi 9.8 milionë euro në vitin 2024.

De Masi i kërkoi BQE-së të miratojë një standard të ngjashëm me ligjet evropiane të deklarimit të pagave për kompanitë e listuara në bursë. “Presidenti i BQE-së dhe zyrtari më i paguar i BE-së duhet të përfaqësojë standardin e artë të llogaridhënies”, tha ai. Vetëm paga bazë e znj. Lagarde e bën atë zyrtaren më të paguar në BE. Paga bazë vjetore e presidentes së Komisionit Evropian, Ursula von der Leyen, është 21 përqind më e ulët.

Përveç pagës së saj bazë, znj. Lagarde merr rreth 135,000 euro përfitime shtesë për strehim dhe çështje të tjera, sipas analizës së FT. Raporti vjetor i BQE-së nuk ofron deklarim individual të përfitimeve shtesë të anëtarëve të bordit ekzekutiv.

Znj. Lagarde gjithashtu fiton rreth 125,000 euro për pozicionin e saj si një nga 18 anëtarët e bordit të drejtorëve të Bankës për Zgjidhje Ndërkombëtare – e njohur si “banka për bankat qendrore”. Raporti vjetor i BQE-së nuk i referohet pagës së Lagarde në BIS. Vetë BIS zbulon vetëm pagat totale për të gjithë anëtarët e bordit të saj./kb

Për të pestën ditë radhazi, protesta masive kanë shpërthyer në Iran kundër regjimit autoritar, mes një krize të thellë ekonomike që po godet vendin. Turma njerëzish kanë dalë në rrugë në disa qytete, ndërsa dëshmitarë raportojnë prani të shtuar të forcave të sigurisë. Shteti është përpjekur të shtypë demonstratat, veçanërisht në zonat rurale, ku përleshjet kanë qenë më të ashpra.

Deri tani raportohet për të paktën shtatë viktima gjatë protestave. Protesta dhe përleshje janë shënuar edhe në provincat Fars, Kermanshah dhe Chahar Mahal, ku qytetarët u përballën me njësi paraushtarake dhe mjete të blinduara. Demonstratat nisën pas rënies së fortë të monedhës, fillimisht nga tregtarët në Teheran dhe më pas u përhapën në të gjithë vendin, të mbështetura edhe nga studentët. Ndërkohë, presidenti amerikan Donald Trump tha se Shtetet e Bashkuara do të ndërhyjnë nëse Irani qëllon dhe vret protestuesit që demonstrojnë kundër përkeqësimit të kushteve ekonomike në vend.
“Nëse Irani qëllon dhe vret me dhunë protestuesit paqësorë, gjë që është zakon i tyre, Shtetet e Bashkuara të Amerikës do t’i ndihmojnë. Jemi të armatosur dhe gati për të filluar. Faleminderit për vëmendjen tuaj ndaj kësaj çështjeje! President DONALD J.TRUMP”, tha ai./kb

Musée d’Art Moderne (MAM) në Paris ka marrë një dhuratë shumë të rrallë dhe me vlerë të jashtëzakonshme: 61 vepra origjinale të piktorit të famshëm Henri Matisse. Këto vepra janë mbajtur për shumë vite nga familja e artistit dhe tani do të jenë të hapura për publikun e gjerë.

Në këtë koleksion përfshihen piktura, vizatime, gravura, litografi dhe një skulpturë. Shumica e veprave paraqesin vajzën e Matisse, Marguerite, e cila ishte personi më i afërt me të dhe modeli i tij i preferuar gjatë gjithë jetës.

Dhurimi u bë nga Barbara Dauphin Duthuit, bashkëshortja e nipit të Matisse, Claude Duthuit, i cili vdiq në vitin 2011 në Nju Jork. Një pjesë e këtyre veprave ishte ekspozuar vitin e kaluar në MAM, në ekspozitën “Matisse dhe Marguerite”. Megjithatë, vendimi që veprat të mbeteshin përgjithmonë në muze ishte një surprizë e madhe për drejtuesit e institucionit.

Familja e Matisse ka dhuruar edhe më parë vepra të rëndësishme. Në vitin 2013, Barbara Dauphin Duthuit i dhuroi Qendrës Pompidou portretin e njohur “Marguerite me një mace të zezë”, një nga veprat më të famshme të artistit.

Marguerite Matisse ka pasur një jetë të vështirë, por shumë të guximshme. Ajo lindi nga një lidhje e Matisse me një modele, por artisti e njohu si vajzën e tij dhe e rriti së bashku me familjen. Që e vogël u sëmur rëndë nga difteria dhe iu nënshtrua një operacioni urgjent, i cili i la një shenjë në qafë. Për shumë vite, ajo e fshihte këtë shenjë me rroba me jakë të lartë ose me fjongo, siç shihet edhe në portretet e babait të saj.

Gjatë Luftës së Dytë Botërore, edhe pse me shëndet të dobët, Marguerite iu bashkua Rezistencës Franceze. Ajo u arrestua, u torturua nga Gestapoja dhe rrezikoi të dërgohej në kampet naziste të përqendrimit, por arriti të mbijetojë.

Pas luftës, Marguerite hoqi dorë nga piktura për t’ju përkushtuar plotësisht babait të saj. Ajo u bë ndihmësja dhe përfaqësuesja e tij, duke qëndruar pranë tij deri në vdekjen e Matisse në vitin 1954. Edhe më pas, ajo vazhdoi të merrej me dokumentimin dhe ruajtjen e veprave të tij deri në vdekjen e saj në Paris, në vitin 1982.

Henri Matisse ishte një artist që preferonte t’i mbante veprat brenda familjes dhe jo t’i shiste. Për këtë arsye, ky dhurim konsiderohet shumë i rëndësishëm dhe i rrallë. Me këtë dhuratë, 61 veprat e reja do t’i shtohen 20 veprave të Matisse që muzeu kishte tashmë në koleksionin e tij.

Drejtori i Musée d’Art Moderne, Fabrice Hergott, tha se portretet e Marguerite janë “shumë të bukura dhe prekëse”, duke shtuar se ky gjest bujar e kthen muzeun në “shtëpinë e re të Marguerite-s për shumë breza në të ardhmen”.

Henri Matisse (1869–1954) ishte një nga piktorët më të mëdhenj të artit modern dhe një figurë kryesore e fovizmit. Vajza e tij, Marguerite Matisse, ishte muza dhe bashkëpunëtorja e tij më e afërt, duke luajtur një rol të rëndësishëm në ruajtjen e trashëgimisë së tij artistike./kb

Viti 2025 shënoi përparimin më të madh të Shqipërisë në rrugën e anëtarësimit drejt BE-së duke ecur me një ritëm të shpejtë se më parë në procesin e negociatave të anëtarësimit, me hapjen e të gjashtë grup kapitujve të negociatave në pak më shumë se një vit.

Në muajin prill u mbajt konferenca e katërt ndërqeveritare.

“Sot sigurisht është një ditë shumë e mirë për ne, sepse kemi një tjetër konferencë dhe çelim kapituj të tjerë. Jemi tej mase të përkushtuar për të përmbushur të gjitha detyrat e kalendarit që është shumë ambicioz për të mbyllur të gjitha negociatat brenda vitit 2027”, u shpreh Rama.

“Është vërtet inkurajuese të shikosh progresin që ka bërë Shqipëria në këtë rrugëtim. Sot ne po çelim një tjetër grup kapitull dhe ambicia jonë është që të hapim edhe grup kapituj të tjerë që janë për t’u negociuar gjatë këtij viti sepse kemi një kalendar të qartë dhe unë mendoj se do ta realizojmë sepse kjo është diçka e rëndësishme për Shqipërinë. Por, mendoj se kjo është një shenjë e mirë edhe për rajonin sepse mënyra më e mirë për mirëqënie, paqe dhe stabilitet në Ballkanin Perëndimor është me BE dhe integrimi në të”, tha Antonio Costa.

Në maj u mbajt konferenca e pestë.

“Jam shumë krenar sepse ky është një nga ato gurë themele që mund t’i mbulojë llumi i kënetës së politikës së përditshme, por historia i kujton dhe i mban parasysh si momente të shtet-bërjes. Patjetër që nuk jam i kënaqur, jam shumë krenar, ne do vazhdojmë ta mbështesim fuqimisht këtë proces të barazisë para ligjit dhe aleanca me BE është një garanci absolute për këtë”, tha Rama.

“Unë e kuptoj se qytetarët shqiptarë e kanë dhënë mbështetjen e tyre për anëtarësimin e vendit në BE. Për këtë duhen reforma të vështira që kërkojnë mbështetjen e të gjithëve në shoqëri. Duhen jo thjesht reforma, por edhe zbatimi i tyre në praktikë, gjë që kërkon mbështetje të plotë edhe të partive politike”, u shpreh Kaja Kallas.

Në muajin shtator të këtij viti u mbajt konferenca e gjashtë ndërqeveritare Shqipëri-BE.

“Shpejtësia e Shqipërisë me reformat është mbresëlënëse. Ky është rezultat i punës së autoriteteve shqiptare që kanë çuar para reforma”, u shpreh Marta Kos.

Në progres-raportin e këtij viti, Komisioni i drejtuar nga Ursula Von Der Leyen e konsideroi qëllimin e qeverisë shqiptare për të përfunduar negociatat në vitin 2027 dhe anëtarësimin e plotë në Bashkimin Evropian në vitin 2030 si një objektiv ambicioz, nëse ky shtet ballkanik e ruan vrullin e reformave.

“Shqipëria është në rrugën e duhur drejt BE. Ju keni bërë rrugë të gjatë, progres, por unë dua të theksoj se është një progres i mrekullueshëm, shpejtësi rekord dhe përshpejtimi i vërtetë në tre vitet e fundit. Qëllimi është mbyllja e negociatave brenda 2027. Na pëlqen ambicia dhe ne jemi të gatshëm me ju në çdo hap”, u shpreh Von Der Leyen.

“Unë, jo e besoj, por e kam bindje absolute që është në dorën tonë që ne të arrijmë objektivin e 2027-ës sepse kam bindjen absolute që Presidentja nuk lëviz nga pozicioni i saj, që nuk është pozicioni i sotëm, por është pozicioni i ditës 1 që kur është zgjedhur herën e parë dhe në twitt-in e parë që ka bërë si Presidente e Komisionit e sapozgjedhur, ka shkruar ‘Ky është një komision gjeopolitik’”, tha Rama.

Më 16 maj të këtij viti, Tirana u bë mikpritëse e mbledhjes së komunitetit politik evropian, një shtysë kjo drejt integrimit të plotë në familjen evropiane të shteteve kandidate.

“Me rëndësi të veçantë që ne kemi për herë të parë këtë samit të komunitetit politik evropian këtu në Tiranë, për të dëshmuar se zgjerimi është një proces win-win, si për shtetet ballkanike, edhe për ato anëtare të BE-së”, u shpreh Roberta Metsola.

“Shqipëria 2030 në BE” ishte slogani i partisë së Ramës në zgjedhjet parlamentare të 11 majit, të cilat ai i fitoi bindshëm. Pas konfirmimit të Qeverisë së re më 18 shtator në Kuvend, Rama deklaroi se ky slogan do të mbetet kryefjala e mandatit të tij të katërt radhazi.

“Unë nuk jam këtu sot për të kryer një formalitet votëbesimi të qeverisë së re, me mbështetjen aritmetike të një shumice të pazakonshme në sallë, e dua t’i them pikërisht shumicës se jo një mandat po vite të tëra politike nuk mund të mjaftojnë për të shpërblyer besimin e jashtëzakonshëm që shqiptarët na dhanë këtë herë”, tha Rama.

Jo vetëm meritat në reforma, por vullneti politik i shteteve anëtare, si dhe situata gjeostrategjike, kanë ndihmuar që Shqipëria të përparojë drejt BE-së.

Reforma në drejtësi, me vetingun e gjyqtarëve dhe prokurorëve, si dhe disa goditje ndaj korrupsionit në nivel të lartë, kanë ripërcaktuar pozicionin ndërkombëtar të Shqipërisë.

Kjo reformë, me ngritjen e SPAK-ut, BKH-së dhe GJKKO-së, ka sjellë si risi rënien e kulturës së mosndëshkimit në nivele të larta, me arrestimin e ish-presidentit Meta, ish-kryebashkiakut Veliaj, mbajtjen në disa muaj arrest shtëpie të ish-presidentit Berisha.

Në momentin kur SPAK-u do të ketë pengesa politike në punën e tij, do të ndalet edhe progresi i Shqipërisë drejt BE-së.

Shqipëria nuk përballet me çështje të mëdha rajonale ose fqinjësore të llojit që kanë penguar kandidatët e tjerë të Ballkanit Perëndimor.

Besohet se përparimi i Shqipërisë drejt BE-së është premtues, por i brishtë, pasi qëndrueshmëria e saj do të varet nga reformat e sinqerta, uniteti politik dhe menaxhimi i kujdesshëm i marrëdhënieve dypalëshe.

“Është mirë që disa ligje në Parlament janë miratuar edhe nga opozita në bashkëpunim me qeverinë. Mendoj se kjo është ajo që Evropa dëshiron të shohë, konsensusin politik. Të gjithë duhet të jenë në një linjë në përmbushjen e reformave të integrimit, pavarësisht nëse janë socialistë apo demokratë, apo nga partitë e tjera, në mënyrë që vendi të anëtarësohet sa më shpejt në BE. Evropa nuk është e interesuar për thashetheme, por jemi të interesuar për diskutime konkrete konstruktive mes qeverisë dhe opozitës”, u shpreh Andreas Schieder, raporter për Shqipërinë në PE.

“Unë e di që ekziston një projekt për ta rishikuar ligjin zgjedhor me komisionin që është ngritur me votë unanime të Parlamentit dhe që duhet të shkojë në drejtimin e duhur, të zbatimit të rekomandimeve që vijnë nga OSBE-ODIHR dhe nga BE”, u shpreh Marco Tarquinio, kryetar i komitetit Shqipëri-PE.

“Opozita nuk ka qenë ndonjëherë kundërshtuese e procesit të integrimit. Çdo gjë që kemi pasur në dorë, në Parlament e kemi kaluar. Nëse ka një përgjegjës për ngecjen e këtij procesi, por edhe për mungesën e një debati publik, kjo është mazhoranca”, u shpreh Jorida Tabaku.

“Sigurisht që integrimi, kryesorja është objektivi strategjik i Shqipërisë dhe patjetër që dialogu mes pozitës dhe opozitës është thelbësor jo vetëm për të bindur partnerët tanë evropianë por edhe për veten tonë, për të arritur reformat”, u shpreh Romina Kuko.

Në muajt e parë të vitit 2026, Shqipëria kërkon që të sigurojë një Raport pozitiv Vlerësimi të Përkohshëm të Standardeve (IBAR) mbi kapitujt kryesorë themelorë – 23 (Gjyqësori dhe të Drejtat Themelore) dhe 24 (Drejtësia, Liria dhe Siguria).

Ky hap do të hapte rrugën për mbylljen e kapitujve të parë të negociatave. Ky do të jetë gjithashtu testi i parë i aftësisë së qeverisë Rama për të përmbushur standarde të shumta dhe për të filluar zbatimin e reformave sektoriale./kb

Lura është një pikat turistike më të bukura në vend, por që prej kohësh ishte lënë në harresë, për shkak të mungesës së infrastrukturës së nevojshme.

Kryeministri Edi Rama ka publikuar sot në 2 janar 2025, pamje në rrjetet sociale, ku shihet se po bëhen punime për në rrugën turistike, që të dërgon në Lurë. Rama shprehet se Lura magjike do të jetë së shpejti e arritshme, pasi po bëhet rruga turistike, që të dërgon në këtë destinacion.

Kreu i qeverisë thotë se është hedhur shtresa e parë e asfaltit në segmentin Peshkopi-Lurë dhe se po vazhdon puna mbi segmentin Lurë-Rrëshen.
“Së shpejti edhe Lura magjike do të jetë e arritshme përmes rrugës së re turistike, ku është hedhur shtresa e parë e asfaltit mbi segmentin Peshkopi – Lurë dhe po vazhdon puna mbi segmentin Lurë- Rrëshen”, shkruan Rama./kb

Drejtori i Përgjithshëm i Policisë së Shtetit, Drejtues Madhor Ilir Proda, përgëzon strukturat hetimore të DVP Shkodër për zbardhjen e vrasjes me lëndë eksplozive të komanduar në distancë dhe për bashkëpunimin dhe koordinimin mjaft efikas me Prokurorinë e Shkodrës.

“Falënderoj dhe përgëzoj publikisht Drejtorinë Vendore të Policisë Shkodër, strukturat hetimore dhe të gjitha forcat e angazhuara, si dhe Prokurorinë, për bashkëpunimin e ngushtë dhe profesional që çoi në zbardhjen e një ngjarjeje të rëndë kriminale, të kryer me përdorimin e lëndës eksplozive të komanduar në distancë.

Ky është një nga rastet ku pasqyrohet puna serioze dhe profesionale, e koordinuar dhe këmbëngulëse e Policisë së Shtetit, në bashkëpunim të plotë me organin e akuzës.

Këto rezultate dekurajojnë veprimtarinë kriminale dhe forcojnë më tej besimin e qytetarëve te Policia e Shtetit, e cila do të vijojë të jetë e vendosur në misionin e saj për garantimin e rendit, sigurisë, jetës, dhe pronës së qytetarëve.”, tha Proda./kb

Aksioni i opozitës në vitin 2026 do të përshkallëzohet. Këtë pohon deputeti demokrat Klevis Balliu në një intervistë për A2CNN, ku nuk përjashton as grevën e urisë dhe as ngujimin si në Kuvend por edhe në sheshe.

“Asgjë nuk përjashtohet, por mendoj se duhet të merremi me qeverinë në një format ballor. Nuk përjashtohet as ngujimi dhe asgjë tjetër në aksionin tonë. Më së shumti mendoj se fokusi duhet të jetë në formë proteste afatgjatë, deri në arritjen e qëllimit. Qëllimi tashmë është i qartë, Edi Rama të japë dorëheqjen dhe t’i hapet rrugë një qeverie teknike apo tranzitore”.

Shefi i Organizimit në Partinë Demokratike tregon edhe arsyet se përse do të organizojnë protesta përgjatë vitit 2026.
“Vendi tanimë është i destabilizuar. Ne kemi kryetarin e bashkisë së kryeqytetit në burg dhe Tirana qeveriset nga burgu. Ne kemi sot zëvendës kryeministren, ministren e energjetikës dhe transportit, numrin 2 të qeverisë, njeriun më të afërt të Edi Ramës, e cila është kapur në flagrancë duke vjedhur për hir të vërtetës në emër të Edi Ramës. Në një dosje ku është vetë kryeministri i përfshirë dhe ai po bën të gjitha përpjekjet për ta mbrojtur atë. Dhe e treta, çka është edhe më e rëndë është fakti tronditës i aferës së AKSHI-it, ku doli në pah bashkëpunimi i krimit të organizuar me politikën.  Në veçanti i Ergys Agasit, koordinatorit të Edi Ramës me krimin e organizuar”, tha për deputeti demokrat Klevis Balliu.

Sipas Balliut detajet e zbuluara nga dosjet e SPAK deri më tani janë maja e ajsbergut, duke paralajmëruar prova të reja më të rënda për zyrtarët por edhe për eksponentët e krimit.

“Mund t’u them me plot gojën që ka prova të tjera shumë herë më të forta se këto, shpresoj që të dalin shumë shpejt. Burimet thonë që ka foto, ka video të tjera shumë specifike, në këtë kontekst shteti ka rënë, pasi kur bie siguria kombëtare ka rënë edhe shtetit”, shprehet Klevis Balliu.

Përveç protestës në bulevard, demokratët tentuan të shkonin edhe në banesën e kreut të qeverisë në Surrel. Balliu nuk mohon që një aksion i tillë por në përmasa më të mëdha të përsëritet në javët në vijim.

“Edi Rama ka përzënë shqiptarët nga shtëpitë e tyre dhe me afera korruptive ka ndërtuar atë banesë 6 mijë metra katrorë. Ajo është një banesë e ndërtuar me djersën e shqiptarëve dhe shqiptarët nëse vendosin të shkojnë, shkojnë në pronat e vjedhura nga Edi Rama. Dhe në këtë aspekt, Edi Rama e ka personalizuar betejën me shqiptarët”, thekson deputeti demokrat.

Partia Demokratike e mbështetur edhe nga aleatët ka organizuar 6 foltore përballë Kryeministrisë dhe një protestë kombëtarë përgjatë këtij viti./kb

Në pikën e kalimit kufitar të Muriqanit në fillim të muajit janar, është shënuar fluks lëvizjesh në dalje. Emigrantët shqiptarë, pas festave të fundvitit, po rikthehen drejt vendeve ku jetojnë dhe punojnë, duke krijuar radhë të shtuara, por të përballueshme.

Për të menaxhuar situatën dhe për të shmangur vonesat, autoritetet kufitare po punojnë me 4 sportele në total, ku 3 sportele janë të dedikuara për dalje dhe 1 sportel për hyrje.
Sipas të dhënave zyrtare nga Pika e Kalimit Kufitar Muriqan, në 24 orët e fundit kanë hyrë 1926 shtetas ndërsa kanë dalë 3392 shtetas, duke e çuar numrin total të lëvizjeve në 5318 persona. Ndërkohë kanë hyrë 717 mjete dhe kanë dalë 1205, me një total prej 1922 mjetesh./kb

Presidenti amerikan Donald Trump tha se gjendja e tij shëndetësore është perfekte dhe merr një dozë më të lartë të aspirinës, sesa rekomandojnë mjekët.

Ai tha se përdor make-up për të fshehur mavijosjet në duar dhe nuk bën ushtrime të rregullta, sepse i duket e mërzitshme. Trump, 79 vjeç, është presidenti më i moshuar i zgjedhur në historinë e SHBA-ve dhe shenjat e moshës janë të dukshme.

Trump tha se merr 325 mg aspirina çdo ditë, krahasuar me 81 mg që rekomandojnë disa mjekë. Ai pranoi se aspirina e bën të mavijoset më lehtë, por nuk dëshiron të ndryshojë rutinën.

Mjeku i tij, Kapiteni i Marinës Sean Barbaella, konfirmoi se skanimi nuk tregoi asnjë problem kardiovaskular. Trump ka një gjendje të zakonshme venoze kronike dhe i ishte sugjeruar të vishte çorape kompresive, por ai refuzoi. Ai tha se ngrihet më shpesh nga tryeza, gjë që ka reduktuar ënjtjen në këmbë.

Presidenti pranoi se nuk bën ushtrime të rregullta përveç golfit, sepse këto i duken “të mërzitshme”. Ai mohoi se ka fjetur gjatë takimeve dhe tha se përdor make-up, vetëm kur duart i dëmtohen.

Mjeku Barbaella vlerësoi se Trump është në shëndet të jashtëzakonshëm dhe plotësisht i aftë për të kryer detyrat e tij si president. /BBC/Kb

Last Updated on 02/01/2026 by Kesjana

Bullgaria ka adoptuar euro-n si monedhën zyrtare më 1 janar 2026, duke zëvendësuar levën bullgare dhe duke u bërë shteti i 21-të në zonën e euros.

Presidenti Rumen Radev, në mesazhin e tij për Vitin e Ri, e quajti futjen e euros “pikën kulmore finale në integrimin e Bullgarisë në Bashkimin Evropian – një vend që ne e meritojmë me arritjet e kulturës sonë mijëvjeçare dhe kontributin civilizues të vendit tonë”.

Guvernatori i Bankës Qendrore Bullgare, Dimitar Radev, mori vendin e tij në Këshillin Drejtues të Bankës Qendrore Evropiane (BQE).

Presidentja e BQE-së, Christine Lagarde, deklaroi se “e mirëpres ngrohtësisht Bullgarinë në familjen e euros dhe guvernatorin Radev në tryezën e Këshillit Drejtues të BQE-së në Frankfurt”.

Për rreth një muaj (deri në fund të janarit ose shkurtit 2026, sipas burimeve), qytetarët mund të paguajnë me leva, por kusuri do të jetë vetëm në euro./kb

Last Updated on 02/01/2026 by Kesjana

Vajza e liderit të Koresë së Veriut, Kim Jong-un, që besohet se po përgatitet si pasardhëse e tij, u shfaq për herë të parë publikisht duke vizituar mausoleumin shtetëror Kumsusan, për të nderuar udhëheqësit e mëparshëm.

Fotot nga agjencia shtetërore KCNA treguan Kim Jong-unin, gruan e tij Ri Sol-ju dhe zyrtarë të lartë pranë Ju-ae, e cila qëndronte midis prindërve në sallën kryesore të Pallatit të Diellit Kumsusan. Lideri koreanoverior viziton këtë mausoleum për të nderuar gjyshin e tij, themeluesin Kim Il-sung, dhe babain Kim Jong-il, në ditë të rëndësishme dhe përvjetore shtetërore.

Sipas Hong Min, ekspert i Koresë së Veriut, shteti po përpiqet të tregojë një imazh të familjes së qëndrueshme, duke shfaqur gruan dhe vajzën pranë Kim Jong-un në evente publike. Megjithatë, fëmijët e tjerë të Kim-it lënë vend për të mos marrë vendime të nxituara për Ju-ae si pasardhëse. Ekspertët thonë se është e pamundur të emërohet publikisht Kim Ju-ae si pasardhëse, e cila besohet se sapo ka mbushur 13 vjeçe. Ajo nuk ka moshën e duhur për t’u bërë anëtare e partisë në pushtet./kb