Europa duket se po i vlerëson talentet shqiptare, teksa po jep gjithnjë e më shumë karta blu, që është një leje pune dhe qëndrimi për persona me kualifikime të larta nga vendet jo anëtare të Bashkimit Europian (BE).

Eurostat raportoi se që nga viti 2014 janë dhënë gjithsej 5405 karta blu për shtetasit shqiptarë. Rritja ka qenë e fortë nga viti 2019, kur nisi dhe një cikël masiv emigracioni, po këtë herë i personave me kualifikim të lartë.

Në vitin 2023 u dhanë 825 karta, ndërsa në 2024-n, ra në 592. Në krahasim me vitet e mëparshme rritja është e fortë. Në vitin 2012 ishin dhënë vetëm 15 karta të tilla, ndërsa në 2021-n, që është rekordi i deritanishëm, shifra arriti në 882.

Rritja e dhënies së kartës blu për shqiptarët ka ardhur për shkak të hyrjes në lojë të Gjermanisë. Në vitin 2021 ky shtet dha 823 karta blu për shtetasit shqiptarë, ose 93% të totalit të shteteve të BE-së. Në 2023-n u dhanë 716 leje, ose 87% e totalit dhe në 2024-n numri i tyre zbriti në 513, ose 87% e totalit. Ata që kanë përfituar këtë kartë në Gjermani paguhen me të paktë 43 mijë euro në vit (rreth 3,600 euro në muaj), që është dhe kriteri minimal për të aplikuar për kartë blu.

Në vend të dytë për kartat blu është Italia, por me nivele shumë më të ulëta në raport me Gjermaninë (23 në 2022, 41 në 2023 dhe 20 në 2024-n). Pas saj renditet Austria (11 në 2022, 30 në 2023 dhe 18 në 2024-n). një shtet tjetër që po tërheq talentet shqiptare është dhe Polonia, që dha 11 karta blu për shtetas shqiptarë në 2023-n dhe 13 në 2024-n.

Gjermania ka qenë vitet e fundit një magnet për profesionistët nga Shqipëria, kryesisht nga fusha e teknologjisë së informacionit dhe mjekësisë, që u nxitën të punonin në ekonominë më të madhe të Europës, të joshur nga pagat e larta dhe zbutja e kritereve në shtetin që po vuante mungesën e fuqisë punëtore si rrjedhojë e plakjes së popullsisë.

Ndërsa talentet largohen, Shqipëria po e ndjen gjithnjë e më shumë ikjen e tyre. Raporti i fundit i Bankës Europiane për Rindërtim dhe Zhvillim (BERZH) “Një botë e vjetër, por më e guximshme”, tregon se rreth 23% e të arsimuarve nga vendi ynë tashmë kanë emigruar.

Shqipëria ka nivel të lartë të emigracionit në popullsinë e arsimuar në vitet 2023-2024 dhe kthime shumë më të ulëta të tyre krahasuar me 38 vende të Rajonit të BERZH.

Raporti i BERZH me fokus tek emigrimi: një e katërta e shqiptarëve me arsim të lartë janë larguar

Edhe në Indeksin Global të Konkurrueshmërisë së Talenteve 2025, vendi ka rënë me 7 pozicione, në vendin e 63-të, duke treguar përkeqësim në zhvillimin e aftësive, cilësinë e arsimit dhe mbajtjen e profesionistëve.

Shqipëria nuk i mban dot talentet, përkeqësohet në indeksin global

Kartat blu në BE

Sipas të dhënave më të fundit të disponueshme nga Eurostat, në vitin 2023 u dhanë rreth 89 mijë Karta Blu në nivel BE-je dhe struktura e shpërndarjes mbeti e përqendruar në disa shtete kryesore.

Gjermania mbeti vendi dominues, duke lëshuar rreth 69 mijë leje, ose rreth 78% të totalit, e ndjekur nga Polonia me rreth 7 mijë dhe Franca me rreth 4 mijë.

Për sa i përket shtetësive përfituese, shtetasit e Indisë vijuan të jenë përfituesit kryesorë të Kartës Blu, të ndjekur nga shtetas nga Rusia, Turqia dhe Bjellorusia, duke reflektuar kërkesën e lartë të tregut europian për profesionistë në sektorë teknikë dhe me kualifikim të lartë.

Çfarë është Karta blu

Karta Blu e BE-së është një leje pune dhe qëndrimi që u jepet shtetasve jo të Bashkimit Europian me kualifikime të larta profesionale, për të punuar në një vend anëtar të BE-së.

Ajo synon të tërheqë specialistë të huaj në profesione të kërkuara, duke u ofruar atyre kushte të favorshme pune, përfshirë të drejtën e qëndrimit familjar, mobilitet brenda BE-së dhe mundësi për qëndrim afatgjatë. Karta Blu jepet mbi bazën e një kontrate pune me pagë minimale të përcaktuar dhe kualifikime universitare.

Për të përfituar nga Karta Blu e BE-së, aplikantët duhet të plotësojnë një prag minimal page, i cili ndryshon sipas vendit anëtar dhe sektorit të punës. Këto pragje përcaktohen nga autoritetet kombëtare dhe zakonisht përfaqësojnë një përqindje të caktuar të pagës mesatare bruto në vendin përkatës. Për shembull, në Gjermani për vitin 2025, paga minimale vjetore bruto për Kartën Blu është 48,300 euro për profesionet e përgjithshme dhe 43,759.80 euro për profesionet me mungesë të theksuar, si IT, inxhinieri dhe kujdes shëndetësor.

Profesionet me prioritet të lartë për Kartën Blu të BE-së janë Teknologjia e Informacionit dhe Komunikimit (TIK); Inxhinieri; Mjekësi dhe kujdes shëndetësor; Shkencat natyrore dhe matematika;  Arsimi i lartë dhe kërkimi shkencor; Financa dhe kontabiliteti.

Burimi: Eurostat

The post Talentet po i merr Europa, dha 5400 karta blu për shqiptarët në dekadën e fundit, rekord Gjermania appeared first on Revista Monitor.

Komisioni i Prokurimit Publik ka vendosur të mos heqë pezullimin për procedurën “Mirëmbajtje e Modulit të Menaxhimit të Kontrollit të Faturimit për Drejtorinë e Përgjithshme të Tatimeve” për shkak të mosplotësimit të gjithë kërkesave nga ana e autoritetit kontraktor.

Në një vendim më të hershëm KPP kërkoi që të bëheshin një sërë ndryshimesh të cilat duhet të reflektoheshin në sistem për procedurën që ka një fond limit 7.7 mln euro dhe që ka për autoritet Agjencinë Kombëtaret ë Shoqërisë së Informacionit.

Ankesa e një prej operatorëve e vendosi sërish këtë procedurë nën pezullim, duke e zgjatur afatin për marrjen e këtij shërbimi ndërkohë që ajo është çelur nga prilli i vitit të shkuar. Në shqyrtimin e kësaj ankese KPP vendosi që pezullimi të mbetet dhe autoriteti të mos vijojë me hapat e tjerë të procedurës. Ndryshe nga kjo procedurë KPP ka rrezuar ankimimin për një tjetër procedurë që lidhej me internetin e institucioneve.

Tenderët që lidhen me teknologjinë dhe informacionin janë kthyer në një nga ngërçet e shumta të prokurimit duke rrezikuar në disa raste edhe mos marrjen në kohë të shërbimeve apo duke i kushtuar shtrenjtë autoriteteve për shkak të masave emergjente që shihen të nevojshme për të vijuar shërbimin.

Një nga këto probleme duket se ka prekur edhe sistemin e Self Care të Tatimeve që është prej javësh tani në pamundësi për të ofruar shërbim të vazhdueshëm për bizneset, ankesë që lakohet thuajse çdo ditë prej tyre.

Dobësitë teknike që shembën e-albania

Tenderi për sistemin e fiskalizimit

Tenderi me objekt kontrate Mirëmbajtje e Modulit te Menaxhimit te Kontrollit te Faturimit per Drejtorinë e Përgjithshme te Tatimeve u hap në prill të këtij viti. Sipas dokumenteve që shoqërojnë procedurën, qëllimi kryesor i këtij projekti është mirëmbajtja e sistemit të Menaxhimit të Kontrollit të Faturimit (sistemi i fiskalizimit) për Drejtorinë e Përgjithshme të Tatimeve për një periudhë prej 24 muajsh.

“Qëllimi është garantimi i funksionimit të plotë të sistemit elektronik, në të gjithë komponentët e tij: softuer dhe pajisje fizike (hardware). Ky sistem është i hostuar në Qendrën e të Dhënave Qeveritare, pranë Agjencisë Kombëtare të Shoqërisë së Informacionit (AKSHI), dhe ofron shërbime për rreth 125 mijë tatimpagues, si dhe për vetë administratën tatimore”, thuhet në dokumente.

Në dokumentacion theksohet se disponueshmëria e sistemit të fiskalizimit është shumë e rëndësishme. Shërbimi i fiskalizimit dhe portali i tatimpaguesve (SelfCare) nuk mund të pësojnë ndërprerje për më shumë se disa minuta dhe nuk tolerohen ndërprerje të planifikuara për qëllime përditësimi (upgrade, update) apo modifikime të tjera.

“Shërbimet e ofruara për tatimpaguesit (fiskalizimi, verifikimi i faturave, pranimi/refuzimi i tyre, etj.), si dhe për administratën tatimore, duhet të jenë funksionale 24 orë në ditë, 7 ditë në javë,” theksohet më tej.

Aktualisht, ky sistem përdoret nga bizneset dhe qytetarët, ndërsa në përdorim të brendshëm është i aksesueshëm nga administrata tatimore dhe institucione të tjera publike të autorizuara. Dokumentet e tenderit përshkruajnë kërkesat dhe përgjegjësitë për mirëmbajtjen e sistemit të fiskalizimit. N.Maho

https://monitor.al/infrastruktura-dixhitale-shteterore-eshte-ne-krize-mirembajtjeje-rrezikohet-siguria-kombetare/

The post KPP mban të pezulluar tenderin 7.7 mln euro të sistemit të fiskalizimit, shkak dokumentet appeared first on Revista Monitor.

Shqipëria bën pjesë në grupin e vendeve ku mbi gjysma e popullsisë e sheh ekonominë si problemin kryesor kombëtar, me 58% të të rriturve që përmendin çmimet e larta, pagat e ulëta dhe standardin e jetesës si shqetësimin dominant.

Këto të dhëna vijnë nga një studim i ri global i Gallup, i prezantuar në World Governments Summit, i cili bazohet në përgjigjet e të rriturve në 107 vende, të cilëve u është kërkuar të shprehin me fjalët e tyre se cili është problemi më i rëndësishëm me të cilin përballet vendi i tyre.

Në nivel global, mesatarisht 23% e të rriturve e përmendin ekonominë si çështjen më të rëndësishme kombëtare. Banorët e vendeve me të ardhura më të ulëta kanë më shumë gjasa sesa ata të vendeve me të ardhura të larta ta identifikojnë ekonominë si problemin kryesor.

Tri vendet e para në këtë listë i përkasin rajoneve dhe konteksteve të ndryshme ekonomike, nga pasiguria e lartë ushqimore në Malawi, te kolapsi ekonomik i Venezuelës në kushtet e krizës politike dhe vështirësitë e Bolivisë me inflacionin, por të gjitha kanë të përbashkët një popullsi që i vendos shqetësimet ekonomike mbi çdo problem tjetër.

Sipas nivelit të të ardhurave, në vendet me të ardhura të larta, mesatarisht 21% e qytetarëve përmendin ekonominë ose pamundësinë për të përballuar nevojat bazë, si ushqimi dhe strehimi. Kjo përqindje rritet në 31% në vendet me të ardhura mesatare të larta, në 36% në vendet me të ardhura mesatare të ulëta dhe në 38% në vendet me të ardhura të ulëta, ku 14% përmendin konkretisht nevojat bazë për ushqim dhe strehim — shumë më tepër se në çdo grup tjetër sipas nivelit të të ardhurave.

Raporti: 12 kategoritë kryesore të problemeve

Në tërësi, qytetarët në mbarë botën i grupojnë shqetësimet e tyre në 12 kategori kryesore. Vetëm 1% deklarojnë se vendi i tyre nuk ka probleme, ndërsa 4% refuzojnë të përgjigjen ose thonë se nuk e dinë.

Katër tema dominojnë në nivel global. Çështjet ekonomike renditen në krye, me një mesatare globale prej 23%, të ndjekura nga puna dhe punësimi (10%), politika dhe qeverisja (8%) si dhe siguria dhe rendi (7%). Së bashku, këto përbëjnë rreth gjysmën e të gjitha përgjigjeve.

Në nivelin pasues renditen ushqimi dhe strehimi (3%), çështjet sociale (3%), mjedisi dhe ndryshimet klimatike (3%) si dhe shëndetësia (3%). Një tjetër 2% përmendin arsimin, 1% secili përmendin emigracionin dhe infrastrukturën, ndërsa më pak se 1% e identifikojnë median si problemin kryesor.

Sipas rajoneve, ekonomia renditet në vendin e parë kudo, përveç Amerikës së Veriut (SHBA dhe Kanada), ku politika është shqetësimi kryesor. Në Azi-Paqësor dhe Europë, pakënaqësia politike renditet e dyta, ndërsa në Afrikën Sub-Sahariane, vendet e ish-Bashkimit Sovjetik dhe në Lindjen e Mesme dhe Afrikën e Veriut, më të theksuara janë problemet që lidhen me punësimin.

Në Amerikën Latine dhe Karaibe, siguria dhe rendi renditen në vendin e dytë, por bien në vendin e tretë në shumicën e rajoneve të tjera.

Në thelb, raporti tregon se njerëzit i gjykojnë problemet kombëtare përmes përvojës personale: nëse arrijnë të përballojnë jetesën, të gjejnë punë të qëndrueshme, t’u besojnë institucioneve dhe të ndihen të sigurt, më shumë sesa përmes treguesve makroekonomikë./ E. Zito

The post Ekonomia dominon shqetësimet në Shqipëri: 58% e të rriturve e rendisin si problemin kryesor appeared first on Revista Monitor.

Pas më shumë se një viti ndalimi, Këshilli i Ministrave miratoi vendimin për rikthimin zyrtar të përdorimit të platformës online Tik Tok, ndonëse qytetarët nisën të kishin akses të plotë rreth 3 muaj pas vendimit për mbylljen e tij.

Vendimi për mbylljen e përkohshme të TikTok u mor nga Këshilli i Ministrave më 6 mars 2025, me qëllimin për të mbrojtur fëmijët dhe të rinjtë nga përmbajtje të dëmshme që nxisin dhunë dhe bullizëm.

Por, që nga qershori, pa zhurmë e bujë, TikTok ishte i lirë që të aksesohej nga përdoruesit në Shqipëri.

TikTok rikthehet në Shqipëri, ndalimi njëvjeçar bie pa zhurmë pas tre muajsh

Edhe gjatë periudhës kur TikTok nuk mund të përdorej, d.m.th nga marsi në qershor, sërish shumë përdorues e aksesuan platformën nëpërmjet rrjeteve virtuale private (VPN).

Era e VPN-ve në Shqipëri: Si po “dështon” ndalimi i TikTok, rriten shikimet e videove

Në vendimin e sotëm, Këshilli i Ministrave ka sqaruar se kjo heqje e ndalimit vjen pas adresimit të problematikave në fushën e sigurisë publike dhe sociale në mjedisin digjital. Autoriteti Kombëtar për Sigurinë Kibernetike (AKSK) do të jetë përgjegjës për realizimin e këtij vendimi, duke respektuar gjithashtu legjislacionin për mbrojtjen e të dhënave personale.

Me këtë vendim shfuqizohet edhe vendimi nr. 151 i datës 6 mars 2025, i cili kishte vendosur masat për ndërprerjen e aksesit në TikTok, duke rikthyer kështu përdorimin e lirë të kësaj platforme për qytetarët shqiptarë.

“Heqja e masave të përkohshme për ndërprerjen e aksesit në platformën online TikTok është rezultat i një rivlerësimi institucional dhe i adresimit konkret të shqetësimeve që lidhen me sigurinë publike, sociale dhe digjitale, veçanërisht për fëmijët dhe të rinjtë.

Masa e miratuar nga Këshilli i Ministrave në mars 2025 u konceptua dhe u zbatua si një ndërhyrje e parandaluese, në funksion të mbrojtjes së interesit publik dhe adresimit të shqetësimeve të evidentuara gjatë asaj periudhe. Ajo shërbeu edhe për të hapur një dialog të drejtpërdrejtë dhe konstruktiv me platformën, duke vendosur bazat për mekanizma të rinj sigurie, të cilët më parë nuk ishin të pranishëm.

Sot, autoritetet shqiptare janë në partneritet me përfaqësuesit e TikTok, për  filtrat mbrojtës përmes fjalëve kyçe, kontrollet e përmbajtjes dhe modalitetet më efikase të raportimit dhe trajtimit të shkeljeve.

Ky vendim shënon kalimin nga masa kufizuese në një fazë monitorimi aktiv, bashkëpunimi ndërinstitucional dhe përgjegjësie të përbashkët me platformat digjitale.

Paralelisht, po punohet për hartimin e një plani të mirëfilltë komunikimi dhe ndërgjegjësimi, të fokusuar te fëmijët, të rinjtë, prindërit dhe mësuesit, për përdorimin e sigurt dhe të përgjegjshëm të platformave online. Qëllimi është i qartë dhe i orientuar drejt edukimit digjital, mbrojtjes reale dhe ndërtimi i një kulture sigurie në hapësirën online.

Kjo qasje e balancuar synon të garantojë lirinë e aksesit, duke vendosur njëkohësisht interesin e sigurisë dhe mirëqenies së të rinjve në qendër të politikave publike”, theksohet në sqarimin e Këshillit të Ministrave.

The post “Kthehet” zyrtarisht TikTok, edhe pse përdorej lirisht që prej qershorit 2025 appeared first on Revista Monitor.

Administrata Tatimore njoftoi shtyrjen e afatit për dorëzimin elektronik të inventarit analitik për vitin 2025, duke përcaktuar si afat dorëzimin datën 20 shkurt 2026.

Në njoftim tatimet sqaruan se shtyrja e afatit, synon të lehtësojë përmbushjen korrekte të detyrimeve ligjore nga tatimpaguesit dhe të shmangë penalitetet për mospërmbushje. Sipas administratës tatimore, dorëzimi i inventarit duhet të kryhet elektronikisht në sistemin e-Filing, në rubrikën “Çështjet e mia”, me emërtimin “Inventari 31.12.2025”.

Por ekspertët kontabël theksojnë se kërkesa e administratës tatimore nuk ka mbështetje të qartë ligjore.

Artur Papajani sqaron për Monitor se mbështetur në udhëzimin dhe ligjin “Për procedurat tatimore” afatet ligjore për dorëzimin e deklaratave tatimore dhe pasqyrave financiare përcaktohen nga deri më 31 mars.

Pra afati për dorëzimin e inventareve është deri më 31 Mars, i njëjtë me afatin e dorëzimin të pasqyrave financiare.

“A përdori administrata tatimore këtë bazë ligjore për kërkimin e inventarëve?

Ligji Nr.9920 datë 19.5.2008 “Për procedurat tatimore në Republikën e Shqipërisë “ në Neni 60 të tij për “Detyrimin e tatimpaguesit për të dhënë informacion dhe për të lejuar hyrjen në mjediset e veprimtarisë ekonomike përcakton se:

Me kërkesën e administratës tatimore, tatimpaguesi jep shpjegime shtesë, me gojë ose me shkrim. Ky detyrim përfshin, por nuk kufizohet në:

a) plotësimin, nënshkrimin dhe kthimin e pyetësorëve ose të kërkesave të tjera me shkrim për informacione apo dokumente nga administrata tatimore, brenda 20 ditëve nga data e postimit të kërkesës ose e dërgimit elektronik të tatimpaguesit;

Ministri i financave sqaron me udhëzim zbatimin e kësaj procedure.

Konkretisht në udhëzimin nr. 24,datë 2.9.2008 “Për procedurat tatimore në Republikën e Shqipërisë “, udhëzohet sa më poshtë:

“60.3.1 Gjatë ushtrimit të një kontrolli tatimor, administrata tatimore ka të drejtë të kërkojë nga personi i tatueshëm edhe shpjegime e informacione shtesë. Shpjegimet apo informacionet shtesë mund të kërkohen nga administrata tatimore në forma të ndryshme, si nëpërmjet dërgimit të pyetësorëve me shkrim tek tatimpaguesi, nëpërmjet kërkesave me shkrim për të dhënë dokumente, libra e regjistra, për të plotësuar të dhëna të ndryshme për aktivitetin ekonomik, transaksionet tregtare, operacionet financiare të kryera nga personi i tatueshëm me persona të tjerë të tretë, etj. Në këto raste, personi i tatueshëm është i detyruar të japë shpjegimet ose informacionet e kërkuara shtesë, me gojë ose me shkrim, brenda 20 ditëve nga data e postimit të kërkesës me shkrim të administratës tatimore ose nga data e nisjes së kësaj kërkese në postën elektronike të personit”.

Më qartë e më saktë nuk mund të shkruajë një akt administrativ.

Kërkesa të tilla, për informacione shtesë, ku në to sigurisht bën pjesë edhe inventari, bëhen vetëm në kuadrin e një kontrolli në vend tek tatimpaguesi.

Asnjëherë në një tjetër situatë, kurrë në mënyrë të njëanshme!

Në udhëzimin për tatimin mbi të ardhurat, udhëzohet nga ministri i financave se: “Tatimpaguesit të cilët janë të detyruar të mbajnë kontabilitet, sipas kërkesave të ligjit “Për kontabilitetin dhe pasqyrat financiare”, paraqesin pranë administratës tatimore deklaratën tatimore, ndërsa pasqyrat e raportimit financiar i paraqesin pranë Qendrës Kombëtare të Biznesit, sipas parashikimeve dhe afateve të përcaktuara në legjislacionin e fushës, si dhe në sistemin e-Tax.”

Më tej akoma, ligji i kontabilitetit precizon se :

“Njësitë ekonomike, subjekt i këtij ligji, duhet të kontrollojnë, të paktën një herë gjatë periudhës  raportuese, ekzistencën dhe vlerësimin e aktiveve, të detyrimeve dhe të kapitaleve të veta, nëpërmjet inventarizimit të këtyre elementeve dhe dokumenteve kontabël përkatëse. “

Pra, legjislacioni i fushës ka përcaktuar si datë dorëzimi të deklaratës tatimore dhe pasqyrave financiare, 31 Marsin!

E para në tatime e dyta në QKB.

Por as 1 janarin, as 14 shkurtin dhe as 1 prillin!”, sqaron eksperti.

https://monitor.al/tatimet-shtyjne-deri-me-20-shkurt-afatin-per-deklarimin-e-inventarit/

The post Afatet për dorëzimin e inventarëve, ekspertët: Nuk mund të shtyhen përpara 31 marsit appeared first on Revista Monitor.

Kredia e re për ekonominë u rrit përsëri me ritme dyshifrore dhe arriti një rekord të ri historik vitin e kaluar.

Sipas të dhënave nga Banka e Shqipërisë, vlera e kredisë së re të disbursuar arriti në 436.6 miliardë lekë, në rritje me 15% krahasuar me vitin 2024.

Në veçanti, muaji dhjetor 2025 shënoi një shifër rekord të kredisë prej 62.3 miliardë lekësh. Kjo shifër është 30% më e lartë krahasuar me dhjetorin e një viti më parë dhe përfaqëson njëkohësisht një vlerë rekord të vlerës mujore të kredisë së re.

Për vitin 2025, kreditimi u rrit me ritme më të larta në segmentin e individëve. Bankat dhanë pothuajse 127 miliardë lekë kredi të reja në këtë segment, me një rritje prej 19% krahasuar me vitin 2024.

Kreditimi i individëve ka vijuar të rritet me ritme të larta, si në segmentin e kredisë për shtëpi, ashtu edhe në atë të kredisë konsumatore. As masat e reja të aplikuara nga Banka e Shqipërisë duke filluar nga gjysma e dytë e vitit 2025 nuk kanë sjellë rezultate të dukshme në drejtim të ngadalësimit të huadhënies në këtë segment.

Kreditimi në segmentin e ndërmarrjeve private u rrit gjithashtu me ritme dyshifrore, por më të ngadalta në raport me individët. Gjatë vitit 2025, sektori bankar disbursoi gjithsej 296 miliardë lekë kredi për bizneset, shifër kjo në rritje me 10.2% krahasuar me vitin 2024. Kredia për biznesin shënoi një tendencë në rritje të fortë sidomos gjatë gjysmës së dytë të vitit. Në veçanti, për dhjetorin bankat dhanë 46 miliardë lekë kredi të reja për bizneset, 32% më shumë krahasuar me dhjetorin e vitit të kaluar.

Portofoli i kredisë për ekonominë në fund të vitit 2025 arriti vlerën e 943.5 miliardë lekëve. Vetëm gjatë muajit dhjetor, vlera e portofolit u rrit me më shumë se 18 miliardë lekë. Me bazë vjetore portofoli total i kredisë u rrit me 12.9%. Rritja e portofolit u përshpejtua më tej, krahasuar me rritjen prej 12.3% të vitit 2024.

Edhe në tepricën e portofolit rritja më e lartë po regjistrohet në segmentin e individëve, me 19.2% më shumë krahasuar me fundin e vitit 2024.

Ndërkohë, kredia në segmentin e biznesit u rrit me 10% krahasuar me një vit më parë. Kredia për biznesin vazhdon të jetë dominuese në strukturën e kredisë për ekonominë, me rreth 55% të portofolit.

Sipas monedhës, rritja e kredisë për ekonominë vazhdon të jetë e përqendruar në masën më të madhe te Leku. Portofoli i kredisë në Lekë u rrit me 16.5% krahasuar me një vit më parë. Tashmë, vlerësohet se kredia në Lekë përbën afërsisht 60% të portofolit të kredisë për ekonominë.

Megjithatë, edhe kredia në valutë është rritur me ritme dyshifrore, duke u zgjeruar me 10% krahasuar me një vit më parë. Portofoli i kredisë në valutë vazhdon të ndikohet negativisht nga efekti i kursit të këmbimit, por ky efekt ishte më i vogël gjatë vitit 2025.

Burimi: BSH

The post Kredia e re për ekonominë u rrit me 15% vitin e kaluar appeared first on Revista Monitor.

Subjekte të veçanta private që ushtrojnë aktivitet në kate të sipërme të ndërtesave shumëkatëshe po verifikohen nga grupe të Furnizuesit e Mundësisë së Fundit që kanë dalë në terren në mënyrë që kontrata e tyre të përputhen me tarifat respektive.

Në disa raste këto biznese nuk kanë rifreskuar të dhënat e kontratës duke e mbajtur atë si klient familjar e për rrjedhojë duke paguar tarifa 8.5-9.5 lekë kWh dhe jo 14 lekë kWh sikurse u takon.

“Furnizuesi i Shërbimit Universal, FSHU pjesë e OSHEE Group, vijon procesin për përditësimin e kontratave të energjisë elektrike për të gjithë kategoritë e klientëve me qëllim ndryshimin e tarifimit sipas sistemit të ri të pagesës së energjisë.

FSHU ka ngritur grupe kontrolli në terren të cilët kanë konstatuar subjekte private që ushtronin aktivitetin e biznesit, kryesisht shërbime dhe që tarifoheshin me 8.5-9.5 lek/kWh si klientë familjarë, jo 14 lek/kWh, tarifa e miratuar për klientët biznes. FSHU, pjesë e OSHEE Group, fton të gjithë bizneset, organizatat jofitimprurëse (OJF-të), si dhe personat fizikë që veprojnë si biznese, të verifikojnë dhe përditësojnë kontratën e tyre të energjisë, nëse rezultojnë ende të regjistruar si klientë familjarë” thuhet në një njoftim të FSHU.

Pse është i nevojshëm ky proces?

FSHU vlerëson se procesi i verifikimit të kontratave të energjisë për subjektet private është i nevojshëm për një tarifim të drejtë bazuar në sistemin e ri të pagesave sipas aktivitetit të biznesit. Kompania shprehet se klasifikimi i pasaktë në sistem, ka ardhur si pasojë e regjistrimeve të vjetra, mungesës së përditësimeve apo ndryshimeve në përdorimin real të objektit.

“Përmes këtij procesi, FSHU u bën thirrje subjekteve të ndërgjegjësohen dhe të bashkëpunojnë me grupet e kontrollit në terren, me qëllim ndryshimin e tarifimit nga familjar në jofamiljar, duke shmangur penalitetet” nënvizon FSHU.

Kush përfshihen në këtë proces përditësimi?

Kompania ka bërë një përmbledhje të atyre që përshihen në procesin e përditësimit dhe mënyrën sesi ai po kryhet.

“Në procesin e përditësimit përfshihen të gjithë subjektet që kryejnë veprimtari ekonomike në emër të një personi fizik apo juridik, të cilët e përdorin energjinë për qëllime biznesi (zyra, dyqane, punishte, qendra shërbimi etj.), apo që janë të regjistruar si OJF, por në praktikë konsumojnë energji për funksione të ngjashme me ato të subjekteve ekonomike.

Ky proces nuk prek klientët që janë realisht konsumatorë familjarë dhe e përdorin energjinë vetëm për qëllime banimi. Procesi është i thjeshtë dhe përfshin verifikimin e kontratës aktuale të energjisë elektrike (nëse është familjare apo biznes), plotësimin e një kërkese për ndryshim të kategorisë, bashkëngjitjen e dokumentacionit përkatës, që vërteton natyrën ekonomike të aktivitetit (NIPT, ekstrakt QKB etj.).

Përditësimi i kontratave mund të bëhet lehtësisht në sportelet e Qendrave të Kujdesit të Klientit të FSHU-së, pjesë e OSHEE Group, ose online, përmes platformës online, web-it zyrtar të kompanisë dhe aplikacionit të OSHEE-së.

FSHU dhe OSHEE Group u bëjnë thirrje të gjitha subjekteve të mos e shtyjnë këtë proces dhe të përfitojnë nga mundësia për përditësim të dhënash dhe ndryshim tarifimi, duke garantuar një sistem më të rregullt dhe funksional për të gjithë,” thuhet në njoftimin e operatorit.

The post Kontratat e energjisë, FSHU në terren për verifikim të bizneseve që “kamuflohen” si familjarë appeared first on Revista Monitor.

Nëse në Farkë rreth 3 vite më parë toka bujqësore shitej me çmim 50 euro për metër katror, aktualisht çmimi ka arritur nga 70 euro deri në 100 euro për metër katror.

Sipas të dhënave nga tregu, çmimi i tokës është dyfishuar. Në rrethina të tjera të Tiranës, sipas agjentëve imobiliarë, si fshati Mullet apo Ndroq çmimi i tokës bujqësore është mbi 50 euro për metër katror.

Nëse do të blihet 1 hektar (ha) tokë këto në këto zona, vlera do të kushtojë nga 500 mijë deri 700 mijë euro deri në 1 milion euro vlera maksimale në Farkë.

Sipas Stela Dhami nga “Colliers International Albania” rritja e ndjeshme të çmimet të tokës bujqësore është sepse shumica e saj shfrytëzohet për ndërtim, dhe madje nuk ka më hapësira të gjelbra të lira në këto zona. Zonja Dhami nënvizon se edhe vetë pronarët nuk janë të interesuar të ulin çmimin e shitjes së tokës bujqësore, dhe shumë prej tyre preferojnë ta menaxhojnë në mënyrë “të zgjuar” tokën bujqësore.

Krahasuar me vendet e Bashkimit Europian çmimet e tokës bujqësore në rrethinat e Tiranës kushtojnë shumë herë më shtrenjtë.

Në vendet e BE-së, sipas të dhënave të Eurostat, çmimi mesatar i tokës bujqësore për vitin 2024 arriti 15,224 euro për ha apo rreth 1.5 euro për metër katror. Krahasuar me 2023 çmimi i shitjes për tokën bujqësore në BE u rrit 6.1% (nga 1.4 euro për metër katror arriti në 1.5 euro për metër katror).

Sipas të dhënave të disponueshme, shtetet me çmimin më të lartë mesatar për 1 hektar tokë bujqësore është Malta me 201,263 euro, pasuar nga Holanda me 96,608 euro dhe Portugalia me 76,556 euro. Ndërkaq, çmimet më të ulëta janë regjistruar në Letoni (4,825 euro), Lituani (5,590 euro) dhe Sllovaki (5,823 euro).

Referuar tabelave të detajuara publikuar nga Eurostat, pas Maltës, një ndër zonat më të shtrenjta për tokën bujqësore është Flevoland të Hollandës. Çmimi i tokës bujqësore në këtë zonë në 2024 arriti 187 mijë euro për hektar.

Flevoland është zona kryesore bujqësore me tokë të re, shumë pjellore dhe të shtruar afër detit dhe kjo e bën çmimin e tokës atje shumë të lartë krahasuar me pjesën tjetër të Hollandës.

Çmimi të larta shitjeje, ofrohen edhe në ishujt Kanarias të Spanjës çmimi ka arritur 148 mijë euro për ha, sipas të dhënave të Eurostat për 2024.

Në vendet e rajonit çmimet e tokës bujqësore janë më të ulëta. Në Selanik të Greqisë çmimi i tokës bujqësore është 14,600 euro për ha apo rreth 1.5 euro për metër katror.

The post Toka bujqësore në rrethinat e Tiranës kushton deri në 100 euro/m², rreth 70 herë mbi mesataren e BE appeared first on Revista Monitor.

Depozitat në monedhën vendase kanë shënuar rritjen më të lartë historike në vitin 2025, sipas të dhënave që janë publikuar nga Banka e Shqipërisë. Në të kundërt shtesa e kursimeve në euro është ngadalësuar në raport me vitet e mëparshme.

Rekord rritja në lekë

Në fund të vitit 2025, në banka ishin të depozituara në monedhën vendase 710.6 miliardë lekë. Ky është niveli më i lartë historik i kursimeve në lekë i regjistruar ndonjëherë. Në krahasim me një vit më parë, depozitat u rritën me gati 13%, ose rreth 81 miliardë lekë më shumë. Kjo është dhe rritja më e lartë vjetore historike në vlerë, që nga viti 2006, kur Banka e Shqipërisë raporton të dhënat. Shtesa është pothuajse dy herë më shumë se një vit në parë, kur zgjerimi kishte arritur në 47 miliardë lekë.

Sipas të dhënave të detajuara, kjo rritje ka ardhur në pjesën më të madhe nga individët që kanë shtuar sidomos depozitat pa afat (me 40 miliardë lekë) dhe më pak nga bizneset.

Ngadalësohet euro

Ndryshe nga kursimet në monedhën vendase, ato në euro janë ngadalësuar në raport me vitet e mëparshme, pavarësisht se kanë vazhduar rritjen. Sipas të dhënave të Bankës së Shqipërisë, bizneset, individët e institucionet e tjera kishin në banka në fund të vitit 2025 rreth 8.7 miliardë euro. Në krahasim me një vit më parë, kursimet në monedhën e përbashkët janë rritur me 8.7%, ose 702 milionë euro më shumë. Kjo është rritja më e ulët vjetore që nga viti 2020. Rekordi ishte vendosur në 2023-n, kur depozitat në valutë u shtuan në një vit me gati 1 miliard euro.

Shtesa në 2025-n, ka ardhur si nga individët ashtu dhe nga bizneset. Tek individët vihet re prirja për të depozituar në afate më të gjata se një vit.

Shtesa vjetore e konvertuar rreth 1.5 mld euro

Në lekë, shtesa vjetore e kursimeve ishte 81 miliardë lekë, ose rreth 810 milionë euro. Në monedhën e përbashkët, shtesa ishte rreth 700 milionë euro, duke bërë që rritja totale e konvertuar në euro e depozitave në 2025-n, të ishte rreth 1.5 miliardë euro.

Banka e Shqipërisë e raporton stokun e kursimeve totale në lekë dhe euro të konvertuara në monedhën vendase, që në fund të vitit 2025 arriti në 1.48 trilionë lekë (rreth 15 miliardë euro). Por, për shkak të rënies së monedhës së përbashkët vitet e fundit, stoku i depozitave në euro i raportuar në lekë, rezulton më i ulët.

The post Kursimet në banka u shtuan me 1.5 mld euro në 2025 (të konvertuara), rekord rritja në lekë appeared first on Revista Monitor.

Shqipëria renditet ndër vendet me barrën më të lartë të shpenzimeve direkte për shëndetin, duke dëshmuar gjithashtu dëshmon mungesë stabiliteti në mbrojtjen financiare që shteti u ofron familjeve për shërbimet bazë, sipas rezultateve të anketës “Securimetri 2025” nga Këshilli i Bashkëpunimit Rajonal.

Sipas shifrave zyrtare të anketimit, rreth 57% e familjeve shqiptare deklarojnë se shpenzojnë midis 1% dhe 10% të të ardhurave të tyre totale për vizita mjekësore dhe barna. Ky grup përfaqëson shumicën dërrmuese të popullsisë dhe shënon nivelin më të lartë në të gjithë Ballkanin Perëndimor për këtë kategori.

Ndërsa në vendet fqinje si Bosnja apo Serbia, një pjesë më e madhe e qytetarëve arrijnë të mbulohen nga skemat publike me kosto minimale, në Shqipëri duket se çdo kontakt me sistemin shëndetësor shoqërohet me një faturë që rëndon mbi buxhetin e të sëmurëve.

Edhe më shqetësues është fakti se 27% e familjeve shqiptare detyrohen të alokojnë më shumë se 10% të të ardhurave të tyre për shëndetin. Ky prag konsiderohet kritik nga organizatat ndërkombëtare si OBSH, pasi shpenzime të këtij niveli shpesh çojnë në varfërim të mëtejshëm të shtresave të mesme dhe të ulëta.

Ndonëse vende si Serbia (34%) apo Kosova (32%) kanë përqindje më të larta në këtë kategori ekstreme, struktura e shpenzimeve në Shqipëri tregon një shtrirje më të gjerë të barrës financiare në të gjithë shoqërinë.

Ajo që e bën situatën në Shqipëri unike në rajon është numri shumë i ulët i atyre që nuk paguajnë. Vetëm 9% e familjeve arrijnë të mbajnë shpenzimet shëndetësore nën nivelin 1%. Ky është treguesi më i ulët në Ballkan (ku mesatarja rajonale është 13%), duke sugjeruar se mbulimi “falas” mbetet më shumë një premtim sesa një realitet i prekshëm për pjesën më të madhe të shqiptarëve.

Analistët sugjerojnë se ky trend reflekton nevojën urgjente për një rishikim të listës së barnave të rimbursueshme dhe përmirësimin e menaxhimit të sistemit parësor.

Në kushtet kur pagat po përballen me një inflacion të lartë, fakti që mbi 84% e popullsisë duhet të paguajë shuma të ndjeshme nga xhepi për shëndetin (kategoritë 1-10% dhe mbi 10% së bashku), e vendos sigurinë sociale të vendit në një pozicion mjaft vulnerabël. Kostoja e shëndetit do të vijojë të mbetet një nga pengesat kryesore për rritjen e mirëqenies së familjeve shqiptare në vitet e ardhshme.

Burimi: KBR

The post Shëndetësia “nga xhepi”, familjet shqiptare paguajnë faturën më të lartë në rajon appeared first on Revista Monitor.

Bilanci tregtar i Shqipërisë për produktet e shportës po dëshmon një varësi gjithnjë e më të theksuar nga importet jashtë vendit.

Sipas të dhënave të INSTAT nga tregtia e jashtme, kategoria “Produkte bulmetore, vezët dhe mjalti” ka pësuar një rritje të fortë të vlerës së importit, duke u ngjitur nga 6.8 miliardë lekë në vitin 2024, në rreth 7.7 miliardë lekë në vitin 2025.

Ky zgjerim prej rreth 14% brenda një viti kalendarik dhe 62% që nga viti 2021, po tregon se prodhimi vendas po humbet terren me shpejtësi përballë produkteve që vijnë kryesisht nga vendet e Rajonit dhe Bashkimit Evropian.

Kjo rritje e importeve vjen si pasojë e drejtpërdrejtë e një krize strukturore që ka mbërthyer sektorin e blegtorisë në Shqipëri. Prej vitesh, numri i krerëve në blegtori po pëson rënie sistematike, e nxitur nga braktisja e fshatit, plakja e popullsisë rurale dhe mungesa e interesit të të rinjve për të trashëguar fermat familjare.

Nga ana tjetër kostoja e prodhimit vendas është shtrenjtuar për shkak të rritjes së çmimeve të inputeve bujqësore dhe bazës ushqimore. Blegtorët shqiptarë po e gjejnë veten të pafuqishëm për të konkurruar me prodhuesit e huaj, të cilët mbështeten nga skema subvencionimi dhe teknologji më efikase.

Sakaq, tregu po reagon duke u orientuar drejt mbushjes së vakumit të krijuar nga prodhimi vendas përmes importeve. Ndërsa konsumi i brendshëm mbetet relativisht i qëndrueshëm dhe kërkesa nga sektori i turizmit po rritet vit pas viti, mungesa e qumështit dhe nënprodukteve të tij “Made in Albania” po plotësohet nga fabrikat e huaja.

Forcimi i monedhës vendase e ka bërë importin e djathit, qumështit apo gjalpit nga vendet e Bashkimit Evropian shumë më të lirë sesa vitet e kaluara. Për një tregtar, sot është me më leverdi të sjellë një maune me qumësht nga Italia apo Hungaria, sesa të grumbullojë sasi të vogla qumështi nëpër fshatrat e Shqipërisë me kosto logjistike të lartë. Leku i fortë po godet rëndë prodhuesin vendas që nuk konkurron dot me çmimet e huaja.

Kjo situatë krijon një rreth vicioz ku, sa më shumë rriten importet, aq më shumë ulet presioni mbi institucionet për të mbështetur blegtorinë lokale, duke e lënë këtë të fundit në mëshirë të fatit dhe të zhvlerësuar përballë konkurrencës rajonale.

Ekspertët e fushës paralajmërojnë se nëse kjo tendencë e reflektuar në shifrat e vitit 2025 do të vijojnë me të njëjtat ritme. Shqipëria rrezikon të humbasë sovranitetin ushqimor në produktet bazë. Rritja e importeve me plot 10 milionë euro brenda një viti po tregon se politikat e subvencionimit nuk kanë arritur të frenojnë tkurrjen e stallave.

Burimi: Instat

The post Kriza e blegtorisë, importet e bulmetit u rritën me 62% ndërmjet 2021-2025 appeared first on Revista Monitor.

Banka e Shqipërisë kishte planifikuar të mërkurën zhvillimin e mbledhjes së dytë të Këshillit Mbikëqyrës për vitin 2026.

Në mbledhje duhej të shqyrtohej dhe miratohej raporti i Politikës Monetare për tremujorin e parë të vitit, i shoqëruar me vendimmarrjen e radhës të politikës monetare për normat bazë të interesit.

Por, edhe mbledhja e dytë e Këshillit Mbikëqyrës ka dështuar, për shkak të përfundimit të mandatit të gjashtë prej anëtarëve dhe moszëvendësimit në kohë të tyre.

Mbledhja u reduktua në një takim informues mes tre anëtarëve të mbetur të Këshillit Mbikëqyrës, takim që nuk mundësonte marrjen e vendimeve, për shkak të mungesës së kuorumit ligjor.

Sipas njoftimit të Bankës së Shqipërisë, në këtë takim u diskutua mbi zhvillimet e fundit ekonomike dhe monetare, si dhe u mor informacion mbi administrimin dhe veprimtarinë e Bankës së Shqipërisë, zbatimin e politikës monetare, mbarëvajtjen e sistemit bankar dhe financiar dhe gjendjen e tregjeve të parasë dhe valutore.

Njoftimi saktëson se çështjet e planifikuara për vendimmarrje në mbledhjen e muajit shkurt do të trajtohen në mbledhjet e ardhshme, atëherë kur Këshilli Mbikëqyrës i Bankës së Shqipërisë të ketë numrin e nevojshëm të anëtarëve për zhvillimin e mbledhjeve dhe marrjen e vendimeve përkatëse.

Në fund të dhjetorit 2025, përfundoi mandati i gjashtë prej anëtarëve të Këshillit Mbikëqyrës të Bankës së Shqipërisë, duke përfshirë zëvendësguvernatoren e parë, Luljeta Minxhozi dhe anëtarët Ridvan Bode, Suela Popa, Edlira Luçi, Artan Hoxha dhe Violeta Staka.

Ashtu siç kishte ndodhur edhe shtatë vjet më parë, dy institucionet që duhet të propozonin kandidaturat për plotësimin e vendeve vakante, Këshilli i Ministrave dhe Kryeministria, i kanë nisur procedurat ligjore me vonesë.

Anëtarët e Këshillit Mbikëqyrës nuk mund të vazhdojnë të ushtrojnë funksionet e tyre pas përfundimit të mandatit. Ligji “Për Bankën e Shqipërisë” kërkon që mbledhja e Këshillit Mbikëqyrës zhvillohet me praninë e më shumë se gjysmës së anëtarëve të emëruar, duke përfshirë praninë e kryetarit ose zëvendëskryetarit të Këshillit Mbikëqyrës.

Për këtë arsye, prej më shumë se një muaji, Këshilli Mbikëqyrës nuk ka më kuorum dhe vendimmarrja në të është faktikisht e paralizuar.

Kuvendi i Shqipërisë i nisi vetëm në fillim të muajit shkurt procedurat e përzgjedhjes së tre kandidatëve që duhet të propozojë për vendet vakante. Këtë javë u zhvilluan seancat dëgjimore me kandidatët, ndërsa vlerësohet se do të duhen minimalisht dy javë para se kandidatët të propozohen për votim në seancë plenare.

Ndërkohë, as Këshilli i Ministrave nuk i ka depozituar ende tre propozimet e tij për vendet e tjera vakante.

Në rastin më të mirë, Këshilli Mbikëqyrës i Bankës së Shqipërisë mund të plotësohet për mbledhjen e ardhshme, të programuar për t’u zhvilluar më datë 4 mars 2026.

Kjo nuk është hera e parë që neglizhencat dhe vonesat në procesin e plotësimit të vakancave në institucionet rregullatore të tregut cenojnë funksionimin normal të institucioneve të pavarura. Këshilli Mbikëqyrës i Bankës së Shqipërisë u përball me një situatë të tillë pikërisht në vitin 2018, para zgjedhjes së anëtarëve që së afërmi u përfundon mandati. Edhe në atë rast, numri i mandateve të përfunduara ishte gjashtë. Mosplotësimi në kohë i vendeve vakante e bllokoi për një kohë të shkurtër vendimmarrjen në Këshillin Mbikëqyrës.

The post Dështon edhe mbledhja e dytë e Këshillit Mbikëqyrës të Bankës së Shqipërisë appeared first on Revista Monitor.

Pas problemeve të shfaqura prej më tepër se dy javësh në sistemin SelfCare, Tatimet njoftuan sot shtyrjen e afatit të deklarimit të inventarit analitik të 2025.

Administrata Tatimore informon tatimpaguesit se afati për deklarimin e inventarit analitik 31.12.2025, shtyhet deri më 20.02.2026.

Kjo shtyrje e afatit realizohet me qëllim garantimin e përmbushjes së saktë dhe korrekte të këtij detyrimi ligjor nga ana e tatimpaguesve.

Inventari duhet të përmbajë informacione në lidhje me lëndën e parë, produktet e gatshme, mallrat për rishitje, të detajuara në njësi, sasi çmim dhe vlerë.

Deklarimi i inventarit duhet të kryhet elektronikisht në sistemin e tatimeve e-Filing, në rubrikën “Çështjet e mia”, brenda datës 20.02.2026, duke u ngarkuar me emërtimin “Inventari 31.12.2025”.

Administrata Tatimore u bën thirrje të gjithë tatimpaguesve që të përmbushin me korrektesë këtë detyrim ligjor brenda afatit të përcaktuar, me qëllim shmangien e verifikimeve në vend dhe aplikimit të penaliteteve përkatëse.

The post Tatimet shtyjnë deri më 20 Shkurt afatin për deklarimin e inventarit appeared first on Revista Monitor.

Bizneset dhe ekonomistët gjenden sot në ditën e 16-të të përballjes me mosfunksionim të plotë të sistemit të fiskalizimit SelfCare.

Një numër i madh prej tyre vijojnë të sjellin ankesa pranë “Monitor”, duke pohuar me shqetësim se po përballen me një mosfunksionim serioz dhe të vazhdueshëm të sistemit SelfCare, i cili praktikisht e ka bërë të pamundur kryerjen normale të punës.

“Praktikisht sistemi hapet, por nuk arrijmë të kryejmë asnjë funksion. Problem mbetet mbyllja e bilanceve mujore, pasi te librat e shitjeve dhe blerjeve të regjistruara në sistem nuk arrihet të bëhet asnjë veprim”, pohon një ekonomiste në një kompani shërbimesh.

Bizneset të tjerë nënvizojnë se situata e krijuar, po kalon përtej problemit teknik, po krijohet kolaps dhe presion për të zbatim afatesh në kushte jo normale.

“Situata ka kaluar prej kohësh kufijtë e një problemi teknik dhe po shndërrohet në presion të hapur dhe shkelje të së drejtës për të punuar në kushte normale, me afate që mbeten në fuqi pavarësisht kolapsit të sistemit. Kjo gjendje po ndikon drejtpërdrejt jo vetëm në punën e papërfunduar, por edhe në mirëqenien profesionale dhe psikologjike të stafit, i cili mbetet i ngulur për orë të tëra duke pritur funksionimin e platformës”, thotë një prej bizneseve.

“Nuk ka stabilitet në funksionimin e sistemit dhe pa asnjë siguri për të dhënat e hedhura, pasi edhe pas përpjekjeve të përsëritura nuk rezulton e mundur të verifikohet një pasqyrë e plotë dhe përfundimtare në sistem. Kjo na detyron të humbim orë të tëra pune pa rezultat konkret, duke krijuar një kaos total operacional, pa pasur asnjë përgjegjësi nga ana jonë”, pohon një tjetër drejtues kompanie.

Edhe për kontabilistin Sotiraq Dhamo situata paraqitet kritike dhe mbi të gjitha nuk ka asnjë komunikim zyrtar për situatën e krijuar.

Zoti Dhamo tha për Monitor se për shkak të situatës është e domosdoshme komunikimet zyrtare nga institucionet përgjegjëse se si do vijojnë punën bizneset.

“AKSHI duhet të dalë me një komunikim për të sqaruar se çfarë problemi ka dhe si po punohet për ta zgjidhur. Ministria e Financave duhet të komunikojë se si do të veprohet lidhur me mosplotësimin e kërkesave ligjore nga tatimpaguesit, i cili vjen si pasojë e mosfunksionimit të sistemit SelfCare”, nënvizon ai.

Edhe eksperti Fiskal Julian Saraçi ripërsërit kërkesën për domosdoshmërinë e nisjes së menjëhershme të një dialogu institucional i strukturuar, me qëllim identifikimin dhe zbatimin e një zgjidhjeje të qëndrueshme në tre faza atë afatshkurtër, afatmesme dhe afatgjatë.

Z.Saraçi gjithashtu vlerëson si të domosdoshme që institucionet përgjegjëse të dalin me qëndrime publike të qarta mbi mosaplikimin e penaliteteve ndaj subjekteve për periudhën e mosfunksionimit të sistemit, si dhe të formalizohet shtyrja e afateve për përmbushjen e detyrimeve

ALP shkresë zyrtare tatimeve e AKSHI: Na keni bllokuar aktivitetin zgjidhni problemin e fiskalizimit

Më 27 janar, Aleanca e Profesionistëve të Lirë (APL) i është drejtuar me një letër zyrtare AKSHI-t dhe Tatimeve, për dijeni edhe Ministrisë së Financave, duke raportuar probleme serioze dhe të përsëritura në funksionimin e sistemit, të evidentuara nga anëtarët që prej 20 janarit 2026 dhe në vijim.

Sipas APL-së, bllokimet kryesore lidhen me pamundësinë për regjistrimin e certifikatave të reja të fiskalizimit, çka pengon rinovimin apo aktivizimin e elementëve bazë të funksionimit dhe ndalon vijimin normal të proceseve të fiskalizimit. Gjithashtu, raportohen vështirësi në hapjen e filialeve të reja, duke bllokuar zgjerimin dhe organizimin e aktivitetit ekonomik, si dhe probleme në ndryshimin e operatorëve, të cilat në rastet e largimit, shtimit apo zëvendësimit të punonjësve, sjellin ndërprerje të faturimit dhe rrezik për pezullim të aktivitetit.

Në letër theksohej se mungesa e një komunikimi zyrtar nga autoritetet e bën të pamundur planifikimin korrekt nga ana e bizneseve.

APL ndër të tjera në letër shprehej se këto bllokime po sjellin pasoja të drejtpërdrejta për bizneset, përfshirë ndërprerje të punës, vonesa në faturim dhe arkëtime, rritje të kostove operative, ekspozim ndaj gjobave dhe penaliteteve, si dhe dëmtim të besimit në procesin e fiskalizimit. Njëkohësisht, situata prek edhe interesin publik, pasi ndikon negativisht në qarkullimin ekonomik, arkëtimet tatimore dhe klimën e të bërit biznes.

Ekspertët fiskale të Aleancës së Profesionistëve të Lirë të kontaktuar pohuan se ende deri tani nuk ka asnjë komunikim zyrtar për ankesën e tyre.

Asgjë e re nga fronti i SelfCare

The post Sistemi SelfCare në kolaps, kontabilistët dhe bizneset kërkojnë reagim zyrtar appeared first on Revista Monitor.

Komisioni Kuvendor për Ekonominë, Punësimin dhe Financat, zhvilloi sot seancën e dytë dëgjimore me kandidatët për anëtarë të Këshillit Mbikëqyrës të Bankës së Shqipërisë.

Kandidati Elton Korbi në vizionin e tij për rolin e Këshillit Mbikëqyrës vendosi theksin te forcimi i qeverisjes së bankës qendrore, përmirësimi i mbikëqyrjes, rritja e cilësisë së burimeve njerëzore dhe një vëmendje më e shtuar për mbrojtjen konsumatore.

“Transformimi digjital dhe inteligjenca artificiale po ndryshojnë mënyrën e funksionimit të bankave qendrore në mbarë botën. Banka e Shqipërisë duhet të ndjekë në mënyrë aktive këto zhvillime, duke aplikuar teknologjitë e reja në analizën e të dhënave, mbikëqyrjen prudenciale, parashikimet makroekonomike dhe menaxhimin e riskut. Në këtë kuadër, mbikëqyrja financiare duhet të shoqërohet edhe me një vëmendje të shtuar ndaj sigurisë kibernetike, duke kërkuar nga bankat dhe institucionet financiare standarde gjithnjë e më të larta në mbrojtjen e sistemeve, të të dhënave dhe të infrastrukturës kritike. Banka e Shqipërisë duhet të luajë një rol më aktiv në mbrojtjen e konsumatorit financiar, në mbikëqyrjen e institucioneve bankare dhe jobankare – veçanërisht mikrokredisë – dhe në forcimin e kërkesave për transparencë,” tha z.Korbi.

Ai theksoi se asnjë bankë qendrore moderne nuk mund të funksionojë pa investuar në mënyrë të vazhdueshme në kapitalin e saj njerëzor, duke shtuar se Banka e Shqipërisë duhet të forcojë më tej politikat e rekrutimit konkurrues, zhvillimit profesional dhe motivimit afatgjatë të stafit, duke ndjekur shembujt e bankave qendrore europiane.

Kandidati Selami Xhepa, therksoi domosdoshmërinë e përshtatjes së rolit të Bankës Qendrore me zhvillimet e reja të lidhura sidomos me format e reja të parasë, që shtron sfida të reja për stabilitetin monetar dhe financiar. Kjo, sipas tij, shtron nevojën për një kuadër rregullator më dinamik.

Gjithashtu, ai theksoi nevojën që Banka e Shqipërisë të eksplorojë më thellë dhe më mirë misionin e mbrojtjes konsumatore, për të balancuar asimetrinë e fuqisë dhe informacionit mes qytetarit të zakonshëm dhe institucioneve financiare.

Kandidatja Holta Zaçaj, theksoi nevojën për të forcuar rolin e Këshillit Mbikëqyrës si garant i zbatimit të misionit ligjor të Bankës së Shqipërisë, duke balancuar pavarësinë e institucionit me një proces të besueshëm dhe transparent të llogaridhënies. Sipas saj, nevojitet forcim i transparencës lidhur me produktet dhe shërbimet financiare, si parakusht për rritjen e besimit të publikut te sistemi në tërësi. Ajo nënvizoi gjithashtu rolin e Bankës së Shqipërisë për të siguruar funksionimin e ndershme në treg, nëpërmjet një qasjeje mbikëqyrëse të paanshme dhe proporcionale.

Kandidati Pajtim Melani, theksoi rolin e Komitetit të Auditit brenda Këshillit Mbikëqyrës, si një organ që mund të ndihmojë në forcimin e transparencës, llogaridhënies dhe përgjegjshmërisë së këtij institucioni.

Kandidatja Luljeta Minxhozi, theksoi nevojën për ta bërë plotësisht operacionale bazën e re ligjore dhe projektet e reja të lidhura me sistemet e pagesave. Sfidë tjetër për të ardhmen, sipas saj, është përmirësimi i hapjes dhe konkurrueshmërisë së sektorit bankar dhe financiar.

Kandidatja Violeta Staka, theksoi nevojën për forcimin e pavarësisë institucionale të bankës së Shqipërisë dhe nevojën për forcuar aftësinë e Bankës Qendrore për t’u përshtatur me ndryshimet teknologjike.

Kandidatja Merita Bejtja vendosi theksin tek eksperienca e saj si inspektore e përgjithshme e Bankës së Shqipërisë dhe kërkoi besimin e deputetëve për t’u angazhuar në nivel politikëbërjeje, si anëtare e Këshillit Mbikëqyrës të institucionit.

Kandidatja Liljana Mamadhaj, theksoi nevojën për të luftuar flukset e parasë nga ekonomia e paligjshme që kanalizohen në ekonominë e ligjshme. Ajo theksoi nevojën për të luftuar në mënyrë më efikase kanalizimin dhe pastrimin e këtyre flukseve në sektorin formal financiar. Sipas saj, kjo çështje duhet të trajtohet si çështje prioritare e lidhur me stabilitetin financiar.

Kandidatja Ingrid Konomi, theksoi se Banka e Shqipërisë ka nevojë të përmirësojë procesin e llogaridhënies, transparencës dhe një pune më aktive për përmirësimin e edukimit financiar. Gjithashtu, ajo shtroi domosodshmërinë e një procesi rrënjësor të modernizimit teknologjik të Bankës Qendrore.

Në fund të vitit 2025, përfundoi mandati i gjashtë anëtarëve të Këshillit Mbikëqyrës të Bankës së Shqipërisë. Tre prej anëtarëve të rinj, duhet të propozohen nga vetë Kuvendi i Shqipërisë ndërsa tre kandidatë të tjerë do të propozohen nga Këshilli i Ministrave.

Në procedurën e hapur nga Kuvendi, për tre kandidatët që duhet të propozohen nga ky institucion aplikuan 20 kandidatë, nga të cilët 18 u paraqitën në seancën dëgjimore të zhvilluar nga Komisioni përgjegjës.

Për t’iu propozuar zyrtarisht Kuvendit për votim, çdo kandidat duhet të mbledhë të paktën 28 vota të deputetëve. Ky proces pritet të mbyllet brenda 10 ditëve të ardhshme.

The post Kuvendi mbyll dëgjesat me kandidatët për Këshillin Mbikëqyrës të Bankës së Shqipërisë appeared first on Revista Monitor.

Një draft i nxjerrë për konsultim lidhur me vendimin e Këshillit të Ministrave “Për përcaktimin e kritereve, të procedurave e të dokumentacionit për hyrjen, qëndrimin dhe trajtimin e të huajve në Republikën e Shqipërisë”, i ndryshuar, ka sjellë një sërë ndryshimesh. Kështu së pari synohet që të bëhet një unifikim procedurash për aplikimin  për vizë apo lejeqëndrim duke e mundësuar atë online diçka që shihet si lehtësim.

“Këto ndryshime synojnë të rrisin transparencën, të shmangin paqartësitë dhe të ulin barrën administrative për subjektet që aplikojnë. Për të aplikuar për vizë, shtetasi i huaj aplikon online duke qenë jashtë territorit të RSH-së në sistemin elektronik të vizave ose paraqitet personalisht në Misionin Diplomatik apo Postin Konsullor” thuhet në relacionin e projektaktit.

Po kështu ralcioni nënvizon se është shtuar një parashikim i ri ligjor, sipas të cilit përjashtohen nga detyrimi për t’u pajisur me vizë për hyrje dhe qëndrim në territorin e Republikës së Shqipërisë, për një periudhë deri në 90 ditë brenda 180 ditëve, për qëllime të barasvlershme me ato të vizës së tipit “C”, të parashikuara në ligjin Për të huajt, shtetasit e vendeve të treta që janë të pajisur me vizë të vlefshme me shumë hyrje-dalje ose me leje qëndrimi të vlefshme, të lëshuara nga një shtet anëtar i Bashkimit Europian. Ky parashikim synon lehtësimin e lëvizjes së ligjshme dhe harmonizimin e praktikave me standardet evropiane. Kategoria C është ajo e vizave turistike.

Në kuadër të dokumentacionit bazë të nevojshëm për të gjitha kategoritë e aplikuesve për pajisje me vizë, është shtuar si kërkesë paraqitja e lejes së qëndrimit mbi 12 muaj, të lëshuar nga shteti ku aplikuesi ka rezidencën e ligjshme, me vlefshmëri jo më pak se 3 muaj përtej afatit të vizës së kërkuar.

Në relacion nënvizohet se janë realizuar përmirësime dhe saktësime në kuadër të kategorive të vizës së tipit “D” dhe lejes unike për shtetasit që i nënshtrohen regjimit të vizave, me synim rritjen e qartësisë, plotësisë dhe efektivitetit të procedurave të aplikimit. Në këtë drejtim, është rishikuar dhe përditësuar dokumentacioni i përgjithshëm i kërkuar për këto kategori, duke garantuar një trajtim më të unifikuar dhe të standardizuar të aplikimeve.

“Një risi e rëndësishme e projektaktit është shtimi i një kategorie të veçantë të dokumentacionit shtesë për vizë të tipit “D” për punëtor shtëpie (D/PSH), e cila përcakton qartë kushtet, kriteret dhe dokumentet e nevojshme për këtë kategori aplikuesish, në funksion të formalizimit të marrëdhënieve të punës dhe mbrojtjes së të drejtave të tyre.

Po ashtu, është shtuar dokumentacion shtesë për vizë të tipit “D” për sportistë (D/SP), konkretisht dokumenti që vërteton regjistrimin e shtetasit të huaj në federatën sportive përkatëse në vendin e origjinës. Ky parashikim qartëson më tej kategorinë e sportistëve që hyjnë në vend për këtë qëllim dhe ndihmon në parandalimin e keqpërdorimeve të kësaj kategorie vizash” thuhet në relacion.

Për vizat për motive studimi është sanksionuar nevoja për një garanci financiare në shumën e barazvlefshme me 300 mijë lekë.

Një tjetër element është ajo e shtimit të dëshmisë së penalitetit.

“Ndryshimet e propozuara adresojnë problematikat e evidentuara gjatë zbatimit praktik të procedurave dhe synojnë forcimin e sigurisë juridike, si për aplikuesit, ashtu edhe për autoritetet kompetente. Në këtë kuadër, është shtuar si kërkesë e përgjithshme paraqitja e certifikatës së gjendjes gjyqësore (dëshmi penaliteti), e cila duhet të jetë e lëshuar jo më përpara se 6 muaj nga data e aplikimit.

Kjo kërkesë aplikohet për të gjitha kategoritë e lejeve të qëndrimit, me përjashtim të aplikantëve nën moshën 16 vjeç dhe mbi moshën 75 vjeç, duke respektuar parimin e proporcionalitetit dhe duke marrë në konsideratë kategoritë vulnerabël. Ky parashikim synon rritjen e nivelit të verifikimit të integritetit dhe sigurisë, në përputhje me standardet kombëtare dhe ndërkombëtare” thuhet në relacion.

I njëjti në lidhje me dokumentacionin shtesë për lejen unike si punëtor stinor, ka  shtuar kërkesa për paraqitjen e një dokumenti që vërteton se i huaji plotëson kushtet e përcaktuara në legjislacionin përkatës, në rastet kur aktiviteti që do të ushtrojë përfshihet në kategorinë e profesioneve të rregulluara. Ky dokumentacion mund të përfshijë diploma, certifikata profesionale ose referenca, dhe synon garantimin e ushtrimit të ligjshëm dhe cilësor të profesionit.

“Një risi e rëndësishme e projektaktit është përcaktimi i dokumentacionit shtesë për lejen unike si punëtor shtëpie, kategori e re e integruar në muajin qershor në ligjin “Për të huajt”. Ky përcaktim synon formalizimin e kësaj kategorie punësimi dhe mbrojtjen e të drejtave të punëmarrësve.

Paralelisht, është përmirësuar dokumentacioni i kërkuar për ripërtëritjen e lejes së përkohshme të qëndrimit të tipit “B”, duke qartësuar kriteret dhe procedurat, në funksion të një procesi administrativ më efikas dhe transparent.

Projektakti saktëson dokumentacionin e kërkuar për pajisjen me leje qëndrimi për investitorë, duke synuar eliminimin e paqartësive ekzistuese dhe sigurimin e një procesi të qartë dhe të parashikueshëm për këtë kategori aplikuesish, në funksion të nxitjes së investimeve të huaja” thuhet në relacion.

The post Lejeqëndrimet për të huajt, drafti: Aplikimet online, kushtet e reja, “sitë” dëshmia e penalitetit appeared first on Revista Monitor.

Kuvendi i Shqipërisë ka shpallur pozicionin vakant të anëtarit të Komisionit të Konkurrencës, që mban njëkohësisht edhe detyrën e Kryetarit të Autoritetit të Konkurrencës.

Shpallja e vendit vakant është bërë në prag të përfundimit të mandatit të anëtarit dhe kryetarit aktual, Denar Biba.

Kriteret kryesore për kandidatët në proces është që të jenë shtetas shqiptarë, të kenë vjetërsi pune në profesion jo më pak se 15 vjet dhe të jenë, prej jo më pak se 5 vjetësh, pjesëtarë të trupit akademik universitar ose të mbajnë titullin apo gradë shkencore në fushën e ekonomisë ose të drejtësisë, në specialitetin “E drejtë civile/ administrative”, si edhe të mos jenë larguar nga puna ose nga shërbimi civil me masë disiplinore.

Sipas ligjit, anëtarët e Komisionit të Konkurrencës zgjidhen nga Kuvendi. Një anëtar propozohet nga Presidenti i Republikës, dy anëtarë propozohen nga Këshilli i Ministrave dhe dy anëtarë propozohen nga Kuvendi.

Ligji parashikon që anëtarët e Komisionit zgjidhen me shumicë votash, në prani të më shumë se gjysmës së të gjithë anëtarëve të Kuvendit të Republikës së Shqipërisë, për një periudhë 5-vjeçare. Kuvendi emëron edhe Kryetarin e Komisionit.

Kryetari aktual, Denar Biba, ka kryer një mandat si anëtar i Komisionit të Konkurrencës dhe ligjërisht ka të drejtën e rizgjedhjes.

Autoriteti i Konkurrencës është institucioni garant i konkurrencës së lirë dhe të ndershme në vend, sipas parashikimeve të ligjit “Për mbrojtjen e konkurrencës”.

Autoriteti i Konkurrencës ka në proces hetimet në disa tregje të rëndësishme, si tregu me pakicë i shërbimeve celulare, tregu i sigurimit të jetës për kreditë dhe tregun e transportit ndërkombëtar detar të udhëtarëve. Gjithashtu, në muajin dhjetor ky institucion hap hetim paraprak për tregun e transportit urban në Bashkinë Kamëz.

Ndërkohë, vitin e kaluar ky institucion realizoi një hetim të thelluar në tregun e grumbullimit dhe shitjes me shumicë të fruta-perimeve në qarqet Tiranë, Elbasan, Berat, Fier dhe Korçë. Në përfundim të hetimit, Autoriteti gjobiti gjashtë ndërmarrje të tregun e grumbullimit dhe shitjes me shumicë të fruta–perimeve, për sjellje të bashkërenduar në përcaktimin e çmimeve të këtyre produkteve. Ndërmarrjet të fjalë u gjobitën në masën e 0.15% të xhiros së vitit paraardhës.

Ndërkohë, ky institucion mbylli hetimin e thelluar në tregun në tregun e ofrimit dhe aksesit të shërbimit të internetit ndaj tre kompanive të administrimit në rezidencat e banimit. Komisioni i Konkurrencës arriti në përfundimin se hetimi nuk provoi abuzimin me pozitën dominuese nga ndërmarrjet e hetuara.

Sipas informacionit ë deritanishëm, gatë vitit 2025 Autoriteti i Konkurrencës mori gjithsej 91 vendime. Shumica e tyre kishin të bënin me vlerësimin e përqendrimeve ose shit-blerjeve të ndërmarrjeve.

The post Parlamenti shpall garën për kryetar të Autoritetit të Konkurrencës appeared first on Revista Monitor.

U zhvillua takimi përmbyllës i Thirrjes së 10-të të Programit Kombëtar të Praktikave të Punës, një iniciativë që prej 10 vitesh synon të kthejë përvojën profesionale të të rinjve në punësim në administratën publike.

Programi u ofron mundësi të rinjve të moshës 21–29 vjeç, të diplomuar në ciklin Bachelor ose Master, për të hedhur hapat e parë drejt një karriere në administratën shtetërore. Gjatë këtij viti, një pjesë e pjesëmarrësve kanë përfituar kontrata njëvjeçare pune, si fazë drejt punësimit të qëndrueshëm.

Në këtë aktivitet ishte i pranishëm Kryeministri Edi Rama, i cili theksoi se Programi Kombëtar i Praktikave të Punës ka mundësuar punësimin përfundimtar të rreth 1,600 të rinjve në administratën e shtetit. Sipas tij, ky program ka shërbyer si një urë lidhëse mes arsimit universitar dhe administratës publike, duke kapërcyer pengesën e mungesës së eksperiencës profesionale për të rinjtë.

Kryeministri Rama nënvizoi rëndësinë e meritës në procesin e përzgjedhjes, duke pranuar njëkohësisht se çdo proces vlerësimi mbart edhe elementë subjektivë. Ai u bëri thirrje të rinjve që nuk kanë përfituar kontrata pune të mos dorëzohen dhe të vijojnë përpjekjet e tyre në konkurse dhe mundësi të tjera punësimi.

“Duke marrë një jehonë pozitive nga ata që merren me organizimin e këtij programi për përshtypjet tuaja  dhe njëkohësisht duke pasur një përshtypje pozitive nga ana e ministrave dhe e drejtuesve të institucioneve për qasjen, për seriozitetin, për dëshirën tuaj për të mësuar, unë jam bërë realisht një besimtar i fortë i këtij programi dhe kini parasysh që ky program ka punësuar në mënyrë përfundimtare në administratën e shtetit rreth 1600 persona.

Dhe kjo praktikë ka qenë një urë e ngritur si fillim me universitetin për t’ju dhënë mundësi më të mirëve që të kenë një sallë pritjeje ku aktivisht të vetëofrohen si punonjës të rinj të shtetit dhe nga ana tjetër besoj që tani kemi kapërcyer dhe një ngërç përmes këtij programi, atë ngërçin e eksperiencës që faktikisht i ka penguar në të shkuarën shumë vajza dhe djem që të fitojnë konkurset e shërbimit civil për shkak të mungesës së eksperiencës dhe ishte pak si pula vezën, veza pulën sepse që të hyje në administron publike duhet të kishe eksperiencë, por po të mos hyje në administratën publike s’kishe ku e krijoje eksperiencën dhe në një farë mënyre programi e ka garantuar këtë tranzicion”, pohoi Rama.

Gjatë fjalës së tij, Kryeministri Edi Rama përmendi gjithashtu projektin e Garancisë Rinore, një iniciativë e përbashkët me Komisionin Europian, me vlerë rreth 65 mln euro, që synon të mbështesë të rinjtë përmes trajnimeve, aftësimit profesional dhe mundësive konkrete të punësimit.

“Është rreth 65 milion euro në mos gabohem dhe të shikoni sesi mund të angazhoheni me këtë projekt. Dhe e përsëris në ndërkohë që keni kontratat një vjeçare për të nënshkruar që të vazhdoni procesin bëni gjithçka mundeni që të aftësoheni dhe përtej asaj që ju jep ai orari i punës sepse gjithmonë e më shumë burimet njerëzore cilësore do të jenë një domosdoshmëri për të gjithë dhe gjithmonë e më pak influencat e tjera do të mund të ndikojnë në pikën që të mos ju japin burimeve cilësore mundësinë që të jenë kontribute në shoqëri dhe të tjerëve, ju them që vazhdoni bëni përpjekjet tuaja.

Ka rrugë të tjera, ka konkurse të tjera. Këtu është dhe drejtorja e përgjithshme e administratës publike dhe ne po bëjmë dhe një tjetër re formatim të legjislacionit për administratën publike për të krijuar më shumë fleksibilitet, për të krijuar më shumë mundësi dhe me bindjen që kjo është rruga dhe me provën që rezultatet e këtij programi të praktikave të punës brenda ministrive, brenda institucioneve kanë qenë shumë inkurajuese ne do vazhdojmë të shtyjmë përpara agjendën e thithjes së burimeve më të mira që dalin nga universiteti, të burimeve më të mira që janë aktive ne shoqëri dhe që i përkasin grupit tuaj shoqëror, të rejave dhe të rinjve”.

The post Kryeministri Rama: BE do mbështesë punësimin e të rinjve, 65 mln euro fondi i Garancisë Rinore appeared first on Revista Monitor.

Edhe yield-et e obligacioneve 15 vjeçare kanë pësuar rënie në ankandin e parë për vitin 2026. Sipas informacionit të Bankës së Shqipërisë, në ankandin e zhvilluar këtë javë, yield-i uniform i pranuar dhe kuponi ra në 5.67%, nga 6.19% që kishte qenë yield-i në ankandin e fundit të këtyre instrumenteve, të zhvilluar në nëntor të vitit të kaluar.

Ulja e yield-it u përcaktua kryesisht nga kërkesa e lartë e investitorëve. Nga dy miliardë lekë që kishte qenë shuma e shpallur për financim nga Ministria e Financave, vlera totale e kërkesave arriti në 6.05 miliardë lekë. Ministria e Financave vendosi të rrisë shumën e emetimit afërsisht me nivelin maksimal prej 15% të lejuar nga rregullorja e ankandit, për një shumë totale prej gati 2.3 miliardë lekësh. Në rast se shuma e emetimit nuk do të rritej, me shumë mundësi yield-i do të rezultonte edhe më i ulët.

Fillimi i këtij viti po sjell tendenca të reja të uljes së yield-eve të titujve qeveritarë, për të gjitha maturitetet. Kjo rënie duket e lidhur kryesisht me likuiditetin e bollshëm në treg dhe kërkesën e lartë të investitorëve në këto ankande.

Statistikat e Bankës së Shqipërisë tregojnë se në fund të vitit të kaluar rritja e ofertës së parasë ka prekur nivelet më të larta historike.  Në nëntor 2025, vjetore e agregatit monetar M2 ishte 14.5%, nga 5.8% që kishte qenë në të njëjtën periudhë të një viti më parë. Agregati monetar M2 përbëhet nga paraja jashtë bankave dhe depozitat bankare në Lekë, të përfshira në përkufizimin e parasë së gjerë dhe një rritje më e shpejtë e tij tregon se në ekonomi po injektohen më shumë para në monedhën kombëtare.

Tremujori i parë i vitit është periudha me përqendrimin më të lartë të emetimit të instrumenteve borxhit të brendshëm, me më shumë se 35% e vlerës totale vjetore të emetimeve të parashikuara. Megjithatë, as zmadhimi sezonal i kërkesës nuk ka sjellë rritje të yield-eve, të paktën deri në këtë moment. Yield-et e bonove të thesarit kanë zbritur të gjitha poshtë normës bazë të interesit, ndërsa yield-et e titujve afatgjatë po i afrohen përsëri niveleve minimale historike.

Yield-et e ulëta të titujve qeveritarë dhe sidomos të instrumenteve afatshkurtra ndikojnë edhe koston e kredisë në Lekë për sektorin privat.

Obligacionet afatgjata janë një alternativë e mirë sidomos për investitorët institucionalë. Veçanërisht për shoqëritë që administrojnë fonde me horizont afatgjatë, si fondet private të pensionit, ato krijojnë mundësi për të pasuruar spektrin e titujve në portofolet e tyre dhe për të rritur kthimet për anëtarët. Shtimi i instrumenteve të borxhit me maturim afatgjatë shton premisat për të zhvilluar tregun dytësor të titujve, për t’i bërë ata më likuidë.

Burimi: Banka e Shqipërisë

The post Yield-et e obligacioneve 15-vjeçare e nisin vitin 2026 me rënie appeared first on Revista Monitor.

Banka e Shqipërisë ka përgatitur disa ndryshime rregullatore, që synojnë të adresojnë problemet e transparencës në tarifat e këmbimit të monedhës të lidhura me transaksionet me kartë.

Ndryshimet në projektrregulloren “Për krahasueshmërinë e tarifave të lidhura me llogaritë e pagesave dhe për shërbimin e transferimit të llogarive të pagesave”, përcaktojnë se ofruesit e shërbimeve të pagesave dhe palët që ofrojnë shërbime të këmbimit të monedhës në një ATM ose në pikën e shitjes (POS), duhet të shprehin një vlerë në përqindje (mark-up) që tregon, sa ndryshon kursi i aplikuar mbi kursin e këmbimit më të fundit të disponueshëm, të publikuar nga Banka e Shqipërisë. Kjo përqindje (mark-up) duhet t’i njoftohet paguesit para inicimit të transaksionit të pagesës.

Kjo përqindje (mark-up) duhet t’i shfaqet paguesit para inicimit të transaksionit të pagesës.

Operatorët e pagesave duhet ta publikojnë përqindjen në një mënyrë të kuptueshme dhe lehtësisht të aksesueshme, në një platformë elektronike.

Përveç informacionit të mësipërm, çdo palë që ofron shërbimin e këmbimit të monedhës në një ATM ose në pikën e shitjes (POS) duhet t’i sigurojë paguesit, para inicimit të transaksionit të pagesës informacion për shumën që do t’i paguhet përfituesit në monedhën e përdorur prej tij dhe shumën që do të paguhet nga paguesi në monedhën e llogarisë së tij.

Çdo palë që ofron shërbimin e këmbimit të monedhës në një ATM ose në POS duhet ta shfaqë qartë informacionin në pajisjen përkatëse.

Përpara inicimit të transaksionit të pagesës, kjo palë duhet të informojë paguesin mbi mundësinë e kryerjes së pagesës në monedhën e përdorur nga përfituesi, dhe në vazhdim, kryerjen e këmbimit të monedhës nga operatori i shërbimit të paguesit. Informacioni i mësipërm duhet, gjithashtu, t’i vihet në dispozicion paguesit me një mjet të qëndrueshëm komunikimi, pas inicimit të transaksionit të pagesës.

Ofruesi i shërbimeve të pagesave të paguesit, duhet t’i dërgojë paguesit, pa vonesa të panevojshme, një mesazh elektronik për çdo kartë pagese që i është lëshuar paguesit prej tij dhe që është e lidhur me të njëjtën llogari, pasi ofruesi i shërbimeve të pagesave të paguesit

të ketë marrë një urdhër pagese për tërheqje fondesh në një ATM, ose për një pagesë në pikën e shitjes (POS), e cila është e denominuar në Lek, monedhë e ndryshme nga monedha e llogarisë së paguesit.

Pavarësisht detyrimit të mësipërm, një mesazh i tillë duhet të dërgohet një herë në muaj kur ofruesi i shërbimeve të pagesave të paguesit merr një urdhër pagese të denominuar në Lek, nga paguesi.

Ofruesi i shërbimeve të pagesave duhet të bjerë dakord me përdoruesin e shërbimeve të pagesave mbi kanalin ose kanalet e komunikimit elektronik gjerësisht të disponueshëm dhe lehtësisht të aksesueshëm, përmes të cilave ofruesi i shërbimeve të pagesave do të dërgojë mesazhet elektronike. Informacioni i mësipërm duhet të ofrohet falas.

Kur shërbimi i këmbimit të monedhës ofrohet nga OSHP-ja e paguesit në lidhje me një transfertë krediti, cila iniciohet direkt nëpërmjet internetit (online), duke përdorur faqen e internetit ose aplikacionin përkatëse të OSHP-së, kjo e fundit duhet të informojë paguesin, para inicimit të transaksionit të pagesës, në mënyrë të qartë mbi tarifat e përllogaritura për shërbimin e këmbimit të monedhës të lidhur me transfertën e kreditit.

Para inicimit të transaksionit të pagesës, OSHP-ja duhet t’i komunikojë paguesit, në mënyrë të qartë, të paanshme dhe të kuptueshme, shumën totale të transfertës të kreditit të përllogaritur, në monedhën e llogarisë së paguesit, duke përfshirë çdo tarifë të lidhur me transaksionin dhe çdo tarifë të këmbimit të monedhës. OSHP-ja duhet, gjithashtu, të komunikojë shumën e përllogaritur që do t’i transferohet përfituesit, në monedhën e përdorur nga përfituesi.

Kostot e larta, veçanërisht për tërheqjet cash në ATM nga zotëruesit e kartave të lëshuara nga institucione të huaja financiare, janë bërë objekt pakënaqësie nga turistët e huaj ose shtetasit shqiptarë që jetojnë jashtë vendit dhe përdorin kartat e tyre bankare për të tërhequr para në Shqipëri.

Madje, vitin e kaluar edhe Autoriteti i Konkurrencës i ka rekomanduar Bankës së Shqipërisë të kontrollojë metodologjinë për llogaritjen e komisioneve për tërheqjet në bankomate, si dhe për kartëmbajtësit vendas ashtu edhe për ata të huaj, duke përfshirë edhe përqindjen (mark-up) për shërbimin e Këmbimit Dinamik të Valutës (DÇ), nëse praktikat e ndjekura nga bankat janë në përputhje me aktet rregullatore në fuqi.

Fillimisht, Banka e Shqipërisë pati hartuar një projektrregullore të posaçme për të adresuar këto ndryshime (“Mbi tarifat e pagesave ndërkufitare në zonën SEPA dhe kushtet e transparencës”), por pas konsultimeve ka vendosur që ndryshimet e mësipërme t’i integrojë në rregulloren “Për krahasueshmërinë e tarifave të lidhura me llogaritë e pagesave dhe për shërbimin e transferimit të llogarive të pagesave”

Megjithëse Banka e Shqipërisë propozon të vendosë detyrime eksplicite rregullatore të transparencës të lidhur me kursin ë këmbimit të përdorur në tërheqjet automatike, ekspertët e sektorit bankar thonë se rregulla të transperencës lidhur me këto shërbime ekzistojnë edhe tani. Operatorët e skemave globale të kartave, si Visa apo Mastercard, aplikojnë detyrime transparence për kostot e tërheqjeve në ATM. Komisionet dhe kostot e tjera duhet t’i shfaqen qartë klientit në ATM dhe paraqitja e tyre verifikohet dhe aprovohet prej operatorëve të mësipërm.

The post BSH, detyrime transparence për kursin e aplikuar në tërheqjet e parave nga ATM appeared first on Revista Monitor.