The post Një spiun në celularin dhe lap top-in tuaj, Vodafone dhe One duhet të tregojnë çfarë po ndodh me DPI appeared first on Albeu.com.

Ka marrë përmasat e një skandali të madh shpërndarja e rreth 13 ton mish pule me salmonelë, sasi e cila është konsumuar nga qytetarët shqiptarë gjatë marsit, siç mësohet indirect nga njoftmi i AKU.

skandali përfshin Portin e Durrësit dhe Autoritetin Kombëtar të Ushqimit, ku një sasia e konsiderueshme e filetos së pulës së ngrirë e ardhur nga Brazili, ka rezultuar me salmonelë, teksa një pjesë e saj është hedhur në treg dhe është konsumuar.

Burime për mediat bëjnë me dije se bëhet fjalë për rreth mbi 18 ton në total, ku 13.1 ton fileto pule është hedhur në treg dhe është konsumuar, ndërsa 5.2 ton është bllokuar nga AKU. Sasia ka hyrë në Shqipëri më 11 Mars.

Ndërkohë, AKU, pas publikimit të skandalit, përmes një komunikate të shkurtër për mediat, pranoi faktet, por ndërkohë nuk tregon se cila është kompania që e ka hedhur në treg fileton me salmonelë, duke mos bërë transparencë për konsumatorin.

AlbEu mëson se kompania, e cila e ka hedhur në treg fileton e pulës me salonelë është “AMG FOOD“, ose e njohur me emrin tregtar si “diMal“. Kompani është në administrim dhe në pronësi 100% të shtetasit Mondi Goxha.

AlbEu kontaktoi kompaninë për një koment, por deri në publikimin e këtij shkrimi nuk morëm një reagim.

Rasti është konstatuar pas procedurave standarde, ku inspektorët e AKU-së në pikën doganore kanë marrë mostrat e mishit të importuar dhe i kanë dërguar për analizim.

Deri në daljen e rezultatit të analizave mishi duhet të qëndronte i bllokuar, por ndërkohë ka ndodhur e kundërta.

Pa pritur rezultatin e analizave, subjekti importues, në këtë rast kompania “AMG FOOD“, ose e njohur me emrin tregtar si “diMal“, ka hedhur të gjithë produktin në treg për shitje.

Përgjigjia e analizave ka dalë me 5 ditë vonesë dhe një pjesë e sasisë është shpërndarë në treg dhe është konsumuar, ku bëhet fjalë për 13.1 ton fileto pule.

Përgjegjësia për këtë skandal shkon direkt tek Ministria e Bujqësisë e drejtuar nga Anila Denaj dhe tek institucioni në varësi të saj, Autoriteti Kombëtar i Ushqimit, i drejtuar nga Manush Kullolli.

Reagimi i AKU-së:

Në kuadër të transparencës dhe informimit të publikut, si dhe në funksion të garantimit të sigurisë ushqimore dhe mbrojtjes së shëndetit të konsumatorëve, Autoriteti Kombëtar i Ushqimit ka ndërmarrë një sërë masash të menjëhershme dhe të strukturuara për të adresuar një situatë të identifikuar para disa ditësh gjatë proceseve të kontrollit të produkteve ushqimore të importuara në Portin e Durrësit.

Referuar analizimit në ISUV në datën 21.03.2025, për prani të Salmonella Typhimurium në një mostër produkt pule (fileto e ngrirë), e importuar nga Brazili, AKU ka ndërhyrë në mënyrë të koordinuar me strukturat përgjegjëse për gjurmimin, verifikimin dhe bllokimin e produktit në fjalë, si dhe për marrjen e masave administrative dhe ligjore ndaj subjektit përgjegjës.

Është inspektuar subjekti importues për ndjekjen e gjurmueshmërisë, i cili është referuar në organet e Prokurorisë së Rrethit Gjyqësor Tiranë, për veprime të mëtejshme proceduriale, për sa i takon elementëve të veprës penale për mosrespektim të kritereve të gjurmueshmërisë dhe dhënie të informacionit të pasaktë.

Autoriteti Kombëtar i Ushqimit siguron publikun se situata është në ndjekje të vazhdueshme dhe se çdo veprim është ndërmarrë në funksion të transparencës, sigurisë dhe mbrojtjes së shëndetit të qytetarëve.

Për çdo zhvillim të mëtejshëm, AKU do të vijojë të informojë në mënyrë të saktë dhe të përgjegjshme. /albeu,com

The post SKANDALI/ Si e hëngrën shqiptarët 13.1 ton mish pule me salmonelë nga kompania AMG Food (Dimal) appeared first on Albeu.com.

Emirjon Senja

Jamie, një 13 vjeçar britanik që vrau bashkëmoshataren e tij me thikë pas bullizimit që ajo i bëntë në rrjete sociale, u arrestua nga policia në orët e para të mëngjesit duke u çuar në rajonin e policisë.

Ndërkohë që ishte në makinë, ai u qetësua dhe këshillua nga një punonjës policie, ku ndër të tjera iu tha se nuk duhej të fliste pa takuar një avokat, ndërsa punonjësi tjetër i policisë në sportel u kujdes që ai të trajtohej me dinjitetin që një shoqëri e përparuar i qaset qytetarëve të saj, edhe pse në rastin konkret kishim të bënim me një vrasje.

Shumica e lexuesve të këtyre rreshtave e kanë parë seritë “Adolescence” ne Netlix që po bën bujë dhe s’po zgjatem më tej.

Tani le të vijmë të rasti ynë.

Xhoni*, 16 vjeç, u arrestua mbrëmë nga efektivët e komisariatit nr.6 në Tiranë pasi bashkë me një shokun e tij 17 vjeçar hodhën shishe me benzinë në oborrin e banesës së një personi që kishin konflikt.

Policia shpërndau një video ku dukeshin se adoleshentët ishin prangosur dhe po futeshin në komisariat me duar të lidhura mbrapa dhe dorën e efektivëve të Shqiponjave mbi kokë. Një përthyerje që zakonisht karakterizon ata që arrestohen për krime të rënda.

Jemi të gjithë dakord që ka një problem të madh me adoleshentët e sotëm,ku i gjen rëndom me thika apo hashash nëpër xhepa, për të mos folur për atë gjuhën vulgare ku në çdo tre fjalë, dy nisin me “o k…!” “o k…”. Mua me shqetëson shumë vulgariteti dhe mungesa e theksuar e përgjegjësisë që ka kjo moshë, por kjo nuk është forma që duhen trajtuar ata nëpër komisariate.

Kështu vetëm i bëjmë kriminelë potencialë kur të bëhen 20 apo 30 vjeç duke i frymëzuar me urrejtjen për forcat e rendit, ligjin dhe shoqërinë në përgjithësi.

Mendja rrebele e një adoleshenti që trajtohet ashtu, zakonisht nuk reflekton për krimin e kryer, por frymëzohet për veprime të tjera të dhunshme në vijim.

Jo, kjo nuk është forma e duhur e trajtimit të adoleshentëve, sado problematikë të jenë bërë ata…

*Emri nuk është i vërtetë

The post Jamie anglezi dhe Xhoni shqiptari appeared first on Albeu.com.

Videoja e shpërndarë gjatë mëngjesit të sotëm në rrjetet sociale teksa ngarkohen dokumente nga Bashkia e Tiranës në një kamion ka bërë xhiron e rrjetit duke nxitur edhe dyshime e reagime për shkak të arrestimit të kryebashkiakut Veliaj nga SPAK.

Gjithçka ndodh teksa një ditë më parë nga njëri prej oxhakëve të Bashkisë Tiranë doli tym i zi duke ngjallur po ashtu komente mbi çfarë po digjej.

Sigurisht në këtë kontekst çdo hyrje-dalje në këtë godinë ngjall interes. Në një reagim për mediat, zyra e shtypit të Bashkisë Tiranë bëri me dije se bëhet fjalë për një transferim rutinë të dokumentacionit drejt Arkivës dhe se pretendimet në rrjetet sociale nuk janë të vërteta.

“Lajmet e shpërndara dhe ajo çfarë thotë Berisha nuk janë të vërteta. Po bëhet një transferim i dokumentacionit në Arkivën e Bashkisë së Tiranë”.

Veliaj u arrestua nga SPAK me akuzën e korrupsionit dhe ndodhet në qeli, ndërsa bashkëshortja e tij Ajola Xoxa ka masë sigurie “detyrim paraqitje”. /albeu.com

The post Ngarkimi i dokumenteve në kamion, reagon Bashkia Tiranë: Po spekulohet, jemi duke I transferuar në Arkivë appeared first on Albeu.com.

*Fotoja shoqëruese e shkrimit është gjeneruar me AI

Nga Emirjon Senja

Inteligjenca artificiale po bëhet pjesë integrale e punës së përditshme të redaksive të lajmeve si edhe përdoruesve individualë, me qëllim krijimin e përmbajtjes, analizimin e saj si edhe shpërndarjen automatike apo gjysmë-automatike.

Edhe pse ka pak vite në përdorim masiv, përparimet e shumta dhe kapaciteti i lartë në përpunimin dhe prodhimin e informacionit e kanë bërë AI-në mjaft efikase në këtë drejtim. Por, sigurisht, kjo lehtësi e madhe nuk mund të vinte pa problematikat e saj.

Vazhdimisht kemi folur për nevojën e verifikimit nga gazetarë dhe redaktorë profesionistë të përmbajtjeve të prodhuara nga AI para publikimit. Megjithatë, në këtë shkrim do të flasim për një rrezik disi më të sofistikuar sesa thjesht shpërndarja e informacionit të rremë me shpejtësi për shkak të kapaciteteve të mëdha të AI.

Bëhet fjalë për fenomenin e përsëritshmërisë së informacionit, ose, siç quhet ndryshe, “kanibalizimi i informacionit”, një cikël në të cilin sistemet e AI gjenerojnë përmbajtje bazuar në informacionin ekzistues, i cili më pas riciklohet përsëri në grupin e të dhënave nga i cili AI merr për të gjeneruar përmbajtje të ardhshme. Ky qark vetë-referues ngre shqetësime të mëdha mbi origjinalitetin dhe cilësinë e përmbajtjes së prodhuar.

Fenomeni pritet të bëhet edhe më shqetësues në periudhat në vijim, kur AI do të përdoret edhe më shumë nga mediat për gjenerimin e përmbajtjes.

Si funksionon “kanibalizmi i informacionit”

Koncepti i “kanibalizmit të informacionit” i referohet një procesi ku përmbajtja, kryesisht teksti, i gjeneruar nga Inteligjenca Artificiale përfundon duke u përdorur sërish nga sistemet e Inteligjencës Artificiale si pjesë e bazës së tyre të të dhënave për të krijuar përmbajtje të re.

Inteligjenca Artificiale, si ChatGPT, për shembull, funksionon kryesisht duke aksesuar dhe përpunuar të dhëna të shumta, të cilat janë publike dhe gjenden lehtësisht online për shkaqe të ndryshme, siç janë mënyra se si janë trajnuar algoritmet apo sepse disa të dhëna janë më të disponueshme se të tjera në motorët e kërkimit.

Duke përpunuar këto të dhëna, AI prodhon rezultatet e veta, si artikuj, përmbledhje, tabela, imazhe apo raporte të ndryshme. Këtu mbyllet cikli i parë i prodhimit, dhe kërkuesi i këtij informacioni, pasi ka bërë verifikimet dhe ndërhyrjet e veta, e publikon atë online, duke nisur ciklin e dytë. Këto të dhëna të publikuara online tashmë do të shërbejnë sërish si pjesë e bazës së informacionit që ChatGPT, për shembull, do të referojë për të prodhuar një përmbajtje të re të ngjashme.

Kjo çon në një qerthull riciklimi ku sistemet e AI gjenerojnë vazhdimisht përmbajtje të supozuar si të re bazuar në atë që është prodhuar tashmë nga AI. Kështu, përmbajtja e krijuar nga AI fillon të ushqehet me modelin e saj, pa kontribute të jashtme origjinale, siç do të ishte krijimtaria nga njeriu.

Një problematikë tjetër është shpërndarja e shpejtë dhe e lehtë e përmbajtjes së pavërtetë. Nëse një sistem AI gjeneron përmbajtje që përfshin informacione të pasakta, ai informacion do të përsëritet dhe do të përhapet më tej, pasi sistemet e tjera të AI do ta përdorin si pikë referimi.

Kanibalizmi i informacionit gjithashtu kontribuon në formimin e “dhomave të jehonës”, ku tashmë nuk janë vetëm njerëzit ata që lexojnë informacione që u përputhen me bindjet e tyre, por edhe vetë sistemet e AI, të cilat, duke u ushqyer nga e njëjta bazë të dhënash, përforcojnë paragjykime të caktuara.

Gazetarët sjellin kreativitetin, mendimin kritik dhe emocionet – elementë që sistemet e AI nuk mund të riprodhojnë. Rrjedhimisht, promovimi i origjinalitetit dhe përdorimi i AI si mjet mbështetës, dhe jo zëvendësues i gazetarit, do të jetë sfida kryesore e medias shqiptare në vitet në vijim. /albeu.com

Ky artikull u realizua me mbështetjen financiare të Bashkimit Europian. Përmbajtja e tij është përgjegjësia e vetme e autorit dhe jo domosdoshmërisht pasqyron pikëpamjet e Bashkimit Europian.

The post “Kanibalizmi i informacionit” në përmbajtjen e gjeneruar nga AI: Një kërcënim për origjinalitetin e medias appeared first on Albeu.com.

Gazetari Emirjon Senja ka reaguar në lidhje me rritjen e çmimeve të sigurimeve të makinave, duke e cilësuar këtë si një padrejtësi që penalizon drejtuesit korrektë dhe shpërblen kompanitë e sigurimeve.

Përmes një postimi të tij në Facebook, Senja ka ndarë përvojën personale, duke theksuar se çmimi i sigurimit të automjetit të tij është rritur me 22 euro, pavarësisht se ai nuk ka shkaktuar asnjë aksident ndër vite.

Sipas gazetarit, shkaku i kësaj situate është rregullorja e re e miratuar nga Autoriteti i Mbikëqyrjes Financiare (AMF), e cila ka deformuar sistemin bonus-malus.

Ky sistem, që teorikisht duhet të shpërblejë drejtuesit e kujdesshëm dhe të penalizojë ata me histori aksidentesh, duket se ka nisur të zbatohet kryesisht në drejtimin “malus”, duke ndëshkuar të gjithë njësoj pa marrë parasysh historikun e sigurisë së drejtuesve të automjeteve.

Senja ka kritikuar ashpër mungesën e transparencës dhe zbatimin e pjesshëm të këtij sistemi, që, sipas tij, është kthyer në një mjet për të përfituar më shumë nga qytetarët.

Ai gjithashtu ka vënë në dukje indiferencën e publikut për çështje që prekin drejtpërdrejt xhepin e tyre.

Në fund të statusit, gazetari ka publikuar një lidhje për më shumë detaje mbi analizën e tij dhe ka bërë thirrje për më shumë vëmendje ndaj çështjeve të tilla të rëndësishme.

Statusi i plotë i gazetarit Emirjon Senja:

Sigurimet ose sistemi Malus-Malus

“Pak më parë pata një komunikim me Makbulën, një zonjë grua që më ka ndihmuar këto vite me sigurimin e makinës. Mësova që çmimi i TPL për makinën time, një Volkswagen, e sapo hyrë në moshën e adoleshencës, kushton sot 22 euro më shtrenjtë.

Dhe mqs një miku im i mirë më tha mbrëmë që “i ke patur qejf që i vogël këto çështjet e sigurimeve” 🙂 më takon të them ca gjëra në mes të kësaj heshtjeje të çuditshme të këtij populli heroik.

Gjithçka ka ndodhur për shkak të rregullores së re të AMF, të miratuar gjoja në kuadër të ligjit të ri të sigurimeve, i cili në draft ishte një super ligj, por pasi kaloi dorë më dorë deri në seancë plenare, u squll fare duke i lënë thuajse dorë të lirë kompanive të sigurimeve.

Më ka ruajtur Zoti në rrugë mes shumë të çmendurish dhe nuk kam shkaktuar asnjë aksident deri më tani.

Sipas parimit bazë të sistemit bonus-malus, unë duhej të isha shpërblyer sot dhe jo të ndëshkohesha me 22 euro plus. Historiku im është fshirë dhe unë sot nis zero-zero, njëlloj me një 22 vjeçar që ka 13 muaj me patentë.

Nuk po i hyj detajeve mbi koeficientët e riskut, të cilët kanë nisur të zbatohen të gjithë përveç atij mbi historikun e aksidenteve, gjë që ka sjellë edhe shtrenjtimin e policave të sigurimit.

Në thelb kjo është e padrejtë, të paktën bonus-malus nuk është.

Emrin le t’ia verë AMF dhe karteli që dikton rregulloret.

Por mund të thotë dikush që shpërblimin do ta marrësh vitin tjetër! Kjo nuk është e vërtetë.

Rregullorja e re operon kryesisht vetëm për “malus” dhe shumë shumë pak në drejtimin “bonus”.

(Lexo detajet: https://shorturl.at/JaPnV )

Në dy shkrime radhazi, në nëntor dhe dhjetor paralajmërova këtë që do të ndodhte në janar, por si përherë e dashura e X personazhi apo orientimi seksual i Y personazhi morën më shumë vëmendje e më shumë LIKE se sa ajo që prek drejtpërdrejt xhepin e këtij mileti.” /albeu

The post Shtrenjtohet siguracioni i makinave, gazetari: Sistemi bonus malus vetëm ndëshkon, nuk shpërblen appeared first on Albeu.com.

Në vitin 2016 filloi reforma në drejtësi e cila ka sjellë një sërë problemesh për njerëzit e thjeshtë si dhe për politikanët e korruptuar, të cilët duhet të kalojnë nga porta e drejtësisë.

Avokati Arben Llangozi, në një intervistë për Shqeto ka bërë një përmbledhje rreth sistemit gjyqësor në Shqipëri. Nga njerëzit e thjeshtë e deri tek dosjet “VIP.

“Kemi drejtësi me dy standarte. Kemi hallexhinjtë që vuajnë në dyertë e gjykatave dhe “ferrin” që po hapet për njerëzit e pushtetshëm, politikanët dhe krimin e organizuar”, tha ai gjatë intervistës.

Llangozi foli edhe për dosjet e nxehta të SPAK, duke filluar nga prokurimet publike e deri te anijet që u morën për prodhimin e energjisë elektrike ne Vlorë dhe asnjëherë nuk janë venë në punë. “Janë një serë dosjesh të nxehta që janë tashmë në SPAK duke u hetuar. Nga disa prokurime publike të cilat janë përfituar nga oligarkë të ndryshëm. Tender të energjisë elektrike sic janë anijet në Vlorë të cilat janë marrë për të prodhuar energji elektrike dhe nuk janë vënë asnjë ditë në punë. Kemi disa kryebashkiakë të cilët po hetohen dhe të tjerë që do hetohen nga SPAK”.

Avokat Llangozi parashikon një verë me temperatura të larta përsa I përketë prokurorisë së posatshme. Nga ana tjetër ai thotë se në prokurorite e tjera ka një zvarritje të datave dhe gjyqeve për shkak të volumit të lartë dhe gjyqtarëve të paktë për ti shqyrtuar. “ Dosjet e pronësise janë në numrin më të lartë në rang vendi dhe qytetarët nuk marrin dot drejtësi në kohë por zvarriten për shkak të reformës në drejtësi dhe hartës së re gjyqësore. /albeu,com

The post VIDEO/ Dosjet e bujshme në SPAK! Avokati i njohur: Po vjen ‘ferri’ i te paprekshmëve! Të varfërit dergjen në gjykata appeared first on Albeu.com.

Një denoncim i pazakontë është bërë publik në Youtube në kanalin PISK. Bëhët fjalë, për një deputet të partisë demokratike i cili është kallëzuar në SPAK nga një ish-biznesmen ndërtues nga qyteti i Fierit, Aredo Behari.

Behari akuzon deputetin Luan Baçi që i ka marrë 22 hyrje me vlerë 780 000 euro.

Por si nisi historia?

Aredin Behari pretendon se Luan Baçi, deputet i Kuvendit të Shqipërisë, i ka vjedhur pasurinë dhe nuk ka deklaruar të ardhurat si subjekt i ligjit për deklarimin e kontrollit të pasurisë.

Në kallëzim, Behari parashtron se në vitin 2008 ka themeluar dhe ka qenë aksioner i vetëm në shoqërinë “Geral AM” shpk. Më pas ka hyrë në ortakëri me Luan Baçin, ku kanë nisur edhe mosmarrëveshjet.

Konflikti për kompleksin “Diamond Hill” në Vlorë
Konflikti mes Luan Baçit dhe Aredin Beharit lidhe me aksionet tek kompleksi turistik “Diamond Hill”, i cili ndodhet në zonën e “Ujit të Ftohtë” në Vlorë.

Në kallëzim Behari parashtron se në vitin 2008 ka themeluar dhe ka qenë aksioner i vetëm i shoqerise “Geral AM” shpk.

Më 31 shtator 2009 i ka shitur 50 për qind të aksioneve Krienko Memo.

Pas kësaj Aredin Behari i ka shitur 10 për qind të aksioneve Elsa Baçi, e cila me prokurën e përgjithshme të datës 15 shkurt 2010 ka emëruar si përfaqësues me tagra të plota bashkëshortin e saj, deputetin Luan Baçi.

Aredin Behari, pretendon se pasuria e Elsa Baçi në fillimet e aktivitetit tregtar në vitin 2010 ka qenë në shumën 450mijë euro, dhe deri më tani ky aktivitet ka gjeneruar të ardhura për cilat kallëzuesi pretendon se nga të dhënat që disponon Luan Baçi, nuk i ka deklaruar në ILDKPKI dhe se i ka fshehur në rrjedhën e viteve.

Për këtë çështje prokurorja Manjola Kajana ka kryer disa verifikime në ILDKPI, zyra e Transportit Rrugor dhe biznese.

Njëherësh në 6 korrik 2023, ditën kur prokurorja Kajana ka mbyllur dosjen, ka marë në pyetje deputetin e Kuvendit të Shqipërisë, Luan Baçi.

Në deklarimin e tij deputeti Baçi shpjegon se ka ushtruar aktivitet privat që prej vitit 1997. Me tej ai shpjegon historikun e punësimit të tij dhe se në vitin 2007 është emëruar drejtor Rajonal i Rrugëve të Qarkut Fier dhe në vitin 2008-2013 ka kryer detyrën e Drejtorit të Drejtorisë Rajonale të Shërbimeve të Transportit Rrugor Fier./albeu

The post VIDEO/ Ndërtuesi vlonjat kallëzon në SPAK deputetin e PD Luan Baçi: “Më zhvati 780 000 euro”. Historia pas kompleksit të njohur appeared first on Albeu.com.

Presidenti i Republikës, Bajram Begaj, përcolli një mesazh të ngrohtë urimi për të gjithë shqiptarët, brenda dhe jashtë vendit, me rastin e ndërrimit të viteve. Në mesazhin e tij, ai e cilësoi këtë moment si një kohë reflektimi, bashkimi dhe shprese për një të ardhme më të begatë për Shqipërinë dhe shqiptarët kudo që ndodhen.

Duke theksuar rëndësinë e familjes, atdhedashurisë dhe mikpritjes, Presidenti Begaj uroi që ky vit të shërbejë si një hap përpara drejt përmbushjes së aspiratave të përbashkëta, forcimit të institucioneve demokratike dhe mirëqenies sociale. Ai ftoi qytetarët dhe politikën të punojnë së bashku për progresin dhe zhvillimin e vendit, ndërsa shprehu mirënjohje për të gjithë ata që kontribuojnë për një Shqipëri më të mirë.

Në fund të mesazhit, Presidenti Begaj përshëndeti në mënyrë të veçantë shqiptarët në Kosovë, Maqedoninë e Veriut dhe Malin e Zi, si dhe diasporën, duke u bërë thirrje të ruajnë lidhjet me vendin e tyre dhe të ndihmojnë në përparimin e tij.

Mesazhi i plotë i Presidenti Begaj: 

Të dashur bashkëkombës,

Në traditën tonë, ndërrimi i viteve është momenti i bashkimit në familje, i festimit, gëzimit dhe lutjeve për një vit të ri sa më të begatë.

Ky moment është një mundësi e çmuar për t’u bashkuar rreth vlerave dhe aspiratave tona, duke parë së bashku drejt të ardhmes.

Festa e Vitit të Ri na kthen tek ajo çka është njerëzore, shpirtërore, dhe te vlerat tona më të rëndësishme, si: familja, atdhedashuria dhe mikpritja.

Sot dëshiroj të ndaj me ju urimet dhe falënderimet e mia më të mira:

Për të gjithë shqiptarët brenda e jashtë vendit, që kontribuojnë çdo ditë me punën e dedikimin e tyre për një Shqipëri më të paqtë, më të begatë e më evropiane.

Për të gjithë bashkëqytetarët tanë, që edhe këtë mbrëmje mbrojnë, kujdesen, ndihmojnë dhe sigurojnë vazhdimësinë e jetës së vendit.

Për të gjithë ata që jetojnë në emigracion, ata që studiojnë apo ata që shërbejnë në misione ushtarake e shtetërore në vende të ndryshme të botës.

Sot dëshiroj të përshëndes dhe t’u uroj çdo të mirë të gjithë bashkëkombësve tanë të Republikës së Kosovës, Maqedonisë së Veriut dhe Malit të Zi, kudo ku ata ndodhen.

Të dashur bashkëqytetarë,

Ndryshimi i viteve është moment bilanci dhe reflektimi, të cilin e bëjmë individualisht, si familje, si shoqëri, si shtet e si komb.

Shqipëria ka ende sfida për të përmbushur pritshmëritë, aspiratat, ëndrrat dhe dëshirat e qytetarëve të saj.

Ky vit ishte i pasur me arritje në shumë fusha, të cilat dëshmojnë për qëndrueshmërinë dhe vendosmërinë tonë për konsolidimin e demokracisë dhe shtetit të së drejtës, forcimin e partneriteteve dhe imazhit ndërkombëtar, si dhe përqafimin e risive teknologjike.

• Dikur e varfër dhe e izoluar, Shqipëria sot është anëtare aktive në NATO, është në negociata për anëtarësim në Bashkimin Evropian, është vendi i samiteve ndërkombëtare dhe mikpritëse e miliona turistëve.

• Shqipëria sot është vendi ku reforma në drejtësi po i jep fund kulturës së pandëshkueshmërisë.

• Shqipëria sot mundëson dhe i jep fuqi votës së Diasporës.

Të dashur bashkëatdhetarë,

Ndonëse dëshirat tona mund të ndryshojnë, të gjithë ndajmë të njëjtën shpresë e vizion.

Reformat që do të përgatisin Shqipërinë e së nesërmes kërkojnë përpjekje dhe angazhim nga secili prej nesh.

• Shqipëria ka nevojë për një politikë më aktive, transparente dhe llogaridhënëse.

• Vendi ka nevojë për zyrtarë me integritet dhe institucione të forta, që garantojnë vlerat e demokracisë dhe shtetit të së drejtës.

• Si shtet e shoqëri, duhet të fokusohemi te sfidat afatgjata, me qëllim nxitjen e reformave konsensuale dhe të qëndrueshme për ngushtimin e hendekut social midis brezave, zonave dhe shtresave shoqërore.

• Mbi të gjitha, kemi nevojë për forcimin e rolit të familjes, mirëarsimimin, mirëedukimin dhe ndërgjegjësimin qytetar.

Një mesazh të veçantë kam sot për brezin e ri:

Përqafoni risitë, por lidhuni fort me trashëgiminë e popullit tuaj dhe, mbi të gjitha, duajeni, mësojeni e mbrojeni mirë shqipen e bukur të trojeve tona.

Studioni, punoni e jetoni ku vlerësoni se arrini objektivat tuaja, por mos i shkëpusni asnjëherë lidhjet me vendin tuaj, vendin e prindërve, gjyshërve, familjarëve tuaj, Shqipërinë krenare, Shqipërinë bujare, Shqipërinë e bukur.

Të dashura motra dhe vëllezër,

Të gjithë ne e duam Shqipërinë të zhvilluar, të sigurt, demokratike dhe evropiane.

Viti zgjedhor 2025 është test për ne për të treguar se kemi mësuar nga gabimet e të shkuarës dhe se kemi aftësinë të shohim përpara.

Kemi mundësitë dhe kapacitetet.

Koha na kërkon të bëjmë gjithçka për të arritur objektivat tona.

Si President, prind, bashkëshort dhe familjar, bashkohem sonte me urimet më të përzemërta për ju, familjet tuaja, miqtë, për shtetin dhe shoqërinë tonë.

Gëzuar Vitin e Ri 2025!

The post Presidenti Begaj mesazh shqiptarëve për Vitin e Ri: Koha na kërkon të bëjmë gjithçka për objektivat tona, mirënjohje për ata që punuan për një Shqipëri më të mirë appeared first on Albeu.com.

The post Maqedonia e Veriut, sërish në udhëkryq appeared first on Albeu.com.

 Nga Andri Papa

Vota e emigrantëve i bën zgjedhjet Parlamentare të vitit 2025 një test për kastën politike por edhe për adminstratën e organizimit të tyre dhe sidomos KQZ-në, e cila sipas statistikave të viteve të fundit, nuk e ka kursyer dorën sa i përket shpenzimeve të fondeve. Madje, herë pas here, KQZ ka tejkaluar edhe ministri të rendësishme sa i përket shpenzimeve, ku vërehen jo pak raste të mungesës së konkurrencës në to, por kjo është histori tjetër.

Ndërkohë, me mbylljen e konsultimeve me partitë politike, sipas përcaktimeve ligjore pritet që deri më datë 10 dhjetor, Presidenti i Republikës të dekretojë datën e zgjedhjeve.

Por, në një kohë që partitë politike presin fjalën e Presidentit, një shoqatë e majmur gjatë viteve të fundit me fondet e donatorëve, që duhet KRIIK, ka dhënë çuditërisht alarmin sot duke shpërndarë nëpër numrat e celularëve të gazetarëve një deklaratë, e cila nga përmbajtja e saj tregon se ka synim më shumë t’u thotë donatorëve “jemi këtu” se sa data data për dekretimin e zgjedhjeve, e cila përfundon më 10 dhjetor!

Si gazetar sot, u çudita nga përmbajtja e një deklarate të tillë, ku KRIIK thotë se jemi vonë me dekretimin e datës së zgjedhjeve, ndërkohë që afati përfundon më datë 10 dhjetor! Si mund të jemi vonë kur ligji cakton datën 10 dhjetor si limitin kohor?!

Duke lexuar ato rreshta një mendje e shëndoshë mendon se KRIIK po rreket të tha thotë se “orari për mbërritjen e trenit nuk ka ardhur ende, por treni është me vonesë”.

Çfarë nonsensi!

Si mundet që një organizatë që është mbajtur me fonde pafund nga donatorët dhe që pretendohet se ka ngritur kapacitetet e duhura njerëzore, të bëjë një çedim të tillë logjik? Apo synimet janë të tjera?

Gafa e sotme e KRIIK duke tentuar të dezinformojë gazetarët dhe nëpërmjet tyre edhe audiencën, duhet trajtuar edhe si një sinjal alarmi për donatorët, të cilët duhet të gjëjnë kohën të verifikojnë nëse taksat e amerikanëve dhe europianëve përdoren në shërbim të forcimit të shtetit ligjor dhe demokracisë në vend apo për të financuar manipulimin e opinionit publik shqiptar duke dhënë alarme false si ky i sotmi?!

Ndoshta ka ardhur koha për një verifikim të thellë se si shpenzohen këto fonde dhe kush paguhet prej tyre duke qenë se i madh dhe i vogël brenda dhe jashtë territorit të Shqipërisë e di që data e caktimit të ditës së zgjedhjeve nuk ndikon aspak në procesin e përgatitjes së zgjedhjeve!

Kush e pengon Ilirjan Celibashin për shembull që të vijojë me përgatitjen e infrastrukturës së zgjedhjeve ndërkohë që Presidenti i Republikës konsultohet me aktorët politik që më pas të shpallë një dekret në respekt edhe të afateve ligjore?

Ndoshta, shashka e sotme e KRIIK për zgjedhjet e ka dhënë efektin, deklarata e shpërndarë fshehurazi në numrat e gazetarëve mund t’i kënë rënë në sy edhe ndonjë donatori, por e sigurt është që sot kjo shoqatë shpërndau një dezinformim duke thënë që qenkemi vonë me caktimin e datës së zgjedhjeve, ndërkohë që afati ligjor për ta bërë këtë përfundon pas një jave!! /albeu.com

The post KRIIK-ut i ka ikur treni, si u tentua dezinformimi i opinionit publik sot për datën e zgjedhjeve dhe një mesazh për donatorët e shoqatës appeared first on Albeu.com.

Nga Majlinda Bregu 

Asgjë nuk ndodh menjëherë. Në një vaskë me ujë që nxehet gradualisht,mund te valosh e të vdesësh pa e kuptuar.”

Ky përshkrim i Margaret Atwood nga “Rrëfenja e Shërbëtores” është metafora e përkryer  për ciklin e dhunës ndaj grave i cili nuk është kurrë një episod i izoluar shpërthimi nga “lodhja”, “stresi”, “nervat” apo “pasioni”.

Jo! Këto janë vetęm etiketat e justifikimit të mësuara ndër vite.

Është gjithmonë më shumë se një moment, është një qasje këmbëngulëse e tinëzare, e përforcuar, vlerësuar, shpërblyer ose thjesht e neglizhuar keqas.

1 në 3 gra në nivel botëror pranojnë se kanë qenë të paktën një herë në jetë pre e dhunës fizike, seksuale apo presionit qoftë nga partneri ose një i panjohur.

Në Ballkanin tonë çdo  muaj, prej 2020 janë vrarë mesatarisht  4 gra dhe me shumë se 66% e ndjejnë në lekurë kërcënimin e dhunës në familje. (RCC, Securimeter 2024)

Në Shqipëri 52.9% e grave raportojnë një ose më shumë forma të dhunës gjatë gjithë jetës së tyre.(Grevio, 2024)

Sikur të mos mjaftonin format klasike të abuzimit e dhunës, të trashëguara ndër vite në shoqërinë tonë, të rritur nën thundrën e përdhunës, kohët moderne, kohët e medias sociale dhe të lirive pa kushte e rregulla që ato kanë, na kanë sjellë një kërcënim edhe më të madh, përballë të cilit jemi të rrezikuar, absolutisht, të gjithë, gra, burra e fëmijë.

Është rreziku i homogjenitetit të dhunuesve, i jehonës që dhuna merr  nga  dritaret online, terreni ku anonimati bullizon me format me perverse të të shprehurit, kryesisht gratë, vajzat e të miturit duke krijuar platformën e re të krimit, kronikat e të cilit po shëmbin çdo ditë qetësinë e secilit prej nesh.

Shqipëria është vendi i parë në  rajon me një sjellje paradoksale për botën online.

43% e qytetarëve e konsiderojnë të besueshëm informacionin që marrin nga mediat  sociale, por ama 59,2% janë të trembur për pasojat që ky informacion ka tek fëmijët. (Balkan Barometer 2024)

Ndaj nuk më bën çudi që edhe  rritjen më të shpejtë të fenomenit të dhunës online e raportojnë po shqiptarët me

12% të vajzave  dhe 5% të djemve.

E vërtetë që dhuna është prezente në çdo cep të botës, diku hapur e diku e kamufluar

Me makabritete, vrasje, përdhunime, plagosje, kërcënime,abort selektiv, përndjekje, martesa në moshë të vogël, dhe diskriminim gjithëfarësoj të grave e vajzave pavarsisht pozicionit të tyre ekonomik dhe statusit të tyre shoqëror.

Por në një ditë si sot, duhet menduar pak më gjatë se dhuna nuk është hall që mund ta zgjidhin viktimat.

Duhet menduar tej mediokritetit patetik të postimeve, se si cikli i dhunës,- misogjinia, tellallizimi i përditshëm se vajzat e gratë duhen parë e gjykuar siç i duan klikimet- objekte seksi dhe djemtë duhen rritur e shfaqur  në rrugë, shkollë, punë e familje, siç i do zakoni, burra të fortë e hakmarrës, – përsëritet e mban nën presion breza jo vetëm individë të dhunshëm.

Dhuna është vetëm simptoma e lëngimit të shoqërisë, anemisë të sistemit ekonomik, politik dhe familjar.

Por si në metaforën e Atwood-it,: Asgjë nuk ndodh menjëherë.

Në një vaskë me ujë që nxehet gradualisht,mund të valosh e të vdesësh pa e kuptuar.”

The post Problemet e dhunës nuk i zgjidhin viktimat … appeared first on Albeu.com.

Berlin – Sekretarja e Përgjithshme e Këshillit të Bashkëpunimit Rajonal (RCC), Majlinda Bregu, mori pjesë në takimin e Ministrave të Jashtëm të Procesit të Berlinit që u zhvillua dje në kryeqytetin gjerman. Ministrja e Jashtme gjermane, Annalena Baerbock, vlerësoi punën e RCC-së dhe Sekretares së saj të Përgjithshme, Majlinda Bregu, duke theksuar kontributin thelbësor në zbatimin e Tregut të Përbashkët Rajonal.

“Duke bërë bilancin e 10 viteve të Procesit të Berlinit, mund të them se ka shumë për të qenë krenar për arritjet konkrete përmes agjendave tona të bashkëpunimit rajonal.

Fluksi i pandërprerë i mallrave kritike gjatë pandemisë dhe më tej, korsitë e gjelbra që janë tashmë realitet jo vetëm brenda Ballkanit, por janë zgjeruar edhe me BE-në; dyfishimi i vëllimit të tregtisë brenda rajonit për mallrat në 5 vite; rritja prej 500% e përdorimit të roaming brenda Ballkanit Perëndimor; afro 1,200 kompani të reja kanë marrë pjesë në tregtinë brenda rajonit; lehtësimi i lëvizjes së fuqisë punëtore dhe trajtimi i dinamikave në ndryshim në tregun e punës dhe zhvendosjeve demografike me njohjen reciproke të kualifikimeve të arsimit të lartë dhe të shtatë profesioneve. Të gjitha këto, të njohura dhe të panjohura, kanë bërë që 82% e qytetarëve të Ballkanit Perëndimor të mbështesin bashkëpunimin rajonal,” tha Bregu në takim.

“RCC-ja, në krye të së cilës kam pasur nderin të shërbej gjashtë vitet e fundit, ka udhëhequr punën për Tregun e Përbashkët Rajonal si platforma kryesore për bashkëpunimin dhe integrimin rajonal. Ky treg ka demonstruar se si mund të duket një Treg i vërtetë Rajonal, duke ofruar gjithashtu një pasqyrë të potencialeve të Tregut Unik Europian. Megjithatë, pengesat e mbetura, bllokadat politike apo angazhimet e paplotësuara, së bashku me potencialet e mëdha të pashfrytëzuara, janë gjithashtu pjesë e të njëjtit bilanc që rajoni duhet të përpiqet t’i adresojë,” shtoi Bregu, duke theksuar se RCC, së bashku me partnerët, është duke punuar në planin e ri të të Tregut të Përbashkët Rajonal, miratimi i të cilit pritet në Samitin e Procesit të Berlinit më vonë këtë muaj.

“Bashkëpunimi rajonal nuk duhet të jetë vetëm për nënshkrimin e marrëveshjeve, por për zbatimin e plotë të angazhimeve. Nuk mjafton të drejtojmë gishtin ose të presim që të tjerët të udhëheqin. Ka hapësirë që të gjithë të bëjnë më shumë. Të gjithë kemi nevojë për më shumë integrim sesa dezintegrim; të gjithë kemi nevojë për më shumë bashkëpunim sesa izolim; të gjithë kemi nevojë për më shumë bashkim jo vetëm me fjalë, por me veprime; kemi nevojë për planifikim më të mirë dhe instrumente të qëndrueshme financiare si pjesë e anëtarësimit gradual të BP-së në BE, kemi nevojë për një mendësi prej të rrituri, jo vetëm për një Plan Rritjeje. Ky është një udhëtim kolektiv nëse duam të sjellim ndryshime të vërteta dhe të qëndrueshme. Bashkëpunimi nuk është një zgjedhje, por një domosdoshmëri! Ia kemi borxh vetes dhe brezave të ardhshëm,” përfundoi Bregu.

Pas takimit, Ministrat e Jashtëm të BE-së dhe Ballkanit Perëndimor lëshuan një deklaratë mbi përforcimin e bashkëpunimit, duke vlerësuar arritjet në agjendat e koordinuara nga RCC për CRM. Ata ranë dakord për Deklaratën e Përbashkët që riafirmon marrëdhëniet e mira fqinjësore dhe bashkëpunimin rajonal, që pritet të miratohet në Samitin e Berlinit më vonë këtë muaj.

The post Bregu: Bashkëpunimi nuk është zgjedhje, por domosdoshmëri …edhe për brezat e ardhshëm! appeared first on Albeu.com.