Drejtori i Përgjithshëm i Policisë së Shtetit, Ilir Proda, ka vizituar mbrëmjen e sotme së bashku me ministren e Brendshme Albana Koçiu në Repartin e Djegieve efektivët e dëmtuar gjatë protestës së opozitës. Proda iu ka uruar efektivëve të policisë shërim të shpejtë.

Gjatë një prononcimi për median, ai ka falënderuar punonjësit e Policisë për profesionalizmin, sakrificën, durimin dhe maturinë e treguar përballë ‘një barbarie të tejskajshme’ me bomba molotov, lëndë piroteknike dhe sende të forta, ku për pasojë u lënduan 16 efektivë.

“Falënderim për të gjithë punonjësit e Policisë për profesionalizmin që kanë treguar dhe vetëm Zoti e di sa krenar jam për ta, për atë që ata bëjnë çdo ditë dhe për vetëpërmbajtjen dhe qytetarinë e tejskajshme që treguan sot, në kundërshtim me atë me të cilën u përballën, e cila ishte shenjë e një barbarie ekstreme”, tha mes të tjerash Ilir Proda.

Ndërkohë drejtori i Përgjithshëm i Policisë, Ilir Proda, iu përgjigj edhe pyetjeve të bëra nga gazetarët.

Pyetje: Mesa u vu re gjatë protestës, pati dy të mitur të cilët shfaqën veprime të dhunshme, duke hedhur sende të forta në drejtim të efektivëve. A do të shoqërohen ata, siç ndodhi edhe në protestën e shkuar, ku u shoqërua një 14-vjeçar?

Ilir Proda: Hetimet sapo kanë filluar, ekipet po kryejnë këqyrjen e vendit të ngjarjes. Ne, në vazhdimësi, kemi bërë thirrje që të miturit të distancohen. Do të nxjerrim përgjegjësitë në bashkëpunim me Prokurorinë e Tiranës dhe besoj se edhe në vijim do të kemi qëndrime për këto situata.

Pyetje: Përveç efektivëve të Policisë, a ka protestues të plagosur, me aq informacion sa keni?

Ilir Proda: Nuk kemi informacion deri më tani për protestues të plagosur.

6 të mitur janë në mesin e protestuesve të opozitës që u ndaluan sot në mbrëmje nga Policia e Shtetit në tubimin e opozitës. Mësohet se të miturit të moshave 16 dhe 17 vjeç po mbahen në Komisariatin nr.2 të kryeqytetit.

Në total, sipas informacioneve të fundit, numri i personave të shoqëruar ka shkuar në 22. Policia pretendon se këta qytetarë kanë kryer veprime të kundraligjshme gjatë protestës, përfshirë hedhjen e molotovëve në drejtim të efektivëve.

Ndërkohë, përfaqësuesit e PD-së e konsiderojnë shoqërimin të padrejtë dhe kërkojnë transparencë mbi procedurat e ndjekura.

Në emisionin “Opinion” po diskutohet në lidhje me efektet që kanë protestat e PD në raport me qeverisën.

Deputeti i PD, Klevis Balliu ka folur për protestën e zhvilluar sot për rreth katër orë, duke thënë se opozita do të vijojë aksionin e saj në terren,

Balliu deklaroi se ekziston një “Plan B” i PD në lidhje me formën e aksionit, teksa thekoi se protestat do të përshkallëzohen.

Klevis Balliu: Të gjitha format do të përdoren, kjo protestë nga protesta e parë që ka nisur është shumë ndryshe dhe situata vjen duke u përshkallëzuar. Shumë ndryshe është edhe për përmasat edhe për aksionin edhe për gjithçka tjetër. Në çdo protestë tjetër që do të vijë situata do të përshkallëzohet. Kjo protestë, filozofia e kësaj proteste është vazhdimësia dhe qëndresa.

Blendi Fevziu: A ka një aksion të dytë? A ka një plan B?

Klevis Balliu: Po ka plan B! Dua të bëj diçka të qartë që këto protesta siç janë do të vazhdojnë, por do të përshkallëzohen. Nuk ka diskutim që aksioni i opozitës do të shkojë edhe drejt finalizimit të vet duke marrë këtu edhe forma të tjera, siç është edhe qëndresa në bulevard, që është një opsion që nuk përjashtohet. Kjo është një protestë padiskutim e suksesshme në kuptimin mediatik. A e ka arritur qëllimin kjo? Për aq kohë sa nuk kemi një qeveri teknike do të thotë që nuk ia ka arritur qëllimit. Herës tjetër opozita vjen me një program dhe një plan tjetër aksioni ndaj qeverisë. Risi e kësaj proteste dhe i këtij aksioni është qëndrueshmëria. Suksesi i protestave dhe i aksionit të opozitës do të jetë vetëm nëse arrin te vazhdimësia dhe qëndresa e këtyre protestave që të korrin sukses. Dështimi i aksionit të opozitës nuk ka qenë prej protestave, ka qenë sepse ke ndaluar aksionin. Ky aksion nuk ndalon dhe ky aksion do të përshkallëzohet.

Blendi Fevziu: A është i mjaftueshëm?

Klevis Balliu: Për aq kohë sa qeveria qëndron do të thotë që nuk është i mjaftueshëm dhe herës tjetër do të duhet që të rritësh aksionin. Aksioni do të vijë duke u përshkallëzuar dhe jemi gati që ta finalizojmë qoftë me grevë në parlament, qoftë me qëndresë në bulevard. Nuk ka asnjë aksion që është i përjashtuar.

Të paktën 20 protestues janë shoqëruar në komisariat nga policia menjëherë pas mbylljes së protestës së të martës, e cila nisi te kryeministria dhe u mbyll te parlamenti.

Në videon e siguruar nga Opinion.al,  shihet teksa një prej protestuesve shoqërohet duke u zvarritur nga efektivët e policisë.

Sipas informacioneve, janë lënduar 14 efektivë policie, të cilët kanë marrë ndihmën e nevojshme në spital. I lënduar ka mbetur edhe deputeti demokrat Nallbati, i cili ka djegie në fytyrë dhe një hematomë në kokë.

Ministrja e Brendshme, Albana Koçiu ka vizituar në QSUT, 16 efektivët e Policisë së Shtetit të lënduar gjatë protestës së sotme të Partisë Demokratike.

Koçiu, tha se qëllimi i vetëm i kësaj proteste ishte goditja e punonjësve të Policisë së Shtetit, ndërsa e cilësoi dhunën barbare.

“Kam kërkuar që të vendosen para përgjegjësisë të gjithë ata që sot u bënë pjesë e një dhune barbare. Qëllimi i vetëm i protestës së sotme ishte goditja e punonjësve të Policisë së Shtetit. Ligjet, institucionet dhe njerëzit që zbatojnë ligjin duhet të respektohen”, u shpreh Koçiu.

Kreu i PD Sali Berisha ka folur për mediat pas një vizite që pati në spital, ku po merr ndihmë mjekësore deputeti Bledion Nallbati.

Berisha akuzoi qeverinë për përdorim të dhunës ndaj protestuesve, ndërsa e cilësoi ndërhyrjen e forcave të rendit si një akt të motivuar politikisht

“Kjo ishte një goditje me urdhër politik. Iu vërsulën si bisha përfaqësuesve të opozitës dhe qytetarëve paqësorë”, tha  Berisha për mediat nga spitali i Traumës, duke akuzuar qeverinë për përdorim të dhunës ndaj protestuesve.

Berisha ka denoncuar ashpër veprimet e policisë gjatë protestës, duke i cilësuar uniformat blu si “banditë dhe kriminelë me uniformë” që, sipas tij, kanë sulmuar qytetarët. Ai theksoi se vetëpërmbajtja dhe guximi i protestuesve paqësorë janë shumë më të fuqishme se çdo akt dhune i ushtruar ndaj tyre.

Kreu i PD-së njoftoi se protesta e radhës  e opozitës do të mbahet më 20 shkurt.

Policia ka shoqëruar mbrëmjen e së martës 13 persona, pas protestës së zhvilluar nga opozita përpara Kryeministirsë e më tej përpara Parlamentit.

Gjithashtu për shkak të tensioneve janë plagosur 16 persona, mes të cilëve edhe deputeti i PD-se Bledian Nallbati.

Tre prej të plagosurve janë lënduar nga molotovi i hedhur, ndërkohë që dy prej personave me djegie mësohet se kanë marr plagë të rënda.

Pas përfundimit të fjalës së kreut të PD Sali Berisha,  një pjesë e protestuesve ashtu si edhe në herët e shkuara kanë hedhur lëndë piroteknike ndaj Kryeministrisë, ndërkohë që policia ka ndërhyrë duke i shpërndarë përmes përdorimit të ujit, me 2 autobote.

Momentalisht, një pjesë e protestuesve janë grumbulluar tashmë përpara parlamentit.

Nga foltorja e protestës kombëtare që mbahet këtë të marte para Kryeministrisë, kreu i PD Sali Berisha tha para qytetarëve se ka qenë protesta e tyre ajo që ndaloi një grusht shtet të kryeministrit Rama , ndërsa tha se ai do të dështojë edhe në një grusht të dytë që po përgatit.

“Dhe, shkurti është muaji kur ne zvarritëm diktatorin, shkurti është muaji kur ne do çlirojmë Shqipërinë”, tha ndër të tjera Berisha.

Pjesë nga fjala e Berishës

Revolta juaj në protestën e kaluar dha një sinjal të qartë brenda dhe jashtë vendit se ne nuk do të tolerojmë kurrë grushtin e shtetit për të mbrojtur vjedhjet e Edi Ramës dhe Lubisë së tij. Dhe ja ku jemi këtu, përcilljani atij hajduti dhe mos e mbroni atë.

Ja ku jemi këtu Edi Rama, edhe grushtin e dytë që po përgatit, do të dështojë.

Dhe, shkurti është muaji kur ne zvarritëm diktatorin, shkurti është muaji kur ne do çlirojmë Shqipërinë.

Po të mos ishit ju, viganë, që me guximin tuaj morët në dorë gazin dhe helmin dhe ua flakët mbrapsht hajdutëve, po të mos ishte juaj që me revoltën tuaj shpëtuat nderin dhe dinjitetin e çdo shqiptari, po të mos ishit ju që me trimërinë tuaj u bëtë lajm kryesor në Europë dhe në botë, po të mos ishit ju që rezistuat përballët helmit të skaduar dhe u përballët dhëmb për dhëmb me regjimin, absolutisht Edi Rama do ia kishte dalë me grushtin e shtetit.

Por ky grusht shteti dështoi sepse siç e patë, e denoncuam atë edhe në kancelaritë më të larta të Europës, kur puthadorët e regjimit shpërndanin lajmet e rreme se gjasme Berishës iu ndërpre fjala në Strasburg.

Në fakt, unë po bëja detyrën time para jush, po denoncoja me forcën më të madhe në aulën e demokracisë evropiane, Edi Ramën si kryehajduti i kombit shqiptar, Ramaduron si ndërtuesin e narkoshtetit të parë dhe të vetëm në Europë.

Kjo pra, miqtë e mi, është opozita e vërtetë.

Revolta juaj është sot zëri i ndërgjegjes qytetare, zëri i dinjitetit qytetar, zëri i ndërgjegjes kombëtare, zëri i dinjitetit kombëtar.

Zoti u bekoftë ju, familjet tuaja dhe shqiptarët kudo që janë.

Miq, mund të thonë shumë gjëra kundër nesh.

Mund të na sulmojnë ditë e natë me banalistë dhe televizionet e qeverisë. Por e vërteta është se ne, opozita e vërtetë, me revoltën tonë, parandaluam grushtin e shtetit më të rrezikshëm në historinë e Shqipërisë.

Mirëpo, fituam një betejë. Fituam një betejë shumë të rëndësishme, por nuk kemi fituar ende luftën. Edi Rama, siç e patë, i ka shpallur luftë drejtësisë, ai deklaroi se në fazën tjetër të grushtit të shtetit, nuk do përfillë vendimin e Gjykatës Kushtetuese.

Dhe, nëse ne duam të çojmë në fund këtë betejë, nëse ne duam vërtet të shpëtojmë Shqipërinë, ka ardhur koha që Edi Ramën që tentoi grushtin e shtetit dhe deklaron se nuk heq dorë nga grushti i shtetit, ta shpallim armikun jo vetëm më të pamëshirë, por edhe më të rrezikshëm për shqiptarët dhe Shqipërinë.

Edi Rama është armiku më i rrezikshëm i Shqipërisë jo vetëm prej ngjarjeve të fundit.  Çdo shifër, çdo zhvillim i këtyre 13 viteve flet për një rrënim të Shqipërisë, me autor kryesor Edvin Ramën, Pashiqin shqipfolës për shqiptarët.

Ervin Salianji është parë sërish këtë të martë në protestën e opozitës që po zhvillohet përpara Kryeministrisë.

Edhe pse prej disa javësh Salianji ka nisur një lëvizje dhe takime brenda PD-së, ai iu është bashkuar edhe protestave të mëparshme të zhvilluara nga opozita.

Kujtojmë që opozita ka nisur mbajtjen e protestave kombëtare pasi SPAK  mori nën akuzë zv. Kryeministren Belinda Balluku.

Drejtuesit e Partisë Demokratike dhe kreu i saj Sali Berisha janë nisur tashmë nga selia blu drejt Kryeministrisë ku do të mbahet protesta e opozitës.

Kjo protestë është e dyta për vitin 2026 e organizuar nga opozita .

“Idiot ndërkombëtar” e ka cilësuar Edi Rama prokurorin e Hagës, i cili në fjalën e tij në seancën gjyqësore, tha se ndërkombëtarët nuk e kishin kuptuar se ish-presidenti i Kosovës, Hashim Thaçi kishte maskuar realitetin, lidhur me luftën në Kosovë.

Kreu i qeverisë shqiptare ka publikuar një Facebook një pjesë nga deklarata e tij në Hagë, ku shprehet ndër të tjera:

“Ajo që nuk kuptojnë James Rubin, Wesley K. Clark dhe ndërkombëtarë të tjerë, është që Thaçi ishte i aftë të maskonte atë që po ndodhte në realitet, dhe kjo ndikoi në botëkuptimin e tyre për të kuptuar vërtet sesi funksiononte UÇK. Veçanërisht Rubin dhe Clark treguan që nuk kishin interes për të kuptuar se çfarë po ndodhte në realitet, dhe besonin se puna e tyre ishte në anën e duhur të historisë. Nuk u përballen me atë që po dëgjon tashmë ky trup gjykues dhe për të cilat do të marrë vendimet përkatëse”, tha Prokurori.

Përfaqësuesi i akuzës vijoi duke thënë se “Vendimet e tyre në fakt nuk ishin as me standardet ligjore ndërkombëtare, sa i takon kontrollit efektiv. Kryekomandanti i identifikuar i UÇK, mund të mos ketë qenë në gjendje të ushtronte komandën sikurse ushtritë e SHBA dhe NATO-s, por as nuk kishte nevojë ta bënte këtë gjë. Paragrafi 613 i dosjes sonë, flet për shumëllojshërinë e hierarkive, të cilat janë të mjaftueshme për të konstatuar përgjegjësinë eprore sipas të drejtës kombëtare humanitare”.

Kujtojmë se për rolin e tyre si ish-eprorë të Ushtrisë Çlirimtare të Kosovës (UÇK) në kohën e luftës në Kosovë, Prokuroria e Hagës ka kërkuar ditën e djeshme për Hashim Thaçi, Kadri Veseli, Jakup Krasniqi dhe Rexhep Selimi, nga 45 vjet burgim për secilin.

Kreu i Partisë Demokratike, Sali Berisha, në konferencën për shtyp para protestës së sotme, zbuloi skenarin e saj.

“Skenari i protestës është skenar i një kryengritje të fuqishme paqësore që do të përcjellë, sot më shumë se kurrë, në vatrat e të gjithë shqiptarëve, por edhe në Bruksel, Uashington, Berlin dhe qendra të tjera kryesore, se ne nuk mposhtemi kurrë nga një narkokraturë. Dhe jemi të vendosur që të mbrojmë me çdo çmim, vlerat e përbashkëta që njerëzit e lirë ndajnë në Shqipëri dhe botë. Skenari sot zhvillohet pas dështimit të fazës së parë të grushtit të shtetit dhe inicimit menjëherë të fazës tjetër të grushtit të shtetit, nga Edi Rama. Por zhvillohet edhe pas kartonit të zi që i nxorrën mbrëmë dhe sot në Bruksel njeriut që për vjedhjet e tij, është i gatshëm t’i vërë flakën një procesi aq jetik, integrimit Europian të Shqipërisë, ëndërrës më fisnike të shumë e shumë gjeneratave, ëndërrës së Shqipërisë, zonjë në Europë”, tha Berisha.

“Në këtë kuadër dua të theksoj këtu, thirrjen time për shqiptarët kudo që janë. Është jetike, vendimtare kontributi i tyre.
Shumë e shumë prej tyre, fluturojnë nga vendet ku janë dhe vijnë në Shqipëri, por ftoj ata, të organizohen për protestët më të fuqishme që janë zhvilluar ndonjëherë, para përfaqësive të narkoshtetit në vendet ku jetojnë. Këto protesta të cilat PD do japë kontributin e saj me anëtarët dhe mbështetësit, janë sot të domosdoshme dhe jetike, në këto çaste, në këto momente kur Edi Rama ka tejkaluar çdo lloj ligji, standardi, norme morale në qëndrimet e tij, si kryeministër ndaj shqiptarëve. Pra, kjo protestë shënon, hap dhe siparin e fillimit të protestave pranë përfaqësive të narkoshtetit, për të ju thënë popujve të atyre vendeve se, kjo përfaqësi përfaqëson narkoshtetin, kurse ne në rrugë përfaqësojmë kombin shqiptar”, shtoi Berisha.

Në seancën e së martës, Henrik Hoxha, i pandehur në dosjen “Plumbi i artë” rrëfeu atentatin e dështuar ndaj biznesmenit Lulëzim Masha.

Sipas të pandehurit, që gjatë hetimit ju hoq nga SPAK statusi i bashkëpunëtorit të drejtësisë, tregoi se shënjestra e vërtetë kishte qenë djali i Mashës. Por, sipas tij, meqë nuk e gjenin dot, vendosën t’i vrasin të atin, që ai të shfaqej në ceremoninë mortore e më pas ta ekzekutonin.

Dëshmia e Henrik Hoxhës

Henrik Hoxha: Lulzim Masha bë dijeninë time ka një shkollë private në Tiranë. E ka shtëpinë tek blloku.

Unë kisha porosi nga Nuredin Dumani për djalin e Mashës, jo per Lulzimin.

Nuk e mbaj mend emrin e djalit, por Nuredini më tregoi një foto, më tregoi shtëpinë, shkollën.

Djalin nuk po e gjenim dot.

Njëri nga vëllezërit Dizdari ka qenë i fejuar me vajzën e Mashës. Dhëndri ka hedhur disa prona në emër të vjehrrit e kunatit. Dhëndri u nda nga vajza dhe këta nuk i kanë kthyer ato lekë a prona pas.

Ne nuk po e gjenim dot djalin e Mashës, se rrinte në Maqedoni.

Në fillim diskutuam për 150 mijë euro. Pastaj për Lulzim Mashën për 100 mijë euro.

Mbikëqyrja e Lulzimit zgjati gati 1 vit, se e lamë cikë pas dore ne. Djalin nuk e gjenim dot. Prandaj u angazhua Sakati, që do na jepte informacion nëse ai futej në Shqipëri.

Nuredini thoshte se djali i Mashës mashtronte njerëzit në Maqedoni.

Ne e pritëm, por nuk erdhi. Pastaj morëm masa, që të vrisnim të atin, që djali të vinte në varrim dhe ta vrisnim.

Bashkë me Skerdin e kemi ndjekur Mashan disa herë me motor. E kemi ndjekur në rrugën që bënte.

Për ngjarjen përdorëm një “Golf 4” të lodhur. Nuredini na e gjeti. Kjo sepse me motor mund të binim në sy.

Për ngjarjen unë përdora një menaxher që kisha tek lokali në Tiranë. I thashë do më lajmërosh kur të shohësh këtë person, sepse më ka lekq borxh.

Na njoftoi. Unë shkova atje bashkë me Skerdi Tasin. E lashë Skerdin dhe vetë u vendosa diku ku nuk kishte kamera. Pastaj lëviza. Goditjen nuk e dëgjova, se arma qe me silenciator.

Kisha radio policie, e dëgjoja komplet çfarë kishte ndodhur.

Pastaj me Skerdin u takuam tek 21-shi.

Skërdi më tha, i qëllova dy herë, por më ngeci arma.

Unë një ditë më parë shkreva 1 karrikator me atë armën, por atë ditë ngeci.

Unë i dëgjoja në radio komunikimet e policisë, kur thonin “një person kështu ashtu, me karakteristikat e Skerdit”.

Djalin nuk e gjetëm dot. Rrija përditë aty, se i kishim shtëpitë ngjitur, por asnjëherë nuk e kam parë djalin.

Vendimin, që meqë nuk gjenim dot djalin, do vrisnim të atin e mori Nuredini.

Presidenti francez Emmanuel Macron ka deklaruar se Bashkimi Evropian ndodhet përballë një zgjedhjeje vendimtare, të shndërrohet në një fuqi globale ose rrezikon të mbetet i pambrojtur dhe të “eliminohet” nga konkurrenca ndërkombëtare.

Në një intervistë për shtatë gazeta evropiane, Macron theksoi se që nga publikimi i raporteve të hartuara nga Mario Draghi dhe Enrico Letta, Kina ka përshpejtuar ndjeshëm rritjen ekonomike, duke arritur një suficit tregtar me pjesën tjetër të botës prej rreth 1.000 miliardë eurosh.

“Nëse Europa mbetet thjesht një treg i hapur në të katër anët, do të shkatërrohet. Europa duhet të vendosë nëse është e aftë të bëhet një fuqi ekonomike, financiare, ushtarake dhe demokratike”, u shpreh Macron.

Sipas tij, aktualisht Europa po shërben si faktor rregullues për pjesën tjetër të botës, pa pasur mjetet e nevojshme për të mbrojtur interesat e veta strategjike, teksa paraqiti katër objektiva kryesore për ringritjen e Bashkimit Evropian.

Së pari, thjeshtimi dhe përfundimi i tregut të përbashkët, për të rritur konkurrueshmërinë dhe efikasitetin ekonomik.

Së dyti diversifikimi tregtar dhe reduktimi i varësive strategjike të krijuara ndër vite, përmes rikthimit të kapaciteteve prodhuese evropiane. Në këtë kuadër, Macron përmendi nevojën për forcimin e rolit ndërkombëtar të euros, përfshirë futjen e euros digjitale dhe zhvillimin e stablecoin-eve në euro.

Së treti promovimi i “preferencës evropiane”, duke vendosur klauzola mbrojtëse në sektorë kyç si industria e çelikut, automobilave, kimisë dhe mbrojtjes, me synimin që prodhimi evropian të ketë përparësi në tregun evropian.

Dhe së fundi investimi në inovacion, të cilin Macron e cilësoi si thelbësor për të ardhmen e kontinentit.

“Shpesh përqendrohemi vetëm te thjeshtimi dhe diversifikimi, duke harruar preferencën evropiane dhe domosdoshmërinë e investimeve të përbashkëta evropiane”, përfundoi presidenti francez.

Ghislaine Maxwell, bashkëpunëtorja e dënuar e Jeffrey Epstein, refuzoi t’u përgjigjej pyetjeve nga Komiteti Mbikëqyrës i Dhomës së Përfaqësuesve të SHBA-së të hënën. Maxwell u paraqit virtualisht për një dëshmi me dyer të mbyllura nga burgu i Teksasit ku po vuan një dënim me 20 vjet burg për trafikim seksual.

Kryetari i Komitetit Mbikëqyrës të Dhomës së Përfaqësuesve, James Comer, tha se “siç pritej”, Maxwell kërkoi Amendamentin e Pestë, që i jep të drejtën për të heshtur.

“Kjo është padyshim shumë zhgënjyese,” tha ai. “Kishim shumë pyetje për të bërë në lidhje me krimet që ajo dhe Epstein kryen, si dhe pyetje në lidhje me bashkëpunëtorët e mundshëm.” “Ne sinqerisht duam të arrijmë në të vërtetën për popullin amerikan dhe drejtësi për të mbijetuarit, kjo është ajo për të cilën bëhet fjalë në këtë hetim,” shtoi Comer.

Amendamenti i Pestë i Kushtetutës së SHBA-së u jep amerikanëve të drejtën të shmangin vetë-inkriminimin duke refuzuar t’u përgjigjen pyetjeve ndërsa janë nën betim.

Në një postim më parë në rrjetet sociale, avokati i Maxwellit, David Oscar Markus, tha se Maxwell ishte “e përgatitur të fliste plotësisht dhe sinqerisht nëse Presidenti Trump do t’i jepte mëshirë”.

“Vetëm ajo mund të japë rrëfimin e plotë. Disave mund të mos u pëlqejë ato që dëgjojnë, por e vërteta ka rëndësi”, shkroi ai.

Në një letër të dërguar Komitetit Mbikëqyrës të Dhomës së Përfaqësuesve para paraqitjes së Maxwellit, një grup të mbijetuarish të Epsteinit i bënë thirrje të ishin skeptikë ndaj çdo informacioni të dhënë nga Maxwell. Ata e kritikuan atë për refuzimin e identifikimit të “shumë burrave të fuqishëm” të përfshirë në operacionin e trafikimit të Epsteinit dhe refuzimet e saj për të “bashkëpunuar plotësisht” me zbatimin e ligjit, duke thënë se çdo “trajtim i veçantë” ose “besueshmëri e dhënë dëshmisë së saj”, do të ishte katastrofike për të mbijetuarit.

Maxwell u dënua në vitin 2021 për rolin e saj në joshjen e vajzave të mitura që Epstein, ish-të dashuri i saj, t’i shfrytëzonte. Epstein vdiq në burg në vitin 2019. Ajo po kërkon falje nga Trump dhe është akuzuar se ka gënjyer zyrtarët federalë.

Ukraina do të hapë 10 qendra eksporti armësh në Evropë në një ndryshim të madh politik në kohë lufte, njoftoi të hënën presidenti Volodymyr Zelensky.

Zelensky tha se qendrat do të operojnë në disa vende evropiane, me Gjermaninë që do të jetë ndër të parat, pasi prodhimi i dronëve ukrainas është planifikuar të fillojë atje brenda pak ditëve të ardhshme, shkruan Euronews.

“Në mesin e shkurtit, do të shohim prodhimin e dronëve tanë në Gjermani. Do të marr dronin e parë. Kjo është një linjë prodhimi plotësisht funksionale”, deklaroi Zelensky.

Ai shtoi gjithashtu se “linja të ngjashme prodhimi” tashmë janë në funksion në Mbretërinë e Bashkuar. “Këto janë të gjitha teknologji ukrainase”, theksoi ai.

Zelensky bëri të ditur se aktualisht ka 450 prodhues dronësh në Ukrainë.

Nga “40-50 janë të nivelit të lartë”, sipas presidentit ukrainas.

“Të gjithë duan të investojnë. Ky vit, 2026, do të jetë një vit investimi në teknologjitë tona”, tha ai. “Para së gjithash, dronët. Kjo është një industri e madhe, një industri e re. Sipas financave që hynë në Ukrainë gjatë luftës, është industria më e madhe në Ukrainë”.

Në shtator 2025, Zelenskyy njoftoi se Ukraina do të fillonte të eksportonte armë të prodhuara në vend, duke hequr një kufizim të futur kur Kievi shpalli gjendjen e jashtëzakonshme.

Eksportet e armëve të brendshme të Ukrainës ishin kufizuar shumë që nga fillimi i pushtimit në shkallë të plotë të Rusisë, me gjithçka që dilte nga linja e prodhimit të devijuar në përpjekjet e luftës.

Kujtojmë se industria e mbrojtjes e Ukrainës dhe sektori i saj i dronëve në veçanti kanë shpërthyer që nga fillimi i luftës së përgjithshme të Rusisë.

Afërsisht 800 prodhues armësh operojnë aktualisht në Ukrainë, dhe shumë prej tyre e rritën prodhimin e tyre në një tepricë të konsiderueshme.

Sipas raporteve më të fundit, Ukraina tani po prodhon mbi 4 milionë dronë në vit dhe mund ta dyfishojë këtë numër me fonde të mjaftueshme.

Prodhuesit e armëve i kishin kërkuar Zelenskyy-t për muaj të tërë që të hiqte kufizimet në shitjen e pajisjeve të tyre të prodhimit vendas të nivelit ushtarak, veçanërisht dronëve, për të gjeneruar më shumë të ardhura.

Sipas sistemit të propozuar, Ukraina do të eksportojë pajisje ushtarake të tepërta dhe do të përdorë të ardhurat për të financuar armët e nevojshme urgjentisht.

Banorë që preken nga projekti i rrugës që lidh bregdetin, në zonën e Currilave, me rrugën “Aleksandër Goga” në Durrës kanë protestuar ditën e sotme para bashkisë së Durrësit.

Ata shprehen se kanë mësuar në rrugë jozyrtare se banesat e tyre do të prishen në kuadër të investimit që sjell zgjerimin e rrugës.

Të shqetësuar nga ky investim dhe mungesa e transparencës nga ana e bashkisë, banorët thonë se vlera e shpronësimit për këtë investim publik është larg vlerës së tregut të pasurive të paluajtshme në Durrës.

Të cenuar në të drejtën e pronës, banorët kërkojnë strehim dhe jo shpronësim, nëse investimi për zgjerimin e rrugës do të kryhet pavarësisht rezistencës së tyre.

Një vit nga arrestimi i kryebashkiakut Erion Veliaj, kanë reaguar dy studiot ligjore Kasowitz Benson Torres në Nju Jork dhe Mishcon de Reya në Londër, me të cilat Veliaj ka kontrata për ta ndihmuar në procesin juridik. Në deklaratë thuhet se Veliaj po përballet me mohimin e së drejtës për një proces të rregullt ligjor dhe me një persekutim të qartë politik.

Deklarata e plotë

Sot shënohet 1-vjetori nga paraburgimi i padrejtë dhe i paligjshëm i Kryetarit të Bashkisë së Tiranës, Erion Veliaj, nga Struktura e Posaçme kundër Korrupsionit dhe Krimit të Organizuar (SPAK) në Shqipëri. Gjatë 365 ditëve të fundit, çështja e Kryebashkiakut Veliaj është bërë shembulli kryesor i përdorimit të tepruar dhe abuzimit me masën e paraburgimit në Shqipëri. Veliaj është mbajtur i ndaluar pavarësisht se nuk ka prova të qarta se ai përbën rrezik arratisjeje, se mund të pengojë drejtësinë, apo se do të mund të kryente sërish krimet e pretenduara për të cilat është akuzuar.

Gjatë vitit të kaluar, çështja e Kryebashkiakut Veliaj është shfaqur si shembull flagrant se si demokraci të brishta, si ajo e Shqipërisë, mund të shkelin të drejtat bazë të procesit të rregullt ligjor të një individi përmes një persekutimi politik të mangët.

Nga shkurti deri në korrik të vitit të kaluar, Kryebashkiaku Veliaj u mbajt i ndaluar pa u akuzuar as për krimet për të cilat mbahej në paraburgim.

Në shtator, ndalimi i tij u përdor nga Këshilli Bashkiak i Tiranës si bazë mbi të cilën u kërkua të shkarkohej nga posti i Kryetarit të Bashkisë – një manovër që duket se synonte t’u hiqte të drejtën e përfaqësimit votuesve të Tiranës, të cilët e kishin zgjedhur atë për tre mandate.

Vetëm muajin e kaluar, Kryebashkiakut Veliaj – i cili ka zgjedhur të mbrohet vetë ndaj akuzave të SPAK – iu mohua plotësisht qasja në mbi 60,000 faqe prova, mbi bazën e të cilave ai mund të përgatisë dhe të ngrejë mbrojtjen e tij në gjyq.

Së fundmi, prokurorët e SPAK kanë argumentuar se mbajtja e vazhdueshme në burg e Kryebashkiakut Veliaj justifikohet sepse ai kërkoi këshillim ligjor në SHBA për t’u mbrojtur, pasi u bë e qartë se nuk mund ta bënte realisht këtë vetë. Ky nuk është proces i rregullt ligjor; është ndëshkim pse kërkon mbrojtje dhe një shkelje e hapur e së drejtës së tij për t’u mbrojtur.

“Që nga dita e parë, kjo çështje ka qenë një persekutim politik i shoqëruar me abuzime skandaloze të procesit të rregullt ligjor. Sot shënohet një vit i plotë i kësaj padrejtësie të vazhdueshme,” tha Daniel J. Fetterman, partner në firmën ligjore Kasoëitz dhe një nga këshilltarët ndërkombëtarë të Kryebashkiakut Veliaj. “Çështja e Kryebashkiakut Veliaj i ka të gjitha shenjat dalluese të një gjyqi-spektakël politik dhe trajtimi i tij bie shumë poshtë çdo standardi të pranueshëm amerikan dhe europian të drejtësisë, procesi të rregullt ligjor dhe drejtësisë.”

Megjithatë, ka shenja se trajtimi i Kryebashkiakut Veliaj nuk po kalon pa u vënë re. Në nëntor të vitit të kaluar, Gjykata Kushtetuese e hodhi poshtë përpjekjen e Këshillit Bashkiak për ta larguar Kryebashkiakun Veliaj nga detyra, duke konfirmuar mandatin e tij dhe duke siguruar që ai të mbetet Kryetar Bashkie deri në vitin 2027. Mediat shqiptare kanë identifikuar natyrën ndëshkuese të qasjes së SPAK ndaj Kryebashkiakut Veliaj, duke e quajtur atë një “mentalitet represiv”, të ngjashëm me një “revolucion të ri kinez” që mbështetet te propaganda e sponsorizuar për të justifikuar shkeljet e të drejtave civile. Media të huaja, si EU Reporter, kanë përsëritur ndjesi të ngjashme, duke vërejtur “shthurjen e ngadaltë të sistemit të drejtësisë në Shqipëri” në një çështje që “tregon shenja të qarta motivimi politik” dhe që mbetet “shumë larg standardeve europiane.” Dhe në dhjetor, Avokati i Popullit i Shqipërisë publikoi një raport ku konstatoi se masat e sigurisë që rregullojnë trajtimin mjekësor të Kryebashkiakut Veliaj në paraburgim ishin të paarsyeshme dhe shkelën privatësinë e tij.

Në mënyrë domethënëse, komuniteti ndërkombëtar ka njohur publikisht të metat me paraburgimin e vazhdueshëm të Kryebashkiakut Veliaj. 76 kryetarë bashkish dhe përfaqësues të “Rrjetit të Qyteteve Ballkanike B40” – që vijnë nga parti dhe prejardhje politike të të gjithë spektrit ideologjik – lëshuan një letër të përbashkët që denoncon paraburgimin e Kryebashkiakut Veliaj. Ata adoptuan një konstatim në Raportin e Komisionit të Venecias të Këshillit të Europës për vitin 2025 se “përdorimi i paraburgimit ndaj kryetarëve të bashkive në detyrë përbën një rrezik serioz për qeverisjen demokratike”, sepse “i privon qytetarët nga e drejta për përfaqësim, duke hequr mënjanë, pa një proces të rregullt ligjor, përfaqësuesit e zgjedhur prej tyre”.

Paraburgimi i Kryebashkiakut Veliaj duhet të përfundojë. Vazhdimi i mbajtjes së Kryebashkiakut Veliaj në paraburgim dhe mohimi i të drejtave themelore të procesit të rregullt ligjor – si mundësia për të shqyrtuar provat kundër tij – tradhton premtimin demokratik të Shqipërisë, hedh dyshime serioze mbi përparimin e reformave të saj dhe mund të vërë në rrezik synimet e saj për anëtarësim në BE.

Udhëheqësit globalë, organizatat demokratike dhe mediat duhet të vazhdojnë ta mbajnë në qendër të vëmendjes këtë padrejtësi dhe të kërkojnë lirimin e menjëhershëm të Erion Veliajt nga paraburgimi.

Protesta e thirrur sot në orën 17:00 nga opozita ka vënë në gatishmëri Policinë e Shtetit, e cila ka marrë masat për çdo skenar të mundshëm, duke vendosur efektivë jo vetëm te kryeministria, por edhe te parlamenti dhe institucione të tjera. Mësohet se nga policia se do të ketë masa shtesë me më shumë efektivë, ku rreth 1400 forca të policisë, duke nisur nga ato të rendit, FNSH, Shqiponjat dhe strukturave të tjera do të jenë të angazhuar për mbarëvajtjen e protestës. Në gatishmëri do të jenë edhe forcat RENEA në rast nevoje.

Gjithashtu edhe Garda e Republikës do të jetë e gjitha në gatishmëri për të kryer detyrën në ruajtjen e institucioneve. Ndërkohë në protestë të gjithë efektivët do të jenë të pajisur me maska kundragaz. Do të ketë edhe autobotë me ujë  që do të qëndrojnë pas kryeministrisë nëse do të ketë nevojë në raste incidentesh, por edhe te parlamenti.

Ashtu si në çdo protestë do të krijohet kordoni me efektivë policie para kryeministrisë dhe perimetrit rreth saj. Në terren do të përfshihen edhe agjentët civilë, të cilët do të jenë të shumtë për të monitoruar mbarëvajtjen e protestës. Dyert e kryeministrisë do të jenë të blinduara me veshje metalike. Policia ka instaluar përgjatë gjithë bulevardit ‘Dëshmorët e Kombit’ kamera me rezolucion të lartë.

Gjithashtu rrugët rreth kryeministrisë do të bllokohen që prej orës 15:00 deri në përfundim të protestës.

Policia e Tiranës ka zhvilluar mbledhje për protestën duke qenë e angazhuar maksimalisht. Në mbledhje kanë qenë të gjithë drejtuesit e policisë së Tiranës dhe shefat e komisariateve të Tiranës. Në mbledhje janë dhënë porositë lidhur me detyrat e policisë për ruajtjen e rendit dhe të sigurisë dhe mbarëvajtjen e protestës. Efektivëve u është kërkuar që të kenë kujdes dhe të mos provokohen nga protestuesit dhe të ruajnë qetësinë. Gjithashtu u është kërkuar që ndërhyrjet të jenë të minimizuara vetëm në raste nevoje dhe mos të krijohen përplasje të provokuara me protestuesit.