“Nuk më kanë votuar të ulem me partitë e vjetra”, kështu ka deklaruar mbrëmjen e sotme kreu i partisë Mundësia Agron Shehaj, ndërsa ishte i ftuar në emisionin “Opinion” në Tv Klan.

Tema e diskutimit të kësaj mbrëmjeje ishte “A do të bashkohet opozita?” dhe i pyetur nga gazetari Blendi Fevziu lidhur me qëndrimin e tij ndaj bashkëpunimit me partitë e tjera opozitare, Shehaj tha se kjo nuk mjafton për ta rrëzuar nga qeveria kryeministrin Edi Rama.

Sipas Shehajt, ideja se bashkimi i opozitës është një “çelës magjik” për zgjidhjen e problemeve të Shqipërisë është e gabuar. Madje ai kujtoi se bashkëpunime të tilla janë provuar edhe më parë, pa sjellë ndryshim real për qytetarët.

Kreu i partisë Mundësia tha se problemi kryesor është mungesa e një alternative të besueshme politike, që të adresojë hallet konkrete të qytetarëve, si çështja e pronës, zhvillimi ekonomik, arsimi dhe shëndetësia. Sipas tij, qytetarët nuk janë të interesuar vetëm se kush largohet nga pushteti, por çfarë ofron opozita në vend të tij.

Pjesë nga biseda në studio:

Blendi Fevziu: Shehaj, ishe më skeptik ditën e hënë, ku je me pozicionin e sotëm?

Agron Shehaj: Unë isha për jo në fakt, jo skeptik. Tani po flasim për bashkimin sikur bashkimi të ishte çelësi magjik për çdo problem që ka Shqipëria.

Blendi Fevziu: Jo nuk po flasim për bashkimin, bashkëpunim i opozitës se fjala bashkim është shumë e madhe…

Agron Shehaj: Bashkëpunim, se na ka munguar bashkëpunimi dhe ky është problemi i madh i shqiptarëve dhe kjo është arsyeja pse Edi Rama është në pushtet dhe ne jemi në opozitë. Tani bashkëpunimi, bashkimi në një qëllim. Qëllimi në thelb i bashkimit është të ikë Rama. Ky është. Rama është një kryeministër i korruptuar dhe duhet të ikë sa më shpejt, por ne bashkëpunime të tilla kemi patur pa fund.

Blendi Fevziu: Të ikë Rama apo të ikë Partia Socialiste?

Agron Shehaj: Tani një sekondë, kur themi të ikë Rama themi të ikë Partia Socialiste, të ikë kjo mazhorancë. Por ne 34 vjet këtë kemi pasur gjithmonë, njëherë të ikë Berisha, të ikë Nano, pastaj të ikë Berisha prap, tani të ikë Rama. Problemi është se ne duhet të shkojmë përtej kësaj. Ne duhet të flasim për alernativën, është alternativa që na duhet.

Kush na dëgjon na shtëpia thotë, ore çfarë po flasin këta?! Për bashkim, të ikë Rama, të vijë dikush tjetër. Ai që na dëgjon ka hallin e pronës dhe do të dijë, Rama nuk ia dha pronën, ia mori dhe ia dha një oligarku, dhe do të dijë, këta që duan të vijnë çfarë plani kanë për pronën, do ma kthejnë apo s’do ma kthejnë?! Sa të besueshëm janë, që do vijnë ta shkundin Ramën dhe ta rrëzojnë?! E njëjta gjë vlen për atë të riun në Theth që Rama nuk ia dha pronën, që Rama nuk ia dha lejen e ndërtimit të ndërtonte një lokal të vogël të jetonte me turistët, e ia prishi.

E njëjta gjë vlen për shëndetësinë, për arsimin, ne duhet të flasim për një alternativë, për një alternativë të besueshme dhe vetëm kështu e fitojmë besimin e qytetarëve. Ore ne duhet të shikojmë… ne kemi patur zgjedhje, se këtu jemi duke dhënë mend, duke dhënë opinione. Duhet të shikojmë faktet. Në zgjedhjet e fundit në 2025-ën, partitë e vjetra apo tradicionale kanë humbur 1/3 e votave, kanë kaluar nga 750 mijë vota, në 500 mijë vota. Kanë humbur 250 mijë vota. E kanë kuptuar apo jo që kanë një problem besueshmërie?!

Kanë marrë për herë të parë partitë e reja pothuajse 150 mijë vota. Qytetarët shqiptarë janë lodhur me partitë e vjetra, i thanë 100 mijë herë, ndryshoni, rinovohuni, riformohuni sepse kështu nuk mund të vazhdojmë dhe përqafuan një parti tjetër politike, partitë e reja.

Dhe partitë e reja nuk u votuan të ulen me partitë e vjetra. I votuan sepse besuan se ata janë ndryshimi. Dhe ne si parti e re, nuk mund të na thonë ‘tani hajde ulemi ne’. Sepse neve nuk na kanë votuar të ulemi me partitë tradicionale, sepse ndryshe votonin partitë tradicionale, nuk votonin për ne. Ne duhet të flasim për alternativën, duhet të fitojmë besimin e qytetarëve. Si ikën Rama? Rama nuk ikën me bashkimin, nuk mjafton bashkimi. Që të ikë Rama duhet të fitojmë besimin e qytetarëve dhe për sa kohë që s’e fitojmë besimin e qytetarëve Rama nuk ikën.

Deputeti i PD, Luçiano Boçi, theksoi se selia blu është e hapur për të bashkëpunuar me çdo parti opozitare që është kundër qeverisë “Rama”.

Në emisionin “Opinion”, Boçi tha se demokratët e kanë bërë “lëshimin e parë” dhe se janë të gatshëm për t’u ulur në tryezë me forcat e tjera politike. Sipas deputetit, kjo do të jetë dhe gjëja më e mirë që opozita mund të bëjë në këto kushte që ndodhet.

“Lëshimin e parë ne e kemi bërë. Nuk është se ne kemi kompleksin që dikush mori iniciativën, iniciativën që për hir të së vërtetës ne e kemi marrë disa herë për të bashkuar forcat politike dhe ai po e bën. Kemi thënë, e po e themi, që ne ulemi si të barabartë pavarësisht madhësisë apo vogëlsisë së forcës politke. Unë mendoj që nisma është anekdoti më i mirë për gjithë këtë toksifikim që është bërë opozitës në këto vite, përçarje, përplasje, mungesë iniciative të përbashkët,  kakofoni, çarje në situata zgjedhore… sepse alternativat kanë ekzistuar”, tha ai.

Cilat janë pikat që bashkon opozitën kundër mazhorancës pavarëissht ndryshimeve? Pikërisht për këtë temë po diskutohet në studion e emisionit “Opinion” në Tv Klan, ku ishte i ftuar dhe Dashamir Shehi, kreu i LZHK-së.

Shehi u ndal fillimisht tek drejtësia në vend, për të cilën u shpreh se është e “dhunuar”, por ama e cilëson mjetin e duhur për t’u përdorur nga opozita.

A bijmë dakord që shpresa më e madhe që kemi ne si opozitarë është kjo drejtësi, e keq, e dhunuar, e korruptuar, vendosja emrin si të duash. Po s’kemi më të mirë se kaq. A jemi dakord që mirë a keq këta prokurorë na japin një dorë në këtë muhabet? E jo thjesht ta interpretojmë se po na japin një dorë për të ardhur në pushtet, por po i japin një mundësi shoqërisë shqiptare në një farë mënyre të pastrohet“, tha ai.

Sa i përket bashkëpunimit të opozitës, ose cilësuar ndryshe si bashkimi i saj, Shehi shprehet se “Ça do bëjmë, do bëjmë krushqni ne? Në qoftë se bijmë dakord për këto gjëra, që është gabuar e po mundohemi t’i rikuperojmë, mund të bëjmë një rrugë bashkë”.

Adriatik Lapaj, kreu i Lëvizjes Shqipëria Bëhet, ndërsa ishte i ftuar mbrëmjen e kësaj të enjteje në studion e emisionit “Opinion”, bëri thirrje për krijimin e një Aleance të Madhe Popullore, pasi sipas tij vetëm një front i gjerë qytetar mund të sjellë largimin e qeverisjes së kryeministrit Edi Rama.

Lapaj u shpreh se situata aktuale politike në vend nuk është normale dhe se skandalet e korrupsionit po shfaqen njëri pas tjetrit, duke e bërë të papranueshme vazhdimin e qeverisjes aktuale.

Sipas tij, partitë e opozitës nuk mjaftojnë, ndaj është e domosdoshme përfshirja e shoqërisë civile, intelektualëve, aktivistëve dhe qytetarëve të angazhuar, përtej siglave politike.

Biseda në studio:

Blendi Fevziu: Adriatik mendon se duhet të bashkëpunojë opozita?

Adriatik Lapaj: Nëse bëhet fjalë që për shkak të makutërisë së madhe të kësaj që  po ndodh duhet një front i madh qytetar për ta detyruar Edi Ramën të tërhiqet dhe vendi të shkojë në procese demokratizuese patjetër duhet një front i madh i të gjithë qytetarëve aktivë, shoqërisë civile, intelektualëve të angazhuar, partitë politike…

Blendi Fevziu: Nuk mjaftojnë vetëm partitë e opozitës?

Adriatik Lapaj: Absolutisht nuk mjaftojnë. Ndaj po them. Në këtë drejtim, nuk diskutohet këtu pse… i dëgjova dhe bashkëbiseduesit. Është një diskutim normal për një situatë krejt normale. Nuk jemi në një situatë normale. Jemi në një situatë kur zëvendëskryeministrja e vendit është kapur në flagrancë, pra është kapur gafil, dhe kur javë për javë na del një skandal kur ky vend vidhet. Në këtë kuptim kjo qeveri nuk mund të rrijë asnjë orë më shumë. Nuk është çështja këtu e një normaliteti, pse mori 83 mandate. Ato 83 mandate sot vlejnë zero. Zero! Sepse ato 83 mandate janë fituar nuk kuhte të tjera, kur kjo që po ndodh sot nuk ka qenë në tavolinë nuk dihej. Dhe shoqëria jonë nuk mund të pranojë situatën se këtu do bëhen reforma… Çfarë reformash mo?! Ky duhet të ikë pa kushte, jotë vendosë ai kushte. Nuk e ka mazhorancën ai fare tani. Në këtë drejtim duhet një Aleancë e Madhe Popullore. Përtej siglave.

Blendi Fevziu: O Adriatik por ti ke dy muaj aty e s’të vjen njeri!

Adriatik Lapaj: Nuk është e vërtetë kjo, ju keni kaluar, protesta e parë është bërë më 20 dhjetor, e dyta është bërë më 4 janar, e treta më 17 janar, kanë ardhur duke u rritur dhe ju jeni dëshmitarë.

Blendi Fevziu: Dhe tani keni tjetrën me 31…

Adriatik Lapaj: Me 31 ditën e shtunë, pasnesër, në orën 6 pasdite ne kemi protestën e katërt që mendojmë se do jetë goxha masive.  Pra qëndrueshmëria, vazhdueshmëria, goditja jonë me precizion, me shënjestër të përqendruar është si ai guri që të bie në këpucë padashje dhe ta vret këmbën dhe ta bën gjak dhe ti nuk vrapon dot më, le të jesh atleti më i mirë në botë. Në këtë drejtim sigurisht duhet një Aleancë e madhe Popullore në shesh përtej siglave, e përbërë nga intelektuale, aktivistë, shoqëri sicivle, parti politike, që nuk vendosin egon e tyre të parën. Halli që kemi për të rrëzuar këtë qeveri është i përbashkët gjithë jetën!

Një skandal politik i madh ka shpërthyer në Malin e Zi, pas rrjedhjes së një videoje seksuale që përfshin një zyrtare të lartë dhe një këshilltar të martuar të Presidentit të Malit të Zi.

Mirjana Pajković, drejtoreshë për Promovimin dhe Mbrojtjen e të Drejtave të Njeriut, dhe Dejan Vukšić, ish-drejtor i Agjencisë Kombëtare të Sigurisë, janë detyruar të japin dorëheqjen pas shpërndarjes së materialit në rrjetet sociale, duke shkaktuar një stuhi zemërimi në qeveri.

Pajković dhe Vukšić dhanë dorëheqjet brenda disa javësh nga njëri-tjetri, pas shpërndarjes së materialeve të papërshtatshme që supozohet të tregojnë Pajković duke kryer akt seksual me Vukšić, i cili është i martuar.

Në një deklaratë të saj, Pajković inkurajoi “çdo grua” të kundërshtojë idenë që ato duhet të heshtin për situata të tilla dhe akuzoi Vukšić për shantazh me videon, të cilën ajo tha se nuk e dinte deri në shpërndarjen e saj.

“Kur u ekspozova ndaj dhunës ekstreme që postova në rrjetet sociale, ku personi i parë pranë presidentit të vendit, ish-përfaqësuesi i lartë i Agjencisë së Sigurisë Kombëtare, me insistim dhe gjatë gjithë bisedës më tha që nuk do të kisha asnjë vend ku të fshihesha dhe asnjë vend ku të jetoja në Malin e Zi”, tha Pajković.

Ajo shtoi se largimi i saj ishte për arsye personale, por e akuzoi Vukšić për kërcënimin me videon, duke e detyruar atë të mbante gojën mbyllur. Sipas Pajković, Vukšić e kërcënoi me dëmshpërblim nëse ajo nuk pranon kërkesat e tij.

“Për shembull, kur dikush po ju shantazhon… Kur dikush më i fuqishëm kërkon një favor apo sjellje që nuk dëshironi, dhe nëse refuzoni, do të dorëzoheni tek dikush që është mishërimi i pushtetit më të lartë të shtetit,” tha ajo.

Të dy palët kanë mohuar akuzat dhe kanë paraqitur ankesa penale. Pajković ka bërë një ankesë për shpërndarjen e paautorizuar të materialeve të papërshtatshme, duke përfshirë një foto të saj. Ajo gjithashtu ka pretenduar se ka marrë kërcënime nga një linjë fikse brenda zyrës së presidentit.

Në një mesazh të regjistruar, një zë thuhet të ketë paralajmëruar që “i gjithë Mali i Zi do ta shohë” materialin që komprometon Pajković.

Pas shpërndarjes së materialeve, Vukšić dha dorëheqjen në fund të dhjetorit, gjithashtu duke përmendur arsye personale. Ai mohoi çdo përgjegjësi për shkeljen e privatësisë së Pajković dhe shpërndarjen e videove të diskutueshme, duke theksuar se ai e pa materialin për herë të parë vetëm kur ai filloi të qarkullonte në mënyrë të paligjshme në rrjetet sociale.

Vukšić gjithashtu e akuzoi Pajković për vjedhjen e telefonit që supozohet të kishte regjistruar kërcënimet e tij dhe për përpjekje për të shantazhuar atë që të tërhiqte kandidaturën e tij për postin e gjyqtarit në Gjykatën Kushtetuese.

Ndërkohë që ende mbetet e paqartë kush e publikoi videon seksuale, shpërndarja e pornografisë hakmarrëse është një krim i rëndë në Malin e Zi. Ata që dëshmohen fajtorë mund të përballen me dënime deri në pesë vjet burg.

Presidenti i SHBA-së, Donald Trump, tha se Presidenti rus, Vladimir Putin, pranoi të mos bombardonte Kievin për një javë për shkak të të ftohtit.

“Unë personalisht i kërkova Presidentit Putin të mos bombardonte Kievin dhe qytete të ndryshme për një javë, dhe ai pranoi ta bënte këtë”, tha Trump gjatë një mbledhjeje të kabinetit, duke përmendur “të ftohtin e jashtëzakonshëm” në rajon.

“Ai ishte shumë i sjellshëm. Shumë njerëz më thanë: ‘Mos e humb telefonatën, nuk do të marrësh asgjë’. E megjithatë ai e bëri”, shtoi Trump.

Ndër të tjera Trump theksoi se lufta mes Ukrainës dhe Rusisë po i vjen fundi.

“Ne i kemi dhënë fund tetë luftërave dhe besoj se një tjetër do të vijë”, tha presidenti amerikan teksa shtoi se Steve Witkoff dhe Jared Kushner po punojnë shumë për këtë çështje.

Sipas Qendrës Hidrometeorologjike të Ukrainës, “një mot shumë i ftohtë pritet nga 1 deri më 3 shkurt: temperaturat e natës pritet të bien nga -20 në -27 gradë Celsius, dhe në disa zona, temperaturat e natës do të arrijnë -30 gradë Celsius”.

Rreth 613 blloqe apartamentesh shumëkatëshe në Kiev kanë mbetur pa ngrohje pas sulmeve të fundit ruse, njoftoi sot administrata shtetërore e Kievit.

Portugalia po ndërton transportuesin e parë të dronëve në Evropë, një anije luftarake e projektuar për të operuar sisteme ajrore, sipërfaqësore dhe nënujore pa pilot që mund të sfidojnë dominimin e transportuesve tradicionalë të avionëve.

NRPD João II prej 107.6 metrash është planifikuar të dorëzohet në gjysmën e dytë të këtij viti.

Kompania holandeze Damen po ndërton anijen në Galati të Rumanisë me një kosto totale prej 132 milionë eurosh, kryesisht të financuara nga fondet e rimëkëmbjes së BE-së.

Anija luftarake mund të kalojë midis profileve të ndryshme të misionit brenda një jave duke ndërruar sistemet dhe pajisjet.

“Kjo qasje i lejon anijes të ruajë fleksibilitet të lartë funksional, duke kaluar midis profileve të ndryshme të misionit pa kompromise të rëndësishme strukturore”, tha Ricardo Sá Granja, zëdhënës i Marinës Portugeze.

Zv.kryeministrja, Belinda Balluku, ka kundërshtuar masën e “ndalimit të daljes nga shteti” në Gjykatën e Lartë.

Mësohet se Balluku ka depozituar rekurs në Gjykatën e Lartë ndaj vendimit të Apelit të GJKKO-së, që la në fuqi këtë masë.

Po ashtu bëhet e ditur se për masën e “pezullimit nga detyra” zv.kryeministrja duket se nuk ka ngritur pretendime për shkak se Apeli nuk u shpreh për këtë masë, derisa të shprehet Kushtëtuesja.

Kujtojmë se SPAK ka kërkuar nga Kuvendi heqjen e imunitetit të Ballukut, për të vendosur për të një masë sigurie më të fortë, si ‘arrest me burg’ ose ‘arrest në shtëpi’.

Presidenti i SHBA-së, Donald Trump njoftoi planin e tij më të ri, i cili synon t’u ofrojë fëmijëve amerikanë një nisje më të fortë financiare që në lindje, duke e cilësuar iniciativën si një hap drejt forcimit të së ardhmes ekonomike të vendit.

Duke folur gjatë një takimi të organizuar pikërisht për prezantimin e programit të quajtur “Llogaritë Trump”, kreu i Shtëpisë së Bardhë tha se për herë të parë çdo foshnjë amerikane do të ketë një rol financiar në të ardhmen e saj. Programi parashikon një investim fillestar prej 1,000 dollarësh nga qeveria për fëmijët e kualifikuar të lindur mes viteve 2025 dhe 2028.

Sipas tij, nisma është projektuar veçanërisht për fëmijët që përndryshe do ta nisnin jetën me pak ose aspak burime financiare, duke u dhënë atyre një shans të drejtë për realizimin e Ëndrrës Amerikane.

Trump argumentoi se këto llogari kanë potencial të rriten ndjeshëm me kalimin e kohës.

“Ne do të vendosim 3 deri në 4 trilionë dollarë pasuri në duart e amerikanëve të rinj, të cilët në të kundërt, do ta kishin nisur jetën pa asgjë. Kjo nismë do të mbahet mend si një nga politikat më transformuese të të gjitha kohërave”, tha presidenti.

Sipas detajeve të publikuara, “Llogaritë Trump” do të jenë të hapura për çdo fëmijë amerikan nën moshën 18 vjeç që disponon një numër të Sigurimeve Shoqërore. Familjet mund të kontribuojnë në këto llogari, të cilat duhet të investohen në një fond indeksi që ndjek tregun e përgjithshëm të aksioneve.

Kur fëmijët të mbushin 18 vjeç, fondet do të mund të përdoren për arsimim, blerjen e një shtëpie ose nisjen e një biznesi. Prindërit, punëdhënësit, organizatat fetare, shtetet dhe individë të tjerë mund të shtojnë deri në 5,000 dollarë shtesë në vit për secilën llogari.

Sipas presidentit, edhe me kontribute modeste, vlera e një “Llogarie Trump” mund të arrijë të paktën 50,000 dollarë deri në moshën 18-vjeçare, ndërsa me kontribute më të larta ajo mund të rritet në 100,000 deri në 200,000 dollarë, madje edhe deri në 300,000 dollarë për fëmijë.

Presidenti i Serbisë, Aleksandar Vuçiç, njoftoi të enjten se shërbimi i detyrueshëm ushtarak në vend do të hyjë në fuqi në dhjetor të këtij viti ose në mars të vitit 2027.

Vendimi për fillimin e shërbimit ushtarak, tha ai, varet nga gatishmëria e kapaciteteve dhe objekteve ushtarake.

“Ne do ta marrim këtë vendim së shpejti, brenda një ose dy muajve të ardhshëm, dhe do ta çojmë në Parlament dhe do të fillojmë regjistrimin e rekrutëve ushtarakë”, tha Vuçiç, pas një takimi me udhëheqësit ushtarakë mbi gjendjen dhe analizën e aftësive të Forcave të Armatosura Serbe për vitin 2025.

Shërbimi ushtarak do të zgjasë 75 ditë, sipas tij.

“Duhet t’i bëjmë gati të gjitha pajisjet. Kemi mjaftueshëm armë dhe çizme, por ka disa gjëra që nuk janë ende plotësisht gati”, tha ai.

Ai shtoi se nevojitet rinovimi i qendrave të rekrutimit, përmirësimi dhe rinovimi i klinikave dhe gjëra të tjera.

“Këto janë pyetje të rëndësishme sepse duam të jemi të përgatitur për këtë dhe që këta të rinj ta kalojnë shërbimin e tyre ushtarak në kushtet më të mira. Të fitojnë përgjegjësinë dhe seriozitetin e nevojshëm, si dhe një qëndrim ndaj patriotizmit”, tha Vuçiq.

Futja e shërbimit të detyrueshëm ushtarak duhet ta marrë pëlqimin e Kuvendit të Serbisë.

Përfaqësuesit e Qeverisë kanë njoftuar vazhdimisht kthimin e shërbimit ushtarak vitet e fundit.

Ideja u konkretizua në janar 2024. Pastaj Shtabi i Përgjithshëm i Ushtrisë Serbe nisi një iniciativë dhe i propozoi presidentit kthimin e shërbimit ushtarak.

Vuçiç më pas, në shtator të të njëjtit vit, nënshkroi një marrëveshje për ta kthyer shërbimin e detyrueshëm ushtarak në Serbi.

Që nga heqja e tij më 1 janar 2011, shërbimi ushtarak ka qenë vullnetar.

Kroacia fqinje votoi gjithashtu për ta kthyer shërbimin e detyrueshëm ushtarak në tetor 2025.

Ndër vendet që nuk e kanë hequr shërbimin e detyrueshëm ushtarak janë Zvicra, Norvegjia, Danimarka, Finlanda, Austria, Turqia, Estonia, Greqia, Qiproja, Ukraina, Rusia dhe Bjellorusia. /REL

Gjykata e Posaçme e Shkallës së Parë për Korrupsionin dhe Krimin e Organizuar ka vendosur vijimin e masës së sigurimit personal “Arrest në burg” ndaj shtetasit Jozi Kraja, i cili dy ditë më parë u esktradua nga Zvicra.

Siç bën me dije Interpol Tirana, Kraja dyshohet se për një periudhë rreth 4-vjeçare ka siguruar kushte dhe mjete materiale për kryerjen e vrasjes së dy vëllezërve, shtetasit D.B. dhe V.B., në kuadër të veprimtarisë së një grupi të strukturuar kriminal.

Kërkesa për verifikimin e kushteve të masës së sigurimit u paraqit në gjykatë më 27 janar 2026 nga Prokuroria e Posaçme kundër Korrupsionit dhe Krimit të Organizuar (SPAK), në zbatim të vendimit të mëparshëm nr. 49, datë 15.05.2024.

Në përfundim të shqyrtimit, trupi gjykues i kryesuar nga gjyqtari Erjon Çela, me vendimin nr. 6, datë 29.01.2026, vendosi vazhdimin e masës së arrestit në burg ndaj të pandehurit Jozi Kraja, i akuzuar për veprat penale: “Sigurimi i kushteve dhe mjeteve materiale për të kryer vrasje”, “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.

Gjykata urdhëroi Policinë Gjyqësore që Kraja të dërgohet menjëherë në institucionin e paraburgimit dhe SPAK-un për zbatimin e vendimit. Po ashtu, u vendos shpërblimi i avokatit të caktuar kryesisht, sipas tarifave ligjore.

Çështja Balluku u kthye nga gazetarët në fokusin kryesor të konferencës për shtyp të kreut të PD-së, Sali Berisha. Ky i fundit drejtoi gishtin nga Edi Rama si fajtorin kryesor të zvarritjes së një vendimi nga Gjykata Kushtetuese, që shfrytëzohet nga mazhoranca për të shtyrë gjithashtu vendimin në Këshillin e Mandateve, për heqjen e imunitetit ndaj numrit dy të Qeverisë.

“Tregon tërheqjen zvarrë, se si Edi Rama tërheq zvarrë dhe poshtëron Gjykatën Kushtetuese. Kjo është dëshmia e parë e asaj që po ndodh. Ajo mori përsipër një çështje, të cilën absolutisht nuk mund ta shqyrtonte pakaluar në Apel dhe Gjykatën e Lartë. Dhe ajo, me urdhër të Edi Ramës, ka caktuar deri më tani tre data dhe nuk e shqyrton dot, sepse Edi Rama e tërheq zvarrë për turpin e saj”, tha Berisha.

Sipas Berishës, kryeministri Edi Rama është nën presion nga zëvendësja e tij, Belinda Balluku.

“E merrnit si shaka kur unë thosha që ajo ka genin terrorist. Ka pasur gjysh vrasës serial, po. Nuk shkon ajo kurban për Edi Ramën, mos kujto ti. Ajo e ka kryer krimin, por e ka kryer për Edi Ramën. Ajo është dorasi, por porositësi është Edi Rama. Kemi të bëjmë me një moment që vetëm populli mund ta zgjidhë dhe do ta zgjidhë populli.”

Gazetarët e pyetën Berishën mbi kontradiktën mes normalitetit të seancës së fundit dhe deklaratave të tij për të refuzuar vijimësinë e punës në Kuvend, në kushtet kur mazhoranca refuzon çdo standard institucional.

“Nuk ka asnjë lloj lidhje me parlamentin. PD është e tëra në protestë tani. Është në protestë dhe do të jetë protesta, dhe mbi të gjitha protesta qytetare, ajo që do t’i japë zgjidhje kësaj situate katastrofale që ekziston në Shqipëri.”

I pyetur nga gazetarët nëse PD do t’i drejtohet Komisionit të Venecias për çështjen Balluku, nëse Gjykata Kushtetuese merr vendim pro saj, Berisha e ndau përgjigjen në dy momente:

“PD nuk legjitimohet t’i drejtohet Komisionit të Venecias. Komisioni i Venecias u përgjigjet qeverive, jo partive politike. Kështu që vetëm shqiptarët e kanë fjalën, qytetarët. Tani është radha e tyre, fjala e tyre. Unë ju siguroj që termometri i zemërimit po shkon në nivelet më të larta tek qytetarët, sepse ky konsideron ata si qenie inferiore.”

Berisha paralajmëroi se PD do të rikthehet sërish në terren me protesta, si ajo e 24 janarit.

Partia Socialiste është tërhequr, të paktën përkohësisht nga kërkesa për të marrë shumicën në Komisionin e Reformës Territoriale, me kushtin që PD të mos i bojkotojë më punimet. PS ka propozuar në Konferencën e Kryetarëve që nëse PD e ka serioze qëndrimin që nuk bojkoton territorialen, të hënën të mblidhet komisioni dhe të shihet nëse ata do të jenë të pranishëm. Në rast se përfaqësuesit e PD do të shkojnë, atëherë PS do të zhbëjë formulën e propozuar për heqjen e barazisë.

Gjatë debateve në Konferencën e kryetarëve, kreu i grupit parlamentar demokrat, Gazment Bardhi, ka mbajtur qëndrimin që mbledhja nuk është bojkotuar. “Thjesht në dy data që kanë qenë për mbledhje, nuk kanë qenë anëtarët tanë, sepse kanë pasur angazhime të tjera”, mësohet të ketë thënë Bardhi.

“Ne ju themi se duhen procese konsensuale, ejani të gjejmë mekanizma dialogu, nën frymën e rekomandimeve të BE-së. Ju thoni: jo! Ejani këtu, flisni kot, ne do të bëjmë çfarë të duam. Për çfarë ju duhet opozita në tryezë? Për të shitur ju fasadën sikur çdo gjë funksionon normalisht. Jo, nuk është asgjë normale! Ju e dini këtë dhe çdo mik i yni ndërkombëtar e di. Në gjithë sjelljen tuaj keni bërë të kundërtën e asaj që keni thënë publikisht për konsensus dhe konstruktivitet. Ju nuk keni qëllim qytetarët, por hartën elektorale. E bëtë këtë në vitin 2014 dhe e pamë se çfarë bëtë, duke shkatërruar pushtetin vendor dhe duke dëmtuar qytetarët”.

Socialistët dhe demokratët janë përplasur sërish këtë të enjte në Konferencën e Kryetarëve të grupeve parlamentare, për shkak të mosthirrjes së mbledhjes së Këshillit të Mandateve, ku do të vendoset mbi heqjen, ose jo, të imunitetit të Belinda Ballukut, sipas kërkesës së SPAK.

“Kjo që po ndodh është një njollë e zezë për Kuvendin. Mbrojtja politike e një të korruptuari është çështje që ju bën me turp edhe juve. Të mblidhet menjëherë Këshilli i Imuniteteve dhe t’i hapim rrugën drejtësisë për t’i hequr imunitetin”, mësohet të ketë thënë deputetja e PD, Jorida Tabaku.

“Shtyrja e mbledhjes në përputhje me Rregulloren e Kuvendit. Në Këshillin e Mandateve vendimet nuk merren thjesht me shumicë, por çdo propozim i anëtarëve vlen. Me propozim të deputetëve anëtarë Taulant Balla dhe Bledi Çomo që kërkuan të presin vendimin e Gjykatës Kushtetuese, shtyva mbledhjen”, mësohet të jetë përgjigjur kryetari i Kuvendit, Niko Peleshi.

Gjykata e Posaçme e Apelit për Korrupsionin dhe Krimin e Organizuar ka vendosur sot pezullimin e dënimit me burg për pesë ish-zyrtarë të Bashkisë së Tiranës, të pandehur në një prej fraksioneve të dosjes së njohur si “5D”.

Trupa gjykuese, e kryesuar nga Miliana Muça, me anëtare Saida Dollani dhe Tereza Merkaj, la në fuqi vendimin e shkallës së parë, por ndryshoi mënyrën e ekzekutimit të dënimit.

Për të pandehurit Eglantina, Enkelejda Qyta, Bruno Koçi, Rivjola Baxha dhe Kristo Zhulati Apeli ka lënë në fuqi dënimet me burg të dhëna nga Shkalla e Parë, por ka vendosur pezullimin e ekzekutimit të dënimeve me burg dhe lënien e tyre në Shërbim Prove.

Ata u shpallën fajtorë për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim.

Apeli vendosi pezullimin e ekzekutimit të dënimit me burg dhe vendosjen e tyre në shërbim prove për 12 muaj, me detyrimin për t’u paraqitur pranë Shërbimit të Provës dhe për të mos kryer vepra të tjera penale.

Gjithashtu, të pesëve u është hequr e drejta për të ushtruar funksione publike për një periudhë prej 5 vitesh.

Vendimi u shpall në Tiranë dhe ndaj tij lejohet rekurs në Gjykatën e Lartë brenda 15 ditëve.

Makina e një kryetari bashkie në Filipine u sulmua nga një bandë kriminale me raketë hedhëse.

Videoja nga momenti i sulmit tregon një makinë gri që ndalet përballë një pike karburanti ku SUV-i i zi që mbante Akhmad Abatuan ishte ndalur mëngjesin e 25 janarit, teksa një burrë del dhe qëllon një raketë ndërsa një i dytë hap zjarr.

Në pamje të tjera, makina e kryetarit të bashkisë duket e goditur, por nuk pëson dëme të mëdha për shkak të blindimit që kishte.

Sipas mediave lokale, dy nga rojet e sigurisë së kryetarit të bashkisë u plagosën, ndërsa tre nga sulmuesit u vranë pak më vonë në një operacion nga ushtria dhe policia.

“Nuk mendoja se do të përdornin një armë kaq të madhe. Një raketë hedhëse dore nuk është diçka që e përdor një person i zakonshëm. Kjo ishte profesionale”, tha Abatuan, i cili kërkoi masa të shtuara sigurie për të.

Një zëdhënës i Policisë Kombëtare Filipinase tha se ky ishte sulmi i katërt ndaj Abatuan, i cili e ka marrë detyrën që nga viti 2022.

Sipas të njëjtit zëdhënës, grupi që kreu sulmin drejtohej nga një burrë i njohur si “Raprap” dhe bashkëpunëtorët e tij ishin xhaxhai, kushëriri dhe vëllai i tij, ky i fundit, arriti të arratisej dhe mbetet i lirë.

#BREAKING | — Philippine Mayor Survives RPG Ambush

Shariff Aguak Mayor Akmad Ampatuan escaped unharmed after gunmen ambushed his convoy in Maguindanao del Sur, Philippines, on January 25, 2026.

Attackers fired a rocket-propelled grenade (RPG) that struck his armored Toyota… pic.twitter.com/odfT6N9l3f

— The Global Eye (@TGEThGlobalEye) January 26, 2026

Pas bojkotit të PD, socialsitët janë vënë në lëvizje për të zhbërë formulën për komisionin e territoriale. Sot në Konferencën e Kryetarëve shqyrtohet kërkesa e tyre për të marrë shumicën e anëtarëve të komisionit, si edhe drejtimin. PS kërkon që të shtohet një anëtar më shumë nga radhët e socialistëve.

Po ashtu, socialistët thonë se nuk duhet të ketë më bashkëdrejtim për shkak të bojkotit, por drejtuesi të jetë Arbian Mazniku ndërsa Luçiano Boçi të jetë nënkryetar dhe jo më bashkëkryetar.

“Që prej krijimit të Komisionit në datën 27.10.2025 (gjatë një periudhe dy mujore) nga 4 mbledhje të njoftuara rregullisht vetëm një mbledhje është zhvilluar me përbërje të plotë të opozitës. Referuar vendimit të Kuvendit, kohëzgjatja e punës së Komisionit është parashikuar 9 muaj. Kjo kohëzgjatje është dakordësuar duke patur parasysh rëndësinë e miratimit të reformës administrative-territoriale në kohë, pra 1 vit përpara zhvillimit të zgjedhjeve vendore 2027 në mënyrë që të merren masat përkatëse ligjore, administrative dhe organizative. Nisur nga qasja e bojkotuese e opozitës parlamentare si dhe fakti që reforma administrativeterritoriale përbën një nga prioritetet kyçe të programit të mazhorancës parlamentare Shqipëria 2030 dhe për integrimin në BE, propozohet ndryshimi i përbërjes dhe mënyrës së punës së Komisionit”, thuhet në kërkesën e PS.

Kryeministri Edi Rama mbajti një fjalë në konkursin ndërkombëtar për “Shtëpinë e Re të Fëmijëve dhe Kompleksin e Inspektorateve Shtetërore”. Duke u uruar suksese të gjithë arkitektëve, Rama renditi disa prej projekteve që janë në fazë të avancuar apo që janë gati të marrin lejen e zhvillimit.

Sa për projektet për të cilat do të prezantohen, kryeministri u shpreh se kjo do t’u japë rrugë dy drejtimeve të reja për të ardhmen.

Do flas shumë shkurt, në radhë të parë për të falënderuar të gjithë arkitektet që janë mbledhur këtu për këtë konkurs të radhës, të organizuar nga Korporata Shqiptare e Investimeve në funksion të krijimit të mëtejshme të kushteve për të përfituar nga partneriteti publik privat hapësira të reja për funksione publike.

Nga ana tjetër dua të falënderoj edhe arkitektët që zemërgjerësisht pranuan të jenë pjesë e kësaj jurie ndërkombëtare dhe jam i bindur që do kemi përsëri një ditë intensive emocionesh krijuese dhe një tjetër arsye për t’u ndjerë mirë në fund të ditës, duke arritur të vendosim një projekt tjetër në radhën e këtyre projekteve që siç e prezantoi edhe drejtorja e korporatës janë tanimë në një fazë të avancuar dhe madje një pjesë e tyre janë gati për të marrë lejen e zhvillimit dhe për të filluar nga puna.

Falë këtij procesi do të kemi më në fund pas vitesh një stadium të ri të përmasave europiane, një tjetër vepër arkitektonike të denjë për historinë e re që po shkruajmë së bashku me këtë skuadër të jashtëzakonshme arkitektësh, Bibliotekën e re Kombëtare, një mjedis i shumë nevojshëm prej vitesh dhe një tjetër vepër e spikatur në historinë, jo thjeshtë të vendit tonë, por në historinë e arkitekturës bashkëkohore. Do të kemi po ashtu një kompleks të ri zyrash për administratën, për një numër të konsiderueshëm institucionesh, do të kemi pallatin e ri të sportit, një vepër mbresëlënëse që në projekt mori mbështetjen konsensuale të jurisë ndërkombëtare dhe një sërë veprash të tjera me interes të madh publik.

Sot me këtë projekt, ne i hapim rrugë dy drejtimeve të reja për të ardhmen, duke krijuar kushte tërësisht të reja për fëmijët që janë në duart e solidaritetit të shoqërisë, jetimët dhe njëkohësisht edhe për korpusin e ri të inspektorateve dhe me këtë rast dua të falënderoj këtu kryeinspektorin që për 10 vite rresht drejtoi një institucion që lindi vërtetë nga hiçi dhe u krijua nga e para dhe që sot është gati të bëjë një hop tjetër.

Thënë të gjitha këto, dua t’i përgëzoj edhe të gjitha studiot lokale që janë këtu të pranishme si partnerë të studiove ndërkombëtare, sepse në ndërkohë që zhvillohen projekte, në ndërkohë që lidhen marrëveshje të reja dhe në ndërkohë që Shqipëria është bërë një pikë referimi në botën e arkitekturës bashkëkohore si një vend ku ka një përqendrim të madh arkitektësh ndërkombëtar me shumë zë, Shqipëria është njëkohësisht edhe një universitet i hapur që i jep mundësi të gjithë arkitektëve të rinj shqiptarë, që i jep mundësi studiove të reja në Shqipëri, që përmes bashkëpunimit të drejtpërdrejtë me këta mjeshtra dhe këto studio të mëdha me plot eksperiencë, të marrin dije dhe të përfitojnë eksperienca që nuk ka asnjë universitet apo asnjë praktikë pune në një studio të huaj që të jep.

Shumë faleminderit të gjithëve një herë. Uroj që askush të mos mërzitet dhe të gjithë të ndiqni me interes deri në fund këto prezantime dhe njëkohësisht u them të gjithë atyre që do humbin, se një fitues do dalë, që këtu në Shqipëri nuk ka të humbur në këto konkurse sepse siç e dinë mirë, shumë prej atyre që kanë humbur konkurse edhe humbja është prezantim me vendin dhe pastaj, ky vend nuk i lëshon ata që vijnë po përkundrazi, i angazhon dhe u jep mundësi që të angazhohen në projekte të tjera.

Secila prej studiove arkitekturore po prezanton projektin e saj për një godinë të re ku pritet të vendoset Shtëpia e Fëmijëve dhe Inspektorati i Përgjithshëm. Në bazë të projektit fitues, do godina ekzistuese do të prishet dhe do të ndërtohet kompleksi i ri.

SHBA-të duket se janë gati ta sulmojnë Iranin brenda pak ditësh, shkruan sot BBC.  Ndërsa objektivat e mundshëm janë kryesisht të parashikueshëm, rezultati nuk është.

Pra, nëse nuk mund të arrihet një marrëveshje e minutës së fundit me Teheranin dhe Presidenti Donald Trump vendos t’u urdhërojë forcave amerikane të sulmojnë, atëherë cilat janë rezultatet e mundshme?

1. Sulme të synuara, kirurgjikale, viktima minimale civile, një tranzicion drejt demokracisë

Forcat ajrore dhe detare amerikane kryejnë sulme të kufizuara dhe precize duke synuar bazat ushtarake të Korpusit të Gardës Revolucionare Islamike (IRGC) të Iranit dhe njësinë Basij, një forcë paraushtarake nën kontrollin e IRGC, vendet e lëshimit dhe magazinimit të raketave balistike, si dhe programin bërthamor të Iranit.

Një regjim tashmë i dobësuar është rrëzuar, duke kaluar përfundimisht në një demokraci të vërtetë ku Irani mund të ribashkohet me pjesën tjetër të botës.

Ky është një skenar shumë optimist. Ndërhyrja ushtarake perëndimore si në Irak ashtu edhe në Libi nuk solli një tranzicion të qetë drejt demokracisë. Edhe pse i dha fund diktaturave brutale në të dyja rastet, ajo solli vite kaosi dhe gjakderdhjeje.

Siria, e cila kreu revolucionin e vet, duke rrëzuar Presidentin Bashar Al-Assad pa mbështetjen ushtarake perëndimore në vitin 2024, deri më tani ka ecur më mirë.

2. Regjimi mbijeton, por i moderon politikat e tij

Kjo mund të quhet gjerësisht “modeli venezuelian”, ku veprimi i shpejtë dhe i fuqishëm i SHBA-së e lë regjimin të paprekur, por me politikat e tij të moderuara.

Në rastin e Iranit, kjo do të thoshte se Republika Islamike mbijetoi, gjë që nuk do të kënaqë një numër të madh iranianësh, por është e detyruar të kufizojë mbështetjen e saj për milicitë e dhunshme në të gjithë Lindjen e Mesme, të ndërpresë ose të kufizojë programet e saj të brendshme bërthamore dhe të raketave balistike, si dhe të lehtësojë shtypjen e protestave.

Përsëri, kjo është në fundin më të pamundur të shkallës.

Udhëheqja e Republikës Islamike ka mbetur sfiduese dhe rezistente ndaj ndryshimeve për 47 vjet. Duket e paaftë të ndryshojë kursin tani.

3. Regjimi bie, i zëvendësuar nga sundimi ushtarak

Shumë njerëz mendojnë se ky është rezultati më i mundshëm. Ndërsa regjimi është qartësisht jopopullor tek shumë njerëz, dhe çdo valë e njëpasnjëshme protestash gjatë viteve e dobëson atë më tej, mbetet një shtet i thellë sigurie i madh dhe i përhapur me një interes të drejtpërdrejtë në status quo-në.

Arsyet kryesore pse protestat deri më tani kanë dështuar në përmbysjen e regjimit janë sepse nuk ka pasur dezertime të rëndësishme në anën e tyre, ndërsa ata që janë në kontroll janë të përgatitur të përdorin forcë dhe brutalitet të pakufizuar për të qëndruar në pushtet.

Në konfuzionin që vjen pas çdo sulmi amerikan, është e mundur që Irani të përfundojë duke u sunduar nga një qeveri e fortë ushtarake e përbërë kryesisht nga figura të IRGC-së. 4. Irani hakmerret duke sulmuar forcat amerikane dhe fqinjët. Irani është zotuar të hakmerret ndaj çdo sulmi të SHBA-së, duke thënë se “gishti i tij është te këmbëza” .

Është e qartë se nuk mund të krahasohet me fuqinë e Marinës dhe Forcave Ajrore të SHBA-së, por prapëseprapë mund të sulmojë me arsenalin e saj të raketave balistike dhe dronëve, shumë prej të cilëve të fshehur në shpella, nën tokë ose në shpate të largëta malore.

Ekzistojnë baza dhe objekte amerikane të shpërndara përgjatë anës arabe të Gjirit, veçanërisht në Bahrein dhe Katar, por Irani gjithashtu mund të shënjestrojë, nëse do të donte, disa nga infrastrukturën kritike të çdo kombi që e konsideronte bashkëpunëtor në një sulm amerikan, siç është Jordania.

Sulmi shkatërrues me raketa dhe dronë ndaj objekteve petrokimike të Saudi Aramco në vitin 2019, i atribuuar një milicie të mbështetur nga Irani në Irak, u tregoi sauditëve se sa të prekshëm ishin ndaj raketave iraniane.

Fqinjët arabë të Iranit në Gjirin Persik, të gjithë aleatë të SHBA-së, janë jashtëzakonisht të shqetësuar tani se çdo veprim ushtarak i SHBA-së do të përfundojë duke u kthyer mbrapsht atyre. 5. Irani hakmerret duke vendosur mina në Gjirin Persik.

Kjo është shfaqur prej kohësh si një kërcënim potencial për transportin detar global dhe furnizimet me naftë që nga lufta Iran-Irak e viteve 1980-88, kur Irani me të vërtetë minoi korridoret e transportit detar dhe minapastruesit e Marinës Mbretërore ndihmuan në pastrimin e tyre.

Ngushtica e ngushtë e Hormuzit midis Iranit dhe Omanit është një pikë kyçe kritike. Rreth 20% e eksporteve botërore të Gazit Natyror të Lëngshëm (LNG) dhe midis 20-25% e naftës dhe nënprodukteve të naftës kalojnë nëpër këtë ngushticë çdo vit.

Irani ka kryer ushtrime për vendosjen e shpejtë të minave detare. Nëse do ta bënte këtë, atëherë kjo do të ndikonte në mënyrë të pashmangshme në tregtinë botërore dhe çmimet e naftës. 6. Irani hakmerret, duke fundosur një anije luftarake amerikane.

Një kapiten i Marinës Amerikane në bordin e një anijeje luftarake në Gjirin Persik më tha dikur se një nga kërcënimet nga Irani për të cilin shqetësohet më shumë është një “sulm i turmës”.

Këtu Irani lëshon kaq shumë dronë me shpërthyes të lartë dhe anije siluruese të shpejta në një ose më shumë objektiva, saqë edhe mbrojtjet e fuqishme të Marinës Amerikane nga afër nuk janë në gjendje t’i eliminojnë të gjitha në kohë.

Marina e IRGC-së ka zëvendësuar prej kohësh Marinën konvencionale iraniane në Gjirin Persik, disa prej komandantëve të së cilës madje u trajnuan në Dartmouth gjatë kohës së Shahut.

Ekipet detare të Iranit e kanë përqendruar pjesën më të madhe të stërvitjes së tyre në luftën jokonvencionale ose “asimetrike”, duke kërkuar mënyra për të kapërcyer ose anashkaluar avantazhet teknike që gëzon kundërshtari i tyre kryesor, Flota e Pestë e Marinës Amerikane.

Mbytja e një anijeje luftarake amerikane, e shoqëruar me kapjen e mundshme të të mbijetuarve midis ekuipazhit të saj, do të ishte një poshtërim i madh për SHBA-në.

Ndërsa ky skenar mendohet i pamundur, shkatërruesi miliarda dollarësh USS Cole u dëmtua nga një sulm vetëvrasës i Al-Kaedës në portin e Adenit në vitin 2000, duke vrarë 17 marinarë amerikanë.

Përpara kësaj, në vitin 1987, një pilot avioni irakian qëlloi gabimisht dy raketa Exocet drejt një anijeje luftarake amerikane, USS Stark, duke vrarë 37 marinarë.

7. Regjimi shembet, i zëvendësuar nga kaosi

Ky është një rrezik shumë real dhe është një nga shqetësimet kryesore të fqinjëve si Katari dhe Arabia Saudite.

Përveç mundësisë së një lufte civile, siç është ajo që përjetuan Siria, Jemeni dhe Libia, ekziston edhe rreziku që në kaos dhe konfuzion, tensionet etnike të mund të shndërrohen në konflikt të armatosur, ndërsa kurdët, balukët dhe pakicat e tjera kërkojnë të mbrojnë popullin e tyre mes një vakumi pushteti mbarëkombëtar.

Pjesa më e madhe e Lindjes së Mesme do të ishte sigurisht e lumtur të shihte mbështetjen e Republikës Islamike, askush më shumë se Izraeli, i cili tashmë u ka dhënë goditje të rënda aleatëve të Iranit në të gjithë rajonin dhe i cili i frikësohet një kërcënimi ekzistencial nga programi i dyshuar bërthamor i Iranit.

Por askush nuk dëshiron ta shohë kombin më të madh të Lindjes së Mesme për nga popullsia, rreth 93 milionë, të zhytet në kaos, duke shkaktuar një krizë humanitare dhe refugjatësh.

Rreziku më i madh tani është që Presidenti Trump, pasi ka grumbulluar këtë forcë të fuqishme pranë kufijve të Iranit, të vendosë se duhet të veprojë ose do të humbasë reputacionin, dhe një luftë të fillojë pa një përfundim të qartë dhe me pasoja të paparashikueshme dhe potencialisht dëmtuese.

Irani po bëhet gati për një sulm të mundshëm, teksa Shtetet e Bashkuara kanë dislokuar asete kyç ushtarake, përfshirë një aeroplanmbajtës dhe bombardues të tjerë në Lindjen e Mesme.

Presidenti amerikan, Donald Trump, ka kërcënuar me sulme ndaj Republikës Islamike për shkak të shtypjes brutale të protestuesve antiqeveritarë. Nëse Trumpi autorizon një veprim ushtarak, Teherani mund të jetë praktikisht i pafuqishëm për të ndalur një sulm ajror, thonë ekspertët.

Por, kjo nuk nënkupton se Irani nuk mund të hakmerret ndaj ushtrisë amerikane dhe aseteve komerciale në rajon, thanë ekspertët, duke përmendur arsenalin e fuqishëm të Teheranit me raketa të avancuara balistike, raketa lundruese që mund të fluturojnë ulët si dhe dronët luftarakë dhe kamikazë.

Gjatë luftës 12-ditore qershorin e vitit të kaluar, Izraeli goditi infrastrukturën ushtarake të Iranit, përfshirë edhe qendrat për prodhimin e raketave. Sulmi i Izraelit po ashtu dobësoi aftësinë e Iranit, që ka një forcë të vjetëruar ajrore, për t’u mbrojtur nga sulmet ajrore, duke shënjestruar radarët e tij dhe sistemet e mbrojtjes ajrore S-300 të prodhimit rus.

Edhe në ato rrethana, Teherani arriti të lëshonte qindra raketa balistike drejt Izraelit. Dhjetëra raketa, shumica nga të cilat kishin për cak objektet ushtarake, depërtuan mbrojtjen e fuqishme ajrore të Izraelit.

“Në aspektin e aftësive mbrojtëse, Irani është praktikisht i pambrojtur”, tha Michael Horowitz, një ekspert i pavarur i mbrojtjes, me seli në Izrael.

Por, Irani “ka ende një arsenal të madh raketash me rreze të shkurtër dhe të mesme veprimi që lehtësisht mund të godasin bazat amerikane në Lindjen e Mesme, si edhe raketa lundruese dhe dronë që me gjasë do t’i përdorte për të shënjestruar anijet amerikane”, shtoi Horowitz.

Raketat “e fuqishme” balistike

Në qershor, Izraeli goditi caqe përreth Teheranit, përfshirë kompleksin ushtarak në Parçin, bazën ushtarake Hoxhir, objektin raketor në Shahrud dhe një fabrikë në Zonën Industriale Shamsabad.

Sulmet kishin për qëllim të pengonin prodhimin nga Irani të raketave balistike me rreze të mesme veprimi, të cilat përbëjnë kërcënim për Izraelin dhe janë “mjaft të fuqishme”, tha Sascha Bruchmann, analist për çështje ushtarake dhe të sigurisë në Institutin Ndërkombëtar për Studime Strategjike, me seli në Londër.

Shumë nga raketat balistike me rreze të mesme veprimi “operojnë me karburante të lëngshëm dhe varen infrastruktura për t’u gjuajtur dhe për t’u mbushur me karburant”, tha Bruchmann. “Izraelitët e përdorën këtë fakt për t’i gjetur dhe për t’i shkatërruar shumicën e lëshuesve të raketave gjatë luftës”.

Numri i lëshuesve të raketave që Irani ka operacionale është i paqartë.

Irani posedon edhe raketa balistike me rreze të shkurtër veprimi që janë “shpesh me karburant të ngurtë, shumë më fleksibile dhe për këtë arsye më të vështira për t’u detektuar para lëshimit”, shtoi Bruchmann, duke vlerësuar se Teherani ka disa mijëra raketa të tilla.

Ai tha se raketat me rreze të mesme veprimi “përbëjnë kërcënim real, veçmas për shtetet më të vogla të Gjirit Persik”, sikurse Katari dhe Bahrejni që janë mikpritës të bazave dhe forcave amerikane.

Përtej arsenalit të armëve, një nga mjetet më të fuqishme të Iranit është aftësia e tij për të penguar trafikun e naftës në Gjirin Persik, një rajon që prodhon rreth 40 për qind të naftës në botë, thonë ekspertët.

Rreth një e pesta e furnizimit global me naftë kalon përmes Ngushticës së Hormuzit, një rrugë e ngushtë ujore që lidh Gjirin Persik me oqeanin e hapur. Irani ka shqyrtuar më herët mbylljen e kësaj rruge, një veprim që do të ndërpriste rrjedhën globale të naftës.

“Republika Islamike që një kohë të gjatë ka përgatitur një sërë kapacitetesh ushtarake të destinuara për ta mbyllur këtë rrugë kyç detare. Kjo do të krijonte një tronditje ekonomike që Irani mund ta shfrytëzonte”, tha Horowitz.

SHBA shqyrton opsione ushtarake

Trump kërcënoi me sulme ushtarake ndaj Iranit pasi autoritetet vranë mijëra persona gjatë shtypjes së protestave masive që shpërthyen në fund të dhjetorit. Kohët e fundit, Trump është tërhequr nga ky kërcënim, megjithëse nuk e ka përjashtuar kryerjen e një sulmi.

Sipas raportimeve të mediave amerikane, Trump po shqyrton një sërë opsionesh ushtarake. Ato përfshijnë sulme ndaj objektivave kryesisht simbolike, sulme që kanë për shënjestër eliminimin e liderit suprem ajatollah Ali Khamenei dhe udhëheqësve të tjerë apo një fushatë të zgjatur bombardimesh.

Çdo veprim ushtarak i SHBA-së kundër Iranit bart rreziqe të mëdha, thonë ekspertët, dhe edhe një sulm i kufizuar mund të provokojë kundërpërgjigje nga Teherani dhe të shkaktojë një konflikt të gjerë që mund ta përfshijë të gjithë rajonin.

Mundësi “shumë të mëdha” për sulme amerikane ndaj Iranit

Nuk është e qartë nëse qëllimi përfundimtar i një veprimi të mundshëm ushtarak amerikan ndaj Iranit është ndryshimi i regjimit, nxitja e dezertimeve në forcat e armatosura dhe elitën politike, dobësimi i aftësisë së forcave të sigurisë për të shtypur protestat, apo që një Teheran i dobësuar të sillet në tavolinën e negociatave.

Një fushatë ajrore amerikane, pa ndërhyrje tokësore, nuk do të çonte në ndryshim të regjimit, sipas ekspertëve. Një pushtim tokësor i Iranit, shtetit më të madh dhe më të populluar në Lindjen e Mesme, konsiderohet opsion joreal nga shumë ekspertë të mbrojtjes.

Një fushatë e zgjatur ajrore nga SHBA-ja ka pak gjasa të ndodhë, thonë ekspertët, duke përmendur dëshirën e Trumpit, sipas raportimeve, për një sulm të kufizuar dhe vendimtar. Por, edhe një ofensivë që do të zgjaste me muaj nuk do të garantonte rrëzimin e regjimit.

“Një fushatë e qëndrueshme ajrore nga SHBA-ja mund ta dëmtojë rëndë ushtrinë konvencionale të Iranit duke shkatërruar sistemet e komandës dhe kontrollit si dhe infrastrukturën, por nuk ka gjasa që vetëm ajo të çojë në kolapsimin e forcave të sigurisë së Iranit, të cilat mund të shpërndahen, të fshihen dhe të kalojnë në represion të brendshëm”, tha Horowitz.

“Fuqia ajrore mund të ndëshkojë dhe paralizojë, por do të duhej që njëkohësisht të kishte në terren një çarje politike, si rifillimi i protestave dhe përçarjeve brenda udhëheqjes iraniane, për të sjellë vërtet një kolaps të plotë të forcave të sigurisë ose të regjimit”, shtoi ai./REL/