Një shpërthim në një fabrikë të paligjshme prodhimi kokaine në jugperëndim të Kolumbisë, pranë kufirit me Ekuadorin, ka lënë të vdekur nëntë persona dhe ka plagosur dhjetë të tjerë.

Viktimat punonin për Koordinatorin Kombëtar të Ushtrisë Bolivariane, një fraksion renegat i grupit gueril FARC, tashmë i shpërbërë. Një hetim paraprak zbuloi se një bombol gazi shpërtheu ndërsa po përdorej për të prodhuar drogën, tha koloneli i policisë John Jairo Urrea, raporton Le Monde.

“Për shkak të gabimit njerëzor dhe trajtimit të bombolave ​​të gazit… vendi u përfshi nga flakët brenda pak sekondash”, tha grupi në një deklaratë.

Laboratori ndodhej në një zonë prodhimi kokaine me një prani të madhe të grupeve të armatosura ilegale në territorin indigjen të Awa-s, në departamentin jugperëndimor të Narinos.

Presidenti konservator i Ekuadorit, Daniel Noboa, nisi një luftë tregtare me Kolumbinë të mërkurën duke vendosur një tarifë prej 30% dhe duke akuzuar qeverinë e Petros se nuk po bën mjaftueshëm për të frenuar trafikun e drogës përgjatë kufirit të tyre të përbashkët. Petro u kundërpërgjigj me të njëjtën tarifë dhe mbrojti përpjekjet e tij kundër trafikantëve të paligjshëm të drogës.

Pasi u përball me akuza të ngjashme nga Presidenti i SHBA-së, Donald Trump, gjatë vitit të kaluar, Petro pritet të udhëtojë për në Uashington për takime me homologun e tij amerikan më 3 shkurt.

Si pasojë e kushteve të përkeqësuara të motit, kapiteneria e Portit në Vlorë ka ndaluar lëvizjen e mjeteve të vogla lundruese dhe ato të peshkimit, duke nisura nga ora 12:00 të datës 24.01.2026 deri në datën 26.01.2026 në orën 06:00.

Kjo masë është marrë për të parandaluar çdo situatë të papritur për shkak të kushteve atmosferike të këqija. Ndërsa njoftohet se anijet e transportit ndërkombëtar detar do të vazhdojnë të operojnë normalisht sipas destinacioneve përkatëse.

Trageti i linjës Vlorës-Brindisi-Vlorë ka anuluar mbërritjen datën 25.01.2026.

Policia e Tepelenës ka parandaluar një ngjarje të rëndë kriminale në familje, në fshatin Lulëzim të Memaliajt.

Pas njoftimit se një shtetas ushtronte dhunë ndaj bashkëshortes dhe e kërcënonte me vrasje, shërbimet e Stacionit të Policisë Memaliaj ndërhynë menjëherë, duke vënë në pranga 53-vjeçarin.

“Shërbimet e Stacionit të Policisë Memaliaj, në Komisariatin e Policisë  Tepelenë, pas njoftimit se një shtetas kishte dhunuar bashkëshorten e tij dhe e kishte kanosur atë, se do ta vriste, kanë organizuar menjëherë punën për parandalimin e ngjarjes së mundshme kriminale. Si rezultat i ndërhyrjes së shpejtë dhe profesionale të shërbimeve të Policisë, është bërë neutralizimi dhe arrestimi në flagrancë i shtetasit L. D., 53 vjeç, banues në fshatin Lulëzim, Memaliaj”, njofton Policia.

Gjatë kontrollit në banesën e tij u gjet dhe u sekuestrua një armë zjarri pistoletë, në cilësinë e provës materiale.

Materialet procedurale iu referuan Prokurorisë së Gjirokastrës për veprime të mëtejshme.

Gjykata e Posaçme e Apelit për Korrupsionin dhe Krimin e Organizuar ka lënë në fuqi masat e sigurisë “arrest me burg” për 8 prej pjesëtarëve të grupit Rraja, mes tyre dhe djali i ish-deputetit të Partisë Socialiste, Rexhep Rraja. Ndërsa dy prej tyre Sokol Qaja dhe Agim Nina nuk bënë ankim.

Islam Sefa, Jani Çavo, Aldo Gjini, Marvin Bushati, Përparim Rraja, Gazmir Rraja, Rexhep Rraja, Zamir Aliaj u arrestuan me urdhër të SPAK në dhjetor.

Sipas Prokurorisë së Posaçme, grupi Rraja së bashku me 2 grupe të tjera, kanë trafikuar drogë nga Shqipëria drejt Malit të Zi me destinacion Gjermaninë, nga Shqipëria drejt Turqisë si edhe nga vendet e Amerikës së Jugut drejt vendeve të BE-së.

Mbeten në fuqi masat “arrest ne burg”

1. Islam Sefa
2. Rexhep Rraja
3. Perparim Rraja
4. Gazmir Rraja
5. Aldo Gjini
6. Zamir ALiaj
7. Jani Cavo
8. Marvin Bushati

Nuk bënë ankim

Sokol Qaja dhe Agim Nina

KOMUNIKIM PËR MEDIAN I GJKKO

Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më datë 24.01.2026, shpalli vendimin mbi çështjen penale nr. 1 akti, datë 19.01.2026 regjistrimi, mbi ankimet e ankuesve I.S, J.Ç, A.Gj., M.B., P.Rr., G.Rr., R.Rr., dhe Z.A.: “Ankim kundër vendimit nr. 124, datë 09.12.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Caktimin e masës së sigurimit personal “Arresti në burg”, parashikuar nga neni 238, i Kodit të Procedurës Penale. Ankim kundër vendimit nr. 126, datë 11.12.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Marrjen në pyetje dhe verifikimin e kushteve të zbatimit të masës së sigurimit personal “Arresti në burg”, parashikuar nga neni 238, i Kodit të Procedurës Penale” në lëndë të masave të sigurimit personal, dhe vendosi:

1. Miratimin e Vendimit nr. 124, datë 09.12.2025 të Gjykatës së Posaçme të Shkallës së Parë për Korrupsionin dhe Krimin e Organizuar për sa i takon disponimeve kundrejt Z. I.S., Z. J.Ç., Z. A.Gj., Z. M.B., Z. P.Rr., Z. G.Rr., Z. R.Rr., Z. Z.A..
2. Miratimin e Vendimit nr. 126, datë 11.12.2025 të Gjykatës së Posaçme të Shkallës së Parë për Korrupsionin dhe Krimin e Organizuar për sa i takon disponimeve kundrejt Z. I.S., Z. J.Ç., Z. A.Gj., Z. M.B., Z. P.Rr., Z. G.Rr., Z. R.Rr., Z. Z.A..
3. Kundër këtij vendimi mund të bëhet rekurs në Gjykatën e Lartë brenda 45 ditëve, duke nisur ky afat nga e nesërmja e njoftimit të vendimit të arsyetuar. U shpall në Tiranë, me datë 24.01.2026.

Rusia ka kryer sulme me dronë dhe raketa ndaj Ukrainës gjatë natës, duke vrarë një person dhe duke plagosur 23 të tjerë, pavarësisht pjesëmarrjes në bisedimet me SHBA-në që synojnë t’i japin fund luftës.

Kryebashkiaku i kryeqytetit ukrainas, Kiev, Vitaly Klischo, tha se një person kishte vdekur dhe katër ishin plagosur pas një sulmi masiv. Ai shtoi se infrastruktura kritike e kryeqytetit ishte dëmtuar, gjë që kishte lënë 6,000 ndërtesa pa ngrohje.

Sulme pati edhe në Kharkiv. Kryebashkiaku I këtij qyteti, Ihor Terekhov tha se 19 persona ishin plagosur gjatë sulmeve në orët e para të mëngjesit të së shtunës.

Në një deklaratë pas sulmeve, presidenti ukrainas, Volodymyr Zelensky, tha se objektivi kryesor i rusëve ishte infrastruktura energjetike.

Sulmet u kryen në kohën kur delegacionet nga Rusia, Ukraina dhe SHBA-ja u takuan në Abu Dhabi në bisedimet e para trepalëshe që kur Kremlini nisi pushtimin në shkallë të plotë të fqinjit të saj në vitin 2022.

Bisedimet e filluara në Abu Dhabi mes përfaqësuesve të Ukrainës dhe Rusisë janë planifikuar të vazhdojnë edhe të shtunën. Ndërkohë që negociohet, Putini intensifikon sulmet.

Për herë të parë nga viti i kaluar, Kievi dhe Moska kanë zhvilluar negociata të drejtpërdrejta. Me ndërmjetësimin e Shteteve të Bashkuara, palët u takuan në Abu Dhabi, në Emiratet e Bashkuara Arabe, për të diskutuar planin e SHBA-së për t’i dhënë fund luftës kundër Ukrainës.  Raundi i parë i bisedimeve ka përfunduar, njoftoi zyra presidenciale ukrainase.

Takimi tre palësh u përqendrua në kushtet për përfundimin e luftës, u shpreh negociatori ukrainas Rustem Umerov, por nuk dha detaje. Kurse Presidenti ukrainas, Volodymyr Zelensky në mesazhin e tij me video në mbrëmja, tha se është shumë herët për të nxjerrë përfundime nga takimi në Abu Dhabi.

Rusia kërkon Donbasin

Negociatat kanë të bëjnë kryesisht me territoret, më saktësisht, me Donbasin – dhe çështjen se kush do ta kontrollojë këtë rajon industrial të Ukrainës lindore pas përfundimit të luftës. Rusia e ka pushtuar një pjesë të madhe aty ushtarakisht. Pjesa tjetër është me rëndësi të madhe për Ukrainën. Moska po kërkon që Ukraina të tërhiqet nga pjesa e Donbasit që ende kontrollohet nga Kievi – dhe po e bën këtë një parakusht për bisedimet e paqes. Kievi refuzon tërheqjen vullnetare. “Çështja e Donbasit është një çështje kyçe”, theksoi Presidenti Volodymyr Zelensky para se të fillonin negociatat.

Për ushtrinë ukrainase, rajoni i Donjetskut në Donbas është strategjikisht i rëndësishëm për ndalimin e një avancimi rus. Lidhur me këtë administrata Trump ka propozuar demilitarizimin e rajonit dhe krijimin e një zone të tregtisë së lirë. Por Donbasi është shkatërruar kryesisht pas luftimeve të ashpra dhe të dyja palët po pretendojnë kontrollin.

Andreas Umland, politolog në Qendrën e Stokholmit për Studime të Evropës Lindore, i përshkruan bisedimet në Abu Dhabi si “teatër diplomatik”. Ai argumenton se gjatë gjithë vitit të kaluar, diskutimet kishin më pak të bënin me arritjen e një armëpushimi apo edhe paqeje, dhe më shumë me qëllimin për të fituar favorin e Presidentit të SHBA-së Donald Trump. “Kjo sepse SHBA-të potencialisht kanë fuqinë ose ta vazhdojnë ose ta përfundojnë luftën”. Umland vë në dyshim interesin e vërtetë të Rusisë për t’i dhënë fund luftës.

Dimri i katërt i luftës

Pavarësisht negociatave për paqen në Abu Dhabi Rusinë ka vazhduar të sulmojë Ukrainën. Sipas burimeve ukrainase, Kievi dhe Kharkivi janë nën sulme të rënda. Sipas zyrtarëve ukrainas, dronët dhe raketat goditën disa lagje të qytetve, ka të paktën një viktimë dhe katër të plagosur. Kryebashkiaku Vitali Klitschko deklaroi në Telegram herët të shtunën në mëngjes: “Kievi është nën sulm masiv armik. Mos u largoni nga vendstrehimet.”

Aktualisht në Ukrainë, miliona njerëz janë pa energji elektrike. Në kryeqytetin Kiyv, 4,000 ndërtesa mbeten pa ngrohje pasi ushtria ruse sulmoi përsëri infrastrukturën energjetike të vendit të martën në mbrëmje. Temperaturat në Kiyv aktualisht janë rreth minus dymbëdhjetë gradë Celsius. Shumë njerëz po jetojnë në apartamente të ftohta për javë të tëra me vetëm disa orë energji elektrike në ditë.

BE njoftoi se do të dërgonte 447 gjeneratorë shtesë emergjence në Ukrainë. Veprimet e Rusisë po i privonin “qëllimisht” civilët nga ngrohja, drita dhe nevojat themelore në mes të një dimri të ashpër, tha Komisionerja e BE-së për Menaxhimin e Krizave, Hadja Lahbib./DW

Sot në orën 17:00 Partia Demokratike do të zhvillojë protestën kombëtare të paralajmëruar para godinës së Kryeministrisë.

Përmes një njoftimi, Policia bën të ditur se ka ndërmarrë të gjitha masat për garantimin e rendit publik dhe mbrojtjen e pronës private e publike.

Po ashtu Policia bën të ditur se nga ora 23:45, 23 janar, janë bllokuar lëvizjet dhe nuk lejohet parkimi i automjeteve deri në përfundim të tubimit në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”,

Gjithashtu njoftohet se nga ora 15:00 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Policia u ka bërë thirrje qytetarëve që të distancohen nëse gjenden përballë veprimeve të kunderligjshme që cënojnë rendin dhe sigurinë publike.

Njoftimi i Policisë:

Tiranë/ Përfaqësues të subjektit politik Partia Demokratike e Shqipërisë kanë njoftuar Policinë e Tiranës, për zhvillimin e një tubimi ditën e nesërme, i cili nis në orën 17:00 para Kryeministrisë.

Në bazë dhe në zbatimit të ligjit “Për tubimet”, Policia e Tiranës ka ndërmarrë të gjitha masat për garantimin e rendit publik, zbatimin e të drejtave dhe lirive të qytetarëve dhe të pjesëmarrësve në tubime, si dhe mbrojtjen e pronës publike dhe private.

Në zbatim të këtyre masave, me qëllim garantimin e mbarëvajtjes së tubimit, ditën e sotme dhe të nesërme do të kufizohet lëvizja në disa akse/segmente rrugore, konkretisht:

-Nga ora 23:45, të ditës 23 janar, do të bllokohet lëvizja dhe nuk do të lejohet parkimi i automjeteve deri në përfundim të tubimit në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”,

-Nga ora 15:00 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Në varësi të zhvillimit të tubimit, mund të ketë kufizime të qarkullimit të automjeteve edhe në akse të tjera rrugore. Në rast bllokimi, për të ndihmuar qytetarët që do të qarkullojnë në këto akse, Policia e Tiranës ka marrë masa për të devijuar qarkullimin e automjeteve në rrugë alternative.

Policia e Tiranës apelon për qytetarët që të shmangin lëvizjen me automjete në akset rrugore që do të bllokohen dhe të përdorin rrugë alternative, për të mos penguar lëvizjen e lirë të pjesëmarrësve në tubim.

Duke marrë shkas nga disa deklarata publike, i bejmë thirrje qytetarëve që të distancohen në rast se gjenden përballë veprimeve të kunderligjshme që cënojnë rendin dhe sigurinë publike.

Mijëra mbështetës të presidentit të rrëzuar të Venezuelës, Nicolas Maduro i cili u kap së bashku me gruan e tij në një operacion ushtarak amerikan më 3 janar demonstruan në Karakas të premten duke kërkuar lirimin e tij.

Demonstrata u zhvillua në 68-vjetorin e rënies së diktaturës së Marcos Pérez Jiménez (1948-1958).

Presidentja e përkohshme e vendit, Delcy Rodriguez, ka kërkuar lidhje më të ngushta me Uashingtonin, por qeveria e saj vazhdon të kërkojë kthimin e Nicolas Maduro dhe gruas së tij, të cilët mbeten të burgosur në Shtetet e Bashkuara.

“Ne i duam ata përsëri”, shkruhej në një banderolë të madhe të varur pranë Sheshit O’Leary në qendër të Karakasit. Marlene Blanco, një kontabiliste 65-vjeçare, tha se arrestimi i Maduro ishte “i paligjshëm” dhe “i padrejtë”.

“Nafta na përket neve. Dhe duhet të paguhet, ashtu siç u takon”, shtoi ajo, duke iu referuar përpjekjeve të Presidentit të SHBA-së Donald Trump për të kontrolluar rezervat e mëdha të naftës në Venezuelë.

“Triumfi ynë më i madh në këtë kohë do të jetë rikthimi i Presidentit Maduro dhe Zonjës së Parë Cilia”, tha Ministri i Brendshëm Diosdado Cabello gjatë tubimit, raportoi televizioni shtetëror.

Ai gjithashtu siguroi se Presidentja e përkohshme Delcy Rodriguez ka “mbështetjen e plotë të partisë në pushtet”.

Disa shtete amerikane dhe kryeqyteti amerikan, Uashington, kanë shpallur gjendje emergjente, teksa po përgatiten për një nga stuhitë dimërore më të ashpra në vitet e fundit, raportuan mediat amerikane më 23 janar.

E shoqëruar me borë të madhe dhe erëra akulli, stuhia do të përhapet në një distancë prej rreth 3 mijë kilometrash, nga Nju Meksiko në juglindje deri në Mejn në verilindje gjatë fundjavës, paralajmëroi shërbimi meteorologjik.

Sipas raportimeve të mediave amerikane, linjat ajrore kanë anuluar tashmë qindra fluturime si masë paraprake. Shumë shkolla gjithashtu kanë anuluar mësimin të premten po ashtu si masë parandaluese.

Po ashtu ka frikë se mund të ketë ndërprerje të mëdha të energjisë elektrike, për shembull për shkak të rrëzimit të mundshëm të pemëve ose të shtyllave elektrike.

Për rreth 160 milionë njerëz janë lëshuar paralajmërime për shkak të kushteve të motit ose këshilla të veçanta. Autoritetet amerikane kanë bërë thirrje që njerëzit të mos dalin nga shtëpitë, nëse është e mundur, dhe të mos përdorin makinat.

Në disa pjesë të Minesotës dhe Dakotës së Veriut, temperaturat mund të bien deri në minus 45 gradë Celsius, sipas shërbimit meteorologjik amerikan.

Në të gjithë shtetin e Nju Jorkut, guvernatorja Kathy Hochul paralajmëroi se i ftohti mund të jetë “vdekjeprurës”.

Kryeqyteti amerikan, Uashington, gjithashtu shpalli gjendje emergjente për shkak të stuhisë së borës që pritet gjatë fundjavës. Masa ka hyrë menjëherë në fuqi, tha kryetarja e qytetit, Muriel Bowser.

Parashikohet që reshjet e borës në qytetin me rreth 700.000 banorë të fillojnë të shtunën në mbrëmje dhe të vazhdojnë deri të dielën, dhe ndoshta edhe të hënën. Gardës Kombëtare amerikane i është kërkuar që të ofrojë mjete motorike për të mbështetur shërbimet emergjente.

Bowser tha se këto reshje bore do të jenë të mëdha, që nuk janë parë që një kohë të gjatë, duke shtuar se me gjasë do të ketë ngrica në rrugë. Ajo u bëri thirrje banorëve që të qëndrojnë në shtëpi dhe të sigurojnë ndriçim alternativ në rast të situatave emergjente.

Presidenti amerikan, Donald Trump, duke reaguar për stuhinë dimërore, kritikoi ekspertët e klimës.

“A mund të na shpjegojnë përkrahësit e mjedisit: “Çfarë ndodhi me ngrohjen globale”, shkroi ai në Truth Social.

Ngrohja globale nënkupton se temperaturat rriten gradualisht me një mesatare në terma afatgjatë.

Sipas ekspertëve, edhe shpeshtësia dhe intensiteti i ngjarjeve ekstreme të motit po nxit ngrohjen globale, përfshirë stuhitë dhe shirat e mëdha./ REL

Gjyqtarja e Gjykatës së Posaçme, Irena Gjoka, i ka dërguar përmes një letre Këshillit të Lartë Gjyqësor (KLGJ), ku u i ka parashtruar argumentat e saj për vendimin Gjyqësor nga Gjykata e Janinës.

Gjoka pretendon se nuk ishte njoftuar kurrë, në asnjë lloj forme, se është dënuar nga një gjykatë greke.

Kjo sipas saj ishte arsyeja që në formularin e dekriminalizimit nuk ka deklaruar se është dënuar me vendim gjykate në Greqi, për falsifikim vize.

Ajo vijoi më tej duke thënë se nuk ka kryer asnjë shkelje të këtij lloji, teksa shtoi se në datë 24 dhjetor të vitit 2002 ajo ka tentuar të futet në Greqi nëpërmjet pikës kufitare të Kakavijës, ku i është ndaluar hyrja në territorin grek, në mënyrë të pashpjegueshme. Një gjë e tillë Gjoka pretendoi se i kishte ndodhur edhe në vitin 2003.

Gjykata e Janinës rezulton ta ketë dënuar Gjokën me tre muaj burgim dhe 1500 euro gjobë, por dënimi me burgim është konvertuar me gjobë në masën 4.4 euro në ditë.

Polonia ka njoftuar dërgimin e qindra gjeneratorëve në Ukrainë, ndërsa sulmet ruse ndaj infrastrukturës energjetike kanë shkaktuar ndërprerje masive të energjisë elektrike.

Sulmet në sistemin energjetik ukrainas kanë çuar në ndërprerje afatgjata të energjisë elektrike dhe ujit në Kiev, të cilat kanë zgjatur tre deri në katër herë më shumë se në dimrat e mëparshëm, ndërsa temperaturat e natës në kryeqytet kanë rënë deri në -20 gradë Celsius.

Rusia pretendon se sulmet kanë për qëllim uljen e kapacitetit luftarak të Ukrainës, por nga ana tjetër Kievi thekson se objektivi janë civilët.

Më herët Ursula von der Leyen njoftoi dërgimin e 447 gjeneratorëve me vlerë 3.7 milionë euro, për të siguruar furnizimin me energji elektrike të spitaleve, strehimoreve dhe shërbimeve thelbësore, si pjesë e masave të mbrojtjes civile.

Djali i Sokol Olldashit, Glauk Olldashi ka mbajtur fjalë e tij gjatë takimit me kryetarin e PD-së, Sali Berisha.

Ai është shprehur se partia e tyre ka shumë probleme, ndër to edhe fakti që shumë demokratë që mbajnë fjalën në ‘Foltoret’ e opozitës janë ‘tapë të pirë’ dhe nuk dinë çfarë flasin.

“Partia jonë ka shumë probleme. Ne duhet të bëjmë një takim tjetër pa kamera, sepse unë jam me parimin që problemet e shtëpisë fliten në shtëpi, jo në sytë e botës.

Në çdo të hënë bëhen foltoret para Kryeministrisë dhe pjesëmarrja nuk është e kënaqshme. Problem nuk është që njerëzit kanë frikë, por problemi është që ata nuk duan. Ata që dalin tek foltoret aty nuk janë të denjë, sepse ai që del aty nuk është për veten, por për Partinë Demokratike.

Ata që dalin aty dhe flasin kuturu, madje disa kanë qenë edhe tapë dhe ju merret goja kur flasin dhe kjo na dëmton të gjithëve. Dëmtimi i imazhit publik na dëmton ne të gjithëve”, u shpreh i riu.

Kryetari i Partisë Demokratike, Sali Berisha, u ka bërë thirrje të gjithë të rinjve të ngrenë zërin për të drejtat e tyre.

Gjatë fjalës së tij me të rinjtë një ditë para protestës kombëtare para Kryeministrisë, ai është shprehur se ashtu siç ka ndodhur në Beograd dhe në Bangladesh, ku gjenerata Z ka përmbysur regjimin, ashtu edhe të rinjtë opozitarë duhet të nisin këtë mision për të rikthyer shpresën, besimin, lirinë, të drejtat dhe të ardhmen e tyre.

“Është gjenerata Z që e përmbysën regjimin në Bangladesh, që përmbysi regjimin në Nepal, Sri Lanka, që po i dridh themelet Beogradit. Aty ra një çati në stacionin e trenit të Novi Sad-it, që humbën jetë njerëzish, 13 qytetarë, por studentët e Beogradit nuk i ndahen dhe do fitojnë. Lufta kundër diktaturave nuk është një ndeshje futbolli. Ju bëj thirrje ju të ngriheni në lartësinë e këtij misioni. Sot keni shansin e madh të riktheni edhe një herë shpresën, besimin, lirinë, të drejtat, të ardhmen tuaj dhe të shqiptarëve”, u shpreh Berisha.

Imazhet që tregojnë agjentët e ICE-së duke arrestuar një fëmijë 5-vjeçar të kopshtit në Minesota kanë bërë xhiron e rrjetit dhe kanë tërhequr edhe vëmendjen e zv.presidentit amerikan, J.D. Vance.

Siç shihet në video, ka një numër oficerësh policie në vendngjarje, ndërsa një grup shoqëron fëmijën dhe e vendos atë në automjetin e tyre.

Në të njëjtën kohë, deklaratat e Zëvendëspresidentit të SHBA-së J.D. Vance, i cili konfirmoi të enjten se autoritetet federale ndaluan një djalë pesëvjeçar pas një operacioni nga policia e imigracionit (ICE) në Minneapolis, po shkaktojnë reagime të shumta.

Vance pretendoi se ICE mori përsipër fëmijën 5-vjeçar sepse babai i tij, të cilin ai e përshkroi si një “emigrant të paligjshëm”, iku për të shmangur arrestimin nga agjentët.

“Unë thashë, ‘O Zot, kjo është e tmerrshme. Si mund të arrestojmë një fëmijë pesëvjeçar?’”, tha Vance, duke shtuar se kishte ndryshuar mendje për veprimin e ndërmarrë nga ICE. “Çfarë duhej të bënin? Të linin një fëmijë pesëvjeçar të vdiste nga të ftohtit?”, pyeti ai.

Fëmija, 5-vjeçari Liam Conejo Ramos, u arrestua së bashku me të atin, Adrian Alexander Conejo Arias, në rrugën ngjitur me shtëpinë e tyre dhe sipas Departamentit të Sigurisë Kombëtare, e gjitha ndodhi kur Adrianit iu afruan agjentët në hyrje të shtëpisë së tij, pasi kishte marrë djalin e tij 5-vjeçar nga kopshti.

Kryeministri i Hungarisë, Viktor Orban ka akuzuar Bashkimin Evropian se dëshiron të zgjasë luftën në Ukrainë, duke argumentuar se vendet kryesore të kontinentit nuk po kërkojnë vërtet një armëpushim.

Në një intervistë të botuar në “Corriere della Sera” , Orban e lidhi gjithashtu kritikën e tij me vendimin e Budapestit për t’u bashkuar me Bordin e ri të Paqes, të promovuar nga administrata amerikane dhe të paraqitur në Forumin Ekonomik Botëror në Davos për të promovuar paqen dhe rindërtimin në Lindjen e Mesme.

Orban është i vetmi udhëheqës i një vendi të Bashkimit Evropian që ka rënë dakord të bashkohet me Bordin e Paqes, një vendim që rrezikon të krijojë përçarje të reja me Brukselin dhe partnerët e saj evropianë, duke pasur parasysh qëndrimin tradicional kritik të Hungarisë ndaj sanksioneve kundër Moskës dhe mbështetjen ushtarake për Kievin.

Kur u pyet për iniciativën, Orban u përgjigj me pyetje:  “Dhe pse nuk janë të tjerët këtu? Kjo është pyetja e duhur.”

Ai raportoi se kishte diskutuar Bordin e Paqes me kryeministren Giorgia Meloni, e cila i shpjegoi vështirësitë kushtetuese të Italisë në anëtarësimin në organizata të reja ndërkombëtare ndërsa tha se “Për Hungarinë, rregullat janë më të thjeshta.”

Pronari kinez i TikTok-ut, ByteDance, njoftoi të enjten se e ka finalizuar një marrëveshje për krijimin e një ndërmarrjeje të përbashkët në pronësi amerikane – e cila do t’i ruajë të dhënat në SHBA – me qëllim që ta shmangë mbylljen e aplikacionit të videove të shkurtra në Shtetet e Bashkuara.

TikTok i ka mbi 200 milionë përdorues amerikanë.

Kjo marrëveshje përbën moment kyç për kompaninë e rrjeteve sociale, pas përplasjeve disavjeçare që nisën në gusht të vitit 2020, kur presidenti amerikan Donald Trump u përpoq ta mbyllte aplikacionin për shkak të shqetësimeve për sigurinë kombëtare.

Më pas, Trump vendosi të mos e zbatojë një ligj të miratuar në prill të vitit 2024, i cili kërkonte që ByteDance t’i shiste asetet e veta në SHBA deri në janarin pasues ose të përballej me mbyllje. Kjo masë u mbështet edhe nga Gjykata e Supreme.

ByteDance theksoi se ndërmarrja e re, TikTok USDS Joint Venture LLC, do t’i ruajë të dhënat e përdoruesve amerikanë, aplikacionet dhe algoritmet përmes masave të privatësisë së të dhënave dhe sigurisë kibernetike.

Kompania dha pak hollësi lidhur me procesin e shkëputjes së pronësisë.

Trump e vlerësoi marrëveshjen në një postim në rrjetet sociale, duke thënë se TikTok-u “tani do të jetë në pronësi të një grupi patriotësh dhe investitorësh të mëdhenj amerikanë, më të mëdhenjtë në botë”.

Ai e falënderoi presidentin e Kinës, Xi Jinping, “për bashkëpunimin me ne dhe, në fund, për miratimin e marrëveshjes. Ai mund të kishte vepruar ndryshe, por nuk e bëri, dhe ai çmohet për vendimin e tij”.

Sipas marrëveshjes, investitorët amerikanë dhe ndërkombëtarë do ta zotërojnë 80.1 për qind të ndërmarrjes, ndërsa ByteDance do t’i mbajë 19.9 për qind të aksioneve.

Tre investitorët menaxhues të TikTok USDS JV – gjiganti i informatikës cloud Oracle, grupi i kapitalit privat Silver Lake dhe firma investuese MGX me seli në Abu Dhabi – do t’i zotërojnë secili nga 15 për qind.

Një zyrtar i Shtëpisë së Bardhë i tha Reuters se qeveritë e SHBA-së dhe Kinës e kanë miratuar marrëveshjen.

Trump i ka më shumë se 16 milionë ndjekës në llogarinë e tij personale në TikTok dhe tha se ky aplikacioni e ndihmoi në fitimin e zgjedhjeve presidenciale. Shtëpia e Bardhë gjithashtu hapi llogari zyrtare në TikTok në gusht.

TikTok njoftoi se investitorët në ndërmarrje përfshijnë Dell Family Office – firmën investuese të themeluesit të Dell Technologies, Michael Dell – si dhe Vastmere Strategic Investments, Alpha Wave Partners, Revolution, Merritt Ëay, Via Nova, Virgo LI dhe NJJ Capital.

Ish-drejtuesit e TikTok USDS, Adam Presser dhe Will Farrell, janë emëruar drejtor ekzekutiv dhe drejtor i sigurisë, përkatësisht.

Drejtori ekzekutiv i TikTok-ut, Shou Chew, u emërua gjithashtu anëtar i bordit të ndërmarrjes; ai drejton bizneset dhe strategjinë globale të TikTok-ut./rel

Shtetet e Bashkuara po kërkojnë një rishikim rrënjësor të marrëveshjes së mbrojtjes me Danimarkën, me synimin për të hequr të gjitha kufizimet ligjore dhe politike mbi praninë e saj ushtarake në Groenlandë. Sipas Bloomberg, Uashingtoni dëshiron të rishkruajë pikat kyçe të marrëveshjes, duke i dhënë vetes liri të plotë veprimi ushtarak në ishullin strategjik të Arktikut. Marrëveshja origjinale e vitit 1951, e ndryshuar në vitin 2004, parashikon që SHBA duhet të konsultohet dhe të informojë Danimarkën dhe Groenlandën për çdo ndryshim të rëndësishëm në aktivitetet apo objektet ushtarake. Kjo klauzolë është pikërisht ajo që negociatorët amerikanë synojnë të dobësojnë ose të heqin, për të shmangur çdo angazhim detyrues.

Burime të njohura me bisedimet i thanë Bloomberg se SHBA po kërkon një formulim që garanton liri të plotë lëvizjeje dhe operimi, pa kufizime kohore apo operative. Megjithatë, detajet përfundimtare të marrëveshjes mbeten ende objekt negociatash. Zëdhënësja e Shtëpisë së Bardhë, Anna Kelly, deklaroi se nëse marrëveshja finalizohet, Shtetet e Bashkuara do të arrijnë objektivat e tyre strategjike në Groenlandë “me kosto minimale dhe në baza të përhershme”. Ambasada daneze në Uashington nuk pranoi të komentojë zhvillimet.

Presidenti Donald Trump e ka konfirmuar publikisht këtë linjë, duke njoftuar se ekziston një “kornizë për një marrëveshje të ardhshme” pas takimit me Sekretarin e Përgjithshëm të NATO-s, Mark Rutte, në Forumin Ekonomik Botëror në Davos. Ai theksoi se NATO do të përfshihet në proces dhe se brenda dy javësh do të bëhej e qartë nëse Danimarka ka dhënë pëlqimin e saj. Në një intervistë për Fox Business, Trump deklaroi se SHBA synon “akses ushtarak të plotë, pa afat kohor”, duke përfshirë vendosjen e sistemeve raketore dhe forcimin e pranisë së NATO-s në Arktik. Sipas Bloomberg, marrëveshja mund të përfshijë edhe të drejta minerare që synojnë përjashtimin e interesave kineze, në këmbim të angazhimit amerikan për të mos vendosur tarifa ndaj vendeve evropiane.

Një marrëveshje e tillë mund të ndihmojë në zbutjen e asaj që konsiderohet si kriza më e rëndë në marrëdhëniet transatlantike që nga themelimi i NATO-s. Aktualisht, SHBA mban vetëm një bazë kryesore në Groenlandë, me rreth 150 ushtarakë dhe mbi 300 kontraktorë, një prani shumë më e reduktuar krahasuar me periudhën e Luftës së Ftohtë. Megjithatë, mbetet e paqartë se deri në çfarë mase Danimarka dhe Groenlanda do të pranojnë zgjerimin e pakufizuar të pranisë amerikane. Kryeministrja daneze Mette Frederiksen ka deklaruar se është e hapur për zgjerim të marrëveshjes, por vetëm “në mënyrë të duhur dhe respektuese”.

Trupat daneze u urdhëruan të ishin gati me municione luftarake javën e kaluar kundër një sulmi të mundshëm amerikan ndaj Groenlandës, raportoi sot transmetuesi publik danez DR.

Urdhri u lëshua javën e kaluar, dhe nëse Groenlanda sulmohej, ushtarët danezë ishin gati me municione luftarake. Ushtarëve danezë iu urdhërua të çonin municione luftarake në Nuuk, kryeqytetin e Groenlandës, në skenarin më të keq, sipas raportit, duke cituar informacione nga burime politike.

Sipas transmetuesit, ky ishte rasti derisa presidenti i SHBA-së, Donald Trump u tërhoq nga përdorimi i forcës kundër Grenlandës pas një takimi me shefin e NATO-s, Mark Rutte të mërkurën në Forumin Ekonomik Botëror në Davos, Zvicër.

Gjithashtu theksohet se kishte vullnet të gjerë politik për të ndërmarrë luftën nëse do të ndodhte një sulm amerikan, jo vetëm në qeverinë daneze, por edhe në një gamë të gjerë partish opozitare.

Trumpi ka treguar interes për Groenlandën për shkak të vendndodhjes së saj strategjike në Arktik, burimeve të pasura minerale dhe shqetësimeve për rritjen e ndikimit rus dhe kinez në rajon.

Danimarka dhe Groenlanda kanë refuzuar propozimet për shitjen e territorit, duke riafirmuar sovranitetin danez mbi ishullin.

Pas takimit me Rutten, Trumpi njoftoi se ishte krijuar një kornizë për marrëveshje të mundshme që përfshinte Groenlandën dhe rajonin e Arktikut më të gjerë. Ai hoqi dorë nga kërcënimi për të vendosur tarifa ndaj vendeve evropiane që kundërshtuan ofertën e tij të blerjes.

Një konflikt për motive të dobëta ka përfunduar në dhunë në qytetin e Kukësit, ku disa persona kanë goditur me shkop bejsbolli dhe kanë tentuar të vrasin me armë zjarri një shtetas.

Sipas informacionit paraprak, shtetasit Ç. M. dhe E. M., kushërinj me njëri-tjetrin, dyshohet se së bashku me tre shtetas të tjerë janë përfshirë në një konflikt në ambientet e një lokali. Gjatë përplasjes, ata kanë goditur me shkop bejsbolli shtetasin S. I. dhe kanë tentuar ta vrasin me armë zjarri.

Si pasojë e dhunës, shtetasi S. I. ka pësuar dëmtime nga goditjet me shkop bejsbolli dhe ndodhet në spital, nën kujdesin e mjekëve. Nga të shtënat me armë zjarri nuk raportohet për persona të lënduar.

Presidenti i FIFA-s (organizmi botëror i futbollit), Gianni Infantino, ka bërë një njoftim të rëndësishëm gjatë Forumit Ekonomik Botëror në Davos, duke konfirmuar se Presidenti i Shteteve të Bashkuara të Amerikës, Donald Trump, do të jetë pjesë e ceremonisë së dorëzimit të Kupës së Botës 2026 për fituesit e turneut.

Infantino u prit me tone entuziaste nga Trump përpara kamerave, i cili e prezantoi presidentin e FIFA-s me fjalët: “Ja ku është Gianni, ai është mbreti i futbollit, mbreti i sportit”.

Në përgjigje, Infantino u shpreh me të njëjtin admirim, duke zbuluar planin për ceremoninë finale të Kupës së Botës.

“Verën e ardhshme, do t’ia dorëzoj Kupën e Botës kampionit së bashku me presidentin e Shteteve të Bashkuara”.

Ky njoftim konfirmon rolin e Trump në ngjarjet madhore të futbollit, pas precedentit të vendosur verën e kaluar në Kupën e Botës për Klube, ku presidenti i SHBA-së i dorëzoi trofeun Chelseat pas fitores ndaj Paris Saint Germain.

Duke folur më gjerësisht në Davos, Infantino e shfrytëzoi momentin për të theksuar rolin e futbollit si faktor bashkues në një botë të polarizuar.

“Ne jetojmë në një botë të ndarë, por ne mbështesim paqen. Njerëzit i besojnë FIFA-s dhe vendeve pritëse. Amerika do ta mirëpresë botën,” u shpreh kreu i FIFA-s.

Kupa e Botës 2026 do jetë më e madhja në histori, me 48 kombëtare pjesëmarrëse dhe do zhvillohet nga 11 qershori deri më 19 korrik në SHBA, Meksikë dhe Kanada.