Kryeministri Edi Rama inspektoi sot parkun e ri të ndërtuar në liqenin e Paskuqanit, pjesë e bashkisë së Kamzës. Kryebashkiaku Rakip Suli prezantoi të gjithë projektin e përfunduar, ku bëhet fjalë për një park prej 84 hektarësh, kënde lojërash, mol si dhe një amfiteatër.

Ndër të tjera, Rakip Suli tha se ka një interes të madh për ndërtime private, të cilët janë menduar jo më shumë se 3 katë në afërsi të parkut.

“Mbështetje e jashtëzakonshme nga ju kryeministër për bashkinë e Kamzës. Është viti i 3 sepse ke qenë disa herë dhe askush nuk e imagjinon që ky park është ndërtuar nga e para prej 84 hektarësh me ambiente sportive, mol, amfiteatër. E kemi mbushur me rreth 80 mijë pemë. Pedonalja rreth e përqark është 5.2 kilometër. Ndërtimin në pjesën private e kemi menduar 2 deri në 3 kat. Ka një kërkesë të jashtëzakonshme”, tha Rakip Suli.

Kryeministri Edi Rama u shpreh se bashkia e Kamzës duhet të merret si shembull dhe se ky park po i jep qytetit një aset të gjelbër të paçmueshëm, falë kësaj bashkie, shton Rama.

“Duhet të gjejmë mënyrën për të promovuar kanoet, është super sport. Këtu vazhdon puna intensive për një transformim që nuk ndalet. Ky park është duke nisur të marrë një formë që mjafton të imagjinosh sesi do të rritet kurora e pemëve në vitet që vijnë, për të kuptuar që falë qeverisë, një aset i gjelbër i paçmueshëm po i jepet kryeqytetit nga Kamza. Kur sheh këtë transformim, të vjen keq sesi u vlerësuan në të kaluarën asete po kaq të vlefshme si liqeni  i Farkës apo ai i Thatë përpara se ato trajektoret të futeshin në një administrim racional. Të mësojmë nga Kamza dhe të ecim në shembullin e Kamzës”, tha Rama.

Komisioni Qendror i Zgjedhjeve ka vendosur që të ketë rinumërim të plotë të të gjitha votave në vendvotimet në 28 komuna. Po ashtu është vendosur që të shkarkohet përfaqësuesit politikë në Komisionin Komunal Zgjedhor në Prizren, ku sipas kreut të KQZ-së, Kreshnik Radoniqi, janë vërejtur dallimet më të mëdha në votat për kandidatët për deputetë.

Paraprakisht, në këto 28 komuna KQZ kishte vendosur që të rinumëroheshin vetëm 10 për qind e vendvotimeve, ndërkaq në 10 komuna të tjera vendosi për rinumërim të plotë.

Vendimi i 19 janarit vjen pasi gjatë rinumërimit të pjesshëm u vërejtën dallime të mëdha në votat për kandidatët për deputetë në zgjedhjet e parakohshme parlamentare të 28 dhjetorit të vitit 2025.

Pas zbulimit të këtyre devijimeve, partitë dhe organizatat e shoqërisë civile kërkuan rinumërim të plotë të votave./ REL

Kërcënimi i presidentit amerikan Donald Trump me tarifa të reja doganore në mesin e konfliktit për Groenlandën, ministri i jashtëm gjerman Johann Wadephul i dha një përgjigje europiane.

Shefi i diplomacisë gjermane u shpreh se nuk beson që marrëveshja e arritur kohë më parë me Shtetet e Bashkuara, do të ratifikohet.

“Nuk pres që marrëveshja tregtare mes BE dhe SHBA, e arritur muaj më parë, të ratifikohet. Nuk besoj se kjo marrëveshje është e mundur në situatën aktuale”, tha ministri i jashtëm gjerman Johann Wadephul.

BE-ja dhe SHBA-ja arritën një marrëveshje vitin e kaluar në mosmarrëveshjen për tarifat, e cila ende duhet të miratohet nga Parlamenti Europian.

Ratifikimi ishte planifikuar për javën e ardhshme, por tani, me kërcënimin e tarifave të reja për shkak të mosmarrëveshjes për Groenlandën, mbetet për t’u parë nëse kjo marrëveshje do të realizohet.

“Ajo që mund të them është se jam shumë skeptik për mundësinë që kjo të ketë sukses tani. Nëse SHBA e ka seriozisht marrjen e masave të mëtejshme, natyrisht që do të duhet të ketë një përgjigje europiane”, shtoi ai.

Deklaratat e Trumpit se Groenlanda i duhet SHBA-së, dhe ajo është gati ta marrë qoftë përmes blerjes apo forcës ushtarake.

Shefi i Shtëpisë së Bardhë njoftoi në fundjavë tarifa të reja doganore për Gjermaninë dhe shtatë vende të tjera europiane derisa të arrihet një marrëveshje për Groenlandën.

Wadephul riafirmoi solidaritetin me Groenlandën në programin Bericht aus Berlin: “Sovraniteti i Mbretërisë së Danimarkës dhe pavarësia e Groenlandës janë të palëkundura. Të ardhmen e Groenlandës e vendosin groenlandezët.”

Sa i përket çështjeve të tjera territoriale, vendimi i takon Mbretërisë së Danimarkës. “Të gjithë europianët qëndrojnë në solidaritet me Danimarkën dhe Groenlandën,” theksoi ai, edhe pse insistoi se nuk sheh rrezik për NATO-n dhe se nuk ka dyshime që Shtetet e Bashkuara të Amerikës e mbështesin plotësisht aleancën dhe gjithashtu mbrojtjen e Europës.

Qeveria e Irakut ka bërë me dije se forcat amerikane kishin përfunduar një “tërheqje të plotë” nga objektet ushtarake brenda territorit federal të vendit, gjë që përjashton Rajonin gjysmë-autonom të Kurdistanit ku mbeten trupat amerikane.

Ministria e mbrojtjes e Irakut tha se kontingjenti i fundit i këshilltarëve amerikanë ishte larguar nga Baza Ajrore Al-Asad në provincën Anbar në Irakun perëndimor, e cila mbajti trupat amerikane për më shumë se dy dekada. Ushtria amerikane ka qenë duke u tërhequr për disa vite pasi qeveria irakiane bëri thirrje që ta bënte këtë në vitin 2023.

Koalicioni i udhëhequr nga SHBA për të luftuar kundër grupit të Shtetit Islamik, u tërhoq gjithashtu nga selia e Komandës së Operacioneve të Përbashkëta, duke i lënë objektet nën kontrollin e plotë të forcave të sigurisë irakiane, shtoi deklarata e ministrisë. Forcat amerikane ende qëndrojnë në Bazën Ajrore Harir në provincën Erbil, e cila ndodhet në Rajonin e Kurdistanit. Qeveria qendrore e Irakut nuk e kontrollon plotësisht rajonin kurd në Irakun verior, pasi është një entitet federal autonom me qeverinë, parlamentin dhe forcat e veta të sigurisë, të njohura nga kushtetuta irakiane.

Prania ushtarake amerikane në Irak ka luhatur shumë që nga pushtimi i vitit 2003. Në kulmin e saj, SHBA-të kishin 170,000 trupa në Irak. Në vitin 2011, ish-Presidenti Barack Obama tërhoqi forcat amerikane nga vendi. Rreth 5,000 trupa u vendosën në Irak në vitin 2014 me kërkesë të qeverisë irakiane, e cila kërkoi ndihmën e SHBA-së në luftën kundër ISIS-it.

Që nga dhjetori i vitit 2021, kur ushtria amerikane njoftoi përfundimin e rolit të saj luftarak në vend, SHBA-të kanë pasur afërsisht 2,500 trupa në Irak në një kapacitet këshillimi dhe ndihme.

Ministria irakiane publikoi të shtunën një video që tregon komandantë të lartë ushtarakë irakianë duke ecur nëpër korridore dhe korridore bosh brenda Bazës Ajrore Al-Asad. Komanda Qendrore e Departamentit të Mbrojtjes të SHBA-së i tha CNN të dielën se “deklarata e mëparshme e Ministrisë së Mbrojtjes së Irakut që tregonte dorëzimin ishte faktike”, pa dhënë detaje të mëtejshme.

Tërheqja vjen mes tensioneve rajonale midis SHBA-së dhe Iranit, ndërsa Presidenti i SHBA-së Donald Trump shqyrton nëse do ta sulmojë Iranin mes protestave vdekjeprurëse në rrugë kundër regjimit autoritar të vendit.

Forcat amerikane të stacionuara në bazën Al-Asad janë sulmuar dhjetëra herë gjatë viteve nga Irani dhe grupet e mbështetura nga Irani. Në janar 2020, Irani nisi një sulm me raketa balistike ndaj forcave amerikane në Al-Asad në hakmarrje për një sulm me dron në një aeroport të Bagdadit që vrau komandantin më të fuqishëm ushtarak të Iranit, Qasem Soleimani. Bombardimi i rëndë zgjati rreth dy orë, duke synuar vetëm zonat amerikane të bazës së përbashkët.

Italia është shprehur e gatshme të ndërmjetësojë midis SHBA-së dhe Evropës. Kryeministrja italiane Giorgia Meloni konsiderohet nga udhëheqësit evropianë si një person që ka marrëdhënie të mirë me Trumpin.

Ministri i Jashtëm Antonio Tajani tha: “Unë besoj se Italia, për shkak të natyrës së saj, kapacitetit të saj për ndërmjetësim dhe aftësisë së saj për të folur me të gjithë, mund të luajë një rol pozitiv për gjetjen e marrëveshjeve.” Ai shtoi se Kryeministrja Giorgia Meloni është “në dialog me Shtetet e Bashkuara, por edhe me evropianët”.

Tajani vazhdoi: “Nuk ka absolutisht asnjë nevojë për luftëra tregtare apo konflikte. Ne kemi nevojë për dialog dhe duhet të gjejmë zgjidhje që nuk e dëmtojnë askënd.”

Meloni: “I thashë Trumpit çfarë mendoja”
Kryeministrja italiane Giorgia Meloni i quajti tarifat doganoretë shpallura nga Presidenti i SHBA-së Donald Trump si “gabim”. Ajo tha se kishte folur me Trumpin “dhe i kishte thënë mendimin e saj”.

Në të njëjtën kohë Meloni u përpoq të qetësonte tensionet midis SHBA-së dhe Evropës. Kishte “një problem me komunikimin dhe mirëkuptimin”, tha ajo. “Nga perspektiva e SHBA-së mesazhi nga përtej Atlantikut nuk kishte qenë i qartë”.

Sytë nga Davosi

Një mundësi për bisedime për krizën mund të ofrojë edhe Forumi Ekonomik Botëror në Davos. Donald Trump pritet të shkojë atje të mërkurën. Edhe kancelari Merz do të jetë në Davos. Sekretari i Përgjithshëm i NATO-s, Mark Rutte, deklaroi pas një bisede telefonike me Trumpin: “Ne do të vazhdojmë të punojmë në këtë drejtim” dhe gëzohet për takimin me Trumpin në Davos.

Italia, një nga anëtaret themeluese të NATO-s, nuk dërgoi në Groenlandë asnjë trupë në misionin e zbulimit të udhëhequr nga Danimarka. Në mision krahas Danimarkës morën pjesë shtatë vende të tjera evropiane: Norvegjia, Suedia, Franca, Gjermania, Britania e Madhe, Holanda dhe Finlanda.

Është e qartë se rreziqet gjeopolitike dhe rritja e mëtejshme e tensioneve tregtare përbëjnë një nga rreziqet kryesore, ndër më të ngutshmet, për ekonominë globale, tha kryeekonomisti i FMN-së, Pierre-Olivier Gourinchas, në një konferencë për shtyp në Bruksel, duke theksuar se parashikimet në “World Economic Outlook” bazohen në supozimin që niveli i tarifave të mbetet i pandryshuar.

“Duke parë përpara, mundësia e një përshkallëzimi të tarifave dhe tensioneve gjeopolitike përbën një rrezik të rëndësishëm, që mund të ndikojë në mënyrë të konsiderueshme mbi rritjen”, shtoi ai.

Në “World Economic Outlook”, ku merret parasysh status quo-ja pa llogaritur efektin e mundshëm të masave të SHBA-së për Groenlandën, FMN-ja thekson se tronditjet nga tarifat dhe ndryshimet në politikat tregtare nuk kanë goditur rritjen globale, falë rritjes së fortë të investimeve teknologjike, veçanërisht në inteligjencën artificiale.

Rritja globale pritet të mbetet në 3,3% për vitin 2026 dhe 3,2% për vitin 2027, në përputhje me 3,3% të vitit 2025.

Parashikimet për 2026 janë rishikuar lehtë në rritje krahasuar me tetorin e kaluar, me një shtytje të fortë nga investimet teknologjike – veçanërisht në Amerikën e Veriut dhe Azinë.

Policia e Shtetit ka finalizuar operacionin policor të koduar “Twins”, duke arrestuar dy vëllezër të dyshuar si të përfshirë në vrasjen e një shtetasi, ngjarje e ndodhur në qarkun Dibër në vitin 2018.

Operacioni u zhvillua nga Drejtoria Vendore e Policisë Dibër, në bashkëpunim me Departamentin e Policisë Kriminale dhe DVP Gjirokastër, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Dibër.

Si rezultat i hetimeve të thelluara, policia siguroi prova se dy shtetas të dyshuar për vrasjen strehoheshin në qytetin e Gjirokastrës. Bazuar në këtë informacion, u bë e mundur kapja dhe arrestimi i shtetasve Kelmend Krusa, 39 vjeç, dhe Klodian Krusa, 39 vjeç, vëllezër, banues në Gjirokastër.

Gjatë kontrollit të banesave të tyre, shërbimet e policisë sekuestruan 3 armë zjarri (2 kallashnikovë dhe 1 pushkë), municion luftarak, 3 krehëra, 1 thikë, 1 maskë si dhe 3 aparate celularë.

Armët e sekuestruara do të dërgohen në Institutin e Policisë Shkencore për ekzaminime të mëtejshme, me qëllim verifikimin nëse janë përdorur në vrasjen e vitit 2018 apo në ngjarje të tjera kriminale.

Gjykata e Posaçme shtyu për më 2 shkurt seancën e shqyrtimit paraprak të dosjes ndaj Erion Veliajt dhe të bashkëpandehurve. I pranishëm në seancë kryebashkiaku ka këmbëngulur në kërkesën e tij për t’u njohur me aktet e dosjes.

Gjykata vendosi të mbyllë shqyrtimin gjyqësor duke i konsideruar abuzive kërkesën e tij dhe të avokatëve për t’ju dhënë kohë të njihen me dosjen dhe mungesë vullneti për të paraqitur parashtrimet. Në një moment të mëvonshmëm gjykata ka shfuqizuar vendimin e saj. Kjo ka ardhur pasi avokatja e caktuar kryesisht nga Gjykata për Veliajn, Valtentina Teodoresku, kërkoi autorizim për të takuat në paraburgim Veliajn e më pas për të paraqitur parashtrimet e saj me shkrim.

Gjykata pranoi kërkesën e saj dhe shtyu seancën.

Presidenti i Republikës, Bajram Begaj, i dërgoi të hënën një mesazh deputetëve të Shqipërisë me rastin e çeljes së sesionit të ri parlamentar të Legjislaturës XI, ku theksoi se Kuvendi nis një gjashtëmujor vendimtar, të mbushur me nisma reformuese dhe përgjegjësi të larta shtetformuese.

Kreu i Shtetit nënvizoi se çdo iniciativë ligjore duhet t’i shërbejë forcimit të shtetit të së drejtës, mirëqenies së qytetarëve dhe objektivit strategjik të Shqipërisë: anëtarësimit në Bashkimin Evropian.

Duke iu referuar përafrimit të legjislacionit dhe agjendës së integrimit, Presidenti i Republikës thekson në mesazhin drejtuar deputetëve se procesi kërkon përkushtim, reforma të thella dhe bashkëpunim të sinqertë ndërinstitucional.

“Përafrimi i legjislacionit dhe plotësimi me prioritet i agjendës së Bashkimit Evropian nuk mund të ketë konkurrencë. Ai kërkon përgjegjësi dhe përkushtim të vërtetë, kërkon reforma të thella dhe punë intensive. Procesi parlamentar në këtë drejtim nuk e garanton dot suksesin nëse vëmendja shpërqendrohet, nëse ligjërimi parlamentar humbet rrugën, nëse bashkëpunimi ngec, nëse debati humbet fokusin nga interesi ynë kombëtar dhe nëse rezultatet vonojnë. Në rrugën drejt familjes evropiane ne nuk kemi kohë për të humbur dhe as energji për të shpërdoruar”,- shprehet Presidenti Begaj.

Ndërsa thekson reformën në drejtësi dhe nisjen e saj si emergjencë kombëtare, Presidenti i Republikës shprehet për rëndësinë e mbështetjes së politikës ndaj luftës kundër krimit të organizuar dhe korrupsionit në mënyrë që qytetarët të marrin drejtësi sipas standardeve evropiane.“Reforma në drejtësi nisi si nevojë dhe emergjencë kombëtare. Ajo krijoi institucione të reja dhe mori mbështetjen masive qytetare për një drejtësi të pavarur, profesionale, funksionale dhe që garanton zbatimin e ligjit dhe shtetit të së drejtës. Ky sesion përballet me nevojën që politika të konfirmojë mbështetjen për drejtësinë. Politika duhet të ndihet krenare kur drejtësia vepron kundër korrupsionit, krimit të organizuar, kur drejtësia tregon pavarësi, integritet, profesionalizëm dhe kur qytetarët marrin drejtësi sipas standardeve evropiane”.

Në këtë sesion parlamentar, Kreu i Shtetit e cilësoi reformën zgjedhore si një prioritet, duke kërkuar adresimin e plotë të rekomandimeve të OSBE-ODIHR-it dhe shmangien e ndryshimeve të vonuara që rrezikojnë standardin e zgjedhjeve.

Reforma zgjedhore duhet të arrijë pikën kulmore, – u shpreh Kreu i Shtetit, – duke theksuar se angazhimi në funksion të saj kërkon përkushtim maksimal: “Rekomandimet e misionit të OSBE-ODIHR-it kanë identifikuar çështje thelbësore për standardin e zgjedhjeve në Shqipëri, të cilat nuk mund të ngelen pa u adresuar. Kuadri ligjor zgjedhor duhet t’i nënshtrohet një reformimi tërësor, në një proces konsultimi gjithëpërfshirës dhe në përputhje me praktikat e mira dhe standardet ndërkombëtare brenda këtij sesioni parlamentar. Ndryshimet e vonuara të legjislacionit zgjedhor përbëjnë rrezik për standardin e zgjedhjeve”.

Po ashtu, Presidenti Begaj theksoi rëndësinë e reformës administrativo-territoriale, e cila duhet të udhëhiqet nga interesi i qytetarëve, zhvillimet demografike dhe nevoja për shërbime publike cilësore e të barabarta.

“Reforma administrativo-territoriale përbën, gjithashtu, një gur kilometrik, i cili suksesin e ka të lidhur ngushtë me aftësinë e palëve për dialog konstruktiv dhe kompromis. Kjo reformë  duhet të udhëhiqet nga interesi më i lartë i qytetarëve, lëvizjet demografike, nga nevoja për shërbime dhe infrastrukturë publike dinjitoze dhe të barabartë në çdo njësi për ta bërë vetëqeverisjen vendore të vërtetë dhe të qëndrueshme”.

Presidenti Begaj kërkoi një Kuvend aktiv në kontrollin parlamentar, ku qeveria jep llogari dhe institucionet reagojnë, duke e bërë parlamentin të jetë më pranë qytetarëve dhe më funksional.

“Qytetarët kanë nevojë ta shohin Kuvendin në veprim dhe qeverinë të japë llogari, por, mbi të gjitha, ata kanë nevojë që kjo procedurë parlamentare të jetë serioze dhe e përgjegjshme”, – vlerëson Presidenti i Republikës, duke nënvizuar rëndësinë e rezultatit në këtë proces. Presidenti Begaj shprehet se “Kontrolli parlamentar ka kuptim kur ai prodhon rezultat, kur institucionet vihen në lëvizje, kur merren masa, ndryshohen procedura, përmirësohen ligje”.

Në përmbyllje të mesazhit, Kreu i Shtetit u bëri thirrje deputetëve që mandatin ta trajtojnë si një kontratë besimi me qytetarët dhe ta kthejnë atë në vendime të drejta dhe veprime konkrete në shërbim të Shqipërisë dhe të ardhmes së saj evropiane.

Drejtori i komanduar i Burgut të Durrësit, Edmond Llabani, ka pësuar hemorragji cerebrale dhe është shtruar me urgjencë në Shërbimin e Neurokirurgjisë në Qendrën Spitalore Universitare Nënë Tereza në Tiranë.

Llabani u komandua javën e kaluar në këtë detyrë, pas shkarkimit të drejtorit Indrit Cërloj, i cili edhe u arrestua më pas, i akuzuar për shpërdorim detyre, pas arratisjes së të paraburgosurit Altin Ndoci, gjatë një vizite shëndetësore në Spitalin e Durrësit. Përveç Cërlojit u arrestuan edhe punonjës të tjerë të burgut dhe spitalit.

Llabani është profesionist në fushën e drejtësisë dhe administratës publike dhe ka përvojë të gjerë në menaxhimin e institucioneve të ngjashme. Më parë ka drejtuar Burgun e Peqinit.

Kryetari i Partisë Demokratike, Sali Berisha tha se pjesëmarrja e Kryeministrit Rama në Bordin e Paqes, me ftesë të Donald Turmp, nuk do ta shpëtojë atë nga rënia nga pushtetit.

“Asgjë nuk e shpëton atë nga rrokullima e madhe. Këtë mund t’u them. Ai është në procesin e rrokullimës së madhe. Edi Rama po fshihet pas Lubisë sepse e di që në mënyrë absolute fill mbrapa do jetë krahas saj. Përndryshe, Anila, të kujtohet ty Makbethi se si shkoi ajo dhe i hodhi vaj të nxehtë. Lubisë do i kishte hedhur plumb të shkrirë në vesh ai po të mos qe halli se dosja flet dy rreshta për të dhe një rresht për Lubinë”, tha Berisha pasi doli nga SPAK, ku ishte në zbatim të masës së sigurisë detyrim paraqitje vendosur nga Gjykata.

Ernest Muçi vazhdon të shkëlqejë në kampionatin turk me fanellën e Trabzonsporit. Sulmuesi shqiptar ishte protagonist absolut të dielën në sfidën kundër Kocaelispor, ku shënoi golin vendimtar në minutën e 91-të dhe siguroi një përmbysje dramatike 1-2 për të tijtë.

Takimi ishte i fortë dhe i luftuar deri në fund, ndërsa në minutat shtesë Muçi finalizoi aksionin që i dha Trabzonsporit tri pikë të arta në garën për titull. Ky gol ‘vulos’ edhe një herë formën fantastike që po kalon futbollisti shqiptar, i cili edhe në mesjavë shënoi në Kupë.

Dhjetë gola këtë sezon për sulmuesin 24-vjeçar i cili i dërgon një ‘SMS’ Sylvinhos për ta rikthyer në Kombëtare.

Kryeministri Edi Rama ka reaguar për tragjedinë që ndodhi në Adamuz të Spanjës, ku përplasja e dy trenave i mori jetën 39 personave.

Përmes një mesazhi në “X”, Rama shprehu ngushëllimet e tij më të thella për familjet e viktimave dhe solidaritetin me popullin dhe Qeverinë e Spanjës.

Duke i drejtuar një mesazh kryeministrit spanjoll Pedro Sánchez, Rama shprehu trishtimin e tij për lajmin e aksidentit dhe theksoi se mendimet dhe lutjet e tij janë me ata që humbën të dashurit e tyre, si dhe me të gjithë ekipet e emergjencave që po punojnë pa pushim për të përballuar pasojat e kësaj tragjedie.

“I dashur Pedro Sanchez.

Kam marrë me shumë trishtim lajmin për aksidentin tragjik të trenit që ndodhi në Adamuz.

Në emër të popullit të Shqipërisë dhe timin, dua të shpreh ngushëllimet e mia më të thella për familjet e viktimave dhe solidaritetin tim me popullin dhe Qeverinë e Spanjës në këtë moment dhimbjeje.

Mendimet tona janë me ata që humbën të dashurit dhe me të gjitha ekipet që po punojnë pa u lodhur për t’iu përgjigjur kësaj tragjedie”, shkruan Rama në mesazhin e tij.

Kuvendi sot rikthehen në punë, në mes të një klime të tensionuar politike. Punimet e sesionit të ri parlamentar do të nisin me mbledhjen e Konferencës së Kryetarëve, që do të shqyrtojë kalendarin dhe programin e punës për 5 javët në vijim, ndërsa në orën 17:00 deputetët do të mblidhen në seancë plenare.

Partia Demokratike pritet të debatojë sërish për çështjen Balluku, për arrestimin ose jo të së cilës, Këshilli i Imunitetit do të mblidhet më 28 janar, ndërsa seanca publike në Kushtetuese mbahet më 22 janar.

Ndërkohë, reforma të rëndësishme kanë mbetur pezull. Dy prej më urgjenteve sipas socialistëve janë zgjedhorja dhe territorialja, që duhet të mbyllen brenda korrikut se vendoret e 2027 do të duhet të bëhen me Kod dhe hartë të re. Megjithatë demokratët i bojkotuan që në dhjetor dhe nuk janë gati të rikthehen.

Socialistët në dhjetor u shfaqën të qartë, kur paralajmëruan se do ta presin reflektimin e palës tjetër deri në nisje të këtij sesioni, përndryshe zhbëjnë formulën e konsensusit dhe marrin shumicën e vendeve në tryezë.

Ngelet për t’u parë nëse PS do të kalojë në zbatim konkret të këtij plani, kur Bashkimi Evropian ka kërkuar gjithëpërfshirje dhe jo reforma të njëanshme, teksa në pritje të nisjes së punës është edhe një ambicie tjetër e madhe e shprehur nga kreu i mazhorancës, një reformë e plotë kushtetuese brenda mandatit.

Kërcënimet për një pushtim të Grenlandës nga SHBA- të vazhdojnë të trondisin marrëdhëniet transatlantike. Dje, Donald Trump konfirmoi se do të fluturojë për në Zvicër këtë javë për të folur në Forumin Ekonomik Botëror. Dhe ndërsa titulli i takimit të Davosit të këtij viti, “Fryma e Dialogut”, duket satirik, evropianët nuk e kanë humbur shpresën për të penguar aneksimin e ishullit më të madh në botë.

Sekretari i Përgjithshëm i NATO-s, Mark Rutte, do të takohet me presidentin amerikan në Zvicër dhe ish-kryeministri holandez foli dje në telefon me shefin e Shtëpisë së Bardhë “për të diskutuar për Groenlandën”, dosjen që kërcënon ta varrosë NATO-n përgjithmonë. Tetë vendet evropiane të kërcënuara nga një valë e re tarifash doganore amerikane paralajmëruan dje për “një spirale të rrezikshme”, dhe presidenti francez Emmanuel Macron kërcënoi me kundërmasa të rënda. Por një nga zëvendësit e Trump, Sekretari i Thesarit Scott Bessent, e fyeu përsëri Evropën dhe konfirmoi se “beteja për Arktikun është reale”.

Edhe “nëse nuk është këtë vit”, dhe edhe nëse “nuk ka konflikt” me vetë Groenlandën, për Bessentin problemi është se “Shtetet e Bashkuara projektojnë forcë, evropianët projektojnë dobësi”. Dhe për të ndërtuar mburojën e tij gjigante anti-raketore, Kupolën e Artë, Trump dëshiron të sigurojë kontrollin e ishullit Arktik “për arsye sigurie”, përfundoi zyrtari amerikan.

Megjithatë, brenda partisë së Trump dhe Bessentit, fushata ushtarake e kërcënuar për të pushtuar ishullin danez po shkakton pakënaqësi në rritje. Kryetari i Dhomës së Përfaqësuesve Mike Johnson i tha BBC-së se “nuk parashikoj ndërhyrje ushtarake në Groenlandë. Rruga diplomatike është ajo që duhet ndjekur”. Kolegët e tjerë republikanë kanë shprehur gjithashtu zhgënjim për mosmarrëveshjen e shkaktuar me aleatët e NATO-s dhe luftën e re tregtare të kërcënuar nga Shtëpia e Bardhë.

Përfaqësuesi Don Bacon i quajti kërcënimet e Trumpit “një farsë”, ndërsa kolegët e tij të partisë, Thom Tills dhe Lisa Murkokowski, i dënuan tarifat si “të këqija për Amerikën, bizneset amerikane dhe aleatët e Amerikës”. Një iniciativë dypartiake është nisur gjithashtu në Senat: Senatori Demokrat Tim Kaine dhe Senatori Republikan Rand Paul do të prezantojnë dy rezoluta për të bllokuar Trumpin.

Ndërkohë, evropianët po përpiqen të ngushtojnë radhët: takimi i ambasadorëve nga 27 shtetet anëtare zbuloi plane për të përgatitur masa kundërfinancimi që arrijnë në 93 miliardë euro ose për të futur kufizime aktuale në aksesin e kompanive amerikane në tregun evropian. Dhe tetë vendet e synuara nga kërcënimet tarifore për dërgimin e trupave në Groenlandë kanë marrë stilolapsin dhe letrën për të paralajmëruar Trump për rrezikun e “një spiraleje të rrezikshme”: Britania e Madhe, Danimarka, Finlanda, Franca, Gjermania, Holanda, Norvegjia dhe Suedia. Tetë vendet po nënvizojnë unitetin e tyre në prag të një jave në të cilën Parlamenti Evropian pritet të miratojë marrëveshjen tregtare të nënshkruar me Shtetet e Bashkuara. Dhe Danimarka, përmes Ministrit të saj të Jashtëm Lars Lokke Rasmussen, na ka kujtuar se çfarë është në lojë: “Aleanca Atlantike dhe rendi botëror siç e njohim ne janë në rrezik”.

Dje, qeveritë evropiane bënë deklarata të reja solidariteti me Danimarkën, por përgjigjet e tyre ndaj Trump ishin të një natyre tjetër. Emmanuel Macron kërcënoi përsëri me hakmarrje të rëndë, por patrulla e vogël që Gjermania dërgoi në Grenlandë për të sinjalizuar gatishmërinë e saj për të mbrojtur Arktikun është kthyer tashmë në shtëpi./La Repubblica

39 persona kanë humbur jetën nga përplasja e dy trenave në Andaluzi në Spanjë.

Sipas raportimeve edhe numri i të plagosurve është rritur, të paktën 73 persona morën plagë dhe janë dërguar në spital për të marrë trajtim mjekësor.

Shkaqet e aksidentit mbetet ende të panjohura, ndërsa autoritetet theksojnë se linja hekurudhore ku edhe ndodhi tragjedia ishte rinovuar në maj të 2025.

Imágenes del interior de uno de los trenes que ha descarrilado en Córdoba

Un trabajador se dirige a los pasajeros para pedir colaboración y tranquilidad tras el accidente pic.twitter.com/8NPsW3AOrx

— EL MUNDO (@elmundoes) January 18, 2026

Kryeministri Edi Rama ka ndarë në Facebook pamje nga Dardha. E ‘veshur’ nën pektun e dëborës, pamjet tregojnë magjinë e vërtetë edhe në stinën e dimrit.

“MIRËMËNGJES dhe me Dardhën magjike, ju uroj një javë të mbarë”, shkruan Rama bashkëngjitur videos së publikuar.

Shqipëria është kthyer në një destinacion edhe gjatë sezonit të dimrit për turistët e huaj. Përveç plazheve gjatë verës, turistë të huaj zgjedhin të vizitojnë gjatë dimrit zona që të ofrojnë pamje fantastike dhe mundësi për të eksploruar.

Ditën e hënë vendi ynë do të ndikohet nga kushte atmosferike të qëndrueshme.

Moti parashikohet i kthjellët në pjesën më të madhe të territorit, ndërsa vranësirat të pakta deri mesatare kryesisht në lindje e jug të vendit.

Era do të fryjë me drejtim verilindje– lindje, me shpejtësi mesatare 8 m/s, përgjatë vijës bregdetare në veri dhe zonat luginore era me shpejtësi deri në 16 m/s.

Deti – Valëzimi forcës 2-3 ballë.

Dashi

Bëjini gjërat me dorë në vend që të mbështeteni në pajisje elektronike të sofistikuara për t’i bërë këto gjëra për ju. Do të përfundonit duke shpenzuar më shumë kohë duke u përpjekur të kuptoni se si ta vini në punë makinën tuaj sesa do t’ju duhej ta bënit detyrën thjesht manualisht.

Demi

Në ajër ka një energji të mrekullueshme tokësore që do të ndihmojë në balancimin e natyrës suaj imagjinare. Ky ndikim i fortë stabilizues do t’ju ndihmojë të manifestoni idetë tuaja dhe t’i vini ato në punë në një plan fizik. Shkurt, do të arrini shumë.

Binjakët

Ngadalëso ritmin. Do të lodhesh shumë deri në fund të muajit nëse nuk qetësohesh dhe nuk relaksohesh. Mbaje mend se nuk është gjithmonë e nevojshme të punosh me shpejtësi të plotë për të qenë efektiv në vendin e punës. Qetësohuni.

Gaforrja

Po kërkoni një punë të re? Kjo është dita juaj për ta gjetur atë. Ndjekja e instinkteve tuaja do t’ju çojë në mundësinë e përsosur që do t’ju japë pagën që dëshironi. Natyra juaj e qëndrueshme, e besueshme dhe e ndershme është pikërisht ajo që dëshirojnë punëdhënësit.

Luani

Jini më konservatorë me paratë tuaja. Ndonjëherë shpenzimet tuaja të kota mund të dalin pak jashtë kontrollit. Kjo është një ditë e mirë për të investuar paratë tuaja në diçka domethënëse – diçka që do t’ju ndihmojë. Investojini ato në një projekt.

Virgjëresha

Ndihu i lirë të besosh tek njerëzit e tjerë. Ndonjëherë mund të marrësh përsipër detyra shtesë në vendin e punës sepse nuk ke besim se të tjerët mund t’i bëjnë këto gjëra vetë. Ki besim dhe dije se të tjerët do të të mbështesin kur mbështetesh tek ata.

Peshorja

Kur lindin fërkime në vendin e punës, reagimi juaj i menjëhershëm mund të jetë të fajësoni dikë tjetër. Shikoni veten përpara se të drejtoni gishtin nga dikush tjetër. Është më mirë të jeni personi më i madh dhe të pranoni gabimet tuaja.

Akrepi

Çështjet financiare janë në krye të axhendës. Merrni kohë për t’i adresuar këto çështje me kujdes. Do të jeni jashtëzakonisht efikas me numrat, dhe deklaratat bankare. Vëmendja që do t’i kushtoni çështjeve që lidhen me buxhetin do t’ia vlejë.

Shigjetari

Ke një sekret të rëndësishëm në lidhje me punën të cilin ngurron ta zbulosh. Ky informacion është jetësor për shëndetin dhe suksesin kolektiv të vendit tënd të punës, por ke frikë nga reagimi negativ që mund të krijojë ky informacion.

Bricjapi

Mbani mend se mënyrat tradicionale të trajtimit të një problemi janë shpesh mënyra më e mirë për të gjetur zgjidhjen që po kërkoni. Këto metoda janë bërë traditë për një arsye – sepse funksionojnë. Përqafoni një metodologji më të vjetër për suksesin që dëshironi.

Ujori

Do të anashkalosh një detaj të rëndësishëm nëse nuk je i kujdesshëm. Merr kohën tënde. Mund të të duhet të ngadalësosh, por kjo është në rregull. Ngadalësia dhe qëndrueshmëria e fitojnë vërtet garën sot, prandaj lëviz me kujdes dhe kontrollo të gjitha tabelat rrugore dy herë para se të vazhdosh.

Peshqit

Je në një terren të fortë për t’u ndjerë i lirë të bësh hapin tjetër gjigant në mal. Njerëz të tjerë do të jenë aty për të të mbështetur nëse rrëshqet. Megjithatë, ka shumë të ngjarë që do të jesh në gjendje ta përballosh gjithçka mirë vetë – kështu që mos u shqetëso.

“Donald Trump nuk ka ndërmend të heqë dorë nga mesazhi i tij drejtuar aleatëve evropianë për çështjen e Groenlandës”, tha Sekretari i Thesarit i SHBA-së, Scott Bessant.

Ai gjithashtu në deklaratën e tij nënvizon se Evropa është “shumë e dobët” për të siguruar sigurinë e saj.

Në një intervistë në NBC News, Bessant duket se minimizoi kërcënimet e Bashkimit Evropian për të anuluar marrëveshjen tregtare të arritur vitin e kaluar me administratën Trump, duke vënë në dukje se presidenti amerikan po përdor ndikimin strategjik si “levë” për të arritur qëllimet e tij.

“Para së gjithash, marrëveshja tregtare nuk është finalizuar dhe një veprim emergjent mund të jetë krejtësisht i ndryshëm nga një marrëveshje tjetër tregtare”, tha ai, duke shtuar se Trump po “përdor fuqitë emergjente për ta bërë këtë”.