“Jam presidenti i Venezuelës dhe nuk pranoj fajin”. Kështu Nikolas Maduro u paraqit për herë të parë në Gjykatën e Nju Jorkut, ku u njoh me aktakuzën e tij, duke përfshirë përfshirje në narkoterrorizëm dhe posedim të armëve dhe pajisjeve shkatërruese.

Presidenti i rrëzuar i Venezuelës doli para trupës gjykuese në Manhatan i veshur me një bluzë ngjyrë blu, me pantallona burgu ngjyrë portokalli, këmbët e prangosura, ndërsa u pa në sallë teksa mbante shënime. Ngjashëm veproi edhe bashkëshortja e tij, Cilia Flores.

Nicolas Maduro iu prezantua gjyqtarit Alvin Hellerstein në spanjisht. Ai shtoi se ishte në sallën e gjyqit “i rrëmbyer”, jo me vullnet të lirë. “U kapa në shtëpinë time në Karakas”, tha Maduro, sipas asaj që raportojnë mediat amerikane.

Në sallën e gjyqit, Maduro mban kufje, me sa duket për përkthim. Ish-udhëheqësi venezuelian nuk flet anglisht, raporton CNN.

Mediat amerikane raportojnë se në sallën e gjyqit, Maduro qëndron pranë avokatit të tij Barry Pollack, ndërsa gruaja e tij, Cicli Flores, është ulur afër.

Sekretari amerikan i shtetit Marco Rubio njoftoi se presidenti Trump do të përdorë një të ashtuquajtur “karantinë ushtarake nafte” për t’u siguruar që Venezuela të zbatojë urdhrat e SHBA-së pas përmbysjes së liderit të saj Nicolás Maduro, mesazh i destinuar edhe për veshët e drejtueses së re të vendit, besnikes së tij Delcy Rodriguez.

Shefi i diplomacisë amerikane tha për CBS News se karantina, në thelb do të ndalojë hyrjen dhe daljen e cisternave të naftës që tashmë ishin nën sanksione. Rubio insistoi se SHBA nuk do ta “drejtojë” Venezuelën si një pushtim në stilin e Irakut, siç u shpreh Trump në një konferencë për shtyp pas kapjes së Maduros.

“Në fakt, ky është lloji i kontrollit për të cilin po fliste presidenti kur bëri një pohim të tillë,” shpjegoi sekretari i Shtetit pasi Trump deklaroi se Rubio dhe Pete Hegseth ishin përgjegjës për Venezuelën.

“Ne vazhdojmë me karantinën dhe presim të shohim se do të ketë ndryshime, jo vetëm në mënyrën se si industria e naftës drejtohet për përfitimin e njerëzve, por edhe që të ndalet trafiku i drogës”, ishte komenti i tij. Sipas pohimeve të tij, karantinën do ta zbatojnë oficerët e Marinës, puna e të cilëve, sipas pretendimeve të Rubios, do të paralizojë rrugët sesi regjimi i Maduros gjeneronte të ardhura.

Deklarata e Rubios që nënkupton se SHBA-ja nuk do ta qeverisin Venezuelën çdo ditë, përveç zbatimit të karantinën së naftës, shihet një përpjekje për të zbutur shqetësimet se aksioni i së shtunës për ndryshimin e regjimit në Venezuelë do ta zhyste vendin në një ndërhyrje tjetër të zgjatur të huaj ose në një përpjekje të dështuar për ndërtimin e kombit. Ky qëndrim është një kthesë e dukshme nga deklaratat fillestare të bëra nga presidenti i SHBA-së, Donald Trump, në të cilat ai këmbënguli se Uashingtoni do ta “drejtonte” vendin derisa të gjendet një zgjidhje demokratike afatgjatë për krizën.

16 persona janë vrarë gjatë një jave trazirash në Iran, sipas një deklarate nga grupet e të drejtave të njeriut.

Protestat kundër inflacionit në rritje u përhapën në të gjithë vendin, duke shkaktuar përleshje të dhunshme midis demonstruesve dhe forcave të sigurisë, shkruan Reuters.

Protestat janë më të mëdhatë në tre vjet. Figura të larta kanë përdorur një ton më të butë sesa në disa periudha të mëparshme trazirash, në një moment cenueshmërie për Republikën Islamike me ekonominë në rrënim dhe presionin ndërkombëtar në rritje.

Presidenti Iranian, Masoud Pezeshkian i tha Ministrisë së Brendshme të ndjekë një qasje të përgjegjshme ndaj protestuesve.

Kjo gjuhë është më pajtuese deri më tani e përdorur nga autoritetet iraniane, të cilat këtë javë kanë pranuar vështirësitë ekonomike dhe kanë premtuar dialog edhe pse forcat e sigurisë kanë shtypur kundërshtimin publik në rrugë.

Presidenti i SHBA-së, Donald Trump ka kërcënuar se do t’u vijë në ndihmë protestuesve nëse ata përballen me dhunë.

Ky paralajmërim shkaktoi kërcënime për hakmarrje kundër forcave amerikane në rajon nga zyrtarë të lartë iranianë. Udhëheqësi Suprem Ajatollah Ali Khamenei tha se Irani “nuk do t’i nënshtrohet armikut”.

Presidentja meksikane Claudia Sheinbaum ka dënuar sërish ndërhyrjen e SHBA-së në Venezuelë dhe kapjen e presidentit Nicolas Maduro.

“Qëndrimi i Meksikës për çdo formë ndërhyrjeje është i vendosur, i qartë dhe historik”, tha Sheinbaum në një konferencë për shtyp në Mexico City të hënën.

“Ne jemi kategorikisht kundër ndërhyrjeve në punët e brendshme të vendeve të tjera. Historia e Amerikës Latine është e qartë dhe bindëse. Ndërhyrja nuk ka sjellë kurrë demokraci”- tha Sheinbaum.

“Meksika këmbëngul fuqimisht se SHBA-të nuk i përkasin asnjë doktrine apo fuqie. Kontinenti amerikan u përket popujve të secilit prej vendeve të tij”, shtoi Sheinbaum.

Duke iu përgjigjur akuzave të Presidentit të SHBA-së, Donald Trump, se Meksika nuk ka bërë mjaftueshëm për të luftuar kartelet e trafikimit të drogës, Sheinbaum pohoi: “Meksika bashkëpunon me Shtetet e Bashkuara, për të parandaluar që fentanili dhe drogat e tjera të arrijnë te popullata e saj, veçanërisht te të rinjtë.”

Qeveria e Zvicrës ka bërë të ditur këtë të hënë, 5 janar, se ka marrë vendim për të bllokuar menjëherë të gjitha pasuritë që presidenti i arrestuar i Venezuelës, Nicolas Maduro, apo persona të lidhur me të, mund të kenë në territorin zviceran.

Sipas autoriteteve në Bernë, ky vendim vjen pas arrestimit të Maduros në Karakas gjatë një operacioni të papritur ushtarak amerikan, pas të cilit ai u transferua në Nju Jork për t’u përballur me akuza që lidhen me trafikimin e drogës.

Duke e cilësuar situatën aktuale si “të paqëndrueshme”, qeveria zvicerane deklaroi se masa synon të parandalojë transferimin jashtë vendit të çdo pasurie që mund të jetë përfituar në mënyrë të paligjshme. Për këtë arsye, si veprim paraprak, është vendosur ngrirja e pasurive të Maduros dhe individëve të tjerë të lidhur me të.

Vendimi hyn në fuqi menjëherë dhe do të mbetet i vlefshëm për një periudhë katërvjeçare, deri në një njoftim të dytë. Autoritetet zvicerane sqaruan se, nëse procedurat ligjore në vijim vërtetojnë se fondet janë siguruar në mënyrë të paligjshme, Zvicra do të angazhohet që ato t’i kthehen popullit të Venezuelës.

Në deklaratë theksohet gjithashtu se ngrirja e pasurive nuk prek asnjë anëtar të qeverisë aktuale venezueliane. Masa bazohet në Ligjin Federal për Ngrirjen dhe Kthimin e Pasurive të Paligjshme të Mbajtura nga Persona të Huaj të Ekspozuar Politikisht dhe përforcon sanksionet ekzistuese ndaj Venezuelës, të vendosura që nga viti 2018, të cilat përfshijnë gjithashtu masa të ngjashme financiare.

Sipas Bernës, ngrirjet e reja synojnë persona që deri më tani nuk kishin qenë objekt sanksionesh në Zvicër. Qeveria zvicerane bëri të ditur se po ndjek nga afër zhvillimet në Venezuelë dhe u bëri thirrje palëve për ulje tensionesh, vetëpërmbajtje dhe respektim të së drejtës ndërkombëtare, përfshirë ndalimin e përdorimit të forcës dhe respektimin e integritetit territorial.

Njëkohësisht, Zvicra përsëriti gatishmërinë e saj për të ofruar “shërbimet e mira” si ndërmjetës, me synimin për të kontribuar në një zgjidhje paqësore të situatës.

Autoritetet zvicerane sqaruan se arsyet e rrëzimit nga pushteti të Maduros nuk janë vendimtare për këtë vendim, as fakti nëse ai ka ndodhur në përputhje apo në shkelje të së drejtës ndërkombëtare. Sipas tyre, elementi kyç është se ka ndodhur një ndryshim pushteti dhe ekziston mundësia që në të ardhmen të nisin procedura ligjore lidhur me pasuri të përfituara në mënyrë të paligjshme.

GJKKO ka refuzuar këtë të hënë kërkesën e kreu të Partisë së Lirisë, Ilir Meta, për zëvendësimin e masës së sigurisë arrest me burg.

Sipas avokatit Cakrani, Meta nuk mund të mbahet në paraburgim, ndërkohë që çështja e tij zvarritet nga prokuroria ose gjykata. Cakrani theksoi se Meta nuk mund të lërë dot garanci pasurore për të dalë nga qelia sepse, sipas tij “Meta nuk disponon pasuri”.

Ai shtoi se ka qenë vetë i gatshëm që të ofrojë nga pronat e tij në mënyrë që të përmbushet ky kriter. Cakrani nënvizoi se Meta do të dalë nga paraburgimi sepse është i pafajshëm.

Gjatë mbledhjes së saj të parë të kabinetit, Presidentja e përkohshme e Venezuelës, Delcy Rodríguez, njoftoi masa urgjente për të adresuar krizën në vendin e saj, duke përfshirë krijimin e një komisioni të nivelit të lartë për të siguruar lirimin e Nicolas Maduro dhe gruas së tij Cilia Flores, të cilët u kapën nga SHBA-të dhe tani përballen me akuza të rënda në gjykatat amerikane.

Sipas transmetuesit shtetëror VTV, komisioni do të përbëhet nga Presidenti i Asamblesë Kombëtare, Jorge Rodríguez, Ministri i Jashtëm Yvan Gil, Ministri i Komunikimit Freddy Ñáñez dhe Zëvendësministrja për Komunikimet Ndërkombëtare, Camilla Fabri.

Kërkesat për lirimin e Maduro-s dhe Flores kanë qenë në qendër të debatit zyrtar që nga ndryshimi i detyruar i udhëheqjes pas veprimit ushtarak amerikan. Ñáñez theksoi se kërkesa për lirimin e tyre ka tejkaluar kufijtë, duke u bërë “një britmë në rrugët e Evropës, Amerikës, Azisë dhe madje edhe brenda vetë Shteteve të Bashkuara”. Ai gjithashtu theksoi se, gjatë takimit të fundit të CELAC, shumica dërrmuese e kombeve dënuan shkeljen e imunitetit diplomatik të zyrtarëve.

“Nuk mund të lejojmë që një ngjarje kaq katastrofike të krijojë precedent, sepse do të ishte destabilizuese jo vetëm për rajonin, por për të gjithë botën”, theksoi ministri.

Një sulm i armatosur ndaj një automjeti të blinduar ka ndodhur mëngjesin e sotëm përgjatë autostradës, në drejtim verior, pranë zonës së Ortonës, në provincën e Chietit në Itali, duke shkaktuar kaos në qarkullim dhe panik te drejtuesit e mjeteve.

Sipas autoriteteve italiane, grabitja ka ndodhur rreth orës 06:30, ndërsa autorët kanë përdorur armë zjarri, mjete shpërthyese dhe automjete të djegura për të ndaluar qarkullimin dhe për të bllokuar ndërhyrjen e forcave të rendit. Grabitësit kanë qëlluar me armë zjarri drejt mjetit të blinduar për ta detyruar të ndalojë, më pas kanë përdorur eksploziv për të hapur automjetin dhe kasafortën, ndërkohë që rojet ndodheshin ende brenda.

Në vendngjarje, autorët kanë hedhur gozhdë metalike dhe kanë djegur të paktën dy automjete, përpara se të largoheshin me shpejtësi me makina të fuqishme, duke marrë një shumë rreth 400 mijë eurosh.

Si pasojë e tymit nga flakëve, dy persona kanë mbetur të lënduar lehtë, një nga Roma dhe një banor i provincës së Chietit. Ata u trajtuan në vend nga shërbimi i urgjencës 118 dhe refuzuan shtrimin në spital.

Autostrada A14 Bologna–Taranto, në segmentin mes Val di Sangro dhe Pescara Sud, është mbyllur për qarkullim, ndërsa raportohet një radhë trafiku prej rreth 5 kilometrash.

Çështja e bujshme penale kundër presidentit venezuelian Nicolás Maduro i është caktuar gjyqtarit federal 92-vjeçar Alvin K. Hellerstein, i cili u nominua dhe u konfirmua në këtë detyrë nga presidenti Bill Clinton në vitin 1998.

Hellerstein shërben si gjyqtar i lartë (senior judge) që prej vitit 2011 në Distriktin Jugor të Nju Jorkut. Gjatë karrierës së tij, ai ka drejtuar një sërë çështjesh të ndjeshme, përfshirë ato që lidhen me sulmet terroriste të 11 shtatorit 2001, si edhe raste të tjera që kanë të bëjnë me terrorizmin dhe sigurinë kombëtare.

Gjatë verës, ish-gjenerali venezuelian dhe ish-shefi i inteligjencës, Hugo Carvajal Barrios, u deklarua fajtor para gjyqtarit Hellerstein për akuza që lidhen me narko-terrorizmin dhe trafikun e drogës.

Hellerstein ka qenë gjithashtu në qendër të vëmendjes mediatike vitet e fundit për vendimet e tij në çështje që përfshijnë Presidentin amerikan Donald Trump. Ai refuzoi kërkesat e Trump për ta transferuar në gjykatë federale çështjen penale lidhur me pagesat për heshtje (hush money), duke vendosur se rimbursimet ndaj Michael Cohen — i cili ndërmjetësoi pagesat ndaj aktores së filmave për të rritur Stormy Daniels — nuk përbënin akte zyrtare të presidencës. Trump vijon ta kundërshtojë këtë vendim.

Në pranverë, Hellerstein nxori gjithashtu një vendim që ndalonte administratën Trump të përdorte Alien Enemies Act për deportimin e venezuelianëve, duke kritikuar dërgimin e personave në një burg të huaj “me pak shpresë për proces ligjor ose kthim”.

Këtë pasdite dhe ditën e nesërme priten reshje me intensitet të lartë kryesisht në veri dhe jug të vendit.

Sipas Institutit të Gjeoshkencave, në qarqet Shkodër, Kukës, Lezhë, Vlorë dhe Gjirokastër mund të ketë vërshime të shpejta të lumenjve të vegjël malorë dhe rrëshqitje të dherave. Në zonat urbane, në këto qarqe mund të shfaqen probleme me përmbytje të lokalizuara, në varësi të gjendjes së kanalizimeve.

Sipas llogaritjeve hidrologjike të IGJEO-s, si rezultat i reshjeve me intensitet të lartë të rëna gjatë ditëve të kaluara, të cilat do të vazhdojnë deri ditën e enjte dt.08 Janar, do të ketë rritje të rrezikshme të prurjeve dhe niveleve në lumenjtë Drin-Buna, Liqeni Shkodrës, lumi Mat, Shkumbin dhe Vjosë.

Lumi Drin-Buna dhe Liqeni i Shkodrës do të kenë rrezik të shtuar për përmbytje me prurje dhe nivele të larta në vazhdim të ditës së sotme dhe të nesërme.

Nesër temperaturat minimale dhe maksimale të ajrit pritet të arrijnë: në bregdet: 13/ 17 °C, në vendet e ulëta: 12 / 17 °C, në vendet malore: 5 / 11 °C.

Nicolas Maduro ka mbërritur me pranga në duar në gjykatën federale në Nju-Jork, ku do të njihet me akuzat dhe masën e sigurisë dhënë ndaj tij.

Bashkë me Maduron, e rrethuar nga agjentët e DEA-s, ishte edhe gruaja e tij Cilia Flores, gjithashtu e kapur gjatë operacionit amerikan në Venezuelë në 2 janar.

Maduro u dërgua me helikopter nga burgu në ishullin Ricker drejt gjykatës në Manhatan, ndërsa më pas një makinë e blinduar e çoi në gjykatë.

Kryeministri britanik, Keir Starmer deklaroi se Britania e Madhe do të mbështesë Danimarkën në përgjigje të pretendimeve të Presidentit të SHBA-së Donald Trump në lidhje me sovranitetin e Groenlandës.

I pyetur gjatë një vizite në Berkshire të Anglisë, në lidhje me përgjigjen e ashpër të Kryeministres daneze Mette Frederiksen ndaj Trump, Sir Keir demonstroi sot një distancim të rrallë dhe të qartë nga presidenti i SHBA-së.

“Unë jam në anën e saj Frederiksen dhe ka të drejtë për të ardhmen e Groenlandës”, u shpreh Starmer.

Edhe kryeministri i Groenlandës Jens Frederik Nielsen, reagoi ashpër ndaj Trump, ku kërkoi të ndalet presioni i Trump.

Më herët, Trump deklaroi se SHBA ka nevojë për Groenlandën, për sigurinë e vet kombëtare dhe sipas tij, Danimarka nuk do të jetë në gjendje që të kujdeset për të.

“Ne kemi nevojë për Groenlandën, për sigurinë e SHBA-së”, përsëriti Trump para gazetarëve në Air Force One.

Dhjetë persona janë shpallur fajtorë për ngacmim kibernetik ndaj Brigitte Macron, bashkëshortes së presidentit francez Emmanuel Macron, nga një gjykatë në Paris.

Të pandehurit u akuzuan se kishin përhapur pretendime të rreme lidhur me gjininë dhe seksualitetin e saj, si edhe se kishin bërë “komente keqdashëse” për diferencën 24-vjeçare të moshës mes çiftit.

Ata u dënuan me dënime me burg me kusht deri në tetë muaj.

Një teori konspirative që pretendon se Brigitte Macron është një grua transgjinore ka qarkulluar që prej zgjedhjes së bashkëshortit të saj si president në vitin 2017.

Vendimi i së hënës në Francë vjen në një kohë kur familja Macron po ndjek një padi për shpifje në Shtetet e Bashkuara kundër influencueses së djathtë Candace Owens, e cila gjithashtu ka përhapur teori konspirative mbi gjininë e zonjës së parë.

Ata pretendojnë se ajo “ka shpërfillur çdo provë të besueshme që rrëzon pretendimin e saj, duke zgjedhur të promovojë teori konspirative dhe shpifës të njohur”.

Owens i ka përsëritur vazhdimisht këto pretendime në podkastin e saj dhe në rrjetet sociale dhe, në mars 2024, deklaroi se do të vinte në lojë “tërë reputacionin e saj profesional” mbi bindjen se zonja Macron “në fakt është burrë”.

Brigitte Macron u njoh për herë të parë me bashkëshortin e saj të tanishëm kur ajo ishte mësuese në shkollën e mesme që ai ndiqte.

Çifti u martua në vitin 2007, kur presidenti i ardhshëm francez ishte 29 vjeç dhe ajo ishte në mesin e të pesëdhjetave.

Presidenti i Kolumbisë, Gustavo Petro ka reaguar sërish pas deklaratës së homologut amerikan, Donald Trump, ku ky i fundit tha se Kolumbia mund të përballet me një operacion ushtarak, si në Venezuelë.

Përmes disa postimesh në rrjetet sociale, Petro thotë se ashtu si venezuelianët, edhe kolumbianët duhet të dalin në rrugë, për të mbrojtur sovranitetin e vendit.

“Dhe të rinjtë venezuelianë kanë dalë në rrugë për të mbrojtur vendin e tyre. Të gjithë venezuelianët, kolumbianët dhe latino-amerikanët duhet të dalin në rrugë. Sovraniteti kombëtar është sovranitet popullor.”, shkruan Petro.

Më herët, Petro deklaroi se emri i tij nuk shfaqet në asnjë trafik droge, duke rrëzuar deklaratën e Trump.

Petro kujtoi gjithashtu se si komandant suprem i Forcave të Armatosura, për të luftuar trafikimin e drogës, urdhëroi sekuestrimin më të madh të kokainës në historinë botërore.

Gjatë një interviste, presidenti amerikan, Donald Trump paralajmëroi Gustavo Petron, se do të dërgonte “një mision amerikan” në vendin e tij të ngjashëm me atë që sulmoi disa zona të Venezuelës dhe çoi në kapjen e presidentit venezuelian, Nicolás Maduro.

Shtyhet në datë 19 janar gjyqi ndaj kryebashkiakut të Tiranës Erion Veliaj dhe të tjerëve.

Shkak u bë mungesa e avokatëve. Avokatja e caktuar kryesisht për Veliajn, Valentina Todoreskut ndodhet jashtë vendit, ndërsa ka njoftuar gjykatën me email.

Kryebashkiaku i Tiranës, akuzohet nga SPAK për disa vepra penale si korrupsion, pastrim parash, fshehje pasurie, shpërdorim detyre, si dhe futje e sendeve të ndaluara në qeli.

Nga gjetjet e SPAK, rezulton se në të paktën 9 raste Erion Veliaj, ka kryer akte korrupsioni pasiv.

SPAK thotë se, në këmbim të përfitimeve të parregullta në para dhe pasuri të paluajtshme, Veliaj ka dhënë leje ndërtimi apo fonde publike nga Bashkia e Tiranës. Të përfshirë në këtë dosje janë janë edhe 28 persona të tjerë, mes tyre dhe biznesmenë.

Prej datës 10 shkurt të 2025, kryetari i bashkisë së Tiranës Erion Veliaj mbahet në paraburgim.

Autoritetet britanike kanë nisur zbatimin e ligjit të ri që u lejon oficerëve të sekuestrojnë telefonat celularë të emigrantëve të paligjshëm edhe pa kryer arrestim.

Qeveria thotë se masa synon të mbledhë informacione mbi rrjetet e kontrabandës që organizojnë kalimet me gomone drejt Mbretërisë së Bashkuar.

Sekuestrimet do të nisin fillimisht në qendrën e përpunimit të emigrantëve në Manston, Kent, ku është instaluar teknologjia për shkarkimin e të dhënave nga pajisjet.

Oficerët do të mund t’u kërkojnë emigrantëve të heqin rrobat për kontroll, si dhe të verifikojnë nëse fshehin karta SIM. Agjencia Kombëtare e Krimit deklaroi se informacionet nga telefonat mund të përshpejtojnë hetimet ndaj grupeve të trafikut.

Ndërkohë, ministri për Sigurinë Kufitare, Alex Norris, tha se masat e reja synojnë “shkatërrimin sa më shpejt të rrjeteve të kontrabandës”.

Nga ana tjetër, Këshilli i Emigrantëve paralajmëroi se kompetencat duhet të përdoren me kujdes, pasi telefonat janë shpesh një mjet jetik komunikimi për njerëzit vulnerabël.

Ministri për Migracionin, Mike Tapp, tha se telefonat mund të kthehen më vonë, në varësi të rrethanave dhe përmbajtjes së tyre.

Ligji i ri parashikon gjithashtu deri në 14 vite burg për personat që trafikojnë emigrantët, ndërsa ata që kërkojnë pajisje për gomone mund të dënohen deri në 5 vite burg.

Sipas të dhënave zyrtare, gjatë vitit 2025, Kanalin e La Manshit e kanë kaluar 41,472 emigrantë,  rreth 5 mijë më shumë se një vit më parë.

Kryetari i Partisë Demokratike, Sali Berisha, tha se ndryshe nga rasti i Nicolas Maduros, Edi Ramën do ta rrëzojë populli shqiptar.

“Edi Rama zhvillon farsë elektorale, njësoj si Maduro. Një nga shkaqet që u arrestua ishte edhe fakti që nuk zhvillon zgjedhje. Edi Rama zhvillon farsë elektorale. Këshilli i Europës, gardiani i zgjedhjeve të lira, thotë që duhet të ndahet partia nga shteti”, tha Berisha pas daljes nga SPAK ku ishte në zbatim të masës së sigurisë ndaj tij.

“Berisha ka deklaruar se zgjedhje me Edi Ramën nuk ka. Është populli shqiptar, opozita shqiptare, që do t’i japë Edi Ramës ndëshkimin e merituar. Unë e kam përshëndetur arrestimin e Maduros dhe ndëshkimin e tij, si një fitore për njerëzit e lirë, por nuk kam deklaruar ndonjëherë se Forcat Delta do të vijnë ta arrestojnë. Po, kam deklaruar, se në aferën McGonigal, Edi Rama është po aq kriminel sa McGonigal”, shtoi ai.

Një aksident me vdekje është shënuar sot në aksin rrugor “Peqin-Elbasan”, në fshatin Bradashesh.

Një 46-vjeçare ka ndërruar jetë në spital pasi u përplas nga një makinë që drejtohej nga shtetasi me inicialet A.H,.

“Mëngjesin e sotëm, në aksin rrugor “Peqin-Elbasan”, në fshatin Bradashesh, shtetasi A. H. dyshohet se ka përplasur me automjetin që drejtonte, shtetasen N. S., 46 vjeçe, këmbësore, e cila për shkak të dëmtimeve ka humbur jetën në spital”, njoftoi sot policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.

Presidenti kolumbian Gustavo Petro i është përgjigjur Donald Trump, pas paralajmërimeve dhe akuza se po prodhon kokainë dhe e shet në SHBA.

Presidenti kolumbian hodhi poshtë këto kërcënime dhe akuzat e homologut të tij amerikan Donald Trump, duke thënë se nuk ka asnjë provë.

“Emri im nuk shfaqet në dosjet gjyqësore për trafik droge. Ndaloni së shpifuri për mua, Trump”, tha Petro nëpërmjet një reagimi në platformën X.

Presidenti amerikan Donald Trump ka deklaruar për gazetarët nga Air Force One, duke u nisur nga Mar-a-Lago drejt Washington DC, se ushtarët amerikanë që u plagosën në operacionin për kapjen e Maduros ndodhen në gjendje të mirë.

Presidenti ka sugjeruar gjithashtu se përparësia e tij aktuale është të “rregullojë” Venezuelën në vend të mbajtjes së zgjedhjeve – dhe paralajmëroi se SHBA-të kanë nevojë për akses të plotë në rezervat e tyre të naftës.

Po ashtu, ai sugjeroi që SHBA-të mund të ndërmarrin operacione ushtarake diku tjetër në Amerikën e Jugut.

“Kolumbia është gjithashtu shumë e sëmurë, e drejtuar nga një njeri i sëmurë, të cilit i pëlqen të prodhojë kokainë dhe ta shesë atë në Shtetet e Bashkuara, dhe nuk do ta bëjë këtë për shumë kohë”, tha Trump në referencë për Presidentin Gustavo Petro.

Kur u pyet nëse SHBA-të do të ndërmerrnin veprime, ai shtoi: “Më duket mirë”.