Ngushtica e Hormuzit duhet të mbetet e mbyllur derisa të përmbushen disa kushte të përcaktuara në Memorandumin e Mirëkuptimit (MM) Iran-SHBA, duke përfshirë lirimin e të paktën 12 miliardë dollarëve në asete iraniane, zbatimin e heqjeve nga sanksionet e naftës dhe tërheqjen e Izraelit nga Libani, raportoi agjencia e lajmeve Tasnim.

Sipas agjencisë, rihapja e Ngushticës vetëm në këmbim të heqjes së bllokadës detare amerikane do të ishte një “gabim strategjik” dhe një shkelje e Memorandumit të Mirëkuptimit (MM) Iran-SHBA. Tasnim shkruan se Ngushtica duhet të mbetet e mbyllur derisa të zbatohen plotësisht të gjitha kërkesat, duke përfshirë tërheqjen e Izraelit nga Libani./mxh

Belgjika ka rritur importet e saj të gazit natyror rus në nivele që nuk ishin parë që para luftës në Ukrainë, sipas të dhënave të Shërbimit Federal të Ekonomisë të cituara nga mediat lokale të premte.

Shifrat tregojnë se gazi rus përbënte 11,6 për qind të konsumit total të gazit në Belgjikë vitin e kaluar, duke shënuar pjesën më të lartë që nga viti 2019, sipas gazetave belge L’Echo dhe De Tijd.

Rritja vjen pavarësisht përpjekjeve të Bashkimit Evropian për të ulur varësinë nga energjia ruse pas fillimit të luftës në Ukrainë në shkurt 2022.

Ndërsa dërgesat e gazit rus përmes gazsjellësve janë ndalur, importet e gazit natyror të lëngshëm (LNG) përmes transportit detar janë rritur ndjeshëm. Pjesa më e madhe e këtij furnizimi hyn përmes terminalit Fluxys në Zeebrugge, i cili regjistroi 17,6 teravat-orë LNG me origjinë ruse vitin e kaluar — më shumë se totali i kombinuar i katër viteve të mëparshme.

BE-ja vendosi të heqë gradualisht të gjitha importet e gazit rus dhe LNG-së deri në fund të vitit 2027, pas një votimi në Këshillin Evropian, duke forcuar një politikë historike që synon shkëputjen nga ai që dikur ishte furnizuesi kryesor i gazit për bllokun./mxh

“E kujtoj ardhjen e tij te kombëtarja franceze, ishte ende adoleshent, por një fenomen për moshën e tij, fenomen në shpejtësi dhe efikasitet”. Kështu e përshkruan Guy Stephan, ndihmësi i trajnerit Didier Deschamps, debutimin e Kylian Mbappe me Francën më 25 mars 2017, kur sulmuesi ishte vetëm 18 vjeç.

Tashmë, në moshën 27-vjeçare, Mbappe përgatitet të arrijë një tjetër moment historik në karrierën e tij. Në ndeshjen ndaj Irakut të hënën, ai pritet të regjistrojë paraqitjen e 100-të me fanellën e Francës, një rrugëtim gjatë të cilit ka realizuar 58 gola, duke u shndërruar në golashënuesin më të mirë në historinë e përfaqësueses franceze.

Sulmuesi francez ka lënë pas edhe rekordin e 13 golave të shënuar në Kupat e Botës nga Just Fontaine dhe tashmë kërcënon shifrat e Lionel Messit dhe Miroslav Klose, të cilët numërojnë nga 16 gola secili në turnetë botërorë. Mbappe, kampion bote në vitin 2018 dhe nënkampion në vitin 2022, ka realizuar deri tani 14 gola në Kampionatet Botërore.

Debutimi i tij me Francën erdhi në fitoren 3-1 ndaj Luksemburgut më 25 mars 2017. Ai u aktivizua në minutën e 78-të në vend të Dimitri Payet dhe luajti 15 minuta si sulmues i majtë. Vetëm pesë ndeshje më vonë, më 31 gusht 2017, Mbappe shënoi golin e tij të parë me “Gjelat” në fitoren 4-0 ndaj Holandës në kualifikueset e Botërorit 2018.

Në Kupën e Botës “Rusi 2018”, ai luajti në të gjitha ndeshjet dhe shënoi katër gola, duke qenë një nga protagonistët e triumfit francez. Katër vite më vonë, në Katar 2022, Mbappe realizoi tetë gola, përfshirë tre në finalen dramatike ndaj Argjentinës, e cila u fitua nga amerikanolatinët pas goditjeve të penalltive.

Aktualisht, Mbappe renditet mes 10 futbollistëve me më shumë ndeshje në historinë e Francës. Përpara tij qëndrojnë emra legjendarë si Didier Deschamps (103), Patrick Vieira (107), Zinedine Zidane (108), Marcel Desailly (113), Thierry Henry (123), Antoine Griezmann dhe Olivier Giroud (137 secili), Lilian Thuram (142) dhe Hugo Lloris (145), nga i cili ka trashëguar edhe shiritin e kapitenit.

Deri më tani, Mbappe numëron 99 ndeshje, 7969 minuta në fushë dhe 84 paraqitje si titullar. Statistikat e tij përfshijnë 15 ndeshje në tre Botërorë, nëntë në dy Kampionate Evropiane, 29 në eliminatoret e Evropianëve dhe Botërorëve, 21 në Nations League, trofe që e fitoi me Francën në vitin 2021, si dhe 25 ndeshje miqësore.

Me vetëm 27 vjeç, Kylian Mbappe ka ende shumë rekorde për të thyer, ndërsa sfida ndaj Irakut do të shënojë një tjetër kapitull të rëndësishëm në karrierën e tij të jashtëzakonshme me kombëtaren franceze./mxh

Drejtuesi Politik i Qarkut Tiranë për Partinë Socialiste, Taulant Balla, ka bërë të ditur lajmin e mirë për nisjen e punimeve për lidhjen e rrugëve dytësore përgjatë autostradës në zonën e Kavajës, një ndërhyrje e shumëpritur nga banorët.

Përmes një postimi ne rrjetet sociale, Balla thekson se rruga dytësore që të çon drejt Spitalit të Kavajës kishte mbetur pa funksion që prej përfundimit të autostradës, duke krijuar vështirësi për lëvizjen e qytetarëve dhe aksesin drejt këtij institucioni shëndetësor.

Balla e cilëson nisjen e punimeve si një hap konkret për zgjidhjen e kësaj problematike. Sipas tij, ky investim do të përmirësojë ndjeshëm qarkullimin dhe do të rrisë sigurinë e aksesit për banorët e zonës, duke i dhënë fund izolimit të kësaj rruge lidhëse./mxh

Një aksident i rëndë hekurudhor ka ndodhur ditën e sotme në Mynih të Gjermanisë. Dy trena mallrash u përplasën në një urë dhe si pasojë dy vagona dolën nga shinat dhe përfunduan në rrugën poshtë.

Nga përplasja e fortë një person ka humbur jetën, ndërsa ende nuk dihet se sa të plagosur ka.

Sipas mediave ndërkombëtare, një zëdhënës i policisë në qytetin jugor gjerman ka deklaruar se shkaku i incidentit është nën hetim.

Pasi shërbimet e emergjencës u njoftuan për përplasjen në lagjen veriore të Milbertshofen të Mynihut, rreth 60 ekipe ndihmëse të para që u dërguan në vendngjarje./mxh

Kombëtarja e Gjermanisë dhe ajo e Bregut të Fildishtë do të përballen në një sfidë interesante në kuadër të xhiros së dytë të fazës së grupeve në Kupën e Botës.

Të dyja skuadrat vijnë në këtë takim me moralin në maksimum pas sukseseve në ndeshjet hapëse. “Pancerat” e drejtuar nga Julian Nagelsmann regjistruan fitoren e tyre të dhjetë radhazi në ndeshjet ndërkombëtare, pas një triumfi shkatërrues 7-1 ndaj debutuesve të Kurasaos.

Nga ana tjetër, Bregu i Fildishtë konfirmoi formën e mirë duke mposhtur Ekuadorin me rezultatin minimal 1-0, duke arritur kështu suksesin e katërt radhazi.

Ky duel pritet të vendosë fatet e kryesimit të grupit dhe të sigurojë biletën e kualifikimit të parakohshëm. Pak minuta përpara vërshëllimës startuese, të dy trajnerët kanë zbuluar rreshtimet zyrtare në fushë./mxh

Kombëtarja e Holandës ka arritur një fitore mbresëlënëse me rezultatin e thellë 5-1 ndaj Suedisë, në ndeshjen e vlefshme për xhiron e dytë të Grupit F në Kupën e Botës.

Skuadra e drejtuar nga Ronald Koeman shfaqi një dominim absolut që nga minutat e para, duke zhbllokuar sfidën me sulmuesin Brian Brobbey që në minutën e 5-të, i cili shënoi edhe golin e dytë personal në minutën e 17-të.

Në pjesën e dytë, holandezët vazhduan sulmet e tyre dhe realizuan dy gola të tjerë të shpejtë me anë të Cody Gakpo-s. Suedia u përpoq të reagonte dhe gjeti golin e nderit me Anthony Elanga-n, por shpresat e tyre u shuan përfundimisht në fund të takimit, kur Crysencio Summerville vulosi rezultatin me një goditje të bukur nga distanca.

Falë këtij triumfi, Holanda merr kryesimin e grupit me katër pikë, duke parakaluar skandinavët./mxh

Janë zbuluar detaje të reja mbi vdekjen e aktores së njohur amerikane Daveigh Chase, e cila ndërroi jetë më 16 qershor në moshën 35-vjeçare.

Sipas raportimeve të mediave amerikane, Chase humbi jetën si pasojë e komplikacioneve të shkaktuara nga meningjiti bakterial dhe një infeksion i rëndë në gjak.

Aktorja, e njohur për rolet e saj në filmat “Lilo & Stitch” dhe “The Ring”, kishte kaluar muaj të vështirë përpara vdekjes, ndërsa përballej me probleme të rënda shëndetësore dhe varësi nga droga.

Persona që e kishin njohur në periudhën e fundit të jetës së saj tregojnë se gjendja e aktores po përkeqësohej dita-ditës. Kevin Call, i njohur si “kryetari i Skid Row”, lagjes famëkeqe të Los Anxhelosit ku Chase kishte kaluar kohë, tha se ajo po humbiste vazhdimisht peshë dhe kishte nevojë urgjente për trajtim mjekësor.

“Ajo dukej gjithnjë e më e dobët sa herë që e shihja. Ishte e qartë se kishte probleme serioze shëndetësore dhe kishte nevojë për ndihmë”, u shpreh ai.

Edhe familja e saj ka folur për betejën e gjatë me varësinë. Babai i aktores, John Schwallier, deklaroi se vajza e tij kishte luftuar me drogën që në moshën 13-vjeçare dhe se kohët e fundit kishte jetuar në kushte shumë të vështira, duke mbetur edhe e pastrehë.

Ndërkohë, menaxheri i saj, John Ryan, tregoi se kishte bërë përpjekje të shumta për ta gjetur dhe për ta dërguar në rehabilitim. Së bashku me gjysmëmotrën e saj, ai kishte planifikuar ta transferonte në një qendër rehabilitimi në Kosta Rika, por nuk arriti ta lokalizonte në kohë.

Vdekja e Daveigh Chase ka tronditur fansat e saj, ndërsa historia e saj po rikthen vëmendjen te pasojat shkatërruese që mund të sjellin varësia dhe mungesa e trajtimit në kohën e duhur.

Protestuesit kundër ekzekutimeve politike në Iran u mblodhën në Paris të shtunën në kundërshtim me ndalimin e tubimit që e njoftoi policia të enjten. Mësohet se gjatë protestës autoritetet franceze kanë arrestuar 20 persona.

“Qindra demonstrues u mblodhën në Place Vauban pranë monumentit Les Invalides në qendër të Parisit, por u shpërndanë nga policia” tha Shahin Gobadi nga NCRI me seli në Paris.

Policia franceze ndaloi opozitën iraniane NCRI të mbante tubimin të shtunën, duke thënë se ekzistonte rreziku i përplasjeve midis aktivistëve që kishin pikëpamje të kundërta, një argument që grupi e përshkroi si “të rremë”.

Organizatorët apeluan ndalimin, por të shtunën ai u mbështet nga një gjykatë e Parisit. Ndalimi i së enjtes në mbrëmje erdhi disa orë pas një telefonate midis Ministrit të Jashtëm të Francës, Jean-Noel Barrot, dhe homologut të tij iranian, Abbas Aragchi, gjatë së cilës ata diskutuan zhvillimet e fundit për t’i dhënë fund luftës në Iran.

Ministria e Jashtme e Francës hodhi poshtë një pretendim nga grupi iranian, Këshilli Kombëtar i Rezistencës së Iranit, se ndalimi ishte i lidhur me thirrjen.

NCRI, krahu politik i Organizatës Popullore të Muxhahedinëve të Iranit, ka mbajtur tubime të shpeshta në kryeqytetin francez gjatë viteve.

Në to kanë marrë pjesë mijëra njerëz, përfshirë ish-zyrtarë të profilit të lartë amerikanë, evropianë dhe arabë, kritikë të Republikës Islamike./ad

A je i varur nga sheqeri? Në vend që të lexosh një listë të gjatë me simptoma, ekziston një pyetje e vetme që mund të japë një tregues të qartë.

A të ndodh ndonjëherë të mos jesh i uritur, por prapë të duash të hash?

Nëse përgjigjja është po, veçanërisht kur ke dëshirë për ëmbëlsira, atëherë bëhet fjalë për një dëshirë të fortë ndaj sheqerit. Sipas ekspertëve, dëshirat për të ngrënë kur nuk je i uritur shpesh lidhen me një varësi ndaj sheqerit.

Pse ndodhin këto dëshira?

Sheqeri në gjak luhatet vazhdimisht

Kur konsumon ushqime të pasura me sheqer, pije të ëmbla apo karbohidrate të rafinuara, organizmi prodhon insulinë për të ulur nivelin e sheqerit në gjak. Ndonjëherë insulina vazhdon të veprojë edhe pasi niveli i sheqerit është stabilizuar, duke bërë që trupi të kërkojë sërish energji të shpejtë.

Kjo krijon një cikël të pafund: ha sheqer, ndihesh më mirë për pak kohë, më pas kërkon përsëri sheqer.

Truri është programuar të kërkojë kënaqësi

Studime kanë treguar se sheqeri aktivizon të njëjtat zona të trurit që lidhen me kënaqësinë dhe shpërblimin. Kjo është arsyeja pse dëshirat për ëmbëlsira mund të jenë aq të forta dhe të vështira për t’u kontrolluar.

Si të thyesh ciklin e dëshirës për sheqer?

Nise ditën pa sheqer

Nëse mëngjesi yt përbëhet nga produkte shumë të ëmbla, po i jep trupit sinjalin për të kërkuar më shumë sheqer gjatë gjithë ditës. Një smoothie me perime jeshile ose ushqime të freskëta mund të ndihmojë në stabilizimin e energjisë.

Zgjidh një alternativë të shëndetshme

Kur të kap dëshira për ëmbëlsira, provo fruta të pjekura, çokollatë me përmbajtje të lartë kakaoje, bajame apo arra. Këto ushqime ofrojnë kënaqësi pa sasinë e lartë të sheqerit të shtuar.

Gatuaj më shumë në shtëpi

Shumë ushqime të gatshme përmbajnë sasi të fshehura sheqeri. Duke përgatitur vetë salcat, supat apo ushqimet e përditshme, ke më shumë kontroll mbi atë që konsumon.

Planifiko momentet kur të kapin dëshirat

Nëse e di që zakonisht të merr uria pasdite, mbaj me vete një alternativë të shëndetshme. Mund të ndihmojë edhe një shëtitje e shkurtër, një gotë ujë apo një telefonatë me një mik.

Lexo etiketat me kujdes

Sheqeri shpesh fshihet pas emrave të ndryshëm. Sa më pak përbërës të panjohur të ketë një produkt, aq më mirë.

Konsumo ushqime që mbështesin humorin

Vitamina C ndihmon në prodhimin e serotoninës, hormonit që ndikon te humori. Specat, agrumet, luleshtrydhet dhe kivi mund të ndihmojnë në uljen e dëshirës për ëmbëlsira.

Ekspertët theksojnë se varësia ndaj sheqerit mund të jetë reale dhe e fortë, por me ndryshime të vogla dhe të vazhdueshme në rutinë, dëshirat mund të reduktohen ndjeshëm me kalimin e kohës./a.d

Edhe pse rutinat e higjienës dhe zakonet e përditshme ndryshojnë nga një person tek tjetri, ka disa rregulla bazë që të gjithë duhet t’i ndjekin. Sidomos kur shmangia e tyre është e lehtë dhe e përshtatshme, disiplina bëhet e rëndësishme për shëndetin dhe mirëqenien.

Nga shtyrja e larjes së çarçafëve deri te moslarja pas stërvitjes, njerëzit që konsiderohen më të kujdesshëm dhe të organizuar shmangin disa zakone që shpesh nënvlerësohen nga të tjerët. Edhe pse duken të vogla, këto veprime mund të kenë ndikim të madh në higjienë dhe shëndet.

1. Ripërdorimi i peshqirëve të banjës

Edhe kur duken të pastër, peshqirët e përdorur disa herë mund të grumbullojnë baktere dhe të shkaktojnë probleme me lëkurën dhe aromën. Për këtë arsye, rekomandohet larja e tyre rregullisht dhe shmangia e përdorimit të zgjatur.

2. Shtyrja e larjes së çarçafëve

Shumë persona i lajnë çarçafët shumë rrallë, por ekspertët sugjerojnë që kjo të bëhet çdo një deri në dy javë. Shtyrja e kësaj praktike mund të ndikojë në cilësinë e gjumit dhe në shëndetin e lëkurës.

3. Moslarja menjëherë pas stërvitjes

Djersa dhe papastërtitë që mbeten në trup pas aktivitetit fizik mund të shkaktojnë probleme të ndryshme të lëkurës. Prandaj, pas stërvitjes rekomandohet gjithmonë një dush.

4. Moslarja e duarve pas përdorimit të tualetit

Një pjesë e konsiderueshme e njerëzve nuk i lajnë duart siç duhet pas tualetit, gjë që rrit rrezikun e përhapjes së infeksioneve.

5. Ndarja e pijeve dhe enëve

Ndarja e gotave dhe enëve mund të transmetojë baktere dhe viruse të ndryshme, edhe kur duket një gjë e padëmshme.

6. Mospastrimi i dhëmbëve me fill dentar

Larja e dhëmbëve nuk mjafton gjithmonë. Përdorimi i fillit dentar ndihmon në parandalimin e sëmundjeve të mishrave të dhëmbëve.

7. Konsumimi i frutave dhe perimeve të palara

Frutat dhe perimet mund të kenë baktere dhe mbetje pesticidesh, prandaj larja e tyre para konsumimit është e domosdoshme.

8. Përdorimi i sfungjerëve të ndotur për larjen e enëve

Sfungjerët e kuzhinës mund të grumbullojnë shumë baktere nëse nuk zëvendësohen ose pastrohen rregullisht.

9. Moslarja e shisheve të ujit

Shishet e ripërdorshme, nëse nuk pastrohen shpesh, mund të grumbullojnë më shumë baktere sesa pritej, ndaj duhen higjienizuar rregullisht.

10. Kollitja dhe teshtitja pa u mbuluar

Kollitja ose teshtitja pa mbuluar gojën ndihmon në përhapjen e sëmundjeve. Rekomandohet përdorimi i bërrylit ose shami.

11. Përdorimi i furçës së dhëmbëve për shumë muaj

Furça e dhëmbëve duhet të ndërrohet çdo 3 deri në 4 muaj, pasi me kalimin e kohës humbet efektivitetin dhe mund të ndikojë negativisht në shëndetin oral.

Zakonisht njerëzit ndahen në dy grupe: ata që e tundin vazhdimisht këmbën kur janë ulur dhe ata që bezdisen nga kjo lëvizje. Një gjë është e sigurt, pak njerëz mbeten indiferentë ndaj këtij zakoni të përhapur.

Lëvizja e shpejtë dhe e përsëritur e këmbës gjatë qëndrimit ulur është një sjellje që shumë prej nesh e bëjnë pa e kuptuar. Ndonjëherë është aq e lehtë sa kalon pa u vënë re, ndërsa herë të tjera mund të shkaktojë dridhje në tavolinë, në zyrë apo edhe në sediljen e autobusit.

Por çfarë e shkakton këtë reagim të pavullnetshëm?

Sipas ekspertëve të shëndetit mendor, tundja e këmbës lidhet shpesh me mënyrën se si trupi përpunon stresin. Kur përjetojmë tension ose ankth, organizmi çliron hormone si adrenalina dhe kortizoli, të cilat e përgatisin trupin për reagimin e njohur si “lufto ose ik”.

Megjithatë, në shumicën e situatave moderne nuk kemi nevojë të vrapojmë apo të përballemi fizikisht me një kërcënim. Si rezultat, energjia e grumbulluar kërkon një rrugëdalje dhe shpesh manifestohet përmes lëvizjeve të vogla të pavetëdijshme, si tundja e këmbës.

Psikologët shpjegojnë se kjo lëvizje mund të shërbejë si një mekanizëm vetërregullues që ndihmon individin të përballojë stresin dhe të qetësojë tensionin e brendshëm./ad

Last Updated on 20/06/2026 by Monika

Anglia po përballet me disa shqetësime në prag të ndeshjes së dytë në Kupën e Botës kundër Ganës.

Sipas raportimeve, trajneri Thomas Tuchel po monitoron nga afër gjendjen e Bukayo Saka, Declan Rice dhe Marcus Rashford.

Dy futbollistët e Arsenalit iu bashkuan kombëtares me probleme të lehta të mbartura nga fundi i sezonit, ndërsa Rashford ka shfaqur shqetësime muskulore pas sfidës ndaj Kroacisë.

Të tre konsiderohen lojtarë shumë të rëndësishëm për skemat e Anglisë në këtë turne. Dyshimet janë shtuar pas mungesës së Saka dhe Rashford në një nga seancat stërvitore me dyer të mbyllura.

Stafi mjekësor po ndjek programe të personalizuara për secilin prej tyre me qëllim shmangien e dëmtimeve më serioze.

Paralelisht, Tuchel po teston alternativa të tjera, mes tyre edhe Morgan Rogers. Gjendja e tre lojtarëve pritet të vlerësohet deri përpara ndeshjes së 23 qershorit ndaj Ganës./mxh

Gjirokastra rikthehet në vëmendje si një pikë me potencial real për zhvillimin e aviacionit civil në jug të vendit. E renditur si një ndër qytetet më të bukura, Gjirokastra përpiqet përherë e më shumë për shtimin e pasurive të veta që do të mund ta bëjnë atë të jetë një tërheqje e vërtetë turistike. Aerodromi i Gjirokastrës është një prej atyre pasurive me të cilat gjirokastritët jo vetëm krenohen, por presin rijetësimin sa më shpejt. Kryeministri Edi Rama deklaroi një ditë më parë se Shqipëria duhet të vazhdojë zgjerimin e sistemit të aviacionit civil për t’iu përgjigjur rritjes së numrit të pasagjerëve dhe fluturimeve në vitet e ardhshme.

“Qeveria ndodhet në fazën përfundimtare të përgatitjeve për hapjen e garës për Aeroportin e Gjirokastrës, i cili do të funksionojë si aeroport turistik dhe sezonal” – tha Rama.

Lajmi për hapjen e garës për aeroportin turistik të Gjirokastrës, është cilësuar si një hap pozitiv për kryetarin e bashkisë Gjirokastër, Flamur Golemi. Për SCAN TV, Golemi ka thënë se aerodromi do të jetë një pikë e rëndësishme që do të sjellë zhvillim ekonomik dhe më shumë punësim, pasi Gjirokastra konsiderohet si një nga qendrat më të rëndësishme të turizmit gjithëvjetor.

“Aeroporti Gjirokastër të mos jetë më aerodrom fushor, por të jetë një aerodrom me të gjitha kapacitetet dhe standardet. E meriton jo vetëm qyteti, por gjithë qarku Gjirokastër, sepse do të jetë një aeroport në shërbim të gjithë zonës. Patjetër që impakti i drejtpërderdjtë do jetë në Gjirokastër, dhe ky është lajm pozitiv. Pista aktualisht shkon në 1.2 km, është një aerodrom fushor. Përgjithësisht e kemi përdorur për fluturime sportive, por tashmë presim të jetë një aeroport me standarde” – thotë Flamur Golemi, kryetar i Bashkisë Gjirokastër.

Ndërkohë, Teodor Bilushi, Konsull Nderi i Italisë në Gjirokastër thekson se u realizuan fluturime direkte nga Italia me realizimin e doganës dhe të kontrollit doganor dhe policor në Gjirokastër gjatë këtij viti dhe po ashtu në 2025-ën.

“Në kuadër të rijetëzimit të aerodromit të Gjirokastrës, është nënshkruar në 2025, edhe një marrëveshje binjakëzimi me aeroportin e Sibarit, Itali” – thotë Bilushi.

I ndërtuar në vitin 1924, sot Aerodromi i Gjirokastrës, pret të finalizojë këtë projekt që do t’i shërbejë qytetit të gurtë për vetë pozicionin gjeografik, potencialin turistik, por edhe aksesit në lëvizje. Aktualisht, infrastruktura kërkon investime konkrete, duke nisur nga mirëmbajtja, rrethimi i plotë i pistës, vijëzimi i saj sipas kritereve të sigurisë ajrore. Megjithatë, fakti që kjo hapësirë ka pritur më herët aktivitete ajrore, tregon se ka potencial të provuar dhe mund të rikthehet lehtësisht në përdorim turistik sezonal. Nëse investimet do të konkretizohen, ajo mund të shndërrohet në një pikë kyçe për fluturime turistike, charter apo edhe shërbime të tjera ajrore, duke i dhënë tjetër impuls zhvillimit ekonomik të gjithë rajonit jugor./ad

Last Updated on 20/06/2026 by Anisa

I papërballueshëm dhe i paekuilibruar: Kancelari gjerman Friedrich Merz e ka kundërshtuar propozimin aktual të buxhetit afatgjatë të Bashkimit Europian për periudhën 2028–2034, dhe qëndrimin e tij e mbështet edhe Holanda, një tjetër kontribuuese e rëndësishme neto në buxhetin e BE-së.

Komisioni Europian ka paraqitur një plan buxhetor që kap vlerën mbi 1.6 trilionë euro për shtatë vitet e ardhshme. Ky plan fokusohet në tre fusha kryesore: bujqësinë dhe zhvillimin rajonal, forcimin e konkurrueshmërisë ekonomike, si dhe politikat e jashtme e të sigurisë.

Por për Merz, projekt-buxheti nuk mund të pranohet në formën e tij aktuale.

Ajo çfarë është propozuar deri tani nuk është e realizueshme. Nuk mund të përballohet. Megjithatë, negociatat për buxhetin duhet të përparojnë më shpejt. Dua që të arrijmë një vendim këtë vit”, tha Merz.

Ky koment i tij theksoi mosmarrëveshjet brenda 27 vendeve anëtare lidhur me planin shtatëvjeçar të financimit. Gjermania është kontribuuesja më e madhe neto në Bashkimin Europian.

Ndërkohë, edhe disa vende të tjera anëtare synojnë përfundimin e negociatave deri në fund të vitit, megjithëse ky afat shihet si mjaft optimist. Irlanda, që po merr presidencën e Këshillit të BE-së, pritet të paraqesë një version të ri kompromisi./ad

Ukraina ka prezantuar një nismë të re në fushën e teknologjisë ushtarake, duke lançuar platformën “TrophyLab”, e cila do t’u ofrojë partnerëve ndërkombëtarë qasje në të dhënat teknike të armëve dhe pajisjeve ruse të kapura gjatë luftës.

Lajmi u bë i ditur nga ministri ukrainas i Transformimit Digjital, Mykhailo Fedorov, i cili shpjegoi se platforma do të shërbejë si një bazë e specializuar të dhënash që përmban dokumentacion teknik, analiza dhe studime kërkimore mbi sistemet moderne ushtarake të Rusisë.

Sipas autoriteteve ukrainase, çdo raketë, dron apo mjet ushtarak i sekuestruar në fushën e betejës do të shfrytëzohet si burim i vlefshëm informacioni për të kuptuar më mirë teknologjitë ruse dhe për të ndihmuar në zhvillimin e sistemeve të avancuara të mbrojtjes.

“Çdo raketë, dron dhe automjet i kapur në fushën e betejës është tashmë një burim njohurish për botën e lirë”, deklaroi Fedorov.

Përmes TrophyLab, qeveritë aleate, institucionet kërkimore dhe kompanitë e industrisë së mbrojtjes do të mund të analizojnë armët ruse duke përdorur të dhëna teknike, raporte të detajuara dhe vlerësime mbi dobësitë e mundshme të sistemeve të ndryshme ushtarake.

Platforma parashikon gjithashtu mundësinë që partnerët ndërkombëtarë të kërkojnë akses në pajisje fizike për testime dhe analiza të drejtpërdrejta. Sipas Kievit, kjo mund të përshpejtojë zhvillimin e teknologjive të reja mbrojtëse dhe të sistemeve kundër armëve moderne.

“Çfarë dikur konsiderohej avantazh sekret i armikut, sot po përdoret për të mbrojtur demokracinë”, u shpreh ministri ukrainas.

Autoritetet ukrainase e konsiderojnë TrophyLab një instrument strategjik që transformon pajisjet ushtarake ruse të kapura në burime të vlefshme informacioni, duke ndihmuar vendet aleate të forcojnë kapacitetet e tyre mbrojtëse dhe të kuptojnë më thellë aftësitë teknologjike të ushtrisë ruse./ad

Kanceri i veshkës është një sëmundje që shpesh nuk shfaq simptoma të qarta në fazat e hershme, duke bërë që pacientët të drejtohen te mjeku vetëm kur shenjat bëhen të dukshme dhe sëmundja ka përparuar. Kjo e vështirëson trajtimin dhe ul mundësitë e shërimit.

Ndaj ekspertët theksojnë rëndësinë e diagnostikimit të hershëm dhe aksesit në trajtime moderne. Ndërgjegjësimi i publikut është vendimtar, veçanërisht për personat mbi 50 vjeç.

Sipas specialistëve, simptomat që nuk duhet të injorohen përfshijnë: praninë e gjakut në urinë, dhimbje të vazhdueshme në zonën e veshkave, lodhje kronike, temperaturë pa shkak të qartë infektiv dhe tension të lartë që vështirë të kontrollohet.

Faktorët e rrezikut përfshijnë moshën e madhe (zakonisht 60–70 vjeç), duhanpirjen, obezitetin, hipertensionin, sëmundjet kronike të veshkave, ekspozimin ndaj substancave toksike si dhe në disa raste trashëgiminë familjare.

Ekspertët theksojnë se në fazat e hershme, trajtimi kryesor është kirurgjia, ndërsa në fazat e avancuara përdoren terapi të synuara dhe imunoterapia, të cilat kanë përmirësuar ndjeshëm mbijetesën dhe cilësinë e jetës së pacientëve.

Sipas mjekëve, përparimet e viteve të fundit kanë bërë që shumë forma të kancerit të veshkës të kthehen nga sëmundje fatale në gjendje të menaxhueshme kronike.

Njëkohësisht, ata nënvizojnë rëndësinë e parandalimit përmes një stili të shëndetshëm jetese, sidomos duke shmangur duhanin dhe obezitetin, si dhe përmes kontrolleve të rregullta mjekësore./ad

Last Updated on 20/06/2026 by Anisa

Gjithçka nisi si një kundërshti ndaj projektit të Zvërnecit, por tashmë ky tubim është kthyer në politik dhe kërkohet dorëheqja e kryeministrit Rama dhe qeverisë së tij.

Por përveç shfrytëzimit politik të kësaj proteste, ka nga ata që e përdorin edhe për biznes. Flamujt kombëtar kanë qenë dominues gjatë këtyre ditëve në protestë dhe kjo ka nxitur shitësit ambulantë të nisin tregtinë e tyre.

Në pamjet e siguruara shihen shitësit ambulantë, që kanë shpalosur flamujt dhe sende të tjera me motive patriotike dhe i kanë nxjerrë në shitje.

Në protestën e sotme pritet të ketë më shumë të pranishëm se zakonisht, pasi është thirrur protestë kombëtare dhe ka të ardhur edhe nga diaspora./ad

Këngëtari i njohur kosovar, Sinan Vllasaliu, ka folur për herë të parë rreth aksidentit me motor që pësoi javën e kaluar, nga i cili mbeti i lënduar dhe iu nënshtrua një ndërhyrjeje kirurgjikale.

Duke kujtuar momentin e aksidentit, ai tha për “Prive” se gjithçka ndodhi brenda pak çastesh dhe se kushtet në rrugë ndikuan në humbjen e kontrollit.

“Nuk di si ta shpjegoj saktësisht. Gjithçka ndodhi shumë shpejt. Kishte rënë pak shi, rruga ishte e rrëshqitshme dhe në një kthesë humba kontrollin. Nuk po lëvizja me shpejtësi të madhe, por kur je me motor, çdo shpejtësi mund të jetë e rrezikshme”, u shpreh ai.

Vllasaliu tregoi se reagimi i shpejtë i njerëzve pranë tij ishte vendimtar për të shmangur pasoja më të rënda.

“Kam pasur fatin që pranë meje ndodhej një mik anesteziolog, i cili më ndihmoi menjëherë. Nëse nuk do të ishte ndërhyrë atë ditë, situata mund të kishte qenë shumë më serioze”, tha këngëtari.Për shkak të gjendjes shëndetësore, ai nuk arriti të marrë pjesë në dasmën e yllit botëror me origjinë shqiptare, Dua Lipa, edhe pse angazhimi ishte planifikuar prej muajsh.

“Me Duan ishim takuar që në mars dhe çdo detaj ishte organizuar më herët. Ishte një nder i veçantë të ishe pjesë e një feste familjare të një artisteje që përfaqëson shqiptarët në mbarë botën”, deklaroi ai.

Megjithatë, këngëtari tha se e ka pranuar situatën me qetësi dhe besim.

“Besoj se gjithçka ndodh për një arsye. I jam mirënjohës Zotit që ngjarja nuk pati pasoja më të rënda, edhe pse mbetet një peng që nuk munda të jem i pranishëm në atë dasmë”, u shpreh Vllasaliu.

Ai bëri të ditur se po vazhdon procesin e rikuperimit dhe falënderoi të gjithë ata që i kanë qëndruar pranë me mbështetje dhe mesazhe inkurajuese./ad