Blake Lively nuk do të marrë nga Justin Baldoni shumën prej 8 milionë dollarësh që kishte kërkuar për shpenzimet gjyqësore. Sipas një vendimi të gjykatës, aktori do t’i paguajë bashkëprotagonistes së tij në filmin “It Ends With Us” 400 mijë dollarë.

Në qershor 2025, një gjykatës rrëzoi padinë për shpifje që Justin Baldoni kishte ngritur kundër Blake Lively dhe New York Times, duke vendosur gjithashtu se aktorja kishte të drejtë të rimbursohej për shpenzimet e bëra në kuadër të mbrojtjes së saj ligjore.

Lively kishte kërkuar rreth 8 milionë dollarë, duke pretenduar se Baldoni i detyrohej 7.495.526,87 dollarë për honorarët e avokatëve dhe 539.514,01 dollarë të tjera për shpenzime të ndryshme të lidhura me mbrojtjen e saj.

Baldoni e kundërshtoi këtë kërkesë, duke argumentuar se shuma ishte e ekzagjeruar dhe se duhej të paguante një shumë gjashtëshifrore, jo shtatëshifrore. Gjykatësi vendosi në fund që Lively të marrë 363.245,40 dollarë për honorarët e avokatëve, si dhe 44.206,35 dollarë për shpenzimet gjyqësore, pra gjithsej rreth 407 mijë dollarë.

Ky vendim duket se mbyll edhe çështjen e fundit të mbetur mes Lively dhe Baldoni-t, pas marrëveshjes së tyre jashtë gjykatës, të arritur përpara gjyqit që pritej të niste në maj dhe që konsiderohej veçanërisht i bujshëm.

Në kuadër të marrëveshjes, asnjëra palë nuk i pagoi dëmshpërblim financiar tjetrës, ndërsa Lively tërhoqi akuzat për ngacmim seksual ndaj Baldoni-t.

Pas arritjes së marrëveshjes, të dyja palët publikuan një deklaratë të përbashkët, ku ndër të tjera thuhej se shqetësimet e ngritura nga Lively meritonin të dëgjoheshin dhe se të dyja palët mbeteshin të përkushtuara për krijimin e ambienteve të punës pa sjellje të papërshtatshme dhe pa klima joproduktive./mxh

Policia nepaleze raportoi të mërkurën në mbrëmje se ka gjetur 157 trupa pas përmbytjeve shkatërruese që goditën rajonin kufitar me Tibetin në veri të vendit.

Me viktimat e raportuara më herët, numri i përgjithshëm i të vdekurve ka shkuar në të paktën 160, ndërsa qindra persona rezultojnë ende të zhdukur.

Përmbytjet kanë shkaktuar dëme të mëdha në zonën kufitare, ndërsa ekipet e kërkim-shpëtimit vijojnë operacionet për gjetjen e personave që rezultojnë të zhdukur.

Disa orë më parë, media shtetërore kineze raportoi gjithashtu humbje të konsiderueshme jetësh si pasojë e një rrëshqitjeje dheu në një qytet kufitar. Sipas raportimit, tre persona u vranë, ndërsa 265 të tjerë rezultonin të zhdukur.

Autoritetet në të dyja anët e kufirit po vijojnë përpjekjet për kërkim dhe shpëtim, ndërsa përmasat e plota të katastrofës dhe dëmeve të shkaktuara nga përmbytjet dhe rrëshqitjet e dheut pritet të bëhen më të qarta në orët në vijim./mxh

Policia e Durrësit ka ndarë detaje nga arrestimi i emrit të njohur për drejtësinë, Ergys Agasi.

Mësohet se Agasi është vënë në pranga në finalizim të operacionit policor të koduar “The Wanted”.

“Drejtoria Vendore e Policisë Durrës dhe strukturat operacionale të Drejtorisë së Përgjithshme të Policisë së Shtetit, në bashkëpunim me Prokurorinë e Posaçme kundër Korrupsionit dhe Krimit të Organizuar (SPAK), finalizuan operacionin e koduar “The Wanted”. Si rezultat i operacionit, në Durrës u kap shtetasi Ergys Agasi, i shpallur në kërkim nga SPAK-u. Në kuadër të operacionit, u kap dhe u arrestua edhe shtetasi Ulian Shpataraku, i cili udhëtonte në të njëjtin automjet me personin e kërkuar”,-theksohet në njoftim.

Agasi u shpall në kërkim me kërkesë të SPAK dhe vendim të Gjykatës së Posaçme si i dyshuar në krye të një grupi kriminal, i cili përmes konkurrencës së pandershme, presioneve dhe ndikimit paracaktonte tenderat në institucionin e AKSHI-t./mxh

Pas ndarjes nga jeta të ikonës së muzikës country, Dolly Parton, në moshën 80-vjeçare, Bebe Rexha ka ndarë me ndjekësit një nga kujtimet më të veçanta që ka nga artistja legjendare.

Këngëtarja shqiptare ka publikuar në Instagram momente nga bashkëpunimi i tyre në këngën “Seasons”, e përfshirë në albumin e saj të vitit 2023. Krahas materialeve nga projekti i përbashkët, Rexha ka shkruar një mesazh emocional për Parton, duke treguar se bashkëpunimi me të ishte një ëndërr që dikur dukej e paarritshme.

Bebe kujtoi me emocion edhe momentin kur mori një letër të firmosur nga Dolly. Për të, ishte dëshmi e karakterit të veçantë të artistes, e cila, pavarësisht statusit të saj legjendar, dinte t’i bënte njerëzit përreth të ndiheshin të rëndësishëm.

Në dedikimin e saj, Rexha nuk u ndal vetëm te talenti muzikor i Parton. Ajo veçoi mirësinë, humorin, elegancën, energjinë dhe mënyrën autentike se si artistja e kishte ndërtuar gjithë karrierën e saj.

Rexha shkroi se Parton i kishte treguar brezave të grave se fuqia qëndron edhe në të qenit plotësisht vetvetja, pa pasur nevojë të zvogëlosh personalitetin apo suksesin tënd për t’i bërë të tjerët të ndihen më mirë.

Për këngëtaren shqiptare, “Seasons” do të ketë gjithmonë një domethënie të veçantë, pikërisht sepse zëri i Dolly Parton është tashmë pjesë e saj.

“Disa njerëz i takon dhe i kujton. Disa të tjerë lënë një pjesë të vogël të vetes tek ti, përgjithmonë. Ti ishe një prej tyre”, shkroi Rexha në një nga pjesët më prekëse të dedikimit.

Ajo shprehu gjithashtu mirënjohjen për mundësinë që pati për të krijuar këtë kujtim dhe falënderoi Danny-n, personin që ndihmoi që bashkëpunimi me Parton të bëhej realitet.

Në fund, Bebe Rexha e mbylli mesazhin me një premtim emocional: gjithçka që përjetoi gjatë atij bashkëpunimi, nga muzika te kujtimet dhe mësimet që mori, do ta mbajë me vete përgjithmonë./mxh

Një nga këngët më të njohura të Dolly Parton u dëgjua në një prej simboleve më të famshme të Britanisë. “9 to 5” jehoi përpara Pallatit Buckingham, e interpretuar nga Garda Mbretërore gjatë ceremonisë së ndërrimit të rojës, në një homazh të veçantë për ikonën e muzikës Country.

“Duke kujtuar të ndjerën dhe artisten e madhe Dolly, e cila solli gëzim dhe frymëzim për kaq shumë njerëz, përfshirë miliona fëmijë që u dhanë libra falas përmes Imagination Library”, thuhet në njoftimin e familjes mbretërore.

Këngëtarja, kantautorja e muzikës Country, karizma e së cilës, tekstet e ndjera përzemërta prekën imagjinatën e publikut për gati gjashtë dekada, u nda nga jeta në moshën 80-vjeçare duke lënë pas një karrierë të gjatë,

Asnjë shkak i vdekjes nuk u zbulua, por zëdhënësi i Parton tha që ajo u nda nga jeta paqësisht në Nashville. Revista People raportoi se ylli i muzikës country luftoi një “betejë të shkurtër me kancerin”, teksa disa ditë më parë, Parton i tha revistës se po merrej me çështje shëndetësore të paspecifikuara, por planifikoi të vazhdonte punën./mxh

Drejtori i Agjencisë Qendrore amerikane të Inteligjencës (CIA), John Ratcliffe, zhvilloi një vizitë të paparalajmëruar në Moskë më 25 gusht, konfirmuan për Radion Evropa e Lirë zyrtarë amerikanë. Kjo vizitë e rrallë vjen në një kohë kur përpjekjet e Uashingtonit për t’i dhënë fund luftës së Rusisë kundër Ukrainës kanë ngecur dhe tensionet lidhur me marrëdhëniet e Moskës me Iranin janë përshkallëzuar.

Arsyeja e vizitës së Ratcliffe, e para që publikisht dihet se ka realizuar në Rusi që kur ai u bë drejtor i CIA-s gjatë mandatit të Donald Trump, nuk ishte menjëherë e qartë. Zyrtarë amerikanë, që ishin në dijeni të udhëtimit, konfirmuan se ai fluturoi drejt Moskës, por nuk pranuan të zbulonin përmbajtjen e takimeve të tij apo të tregonin me kë u takua.

CIA dhe Shtëpia e Bardhë nuk u deklaruan për media.

Vizita, e raportuar fillimisht nga CBS News, u sinjalizua nga të dhënat e gjurmimit të fluturimeve, të cilat tregonin një avion transporti ushtarak amerikan duke udhëtuar nga Shtetet e Bashkuara përmes Letonisë drejt Moskës. Avioni, që dukej se ishte nisur nga Baza Andrews në Merilend, ateroi në Aeroportin Vnukovo të Moskës më 25 gusht dhe u largua nga Rusia më vonë po atë ditë, sipas të dhënave të gjurmimit të fluturimeve.

Kjo ngriti pyetje se pse kreu i agjencisë amerikane të inteligjencës po vizitonte Rusinë në një moment kaq delikat. Vizita e fundit në Moskë e një drejtori të CIA-s, që dihet publikisht, ishte ajo e paraardhësit të Ratcliffe, William Burns, i cili u takua me presidentin rus, Vladimir Putin, në nëntor 2021, tre muaj para se Putini të niste pushtimin në shkallë të plotë të Ukrainës.

Natyra e këtij udhëtimi sugjeron se rreziku ishte i lartë, tha për REL-in Glen Howard, ekspert për Rusinë dhe kryetar i Saratoga Foundation, një institut me bazë në Shtetet e Bashkuara.

“Drejtorët e CIA-s nuk shkojnë në Moskë nëse nuk duan të kërkojnë diçka”, tha Howard, duke shtuar se ata nuk “udhëtojnë deri në Rusi nëse nuk është diçka e rëndësishme”.

“Burns shkoi atje në nëntor 2021, para pushtimit rus, për t’i paralajmëruar [rusët] që të mos pushtonin Ukrainën”, tha ai.

Zyrtarë të lartë të inteligjencës amerikane kanë mbajtur kontakte me homologët e tyre rusë gjatë luftës, por takimet ballë për ballë në këtë nivel mbeten të rralla.

Karota dhe shkopinj?

Një shpjegim i mundshëm është Ukraina, veçanërisht përpjekja e administratës amerikane për të përcaktuar nëse Moska mund të bindet ende të negociojë për t’i dhënë fund luftës. Përpjekjet e ndërmjetësuara nga SHBA-ja kanë ngecur, pavarësisht takimit të Trumpit me Putinin në Alaskë në gusht të vitit 2025.

“Do të shpresoja që në krye të listës së tij të ishte një kërkesë e drejtpërdrejtë që Putin t’i japë fund kësaj lufte të pajustifikuar të agresionit kundër Ukrainës”, tha për REL-in Bradley Bowman, drejtor i lartë i Qendrës për Fuqinë Ushtarake dhe Politike në Fondacionin për Mbrojtjen e Demokracive, me bazë në Uashington.

Bowman, ish-këshilltar për sigurinë kombëtare i anëtarëve të Komiteteve të Senatit amerikan për Forcat e Armatosura dhe Marrëdhëniet me Jashtë, tha se Uashingtoni duhet ta bëjë të qartë se dështimi për t’i dhënë fund luftës do të sjellë masa gjithnjë e më të dhimbshme kundër Rusisë, ndërsa SHBA-ja dhe aleatët e saj vazhdojnë ta ndihmojnë Ukrainën të mbrohet.

Bowman përmendi edhe një tjetër temë të mundshme: mbështetjen e Rusisë për Iranin.

Rusia dhe Irani

“Shpresoj që ai të ketë thënë gjithashtu se Putin duhet të ndalojë së ofruari ndihmë për Iranin për lëshimin e satelitëve”, tha Bowman, duke shtuar se Moska duhet të ndalojë gjithashtu ofrimin e mbështetjes që mund ta ndihmojë Iranin të godasë forcat amerikane, përfshirë informacionet për shënjestrimin, ndihmën lidhur me dronët dhe kapacitete të tjera ushtarake.

Rusia ka lidhje të mëdha ushtarake dhe tregtare me Iranin. Vizita e Ratcliffe erdhi një ditë pasi sekretari amerikan i Thesarit, Scott Bessent, njoftoi një përpjekje të re për të “ndërprerë çdo burim ekonomik që mban gjallë këtë regjim tiranik derisa Teherani të mbetet i vetëm” dhe tha se vendeve do t’u jepen afate për të “mbyllur” aktivitetet që e mbështesin atë.

Howard gjithashtu sugjeroi se Irani mund të jetë në qendër të misionit të Ratcliffe, megjithëse theksoi se ky ishte spekulimi i tij dhe jo një fakt i konfirmuar. Sipas tij, Ratcliffe mund të jetë duke u përpjekur ta bindë Moskën të ndalojë furnizimin ose ndihmën për Iranin, duke e kthyer potencialisht vizitën në një paralajmërim jashtëzakonisht të drejtpërdrejtë për Kremlinin.

Bowman iu referua raportimeve se Rusia i ka ofruar Iranit informacione për shënjestrimin dhe i ka transferuar taktika dhe teknika të përdorimit të dronëve të zhvilluara gjatë luftës në Ukrainë. Ai argumentoi se mbështetja e Moskës mund të jetë një nga arsyet pse Irani ka qenë në gjendje të ruajë qëndrueshmërinë ushtarake dhe t’i rezistojë presionit për të negociuar.

Një vizitë e rrallë në një moment të ndjeshëm

Vizita e Ratcliffe në Moskë ishte e veçantë edhe për shkak të reputacionit të tij si një kritik i ashpër i Rusisë. Howard iu referua mbështetjes së mëparshme të Ratcliffe për mbajtjen e këshilltarëve të CIA-s në Ukrainë për të ndihmuar me inteligjencën dhe shënjestrimin, edhe pse Pentagoni po lëvizte drejt zvogëlimit të pranisë së tij këshilluese atje.

Kjo, argumentoi Howard, sugjeron se Ratcliffe ka një linjë veçanërisht të drejtpërdrejtë me Trumpin.

Ndërkohë, Moska e ka akuzuar Shtetet e Bashkuara se po ofrojnë mbështetje të fortë për sulmet ukrainase ndaj Rusisë.

Pa paraqitur prova, ministri i Jashtëm rus, Sergei Lavrov, tha në fillim të këtij muaji se Rusia i kishte dërguar Departamentit të Shtetit pyetje “lidhur me çështjen e të dhënave të inteligjencës dhe faktin se SHBA-ja është shumë më e përfshirë në organizimin dhe realizimin e sulmeve në thellësi të territorit rus”.

Amerikanët pas hekurave

Disa vëzhgues spekuluan se fati i amerikanëve të burgosur ose të ndaluar në Rusi mund të ketë qenë pjesë e qëllimit të vizitës.

CIA ka luajtur një rol të rëndësishëm në përpjekjet e mëparshme për të siguruar lirimin dhe kthimin e amerikanëve të burgosur, përfshirë shkëmbimin e vitit 2024 që mundësoi lirimin e gazetarit të Wall Street Journal, Evan Gershkovich, gazetares së REL-it, Alsu Kurmasheva, dhe ish-marinsit amerikan Paul Whelan.

Ratcliffe gjithashtu luajti rol në negociatat që çuan në lirimin e Ksenia Karelina, shtetase ruso-amerikane e cila kaloi më shumë se një vit burgim në Rusi pasi autoritetet ruse e akuzuan për mbështetje ndaj Ukrainës.

“Ekziston një përgjegjësi serioze për çdo zyrtar të Qeverisë amerikane që flet me cilindo shtet që po mban padrejtësisht një shtetas amerikan, që ta ngrejë këtë çështje në çdo mundësi”, tha Bowman.

Një pyetje që mbetet pa përgjigje është nëse vizita e Ratcliffe përfaqëson përshkallëzim të tensioneve, një hapje diplomatike apo përdorimin e një kanali të inteligjencës për një marrëveshje specifike.

Uashingtoni po bën presion për t’i dhënë fund luftës së Rusisë kundër Ukrainës, por Putini – ndonëse duket i interesuar ta mbajë SHBA-në të përfshirë në përpjekjet diplomatike – ka refuzuar thirrjet e SHBA-së dhe Kievit për nisjen e bisedimeve duke i ngrirë vijat e frontit në gjendjen aktuale.

Në vend të kësaj, ai këmbëngul që Ukraina t’ia dorëzojë territorin që forcat e Moskës nuk kanë qenë në gjendje ta pushtojnë në fushëbetejë./mxh

Papa Leone XIV është i pranishëm në listën e revistës amerikane ”Vanity Fair” të personaliteteve më të veshura mirë të vitit 2026, në kategorinë “Origjinalët”, e cila bashkon 10 nga “personat e veshur më çuditshëm dhe inovativë”.

Kryetar i Kishës Katolike në listë i bashkohen muzikantët Björk dhe Rosalía dhe regjisori Spike Lee.

”Vanity Fair” përmendi stilin jokonvencional të papës si arsyen e përfshirjes.

“Edhe para papatit, Leone, i njohur më parë si ati Bob, e çoi veshjen e tij modeste ngjyrë krem ​​në lartësi qiellore duke e kombinuar atë me ‘Nike”, tha revista.

“Leone e ka ruajtur ndjenjën e tij të rastësisë ironike, ndonjëherë duke veshur kapele bejsbolli”, theksoi ajo.

Nuk është çmimi i parë papal i stilit

Nuk është hera e parë që papa i lindur në SHBA shfaqet në një listë të tillë.

”Vogue” e kishte vendosur tashmë Leonen në listën e saj të 55 njerëzve më të veshur të vitit 2025.

Megjithatë, ”Vogue” vlerësoi rikthimin e tij në “trashëgiminë papale për veshjet liturgjike të përshtatshme” dhe ndarjen e tij nga stili modest i paraardhësit të tij, Françeskut.

”The New York Times” gjithashtu e numëroi Leonen midis njerëzve më elegantë të vitit 2025.

Si ”Vogue” ashtu edhe ”New York Times” e njohën stilin e tij në vitin e zgjedhjes së tij si papë.

Leone doli nga konklava si papa i ri më 8 maj 2025, pas vdekjes së papa Françeskut.

Ai është qytetari i parë amerikan që zë Karrigen e Shën Pjetrit.

Ai njihet si tifoz i ekipit të bejsbollit ”Chicago White Sox” dhe një fotografi e tij duke veshur kapelen e ekipit të qytetit të tij të lindjes bëri bujë./mxh

Ministrja e Ekonomisë dhe Inovacionit, Delina Ibrahimaj, ka njoftuar lançimin e “PriceWatch Albania”, një platformë e re që synon të rrisë transparencën e çmimeve në treg.

Duke nisur nga muaji shtator, konsumatorët do të mund të krahasojnë çmimet e produkteve bazë dhe të identifikojnë pikat ku ato shiten më lirë.

Platforma do të mundësojë gjithashtu monitorimin e zinxhirit të çmimit, nga importi ose prodhimi deri te pika e shitjes, me synim evidentimin e abuzimeve.

Postimi i Ibrahimajt:

Çmimet duhet të jenë të dukshme, të krahasueshme dhe transparente për çdo qytetar.

Për këtë arsye, nga muaji shtator do të lançojmë “PriceWatch Albania” – Pasqyra e Çmimeve, një platformë e menduar për qytetarët shqiptarë dhe miliona konsumatorë të huaj në Shqipëri. Platforma do të integrohet edhe në PasqyrAlbania.

Përmes kësaj platforme, konsumatorët do të mund të shohin çmimet e produkteve bazë, t’i krahasojnë ato dhe të zgjedhin se ku mund t’i blejnë më lirë.

Nëpërmjet mekanizmit të ri të raportimit do të ndjekim edhe zinxhirin e çmimit, nga importi apo prodhimi deri në pikën e shitjes, për të kuptuar ku krijohen diferencat dhe për të evidentuar abuzimet.

Në një ekonomi të lirë, çmimet përcaktohen nga tregu. Roli ynë është të garantojmë transparencë, monitorim dhe më shumë informacion për konsumatorin.

Me PriceWatch Albania, çdo konsumator do të ketë një instrument konkret për të krahasuar, vlerësuar dhe vendosur ku të blejë./mxh

Një ngjarje e rëndë ka tronditur zonën e Rodopit në Greqi, ku 44-vjeçarja shqiptare Esma Meço u vra me thikë nga bashkëshorti i saj 53-vjeçar, Bujar Meço, mesditën e sotme.

Sipas mediave greke, çifti, me origjinë nga Shqipëria dhe nga Gramshi, ishte ndarë kohët e fundit. 44-vjeçarja kishte kohë që ishte larguar nga shtëpia dhe punonte sezonalisht jashtë Rodopit, ndërsa ishte kthyer në fshatin Dialambi për të festuar ditëlindjen e vajzës së saj 16-vjeçare.

Por kthimi në banesën familjare përfundoi në tragjedi. Sipas raportimeve paraprake, 53-vjeçari dyshohet se e sulmoi gruan dhe e goditi me thikë në qafë, duke i shkaktuar plagë fatale.

Ngjarja u zbulua mesditën e 26 gushtit, kur një i afërm e gjeti 44-vjeçaren brenda banesës, të plagosur rëndë me një mjet të mprehtë. Ajo u transportua me urgjencë në Spitalin e Komotinit, por, pavarësisht përpjekjeve të mjekëve, ndërroi jetë për shkak të plagëve të marra.

Pas ngjarjes, djali 19-vjeçar i çiftit e mori nënën e tij të gjakosur në krahë dhe e çoi në spital, me shpresën se mund të shpëtonte. Megjithatë, mjekët e njoftuan të riun se nëna e tij kishte ndërruar jetë.

Ndërkohë, vajza 16-vjeçare, e cila ndodhej në një dhomë tjetër të banesës, dyshohet se ka telefonuar autoritetet për të njoftuar për sulmin. Të dy fëmijët ndodhen në gjendje shoku.

Pas sulmit, 53-vjeçari dyshohet se është vetëplagosur dhe ka konsumuar naftë, në tentativë për t’i dhënë fund jetës. Ai u transportua me ambulancë në spital, ku po merr trajtim mjekësor nën mbikëqyrjen e policisë dhe ndodhet jashtë rrezikut për jetën.

Policia greke e ka arrestuar Bujar Meçon si të dyshuar për vrasjen. Gjatë këqyrjes së banesës, autoritetet sekuestruan dy thika, të cilat pritet t’i nënshtrohen ekspertizës në kuadër të hetimeve për zbardhjen e plotë të krimit.

Për 53-vjeçarin është ngritur një çështje penale për vrasje me dashje, dhunë në familje dhe shkelje të ligjit për armët.

Një detaj i rëndësishëm i bërë publik nga autoritetet është se në vitin 2022, në Heraklion të Kretës, 53-vjeçari ishte arrestuar pasi Esma Meço e kishte denoncuar për kërcënim. Pas kallëzimit, ai ishte dërguar përpara autoriteteve gjyqësore.

Ky fakt e bën edhe më të rëndë ngjarjen e sotme, pasi sipas raportimeve bëhet fjalë për një çift që kishte pasur probleme dhe tensione edhe më herët.

Sipas autoriteteve greke, autopsia pritet të përcaktojë shkakun e saktë të vdekjes, ndërsa hetimet paraprake po kryhen nga Departamenti i Hetimit dhe Ndjekjes Penale të Krimeve në Komotini.

Policia vijon hetimet për të zbardhur plotësisht dinamikën dhe motivin e krimit, ndërsa deklarimet e fëmijëve dhe personave të tjerë që mund të kenë dijeni për ngjarjen pritet të ndihmojnë në hedhjen e më shumë drite mbi momentet para dhe gjatë vrasjes./mxh

Last Updated on 26/08/2026 by Monika

Autoritetet kuvajtiane kanë sekuestruar rreth 5 tonë pluhur pregabaline dhe afro 4,0 milionë kapsula të gatshme për shitje, në atë që Ministria e Brendshme e ka cilësuar si operacionin më të madh antidrogë në historinë e vendit.

Ministri i Brendshëm, Sheikh Fahad Yousef Al-Sabah tha sot se droga, e njohur gjerësisht me emrin tregtar Lyrica, kishte një vlerë të përllogaritur në treg prej rreth 150 milionë dinarësh kuvajtianë ose afërsisht 490 milionë dollarë.

Operacioni, i zhvilluar të martën, zbuloi gjithashtu një fabrikë të pajisur plotësisht për prodhimin e pregabalinës, si dhe makineri për mbushjen, ndarjen dhe paketimin e kapsulave.

Pregabalina përdoret zakonisht si ilaç për trajtimin e dhimbjeve nervore, por mund të keqpërdoret për shkak të efekteve të saj në sistemin nervor.

Al-Sabah vlerësoi punën e oficerëve kundër narkotikëve dhe tha se operacioni tregoi përmasat e kërcënimit që paraqet trafiku i drogës në vend.

Ministri theksoi se lufta kundër drogës mbetet një nga prioritetet kryesore të Ministrisë së Brendshme, duke përfshirë ndjekjen e trafikantëve dhe shpërndarësve, forcimin e kontrolleve dhe goditjen e rrjeteve të furnizimit./mxh

Një çift që po numëronte ditët deri te martesa e tyre vendosi t’i japë fund gjithçkaje vetëm dy javë para ceremonisë, pas një debati që lidhej me një prej rasteve më të diskutuara kriminale në SHBA.

Sipas një historie që është bërë virale në rrjet, burri mësoi se e fejuara e tij kishte shprehur mbështetje për Lindsay Clancy, gruan nga Massachusetts e akuzuar për vdekjen e tre fëmijëve të saj të vegjël në vitin 2023.

Pikërisht ky qëndrim thuhet se u bë pika e fundit për marrëdhënien. Burri dyshohet se nuk e pa më çështjen si një debat të zakonshëm mes partnerësh, por si një tregues se të dy kishin pikëpamje shumë të ndryshme për çështje themelore, veçanërisht për familjen dhe prindërimin.

Rasti i Clancy-t vazhdon të jetë objekt debati në SHBA. Ajo është deklaruar e pafajshme, ndërsa mbrojtja pretendon se në momentin e ngjarjes vuante nga psikozë pas lindjes. Prokuroria, nga ana tjetër, argumenton se ajo ishte në gjendje t’i kuptonte veprimet e saj dhe duhet të përballet me përgjegjësi penale.

Ndërkohë, emrat e dy personave që pretendohet se i dhanë fund fejesës nuk janë bërë publikë dhe detajet e historisë nuk janë verifikuar në mënyrë të pavarur.

Megjithatë, rrëfimi ka shkaktuar një debat të madh në rrjet: deri ku mund të ndikojnë bindjet dhe vlerat personale në një marrëdhënie dhe a mund të jenë ato arsye e mjaftueshme për të anuluar një martesë, edhe kur ceremonia është vetëm pak ditë larg?

Në këtë rast, përgjigjja duket se ka qenë po./mxh

Emma Watson e njohu famën botërore që në moshë shumë të re, kur u bë e njohur në mbarë botën përmes rolit të Hermione Granger në sagën “Harry Potter”. Por, ndryshe nga shumë personazhe të industrisë së filmit, ajo nuk e ndërtoi identitetin e saj vetëm rreth karrierës dhe famës.

Me kalimin e viteve, Watson ka zgjedhur të investojë edhe në fusha të tjera të jetës. Ajo i dha një rëndësi të veçantë arsimimit dhe përfundoi studimet në Universitetin Brown, ndërsa paralelisht u angazhua në çështje sociale që i konsideron të rëndësishme.

Një prej roleve më të rëndësishme jashtë kinemasë ka qenë angazhimi i saj me UN Women. Si Ambasadore e Vullnetit të Mirë, ajo u bë një prej zërave të njohur të fushatës HeForShe, e cila synon të përfshijë të gjithë në promovimin e barazisë gjinore.

Watson ka treguar interes edhe për mënyrën se si industria e modës ndikon te mjedisi. Për këtë arsye, ajo ka mbështetur vazhdimisht modën e qëndrueshme dhe zgjedhjet më etike në industrinë e veshjeve.

Edhe pse emri i saj mbetet i lidhur ngushtë me një prej ekskluziviteteve më të suksesshme të kinemasë, Emma Watson ka zgjedhur të mos e masë suksesin vetëm me projektet e ekranit apo vëmendjen mediatike.

Rrugëtimi i saj tregon se fama nuk duhet domosdoshmërisht të përcaktojë mënyrën se si dikush zgjedh të jetojë. Për Watson, duket se rëndësi kanë pasur gjithnjë edhe arsimimi, kauzat që mbështet dhe liria për të marrë vendime në përputhje me bindjet e saj./mxh

Rumer Willis ka folur për herë të parë me më shumë detaje rreth jetës së saj pranë babait, Bruce Willis, dhe mënyrës se si familja po përballet me diagnozën e tij me demencë frontotemporale.

Në një intervistë për People, aktorja tregoi se përballja me sëmundjen ka qenë një përvojë e vështirë dhe e paparashikueshme. Ajo e përshkroi demencën si një proces që nuk mund të parashikohet lehtë, pasi simptomat dhe ecuria mund të jenë të ndryshme për çdo person.

Megjithatë, Rumer u shpreh se i ati po ia del mirë duke marrë parasysh situatën dhe se familja përpiqet të përqendrohet te momentet e vogla që mund të ndajnë së bashku.

Një prej tyre është veçanërisht i rëndësishëm për të: vizitat e saj me vajzën e saj, Louetta. Sipas Rumer, buzëqeshja e Bruce kur sheh mbesën e tij mbetet një nga momentet më të bukura dhe më emocionale për të.

Kjo përvojë ka ndryshuar edhe mënyrën se si Rumer e sheh shëndetin dhe të ardhmen. Duke qenë se sëmundjet neurodegjenerative janë bërë pjesë e realitetit të familjes së saj, ajo ka zgjedhur të jetë më e informuar dhe proaktive në lidhje me shëndetin personal.

Në kuadër të një bashkëpunimi me kompaninë Function, Rumer iu nënshtrua edhe testimit gjenetik APOE, i cili mund të japë informacion mbi një faktor gjenetik të lidhur me rrezikun për sëmundjen e Alzheimerit.

Për Rumer, ky hap nuk lidhet vetëm me veten. Ajo dëshiron të kujdeset sa më shumë për shëndetin e saj në mënyrë që të ketë mundësi të jetë pranë vajzës së saj për shumë vite.

Në mes të një situate të dhimbshme familjare, Rumer thotë se ka mësuar t’i vlerësojë edhe më shumë momentet e përbashkëta me të atin dhe kohën që kanë ende për të kaluar së bashku./mxh

Aktori britanik Tim Curry, i famshëm për rolin e tij si Frank-N-Furter në filmin kult “The Rocky Horror Picture Show”, ka vdekur në moshën 80-vjeçare, raportoi sot agjencia e njohur amerikane e lajmeve për personazhe të famshëm TMZ.

”Tim Curry, i cili vuante nga probleme shëndetësore për më shumë se një dekadë pasi një goditje e rëndë në tru e la me aftësi të kufizuara të konsiderueshme, vdiq në shtëpinë e tij në Los Anxheles”, sipas TMZ, duke cituar burime anonime.

Aktori, i cili e filloi karrierën e tij në kinematë e Londrës, portretizoi Frank-N-Furter, një shkencëtar të çmendur alien që e quan veten “tranvestit transilvanian”, në skenë dhe më pas në filmin e vitit 1975 “The Rocky Horror Picture Show”, i cili u bë klasik dhe ende shfaqet në kinema më shumë se 50 vjet pas publikimit të tij.

Ai gjithashtu luajti kllounin e tmerrshëm në adaptimin filmik të romanit “It” të Stephen King dhe u shfaq në filma të tillë si “Annie” dhe “Charlie’s Angels”./mxh

Food and Drug Administration ka miratuar ilaçin me emrin tregtar Rasonque (daraxonrasib) për të rriturit me kancer të avancuar të pankreasit që nuk i përgjigjet më trajtimit të mëparshëm ose për pacientët shumë të sëmurë për kimioterapi standarde të kombinuar.

Ilaçi përmirësoi mbijetesën mesatare të përgjithshme në 13,2 muaj krahasuar me vetëm 6,7 muaj për kimioterapinë standarde.

”Është ilaçi i parë i synuar i miratuar për kancerin e pankreasit që vepron në forma të shumëfishta të RAS, një proteinë që nxit rritjen e tumorit në shumicën e rasteve të adenokarcinomës pankreatike”, sipas një njoftimi për shtyp të FDA-së më 26 gusht.

Mutacionet RAS i shpëtuan terapive të synuara për dekada – një boshllëk që një valë e re e frenuesve të RAS, përfshirë Rasonque, vetëm tani po fillon ta mbyllë.

Të dhënat e mbijetesës erdhën nga një provë e rastësishme, e hapur me 500 të rritur me adenokarcinomë pankreatike metastatike të trajtuar më parë.

Rezultati bazohet në të dhënat e mëparshme të provave që tregojnë se daraxonrasib zgjati mbijetesën mesatare pa përparim të sëmundjes me 8,5 muaj dhe tejkaloi kimioterapinë si në mbijetesën e përgjithshme ashtu edhe në atë pa përparim – gjetje që tashmë i kishin shtyrë qendrat e kancerit në të gjithë vendin të përgatiteshin për një rritje të kërkesës së pacientëve muaj para miratimit.

FDA i dha Rasonque-s emërtimet e terapisë revolucionare dhe të barnave jetime dhe shqyrtoi aplikimin nën shqyrtimin prioritar dhe programin pilot të Komisionerit të Kuponit Kombëtar të Prioritetit.

Miratimi erdhi 6,5 muaj përpara afatit të tarifës së përdoruesit të agjencisë.

”Revolution Medicines”, prodhuesi i ilaçit, mori një letër “të sigurt për të vazhduar” nga FDA në maj duke lejuar akses të zgjeruar në ilaç përpara miratimit.

Adenokarcinoma e pankreasit përbën 90% deri në 95% të 67 000 rasteve të kancerit të pankreasit të diagnostikuara në SHBA çdo vit, sipas Institutit Kombëtar të Kancerit.

Megjithëse përfaqëson rreth 3,2% të të gjitha diagnozave të kancerit, lloji i kancerit shkakton një pjesë disproporcionalisht të lartë të vdekjeve nga kanceri për shkak të zbulimit të vonë dhe opsioneve historikisht të kufizuara të trajtimit./mxh

Shtetet e Bashkuara të Amerikës përcaktuan sot Grupin e Veprimit për Palestinën, me bazë në Mbretërinë e Bashkuar, si dhe një grup italian të së majtës ekstreme si “organizata terroriste të huaja”.

Kjo organizatë pro palestineze, të cilën qeveria britanike do ta klasifikonte si një organizatë “terroriste” në vitin 2025, akuzohet se “ka ofruar ndihmë të konsiderueshme (…) për ose në mbështetje të një akti terrorizmi”, tha Departamenti i Thesarit në një deklaratë.

Entiteti italian i synuar është ”Autistici/Inventati” (”A/I Collective”), të cilin Uashingtoni e konsideron “një grup ekstremist që krijon dhe menaxhon infrastrukturën digjitale të qelizave të dhunshme Antifa dhe militantëve të tjerë të së majtës ekstreme në të gjithë botën”.

Departamenti i Shtetit deklaron gjithashtu se “qelizat anarkiste përgjegjëse për aktet e sabotimit të kryera kundër rrjeteve hekurudhore në Francë, Itali, Gjermani dhe Holandë në vitin 2026 përdorën mjetet dhe shërbimet e A/I për të marrë përgjegjësinë për këto sulme, për të publikuar deklarata zyrtare dhe për të shpërndarë manuale që shpjegojnë se si të bëhen pajisje ndezëse të improvizuara për hekurudhat dhe infrastrukturën tjetër kritike”.

E themeluar në vitin 2020, ”Palestina Action” fitoi famë pas fillimit të luftës në Rripin e Gazës, e shkaktuar nga sulmi i pashembullt i nisur nga lëvizja islamiste palestineze Hamas kundër Izraelit më 7 tetor 2023.

Sanksionet e SHBA-së përfshijnë ngrirjen e çdo pasurie të mbajtur në Shtetet e Bashkuara nga organizatat e synuara.

Kompanitë dhe qytetarët amerikanë ndalohen të bëjnë biznes me to, nën dënimin se do të sanksionohen vetë./mxh

A mund të jetë qielli zgjidhja për trafikun famëkeq të Los Anxhelosit? Në prag të Lojërave Olimpike të vitit 2028, qyteti kalifornian po zhvillon pikën e parë të ngritjes dhe uljes për taksi ajrore elektrike, të cilat synojnë të transportojnë pasagjerët në pjesë të ndryshme të qytetit brenda pak minutash.

Teksa Los Anxhelosi përgatitet të presë botën në vitin 2028, vizitorët mund të kenë një mënyrë tipike “LA” për t’i shpëtuar një prej problemeve më të mëdha të qytetit: trafikut të rënduar. Ideja është e thjeshtë, të fluturosh mbi trafikun, në vend që të rrish i bllokuar në të.

Qyteti pritet të ndërtojë “vertiportin” e parë, një hapësirë të dedikuar për ngritjen dhe uljen e taksive ajrore elektrike. Projekti po zhvillohet nga gjiganti i argëtimit sportiv AEG dhe kompania Archer Aviation, ndërsa vertiporti do të vendoset në L.A. Live, një kompleks sportiv dhe argëtues me sipërfaqe prej rreth katër milionë këmbësh katrorë në qendër të Los Anxhelosit.

Avioni Midnight i kompanisë Archer është plotësisht elektrik dhe mund të transportojë deri në katër pasagjerë. Me një shpejtësi maksimale prej 241.4 kilometrash në orë, ai synon të ofrojë udhëtime shumë më të shpejta sesa transporti rrugor.

Sipas kompanisë, një fluturim me taksi ajrore nga Aeroporti Hawthorne drejt Orange County zgjat rreth 12 minuta, ndërsa e njëjta rrugë me makinë mund të marrë rreth 56 minuta.

Një tjetër itinerar, nga Aeroporti Hollywood Burbank drejt stadiumit SoFi në Inglewood, do të zgjaste rreth 14 minuta me taksi ajrore, krahasuar me afro një orë udhëtim me automjet.

Kjo mund të jetë veçanërisht e dobishme gjatë Lojërave Olimpike të vitit 2028. Stadiumi SoFi, i riemërtuar tashmë “2028 Stadium” për periudhën e Lojërave, do të shndërrohet në arenën më të madhe të notit në historinë e Olimpiadës. Ai do të bashkëpresë gjithashtu ceremoninë hapëse të Lojërave Olimpike së bashku me LA Memorial Coliseum, si edhe ceremoninë hapëse të Lojërave Paralimpike.

Vitin e kaluar, Archer Aviation u zgjodh si ofruesi zyrtar i taksive ajrore për Lojërat LA28 dhe ekipin olimpik amerikan Team USA. Për të shënuar këtë bashkëpunim, kompania prezantoi avionin Midnight me ngjyrat e Team USA në një ekspozim në L.A. Live.

Last Updated on 26/08/2026 by Monika

Ergys Agasi është arrestuar këtë të mërkurë te zona e Plepave në Durrës, pasi prej muajsh ishte shpallur në kërkim nga Prokuroria e Posaçme (SPAK) në kuadër të hetimeve për dosjen e AKSHI-t. Lajmi për arrestimin është raportuar mbrëmjen e sotme.

Agasi dyshohet nga SPAK për përfshirje në një skemë të manipulimit të procedurave të prokurimit publik pranë Agjencisë Kombëtare të Shoqërisë së Informacionit (AKSHI).

Prokuroria e Posaçme e akuzon Agasin, së bashku me biznesmenin Ermal Beqiraj, për përfshirje në një grup të strukturuar kriminal të dyshuar për manipulimin e tenderave të AKSHI-t, ndërsa hetimet përfshijnë edhe pretendime për përdorim të dhunës dhe pengmarrje. Në kuadër të kësaj dosjeje, SPAK ka kryer edhe sekuestrime të pasurive me vlerë të konsiderueshme./mxh

Vendet europiane kanë paguar miliarda euro më shumë për importet e lëndëve djegëse fosile për shkak të rritjes drastike të çmimeve pas luftës kundër Iranit, duke nxjerrë në pah cenueshmërinë energjetike të Europës ndaj krizave gjeopolitike.

Holanda, Italia, Franca dhe Spanja renditen mes dhjetë vendeve më të goditura nga kostot shtesë të importeve të lëndëve djegëse fosile, të shkaktuara nga ndërprerjet e furnizimeve në Lindjen e Mesme, sipas një raporti të Qendrës për Kërkime mbi Energjinë dhe Ajrin e Pastër (CREA).

Raporti, i cili analizoi 170 vende, tregon se 134 prej tyre paguan më shumë për naftën dizel sesa parashikohej nga tregjet përpara nisjes së luftës. Holanda regjistroi rreth 11.5 miliardë euro kosto shtesë nga marsi deri në gusht 2026, ndërsa Italia u përball me 12.7 miliardë euro, Franca me 10.8 miliardë euro dhe Spanja me 8.8 miliardë euro.

Së bashku, këto katër ekonomi të BE-së kanë përballuar pothuajse 41 miliardë euro kosto shtesë për lëndët djegëse fosile, pa importuar sasi të reja energjie.

Shifrat nxjerrin në pah varësinë e ekonomive europiane nga çmimet globale të naftës dhe gazit. Në nivel botëror, kriza ka shtuar më shumë se 282 miliardë euro në faturat e importeve të lëndëve djegëse fosile, ku vetëm nafta përbën rreth 140 miliardë euro të kësaj rritjeje.

Çmimet e gazit natyror të lëngshëm (LNG) u rritën me 60% në tregun e Atlantikut dhe me 75% në Paqësor, ndërsa çmimet e dizelit dhe benzinës janë rritur me 59% që nga 28 shkurti, kur SHBA-ja dhe Izraeli nisën luftën kundër Iranit.

Për të kompensuar mungesat nga Lindja e Mesme, SHBA-ja dhe Norvegjia u bënë furnizuesit më të mëdhenj të BE-së me produkte të naftës dhe LNG gjatë tremujorit të parë të vitit, sipas të dhënave europiane.

Goditja ndaj dizelit është veçanërisht e rëndësishme për Europën, pasi blloku mbështetet gjerësisht tek ky karburant për transportin e mallrave, bujqësinë dhe industrinë. Rritja e kostove të karburantit mund të përhapet në të gjithë zinxhirët e furnizimit dhe të çojë në rritje të mëtejshme të çmimeve të mallrave.

Investimet në energjinë e pastër sjellin kursime

Autorët e raportit të CREA-s theksojnë se zgjerimi i kapaciteteve të energjisë së pastër po shndërrohet gjithnjë e më shumë në një element të sigurisë energjetike të Europës.

Sipas raportit, kapacitetet e energjisë së pastër të instaluara në BE që nga viti 2020 u kanë kursyer vendeve importuese rreth 36 miliardë euro në blerjet e lëndëve djegëse fosile gjatë pesë muajve të parë të krizës.

“Mënyra më e mirë për t’u mbrojtur nga çmimet e larta të naftës është të heqim dorë prej saj sa më shpejt të jetë e mundur”, deklaroi Luke Wickenden, analist energjetik në CREA.

Sipas tij, çmimet e naftës dhe gazit kanë qenë prej kohësh një pikë e dobët si për financat familjare ashtu edhe për ekonominë globale, ndërsa vendet që investuan në energjinë e pastër pas krizave të mëparshme energjetike kanë kursyer miliarda dollarë.

Raporti argumenton se energjia e rinovueshme dhe elektrifikimi nuk lidhen më vetëm me uljen e emetimeve, por përbëjnë edhe një mbrojtje ndaj goditjeve energjetike të shkaktuara nga tensionet gjeopolitike.

“Energjia e rinovueshme i kurseu Spanjës miliarda euro, por transporti, aviacioni dhe industria e varur nga nafta vazhduan t’i kushtonin çdo personi mesatarisht 181 euro shtesë për importet e lëndëve djegëse fosile”, deklaroi Isaac Levi nga CREA.

Sipas tij, përvoja e Spanjës tregon se energjia elektrike e pastër duhet të shoqërohet tashmë me një elektrifikim më të shpejtë të të gjithë ekonomisë.

Mbi 100 organizata kërkojnë fundin e lëndëve djegëse fosile

Ndërkohë, më shumë se 100 organizata europiane dhe ndërkombëtare i kanë dërguar një letër presidentes së Komisionit Europian, Ursula von der Leyen, duke i kërkuar të paraqesë një plan për daljen graduale nga përdorimi i lëndëve djegëse fosile.

Organizatat kërkojnë që von der Leyen të paraqesë një vizion strategjik për pjesën e mbetur të mandatit të saj dhe të shpallë nisjen e një plani për largimin nga lëndët djegëse fosile gjatë fjalimit të saj për Gjendjen e Bashkimit Europian, të planifikuar për 16 shtator.

“Ju bëjmë thirrje ta përdorni fjalimin tuaj të ardhshëm për të shpallur nisjen e një raporti gjithëpërfshirës, të bazuar në shkencë dhe të pavarur, me një objektiv të qartë: që kjo krizë e lëndëve djegëse fosile të jetë e fundit për Europën”, thuhet në letër.

Nënshkruesit, të udhëhequr nga organizata mjedisore Climate Action Network Europe, argumentojnë se Europa po paguan dyfish për varësinë e saj nga lëndët djegëse fosile: fillimisht përmes faturave më të larta të energjisë dhe më pas përmes dëmeve në rritje të shkaktuara nga ndryshimet klimatike.

Ata kërkojnë hartimin e një raporti të pavarur, të ngjashëm me raportin Draghi, i cili të përcaktojë mënyrën se si BE-ja mund të përshpejtojë heqjen dorë të plotë nga lëndët djegëse fosile, duke mbrojtur njëkohësisht konsumatorët, punëtorët dhe industrinë.

Strategjia e propozuar vendos në qendër energjinë e rinovueshme, eficiencën energjetike, rrjetet elektrike dhe fleksibilitetin e energjisë së pastër, ndërsa kërkon që fondet europiane dhe kombëtare të zhvendosen nga investimet që zgjasin varësinë nga lëndët djegëse fosile drejt teknologjive të pastra.

Kryeministri britanik Andy Burnham po planifikon një vizitë në Nju Jork në shtator, ku pritet t’i kërkojë presidentit amerikan Donald Trump më shumë mbështetje për Ukrainën.

Udhëheqësit botërorë do të mblidhen muajin e ardhshëm në Nju Jork për Asamblenë e Përgjithshme të Kombeve të Bashkuara, ndërsa ndihma ushtarake për Kievin pritet të jetë një nga çështjet kryesore në axhendë.

Në një intervistë për Bloomberg këtë javë, Burnham deklaroi se po priste me padurim udhëtimin drejt Nju Jorkut në shtator.

“Ende nuk i kam konfirmuar plotësisht detajet, por ka shumë gjasa që të shkoj, veçanërisht pas diskutimeve të sotme”, tha ai, duke iu referuar bisedimeve me presidentin ukrainas Volodymyr Zelenskyy. “Pas ditës së sotme, e kam shumë të qartë se çfarë duhet të bëj gjatë javëve të ardhshme.”

Nëse konfirmohet, kjo do të jetë vizita e parë zyrtare e Burnham në SHBA që kur mori detyrën e kryeministrit në korrik.

Komentet e tij vijnë ndërsa Zelenskyy vazhdon të kërkojë më shumë raketa interceptuese, veçanërisht sistemet amerikane Patriot, për t’u mbrojtur nga sulmet në rritje të Rusisë me raketa balistike.

Burnham deklaroi për Bloomberg se problemi i rezervave në pakësim të raketave interceptuese të Ukrainës ishte “i zgjidhshëm”, por shtoi se çdo marrëveshje do të kërkonte “shumë nivele dhe shumë negociata”.

Kryeministri britanik ndodhej të hënën në Kiev, ku udhëheqësit perëndimorë morën pjesë në aktivitetet për shënimin e Ditës së Pavarësisë së Ukrainës.

Në një fjalim nga kryeqyteti ukrainas, ai ritheksoi mbështetjen e Britanisë për Ukrainën, pavarësisht asaj që i cilësoi si “kërcënime të papranueshme” të Rusisë ndaj Mbretërisë së Bashkuar.

“Jemi me ju në këtë luftë me gjithë zemër dhe shpirt. Dhe, si kryeministër, më lejoni të them se jam me ju edhe personalisht”, tha Burnham.

Britania e Madhe njoftoi gjithashtu këtë javë se do t’i ofrojë Ukrainës teknologjinë për të prodhuar vetë raketat e lundrimit Storm Shadow, duke rritur më tej mbështetjen ushtarake ndaj vendit.

Ministri britanik për Gatishmërinë dhe Industrinë e Mbrojtjes, Luke Pollard, deklaroi se kjo lëvizje do të krijonte “një efekt më të madh parandalues ndaj agresionit rus”.

Megjithatë, kërkesa kryesore e Zelenskyyt mbeten raketat amerikane Patriot. Sistemi Patriot konsiderohet një nga sistemet më të avancuara të mbrojtjes ajrore në botë dhe mund të përdoret kundër një sërë objektivash, përfshirë raketat balistike dhe të lundrimit, avionët dhe municionet endacake.

Në korrik, Trump dukej se kishte rënë dakord t’i jepte Kievit licencë për prodhimin vendas të raketave për këtë sistem, por më vonë u tërhoq, duke deklaruar se duhet të tregohet “shumë kujdes kur i lejon dikujt t’i prodhojë ato”.

Në një postim në X të dielën, Zelenskyy deklaroi se dëshironte të siguronte 300 raketa për sistemet Patriot si pjesë e një pakete për dimrin.

“Do të doja shumë të besoja se mund të gjejmë një mënyrë për të pasur akses në një përqindje të vogël të rezervave amerikane, le të themi 5% ose 10%. Dhe ne jemi të gatshëm të paguajmë për këto furnizime”, shkroi ai.