Britania e Madhe do të vazhdojë të mbështesë Ukrainën “100%” në luftën kundër Rusisë dhe do të qëndrojë në krah të Kievit “në orën e tij të nevojës”. Kështu deklaroi kryeministri britanik Andy Burnham, pas paralajmërimeve të Moskës ndaj Londrës për furnizimin e Ukrainës me dronë.
Rusia akuzon Britaninë se po thellon përfshirjen e saj në konflikt, pas raportimeve të gazetës “The Times” se dronë të prodhuar në Britani janë përdorur për herë të parë në sulme me rreze të gjatë brenda territorit rus.
Burnham tha se mbështetja britanike është në përputhje me qëndrimin e Londrës ndaj luftës, të cilën e cilësoi si të paligjshme dhe të udhëhequr nga presidenti rus Vladimir Putin.
Ukraina ka përdorur dronë me rreze të gjatë për të goditur rafineri nafte dhe objekte logjistike në territorin rus. Ndërkohë, Ministria britanike e Mbrojtjes nuk ka konfirmuar nëse dronët e përdorur në këto sulme janë prodhim britanik.
Gjatë një prononcimi për mediat në West Midlands, Burnham foli edhe për kontaktin e tij me një person që u paraqit si shefja e stafit të Shtëpisë së Bardhë, Susie Wiles. Kryeministri tha se komunikimi ishte “minimal” dhe “pa ndonjë pasojë”, ndërsa shtoi se e raportoi menjëherë rastin, pasi kuptoi se bëhej fjalë për një situatë që duhej referuar tek autoritetet./mxh
Një dasmë luksoze në Malibu mblodhi disa prej emrave më të njohur të Hollywood-it dhe modës, por mes të ftuarve vëmendjen e mori edhe një moment i veçantë stilistik. Hailey Bieber u shfaq në ceremoni me një fustan vintage nga Versace, i cili vite më parë ishte prezantuar në pasarelë nga supermodelja Naomi Campbell.
Dasma ishte ajo e modeles Jordyn Woods dhe basketbollistit Karl-Anthony Towns, të cilët kurorëzuan dashurinë e tyre në Malibu. Në mesin e të ftuarve ishin Hailey dhe Justin Bieber, Kylie Jenner, Timothée Chalamet, Teyana Taylor, Michael B. Jordan, Jada Pinkett Smith dhe Ben Stiller.
Për këtë mbrëmje, Hailey zgjodhi një fustan të gjatë të zi nga koleksioni pranverë/verë 2023 i Versace. Ndryshe nga versioni i parë i prezantuar në pasarelë, Hailey vendosi të mos përdorte dorezat e gjata dhe me shkëlqim që shoqëronin fustanin.
Dhe arsyeja pse look-u të duket kaq familjar është Naomi Campbell. Supermodelja e kishte veshur të njëjtin krijim në pasarelën e Versace, të kompletuar me doreza që arrinin mbi bërryla, duke krijuar një prej atyre pamjeve që mbeten gjatë në memorien e modës.
Hailey, nga ana tjetër, e mbajti stilimin më minimalist. Ajo e kombinoi fustanin me sandale të zeza me taka të larta dhe rripa, ndërsa në dorë mbante një çantë elegante mbrëmjeje. Një version më modern dhe i thjeshtë i të njëjtit look, por që ruajti elegancën klasike të krijimit të Versace.
Në këtë mënyrë, një fustan i vetëm bashkoi dy prej figurave më të njohura të modës të brezave të ndryshëm: Naomi Campbell në pasarelë dhe Hailey Bieber në një nga dasmat më glamuroze të sezonit./mxh
Salma Hayek është zyrtarisht gjyshe! Aktorja 59-vjeçare është bërë gjyshe pasi djali i bashkëshortit të saj, François Pinault Jr., mirëpriti fëmijën e tij të parë me bashkëshorten, Lara Cosima Henckel von Donnersmarck.
Hayek ka një vajzë, Valentina, 18 vjeçe, me bashkëshortin François-Henri Pinault, 64 vjeç, ndërsa është edhe njerkë e tre fëmijëve të tij të tjerë: Mathilde, 25 vjeçe, François, 38 vjeç, dhe Augustin, 19 vjeç.
Të dielën, më 16 gusht, aktorja publikoi në Instagram një video të ëmbël ku shihet duke mbajtur në krahë nipin e saj dhe duke i folur në spanjisht. Në përshkrimin e videos, ajo zbuloi se vogëlushi ka marrë emrin François, por ajo ka vendosur ta thërrasë “Panchito”.
“Jemi të bekuar që mirëpresim brezin e katërt të François-ve që jetojnë. Edhe pse unë do ta quaj Panchito. Duket se atij i pëlqen dhe nuk mund ta dua më shumë”, shkroi Hayek.
Një javë më parë, edhe nëna e foshnjës, Lara Cosima Henckel von Donnersmarck, publikoi disa fotografi me djalin e saj, mes të cilave edhe një tjetër moment të ëmbël të Salma Hayek me nipin.
“Bashkëshorti im, François-i më i lezetshëm në botë, dhe djali ynë, François-i më i ëmbël në botë… muaji ynë i parë si prindër”, shkroi ajo krahas fotografive.
Hayek mori rolin e njerkës kur u martua me François-Henri Pinault në vitin 2009. Aktorja, e cila kishte sjellë në jetë vajzën Valentina në të njëjtin vit, u përfshi menjëherë në jetën e tre fëmijëve të bashkëshortit të saj.
“Gjithmonë kam dashur të kem shumë fëmijë dhe nuk munda. Trupi im, si për mrekulli, më dha një”, tregoi ajo në vitin 2017. “Bekimi i madh që kam pasur është se bashkëshorti im ka edhe tre fëmijë të tjerë. Kështu që unë kam katër. Dhe të gjithë janë shumë të ndryshëm.”
Në një intervistë të mëparshme, Hayek foli edhe për mënyrën se si e ka balancuar mëmësinë me karrierën. Ajo tregoi se bashkëshorti e kishte inkurajuar të vazhdonte punën pas lindjes së Valentina-s, një vendim për të cilin ajo shprehej mirënjohëse.
“Është e rëndësishme që fëmijët tuaj të kuptojnë se ata janë gjëja më e rëndësishme, por jo gjithçka ka të bëjë vetëm me ta. Ju u jepni një shembull duke treguar se jeni gjithashtu njeri dhe se duhet të vazhdoni të rriteni në fushën ku punoni”, tha aktorja./mxh
Mund të flesh mjaftueshëm, të ushqehesh mirë dhe të bësh, pak a shumë, gjithçka siç duhet, por përsëri ta kalosh ditën sikur nuk ke energji. Kur nuk duket se ka ndonjë problem të dukshëm, shumica prej nesh ndalojnë së kërkuari arsyen.
E quajmë stres. E quajmë lodhje. E quajmë moshë. Por trupi ynë është krijuar të marrë rregullisht dritë natyrale dhe, me kalimin e kohës, mënyra moderne e jetesës ka bërë që shumë prej nesh të kalojnë pjesën më të madhe të ditës brenda.
Drita e diellit ndihmon trupin të prodhojë vitaminën D dhe ndikon në qarkullimin e gjakut dhe humorin. Ekspozimi ndaj dritës natyrale është lidhur gjithashtu me një humor më të mirë dhe një rrezik më të ulët për probleme të caktuara të shëndetit mendor.
Pra, edhe nëse po bën gjithçka siç duhet, mund të jesh duke marrë shumë pak dritë natyrale. Këto janë disa nga shenjat që mund të vëresh.
1. Lodhje që nuk largohet as pas gjumit
Fle tetë orë dhe zgjohesh sikur ke fjetur vetëm katër. Shkon më herët në shtrat, përpiqesh të konsumosh më pak kafeinë, pastaj më shumë kafeinë, madje përpiqesh të pushosh më shumë gjatë fundjavës. Disa prej këtyre gjërave mund të ndihmojnë pak, por lodhja vazhdon.
2. E ndien ndryshimin e stinës përpara se ta shohësh
Drita ndryshon në shtator dhe diçka brenda teje ndryshon bashkë me të, disa javë përpara se pemët të fillojnë të tregojnë ndonjë ndryshim. Nuk po e imagjinon dhe nuk po e ekzagjeron. Trupi yt po reagon ndaj dritës. Gjithmonë e ka bërë.
3. Gjërat e vogla të lodhin më shumë seç duhet
Nuk bëhet fjalë për gjëra të mëdha. T’i përgjigjesh një mesazhi. Të zgjedhësh çfarë do të hash. Të marrësh një vendim të vogël. Secila prej tyre të kushton më shumë energji nga sa të kushtonte më parë dhe në mbrëmje ndihesh sikur e ke shpenzuar gjithë energjinë për asgjë të veçantë.
4. Të tërheqin dritaret
Zgjedh vendin pranë dritares. Qëndron pak më gjatë në hyrje vetëm për të marrë edhe pak dritë. E zhvendos tavolinën e punës dhe nuk arrin ta shpjegosh pse, por papritur ndihesh më mirë. Trupi yt e di se çfarë kërkon, edhe kur ti nuk e ke pyetur kurrë.
5. Humori yt ndjek motin më shumë sesa jetën tënde
Një lajm i mirë të duket i vakët në një ditë gri. Një pasdite me diell të ngre humorin më shumë nga sa do të duhej. Asgjë nuk ka ndryshuar në rrethanat e tua. Ka ndryshuar vetëm drita.
6. Ditët e tua më të mira kanë diell brenda tyre
Mendo për muajin e fundit. Kujto ditët që do t’i përshkruaje si të mira dhe shiko si ka qenë moti gjatë tyre. Mund të ketë një model që përsëritet dhe shumica e njerëzve as nuk kanë menduar ndonjëherë ta kërkojnë.
7. Ke ndaluar së prituri që të ndihesh më mirë
Kjo është shenja më e heshtur dhe ndoshta më e rëndësishmja. Diku gjatë rrugës, mund të kesh ndaluar së menduari për lodhjen si një problem që mund të zgjidhet dhe ke filluar ta konsiderosh si pjesë të personalitetit tënd.
Mungesa e dritës së diellit nuk shfaqet gjithmonë në mënyrë të dukshme. Ajo mund të bëhet gjendja në të cilën jeton. Përshtatesh, gjen mënyra për ta kompensuar dhe ndërton një jetë të tërë mbi një nivel energjie që nuk e ke zgjedhur kurrë.
Çfarë mund të bësh?
“Thjesht dil jashtë” është këshilla që e dëgjojmë gjithmonë dhe nuk është domosdoshmërisht e gabuar.
Kalimi i kohës në ambiente të jashtme dhe ekspozimi ndaj dritës natyrale gjatë ditës mund të jetë një mënyrë e thjeshtë për t’i dhënë trupit më shumë dritë.
Sigurisht, kjo nuk do të thotë se çdo lodhje shkaktohet nga mungesa e diellit. Lodhja e vazhdueshme mund të ketë shumë shkaqe të tjera dhe, nëse vazhdon, është mirë të flisni me një mjek.
Por ndonjëherë, para se ta quajmë veten dembelë, të stresuar ose thjesht “njeri pa energji”, mund t’ia vlejë të pyesim veten: sa kohë po kalojmë realisht në dritë natyrale?/mxh
Ish-kampioni botëror i boksit, Wladimir Klitschko, ka reaguar me një mesazh prekës pas vdekjes së ish-partneres së tij, aktorja Hayden Panettiere, në moshën 36-vjeçare. Panettiere u nda nga jeta më 16 gusht në Karolinën e Jugut.
“Familja jonë po kalon një periudhë tronditjeje dhe dhimbjeje të thellë”, shkroi Klitschko në një deklaratë të publikuar në rrjetet sociale.
Ai tha se lajmi për vdekjen tragjike të Panettiere-s e ka prekur thellë dhe se ajo “u largua nga kjo botë shumë shpejt”. Edhe pse ata nuk ishin më partnerë, Klitschko e cilësoi aktoren si një person të rëndësishëm në jetën e tij dhe mbi të gjitha si nënën e vajzës së tyre, Kaya.
Klitschko vlerësoi talentin e saj dhe karrierën që ajo ndërtoi, duke theksuar se Panettiere u përball edhe me anët më të errëta të një industrie shumë kërkuese. Ai nënvizoi se asgjë nuk mund t’i fshijë kujtimet e viteve që ndanë së bashku apo vendin që ajo zinte në jetën e tyre.
Duke iu drejtuar vajzës së tyre, Kaya, 11 vjeçe, Klitschko premtoi se do të flasë gjithmonë me respekt për të ëmën dhe do të kujdeset që ajo të kujtojë personin që ishte Panettiere.
“U shpreh ngushëllimet e mia më të thella prindërve të Hayden, miqve të saj dhe fansave, të cilët po përjetojnë gjithashtu dhimbje të madhe”, shkroi ai, duke shtuar se njerëz kaq të rinj dhe të talentuar nuk duhet të largohen kaq shpejt nga kjo botë.
Në fund, ish-boksieri kërkoi respekt për ndjenjat dhe privatësinë e familjes gjatë kësaj periudhe të vështirë, ndërsa falënderoi të gjithë ata që kanë shprehur ngushëllimet dhe mbështetjen e tyre.
“Pusho e qetë, Hayden. U prehsh në paqen e përjetshme”, përfundoi Klitschko./mxh
Këngëtarja kolumbiane Shakira premtoi ndihmë financiare të hënën për të rindërtuar shkollat në vend pas një tërmeti shkatërrues që goditi më 10 gusht.
Shakira vizitoi departamentin e Choco-s, i cili është goditur nga tërmeti, në bregdetin e Paqësorit të Kolumbisë, me filantropin amerikan Howard Buffett, një javë pasi një tërmet i fuqishëm me magnitudë 7.4 shkaktoi vdekjen e gati 300 njerëzve.
Këngëtarja e njohur e muzikës pop tha se fondacioni i saj, Pies Descalzos, prej më shumë se 20 vitesh është aktiv në këtë provincë të varfër të Kolumbisë veriperëndimore, duke mbështetur ndërtimin e shkollave dhe programeve arsimore për fëmijët dhe të rinjtë.
Më shumë se 2.800 shkolla në të gjithë Kolumbinë janë dëmtuar nga tërmeti, shumë prej tyre në Çoko, ku jetojnë kryesisht komunitete indigjene dhe afro-kolumbiane.
“Ajo që më shqetëson më shumë është se, sapo të hiqet gjendja e jashtëzakonshme, të gjitha këto shkolla mund të mos rindërtohen, se kaq shumë njerëz do të harrohen dhe se fëmijët tanë nuk do të mund të kthehen në shkollë”, theksoi Shakira duke folur për gazetarët nga Kimbdo, kryeqyteti i provincës.
Këngëtarja kolumbiane bëri të ditur se tashmë janë mbledhur 1 milion dollarë për rindërtimin. Fondet pritet të përdoren kryesisht për riparimin e godinave shkollore, rindërtimin e një institucioni të arsimit teknik dhe ndërtimin e 10 shkollave të reja.
Më herët ajo kishte postuar në rrjetin social X, ku dha mbështjetjen e saj pas lajmit të tërmetit shkatërrimtar në Kolumbi disa ditë më parë.
“Kolumbi e dashur, zemra ime është me të gjithë ata që sot ndienë këtë tërmet dhe me familjet që po kalojnë momente ankthi. Në momente të tilla, ne kolumbianët dimë të bashkohemi dhe të mbështesim njëri-tjetrin. Gjithë forcën dhe dashurinë time për vendin tim. Le të përqafohemi fort dhe të jemi të vëmendshëm ndaj udhëzimeve, në mënyrë që të mund të ndihmojmë sa më shpejt të jetë e mundur.”
Përmes fondacionit të saj Pies Descalzos, të themeluar në vitin 1997, Shakira është angazhuar prej dekadash në mbështetjen e arsimit publik në Kolumbi, veçanërisht për fëmijët dhe komunitetet në nevojë. Fondacioni ka ndërtuar dhe përmirësuar shkolla në disa zona të vendit, ndërsa ka zhvilluar edhe programe që synojnë të rrisin aksesin dhe vazhdimësinë e fëmijëve në arsim./mxh
Detaje të reja janë bërë publike lidhur me vdekjen e papritur të Hayden Panettiere, e cila ndërroi jetë në moshën 36-vjeçare, të dielën, më 16 gusht. Sipas hetimeve paraprake të policisë, deri tani nuk ka prova që vdekja e saj të ketë ardhur si pasojë e një akti kriminal.
Siç raporton People, rreth orës 13:50 të së dielës, më 16 gusht, policia e Greenville, në Karolinën e Jugut, dhe ekipet e emergjencës morën një telefonatë për një “grua pa ndjenja”, bëri të ditur një zëdhënës i Departamentit të Policisë së Greenville.
“Pas mbërritjes në vendngjarje, iu dha ndihma mjekësore. Megjithatë, personi, i cili më vonë u identifikua si Hayden Panettiere, u konstatua i vdekur në vendngjarje. Rasti po hetohet nga Departamenti i Policisë së Greenville, në bashkëpunim me Zyrën e Mjekësisë Ligjore të Qarkut Greenville. Hetimi paraprak nuk ka zbuluar prova për ndonjë akt kriminal apo rrethana të dyshimta. Telefonata në numrin 911 u bë nga një person i afërt me Panettiere”, deklaroi zëdhënësi.
Ai theksoi gjithashtu se autoritetet nuk do të bëjnë publike detaje të tjera rreth rastit.
Vdekja e Hayden Panettiere u bë e ditur përmes një deklarate të babait të saj Alan Panettiere.
“Me pikëllim të thellë njoftojmë vdekjen tragjike të Hayden tonë të dashur. Ajo ishte një dritë e jashtëzakonshme dhe një forcë e natyrës, që u dha dashuri dhe gëzim të pafund të gjithë atyre që e njihnin, si dhe miliona njerëzve që e ndiqnin në ekran”, thuhej në deklaratë.
Vetëm pak muaj para vdekjes së saj, Hayden Panettiere fliste me optimizëm për të ardhmen.
Ylli i serialeve “Heroes”, “Nashville” dhe filmave “Scream” shprehej me krenari se kishte arritur të kapërcente periudhat e vështira që kishte kaluar.
“Më në fund ndjej se kam arritur ta lë pas gjithë atë errësirë dhe negativitet. Ndjej se një kapitull ka përfunduar dhe një i ri po fillon. Shoh përpara meje shumë mundësi emocionuese. Ndjej se kam ende shumë për të jetuar”, ishte shprehur ajo në podcastin “On Purpose With Jay Shetty./mxh
Rreth 100 migrantë janë shpëtuar pasi gomonia e tyre pësoi defekt në La Mansh.
Mjeti lundrues pësoi një defekt në motor pak pasi ishte nisur nga bregdeti francez dje në mëngjes.
“Në total, 96 persona u shpëtuan dhe u dërguan në portin francez të Boulogne-sur-Mer”, thanë autoritetet franceze.
“Kur gomonia u nis nga plazhi i Le Touquet, rreth 30 persona mbetën në ujë, mes tyre disa që ndodheshin në vështirësi serioze për shkak të rrymave detare”, thanë ekipet e shpëtimit.
Katër persona u nxorën nga uji me helikopter, ndërsa gjashtë të tjerë u shpëtuan nga një mjet shpëtimi detar.
Ndërkohë, migrantë nga një tjetër varkë u fotografuan nga “Association Press” duke mbërritur dje në mbrëmje në kompleksin e Komandës së Sigurisë Kufitare në Dover, Kent.
Në fillim të këtij muaji, një rekord prej 230 personash e kreu udhëtimin me një varkë të vetme.
Bandat e trafikimit duket se kanë nisur të ngarkojnë më shumë persona në një varkë të vetme gjatë javëve të fundit.
Kryeministri Andy Burnham ka premtuar se do të “ndryshojë taktikat” për të luftuar aktivitetin e këtyre bandave./mxh
Presidenti amerikan Donald Trump po përballet me një rënie të ndjeshme të mbështetjes nga amerikanët. Sipas një sondazhi të Reuters/Ipsos, vetëm 33% e të pyeturve miratojnë mënyrën se si ai po drejton Shtëpinë e Bardhë, ndërsa 64% shprehen kundër.
Ky është niveli më i ulët i miratimit për Trump gjatë mandatit të tij aktual. Në sondazhin e mëparshëm, shifra ishte 35%.
Shumica beson se lufta me Iranin do të zgjasë
Lufta mes SHBA-së dhe Iranit duket se po ndikon në mënyrë të drejtpërdrejtë te opinioni publik amerikan. Rreth 80% e amerikanëve mendojnë se përfshirja e SHBA-së në konflikt do të zgjasë për një periudhë të gjatë. Këtë mendim e ndajnë 87% e demokratëve dhe 71% e republikanëve.
Vetëm 16% besojnë se konflikti mund të përfundojë brenda pak javësh.
Trump kishte premtuar gjatë fushatës se do të shmangte luftërat e gjata dhe do të mbante nën kontroll inflacionin. Në fillim të konfliktit, ai tha se lufta me Iranin mund të zgjaste vetëm disa javë.
Por situata ka rezultuar më e vështirë. Irani ka vazhduar rezistencën, ndërsa tensionet kanë ndikuar edhe në transportin e naftës përmes ngushticës së Hormuzit. Vetëm një në pesë amerikanë e konsideron luftën të vlefshme.
Sondazhi tregon gjithashtu se vetëm rreth një në pesë amerikanë beson se lufta me Iranin ia ka vlejtur. Në mesin e republikanëve, këtë mendim e ndan rreth gjysma. Trump ka mbrojtur ndërhyrjen amerikane, duke argumentuar se ajo është e nevojshme për të penguar Iranin të zotërojë armë bërthamore.
Ndërkohë, rritja e çmimit të karburanteve po shton shqetësimet e amerikanëve. Çmimet e benzinës janë kthyer në një problem politik për republikanët, të cilët përpiqen të mbajnë shumicën e ngushtë në Dhomën e Përfaqësuesve në zgjedhjet e 3 nëntorit.
Demokratët fitojnë terren për ekonominë
Sondazhi tregon se demokratët po fitojnë avantazh edhe në çështjet ekonomike.
Rreth 38% e votuesve thonë se demokratët do ta menaxhonin më mirë ekonominë, ndërsa 35% preferojnë republikanët. Kjo është hera e parë pas rreth një dekade që demokratët kryesojnë republikanët në këtë çështje, sipas sondazheve të Reuters/Ipsos.
Në politikën e emigracionit, republikanët vazhdojnë të kenë një avantazh të vogël. Rreth 40% e votuesve preferojnë qasjen e republikanëve, kundrejt 38% që mbështesin demokratët. Në janar 2025, diferenca ishte shumë më e madhe, me republikanët 26 pikë përpara.
Sondazhi i Reuters/Ipsos u zhvillua online dhe përfshiu 1,166 të rritur në të gjithë SHBA-në. Marzhi i gabimit është rreth 3 pikë përqindjeje./mxh
“Sado të përparojmë teknologjikisht, ju lutem, mos e braktisni librin. Nuk ka asgjë në botën tonë materiale më të bukur se libri”. Ky është mesazhi i artistes dhe shkrimtares amerikane Patti Smith, e cila prej vitesh ka shprehur publikisht dashurinë e saj të veçantë për letërsinë dhe fjalën e shkruar.
E njohur për një karrierë të jashtëzakonshme në muzikë, Smith është njëkohësisht një lexuese dhe shkrimtare e apasionuar. Në kujtimet e saj “Just Kids”, ajo rrëfen magjepsjen e hershme me librat dhe ndikimin që leximi pati në formimin e saj artistik.
Në rrugëtimin e saj letrar, Smith ka veçuar autorë si Jack Kerouac, Joseph Conrad dhe Arthur Rimbaud, ndërsa një vend të veçantë zë poetja amerikane Sylvia Plath. Smith ka treguar se “Ariel”, vëllimi i famshëm i Plath, u bë për të “libri i jetës” dhe një pikë referimi e rëndësishme në formimin e saj letrar.
Për Patti Smith, libri nuk është thjesht një objekt kulturor, por një portë drejt botëve të reja, kujtesës dhe imagjinatës. Në një kohë kur teknologjia po ndryshon mënyrën se si njerëzit lexojnë dhe konsumojnë informacionin, mesazhi i saj mbetet një mbrojtje e fuqishme e librit të printuar dhe e marrëdhënies së veçantë që krijohet mes lexuesit dhe faqes së shkruar./mxh
Demi Moore ka vendosur të ndajë me publikun disa nga momentet më të veçanta të dasmës së vajzës së saj, Tallulah Willis, në një postim të mbushur me emocione dhe kujtime familjare.
Tallulah, vajza më e vogël e Demi Moore dhe Bruce Willis, kurorëzoi dashurinë me muzikantin Justin Ashe më 8 gusht, gjatë një ceremonie private në Sun Valley, Idaho. Çifti, i cili ka qenë në një lidhje prej rreth tre vitesh, zgjodhi një festë intime, larg vëmendjes së madhe mediatike.
Një javë pas ceremonisë, Moore publikoi në Instagram disa fotografi nga dita e madhe. Në imazhet e publikuara, aktorja shihet pranë vajzës së saj në momente intime para ceremonisë, ndërsa disa prej fotove sjellin edhe atmosferën e festës pas martesës.
Krahas albumit fotografik, Demi i kushtoi Tallulah-s edhe disa fjalë të ndjera, duke treguar se ta shihte vajzën e saj të bëhej nuse ishte një prej atyre momenteve që do ta ruajë përgjithmonë në kujtesë.
“Ka momente në jetë që duken pothuajse shumë të mira për të qenë të vërteta dhe të shikoja Tallulah-n time të bëhej nuse, e rrethuar nga kaq shumë dashuri, ishte një prej tyre”, shkroi ajo.
Aktorja tregoi se dita e martesës e la me një ndjenjë të fortë mirënjohjeje dhe dashurie, ndërsa i uroi çiftit një jetë të mbushur me aventura, të qeshura dhe një dashuri që do të forcohet me kalimin e viteve.
Fustani i nusërisë kërkoi 712 orë punë
Emocionet për martesën kishin nisur shumë përpara ceremonisë. Pak ditë para dasmës, Demi Moore kishte ndarë me ndjekësit edhe pamje nga provat e fustanit të vajzës së saj.
Sipas aktores, krijimi i fustanit të nusërisë kërkoi plot 712 orë punë, duke e bërë veshjen një prej detajeve më të veçanta të ditës.
Moore falënderoi publikisht stilistin Pierpaolo Piccioli për krijimin e fustanit, duke treguar se ai kishte arritur të realizonte ëndrrën e Tallulah-s për pamjen e saj në ditën e martesës.
Me fotografitë e publikuara, Demi Moore ka ndarë me fansat një pjesë të rrallë të një dite tepër personale për familjen, duke treguar jo vetëm elegancën e ceremonisë, por mbi të gjitha emocionet e një nëne që sheh vajzën e saj të nisë një kapitull të ri të jetës./mxh
Ministria e Mbrojtjes ka ndarë një përditësim mbi situatën e zjarreve në vend.
Sot janë regjistruar 9 vatra zjarri, nga të cilat 6 mbeten aktive, 1 është nën kontroll dhe 2 janë në monitorim.
Forcat operacionale vijojnë punën në terren, ndërsa Forcat e Armatosura mbështesin operacionet me 140 efektivë, 3 helikopterë dhe 2 avionë Air Tractor.
Situata me zjarret, sipas vatrave kryesore:
Dajt, Tiranë – Nuk ka rrezik për zonat e banuara. Priska është nën kontroll dhe në monitorim, ndërsa Vakumone është e izoluar.
Gurë-Lurë, Dibër – Korridoret e hapura kanë bërë të mundur izolimin e zjarrit. Sot vijon puna për shuarjen me forcat operacionale. Nuk ka rrezik për banesat.
Qafë Helmës – Zjarri është fikur nga krahu i Bulqizës dhe mbetet aktiv drejt Selishtës; në terren janë 11 zjarrfikës, 11 forca bashkiake dhe 5 vullnetarë.
Bruç, Mat – Vijon operacioni në terren të vështirë, i mbështetur nga 30 efektivë të FA. Nuk ka rrezik për zonat e banuara.
Lufaj, Mirditë – Vatra mbetet aktive, por me intensitet të ulët dhe avancim të lehtë. Forcat janë pozicionuar pranë zonave të banuara për gatishmëri të menjëhershme.
Tërbun, Pukë – Vijon operacioni me 3 automjete zjarrfikëse. Nuk ka rrezik për zonat e banuara.
Në përgjithësi, situata paraqitet në menaxhim të vazhdueshëm, me disa vatra të izoluara ose nën kontroll dhe me përqendrim të forcave tokësore e ajrore në Dajt, Lurë, Mat dhe Tërbun./Mxh
Ndërsa rutina të ndryshme të mirëqenies dhe zgjimit herët janë kthyer në një trend në rrjetet sociale, Dakota Johnson duket se ka zgjedhur një filozofi krejt tjetër: të flejë sa më shumë.
Aktorja ka treguar se gjumi është një nga prioritetet më të rëndësishme në jetën e saj dhe se trupi i saj nuk funksionon mirë kur nuk fle mjaftueshëm.
“Gjumi është prioriteti im numër një në jetë. Nuk funksionoj dot nëse fle më pak se dhjetë orë. Mund të fle lehtësisht edhe 14 orë”, është shprehur ajo.
Deklarata e saj ka tërhequr vëmendjen, sidomos në një kohë kur shumë njerëz përpiqen të ndjekin rutina intensive të mëngjesit, të zgjohen herët dhe të jenë produktivë që në orët e para të ditës.
Për Johnson, megjithatë, duket se formula është më e thjeshtë: një gjumë i gjatë dhe cilësor është çelësi për t’u ndier mirë dhe për të pasur energji gjatë ditës.
Në fund të fundit, ndoshta jo çdo ditë duhet të nisë me alarmin në orën 5 të mëngjesit… ndonjëherë trupi thjesht kërkon edhe disa orë të tjera gjumë./mxh
Përdorimi i tepërt i ekraneve në shkolla po nxit një rishikim të politikave arsimore në disa vende europiane, ku librat e printuar, leximi dhe shkrimi me dorë po marrin sërish një rol më të rëndësishëm në procesin mësimor.
Suedia është ndër vendet që ka bërë kthesën më të dukshme, duke orientuar politikat arsimore drejt më shumë librave fizikë dhe përdorimit më të kufizuar të ekraneve. Edhe Norvegjia ka investuar në mënyrë të konsiderueshme në tekstet e shtypura, ndërsa Danimarka ka parashikuar fonde të posaçme për blerjen e librave fizikë në shkolla.
Në Finlandë, nga gushti i vitit 2025, janë forcuar kufizimet për përdorimin e telefonave dhe pajisjeve të tjera mobile gjatë orëve të mësimit, ndërsa është vendosur më shumë theks te leximi dhe shkrimi.
Edhe Franca ka ndërmarrë masa për të kufizuar përdorimin e telefonave në shkolla dhe për të reduktuar ekspozimin e nxënësve ndaj pajisjeve digjitale. Ndërkohë, Italia po promovon leximin dhe shkrimin me dorë, duke i konsideruar ato aftësi të rëndësishme në një periudhë të përdorimit gjithnjë e më të madh të teknologjisë në klasë.
Këto zhvillime nuk nënkuptojnë një braktisje të mësimit digjital. Përkundrazi, debati në vendet europiane po përqendrohet gjithnjë e më shumë te gjetja e një ekuilibri mes teknologjisë dhe metodave tradicionale të të nxënit.
Ekspertët dhe politikëbërësit po shqyrtojnë ndikimin e kohës së gjatë para ekranit në përqendrimin, leximin dhe përfshirjen e nxënësve, duke nxitur një rikthim të pjesshëm te mjete të tilla si libri fizik, fletorja dhe stilolapsi.
Kështu, në një arsim që gjatë viteve të fundit është dixhitalizuar me ritme të shpejta, Europa duket se po kërkon një qasje më të balancuar: teknologjia të mbetet pjesë e klasës, por pa zëvendësuar plotësisht mënyrat tradicionale të leximit dhe shkrimit./mxh
Ngushtica e Hormuzit, rrugë detare strategjike në qendër të konfliktit mes Iranit dhe Shteteve të Bashkuara të Amerikës, do të mbetet e mbyllur derisa Uashingtoni të përmbushë angazhimet e parashikuara në memorandumin e mirëkuptimit të nënshkruar në qershor, deklaroi sot kryenegociatori iranian, Mohammad Bagher Ghalibaf.
”Ngushtica e Hormuzit, e bllokuar nga Teherani, nuk do të hapet derisa të zbatohen angazhimet amerikane” të përcaktuara në memorandum”, tha Ghalibaf, i cili është gjithashtu kryetar i Parlamentit iranian, në një fjalim të transmetuar nga televizioni shtetëror.
Sipas tij, kërkesat e Iranit përfshijnë heqjen e bllokadës detare amerikane, zhbllokimin e aseteve iraniane të ngrira, heqjen e embargos ndaj naftës, si dhe ndërprerjen e operacioneve ushtarake në të gjitha frontet./mxh
Chiara Ferragni duket se nuk ka më arsye për ta mbajtur larg syrit të publikut lidhjen e saj të re. Influencuesja italiane ka ndarë një album fotografik me partnerin José Hernandez, duke sjellë për ndjekësit disa prej momenteve më romantike të historisë së tyre.
Në foton kryesore, Ferragni dhe Hernandez shfaqen të përqafuar, teksa shkëmbejnë një puthje. Të tjera imazhe nga albumi tregojnë çiftin në udhëtime dhe pushime, duke dhënë një pasqyrë të vogël të kohës që kanë kaluar së bashku gjatë muajve të fundit.
Mes fotografive është edhe një imazh i realizuar në Kolumbi. Ferragni ka treguar se bëhet fjalë për një nga fotot e para që çifti ka bërë së bashku, në janar, kur lidhja e tyre ishte ende në fillimet e saj.
Albumi përfshin gjithashtu momente nga udhëtime në vende me dëborë dhe pushime verore, duke dokumentuar etapat e ndryshme të romancës së tyre.
Pas historisë së saj të shumëpërfolur me Fedez, Ferragni duket se po e jeton këtë lidhje me një qasje më të hapur. Me publikimin e fotove, ajo ka zgjedhur të ndajë me fansat disa prej kujtimeve më personale me Hernandez, duke e bërë romancën e re gjithnjë e më publike.
Postimi ka marrë vëmendjen e ndjekësve, të cilët kanë mundur të shohin një anë më romantike dhe intime të jetës së influencueses italiane./mxh
Një mbrëmje e mbushur me emocione, duartrokitje dhe surpriza u zhvillua në Anaheim të Kalifornisë, ku 11 figura të njohura u përfshinë zyrtarisht në listën prestigjioze të “Disney Legends”.
Ceremonia u mbajt në kuadër të eventit D23: The Ultimate Disney Fan Event dhe u drejtua nga Ryan Seacrest. Mes personaliteteve që morën këtë vlerësim këtë vit ishin Anne Hathaway, Dwayne “The Rock” Johnson, Bob Iger, Jonas Brothers dhe Lin-Manuel Miranda.
Anne Hathaway: “Jam një nga njerëzit më me fat”
Një nga momentet më emocionuese të ceremonisë ishte ai i Anne Hathaway. Aktorja u nderua nga regjisori David Frankel, me të cilin ka punuar në filmin ikonë The Devil Wears Prada.
Marrëdhënia e Hathaway me Disney-n daton më shumë se 20 vite më parë, kur ajo u bë e njohur për publikun me rolin e Mia Thermopolis në The Princess Diaries.
Gjatë fjalimit të saj, aktorja foli për familjen dhe karrierën, duke e cilësuar veten me fat që mund të bëjë profesionin që dashuron dhe njëkohësisht të ndajë jetën me bashkëshortin dhe fëmijët e saj.
“Sado perfekte të jetë e gjitha kjo, thjesht të qenit vetvetja është ajo që më bën më të lumtur”, u shpreh ajo.
Dwayne Johnson emocionohet në skenë
Edhe Dwayne Johnson përjetoi një moment të veçantë kur u ngjit në skenë për të marrë titullin “Disney Legend”. Çmimin ia dorëzoi Emily Blunt, bashkë-ylli i tij në filmin Jungle Cruise.
Në fjalimin e tij, aktori dhe ish-mundësi profesionist theksoi rëndësinë e mirësisë dhe të marrëdhënies me njerëzit që e kanë mbështetur gjatë rrugëtimit të tij.
“Është mirë të jesh i rëndësishëm, por gjëja më e rëndësishme është të jesh një person i mirë”, tha Johnson.
Jonas Brothers falënderojnë fansat
Në mesin e të nderuarve ishin edhe Kevin, Joe dhe Nick Jonas. Tre vëllezërit, të cilët u bënë të famshëm fillimisht përmes Disney Channel, morën çmimin nga Vanessa Hudgens.
Nick Jonas shfrytëzoi momentin për t’iu drejtuar fansave, duke i falënderuar për mbështetjen ndër vite.
“Faleminderit që u dhatë tre vëllezërve nga New Jersey një jetë përtej imagjinatës”, tha ai.
Një nderim për figurat që kanë formësuar Disney-n
Një tjetër emër i rëndësishëm i mbrëmjes ishte Bob Iger, ish-drejtori ekzekutiv i Walt Disney Company. Ai u nderua nga drejtori aktual i kompanisë, Josh D’Amaro, i cili e përshkroi si një prej drejtuesve më të rëndësishëm të biznesit të kohës së tij.
Gjatë ceremonisë, Iger u vlerësua për ndikimin e tij në zhvillimin e kompanisë, përfshirë marrëveshjet për blerjen e Pixar, Marvel, Lucasfilm dhe 21st Century Fox, si dhe krijimin e Disney+.
Në nder të tij folën edhe personalitete si Robert Downey Jr., Diane Sawyer, Harrison Ford, Ellen Pompeo dhe Al Michaels.
Lista e këtij viti plotësohet nga Chris Berman, Jerry Bruckheimer, Susan Egan, Eric Goldberg, Kim Irwin dhe Alan Tudyk.
Titulli “Disney Legend” konsiderohet një nga vlerësimet më të rëndësishme të kompanisë dhe u jepet individëve që kanë dhënë kontribut të jashtëzakonshëm në historinë, kulturën dhe trashëgiminë e Disney-t./mxh
PS-ja ka propozuar që Shqipëria të ketë 46 bashki, nga 61 që janë sot. PD-ja ka propozuar që të jenë 100 rrumbullak (mesatarisht 1 për çdo 280 kilometra katrorë, në një vend ku rreth 80% e sipërfaqes është kodrinore-malore, fare rrallë e banuar).
Deri në nëntor, kur Presidenti i Republikës të shpallë zgjedhjet bashkiake sipas detyrimit kushtetues, gjasat janë që harta e re e bashkive të jetë miratuar në Kuvendin e Shqipërisë. Mund të mos miratohen 46 bashki (sa ç’i ka parashikuar paraprakisht PS-ja), por as 100 (sa ç’i ka propozuar PD-ja). Sidoqoftë, rëndësi ka që zgjedhjet bashkiake do të zhvillohen sipas hartës së re territoriale.
Dhe pas zgjedhjeve bashkiake, do të fillojë procesi i vështirë i përcaktimit të rajoneve dhe i funksioneve të tyre. Dhe aty duhet të mbahet mirë parasysh kriteri gjeografik dhe ekonomik!
Teksa bashkitë aktuale janë praktikisht ndërmarrje komunale, rajonet mund të luajnë një rol të rëndësishëm zhvëllimor. Me buxhete dhe burime njerzore të mjaftueshme, ato mund të bëhen motorë të zhvillimit ekonomik. Dhe për ndarjen e rajoneve, kriteri kryesor duhet të jetë gjeografik, për vetë relievin e thyer të Shqipërisë, si dhe ai ekonomik.
Kështu, nga Miloti deri në Vermosh, vlen të krijohet Rajoni Veriperëndimor, me qendër Shkodrën.
Nga Rubiku deri në Morinë, vlen të krijohet Rajoni Verilindor, me qendër Kukësin.
Nga Tuneli i Murrizit deri në Kalanë e Dodës, vlen të krijohet Rajoni Lindor, me qendër Peshkopinë.
Nga Rrogozhina deri në Kapshticë, vlen të krijohet Rajoni Juglindor, me qendër Pogradecin.
Në krahun tjetër, nga Rrogozhina deri në Qafë-Botë, vlen të krijohet Rajoni Jugperëndimor, me qendër Vlorën. (Qarku aktual i Beratit mund të bëhet ose rajon më vete, ose t’i bashkëngjitet rajonit Jugperëndimor).
Nga Ballshi deri në Kakavijë, vlen të krijohet Rajoni Jugqendror, me qendër Gjirokastrën.
Rajoni Qendror, më i rëndësishmi, kuptohet që duhet të ketë Tiranën në mes. Dhe ai mund të përfshijë territorin që kufizohet nga Miloti në veri, Rrogozhina në jug, Mali me Gropa në lindje dhe Deti Adriatik në perëndim.
Që vlera gjeografike e rajoneve të mësipërme të përkthehet në zhvillim ekonomik për banorët e tyre, duhet që drejtuesit të zgjidhen drejtpërdrejt nga banorët dhe që rajonet të kenë buxhete relativisht të pavarura nga buxheti qendror.
Sikur ndarja e rajoneve të realizohet deri në zgjedhjet e 2029-ës, mund të kemi njëkohësisht edhe zgjedhje parlamentare, edhe rajonale. Ka gjithmonë një herë të parë…/ad
Instituti Kombëtar i Shëndetësisë Publike të Kosovës (IKSHPK) ka njoftuar se vetëm gjatë javës së fundit në Kosovë janë regjistruar 25 raste të reja me fruth.
Sipas të dhënave të institutit, nga 16 prilli deri më 17 gusht 2026, në Kosovë janë konfirmuar gjithsej 137 raste me fruth. Në krahasim, gjatë periudhës 2021–2024 ishin regjistruar vetëm tri raste, të gjitha të importuara.
Numri më i lartë i rasteve është shënuar në Prishtinë, me 47 raste. Përballë rritjes së rasteve, IKSHPK ka intensifikuar aktivitetet e vaksinimit në komunat më të prekura. Deri tani janë vaksinuar 276 fëmijë që nuk e kishin marrë në kohë, sipas kalendarit të rregullt të vaksinimit, vaksinën MMR.
Instituti u ka bërë thirrje qytetarëve që personat me simptoma të dyshimta për fruth, si temperaturë të lartë, skuqje të lëkurës, kollë, rrufë ose konjuktivit, të paraqiten sa më shpejt në institucionet shëndetësore. Vaksinimi konsiderohet mënyra më efektive për parandalimin e sëmundjes.
Fruthi është një nga sëmundjet më ngjitëse dhe transmetohet përmes ajrit. Rikthimi i rasteve në Kosovë lidhet ngushtë me rënien e mbulueshmërisë me vaksinën MMR.
Sipas epidemiologes së IKSHPK-së, Edita Goranci, kur mbulueshmëria me vaksinën kundër fruthit ka qenë mbi 95%, situata epidemiologjike ka qenë e qetë. Rastet e reja janë shfaqur kryesisht në zonat ku ka fëmijë të pavaksinuar.
Goranci ka shpjeguar se doza e parë e vaksinës MMR ofron mbrojtje në rreth 93% të rasteve, ndërsa pas dozës së dytë mbrojtja arrin në rreth 97%. Ajo e ka cilësuar vaksinën si një nga vaksinat më të sigurta.
Fruthi është jashtëzakonisht ngjitës. Një fëmijë i infektuar mund të infektojë rreth 90% të personave të pavaksinuar me të cilët ka kontakt. Virusi përhapet përmes ajrit gjatë të folurit, kollitjes dhe teshtitjes dhe mund të qëndrojë deri në dy orë në ajër dhe në sipërfaqe.
Simptomat e para të sëmundjes përfshijnë temperaturën, ethet, rrjedhjen e hundëve, skuqjen e syve dhe dhimbjen e fytit, ndërsa më pas shfaqet edhe skuqja karakteristike në lëkurë.
Fruthi mund të shkaktojë komplikacione të rënda dhe, në raste të caktuara, mund të jetë vdekjeprurës. Sipas të dhënave të Organizatës Botërore të Shëndetësisë, gjatë vitit 2024 më shumë se 95 mijë persona humbën jetën nga fruthi në mbarë botën, shumica prej tyre fëmijë nën moshën pesë vjeç./ad
Login
