Presidenti i Ukrainës, Volodymyr Zelensky, tha të hënën se bisedimet e zhvilluara me Shtetet e Bashkuara dhe vendet evropiane me qëllim të përfundimit të luftës gati 4-vjeçare me Rusinë janë “shumë afër një rezultati real”.
Negociatorët ukrainas, të udhëhequr nga zyrtari i lartë, Rustem Umerov, bashkë me përfaqësues nga Evropa, zhvilluan një varg takimesh me emisarë amerikanë, përfshirë bisedimet e zhvilluara ditëve të fundit në Florida, raporton agjencia e lajmeve “Reuters”.
Negociatori rus, Kirill Dmitriev, emisar për investime i presidentit Vladimir Putin, gjithashtu ka qenë duke zhvilluar bisedime të ndara me zyrtarë amerikanë në Florida.
Zyrtarët në Ukrainë e Rusi thonë se ekipet e tyre po ktheheshin në vendet e veta të hënën për të raportuar rreth rezultatit të diskutimeve.
“E tëra duket goxha sikur ia vlen… dhe këtu është me rëndësi që kjo është puna e të dyja palëve (Ukrainës) dhe Shteteve të Bashkuara. Kjo lë të kuptohet se ne jemi shumë afër një rezultati real” – tha Zelensky në një tubim kushtuar diplomatëve ukrianas.
Zelensky tha se negociatorët kanë qenë duke punuar në një plan 20-pikësh, i çuar përpara nga emisarët amerikanë dhe i cili ka qenë në diskutime me javë, pasi një draft fillestar ishte kritikuar nga ukrainasit dhe evropianët, duke u cilësuar si shumë favorizues për Rusinë.
Gjithashtu, pjesë e diskutimeve ishin garancitë e sigurisë që Ukraina i ka kërkuar për t’u mbrojtur nga ndonjë veprim ushtarak rus në të ardhmen pas përfundimit të kësaj lufte, si dhe një plan për rimëkëmbjen ekonomike të Ukrainës.
“Blloku bazë i të gjitha dokumenteve është i gatshëm. Është bazë. Janë disa çështje për të cilat ne nuk jemi të përgatitur dhe unë jam i sigurt se ka çështje për të cilat rusët nuk janë të përgatitur” – tha presidenti ukrainas.
Duke folur më vonë në adresimin e tij të zakonshëm të mbrëmjes, Zelensky tha se çështje kyçe është që të përcaktohet nëse Shtetet e Bashkuara do të jenë në gjendje që “të marrin një përgjigje nga Rusia, gatishmëri të vërtetë nga ana e atij vendi për t’u përqendruar në diçka tjetër pos agresionit”.
Një numër i konsiderueshëm i mërgimtarëve po arrijnë suksese në diasporë, duke u bërë emra të njohur në skenën politike dhe jo vetëm. Sllovenia pa dyshim se është një nga shtetet evropiane, ku mundësia e arsimimit, punësimit, depërtimit në karrierë dhe formimit profesional e etik është e madhe.
Arritjeve të shqiptarëve në Slloveni pa dyshim i shtohet edhe Ganimet Shala, e cila ka hyrë në histori si asambleistja e parë shqiptare në Parlamentin e qytetit të Lubjanës.
Nga Kosova, për t’u bërë storie suksesi në Slloveni
E lindur në Pejë, por e rritur dhe e shkolluar në Lubjanë, Shala përfaqëson gjeneratën e mërgimtarëve që arritën të gërshetojnë rrënjët shqiptare me përvojën evropiane. Fillimet në Slloveni nuk ishin aspak të lehta, kujton Ganimetja.
“E nisa shkollimin në vitin e pare të gjimanazit, në moshën 14 vjeçare, një periudhë delikate për çdo të ri. Përveç moshës, gjithçka ishte e re për mua, gjuha, kultura dhe mënyra e jetesës. Megjithatë, me përkushtim dhe punë të vazhdueshme, ia dola ta tejkaloj çdo vështirësi”.
Vlen të theksohet se Ganimeti është magjistre në “Marrëdhënie Ndërkombëtare dhe Diplomaci” dhe ka një karrierë mbi 29-vjeçare në sektorin publik slloven, ndërkohë që Telekomi i Sllovenisë ishte puna e parë e saj që i solli shumë suksese.
“Telekomi ishte për mua edhe një shkollë e re, një familje e re. Aty kam mësuar çfarë do të thotë kultura e punës. Sllovenët janë shumë seriozë, punëtorë, secili e di përgjegjësinë e vet.” rrëfen ajo revisten Albinfo.ch.
Në fakt, Ganimet Shala nisi punën në Telekomin e Sllovenisë, si praktikante në “call center”, dhe pas disa viteve përkushtim, ajo u avancua deri në pozitën e menaxheres së disa kompanive bijë. “Në dhjetor të vitit 2025 do të mbush plot 30 vjet stazh pune të rregullt në këtë kompani,” shton ajo me krenari.
Jeta profesionale në politikë
Paralelisht me karrierën profesionale, Shala ka qenë gjithmonë aktive në jetën shoqërore dhe kulturore të shqiptarëve në Slloveni. Ajo është themeluese e Shoqatës së Grave Shqiptare “Teuta”, anëtare nderi e Shoqatës “Migjeni”, si dhe kryetare e Unionit të Shoqatave Kulturore Shqiptare në Slloveni.
Në vitin 2022, ajo kandidoi për herë të parë në zgjedhjet parlamentare të Sllovenisë, duke hyrë në histori si kandidatja e parë shqiptare për deputete dhe njëkohësisht si asambleistja e parë shqiptare në Parlamentin e Lubjanës për mandatin 2022–2026.
“Jam tejet mirënjohëse dhe krenare, ky titull bart në vete shumë përgjegjësi. Një pjesë të madhe të kohës ia kushtoj qytetarëve që më kanë votuar, megjithatë jo gjithçka është në dorën time.”
Përfaqësuese e një vizioni gjithëpërfshirës
Për Ganimet Shalën, hyrja në politikë nuk ishte thjesht ambicie personale, por një nevojë për të qenë zë i komunitetit shqiptar, duke mbrojtur edhe interesat e qytetarëve të tjerë sllovenë.
“Shqiptarët janë ata që fal tyre unë sot jam këtu ku jam, por nuk përfaqësoj vetëm shqiptarët, përfaqësoj të gjithë banorët e Sllovenisë,” shprehet ajo.
Vlen të theksohet se në partinë e Tanja Fajonit (Social Demokratët), Shala është pjesë aktive e grupeve që trajtojnë politikat banesore, çështjet ndërkombëtare, si dhe trafikun dhe sektorin publik në qytet. Nga viti 2024 ajo është edhe anëtare e Kongresit të Autoriteteve Lokale dhe Rajonale pranë Këshillit të Evropës, një arritje e rrallë për një shqiptare në diasporë.
Zëri i Kosovës në arenën evropiane
Një ndër temat që Shala ka ngritur shpesh është nevoja për njohjen e patentave të Kosovës në Slloveni, si dhe mundësia për blerjen e pasurive të paluajtshme nga shtetasit kosovarë me leje qëndrimi të përhershme.
“Presim që procesi i njohjes së patentave të Kosovës të mbyllet deri në fund të këtij viti,” thotë ajo, duke shtuar se çështja e pasurive të paluajtshme është më e ndërlikuar dhe lidhet me statusin ndërkombëtar të Kosovës.
“Emri dhe problematika e Kosovës rrallë dëgjohen në Parlamentin Evropian. Prandaj i bëj thirrje institucioneve të Kosovës që të jenë më aktive në anëtarësime dhe marrëveshje ndërkombëtare.”
Një zë gruaje që ndryshon perceptime
Të depërtosh në skenën politike sllovene nuk është e lehtë, veçanërisht për një grua shqiptare. Megjithatë, Ganimet Shala e sheh këtë si një sfidë të mundshme, nëse punon me përkushtim dhe profesionalizëm.
“Nuk është e lehtë, por as e pamundur. Sllovenia është një demokraci stabile, por sistemi i saj politik mbetet mjaft konkurrues dhe relativisht i mbyllur ndaj figurave të reja. Për ne shqiptarët, si një komunitet i vogël, kërkon kohë dhe punë për të fituar besimin e elektoratit vendas,” thotë ajo.
Sipas saj, njohja e mirë e gjuhës sllovene, angazhimi në komunitet dhe përvoja institucionale janë çelësi për t’u pranuar dhe respektuar.
“Duhet ndërtuar kredibilitet përmes veprimeve konkrete, për çështje sociale, integrim, barazi gjinore. Kështu krijohet një imazh publik i besueshëm. Jam e lumtur që angazhimi im politik i bën të ndihen krenarë edhe bashkëkombësit e mi,” shton Shala, për revisten Albinfo.ch.
Shoqata “Teuta”, kur bashkimi i grave bëhet forcë
Përveç politikës, Ganimet Shala ka dhënë kontribut të veçantë në fuqizimin e grave shqiptare në Slloveni, përmes Shoqatës së Gruas Shqiptare “Teuta”, të cilën e themeloi me qëllimin për të thyer stereotipet dhe për të ndërtuar një imazh të ri të gruas shqiptare në sytë e shoqërisë sllovene.
“Kjo nismë lindi nga dëshira për ndryshim. Qëllimi ishte forcimi, përfaqësimi dhe bashkëpunimi midis grave shqiptare, fuqizimi ekonomik e social, promovimi i arsimit dhe barazisë gjinore, por edhe ruajtja e kulturës dhe gjuhës sonë,” tregon ajo.
Shoqata “Teuta” bashkon gratë shqiptare më të suksesshme në Slloveni, duke krijuar hapësira për bashkëpunim, mentorim dhe ngritje personale.
“Donim t’i tregojmë shoqërisë sllovene se gruaja shqiptare nuk është thjesht ajo që shëtitet me karrocë në park, por një grua e angazhuar, profesionale dhe e përkushtuar në shumë fusha të jetës,” shton Shala me bindje.
Sfidat e grave shqiptare në diasporë
Si pjesë e diasporës, gratë shqiptare në Slloveni përballen me sfida të shumta, nga barrierat gjuhësore e deri te integrimi kulturor dhe ekonomik.
“Shumë gra punojnë në sektorë me paga të ulëta ose pa kontrata të rregullta. Kjo i bën më të pambrojtura ekonomikisht dhe më të varura nga familja. Mungesa e gjuhës, njohjes së ligjeve dhe arsimimit i pengon të marrin pjesë aktive në jetën publike,” shpjegon ajo.
Shoqata “Teuta” punon për ta ndryshuar këtë realitet, duke ofruar kurse falas të gjuhës sllovene, mentoring dhe këshillim, si dhe aktivitete kulturore e edukative.
“Organizojmë trajnime për të drejtat e grave, barazinë gjinore, të drejtat në punë dhe mbrojtjen ligjore nga diskriminimi apo dhuna. Inkurajojmë pjesëmarrjen e tyre në forume, debate dhe këshilla lokale. Por gjithçka nis nga vetë grate, nga gatishmëria për t’u përfshirë e për të besuar në veten e tyre,” shton ajo.
Mesazhi për vajzat shqiptare në botë
Në fund të intervistës, Ganimet Shala ndalet te forca e brendshme që çdo grua mbart në vetvete dhe dërgon një mesazh të fuqishëm për vajzat shqiptare kudo në botë:
“Mos lejoni frikën t’ju ndalojë. Është normale të ndiheni të pasigurta, por kujtoni pse nisët këtë udhëtim. Guximi nuk është mungesë frike – është zgjedhja për të ecur përpara, pavarësisht saj.”
Me një gjuhë të ngrohtë e përfshirëse, ajo vazhdon: “Të largohesh nga shtëpia kërkon më shumë se një valixhe, kërkon zemër. Mbani rrënjët në shpirt, por lërini degët të prekin qiellin e ri që keni zgjedhur. Çdo hap që bëni, edhe kur dridheni, është dëshmi e forcës që keni brenda vetes. Mos u ndalni, sepse bota ka nevojë për dritën tuaj.”
Me pak fjalë, historia e Ganimet Shalës nuk është thjesht rrëfimi i një karriere të suksesshme, por i një filozofie jetësore, të punosh me përkushtim, të ruash rrënjët e tua dhe të ndërtosh ura midis kulturave.
Rusia ka intensifikuar sulmet e saj në rajonin jugor ukrainas të Odesës, duke shkaktuar ndërprerje të gjera të energjisë dhe duke kërcënuar infrastrukturën detare të rajonit, ka raportuar BBC.
Zëvendëskryeministri ukrainas Oleksiy Kuleba tha se Moska po kryente sulme “sistematike” në rajon. Javën e kaluar, ai paralajmëroi se fokusi i luftës “mund të jetë zhvendosur drejt Odesës”.
Presidenti Volodymyr Zelensky tha se sulmet e përsëritura ishin një përpjekje nga Moska për të bllokuar aksesin e Ukrainës në logjistikën detare.
Më parë në dhjetor, Presidenti rus Vladimir Putin kërcënoi të ndërpresë aksesin e Ukrainës në det si hakmarrje për sulmet me dronë ndaj cisternave të “flotës në hije” të Rusisë në Detin e Zi.
“Flotë në hije” është një term që i referohet qindra cisternave të përdorura nga Rusia për të anashkaluar sanksionet perëndimore të vendosura pas pushtimit të saj në shkallë të plotë të Ukrainës në vitin 2022.
Të hënën në mbrëmje, sulmet goditën infrastrukturën portuale në Odesa, duke dëmtuar një anije civile, tha guvernatori rajonal.
Ishte i fundit në një seri prej qindra sulmesh që kanë ndërprerë furnizimin me energji në rajon për ditë të tëra dhe kanë shkaktuar disa viktima.
Natën e së dielës, grevat ndërprenë energjinë elektrike për 120,000 njerëz dhe shkaktuan një zjarr në një port të madh i cili shkatërroi dhjetëra kontejnerë me miell dhe vaj perimesh.
Javën e kaluar, një sulm me raketa balistike në portin Pivdenniy në lindje të Odesës vrau tetë persona dhe plagosi të paktën 30.
Një sulm tjetër më herët gjatë javës vrau një grua që po udhëtonte në një makinë me tre fëmijët e saj dhe preu përkohësisht urën e vetme të rajonit të Odesës që lidh Ukrainën dhe Moldavinë.
Nënshkrimi i Aktit të Mbrojtjes nga presidenti i Shteteve të Bashkuara, Donald Trump, ka rikthyer Kosovën në fokusin e debatit politik në Uashington. Përfshirja e Kosovës në këtë dokument si dhe riafirmimi i njohjes reciproke si bazë për marrëveshjen përfundimtare me Serbinë e kundërshtimi i ndarjeve territoriale mbi baza etnike, janë interpretuar si sinjal pozitiv për vijimësinë e mbështetjes amerikane.
Megjithatë, sipas ekspertit amerikan për Ballkanin, Daniel Serwer, kjo gjuhë duhet lexuar me shumë kujdes.
Sipas Serwerit, përfshirja e këtyre formulimeve nuk është domosdoshmërisht shprehje e një konsensusi të fortë politik në SHBA, por më tepër një reagim ndaj përpjekjeve intensive të lobistëve që synojnë ndryshimin e politikës tradicionale amerikane ndaj Kosovës.
“Ndërsa më pëlqen gjuha që Kongresi ka miratuar, do të ishte gabim të interpretohej ajo si një shenjë pa mëdyshje pozitive. Arsyeja pse kjo gjuhë është përfshirë është se lobistët po punojnë intensivisht për të përmbysur politikën tradicionale të SHBA-së, e cila favorizon sovranitetin dhe integritetin territorial të Kosovës, si dhe njohjen e ndërsjellë me Serbinë. Kjo është një përpjekje për t’i bllokuar lobistët dhe do të funksionojë deri në një pikë. Por Presidenti ka autoritet pothuajse 100 për qind në politikën e jashtme dhe Trump i konsideron të bezdisshme kufizimet e tilla. Nuk mund t’ju premtoj se ai do ta respektojë gjuhën e parashikuar në ligj”, ka thënë Serwer.
Ai ka vlerësuar se Kongresi ka tentuar të vendosë një lloj “frenimi” ndaj ideve që bien ndesh me parimin e sovranitetit dhe integritetit territorial të Kosovës, por ka paralajmëruar se kjo mbrojtje është e kufizuar.
Sa i përket dialogut Kosovë–Serbi, Serwer ka thënë se Kosova duhet të vazhdojë ta ketë si objektiv kryesor njohjen reciproke, por ai ka shprehur skepticizëm se ky ligj e bën këtë qëllim më të arritshëm sesa më parë.
Edhe në lidhje me perspektivën euroatlantike, Serwer është shprehur i rezervuar. Ai ka vënë në dukje se administrata Trump ka treguar qëndrim armiqësor ndaj Bashkimit Evropian dhe nuk ka qenë përkrahëse e zgjerimit të NATO-s, çka e bën të paqartë mbështetjen reale për anëtarësimin e Kosovës në këto struktura.
“Kosova duhet gjithmonë të synojë njohjen e ndërsjellë. Por nuk kam asnjë arsye të besoj se kjo është më e mundshme sot sesa para se të nënshkruhej ligji. Po ashtu, nuk kam asnjë arsye të besoj se Administrata do ta mbështesë anëtarësimin e Kosovës në BE apo në NATO. Strategjia e sigurisë kombëtare e Presidentit është armiqësore ndaj BE-së. Ai nuk ka qenë përkrahës i zgjerimit të NATO-s. Pika kryesore këtu është bllokimi ose ngadalësimi i ndryshimeve në politikën amerikane që mund të jenë të dëmshme për Kosovën. Ka njerëz që po shtyjnë për këto ndryshime. Bllokimi i tyre kërkon vigjilencë të vazhdueshme”, ka potencuar ai.
Sipas Serwerit, beteja kryesore zhvillohet në prapaskenë, mes lobimeve dhe interesave të ndryshme dhe kërkon vëmendje të vazhdueshme nga institucionet dhe diplomacia kosovare për të mbrojtur interesat e vendit.
Presidenti amerikan, Donald Trump, ka nënshkruar të enjten e shkuar Ligjin për politikën e mbrojtjes prej gati 1 trilion dollarësh, në të cilin është përfshirë edhe Kosova. Dokumenti mbi 3 mijë faqesh thekson rëndësinë strategjike të Kosovës si pjesë e Ballkanit Perëndimor dhe riafirmon angazhimin e SHBA-së për paqe, stabilitet, demokraci dhe zhvillim ekonomik në rajon.
Një seksion i veçantë i kushtohet marrëdhënieve ndërmjet Kosovës dhe Serbisë. Palët inkurajohen për zbatimin e marrëveshjes së Brukselit e arritur më 27 shkurt 2023, tek përjashtohet ideja e ndryshimit të kufijve në Ballkan.
Pasi të jetë shënuar përparim në dialog, SHBA-ja ka listuar veprimet që mund t’i ndërmarrë, ku përfshihet angazhimi për marrëveshje e cila ka njohjen reciproke në qendër, si dhe vendosjen e dialogut strategjik nga ana e Uashingtonit me Kosovën e Serbinë.
Në Ligj parashikohet mbështetje e vazhdueshme për reformat demokratike dhe sundimin e ligjit në Ballkanin Perëndimor, zhvillimin ekonomik, rritjen e investimeve dhe forcimin e institucioneve.
Kandidatja për deputete nga LDK, Rrezarta Krasniqi, ka reaguar ndaj deklaratave të kryeministrit Albin Kurti, duke e akuzuar atë për hipokrizi politike dhe përvetësim të figurës së Presidentit historik Ibrahim Rugova.
Sipas Krasniqit, Kurti sot flet në emër të Rugovës, ndonëse në të kaluarën e ka quajtur atë “kolaboracionist”. Ajo theksoi se nuk mund të fyesh për vite një figurë historike dhe më pas ta përdorësh emrin e saj për përfitime politike.
“Presidenti Rugova dhe LDK-ja përfaqësojnë urtësi, maturi dhe orientim perëndimor — vlera që Kurti i ka luftuar vazhdimisht. Ta përvetësosh Rugovën pasi e ke sharë, është fyerje për familjen Rugova, historinë dhe qytetarët”, ka deklaruar Krasniqi.
Ajo shtoi se Ibrahim Rugova nuk është dekor fushate dhe se trashëgimia e tij nuk mund të keqpërdoret për nevoja ditore politike.
Presidentja e Republikës së Kosovës, Vjosa Osmani, ka njoftuar se ka arritur marrëveshje me kryeministrin e Bahamas, Philip Davis, për heqjen reciproke të vizave.
“Kemi arritur dakordim për heqjen reciproke të vizave dhe kjo marrëveshje do të nënshkruhet së shpejti këtu në Washington D.C”, tha Osmani.
Bahamas u bë shteti i 121-të që e njeh Pavarësinë e Kosovës.
Presidentja e Kosovës, Vjosa Osmani ka ngushëlluar familjen, miqtë, bashkëpunëtorët dhe gjithë komunitetin artistik për ndarjen nga jeta të Shemsi Krasniqit – Shemi.
Përmes një reagimi në Facebook, e para e shtetit thotë se “Xhamadani vija vija” mbetet një kujtim i fuqishëm dhe simbolik, që vazhdon të bashkojë emocione, histori dhe identitet, ashtu siç bëri zëri i Shemit ndër dekada.
Ndër të tjera, ajo ka kujtuar se për kontributin e jashtëzakonshëm të grupit “Ilirët” me kantautor Shemin, i vlerësoi me Medaljen Presidenciale të Meritave.
“Kujtimi dhe vepra e tij do të jetojnë gjatë përmes muzikës që na la trashëgimi. I përhershëm qoftë kujtimi për Shemsi Krasiqin-Shemin”, thuhet në reagim.
Ekspertët amerikanë thonë se një virus, i cili shkakton atë që po quhet super gripi, po përhapet gjerësisht në të gjithë Shtetet e Bashkuara të Amerikës, teksa vaksinimi ndaj këtij varianti nuk është i përfshirë në vaksinën kundër virusit këtë vit.
Qendra për Kontrollin dhe Parandalimin e Sëmundjeve në SHBA njoftoi se shkalla e shtrimeve në spitalet e vendit u rrit me 14.3% që nga e premtja. Zyrtarët e shëndetit publik, sipas mediave amerikane, thonë se gripi po përhapet veçanërisht shpejt në Nju Jork, Luiziana dhe Kolorado.
Nju Xhersi dhe Rod Ajlend po shohin gjithashtu nivele të larta të rasteve të të gripit, sipas të dhënave të mbledhura që nga 13 dhjetori. Në Xhorxhia, Nju Meksiko, Ajdaho, Miçigan, Karolinën e Veriut dhe të Jugut, Masaçusets, Konektikut, Merilend dhe Uashington D.C. është rritur numri i vizitave në spitale nga pacientët me simptomat e gripit.
Mes kësaj periudhe të fundvitit dhe deri në fund të sezonit të gripit, në shkurt, sëmundja do të përhapet në çdo shtet në shkallë të ndryshme, thonë ekspertët. Në analizat që janë bërë për supergripin rezultoi se 90% e viruseve të gripit A ishin pozitive për llojin e ri. Vaksina kundër gripit këtë vit nuk e mbulon gripin A, që sjell numrin më të madh të vdekjeve te të moshuarit. Megjithatë, ekspertët thonë se ia vlen të bëhet vaksina e zakonshme për të lehtësuar simptomat.
Këto të fundit përfshijnë ethe, të dridhura, kollë, dhimbje fyti, hundë që rrjedh, dhimbje muskujsh dhe koke, lodhje dhe herë pas here të vjella ose diarre, sipas Qendrës për Kontrollin dhe Parandalimin e Sëmundjeve. Teksa shumica e njerëzve e marrin veten brenda disa ditësh ose disa javësh, disa ndërlikime, si pneumonia, mund të jenë vdekjeprurëse.
Presidentja e Republikës së Kosovës, Vjosa Osmani, u takua me Zëvendës Sekretarin e Shtetit të Shteteve të Bashkuara të Amerikës, Christopher Landau. Ndër të tjera, Osmani foli edhe për rëndësinë e shtyrjes përpara të Dialogut Strategjik Kosovë–SHBA.
Presidenca njofton se gjatë takimit, Presidentja Osmani shprehu mirënjohjen e popullit të Kosovës për nënshkrimin nga Presidenti Donald Trump të Ligjit për Autorizimin e Mbrojtjes Kombëtare (NDAA), për mbështetjen amerikane ndaj sovranitetit dhe integritetit territorial të Kosovës, për vizionin e Presidentit Trump që dialogu të bazohet në njohje reciproke ndërmjet Kosovës dhe Serbisë, për mbështetjen për anëtarësimin e Kosovës në NATO, si dhe për rritjen e investimeve strategjike ekonomike.
Presidentja Osmani foli poashtu edhe për zhvillimet e fundit, situatën e sigurisë në rajon, si dhe për rëndësinë e shtyrjes përpara të Dialogut Strategjik Kosovë–SHBA, si një platformë thelbësore për forcimin e partneritetit dypalësh dhe avancimin e bashkëpunimit në fushat me interes të përbashkët, vijon njoftimi.
Sipas presidencës, Presidentja theksoi përkushtimin e Kosovës ndaj aleancës me Shtetet e Bashkuara të Amerikës dhe gatishmërinë për të vazhduar punën e ngushtë me Administratën e Presidentit Trump, siç është reflektuar përmes heqjes së tarifave për produktet amerikane, marrëveshjes për shtetasit e vendeve të treta, linjëzimit me politikën e jashtme amerikane, harmonizimit të plotë të listës së organizatave të huaja terroriste me urdhrat ekzekutivë të Presidentit Trump, si dhe përmes veprimeve të tjera që dëshmojnë mbështetjen e Kosovës për Administratën e Presidentit Trump.
“Në këtë takim, Presidentja ka ngritur çështjen e shkeljeve flagrante nga ana e Serbisë të të drejtave të shqiptarëve në Preshevë, Medvegjë e Bujanoc, duke kërkuar përkrahjen e Administratës Trump për këtë çështje.
Sa i përket raporteve ndërmjet Kosovës dhe Serbisë, Presidentja shprehi mirënjohje ndaj politikës së qartë të Administratës Trump që dialogu duhet të bazohet në njohje reciproke dhe për faktin që janë përjashtuar idetë e rrezikshme për ndryshime të kufijve apo ndarje. Kjo qasje, shtoi ajo, është e domosdoshme, në mënyrë që të ruhet paqja e stabiliteti në rajonin tonë.
Në takim me Zëvendës Sekretarin Landau, që përbën takimin e dytë bilateral brenda këtij viti, Presidentja Osmani ritheksoi se Kosova do të vazhdojë të ecë përkrah Shteteve të Bashkuara të Amerikës, aleatin e përhershëm të Kosovës”, përfundon njoftimi.
Asociacioni i Gazetarëve të Kosovës (AGK) e ka mirëpritur vendimin e Gjykatës Themelore për miratimin e kërkesë-padisë së Institutit të Kosovës për Drejtësi (IKD), lidhur me zgjedhjen e kryetarit të Komisionit të Pavarur të Mediave (KPM), në fillim të këtij viti.
Gjykata Themelore e ka shpallur të paligjshëm vendimin e Bordit të KPM-së për zgjedhjen e Besnik Berishës në pozitën e kryetarit, në mbledhjen e mbajtur më 17 janar 2025.
“IKD kishte kërkuar edhe deklarimin e paligjshmërisë dhe shfuqizimin e paragrafit 2 të nenit 3 të Rregullores së Punës së Komisionit të Pavarur të Medieve, paragraf ky që ishte shtuar në këtë rregullore në mbledhjen e KPM-së të mbajtur më 17 janar. AGK-ja konsideron se zgjedhja e z. Berisha është bërë në mënyrë të paligjshme, në një përpjekje të hapur për kontroll politik të këtij institucioni nga ana e Qeverisë së Kosovës”.
“Vendimi i Gjykatës Themelore i marrë sot rikthen ligjshmërinë dhe institucionet e pavarura duhet ta kenë parasysh nevojën për respektimin e plotë të ligjeve në fuqi në proceset e rëndësishme të vendimmarrjes. AGK-ja angazhohet që KPM-ja të mbetet e pavarur politikisht, në mënyrë që të përmbushë rolin e saj kushtetues në monitorimin dhe rregullimin e transmetuesve televizivë dhe radiofonikë në Kosovë”, thuhet në njoftimin e AGK-së.
Një arsenal armësh është zbuluar nga Policia e Kosovës në një shtëpi të pabanuar në fshatin Rvatska të Leposaviqit, gjatë një patrullimi rutinë të njësive policore.
Ngjarja ka ndodhur më 19 dhjetor 2025, rreth orës 22:07, kur njësitë e NJNSH-së kanë vërejtur se dera e një shtëpie të pabanuar ishte e hapur. Gjatë kontrollit fillestar në objekt, policia ka hasur në tri armë zjarri të kalibrave të ndryshëm, çka ka nxitur reagimin e menjëhershëm të njësive hetimore.
Në vendin e ngjarjes kanë dalë njësia e hetimeve dhe krimteknika, ndërsa me urdhër të Prokurorit është realizuar kontrolli i plotë i shtëpisë dhe objekteve përcjellëse. Gjatë këtij kontrolli janë gjetur dhe konfiskuar: 1 armë gjuetie (nr. serik A49808), 1 karabinë, 1 pushkë automatike AK-47, 5 karikatorë, 150 fishekë kalibri 7.62×39 mm, 85 fishekë kalibri 7.9 mm, 1 palë dylbi.
Me urdhër të Prokurorit të Shtetit, rasti është iniciuar për veprën penale “Mbajtje në pronësi, kontroll ose posedim të paautorizuar të armëve”, ndërsa për momentin nuk ka persona të dyshuar, pasi objekti rezulton të jetë i pabanuar.
Ndërsa, më 22 dhjetor 2025, gjatë vazhdimit të veprimeve hetimore dhe kërkimit për identifikimin e pronarit, policia ka hyrë sërish në objektin përcjellës të shtëpisë, ku janë gjetur edhe: 1 pushkë ajrore Crvena Zastava, Mekanizëm për barut, 1 thikë ushtarake, 1 futroll për revole.
Edhe këto mjete janë sekuestruar nga njësia e krimteknikës, ndërsa Prokurori ka urdhëruar që rasti të trajtohet si vazhdimësi hetimore.
Hetimet për zbardhjen e plotë të këtij rasti dhe identifikimin e personave përgjegjës janë në vazhdim.
Gazeta Sinjali mëson ekskluzivisht se qytetari i arrestuar për veprën penale “Dhënia e ryshfetit” në pikën kufitare të Vërmicës është Bosko Çerimoviq, shtetas i Republikës së Serbisë.
Sipas informacioneve zyrtare, Çerimoviq dyshohet se i ka ofruar ryshfet një zyrtari policor të Policisë Kufitare të Kosovës, me qëllim që t’i mundësohej hyrja në territorin e Republikës së Kosovës, ndonëse ndaj tij kishte qenë në fuqi ndalimi i hyrjes.
Pas veprimeve hetimore të ndërmarra nga Inspektorati Policor i Kosovës, në koordinim me Prokurorinë Themelore në Prizren, qytetari në fjalë është arrestuar dhe me vendim të prokurorit kompetent ndaj tij është caktuar masa e ndalimit prej 48 orësh.
Rasti është iniciuar për veprën penale “Dhënia e ryshfetit”, ndërsa hetimet po vazhdojnë për të sqaruar plotësisht rrethanat dhe përgjegjësinë penale të të gjithë të përfshirëve.
Inspektorati Policor i Kosovës ka arrestuar sot zyrtarin policor Artan Krasniqi, nën dyshimin se ka kryer veprën penale “Marrje ryshfeti”, gjatë ushtrimit të detyrës zyrtare në Stacionin e Policisë Kufitare në Vërmicë, mëson ekskluzivisht Gazeta Sinjali.
Sipas informacioneve zyrtare, rasti ka ndodhur më 22 dhjetor 2025, kur dyshohet se Krasniqi, për përfitim financiar, i ka mundësuar një qytetari të Republikës së Serbisë hyrjen në territorin e Republikës së Kosovës, ndonëse këtij shtetasi paraprakisht i ishte ndaluar hyrja në vend.
Burimet bëjnë me dije se pas pranimit të informatave të para, hetuesit e IPK-së, me autorizim dhe në koordinim të plotë me Prokurorinë Themelore në Prizren, kanë zhvilluar veprime të shpejta hetimore dhe operative në terren, të cilat kanë rezultuar me arrestimin e zyrtarit policor.
Me vendim të prokurorit kompetent, ndaj Artan Krasniqit është caktuar masa e ndalimit prej 48 orësh.
Në kuadër të të njëjtit rast, është arrestuar edhe qytetari i përfshirë, shtetas i Republikës së Serbisë, ndaj të cilit është iniciuar procedurë penale për veprën “Dhënia e ryshfetit”, ndërsa edhe atij i është caktuar masa e ndalimit prej 48 orësh.
Hetimet lidhur me këtë rast po vazhdojnë, ndërsa priten veprime të tjera procedurale nga organet e drejtësisë.
Sinjali – aty ku e vërteta flet para lajmit!
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
Një vjedhje e rëndë është regjistruar në orët e hershme të mëngjesit të së hënës në Hajvali, ku persona ende të paidentifikuar kanë grabitur një shumë të konsiderueshme parash nga depoja e kompanisë Posta Cheetah.
Siç mëson ekskluzivisht Sinjali, ngjarja ka ndodhur më 22 dhjetor 2025, rreth orës 04:00, në rrugën “Rifat Gashi”, ndërsa rasti është raportuar në polici sapo është vërejtur nga pronari.
Sipas informatave fillestare, persona të panjohur, me maskë në fytyrë, kanë hyrë me forcë në objekt pasi kanë thyer derën hyrëse me mjet të fortë. Më pas, ata janë ngjitur në katin e dytë, ku ndodhej sefi me para, nga i cili kanë kryer vjedhjen.
Ankuesi në këtë rast, R. Sahiti, ka deklaruar se nga objekti janë marrë para në vlerë që kalon shumën prej 20 mijë euro.
Në vendin e ngjarjes kanë dalë njësitë policore, hetuesi kujdestar, forenzika, si dhe hetimet rajonale, të cilët kanë kryer ekzaminimin e plotë të vendit të ngjarjes dhe kanë mbledhur prova materiale.
Me urdhër të Prokurorit kujdestar, rasti është iniciuar si “Vjedhje e rëndë”, ndërsa hetimet për identifikimin dhe kapjen e të dyshuarve janë në vazhdim.
Një rast i pazakontë ka përfunduar me arrestim në Prishtinë, ku një qytetar që fillimisht kishte raportuar ryshfet, ka dalë të ketë dhënë deklarim të rremë nën betim.
Burimet e Sinjalit bëjnë me dije se më 22 dhjetor 2025, rreth orës 12:30, Drejtoria për Hetimin e Krimeve Ekonomike dhe Korrupsionit ka intervistuar Besnik Islamin në cilësi të të dyshuarit për veprën penale “Deklarim i rremë nën betim”.
Sipas hetimeve, i dyshuari në qershor të vitit 2025, në cilësi të ankuesit, kishte raportuar se zyrtarë të Agjencisë për Regjistrimin e Bizneseve të Kosovës (ARBK) i kishin kërkuar ryshfet për bartjen e aksioneve që ai pretendonte se i kishte blerë nga bashkëaksionarët e tij.
Në koordinim dhe me autorizim të Prokurorisë Themelore në Prishtinë, ishin zhvilluar hetime të detajuara lidhur me këto pretendime. Megjithatë, gjatë procesit hetimor dhe pas sigurimit të dëshmive relevante, autoritetet kanë konstatuar se pretendimet e ankuesit nuk qëndronin, duke rezultuar se deklarimet e tij ishin të pavërteta.
Burimet bëjnë të ditur se gjatë intervistimit, në prani të avokatit mbrojtës, i dyshuari e ka pranuar veprën penale, duke konfirmuar se ka dhënë deklarim të rremë nën betim.
Pas përfundimit të intervistimit, me vendim të Prokurorit të Shtetit, ndaj Besnik Islamit është caktuar masa e ndalimit për 48 orë.
Hetimet lidhur me rastin janë duke vazhduar.
Sinjali – aty ku e vërteta flet para lajmit!
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
Një ngjarje e rëndë është shënuar pasditen e sotme në Prishtinë, ku është gjetur pa shenja jete artisti Shemsi Krasniqi, i lindur më 1955.
Siç mëson ekskluzivisht Sinjali, një femër, F.B., ka njoftuar autoritetet pasi kishte shkuar në banesën e viktimës për pastrim dhe kishte vërejtur përkeqësim të papritur të gjendjes së tij shëndetësore.
Sipas deklarimit, ajo kishte tentuar t’i ofrojë ndihmën e parë, mirëpo pasi kishte dalë nga banesa për të marrë ujë, dera ishte mbyllur dhe hyrja ishte bërë e pamundur.
Në vendngjarje ka intervenuar njësia policore, e cila ka hapur derën me forcë.
Pak minuta më vonë, në lokacion ka arritur edhe Njësia e Emergjencës, e cila ka konstatuar vdekjen e viktimës.
Në vendin e ngjarjes kanë dalë edhe hetuesit e stacionit policor, forenzika dhe më pas Mjekësia Ligjore (IML).
Gjatë ekzaminimit të trupit, sipas burimeve të Sinjalit në IML, nuk janë vërejtur shenja dhune, ndërsa në xhepin e xhaketës së viktimës është gjetur një paketim i zbrazët i një pilule për stimulim seksual, çka ka ngritur dyshime fillestare për një infarkt të mundshëm si pasojë e këtij bari.
Në vendngjarje ka dalë edhe prokurorja kujdestare, e cila ka urdhëruar që rasti të iniciohet si “Hetim mbi vdekjen”, ndërsa trupi i pajetë i viktimës është dërguar për autopsi në Institutin e Mjekësisë Ligjore.
Hetimet për sqarimin e plotë të rrethanave të vdekjes janë në vazhdim.
Inspektorati Policor i Kosovës ka arrestuar sot një zyrtar policor nën dyshimin për veprën penale “Marrje ryshfeti”, si dhe një qytetar të dyshuar për “Dhënie ryshfeti”, ka bërë të ditur IPK-ja.
Sipas njoftimit, rasti ka ndodhur në Stacionin e Policisë Kufitare në Vërmicë, ku dyshohet se zyrtari policor, gjatë ushtrimit të detyrës zyrtare, për përfitim financiar i ka mundësuar një qytetari të Republikës së Serbisë hyrjen në territorin e Republikës së Kosovës, ndonëse ai kishte ndalim paraprak për hyrje.
Pas pranimit të informatave fillestare, hetuesit e IPK-së kanë nisur hetimet me autorizim dhe në koordinim me Prokurorinë Themelore në Prizren. Pas veprimeve hetimore dhe operative në terren, është arrestuar zyrtari policor, ndërsa prokurori kompetent ka caktuar masën e ndalimit prej 48 orësh.
Po ashtu, lidhur me këtë rast është arrestuar edhe qytetari (shtetas i Republikës së Serbisë), ndaj të cilit është iniciuar rast penal për “Dhënie ryshfeti”, me masë ndalimi prej 48 orësh.
Tensione janë shënuar para kryeministrisë së Shqipërisë gjatë protestës së thirrur nga opozita.
Menjëherë pas fjalimit të kryedemokratit Sali Berisha protestuesit kanë nisur të përplasen me policinë duke hedhur flakadanë në drejtim të godinë së qeverisë.
Situata është menaxhuar nga forcat e shumta të policisë që kanë krijuar një kordon përreth Kryeministrisë duke shmangur përplasjet me protestuesit.
Berisha u largua nga protesta menjëherë sapo ka mbaruar fjalimin e tij, ndërkohë që protestuesit kanë vijuar të qëndrojnë para godinës së qeverisë duke u përpjekur herë pas here të heqin kordonët e hekurit të vendosur nga policia.
Prokuroria Suedeze në bashkëpunim me Prokurorinë Speciale të Kosovës, kanë kryer një operacion ndaj një personi i dyshuar për krim të organizuar, pastrim të parave dhe përdorim të lëndëve narkotike.
Sipas njoftimit zyrat, bastisjet janë kryer në Suedi dhe Kosovë, ku si rezultat janë gjetur dhe konfiskuar pasuri të konsiderueshme dhe para të gatshme në Kosovë.
“Në lidhje me operacionin, u siguruan asete të gjera. Në Kosovë janë sekuestruar pasuri të paluajtshme, para dhe një automjet, ndër të tjera”.
“Në Suedi, sendet me vlerë dhe dokumentacioni dixhital janë siguruar gjithashtu, gjë që mundëson masa të vazhdueshme hetimore dhe analiza të thelluara të flukseve financiare”, thuhet në njoftimin e Prokurorisë Suedeze.
Login
