Prezenca e OSBE-së në Shqipëri ka mirëpritur mesazhin e Presidentit Bajram Begaj, duke iu bashkuar thirrjes së tij për qetësi dhe dialog gjithëpërfshirës, pas tensioneve në protestë.

Në reagimin e saj, OSBE shprehet gjithashtu e gatshme të ndihmojë në lehtësimin e dialogut, nëse një gjë e tillë kërkohet nga palët.

“Ne i bashkohemi thirrjes për qetësi dhe dialog gjithëpërfshirës dhe jemi të gatshëm të ndihmojmë në lehtësimin e një dialogu të tillë, nëse na kërkohet”, thuhet në njoftim.

Reagimi:

Për të tretën ditë radhazi, protestat kundër qeverisë së Edi Ramës janë shoqëruar me përplasje të dhunshme mes demonstruesve dhe policisë në Tiranë. Protestuesit kërkojnë dorëheqjen e kryeministrit, duke ngritur shqetësime për korrupsionin, keqmenaxhimin e fondeve publike dhe vështirësitë ekonomike me të cilat përballen qytetarët.

 

 

Sipas raportimeve të Fox News, gjatë protestës së të enjtes, më 15 tetor, demonstruesit hodhën gurë në drejtim të forcave të policisë pranë Ministrisë së Arsimit. Efektivët u kundërpërgjigjën me gaz lotsjellës dhe ujëhedhës në përpjekje për të shpërndarë turmën.

Tensionet vijnë pas incidenteve të së mërkurës, kur protestuesit sulmuan ndërtesa qeveritare, banka dhe biznese. Sipas të dhënave të raportuara nga mediat, 89 persona mbetën të plagosur, përfshirë 61 punonjës policie.

Pavarësisht thirrjeve të protestuesve për largimin e tij, kryeministri Edi Rama ka bërë të qartë se nuk ka ndërmend të japë dorëheqjen. Në një deklaratë për Reuters, ai theksoi se ndryshimi i qeverisë duhet të bëhet përmes zgjedhjeve demokratike.

“Sa u përket thirrjeve për dorëheqjen time, qeveritë ndryshohen përmes zgjedhjeve demokratike. Ne patëm zgjedhje vitin e kaluar, jo një revolucion”, deklaroi Rama.

Kreu i qeverisë u shpreh se është i gatshëm të dëgjojë qytetarët dhe të adresojë shqetësimet e tyre, por nënvizoi se objektivi i Shqipërisë për anëtarësimin në Bashkimin Evropian nuk duhet të pengohet nga dhuna.

Sipas tij, vazhdimi i rrugës drejt integrimit evropian është pjesë e mandatit që i kanë dhënë qytetarët.

Lëvizja protestuese, e njohur si “Revolucioni i Flamingove”, kërkon largimin e Ramës dhe kundërshton atë që organizatorët dhe kritikët e qeverisë e cilësojnë si korrupsion të përhapur. Emërtimi lidhet me pankartat me figurën e flamingos rozë që janë shfaqur gjatë demonstratave.

Protestave u janë bashkuar grupe të ndryshme qytetarësh, ndërsa pakënaqësia lidhet me çështje si varfëria, papunësia, cilësia e shërbimeve publike dhe largimi i të rinjve shqiptarë drejt vendeve evropiane.

Agim Nesho, ish-ambasador i Shqipërisë në Shtetet e Bashkuara, deklaroi për Fox News Digital se pas 13 vitesh në pushtet, qeveria socialiste po përballet me pakënaqësi në rritje dhe akuza për korrupsion, keqpërdorim të fondeve publike dhe favorizim politik.

Sipas tij, një pjesë e qytetarëve ndihen të lënë pas dore, ndërsa përfitimet ekonomike dhe politike, sipas kritikëve, janë përqendruar te një elitë e ngushtë.

Në qendër të kundërshtimeve është edhe një projekt i madh zhvillimi i lidhur me Jared Kushner, dhëndrin e presidentit amerikan Donald Trump, i cili është bërë një tjetër çështje debati mes kundërshtarëve të qeverisë.

Një tjetër grup i rëndësishëm që ka dalë në protestë janë studentët, të cilët kërkojnë uljen e tarifave të arsimit të lartë, rritjen e mbështetjes financiare, përmirësimin e kushteve në universitete dhe më shumë mundësi punësimi pas diplomimit.

Sipas Reuters, përfaqësues të studentëve i kanë identifikuar këto çështje si disa nga arsyet kryesore që i kanë nxitur të protestojnë.

Rama është shprehur i gatshëm të diskutojë për kostot e arsimit, por ka dënuar aktet e dhunës dhe sulmet ndaj institucioneve.

“Sulmi ndaj institucioneve, shkatërrimi i pronës publike dhe kërcënimi i sigurisë publike nuk kanë asgjë të përbashkët me kërkesat legjitime të studentëve”, tha kryeministri.

Delegacioni i Bashkimit Evropian në Shqipëri ka shprehur shqetësim për përshkallëzimin e protestave në Tiranë, duke kërkuar që reagimi i autoriteteve të jetë proporcional.

Ndërkohë, Rama ka mbrojtur bilancin e qeverisë së tij në luftën kundër korrupsionit, duke pretenduar se Shqipëria po ndërmerr përpjekje të rëndësishme në këtë drejtim.

Kryeministri ka paralajmëruar gjithashtu se nuk do të lejojë që dhuna të pengojë procesin e integrimit evropian.

Rama fitoi mandatin e katërt në zgjedhjet e vitit 2025, duke e vendosur anëtarësimin në BE në qendër të programit të tij. Sipas Reuters, Shqipëria synon të përmbushë objektivin e anëtarësimit në vitin 2028.

Megjithatë, protestat e njëpasnjëshme dhe kërkesat për dorëheqjen e kryeministrit tregojnë se pakënaqësia ndaj qeverisë po shtrihet përtej një grupi të vetëm. Korrupsioni, kostot e jetesës, problematikat në arsim dhe përplasjet me policinë po mbajnë të larta tensionet politike në vend.

Hidhet masivisht gaz lotsjellës drejt protestuesve. Studentët janë vendosur në Bulevardin te Kryeministria ndërsa protesta vijon që prej orëve të mëngjesit.

 

 

Në Bulevard i është vënë flaka një tjetër kioske në Bulevard.

Protesta është shtrirë masivisht edhe në disa qytete të tjera, Vlorë, Durrës, Korçë, Shkodër.

Ministrja e Ekonomisë, Delina Ibrahimaj, ka shkuar te Zogu i Zi në Tiranë për të parë nga afër dëmet e shkaktuara ndaj bizneseve gjatë protestës. Ajo ka kundërshtuar pretendimet se pas akteve të dhunës qëndrojnë studentët dhe u ka bërë thirrje bizneseve të dokumentojnë dëmet e pësuara.

Ajo tha se pas shkatërrimeve qëndrojnë të njëjtët aktorë që, sipas saj, kanë dëmtuar vendin edhe më parë, këtë herë me ndihmë të huaj.

Reagimi i ministres:

“Kam ardhur tek Zogu i Zi për të dokumentuar dhe për të parë nga afër dëmin që i është bërë bizneseve nga protestat. Nuk janë studentë ata që duan të shkatërrojnë qytetin. Nuk janë studentë ata që duan që mundi dhe djersa e prindërve të shokëve dhe shoqeve të tyre të dëmtohet dhe shkatërrohet.

Është e njëjta dorë që ka dashur që Shqipërinë ta lejë mbrapa. Është e njëjta dorë që ka shkatërruar shumë herë vendin, por kësaj rradhë, ndryshe nga herët e tjera me ndihm,a të huaja që nuk duan që Shqipëria të përparojë e të futet në BE.

Unë u bëj thirrje të gjitha bizneseve që të dokumentojnë dëmet e bëra që Ministria e Ekonomisë dhe organet e drejtësisë të bënë detyrën e tyre dhe të adresojnë dëmet e bëra nga një dorë e pabesë që do të shohë Shqipërinë të shkatërruar” tha Ibrahimaj.

Ministrja e Shëndetësisë dhe Mirëqenies Sociale, Klodiana Spahiu, ka bërë thirrje për qetësi dhe përgjegjësi, pas tensioneve dhe incidenteve të regjistruara gjatë protestës në Durrës.

Gjatë një vizite në Spitalin Rajonal të Durrësit, ministrja shprehu mirënjohjen për mjekët, infermierët, ekipet e urgjencës dhe punonjësit e tjerë shëndetësorë në të gjithë vendin, të cilët po trajtojnë personat e lënduar gjatë protestave.

Spahiu vlerësoi gatishmërinë dhe përkushtimin e personelit mjekësor, duke theksuar se ata kanë vijuar të ofrojnë kujdesin e nevojshëm shëndetësor pavarësisht situatës së krijuar.

“U jam mirënjohëse për punën, qëndrueshmërinë dhe humanizmin e treguar, dhe siguroj se do të kenë gjithë mbështetjen e nevojshme për të vijuar këtë mision”, u shpreh ministrja.

Një apel ajo pati edhe për qytetarët e Durrësit, të cilëve u kërkoi të shmangin aktet e dhunës dhe dëmtimin e pronës publike, duke nënvizuar se shkatërrimi i hapësirave publike nuk zgjidh problemet, por dëmton qytetarët, familjet dhe komunitetin.

Një vëmendje të veçantë, Spahiu i kushtoi përfshirjes së të miturve në situatat e tensionuara, duke u kërkuar prindërve dhe qytetarëve që të mos i ekspozojnë fëmijët ndaj dhunës dhe rrezikut.

“Fëmijët kanë nevojë për siguri, për mbrojtje dhe për shembullin tonë të mirë. Ata nuk duhet të ekspozohen ndaj rrezikut dhe as të bëhen pjesë e situatave që mund të cenojnë shëndetin dhe të ardhmen e tyre”, deklaroi ajo.

 
Në përfundim, ministrja theksoi se e drejta për t’u shprehur duhet të ushtrohet duke respektuar jetën, sigurinë dhe qytetin ku jetojnë qytetarët.

Presidenti i Republikës, Bajram Begaj, ka dalë sot me një mesazh zyrtar drejtuar qytetarëve, duke reaguar mbi protestat dhe përshkallëzimin e tensioneve e akteve të dhunës gjatë ditëve të fundit në kryeqytet dhe rrethe.

 

 

Kreu i Shtetit tha se zëri i të rinjve përfaqëson shpresën dhe të ardhmen e vendit dhe meriton të dëgjohet pa u diskutuar nga askush, por thekson se dhuna nuk mund të jetë kurrë zgjidhja pasi dëmton shoqërinë dhe cenon sigurinë.

Begaj u ka bërë thirrje palëve për maturi, vetëpërmbajtje dhe shmangie të tensioneve që prekin rendin kushtetues, ndërsa ka shprehur gatishmërinë e tij kushtetuese për të ofruar hapësirë dialogu dhe mirëkuptimi mes aktorëve të përfshirë.

Mesazh i Presidentit të Republikës Bajram Begaj:

Tiranë, më 15 tetor 2026

Të dashur qytetarë,
Shqipëria është atdheu ynë i përbashkët. Ajo është shtëpia e të gjithëve.
Kam ndjekur protestat, kërkesat, por me keqardhje edhe aktet e dhunës së dy ditëve të fundit.
Zëri i çdo qytetari meriton të dëgjohet, veçanërisht zëri i të rinjve, të cilët përfaqësojnë shpresën dhe të ardhmen e vendit tonë. Këtë s’mund ta verë dhe nuk e vë askush në diskutim.
Por dhuna nuk është dhe nuk mund të jetë kurrë zgjidhja. Ajo dëmton shoqërinë, cenon sigurinë e qytetarëve dhe polarizon bashkëjetesën demokratike.
Në këto momente, vendi ynë ka nevojë për qetësi, përgjegjshmëri dhe dialog. Ka nevojë që dallimet të mos na përçajnë, por të na nxisin të dëgjojmë njëri-tjetrin dhe të gjejmë zgjidhje në interes të qytetarëve dhe të Shqipërisë.
U bëj thirrje të gjithëve të zgjedhin maturinë, të shmangin dhunën dhe të mos lejojnë që tensionet të cenojnë rendin kushtetues dhe stabilitetin e vendit. Inkurajoj forcat e rendit në detyrën e tyre tejet delikate dhe uroj shërim të shpejtë për çdo të lënduar, polic apo protestues.
Me përgjegjësinë dhe tagrat që më jep Kushtetuta, mbetem i hapur për këdo që dëshiron të ketë një hapësirë dialogu dhe mirëkuptimi sikurse i bëj thirrje aktorëve të përfshirë t’i përkushtohen dialogut dhe bashkëpunimit, në të mirë të rinisë, në të mirë të Shqipërisë.

Në ditën e tretë të radhës të revoltës studentore dhe qytetare, situata përpara godinës së Kryeministrisë po përjeton momente tejet dramatike.

Përveç përdorimit masiv të lëndëve kimike, policia ka futur në veprim autobotët e ujit me presion, të cilët po spërkasin turmën nga dy drejtime të ndryshme për të realizuar rrethimin dhe shpërndarjen e plotë të protestuesve.

Një studente ka përcjellë një mesazh të fuqishëm ndërsa ndodhet në protestë me të rinjtë e tjerë, të cilët kërkojnë dorëheqjen e kryeministrit Edi Rama. E reja thotë se kanë dalë në shesh për tre muaj dhe kanë protestuar në mënyrë paqësore, dhe se askush nuk i ka dëgjuar. Ajo thotë se të gjithë institucionet shtetërore duhet të shkatërrohen, ndërsa kërko ndjesë për çdo biznes privat të prekur.

Studentja u përlot teksa tha se është e vetme në Shqipëri për shkak të familjen i ka jashtë, ndërsa shtoi se pushtetarët nuk mund të vjedhin dhe të pasurohen me taksat e tyre.

Drejtori i Përgjithshëm i Policisë së Shtetit, Skënder Hita, në orën 16:00 do të japë një konferencë për mediat, lidhur me situatën e krijuar pas protestave të dhunshme të 3 ditëve të fundit në Tiranë, ku persona të maskuar po sulmojnë e shkatërrojnë gjithçka që u del përpara.

Kryepolici Hita më herët vizitoi në Spitalin e Traumës në kryeqytet punonjësit e Policisë të dëmtuar si pasojë e sulmeve me gurë, sende të forta dhe bomba molotov nga protestuesit e maskuar.

 

Tensione dhe shoqërime protestuesish janë regjistruar në Shkodër, pas përplasjeve mes të rinjve që protestojnë prej orëve të mëngjesit dhe forcave të policisë.
Pas incidentit gjatë protestës, ku u dëmtua komandanti i forcave të rendit, Fasli Rama, situata është shoqëruar me ndërhyrje të policisë ndaj protestuesve.

Në pamjet nga vendngjarja, efektivët e policisë shihen teksa tërheqin protestuesit e ndaluar dhe i fusin me forcë në ambientet e komisariatit.
Një tjetër protestues, që ndodhet pas tyre, dëgjohet duke bërtitur dhe duke reaguar ndaj ndalimit. Protesta në Shkodër ka nisur që në mëngjes, ndërsa përplasjet mes të rinjve dhe policisë kanë shoqëruar zhvillimet e saj.

Komandanti i forcave të rendit në policinë e Shkodrës Fasli Rama është në gjendje të rëndë shëndetësore.

Efektivi i policisë është dërguar me urgjencë drejt Tiranës për shkak se rrezikon jetën duke qenë se ka një plagë të rëndë në kokë. Komandanti u godit me gur në kokë nga protestuesit që ndodheshin përpara policisë vendore të Shkodrës. Gjatë një përleshje me efektivët, punonjësi i policisë Fasli Rama mori goditje të fortë në kokë duke qenë në gjendje të rëndë për jetën.

Ndryshe nga Tirana, në qytetet e tjera të vendit, gjimnazistët nuk bojkotuan mësimin, por protestën. Në Durrës, një grusht protestuesish, mes tyre simpatizantë të Partisë Demokratike dhe pjesëtarë të Forumit Rinor Demokrat, u mblodhën para bashkisë. Pjesëmarrja mbeti e kufizuar, ndërsa gjimnazet vijuan procesin mësimor dhe qytetarët nuk iu bashkuan tubimit.

Në Vlorë, një pjesë e studentëve bojkotuan mësimin dhe dolën në rrugë, ndërsa në disa fakultete, mes tyre ai i Shkencave të Natyrës, mësimi vijoi normalisht.
Edhe në Shkodër, protesta u përqendrua te një grup studentësh të Fakultetit të Gjuhëve në Universitetin “Luigj Gurakuqi”. Më vonë, sulmuan me gurë godinën e bashkisë së Shkodrës. Në Korçë, një grup gjimnazistësh u përfshi në incidente pranë gjimnazit “Raqi Qirinxhi”, ku u thyen disa xhama.

Gjatë shoqërimit në komisariat, protestuesi dhunoi fizikisht shefin e Korçës. Në Fier dhe Lushnjë, grupe nxënësish u grumbulluan në sheshet kryesore. Në Fier, një grup gjimnazistësh të shkollës “Petro Sota” u shpërnda brenda pak minutash, ndërsa në Roskovec u raportua bojkot nga disa grupe nxënësish.

Në qytetin e Fierit, tubimi vijoi në formën e një marshimi, pa përshkallëzim të mëtejshëm të situatës.Ndërsa në Elbasan, protesta u shoqërua me grumbullimin e gjimnazistëve dhe shoqërimin e tre të rinjve nga policia.

Në qytetet ku pati tubime, forcat e rendit u pozicionuan në sheshet kryesore, duke mbajtur situatën në monitorim.

Vijon protesta e madhe e studentëve dhe e nxënësve në Tiranë.
Pranë qendrës së Tiranës ka pasur përleshje të ashpra mes efektivëve dhe protestuesve.
Një skenë e pazakontë është vërejtur pranë qendrës.
Disa efektivë kanë rrethuar një protestues, duke ushtruar dhunë ndaj tij.
Ata e shoqërojnë dhunshëm protestuesin. Tashmë policia ka ndërhyrë dhe me gaz lotsjellës, për të vendosur qetësi.

Një bankë e nivelit të dytë në zemër të Tiranës është plaçkitur dhe shkatërruar totalisht nga protestuesit. Një grup prej tyre, pjesë më e madhe me maska në fytyrë me qëllim që mos të identifikohen, shkatërruan bankën me shkopinj hekuri e sende të forta.

Fillimisht protestuesit sulmuan fasadën e xhamtë, bankomatët dhe më pas u futën brenda saj duke shkatërruar çfarë gjetën brenda.

Madje, arritën të marrin edhe dokumente nga brenda bankës dhe ti nxjerrin në rrugë duke u vënë flakën. Policia ndërhyri vetëm pasi protestuesit shkatërruan gjithçka, duke hedhur ujë dhe gazlotsjellës

Në përgjigje të sulmeve ndaj tyre, bizneset po përpiqen të shmangin disi dhunën e protestuesve. Mbi qepenat e mbyllur apo në fasadat e xhamit, kanë ngjitur letra ku shkruhet “Ne jemi me ju, mos na dëmtoni.

Pasi tentuan sulmin ndaj selisë së PS, protestuesit kanë nisur të shkulin kangjellat në qendwr tw Tiranws.

Disa pamje të rënda janë publikuar në rrjetet sociale. Disa efektivë shoqërojnë dhunshëm një gjimnazist në një rrugë. Të pranishmit në këtë shoqërim bënë thirrje ndaj efektivëve “Ju lutem, është gjimnazist”, “Çfarë bëni kështu”. Aktivistja Albina Ruko ka shpërndarë videon, teksa ka një thirrje të veçantë për prindërit.

Tensionet kanë vijuar gjatë gjithë ditës në zonën e njohur si “Dollari”, ku janë shënuar përplasje mes policisë dhe protestuesve. Situata është përshkallëzuar në disa momente, ndërsa gjatë protestës është shkallmuar edhe qepeni i një pike të kompanisë celulare “One”.

Protestat janë shoqëruar me tensione dhe përplasje, ndërsa bojkoti i mësimit ka vijuar, me nxënës dhe të rinj që i janë bashkuar tubimeve. Situata në zonë mbetet e tensionuar, në një ditë të karakterizuar nga përplasjet mes protestuesve dhe forcave të policisë