Forcat e armatosura të Shtetet e Bashkuara njoftuan përmes platformës X se bombarduan edhe një tjetër skaf të shpejtë, i cili sipas tyre transportonte drogë në Karaibe të premten, duke vrarë tre personat që ndodheshin në bord.

“Më 13 shkurt, me urdhër të komandantit të SOUTHCOM, gjeneralit Francis L. Donovan, Forca e Përbashkët e Veprimit Southern Spear kreu një sulm vdekjeprurës kinetik ndaj një mjeti lundrues që operohej nga Organizata të Caktuara Terroriste

Informacionet konfirmuan se mjeti po lëvizte në rrugë të njohura të trafikut të drogës në Karaibe dhe ishte i përfshirë në operacione të trafikut të narkotikëve. Tre narkoterroristë u vranë gjatë këtij veprimi.  Asnjë pjesëtar i forcave ushtarake amerikane nuk u plagos”, thuhet në postimin e komandës së përbashkët të forcave të armatosura amerikane përgjegjëse për Amerikën e Jugut.

Të paktën 131 persona janë vrarë në 38 goditje që kishin në shënjestër mjete lundruese në Karaibe dhe në Paqësorin lindor që nga shtatori, kur nisi fushata amerikane e bombardimeve kundër anijeve që, sipas Uashingtonit, dyshohet se ishin të përfshira në trafikun e drogës, sipas njoftimeve të ushtrisë amerikane. Ligjshmëria e këtyre operacioneve është vënë në pikëpyetje.

Punonjësit e Policisë, jashtë shërbimit, gjejnë dhe kthejnë çantën me 1000 euro, dokumente dhe celular.

Drejtori i Përgjithshëm i Policisë së Shtetit, Drejtues Madhor Ilir Proda, ka vlerësuar veprimin me integritet të dy punonjësve të policisë, Klejdin Lleshaj (Qarkullimi Rrugor Lezhë) dhe Durim Xhakaj (Qarkullimi Rrugor Shkodër), të cilët mbrëmë rreth orës 22:30, në rrugën e Rinasit, duke u kthyer për në shtëpitë e tyre nga Tirana për në Lezhë e Shkodër, së bashku me familjarët e tyre, gjetën një çantë në rrugë me dokumente, një shumë parash dhe një celular, të një personi që ishte kthyer nga Italia.

Nëpërmjet pasaportës dhe rrjeteve sociale, ata bënë të mundur identifikimin dhe gjetjen e pronarit, si dhe kthimin e çantës me 1000 euro, dokumente dhe celularin 34-vjeçarit nga Kavaja.

Për këtë veprim, Drejtori Proda u ka dërguar punonjësve të Policisë një mesazh falënderimi për veprimin sa qytetar, aq edhe kuptimplotë, që nderon uniformën e Policisë së Shtetit dhe mishëron vlerat e integritetit, humanizmit dhe përgjegjësisë që qëndrojnë në themel të misionit tonë.

Mesazhi i Drejtorit të Përgjithshëm:

“Të nderuar kolegë,

Ju përgëzoj dhe ju vlerësoj maksimalisht për veprimin tuaj, i cili mbart në vetvete qytetarinë, humanizmin, integritetin dhe ndjenjën e përgjegjësisë ndaj detyrës.

Pavarësisht se ishit civilë, jashtë orarit të shërbimit, me veprimin tuaj treguat integritet dhe dëshmuat edhe njëherë se mijëra djem e vajza, gra dhe burra që shërbejnë në radhët tona nuk janë ashtu siç tentojnë t’i përbaltin, por janë njerëz që sakrifikojnë me ndershmëri për ligjin dhe qytetarin.

Ky veprim rrit besimin e qytetarëve, pa të cilin misioni ynë do të ishte i cunguar.

Mirënjohje për ju kolegë dhe për çdo punonjës të Policisë me integritet që nderon uniformën e Policisë së Shtetit”.

Presidenti amerikan, Donald Trump, tha se ndryshimi i regjimit është “gjëja më e mirë që mund të ndodhë” në Iran, teksa konfirmoi se një aeroplanmbajtës i dytë së shpejti do t’i bashkohet flotës “masive” amerikane në Detin Arabik, në mes të tensioneve të larta mes dy rivalëve.

“Duke se kjo do të ishte gjëja më e mirë që mund të ndodhte”, tha Trump për gazetarët më 13 shkurt teksa po qëndronte në një bazë ushtarake në Karolinë të Veriut kur u pyet nëse synonte “ndryshim të regjimit” në Teheran.

“Për 47 vjet, ata kanë folur e kanë folur e kanë folur. Në ndërkohë, ne kemi humbur shumë jetë njerëzish në kohën kur ata kanë folur”, shtoi ai. Kjo është thirrja më e drejtpërdrejtë e Trumpit për rrëzimin e regjimit klerikal të Iranit.

Trump nuk tha se kush dëshiron që ta marrë drejtimin e Qeverisë nëse regjimi do të binte, por tha vetëm se “ka njerëz”.

Reza Pahlavi, djali në mërgim i shahut të fundit të Iranit, është një nga shumë figurat që synojnë të fitojnë ndikim brenda opozitës së fragmentuar iraniane në mërgim.

Regjimi teokratik i Iranit është në pushtet që nga viti 1979, kur Revolucioni Islamik çoi në rrëzimin e shahut të mbështetur nga SHBA-ja, Mohammad Reza Pahlavi, nga klerikët besnikë ndaj ajatollah Ruhollah Khomeini. Të dy shetet nuk kanë pasur marrëdhënie diplomatike që nga viti 1980.

Uashingtoni dhe Teherani janë përfshirë në bisedime indirekte mbi programin bërthamor të Iranit. Shtetet perëndimore dyshojnë se Irani po përpiqet të zhvillojë një armë bërthamore, teksa Teherani insiston se programi i tij është vetëm për qëllime civile.

Trump po ashtu ka kërcënuar me një sulm të ri ushtarak ndaj Qeverisë iraniane nëse ekzekuton ndonjë nga protestuesit e arrestuar gjatë protestave masive antiqeveritare të mbajtura së voni.

Trump u tha trupave amerikane në bazë se Teherani ka qenë “i vështirë” në bisedimet bërthamore dhe sugjeroi se duhet të shtohet presioni ndaj iranianëve.

“Ata e kanë bërë të vështirë që të arrihet një marrëveshje”, tha ai. “Ndonjëherë duhet të kesh frikë. Kjo është e vetmja gjë që do ta zgjidhë situatën”.

Trump po ashtu lartësoi luftën 12-ditore të zhvilluar qershorin e vitit të kaluar, kur Izraeli dhe SHBA-ja kryen fushatë bombardimesh që kishin për cak objektet bërthamore dhe ato ushtarake të Iranit.

Deklaratat e fundit të udhëheqësit amerikan vijnë në kohën kur Uashingtoni ka një grumbullim masiv ushtarak në rajonin e Gjirit Persik.

Ekspertët thonë se dislokimi e forcave ka për qëllim t’i japë Trumpit opsionin ushtarak nëse zgjedh të veprojë mbi kërcënimet e tij për të sulmuar Iranin, për shkak se ky i fundit nuk ka arritur një marrëveshje bërthamore dhe ka shtypur dhunshëm protestuesit.

Forcat e sigurisë iraniane vranë mijëra demonstrues në janar, pas protestave që shpërthyen në fund të dhjetorit 2025, fillimisht për çështje ekonomike, por më pas u shndërruan në zemërim të përgjithshëm kundër regjimit. Më shumë se 53.000 persona u arrestuan, sipas grupeve për të drejtat e njeriut.

Paraprakisht, SHBA-ja ka dislokuar aeroplanmbajtësin Abraham Lincoln në rajonin e Gjirit Persik në kuadër të asaj që Trump e quan “flotë masive” të dislokuar pranë Iranit.

Më 13 shkurt, Trump konfirmoi se një aeroplanmbajtësi tjetër, Gerald R. Ford, së bashku me anijet shoqëruese, po lundronte nga Karaibet dhe së shpejti do t’i bashkohej forcave amerikane në rajon, me shumë gjasa brenda rreth shtatë ditësh.

Gerald R. Ford konsiderohet se është luftanija më e madhe në botë, me gjatësi 337 metrash dhe është e aftë të bartë disa nga teknologjitë më të avancuara ushtarake.

Kur u pyet pse po dërgonte luftanijen e dytë, Trump tha: “Në rast se nuk arrijmë një marrëveshje, do të na duhet… Nëse na duhet, do ta kemi gati”.

Avokati i Popullit i Shqipërisë, Endrit Shabani, është zgjedhur President i Organizatës së Avokatëve të Popullit të Mesdheut (AOM), e cila është një rrjet ndërkontinental i monitorimit të të drejtave të njeriut.
Vendimi u mor me unanimitet nga Bordi i organizatës.

E themeluar si një platformë strategjike për mbrojtjen e të drejtave të njeriut, AOM bashkon mbi 30 institucione garantë të të drejtave të njeriut nga Evropa, Afrika e Veriut dhe Lindja e Mesme.
Ky rrjet përfshin vende si: Franca, Spanja dhe Greqia, Maroku, Egjipti, Izraeli dhe Jordania, duke krijuar një front të përbashkët për mbikëqyrjen e standardeve të qeverisjes dhe sundimit të ligjit në të gjithë pellgun e Mesdheut.

Marrja e presidencës nga Shqipëria vjen në një moment kritik për rajonin, ku sfidat e llogaridhënies administrative dhe mbrojtja e lirive civile mbeten prioritete globale.
Z. Shabani tha se “si President i AOM do të koordinoj përpjekjet e rrjetit për të forcuar pavarësinë e institucioneve të Avokatit të Popullit dhe për të siguruar respektimin e të drejtave të qytetarëve përballë pushtetit ekzekutiv në tre kontinente”.

Avokati i Popullit i Shqipërisë shtoi se:
“Ky pozicionon zyrën e Avokatit të Popullit të Shqipërisë si një aktor kyç në diplomacinë institucionale, duke i dhënë Tiranës një rol drejtues në hartimin e agjendave rajonale për drejtësinë administrative dhe mbrojtjen e të drejtave të njeriut”.

Kreu i Partisë Demokratike, Sali Berisha po mban një bashkëbisedim online me qytetarët.

Ai nuk i ka kursyer batutat në lidhje me kryeministrin Edi Rama, ku tha se nuk ishte i pranishëm në konferencën e Mynihut, pasi nuk ishte i denjë.

“I ngeli në dorë Dash Sula”, tha me batutë Berisha, duke iu referuar emërimit të ish-deputetit demokrat në krye të Kryeinspektoratit të Përgjithshëm.

Sali Berisha: Në Mynih Rama nuk ishte i denjë për atë konferencë. Delegacionin e nisi por vetë nuk shkoi dot, i mbeti në dorë Dashi, e kam fjalën për Dash Sulën.

Ishte dëshmi e një rrethi të kuq nga i cili Rama nuk del më. Fati ynë dhe i familjeve tona duhet të jetë në duart tona, ndaj duhet të vijmë protesta. Sapo mora lajmin s e guximtarët e fundit u liruan nga gjykata.

Gjykata e Tiranës ka caktuar masën e sigurisë “detyrim paraqitje” për 14 të arrestuarit në protestën kombëtare të opozitës më 10 shkurt.

Kujtojmë se Prokuroria ka kërkuar vendosjen e masave të sigurisë: 2 arreste me burg, 3 arreste ne shtëpi dhe 9 detyrim paraqitje për protestuesit e arrestuar.

Emrat e protestuesve:

1. Kreshnik Çeço
2. Klodian Bajrami
3. Leonid Tusha
4. KLejdi Subashi
5. Ramazan Nuhu
6. Geraldo Demiraj
7. Danjel Kulla
8. Arbri Ujkaj
9. Suzana Dimushi
10. Xhersi Velçanaku
11. Florian Nuhu
12. Andrea Kulla
13. Artur Kadria
14. Fabiol Ahmet

E njëjta masë u caktua edhe një ditë më parë për 7 të miturit e arrestuar, Rei Bogdani, Sindrit Peka, Joel Korbi, Kreshnik Kastrati, Zeni Guraj, Daniel Zeka dhe Oresti Halilaj.

Një 25-vjeçar shqiptar, Kevin Muharremi është qëlluar për vdekje orët e para të mëngjesit të sotëm në Montecalvoli, një fshat i vogël në komunën e Santa Maria a Monte në Itali.

Sipas informacioneve të para, Kevin Muharremi u qëllua nga një ose më shumë plumba ndërsa ishte në makinën e tij. Të shtënat, duket se u realizuan nga një makinë tjetër që po lëvizte pranë tij.

Rrethanat tregojnë se i riu u qëllua në qafë ndërsa udhëtonte në makinën me dy shokë të tjerë, teksa ka qenë ulur në sediljen e pasagjerit përpara. Hetuesit po përpiqen të zbulojnë motivin e vrasjes, por sipas asaj që është mësuar deri tani, krimi mund të ketë lindur nga një grindje.

Vrasësi ishte në një makinë së bashku me një person tjetër, i cili më pas u largua nga vendi i ngjarjes. Hetuesit po analizojnë gjithashtu kamerat e sigurisë në zonë, përfshirë ato që regjistrojnë targat e makinave.

Oficerët e karabinierisë po intervistojnë disa dëshmitarë për të sqaruar më shumë rrethanat e ngjarjes.

Policia ka zbardhur ngjarjen e rëndë të ndodhur dje në Qerret, ku shtetasi Ardjan Varrosi është vetëplagosur me thikë pas një konflikti brenda familjes me të shoqen dhe vajzën e tyre.

Ai ka dalë nga banesa duke e ndjekur vajzën me thikë në dorë, por është ndaluar nga policia. Sipas bluve të qytetit, efektivët arrestuan në flagrancë shtetasin A.V., 55 vjeç, banues në Qerret, Durrës.

Ky shtetas, rreth orës 19:00, të datës 13.02.2026, në banesën e tyre në fshatin Qerret, Durrës, pas një konflikti për motive të dobëta, ka ushtruar dhunë fizike ndaj bashkëshortes së tij, shtetases A.V., 42 vjeçe, dhe më pas ka kërcënuar edhe vajzën e tij, e cila ka ndërhyrë për të parandaluar përshkallëzimin e dhunës dhe ka lajmëruar Policinë.

Shtetasi A.V., pas konfliktit me bashkëshorten, është vetëdëmtuar me një mjet prerës në pjesën e qafës.

Ai ka marrë mjekim në Spitalin Rajonal Durrës, pa probleme serioze për shëndetin. Materialet i kaluan Prokurorisë së Juridiksionit të Përgjithshëm Durrës për veprime të mëtejshme.

Banorët e Rrjollit vijojnë sot me protestën kundër ndërtimit të resortit luksoz të Bashkim Ulajt. Burrat e zonës kanë dalë për t’i bllokuar rrugën makinerive dhe punimet kompanisë ‘Gener 2’ së bashku me gratë, fëmijët e të moshuarit.

Banorët kanë qëlluar me gurë drejt fadromave të kompanisë së Bashkim Uajt, duke i kërkuar punonjësve të zbrisnin dhe të mos tentojnë të nisin punën. Në zonë janë prezente dhe forca të shumta të policisë, duke u përpjekur për të shuar tensionet.

Banorët e Rrjollit në Velipojë pretendojnë pronësinë e tokës, pronë e trashëguar që nga hera nga paraardhësit. Ata kanë depozituar një kërkesë zyrtare drejtuar Prokurorisë, ku kërkojnë një zgjidhje sa më të shpejtë ligjore lidhur me vërtetësinë e dokumenteve që disponojnë për pronësinë e tokës në zonën e Rrjollit, aty ku po ndërtohet resorti turistik i Bashkim Ulajt.

Sipas tyre, dokumentacioni që ata zotërojnë provon pronësinë e ligjshme të tokës dhe kërkojnë nga organet e drejtësisë që çështja të trajtohet me prioritet, duke shmangur zvarritjen e mëtejshme të procesit.

Banorët kanë protestuar dhe përpara bashkisë e përpara godinës së Parlamentit. Ata janë takuar gjithashtu dhe me kryebashkiakun e Shkodrës, të cilit i kanë kërkuar shpjegime për lejen e ndërtimit që i është dhënë botuesit Bashkim Ulaj, por nuk kanë marrë përgjigje.

Banorët e Durrësit kanë dalë sërish në protestë para bashkisë së qytetit, kundër projektit TID, një nismë e qeverisë shqiptare që synon të kthejë zonën arkeologjike të qytetit në një park të madh urban.

Mësohet se ditën e sotme qytetarët do zhvillojnë edhe një takim në Bashki, ku ka mbërritur edhe kryeministri Edi Rama, për të diskutuar me ta mbi projektin.

Kryetari i grupit parlamentar në Partinë Socialiste, Taulant Balla, njëkohësisht drejtues politik i PS-së për diasporën, gjatë pjesëmarrjes në Konferencën e Sigurisë në Mynih, u takua me anëtarin e Bundestagut, anëtar i Grupit CDU/CSU, Carl-Philipp Sassenrath.

Gjatë takimit, Balla bëri të ditur se ndanë mendime mbi procesin e anëtarësimit të Shqipërisë në Bashkimin Evropian si dhe mbi çështje të tjera.

Balla nënvizoi se “me këtë ritëm reformash, e reflektuar në ecurinë e mbylljes së kapitujve të marrëveshjes për anëtarësimin e Shqipërisë në BE, objektivi ynë, Shqipëria në 2030 anëtare e BE është plotësisht i arritshëm”.

Një ditë më parë Balla u takua edhe me Richard Grenell, të dërguarin special të presidentit Donald Trump për misionet speciale të ShBA si dhe me presidenten e Bullgarisë, Iliana Iotova.

Një 63-vjeçar ka rënë në prangat e policisë së kryeqytetit për armëmbajtje pa leje.

Gjatë kontrollit në banesën e Muhamet Çeçës në fshatin Kllojkë, Bërzhitë, blutë sekuestruan 2 armë zjarri(një automatik dhe një pushkë), 3 armë gjahu, 2 armë të ftohta dhe municion luftarak.

“Shërbimet e Komisariatit të Policisë Nr. 1, në vijim të punës për parandalimin dhe goditjen e rasteve të armëmbajtjes pa leje, organizuan dhe finalizuan operacionin policor të koduar “Kllojka” në kuadër të të cilit, u arrestua shtetasi:

M. Ç., 63 vjeç, banues në fshatin Kllojkë, Bërzhitë.

Në vijim të operacionit, gjatë kontrollit në banesën e 63-vjeçarit, Policia gjeti dhe sekuestroi në cilësinë e provës materiale, 2 armë zjarri(një automatik dhe një pushkë), 3 armë gjahu, 2 armë të ftohta dhe municion luftarak”, njoftoi sot policia.

Materialet procedurale iu referuan Prokurorisë së Tiranës, për veprime të mëtejshme.

Vdekja e Jeffrey Epstein në vitin 2019 vazhdon të ngjallë polemika dhe dyshime të forta në nivel global. Ndërsa versioni zyrtar thotë se Epstein kreu vetëvrasje gjatë paraburgimit, në pritje të gjyqit për shfrytëzim seksual të të miturve, një valë e re zbulimesh dhe dokumentesh të publikuara nga Departamenti i Drejtësisë i SHBA ka forcuar dyshimet se pas vdekjes së tij mund të fshihet diçka më e errët.

Një nga zbulimet më tronditëse është regjistrimi i një “flash-i portokalli” në një video sigurie që kap momentet e fundit të Epstein në Qendrën Korrektuese Metropolitane në Nju Jork (MCC). Pamjet tregojnë një figurë të paqartë, të veshur me portokalli, që lëviz drejt zonës së qelisë së tij rreth një orë para se trupi i 66-vjeçarit të gjendej i pajetë.

Pyetja që shtrohet është: kush ishte personi me veshje portokalli dhe si u gjend pranë qelisë së Epstein në orën 22:39, kur të burgosurit duhej të ishin të mbyllur për natën? Edhe pse të burgosurit veshin uniforma portokalli, momenti i shfaqjes së figurës konsiderohet kritik, pasi më pak se tetë orë më vonë Epstein do të gjendej i vdekur.

Termi “flash of orange” ka shkaktuar reagime të forta dhe ka rindezur teoritë se rrethanat e vdekjes së tij nuk janë sqaruar plotësisht.

Zbulimet nuk kufizohen vetëm te videoja. Dokumente të reja tregojnë se Departamenti i Drejtësisë kishte përgatitur një njoftim zyrtar për vdekjen e Epstein disa orë përpara se ai të gjendej i pajetë. Kjo “rastësi” ka ushqyer teoritë për një mbulim të organizuar, ndonëse zyrtarët e kanë cilësuar si “gabim teknik”.

Po ashtu, dokumentet zbulojnë diskutime mes avokatëve të Epstein dhe autoriteteve për një marrëveshje të mundshme bashkëpunimi, ku ai do të jepte informacione për persona të tjerë në këmbim të një dënimi më të lehtë. Frika se ai mund të zbulonte emra të fuqishëm të përfshirë në aktivitete kriminale ka forcuar dyshimet se ai mund të jetë eliminuar për t’u heshtur.

Në disa materiale përmendet edhe një lidhje e mundshme e Epstein me rrjete kriminale ruse dhe përdorimi i kontakteve të tij për mbledhje informacioni shantazhues. Marrëdhëniet e tij me figura të fuqishme politike dhe ekonomike në mbarë botën kanë ushqyer teorinë se vdekja e tij mund të ketë qenë pjesë e një plani për të shmangur ekspozimin e një rrjeti më të gjerë.

Sipas dokumenteve të rrjedhura, udhëtimi i fundit i Epstein që nga mbërritja e tij në burgjet e New York City deri në vdekjen e tij përfshinte shumë kthesa dhe kthesa. Vonesa në gjyqin e tij dhe përballimi i presionit në rritje nga financieri i akuzuar krijuan një atmosferë të tensionuar:

6 korrik 2019: Arrestimi i Epstein nga FBI pas një fluturimi nga Parisi dhe transferimi i tij në MCC në Nju Jork, një institucion i mbipopulluar dhe me probleme mirëmbajtjeje.

10 korrik: Ai deklarohet i pafajshëm për akuzat për trafikim seksual dhe komplot, dhe vendoset në Njësinë e Veçantë të Strehimit për arsye sigurie.

23 korrik: Pas një tentative të dyshuar vetëvrasjeje, vendoset nën mbikëqyrje për rrezik vetëvrasjeje.

Më 9 gusht, në prag të vdekjes së tij, shoku i qelisë, Ephraim Reyes, largohet dhe Epstein mbetet vetëm, pavarësisht shqetësimeve për sigurinë e tij. Gardianët duhej të kontrollonin qelinë çdo 30 minuta, por u raportuan mangësi serioze, ndërsa dy kamera sigurie nuk funksiononin.

Misteri thellohet nga regjistrimi i orës 22:39, i cili tregon një figurë të turbullt portokalli që lëviz drejt zonës së qelisë së Epstein. Rojet dhe stafi përgjegjës i burgut mohojnë çdo mundësi ndërhyrjeje nga të burgosur të tjerë, ndërsa hetimi i FBI-së sugjeron se kjo figurë mund të jetë ose një i burgosur që është transferuar në atë zonë ose edhe një punonjës i burgut që mbante çarçafë.

Provat e reja nga hetimi dhe pamjet video të mbikëqyrjes po rivendosin teoritë e një vrasjeje metodike, në vend të vetëvrasjes. Fakti që sendet në qelinë e Epstein ishin zhvendosur dhe trupi i tij ishte hequr para se të mbërrinin autoritetet përforcon dyshimet se skena e vdekjes së tij ishte ndryshuar qëllimisht.

Përveç figurës misterioze në video, hetimet zbuluan se disa objekte në qelinë e Epstein ishin zhvendosur dhe trupi i tij ishte hequr para mbërritjes së autoriteteve hetimore, duke shtuar dyshimet për manipulim të vendit të ngjarjes.

Vlen të përmendet se mjeku ligjor Dr. Michael Baden, i cili mbikëqyri autopsinë e trupit të Epstein, ka deklaruar publikisht se lëndimet në qafën e Epstein nuk janë në përputhje me lëndimet e shkaktuara nga varja, por përkundrazi ato që vijnë nga mbytja.

Dr. Baden theksoi se forca e nevojshme për të shkaktuar lëndimet e Epstein tregon se nuk ishte vetëvrasje, por një vrasje e qëllimshme. Kjo përforcon teoritë e vrasjes dhe u bën thirrje autoriteteve ta rishqyrtojnë çështjen bazuar në provat e reja.

Një ngjarje e rëndë është shënuar pak pas mesnate në hotel Gjuta në Tiranë.

Një 18-vjeçare, Natalia Murtati, është vetëplagosur me armë zjarri në dhomën e hotelit të të dashurit të saj, ndërsa ky i fundit, Erisjaldo Gjuta së bashku me familjarët ndodheshin në katin e parë të biznesit.

Pasi kanë dëgjuar të shtënat ata janë ngjitur në dhomë dhe kanë gjetur 18-vjecaren e plagosur. Nëna e 22-vjeçarit dhe nipi i bashkëshortit të saj e kanë transportuar vajzën në spital, duke deklaruar se e kanë gjetur në rrugë të plagosur dhe e kanë ndihmuar.

Aktin ajo ka deklaruar se e ka kryer pasi ‘ka bërë shumë gabime në jetë’.

Policia ndërkohë ka vënë në pranga nënën e të dashurit të vajzës, Mirvetja Gjuta, xhaxhain e tij Vladimir Gjuta, ndërsa janë shpallur në kërkim partneri i 18-vjeçares Erisjaldo Gjuta, babai i tij  Sajmir Gjuta dhe kushëriri Elvir Gjuta, të cilët akuzohen për fshehje krimi dhe pastrim gjurmësh.

Njoftimi i plotë i policisë:

Tiranë

Zbardhet ngjarja e ndodhur pak pas mesnate, ku një 18-vjeçare u vetëplagos me armë zjarri.

Arrestohen 2 shtetas dhe shpallen në kërkim 3 të tjerë.

Më datë 14.02.2026, rreth orës 00:15, në spital është paraqitur e plagosur me armë zjarri shtetasja N. M., 18 vjeçe, e cila ndodhet jashtë rrezikut për jetën.

Nga veprimet e shpejta hetimore të kryera nga specialistët për Hetimin e Krimeve kundër Jetës dhe Pronës, si dhe nga kqyrja e pamjeve të kamerave të sigurisë, rezultoi se ngjarja ka ndodhur në ambientet e një subjekti në Sauk, ku 18-vjeçarja dyshohet se është vetëplagosur me armë zjarri.

E dëmtuara është transportuar në spital nga shtetasja M. R. (Gj) dhe shtetasi E. Gj., 24 vjeç.

Në vijim të veprimeve procedurale:
-u arrestuan në flagrancë shtetasit V. Gj., 46 vjeç dhe M. R. (Gj), 48 vjeçe, për veprat penale “Moskallëzim i krimit” dhe “Veprime që pengojnë zbulimin e së vërtetës”;
-u shpallën në kërkim shtetasit S. Gj., 49 vjeç, dhe E. Gj., 24 vjeç, për veprat penale “Moskallëzim i krimit” dhe “Veprime që pengojnë zbulimin e së vërtetës”, si dhe shtetasi E. Gj., 22 vjeç, për veprat penale “Moskallëzim i krimit”, “Veprime që pengojnë zbulimin e së vërtetës” dhe “Armëmbajtja pa leje”.

Këta shtetas dyshohet se kanë prishur provat në vendin e ngjarjes dhe nuk kanë kallëzuar krimin.

Vijon puna për gjetjen dhe sekuestrimin e armës së zjarrit të përdorur në ngjarje, si dhe për kapjen e 3 shtetasve të shpallur në kërkim, me qëllim dokumentimin e plotë ligjor të rastit.

Materialet procedurale iu referuan Prokurorisë, për veprime të mëtejshme.

Gjatë fjalimit në Konferencën e Sigurisë së Munihut, sekretari amerikan i Shtetit, Marco Rubio, tha se SHBA-ja dhe Evropa “janë bashkë”.

“Amerika po udhëheq rrugën për një shekull të ri të prosperitetit dhe ne duam që këtë ta bëjmë së bashku me ju, aleatët tanë të çmuar dhe miqtë tanë më të vjetër”, tha Rubio gjatë adresimit të tij kyç në këtë konferencë.

Duke vepruar së bashku me Evropën, tha ai, kjo “do të ndihmojë në rivendosjen e një politike të arsyeshme”.

Fjalimi i Rubios u ndjek nga afër pasi u mbajt në një kohë kur aleanca transatlantike po përjeton tensione dhe vjen pas fjalimit të vitit të kaluar të nënpresidentit amerikan, JD Vance, kur ai kritikoi ashpër udhëheqësit evropianë për rolin e tyre në atë që e përshkroi si erozion të demokracisë në kontinent.

Duke iu përgjigjur shqetësimeve për një divorc të mundshëm transatlantik, sekretari Rubio tha se “ky nuk është as qëllimi ynë dhe as dëshira jonë”.

“Ne nuk kemi nevojë të zhbëjmë institucionet globale të rendit të vjetër që kemi ndërtuar së bashku. Por, ato duhet të reformohen”, tha Rubio. Shtetet e Bashkuara nën udhëheqjen e presidentit Donald Trump, tha ai, synojnë ta udhëheqin “restaurimin” botëror.

Rubio po udhëheq delegacionin amerikan – më të madhin deri më tani që përbëhet nga më shumë se çereku i Senatit të SHBA-së – gjatë ngjarjes vjetore që zgjat tri ditë, dhe ku marrin pjesë qindra udhëheqës evropianë, ligjvënës, zyrtarë ushtarakë, akademikë dhe të tjerë. Në mesin e pjesëmarrësve është edhe kryeministri i Kosovës, Albin Kurti, i cili u pa në audiencë gjatë fjalimit të Rubios.

Sekretari Rubio lavdëroi trashëgimin e pasur kulturore të Evropës, duke theksuar se “ne amerikanët… gjithmonë do të jemi një fëmijë i Evropës”.

Një raport i shkruar nga organizatorët dhe i publikuar para konferencës fliste për ardhjen e “politikës shkatërruese” dhe deklaronte: “Më i fuqishmi nga ata që përdorin sëpatën ndaj rregullave dhe institucioneve ekzistuese është presidenti amerikan Donald Trump”.

Konferenca në Munih mbahet në një kohë trazirash botërore, përfshirë mundësinë e sulmeve ajrore amerikane ndaj Iranit dhe luftën e Rusisë në Ukrainë, konflikt që nisi në shkurt të vitit 2022.

Sa i përket konfliktit në Ukrainë, Rubio tha se “çështjet për t’i dhënë fund luftës janë ngushtuar, por lajmi i keq është se tani kanë mbetur pyetjet më të vështira”.

Trump e ka bërë prioritet ndaljen e luftës në Ukrainë, por Moska deri më tani ka shfaqur pak vullnet për kompromis, duke bërë që të ngecin dy rundet e fundit të bisedimeve mes SHBA-së, Rusisë dhe Ukrainës.

Rubio pritet të takohet me presidentin ukrainas, Volodymyr Zelensky, më vonë gjatë 14 shkurtit në margjinat e konferencës.

Në një sesion të shkurtër pyetjes pas fjalimit me Wolfgang Ischingerin, kryetarin e Konferencës së Sigurisë në Munih, Rubio tha se “çfarë nuk mund të përgjigjem dhe çfarë ne do të vazhdojmë të testojmë është nëse ekziston një zgjidhje që Ukraina mund ta pranojë dhe Rusia mund ta pranojë dhe do të thosha që deri më tani kjo nuk është arritur”.

Duke folur në një intervistë për Bloombergun pas fjalimit në Munih, Rubio tha se “nuk mendoj që është e mundur për Rusinë që madje të arrijë edhe objektivat fillestare që ajo kishte në fillim të kësaj lufte”.

Një 46-vjeçar ka rënë në prangat e policisë pasi qarkullonte me makinë i armatosur dhe në gjendje të dehur.

Ai u kap nga uniformat blu teksa po lëvizte me makinën tip ‘Volkswagen’ në segmentin rrugor Burrel-Komsi.

Arma e zjarrit pushkë dhe automjeti u sekuestruan si provë materiale.

“Në vijim të punës për sigurimin e informacioneve me qëllim kapjen dhe arrestimin e personave që qarkullojnë të armatosur apo mbajnë në banesë armë zjarri pa leje, shërbimet e Komisariatit të Policisë Mat bazuar në informacionet e siguruara për një shtetas që qarkullonte me automjet në gjendje të dehur dhe i armatosur, organizuan dhe finalizuan operacionin policor të koduar “Aksi”.

Si rezultat i operacionit, në aksin rrugor “Burrel-Komsi”, shërbimet e Policisë konstatuan dhe ndaluan automjetin tip “Volkswagen” me të cilin udhëtonte 46-vjecari, i armatosur.

Gjatë kontrollit fizik të automjetit, shërbimet e Policisë gjetën të fshehur dhe sekuestruan në cilësinë e provës materiale 1 armë zjarri pushkë.

Në përfundim të veprimeve procedurale, u arrestua në flagrancë shtetasi V.N., 46 vjeç, banues në fshatin Drita, Burrel, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Drejtimi i automjetit në mënyrë të parregullt”, njoftoi sot policia.

Materialet procedurale i kaluan Prokurorisë së Dibrës, për veprime të mëtejshme

18-vjeçarja Natalie Murtati e cila u vetëplagos me armë zjarri pas mesnate ndodhet në gjendje stabël në spitalin e Traumës, koshiente.

Dyshohet të ketë marr një plumb në pjesën e kraharorit, hyrje-dalje. Aktualisht ndodhet në observim, nën kujdesin e stafit mjekësor.

Milani arriti një fitore të rëndësishme përballë Pisas në sfidën hapëse të javës së 25-të të Serie A me rezultatin 1-2.

Takimi nisi mjaft mirë për të besuarit e Allegrit, por goli erdhi në minutën e 39’ nga Loftus-Cheek.

Në minutën e 56’, Fullkrug gaboi nga pika e bardhë e 11-metërshit, duke humbur mundësinë të dyfishonte shifrat.

Loyola barazoi në minutën e 71’ duke shtangur kuqezinjtë, por në minutën e 85’, Luka Modriç siguroi tre pikët.

“Djalli” u detyrua ta mbyllte ndeshjen me 10 lojtar, pas daljes me karton të kuq të Rabiot në minutën e 91’.

Me këtë sukses Milani shkon në kuotën e 53 pikëve, 5 më pak nga Interi kryesues.

GOLAT

Një 15 vjeçar i vdekur dhe dy të tjerë në gjendje të rënde por jashtë rrezikut për jetën.

Ky është bilanci tragjik i një aksidenti të ndodhur mbrëmjen e së premtes në periferi të Athinës.

Sipas mediave greke, njëri prej adoleshentëve mori nga çanta çelësat e automjetit të së ëmës dhe në vazhdim së bashku me dy shokët e tij, mes tyre njëri shqiptar, nisën të ecin me shpejtësi nëpër rrugët e zonës.

Në rrethana që ende nuk dihen, automjeti që po lëvizte me shpejtësi tej normave, doli nga rruga dhe u përplas me një pemë, duke lënë të vdekur në vend njërin prej dy pasagjerëve 15 vjeçar, ndërsa drejtuesi i automjetit dhe adoleshenti tjetër u dërguan në spital jashtë rrezikut për jetën.

Momenti i përplasjes

Ende nuk dihen rrethanat e ngjarjes, por policia njoftoi se ka ndaluar në spital drejtuesin e automjetit si dhe prindërit e tij, ndërsa trupi i viktimës u dërgua në morg.

Presidenti i Serbisë, Aleksandar Vuçiç, duket se është shqetësuar shumë për aleancën mes Kroacisë, Kosovës dhe Shqipërisë.

Duke folur para gazetarëve në margjinat e Konferencës së Sigurisë në Munih, Vuçiç theksoi se ende po pret një përgjigje për pyetjen se pse po krijohet një aleancë ushtarake mes Prishtinës, Tiranës dhe Zagrebit.

Ai paralajmëroi se kjo është arsyeja pse Serbia do të investojë më shumë në mbrojtje.

“Me formimin e një aleance ushtarake të Kroacisë me Prishtinën dhe Tiranën, ne jemi seriozisht të rrezikuar dhe do të merremi me këtë çështje me shumë seriozitet. Së shpejti do të marr pjesë në kolegjiumin e Shtabit të Përgjithshëm dhe të Ministrisë së Mbrojtjes [të Serbisë] dhe do të vizitoj të gjitha fabrikat e industrisë ushtarake. Do të investojmë një shumë të madhe shtesë të parave në fabrikat e industrisë ushtarake”, tha Vuçiç, duke shtuar se nga tani e tutje “30, ndoshta deri në 40 për qind” e prodhimit ushtarak do të destinohet drejtpërdrejt për Serbinë.

Në mars të vitit të kaluar, Kosova, Shqipëria dhe Kroacia nënshkruan një deklaratë bashkëpunimi në fushën e sigurisë dhe mbrojtjes. Në paktin mbrojtës thuhet se tri shtetet do të bashkëpunojnë për rritjen e sigurisë dhe stabilitetit në Evropën Juglindore. Ministrat e mbrojtjes të tri vendeve mbajtën një takim më herët gjatë muajit shkurt, ku diskutuan për zbatimin e kësaj deklarate.

Ndërkaq, pas një takimi mes gjeneralëve të ushtrive të tri shteteve të mbajtur më 11 shkurt u tha se Kosova, Shqipëria dhe Kroacia do të zhvillojnë stërvitjen e parë të përbashkët gjatë këtij viti.

Këtë deklaratë për bashkëpunim në fushën e mbrojtjes, Vuçiç e ka përshkruar si “një aleancë ushtarake dhe sulmuese kundër serbëve dhe Serbisë”.

Vuçiç po merr pjesë në Konferencën e Sigurisë në Munih, e cila është një nga mbledhjet më të rëndësishme ndërkombëtare gjeopolitike të vitit. Në konferencë marrin pjesë qindra udhëheqës dhe politikanë nga e gjithë bota, në mesin e tyre edhe kryeministri i Kosovës, Albin Kurti.

Fokus i konferencës së këtij viti është e ardhmja e aleancës transatlantike dhe përpjekjet për t’i dhënë fund luftës së Rusisë kundër Ukrainës.

Në margjinat e konferencës, presidenti i Serbisë u takua me presidentin e Këshillit Evropian, Antonio Costa, i cili i shprehu udhëheqësit serb pakënaqësitë e Brukselit për ligjet që janë miratuar së voni nga Beogradi sa i përket fushës së drejtësisë.

“Nëse Komisioni i Venecias jep komente negative, ne do të veprojmë në përputhje me to. Ne jemi një shtet i pavarur dhe sovran dhe hartojmë ligjet tona”, tha Vuçiç.

Ai gjithashtu u takua me ministrin e Punëve të Jashtme të Republikës Popullore të Kinës, Wang Yi, dhe njoftoi se në gjysmën e parë të këtij viti do të vizitojë Pekinin, ku do të takohet me presidentin kinez, Xi Jinping./REL