Pamjet e filmuara me dron nga protesta e zhvilluar në Tiranë tregojnë pjesëmarrje të lartë të qytetarëve, me mijëra protestues të mbledhur në shesh dhe përgjatë akseve kryesore të kryeqytetit.

Nga ajri, rreshti i protestuesve duket i pandërprerë, ndërsa flamujt kuqezi dominojnë pamjet e tubimit. Qytetarë të ardhur nga e gjithë Shqipëria, por edhe nga diaspora, i janë bashkuar protestës së ditës së 21-të kundër qeverisë.

Pamjet me dron kanë dokumentuar përmasat e tubimit, ku mijëra njerëz kanë marshuar drejt Kryeministrisë duke kërkuar dorëheqjen e kryeministrit dhe plotësimin e kërkesave të protestuesve.

Atmosfera në qendër të Tiranës është shoqëruar nga flamuj kombëtarë, thirrje dhe pjesëmarrje masive të qytetarëve.

Mijëra qytetarë janë mbledhur në Tiranë në ditën e 21-të të protestës kundër qeverisë së Edi Ramës.

Në tubim janë bashkuar edhe pjesëmarrës nga diaspora, të cilët kanë posaçërisht në mbështetje të revoltës që vijon prej ditësh.

Ashtu si në ditët e mëparshme, protesta nisi me grumbullimin e qytetarëve në sheshin “Skënderbej”, për t’u zhvendosur më pas drejt Kryeministrisë, ku do të mbahen fjalime. Kërkesa e protestuesve mbetet dorëheqja e kryeministrit.

Prania e diasporës në protestë konsiderohet një mesazh solidariteti dhe mbështetjeje për protestuesit, duke treguar se jehona e pakënaqësive qytetare ka kapërcyer kufijtë e vendit dhe ka mobilizuar edhe shqiptarët që jetojnë jashtë.

Protesta e zhvilluar në Tiranë kundër qeverisë ka hyrë sot në ditën e saj të 21-të, ndërsa organizatorët e kanë cilësuar atë si një protestë mbarëkombëtare.

Qytetarëve të mbledhur në kryeqytet u janë bashkuar edhe shqiptarë të ardhur nga diaspora, të cilët kanë mbërritur në Tiranë gjatë ditës. Disa prej tyre kanë parakaluar me automjete në akset kryesore të qytetit, duke valëvitur flamuj kombëtarë.

Sipas organizatorëve, pjesëtarët e diasporës janë grumbulluar në bulevardin “Zogu i Parë”, nga ku do t’u bashkohen protestuesve të tjerë në sheshin “Skënderbej”.

Më pas, protestuesit pritet të vijojnë marshimin drejt godinës së Kryeministrisë, ku do të zhvillohet pjesa kryesore e tubimit të kësaj mbrëmjeje.

Shërbimet e Njësisë Speciale Delta, të planizuara me shërbim në mbështetje të Komisariatit të Policisë Kufitare Sarandë, kanë ndërhyrë me profesionalizëm dhe në kohë për t’i ardhur në ndihmë dy turistëve ukrainas, të cilët rrezikuan jetën në det për shkak të përkeqësimit të motit.

Gjatë patrullimit në zonën e Ksamilit, efektivët konstatuan një mjet lundrues tip skaf, i marrë me qira nga turistët, që po fundosej si pasojë e erërave të forta dhe kushteve të rënduara atmosferike. Në bord ndodheshin dy shtetas ukrainas.

Menjëherë, efektivët e Njësisë Speciale Delta ndërhynë duke bërë të mundur shpëtimin e dy turistëve, të cilët fatmirësisht janë në gjendje të mirë shëndetësore.

Aktualisht po punohet për nxjerrjen e mjetit lundrues në breg.

Policia Kufitare mbetet e angazhuar maksimalisht për garantimin e sigurisë së jetës së qytetarëve dhe turistëve në hapësirat detare të vendit.

Shërbimet e Komisariatit të Policisë Krujë kanë arrestuar 21-vjeçarin Marvin Ferra, i cili vodhi më 15 qershor një pikë karburanti në Krastë. Po ashtu, i riu rezulton se më 19 qershor ka hyrë i maskuar dhe me armë zjarri automatike në oborrin e shtetases M.K., në fshatin Radë, me qëllim vjedhjen.

Gjatë operacionit për kapjen e tij, 21-vjeçari ka tentuar t’u largohet forcave të policisë, por është neutralizuar 300 metra larg vendit të ngjarjes nga Policia e Krujës.

Ndërkohë, policia ka sekuestruar edhe dy armë zjarri, një automatik dhe një pushkë, që posedoheshin nga i riu.
974f6134-af14-4d06-aef5-4d66c4524ee6

Një ndërhyrje e shpejtë e Policisë Kufitare në Himarë ka shmangur një ngjarje me pasoja të rënda në det, pasi një gomone po lëvizte në mënyrë të pakontrolluar dhe me shpejtësi, pa asnjë person në bord.

Ngjarja ndodhi në zonën e Kepit të Rigonit, përballë plazhit të Llamanit, ku shërbimet e Policisë Kufitare ndërhynë menjëherë pas marrjes së njoftimit.

Nga verifikimet rezultoi se drejtuesi i mjetit lundrues, shtetasi E.M., 35 vjeç, banues në Orikum, kishte rënë në det gjatë lëvizjes së gomones. Ai kishte arritur të dilte në breg në gjirin e Llamanit, duke pësuar dëmtime në këmbë. Pas transportimit në spital, mësohet se ndodhet jashtë rrezikut për jetën.

Ndërkohë, gomonia paraqiste rrezik për mjetet e tjera lundruese dhe për pushuesit në zonë. Një punonjës i Njësisë Policore Detare u hodh në bordin e saj dhe arriti ta ndalonte, duke shmangur një incident të mundshëm.

Pas neutralizimit të situatës, mjeti lundrues u transportua në Pikën e Kontrollit Kufitar në Himarë për veprime të mëtejshme procedurale.

Kreu i Partisë Demokratike, Sali Berisha, gjatë një bashkëbisedimi me qytetarët në rrjetet sociale, e cilësoi protestën e kësaj mbrëmjeje si “protestën më kulmore rinore qytetare” të zhvilluar në vend.

Sipas Berishës, gjatë javës së fundit Shqipëria ka përjetuar protestat më të mëdha qytetare dhe rinore, ndërsa tha se qytetarë, mbështetës të opozitës dhe emigrantë po i drejtohen Tiranës për t’iu bashkuar protestës.

“Diaspora shqiptare ka mësyrë vendin e vet dhe rrugët, aeroportet e tragetet sjellin dhjetëra mijëra shqiptarë këtë natë në protestën më kulmore rinore qytetare”, deklaroi ai.

Berisha u ndal edhe te reagimet ndërkombëtare lidhur me çështjen e Zvërnecit, duke përmendur diskutimet në institucionet europiane dhe duke e cilësuar situatën politike në vend si një zhvillim historik.

Nga ana tjetër, kreu i opozitës akuzoi kryeministrin Edi Rama se po sulmon rrjetet sociale dhe zërat kritikë, ndërsa theksoi se protesta do të vazhdojë deri në plotësimin e kërkesave të saj.

Sipas Berishës, zhvillimet e fundit po afrojnë fundin e qeverisjes aktuale, të cilën ai e cilësoi si një regjim të refuzuar nga qytetarët.

Kryeministri Edi Rama ka komentuar protestat kundër projektit turistik në Zvërnec, duke deklaruar se në epokën e rrjeteve sociale protestat nuk zhvillohen më vetëm në shesh, por edhe në hapësirën dixhitale.

Gjatë mbledhjes së Grupit Parlamentar të PS, Rama tha se algoritmet e rrjeteve sociale favorizojnë konfliktin, zemërimin dhe përplasjet, ndërsa sipas tij qetësia dhe arsyetimi nuk shpërblehen.

“Algoritmi nuk shpërblen qetësinë, nuk e do arsyen dhe favorizon konfliktin, indinjatën dhe frikësimin, sepse këto prodhojnë klikime dhe klikimet prodhojnë para”, u shpreh kryeministri.

Sipas Ramës, protestat e javëve të fundit treguan se sheshi është shndërruar në një “studio televizive”, ku prodhohet material për rrjetet sociale dhe për të ushqyer algoritmet.

“Kush mendon se me like dhe followers bën politikë, bën gabim. Sheshi është vendi ku filmohet materiali për ta ushqyer algoritmin”, deklaroi ai.

Rama shtoi se kjo është një betejë që, sipas tij, nuk lidhet me ndarjet tradicionale mes të majtës dhe të djathtës, por me ndikimin që algoritmet dhe ekonomia e vëmendjes kanë marrë në politikën moderne.

Qytetarë shqiptarë që jetojnë dhe punojnë jashtë vendit kanë nisur të mbërrijnë në pikat kufitare të vendit për t’iu bashkuar protestës kundër qeverisë së kryeministrit Edi Rama.

Sipas informacioneve dhe pamjeve të publikuara në rrjetet sociale, një pjesë e emigrantëve po udhëtojnë drejt Tiranës për të marrë pjesë në tubimin e paralajmëruar, duke shprehur mbështetjen e tyre për kërkesat e protestuesve.

Ndërkohë, në disa akse rrugore që lidhin veriun e vendit me kryeqytetin është vërejtur rritje e qarkullimit të automjeteve, ndërsa pritet të shihet se sa i madh do të jetë pjesëmarrja e diasporës në protestë.

Kryeministri Edi Rama ka ‘thumbuar’ deputeten Marjana Koçeku (Neomalsorja) e cila u largua nga PS dhe do të qëndrojë në Kuvend si ligjvënëse e pavarur.

Gjatë fjalës së tij në mbledhjen e Zgjeruar të Grupit Parlamentar të PS, Rama tha se “ata që kalëruan këtë parti sa mudën dhe kur ranë nga kali filluan ti gjuajnë me këpucët e blera majë kalit”. “Një grumbullim i hatashëm gjërash që as janë njësoj as janë bashkë, por u mblodhën sëbashku në një prurje që nxorri në bregun e gjithë atij oqeani virtual deri te dhëmbë të atyre që e kalëruan këtë parti sa mundën dhe kur ranë nga kali filluan ti gjuajnë me këpucët e blera majë kalit”, tha mes të tjerash Rama.

Kryetari i Partisë Demokratike Sali Berisha ka reaguar në lidhje me një deklaratë prej një prej protestuesve në protestën e ditës së djeshme.
Berisha shkruan se, deklarata se Argita Berisha dhe familja e kryeministrit Berisha më kanë marrë 63 hektar tokë në Divjakë ‘është një gënjeshtër e plotë dhe shpifje e turpshme’.

Reagimi i Kryetarit të PD, Sali Berisha:

Kur kauzat ngjyhen me shpifjet e qeverisë
Lidhur me deklaratën e një shpifëseje të paguar dje në protestë, se ‘Argita Berisha dhe familja e kryeministrit Berisha më kanë marrë 63 hektar tokë në Divjakë’, deklaroj se: kjo është një gënjeshtër e plotë dhe shpifje e turpshme.
Argita Berisha dhe familja e ish-kryeministrit Berisha nuk kanë dhe nuk kanë patur kurrë asnjë metër katror tokë në Divjakë dhe nuk i kanë marrë kujt kurrë asnjë metër katror tokë.
Sali Berisha dhe familja e tij është hetuar për 35 vjet nga militantët e Edi Ramës dhe në përfundim rezultoi se ata kurrë nuk kanë përfituar asnjë lekë publik, asnjë tender dhe asnjë cm2 tokë, publike e as private të tjetërkujt.
Pasi dështuan me shpifjet për interesat e mia e të familjarëve të mi në kullat e Tiranës, ditën kur Edi Rama duhet të jepte përgjigje për vjedhjen e pronës publike të provuar me dokumentat e rastit të hotelit Zig-Zag, duke qenë që përgjigje nuk jepte dot zgjodhi shpifjen.
Përlyerja e kauzave publike me gënjeshtra të dukshme është mjet i qëllimshëm i asfiksimit të kauzës dhe oksigjenimit të kësaj qeverie që ka vjedhur pronat publike e private të shqiptarëve dhe kërkon të fshihet pas shpifësave të saj.
Duke përfunduar Sali Berisha mbështet fuqishëm protestën e rinisë dhe qytetarëve, por natyrisht jo shpifjet dhe shpifësit që e dëmtojnë kauzën e saj.

Kryeministri Edi Rama ka komentuar debatin dhe protestat e zhvilluara gjatë javëve të fundit lidhur me projektin e investimit në Zvërnec, gjatë mbledhjes së zgjeruar të Grupit Parlamentar të PS.

Sipas Ramës, Shqipëria është kthyer për rreth 20 ditë në “syrin e një cikloni dixhital”, ku, sipas tij, janë përfshirë aktivistë, figura publike, media, parti politike brenda dhe jashtë vendit, si edhe kundërshtarët politikë të qeverisë.

“Befas Zvërneci u bë kërthiza e botës, ku po vendosej fati i ngrohjes globale. Bulevardi i Tiranës u bë sheshi ku qindra mijëra njerëz, sipas vetë Sanders, iu turrën oligarkisë botërore”, u shpreh Rama.

Kreu i qeverisë përdori tone ironike ndaj kundërshtarëve të projektit, duke deklaruar se “flamingot u bashkuan me fundin e kazanit dixhital”, ndërsa i cilësoi si “karavidhe opozitare” kritikët e qeverisë.

Deklaratat e Ramës vijnë në një kohë kur projekti i investimit në Zvërnec ka shkaktuar debate të forta publike, protesta dhe reagime nga aktivistë, organizata mjedisore dhe opozita.

Deputetja e Partisë Demokratike, Jorida Tabaku, ka publikuar një video në rrjetet sociale ku analizon ndikimin që ekonomia informale dhe pastrimi i parave kanë pasur mbi ekonominë shqiptare.

Duke iu referuar goditjes së fundit të SPAK ndaj një skeme të dyshuar të pastrimit të parave në sektorin e ndërtimit, Tabaku argumenton se ekonomia shqiptare është deformuar nga hyrja e parave të krimit të organizuar, duke krijuar pasoja të rënda për sektorët produktivë dhe për qytetarët e zakonshëm.

Sipas saj, tre janë pasojat kryesore të këtij modeli ekonomik: rritja e papërballueshme e çmimeve të banesave, kriza në bujqësi dhe goditja ndaj industrisë fason.

Tabaku thekson se sektori i ndërtimit në Tiranë është kthyer në një treg të paarritshëm për shtresën e mesme dhe të rinjtë, ndërsa çmimet e apartamenteve nuk kanë më asnjë lidhje me nivelin e të ardhurave në vend. Ajo argumenton se fluksi i parave informale ka deformuar tregun, duke e bërë strehimin një luks për shumicën e qytetarëve.

Deputetja demokrate ndalet gjithashtu tek bujqësia, duke e konsideruar atë një nga viktimat kryesore të zhvlerësimit të euros dhe mungesës së politikave mbështetëse. Sipas saj, sektori ka humbur konkurrueshmërinë në tregjet rajonale dhe europiane, duke dëmtuar qindra mijëra fermerë dhe duke i kushtuar ekonomisë shqiptare miliarda lekë në prodhim të humbur.

Një tjetër sektor i goditur, sipas Tabakut, është industria fason, e cila për vite me radhë ka qenë një nga eksportuesit më të mëdhenj dhe punëdhënësit kryesorë në vend. Ajo argumenton se zhvlerësimi i euros dhe deformimet e ekonomisë kanë sjellë mbylljen e dhjetëra bizneseve dhe humbjen e vendeve të punës.

Në përfundim, Tabaku lidh problemet ekonomike me protestat qytetare të javëve të fundit, duke argumentuar se pakënaqësia e qytetarëve buron nga një sistem që favorizon një pakicë të lidhur me pushtetin në kurriz të shumicës së shqiptarëve.

“Ky është sistemi që duhet të ndryshojmë. Është sistemi i pakicës që ka hequr garën nga ekonomia, ka dëmtuar prodhimin dhe ka marrë frymën e ekonomisë shqiptare për më shumë se një dekadë”, shprehet Tabaku në mesazhin e saj.

Një 44-vjeçar ka rënë në prangat e Policisë së Tiranës gjatë një operacioni anti-drogë të zhvilluar në kryeqytet.

Dyshohet se 44-vjeçari Sokol Kuçi furnizonte persona të tjerë me lëndë narkotike kokainë, me qëllim shitjen e saj në doza, si dhe një pjesë të sasisë e shpërndante vetë.

Policia bën të ditur se gjatë operacionit është sekuestruar një sasi prej 1 kilogram e 680 gramë lëndë narkotike kokainë. Ky aksion është vijim i operacionit të koduar ‘Zonat’, të zhvilluar gjatë muajve maj dhe qershor, ku janë sekuestruar rreth 1.5 kilogramë kokainë dhe 1.1 kilogramë heroinë.

Partia Socialiste  mbledh sot, më 20 qershor, Grupin e saj Parlamentar në një takim të zgjeruar, ku në qendër të diskutimeve do të jenë zhvillimet më të fundit politike dhe organizimi i punës së grupit për periudhën në vijim.

Mbledhja është planifikuar të zhvillohet në “Pallatin e Brigadave”, duke nisur nga ora 10:00. Takimin do ta çelë kryetari i Grupit Parlamentar të PS-së, Taulant Balla, ndërsa më pas do t’i drejtohet të pranishmëve kryetari i Partisë Socialiste dhe Kryeministri i Shqipërisë, Edi Rama.

Sipas axhendës së parashikuar, një pjesë e rëndësishme e diskutimeve do t’i kushtohet zhvillimeve politike të ditëve të fundit, si edhe koordinimit të punës së mazhorancës në Kuvend.

Agjenda e mbledhjes së Grupit të PS:

Hapja e mbledhjes nga Kryetari i Grupit Parlamentar të PSSH, Taulant Balla.

• Fjala e Kryeministrit, Kryetarit të PSSH, Edi Rama.

• Informim mbi konkluzionet e Konferencës së 8-të Ndërqeveritare Shqipëri-BE dhe ecurinë e negociatave të anëtarësimit. Pyetje / diskutime jo më shumë se 2 minuta për çdo folës

• Informim mbi paketën e ligjeve që lidhen me procesin e anëtarësimit të Shqipërisë në BE.

Pyetje / diskutime jo më shumë se 2 minuta për çdo folës

• Informim mbi procedurat e ndjekura deri më tani për investimin në Zvërnec dhe interesin e shprehur për zhvillimin turistik të ishullit të Sazanit.

Pyetje / diskutime jo më shumë se 2 minuta për çdo folës

• Informim mbi ecurinë e Reformës Administrative Territoriale. Pyetje / diskutime jo më shumë se 2 minuta për çdo folës

• Informim mbi detyrat e lëna nga mbledhja e kaluar dhe performancën e anëtarëve të Grupit Parlamentar.

Pyetje / diskutime jo më shumë se 2 minuta për çdo folës

Qytetarët janë mbledhur për të 20-tën ditë radhazi në protestë kundër qeverisë, duke vijuar mobilizimin e nisur prej javësh në Tiranë.

Protestuesit u grumbulluan fillimisht në sheshin “Skënderbej”, ndërsa më pas marshuan drejt godinës së Kryeministrisë. Gjatë tubimit, ata mbanin pankarta me mesazhe kundër qeverisë aktuale dhe klasës politike në përgjithësi.

Thirrjet që dominuan protestën ishin “Rama në burg, Berisha në burg” dhe “Rama jepe dorëheqjen”, duke shprehur pakënaqësinë e pjesëmarrësve ndaj situatës politike në vend.

Ndërkohë, në tre protestat e fundit, Policia e Shtetit ka proceduar penalisht dhjetëra protestues. Sipas autoriteteve, procedimet janë kryer për bllokimin e akseve rrugore, prishjen e rendit publik si dhe për shkeljen e fashës orare dhe perimetrit të njoftuar për zhvillimin e tubimit.

Pavarësisht procedimeve, protestuesit kanë deklaruar se do të vijojnë tubimet e tyre edhe në ditët në vijim, duke kërkuar ndryshime politike dhe mbajtjen e përgjegjësive nga drejtuesit e vendit.

Një aksident tragjik është regjistruar pasditen e sotme në autostradën Fier-Lushnjë, pranë fshatit Vajkan, ku ka humbur jetën një 34-vjeçar.

Sipas informacioneve paraprake, i riu po udhëtonte me motor në drejtim të Lushnjës, kur dyshohet se ka humbur kontrollin e mjetit, ka dalë nga rruga dhe është përplasur në asfalt.

“Rreth orës 17:10, në aksin rrugor Fier–Lushnjë, shtetasi A. S., 34 vjeç, duke drejtuar një motomjet, dyshohet se ka humbur kontrollin mbi drejtimin e motomjetit dhe ka dalë nga rruga. Si pasojë e aksidentit, 34-vjeçari ka humbur jetën në vendngjarje”,- njoftoi sot policia.

Grupi hetimor ndodhet në vendngjarje dhe po punon për sqarimin e plotë të rrethanave dhe shkakut të aksidentit.

Publikohen rezultet e provimit të Maturës Shtetërore për lëndën e Gjuhës Shqipe dhe Letërsisë.

Njoftimin e ka shpërndarë Ministria e Arsimit përmes një postimi në rrjetet sociale.

Sipas njoftimit maturantët të cilët kanë pretendime apo ankesa për rezultatin mund të ankimojnë përmes rrugëve zyratre të  Qendrës së Shërbimeve Arsimore, duke përdorur të dhënat personale të identifikimit.

Rezultatet mund t’i gjeni në linkun: https://qsha.gov.al/…/06/Publikimi-i-Rezultateve-D1.pdf

Irani ka njoftuar një sërë rregullash të reja për anijet që synojnë të kalojnë përmes Ngushticës së Hormuzit, një prej korridoreve detare më të rëndësishme për tregtinë globale të naftës.

Autoriteti i sapokrijuar i Ngushticës së Gjirit Persik (PGSA) deklaroi se të gjitha anijet tregtare duhet të regjistrohen paraprakisht dhe të pajisen me leje dhe sigurim përpara se të lejohen të hyjnë në këtë rrugë ujore strategjike.

“Të gjitha anijet duhet të regjistrohen dhe të pajisen me leje për të garantuar kalimin e sigurt në Ngushticën e Hormuzit”, tha Autoriteti i Ngushticës së Gjirit Persik.

Sipas autoriteteve iraniane, regjistrimi dhe sigurimi do të ofrohen pa pagesë gjatë periudhës 60-ditore të mbuluar nga memorandumi i mirëkuptimit të nënshkruar së fundmi mes Iranit dhe Shteteve të Bashkuara. Megjithatë, Teherani ka lënë të kuptohet se pas përfundimit të kësaj periudhe mund të aplikohen tarifa për shërbimet e sigurisë, mbrojtjes dhe sigurimit.

“Gjatë periudhës 60-ditore, tarifat për sigurinë, mbrojtjen dhe shërbimet mjedisore, si dhe sigurimet iraniane përkatëse, nuk do të mblidhen nga pronarët e anijeve dhe do të mbulohen nga qeveria e Republikës Islamike të Iranit”, thuhet në deklaratën e PGSA-së.

Njoftimi vjen pak ditë pasi presidenti amerikan Donald Trump deklaroi se kalimi nëpër ngushticë do të ishte pa pagesë gjatë 60 ditëve të para dhe më pas.

Autoritetet iraniane paralajmëruan gjithashtu se anijet duhet të ndjekin një itinerar të përcaktuar me saktësi gjatë kalimit nëpër ngushticë, me qëllim shmangien e zonave të minuara.

“Mosrespektimi i këtij rregulli do të jetë përgjegjësi e pronarit të anijes”, theksoi PGSA.

Rregullat e reja hynë në fuqi në një kohë kur trafiku detar në Ngushticën e Hormuzit po rikuperohet gradualisht pas muajsh pasigurie dhe lëvizjesh të kufizuara për shkak të frikës nga sulme të mundshme iraniane.

Sipas kompanisë së inteligjencës detare AXSMarine, të enjten kaluan 25 anije tregtare nëpër ngushticë, shifra më e lartë e regjistruar që nga muaji prill.

Është shtyrë seanca e sotme gjyqësore në Gjykatën Administrative ku palë të përfshira janë kryebashkiaku i Tiranës, Erion Veliaj, dhe prokurori i çështjes së tij, Ols Dado.

Trupa gjykuese ka vendosur që shqyrtimi i çështjes të mos vijohet ditën e sotme, duke caktuar një datë të re për mbajtjen e seancës radhës.

Sipas vendimit të gjykatës, seanca e ardhshme do të zhvillohet më datë 3 korrik, në orën 13:00.

Padia e Veliajt

Kryetari i bashkisë së Tiranës, Erion Veliaj depozitoi më 23 janar në Gjykatën Administrative të Shkallës së Parë Tiranë, një kërkesë-padi kundër institucionit të Presidentit të Republikës së Shqipërisë të vitit 2007-2012 dhe prokurorit të Posaçëm, Ols Dado, duke kërkuar konstatimin e pavlefshmërisë absolute të dekretit të emërimit të këtij të fundit si prokuror nga noter që ishte në vitin 2008.

Sipas padisë emërimi i prokurorit është kryer në kundërshtim flagrant me ligjin, pasi në momentin e dekretimit ai nuk plotësonte kriteret ligjore të detyrueshme për ushtrimin e funksionit të prokurorit.

Veliaj kërkon gjithashtu, që Këshilli i Lartë i Prokurorisë të detyrohet të marrë vendim për përfundimin e menjëhershëm të statusit të magjistratit dhe ushtrimit në mënyrë të paligjshme të detyrës të prokurorit në fjalë.

“Presidenti i Republikës ka lëshuar një dekret në kundërshtim të hapur me dispozitat urdhëruese procedurale të ligjit nr. 8737, duke realizuar një emërim pa bazë ligjore dhe në mungesë të kompetencës materiale ratione personae për të emëruar një subjekt që nuk përmbushte kriteret e ligjit. Ky fakt përbën një shkelje flagrante të rendit juridik dhe një rast tipik të pavlefshmërisë absolute të një akti administrativ, në kuptim të nenit 108 të Kodit të Procedurave Administrative, pasi: (i) akti është nxjerrë në kundërshtim flagrant me normat urdhëruese të ligjit; (ii) personi i emëruar nuk plotësonte kushtet e përgjithshme dhe të posaçme ligjore; dhe (iii) organi publik ka ushtruar kompetencën e tij për emërim në shkelje të kushteve procedurale të vlefshmërisë së aktit, duke e bërë dekretin juridikisht të paefektshëm dhe nul abinitio”, thuhet në kërkesë padi.