Një sherr mes disa të burgosurve është regjistruar në burgun e sigurisë së lartë në Fier më dhomën e ajrimit. Burime nga Spitali Rajonal i Fierit dhe nga institucioni i vuajtjes së dënimit konfirmojnë se gjatë konfliktit dy të burgosur kanë mbetur të plagosur.

Sipas të dhënave paraprake, dyshohet se të plagosurit janë goditur me mjete të improvizuara, mes tyre edhe brisqe rroje.
Pas nisjes së konfliktit, kanë ndërhyrë menjëherë forcat e sigurisë së burgut, të cilat kanë neutralizuar situatën dhe kanë rikthyer të burgosurit në qelitë e tyre.

Dy të plagosurit janë transportuar me urgjencë drejt Spitalit Rajonal të Fierit, ku kanë marrë ndihmën e parë mjekësore. Sipas burimeve spitalore, gjendja e tyre shëndetësore paraqitet e qëndrueshme dhe ata janë jashtë rrezikut për jetën.

Burime infirmacioni nga burgu Fier pohojnë se një ka qënë në paraburgim, ndërkohë që stafi drejtues i burgut është thirrur me urgjencë për të shqyrtuar sitiatën.

Nuk dihen ende rrethanat e plota që çuan në nisjen e konfliktit sikurse nuk bëhen të ditur edhe emrat e dy të plagosurve apo të personave që janë përfshirë në konflikt, ndërsa pritet edhe një reagim zyrtar nga drejtoria e institucionit të vuajtjes së dënimit për të sqaruar ngjarjen dhe masat e marra pas incidentit.

The post Sherr në burgun e Fierit, dy të burgosur përfundojnë në spital appeared first on Euronews Albania.

Zbardhet ngjarja e ndodhur në orët e para të mëngjesit të 8 gushtit në lagjen “Tufinë”, ku një sasi lënde plasëse shpërtheu në derën e banesës së një 72-vjeçari, duke shkaktuar dëme të pakta materiale.

Policia ka shpallur në kërkim tre vëllezër, të identifikuar si Ervis Alla 39 vjeç, Altin Alla 43 vjeç dhe Maksim Alla 41 vjeç, të tre me precedentë të mëparshëm penalë. Ata dyshohen për veprën penale “Shkatërrimi i pronës me eksploziv”, kryer në bashkëpunim.

Sipas hetimeve, tre vëllezërit dyshohet se rreth orës 00:30 kanë vendosur dhe shpërthyer lëndën plasëse në derën e banesës së shtetasit J. M., për motive të dobëta.

Pas njoftimit për ngjarjen, shërbimet e Komisariatit të Policisë Nr. 4 organizuan operacionin e koduar “Motivi”. Këqyrja e vendit të ngjarjes, administrimi i provave dhe veprimet hetimore çuan në identifikimin e autorëve të dyshuar.

Policia vijon punën për lokalizimin dhe arrestimin e tre personave të shpallur në kërkim, si dhe për dokumentimin e plotë të rrethanave të ngjarjes.

Materialet procedurale i janë referuar Prokurorisë së Tiranës për veprime të mëtejshme.

The post Lënda plasëse shpërtheu në derën e banesës së një 72-vjeçari, shpallen në kërkim 3 vëllezërit (EMRAT) appeared first on Euronews Albania.

Rendi i lindjes së fëmijëve mund të ndikojë në rrezikun për zhvillimin e dhjetëra sëmundjeve, nga autizmi dhe alergjitë deri te abuzimi me substancat.

Në këtë përfundim ka dalë një studim i cili thekson se rendi i lindjes lidhet me rrezikun për sëmundje në një shkallë më të gjerë nga sa mendohej më parë.

Studiuesit analizuan të dhënat e mbi 10 milionë personave, nga familje me dy fëmijë, dhe identifikuan lidhje të rëndësishme me 150 sëmundje, duke filluar nga çrregullimet psikiatrike deri te problemet e aparatit tretës.

Gjetjet, të publikuara në revistën Nature Health, tregojnë se fëmijët e parë kanë më shumë gjasa të përballen me probleme neurozhvillimore, si autizmi dhe ADHD-ja, si edhe me alergji që lidhen me sistemin imunitar.

Ata rezultuan gjithashtu me rrezik më të lartë për çrregullimin obsesiv-kompulsiv , aknet dhe astmën.

Ndërkohë, fëmijët më të vegjël në familje shfaqën një prirje më të lartë për abuzimin me substancat, problemet gastrointestinale dhe disa sëmundje infektive,

Sipas autorëve, lidhja mes rendit të lindjes dhe rrezikut për sëmundje mund të shpjegohet nga një kombinim faktorësh fiziologjikë, imunologjikë dhe socialë.

Për sëmundjet alergjike dhe të frymëmarrjes, si alergjitë sezonale, ekzema dhe astma, fëmijët e parë mund të kenë një rrezik më të lartë sepse në vitet e para të jetës kanë më pak kontakt me mikroorganizma.

Në të kundërt, fëmijët më të vegjël ekspozohen që herët ndaj një shumëllojshmërie më të madhe mikrobesh, të sjella në shtëpi nga vëllezërit dhe motrat më të mëdha. Ky ekspozim i hershëm mund të ndihmojë në zhvillimin dhe rregullimin e sistemit imunitar.

Studimi zbuloi gjithashtu se efekti mbrojtës për fëmijët më të vegjël është më i fortë kur diferenca në moshë mes vëllezërve dhe motrave është më e vogël, duke mbështetur idenë se mikrobet mund të transmetohen drejtpërdrejt mes tyre.

Ndërsa rreziku më i lartë për abuzimin me substancat tek fëmijët e dytë lidhet kryesisht me faktorë socialë, si ndikimi dhe imitimi i sjelljes së vëllait ose motrës më të madhe, por edhe me prirjen e fëmijëve të lindur më vonë për të marrë më shumë rreziqe.

The post Studimi, rendi i lindjes së fëmijëve ka ndikim në 150 sëmundje appeared first on Euronews Albania.

Një dron ende i paidentifikuar shpërtheu të shtunën mbi Bullgari, pranë kufirit me Rumaninë, njoftuan autoritetet.

Sipas kryeministrit bullgar Rumen Radev, droni hyri në hapësirën ajrore të Bullgarisë nga Rumania dhe shpërtheu rreth 1,000 metra larg një stacioni kompresor të gazsjellësit Trans-Ballkanik, pranë ish-pikës kufitare Kardam, mes dy vendeve.

“Zhurma e shkaktuar nga droni u pikas nga policia kufitare rumune dhe më pas u dëgjua një shpërthim i fuqishëm nga patrulla e policisë kufitare ‘General Toshevo’”, tha ai në një konferencë për mediat.

Ai shtoi se “vendndodhja e shpërthimit të dronit u identifikua menjëherë” dhe konfirmoi se nuk pati viktima apo dëme në ndërtesa dhe infrastrukturë.

Kryeministri tha se autoritetet bullgare dhe rumune nuk arritën ta zbulonin dronin teksa ai kalonte në hapësirat e tyre ajrore. Sipas tij, tashmë do të shtohen operacionet e vëzhgimit në rajon.

Sipas deputetit të opozitës, Ivaylo Mirchev, Kardam është një nga pikat kryesore të Korridorit Vertikal të Gazit, një rrugë strategjike për transportin e gazit natyror të lëngshëm nga Greqia drejt Evropës Juglindore dhe Qendrore. Korridori lidh Greqinë, Bullgarinë, Rumaninë, Hungarinë, Sllovakinë, Moldavinë dhe Ukrainën.

Ky incident vjen pasi forcat rumune rrëzuan tre dronë në hapësirën e tyre ajrore brenda vetëm tri ditësh, në fund të korrikut. Zyrtarët rumunë kanë thënë se të paktën një prej këtyre dronëve është identifikuar si i tipit Shahed, i përdorur nga forcat ruse.

Rumania dhe Bullgaria ndodhen në krahun lindor të NATO-s, në kufi me Detin e Zi, dhe përballen me sfida të shtuara të sigurisë lidhur me luftën e Rusisë në Ukrainë, e cila nisi pas pushtimit në shkallë të gjerë të vendit nga Moska në shkurt 2022.

Në muajt e fundit, Rumania ka përjetuar një rritje të incidenteve dhe shkeljeve të hapësirës së saj ajrore nga dronët, duke rritur tensionet në rajon dhe duke nxitur solidaritet të gjerë nga zyrtarët e BE-së.

Në maj, një dron rus i pajisur me eksplozivë u rrëzua mbi një pallat banimi në Galați të Rumanisë, duke shkaktuar zjarr në çati dhe plagosur dy persona.

Muajin pasues, një dron detar ukrainas shpërtheu gjithashtu në portin rumun të Konstancës. Ushtria ukrainase tha se droni kishte devijuar nga kursi për shkak të ndërhyrjeve të luftës elektronike ruse.

Presidentja e Komisionit Evropian, Ursula von der Leyen, i ka cilësuar incidente të tilla si “pasojë e drejtpërdrejtë e luftës së Rusisë kundër Ukrainës”.

The post Incidenti që alarmoi krahun lindor të NATO-s, një dron hyri nga Rumania dhe shpërtheu në hapësirën ajrore të Bullgarisë appeared first on Euronews Albania.

Kreu i Partisë Demokratike, Sali Berisha, ka kritikuar reformën territoriale , duke e cilësuar atë si një nga faktorët kryesorë të shpopullimit të vendit.

Ndërkaq, Berisha ka shprehur mbështetjen për qytetarët që kanë dalë në protesta kundër ndryshimeve të propozuara në ndarjen territoriale.

Sipas tij, reforma territoriale e vitit 2014, e cila reduktoi numrin e njësive të qeverisjes vendore nga rreth 400 bashki e komuna në 61 bashki, ka dëmtuar decentralizimin dhe ka sjellë pasoja të rënda për komunitetet.

“Edi Rama nuk ka më legjitimitet dhe qeveria e tij, siç faktoi me hartën elektorale, me hartën e ndarjes së pushtetit lokal. Këto vite faktuan për shqiptarët se ndarja territoriale e vitit 2014 që shkurtoi, pakësoi nga rreth 400 njësi të qeverisjes vendore, bashki dhe komuna të marra së bashku, në 61 njësi, ishte goditja më e fuqishme që iu bë parimit demokratik të decentralizimit.

Por ishte gjithashtu platforma më e egër për shpopullimin e Shqipërisë dhe largimin, dëbimin e shqiptarëve nga Shqipëria, për mungesë shërbimesh, për bojkot total të tyre.

Reforma territoriale e Edi Ramës së bashku me politikat e ndjekura nga 2014 e gjer sot, kanë tejkaluar në fuqinë e përzënies së shqiptarëve nga shtëpitë dhe fshatrat, qytetet e tyre, mbi dy herë platformën e Vaso Çubrilloviçit, e cila për hir të së vërtetës, përveç zbatimit të largimit të shërbimeve, rrënimit të arsimit, shëndetësisë, injorimit të infrastrukturës, intimidimit me polici, pati dhe një marrëveshje ndërkombëtare me Turqinë për tërheqjen e shqiptarëve nga Kosova në Turqi”, theksoi Berisha.

Kreu i PD-së kritikoi gjithashtu propozimin për reduktimin e mëtejshëm të numrit të bashkive. Sipas tij, në vend që të korrigjohen problemet e reformës së vitit 2014, qeveria ka zgjedhur të vijojë me shkurtimin e 15 bashkive të tjera, duke e çuar numrin e tyre në 46.

“E megjithatë regjimin opresiv të Gjeorgjeviçit dhe Paniçit ndaj shqiptarëve në Kosovë, Edi Rama tejkaloi me dy herë numrin e të dëbuarve nga Shqipëria krahasuar me ata që u dëbuan nga Kosova.
Por, i pangopur në politikën e përqendrimit të të gjitha pushteteve në duart e tij, të centralizimit të plotë, duke tejkaluar në disa aspekte dhe Enver Hoxhën, i pangopur në zbimin e shqiptarëve, gjenocidin e butë ndaj shqiptarëve, ai ndërmori hapin tjetër.

Ku në vend që të korrigjonte gabimet katastrofale të reformës së parë, vazhdoi me shkurtimin e 15 bashkive të tjera duke ulur numrin në 46 bashki.

Kjo ka sjellë një reagim të fuqishëm të banorëve të bashkive të shkurtuara, por dhe një reagim të fuqishëm të banorëve të cilët humbën pushtetin vendor në mënyrën më të pajustifikueshme në vitin 2014″, tha Berisha.

The post Berisha: Reforma territoriale e Ramës, platforma më e egër për shpopullimin e Shqipërisë appeared first on Euronews Albania.

Një 31-vjeçar është vënë në pranga këtë të shtunë nga Policia në zonën e Spillesë pasi tentoi të vriste me armë zjarri një person tjetër.

Sipas raportimeve të policisë, në pranga ka rënë 31-vjeçari Neldi Hallulli, pasi tentoi të vriste 38-vjeçarin Indrit Ramën.

Nga raportimet, dyshohet se 31-vjeçari ka pasur një konflikt me 38-vjeçarin dhe, në vijim të konfliktit, dyshohet se ka dashur ta vriste atë.

“Pas marrjes së informacionit në rrugë operative se në zonën e Spillesë, Rrogozhinë, po ndodhte një konflikt, shërbimet e Policisë u organizuan dhe ndërhynë menjëherë për parandalimin e përshkallëzimit të konfliktit.

Si rezultat i veprimeve të shpejta dhe të koordinuara të shërbimeve të Komisariatit të Policisë Kavajë dhe Postës së Policisë Rrogozhinë, u bë e mundur kapja në flagrancë e shtetasit N. H. Në momentin e ndërhyrjes së shërbimeve të Policisë, ky shtetas mbante një armë zjarri, “Kallashnikov”.

Nga veprimet e para hetimore dyshohet se shtetasi N. H. kishte pasur një konflikt me shtetasin I. R. dhe, në vijim të konfliktit, dyshohet se kishte qëllim ta vriste atë.

Ndërhyrja e menjëhershme e shërbimeve të Policisë bëri të mundur parandalimin e një ngjarjeje të rëndë kriminale, duke shmangur përshkallëzimin e konfliktit dhe pasojat e rënda për jetën e 38-vjeçarit.

Po në vijim të veprimeve u procedua penalisht dhe shtetasi I. R., për “Dëmtime të tjera me dashje”, sepse ka goditur me grushte shtetasin N. H., duke i shkaktuar dëmtime të lehta trupore”, thueht në njoftimin e policisë.

Materialet procedurale iu referuan Prokurorisë për veprime të mëtejshme.

The post Tentoi të vriste me armë zjarri 38-vjeçarin pas konfliktit, arrestohet 31-vjeçari në Kavajë appeared first on Euronews Albania.

Kryetari i Partisë Demokratike, Sali Berisha, gjatë një komunikimi në rrjetet sociale me qytetarët këtë të shtunë, e ka cilësuar protestën e cila sot shënon ditë e saj të 70-të, si protestën më të fuqishme rinore dhe qytetare në Shqipëri që prej viteve ’90.

Berisha deklaroi se kjo lëvizje arriti të bashkojë shqiptarët brenda dhe jashtë vendit rreth një çështjeje jetike si mjedisi, ndërsa theksoi se PD do ta mbështesë me të gjithë forcën që ka.

“Pas viteve ’90, kjo është protesta më e fuqishme rinore qytetare në historinë e këtij vendi. Kjo është protesta, ta quajmë pan-kombëtare, që bashkoi shqiptarët kudo që janë në botë për një çështje të përbashkët.

Kjo është protesta në të cilën u ngrit një zëri ndërgjegjja e shqiptarëve edhe për çështjet mjedisore që janë çështje jetike, që dikur kanë qenë dytësore e tretësore.

Të rinjtë shqiptarë që dalin e protestojnë kundër krimeve mjedisore meritojnë një dekoratë lirie që të gjithë. Protesta ishte e jashtëzakonshme edhe për frymën e saj qytetare. Kërkon largimin e diktatorit autoritar Edi Rama, e atij që të tjerët e kanë quajtur Shqipërinë autokraci elektorale, e cila është sinonim plotësisht i diktaturës autoritare.

Partia Demokratike ka bërë thirrje dhe ka bërë gjithçka për një prani sa më të madhe të anëtarëve dhe mbështetësve të saj, jo si përfaqësues partie, por si qytetarë, duke respektuar prapë plotësisht frymën e qytetarisë.

I kam mbështetur plotësisht kërkesat e saj, sepse për ato kërkesa ç’është e vërteta, Partia Demokratike ka bërë një betejë të gjithanshme në parlament, në komisione, por edhe në protesta dhe në sheshe.

A mund të ishte më e madhe prania e Partisë Demokratike? Mund të ishte dhe më e madhe. E them këtë megjithëse kanë marrë dhe sot janë një shumicë, pjesëmarrësit janë demokratë.

U desh pak kohë që të adaptoheshin me situatën, për arsye se protesta krahas kërkesave të drejta kishte dhe slogane me të cilat ata barazonin Edi Ramën me Sali Berishën.

Tani, do vijmë këtu. Pse unë dhe pse Partia Demokratike ka bërë thirrje për pjesëmarrje? Po. Së pari, kërkesat janë shumë të drejta. Së dyti, këto slogane i kanë të armiqve të Partisë Demokratike.

Pra, janë slogane të opozitës së opozitës, që është vegël e qeverisë. Ky slogan është gjithashtu i qarkulluar nga grupet sorosiane, duke ditur armiqësinë e madhe që unë kam me ideologjinë dhe qëndrimet e George Sorosit.

Konkretisht ju garantoj se ne do bëjmë çfarë kemi në dorë që ta mbështesim këtë protestë”, u shpreh Berisha.

The post Dita e 70-të e protestës, Berisha: Pas viteve ’90, kjo është ngritja më e fuqishme rinore qytetare në historinë e vendit appeared first on Euronews Albania.

Nga terreni, Drejtori i Përgjithshëm i Policisë së Shtetit, Drejtues Madhor Skënder Hita, apeloi për respektimin e rregullave të qarkullimit, duke theksuar se një rregull i respektuar, është një jetë e shpëtuar më shumë.

Nisur nga shkeljet e shumta të evidentuara nga mjetet inteligjente, shkelje që përbëjnë rrezik potencial për sigurinë e jetës së përdoruesve të rrugës, Drejtori i Përgjithshëm i Policisë së Shtetit inspektoi në terren masat që po aplikon Policia Rrugore për parandalimin e aksidenteve.

Gjatë inspektimit, Drejtori i Policisë Rrugore, Drejtues i Parë Perlat Vatoci, informoi Drejtorin e Përgjithshëm për dinamikën e punës në terren të Policisë Rrugore, duke përdorur për monitorim mjetet inteligjente.

“Jemi dislokuar në aksin rrugor, në rrugën interurbane kryesore “Rrogozhinë-Durrës”. Është një mjet inteligjent që e mat shpejtësinë në mënyrë automatike. Kemi edhe të tjera në të gjithë territorin e vendit, të ngjashme, që janë të dislokuara në akset kryesore të vendit, në Rrugën e Kombit, por edhe në akset e tjera kryesore rrugore, që evidentojnë çdo mjet që tejkalon normat e shpejtësisë.

Është e nevojshme që, në vazhdimësi, ne të operojmë me këto mjete inteligjente në dinamikën e përditshme të punës”, është shprehur Vatoci.

Ndërkohë, Hita kërkoi intensifikim të masave dhe bëri një apel për përdoruesit e rrugës.

“Siguria rrugore ngelet përparësi e Policisë së Shtetit dhe, siç e shikoni, ndodhemi me mjetet inteligjente të vendosura në rrugë, me qëllim që të bëjmë të mundur evidentimin e të gjitha shkeljeve dhe problematikave që hasim në përditshmërinë tonë.

Policia Rrugore është e vendosur që të gjitha shkeljet të evidentohen me mjetet inteligjente, me ato të cilat kemi në përdorim, siç është Poliscani, apo edhe mjetet e tjera, radarë dhe dronë. Të gjitha këto mjete inteligjente që ne kemi në përdorim do të bëjnë të mundur që të ndëshkohen shkelësit për të gjitha shkeljet që kryejnë në rrugët kryesore dhe interurbane.

Përgjatë kësaj jave, mjetet inteligjente kanë vendosur 1.100 masa administrative për shkelje të tejkalimit të shpejtësisë, që variojnë deri në 230 km/h.

Ndërkohë, gjatë një viti, në të gjithë territorin e Republikës së Shqipërisë, janë 1.075 drejtues automjetesh, të cilëve iu është hequr leja e drejtimit, pasi iu kanë mbaruar pikët e lejes së drejtimit.

Njëkohësisht, kemi edhe 1.060 raste të proceduara për mospasjen e lejeve të drejtimit. Këto janë me të vërtetë shifra alarmante dhe na bëjnë të kthejmë vëmendjen dhe fokusin kryesor tek siguria rrugore.

Së shpejti do të vihen në funksion edhe kamerat në Qendrën Kombëtare të Monitorimit të Trafikut Rrugor, të cilat do të integrohen në sistemin e Policisë dhe, në këtë mënyrë, do të kemi një kontroll dhe një çekim më të saktë të të gjitha shkeljeve dhe të gjitha problematikave që do të hasim në rrugët kryesore interurbane.

Nuk është në fokusin tonë që ne vetëm të evidentojmë shkelje, në fokusin tonë është të ndërgjegjësojmë qytetarët, të parandalojmë këto shkelje rrugore dhe të mos kemi aksidente fatale.

Ju bëjmë apel dhe thirrje të gjithë drejtuesve të automjeteve që të mos përdorin telefonin celular, të mos drejtojnë automjetin nën efektin e alkoolit dhe lëndëve narkotike, të mos tejkalojnë normat e shpejtësisë, pasi shpejtësia vret.

Një rregull i respektuar, është një jetë e shpëtuar më shumë”, ka përfunduar Hita.

The post Mjetet inteligjente, Hita inspektime në terren: 1,100 shkelje me 230 km/h, 1,075 drejtuesve u është hequr leja e drejtimit appeared first on Euronews Albania.

Kryeministri i Kosovës, Albin Kurti, ka reaguar pas incidentit të regjistruar sot në Kuvend, ku u godit me vezë nga deputetja e Aleancës për Ardhmërinë e Kosovës (AAK), Time Kadrijaj, në kohën kur po fliste në foltore.

Përmes një deklarate për mediat, shefi i qeverisë u shpreh i gatshëm të përballet me veprime të tilla nëse kjo i shërben arritjes së marrëveshjeve politike dhe ecjes përpara të proceseve shtetërore.

“Nëse hedhja me vezë është çmimi që duhet të paguaj për t’u takuar dhe për të arritur marrëveshje, jam shumë i lumtur ta bëj këtë,” deklaroi Kurti.

Sipas kryeministrit, prioriteti i qeverisë mbetet funksionalizimi i institucioneve dhe kapërcimi i ngërçit politik, pavarësisht tensioneve dhe formave të zgjedhura nga opozita.

Incident në Kuvendin e Kosovës, Albin Kurti goditet me vezë nga deputetja Time Kadrijaj (VIDEO)

The post Kurti pas incidentit në Kuvend: Nëse gjuajtja me vezë është çmimi që duhet të paguaj për marrëveshje, jam i lumtur ta bëj këtë appeared first on Euronews Albania.

Tajfuni Dolphin goditi prefekturën jugore Okinawa të Japonisë, duke plagosur gjashtë persona dhe duke ndërprerë energjinë elektrike në më shumë se 50,000 ndërtesa.

Kina mbylli portet dhe pezulloi shërbimet e trageteve ndërsa tajfuni pritej të godiste bregun e saj lindor.

Pesë të moshuar, tre prej të cilëve ranë për shkak të erërave të forta, pësuan lëndime jo kërcënuese për jetën në Okinawa, ndërsa një person tjetër u plagos në prefekturën Kagoshima, sipas autoriteteve lokale.

Rreth 39,000 ndërtesa mbetën pa energji elektrike në Kagoshima, ndërsa më shumë se 12,000 ndërtesa u prekën në Okinawa.

Linjat ajrore japoneze, ANA dhe Japan Airlines anuluan fluturimet për në dhe nga Okinawa.

Typhoon Dolphin pounds Okinawa, Japan with fierce winds and dangerous conditions. Evacuation orders issued for nearly 260,000 people and 500+ flights canceled. https://t.co/upTxtB2EtJ pic.twitter.com/JjTaTMFy0c

— Weather Monitor (@WeatherMonitors) August 7, 2026

The post Tajfuni “Dolphin” godet Japoninë, 6 të plagosur dhe mijëra shtëpi pa energji. Kina mbyll portet (VIDEO) appeared first on Euronews Albania.

Në një lidhje live për Euronews Albania, meteorologu Hakil Osmani u shpreh se kjo fundjavë dhe vijimi i javës së ardhshme do të mbetet me temperatura të larta.

Sipas meteorologut, temperaturat do të arrijnë deri në 41 gradë Celsius, ndërsa një pjesë e territorit do të jetë me mot të qëndrueshëm dhe shpeshherë me vranësira në zona të izoluara.

“Kjo e shtunë mbetet me temperatura të larta, pasi territori ynë mbetet nën ndikimin e valëve të të nxehtit. Me 41°C mbetet qarku i Elbasanit dhe Beratit, ndërsa Shkodra dhe Gjirokastra me 40°C. Zona që është më e freskët është juglindja.

Edhe dita e nesërme do të ketë temperatura 40-41°C në qytetet e zonës së ulët. Ajo çfarë ndryshon është orët e para të mëngjesit, të cilat do të jenë 18°C. 24-orëshi i ditës së nesërme do të jetë i nxehtë. Pjesërisht në zonat lindore do të kemi herë pas here momente të pakta shiu.

Ndërkohë, java që vjen pritet të mbetet me temperatura të larta, të cilat do të luhaten nga vlerat 39 deri në vlerën 41°C. Pjesa më e madhe e territorit do të jetë me mot të qëndrueshëm.

Ndërkohë, në zona të izoluara pritet të kemi reshje shiu. Temperaturat do të jenë të larta në orët e mesditës. Do të jetë një gusht me temperatura shumë më të larta se normalet”, u shpreh Osmani.

The post Temperatura deri në 41 gradë, meteorologu tregon qarqet më të nxehta të javës appeared first on Euronews Albania.

Një incident është regjistruar këtë të shtunë në sallën e Kuvendit të Kosovës gjatë zhvillimit të seancës parlamentare.

Kryeministri Albin Kurti është goditur me vezë nga deputetja e Aleancës për Ardhmërinë e Kosovës (AAK), Time Kadrijaj, në kohën kur po fliste në foltore.

Kadriaj ka sulmuar Kurtin me vezë, pas deklaratave të këtij të fundit për nevojën e kohës shtesë për përfundimin e procesit të konstituimit të Kuvendit.

The post Incident në Kuvendin e Kosovës, Albin Kurti goditet me vezë nga deputetja Time Kadrijaj (VIDEO) appeared first on Euronews Albania.

Një sherr mes disa të burgosurve është regjistruar këtë të shtunë në burgun e sigurisë së lartë në Fier, në dhomën e ajrimit. Burime bëjnë me dije se gjatë konfliktit dy të burgosur kanë mbetur të plagosur.

Sipas informacioneve paraprake, dyshohet se të plagosurit janë goditur me mjete të improvizuara, teksa pas nisjes së konfliktit, kanë ndërhyrë menjëherë forcat e sigurisë së burgut, të cilat kanë neutralizuar situatën dhe kanë rikthyer të burgosurit në qelitë e tyre.

Dy të plagosurit janë transportuar me urgjencë drejt Spitalit Rajonal të Fierit, ku kanë marrë ndihmën e parë mjekësore. Sipas burimeve spitalore, gjendja e tyre shëndetësore paraqitet e qëndrueshme dhe ata janë jashtë rrezikut për jetën.

Nuk dihen ende rrethanat e plota që çuan në nisjen e konfliktit, sikurse nuk bëhen të ditur as emrat e dy të plagosurve apo të personave që janë përfshirë në konflikt.

The post Sherr mes të burgosurve në burgun e Fierit, plagosen dy të dënuar në dhomën e ajrimit appeared first on Euronews Albania.

Drafti i propozuar nga Partia Socialiste për reformën e re administrativo-territoriale është kundërshtuar edhe në Fushë Arrëz.

Banorë, përfaqësues të shoqërisë civile dhe drejtues vendorë u mblodhën në protestë kundër propozimit për bashkimin e Bashkisë Fushë Arrëz me atë të Pukës, duke e konsideruar këtë nismë si një cenim të identitetit, dinjitetit dhe interesave të komunitetit. Protestës iu bashkuan edhe bashkëkryetari i Reformës Administrativo-Territoriale nga opozita, Luçiano Boçi, si dhe deputeti Gjin Gjoni.

Nga tubimi, kryebashkiaku i Fushë Arrëzit, Hilë Curri, e cilësoi të papranueshëm draftin dhe shpalli të padëshiruar në këtë qytet një prej hartuesve të tij, Arbian Maznikun.

Kundër bashkimit me Pukën u shprehën edhe drejtues të tjerë vendorë. Në mbështetje të banorëve të Fushë Arrëzit ishte kryebashkiaku i Mirditës, Albert Melyshi, dhe ai i Pukës, Rrok Dodaj.

Mes protestuesve ishte edhe ish-kandidati i Partisë Socialiste për deputet në këtë zonë dhe ish-kreu i Përgjithshëm i Rezervave të Shtetit, Pavlin Luli. Ai iu bashkua kundërshtimit të banorëve, ndërsa gjatë fjalës së tij nuk munguan kritikat ndaj qeverisë dhe kryeministrit Edi Rama.

Përfaqësues të shoqërisë civile dhe banorë të Fushë Arrëzit kërkuan që përpara çdo vendimmarrjeje të dëgjohet zëri i komunitetit dhe të merret në konsideratë vullneti i banorëve.

Në përfundim të protestës, banorët njoftuan nisjen e mbledhjes së firmave për një peticion kundër draftit të propozuar, ndërsa paralajmëruan edhe përshkallëzim e reagimit nëse kërkesat e tyre nuk merren në konsideratë.

Sipas të dhënave të Censusit, Bashkia Fushë Arrëz ka rreth 4 mijë e 878 banorë, ndërsa Bashkia Pukë rreth 6 mijë e 222 banorë. Drafti i propozuar parashikon bashkimin e tyre në një njësi të vetme administrative, një propozim që ka hasur kundërshtimin e banorëve të Fushë Arrëzit.

The post Protestë në Fushë Arrëz kundër reformës territoriale, banorët kundërshtojnë bashkimin me Pukën appeared first on Euronews Albania.

Fluksi i udhëtarëve në Portin e Vlorës vijon të mbetet i lartë. Gjatë orëve të para të mëngjesit në port mbërriti trageti nga Brindisi, me 818 pasagjerë, 228 automjete, 14 kamperë, 8 kamionë dhe 47 anëtarë ekuipazhi.

Ndërkohë, në orën 17:00 pritet mbërritja e një tjetër trageti me rreth 1.100 pasagjerë dhe 260 automjete.

Sipas të dhënave portuale, fluksi pritet të vijojë edhe gjatë ditës së nesërme, kur në Portin e Vlorës janë planifikuar të mbërrijnë tre tragete, duke sjellë një numër të lartë udhëtarësh dhe automjetesh nga Italia.

The post Fluks i lartë në Portin e Vlorës, mbërrijnë qindra automjete dhe kamperë (VIDEO) appeared first on Euronews Albania.

“Është mirë që po vjen”. Me këto fjalë, ukrainasja Svetlana, e cila prej katër vjetësh jeton në Beograd, e komentoi vizitën e parë të presidentit ukrainas, Volodymyr Zelensky, në Serbi.

Presidenti i Ukrainës do ta vizitojë Serbinë më 8 gusht, më pak se një muaj pasi presidenti serb, Aleksandar Vuçiq, mori pjesë në Kiev në samitin Ukrainë–Evropa Juglindore.

“Duhet edhe ta vizitojnë njëri-tjetrin si miq. Në këtë mënyrë do të mësojmë më shumë për njëri-tjetrin, sepse edhe Serbia është një vend i bukur, sikurse Ukraina”, tha Svetlana për REL-in.

Svetlana u largua nga Zaporizhja, në juglindje të Ukrainës, në mars të vitit 2022, menjëherë pasi Kremlini nisi pushtimin e Ukrainës.

Sipas të dhënave të UNHCR-së, afër shtatë milionë njerëz janë larguar nga Ukraina që nga fillimi i luftës. Deri në dhjetor të vitit 2025, në Serbi ishin regjistruar zyrtarisht pak më shumë se 16.000 refugjatë nga Ukraina.

Sipas të dhënave të regjistrimit të popullsisë të vitit 2022, në Serbi jetojnë gjithashtu afër 4.000 ukrainas dhe kjo pakicë kombëtare ka edhe këshillin e vet kombëtar.

Filip Pronek, kryetar i këtij organi që merret me ruajtjen e identitetit ukrainas në Serbi, tha për REL-in se vizita e Zelenskyt është një lajm i mirë.

Ai kujtoi se zonja e parë e Ukrainës, Olena Zelenska, e vizitoi Serbinë në maj të vitit 2024 së bashku me ministrin e atëhershëm ukrainas të Punëve të Jashtme, Dmytro Kuleba.

“Mendoj se është normale që [Volodymyr Zelensky] të vijë dhe ta vizitojë Serbinë, si dhe të avancohen dialogu dhe bashkëpunimi dypalësh mes dy shteteve dhe dy popujve vëllazërorë sllavë. Janë dy shtete sllave që kanë shumë gjëra të përbashkëta gjatë historisë”, tha Pronek.

The post Zelensky viziton Serbinë, ukrainasit dhe rusët presin ndryshim nga Beogradi appeared first on Euronews Albania.

Një 43-vjeçar është vënë në pranga këtë të shtunë nga Policia e Elbasanit, pasi dyshohet se është autor i dy rasteve të djegies së qëllimshme të automjeteve.

Sipas raportimeve të policisë, në pranga ka rënë E. K., 43 vjeç, i cili dyshohet se më datë 07.08.2026, rreth orës 01:00, ka djegur me lëndë djegëse automjetin në përdorim nga shtetasi L. D., 26 vjeç, banues në Elbasan.

Gjithashtu, nga veprimet e thelluara hetimore, shtetasi E. K. dyshohet se është autor edhe i djegies së dy automjeteve në pronësi të shtetasit E. H., më datë 28.06.2026.

Ndërkaq, në pranga ka rënë edhe një person tjetër, D. R., 32 vjeç, të cilit gjatë kontrollit fizik iu gjetën një armë zjarri pa leje, 35 fishekë dhe lëndë narkotike.

Njoftimi i plotë i policisë:

Shërbimet e Komisariatit të Policisë Elbasan, në bashkëpunim me Forcën e Posaçme Operacionale të DVP Elbasan, bazuar në informacionet e siguruara në rrugë operative, në kuadër të planit të masave për parandalimin dhe goditjen e veprimtarisë kriminale, si dhe në vijim të veprimeve të thelluara hetimore, organizuan dhe finalizuan me sukses dy operacionet policore të koduara “Last Fire” dhe “Mbikëqyrja”.

Në kuadër të operacionit policor të koduar “Last Fire”, si rezultat i veprimeve të kryera dhe i hetimeve të thelluara, u bë ndalimi me iniciativë i shtetasit:

E. K., 43 vjeç, banues në Elbasan.

Ky shtetas dyshohet se më datë 07.08.2026, rreth orës 01:00, ka djegur me lëndë djegëse (benzinë), automjetin në përdorim nga shtetasi L. D., 26 vjeç, banues në Elbasan.

Gjithashtu, nga veprimet e thelluara hetimore, shtetasi E. K. dyshohet se është autor edhe i djegies së dy automjeteve, në pronësi të shtetasit E. H., më datë 28.06.2026.

Në kuadër të operacionit policor të koduar “Mbikëqyrja”, u kap në flagrancë dhe u arrestua shtetasi:

D. R., 32 vjeç, banues në Elbasan.

Ky shtetas u kap në flagrancë në lagjen “Brigada 17 Sulmuese”, ku, gjatë kontrollit fizik, iu gjet një armë zjarri pistoletë, 35 fishekë, si dhe një sasi lënde narkotike të dyshuar kokainë.

Në vijim të veprimeve procedurale, shtetasi D. R. u arrestua në flagrancë për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”.

Arma e zjarrit, municioni luftarak dhe lënda narkotike u sekuestruan në cilësinë e provës materiale.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.

The post Dyshohet se dogji 3 makina, në pranga 43-vjeçari në Elbasan. Arrestohet edhe një tjetër për armëmbajtje pa leje appeared first on Euronews Albania.

Pas përfundimit të afatit të caktuar kushtetues, deputetët e Kuvendit të Kosovës janë rikthyer këtë të shtunë në sallën e seancave për të vazhduar seancën konstituive.

Sipas raportimeve të medieve lokale, në rendin e ditës është pika kryesore që mban të bllokuar procesin, zgjedhja e Kryetarit të Kuvendit dhe nënkryetarëve të tij.

Ndërkohë, partitë opozitare kanë qëndruar mbrëmë në ambientet e Kuvendit deri në orën 00:00, afat ky që ishte paraparë sipas Kushtetueses për konstituimin e Kuvendit të Kosovës.

The post Kuvendi i Kosovës rikthehet në seancë konstituive pas skadimit të afatit kushtetues appeared first on Euronews Albania.

Dy persona kanë rënë në pranga këtë të shtunë nga Policia e Korçës, pasi u kapën duke transportuar drejt Shkodrës, kundrejt pagesës, 28 shtetas afrikanë që synonin të kalonin ilegalisht kufirin për në Malin e Zi.

Sipas raportimeve të policisë, në pranga kanë rënë J. M., alias D. M., 42 vjeç, dhe E. D., 31 vjeç, ku ky i fundit ka rezultuar se ka qenë me masën e sigurisë “Arrest në shtëpi”.

Raportohet se të dy këta persona u kapën në fshatin Plasë, Maliq, ku kishin grumbulluar rreth 28 shtetas sudanezë, të cilët më pas, nga 7-8 shtetas, i transportonin me mjete të ndryshme drejt veriut të Shqipërisë, me synim kalimin në mënyrë të paligjshme në territorin e Malit të Zi.

Njoftimi i plotë i Policisë:

Shërbimet e Drejtorisë Vendore për Kufirin dhe Migracionin Korçë, në vijim të kontrolleve intensive për parandalimin dhe goditjen e veprimtarisë kriminale të dhënies ndihmë emigrantëve, për kalim të paligjshëm të kufirit, bazuar dhe në informacionet e siguruara në rrugë operative, organizuan dhe finalizuan operacionin e koduar “Route”.

Si rezultat i operacionit, u arrestuan shtetasit J. M., alias D. M., 42 vjeç, banues në Korçë dhe shtetasi E. D., 31 vjeç, banues në fshatin Belorta, Maliq.

Nga verifikimet rezultoi që shtetasi E. D. ka qenë me masën e sigurisë atë të “Arrestit në shtëpi”.

Këta shtetas u kapën në flagrancë nga shërbimet e Policisë Kufitare, në fshatin Plasë, Maliq, ku kishin grumbulluar rreth 28 shtetas sudanezë, të cilët më pas, nga 7-8 shtetas, i transportonin me mjete të ndryshme drejt veriut të Shqipërisë, të cilët synonin të kalonin në mënyrë të paligjshme në territorin e Malit të Zi.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

The post Do të kalonin ilegalisht 28 afrikanë drejt Malit të Zi, në pranga 2 persona. Njëri theu masën e arrestit shtëpiak appeared first on Euronews Albania.

Departamenti Amerikan i Shtetit tha të premten se planifikonte të njoftonte një paketë sigurie prej 1 miliard dollarësh për administratën e presidentit të ri të Kolumbisë, Abelardo de la Espriella, e krahut të djathtë.

Në një njoftim për shtyp, zyra e zëdhënësit të Departamentit të Shtetit tha se paketa synon të ndihmojë Uashingtonin dhe Bogotan për të arritur “objektivat tona të përbashkëta”.

De la Espriella u betua si president të premten, në një ceremoni ku mori pjesë një delegacion amerikan, pjesë e të cilit ishte edhe ushtruesi i detyrës së prokurorit të përgjithshëm, Todd Blanche.

“Delegacioni demonstron angazhimin e SHBA-së për rigjallërimin e marrëdhënieve SHBA-Kolumbi dhe thellimin e partneritetit tonë të përbashkët në fushën e sigurisë dhe ekonomisë”, tha Departamenti i Shtetit.

Presidenti amerikan Donald Trump ka shprehur vlerësime të larta për De la Espriellan, duke e cilësuar atë një “udhëheqës të zgjuar, të fortë dhe të vendosur”, për të cilin parashikoi se do të ishte “jashtëzakonisht i suksesshëm” si president i Kolumbisë dhe si një mbështetje për të djathtën në vendin e Amerikës së Jugut.

Trump kishte deklaruar më herët se De la Espriella do të kishte “mbështetjen dhe fuqinë e plotë të Shteteve të Bashkuara pas tij” gjatë mandatit.

Të premten, Uashingtoni tha gjithashtu se Kolumbia tashmë i ishte bashkuar “Mburojës së Amerikave”, një aleancë qeverish që shtrihet nga SHBA-ja në të gjithë Amerikën Qendrore dhe Jugore dhe që është zotuar të luftojë grupet e trafikut të narkotikëve.

“Administrata Trump mirëpret anëtarësimin e Kolumbisë në Mburojën e Amerikave dhe është e gatshme të mbështesë përpjekjet e administratës De la Espriella për të mposhtur organizatat e dhunshme narkoterroriste dhe kriminale që kërcënojnë sigurinë dhe prosperitetin ekonomik të SHBA-së, Kolumbisë dhe të gjithë hemisferës”, tha Departamenti i Shtetit.

SHBA-ja është përfshirë gjithnjë e më shumë në Amerikën Latine gjatë mandatit të dytë të Trumpit në Shtëpinë e Bardhë, duke kryer sulme ndaj anijeve të dyshuara për trafik droge që vinin nga rajoni dhe duke nisur një operacion për kapjen e ish-udhëheqësit venezuelian Nicolas Maduro.

Maduro që atëherë mbahet në paraburgim në Nju Jork, nën akuza që përfshijnë narkoterrorizëm dhe trafik droge, akuza për të cilat ai është deklaruar i pafajshëm.

The post SHBA premton 1 mld dollarë për sigurinë e Kolumbisë, teksa presidenti i ri zotohet për luftë kundër drogës appeared first on Euronews Albania.