Agjencia e Ushqimit dhe Veterinarisë (AUV) njofton se ka kryer inspektim të jashtëzakonshëm në 9 shtëpiza të Vitit të Ri në çarshinë e qytetit në Strugë dhe lëshoi vendime për ndalimin e punës për shkak të mospërmbushjes së kushteve themelore të higjienës.
Nga AUV njoftojnë se pronarëve u janë lëshuar gjoba prej 200 euro në kundërvlerë denarë, ndërsa u lëshuan urdhra për regjistrimin e tyre në Agjenci si operatorë ushqimorë.
"Kontrolli i kryer më 22 të këtij muaji përcaktoi se individë punonin në shtëpi dhe në kushte johigjienike, d.m.th. shtëpitë nuk ishin të lidhura me rrjetin e ujësjellësit të qytetit, nuk kishin kryer dezinfektimin, dezinfektimin dhe deratizimin e detyrueshëm, personat nuk kishin kryer ekzaminime të detyrueshme shëndetësore dhe sanitare, dhe nuk ishin respektuar Rregullat e praktikës së mirë të prodhimit dhe praktikës së mirë të higjienës".
"Vendimet për ndalimin e përkohshëm të kryerjes së aktiviteteve do të mbeten në fuqi derisa të përmbushen kushtet e nevojshme për punë", thonë nga AUV.
Java e 16-të e Ligës së Parë të Maqedonisë së Veriut pritet të mbyllë gjysmësezonin vjeshtor me duele vendimtare, ku do të mësohet edhe kampioni vjeshtor i këtij edicioni. Ndeshjet zhvillohen nga e premtja deri të hënën, ndërsa gara në krye është hapur, megjithëse me epërsi të lehtë ështe Vardari para Strugës, njofton Telegrafi.
Sipas renditjes aktuale, Vardari hyn në këtë javë si lider dhe është më afër ta mbyllë pjesën e parë të sezonit në vend të parë. Megjithatë, ekipi kuqezi nuk e ka të garantuar epitetin e kampionit vjeshtor. Struga, që ndodhet vetëm një hap prapa, ka shanse reale të kapë kreun, sidomos nëse Vardari ndalet me barazim në duelin ndaj Makedonija Gj.P, ndërsa ata arrijnë fitore në transfertë kundër Tikveshit. Në këtë skenar, Struga do të shkonte në pushimin dimëror si kampione e vjeshtës.
Ndërkohë, kampioni aktual, Shkëndija, ka pësuar ngecje gjatë javëve të fundit dhe praktikisht është jashtë garës për titullin vjeshtor. Megjithatë, tetovarët mbeten ende brenda objektivit madhor, mbrojtjes së titullit në fund të sezonit, pasi distanca me kreun është e rikuperueshme në pjesën pranverore.
Në mesin e tabelës qëndrojnë dy ekipet tjera shqiptare, Bashkimi dhe Arsimi. Të dy skuadrat po zhvillojnë një sezon të qetë, larg zonës së rrezikut, por edhe pa presion për garë në kreun e klasifikimit. Të dyja ekipet synojnë ta mbyllin vjeshtën me rezultate pozitive për të hyrë më të forta në fazën pranverore.
Në anën tjetër, situata më e rëndë i takon Shkupit, i cili po zhvillon sezonin më të dobët në historinë e klubit. Me vetëm një pikë nga 15 ndeshje, Shkupi është ekipi i vetëm që nuk ka provuar ende shijen e fitores. Për të kaltrit e Çairit, java e 16-të është më shumë një përpjekje për të shpëtuar krenarinë sesa luftë për pikë. /Telegrafi/
Derbi shqiptar në Ligën e Parë të Maqedonisë së Veriut u mbyll me një “rezultat tenisi” – Struga T&L - Bashkimi 6:0, njofton Telegrafi.
Në stadiumin e qytetit në Strugë, vendasit dhuruan spektakël të plotë, dominim, ritëm, kreativitet dhe gjashtë gola në rrjetën e skuadrës nga Kumanova, që u la pa asnjë përgjigje ndaj lojës së djemve të Bledi Shkëmbit.
Ndeshja nisi me sinjale të qarta që Struga dëshironte fitore të madhe. Fali e pati rastin e parë serioz në minutën e 11-të, pak më vonë Maleskit iu anulua një gol për pozitë jasht loje dhe vetëm atëherë nisi rrëfimi i golave.
Bunjamin Shabani hapi serinë e golave për Strugën telegrafi.com
Në minutën e 24-t, Bunjamin Shabani gjeti hapësirën perfekte në zonë dhe hapi rezultatin për 1-0. Pasoi 2-0 në minutën e 37-të, me një aksion shembullor, krosimi i Falit dhe finalizimi i Maleskit. Jevtoski nga distanca shënoi për 3-0, rezultat që mbylli pjesën e parë.
E njëjta histori vazhdoi edhe pas pushimit. Në minutën e 53-të, Hamza i vendosi vulën një goditjeje dënimi rreth 18 metra për 4-0, duke e ngritur në këmbë gjithë stadiumin. Në të 62-ën, Maleski shënoi edhe një herë, kësaj here me një goditje të bukur në këndin e kundërt 5-0. Struga nuk u ndal. Në minutën e 84-t, Vosha realizoi golin e gjashtë, duke e mbyllur këtë derbi shqiptar në mënyrën më bindëse të mundshme.
Kjo ishte ndeshja e fundit e Strugës në shtëpi për këtë pjesë të sezonit. Në javën e fundit, ata udhëtojnë drejt Kavadarit për t’u përballur me Tikveshin, ndërsa gara për titullin e kampionit vjeshtor mbetet e hapur, gjithçka do të vendoset mes dueleve Tikveshi – Struga T&L dhe Makedonija Gj.P – Vardari. /Telegrafi/
Struga Trim Lum ka vazhduar serinë e fitoreve, duke triumfuar në kryeqytet, pasi ka shënuar fitore ndaj Rabotniçkit dhe ka vazhduar garën për titull, si ndjekëse e vetme e Vardarit, njofton Telegrafi.
Skuadra e Struga Trim Lum e arsyetoi plotësisht epitetin e favoritit dhe u rikthye me tre pikë nga udhëtimi në Shkup, pasi mposhti bindshëm Rabotniçkin me rezultat 1:3.
Në debutimin e trajnerit të ri Tupajiq, Rabotniçki e nisi ndeshjen me pasiguri. Struga ushtroi presion të fort që nga minutat e para dhe kjo solli golin e hershëm. Pas një aksioni të rrezikshëm, topi mbeti te Stefan Jeftoski në hyrje të zonës, i cili me një goditje të fortë në minutën e 11-të mposhti portierin Vasilevin për rezultat 0:1. Dominimi i Strugës vazhdoi edhe më tej, duke sjellë golin e dytë. Pas një kombinimi të bukur, Kristijan Maleski u gjend i vetëm përballë portierit, dhe me një goditje të fuqishme në këndin e sipërm rriti epërsinë në 0:2, duke e futur skuadrën vendase në vështirësi të mëdha.
Dy golat në disavantazh duket se zgjuan Rabotniçkin, që filloi të marrë iniciativën dhe të kalojë në gjysmën e fushës së kundërshtarit. Florent Kadriu kishte mundësinë e artë të ngushtonte rezultatin, por portieri italian i Strugës, Marco Angeletti reagoi në kohë dhe priti gjuajtjen e fortë.
Pjesa e dytë nisi me emocione dhe ndryshim rezultati. Në minutën e 54-t, një nga pikat më të mira të Rabotniçkit këtë sezon, Dimitar Trajkov, u gjend në vendin e duhur dhe me një goditje me kokë e çoi topin në rrjetë për 1:2, me asistim të Kadriut.
Megjithatë, çdo dilemë u shua në minutën e 70-të, kur pas shqyrtimit me VAR u akordua penallti për Strugën. Shabani u tregua i saktë nga pika e bardhë, duke vulosur fitoren me 1:3. Java e 14-të e Ligës së Parë mbyllet nesër me duelin e shtyrë Shkupi – Pelisteri, ndeshje që luhet nga ora 13:00 në Strugë. /Telegrafi/
Java e 14-të e Ligës së Parë të Maqedonisë së Veriut sjell një program të pasur futbollistik, me ndeshje të forta, ku në qendër të vëmendjes është derbi shqiptar ndërmjet Arsimit dhe Shkëndijës, ndërsa sfida Shkupi – Pelisteri është shtyrë për të martën për shkak të gjendjes së keqe të fushës në Strugë, njofton Telegrafi.
Ndeshja ndërmjet Shkupit dhe Pelisterit, e vlefshme për javën e 14-të të Ligës së Parë të Maqedonisë, ka marrë një termin të ri. Fillimisht ishte planifikuar të luhej sot, por kjo nuk do të ndodhë.
Problemi qëndron tek gjendja e fushës në “Stadionin e Qytetit” në Strugë, ku Shkupi i zhvillon ndeshjet si vendas. Pas reshjeve të dendura të ditëve të fundit, terreni është i përmbytur dhe nuk ofron kushte minimale për zhvillimin e lojës.
Për këtë arsye, me marrëveshje mes dy klubeve dhe FFM-së, ndeshja është shtyrë për të martën, në të njëjtin orar – 13:00.
Ndërkohë, këtë fundjavë do të kemi disa përballje interesante në kampionat. Të dielën në Gostivar luhet derbi shqiptar mes Arsimit dhe Shkëndijës, gjithashtu me fillim nga ora 13:00. Po në të njëjtin termin, Bashkimi nga Kumanova do të jetë mysafir i Tikveshit në Kavadar.
Të hënën Struga udhëton drejt Shkupit në sfidën kundër Rabotniçkit, ndërsa një ditë më parë u luajt ndeshja mes Maqedonija GJ.P dhe Sileksit, ku ekipi mysafir nga Kratova fitoi me rezultat 1-2. Sot, duke filluar nga ora 13:00, zhvillohet edhe takimi AP Brera – Vardari. Java pra mbyllet me duelin Shkupi Pelisteri që luhet të martën. /Telegrafi/
MPB Maqedoni njofton se më 09.11.2025, në orën 18:15, në Departamentin e Punëve të Brendshme në Strugë është raportuar se në rrugën rajonale Strugë-Dibër, pranë vendit të quajtur "Livadhet labunishte", një automjet pasagjerësh "Volkswagen Golf" me targa të Ohrit, i drejtuar nga F.Ç. (76) nga Struga, ka dalë nga rruga.
Në aksident, shoferi ka pësuar lëndime të rënda dhe është transportuar në Spitalin Special "Shën Erazmi" në Ohër, ku ka marrë ndihmë mjekësore.
"Një ekip inspektimi nga Departamenti i Punëve të Brendshme të Strugës ka kryer inspektim në vendngjarje, dhe aktualisht po përcaktohen shkaqet e aksidentit", thonë nga MPB.
Javën e 13-të të Ligës së Parë të Maqedonisë së Veriut, e kanë hapur duelet Struga – Arsimi dhe Bashkimi – Rabotniçki, ku në të dyja përballjet kanë triumfuar ekipet nikoqire. Struganët fituan bindshëm ndaj Arsimit dhe u rikthyen në krye të tabelës, ndërsa Bashkimi siguroi tri pikë të vlefshme kundër Rabotniçkit për t’u ngjitur në mesin e renditjes, njofton Telegrafi.
Struga Trim Lum shënoi fitore të sigurt ndaj Arsimit (4-0) në ndeshjen e javës së 13-të të Ligës së Parë të Maqedonisë. Skuadra e Bledi Shkëmbit nuk hasi vështirësi përballë mysafirëve, duke e kontrolluar plotësisht lojën në “Stadiumin e Qytetit” në Strugë. Pas disa rasteve të humbura në fillim, rezultatin e zhbllokoi Marjan Radeski në minutën e 20-të, pas një topi të gjatë nga Bojku dhe përfundimi të saktë në këndin e portierit Islami.
Në pjesën e dytë, kapiteni Bunjamin Shabani mori skenën, duke realizuar dy gola brenda dy minutash – fillimisht pas kombinimit me Compaorén dhe më pas pas një topi të vjedhur nga Jevtovski. Në fund, rezultatin përfundimtar 4-0 e vulosi Hristijan Maleski, duke konfirmuar epërsinë e plotë të struganëve. Me këtë fitore, Struga Trim Lum ngjitet sërish në krye të tabelës me 32 pikë, dy më shumë se Vardari, ndërsa Arsimi mbetet me 15 pikë dhe rrezikon rënien në zonën e ftohtë.
Në ndeshjen tjetër, Bashkimi fitoi 2-1 ndaj Rabotniçkit në një duel të fortë në Kumanovë. Pas disa rasteve në pjesën e parë, vendasit kaluan në epërsi në minutën e 41-të me golin e Abdulhadi Jahjas. Në pjesën e dytë, Emanuell Avornio shënoi me kokë për 2-0, duke sjellë entuziazëm në tribuna.
Mysafirët ngushtuan diferencën në fund me golin e Hoxhës, por Bashkimi ruajti avantazhin dhe mori një fitore të rëndësishme. Kjo ishte fitorja e gjashtë për kumanovarët, që në javën e ardhshme do të përballen me Strugën, ndërsa Rabotniçki do të ketë sfidë të vështirë ndaj Shkëndijës. /Telegrafi/
Java e 13-të e Ligës së Parë të Maqedonisë së Veriut pritet të sjellë duele interesante dhe me shumë rëndësi për ecurinë e sezonit. Ndeshjet do të zhvillohen në tri ditë, nga e shtuna deri të hënën, njofton Telegrafi.
Të shtunën, më 8 nëntor, në orën 13:00, në program janë dy përballje: Bashkimi pret Rabotniçkin në Kumanovë, ndërsa në Strugë zhvillohet derbi shqiptar mes Strugës dhe Arsimit, një ndeshje që gjithmonë zgjon interesim të madh.
Të dielën, më 9 nëntor, gjithashtu në orën 13:00, Pelisteri do të përballet me AP Brerën, ndërsa në Shkup do të luhet dueli mes Vardarit dhe Tikveshit.
Java do të përmbyllet të hënën, më 10 nëntor, me dy ndeshje po aq tërheqëse: Shkëndija do të jetë nikoqire e Makedonija Gj.P., ndërsa Sileksi do të përballet me Shkupin.
Pas kësaj jave, kampionati do të ndërpritet për shkak të angazhimeve ndërkombëtare të Përfaqësueses së Maqedonisë, e cila do të luajë ndeshjet kualifikuese për Botërorin 2026.
Vlen të kujtohet se më 15 nëntor do të zhvillohet edhe ndeshja e prapambetur e javës së 12-të mes Shkupit dhe Shkëndijës, e shtyrë për shkak të angazhimit të kuqezinjve në Ligën e Konferencës kundër Jagiellonias. /Telegrafi/
Skuadra e Struga Trim Lum vazhdon marshimin e saj bindës në elitën e futbollit vendor. Pas fitores në Kupë ndaj të njëjtit rival, struganët triumfuan sërish ndaj Makedonija Gj. P. me rezultatin e pastër 0-2, këtë herë në ndeshjen e javës së 12-të të kampionatit, njofton Telegrafi.
Që nga minutat e para, mysafirët morën kontrollin e lojës në fushën e Gjorgje Petrovit. Me posedim të lartë dhe qarkullim të shpejtë të topit, ata i imponuan ritmin kundërshtarit që u përpoq të mbrohej dhe të kërcënonte përmes kundërsulmeve të rralla. Rastin më të mirë në pjesën e parë e pati Florian Roçi, por ndërhyrja vendimtare e Abdullait shpëtoi vendasit nga pësimi i hershëm.
Megjithatë, presioni i Strugës dha rezultat në minutën e 32-të kur pikërisht Roçi, 18-vjeçari që po debutonte me ekipin, gjeti rrugën e rrjetës pas një aksioni të bukur të nisur nga Fal 0-1.
Në pjesën e dytë, struganët vazhduan dominimin, dhe në minutën e 62-të, pas një ndërhyrjeje të gabuar ndaj Maleskit, referi akordoi penallti. Përgjegjësinë e mori Basiru Kompaore, i cili u tregua i saktë dhe vulosi rezultatin përfundimtar 0-2.
Në vazhdim, ndeshja u menaxhua me maturi nga skuadra e Bledi Shkëmbit, që me këtë fitore ngjitet përkohësisht në krye të tabelës me 29 pikë, dy më shumë se Vardari. Ndërkaq, Makedonija Gj. P. mbetet në vendin e tetë me 14 pikë.
Në ndeshjen tjetër të zhvilluar në Shkup, Rabotniçki u mund nga Tikveshi me të njëjtin rezultat 0-2. Java e 12-të do të vazhdojë nesër me dy duele të tjera: Brera pret Sileksin, ndërsa Pelisteri përballet me Vardarin.
Dueli Shkupi – Shkëndija do të luhet në një datë tjetër, për shkak se Shkëndija të enjten zhvillon ndeshjen e javës së tretë në kuadër të Ligës së Konferencës. /Telegrafi/
Ndeshja që duhej të luhej në Çair u zhvillua në Strugë, pasi ekipi i Shkupit ka ndalesë për të luajtur në fushën e vet, njofton Telegrafi.
Duhej të ishte një derbi mes dy skuadrave që dikur luftonin për titullin kampion, por tani situata ka ndryshuar – Struga po vazhdon garën në krye, ndërsa Shkupi po kalon një krizë të thellë.
Në ndeshjen e javës së 11-të të elitës së futbollit të Maqedonisë, Struga Trimi Lum arriti një fitore të vlefshme me rezultat 1-2, edhe pse për më shumë se gjysmë ore luajti me një lojtar më pak.
Struganët e nisën fuqishëm ndeshjen dhe morën epërsinë në minutën e 24-të me golin e Kompaoré. Shkupi barazoi në minutën e 56-të me penalltinë e kapitenit Muarrem, ndërsa Struga mbeti me dhjetë lojtarë pas përjashtimit të Diakos.
Megjithatë, skuadra e Bledi Shkëmbit nuk u dorëzua. Pas një prekjeje me dorë në zonë, gjyqtari akordoi penallti në minutën e 74-të, të cilën Kompaoré e shndërroi në golin e dytë personal dhe të fitores për Strugën.
Me këtë triumf, Struga ruan ritmin në garën për kreun e tabelës, ndërsa Shkupi mbetet e fundit me vetëm një pikë të fituar dhe në krizë të thellë. Në xhiron e ardhshme, Struga luan në Shkup kundër Makedonija GJ.P., ndërsa Shkupi udhëton në Kratovë për t’u përballur me Sileksin. /Telegrafi/
Ka nisur java e 11-të e Ligës së Parë të Maqedonisë së Veriut me dy ndeshje të luajtura sot, në Shkup dhe Gostivar, njofton Telegrafi.
Në kryeqytet, Makedonija Gj.P dhe Bashkimi ndanë pikët pas një dueli të luftuar që përfundoi 1:1. Të dy skuadrat patën raste të mira shënimi, ndërsa portierët ishin në qendër të vëmendjes gjatë pjesës së parë. Avantazhin e takimit e mori Bashkimi në fillim të pjesës së dytë me golin e Avornijos, pas një pasigurie të portierit vendas. Megjithatë, vendasit arritën të barazonin në minutat e fundit përmes Peçovit, duke shmangur humbjen në shtëpi. Kumanovarët, megjithëse pa fitore, treguan karakter dhe qartazi po rriten nga ndeshja në ndeshje.
KF Bashkimi - Kumanovë
Në Gostivar, Arsimi zhvilloi një ndeshje spektakolare përballë Rabotniçkit, duke arritur një barazim 2:2 pas një përmbysjeje të bukur në pjesën e dytë. Miqtë nga Shkupi përfituan në fundin e pjesës së parë, kur fillimisht Demir Imeri shënoi një gol të bukur nga distanca, ndërsa menjëherë pas tij një autogol i fatkeq e dyfishoi epërsinë e Rabotniçkit.
Në pjesën e dytë, skuadra nga Çegrani reagoi me vendosmëri, veterani Bashkim Velija realizoi një “perlë” nga 30 metra, ndërsa në minutat e fundit Albian Taipi, pasi goli iu konfirmua nga VAR-i, barazoi rezultatin për 2:2, duke shpërthyer entuziazmin në tribuna. Arsimi arriti të ruajë barazimin deri në fund dhe të marrë një pikë me shumë vlerë në shtëpi.
Pas këtyre dueleve, Arsimi ngjitet në kuotën e 12 pikëve, ndërsa Bashkimi mbetet me një bilanc të qëndrueshëm në mesin e tabelës. Java e 11-të do të vazhdojë me tri përballje të tjera interesante: nesër Shkupi luan ndaj Strugës, Pelisteri pret Tikveshin në orën 17:00, ndërsa të enjten zhvillohen dy duele të forta – AP Brera përballet me Shkëndijën në orën 13:30 dhe në mbrëmje Vardari pret Sileksin në orën 17:00. /Telegrafi/
Java e dhjetë e kampionatit ka vazhduar sot me dy duele interesante, ku befasia më e madhe ndodhi në Strugë, ndërsa në Shkup u ndanë pikët pa gola, njofton Telegrafi.
Ekipi i Struga Trim Lum u befasua në terrenin vendas, duke pësuar humbje 2-4 nga Brera, në një ndeshje plot gola. Miqtë nga Strumica merituan fitoren, pasi gjatë gjithë takimit ishin më të organizuar dhe më konkretë në lojë.
Që nga minutat e para, Brera tregoi se kishte udhëtuar drejt Strugës për fitore. Me dy gola të shpejtë në minutat e 3-të dhe 7-të, ata morën epërsinë e hershme dhe paralajmëruan befasinë e madhe që do të pasonte.
Struga reagoi në kohë, kur Zenku shënoi me një goditje të fortë nga distanca, duke ngushtuar diferencën. Megjithatë, në minutën e 21-të Ndzenge riktheu epërsinë prej dy golash për Brerën.
Momenti më i bukur i ndeshjes erdhi në fund të pjesës së parë, kur Besmir Bojku realizoi një gol spektakolar nga rreth 30 metra. Në pjesën e dytë, Struga sulmoi vazhdimisht, por pa sukses. Brera shfrytëzoi hapësirat dhe në minutën e 61-të vulosi rezultatin përfundimtar 2-4, duke marrë tri pikë të mëdha nga kampioni në fuqi.
Në ndeshjen tjetër të javës së dhjetë, Rabotniçki dhe Makedonija Gjorçe Petrov ndanë pikët, pasi sfida e zhvilluar në Shkup përfundoi pa gola (0-0).
Të hënën në Tetovë do të luhet derbi i javës, ku Shkëndija pret Vardarin, dhe nëse njëra nga këto dy skuadra arrin të marrë pikët e plota, do të ngjitet në krye të tabelës së renditjes.
Ndërkohë, dje Bashkimi mundi Shkupin me rezultat bindës 4-1, ndërsa Arsimi arriti një përmbysje spektakolare në Kavadar, duke e mposhtur Tikveshin 4-3. /Telegrafi/
Pas një pauze të gjatë, shkaku i angazhimeve të përfaqësueses së Maqedonisë në ndeshjet kualifikuese për Kampionatin Botëror dhe më pas nga raundi i parë i zgjedhjeve lokale, futbolli vendor rikthehet, nga sot me duelet e javës së dhjetë në Ligën e Parë, njofton Telegrafi.
Java do të nisë me dy ndeshje të premten, ku më interesant pritet të jetë derbi shqiptar në Kumanovë. Ekipi i Bashkimit, që këtë sezon po tregon formë solide, do të jetë nikoqir i Shkupit. Dy skuadra me objektiva të ndryshme – Bashkimi ndodhet në pozitën e pestë me 15 pikë, ndërsa Shkupi, ndonëse një emër i madh në futbollin vendor, këtë edicion po kalon periudhë të vështirë dhe gjendet në fund të tabelës me vetëm një pikë të fituar.
Dueli tjetër i ditës do të luhet në Kavadar, ku Tikveshi pret Arsimin. Të dy ekipet kanë pikë të barabarta në renditje dhe synojnë të marrin maksimumin për të larguar presionin e zonës së ftohtë. Të dy ndeshjet do të fillojnë në orën 14:30.
Të shtunën do të zhvillohen dy takime të tjera: Rabotniçki do të përballet me Makedonija Gj.P, ndërsa Struga Trim Lum, që aktualisht kryeson tabelën, do të jetë nikoqire e Brerës nga Strumica.
Të dielën pritet një duel interesant mes Sileksit dhe Pelisterit, ndërsa java e dhjetë do të mbyllet të hënën me superderbin e madh mes Shkëndijës dhe Vardarit, përballje që gjithmonë sjell emocione dhe rivalitet të lartë.
Shkaku i ndryshimit të orës nga ajo verore në dimërore, ndeshjet Sileksi – Pelisteri dhe Shkëndija – Vardari do të fillojnë në orën 13:30. /Telegrafi/
Shkëndija nga Haraçina ka realizuar një befasi të madhe në Kupën e Maqedonisë, duke eliminuar një ekip të Ligës së Parë, Pelisterin nga Manastiri, me rezultat 1-0 dhe duke siguruar vend mes tetë skuadrave më të mira të garës, njofton Telegrafi.
Ndeshja, e zhvilluar në stadiumin e lagjes Hasanbeg në Shkup, u kontrollua nga skuadra vendase. Goli vendimtar erdhi në minutën e 51-të, kur Arsim Lamallari, ishte më i lart në kërcim në një goditje këndi, shënoi me kokë. Pelisteri krijoi disa mundësi deri në fund, por nuk arriti të gjejë rrugën drejt portës, duke e bërë këtë fitore të rëndësishme për Shkëndijën nga Haraçina. Rivalin e radhës Shkëndija do ta mësojë në shortin që do të organizojë Federata e Futbollit të Maqedonisë.
Ndërkohë, Struga Trim & Lum u kualifikua për çerekfinale me një fitore të qartë 5-0 ndaj Makedonija Gjorçe Petrovit në Shkup. Ivkoviç hapi rezultatin pas një pasimi të saktë nga Fal, pas aksionit të nisur nga kapiteni Shabani. Në fillim të pjesës së dytë, Arbi Vosha shënoi golin e dytë me një goditje të saktë. Basiru Kompaore realizoi golin e tretë në minutën e 76-të, ndërsa Hristijan Maleski dhe Stefan Jevtovski vulosën rezultatin përfundimtar 5-0. Struga vazhdon rrugëtimin në Kupë, pasi vitin e kaluar arriti në finale ku humbi ndaj Vardarit.
Në një tjetër ndeshje, Bashkimi u përball me Sileksin në “Stadiumin e Qytetit” në Kumanovë. Takimi nisi me një gol spektakolar të Darko Dodev në minutën e 4-t,nga një ditancë mbi 15 metra. Para pushimit të pjesës së parë, Kumanova barazoi me një gol të Marko Simonovskit. Nikoliq shënoi golin e fitores pë mysafirët.
Rabotniçki ka siguruar kualifikim vetëm pas goditjeve nga penalltia, pasi ndeshja në kohën e rregullt kishte përfunduar 1-1 ndaj Bregallnicës.
Ndeshjet e radhës:
Vardari – Novaci luhet nesër, e mërkurë, 22 tetor 2025, ora 14:00.
Për shkak të angazhimeve në Ligen e Konferencës, ndeshja Shkëndija (Tetovë) – Tikveshi do të zhvillohet më 19 nëntor 2025, e mërkurë, ora 13:00.
Dy skuadra, Detoniti dhe Ohri, janë kualifikuar automatikisht në çerekfinale./Telegrafi/
Kupa e Maqedonisë së Veriut hyn në fazën e saj të dytë, ose ndryshe 1/8 e finales me pesë ndeshje që do të zhvillohen këtë javë më 21 dhe 22 tetori. Tashmë dy skuadra, Detoniti dhe Ohri, janë kualifikuar automatikisht në çerekfinale, por vëmendja më e madhe këtë javë është te ekipet shqiptare që do të kërkojnë të bëjnë hapin e radhës drejt trofeut, njofton Telegrafi.
Skuadra e Bashkimit nga Kumanova përballet me Sileksin në një duel që pritet të jetë i balancuar. Bashkimi, që ka treguar formë solide këtë sezon, do të kërkojë të shfrytëzojë përparësinë e fushës për të eliminuar një kundërshtar me më shumë përvojë nga elita.
Një ndeshje shumë e fortë dhe ndër më interesantet e kësaj faze. Struga Trim&Lum, ndeshet në udhëtim me një skuadër që ka treguar shpesh se mund të befasojë, Makedonija Gjorçe Petrov në Shkup. Struga është favorite, por në një ndeshje të vetme gjithçka është e mundur.
Ky është një duel historik për skuadrën e Shkëndijës nga Haraçina, e cila ka mbërritur në këtë fazë pas një paraqitjeje të mirë. Përballë do të ketë Pelisterin, një ekip me emër të madh në futbollin e vendit tonë, por që nuk po kalon formën më të mirë. Një shans i artë për Shkëndijën e Haraçinës që të shkruajë histori. Një ditë më vonë pra të mërkurën në ora 14:00, luhet dueli Vardari me Novacin e ligës së dytë.
Shkëndija e Tetovës, një nga klubet më të mëdha shqiptare në vend, do të luajë më vonë për shkak të angazhimeve të saj në garat e Ligës së konferencës. Tikveshi është një kundërshtar serioz, por objektivi i Shkëndijës është i qartë, triumfi në Kupë dhe kthimin e këtij trofeu. /Telegrafi/
Duelet e Kupës së Maqedonisë së Veriut:
21 tetor 2025 (e martë, ora 14:00)
Bashkimi – Sileksi
Makedonija Gj.P. – Struga T.L.
Rabotniçki – Bregallnica
Shkëndija (Haraçinë) – Pelisteri
22 tetor 2025 (e mërkurë, ora 14:00)
Vardari – Novaci
19 nëntor 2025 (e mërkurë, ora 13:00)
Shkëndija (Tetovë) – Tikveshi
Dy skuadra, Detoniti dhe Ohri janë kualifikuar automatikisht në çerekfinale.
Këtë fundjavë nuk do të zhvillohen ndeshje futbolli në Maqedoni, pasi Federata e Futbollit e Maqedonisë (FFM) ka pranuar rekomandimin e Ministrisë së Punëve të Brendshme (MPB) për të shtyrë të gjitha takimet për shkak të mbajtjes së raundit të parë të zgjedhjeve lokale, njofton Telegrafi.
Janë publikuar terminet e reja për ndeshjet e shtyra të javës së dhjetë, ndërsa vëmendjen më të madhe, sigurisht, e tërheq derbi i madh mes Shkëndijës dhe Vardarit, i cili do të luhet në “Stadiumin e Qytetit” në Tetovë.
Përballja mes Shkëndijës dhe Vardarit është caktuar për të hënën, më 27 tetor, me fillim nga ora 13:30.
Xhiroja e dhjetë në Ligën e Parë të Futbollit të Maqedonisë do të nisë të premten (më 24 tetor) me ndeshjet Bashkimi – Shkupi dhe Tikveshi – Arsimi (në orën 14:30).
Të nesërmen, pra të shtunën, do të luhen takimet Rabotniçki – Makedonija GP dhe Struga – Brera (në orën 14:30), ndërsa të dielën (më 26 tetor) është parashikuar vetëm një ndeshje – Sileksi kundër Pelisterit (në orën 13:30). /Telegrafi/
Pas nëntë javëve të para në Ligën e Parë të Maqedonisë së Veriut, Struga Trim & Lum e pandalshme në krye, Shkëndija në ndjekje për mbrojtjen e titullit, ndërsa Shkupi përjeton sezonin më të errët në historinë e saj, njofton Telegrafi.
Liga e Parë ka hyrë në një pauzë për shkak të ndeshjeve të përfaqësueses, por pas nëntë javëve, tabela e kampionatit është e qartë: Struga Trim & Lum kryeson pa humbje dhe me një golaverazh mbresëlënës, Shkëndija po qëndron fort në garë për fronin, ndërsa Bashkimi dhe Arsimi po kërkojnë stabilitet në mesin e tabelës. Në anën tjetër, FC Shkupi, një klub me traditë, është zhytur në krizë të thellë me vetëm një pikë të fituar.
Struga Trim & Lum – lidere e padiskutueshme
Struga Trim & Lum po zhvillon një sezon fantastik. Pas nëntë javëve, skuadra strugane kryeson renditjen me 23 pikë, me një bilanc mbresëlënës prej 7 fitoreve dhe 2 barazimeve, pa asnjë humbje.
Me 22 gola të shënuar dhe vetëm 5 të pësuar, Struga ka golaverazhin më të mirë në kampionat (+17), duke dëshmuar forcën e saj në të dyja fazat e lojës. Ekipi i trajnerit Blendi Shkëmbi ka ndërtuar një stil dominues dhe të disiplinuar, ku përveç efikasitetit në sulm, mbrojtja ka qenë një nga më të qëndrueshmet në ligë.
Shkëndija – kampionia që nuk heq dorë nga froni
Në vendin e tretë, me 21 pikë, qëndron Shkëndija e Tetovës, kampione në fuqi dhe rivale e përjetshme për kreun. Kuqezinjtë kanë regjistruar 6 fitore dhe 3 barazime, duke qenë një nga tre skuadrat që ende nuk kanë pësuar humbje. Me 15 gola të shënuar dhe vetëm 4 të pësuar, Shkëndija është ekipi me mbrojtjen më të fortë në kampionat. Forma e qëndrueshme, përvoja dhe grupi i konsoliduar e mbajnë skuadrën tetovare në garë të plotë për titull, në një duel që duket se do të vazhdojë gjatë gjithë sezonit me Strugën dhe Vardarin. Sigurisht se garën e bënë pak më të vështirë, pasi kuqezinjtë nga Tetova këtë seszonë janë pjesëmarrës për herë të parë në historinë e klubit edhe në garat e Ligës së Konferencës.
Bashkimi befasia pozitive e sezonit
Ekipi i Bashkimit të Kumanovës është një nga historitë e bukura të këtij fillim sezoni. Pas nëntë javëve, Bashkimi renditet në vendin e pestë me 15 pikë, falë 4 fitoreve, 3 barazimeve dhe vetëm 2 humbjeve.
Skuadra ka shënuar 12 gola dhe ka pësuar po aq (12:12), çka tregon një ekuilibër të mirë mes fazave të lojës. Në javët e fundit, Bashkimi ka treguar karakter, duke marrë rezultate të rëndësishme si mysafir, dhe po hyn me ambicie në mesin e skuadrave që luftojnë për pozicionet e para. Nëse jo më shumë, kumanovarët do të sulmojnë një pozitë që u mundëson dalje në garat evropiane.
Arsimi luan “ftohtë-nxehtë”, me potencial për rikthim
Në vendin e tetë me 8 pikë gjendet Arsimi i Tetovës, që ka realizuar 2 fitore, 2 barazime dhe 5 humbje, me golaverazh 13:16. Skuadra ka treguar momente të mira loje, sidomos në duelet në shtëpi, por mungesa e vazhdimësisë dhe disa gabime në fundin e ndeshjeve kanë kushtuar pikë të vlefshme. Nëse arrin të stabilizojë mbrojtjen dhe të ruajë ritmin e sulmit, Arsimi ka potencial për të ngjitur disa shkallë në tabelë pas rikthimit nga pauza.
Shkupi në krizë, nëntë javë një pikë
Në fund të tabelës, me vetëm 1 pikë nga 9 ndeshje, qëndron FC Shkupi, një klub me traditë të madhe dhe katër tituj kampion në historinë e saj. Bilanci është alarmant: 0 fitore, 1 barazim dhe 8 humbje, me golaverazh -17 (6:23).
Kjo është periudha më e vështirë që ka përjetuar Shkupi në vitet e fundit, ku problemet financiare, ndryshimet e brendshme dhe mungesa e stabilitetit kanë ndikuar drejtpërdrejt në fushë. Në Çair mbretëron pasiguria, ndërsa tifozët presin reagim dhe masa konkrete për ta shpëtuar sezonin, që aktualisht po shkon drejt katastrofës.
Pauza – moment reflektimi
Pas nëntë javëve, kampionati po tregon se do të jetë një nga më interesantët e viteve të fundit. Ekipet shqiptare janë protagoniste në çdo nivel të tabelës: Struga Trim & Lum si lidere e qartë, Shkëndija në ndjekje për mbrojtjen e titullit, Bashkimi me rritje të qëndrueshme, Arsimi që kërkon stabilitet dhe Shkupi që përballet me krizën më të thellë në historinë e tij të afërt.
Pauza për ndeshjet e përfaqësueses do t’u japë trajnerëve kohë për analizë dhe përgatitje, ndërsa rikthimi në fushë pritet të sjellë edhe më shumë emocione dhe duele të zjarrta mes skuadrave shqiptare që po e udhëheqin elitën e futbollit në Maqedoninë e Veriut. /Telegrafi/
Struga Trim & Lum, ka marrë një barazim me shumë vlerë në derbin kundër Vardarit (2-2), në një ndeshje që dhuroi spektakël, gola dhe emocione deri në minutat e fundit. Struga edhe pse kishte fitoren në shtesë, mbetet e vetme në krye të tabelës me 23 pikë, duke dëshmuar se është skuadra më stabile dhe më e kompletuar e sezonit, njofton Telegrafi.
Takimi i zhvilluar në Arenën “Todor Proeski” në Shkup filloi me kujdes nga të dyja palët, por Struga u tregua më konkrete dhe më e organizuar në fazën sulmuese. Epërsia erdhi në minutën e 19-të, kur kapiteni Bunjamin Shabani u gjend në vendin e duhur pas një harkimi perfekt nga Pape Fall, duke shënuar me kokë për 0-1.
Në pjesën e dytë, Vardari rriti presionin dhe pas një penalltie të diskutueshme, Roger Mato barazoi në minutën e 60-të, pas një goditjeje të dytë. Por, përgjigjja e Strugës ishte e menjëhershme, vetëm katër minuta më pas, ylli i skuadrës Kompaore realizoi një gol të bukur për rikthimin e epërsisë (1-2).
Në minutat e fundit, Struga pati mundësinë të vuloste fitoren, por Maleski humbi një rast ideal, ndërsa në shtesë (92’) Vardari arriti të shpëtojë një pikë falë golit të Jankullovit për 2-2.
Ky barazim megjithatë nuk e lëviz Strugën nga pozita e parë, e cila vazhdon marshimin drejt titullit me vetëm një humbje pas nëntë javësh. Skuadra e Blendi Shkëmbit po konfirmohet si forca më e qëndrueshme në elitën e futbollit, duke ruajtur ritmin e fitoreve edhe në ndeshjet më të forta. Në duelin e dytë të ditës, Sileksi mundi me rezultat minimal 1-0 Tikvesin.
Java e nëntë mbyllet nesër me duelin Pelisteri – Shkëndija. /Telegrafi/
Java e tetë e Ligës së Parë të Maqedonisë u hap sot me përballjen mes Makedonija Gj.P dhe Arsimit, dy skuadrave që po luftojnë për t’u larguar nga fundi i tabelës, njofton Telegrafi.
Nikoqirët arritën të triumfojnë me rezultat 4-1, edhe pse Arsimi pati momente kur u duk se mund të merrte më shumë nga ky duel.
Ndeshja nisi me presion të vendasve, që kaluan në epërsi në minutën e 13-të me golin e Stoillovit. Arsimi e pranoi golin herët, por nuk u dorëzua dhe me kalimin e minutave filloi të krijojë raste, siç ishte përpjekja e Ignjatovit në minutën e 33-të.
Në pjesën e dytë, Arsimi u gjend në disavantazh prej dy golave, por në minutën e 63-të Shefit Shefiti ktheu shpresat me një realizim të bukur, duke ngushtuar rezultatin në 2-1. Megjithatë, vetëm pak çaste më pas, ekipi nga Çegrani mbeti me një lojtar më pak pasi Xhemil Jahiji u ndëshkua me kartonin e dytë të verdhë, gjë që e vështirësoi misionin e tyre për të rikthyer ndeshjen.
Edhe futbollistët e Arsimit me një lojtar më pak u përpoqën të mbeten aktivë në lojë, një gabim i portierit Siljanovski i dha mundësinë vendasve të realizojnë golin e tretë, ndërsa në fund u shënua edhe i katërti për rezultatin përfundimtar 4-1.
Arsimi mbeti duarbosh në duelin ndaj Makedonija Gj.P telegrafi.com
Me këtë humbje, Arsimi mbetet me katër pikë më pak se rivali i sotëm dhe do të kërkojë të rikthehet në binarë javën e ardhshme në udhëtimin e vështirë ndaj Tikveshit në Kavadar. Kujtojmë se ndeshjet tjera të javës së tetë do të zhvillohen në tri ditët e ardhshme. /Telegrafi/
Fillimi i tetorit sjell javën e tetë të kampionatit në Ligën e Parë të Maqedonisë së Veriut, e cila më pas do të ketë një pauzë për shkak të angazhimeve të përfaqësueses në kualifikimet për Botërorin 2026. Kjo xhiro premton duele të nxehta, me disa ndeshje që mund të ndikojnë drejtpërdrejt në renditjen e tabelës, njofton Telegrafi.
Xhiron e hap të premten përballja mes Makedonija Gj.P dhe Arsimit (15:00). Të dy skuadrat ndahen vetëm nga një pikë në renditje, ndërsa Arsimi vjen i motivuar pas fitores ndaj Shkupit, kurse Makedonija e Gj.P. do të kërkojë të kthehet te rezultatet pozitive pas humbjes nga Tikveshi.
Të shtunën zhvillohen dy ndeshje të tjera. Bashkimi, që ndodhet në formë shumë të mirë dhe është afër kreut të tabelës, udhëton në Strumicë për t’u përballur me AP Brerën. Në të njëjtën kohë, Shkupi do të masë forcat me Rabotniçkin, ndeshje që do të luhet në Strugë për shkak të pezullimit të stadiumit të Çairit. Bëhet fjalë për dy skuadrat që ndodhen në fund të tabelës, por kjo mund të jetë mundësia e artë për Shkupin që ende nuk ka fituar asnjë pikë këtë sezon.
Të dielën spikat derbi i madh në Shkup mes Vardarit dhe Strugës (15:00). Struga Trimi Lum, që po dominon kampionatin, do të kërkojë të vazhdojë ecurinë perfekte përballë ndjekësit të parë, Vardarit, në një duel që pritet të tërheqë vëmendjen e madhe të opinionit sportiv. Në të njëjtën ditë, Sileksi pret Tikveshin në Kratovë.
Java e tetë do të mbyllet të hënën me përballjen në Manastir mes Pelisterit dhe Shkëndijës. Për kuqezinjtë e Tetovës kjo do të jetë një ndeshje e vështirë, pasi sot ata përballen me Rayo Vallecanon në Ligën e Konferencës. /Telegrafi/
Login
