Milani po shqyrton disa opsione për repartin defensiv përpara hapjes së afatit kalimtar të janarit, teksa Massimiliano Allegri synon të shtojë përvojë dhe thellësi në mbrojtje.

Një nga emrat që po merret në konsideratë është Federico Gatti, profil që Allegri e njeh shumë mirë nga koha e tyre e përbashkët te Juventusi.

Mbrojtësi 27-vjeçar kishte refuzuar një transferim te Napoli verën e kaluar, por situata e tij aktuale në Torino është bërë më e ndërlikuar si pasojë e lëndimeve dhe mungesave të shumta në prapavijën e bardhezinjve.

Juventusi po operon në kushte emergjente në qendër të mbrojtjes, me Daniele Rugani jashtë fushave për disa javë, ndërsa klubi nuk dëshiron të dobësojë edhe më tej një repart që tashmë është i tejngarkuar. Për këtë arsye, një largim i Gattit në janar, veçanërisht drejt një rivali direkt në garën për top katërshen, shihet si shumë pak i mundshëm.

Si rrjedhojë, Milani po monitoron edhe alternativa më me përvojë për ta përforcuar mbrojtjen.

Sipas "Sky Sport Italia", një nga sugjerimet është Milan Skriniar. Sllovaku ka kaluar shtatë vite në Serie A me Sampdorian dhe Interin, përpara se të largohej nga Italia në vitin 2023. Megjithatë, ai aktualisht mban shiritin e kapitenit te Fenerbahçe, gjë që e bën një marrëveshje të mundshme shumë të vështirë për t’u realizuar në mes të sezonit.

Një tjetër emër në radarët e kuqezinjve është Eric Dier, i cili u transferua te Monaco nga Bayern Munich verën e kaluar. Mbrojtësi anglez është rikthyer së fundmi nga një lëndim muskulor dhe Milani po vlerëson nëse ekziston hapësirë për manovrim në bisedimet me klubin e Ligue 1.

Me afrimin e muajit janar, Milani po përpiqet të gjejë ekuilibrin mes ambicies dhe realizmit, duke synuar ta përforcojë mbrojtjen e Allegrit pa shkaktuar tronditje në tregun e transferimeve./Telegrafi

Trajneri i Milanit , Massimiliano Allegri, e ofendoi zyrtarin e Napolit, Gabriele Oriali, gjatë gjysmëfinales së Superkupës së Italisë e cila përfundoi me fitoren 2-0 të napolitanëve.

Incidenti ndodhi gjatë një përplasjeje midis stolave të ekipeve pasi Adrien Rabiot bëri një ndërhyrje të fortë ndaj Matteo Politanos.

Stoli i Napolit vrapoi në fushë, duke kërkuar që mesfushorit të Milanit t’i jepej kartoni i kuq.

Sportmediaset pretendon se Allegri e quajti Orialin një "bastard" përpara se trajneri i Milanit të arrinte ta qetësonte dhe ta kthente në zonën teknike.

“Napoli dënon fuqishëm sjelljen e trajnerit të Milanit, Massimiliano Allegri, i cili, gjatë gjysmëfinales së Superkupës së Italisë, para dhjetëra njerëzve në fushë dhe drejtpërdrejt në televizion, e fyeu vazhdimisht dhe në mënyrë të vrazhdë Gabriele Orialin”.

“Shpresojmë që ky agresion krejtësisht i pakontrolluar të mos kalojë pa u vënë re, veçanërisht pasi me 33 kamera të përfshira në transmetim, është e pamundur të mos regjistrohet ajo që ndodhi”, ka thënë Napoli në një deklaratë. /Telegrafi/

Ardon Jashari këmbëngul se “të gjithë” te Milani e bënë të ndihej i rëndësishëm gjatë kohës që qëndroi jashtë fushe, teksa vlerëson Massimiliano Allegrin dhe shokët e tij të ekipit Luka Modric dhe Adrien Rabiot.

Jashari iu bashkua Milanit nga Club Brugge verën e kaluar, por pësoi një dëmtim të fibulës në stërvitje menjëherë pas transferimit të tij në San Siro, duke qëndruar më shumë se dy muaj jashtë fushave. 23-vjeçari ka luajtur vetëm 121 minuta futboll në fushë këtë sezon.

“Sinqerisht, pas një vere gjatë së cilës negociatat për ardhjen time në Milan kishin qenë të gjata, të kisha një problem si ky nuk ishte ideale. Kisha punuar me ekipin për tre javë, po rritesha dhe nuk mendoj se dikush në vendin tim do të kishte qenë i lumtur”, ka thënë fillimisht Jashari për Gazzetta dello Sport.

“Të gjithë te Milani më shkruanin dhe më bënin të ndihesha i rëndësishëm: shokët e skuadrës, stafi, trajneri, drejtorët”.

"Dua ta shoh nivelin e tij" - Allegri flet për Jasharin

“Tre ditët e para ishin të vështira nga pikëpamja mendore, por pas kësaj, pata mundësinë të shkoja dhe të kaloja disa javë me familjen time në Zug".

“Me një kockë të thyer nuk munda të stërvitesha, dhe kalimi i pak kohe me prindërit dhe miqtë e mi, pa harruar të bëja fizioterapi, më ndihmoi: Nuk mendova shumë për dëmtimin dhe u ndjeva më i qetë”.

"Që nga mesi i shtatorit, kam vazhduar terapinë me fizioterapistin David, dhe më pas kam filluar të ushtroj, fillimisht në palestër dhe më pas në rërë dhe fushë. Kthimi në grup ishte hapi i fundit".

Jashari iu bashkua Rossonerëve pas javësh negociatash verën e kaluar dhe refuzoi ofertat nga klube të tjera për t'u transferuar në San Siro.

“Kam ëndërruar të jem aty ku jam, në një klub të madh. Të gjithë e dinë sa shumë doja të bashkohesha me Milanin. Club Brugge kishte shumë kontakte me klube të tjera, por unë kisha ide të qarta dhe e shihja veten vetëm me fanellën e Rossonerëve".

Trajneri i Milanit, Massimiliano Allegri, ka qenë mesfushor qendror gjatë karrierës së tij si lojtar, në të njëjtin rol si Jashari.

“E di, ai ishte një numër 10, dhe kjo është arsyeja pse them se mund të më ndihmojë shumë. Trajneri është i rëndësishëm, ai është gjithmonë pranë nesh. Të kesh dikë si ai u jep besim individëve dhe dhomës së zhveshjes. Ai është thelbësor për suksesin tonë: ai ka përvojë dhe ka punuar me lojtarë të jashtëzakonshëm. Mund të mësoj shumë nga dikush si ai”, shtoi shqiptari.

Verën e kaluar, Milani bëri disa blerje në qendër të mesfushës. Përveç Jasharit, ata nënshkruan edhe me Samuele Ricci, Adrien Rabiot dhe Luka Modric.

“Të luash me të [Modricin] është e jashtëzakonshme për të gjithë, jo vetëm për mua. Unë luaj në të njëjtën pozicion me të dhe mund të mësoj shumë: ai ka aftësi të jashtëzakonshme teknike, por edhe një personalitet fantastik, gjë që duket në mënyrën se si u afrohet lojtarëve”.

“Rabiot ka pasur një ndikim të madh në ekip që nga dita e parë dhe është i rëndësishëm për Milanin. Ai ka mënyrën se si e lexon lojën dhe si luan futboll”.

“Nuk mund ta imitosh sepse secili ka cilësitë dhe karakteristikat e veta fizike, por prapëseprapë mund të mësosh diçka nga kampionë si ai dhe Modric dhe të bëhesh më i kompletuar”, përfundoi Jashari.

Sonte (e enjte), Milani i Jasharit luan me Napolin në Riad të Arabisë Saudite, në gjysmëfinalen e Superkupës së Italisë. /Telegrafi/

Trajneri i Milanit, Massimiliano Allegri ka folur për gjendjen e Ardon Jasharit para ndeshjes kundër Lazios. Sipas tij, fokus i vëmendjes nuk është vetëm të shohë aftësitë e Jasharit, por edhe gjendjen e tij fizike. “Dua të shoh gjendjen e tij fizike, sepse të mos harrojmë se kur ai mbërriti, kishte qenë jashtë fushave për dy muaj. Ai luajti 45 minuta, pastaj u lëndua dhe tani ka qenë përsëri…

Source

Trajneri i Milanit, Massimiliano Allegri, ka folur për “SportMediaset” në prag të ndeshjes së Kupës së Italisë kundër Lazios, duke ndalur vëmendjen edhe te mesfushori Ardon Jashari.

Jashari, i cili ka munguar që nga 23 gushti për shkak të një lëndimi në stërvitje, mund të rikthehet më në fund në lojë të enjten në “Olimpico”, në duelin që nis nga ora 21:00.

Mesfushori 23-vjeçar, që përfaqëson Zvicrën dhe u transferua këtë verë nga Club Brugge për 36 milionë euro, pritet të marrë minuta pas një periudhe të vështirë jashtë fushës.

Allegri u shpreh se ndeshja ndaj Lazios do të jetë një test i rëndësishëm për të kuptuar gjendjen aktuale të lojtarit.

“Më pak është çështje cilësish teknike dhe më shumë një rast për ta vlerësuar fizikisht. Kur u transferua, kishte qenë një muaj e gjysmë jashtë. Luajti vetëm 45 minuta dhe më pas mungoi edhe dy muaj të tjerë. Jam shumë kurioz të shoh nivelin e tij fizik”, deklaroi ai.

Në sezonin e kaluar, Jashari spikati te Club Brugge, ku fitoi disa çmime individuale dhe u konsiderua një nga lojtarët më të mirë të kampionatit belg, gjë që e bëri një nga blerjet më premtuese të Milanit këtë verë. /Telegrafi/

Ish-sulmuesi i Italisë, Antonio Cassano, vazhdon të jetë një nga kritikët më të zëshëm të Massimiliano Allegrit, duke deklaruar se trajneri i Milanit “do të përfundojë i harruar, njësoj si Jose Mourinho”.

Edhe pse Milani kryeson tabelën me 28 pikë, stili i lojës së skuadrës nuk i pëlqen aspak ish-yllit të Romës.

“Mbani mend çfarë kam thënë për Mourinhon: herët a vonë do të përfundonte dhe do të harrohej. E njëjta gjë do t’i ndodhë edhe Allegrit”, u shpreh Cassano në podkastin Viva El Football, sipas Milan News.

Ai shtoi se nuk mund ta imagjinojë Milanin që në vitin 2025 të luajë futboll “të shëmtuar”, siç e përshkruan ai, vetëm për shkak të filozofisë së trajnerit.

“Milani është histori, bukuri, estetikë dhe cilësi. E çfarë bëjnë ata? Qëndrojnë të gjithë para portierit, s’ka thellësi, s’ka ide”, theksoi Cassano.

Cassano telegrafi.com

Ironikisht, vetë Cassano — që gjatë karrierës së tij ka luajtur për Romën, Interin, Milanin dhe Real Madridin — ka një Scudetto të vetëm, të fituar pikërisht në vitin 2011, nën drejtimin e Massimiliano Allegrit. /Telegrafi/

Gianluigi Buffon, kreu aktual i delegacionit të kombëtares italiane, ka komentuar situatën e AC Milan në një intervistë për Radio Rai, duke dhënë mendimin e tij mbi mungesën e skuadrës në Ligën e Kampionëve dhe perspektivat e sezonit.

Milani në fundjavë mposhti Lazion me rezultat minimal 1-0, derisa këtë edicion është treguar skuadër shumë e fortë sidomos nëderbi.

Rossonerët kanë mposhtur Interin (1-0), Romën (1-0), Napolin (2-1) dhe kanë barazuar me Juventusin.

"A mund ta shfrytëzojë Allegri mungesën nga Liga e Kampionëve? Gjithmonë kam menduar se është mirë të jesh në garë për gjithçka, duke hipur në valën e garave të ndryshme. Ndonjëherë, të nxjerrësh maksimumin nga gjithçka është e komplikuar, por me mentalitetin e duhur, është më mirë të jesh në të gjitha garat".

telegrafi.com

"Milani i Allegrit nuk zgjodhi të mos ishte në Ligën e Kampionëve dhe në fund, ata do të jenë në gjendje ta shfrytëzojnë këtë", tha Buffon.

Ai komentoi gjithashtu ndeshjen e veçantë Milan-Como që do të zhvillohet në Perth të Australisë në shkurt.

"Sigurisht që nuk është ndeshja jonë e zakonshme, por bota ecën përpara dhe ka interesa të rëndësishme pas saj. Sidoqoftë, them se dikush mund të bjerë dakord ose jo, por për të mbajtur ritmin me kombet e tjera, zgjedhja është bërë. Nuk më takon mua të them nëse do të jetë një sukses apo jo", tha Buffon.

Aktualisht, Rossonerët ndajnë vendin e parë në Serie A me Napolin, pas humbjes së Romës në shtëpi kundër Azzurrëve, duke e bërë garën për titull më të fortë dhe të ngushtë këtë sezon. /Telegrafi/

Milani po përjeton një rilindje nën drejtimin e Massimiliano Allegrit, i cili ka rikthyer energjinë, disiplinën dhe identitetin konkurrues të skuadrës.

Pas 12 javësh, kuqezinjtë renditen të dytët në Serie A, vetëm dy pikë larg Romë, dhe ky fillim i fortë i sezonit ka shtyrë drejtuesit të planifikojnë ndërhyrje të rëndësishme për afatin e janarit.

Sipas Calciomercato, objektivi kryesor është gjetja e një sulmuesi të ri dhe emri i Jean-Philippe Mateta ka dalë sërish në krye të listës.

Arsyeja kryesore pse Milani po përshpejton kërkimet lidhet me mundësinë e largimit të Santiago Gimenez, çka i detyron drejtuesit të veprojnë paraprakisht.

Mateta, i cili po shkëlqen me Crystal Palace në Ligën Premier, shihet si profili ideal për të zëvendësuar me efekt të menjëhershëm sulmuesin meksikan.

Jean-Philippe Mateta

Përforcimi i kërkuar nga Allegri duhet të ketë fuqi fizike, prani në zonë dhe vazhdimësi në lojë — karakteristika që francezi i ka dëshmuar me performanca të forta këtë sezon.

Crystal Palace e vlerëson Matetan rreth 30 milionë euro, një shumë që Milani e konsideron të përballueshme.

Megjithatë, Calciomercato paralajmëron se interesimi nga disa klube angleze dhe italiane mund të nisë një ankand, duke ngritur ndjeshëm çmimin.

Për këtë arsye, Milani po përpiqet të veprojë shpejt, përpara se konkurrenca të rritet me afrimin e janarit.

Profili i Matetas përputhet natyrshëm me stilin që dëshiron të shohë Allegri: një sulmues që mban qendërmbrojtësit të angazhuar, krijon hapësira dhe ofron referencë konstante në zonë. /Telegrafi/

Massimiliano Allegri ka festuar një fitore të madhe të Milanit në derbin ndaj Interit, një triumf që e ngjit skuadrën kuqezi në vendin e dytë të Serie A, vetëm dy pikë prapa liderit Roma.

Edhe pse Milani u vendos nën presion për periudha të gjata dhe u shpëtua nga shtyllat në pjesën e parë pas tentimeve të Acerbit dhe Lautaro Martinez, ekipi tregoi cinizëm dhe efikasitet, duke goditur në kundërsulm ashtu si ndaj Romës javë më parë.

Christian Pulisic shënoi golin vendimtar pas një aksioni të shpejtë të Alexis Saelemaekers, ndërsa Mike Maignan vulosi fitoren me një pritje shumë të rëndësishme të penalltisë së Hakan Calhanoglu, ish-mesfushorit të Milanit.

Ky rezultat e konsolidon Milanin si një skuadër të “ndeshjeve të mëdha”: fitore ndaj Interit, Napolit, Romës e Bolognas dhe barazim me Juventusin. Megjithatë, Allegri pranon se humbja e pikëve kundër ekipeve më të vogla mbetet problemi kryesor i sezonit.

“Ka qenë një fitore e madhe, një ndeshje e bukur. Fillimisht ishim pak të tensionuar në 15 minutat e para, por pastaj u liruan dhe patëm katër ose pesë situata ku mund të kishim zgjedhur më mirë në të tretën e fundit, sidomos në pasimet drejt Pulisic dhe Saelemaekers”.

“Duhej të ishim më të saktë në harkime, pastaj në pjesën e dytë, pasi shënuam, ishte normale që Interi të shtynte. Patëm disa situata të favorshme me Leaon një kundër një, mbrojtëm mirë me markimin preventiv, gjë shumë e rëndësishme kundër Interit kur ata janë të rrezikshëm në daljen nga presioni i parë".

“Mendoj se pikët që kemi janë ato që meritojmë, sepse me Napolin dhe Romën mund të kishim barazuar lehtësisht, kështu që gjithçka balancohet. Kjo ndeshje konfirmoi sezonin tonë që nga fillimi: kur duhej të vendosnim ritmin, nuk e bëmë gjithmonë, duke pësuar gola ndaj Cremonese, Parmës dhe Pisas".

“Psikologjikisht, kjo është një fitore e rëndësishme, sepse qëndrimi në top katërshe ishte objektivi ynë", deklaroi Allegri. /Telegrafi/

Massimiliano Allegri foli pas fitores së përmbysur 2-1 të Milanit ndaj Fiorentinës, një ndeshje që riktheu kuqezinjtë në krye të renditjes.

Trajneri italian shmangu komentet mbi polemikat që përfshijnë Fiorentinën dhe Stefano Piolin, por nuk kurseu vlerësimet për ekipin e tij.

“Ekipi zhvilloi një ndeshje të mirë. Deri në momentin e golit nuk kishim lejuar asnjë gjuajtje në portë, kështu që ai rast ishte më shumë i shmangshëm. Në pjesën e parë, Pavlovic dhe Leao patën mundësi të mira. Pas golit të pësuar reaguam fuqishëm dhe kjo ishte ajo që më pëlqeu më shumë. Nuk ishte e lehtë dhe jemi të lumtur për këtë fitore", tha Allegri.

Sa i përket zgjedhjeve në sulm dhe penalltisë së realizuar nga Leao, tekniku kuqezi shtoi se skuadra e tij mund të luaj edhe pa një qendërsulmues.

“Mund të luajmë edhe pa një qendërsulmues të mirëfilltë. Fofana mund të futet si mesfushor dhe kjo na ndihmon të kemi më shumë njerëz në zonë. Rafën e kisha zgjedhur unë për të gjuajtur penalltinë. Gjithsesi, duhet të përmirësojmë përqindjen e penalltive të humbura".

Në fund, Allegri nuk dëshiroi të flasë për ‘mesazhe’ në garën për titull, por u tregua i kujdesshëm dhe realist për vazhdimësinë.

“Nuk po dërgojmë asnjë mesazh. Duhet të shijojmë këtë fitore, kemi marrë tre pikë dhe duhet të marrim të tjera për të arritur objektivin tonë. Të premten duhet të jemi sërish në këtë nivel. Shpresoj të rikuperojmë Loftus-Cheek dhe Nkunku", përfundoi Allegri.

Pas kësaj fitoreje, Milani kryeson kampionatin dhe në raundin e ardhshëm do të presë Pizën në “San Siro”. /Telegrafi/

Milani po përgatitet të kërkojë përforcime në mbrojtje gjatë merkatës së janarit, pasi tre titullarët aktualë nuk janë të mjaftueshëm për të përballuar sezonin.

Alternativat në dispozicion janë Koni De Winter dhe 19-vjeçari Odogu, i cili është përdorur me kursim, duke përfshirë disa minuta në Kupën e Italisë kundër Lecces në raundin e 1/16. Për këtë arsye, skuadra kuqezi ka nevojë urgjente për një lojtar të ri në qendër të mbrojtjes.

Drejtori sportiv Igli Tare po shqyrton dy opsione kryesore: Joe Gomez të Liverpoolit dhe Mario Gila të Lazios. Të dy lojtarët konsiderohen kandidatë të mundshëm për trajnerin Massimiliano Allegri.

Qendërmbrojtësi anglez ka luajtur shumë pak te Liverpooli këtë sezon, vetëm 29 minuta në ligë dhe Ligën e Kampionëve nën drejtimin e trajnerit Slot, dhe e vetmja ndeshje si titullar ishte në Carabao Cup kundër Southampton. Nga ana tjetër, spanjolli i Lazios është një titullar i rregullt nën drejtimin e Sarrit.

Milani e ka ndjekur Joe Gomezin edhe gjatë verës, por negociatat nuk përfunduan me sukses. Në janar, kuqezinjtë mund të rikthehen në tentativë për të siguruar shërbimet e tij.

Sa i përket Mario Gilas, situata është më komplekse, pasi ai është një lojtar i rregullt në skuadrën e Sarrit dhe negociatat duhet të zhvillohen me presidentin Claudio Lotito. Për më tepër, duke filluar nga janari, Lazio do të ketë tregun e transferimeve të hapur dhe mund të preferojë të mos shesë, por të blejë një lojtar tjetër për të zëvendësuar Gilas.

Milani duhet të veprojë me shpejtësi në janar për të forcuar mbrojtjen dhe për të siguruar alternativa të besueshme për sezonin që po zhvillohet. /Telegrafi/

Pas barazimit 0-0 kundër Juventusit në Allianz, trajneri i Milanit, Massimiliano Allegri, komentoi për performancën e ekipit të tij dhe rikthimin e tij në stadiumin ku ka kaluar vite të rëndësishme të karrierës së tij.

Trajneri i njohur italian i dha merita ekipit të tij për lojëm por tha se duhet më shumë për të marr fitoren.

“Nuk e sulmuam shumë vijën mbrojtëse të Juventusit me mesfushorët tanë. Në pjesën e dytë u përmirësuam fizikisht, por ata patën një shans të madh kur Maignan bëri një pritje të shkëlqyer. Ana pozitive është se nuk pranuam gol dhe vazhduam serinë tonë pozitive, por duhet të jemi më agresivë dhe ta çojmë pikët në shtëpi”, deklaroi Allegri.

Trajneri foli gjithashtu për rikthimin e Rafael Leaos, i cili luajti pak më shumë pas një periudhe mungese.

“Kjo ishte java e tij e parë pas 45 ditësh jashtë. Ai duhet të rifitojë formën e tij fizike shpejt. Leao dhe Nkunku janë lojtarë teknikë që mund të vendosin ndeshjet. Ai tashmë ka luajtur si qendërsulmues te Lille dhe lëvizja e tij në topin e Modric ishte e shkëlqyer, por duhet të kuptojë se mund të bëjë diferencën dhe të shënojë”, nënvizoi Allegri.

Allegri komentoi edhe mundësinë e përdorimit të një tresheje sulmuese Pulisic-Leao-Nkunku.

“Do të ndryshonte ekuilibrin e ekipit, por gjëja e rëndësishme është që ata të jenë në formë. Sa më shumë lojtarë teknikë të kemi, aq më mirë, por duhet edhe pak durim”, shtoi italiani.

Ai foli edhe për rikthimin personal në Allianz, ku tifozët e pritën me pankarta mirënjohjeje.

“Ishte emocionuese. Pashë kaq shumë njerëz me të cilët kam punuar dhe me të cilët kemi festuar. Ishte emocionuese dhe argëtuese. Thjesht dua t’i falënderoj ata dhe tifozët. Jam i lumtur që u ktheva. Morëm një pikë në shtëpi, por patjetër që mund të kishim bërë më mirë. Duhet ta kuptojmë më mirë momentin”, përfundoi ai. /Telegrafi/

Trajneri i Milanit, Massimiliano Allegri, u prit ngrohtësisht nga tifozët e Juventusit gjatë rikthimit të tij në stadiumin Allianz si kundërshtar, të dielën në ndeshjen mes dy gjigantëve të Serie A.

Tifozët bardhezi e pritën me respekt ish-trajnerin e tyre, i cili kaloi tetë vite të suksesshme në Torino, duke e udhëhequr Juventusin drejt dominimit në futbollin italian.

Edhe pse skuadra e Milanit u fishkëllua gjatë prezantimit para ndeshjes, atmosfera ndryshoi kur zëri i stadiumit përmendi emrin e Allegrit — moment që u shoqërua me duartrokitje të gjata dhe brohoritje nga tifozët vendas.

Para hyrjes në fushë, Allegri përqafoi disa prej ish-lojtarëve të tij, përfshirë Kenan Yildiz, duke dhënë një shembull të ndërsjellë respekti dhe nostalgjie për periudhën e tij te “Zonja e Vjetër”.

Gjatë kohës së tij në Juventus, Allegri fitoi pesë tituj të Serie A dhe pesë Kupa të Italisë, duke drejtuar klubin në dy finale të Ligës së Kampionëve – ndaj Barcelonës së Leo Messit në vitin 2015 dhe Real Madridit të Cristiano Ronaldos në 2017.

Ai drejtoi bardhezinjtë në dy periudha: nga 2014 deri në 2019 dhe sërish nga 2021 deri në 2024.

Në prag të përballjes, vetëm një pikë ndante dy ekipet në tabelën e Serie A – Milani me 12 pikë dhe Juventusi me 11 – duke i dhënë këtij rikthimi edhe më shumë peshë emocionale e sportive për Allegrin. /Telegrafi/

Pas një sezoni zhgënjyes për Milanin, ku skuadra përfundoi jashtë zonës evropiane dhe shpëtoi vetëm me një trofe, Superkupën e Italisë, drejtuesit vendosën të nisin një cikël të ri.

Emërimi i Igli Tares si drejtor sportiv u pa si sinjali i parë i këtij ndryshimi të thellë. Me përvojë të gjatë te Lazio, Tare erdhi në San Siro me ambicie të qarta dhe me një vendim të madh, rikthimin e Massimiliano Allegrit në pankinë.

Në një intervistë për Top Story, ai foli për fillimin e aventurës te Milani, rëndësinë e këtij klubi dhe zgjedhjet e para si drejtues.

“Ishte diçka që gjithmonë e kam ndjerë se do të ndodhte. E kam pasur ndjesinë se rrugët e mia dhe ato të Milanit do të kryqëzoheshin. Ka pasur një mundësi edhe më parë, por prisja momentin e duhur. Që prej përfundimit të përvojës me Lazion, kam qenë shumë i duruar, 18 vite me atë klub, tre si lojtar dhe 15 si drejtor sportiv”, ka thënë Tare fillimisht.

Tutje Tare u ndal të flasë edhe për zgjedhjen e trajnerit Massimiliano Allegri te Milani.

“Klubi mbështeti opinionin tim për të sjellë Allegrin si trajner, për shkak të përvojës që ka dhe mënyrës se si menaxhon situata të ndryshme, si me skuadrën ashtu edhe me strukturat e klubit. Ai është i shkëlqyer në këtë aspekt”.

Igli Tare e konsideron Milanin si kulmin e karrierës së tij dhe një nga klubet më të mëdha në botë. Ai thotë se është një nder të jetë pjesë e historisë së kuqezinjve dhe e sheh këtë përvojë jo vetëm si profesionale, por edhe personale.

Për Taren, Milani nuk është thjesht një punë, është një mision shpirtëror për të fituar dhe lënë gjurmë në historinë e klubit.

“Dua të qëndroj sa më gjatë sepse ky është një klub që përfaqëson kulmin. Nuk ka më lart se Milani. Është një nga klubet më të dekoruara në botë, përkrah Real Madridit. Deri para pak vitesh, Milani ishte klubi me më shumë trofe të fituar. Për të arritur këtë nivel duhet shumë punë, sakrificë dhe pasion. Është një nder për mua të jem pjesë e historisë së këtij klubi”.

“Në aspektin personal, kjo përvojë me Milanin është thelbësore. Për mua nuk është vetëm një klub, por një pjesë e rëndësishme e karrierës dhe jetës sime. Kam një detyrim shpirtëror për të fituar me këtë klub dhe për të qenë pjesë e historisë së tij”.

Milani, aktualisht në krye të Serie A së bashku me Napolin dhe Romën, përgatitet për një sfidë të madhe ndaj Juventusit këtë të diel më 5 tetor në stadiumin Allianz. /Telegrafi/

Massimiliano Allegri ka deklaruar se pavarësisht fitores 2-1 ndaj Napolit në “San Siro” të dielën mbrëma, sipas tij, kampionët në fuqi mbeten favoritët kryesorë për ta fituar përsëri titullin në Serie A.

Falë kësaj fitoreje, Milan u ngjit në krye të tabelës pas pesë xhirove, duke u barazuar me pikë me Napolin dhe Romën. Golat u shënuan nga Alexis Saelemaekers, Christian Pulisic dhe Kevin De Bruyne.

Megjithatë, Allegri theksoi se objektivi kryesor i kuqezinjve nuk është Scudetto, por kthimi në Ligën e Kampionëve sezonin e ardhshëm.

Max Allegri

“Ata janë kampionë në fuqi, ne duhet të ecim hap pas hapi për t’u përmirësuar. Pjesa e parë ishte shumë e fortë nga të dyja skuadrat. Më pas, pas penalltisë mbetëm me 10 lojtarë dhe u mbrojtëm shumë mirë. Jemi treguar të fortë dhe ata që hynë nga banka dhanë një ndihmë të madhe. Ishte një test i vështirë ndaj një Napoli shumë të fortë”, deklaroi Allegri në konferencën pas ndeshjes.

Trajneri kuqezi foli edhe për gjendjen e skuadrës, pasi vijnë nga disa dëmtime, disa nga yjet kryesore.

“Kemi lojtarë teknikisht shumë të mirë. Leao ende nuk është në formën e tij më të mirë, por luajti sepse na duhej në këtë ndeshje. Kemi alternativa të mira. E rëndësishme është që të gjithë kemi të njëjtin objektiv: të kualifikohemi në Ligën e Kampionëve", nënvizoi strategu italian.

Cristian Pulisic

Sipas Allegrit, Milani ka nevojë për 76 pikë për të arritur objektivin, që do të thotë edhe 64 pikë të tjera pas pesë javëve të para.

“Kam parë një grup djemsh që duan të punojnë fort dhe ta arrijnë qëllimin. Për t’u rikthyer në Ligën e Kampionëve na duhen ende 64 pikë, ndaj duhet të ecim me qetësi, duke shijuar fitoret por pa u euforizuar”, përfundoi Allegri. /Telegrafi/

Trajneri i Milanit, Massimiliano Allegri, ka respekt të madh për Antonio Conten dhe këmbëngul se Napoli mbetet favorit për të fituar titullin e Serie A.

Allegri foli në një konferencë për shtyp në prag të një ndeshjeje të madhe të Serie A kundër Napolit të dielën në San Siro.

Napoli ka pasur një nisje perfekte me katër fitore në katër ndeshjet e para të ligës, ndërsa Milani ka grumbulluar nëntë pikë me tre fitore dhe një humbje.

“Nesër përballemi me Napolin, i cili me meritë fitoi Scudetton sezonin e kaluar”, ka thënë fillimisht Allegri para gazetarëve.

“Ata patën një afat të rëndësishëm transferimesh dhe unë ende besoj se janë favoritë për titullin”.

“Conte është i shkëlqyer në nxjerrjen më të mirë nga lojtarët. Në 26 ndeshjet e tyre të fundit, ata fituan 18 herë”.

“Në vitet e fundit, Milani gjithmonë ka humbur në shtëpi kundër Napolit. Shpresojmë t’i përmbysim këto shifra. Sigurisht që do të jetë një ndeshje e shkëlqyer”.

“Është një ndeshje e shkëlqyer, ndeshja e parë e madhe e sezonit. Do të jetë një provë e rëndësishme”, përfundoi trajneri i Milanit. /Telegrafi/

Sipas Corriere della Sera, trajneri i Milanit, Massimiliano Allegri, ka vendosur disa rregulla të rrepta jashtë fushe për lojtarët dhe stafin e tij, duke synuar disiplinë dhe bashkëpunim më të madh brenda skuadrës.

Rregullat përfshijnë: detyrimin për të folur italisht gjatë qëndrimit në Milanello, një kod veshjeje për ndeshjet jashtë fushe dhe tërheqje të detyrueshme përpara ndeshjes.

Kuqezinjtë duket se kanë ndjerë menjëherë efektet e këtyre ndryshimeve, pasi kanë fituar katër ndeshje radhazi në të gjitha garat pa pësuar gol.

Max Allegri te Milan

Rregulla dhe masa të tjera të Allegrit

• Gjuhë e përbashkët: Lojtarët dhe stafi duhet të flasin vetëm italisht në Milanello, për të përmirësuar komunikimin dhe unitetin e grupit.
• Kod veshjeje: Për ndeshjet jashtë fushe, të gjithë, përfshirë trajnerët dhe shefat e kuzhinës, duhet të paraqiten në stadium me veshje të plotë të klubit, duke përfshirë xhaketë dhe kravatë. Një rikthim në “Milanin e vjetër” dhe epokën e Berluskonit, si një mesazh përkatësie për të gjithë grupin.
• Tërheqje para ndeshjes: Të gjithë lojtarët dhe stafi duhet të marrin pjesë për të përgatitur skuadrën për sfidën e ardhshme.
• Ngrënie së bashku: Tani të gjithë hanë në të njëjtën tavolinë në Milanello, duke shmangur krijimin e klikave dhe duke forcuar frymën e skuadrës.

AC Milan

Këto masa synojnë të përforcojnë disiplinën dhe unitetin e grupit, duke ndihmuar Milanin të performojë në nivele të larta, siç dëshmuan rezultatet e fundit. /Telegrafi/

Ndikimi i Massimiliano Allegrit është tashmë i dukshëm te Milani, pasi kuqezinjtë kanë arritur të fitojnë tre ndeshje radhazi në Serie A pa pësuar asnjë gol, një gjë që nuk e kishin arritur kurrë gjatë gjithë sezonit të kaluar.

Milani ka marrë tre fitore rresht në kampionat duke ruajtur portën e paprekur, një arritje që nuk u realizua as nën drejtimin e Paulo Fonsecas dhe as të Sergio Conceiçaos sezonin e kaluar. Ky progres është tregues i qartë i ndryshimit që ka sjellë Allegri në aspektin e organizimit dhe disiplinës taktike.

Në këtë seri pozitive, Rossonerët kanë grumbulluar 9 pikë nga tri ndeshje, duke shënuar gjashtë gola dhe duke mos pësuar asnjë.

Max Allegri

Pas humbjes 2-1 ndaj Cremoneses në ndeshjen hapëse të sezonit, ekipi reagoi fuqishëm me fitoret kundër Lecce-s (0-2), Bolognas (1-0) dhe Udineses (0-3).

Sipas TMW, ky është një fakt i ri për sezonin 2025/26, pasi Milani nuk kishte arritur më parë të fitonte tre ndeshje radhazi pa pësuar gol.

Edhe pse Allegri ishte i pezulluar në sfidën ndaj Udineses, ai e ndoqi ndeshjen me pasion dhe, sipas raportimeve, nuk hezitoi t’u jepte udhëzime lojtarëve të tij edhe gjatë lojës, duke u kërkuar kujdes në lëvizjet mbrojtëse, pavarësisht se skuadra kryesonte bindshëm me shifrat 3-0.

Prej kohësh, Allegri është i njohur për qasjen e tij të bazuar te parimet e “shkollës së vjetër”, duke vënë theksin te disiplina taktike dhe organizimi mbrojtës.

Max Allegri te Milani

Kjo filozofi duket se po funksionon përsëri në Serie A, ku statistikat tregojnë se në 17 nga 18 sezonet e fundit titullin e ka fituar skuadra me mbrojtjen më të fortë.

Duket qartë se Milani nën drejtimin e Allegrit ka marrë një kthesë pozitive, duke ndërtuar një bazë të fortë për të qenë konkurrent serioz në garën për titull. /Telegrafi/

Trajneri i Milanit, Massimiliano Allegri, është dënuar me një ndeshje pezullim dhe një gjobë prej 10,000 eurosh, pas kartonit të kuq që mori në përballjen kundër Bolonjës. Vendimi u konfirmua nga Gjyqtari Sportiv.

Allegri u përjashtua në minutat shtesë për shkak të protestave të ashpra ndaj një penalltie të dhënë, sjellje që u cilësua si mungesë respekti ndaj VAR-it dhe gjyqtarit të katërt.

Si pasojë, tekniku kuqezi do të humbasë udhëtimin e Milanit në Serie A kundër Udineses të shtunën, më 20 shtator. Në mungesën e tij, drejtimin nga stoli do ta marrë ndihmësi Marco Landucci.

Allegri pritet të rikthehet në bankinë për sfidën e radhës në kampionat, një ndeshje shumë e rëndësishme ndaj Napolit që mund të ketë peshë të madhe në garën për Scudetto.

Ndërkohë, është konfirmuar edhe një pezullim tjetër në Serie A: mbrojtësi i Comos, Jacobo Ramon, do të mungojë në ndeshjen e ardhshme të ekipit të tij pas kartonit të kuq direkt të marrë ndaj Genoas për një faull të rrezikshëm. /Telegrafi/

Milani i Massimiliano Allegrit siguroi tri pikë të rëndësishme në San Siro ndaj Bolognas, falë një goli vendimtar nga mesfushori me përvojë Luka Modric.

Kroati 40-vjeçar, i transferuar këtë verë nga Real Madridi si lojtar i lirë, shkëlqeu në fitoren minimale 1-0.

Duke folur pas ndeshjes për DAZN, trajneri Max Allegri u shpreh në lidhje me objektivat e skuadrës kuqezi e zi këtë sezon.

Luka Modric, ylli i Milanit

“Ne duam të arrijmë në Ligën e Kampionëve me çdo kusht, por e dimë që nuk do të jetë e lehtë. Grupi po punon me intensitet të madh dhe fryma e vetëmohimit që shoh në fushë është çelësi për të kapërcyer vështirësitë. Çdo ndeshje, çdo seancë stërvitore është një mundësi për të treguar sa shumë na intereson kjo fanellë”, deklaroi Allegri.

Trajneri kuqezi lavdëroi veçanërisht autorin e golit, i cili sipas tij është kampion absolut.

“Luka është një kampion absolut. Përvoja e tij është thelbësore për ne. Ai nuk tërhiqet kurrë dhe është shembull për shokët e skuadrës, jo vetëm me klasin e tij, por edhe me gatishmërinë për t’u sakrifikuar për ekipin. Goli i tij ishte shpërblimi i merituar për gjithë punën që po bën”, nënvizoi Allegri.

Pavarësisht se këtë javë festoi 40-vjetorin e lindjes, Modric luajti plot 90 minuta dhe u shpall “Lojtari i ndeshjes”. Forma e tij tregoi edhe një herë rëndësinë që ai mund t’i japë Milanit në sezonin aktual.

Max Allegri

Mungesa e angazhimeve evropiane për kuqezinjtë mund të jetë një avantazh për Modricin, duke i ofruar më shumë kohë rikuperimi mes ndeshjeve të rëndësishme në Serie A. /Telegrafi/