Barcelona dhe Real Madridi kanë dhuruar një pjesë të parë spektakolare në finalen e Superkupës së Spanjës, e cila u mbyll me rezultat 2-2 pas 45 minutave dramatike.

Barcelona e nisi më mirë ndeshjen dhe gradualisht mori kontrollin e lojës, duke qenë skuadra më këmbëngulëse në fazën ofensive. Rasti i parë serioz erdhi në minutën e 14-të, kur Vinicius Junior depërtoi në zonë, por goditja e tij u ndal nga Joan Garcia.

Reagimi i Barcelonës ishte i menjëhershëm. Në minutën e 15-të, Eric Garcia ishte shumë pranë golit pas një goditjeje këndi, por mbrojtja e Real Madridit ndërhyri në momentin e fundit për ta larguar topin nga vija fatale.

Presioni katalanas u konkretizua në minutën e 36-të, kur Raphinha realizoi një gol të jashtëzakonshëm. Braziliani kaloi disa kundërshtarë dhe nga jashtë zone lëshoi një goditje precize në këndin e poshtëm, duke i dhënë epërsinë Barcelonës prej 1-0.

Skuadra e Hansi Flickut vazhdoi të shtyjë përpara edhe pas golit. Fermín dhe Lamine Yamal patën raste të pastra në minutat 40 dhe 41, por Thibaut Courtois reagoi në mënyrë vendimtare për të mbajtur Real Madridin në lojë.

Megjithatë, në sekondat e fundit të pjesës së parë, Real Madridi barazoi rezultatin. Në minutën e 45+2’, Vinicius Junior realizoi një aksion individual brilant dhe me një goditje të saktë brenda zonës barazoi shifrat në 1-1.

Drama nuk përfundoi me kaq. Vetëm dy minuta më vonë, Barcelona reagoi sërish. Pedri gjeti një pasim perfekt në thellësi për Robert Lewandowskin, i cili me shumë qetësi realizoi një parabël të bukur mbi Courtois për golin e epërsisë 2-1 në minutën e 45+4’.

Sidoqoftë, vetëm një minuta më vonë Gonzalo Garcia realizoi nga afërsia pas një rivendje këndore (45+6’).

Mbetet të shihet se cila skuadër do të arrijë ta fitojë në fund Superkupën e Spanjës, ku na mbesin edhe 45 minuta të zjarrtë./mxh

Aktori turk me origjinë shqiptare, Can Yaman ka reaguar në lidhje me lajmet se ishte arrestuar në Turqi për posedim droge.

Me anë të një postimi në rrjetet sociale, Yaman shkruan se shtypi turk prej kohësh ka qenë i padrejtë ndaj tij, por kjo nuk është gjë e re.

Aktori i drejtohet shtypit italian, duke i thënë se nuk duhet të bëjë gabimin e të kopjuarit të lajmit nga Bosfori.

Yaman shprehet se nëse do të ishte kapur me lëndë narkotike nuk do të lirohej aq shpejt dhe aq më tepër të udhëtonte drejt Italisë ditën tjetër.

“I dashur shtyp italian, prej kohësh shtypi turk ka qenë i ashpër me mua, por kjo nuk është risi! Por ju jo! Ju lutem, mos bëni edhe ju gabimin të kopjoni lajmet që vijnë nga Bosfori. A ju duket normale që unë të shëtis nëpër lokale me substanca të ndaluara në një periudhë kur policia po kryen hetime të gjera, duke arrestuar shumë persona të famshëm? Po të kishte qenë qoftë edhe minimalisht e vërtetë, nuk do të isha liruar në një kohë kaq të shkurtër dhe as do të kisha mundur të kthehesha në Itali që të nesërmen. Ju dua shumë.I dashur shtyp italian, prej kohësh shtypi turk ka qenë i ashpër me mua, por kjo nuk është risi! Por ju jo! Ju lutem, mos bëni edhe ju gabimin të kopjoni e ngjitni lajmet që vijnë nga Bosfori. A ju duket normale që unë të shëtis nëpër lokale me substanca të ndaluara në një periudhë kur policia po kryen hetime të gjera, duke arrestuar shumë persona të famshëm? Po të kishte qenë qoftë edhe minimalisht e vërtetë, nuk do të isha liruar në një kohë kaq të shkurtër dhe as do të kisha mundur të kthehesha në Itali që të nesërmen. Ju dua shumë”, shkruan Yaman./mxh

Departamenti Amerikan i Sigurisë Kombëtare ka vendosur të dërgojë qindra oficerë policie shtesë në Minesota, një ditë pasi dhjetëra mijëra njerëz marshuan në Minneapolis për të protestuar kundër të shtënave fatale të 37-vjeçares, Renee Goode nga një oficer i Imigracionit dhe Doganave (ICE).

Kështu ka deklaruar Sekretarja e Sigurisë Kombëtare Kristi Noem në një deklaratë sot. Oficerët do të vendosen sot dhe të hënën për të forcuar sigurinë e agjentëve të Imigracionit, Doganave dhe Patrullës Kufitare që ndodhen tashmë në Minesota.

Rreth 2,000 oficerë federalë janë vendosur tashmë në zonën Minneapolis-St. Paul, pjesë e operacionit më të madh të ndërmarrë ndonjëherë nga Departamenti i Sigurisë Kombëtare.

Përforcimet e reja të policisë ishin planifikuar të fillonin, edhe pse më shumë se 1,000 protesta ishin planifikuar në të gjithë vendin këtë fundjavë kundër shtytjes së qeverisë federale për dëbime dhe të shtënave fatale të 37-vjeçares Renee Goode të mërkurën nga një oficer i ICE-së./mxh

Në Iran vijojnë prej më shumë se dy javësh protestat e dhunshme, ku pasur protestues të vrarë dhe të arrestuar. Ministria e Jashme ka dalë me një njoftim të rëndësishëm për qytetarët shqiptarë që jetojnë atje .

Ministria këshillon shqiptarët të tregojnë kujdes të shtuar dhe të qëndrojnë në kontakt të vazhdueshëm me përfaqësitë diplomatike dhe konsullore të Shqipërisë.

Njoftimi i plotë:
Ministria për Evropën dhe Punët e Jashtme këshillon qytetarët shqiptarë që ndodhen aktualisht në Iran, të tregojnë kujdes të shtuar dhe të qëndrojnë në kontakt të vazhdueshëm me përfaqësitë tona diplomatike dhe konsullore.
Për çdo informacion, emergjencë ose ndihmë, qytetarët mund të kontaktojnë në:
AMBASADA SHQIPTARE NË KATAR
Email: embassy.doha@mfa.gov.al
Tel: +974 77180778
AMBASADA SHQIPTARE NË KUVAJT
E-mail: embassy.kuëait@mfa.gov.al
Tel: +965 94048219
AMBASADA SHQIPTARE NË ARABI SAUDITE
Email: embassy.riyadh@mfa.gov.al
Tel: +966501422449
AMBASADA SHQIPTARE NË EMIRATET E BASHKUARA ARABE
Email: embassy.UAE@mfa.gov.al
Tel: +971 50 980 7881
AMBASADA SHQIPTARE NË TURQI
Email: embassy.ankara@mfa.gov.al
Tel: +90 (549) 561 19 85./mxh

Tre fëmijë të mitur janë gjetur të braktisur në zonën e Plazhit në Durrës. Sipas raportimeve, fëmijët janë lënë të vetëm në një apartament nga nëna e tyre, ndërsa dyshohet se kishin disa ditë që nuk ishin ushqyer.

Policia ka shoqëruar të miturit në spitalin e Durrësit për ekzaminime mjekësore dhe më pas u morën nën kujdes nga shërbimi social. Ndërkohë bëhet me dije se është proceduar penalisht nëna e fëmijëve.

NJOFTIMI I POLICISË:

Drejtoria Vendore e Policisë Durrës

Specialistët për Hetimin e Krimeve të Stacionit të Policisë Plazh referuan materialet në Prokurori, ku nisi procedimi penal ndaj shtetases B. B., 33 vjeçe, për veprën penale “Keqtrajtimi i të miturve”.

Procedimi penal nisi pasi ditën e sotme, rreth orës 17:20, është paraqitur shtetasja D. V., e cila ka deklaruar se ish-nusja e djalit të saj kishte lënë vetëm tre fëmijët e mitur në pallatin ku banonte, rasti i publikuar dhe në rrjete sociale.

Nga ana e shërbimeve të Policisë, në bashkëpunim me Zyrën e Mbrojtjes së Fëmijëve, u bë e mundur marrja në mbrojtje e tre fëmijëve, të cilët u dërguan në spital për ekzaminime mjekësore dhe më pas u morën në kujdes nga Qendra e Mbrojtjes së Fëmijëve Durrës.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./mxh

Sulmet izraelite kanë vrarë të paktën tre palestinezë në Gazë. Lajmin e kanë njoftuar autoritetet lokale të shëndetësisë, ndërsa tensionet po rriten për shkak të sulmeve të vazhdueshme.

Mjekët thanë se një palestinez u vra në lagjen Tuffah në qytetin e Gazës, në një zonë nën kontrollin palestinez, ndërsa dy të tjerë u vranë në qytetin Bani Suhaila në lindje të Khan Younis, një zonë që Izraeli ende e pushton. Ndërkohë bëhet me dije se nuk ka pasur asnjë koment nga ushtria izraelite lidhur me incidentet.

Luftimet janë zbutur kryesisht që kur Izraeli dhe grupi militant palestinez Hamas ranë dakord për një armëpushim në tetor, dy vjet pas fillimit të luftës, por nuk janë ndalur plotësisht. Izraeli dhe Hamasi kanë shkëmbyer akuza për shkeljet e marrëveshjes së armëpushimit.

Më shumë se 440 palestinezë, shumica e tyre civilë sipas zyrtarëve të shëndetësisë në Gaza, janë vrarë që nga armëpushimi, si dhe tre ushtarë izraelitë./mxh

Sulmuesi i kombëtares, Myrto Uzuni, i cili aktivizohet në MLS për Austin Fc, ka vendosur që të investojë në Shqipëri, teksa ka blerë një hotel në qytetin e Vlorës.

Pasi zyrtarizoi investimin e rëndësishëm në bregdetin shqiptar, të shumtë kanë qënë ata që kanë thënë që Uzuni po pastron lekët. E menjëhershme ka qënë përgjigja e 30-vjeçarit, nëpërmjet një postimi në rrjetet sociale.

“Jam një futbollist që të gjitha të ardhurat e mia i investoj në Shqipëri. Mund të investoja në Spanjë, por zgjodha vendin tim.

Paratë e mia janë të deklaruara dhe paga ime është publike. Nuk kam nevojë të pastroj lekët e askujt.”

Hoteli do të quhet “Uzuni Hotel”./mxh

Gati 2,5 miliardë dollarë llogaritet dëmi i përmbytjeve në tre dekada, e megjithatë askush nga përfaqësuesit e institucioneve që janë të angazhuara me mirëmbajtjen e sistemit hidrik në Shqipëri, vlerësimin e riskut para dhe gjatë emergjencave nuk ka dhënë llogari para drejtësisë dhe as është gjetur fajtor.

Fatura e dëmit ekonomik bëhet publike nga një raport i detajuar i Kontrollit të Lartë të Shtetit, që ka kaluar në lupë përgjegjësitë në nivel qendror dhe të pushtetit lokal duke nisur nga ministria e bujqësisë deri tek ndërmarrjet që administrojnë argjinaturat, sistemin kullues dhe kanalizimet.

Gjetjet janë bërë publike nga Kontrolli i Lartë i Shtetit mbas auditimit mbi përmbytjet e 2024 në qytetin e Vlorës, ku dhe janë administruar qindra dokumente mbi hartën, kanalizimin, deri tek hidrovorët dhe kontratat e mirëmbajtjes së tyre. Në këtë kontroll, përpos evidentimit të problematikës për mos pastrimin e kanaleve kulluese prej dekadash nga institucionet përgjegjëse, ngrihen pikëpyetje për mosmenaxhim efektiv të riskut nga përmbytjet në nivel kombëtar, i cili duhet të përshtatej me kushtet klimaterike, që në këto kushte, sipas KLSH, bie në kundërshtim me ligjin për mbrojtjen civile. E ndërsa ekspozohet se 3,285 objekte janë ndërtuar pa leje në infrastrukturën ujitëse, kulluese dhe të mbrojtjes, ky është vetëm njëri ngërç, pasi të tjerat lidhen me mosbashkëpunimin e duhur midis institucioneve për menaxhimin e situatave të përmbytjes, deri tek mungesa e mirëmbajtjes të sistemit kullues.

Nga 1990 numërohen tetë përmbytje të rënda në Shqipëri: e 1995, shtatori 2002 kur u prekën 7,500 familje kryesisht në Torovicë, Lezhë dhe Milot, shkurt-mars 2004 përmbytjet e Drinit dhe Bunës, dhjetor 2005 përmbytjet në Jug nga Vjosa, përmbytjet e Nënshkodrës 2010-2011 gjatë të cilës u evakuuan 12 mijë shtetas, në shkurt 2015 përmbytja e Jugut ku u dëmtuan plotësisht 709 shtëpi, përmbytjet e nëntorit 2017 përgjatë rrjedhës së Vjosës ku u dëmtuan 4,700 banesa dhe e 2021 e 2024 në zonat Lezhë, Shkodër dhe Vlorë, me mijëra hektarë tokë të përmbytur, banesa e biznese të shkatërruara dhe rrugë të bllokuara përkohësisht nga rrëshqitjet.

Në të gjithë këto emergjenca, drejtësia ka shënuar vetëm dy hetime, duke dyshuar se nuk ishte vetëm faji i motit. E para emergjenca e 2010 në Shkodër, mbasi u hapën tre porta shkarkimi të Vaut të Dejës, të Komanit dhe të Fierzës, dhe kjo solli përmbytjet masive të gjithë Shkodrës, madje edhe në qytet. Por, duke u bazuar në ekspertizën e tre specialistëve të hidrocentraleve, hetimet dolën në përfundimin se çështja duhej pushuar, mbasi hapja e digave ishte e justifikuar. E dyta, ende nën proces, është e prokurorisë së Durrësit, nisur pak ditë më parë, jo vetëm për shkatërrim prone me përmbytje, por gjithashtu edhe ndaj personave që dyshohet se shpërdoruan detyrën gjatë menaxhimit të situatës.

Deri më tani, edhe për këtë dosje nuk ka ende të dyshuar./mxh

Një grup vendesh evropiane, me në krye Britaninë e Madhe dhe Gjermaninë, po diskutojnë plane për të forcuar praninë e tyre ushtarake në Groenlandë, me qëllim që t’i dërgojnë një sinjal presidentit amerikan Donald Trump se Evropa e merr seriozisht sigurinë në rajonin e Arktikut. Lajmi raportohet nga Bloomberg News.

Sipas burimeve të njohura me planet, Gjermania pritet të propozojë krijimin e një misioni të përbashkët të NATO-s për mbrojtjen e zonës arktike, në një përpjekje për të rritur koordinimin dhe sigurinë në këtë rajon strategjik.

Zhvillimi vjen pasi presidenti amerikan Donald Trump deklaroi të premten se Shtetet e Bashkuara duhet të sigurojnë kontrollin mbi Groenlandën për të parandaluar që Rusia ose Kina ta “marrin” atë në të ardhmen. Trump ka pohuar në mënyrë të përsëritur se anije ruse dhe kineze po operojnë pranë Groenlandës, pretendime që janë mohuar nga vendet skandinave./mxh

Shkurtë Mani e la banesën për të shpëtuar veten dhe bashkëshortin e sëmurë nga mbytja. Gati një javë pas evakuimit në kavalishencë rikthehet e shqetësuar në shtëpinë e përmbytur në Vadardhë të Sukthit.

“Bobo si është bërë! Më mirë të na kishte mbytur fare se kështu. Unë me 200 mijë lek pension, ku të shkoj?!”, shprehet qytetarja Shkurtë Mani.

Pensionistja qëndron e drobitur mes baltës. E pashpresë dhe e përlotur numëron dëmet e objekteve shtëpiake.

“Mundi i gjithë jetës ja iku. I mori uji. Soba është prishur, lavatricja është prish, frigoriferi po, rrobat janë kalbur”, shton ajo.

Ajo kujton momentet e para të shpërthimit të ujit brenda banesës dhe është në pritje të dëmshpërblimit për të nisur rregullimet që shtëpia të bëhet sërish e jetueshme.

“Dysheku akoma i lagur. Uji arriti deri te krevati. Erdhi sikur futet arusha brenda, në sekondë. Nuk e di çdo bëj”, tha më tej e moshuara.

Në ditën e gjashtë të përmbytjeve raportohet se në Sukth rreth 1800 hektarë tokë janë nën pushtetin e ujit. Dhe në këtë segment rrugor, te kthesa e Perlatit, zona është e bllokuar, për shkak të daljes së lumit Erzen nga shtrati dhe ende ka ujë në rrugë.

“6 ditë jemi të mbyllur këtu. Hamallaj, Rrushkull kalon këtu. Për 100 metra vend, mbahet populli i izoluar”, thotë banori i zonës.

“Paska shumë ujë këtu. Nga duhet ti dalim se po shkojmë për vdekje”, shprehet një shofer.

“Na ka mbuluar gjithë uji, ska pyetur njeri a jemi gjallë a jemi vdekur. Kurrkush!”, shton ai.

Uji ka filluar të tërhiqet, por ende tokat ngjajnë si liqen dhe shtëpitë janë të izoluara. Por ndonëse reshjet këtu kanë përfunduar, kanë mbetur lotët e banorëve të cilët kanë dëme të shumta materiale!/mxh

Lazio regjistroi fitoren e pestë radhazi ndaj Hellas Veronës, duke triumfuar 1-0 në transfertë. Ndeshja u vendos nga një autogol në minutat e fundit, pas një devijimi të topit nga Victor Nelsson.

Lazio dominoi posedimin, por pati vështirësi në krijimin e rasteve të pastra. Verona u mbrojt mirë dhe tentoi kundërsulmet, pa arritur të konkretizojë.

Me këtë sukses, Lazio i jep fund një serie prej katër ndeshjesh pa fitore në Serie A. Bardhekaltrit afrohen në gjashtë pikë me zonën e gjashtë vendeve të para. Hellas Verona mbetet në vendin e 19-të, tre pikë larg shpëtimit.

Në ndeshjen tjetër, Lecce u mposht 2-1 në shtëpi nga Parma, pavarësisht se shënoi që në minutën e parë.

Lecce mbeti me nëntë lojtarë dhe pësoi përmbysje, ndërsa Parma siguroi tri pikë shumë të rëndësishme për mbijetesën./mxh

Brajan Gruda ishte protagonist kryesor në kualifikimin e Brighton-it ndaj Manchester United në kuadër të raundit të 1/32-ave të Kupës FA.

Sulmuesi 21-vjeçar ishte protagonist i drejtpërdrejtë në të dy golat e shënuar nga skuadra e tij në stadiumin “Old Trafford”, në takimin që përfundoi me rezultatin 1-2.

Gruda hapi serinë e golave duke shënuar vetë dhe më pas shërbeu asistin për golin e dytë të realizuar nga Danny Welbeck.

Sipas platformave të specializuara të statistikave si “Flashscore”, futbollisti me origjinë shqiptare u vlerësua me notën më të lartë të ndeshjes, 8.5.

Kjo paraqitje rezultoi vendimtare për eliminimin e “Djajve të Kuq” nga ky kompeticion. Performanca e tij është cilësuar si një nga më të mirat e karrierës së tij të deritanishme në Angli./mxh

Bayern Munich triumfoi me rezultatin e thellë 8-1 ndaj Wolfsburg, për të dërguar në 11 pikë diferencën në krye të Bundesligës.

Bavarezët zgjatën gjithashtu serinë pa humbje në ndeshjet shtëpiake kundër Wolfsburgut në elitë në 29 takime.

Ndeshja u zhbllokua herët me një autogol pas krosimit të Luis Diaz, ndërsa Wolfsburgu barazoi shpejt me Pejcinovic. Bayern rimori avantazhin me golin e Diaz dhe e mbylli pjesën e parë në epërsi.

Në pjesën e dytë, skuadra e Vincent Kompany shënoi dy gola të shpejtë me Michael Olise dhe një tjetër autogol.

Bavarezët vazhduan dominimin me gola nga Raphael Guerreiro, Harry Kane, Olise dhe Leon Goretzka. Ndeshja përfundoi 8-1, duke konsoliduar pozitat e Bayern në krye të renditjes./mxh

Këngëtarja britanike dhe ish-anëtarja e Little Mix, Jesy Nelson, ka bërë publike se vajzat e saj binjake janë diagnostikuar me një sëmundje të rrallë gjenetike, Spinal Muscular Atrophy (SMA) tip 1, e cila prek rëndë muskujt e trupit.

Në një video emocionale në Instagram, Nelson tregoi se Ocean Jade dhe Story Monroe, të lindura para kohe në javën e 31-të, kanë pasur vështirësi në lëvizje dhe ushqyerje, çka i çoi mjekët drejt ekzaminimeve të thelluara në spitalin Great Ormond Street në Londër. Aty ajo u informua se vajzat “ndoshta nuk do të ecin kurrë” dhe se do të përballen me aftësi të kufizuara.

Këngëtarja theksoi se SMA është një sëmundje shumë serioze, e cila pa trajtim mund të jetë fatale brenda dy viteve të para të jetës. Ajo u shpreh mirënjohëse që vajzat kanë marrë trajtimin e nevojshëm, pasi sipas saj “pa të, ato do të vdisnin”.

Pavarësisht situatës së vështirë, Jesy Nelson u shpreh optimiste, duke besuar se vajzat e saj do të “sfidojnë çdo parashikim”. Ajo tha se e bëri publike historinë për të ndërgjegjësuar prindërit e tjerë dhe për të ndihmuar në diagnostikimin sa më të hershëm të fëmijëve me këtë sëmundje.

Partneri i saj, Zion Foster, ndau gjithashtu një foto të binjakeve me mesazhin prekës: “Ende buzëqeshin mes të gjitha sfidave. Babi ju do shumë”./mxh

Ronald Hysi ishte i pranishëm sot në studion e emisionit “Fan Club”, ku komentoi zhvillimet e fundit mes Mirit dhe Selin brenda shtëpisë së “Big Brother VIP 5”. Si mik i afërt i banorit, ai ndau mendimin e tij mbi situatën që ka ngjallur diskutime të shumta në publik.

Gjatë intervistës, Landi foli edhe për jetën familjare të Mirit, duke theksuar se bashkëshortja e tij ka një formim kulturor ndryshe nga ai shqiptar, çka sipas tij ndikon edhe në mënyrën se si perceptohen situatat brenda lojës. Ai nënvizoi se marrëdhënia e çiftit është e qëndrueshme dhe pa probleme.

“Nusja e Mirit është gjermane, ka një mentalitet ndryshe nga përjetimi i shqiptarëve në përgjithësi. Nga sa i njoh unë, ata kanë një marrëdhënie bashkëshortore të mirë”, u shpreh Landi.

I pyetur në lidhje me faktin që Miri dhe Seli kanë ndarë të njëjtin shtrat, ai u tregua kategorik duke mohuar çdo shkelje morale apo familjare.

“Jo. Nuk ka bërë gjynah dhe krim, asnjëri nga të dyja palet nuk ka bërë gjynah dhe krim. Nuk i ka hyrë në hak as shoqërisë dhe as familjes”.

Në vijim, biseda u ndal edhe te reagimi i bashkëshortes së Mirit, e cila ka zgjedhur të qëndrojë larg vëmendjes publike, pavarësisht aludimeve për distancë mes tyre. Sipas Landit, ajo ka reaguar vetëm një herë në rrjetet sociale dhe po shqyrton mundësinë e një tjetër reagimi.

“Ka bërë një postim për Mirin, pas reagimit të babait të Selin për Mirin. Po mendon që t’i dërgojë një letër”./mxh

Për vite me radhë, Apple ka lansuar çdo vit modelet e reja të iPhone në muajin shtator, duke ndjekur një cikël të rregullt që përdoruesit tashmë e njohin mirë. Por raportet e fundit sugjerojnë se kompania mund të ndryshojë këtë model duke filluar nga viti 2026.

Analisti i njohur Ming-Chi Kuo raporton se Apple mund të ndajë lançimin e iPhone-ve në dy cikle të veçanta. Sipas këtyre parashikimeve, modelin bazë iPhone 18 mund ta shohim vetëm në pranverën e vitit 2027. Ndërkohë, në vjeshtën e vitit 2026 do të dalin vetëm modelet iPhone 18 Pro, iPhone 18 Pro Max dhe iPhone i parë me ekran të palosshëm, si dhe iPhone Air 2.

Kjo strategji mund të lidhet me konkurrencën e fortë nga Android, por edhe me lansimin e foldable iPhone, që kërkon një periudhë të veçantë marketingu. Duke ndarë lançimet, Apple synon të shmangë konkurrencën brenda linjës së saj dhe të rrisë fokusin tek modelet premium.

Parashikimi i ciklit të ardhshëm të iPhone-ve sipas raporteve:

Pranverë 2026: iPhone 17e
Vjeshtë 2026: iPhone 18 Pro, iPhone 18 Pro Max, Foldable iPhone, iPhone Air 2
Pranverë 2027: iPhone 18, iPhone 18e
Vjeshtë 2027: iPhone 19 Pro, iPhone 19 Pro Max, Foldable iPhone 2, iPhone Air 3 (me ekran më të madh)

Nëse këto raporte rezultojnë të sakta, përdoruesit do të duhet të presin më shumë se një vit për të përditësuar modelin bazë të iPhone-it, ndërkohë që Apple do të vazhdojë të përqendrohet tek modelet Pro dhe të palosshme./mxh

Më 9 janar 2026, në qytetin e Santa Martës në Kolumbi, u arrestua shtetasi zviceran Vik Ntominik Gioel, i shpallur në kërkim ndërkombëtar nga Interpol përmes një Njoftimi të Kuq, me kërkesë të autoriteteve gjyqësore të Mbretërisë së Spanjës.

Hetimet tregojnë se i arrestuari kishte rol në koordinimin e dërgesave të drogës drejt vendeve evropiane, me fokus kryesor Spanjën.

Autoritetet zbuluan se ai përdorte dokumente identifikimi të shumta, përfshirë greke, spanjolle dhe belge, si dhe dokumente të siguruara në mënyrë të parregullt në Kolumbi.

Për t’iu shmangur kontrolleve të emigracionit dhe policisë, ai paraqitej si shtetas shqiptar me emrin Xhuti Zuluaga Arsen.

Sipas autoriteteve, Gioel dyshohet për trafikim të lëndëve narkotike dhe anëtarësim në një organizatë kriminale, e cila vepronte në shkallë të gjerë në disa shtete.

Ai konsiderohet si një figurë kyçe në një organizatë kriminale, me rol të rëndësishëm në koordinimin logjistik, infrastrukturën dhe funksionimin e laboratorëve klandestinë për përpunimin e kokainës dhe kanabisit, kryesisht në zonën Albalat de Taronchers, në Valencia të Spanjës.

Arrestimi u bë i mundur pas konfirmimit të pranisë së tij në territorin kolumbian nga Byroja Qendrore Kombëtare e INTERPOL-it (NCB), pas rreth gjashtë muajsh hetime intensive të zhvilluara në bashkëpunim ndërkombëtar./mxh

Ish-deputeti i Partisë Demokratike, Ervin Salianji, zhvilloi dje një takim me mbështetësit dhe strukturat demokrate në Korçë, të cilin e cilësoi si të mbushur me entuziazëm dhe frymëzim.

Përmes një reagimi në rrjetet sociale, Salianji u shpreh se Partia Demokratike mbetet një forcë e fuqishme politike, me energjinë dhe kapacitetin për të sjellë ndryshim të vërtetë dhe rotacion politik në vend. Ai theksoi se kjo frymë është ndjerë edhe më herët në qytete të tjera si Durrësi, Gjirokastra, Elbasani dhe Shkodra.

Salianji falënderoi demokratët e Korçës për mbështetjen dhe atmosferën e krijuar gjatë takimit, duke e quajtur atë një moment të paharrueshëm.

Korça ishte një magjepsje
Partia Demokratike është fuqi e jashtëzakonshme!
Ka brenda vetes energjinë dhe frymëzimin për të sjellë ndryshim të vërtetë, për të përfshirë njerëz, për të shkuar përtej vetes, për të sjellë rotacionin. Këtë e kemi parë në Durrës, në Gjirokaster, Elbasan, në Shkodër dhe dje në Korçën time të zemrës!
Fjalët nuk ekzistojnë për të shprehur falenderimet, por dua t’i përcjell një mirënjohje nga zemra për çdo demokrat dhe demokrate të Korçës entuziazmin dhe dashurinë që më përcollën në takimin e djeshëm!
E paharrueshme./mxh

Kreu i Partisë Demokratike, Sali Berisha, ka reaguar për zhvillimet në Iran, duke deklaruar se revolucioni demokratik i opozitës iraniane ndodhet pranë fitores përfundimtare.

Përmes një postimi në rrjetet sociale, Berisha akuzon regjimin e Ajetullahëve për “masakra dhe barbarizma të papara” ndaj protestuesve paqësorë, duke pohuar se vetëm në 24 orët e fundit janë vrarë mbi 2 mijë persona.

Ai shprehu mbështetjen e plotë për opozitën dhe popullin iranian, duke dënuar ashpër dhunën e autoriteteve dhe duke theksuar se qytetarët iranianë po luftojnë për liri, demokraci dhe dinjitet kombëtar.

Postimi i Berishës:

Revolucioni iranian drejt fitores vendimtare.
Diktatura e Ajetullahëve obskurantistë në grahmat e fundit!
Miq, revolucioni demokratik i opozitës iraniane në pragun e triumfit, fitores përfundimtare.
Masakra dhe barbaritë e papara të regjimit ndaj kryengritësve paqësorë të pamposhtur.
Në 24 orët e fundit, revolucioni për Iranin e lirë dhe demokratik numëron mbi 2 mijë martirë të rënë nga breshëritë e falangave të zeza të pushtetit të krimit.
Duke mbështetur plotësisht revolucionin e opozitës dhe popullit iranian, dënoj me forcën më të madhe barbaritë e regjimit ndaj qytetarëve trima që luftojnë të pamposhtur për lirinë dhe dinjitetin e vendit dhe kombit të tyre!
Rroftë Irani i lirë dhe demokrat!
Vdekje Ajetullahëve!/mxh

Kryeministrja e Danimarkës, Mette Frederiksen ka thënë se Danimarka ndodhet në një moment kritik mes kërcënimeve të Donald Trump për të marrë Groenlandën, duke akuzuar SHBA-në se i ka kthyer shpinën NATO-s. Gjatë fjalës në një tubim politik, kryeministrja daneze tha se vendi i saj ishte në një udhëkryq.

Komentet e kryeministres vijnë përpara një jave vendimtare në marrëdhëniet gjithnjë e më të tensionuara midis Danimarkës, Groenlandës dhe SHBA-së, në të cilën ministrat e jashtëm të Danimarkës dhe Groenlandës, Lars Løkke Rasmussen dhe Vivian Motzfeldt, do të takohen me sekretarin e shtetit të SHBA-së, Marco Rubio.

“Jemi në një udhëkryq dhe ky është një moment kritik. Ajo që është në rrezik është më e madhe nga sa mund të shohë syri, sepse nëse ajo që përjetojmë nga amerikanët është se ata në fakt po i kthejnë shpinën aleancës perëndimore, se po i kthejnë shpinën bashkëpunimit tonë në NATO duke kërcënuar një aleat, gjë që nuk e kemi përjetuar më parë”, tha Frederiksen.
Të premten, Trump u shpreh se SHBA-të do të ndërmarrin veprime ndaj Groenlandës.

“Ne do të bëjmë diçka me Groenlandën, qoftë në mënyrën e mirë ose në mënyrën më të vështirë”, tha ai.
Administrata e tij ka refuzuar vazhdimisht të përjashtojë përdorimin e forcës ushtarake – pavarësisht se Danimarka dhe Groenlanda janë aleate të NATO-s.

Kryeministri i Groenlandës, Jens-Frederik Nielsen, së bashku me udhëheqësit e katër partive të tjera politike të vendit, u përgjigjën duke lëshuar një deklaratë të përbashkët.

“Ne nuk duam të jemi amerikanë, nuk duam të jemi danezë, duam të jemi groenlandezë. E ardhmja e Groenlandës duhet të vendoset nga groenlandezët”, thuhej në deklaratë.
Ndërkohë, në një konferencë kombëtare të popullit dhe mbrojtjes në Sälen, në veriperëndim të Suedisë , kryeministri suedez, Ulf Kristersson, foli në mbështetje të Danimarkës fqinje.

Ai tha se SHBA-të duhet ta falënderojnë Danimarkën për besnikërinë, në vend që të lëshojnë kërcënime kundër saj dhe Groenlandës. Ai gjithashtu dënoi sulmin e SHBA-së ndaj Venezuelës, duke thënë se ai shkelte ligjin ndërkombëtar dhe “rrezikon të inkurajojë më shumë vende të veprojnë në mënyrë të ngjashme”.

Suedia njoftoi të dielën se do të investojë rreth 15 miliardë krona suedeze (1.21 miliardë paund) në aftësitë e mbrojtjes ajrore territoriale./mxh