Një burrë 48-vjeçar është arrestuar në shtetin e Utah, SHBA, pasi dyshohet se sulmoi me thikë një mysliman në një qendër tregtare, duke deklaruar më pas para policisë se e kishte zgjedhur viktimën për shkak të fesë së saj. Sipas dokumenteve të paraqitura në gjykatë, i dyshuari, Peter Michael Larsen, u tha hetuesve se kishte “ndërmend të vriste myslimanë” dhe se e kishte shënjestruar viktimën me qëllim që ta vriste për shkak të besimit të tij fetar. Policia e konsideron atë një rrezik të lartë për publikun, duke përmendur prirjet e tij të dhunshme dhe bindjet ekstremiste.

Ngjarja ndodhi të hënën në qendrën tregtare Valley Fair Mall, në West Valley City të Utah. Sipas autoriteteve, viktima, e cila punonte në një kioskë brenda qendrës tregtare, u godit disa herë me thikë dhe u gjet me plagë të shumta në trup, ndërsa kishte humbur shumë gjak.

Policia bëri të ditur se sulmuesi u neutralizua nga kalimtarët, të cilët e rrëzuan në tokë dhe e mbajtën deri në mbërritjen e forcave të rendit. Sipas Imam Shuaib Dean, drejtues i Qendrës Islamike të Utah, sulmuesi fillimisht iu afrua viktimës, e pyeti për emrin dhe fenë e tij, më pas kërkoi një shishe ujë. Në momentin që viktima u kthye për të marrë ujin, ai nisi ta godiste me thikë.

Viktima ndodhet në gjendje kritike në spital. Sipas një fushate të hapur për mbledhjen e fondeve, ai është goditur rreth 15 herë me thikë dhe i është nënshtruar ndërhyrjeve kirurgjikale.

Peter Michael Larsen mbahet në paraburgim dhe po hetohet për tentativë vrasjeje dhe përdorim të një arme të rrezikshme.

Ngjarja është dënuar nga organizatat myslimane në SHBA, përfshirë Këshillin për Marrëdhëniet Amerikano-Islamike (CAIR), të cilat kanë ngritur shqetësimin për rritjen e incidenteve të motivuara nga urrejtja ndaj myslimanëve. Sipas grupeve të të drejtave të njeriut, islamofobia në SHBA është shtuar vitet e fundit, e nxitur nga retorika anti-emigracion, ideologjitë supremaciste të bardha dhe tensionet e lidhura me luftën në Gaza.

Partia Demokratike do të mbledhë sot, Këshillin Kombëtar, ku pritet të zgjidhet ekipi i ri drejtues. Në njoftimin zyrtar të shpërndarë nga PD bëhet e ditur se në rendin e ditës janë përfshirë zgjedhja e Sekretarit të Përgjithshëm, nënkryetarëve të partisë, Sekretariatit të PD-së dhe Komisionit të Apelimit.

Mbledhja e Këshillit Kombëtar do të zhvillohet në orën 18:00, ndërsa pritet që vendimmarrja e këtij organi të përcaktojë strukturën kryesore drejtuese të PD-së në vijim. Kjo mbledhje vjen pas asaj të 1 korrikut, ku Këshilli Kombëtar i Partisë Demokratike zgjodhi kryetarin e këtij organi dhe 20 anëtarë të Kryesisë së partisë.

Në njoftimin drejtuar anëtarëve të Këshillit Kombëtar, PD falënderoi mbështetësit dhe bëri thirrje për bashkëpunim në punën e përbashkët për organizimin e mëtejshëm të partisë.

Policia ka sekuestruar ditën e sotme në Tiranë apartamente dhe garazh, me vlerë rreth 420 000 euro, të përfituara nga trafikimi i lëndëve narkotike.

Ato i përkasin 54-vjeçarit me iniciale H(A). A., i cili sipas policisë i ka përfituar këto pasuri nga veprimtaria kriminale në fushën e trafikimit të lëndëve narkotike.

Policia njofton se hetimet vijojnë për identifikimin dhe sekuestrimin e pasurive të tjera me burim kriminal, ndërsa materialet procedurale i janë referuar Prokurorisë së Tiranës për veprime të mëtejshme.

Njoftimi i policisë:

Tiranë/Finalizohet operacioni i koduar “De facto”, si rezultat i hetimeve për gjurmimin dhe sekuestrimin e pasurive me burime kriminale.

Sekuestrohen apartamente dhe garazh, me vlerë rreth 420 000 euro, të përfituara nga trafikimi i lëndëve narkotike.

Në vijim të një hetimi pasuror, me metoda speciale, kryer në bazë ligjit nr. 10192, datë 03.12.2009, “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”, nga specialistët e Seksionit për Hetimin e Pastrimit të Parave dhe Aseteve Kriminale, në bashkëpunim me Prokurorinë, në kuadër të operacionit të koduar “De facto”, u ekzekutua vendimi i Gjykatës për sekuestrimin e dy apartamenteve dhe një garazhi.

Pasuritë, me vlerë tregu rreth 420 000 euro, dyshohet se janë përfituar nga veprimtaria kriminale e shtetasit H(A). A., 54 vjeç, në fushën e trafikimit të lëndëve narkotike.

Hetimi vijon për të gjurmuar dhe sekuestruar pasuri të tjera me burime kriminale, të 54-vjeçarit ose shtetasve të lidhur me të.

Materialet procedurale iu referuan Prokurorisë së Tiranës, për veprime të mëtejshme.

Një projektligj i ri pritet të kthejë përmbys mënyrën se si shteti shqiptar administron dhe shet pasuritë e sekuestruara dhe të konfiskuara nga krimi i organizuar dhe korrupsioni.

Përmes një drafti prej 11 nenesh, qeveria synon të krijojë një sistem të unifikuar dhe efikas, duke futur në lojë ndryshime rrënjësore ligjore dhe praktike që prekin jo vetëm botën e teknologjisë, por edhe pronat e paluajtshme në mbarë vendin.

Milionat në Kripto që SPAK “nuk kishte ku t’i çonte”

Ky hap ligjor vjen në një moment kritik, pasi Struktura e Posaçme Antikorrupsion (SPAK) ka goditur fort botën e financave të errëta dixhitale, por është përballur me vështirësi të paprecedentë logjistike dhe ligjore për menaxhimin e tyre.

Gjatë bilancit të saj të fundit, SPAK konfirmoi se vetëm gjatë vitit 2025 vlera totale e aseteve të sekuestruara dhe konfiskuara kapte vlerën e rreth 45.4 milionë eurove, ku një pjesë e konsiderueshme përbëhej nga kriptovalutat. Goditja më e bujshme ishte ajo ndaj grupit kriminal të vëllezërve Çopja nga Elbasani, të cilëve iu ngrinë plot 10 milionë dollarë në kriptomonedha.

Megjithatë, ky sukses zbuloi një ngërç të madh. Shteti shqiptar nuk kishte kapacitete dhe as portofol zyrtar dixhital për t’i ruajtur këto miliona!

Prokurorët e SPAK u detyruan të kërkojnë ndihmë urgjente dhe bashkëpunim ndërkombëtar, duke i ruajtur këto asete fillimisht me ndihmën e prokurorisë italiane dhe kompanive të huaja globale të këmbimit (exchanges). Në Komisionin e Ligjeve, prokurorët ngritën alarmin se “portofolet dixhitale kërkojnë mirëmbajtje dhe ndërhyrje urgjente ligjore” pasi as AAPSK dhe as SPAK nuk dispononin një infrastrukturë të sigurt për administrimin e “thesarit dixhital”.

Me kalimin e këtij projektligji të ri, ky vakum ligjor mbyllet përfundimisht. Shteti shqiptar tashmë do të ketë rregulla të qarta se si do t’i sekuestrojë, mbajë dhe eventualisht t’i kthejë në para cash për buxhetin e shtetit të gjitha kriptovalutat e sekuestruara nga eksponentët e krimit.

Çfarë sjell projektligji i ri?

Zgjerimi i fushës së veprimit: Për herë të parë, AAPSK nuk do të administrojë vetëm pasuritë e sekuestruara apo konfiskuara nga organet e drejtësisë. Agjencia merr tashmë nën varësi edhe pasuritë e bllokuara nga vendimet e pushtetit vendor apo organeve të tjera administrative, duke përfshirë këtu një nga plagët më të mëdha të territorit: ndërtimet pa leje.

Krijimi i “Fondit të posaçëm për ndërtimet pa leje”: Ky është një term tërësisht i ri i parashikuar në ligj. Ky fond i dedikuar do të shërbejë ekskluzivisht për zhvillimin dhe veprimtarinë e objekteve pa leje që konfiskohen. Qëllimi është që këto objekte të përdoren për interes publik, strehim social apo për të zbutur pasojat sociale në komunitet.

AAPSK merr kontrollin e plotë të shitjeve:

Deri më sot, përfshirja e një institucioni të dytë në procesin e shitjes së pronave të sekuestruara krijonte vonesa të stërzgjatura burokratike dhe rriste kostot. Tashmë, Agjencia dhe Kryeadministratori do të kryejnë vetë të gjitha procedurat e ankandit dhe lidhjen e kontratave të shitjes, duke rritur efikasitetin financiar dhe transparencën.

Minimizimi i afateve të shitjes: Në aspektin procedural, projektligji shkurton ndjeshëm kohën e shitjes së pasurive të sekuestruara e konfiskuara, duke bërë që të ardhurat të kalojnë shumë më shpejt në buxhetin e shtetit dhe në fondet sociale.

Formula e re për shpenzimet e administrimit (“Sekuestro me studim tregu”): Për shkak se pasuritë në masë “sekuestro” kanë një ecuri të paparashikueshme (pasi varen nga hetimet e pazbardhura të drejtësisë), ligji përcakton që shpenzimet për to do të mbulohen mbi bazën e një studimi tregu. Këto shpenzime do të paguhen nga vetë të ardhurat që agjencia gjeneron nga qiratë apo shitjet e pasurive që ka në administrim, duke mos rënduar buxhetin e shtetit.

Kriptomonedhat njihen zyrtarisht si pasuri e luajtshme: Projektligji integron ligjërisht “monedhën virtuale” në listën e pasurive të luajtshme që mund të sekuestrohen, konfiskohen dhe administrohen sipas rregullave të qarta që do të miratohen me akte nënligjore të Këshillit të Ministrave.

Pas tubimit përpara godinës së Kryeministrisë, protestuesit kanë nisur marshimin në rrugët e Tiranës, duke vijuar protestën e 45-të radhazi kundër qeverisë së kryeministrit Edi Rama.

Me flamuj kombëtarë, pankarta dhe thirrje kundër qeverisë, pjesëmarrësit po përshkojnë rrugët kryesore të kryeqytetit.

Gjatë marshimit, protestuesit kanë përsëritur se nuk kanë ndërmend të tërhiqen nga kauza e tyre dhe se protestat do të vazhdojnë deri në dorëheqjen e kryeministrit Edi Rama.

“Nuk dorëzohemi” dhe “Rama ik”janë ndër thirrjet që dëgjohen më shpesh përgjatë itinerarit të protestës, ndërsa pjesëmarrësit shprehen se do të vijojnë të dalin në rrugë çdo javë, derisa, sipas tyre, të ketë një ndryshim në drejtimin e vendit.

Protestuesit kërkojnë që prioritet i qeverisë të jenë arsimi, shëndetësia dhe mirëqenia e qytetarëve, duke kundërshtuar, sipas tyre, shpenzimet për aktivitete që nuk adresojnë problemet e përditshme të shqiptarëve. Mes pankartave dhe thirrjeve është përsëritur edhe mesazhi: “Duam shkolla dhe spitale, jo koncerte.”

Pjesëmarrësit akuzojnë qeverinë se ka humbur kontaktin me problemet e qytetarëve dhe pretendojnë se drejtuesit e saj kanë hyrë në politikë për përfitime personale. Këto mbeten qëndrime të shprehura nga protestuesit gjatë tubimit.

Pavarësisht se kjo është protesta e 45-të, organizatorët dhe pjesëmarrësit shprehen se vendosmëria e tyre nuk është zbehur. Përkundrazi, sipas tyre, çdo protestë ka sjellë më shumë qytetarë dhe ka forcuar bindjen se ndryshimi është i mundur.
Ata thonë se vazhdimësia e protestave ka krijuar një frymë më të madhe solidariteti dhe angazhimi qytetar, duke u dhënë shpresë se zëri i tyre do të dëgjohet. Sipas protestuesve, ky është vetëm një hap i radhës i një lëvizjeje që, sipas tyre, do të vazhdojë deri në plotësimin e kërkesave të tyre.

Janë identifikuar dy viktimat e aksidentit të rëndë rrugor të ndodhur në fshatin Qyrkan, në Njësinë Administrative Gostime të Bashkisë Cërrik.

Mësohet se në përplasjen e fuqishme kokë më kokë mes dy automjeteve kanë humbur jetën Qemal Çala, 63 vjeç, dhe Drilon Tabaku. Dy personat kanë ndërruar jetë në vendngjarje, si pasojë e goditjes së fortë, ndërsa automjetet e përfshira në aksident kanë pësuar dëmtime të rënda dhe janë shkatërruar plotësisht.

Aksidenti i rëndë me dy viktima ka shkaktuar tronditje te madhe banorët e zonës së Mollasit , ndërsa në vendngjarje kanë mbërritur shërbimet e emergjencës dhe grupi hetimor i policisë, të cilët po punojnë për zbardhjen e plotë të dinamikës së aksidentit.

Paraprakisht dyshohet se përplasja frontale mes dy mjeteve ka qenë fatale për të dy drejtuesit/pasagjerët, por rrethanat e sakta dhe shkaku i aksidentit pritet të përcaktohen pas ekspertizave dhe hetimeve të autoriteteve.

Ministri për Evropën dhe Punët e Jashtme, Ferit Hoxha, reagoi në platformën X, duke dënuar deklaratën e një anëtari të Qeverisë së Serbisë, Snezhana Paunoviçit, për spastrimin etnik në Kosovë, duke e cilësuar atë të papranueshme dhe fyese për viktimat e luftës.

Ai theksoi se normalizimi i krimeve kundër njerëzimit minon pajtimin dhe se e ardhmja

evropiane e rajonit mund të ndërtohet vetëm mbi të vërtetën, përgjegjësinë dhe respektin për viktimat.

Reagimi i plotë Ministrit:

“Deklarata e një anëtari të qeverisë së Serbisë, që shpreh publikisht keqardhje që në Kosovë nuk është kryer një spastrim etnik edhe më i madh, është e papranueshme, tronditëse dhe një fyerje e rëndë për viktimat e luftës.

Relativizimi dhe normalizimi i një prej krimeve më të rënda kundër njerëzimit, krime të dënuara nga historia, nga drejtësia ndërkombëtare dhe nga vetë ndërgjegjja njerëzore, bien ndesh me vlerat mbi të cilat është ndërtuar Evropa e sotme. Ato minojnë përpjekjet për pajtim dhe bashkëpunim, ushqejnë mosbesimin dhe urrejtjen, si dhe rihapin plagë që ende nuk janë shëruar.

Askush nuk mund të ndërtojë besim duke rikthyer hijet më të errëta të së kaluarës, aq më pak duke lartësuar politika dhe figura që mbajnë përgjegjësi për tragjedi, vuajtje dhe krime që kanë lënë gjurmë të thella në historinë e rajonit tonë siç është “kasapi i Ballkanit”.

Procesi i normalizimit dhe i pajtimit, për të cilin Kosova, Serbia dhe i gjithë rajoni ynë kanë aq shumë nevojë, kërkon para së gjithash përgjegjësi, reflektim dhe guxim për t’u përballur me të kaluarën.

Ai nuk mund të ndërtohet kurrë mbi deklarata që justifikojnë apo lartësojnë politikat që sollën aq shumë dhimbje e shkatërrim, por vetëm e vetëm mbi të vërtetën, respektin për viktimat dhe angazhimin e sinqertë për një të ardhme të përbashkët evropiane”.

Një aksident i rëndë rrugor ka tronditur mbrëmjen e sotme banorët e fshatit Qyrkan, në Njësinë Administrative Gostime të Bashkisë Cërrik.

Sipas informacioneve paraprake, dy automjete janë përplasur fuqishëm me njëri-tjetrin në një përplasje frontale, duke shkaktuar pasoja fatale. Përplasja ka qenë aq e fortë sa të dy automjetet janë shkatërruar plotësisht dhe njëri prej tyre pas përplasjes ka “fluturuar” jashtë rruge.

Si pasojë e aksidentit, dy persona kanë humbur jetën në vendngjarje, ndërsa identitetet e viktimave ende nuk janë bërë të ditura.

Në vendin e ngjarjes kanë mbërritur menjëherë shërbimet e emergjencës, policia dhe grupi hetimor, të cilët kanë nisur punën për zbardhjen e plotë të rrethanave të aksidentit.

Paraprakisht dyshohet se shkak i përplasjes mund të ketë qenë humbja e kontrollit mbi drejtimin e automjeteve ose një manovër e gabuar gjatë lëvizjes, por pritet që hetimet e policisë të përcaktojnë dinamikën e saktë të ngjarjes.

Aksidentet rrugore vijojnë të jenë një ndër problematikat më shqetësuese në vend, ndërsa autoritetet u bëjnë vazhdimisht apel drejtuesve të mjeteve të tregojnë kujdes maksimal, të respektojnë rregullat e qarkullimit dhe të shmangin shpejtësinë e lartë.

Partia Demokratike ka dënuar ashpër deklaratën e ministres serbe të Administratës Publike dhe Vetëqeverisjes Lokale, Snezhana Paunoviç, duke e cilësuar atë raciste dhe antishqiptare.

Në një deklaratë për mediat, zëdhënësja e PD-së, Floriana Garo, tha se deklarata e ministres, ku ajo shprehet se “po të ishte në vend të Sllobodan Millosheviçit në vitin 1998, do ta kishte spastruar etnikisht Kosovën”, përbën një nxitje të hapur të urrejtjes dhe glorifikim të gjenocidit. Sipas Partisë Demokratike, me këtë deklaratë Paunoviç shpreh keqardhje që regjimi i Millosheviçit nuk arriti të dëbonte shqiptarët nga Kosova gjatë luftës.

PD akuzon gjithashtu kryeministrin Edi Rama dhe qeverinë për mungesë reagimi ndaj, siç e cilëson, një deklarate çnjerëzore që bie ndesh me parimet themelore të të drejtave të njeriut.

Në përfundim të reagimit, Partia Demokratike kërkon që Snezhana Paunoviç të shpallet “non grata” në Shqipëri dhe të paditet për nxitje të gjenocidit, duke i cilësuar këto si masat e vetme që meriton.

Deklaratë e zëdhënëses së Partisë Demokratike,Floriana Garo

Këto ditë, në media ka qarkulluar një deklaratë ultraraciste dhe antishqiptare e ministres serbe të Administratës Publike dhe Vetëqeverisjes Lokale, Snezhana Paunoviç, në qeverinë e padronit të Edi Ramës, Aleksander Vuçiçit.

Në këtë deklaratë, ajo shprehet: “Po të isha në vend të Sllobodan Millosheviçit në vitin 1998, do ta kisha spastruar etnikisht Kosovën.”

Me këtë deklaratë, kjo figurë e ultranacionalizmit serb shpreh keqardhje që xhelati i Ballkanit, Sllobodan Millosheviçi, me operacionin e tij “Patkoi” dhe me gjenocidin e fundit serb ndaj shqiptarëve, nuk arriti t’i dëbonte ata nga trojet e tyre mijëravjeçare.

Partia Demokratike e dënon me forcë deklaratën raciste dhe antishqiptare të kësaj përfaqësueseje të ultranacionalizmit primitiv serb, si edhe qëndrimin e Edi Ramës dhe të narkoqeverisë së tij përballë deklaratave të tilla çnjerëzore dhe nxitëse të urrejtjes, të cilat bien ndesh me parimet themelore të Deklaratës Universale të të Drejtave të Njeriut.

Shpallja e saj non grata dhe paditja për nxitje të gjenocidit janë të vetmet qëndrime që ajo meriton.

Gjykata e Apelit ka ndryshuar masën e sigurisë për një nga rojet private të arrestuara pas dhunës ndaj protestuesve në Zvërnec më 29 maj.

Për Gazmend Vathin, i cili ishte lënë në burg nga Gjykata e Vlorës, Apeli vendosi masën “arrest në shtëpi”. Ndërsa për rojen tjetër, Artur Grani, u la në fuqi masa “arrest në burg”.

Në burg do të qëndrojë edhe pronari i kompanisë “Major Security”, Geraldo Biba. Apeli rrëzoi kërkesën e tij për zbutjen e masës së sigurisë.

Sipas hetimeve, tre të dyshuarit akuzohen se ushtruan dhunë ndaj një protestuesi gjatë tubimit kundër projektit në Zvërnec, duke e goditur dhe tërhequr zvarrë. Ngjarja ndodhi në prani të efektivëve të Policisë së Shtetit, të cilët, sipas hetimeve, nuk ndërhynë për të ndaluar dhunën.

Policia e Shtetit njoftoi sot se gjatë 24 orëve të fundit, janë identifikuar dhe arrestuar në flagrancë dy shtetas, ndërsa është proceduar në gjendje të lirë një tjetër, të dyshuar si autorë të tri zjarrvënieve në Kavajë, Vorë dhe Mallakastër.

Konkretisht, në Kavajë u arrestua shtetasi S. Ç., 51 vjeç, banues në fshatin Sterbeg, pasi, si pasojë e zjarrit që ndezi në sipërfaqen e tokës në pronësi të tij, u dëmtuan kullota në këtë fshat dhe 300 pemë (agrumesh dhe ullinjsh).

Ndërkohë në Vorë u arrestua shtetasi A. D., 43 vjeç, banues në fshatin Gjokaj, pasi si pasojë e zjarrit që ndezi në sipërfaqen e tokës në pronësi të një shtetasi tjetër, u dogj një sipërfaqe toke në këtë fshat, e mbjellë me drufrutorë.

Në Mallakastër u vu nën hetim penal O. B., 39 vjeç, banues në fshatin Levan, pasi gjatë tërheqjes me karrotrecin që drejtonte të një automjeti të aksidentuar, janë shkaktuar shkëndija elektrike, të cilat janë përhapur dhe kanë djegur dhjetëra pemë arre në pronësi të një shtetasi, në fshatin Romës.

Materialet procedurale iu referuan prokurorive kompetente për veprime të mëtejshme.

Sipas policisë, gjatë muajit qershor dhe dy javëve të para të muajit korrik 2026, janë arrestuar dhe proceduar 29 shtetas të dyshuar si autorë të zjarrvënieve.

Policia e Shtetit apelon sërish ndaj të gjithë qytetarëve, fermerëve dhe pronarëve apo poseduesve të kullotave që, në asnjë rrethanë, të mos ndezin zjarr.

Gjithashtu, praktika e gabuar dhe penalisht e ndëshkueshme e djegies së mbeturinave në toka bujqësore ose kullota përbën rrezik për përhapjen e pakontrolluar të flakëve, si dhe për dëmtimin e pronës, shëndetit dhe jetës.

Grupi parlamentar i Partisë Demokratike ka depozituar një kallëzim penal në Prokurorinë e Posaçme Kundër Korrupsionit dhe Krimit të Organizuar (SPAK) ndaj kryeministrit Edi Rama, lidhur me atë që opozita e cilëson si afera “The Albanian Files”.

Kallëzimi është bërë nga kryetari i grupit parlamentar të PD-së, Gazment Bardhi.

Sipas Bardhit, kallëzimi përfshin dyshime për veprat penale “Shpërdorimi i detyrës”, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale ose veprimtarisë kriminale”, në formën e veçantë të bashkëpunimit, atë të “Grupit të Strukturuar Kriminal”.

Partia Demokratike thotë se përmbajtja e librit “Albanian Files” paraqet atë që e cilëson si një skemë të organizuar për dhënien e lejeve të ndërtimit në vend. Sipas PD-së kryeministri Edi Rama, në cilësinë e Kryeministrit dhe Kryetarit të Këshillit Kombëtar të Territorit (KKT), përzgjidhte studio ndërkombëtare të arkitekturës, kontaktonte me to dhe më pas i lidhte me investitorë apo ndërtues shqiptarë. PD nënvizon se këta investitorë paguanin tarifa të larta për projektimin dhe më pas përfitonin leje për ndërtimin e pallateve, kullave, hoteleve dhe resorteve në Tiranë dhe zonat bregdetare.

“Nga përmbajtja e këtij libri, zbardhet skema se si shtetasi Edi Rama, me detyrë Kryeministër/Kryetar i Këshillit Kombëtar të Territorit (në vijim «KKT»), përzgjidhte studiot ndërkombëtare të artitekturës, i kontaktonin, takonin dhe më pas krijonin lidhjet me investitorë apo ndërtues shqiptarë. Këta të fundit paguanin shuma të larta për projektimin dhe më pas përfitonin leje ndërtimi për ndërtimin e pallateve, kullave, hoteleve apo resorteve në Tiranë dhe zonat bregdetare të vendit”, thotë PD.

PD pretendon se rastet e përfshira në “Albanian Files” tregojnë se zhvillimi i sektorit të ndërtimit, veçanërisht ai i kullave në Tiranë, nuk ka ndjekur procedurat normale administrative. Sipas saj, në vend që investitorët të paraqisnin projektet pranë Agjencisë së Zhvillimit të Territorit dhe më pas ato të shqyrtoheshin nga KKT, ishte vetë kryetari i KKT-së që identifikonte dhe kontaktonte studiot e huaja të arkitekturës, të cilat më pas lidhnin marrëdhënie me investitorët shqiptarë.

“Rastet e përmendura në «Albanian Files» provojnë se zhvillimi i sektorit të ndërtimit në Tiranë, veçanërisht ndërtimi i kullave të larta, nuk ndiqte procedurën normale, ku një investitor paraqiste dokumentacionin teknik dhe ligjor për ndërtimin e një vepre pranë Agjencisë së Zhvillimit të Territorit, dhe në përfundim të procedurës administrative, çështja i kalonte Këshillit Kombëtar të Territorit për vendimmarrje. Në fakt, ishin shtetasit Edi Rama, Kryetar i KKT-së, i cili identifikonte, kontaktonte dhe takonte studiot e arkitekturës, të cilët më pas i lidhnin me investitorë apo biznemenë shqiptar për të vijuar procedurat e projektimit dhe marrjes së lejeve të zhvillimit dhe ndërtimit. Arkitektët dhe studiot ndërkombëtare që u imponoheshin investitorëve shqiptarë, kishin tarifa shumë të larta, deri në 10-fishin e çmimeve të tregut, çka sillte më pas rritje të kostove, e për rrjedhojë rritje të çmimeve të shitjes së sipërfaqeve të ndërtimit. Nëse çmimet mesatare të projektimit variojnë nga 7-10 euro për m2, arkitektët e huaj faturojnë 60 euro/m2, duke arritur kështu në kosto projektimi nga 300 mijë deri në 2 milionë euro. Megjithatë, kjo shihet si një mënyrë e sigurtë për të përfituar lejen e zhvillimit apo ndërtimit nga AZHT-ja dhe KKT-ja”, thotë PD në kallëzimin e depozituar në SPAK.

Një zjarr ka rënë në zonën e Llamanit, në Himarë, duke përfshirë një sipërfaqe me bimësi në kodrat përreth.

Flakët janë përhapur me shpejtësi në terren, ndërsa era e fortë po favorizon përparimin e zjarrit.

Shkaqet e zjarrit ende nuk dihen, por temperaturat e larta janë kryesisht shkaktarët kryesorë.

Sot protesta qytetare hyn në ditën e saj të 44-t, duke u kthyer në një nga lëvizjet më të gjata qytetare që ka njohur Shqipëria në vitet e fundit. Pasi u mblodhën para Sheshin Skëndërbej, ata u ndalën te Kryeministria. Për 44 ditë me radhë, qytetarët janë mbledhur çdo mbrëmje para Kryeministrisë me të njëjtat thirrje që dëgjohen që prej ditës së parë: “Rama në burg, Berisha në burg”, “Rama jep dorëheqjen” dhe “Shqipëri e Re”.

Policia Kufitare dhe Njësia Policore Detare u erdhën në ndihmë 9 turistëve të huaj, në dy raste të ndryshme në Himarë dhe Ksamil, duke shmangur pasoja për jetën e tyre.

Komisioni për të Drejtat e Njeriut dhe Mjetet e Informimit Publik zhvilloi sot një aktivitet në ish-burgun e Spaçit me temë “Spaçi, nga kujtesa te mbrojtja e të drejtave të njeriut”.

Në këtë aktivitet morën pjesë kryetarja e Komisionit Jorida Tabaku, zv/kryetarja Iris Luarasi dhe deputeti Gjin Gjoni. Gjithashtu në aktivitet ishin të pranishëm ambasadori i Bashkimit Evropian në Tiranë, Silvio Gonzato, përfaqësues të institucioneve publike, historianë, ish-të përndjekur politikë, studiues dhe ekspertë të fushës.

Gjatë aktivitetit u diskutua për të vërtetën, drejtësinë dhe kujtesën, duke vendosur në qendër të vëmendjes personat e zhdukur gjatë periudhës së komunizmit. Po ashtu u analizuan përpjekjet e deritanishme për dokumentimin dhe zbardhjen e rasteve të pazgjidhura si dhe sfidat që lidhen me identifikimin e mbetjeve mortore dhe vendvarrimeve të dyshuara në Spaç dhe në vende të tjera.

Diskutimet u përqendruan kryesisht në politikat e kujtesës dhe dinjitetin njerëzor. Një vëmendje e veçantë iu kushtua mbrojtjes së të drejtave të njeriut përmes ndërgjegjësimit historik dhe domosdoshmërisë për të pasur qasje të plotë në arkivat historike, çka mbetet një hap kyç për zbardhjen e së vërtetës.

Në fjalën e saj, Tabaku u shpreh se Spaçi mbart një histori të gjallë që flet përmes kujtimeve të të mbijetuarve, duke kërkuar që ky vend të shndërrohet në një qendër kombëtare kujtese përpara se të largohen dëshmitarët e fundit. Ajo nënvizoi se kjo nuk është një çështje politike, por një detyrim për të rikthyer dinjitetin e ish-të dënuarve politikë dhe familjarëve të tyre, të cilët ende kërkojnë eshtrat.

“Ka vende ku historia lexohet, tregohet dhe ende dëgjohet. Spaçi është një prej tyre. Historia flet përmes kujtimeve të atyre që mbijetuan. Ne duhet të shohim se si mund t’u japim zgjidhje çështjeve të pazgjidhura. Instituti i Studimeve për Krimet dhe Pasojat e Komunizmit (ISKK) dhe të tjera kanë marrë masa dhe kanë identifikuar problematikat ndër vite. Familjarët e ish-të dënuarve kërkojnë eshtrat e atyre që nuk jetojnë më. Duhet vendosur dinjiteti dhe një vend kujtimi për ata që nuk jetojnë më”, tha Tabaku.

Sipas saj, “Spaçi duhet të ruhet dhe të shndërrohet në një vend kombëtar kujtese”. “Në sesionet e ardhshme do bëjmë dëgjesa me familjarë dhe institucionet përgjegjëse për të ngritur një mekanizëm që 36 vite pas komunizmit të rikthejmë atë që familjarët kërkojnë prej vitesh. Kjo është çështje e dinjitetit të njeriut”,  u shpreh Tabaku.

Ndërsa Luarasi u shpreh se Spaçi duhet parë si një vend krimi dhe jo thjesht si një vend kujtese. Sipas saj, vonesat në dëmshpërblime janë një padrejtësi e vazhdueshme. Luarasi shtoi se linçimi publik në ekranet digjitale dhe shpallja armik e çdo mendimi ndryshe po cenojnë dinjitetin njerëzor dhe se lufta ndaj dezinformimit dhe gënjeshtrave të fabrikuara është jetike për mbijetesën e demokracisë, e cila rrezikon të vdesë dalëngadalë nëse liria nuk mbrohet çdo ditë.

“Do të thoja që ky është një moment reflektimi. Spaçi nuk është monument, por vend krimi. Tragjedia është se viktimat janë lënë pas. Kemi një ligj për dëmshpërblimin për ish-të dënuarit politik. Lugë boshe. Vonesat janë një padrejtësi. Kujtesa nuk mund të jetë çështje protokollare. Sot ka gënjeshtra të fabrikuara që Shqipëria po u shitet të tjerëve. Lufta kundër dezinformimit nuk është çështje dytësore, por kusht i mbijetesës demokratike. Demokracitë nuk vdesin nga një grusht shteti, por dalëngadalë. Liria nuk trashëgohet, por jemi si një provë për ta ruajtur atë”, u shpreh Luarasi.

Ambasadori i Bashkimit Evropian në Tiranë, Silvio Gonzato, u shpreh se të mbijetuarit dhe familjarët e viktimave të regjimit duhet të dëmshpërblehen financiarisht dhe të trajtohen me dinjitet.

Gonzato u bëri thirrje politikës dhe autoriteteve shqiptare të tregojnë vullnet për të zbardhur fatin e mbi 6 mijë të zhdukurve përmes hetimeve, fakteve dhe gërmimeve shkencore. Po ashtu, Gonzato nënvizoi se kthimi i Spaçit në një vend kujtese dhe ballafaqimi me të shkuarën janë thelbësore që Shqipëria të mos përsërisë më kurrë gabimet e historisë.

“Kthimi i drejtësisë është kompensimi financiar. Kur të gjitha informacionet janë në dosje, njerëzit duhet të marrin atë që u takon. Janë mbi 6 mijë të zhdukur. Jemi përpjekur për të mbledhur të dhëna. Duhet vepruar. Politika duhet të tregojë vullnetin që të lejohen gërmime në varre të përbashkëta. Spaçi mund të jetë një vend i kujtesës. Sjellim njerëz për t’u kujtuar çfarë ka ndodhur, për të shkuarën e Shqipërisë dhe që Shqipëria të mos shohë më padrejtësi”, u shpreh ambasadori.

Gonzato theksoi se Evropa e kujton historinë dhe gabimet e së shkuarës nuk përsëriten.

“Kemi nevojë për fakte. Njerëzit duan drejtësi, autoritetet duhet të ndjekin këto persona dhe të hetohet për të zhdukurit. Duhet një vendim i thjeshtë nga Këshilli i Ministrave. Parlamenti bën detyrën e tij. Duhet hetuar dhe të mbijetuarve t’u jepet një jetë e dinjitetshme. Shpresoj që të vazhdoni këtë luftë dhe të garantoni këtë rrugë për këta njerëz”, tha Gonzato.

Më tej, anëtarët e Komisionit për të Drejtat e Njeriut dhe Mjetet e Informimit Publik dhe të pranishmit panë nga afër ambientet e ish-burgut të Spaçit si dhe zhvilluan një vizitë në dy vendvarrime të dyshuara të ish-të dënuarve.

Avokati i Popullit, Endri Shabani po zhvillon sot dhe nesër një inspektim të paparalajmëruar në burgun e Shënkollit, në kuadër të mandatit si Mekanizëm Kombëtar për Parandalimin e Torturës. Sipas njoftimit për shtyp të Avokatit të Popullit, gjetjet paraprake janë shqetësuese, pasi grupi i inspektimit konstatoi mbipopullim të rëndë të ambienteve të akomodimit dhe mungesë të theksuar të personelit mjekësor, në raport me nevojat shëndetësore të të burgosurve.

Sipas Avokatit të Popullit, kushte të tilla cenojnë dinjitetin njerëzor dhe standardet minimale të Komitetit Evropian për Parandalimin e Torturës (CPT). Pas inspektimit Shabani tha në një prononcim për mediet se “problemi kryesor është se duhet të ishte një spital me siguri të lartë, jo një burg me dy psikiatër”.

Gjatë inspektimit po verifikohen kushtet e akomodimit, kujdesi shëndetësor, regjistrat e ankesave dhe po zhvillohen biseda private me të burgosur, pa praninë e stafit të institucionit.

Pas përfundimit të inspektimit, Avokati i Popullit do t’i përcjellë Ministrisë së Drejtësisë dhe Drejtorisë së Përgjithshme të Burgjeve raportin e plotë me gjetjet dhe rekomandimet konkrete. Institucioni do të krahasojë gjetjet me inspektimin e vitit të kaluar në burgun e Shënkollit për të verifikuar zbatimin e tyre.

Kushtet në burgje nuk janë çështje mëshire apo favor, por një detyrim kushtetues i shtetit ndaj çdo personi që ndodhet nën kujdesin e tij.

Zbardhen detaje të reja nga vrasja e Eglant Koçit, si autori Armand Shakaj u fsheh për 10 ditë pas krimit në qarkun e Elbasanit.

Burime nga hetimi bëjnë me dije për A2 CNN se pasi ka eliminuar mikun e tij, autori Armand Shakaj është fshehur në qarkun e Elbasanit. Shakaj duke ndryshuar edhe pamjen për t’u mos u njohur, është fshehur në rrethina të Elbasanit duke qëndruar në hotele dhe apartamente me qira ditore duke paraqitur dokumente fallso identifikimi nëse i është kërkuar.

Shakaj ka qëndruar vetëm me qira ditore dhe nuk ka lëvizur me mjete personale por me taksi. Dyshohet se gjatë kësaj periudhe është fshehur edhe në zonën e Peqinit dhe Cërrikut me të njëjtën metodë duke qëndruar në hotele dhe apartamente me qira ditore dhe duke lëvizur me taksi.

Këto veprime të Shakajt janë vërtetuar edhe më pas nga hetimet që kryer grupi hetimor.

Kur hetuesit kanë rënë në gjurmë të telefonit të tij celular dhe kanë kuptuar se sinjali i tij pulsonte në qarkun e Elbasanit, janë organizuar operacione për kapjen e tij, por Shakaj ka humbur sërish gjurmët duke u larguar nga qarku i Elbasanit.

Shakaj vijon të jetë në arrati, ndërsa policia ka dyshime se ai ndihmohet për t’u fshehur nga persona të afërt me të, me të cilët mban edhe kontakte.

Më datë 4 qershor Shakaj vrau mikun e tij Eglant Koçi dhe më pas zhduku kufomën e tij duke e hedhur në majën e Korrës 1450 lartësi në fshatin Cerrujë. Trupi i Koçit u gjet pas dy javësh nga policia.

Gjykata e Shkodrës ka lënë në qeli 64-vjeçarin, Shtjefën Ziçi i cili vrau me armë gjahu bashkëshorten e tij 55-vjeçare, Bardhe. Ziçi nuk ka folur asnjë fjalë para trupit gjykues, ndërsa avokati i tij Agim Martini ka kërkuar ekspertimin psikik të klientit të tij.

Ngjarja e rëndë ndodhi mesditën e 9 korrikut, në unazën lindore të Shkodrës. Pas debatit në dyqanin ushqimor që administronin pranë banesës, 64-vjeçari mori armën e gjahut dhe qëlloi ndaj bashkëshortes në pragun e shtëpisë. Sipas hetimeve, 55-vjeçarja tentoi të largohej për t’i shpëtuar sulmit, por nuk arriti t’u mbijetojë plagëve të marra.

Grupi hetimor ka dyshime se 64-vjeçari e vrau bashkëshorten për motive xhelozie. Sipas hetimeve, ai i ka kërkuar bashkëshortes telefonin celular, çka ka sjellë një debat mes tyre. Pak çaste më vonë, është futur në banesë, ka marrë çiften që e posedonte me leje dhe ka qëlluar dy herë në drejtim të gruas, duke i shkaktuar vdekjen në vend.

Çifti ishin prindër të dy fëmijëve. Djali jeton në Kanada, ndërsa vajza shërben si oficere në repartin ushtarak të Vau Dejës.

Në gjyqin e fraksionit të ndarë të fashikullit “Veliaj” me 11 të pandehur është mbajtur mbrojtja e të pandehurve Fatjon Baçi dhe Adela Kondakci, ish-financiere e disa kompanive.

Sipas gazetares Anila Hoxha, ish-polici i burgjeve Baçi, përmes avokatit, tha se ishte ndikuar për t’ia dhënë telefonin Erion Veliajt nga pushteti i kryebashkiakut dhe personit që ai përfaqësonte dhe se Veliaj nuk kishte bërë asnjë krim duke folur me të vëllain.

Ndërkohë, avokati i të akuzuarës Kondakci kërkoi lehtësira, pasi ajo kishte ndihmuar drejtësinë. Në proces, siç tha Anila Hoxha, avokati i Kondakci tha se klientja e tij ka pranuar të marrë pjesë në abuzim me ligjin, por e shtyrë dhe e ndikuar nga urdhrat e Ajola Xoxës.

Jo vetëm që nuk ka përfituar, por është vënë në dispozicion të drejtësisë dhe ka pasur kosto për transparencën e saj, tha avokati. Ka ndihmuar në zbardhjen e së vërtetës për organet e drejtësisë, vijoi më tej mbrojtësi për klienten e tij.

Nga ana tjetër, mbrojtja e ish-policit deklaroi: “Fatjon Baçi ka bërë një gabim njerëzor përballë një njeriu si Erion Veliaj, që gëzonte pushtetin që gëzonte. Veliaj ka biseduar me vëllain dhe gruan e tij dhe nuk ka bërë asnjë bisedë kriminale, përndryshe nuk do t’ia jepte celularin.

Kërkoj që Gjykata të japë një dënim më të lehtë duke marrë në konsideratë se nuk kam pasur qëllim kriminal dhe duke marrë parasysh rrethanat familjare, që jam i vetmi njeri i punësuar në shtëpinë time”, pohoi mbrojtja. Seanca u shty për në datën 23 korrik mbasi avokatët kërkuan kohë të plotësojnë konkluzionet.