Kërcënohet me jetë grupi i xhirimit të Ora News në krye të detyrës në fshatin Zbarqe, në periferi të Tiranës! Kërcënohet me jetë grupi i xhirimit të Ora News gjatë realizimit të një kronike për dëmtimin e një burimi ujor në zonë.

Grupi i xhirimit të Ora News po përgatiste një material për dëmtimin e një burimi ujor, pas një denoncimi nga banorët e zonës.

Banorët denoncuan në Ora News se një person ka dëmtuar një burim uji historik në fshat. Grupi i xhirimit u përball me kërcënime me jetë.

Policia shpall në kërkim shtetasin Sinan Hamdi Idrizi për kërcënimin me jetë të gazetares dhe operatorit të Ora News.

Sinan Hamdi Idrizi kërcënoi me jetë grupin e xhirimit të Ora News gjatë realizimit të një kronike në fshatin Zbarqe të Tiranës.

Nga 3 shtatori, Shqipëria do të ndërpresë importin e mishit nga Brazili.

Autoriteti Kombëtar i Ushqimit ka sinjalizuar Ministrinë e Bujqësisë dhe Zhvillimit Rural për ndryshimet e reja të Bashkimit Europian lidhur me importin e mishit nga Brazili, duke kërkuar marrjen e masave për vijimin e procedurave në pikat e inspektimit kufitar pas datës 3 shtator 2026.

Sipas AKU-së, Bashkimi Europian, përmes Rregullores Zbatuese, ka ndryshuar listën e vendeve të autorizuara për eksport, në kuadër të kufizimeve për përdorimin e disa produkteve medicinale antimikrobike.

Si pasojë e këtij ndryshimi, Brazili është hequr nga lista e vendeve të treta ose rajoneve të tyre të autorizuara për hyrjen në BE të dërgesave të disa kafshëve dhe produkteve me origjinë shtazore të destinuara për konsum njerëzor.

Në përgjigjen drejtuar AKU-së, Ministria e Bujqësisë vlerëson se ndryshimet e miratuara nga BE-ja reflektohen drejtpërdrejt në zbatimin e urdhrit shqiptar, pasi ky i fundit e kushtëzon importin me miratimin nga BE-ja të zonave dhe stabilimenteve të prodhimit.

Ministria e Bujqësisë i kërkon AKU-së të njoftojë bizneset për ndërprerjen e importit të mishit nga Brazili, në përputhje me ndryshimet e reja që hyjnë në fuqi më 3 shtator 2026.

Një konflikt për motive të dobëta ka përfunduar me të shtëna me armë zjarri në Kurbin, ndërsa policia ka arrestuar tre persona dhe ka shpallur në kërkim një tjetër.

Ngjarja u denoncua nga 38-vjeçari P. L., i cili deklaroi se mesditën e djeshme, teksa lëvizte me automjet në rrugën e Patokut, në drejtim të makinës së tij ishte qëlluar me armë zjarri.

Pas kallëzimit, specialistët e Seksionit për Hetimin e Krimeve Kundër Personit nisën menjëherë veprimet hetimore, duke bërë të mundur lokalizimin dhe ndalimin e tre personave: Gj. L., 67 vjeç, Gj. (A.) L., 40 vjeç, babë e bir, si dhe E. L., 28 vjeç, kushëri i tyre. Të tre janë banues në Laç.

Ndërkohë, në kërkim është shpallur V. Gj. (L.), 35 vjeç, djali tjetër i 67-vjeçarit.

Sipas hetimeve paraprake, pas një konflikti verbal me kushëririn e tyre, për motive të dobëta, të dyshuarit kanë qëlluar me armë zjarri në drejtim të automjetit me të cilin lëvizte 38-vjeçari.

Fatmirësisht, nga të shtënat nuk ka pasur persona të plagosur.

Gjatë largimit nga vendngjarja, 38-vjeçari P. L. ka përplasur me automjetin që drejtonte një tjetër automjet, duke shkaktuar vetëm dëme materiale. Automjeti i tij është sekuestruar nga policia si provë materiale.

Autoritetet vijojnë punën për kapjen e 35-vjeçarit të shpallur në kërkim, gjetjen e armës së zjarrit dhe dokumentimin e plotë të ngjarjes. Në drejtimin e Prokurorisë po punohet edhe për përcaktimin e përgjegjësisë penale të secilit prej personave të përfshirë.

Materialet procedurale i janë referuar Prokurorisë së Lezhës për veprime të mëtejshme.

Instituti i Gjeoshkencave (IGJEO) ka paralajmëruar nivel të lartë rreziku për zjarret në pyje gjatë pasdites së sotme dhe ditës së nesërme në pesë qarqe të vendit.

Sipas IGJEO-s, rrezik “I LARTË” pritet në qarqet Lezhë, Durrës, Tiranë, Elbasan dhe Fier, ndërsa në Shkodër, Kukës, Dibër, Berat, Vlorë, Gjirokastër dhe Korçë niveli i rrezikut parashikohet “I MODERUAR”.

Në disa qarqe, rreziku i lartë pritet vetëm në zona të lokalizuara, konkretisht në jugperëndim të Shkodrës, qendër të Kukësit, jugperëndim të Dibrës, verilindje të Korçës dhe veriperëndim të Beratit.

Instituti thekson se rreziku pritet të jetë më i lartë gjatë ditës së nesërme.

Sa i përket kushteve meteorologjike, pasditen e sotme priten reshje lokalisht të dobëta në qarqet Korçë, Vlorë dhe Gjirokastër, ndërsa në pjesën tjetër të vendit nuk parashikohen reshje. Për të martën nuk priten reshje.

Temperaturat minimale dhe maksimale pritet të luhaten nga 23 deri në 35° C në zonat bregdetare, 22 deri në 39° C në vendet e ulëta dhe 16 deri në 34°C në zonat malore.

Era pritet të jetë e lehtë deri mesatare, ndërsa në bregdet dhe zonat malore, mund të jetë e fortë.

Viti 2026 po shënon një rekord të ri sa i takon aviacionit civil, duke arritur në shifra të paregjistruara më parë. Sezoni turistik veror është periudha e cila shënon një fluks të lartë sa i takon numrit të fluturimeve dhe pasagjerëve.

Ministri i Infrastrukturës dhe Energjisë, Enea Karakaçi ishte pranë Albcontrol, ku u njoh nga drejtori Dritan Isaku, me të gjithë procesin që po bëhet për menaxhimin e fluksit të fluturimeve, si dhe masat e marra për të garantuar një proces pa problematika dhe vonesa.

Drejtori Isaku bëri të ditur se prej muajit janar dhe deri në korrik janë përpunuar rreth 242 mijë fluturime, 11% më shumë, krahasuar me vitin e kaluar, ndërkohë që janë marrë të gjitha masat, duke shtuar edhe stafin, për t’ju përgjigjur fluksit në rritje.

“Në dy-tre vitet e fundit, për shkak të rritjes së trafikut në aeroportin e Tiranës, ky sektor ka pasur një ngarkesë të shtuar. Kemi marrë masa dhe me shtimin e stafeve për përballimin e sezonit dhe për përballimin e të gjithë situatave, qoftë të pazakonta ose emergjente, të cilat edhe mund të ndodhin, por për moment nuk kemi patur asnjë problematikë”, tha Isaku.

Aktualisht aeroporti ndërkombëtar i Tiranës klasifikohet si aeroporti me ngarkesën më të madhe në Ballkan.

Ministri Karakaçi tha se vit pas viti Shqipëria po regjistron shifra rekord sa i takon aviacionit civil, i cili nga ana e tij po i përgjigjet të gjithë këtij fluksi në mënyrë më të mënyrë duke mos sjellë asnjë vonesë në përpunimin e pasagjerëve.

“Ne vazhdojmë përsëri me rritjen e trafikut ajror. Nga viti në vit kemi rritje. Edhe këtë vit, në krahasim me vitin 2025, si për kategorinë e ulje-ngritjeve nga aeroporti i Tiranës, ashtu edhe për trafikun që kalon mbi kufirin shqiptar, kemi një rritje dyshifrore. Dhe po ashtu është edhe shumë evidente në fakt, që duhet theksuar, që edhe puna shumë e mirë e menaxhimit të aeroportit të Tiranës, pasi në këtë 6-mujor që ne kemi shifrat zyrtare, kemi një numër pasagjerësh pothuajse mbi 17% të zbritur në aeroportin e Tiranës, rreth 6 milionë dhe për ta krahasuar me vitin 2025 kemi rreth 900 mijë pasagjerë më shumë. Konfirmim i trendit të rritjes së menaxhimit të aeroportit, por edhe atë çfarë është evidente në të gjithë Shqipërinë, i fluksit të rritjes së turistëve dhe i menaxhimit të mirë që bëhet në aeroportin e Tiranës”, tha Karakaçi.

Të gjitha shifrat, shtoi Ministri i Infrastrukturës dhe Energjisë dëshmojnë edhe një herë se tashmë Shqipëria ka hyrë në një fazë të re zhvillimi. “Ne po vazhdojmë rritjen vit pas viti në industrinë e aviacionit civil. Dhe kjo vjen shumë qartë për shkak të politikave të Qeverisë Shqiptare në aviacionin civil që kanë bërë të mundur edhe diversifikimin e operatorëve dhe linjave të trafikut ajror, duke krijuar kështu edhe mundësi më të mira për turizmin, por edhe mundësi për ndërlidhje më të mira ekonomike ndërmjet shteteve, pasi linjat ajrore intensifikojnë marrëdhëniet mes shteteve”, nënvizoi Krakaçi.

Një element i rëndësishëm është edhe rritja e numrit të desitacioneve të cilat kanë sjellë në Shqipëri turistë dhe vizitorë nga shumë vende të botës të cilët tashmë kanë mundësi ta aksesojnë vendin tonë përmes linjave direkte të fluturimeve.

Deputeti i Partisë Demokratike, Klevis Balliu, ka hedhur akuza të forta ndaj qeverisë lidhur me projektin e industrisë ushtarake dhe partneritetin mes shoqërisë publike KAYO dhe kompanisë private Timak Defence. Në një deklaratë publike, Balliu pretendon se automjetet e prezantuara nga kryeministri Edi Rama si pjesë e prodhimit “Made in Albania” nuk përfaqësojnë një industri të mirëfilltë ushtarake shqiptare.

Sipas deputetit demokrat, bilancet e kompanisë Timak Defence ngrenë pikëpyetje mbi kapacitetet reale të saj prodhuese.

Balliu deklaron se kompania është krijuar më 4 gusht 2025 dhe se në fund të dhjetorit kishte 14 punonjës, ndërsa fondi total i pagave për pesë muaj ishte 5.8 milionë lekë. Ai pretendon gjithashtu se aktivet afatgjata të kompanisë, ku përfshihen makineritë dhe pajisjet, kapnin vetëm rreth 146 mijë lekë, ose afërsisht 1,500 euro.

 

 

“Me 1,500 euro nuk ndërtohet një fabrikë automjetesh ushtarake. Me 1,500 euro nuk prodhohen automjete të blinduara”, deklaroi Balliu, duke e përdorur këtë shifër si argument për të vënë në dyshim kapacitetet prodhuese të kompanisë.

Deputeti i PD-së pretendon se, ndërkohë që aktivet afatgjata të kompanisë janë shumë të ulëta, ajo rezulton të ketë mbi 10.5 milionë euro aktive afatshkurtra, të cilat sipas tij lidhen kryesisht me parapagime të marra përmes kontratave me shtetin.

Balliu e cilësoi këtë situatë si një tregues të një modeli që, sipas tij, nuk përfaqëson industrializim të mirëfilltë, por një mekanizëm që favorizon një kompani të caktuar.

Ai ngriti gjithashtu pikëpyetje mbi mënyrën se si automjete të markave ndërkombëtare, përfshirë Toyota Land Cruiser dhe MAN, prezantohen si pjesë e prodhimit shqiptar.

Sipas tij, qeveria duhet të sqarojë se cila është vlera e shtuar që krijohet realisht në Shqipëri përmes punës, kapitalit dhe teknologjisë. Në deklaratën e tij, Balliu kërkoi publikimin e të gjitha kontratave të lidhura mes KAYO, Timak Defence dhe institucioneve shtetërore.

Ai kërkoi gjithashtu transparencë mbi mënyrën e përzgjedhjes së kompanisë, vlerën e kontratave dhe burimin e financimit.

Deputeti demokrat i bëri thirrje SPAK-ut që të hetojë mënyrën e dhënies së kontratave, përdorimin e shoqërisë publike KAYO dhe nëse ka pasur shkelje të ligjit apo eliminim të konkurrencës.

“Ky nuk është industrializim. Ky është industrializimi i korrupsionit”, deklaroi Balliu.

Akuzat e deputetit të PD-së përbëjnë pretendime politike dhe ekonomike, ndërsa për verifikimin e tyre nevojitet shqyrtimi i dokumenteve zyrtare, kontratave dhe bilanceve të kompanive përkatëse. Deri në këtë fazë, deklarata e Balliut nuk përbën në vetvete provë përfundimtare se ka pasur shkelje ligjore apo korrupsion.

Balliu e mbylli deklaratën duke kërkuar që çështja të hetohet dhe që qytetarët të kenë transparencë të plotë mbi përdorimin e fondeve publike në projektet e industrisë së mbrojtjes.

Deklarata e deputetit të PD, Klevis Balliu:

Prej kohësh, Edi Rama po përpiqet t’u shesë shqiptarëve mashtrimin e radhës, duke e paraqitur si ‘industri ushtarake shqiptare’ atë që në fakt duket si një tjetër aferë e ndërtuar me paratë e taksapaguesve.

Me propagandë të përditshme, kryeministri promovon 40 automjete ushtarake si ‘Made in Albania’, duke pretenduar se Shqipëria ka hyrë në industrinë e prodhimit të mjeteve ushtarake përmes partneritetit mes shoqërisë publike KAYO dhe kompanisë private Timak Defence të Rony Yefet.

Por propaganda e Edi Ramës përplaset me faktet.

Kur qytetarët ngritën pyetjen e thjeshtë se si automjete të markave Toyota, Land Cruiser apo MAN mund të quhen prodhim shqiptar, kryeministri nuk dha asnjë shpjegim ekonomik. Ai zgjodhi propagandën dhe sulmin ndaj kritikëve.

Por në ekonomi propaganda nuk ka vlerë. Vlerë kanë vetëm faktet.

Nëse një vend prodhon, kjo provohet nga vlera e shtuar që krijohet përmes punës, kapitalit dhe teknologjisë.

Le të shohim faktet.

Sipas bilancit zyrtar, Timak Defence është krijuar më 4 gusht 2025. Në fund të muajit dhjetor kompania kishte vetëm 14 punonjës dhe një fond total pagash prej 5.8 milionë lekësh, ose rreth 61 mijë euro për pesë muaj.

Kjo do të thotë se fondi mesatar i pagave është vetëm 12 mijë euro në muaj, ndërsa paga mesatare bruto për punonjës është rreth 860 euro.

Pra, sipas vetë bilancit të kompanisë, e gjithë vlera e shtuar nga puna në Shqipëri është vetëm 12 mijë euro në muaj, ose rreth 150 mijë euro në vit.

Këto nuk janë shifra të një industrie ushtarake. Janë shifra të një biznesi të vogël.

Po aq domethënës është edhe kapitali prodhues.

Bilanci zyrtar tregon se aktivet afatgjata të kompanisë, pra makineritë, pajisjet dhe linjat e prodhimit, janë vetëm 146 mijë lekë, ose rreth 1 500 euro.

Po, vetëm 1 500 euro aktive prodhuese.

Me 1 500 euro nuk ndërtohet një fabrikë automjetesh ushtarake. Me 1 500 euro nuk prodhohen automjete të blinduara. Me 1 500 euro nuk krijohet një industri që Edi Rama e shet si krenari kombëtare.

Ndërkohë, kompania rezulton të ketë mbi 10.5 milionë euro aktive afatshkurtra, të krijuara kryesisht nga parapagimet e marra përmes kontratave me shtetin shqiptar.

Pra, investimi real në kapacitete prodhuese është pothuajse zero, ndërsa milionat e taksave të shqiptarëve kanë hyrë në llogaritë e kompanisë.

Kjo është arsyeja pse Partia Demokratike ngre dyshime serioze se nuk kemi të bëjmë me një histori suksesi industrial, por me një skemë të ndërtuar për të eliminuar konkurrencën dhe për të garantuar fitime të privilegjuara me paratë e qytetarëve.

Në vend që ushtria shqiptare të furnizohet përmes tenderëve të hapur ndërkombëtarë, ku kompanitë konkurrojnë për çmimin dhe cilësinë më të mirë, qeveria ka krijuar një mekanizëm ku një kompani e favorizuar shfaqet si ‘prodhues’, ndërkohë që bilancet e saj nuk pasqyrojnë as kapacitetet minimale të një industrie prodhuese.

Ky nuk është industrializim. Ky është industrializimi i korrupsionit.

Edi Rama nuk po ndërton industri shqiptare. Ai po ndërton monopole me paratë e shqiptarëve dhe më pas i shet ato si histori suksesi.

Sa herë që një qeveri zëvendëson konkurrencën me privilegjin, tregun me klientelizmin dhe prodhimin me propagandën, humbësi është qytetari shqiptar.

Partia Demokratike kërkon publikimin e menjëhershëm të të gjitha kontratave të lidhura mes KAYO, Timak Defence dhe institucioneve shtetërore, si dhe transparencë të plotë mbi mënyrën e përzgjedhjes së kësaj kompanie, vlerën e kontratave dhe burimin e financimit.

Ne i bëjmë thirrje SPAK-ut të hetojë këtë skemë deri në fund, të verifikojë mënyrën e dhënies së kontratave, eliminimin e konkurrencës, përdorimin e shoqërisë publike KAYO dhe çdo element që mund të përbëjë shkelje të ligjit.

Shqiptarët nuk kanë nevojë për spektakle propagandistike dhe gënjeshtra të ricikluara.

Ata kanë nevojë për një qeveri që ndërton industri të vërtetë, jo fasada; që krijon vende pune, jo monopole; që respekton taksat e qytetarëve, jo i përdor ato për të ushqyer klientët e pushtetit.

Bilancet nuk gënjejnë. Shifrat nuk gënjejnë. Ato tregojnë se pas propagandës së Edi Ramës fshihet një tjetër aferë që meriton hetim të plotë dhe përgjegjësi politike e ligjore.

Dy kompani shtetërore, “Ujesjellës dhe kanalizime Tiranë” dhe prodhuesi i kartave të identitetit “Identitek”, që si qëllim parësor kanë ofrimin e shërbimeve ndaj publikut, janë kthyer në fakt në makineri të mëdha fitimi për shtetin dhe nuk i kanalizojnë këto fitime në ulje të tarifave për konsumatorët.

Sipas të dhënave të publikuara në raportet vjetore, Ujësjellës-Kanalizime  i Tiranës raportoi të ardhura prej 4.5 miliardë lekësh në vitin 2025, me rritje të letë prej 2.7%. Fitimi para taksave u rrit ndjeshëm me gati 30%, në 1.5 miliardë lekë (rreth 16 milionë euro).

Edhe kompania shtetërore e prodhimit të kartave të identitetit dhe pasaportave, “Identitek”, e cila ka vijuar aktivitetin e koncesionarit “Aleat”, ka raportuar të ardhura prej 3.5 miliardë lekësh në 2025-n, me rënie vjetore prej 3.8%. Edhe në këtë rast, 2025-a ka qenë pozitiv për fitimet që kanë arritur në gati 1.8 miliardë lekë (rreth 19 milionë euro), me rritje 10% nga viti i mëparshëm.

Të dy operatorët shtetërorë kanë fituar së bashku rreth 3.3 miliardë lekë, ose gati 35 milionë euro në 2025-n.

Normat e fitimit të tyre luhaten në 30-50%, shumë më të larta sesa mesatarja e tregut, që luhatet në rreth 9-10%, sipas INSTAT.

Në praktikën ndërkombëtare, kompanitë që ofrojnë shërbime publike në kushte monopoli zakonisht rregullohen me parimin që tarifat të mbulojnë kostot e shërbimit, investimet e nevojshme dhe një kthim të arsyeshëm, por jo të prodhojnë norma të larta fitimi të shkëputura nga cilësia e shërbimit.

Në sektorin e ujit psh, OECD e vendos theksin te balanca mes rikuperimit të kostove, qëndrueshmërisë financiare dhe përballueshmërisë së tarifave për konsumatorët

Ujësjellësi i Tiranës, normë fitimi 33%, por nuk ka ujë 24 orë në ditë

Ujësjellës-kanalizime i Tiranës raportoi një normë fitimi prej 33% në 2025-n, ndërsa në vlerë fitimi arriti rekord, që nga 2018-a. Niveli më i lartë i fitimeve para taksave deri tani ishte në 2023-n, në gati 1.3 miliardë lekë.

Në vitin 2018, çmimi i ujit në Tiranë u rrit mesatarisht me 44%. Nga ai vit, që përkon dhe me kohën, kur filloi të operaonte si e vetme, pas ndarjes me Kamzën dhe Vorën, Ujësjellësi Tiranë raporton fitime prej 10-12 milionë euro në vit (përveç 2020-s).

Në atë kohë, rritja e çmimit  u argumentua atëherë me nevojën për të përmirësuar gjendjen financiare të UKT-së dhe për të financuar investime që synonin furnizimin e Tiranës me ujë 24 orë në ditë brenda pesë viteve.

Të dhënat zyrtare të Entit Rregullator të Ujit tregojnë se objektivi nuk u realizua. Në vitin 2024, Ujësjellës-Kanalizime Tiranë raportonte mesatarisht vetëm 17 orë furnizim me ujë në ditë, një nivel i pandryshuar nga 2022 dhe 2023, por shumë zona kanë ujë vetëm disa orë në ditë.

Fitimi kumulativ para taksave i ujësjellësit nga 2018-a arrin në rreth 9.1 miliardë lekë në 2018-2025.

Qytetarët ndërkohë detyrohen të blejnë ujin e pijshëm për shkak të cilësisë së dobët të ujit të rubinetit.

“Identitek” fiton gjysmën e shpenzimeve të publikut për karta identiteti

“Identitek2 kishte një kthim edhe më të lartë prej 51%, që do të thotë që për çdo 100 lekë që arkëtohen nga ata që duan të marrin një pashaportë apo kartë identiteti, 51 lekë janë fitime të kompanisë.

“Identitek” filloi aktivitetin e prodhimit të kartave të identitetit në vitin 2023, pas përfundimit të koncesionit të kompanisë franceze, “Aleat”. “Identitek” ia ka kaluar dhe koncesionarit, që në vitin e tij më të mirë, në 2021-n, kishte një normë fitimi prej 40%, teksa arriti të ardhura prej 5.5 miliardë lekësh.

Shtetasit shqiptarë kanë ndërkohë kostot më të larta në rajon për marrjen e pasaportave dhe kartave të identitetit. Në Shqipëri për të marrë një pasaportë biometrike duhen paguar 7500 lekë, ose rreth 75 euro.

Me afat të përshpejtuar, për 2-3 ditë, tarifa rritet në 18 mijë lekë (rreth 180 euro).

Mesatarja europiane luhatet në rreth 70–80 euro, pra dukshëm më e lartë se vendet e Ballkanit Perëndimor, ku çmimet janë mes 30–40 euro, përveç Shqipërisë që është shumë më pranë mesatares së BE-së./Monitor

Denis Bajri alias Brajovic akuzon kundërshtarin e tij të përbetuar të shumëkërkuarin Ibrahim Lici, se urdhëroi sulmin ndaj tij brenda qelisë së burgut të Fierit. Gjatë dëshmisë së dhënë para hetuesve Bajri, të cilin tentuan ta vrisnin me thikë artizanale brenda burgut, ka pretenduar se Jurgen Zotaj e sulmoi me porosi të Licit.

“Aldo Gjini kërkoi të më takonte. Ai erdhi ne qelinë time bashkë me Jurgen Zoton. Ky i fundit më dha një telefon. Në linjë ishte Ibrahim Lici. Ai më tha jeta jote kaq e pat!. Në atë moment Zoto tentoi të më sulmonte me thikë”, deklaroi ndër të tjera Denis Bajri.

Gjatë përleshjes, Bajri dhe Zoto mbetën të plagosur dhe u trasportuan për ndihmë mjekësore. Pas ngjarjes, Komisioni i Disiplinës në Drejtorinë e Përgjithshme të Burgjeve vendosi të përjashtojë 8 efektive të policisë dhe t’i referojë në prokurori për shpërdorim detyre. Shërbimi për çështjet e Brendshme dhe Ankesat në Burgje është duke hetuar për të nxjerrë përgjegjësinë e punonjësve të policisë, të cilët kanë lejuar lëvizjet e të dënuarve dhe të paraburgosurve nga njëra godinë në tjetrën, si dhe faktin se ata kishin telefon, send rreptësishtë i ndaluar në qeli.

Komisioni i disiplinës urdhëroi masën e izolimit për 3 muaj për Gjinin e Zotaj. Aldo Gjini u transferua në Drenovë, ndërsa Zoto në burgun e Burrelit.

Ministria e Mbrojtjes njofton se gjatë 24 orëve të fundit janë raportuar 27 vatra zjarri në të gjithë vendin. Pesë prej tyre vijojnë të jenë aktive, ndërsa dy të tjera po mbahen nën monitorim.Për përballimin e situatës janë angazhuar 42 automjete zjarrfikëse dhe 371 forca operacionale. Në mbështetje të operacioneve janë vënë edhe 153 efektivë të Forcave të Armatosura, 6 automjete zjarrfikëse, një autoambulancë e FA-së, 4 helikopterë dhe një avion “Air Tractor” i Forcës Ajrore.

Kavajë dhe Tirane

Në Cikallesh, në bashkinë Kavajë, ekipet vijojnë punën për eliminimin e vatrave të mbetura. Situata nuk paraqitet problematike dhe nuk ka rrezik për zonat e banuara.

 

 

Në Dajt dhe Priskë të Madhe, situata vijon të monitorohet dhe deri tani nuk raportohet rrezik për banesat.

Mallakastër

Në zonën Panahor–Ndrenie–Vlosh, zjarri është nën kontroll. Edhe në Koilaç–Greshicë/Hekal situata është stabilizuar dhe nuk paraqitet rrezik për zonat e banuara.

Krujë

Në Abaze, zjarri është reduktuar në vatra të vogla dhe nuk paraqet rrezik për komunitetin.

Në Krastë, për shkak të terrenit të vështirë, ndërhyrja po mbështetet nga ajri me një helikopter të Forcës Ajrore. Pranë vatrës nuk ka banesa dhe nuk raportohet rrezik i drejtpërdrejtë për komunitetin.

Kurbin

Në Vilëz, zjarri vijon të jetë aktiv. Ndërhyrja e dy helikopterëve të Forcave të Armatosura gjatë ditës së djeshme ka frenuar përhapjen e flakëve dhe ka shmangur rrezikun për kishën, varrezat dhe banesat.

Ndërkohë, gjatë 24 orëve të fundit janë shuar plotësisht edhe disa vatra të tjera, përfshirë ato në Xhaferaj–Oblikë, Spatharë dhe Kodrën e Butë në Cërrik.

AKMC dhe strukturat e sistemit të mbrojtjes civile vijojnë monitorimin dhe koordinimin e operacioneve në terren, me prioritet mbrojtjen e jetës së qytetarëve, banesave dhe zonave të banuara.

Një prej stuhive më të fuqishme të sezonit ka goditur Kinën lindore, duke detyruar autoritetet të evakuojnë më shumë se një milion njerëz dhe të ndërpresin një pjesë të madhe të transportit në rajon. Tajfuni “Dolphin” ka sjellë erëra të forta, reshje intensive dhe përmbytje, ndërsa autoritetet paralajmërojnë për rrezik të shtuar gjatë ditëve në vijim.

Sipas autoriteteve meteorologjike kineze, tajfuni arriti në tokë për herë të parë në Yuhuan, në provincën Zhejiang, me erëra që arrinin shpejtësinë 150 km/orë. Rreth një orë më vonë, stuhia goditi për herë të dytë pranë qytetit të Wenzhou.

Tajfuni ka shkaktuar ndërprerje të rëndësishme të transportit në të gjithë rajonin. Vetëm në Shangai janë anuluar rreth 1,400 fluturime, ndërsa shërbime të tjera transporti janë pezulluar për shkak të kushteve të rrezikshme atmosferike.

 

 

Autoritetet kineze kishin shpallur më herët alarmin e kuq, nivelin më të lartë të paralajmërimit për mot të rrezikshëm, por të hënën në mëngjes e ulën nivelin e alarmit pasi stuhia filloi të dobësohej.

Megjithatë, rreziku mbetet i lartë.

Reshje të dendura dhe rrezik për përmbytje

Tajfuni “Dolphin” po lëviz drejt brendësisë së Kinës, ndërsa meteorologët paralajmërojnë për reshje të rrëmbyeshme, përmbytje të mëdha dhe rrëshqitje dheu deri të mërkurën.

Reshje të dendura janë parashikuar në provincat Shandong, Henan, Hubei, Anhui, Jiangsu dhe Zhejiang, si dhe në qytetin e Shangait.

Në disa zona të Zhejiang, parashikohet që sasia e reshjeve të arrijë nga 250 deri në 500 milimetra gjatë ditëve të ardhshme.

Pamjet e publikuara nga mediat shtetërore kineze tregojnë rrugë të përmbytura në Shangai, ndërsa disa biznese në katet përdhese janë mbuluar nga uji. Banorët janë parë duke lëvizur nëpër ujëra që arrijnë deri në kyçet e këmbëve.

Qindra mijëra të zhvendosur

Në Wenzhou, autoritetet kanë zhvendosur rreth 900,000 banorë dhe kanë hapur më shumë se 1,000 strehimore emergjente.

Në Taizhou, rreth 390,000 persona janë evakuuar nga banesat e tyre.

Në Hangzhou, kryeqytetin e provincës Zhejiang, autoritetet kanë hequr tarifat e parkimit në hapësirat publike për shoferët që kërkojnë strehim për shkak të erërave të forta dhe përmbytjeve.

Ndërkohë, qeveritë lokale u kanë bërë thirrje qytetarëve të shmangin aktivitetet në natyrë.

Disa prej atraksioneve më të njohura turistike janë mbyllur përkohësisht, përfshirë pjesë të Disneyland dhe Legoland, si dhe disa platforma panoramike përgjatë zonës së Bund në Shangai.

Një tajfun me jetëgjatësi të pazakontë

Sipas transmetuesit shtetëror kinez CCTV, stuhia ka përshkuar një distancë prej rreth 6,000 kilometrash përpara se të arrinte në tokë.

Kjo sugjeron një jetëgjatësi më shumë se tre herë më të madhe se ajo e një tajfuni mesatar.

CCTV raportoi gjithashtu se “Dolphin” ka një qarkullim masiv dhe kapacitet të lartë për prodhimin e reshjeve, faktorë që mund të rrisin ndjeshëm rrezikun e përmbytjeve në ditët e ardhshme.

Autoritetet kineze mbeten në gatishmëri ndërsa tajfuni vazhdon të zhvendoset drejt brendësisë së vendit.

Ministria e Mbrojtjes ka publikuar përditësimin e fundit mbi situatën e zjarreve në vend, ku aktualisht janë angazhuar të paktën 227 forca operacionale dhe 16 mjete zjarrfikëse e mbështetëse.

Në operacione janë përfshirë edhe mjete ajrore, me tre helikopterë dhe një avion Air Tractor.

Në qarkun e Tiranës, disa vatra janë rishfaqur gjatë mesditës në zonën e Dajtit, pranë fabrikës së ujit Selita. Forcat në terren vijojnë ndërhyrjen dhe monitorimin, ndërsa sipas Ministrisë së Mbrojtjes nuk ka rrezik për zonat e banuara.

Në Cikallesh të Kavajës, intensiteti i zjarrit ka rënë ndjeshëm dhe vatra po shkon drejt shuarjes së plotë, pas ndërhyrjes së strukturave zjarrfikëse dhe mbështetjes nga ajri. Ndërkohë, në Priskë të Madhe vijojnë operacionet për vënien nën kontroll të disa vatrave të vogla.

Në qarkun e Fierit, në aksin Panahor–Ndrenie–Vlosht në Mallakastër, zjarri është nën kontroll dhe nuk paraqet rrezik për zonat e banuara. Edhe vatra në zonën Koilac–Greshicë raportohet nën kontroll.

Në Abazë të Krujës, situata është stabilizuar. Në terren kanë mbetur vetëm disa vatra të vogla, kryesisht në zona me terren të vështirë. Operacioni po vijon me pjesëmarrjen e strukturave të Emergjencave Civile, Bashkisë Krujë, MZSH-së, shërbimit pyjor dhe Prefekturës së Qarkut Durrës. Edhe këtu nuk raportohet rrezik për banesat.

Vëmendje e veçantë i është kushtuar situatës në Vilëz të Kurbinit, ku zjarri u riaktivizua në një sipërfaqe pyjore dhe, për shkak të terrenit të vështirë dhe erës, rrezikonte kishën, varrezat dhe disa banesa.

Rreth 50 forca nga MZSH-ja, Emergjencat Civile, Policia, strukturat vendore, shërbimi pyjor dhe vullnetarë janë angazhuar në operacion. Ndërhyrja nga ajri me dy helikopterë ka frenuar përparimin e flakëve dhe ka shmangur prekjen e kishës, varrezave dhe banesave përreth.

Megjithatë, vatra në Vilëz vijon të jetë aktive dhe po mbahet nën ndërhyrje.

Ministria e Mbrojtjes bën me dije se strukturat e sistemit të Mbrojtjes Civile po vijojnë pa ndërprerje operacionet tokësore dhe ajrore, me synim izolimin, vënien nën kontroll dhe shuarjen përfundimtare të të gjitha vatrave aktive.

I dënuar me burgim të përjetshëm, Ardian Çapja ka kërkuar leje për të dalë nga burgu dhe për të marrë pjesë në ceremoninë e varrimit të nënës së tij.

Emri i tij është i njohur për autoritetet shqiptare, ndërsa një prej atentateve më të bujshme ndaj tij ndodhi në vitin 2020, kur u qëllua me snajper pranë banesës së tij në Elbasan.

Atentati ndodhi në mëngjesin e 8 qershorit, teksa Çapja ndodhej në banesën e tij. Ai u qëllua me një plumb në shpatull nga një distancë e largët. Sipas burimeve të kohës, sulmi ishte kryer me snajper.

Plumbi e plagosi rëndë Çapjan dhe i kaloi pranë zemrës. Pas atentatit, ai u transportua fillimisht në spitalin e Elbasanit dhe më pas u dërgua me urgjencë në Spitalin e Traumës në Tiranë, ku iu nënshtrua një operacioni.

Pas disa orësh ndërhyrjeje, Çapja doli jashtë rrezikut për jetën.

Sipas të dhënave të bëra publike në atë kohë, atentatori e kishte mbajtur Çapjan nën vëzhgim dhe kishte zgjedhur një pozicion të përshtatshëm për të qëlluar.

Burimet e kohës dyshonin se snajperisti dhe persona të tjerë të përfshirë në atentat ishin pozicionuar në një servis pranë banesës së Çapjas. Distanca në vijë ajrore mendohej të ishte rreth 150 metra. Pas të shtënave, autorët u larguan nga zona, ndërsa policia nisi menjëherë hetimet për identifikimin e tyre dhe zbardhjen e motivit të atentatit.

Mbas incidentit me dy të dëmtuar në burgun e Fierit, Drejtoria e Përgjithshme e Burgjeve ka hequr nga ky burg dy të dënuar.

Siç i treguan burime shumë të sigurta gazetares Anila Hoxhës, njëri prej tyre, Aldo Gjini, është transferuar në burgun e sigurisë së lartë në Burrel, kurse Jurgen Zotaj është dërguar nga spitali i Fierit në Qendrën Spitalore të Burgjeve në Tiranë. Në burgun e Fierit është mbajtur vetëm Denis Brajovic ose Bajri.

Sakaq, Policia e Fierit, së bashku me Prokurorinë lokale, po kryejnë hetime për të faktuar shkaqet e përleshjes mes dy të burgosurve, që u mbyll me plagosjen e Brajovic dhe Zotaj. Janë marrë në pyetje 6 policë të burgjeve që ishin në detyrë, nga të cilët pritet që katër të pezullohen gjatë javës së vjen, si të dyshuar se neglizhuan rregullat e sigurisë.

Në kamera duket Jurgen Zotaj dhe Aldo Gjini që lëvizin nga njëri sektor në sektorin e Brajovic, mbasi këtij të fundit i ishte komunikuar nëse i priste apo jo për kafe. Tre të burgosurit takohen me njëri-tjetrin duke u përqafuar dhe zhvendosen në një ambient tjetër ku nuk ka kamera.

Por për pak minuta, nga dëshmia e marrë, Brajovic thuhet se ai u sulmua me një send të improvizuar si armë e ftohtë. I burgosuri i thotë policisë që po heton se ia rrëmbeu armën Jurgenit dhe me të iu kundërpërgjigj. Sipas tij, ai nuk la asnjë konflikt dhe e kishte pranuar vizitën për kafe në sektor, mbasi njihte dhe kishte shok, pra garant, Aldo Gjinin.

I thashë policit, deklaroi Brajovic: “Le të vijnë sa të laj sytë” dhe më pas, për arsye që nuk i shpjegon dot, pas takimit me shokët u sulmua.

Hetimet po vazhdojnë ende për të zbuluar nëse është incident banal apo i porositur.

Një trung peme rreth 8 metra i gjatë është gjetur brenda kolektorit kryesor të ujërave të zeza në Bulevardin e Kasharit. Kryeministri Edi Rama ka ndarë pamjet e nxjerrjes së trungut, duke shkruar se ishte shkaku kryesor i problemeve me kanalizimet në zonë.
Rama shkruan se prej më shumë se 10 vitesh, sa herë kishte reshje, ujërat e zeza dilnin në bulevard dhe përhapeshin në lagjet përreth. Pavarësisht ndërhyrjeve të kryera ndër vite, shkaku nuk ishte zbuluar.

Kryeministri thotë se vetëm pas kontrollit të kolektorit me kamera të posaçme nëntokësore u konstatua trungu i pemës, i shtrirë brenda tubacionit dhe që pengonte kalimin e ujërave.
Sipas Ramës, kolektori ishte ndërtuar nga ish-Komuna e Kasharit, përpara reformës territoriale. Ai e solli rastin edhe si argument për nevojën e reformës, duke thënë se probleme të tilla janë pasojë e mënyrës se si menaxhoheshin më parë njësitë vendore. Trungu tashmë është nxjerrë dhe kolektori është zhbllokuar.

Postimi

“NJË PEMË 8 METROSHE U ZBULUA E “VARROSUR” NË KOLEKTORIN E UJËRAVE TË ZEZA

Për më shumë se një dekadë, sa herë binte një shi sado i shkurtër, ujërat e zeza merrnin mbarë bulevardin e Kasharit dhe shpërthenin nëpër lagje. Preventiva, ndërhyrje, rindërhyrje të pasuksesshme derisa dje u zbulua shkaku i vërtetë dhe i pabesueshëm i bereqetit të zi që sillte shiu sa herë binte mbi Kashar, ku përpara Reformës së Parë Territoriale, Komuna e Kasharit, një bastion krenar i demokratëve, ndërtoi kolektorin kryesor të ujërave të zeza në Bulevardin e Kasharit.

Kamerat speciale nëntokësore hynë brenda në kolektor dhe gjetën aty atë që zor se mund ta kapte edhe fantazia më e shfrenuar: Një trung peme 8 metrosh i shtrirë brenda tubit kryesor të ujërave të zeza

Pra gjatë punimeve, një çinar i madh, 8 metra i gjatë që gjendej atypari, u pre dhe, në vend që të largohej nga kantieri, u “varros” brenda kolektorit!

Se çfare u tha mendja atyre që e urdhëruan dhe e zbatuan këtë veprim kriminal vetëm Zoti e di, por kjo është edhe një kujtesë shumë konkrete për të gjithë ata që kanë harruar pse Shqipërisë i duhej Reforma Territoriale.

Sot pema është nxjerrë. Kolektori është çliruar. Dhe banorët e Kasharit nuk do ta kenë më taksiratin e faturës së një poshtërsie kriminale si ajo që i torturoi për më shumë se dhjetë vjet.

Shqipëria e re nuk është vetëm Europa e Ballkanit që po ndërtojmë, po edhe ajo që zbulon, pastron dhe korrigjon deformimet e mbetura ende në rrugën tonë nga Gropa e Zezë e Ballkanit që ky vend ishte kur ne morëm detyrën”, shkruan Rama.

Zbardhen detaje të reja nga hetimet për vrasjen e 20-vjeçarit Johan Zuko në Korçë. Autori Kristjan Sterjo, i cili u kap pas rreth 6 orësh arrati, ka dhënë dëshminë e tij përpara grupit hetimor lidhur me motivin e ngjarjes së rëndë. Sipas dëshmisë së tij, konflikti mes dy të rinjve lidhej me disa episode të mëparshme, ndërsa një nga shkaqet që dyshohet se ka çuar në përshkallëzimin e situatës ka qenë ngacmimi i të dashurës së autorit të dyshuar.

Por, krahas këtij konflikti, hetuesit po marrin në konsideratë edhe përplasjet e mëparshme mes dy të rinjve, të cilët dyshohet se kishin pasur debate për shkak të pretendimeve se kush ishte “më i forti” i lagjes. Sipas të dhënave të deritanishme nga hetimi, autori i dyshuar dhe viktima ishin konfliktuar verbalisht disa ditë përpara ngjarjes. Dyshohet se të dy palët kishin pasur përplasje dhe ngacmime ndaj njëri-tjetrit, duke bërë që marrëdhënia mes tyre të përshkallëzohej.

Konflikti, i cili dyshohet se kishte nisur për motive të dobëta, duke filluar nga pretendimet se kush konsiderohej “i forti” i lagjes, më pas është shoqëruar me ngacmime, sharje dhe përplasje të vazhdueshme mes dy të rinjve. Përplasja përfundoi tragjikisht me vrasjen e 20-vjeçarit Johan Zuko, ndërsa Kristjan Sterjo u largua nga vendi i ngjarjes dhe u arrestua rreth 6 orë më vonë nga forcat e policisë në afërsi të banesës së tij. Sterjo fshihej në një zonë në afërsi të varrezave të qytetit, por është larguar prej aty për tu afruar drejt banesës. Ka qenë ky moment që policia e ka pikasur dhe është ndërhyrë menjëherë për kapjen e tij. Grupi hetimor vijon punën për të zbardhur të plotë dinamikën e ngjarjes, ndërsa dëshmia e autorit të dyshuar dhe provat e mbledhura pritet të ndihmojnë në përaktimin e rrethanave dhe motivit të saktë që çoi në krimin e rëndë.

Situata e krijuar nga zjarri në territorin e Bashkisë Krujë ka përshkallëzuar, duke detyruar autoritetet të urdhërojnë evakuimin e menjëhershëm të banorëve të zonës Barabit–Lluban. Vendimi është marrë në zbatim të Ligjit nr. 45/2019 “Për Mbrojtjen Civile”, Planit Kombëtar dhe Planeve Vendore të Emergjencave Civile, për shkak të rrezikut të paraqitur nga përhapja e flakëve.

Procesi i evakuimit po zhvillohet në koordinim me Agjencinë Kombëtare të Mbrojtjes Civile, Prefektin e Qarkut Durrës dhe strukturat e Emergjencave Civile të Bashkisë Krujë.

Për largimin e banorëve nga zona e rrezikuar do të angazhohen mjetet dhe strukturat e Bashkisë Krujë, MZSH-së, Policisë së Shtetit dhe Forcave të Armatosura. Prioritet gjatë evakuimit kanë fëmijët, të moshuarit, personat me aftësi të kufizuara dhe familjet që ndodhen në zona të izoluara.Bashkia Krujë ka bërë të ditur se do të garantojë strehimin e përkohshëm të qytetarëve të evakuuar, regjistrimin e tyre, sigurimin e nevojave bazë dhe asistencën shëndetësore. Autoritetet u kanë bërë thirrje banorëve të Barabit–Llubanit të ndjekin me përparësi udhëzimet e strukturave në terren dhe të bashkëpunojnë gjatë procesit të evakuimit, për të garantuar sigurinë e tyre. Sakaq, raportohet për shpërthime armatimesh.

Zbulohet emri i autorit të dyshuar për vrasjen e 20-vjeçarit Johan Zuko, ngjarje e rëndë e ndodhur sot në lagjen nr. 14 në Korçë. Bëhet fjalë për Kristjan Sterjon, i cili dyshohet se qëlloi për vdekje me armë zjarri viktimën.

Sterjo është shpallur në kërkim nga Policia, ndërsa vijojnë kontrollet dhe postblloqet në disa zona për lokalizimin dhe kapjen e tij.

Hetimet vijojnë për zbardhjen e plotë të dinamikës dhe motivit të ngjarjes, ndërsa grupi hetimor po administron edhe pamjet e kamerave të sigurisë në zonën ku ndodhi krimi.

Që kur shpërtheu konflikti mes dy aksionerëve në Aeroportin e Vlorës, qytetarët shqiptarë janë bombarduar me shifra pompoze mbi investimin në këtë projekt. Por cila është e vërteta sipas dokumentave zyrtare.

Të dhënat nga bilanci zyrtar tregojnë se deri në fund të vitit të kaluar, totali i aktiveve i shoqërisë koncesionare VIA arriti 8.8 miliardë lekë ose 94 milionë euro me kursin aktual.

Kjo shifër përfaqëson shumën maksimale të investuar deri në dhjetor 2025 në Aeroportin e Vlorës. Por shifra reale është më e ulët, pasi brenda kësaj shume gjenden edhe 1 miliardë lekë ose gati 11 milionë euro TVSH që kompania duhet t’i rimbursojë mbrapsht nga shteti.

Por si janë financuar këto investime?

Sipas pasqyrave financiare, 5.9 miliardë lekë janë financuar nga një kredi që VIA ka marrë në BKT.

Rreth 2.6 miliardë lekë të tjera janë punime të kryera nga kompania 2A Group, por të papaguara ende nga VIA.

Ndërsa Behgjet Pacolli ka financuar 535 milionë lekë ose 5.7 milionë euro përmes një huaje që kompania e tij Mabco ka dhënë për VIA-n si ortak. Fillimisht Mabco i dha VIA-s një hua 11 milionë euro, por gjysmën e ka tërhequr mbrapsht. Gjithsesi edhe pjesa e mbetur prej 5.7 milionë euro është gjithmonë hua, që VIA duhet t’ia shlyejë mbrapsht ortakut të saj Mabco.

Kjo është fotografia e investimeve dhe financimit të tyre në Aeroportin e Vlorës. Pra 60 milionë euro kredia e BKT, 27.5 milionë euro 2A Group e Valon Ademit dhe 5.7 milionë euro huaja e Mabcos së Pacollit.

Por secila palë ka mënyrën e vet se si i interpreton këto shifra. Behgjet Pacolli thotë se i gjithë investimi është financuar nga ai. Zoti Pacolli thotë se kredia në BKT është e atij, pasi është marrë duke lënë si garanci pasuritë e Mabcos dhe pasuritë e tij personale.

Borxhi prej 27.5 milionë euro që VIA ka ndaj 2A Group për punime të kryera por të papaguara, po ashtu për Pacollin janë financime të tijat, pasi thotë se këto para do t’i shlyhen kompanisë së Ademit. Ndërsa zoti Ademi këmbëngul se ka 49 për qind të aksioneve sipas kontratës së shitjes dhe se punimet e papaguara reflektojnë edhe këtë fakt.

Por pavarësisht pretendimeve të dy aksionerëve, në finale financimi i aeroportit është bërë nga vetë shoqëria koncesionare.

Në rast se qeveria do të prishë konçesionin, kredia i mbetet shtetit, pra do të paguhet nga taksapaguesit ose nga aksioneri i ri që do të marrë koncesionin. Po ashtu e njëjta gjë vlen edhe çdo detyrim tjetër të shoqërisë konçesionare, përfshirë borxhet për punimet e papaguara të 2A Group dhe huanë 5.7 milionë eurot të Pacollit.

Në fund fare vetë shoqëria është e garantuar po nga paratë e taksapaguesve, pasi buxheti i shtetit ka marrë përsipër të garantojë 136 milionë euro të ardhura për 10 vitet e para të operimit, si garanci trafiku.

E vetmja pikëpyetje mbetet ajo e pronave, që Pacolli ka lënë si kolateral në BKT. Cfarë ndodh me këto prona pas nxjerrjes jashtë konçesionit të dy ortakëve aktualë. Kjo do të varet nga mënyra se si do të zgjidhet ky konflikt. Normalisht marrja e koncesionit nga shteti do të duhet të lirojë pronat e Pacollit nga barra, pasi BKT do të garantohej nga shteti ose aksioneri i ri i konçesionit.

Skenaret se si mund të zgjidhet çështja e konçesionit janë të shumtë. Nga marrëveshje për blerje me book value deri në shpronësim për shkelje të kontratës. Por një gjë është e sigurtë.

Fajin se pse nuk u ndërtua aeroporti nuk e ka as qeveria dhe aq më pak taksapuesit shqiptarë. Fajin e kanë vetë ata që sot kërcënojnë me 700 milionë euro arbitrazh dhe fitime të munguara. Po, qeveria ka një faj të madh. Dhënien e projekteve strategjike tek biznesmenë kontroversë, që dinë të luajnë vetëm sekserash.

Një zjarr me përmasa të frikshme është regjistruar sot në Krujë. Mësohet se një faqe mali në lagjen Abazaj është përfshirë nga flakët, ndërsa situata paraqitet tepër dramatike, pasi zjarri rrezikon t’i afrohet 30 banesave dhe bizneseve.

Ndërkohë, në vendin e ngjarjes ndodhet vetëm një zjarrfikëse, ndërsa situata paraqitet tepër e vështirë në terren.

Sakaq, banorët bëjnë apel për ndihmë, ndërkohë që kërkohet ndërhyrje me helikopter nga ajri.

Detaje të reja dalin në dritë nga shpërthimi me tritol në banesën e një 72-vjeçari në Tufinë. Pas identifikimit të tre vëllezërve Alla si autorë të dyshuar, janë zbardhur edhe detaje mbi motivin që dyshohet se fshihet pas ngjarjes. Ervis Alla, Altin Alla dhe Maksim Alla, të cilët kanë një mobileri në Fushë-Krujë, dyshohet se kishin një konflikt financiar me djalin e 72-vjeçarit, në banesën e të cilit u vendos lënda plasëse.

Sipas të dhënave paraprake, djali i 72-vjeçarit kishte bërë një porosi për disa mobilje në mobilerinë e tre vëllezërve, por nuk kishte kryer pagesën. Prej disa ditësh, vëllezërit Alla dyshohet se e kishin kërkuar dhe kërcënuar për shlyerjen e borxhit, por nuk kishin mundur të merrnin paratë. Në këto kushte, dyshohet se kanë vendosur t’i japin një “mesazh” me tritol, duke e vendosur lëndën plasëse në derën e banesës ku jetonte babai i tij.

Tre vëllezërit dyshohet se kanë udhëtuar me një automjet drejt Tufinës, kanë vendosur lëndën plasëse në derën e banesës dhe më pas janë larguar nga vendngjarja. Shpërthimi ndodhi rreth orës 00:30 dhe shkaktoi vetëm dëme të pakta materiale. Fatmirësisht, nuk pati persona të lënduar.

Tashmë, një nga pistat kryesore të hetimit është gjurmimi i automjetit me të cilin dyshohet se kanë lëvizur autorët. Policia po analizon pamjet e kamerave të sigurisë përgjatë itinerarit, me qëllim dokumentimin e lëvizjeve të tyre dhe sigurimin e provave të tjera. Tre vëllezërit Alla janë shpallur në kërkim dhe akuzohen për veprën penale “Shkatërrimi i pronës me eksploziv”, kryer në bashkëpunim. Policia vijon punën për lokalizimin dhe kapjen e tyre.