Boksieri Granit Shala nuk ka arritur ta mbrojë titullin IBF International kundër kroatit Petar Milas.

Milas që ishte favorit, arriti ta nokautojë boksierin shqiptar në raundin e 10-të.

Shala e nisi mjaftë mirë përballjen, ku mund të themi se edhe fitoi raundet e para, por kroati kishte më shumë energji dhe nisi të sulmojë kur e pa që 29-vjeçari filloi të lodhet.

Në raundin e fundit, Milas me një goditje të fortë më të djathtën arriti ta rrëzojë Shalën, i cili u ngrit pas shtatë sekondave. Pas kësaj, kroati vazhdoi me sulmet e njëpasnjëshme për ta nokautuar përfundimisht shqiptarin.

Kjo garë ishte për titullin IBF që u mbajt në Gjermani, ndërsa Shalës i mbetet të vazhdojë me stërvitje dhe të kthehet edhe më i fortë.

Kujtojmë, Milas është një boksier tepër i njohur pasi ka plot 20 fitore (16 me nokaut) dhe vetëm një humbje, ndërsa Shala tani regjistron humbjen e dytë, kurse ka 18 fitore./Telegrafi/

Boksieri shqiptar Granit Shala po synon të shndërrohet në shpresën e radhës të Gjermanisë në kategorinë e peshave të rënda.

Kur Kabayel rikthehet në ring në Gjermani më 10 janar në “Oberhausen” pas gati tre vitesh mungesë, edhe Shala do të boksojë para rreth 13 mijë shikuesve, në eventin më të madh të boksit në Gjermani që nga fundi i epokës Klitschko.

Ndërsa talente të tjera të peshave të rënda e kanë lënë pa shpjegim këtë mundësi për t’u prezantuar para një audience kaq të madhe, boksieri nga Mynihu, me bilanc 18 fitore dhe një humbje, është i vendosur ta shfrytëzojë maksimalisht shansin e tij. Në “Oberhausen”, ai do të përballet me kroatin e fortë Peter Milas, i cili ka 19 fitore dhe një humbje në karrierë.

“Pa Agitin, një event i tillë nuk do të ishte fare i mundur në Gjermani. Kjo është mundësia perfekte për të treguar aftësitë e mia. Jam shumë mirënjohës për këtë shans dhe do të përpiqem të ndjek të njëjtën rrugë”.

Shala, i renditur aktualisht i 86-ti në botë, është tashmë pjesë e 100 boksierëve më të mirë të peshave të rënda. Një arritje që pak kush do ta kishte parashikuar gjatë fëmijërisë së tij. Ai ka treguar se rruga drejt ringut ka qenë gjithçka tjetër veçse e lehtë.

“Si fëmijë isha shumë mbipeshë, mbi 100 kilogramë që në moshën 9-vjeçare. Për këtë arsye më bullizonin në shkollë. Ishte një periudhë shumë e vështirë nga ana psikologjike”.

Granit Shala

Boksi i dha vetëbesim dhe motivim, por mbipesha i krijoi vështirësi edhe aty. Përvojat e para në gara nuk ishin aspak të lehta për të.

“Kur hyra për herë të parë në Kampionatin Gjerman, njerëzit qeshnin. As brezi nuk më dukej, sepse barku më varej mbi të”.

Megjithatë, pavarësisht paragjykimeve, Shala pati një karrierë të suksesshme amatore me rreth 80 ndeshje, duke u shpallur kampion i Gjermanisë gjashtë herë te të rinjtë dhe nënkampion në kategorinë e të rriturve.

Në vitin 2017, ai kaloi në boksin profesionist. Në atë kohë peshonte mbi 160 kilogramë dhe konsumonte litra çaji të ftohtë dhe kola. Me ndihmën e trajnerit të tij, Agron Kurtishi, Shala ndryshoi rrënjësisht stilin e jetesës, humbi mbi 50 kilogramë dhe nisi ngjitjen e vazhdueshme në renditje.

Në prill të vitit 2024, ai pësoi humbjen e parë në karrierën profesionale, në një duel për titullin prestigjioz evropian EBU ndaj Oleksandr Zakhozhyi. Një moment i vështirë, por vendimtar për pjekurinë e tij si sportist.

“Ishte një periudhë shumë e rëndë. Por më bëri më të fortë. Janë pikërisht këto momente që e formojnë një kampion”.

Pas kësaj humbjeje, Shala u rikthye fuqishëm, duke fituar tre ndeshjet e radhës, mes tyre edhe ndaj të pamposhturit Daniel Dietz. Tashmë, ai synon të vazhdojë ngjitjen në renditje me një fitore ndaj ndoshta kundërshtarit më të fortë të karrierës së tij, duke shpresuar se Oberhauseni do të jetë skena e hapit të radhës drejt majës./Telegrafi

Boksieri britanik Anthony Joshua ka thyer heshtjen për herë të parë pas vdekjes tragjike të dy miqve të tij më të afërt, Sina Ghami dhe Kevin Latif Ayodele, të cilët humbën jetën në një aksident të rëndë automobilistik në Nigeri, në muajin dhjetor.

Joshua ishte gjithashtu i përfshirë në aksident, por për fat të mirë pësoi vetëm lëndime të lehta. Automjeti tip SUV, me të cilin po udhëtonin, u përplas me një kamion të palëvizshëm në autostradën Lagos–Ibadan, në zonën Makun.

Përplasja rezultoi fatale për dy miqtë e tij të hershëm, të cilët ishin pjesë kyçe e ekipit profesional të boksierit. Kevin Latif Ayodele ishte trajneri personal i Anthony Joshuas, ndërsa Sina Ghami shërbente si trajner i forcës dhe përgatitjes fizike – dy figura që kishin luajtur rol vendimtar në karrierën e kampionit britanik.

Në një postim prekës në Instagram, ku ndau një grafikë kushtuar dyshes, Joshua shfaqi ndjenjat pas humbjes së madhe.

“Faleminderit për gjithë dashurinë dhe kujdesin që ua keni treguar vëllezërve të mi. As nuk e kuptova sa të veçantë ishin. Ecja me ta, qeshja dhe bëja shaka, pa e ditur se Zoti më kishte vendosur pranë njerëzve kaq të mëdhenj".

"Është 100% e vështirë për mua, por e di se është edhe më e vështirë për prindërit e tyre. Kam një mendje të fortë dhe besoj se Zoti i njeh zemrat e tyre. Zoti i mëshiroftë vëllezërit e mi”, shkroi boksieri i njohur.

Sipas mediave britanike, Anthony Joshua doli nga spitali në orët e vona të natës së Vitit të Ri dhe menjëherë pas kësaj realizoi një vizitë emocionale në një shtëpi funerale, për t’u shprehur ngushëllimet familjeve të viktimave, përpara se trupat e tyre të riatdhesoheshin. /Telegrafi/

Një foto e Adeniyi Kayode, shoferit 47-vjeçar të Anthony Joshuas, i cili shkaktoi një aksident fatal me makinë që la të vdekur dy persona, është publikuar për herë të parë.

Kayode u akuzua për shkaktimin e një aksidenti trafiku në të cilin mbetën të vdekur dy burra, ndërsa Joshua gjithashtu pësoi lëndime të lehta.

47-vjeçari akuzohet për drejtim mjeti të pakujdesshëm, ku përplasi Lexus-in e tij me një kamion të parkuar në një autostradë në Nigeri. Kayode është paraqitur për herë të parë në një gjykatë në Sagamu, ku akuzohet për drejtim mjeti të rrezikshëm që shkaktoi vdekjen, drejtim mjeti të pakujdesshëm dhe neglizhent, si dhe mungesë leje drejtimi.

Ai përballet gjithashtu me akuza për drejtim mjeti pa kujdes, shkaktim të lëndimeve trupore dhe dëmtim të pronës, dhe përballet me burgim të përjetshëm.

Adeniyi Kayode

Në të njëjtën kohë, shoferi i kamionit, me të cilin u përplas Lexus, është ende në arrati pasi është larguar nga vendi i aksidentit.

Zëdhënësi i policisë, Oluseyi Babaseyi, theksoi se të akuzuarit Kayode iu dha një garanci prej 3,500 dollarësh me dy garantues. Ai u la në paraburgim derisa të përmbushen kushtet e garancisë.

"Klienti im është deklaruar i pafajshëm dhe se ajo që ndodhi ishte një aksident. Nuk kam pasur ende mundësi të flas me të, por e di që ai thotë se frenat dështuan", tha avokati i Kayode, Olalekan Abiodun.

Dalin pamjet e frikshme të aksidentit që pësoi Anthony Joshua

Avokati zbuloi gjithashtu fatin e jashtëzakonshëm të Joshuas në këtë aksident tragjik me makinë. Joshua ishte ulur në ulësen e përparme në fillim të udhëtimit, por më vonë u zhvendos në ulësen e pasme sepse nuk mund të ulej siç duhet.

Trajneri dhe miku i tij që vdiqën në aksident ishin pikërisht të ulur në ulësen e përparme. /Telegrafi/

Boksieri i peshave të rënda Tyson Fury ka njoftuar tifozët se ka vendosur të rikthehet nga pensionimi.

Fury vendosi t’i varë “dorëzat” pas humbjes nga Oleksandr Usyk, por tani duket se ka ndryshuar mendje.

Fury zyrtarisht ka konfirmuar se në vitin 2026 do ta shohim sërish në ring.

“2026 është viti i rikthimit. Kam qenë jashtë për një kohë por jam kthyer tani, 37 vjeç dhe po godasë ende. Nuk ka asgjë më të mirë se t’i godasësh disa burra në fytyrë dhe të paguhesh”, shkroi ai në “Instagram”.

Fury nuk ka zhvilluar asnjë meç që nga humbja e tij e dytë radhazi me pikë ndaj Oleksandr Usyk në Riad në dhjetor të vitit 2024, një duel pas të cilit ai u ankua për atë që e konsideroi një rezultat të padrejtë dhe tre javë më vonë njoftoi tërheqjen nga boksi.

Fury pritej gjerësisht që të rikthehej nga pensionimi dhe më në fund të merrte pjesë në përballjen e shumëpritur dhe shumë fitimprurëse mes dy britanikëve me rivalin e tij të madh, Anthony Joshua, në muajt gusht ose shtator – potencialisht në Londër – si ndeshja kryesore e Riyadh Season, me një meç parapërgatitor që pritej të zhvillohej më herët gjatë vitit në Arabinë Saudite.

Megjithatë, mbetet e paqartë se kush do të jetë kundërshtari i radhës i Fury-t, teksa Usyk ndodhet aktualisht në negociata për një përballje të madhe me ish-kampionin e gjatë të WBC-së, Deontay Wilder./Telegrafi

Është zbuluar një arsye tronditëse pse miku i Anthony Joshuas po udhëtonte me të në Nigeri, sipas xhaxhait të tij.

Të hënën, kampioni dy herë botëror i peshave të rënda ishte përfshirë në një aksident automobilistik që mori jetën e dy prej miqve të tij.

Aksidenti ndodhi në Makun, shteti Ogun, në autostradën Lagos-Ibadan, kur makina u përplas me një kamion të ndalur pranë rrugës.

Fotografi treguan Joshuan në ulë sen e pasme të automjetit, të rrethuar nga xhama, dhe më pas ai u dërgua në spital për të marrë trajtim nga lëndime të lehta, me sugjerime se “mundësia për dëmtime në brinjë dhe gjunjë” ishte përmendur nga një burim që thuhet se është afër “rrethit të brendshëm” të Joshuas.

Një raport pretendonte se ai kishte thënë: “Ndjej dhimbje kudo në trupin tim” në fjalët e tij të para pas aksidentit.

Autoritetet konfirmuan se dy burra të rritur humbën jetën në këtë aksident tragjik dhe më vonë u identifikuan si Kevin Latif Ayodele dhe Sina Ghami, të dy 36 vjeç, bashkëpunëtorë të ngushtë të Joshuas dhe anëtarë kyç të ekipit të tij.

Të dy kanë qenë pjesë integrale në përgatitjen e Joshuas për shumë beteja të mëdha, përfshirë fitoren e tij më të fundit me nokaut ndaj Jake Paul në Miami.

Sina, bashkëthemelues i Evolve Gym në Londër, ka punuar me Joshuan në kampin e tij si trajner i sportit dhe rehabilitimit fizik për më shumë se një dekadë.

Ai ka krijuar një miqësi me Joshuan, me Shahryar Rumi që zbuloi se marrëdhënia e tyre ishte aq e ngushtë sa boksieri e kishte marrë atë në Nigeri për këtë udhëtim që të mos ishte vetëm.

“Ata ishin miq, Anthony Joshua dhe Sina. Punuan së bashku, por filluan si miq. Edhe në këtë udhëtim, ai nuk donte që ai të ishte i vetëm, prandaj shkoi me të”, ka deklaruar Rumi për The Times./Telegrafi/

Një nga emrat më të mëdhenj të boksit botëror, Anthony Joshua, mund të mos rikthehet më kurrë në ring pas një aksidenti të rëndë automobilistik, sipas promotorit të njohur Frank Warren.

Ngjarja tragjike, e cila ndodhi në Nigeri, ka lënë pasoja të rënda emocionale dhe ka vënë në pikëpyetje vazhdimin e karrierës së boksierit britanik.

Aksidenti ndodhi në qytetin Makuni dhe rezultoi fatal për dy miq të afërt dhe bashkëpunëtorë të stërvitjes së Joshuas, Sin Ghami dhe Latif Ayodele. Joshua i shpëtoi vdekjes për pak, vetëm sepse ndodhej disa centimetra më lart në sediljen e majtë të automjetit krahasuar me pasagjerët e tjerë.

“Kjo është një periudhë e tmerrshme për të gjithë të përfshirët. Shpresoj që Anthony të jetë mirë fizikisht, por aspekti mendor është një çështje krejt tjetër. Nuk e di nëse ai do ta gjejë ndonjëherë forcën apo dëshirën për të luftuar përsëri, apo nëse do të rikthehet fare në ring. Vetëm koha do ta tregojë”, deklaroi Frank Warren për ITV News.

Joshua, i cili ishte planifikuar të përballej me Tyson Fury në vjeshtën e vitit 2026, tani e ka të ardhmen sportive të mbuluar nga pasiguria. Humbja e dy miqve të ngushtë në këtë aksident tragjik pritet të ketë një ndikim të thellë në gjendjen e tij mendore dhe në motivimin për të vazhduar karrierën.

Policia nigeriane ka konfirmuar se shkaku paraprak i aksidentit ishte shpërthimi i një gome, ndërsa automjeti Lexus SUV në të cilin udhëtonte Joshua u përplas me një kamion të ndaluar në autostradën e rrezikshme Lagos–Ibadan. Boksieri 36-vjeçar i shpëtoi vdekjes për pak në këtë përplasje fatale.

telegrafi.com

Sipas Babatunde Akinbiyi, komandant i Policisë së Trafikut dhe Zbatimit të Rregullave në Nigeri, hetimet fillestare tregojnë se automjeti humbi kontrollin për shkak të shpejtësisë së tepërt dhe shpërthimit të gomës gjatë një tentative për tejkalim. Fuoristrada drejtohej nga një shofer vendas.

Ndërsa hetimet vazhdojnë, bota e boksit mbetet në pritje për të mësuar nëse Anthony Joshua do të jetë në gjendje – fizikisht dhe mendërisht të rikthehet ndonjëherë në ring pas kësaj tragjedie të rëndë. /Telegrafi/

Kampi i Anthony Joshuas ka reaguar zyrtarisht pasi boksieri anglez u lëndua në një aksident të rëndë automobilistik në Nigeri, aksident që për fat të keq mori jetën e dy personave shumë të afërt me të.

Përplasja fatale ndodhi të hënën, më 29 dhjetor, rreth orës 12:00 sipas kohës lokale, në një nga rrugët më të frekuentuara dhe më të rrezikshme të Nigerisë, e cila lidh Lagosin me pjesë të tjera të vendit. Joshua pësoi lëndime të lehta dhe u dërgua në spital për kontrolle, ku gjendja e tij raportohet të jetë e qëndrueshme.

Viktimat e aksidentit janë identifikuar si Sina Ghami, trajneri i forcës dhe përgatitjes fizike të Joshuas, si dhe Kevin “Lateef” Ayodele, trajneri i tij personal, i njohur edhe si “Latz”. Të dy konsideroheshin pjesë kyçe e ekipit dhe miq shumë të afërt të boksierit.

Në një deklaratë të lëshuar në emër të Joshuas, kampi i tij konfirmoi humbjen tragjike dhe kërkoi privatësi për familjet e prekura.

“Me dhimbjen më të thellë konfirmojmë se, pas një aksidenti rrugor në Lagos, Nigeri, humbën jetën Sina Ghami dhe Kevin ‘Lateef’ Ayodele. Të dy ishin miq të ngushtë dhe pjesë thelbësore e ekipit të Anthonyt. Kërkojmë me respekt hapësirë dhe privatësi për familjet e tyre në këtë moment jashtëzakonisht të vështirë. Anthony pësoi lëndime dhe ndodhet në spital për trajtim dhe vëzhgim, në gjendje të qëndrueshme”, thuhet në njoftim.

Eksperti i boksit në BBC, Steve Bunce, i përshkroi Ghami dhe Ayodele si “dy nga miqtë më të afërt të Joshuas” dhe si pjesë të rëndësishme të suksesit të tij profesional.

Një i afërm i familjes së Joshuas në Nigeri, i cili kërkoi të mbetet anonim, deklaroi për BBC se lajmi ishte një “tronditje e madhe”, duke shtuar se familja po lutet për shërimin e shpejtë të Anthonyt dhe për prehjen e të ndjerëve.

Ngushëllime publike ka shprehur edhe promotori Eddie Hearn, i cili konfirmoi gjendjen stabile të Joshuas dhe kërkoi respektim të privatësisë së familjeve të prekura. /Telegrafi/

Qeveria lokale e shtetit të Ogun, pjesë e Nigerisë, ka dhënë një përditësim mbi gjendjen e boksierit, Anthony Joshua, pas aksidentit tragjik me makinë që la dy të vdekur.

Joshua, 36 vjeç, ishte një nga katër pasagjerët në një xhip Lexus që u përplas me një kamion të palëvizshëm rreth orës 11:00 të mëngjesit, sipas orës lokale të hënën.

Boksieri u shpëtua me lëndime të lehta dhe tashmë është i qëndrueshëm, duke qenë i vetëdijshëm dhe në kontakt me familjen e tij.

“Pas vlerësimeve gjithëpërfshirëse klinike, mjekët kanë konfirmuar se Joshua dhe një pasagjer i dytë janë në gjendje të qëndrueshme dhe nuk kanë nevojë për ndërhyrje urgjente mjekësore. Një ekip mjekësor do të vazhdojë t’i monitorojë nga afër”, thuhet në deklaratën e qeverisë së shtetit Ogun.

Sipas raportimeve, dy meshkuj të tjerë në automjet humbën jetën, ndërsa Joshua dhe një pasagjer tjetër u transportuan në spital për trajtim. Aksidenti ndodhi në autostradën Lagos-Ibadan, një rrugë e njohur për rrezikshmërinë e saj.

Qeveria lokale po monitoron nga afër situatën dhe ka nisur hetimet për rrethanat e aksidentit. Automjeti i përfshirë është evakuuar, ndërsa autoritetet punojnë për të siguruar që kamioni i përfshirë të largohet nga vendi i ngjarjes për të lehtësuar hetimin. /Telegrafi/

Boksieri britanik me prejardhje nga Nigeria, Anthony Joshua i shpëtoi vdekjes në një aksident të rëndë, ku mbeten të vdekur dy njerëz.

Joshua pësoi vetëm me disa lëndime të lehta, ndërsa është në spital – ku ka nisur shërimin.

Në rrjetet sociale tashmë janë publikuar disa video, ku shihet Joshua duke u larguar nga makina që ishte përfshirë në aksident.

Aksidenti ndodhi në zonën e Makun, gjatë autostradës së ngarkuar Lagos – Ibadan Expressway, në shtetin Ogun. Automjeti i tij u përplas me makinën tjetër, kurse rrethanat e tjera vazhdojnë të hetohen.

Aksidenti vjen vetëm disa ditë pasi Joshua e rrahu keq Jake Paul, për ta mposhtur me nokaut dhe iu bërë me dije të gjithëve se ende po e ëndërron titullin e kampionit të botës në peshat e rënda./Telegrafi

Boksieri britanik-me origjinë nigeriane, Anthony Joshua, është përfshirë në një aksident të rëndë rrugor në Nigeri, ku dy persona kanë humbur jetën, bëjnë me dije mediat e ndryshme angleze.

Ngjarja ndodhi në zonën e Makun, përgjatë autostradës së ngarkuar Lagos-Ibadan Expressway në shtetin Ogun.

Automjeti ku ndodhej Joshua u përfshi në përplasje me një makinë tjetër, ndërsa rrethanat e aksidentit janë ende në hetim.

Joshua, 36 vjeç, raportohet se ka pësuar lëndime të lehta si pasagjer, ndërsa dy persona humbën jetën në vendin e aksidentit.

Ekipet e emergjencës u nxitën në vendngjarje për të ndihmuar të lënduarit dhe për të menaxhuar situatën pas përplasjes.

Ky incident vjen vetëm disa ditë pasi Joshua u përball me Jake Paul, ku mbrojti karrierën e tij në një ndeshje të bujshme boksi. /Telegrafi/

Mbrëmë (e enjte), gazeta spanjolle Marca publikoi një video shqetësuese të shfaqjes së YouTuber-it dhe boksierit amerikan Jake Paul, pasi pësoi një humbje të rëndë në ndeshjen kundër Anthony Joshua.

Joshua e nokautoi Paulin javën e kaluar në një ndeshje të zhvilluar në Miami. Nokauti ndodhi në raundin e gjashtë të ndeshjes.

Pastaj Joshua e rrëzoi Paulin me një goditje të fortë me të djathtën, pas së cilës influencuesi i YouTube nuk mundi të ngrihej dhe gjyqtari e ndaloi ndeshjen.

Goditja e nokautit të Joshuas ishte fatale, Jake Paul përfundoi me nofull të thyer

Pas luftës, Paul përfundoi në spital, dhe më pas njoftoi se kishte një operacion të suksesshëm pasi Joshua ia theu nofullën në dy vende me këtë nokaut.

Tani, gjashtë ditë pas ndeshjes, ndërsa Paul po rikuperohet nga operacioni, gazeta Marca ka publikuarnjë foto dhe video se si duket ai pas operacionit dhe një dëmtimi të rëndë.

"Operacioni shkoi mirë, faleminderit për gjithë dashurinë dhe mbështetjen. Dy pllaka titani në secilën anë. Disa dhëmbë u nxorën. Mund të pi vetëm lëngje për shtatë ditët e ardhshme", ka thënë Paul pas operacionit.

Megjithatë, fotografitë e publikuar të Paul duket se janë të bëra me Inteligjencë Artificiale, pasi amerikani u pa në një podcast me vëllain e tij në një gjendje shumë stabile.

Paul nga podcasti me vëllain e tij, Logan Paul

Ndryshe, kjo ishte lufta e 14-të profesionale e Paulit dhe e dyta kundër një boksieri "të vërtetë" aktiv, dhe njëkohësisht disfata e tij e dytë, pasi më parë ishte mundur nga Tommy Fury. /Telegrafi/

Tyson Fury është gati të hyjë në ring me Anthony Joshuan vitin e ardhshëm, por ndeshja që tifozët e boksit kanë pritur për gati një dekadë do të ndodhë vetëm me një kusht, por vendimtar. Siç e ka konfirmuar promotori i tij, gjithçka varet nga një ofertë financiare.

Ky spektakël i peshave të rënda është organizuar prej vitesh, gjatë të cilit të dy boksierët mbajtën tituj botërorë. Fury u bë kampion i unifikuar me një fitore ndaj Wladimir Klitschko, pas së cilës u tërhoq për disa vite. Ai u rikthye me stil, mori rripin e WBC nga Deontay Wilder dhe e mbrojti atë në një ndeshje epike, vetëm për t'ia dorëzuar përfundimisht Oleksandr Usyk.

Ishte Usyk ai që e rrëzoi nga froni Joshuan në vitin 2021, dhe as Fury dhe as Joshua nuk arritën ta ndryshonin rezultatin në revanshet e tyre kundër mjeshtrit ukrainas.

Fury është pensionuar zyrtarisht që nga janari i vitit 2025, ndërsa Joshua kishte qenë jashtë ringut që nga një nokaut i rëndë kundër Daniel Dubois në shtator të vitit 2024, deri fundjavën e kaluar kur ai e mposhti Jake Paulin në një ndeshje të pabarabartë.

Joshua i bën thirrje Tyson Furyt të lëshojë mikrofonin dhe të veshë dorëzat pas fitores ndaj Jake Paul

Çmimi luan një rol vendimtar

Duke folur për Sky Sports, promotori i Furyt, Frank Warren, pranoi se "Mbreti Cigan" është i interesuar për meçin, por me një kusht.

“Ajo që do ta motivojë Tysonin është aspekti financiar. Unë besoj se ai mund ta mposhtë 'AJ', vetë Tyson dhe i gjithë ekipi i tij e besojnë këtë. Gjithçka varet nga vlera e ndeshjes. Është një ndeshje e madhe dhe vlen shumë para. Tyson ka çmimin e tij", ka thënë Warren.

Në të njëjtën intervistë, Warren shtoi se ka shumë të ngjarë që ndeshja të zhvillohet në Arabinë Saudite si pjesë e Sezonit të Riadit.

"Paratë do të diktojnë se ku do të zhvillohet ndeshja, është kaq e thjesht. Ata do të shkojnë aty ku janë paratë, janë luftëtarë profesionistë, hyjnë në ring dhe pranojnë grushte për para”, përfundoi promotori i Furyt. /Telegrafi/

Boksieri Leonid Berisha - Duqi, është gati për një tjetër sfidë të madhe në karrierën e tij. Më 26 dhjetor, ai do të ngjitet në ring në një natë legjendare boksi, ku do të përballet me boksierin grek Charilaos Malichoudis në Kursaal Arena të Bernit.

Kjo do të jetë ndeshja e dytë e Leonid Berishës në boksin profesionist. Në debutimin e tij profesional, Berisha arriti të regjistrojë fitore, duke konfirmuar potencialin dhe ambiciet e tij për të ndërtuar një karrierë të suksesshme edhe në këtë nivel.

Përveç boksit profesionist, Berisha ka pasur një karrierë solide edhe si amator, ku ka regjistruar tetë fitore dhe tri humbje.

Boksieri me prejardhje nga fshati Drenoc, komuna e Rahovecit, është ish-kampion i Zvicrës në boks, një tjetër dëshmi e cilësisë dhe përgatitjes së tij.

Në anën tjetër, kundërshtari i tij, Charilaos Malichoudis, ka zhvilluar deri më tani shtatë meçe në boksin profesionist, me bilanc prej tri fitoresh dhe katër humbjesh.

Përballja pritet të jetë interesante dhe sfiduese për të dy boksierët, në një mbrëmje që premton emocione të forta për tifozët e sportit të grushtave./Telegrafi/

Ekipi promovues që qëndron pas ndeshjes Anthony Joshua-Jake Paul do të ndërmarrë veprime ligjore kundër kujtdo që pretendon se lufta ishte e kurdisur.

Konkretisht, Nakisa Bidarian, partnerja në biznes e Paul dhe bashkëthemeluese e kompanisë Most Valuable Promotions, konfirmoi se u punësuan avokatë për t'i dhënë fund pretendimeve të pabaza që u përhapën në internet pas meçit.

Ndërsa akuzat për trukim ndeshjesh kanë ndjekur pothuajse çdo ndeshje që Paul ka zhvilluar, me përjashtim të humbjes së tij ndaj Tommy Fury, kjo është hera e parë që ekipi i tij ka njoftuar veprime konkrete ligjore.

Zbulohet shuma marramendëse që fituan Anthony Joshua dhe Jake Paul për meçin e tyre në Miami

Paul më parë i ka hedhur poshtë akuza të tilla, duke theksuar se manipulimi i ngjarjeve sportive profesionale në Amerikë është një krim federal.

Në një paraqitje si i ftuar në "The Ariel Helëani Shoë" të hënën, Bidarian dha detaje mbi akuzat. Kur u pyet nga prezantuesi nëse performanca e Paul, pavarësisht nokautit të rëndë, ishte e mjaftueshme për të heshtur teoricienët e konspiracionit, Bidarian ishte i qartë: "Jo, jo tamam. Avokatët tanë po ndjekin penalisht në mënyrë aktive një numër njerëzish."

Ju kujtojmë se në ndeshjen që u zhvillua të premten në Miami, dy herë ish-kampioni i peshave të rënda Joshua e nokautoi brutalisht Paulin në raundin e gjashtë. Në atë rast, ai theu edhe nofullën në dy vende. /Telegrafi/

Boksieri amerikan dhe YouTuber-i i njohur Jake Paul shkaktoi reagime të shumta me një postim në rrjetet sociale, menjëherë pas daljes nga spitali, ku u trajtua pas humbjes me nokaut ndaj Anthony Joshua.

Paul pësoi dëmtimin në raundin e pestë të ndeshjes së zhvilluar të premten mbrëma, ku Joshua e dominoi përballjen me një seri goditjesh vendimtare, duke e mbyllur duelin në mënyrë spektakolare.

Me këtë fitore, Anthony Joshua e përmirësoi rekordin e tij në 29 fitore dhe katër humbje, ndërsa Jake Paul tani ka një bilanc prej 12 fitoresh dhe dy humbjesh. Pas ndeshjes, Paul u diagnostikua me thyerje të nofullës dhe qëndroi për disa kohë në spital.

Menjëherë pas daljes nga spitali, Paul publikoi një postim kontrovers, duke shfaqur edhe një herë stilin e tij luksoz të jetesës. Ai ndau një foto nga një avion privat, i rrethuar nga tufa parash, çanta të markës Louis Vuitton dhe objekte të tjera luksi.

Në postimin e tij, Paul shoqëroi imazhin me një mesazh motivues:

“Ëndrra amerikane. Filloni ëndrrën tuaj sot. Besoni në të. Nëse bini, mësoni. Nëse bini, mos u ndalni.”

Postimi ngjalli reagime të shumta nga tifozët. Ndërsa një pjesë e tyre e përgëzuan Paul për mënyrën se si u rikthye pas humbjes, të tjerë e kritikuan për arrogancë dhe mungesë modestie.

Sipas raportimeve, të dy boksierët përfituan të njëjtën shumë financiare nga kjo përballje, rreth 78 milionë euro bruto, ose afërsisht 63 milionë euro neto pas zbritjeve. /Telegrafi/

Luftëtari shqiptar i MMA Eduard Drenica thotë se serbi Petar Jakovljevic e shpiku historinë kinse e kanë sulmuar katër persona vetëm që të mos del në ring.

Vetëm katër orë pa nisur meçi, Drenica u njoftua se gjithçka është anuluar meqenëse Jakovjevic është në polici, me këtë të fundit që prentendoi në rrjetin social “Instagram” se ishte sulmuar nga katër persona.

Në një intervistë për Telegrafi, luftëtari shqiptar komentoi prapaskenat, ku ndër të tjera deklaroi se ka mbetur i zhgënjyer.

“E mora vesh katër orë para meçit, përmes një mesazhi nga ekipi i tij tek promotori. Reagimi im i parë ishte papërfytyrueshmëri dhe zhgënjim. Isha i gatshëm, i fokusuar dhe të shihja gjithçka të prishej në momentin e fundit ishte shumë zhgënjyese”.

Drenica kreu të gjitha përgatitjet për ta bërë krenar Kosovën, pasi për të ishte më shumë se një meç.

“Të gjitha përgatitjet ishin bërë, isha në formë të plotë, gati të jap maksimumin. Ky meç për mua kishte shumë kuptim, nuk ishte vetëm sport: unë përfaqësoja Kosovën dhe popullin tim. Të shihej i anuluar në momentin e fundit ishte një goditje e fortë, por nuk ndryshon vendosmërinë time”.

I pyetur mbi “justifikimin” e serbit se është sulmuar, ai shtoi se nuk është e vërtetë pasi gjatë matjeve e ka vërejtur se Jakovljevic ishte i frikësuar.

“Personalisht nuk besoj në këtë justifikim. Gjatë matjeve e pashë në sy dhe pashë frikë. Sipas mendimit tim, ai e shpiku këtë histori për t’u tërhequr pa pranuar se kishte frikë dhe për të fituar kohë”.

“A kishte politikë të përzier? Jo, për mua politika nuk ka lidhje. Kjo është sport dhe ajo që ndodhi lidhet me frikën dhe presionin brenda kafazit, jo me faktorë të jashtëm”.

Drenica assesi nuk harroi t’i falënderonte tifozët për mbështetjen e madhe që i dhanë si dhe iu premtoi se do t’i bëjë krenar.

“Tek tifozët e mi dua të them të mos shqetësohen: Vendosmëria ime nuk ka ndryshuar. Kam ndjerë mbështetjen tuaj dhe më ka dhënë edhe më shumë forcë. Vazhdoni të besoni tek unë dita e duhur do të vijë dhe do t’ju jap shfaqjen që e meritoni”.

Në fund, ai nënvizoi se ëndërron të hyjë në UFC për ta përfaqësuar Kosovën në nivelin më të lartë.

“Synimi im mbetet i qartë të rritem si fighter, të hyj në UFC dhe të përfaqësoj Kosovën në nivelin më të lartë. Çdo pengesë më bën më të fortë dhe do të vazhdoj të punoj për të arritur qëllimin tim pa kompromis”, përfundoi ai për Telegrafi.

Ndërkohë, Drenica ka zhvilluar pesë meçe deri më tani – ku ka regjistruar tre fitore dhe dy humbje./Telegrafi

Ish kampioni i kikboksit AndrewTate thotë se ka humbur shumë kohë në burg, prandaj edhe pësoi humbje nga DeMoor.

Tate debutoi në boksin profesionist ndaj Chase DeMoor, por nuk arriti t’i bëjë ballë këtij të fundit, i cili e dominoi në përgjithësi.

Pas humbjes, Tate deklaroi se humbi me kampionin prandaj “ndihet krenar”.

“Jam 40 vjeç, 10 vite jashtë ringut... kam qëndruar shumë kohë në burg dhe mbyllur në shtëpi. Është në rregull të humbasësh, por jo të mos tentosh. Ishte më i ri, 10 kilogramë më i rëndë dhe luftova kampionin”, tha ai.

Përndryshe, nuk dihet nëse Tate do të vazhdojë karrierën si boksier profesionist./Telegrafi/

Përballja e shumë pritur mes luftëtarit shqiptar të MMA, Eduard Drenica dhe serbit Petar Jakovljevic nuk do të zhvillohet.

Eduard Drenica përmes disa videove në rrjetin social “Instagram” ka njoftuar të gjithë se meçi i zjarrtë është anuluar vetëm katër orë para se të niste.

Të gjitha detajet ishin kompletuar, përfshirë edhe matjen zyrtare, megjithatë serbi nuk është shfaqur fare në vendin ku ishte paraparë të zhvillohet meçi.

Jakovljevic përmes një postimi gjithashtu pretendoi se është sulmuar fizikisht nga katër persona dhe që policia e kanë dërguar në mbajtje, prandaj edhe përballja nuk do të zhvillohet.

Ndërkohë, Eduard Drenica shkroi se ky i fundit thjesht nuk guxoi të dilte në ring, duke gjetur edhe justifikime.

“Ti flet për politikë, unë për luftë. Ti flet për siguri, unë shfaqëm kur dhe ku të nevojitem. Ti flet për para, unë nënshkruaj që të hy në kafaz. Ti thua se je amator, por kërkon 15 mijë franga si kampion”.

“Ti thua se nuk je gati dhe prandaj nuk shfaqësh, por vetëm shkruan. Unë luftoj, pro ose amator. Në shkurt ose në prill. Jam gati, dëshmo që edhe ti je”.

“Ti thua se kemi nevojë për ty, por e vërteta është që të nevojitet ky meç për ta dëshmuar vetën. Në vend të kësaj, ti bën hap mbrapa. Ne nuk fluturojmë, qëndrojmë për toke, punojmë, stërvitemi dhe luftojmë. Edhe ti fluturove... por larg ringut”.

“Nëse një ditë dëshiron ta dëshmosh që je luftëtar, do të jem këtu. Deri atëherë, fjalët mbesin fjalë. Ringu kurrë nuk gënjen. Shihemi kur do që të kesh kurajon për t’u përballur me mua”, njoftoi ai./Telegrafi

Jake Paul ka publikuar një rreze X në rrjetet sociale, duke treguar dëmtimet që pësoi gjatë humbjes ndaj Anthony Joshuas, ndërsa njëkohësisht shfaq edhe interesin e tij për kundërshtarin e ardhshëm.

Qysh në fillim të ndeshjes u bë e qartë se taktika e Paul ishte të shmangte goditjet e fuqishme të Joshuas.

Pas një minute pushim për të rikuperuar ndërmjet raundeve, 28-vjeçari u rrëzua sërish në raundin e gjashtë dhe nuk arriti të ngrihej brenda kohës së numërimit të gjyqtarit, duke i dhënë Joshuas fitoren e 29-të profesionale në 33 duele.

Nga ana tjetër, rekordi i Paul u përditësua në 12 fitore dhe 2 humbje, ku humbja tjetër kishte ardhur kundër Tommy Furyt, vëllait të Tyson Furyt, në vitin 2023.

Në një postim në X, YouTuberi që u bë bokser tregoi shkallën e plotë të dëmtimeve të tij duke publikuar një rreze X, që tregon qartë se kishte pësuar një thyerje të dyfishtë të nofullës.

Megjthëse po shërohet nga një dëmtim që kërkon kohë, Paul ka vendosur të synojë një ndeshje të mundshme me një nga boksierët më të mëdhenj të dy dekadave të fundit.

Në postimin e tij, ai shkroi: “Thyerje e dyfishtë e nofullës. Më jepni Canelon brenda 10 ditësh”.

Saul ‘Canelo’ Alvarez, i cili ka mbajtur më parë 16 tituj botërorë, konsiderohet gjerësisht si një nga boksierët më të mirë meksikanë të të gjitha kohërave, me një rekord mbresëlënës prej 63 fitore, 3 humbje dhe 2 barazime, duke humbur ndeshjen e fundit ndaj Terence Craëford në shtator të këtij viti.

Ende nuk është e qartë nëse Canelo do të pranojë të ndeshet me Paulin, duke pasur parasysh se ai mbetet ende pjesë e skenës botërore të titujve./Telegrafi/