Gjykata e Apelit ka lënë në fuqi masat e arrestit me burg për pjesëtarët e grupit kriminal që dyshohet se trafikonin kokainë dhe mariuanë në 3 linja, drejt Holandës, Gjermanisë dhe Turqisë.

Mes personave të lënë në burg është edhe djali ish deputetit Rrahman Rraja, Rexhepi.

Islam Sefa, Jani Çavo, Aldo Gjini, Marvin Bushati, Përparim Rraja, Gazmir Rraja, Rexhep Rraja dhe Zamir Aliaj u arrestuan me urdhër të SPAK në dhjetor.

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më datë 24.01.2026, shpalli vendimin mbi çështjen penale nr. 1 akti, datë 19.01.2026 regjistrimi, mbi ankimet e ankuesve I.S, J.Ç, A.Gj., M.B., P.Rr., G.Rr., R.Rr., dhe Z.A.: “Ankim kundër vendimit nr. 124, datë 09.12.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Caktimin e masës së sigurimit personal “Arresti në burg”, parashikuar nga neni 238, i Kodit të Procedurës Penale. Ankim kundër vendimit nr. 126, datë 11.12.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Marrjen në pyetje dhe verifikimin e kushteve të zbatimit të masës së sigurimit personal “Arresti në burg”, parashikuar nga neni 238, i Kodit të Procedurës Penale” në lëndë të masave të sigurimit personal, dhe vendosi:

1. Miratimin e Vendimit nr. 124, datë 09.12.2025 të Gjykatës së Posaçme të Shkallës së Parë për Korrupsionin dhe Krimin e Organizuar për sa i takon disponimeve kundrejt Z.I.S., Z. J.Ç., Z. A.Gj., Z. M.B., Z. P.Rr., Z. G.Rr., Z. R.Rr., Z. Z.A..

2. Miratimin e Vendimit nr. 126, datë 11.12.2025 të Gjykatës së Posaçme të Shkallës së Parë për Korrupsionin dhe Krimin e Organizuar për sa i takon disponimeve kundrejt Z.I.S., Z. J.Ç., Z. A.Gj., Z. M.B., Z. P.Rr., Z. G.Rr., Z. R.Rr., Z. Z.A..

3. Kundër këtij vendimi mund të bëhet rekurs në Gjykatën e Lartë brenda 45 ditëve, duke nisur ky afat nga e nesërmja e njoftimit të vendimit të arsyetuar. U shpall në Tiranë, me datë 24.01.2026.”-thuhet në njoftim.

Ky hetim i SPAK i nisur që në vitin 2024 zbuloi të implikuar edhe Rexhep Rrajën djalin e ish deputetit të PS, Rrahman Rraja i cili është nën gjykim për kryerjen e veprave “trafikimi i narkotikëve” i kryer në bashkëpunim dhe u vu në pranga.

Nëpërmjet komunikimeve në aplikacionin SKY ECC Prokuroria e Posaçme ka konstatuar tre episode trafiku, ku vlerësohet se financuesi dhe organizatori kryesor i grupit kriminal është Islam Sefa, aktualisht i izoluar në burg për një tjetër vepër penale.

The post Trafikuan 2.4 ton lëndë narkotike/ Apeli lë në burg 8 anëtarët e grupit Rraja, mes tyre djali i ish-deputetit të PS (EMRAT) appeared first on Albeu.com.

Rreth orës 13:00, në rrugën “Egnatia”, automjeti me drejtues shtetasin E. S. është përplasur me automjetin me drejtues shtetasin I. N.

Nga aksidenti u dëmtuan dy drejtuesit e automjeteve dhe pasagjeri që ndodhej në njërin prej automjeteve.

Të tre shtetasit u dërguan në spital për ndihmë mjekësore dhe ndodhen jashtë rrezikut për jetën.

Grupi hetimor po punon për sqarimin e plotë të rrethanave dhe shkakut të aksidentit.

The post Aksident në rrugën “Egnatia”, tre të lënduar appeared first on Albeu.com.

Kjo periudhë e dimrit shoqërohet me shtim të rasteve të virozave dhe gripit, duke sjellë një ngarkesë më të madhe në qëndrat shëndetesore dhe urgjencë

Simptomat shfaqen fillimisht me lodhje të theksuar, dhimbje trupi dhe temperaturë, ndërsa në ditën e tretë apo të katërt kolla bëhet më e fortë dhe shfaqen sekrecione respiratore.

Mjekët bëjnë thirrje që qytetarët të mos e neglizhojnë lodhjen apo këputjen e trupit, pasi situata mund të përkeqësohet dhe të kërkojë trajtim të specializuar.

Grupmoshat më të rrezikuara mbeten të moshuarit mbi 65 vjeç, si dhe pacientët me sëmundje kronike apo imunitet të dobët, për të cilët kujdesi duhet të jetë edhe më i shtuar.

Mjekët këshillojnë gjithashtu respektimin e rregullave bazë të higjienës, ushqyerjen e shëndetshme me perime dhe zarzavate, shmangien e ambienteve të mbyllura dhe ajrosjen e shpeshtë të ambientit, si masa të domosdoshme për parandalimin e gripit

The post KUJDES ME GRIPIN/ Simptomat zgjasin disa ditë dhe kërkojnë konsultë appeared first on Albeu.com.

Kryeministri Edi Rama, do të zhvillojë një vizitë pune në Jeruzalem, Izrael, më 25–27 janar, me rastin e pjesëmarrjes së tij në Konferencën Ndërkombëtare për Luftën kundër Antisemitizmit.

Në këtë vizitë, Rama do të shoqërohet nga delegacioni shqiptar dhe bashkëshortja e tij.

Axhenda e plotë:

Ditën e hënë, më 26 janar, ora 11:00 – 12:30 Kryeministri Rama do të zhvillojë një takim kokë më kokë me Kryeministrin e Izraelit, Benjamin Netanyahu, i cili do të pasohet nga takimi mes dy delegacioneve, në përfundim të të cilit do të ketë edhe deklaratë për shtyp.
Paralelisht, Linda Rama, në shoqërinë e znj. Herzog, bashkëshortes së Presidentit të Izraelit, Isaac Herzog, do të zhvillojë një vizitë në Bibliotekën Kombëtare.

Në orën 14:00, Kryeministri Rama, i shoqëruar nga znj. Linda Rama, do të mbërrijë në Knesset “Plaza”, Parlamenti i Izraelit, ku do të pritet me një ceremoni të posaçme shtetërore nga Kryetari i Knessetit. Ceremonia përfshin rojet e nderit, ekzekutimin e himneve kombëtare, si dhe vendosjen e kurorave në monumentin e ushtarëve të rënë dhe në monumentin e viktimave të terrorit.

Më pas, Kryeministri Rama do të firmosë Librin e Përshtypjeve në Hollin Shagall.

Në orën 14:30, Kryeministri Rama dhe delegacioni shqiptar do të zhvillojnë një takim me Kryetarin e Knessetit, z. Amir Ohana.

Në orën 16:15, do të nisë seanca plenare speciale e Knessetit, e shoqëruar nga hyrja ceremoniale në sallë. Gjatë kësaj seance do të mbajnë fjalën Kryetari i Knessetit, z. Amir Ohana, Kryeministri i Izraelit, Benjamin Netanyahu, Lideri i Opozitës, Yair Lapid, si dhe Kryeministri Edi Rama, i cili do t’i drejtohet Parlamentit të Izraelit me një fjalim.

Në orën 17:15, do të zhvillohet një pritje zyrtare në nder të Kryeministrit Rama, me pjesëmarrjen e ambasadorëve dhe të ftuarve të posaçëm, në Jerusalem Hall të Knessetit.

Ndërsa, znj. Linda Rama do të ketë një takim të veçantë me gratë parlamentare.

Më 27 janar, Kryeministri Edi Rama do të marrë pjesë në Konferencën Ndërkombëtare për Luftën kundër Antisemitizmit, ku do të mbajë një fjalë, në praninë e Presidentit të Izraelit, Isaac Herzog.

Gjatë qëndrimit në Jeruzalem, Kryeministri Rama do të kryejë gjithashtu vizita simbolike në Western Wall (Muri i Lotëve) dhe në Kishën e Varrit të Krishtit.

The post Nga takimi kokë me kokë me Netanyahun te fjalimi në Knesset/ Rama vizitë zyrtare në Izrael, zbardhet axhenda e kryeministrit appeared first on Albeu.com.

Sekretari i Përgjithshëm i PD-së, Flamur Noka ka reaguar sërish për arrestimin e fëmijës dje nga policia, pas protestës madhështore të opozitës.
Noka shkruan se, fëmija u lutet policëve që të mos e rrahin dhe kjo është e frikshme.

Reagimi i Sekretarit të Përgjithshëm të PD, Flamur Noka:

Videoja e arrestimit të fëmijës 12-vjeçar, përpos të tjerash, na nxjerr në pah një dukuri të re që vjen nga edukimi i bindjes dhe frikës së brezit të ri, që ushtron shteti në sistemin arsimor. Po të dëgjosh me vëmendje fjalët e vogëlushit, ai thotë në ligjëratë të drejtë këtë fjali: Aman, ju hëngsha m*tin, veç mos më rrihni!

Pra një fëmijë 12 vjeç e ditka qartësisht se policia të rreh, të dhunon dhe që është fuqiplotë. Me pak fjalë ai e di që ata bëjnë gjithçka dhe për të shpëtuar nga të rrahurit, fëmija nuk i referohet ligjit, as të drejtave të fëmijëve dhe as normave të tjera të edukimit dhe komunikimit. Fëmija thjesht u përgjërohet policëve: Aman, ju hëngsha m*tin, mos më rrihni!

Një fëmijë 12-vjeçar duhet të jetë diku në klasë të pestë apo të gjashtë dhe siç dihet në këto klasa merren nocionet e qytetarisë, të të drejtave të njeriut dhe sidomos të fëmijëve. Fjalia ‘aman, ju hëngsha m*utin mos më rrihni’ është treguesi më i qartë se edukimi dhe arsimi është i orientuar ndaj bindjes dhe frikës. Ky është treguesi më i qartë se ku po shkon brezi i ri. Prindërit të reflektojnë sa nuk është vonë, sepse indiferentizmi i tyre po prodhon fëmijë të frikur dhe të bindur ndaj pushtetit.

The post Noka: E frikshme, fëmija i arrestuar u lutet policëve ‘aman ju hëngsha m*tin, mos më rrihni’ appeared first on Albeu.com.

Kreu i Partisë Demokratike, Sali Berisha, ka deklaruar se opozita do të vijojë me protesta, duke e cilësuar situatën politike si “kilometrin e fundit” dhe duke falënderuar qytetarët për pjesëmarrjen dhe reagimin e tyre.

Në një deklaratë për mediat, Berisha theksoi se protestat nuk kanë karakter personal apo partiak, por janë, sipas tij, shprehje e ndërgjegjes qytetare. Ai u bëri thirrje të gjithë qytetarëve që të bashkohen, duke argumentuar se fondet e dyshuara si të vjedhura prekin interesat e të gjithëve, veçanërisht të brezave të rinj.

Kreu i PD-së vuri theksin te pjesëmarrja e të rinjve në protestë, duke e cilësuar atë si elementin më domethënës të tubimit. Sipas tij, prania e rinisë ka shkaktuar reagimin e ashpër të kryeministrit, të cilin e akuzoi për gjuhë fyese ndaj të rinjve protestues.

Berisha përfundoi duke deklaruar se opozita do të angazhojë të gjithë potencialin e saj në vijim të protestave, duke i konsideruar ato si mjetin kryesor të reagimit politik dhe qytetar në këtë fazë.

“Padyshim do ketë protesta dhe vetëm protesta. Jemi në kilometrin e fundit, të gjithë potencialin tonë, jemi mirënjohës pafund për përgjigjen qytetare. Një thirrje kam për çdo qytetar, edhe një herë, nuk është protestë kjo as për një person apo parti, është protestë e ndërgjegjes qytetare. Kur themi janë vjedhur qindra miliona euro nuk janë vetëm të fëmijëve të atyre opozitarëve që protestojnë, por të fëmijëve të gjithëve. Tipari më kardinal në atë protestë ishte rinia në veprim dhe ndaj tmerri i Ramës që i quajti rrugaçë lagjesh të rinjtë dinjitozë e guximtarë që kishin dalë për ndërgjegjen e tyre kundër tij”, tha Berisha mes të tjerash.

The post “Jemi në kilometrin e fundit”, Berisha paralajmëron vijim të tubimeve: Protestë jo për një parti, por për ndërgjegjen qytetare appeared first on Albeu.com.

Kreu i Partisë Demokratike, Sali Berisha, ka vijuar akuzat pas protestës së zhvilluar para Kryeministrisë, duke deklaruar në një konferencë për mediat se gjatë tubimit janë ushtruar akte dhune ndaj protestuesve nga ana e Policisë së Shtetit.

Berisha pretendoi se forcat e rendit kanë përdorur gaz lotsjellës, topa uji dhe shkopinj, duke i cilësuar këto veprime si të pajustifikuara ndaj protestuesve që ai i përshkroi si paqësorë. Sipas tij, gazi i përdorur ishte i skaduar dhe, siç deklaroi ai, përbën rrezik për shëndetin, duke shtuar se përdorimi i tij bie ndesh me konventat ndërkombëtare.

Në deklaratën e tij, Berisha përmendi edhe ndalimin e një fëmije 10-vjeçar, duke thënë se ai nuk kishte lidhje me protestën dhe ishte ndaluar ndërsa po largohej nga një xhami. Ai e cilësoi këtë veprim si të papranueshëm dhe akuzoi autoritetet për shkelje të rënda të të drejtave të njeriut.

Kreu i PD-së deklaroi gjithashtu se disa deputetë dhe drejtues të Partisë Demokratike janë përballur me sjellje agresive nga ana e forcave të rendit, duke përmendur nënkryetarin e PD-së Luçiano Boçi dhe deputetët Zija Ismaili dhe Besart Xhaferri.

“Dje narkopolicia e Ramës e komanduar nga Proda I krimit përdori dhunë të egër ndaj protestuesve. Goditi me të gjitha mjetet, përdori gaz lotsjellës të skaduar, i cili në konventa ndërkombëtare përbën helm luftarak dhe nuk mund të përdoret ndaj protestave. Gazi ishte i skaduar prej 3 vitesh dhe ai pas skadimit njihet se transformohet në helme që japin dëmtime të rënda të sistemeve. Por mund të shkaktojë edhe humbjen e pamjeve. U përdorën topa të ujit dhe mjete të tjera, u goditën me shkopinj protestues paqësorë dhe u ndaluan brutalisht në akte që lartësohen në krime kundër njerëzimit, u ndal një fëmijë 10 vjec teksa dilte nga xhamia. Romeo nuk kishte asnjë lidhje me protestën. Ai kishte ardhur me detyra të ngarkuara nga familjarët e tij, e morën në mënyrën më të turpshme dhe kriminale. Do t’u shtojnë kohë të gjatë lutjet e tij ndaj atyre 5 banditëve që tërhiqnin zvarrë një 10 vjecar. Shkelën konventat ndërkombëtare, fytyra e vërtetë e Edi Ramës, i cili edhe kur të jetë puna për karrigen e tij nuk ndalet as me krime ndaj fëmijëve. U sollën egërsisht dhe në mënyrë të padenjë ndaj deputetëve, agresuan disa prej tyre. Luciano Bocin, nënkryetarin e partisë, Zija Ismailin, deputetin e Beratit, Besart Xhaferrin, agresuan si të droguar. Akte këto vetëm të njerëzve në panik të tmerrshëm, njerëzve pa shpresë dhe përpjekje për të mbuluar krimet e Ramës dhe Lubi Ballukut me të tjerë”, tha Berisha.

The post “Përdorën gaz lotsjellës 3 vite të skaduar, ishte kthyer në helm”, Berisha: Proda i krimit përdori dhunë të egër, 5 banditë tërhoqën zvarrë një 10-vjeçar appeared first on Albeu.com.

Mbrëmjen e djeshme, shtëpisë së Big Brother VIP Albania iu bashkua një tjetër personazh: Dj.Gimbo (Gëzim Blakaj).

Ai hyn në një moment kritik të lojës, ku banorët kanë krijuar raportet dhe dinamikat e tyre tashmë.

Mirëpo si mik dhe Dj i Gjestit, Gimbo zbuloi edhe këshillën e tij para hyrjes në Big Brother VIP Albania.

“Çfarë këshille të ka dhënë Gjesti?” e pyeti Ledioni, ndërsa Gimbo tha: “Shko dhe fito!”

The post Dj.Gimbo zbulon këshillën që ia ka dhënë Gjesti para hyrjes në BBVA appeared first on Albeu.com.

Në Shqipëri, Partia Demokratike po bën thirrje për një rikthim në rrugë për të kërkuar dorëheqjen e Edi Ramës dhe Belinda Ballukut dhe formimin e një qeverie teknokratike. Por a ka opozita, e përjashtuar nga pushteti që nga viti 2013, një strategji?

Intervistë me Sali Berishën nga Jean-Arnault Dérens.

I lindur në vitin 1944 në Tropojë, themelues dhe kryetar i Partisë Demokratike (PD), Sali Berisha ishte President i Republikës së Shqipërisë nga viti 1992 deri në vitin 1997 dhe Kryeministër nga viti 2005 deri në vitin 2013. Ai u vu në arrest shtëpiak më 30 dhjetor 2023, për akuza për korrupsion, një masë e hequr nga gjykatat më 28 nëntor 2024.

Le Courrier des Balkans (CdB): Partia Demokratike po bën thirrje për një tubim. Çfarë prisni prej saj? Cila është strategjia juaj?

Sali Berisha: Zgjedhjet nuk mund ta largojnë një regjim diktatorial, sepse i shndërrojnë në farsë; ajo që nevojitet është presioni nga rruga. Në një autokraci zgjedhore si ajo që po përjeton Shqipëria, pluralizmi është vetëm një fasadë. Por në realitet, regjimi ka një kontroll të tillë mbi median dhe të gjithë shoqërinë saqë e bën të pamundur çdo ndryshim. Paratë e drogës dhe pastrimi i parave i sigurojnë regjimit burime të mëdha për të blerë njerëz, si brenda ashtu edhe jashtë vendit. Shqipëria është bërë një narko-shtet, megjithatë ajo mbetet e mbështetur nga Bashkimi Evropian dhe Shtetet e Bashkuara. Demonstratat paqësore dhe protestat popullore janë pra të vetmet mjete të mbetura për ne për të mobilizuar qytetarët dhe për të tërhequr vëmendjen e bashkësisë ndërkombëtare. Ne kërkojmë dorëheqjen e Edi Ramës dhe zëvendëskryeministres Belinda Balluku, si dhe formimin e një qeverie teknokratike të ngarkuar me organizimin e zgjedhjeve vërtet të lira dhe sigurimin që ajo të mos ndërhyjë në punën e gjyqësorit.

CdB: Por si mund ta bëjmë të mundur një alternativë?

Sali Berisha: Edi Rama e ka marrë peng vendin. Në dhjetë vjet, 1.1 milion shqiptarë kanë emigruar në vendet anëtare të Bashkimit Evropian, pa llogaritur të gjithë ata që janë larguar për në pjesë të tjera të botës. Në total, 45% e popullsisë sonë vlerësohet të ketë emigruar. Të rinjtë nuk shohin se si të ndërtojnë një të ardhme në Shqipëri, por Edi Rama vazhdon të shfrytëzojë të vetmin argument që i ka mbetur: gjeopolitikën, duke i përafruar politikat e tij me ato të Bashkimit Evropian dhe Shteteve të Bashkuara. Askush nuk mashtrohet, por Bashkimi Evropian duhet të jetë në gjendje të paraqesë një narrativë pozitive, një histori suksesi… Çfarë rruge tjetër na ka mbetur? Lufta e armatosur, lufta guerile? Ne gjithmonë e kemi refuzuar këtë, sepse jemi një forcë demokratike. Një lëvizje proteste demokratike, paqësore dhe e vazhdueshme mund të ketë sukses.

Edi Rama dhe skandali Mogherini

CdB: Rrjeta e drejtësisë duket se po i afrohet Edi Ramës.

Sali Berisha: Po, rasti Balluku është thelbësor, sepse Belinda Balluku ka zbatuar vetëm urdhrat e Edi Ramës që kur u bë shefe e stafit të tij në Bashkinë e Tiranës në fillim të viteve 2000. Ajo nuk ka marrë kurrë ndonjë iniciativë të sajën. Nëse humbet imunitetin, Edi Rama do të ekspozohet drejtpërdrejt.

CdB: A mund ta ndryshojë kjo perceptimin ndërkombëtar për Shqipërinë?

Sali Berisha: Ka tashmë shenja që tregojnë në atë drejtim. Raporti evropian mbi zgjedhjet e fundit parlamentare është dënues, edhe pse këto kritika u injoruan qëllimisht nga Komisioni Evropian. Po shohim gjithashtu një ndryshim në Departamentin e Shtetit të SHBA-së, i cili ka përsëritur nevojën për zgjedhje të lira. Partia Popullore Evropiane (PPE) po bën gjithashtu thirrje për më shumë transparencë, por toleranca që gëzon Edi Rama mbetet e madhe. Shikoni skandalin e korrupsionit që rrethon Federica Mogherini dhe Kolegjin Evropian në Bruges! Po flasim për tre milionë euro të përvetësuara, por këtu në Tiranë, janë shumë më tepër para që janë përvetësuar nga znj. Mogherini dhe miku i saj Rama – po flasim për 20 milionë euro – por askush nuk po heton! I bëj thirrje OLAF-it që më në fund të vijë në Shqipëri.

CdB: Edi Rama e pranoi me padurim ftesën e Donald Trump për t’u bashkuar me “Këshillin e Paqes” të tij. Cili është vlerësimi juaj për këtë zhvillim?

Sali Berisha: Ky është rezultat i përpjekjeve lobuese të Edi Ramës. Ai është gati të shfrytëzojë çdo mundësi për t’u paraqitur si një partner i respektuar i Shteteve të Bashkuara. Në thelb, ky projekt kërkon të zëvendësojë OKB-në, por Edi Rama mbetet krejtësisht cinik në marrëdhëniet e tij ndërkombëtare. Gjashtë vjet më parë, ai e quante publikisht Emmanuel Macronin “idiot”, përpara se të merrej vesh me të dhe ta përshkruante si “mikun e tij më të mirë”.

CdB: Bashkimi Evropian është shumë i vetëdijshëm për rëndësinë e trafikut të drogës dhe pastrimit të parave. Si mund ta kuptojmë vetëkënaqësinë e tij?

Sali Berisha: Durrësi është bërë një port i lirë për trafikantët e drogës, veçanërisht për kartelin Troplini, i cili ka marrë kontrollin dhe është i lidhur me kartelin meksikan Sinaloa. Këto marrëdhënie janë të dokumentuara; xhandarmëria franceze, në veçanti, ishte në gjendje të përgjonte shkëmbimet në shërbimin e mesazheve të koduara Sky ECC. Zyra e prokurorit italian të antimafias është gjithashtu shumë e informuar, por Edi Rama gjithmonë ka ditur si ta blejë bashkëpunimin e Romës. Kështu i ofroi Giorgia Melonit qendrat e emigrantëve në Shëngjin dhe Gjadër.

Nuk i takon Tiranës dhe Beogradit të vendosin për fatin e Kosovës.

CdB: Cila është marrëdhënia juaj me Albin Kurtin?

Sali Berisha: Kam respektin më të lartë për të, dhe Kosova ndoshta është bërë vendi më demokratik në rajonin tonë, por nuk e kam takuar kurrë Albin Kurtin që kur ai u bë Kryeministër. Kosova është një vend i pavarur dhe është rregulli im të mos ndërhyj kurrë në punët e saj. E vetmja herë që e theva këtë rregull ishte duke kundërshtuar shkëmbimin e propozuar të territoreve. Ky projekt u negociua midis Edi Ramës dhe Aleksandar Vuçiçit, pa marrë parasysh dëshirat e vetë kosovarëve. Hashim Thaçi u detyrua ta pranonte. Në të vërtetë, është një ide e vjetër që daton që nga koha e Millosheviqit, dhe ishte duke u diskutuar që në vitet 1992-1993… Vetëm në fillim të viteve 2000, fola me Vuk Drashkoviçin, i cili atëherë ishte Ministër i Punëve të Jashtme i Serbisë, në margjinat e një Samiti Evropian në Selanik. Ai më tha se mund ta zgjidhnim çështjen e Kosovës “brenda pesë minutash” duke arritur një marrëveshje midis nesh, por kjo nuk ndodhi kurrë! Nuk i takon Tiranës dhe Beogradit të vendosin për fatin e Kosovës. Shqipëria duhet ta trajtojë Kosovën si mik, fqinj dhe vend të pavarur. Megjithatë, kur vizitova Kosovën si Kryeministër, gjithmonë e kam nxitur Kosovën të integrojë më mirë komunitetin serb, pasi kjo është çelësi i të ardhmes së saj. U takova me serbë nga Fushë Kosova dhe madje bëra donacione për Manastirin e Graçanicës…/courrierdesbalkans.fr/

The post ‘Courrier des Balkans’ intervistë me Berishën/ Kreu i PD: Kërkojmë dorëheqjen e Ramës dhe Ballukut, qeveria teknike të organizojë zgjedhje të lira dhe mos të prekë gjyqësorin appeared first on Albeu.com.

Moderatorja e njohur Bora Zemani është e ftuara e radhës në podcast-in e Grida Dumës, dhe promoja e publikuar së fundmi premton një rrëfim pa doreza.

Për herë të parë pas shumë kohësh, Bora ka prekur temën delikate të faljes në çift, duke iu referuar në mënyrë të tërthortë por të qartë ribashkimit me Donald Veshajn.

Në videon promovuese, Grida Duma e pyet hapur: “Në çfarë niveli fal ti?”. Përgjigja e Borës tregon pjekuri dhe një analizë të situatës që kaloi.

“Natyrisht nuk fal me naivitet, nuk fal se po gënjehem. Fal me koshience të plotë, e di ku është gabuar, por unë do e fal, do e tejkaloj këtë gjënë,” dëgjohet të thotë ajo.

Më tej, Bora sqaron se falja nuk do të thotë shkelje e parimeve të saj, por një përpjekje për të mos hedhur poshtë gjithçka pa luftuar.

“Nuk e bëj duke zgjeruar kufijtë, jo, kufijtë ngelen të njëjtat… Nëse ka mundësi të shkatërrohet një marrëdhënie dhe të prishet, a kishte ndonjë mundësi për t’u shpëtuar kjo marrëdhënie?”

Sakaq ishte e pashmangshme që kjo deklaratë të lidhej me historinë e bujshme të dashurisë mes saj dhe Donald Veshajt.

Kujtojmë se gjatë pjesëmarrjes në “Big Brother VIP 1”, Donaldi nisi një romancë brenda shtëpisë me këngëtaren Beatrix Ramosaj, duke krijuar një nga trekëndëshat më të komentuar në historinë e televizionit shqiptar.

Ajo romancë përfundoi menjëherë pas daljes së Donaldit nga formati.

Aktori kërkoi rikthimin me Borën, një proces që kërkoi kohë dhe, siç e pranon vetë Bora, një “falje me vetëdije të plotë” për të shpëtuar atë që kishin ndërtuar ndër vite.

The post Bora Zemani flet për herë të parë për raportin e Donaldit me Trixën: Mendova si ta shpëtoj marrëdhënien appeared first on Albeu.com.

Në përvjetorin e 15-të të krimit shtetëror të 21 janarit, kryeministri Rama tha se mbetet një përvjetor i trishtë dhe një plagë e hapur jo vetëm për familjarët e katër protestuesve të vrarë, por edhe për moralin e drejtësisë dhe themelet e shtetit shqiptar.

Duke folur për këtë ngjarje, Rama theksoi se krimi i 21 Janarit i përket atyre krimeve shtetërore për të cilat drejtësia mund të vonojë, por nuk harron, pasi koha nuk i fshin dot nga kujtesa dhe nga tryezat e njerëzve të drejtësisë.

“21 janari ishte përvjetori i trishtë pas vrasjes së 4 protestuesve dhe përsëri erdhi me hijen përqeshëse të padrejtësisë. Mbetet një plagë e hapur jo vetëm për familjarët, por edhe për moralin e drejtësisë dhe themelet e shtetit shqiptar.

Ne përsëri u mblodhëm dhe e bëmë ritin e nderimit të 4 dëshmorëve në prani të familjarëve, të cilët presin drejtësi. 21 janari është në llojin e atyre krimeve shtetërore për të cilat drejtësia vonon, por nuk harron. Koha nuk i zhben dot nga kujtesa dhe nga tryeza e njerëzve të drejtësisë. Shpresoj që SPAK-u, që prej 6 vitesh ka marrë jetë dhe gëzon mbështetjen e padiskutueshme dhe ka pasur gjatë gjithë kohës inkurajimet më të sinqerta për të vënë drejtësinë në binarë, të zgjohet dhe të bëjë punën e vet.”

The post 15 vjet pa drejtësi/ Rama për 21 Janarin: SPAK të zgjohet dhe të bëjë punën e vet appeared first on Albeu.com.

Një zjarr përfshiu në orët e vona të natës një lokal pranë urës së Dajlanit në Durrës.

Lokali nuk ishte në funksion dhe fatmirësisht nuk pati të lënduar.

Zjarrfikësit që mbërritën në vendngjarje, shuan flakët, duke parandaluar përhapjen e zjarrit.

Paraprakisht, sipas burimeve nga shërbimi zjarrfikës, dyshohet se shkak ka qenë një shkëndijë elektrike, në lokalin që prej kohësh ishte i mbyllur. Ajo i dha flakën materialeve brenda, duke shkaktuar vetëm dëme materiale.

The post Zjarr në një lokal në Durrës, dyshohet se flaka nisi nga një shkëndijë elektrike appeared first on Albeu.com.

Kryeministri Edi Rama tha në podcastin “Flasim” se ftesa për përfshirjen e Shqipërisë në Bordin e Paqes u mirëprit, u pranua dhe u ratifikua përmes një projektmarrëveshjeje dhe projektligji, pavarësisht përpjekjeve për ta shoqëruar procesin me zhurmë.

Sipas Ramës, vendimi u miratua me një “po” të fortë, përfshirë edhe votat e atyre që kanë qenë kritikë, duke theksuar se Shqipëria, ka paqen si busullën e vetë.

“Realisht që ishte një ftesë e mirëseardhur, edhe pse nuk e dyshoja që do të kishte zhurmë dhe përpjekje për të bërë tollovi, nuk e mendoja që fantazitë dhe ligësia do të bashkoheshin për t’i dhënë jetë disa teorive dhe përrallave që duhet të jenë vërtet të rënda, që të arrihet deri në pikat ku u arrit.

Ftesa u mirëprit, u pranua dhe u ratifikua në një formë projektmarrëveshjeje dhe projektligji. Shqipëria, si një shtet që ka gjetur paqen si busullën e vet dhe që ka ditur të kontribuojë në tryeza të rëndësishme ndërkombëtare, e aprovoi me një “po” të fortë, edhe me votat e atyre që nuk lanë gjë pa thënë, përkatësinë në këtë bord.”

The post Shqipëria anëtare në Bordin e Paqes / Rama: U miratua me një ‘PO’ të fortë edhe nga kritikët appeared first on Albeu.com.

Mes mjeteve piroteknike, përplasjeve fizike dhe gazit lotsjellës u zhvillua protesta e dyte kombëtare e thirrur këtë të shtunë (24.01) nga opozita shqiptare. Protestuesit hodhën bomba molotovë drejt Kryeministrisë, ndërsa policia reagoi me ujë dhe gaz lotsjellës për të shpërndarë turmën. Sipas njoftimit zyrtar të Policisë së Shtetit 11 efektivë u lënduan. Rreth 20 protestues u shoqëruan.

Për rreth tri orë, opozita përsëriti kërkesat e saj politike: dorëheqjen e kryeministrit Edi Rama dhe të zëvendëskryeministres Belinda Balluku, si dhe ngritjen e një qeverie teknike që do të përgatisë vendin për zgjedhje të parakohshme.

Berisha: “Stina e rezistencës do të vijojë

“Opozita ka arritur në kilometrin e fundit, para triumfit të saj” – u shpreh kreu i Partisë Demokratike, Sali Berisha, përpara protestuesve që ishin vendosur në bulevardin “Dëshmorët e Kombit”, përballë godinës qeveritare. Ai përsëriti akuzat ndaj qeverisë, duke thënë se “sot shumica e shqiptarëve e ka të qartë se Edi Ramakryeson organizatën kriminale më të rrezikshme në Europë”. Fundi i fjalimit të tij, duke mbajtur në dorë një flamur kombëtar, shënoi edhe nisjen e hedhjes së molotovëve dhe fishekzjarreve në drejtim te Kryeministrisë. Forcat e policisë u kundërpërgjigjën me gaz lotsjellës dhe ujë. Më pas protesta u zhvendos drejt godinës së Kuvendit të Shqipërisë, ku pati përplasje të tjera mes protestuesve dhe forcave të rendit.
Pas përfundimit të protestës, Berisha deklaroi se aksioni opozitar nuk do të ndalet me këtë tubim, pasi sipas tij “stina e rezistencës do të vijojë”.

Reagime për protestën

“Asgjë e re nga fronti i së keqes dhe keqbërësi Sali Berisha” – u shpreh kreu i Grupit Parlamentar të Partisë Socialiste, Taulant Balla, menjëherë pas protestës kombëtare të Partisë Demokratike, në një status në rrjetet sociale. “Shpresoj që punonjësit e policisë të lënduar nga molotovët dhe mjetet apo lëndët e tjera të paligjshme të mos kenë dëmtime serioze” – shkruan më tej Balla.

Protesta e së shtunës u zhvillua në një moment të tensionuar politik, disa ditë pas një përplasjeje institucionale mes qeverisë dhe drejtësisë. Në qendër të debatit është vendimi i Gjykatës së Posaçme për pezullimin nga detyra të zëvendëskryeministres Belinda Balluku, një vendim që kryeministri Edi Rama e ka ankimuar në Gjykatën Kushtetuese. Kjo e fundit ende nuk ka marrë një vendim./ DW

The post Demonstrata e opozitës, Deutsche Welle: Për tri orë u përsëritën kërkesat për dorëheqjen e Ramës e Ballukut dhe qeverinë teknike appeared first on Albeu.com.

Policia e Tiranës ka njoftuar zyrtarisht masat e ndërmarra pas protestës së djeshme të Partisë Demokratike.

Sipas autoriteteve janë arrestuar 18 persona, proceduar penalisht 17 të tjerë, ndërsa 2 persona janë shpallur në kërkim.

Mes personave të proceduar janë edhe 4 zyrtarë të PD, 3 prej tyre deputetë.

Sipas njoftimit të policisë, u referuan materialet në Prokurori ku nisi procedimi penal për shtetasin Ervin Minarolli me detyrë sekretar organizativ i subjektit politik Partia Demokratike, për veprën penale “Organizimi dhe pjesëmarrja në grumbullime e manifestime të paligjshme” si dhe shtetasit Luçiano Boçi, Klevis Balliu dhe Gazment Bardhi, për veprën penale “Kundërshtimi i punonjësit të Policisë së Rendit Publik”.

Tiranë

Hodhën lëndë djegëse (molotovë) dhe kundërshtuan dhe goditën punonjësit e Policisë, gjatë tubimit të zhvilluar dje, identifikohen 37 shtetas.

Arrestohen 18 prej tyre, procedohen penalisht 17 dhe shpallen në kërkim 2 të tjerë.

Gjatë tubimit u dëmtuan 11 punonjës policie.

Më datë 24.01.2026, rreth orës 17:00, subjekti politik Partia Demokratike zhvilloi një tubim në bulevardin “Dëshmorët e Kombit”, përpara Kryeministrisë dhe Parlamentit.

Gjatë zhvillimit të tubimit, disa prej pjesëmarrësve kanë kundërshtuar punonjësit e Policisë së Shtetit që ishin të planëzuar me shërbim për garantimin e rendit dhe sigurisë publike, si dhe kanë hedhur drejt tyre lëndë djegëse (molotovë).

Si rezultat i veprimeve hetimore, u identifikuan 37 shtetas që kanë kryer veprime të kundërligjshme gjatë tubimit. Në vijim:
-u arrestuan në flagrancë shtetasit: A. L., 19 vjeç, A. Ll., 26 vjeç, A. L., 24 vjeç, A. M., 30 vjeç, T. K., 25 vjeç, E. Sh., 24 vjeç, S. S., 21 vjeç, E. M., 30 vjeç, A. T., 50 vjeç, R. H., 24 vjeç, B. S., 48 vjeç, E. H., 22 vjeç, A. T., 47 vjeç, L. Xh., 26 vjeç, B. B., 48 vjeç, E. H., 40 vjeç, R. B., 40 vjeç dhe H. C., 20 vjeç;
-nisi procedimi penal për shtetasit:B. N, E. V, A. P, K. K., F. P, M. K, D. B, R. K, A. Z, R. T, dhe 3 të mitur;
-u shpallën në kërkim shtetasit S. D dhe E. Ll.

Gjithashtu, u referuan materialet në Prokurori ku nisi procedimi penal për shtetasin E. M., me detyrë sekretar organizativ i subjektit politik Partia Demokratike, për veprën penale “Organizimi dhe pjesëmarrja në grumbullime e manifestime të paligjshme” si dhe shtetasit L. B, K. B dhe G. B, për veprën penale “Kundërshtimi i punonjësit të Policisë së Rendit Publik”.

11 punonjësit e Policisë që mbetën të dëmtuar gjatë tubimit morën mjekim në spital dhe janë jashtë rrezikut për jetën.

Grupi hetimor vijon punën për identifikimin e shtetasve të tjerë që mund te kënë kryer veprime të kundërligjshme gjatë tubimit të zhvilluar dje.

Materialet procedurale iu referuan Prokurorisë së Tiranës, për veprime të mëtejshme.

The post Protesta e opozitës, policia reagim zyrtar: 18 persona të arrestuar, 17 të proceduar! Mes tyre 3 deputetët e PD appeared first on Albeu.com.

Kryeministri Edi Rama ka reaguar në rrjetin social X lidhur me protestën e zhvilluar një ditë më parë nga Partia Demokratike, duke e cilësuar atë si një akt dhune të organizuar dhe të papranueshëm në një vend europian.

Në reagimin e tij, Rama shprehet se në Europë ka lloje të ndryshme protestash dhe protestuesish, nga anarkistë e ekologjistë, te studentë apo grupe ekstremiste, të cilët shpesh maskohen dhe kryejnë akte vandalizmi, duke dëmtuar prona dhe plagosur punonjës policie. Megjithatë, sipas tij, ekziston vetëm një parti parlamentare në Europë që, që nga krijimi i saj, e ka dhunën pjesë të pandarë të aktivitetit politik.

“Kjo parti ka në program shkatërrimin e pronës, sulmin ndaj institucioneve dhe mobilizimin e paramilitarëve, të cilët deri dje ishin çeta e liderit shpirtëror, ndërsa sot janë mercenarë të rekrutuar me para nga rrugaçët e lagjeve”, shkruan Rama.

Kryeministri shton se protestat e fundit kanë lënë pas ndotje dhe shkatërrim në bulevard, duke i krahasuar ato me “jashtëderdhjen në rrugë të plakut të lajthitur që i organizon”, ndërsa i cilëson si shenjë të një “degjenerimi të pandalshëm dhe dëshpërimi të pangushëllueshëm”.

Në fund të reagimit të tij, Rama u ka uruar shërim të shpejtë punonjësve të policisë që u plagosën gjatë protestës.

The post Rama reagon pas protestës së PD: Degjenerim i pandalshëm! Mercenarë të rekrutuar nga rrugaçët e lagjeve hedhin molotovë appeared first on Albeu.com.

Një fëmijë është shoqëruar në komisariat pas protestës kombëtare të PD. Mësohet se i ndaluari nga policia quhet Romeo Kora. Pasi lajmi u bë publik në media, Policia e Tiranës ka reaguar duke treguar edhe arsyet e ndalimit të të miturit.

Sipas bluve, ai ka qëlluar me gurë në drejtim të efektivëve gjatë protestës para Kuvendit.

Policia bën me dije se i mituri u shoqërua për verifikim në ambientet e komisariatit, ndërsa pas veprimeve procedurale dhe sqarimit të rrethanave, Romeo Kora i cili ka rezultuar se ishte 14 vjeç, ai u la i lirë.
Në lidhje me shoqërimin e një të mituri në ambientet e Komisariatit të Policisë Nr. 1, sqarojmë se gjatë veprimeve të shërbimeve të Policisë për parandalimin e sjelljeve dhe veprimeve të rrezikshme, në tubimin e mbajtur ditën e sotme, është konstatuar një i mitur duke gjuajtur me gurë dhe sende të forta në drejtim të shërbimeve të Policisë. Për këtë arsye, i mituri është marrë për verifikim, nga ku rezultoi të ishte i moshës 14 vjeç.

Theksojmë se shtetasi i mitur në asnjë moment nuk është mbajtur në ambiente të përbashkëta me persona të rritur të ndaluar apo të shoqëruar, por ka qëndruar në një ambient të përshtatshëm dhe është trajtuar me kujdes, në përputhje me parimet dhe garancitë ligjore për të miturit. Ai është lënë i lirë menjëherë pas mbërritjes së përfaqësuesit ligjor.

Në lidhje me veprimet e punonjësve të Policisë gjatë trajtimit të këtij rasti, është njoftuar menjëherë Drejtoria e Standardeve Profesionale në Drejtorinë e Përgjithshme të Policisë së Shtetit, si dhe Agjencia e Mbikëqyrjes Policore, për verifikimin e plotë të rastit.

The post Shoqërimi i të miturit/ Policia e Tiranës: Gjuante me gurë drejt efektivëve. Pas verifikimit në komisariat u la i lirë, ishte 14 vjeç appeared first on Albeu.com.

Për ditën e diel vendi ynë do të ndikohet nga kushte atmosferike të paqëndrueshme. Moti parashikohet të jetë fillimisht me vranësira të dendura, pas orëve të mëngjesit deri në orët e pasdites mot me alternime kthjellimesh dhe vranësira, në mbrëmje mot i vranët.

Reshjet e shiut priten të jenë prezente që në orët e para të 24-orëshit deri në orët e mëngjesit me intensitet të ulët në pjesën më të madhe të vendit. Gjatë ditës reshjet e shiut me intensitet të ulët lokalizohen vetëm në ekstremin verior dhe atë jugor të vendit.

Në orët e vona të mbrëmjes reshje shiu në të gjithë vendin me intensitet të ulët ndërsa përgjatë vijës bregdetare dhe ultësirës perëndimore reshje shiu me intensitet deri mesatar.
Në zonën e Alpeve, dhe në relievet malore në verilindje e juglindje reshje dëbore me intensitet të ulët.

Era do të fryjë me drejtim jug – juglindje, me shpejtësi mesatare 10 m/s, përgjatë vijës bregdetare dhe në zonat luginore era me shpejtësi deri në 22 m/s. Deti – Valëzimi forcës 4-6 ballë.

The post Vranësira dhe kushte atmosferike të paqëndrueshme, parashikimi i motit për këtë të diel appeared first on Albeu.com.

Dëmet nga fatkeqësitë natyrore për Shqipërinë janë një lajm periodik. Vendi ynë rregullisht i ekspozuar ndaj këtyre fatkeqësive dhe ato nuk mungojnë të godasin ekonominë me përpikëri, ndonjëherë më shumë dhe ndonjëherë më pak. Me përjashtime të rralla, vera është stinë zjarresh, vjeshta ose dimri stinë përmbytjesh.

Si zonë sizmike, një herë në disa dekada vendi përballet me tërmete që shkaktojnë dëme të mëdha materiale dhe njerëzore. Në nëntor 2019, vendi u godit nga një tërmet i fuqishëm që shkaktoi dëme të vlerësuara për më shumë se 1 miliard euro.

Nga kjo shumë, tregu i sigurimeve pagoi vetëm rreth 40 milionë euro, pikërisht për shkak të shkallës së ulët të sigurimit. 46 njerëz humbën jetën, ndërsa mijëra të tjerë humbën shtëpitë apo pronat. Duke qenë se tërmeti ishte një ngjarje me ndikim të gjerë në territor dhe në popullsi, mund të mendohej se edhe efekti ndërgjegjësues do të ishte më i madh.

Në fakt, as tërmeti nuk mjaftoi për t’i shkundur shqiptarët në këtë drejtim. Rreziku i vazhdueshëm, që më tepër materializohet rregullisht dhe bëhet shpeshherë i prekshëm, nuk ka ndryshuar shumë në ndërgjegjësimin për të siguruar pronat dhe ekonomitë nga dëmet e fatkeqësive.

Sipas vlerësime të Fondit Monetar Ndërkombëtar (FMN), Shqipëria ka një shpeshtësi të katastrofave natyrore prej 0.8 në vit, ndërsa kostoja mesatare dhe mediane për secilën ngjarje vlerësohet përkatësisht sa 0.6% dhe 1.3% të Prodhimit të Brendshëm Bruto.

Sigurimi i fatkeqësive, vetëm 10 euro për frymë

Përmbytjet e radhës e kanë gjetur ekonominë shqiptare edhe njëherë me mbulim të papërfillshëm me sigurime nga fatkeqësitë.

Të dhënat nga Autoriteti i Mbikëqyrjes Financiare (AMF) tregojnë se për vitin 2024 vlera e primeve të shkruara bruto në sigurimin nga zjarri dhe forcat e natyrës ishte 2.2 miliardë lekë ose rreth 218 milionë euro. As viti 2025 nuk ka sjellë përmirësime domethënëse. Për 11-mujorin, rritja e primeve të shkruara bruto në këtë klasë sigurimi ishte 4.3%.

Duke projektuar këtë rritje për të gjithë vitin 2025 primet e shkruara bruto do të rezultonin rreth 2.3 miliardë lekë ose rreth 23.5 milionë euro. Kjo përkthehet në prim vjetor sigurimi prej afërsisht 10 eurosh për person. Bazuar në numrin vjetor të policave të sigurimit, mund të vlerësohet se në Shqipëri janë të siguruara afërsisht 5% e numrit të përgjithshëm të banesave (duke iu referuar Censit 2023).

Ky është sigurisht një vlerësim indikativ, sepse jo të gjitha primet e sigurimit nga fatkeqësitë u takojnë individëve apo familjeve. Më shumë se 90% e primeve të sigurimit nga katastrofat natyrore janë të përqendruara në qarkun e Tiranës, ndërsa pjesa tjetër e vendit është në masën dërrmuese e pambuluar ndaj këtyre rreziqeve.

Megjithëse ligjërisht sigurimi i pronës nga fatkeqësitë natyrore është vullnetar, në praktikë pjesa më e madhe e kontratave të sigurimit për këtë produkt janë të lidhura me pronat e lëna si kolateral për kreditë bankare.

Në rastet kur kredia është e siguruar me kolateral, sigurimi i tij është kusht i vendosur nga banka për huamarrësin, ndaj edhe në këtë rast bëhet fjalë për një produkt faktikisht të detyrueshëm. Për vitin 2024, siguruesit paguan rreth 643 milionë lekë ose 6.4 milionë euro dëme nga zjarri dhe fatkeqësitë natyrore. Për vitin 2025, deri në fund të 11 mujorit, dëmet e paguara paraqiten në rënie me gati 30% krahasuar me një vit më parë.

Këto shifra tregojnë qartë se fatura financiare e dëmeve nga forcat natyrore bie në pjesën dërrmuese mbi subjektet e prekura ose mbi taksapaguesit, në rastet kur qeveria merr përsipër dëmshpërblimet.

Avni Ponari, drejtor i përgjithshëm i Sigal Insurance Group thotë se mes shqiptarëve vazhdon të mbizotërojë mentaliteti që problemet duhet t’ia zgjidhë dikush tjetër, pa marrë përgjegjësinë të kujdeset për veten.

“Sot ne do të duhej të ishim duke paguar për të gjithë ata që janë të përmbytur, për ata që i godet zjarri, për ata që i godet tërmeti, sepse ky është misioni i sigurimeve. Këtë detyrë e kanë edhe organizmat shtetërorë: ta bëjnë sa më efikase, që njerëzit ta dinë, të sigurohen dhe autoritetet përkatëse të dalin dhe t’i garantojnë pagesat, sepse ti lidh një kontratë sigurimi.

Shqiptarët i kanë sytë nga shteti, nga autoritetet shtetërore, nga bashkitë; nuk marrin, nuk blejnë sigurime. Një sigurim apartamenti kushton vetëm 50 euro. Një sigurim shtëpie nga përmbytja kushton 50–100 euro.

Një sigurim biznesi kushton 50–100 euro. Këto janë produkte që duhen konsumuar, që duhen marrë nga klienti, por a është populli shqiptar i interesuar t’i bëjë? Jo,” thotë z. Ponari.

Disa nuk sigurohen, disa nuk mund të sigurohen

Niveli i ulët i sigurimit në Shqipëri, megjithatë, nuk është vetëm dhe ekskluzivisht një problem i mungesës së vullnetit dhe ndërgjegjësimit për t’u siguruar.

Në disa raste, mungesa e një menaxhimi të përshtatshëm të rrezikut apo mosgarantimi i mbajtjes së përgjegjësive ligjore i bën prona të veçanta të pasigurueshme, për shkak të nivelit të lartë të rrezikut.

Drejtuesit e kompanive shprehen se ka raste kur sigurimi nuk është i mundur ose ofrohet vetëm me kushte shumë të kufizuara për shkak të nivelit të lartë të riskut.

“Këto raste lidhen kryesisht me ndërtime në zona te caktuara të ekspozuara ndaj përmbytjeve, pranë shtretërve të lumenjve, në zona të ulëta gjeografike ose në prona pa dokumentacion të rregullt ligjor.

Po ashtu, objekte bujqësore dhe industriale pa masa mbrojtëse ose pa infrastrukturë parandaluese përbëjnë një risk që shpesh nuk mund të mbulohet nga tregu i sigurimeve ose mbulohet vetëm me prime shumë të larta,” shprehet Venera Xhillari, zëvendësdrejtore e përgjithshme e kompanisë së sigurimeve “Atlantik”.

Ajo thekson se këto janë raste ku mungesa e planifikimit urban dhe e kontrollit institucional reflektohet drejtpërdrejt në pamundësinë për sigurim.

Klaidi Çitozi, drejtor i përgjithshëm i Sigma Vienna Insurance Group, thotë se sigurimi nuk mund të funksionojë i shkëputur nga infrastruktura dhe politikat publike. Sipas tij, shoqëria duhet të marrë përgjegjësi për përmirësimin e infrastrukturës dhe masave parandaluese.

“Menaxhimi i riskut nga fatkeqësitë natyrore kërkon një qasje të integruar dhe të mirëstrukturuar, ku sigurimet përbëjnë një shtyllë kyçe, por jo të vetmen.

Përveç investimeve në infrastrukturë parandaluese, planifikimit urban afatgjatë, hartave të riskut dhe forcimit të standardeve të ndërtimit, një element thelbësor është edhe vendosja e sigurimit të detyrueshëm nga rreziqet bazë, si tërmeti dhe përmbytja.

Roli i shtetit është vendimtar në krijimin e një kornize institucionale që ul ekspozimin ndaj këtyre rreziqeve dhe i bën ato të menaxhueshme si për qytetarët, ashtu edhe për tregun e sigurimeve.

Një skemë e tillë do të kontribuonte në ndërtimin e një sistemi më të qëndrueshëm dhe të aftë për përballimin e goditjeve, ku barra financiare e fatkeqësive natyrore nuk rëndon në mënyrë disproporcionale mbi buxhetin e shtetit apo individët, por shpërndahet në mënyrë të balancuar dhe të parashikueshme në nivel kombëtar,” thotë z.Çitozi.

Ligji për sigurimin e detyrueshëm, qeveria nuk po i zgjidh ende dilemat

Pas tërmetit të vitit 2019, qeveria shqiptare vendosi t’i kthehet idesë për të ngritur një skemë të detyrueshme sigurimi nga fatkeqësitë, por me objekt vetëm sigurimin e tërmeteve. Një variant i parë i projektligjit u hodh për konsultim në vitin 2023, por nuk u propozua më tej për miratim në Kuvend.

Në muajin korrik të vitit të kaluar, qeveria shqiptare e riktheu për konsultim, pas dy vitesh, projektligjin për sigurimin e detyrueshëm të banesave nga tërmetet. Varianti i ri i projektligjit nuk solli ndryshime të mëdha në thelbin e konceptimit të skemës së sigurimit nga tërmetet krahasuar me variantin fillestar të vitit 2023.

Ai përcakton detyrimin për sigurimin e të gjitha banesave në vend, me pak përjashtime (psh. shtëpitë e ndërtuara prej argjile, qerpiçi, kallami, etj apo ndërtesave me vendndodhje të lëvizshme apo të përkohshme).

Skema e sigurimit do të administrohet nga një ent i posaçëm me kapital shtetëror që do të ngrihet për këtë qëllim, Fondi Kombëtar për Sigurimin e Detyrueshëm nga Tërmetet.

Shuma e sigurimit do të përcaktohet me vendim të Këshillit të Ministrave, ndërsa primi i sigurimit që do të paguajnë pronarët e banesave do të përcaktohet nga Fondi për tërmetet, pas marrjes së pëlqimit nga ministri përgjegjës për financat. Për shtresat nevojë, primi i sigurimit do të financohet nga buxheti i shtetit.

Ashtu si në variantin fillestar, projektligji i ri përcakton se subjektet të cilat nuk zbatojnë detyrimin për të lidhur kontratë sigurimi nga tërmetet, nuk marrin shërbime kadastrale, nuk marrin shërbime nga e-Albania dhe as nga Qendra Kombëtare e Biznesit.

Ndër ndryshimet e pakta krahasuar me variantin fillestar të projektligjit është ndryshimi i përcaktimeve lidhur me afatin maksimal për dëmshpërblimin, që në variantin fillestar parashikohej të ishte 9 muaj.

Në projektligjin e ri, rregullat, afatet, kriteret dhe procedurat për pagesën e dëmeve të shkaktuara nga ngjarjet e tërmeteve përcaktohen me udhëzim ministrit të Financave. Megjithatë, në projektligj përcaktohet se dëmshpërblimi në varësi të shkallës së dëmtimit dhe masës së dëmshpërblimit, paguhet brenda tre muajve, duke filluar nga momenti i plotësimit të plotë të dokumentacionit përkatës.

Një risi e projektligjit të ri është edhe saktësimi i rregullave të dëmshpërblimit në rastin kur një person është i siguruar si me një kontratë të detyrueshme ashtu edhe nëpërmjet një kontrate sigurimi vullnetare.

Në një rast të tillë, pagesa e dëmshpërblimit do të bëhet sipas kushteve të sigurimit të detyrueshëm. Për shumën e siguruar që tejkalon vlerën e kontratës së sigurimit të detyrueshëm, pagesa do të bëhet sipas kontratës së sigurimit vullnetar.

Një ndryshim tjetër në projektligj është heqja e parashikimit për mundësinë e menaxhimit të fondit nga një operator ndërkombëtar. Në projektligjin e mëparshëm, përcaktohej që Fondi për Tërmetet mund të delegonte menaxhimin dhe administrimin operacional pranë një Operatori Teknik Ndërkombëtar. Në versionin e ri të projektligjit, ky përcaktim është hequr.

Ndërkohë që në projektligjin e mëparshëm përcaktohej se menaxhimi i rrjetit të shitjeve do të bëhej nga një agjent i vetëm, i zgjedhur me vendim të Këshillit të Ministrave, në variantin e ri parashikohet mundësia që agjentët e shitjeve të jenë më shumë se një. Këshilli i Ministrave do të përcaktojë përcakton agjentin ose agjentët për menaxhimin e shitjeve, komisionet përkatëse dhe kushtet e bashkëpunimit me ta.

Projektligji i ri gjithashtu rishikon dispozitat që parashikonin mbikëqyrjen e Fondit për Tërmetet nga Autoriteti i Mbikëqyrjes Financiare. Në variantin e ri, përcaktimet për mbikëqyrjen e AMF-janë më të kufizuara, por nga ana tjetër e bëjnë më evazive dhe më pak të qartë për të kuptuar se në ç’masë dhe me çfarë instrumentesh AMF do ta mbikëqyrë këtë fond.

Projektligji i ri përcakton se AMF, në bazë të këtij ligji dhe përsa është e nevojshme në zbatim të legjislacionit për sigurimin dhe risigurimin në Republikën e Shqipërisë, mbikëqyr Fondin për Tërmetet, në drejtim të unifikimit të rregulloreve dhe standardizimit të akteve rregullatore gjatë veprimtarisë së tij me këtë ligj dhe ligjet e fushës, të transparencës ndaj publikut, të zbatueshmërisë së termave dhe kushteve të kontratave që lidhen me të siguruarit, si dhe të monitorimit të zbatueshmërisë së politikave të investimeve, kur konstaton se nuk janë në përputhje me aktet rregullatore të vendosura apo kur rrezikojnë pozicionin financiar të shoqërisë. Gjithashtu, AMF mund të nxjerrë rekomandime për përmirësimin e veprimtarisë së Fondit për Tërmetet./Monotor.al

The post Fatkeqësi pa sigurim/ Shqipëria përballet me kriza natyrore, por vetëm 5% e banesave janë të mbuluara appeared first on Albeu.com.

Brikena ka marrë një surprizuese këtë të shtunë.

Pas një rrëfimi emocional në living, banorja doli jashtë në oborr, aty ku pa një tepsi me fli, e përgatitur nga nëna e saj.
Më pas, ishte kjo e fundit e cila doli nga dhoma e dëshirave dhe u takua me Brikenën, e cila nuk i mbajti dot lotët.

Pasi e takoi, nëna e Brikenës tha: “I përshëndes të gjithë banorët. Mateon dhe të gjithë të tjerët. Jeni shumë të mirë”.
Më pas ishte Matoeo i cili doli në oborr dhe takoi pikërisht nënë e Brikenës, duke i thënë: “Të kërkoj falje nëse ju kam lënduar juve dhe Brikenën”.

The post Surprizë emocionuese për Brikenën, banorja ‘shpërthen’ në lot pas takimit me nënën e saj/ Mateo: Të kërkoj falje… appeared first on Albeu.com.