Demokratët janë aq të bindur se harta e tyre territoriale me 100 bashki afron shërbimet te qytetari dhe frenon shpopullimin e zonave rurale, sa janë të gatshëm të sfidojnë mazhorancën me referendum.

Sfida më kryesore është kjo: ftojmë politikën, mazhorancën, por edhe qytetarët, të realizojmë një referendum. Dy projektet të hidhen në referendum dhe të jetë qytetari ai që vendos e përcakton se cili është modeli që i shkon më afër interesit të tij.

Motivi pse nuk e dorëzojnë draftin e tyre në Kuvend shkon përtej procedurave.

Boçi: Parlamenti nuk ka autoritet, pas përfundimit të punës së komisionit, të shqyrtojë një produkt që i vjen nga një grup deputetësh. Sepse nuk është çështje procedure, është çështje demokracie. Produkti nuk ka autoritet moral, politik, parlamentar apo kushtetues dhe nuk mund të kalojë nëpërmjet Parlamentit.

Po nëse PS refuzon sfidën për referendum, a do ta kërkojë zyrtarisht PD thirrjen e qytetarëve në votë?

Boçi: Sigurisht që ne do ta kërkojmë, por përballë duhet të jetë edhe sfidanti, apo jo, në një referendum? Pra, duhet që edhe projekti i tyre të kalojë nëpërmjet referendumit. Ne do t’i ndjekim të gjitha procedurat për ta realizuar një gjë të tillë.

I pyetur nga gazetarët, Sali Berisha nuk i fshehu pritshmëritë që ka ndaj ndërkombëtarëve.

Berisha: Reforma e përbashkët territoriale dhe reforma e përbashkët zgjedhore janë të përcaktuara në raportin e Komisionit Evropian të tetorit të vitit të kaluar si kushte për progresin e Shqipërisë drejt Bashkimit Evropian.

Me ndryshimet në drejtimin e selive diplomatike, momenti nuk është më ideali.

Berisha: Ky akt i tërheqjes së njëanshme, bojkoti i njëanshëm i qeverisë, ndodhi në një moment vakancash dhe largimesh, por kam bindjen e thellë se komuniteti ndërkombëtar nuk do të pranojë një tërheqje të tillë.

Gazetarët e pyetën gjithashtu kryedemokratin nëse ecja në mënyrë të njëanshme e mazhorancës me ndarjen e saj territoriale vë në pikëpyetje praninë e opozitës në Komisionin tjetër të Reformës Zgjedhore.

Berisha: Ne kemi bindjen se Edi Rama nuk pranon asgjë që lëkund apo cenon sadopak pushtetin e tij. Por qëndrimi ynë është të hartojmë dhe t’u paraqesim shqiptarëve kodin zgjedhor më të mirë dhe sipas standardeve më të mira ndërkombëtare.

Deputeti socialist Erion Braçe ka kërkuar rikthimin e bordit të transparencës për karburantet, duke reaguar pas rritjes së çmimit të naftës që sot sipas tij shitet me 214-216 lekë për litër, ndërsa varianti më cilësor i saj arrin deri në 230 lekë për liter.

Në një video të postuar në Facebook, Braçe paralajmëron se rritja është e qëllimshme dhe se sezoni turistik mund të marrë një goditje kolosale si pasojë e rritjes së çmimit të naftës duke i kthyer destinacionet turistike në vende qëndrimi dhe jo vende të vizitueshme.

Ai kritikon tregëtarët që sipas tij ‘fituan para me lopatë’ gjatë kohës së Bordit dhe kërkon me ngulm kthimin e tij që kriza e ccmimeve të mos kufizojë lëvizshmërinë gjatë sezonit turistik.

“Nafta kërceu sot në 214-216 lekë për litër. E zakonshmja kjo. Nafta tjetër, ajo e mira që nuk të djeg makinën, nis me 218 dhe arrin në 230 lekë për litër. Tregtarët e rritën çmimin në nisje të fundjavës, kur ndodh gjithashtu fluksi më i madh i pushuesve të korrikut që kthehen dhe fluksi edhe më i madh i pushuesve të gushtit që shkojnë në destinacionet turistike. E qëllimshme? Ja bën muuuuuuu! E njëjta gjë edhe sot në Itali, nga mjeshtri i Kartelit të Naftës kopjon vazhdimisht. Një javë e pak më parë kërkova kthimin në punë të bordit, paralajmërova këtë që po ndodh sot. E dija që këta që nuk fituan me lopatë gjatë kohës së bordit, do bënin çmos të fitonin me kovën e skrepit tani, në pik të sezonit. Duhet bordi që këta mos i japin një goditje fatale sezonit në kulmin e tij, duke shtrenjtuar e thuajse kufizuar lëvizshmërinë nëpër destinacionet e këtij vendi!”

Reagimi i deputetit Erion Braçe vjen në një kohë kur qeveria ka nxjerrë për konsultim një projektvendim që vendos rregulla të reja për tregun e karburanteve. Projektakti parashikon shenjimin e detyrueshëm të naftës dhe benzinës me një substancë të posaçme, me synimin për të gjurmuar lëvizjen e tyre në të gjithë zinxhirin e furnizimit, për të forcuar kontrollin mbi tregun dhe për të luftuar evazionin fiskal.

Sipas projektvendimit, shërbimi i shenjimit do të kryhet ekskluzivisht nga shoqëria shtetërore ALBTrace CO, ndërsa subjektet që importojnë, tregtojnë apo shpërndajnë karburante do të paguajnë një tarifë prej 6.5 euro pa TVSH për çdo 1 mijë litra të shënjuara.

Projektakti parashikon gjithashtu që, pas një periudhe implementimi prej gjashtë muajsh, asnjë produkt që i nënshtrohet shenjimit nuk do të mund të importohet, tregtohet, transportohet apo të hidhet në treg pa kaluar më parë procesin e shenjimit dhe monitorimit.

Belinda Balluku ka mbërritur mesditën e sotme në ambientet e SPAK, e shoqëruar nga avokati i saj Adrian Kalija.

Këtë të premte, SPAK pritet që t’i komunikojë akuzën ish-zv. Kryeministres Balluku.

Ndërsa u fut në SPAK, Balluku nuk ka bërë asnjë deklaratë për gazetarët.

Bashkëkryetari i Komisionit për Reformën Territoriale, Arbian Mazniku, ka prezantuar draftin e ri që parashikon reduktimin e numrit të bashkive në vend nga 61 në 46. Gjatë një konference për mediat, ai sqaroi se ky propozim bazohet në një sërë kriteresh kryesore si ngurtësia buxhetore, efiçenca e stafit dhe mbledhja e të ardhurave.

Gjithashtu, në vlerësimin e efikasitetit të bashkive analizohen dendësia e popullsisë, indeksi i shpërndarjes së banorëve dhe performanca ekonomike e çdo zone. Qëllimi i këtyre ndryshimeve është rritja e qëndrueshmërisë financiare dhe përmirësimi i drejtpërdrejtë i shërbimeve ndaj qytetarëve.

“Elementi i dytë lidhet me ngurtësinë buxhetore, ç’pjesës ka zënë dhe ç’pjesë ka të lirë. Apo bashki si Kavaja 92% e ka të zënë dhe pjesën tjetër e ka ë lirë. Elementi i tretë është efiçenca e stafit, sa punonjës ka një bashki për çdo 1 mijë banorë në territorin e saj.

Janë 17 herë më shumë në aparat dhe 10 herë më shumë se banorët. Elementi tjetër lidhet me grumbullimi. Të gjitha këto lidhen me eficencën e bashkive. Kemi zona me dendësi të mëdha, apo zona që e kanë dendësinë të vogël. Elementi tjetër është totali i dendësisë. Numri i banorëve është i rëndësishëm.

 Elementi tjetër ka të bëjë me indeksin e shpërndarjes së banorëve, sepse kjo na mundëson të mësojmë se si shkon shërbimi te njerëzit. Elementi tjetër është ai i varësisë, ç’pjesë gjeneron ekonomi dhe cila pjesë përfiton nga gjenerimi i ekonomisë. Një element tjetër është elementi i perfomancës ekonomike. Punësimi formal, numri i njerëzve të punësuarve për 1 mijë banorë”, tha Mazniku.

Kryetari i Partisë Demokratike, Sali Berisha, akuzoi qeverinë se po vijon, sipas tij, “antireformën territoriale”, duke synuar uljen e numrit të bashkive nga 61 në 46.

Ai përgëzoi grupin e punës të ngritur nga PD për reformën territoriale, të drejtuar nga Luçiano Boçi, duke thënë se ai ka hartuar një projekt të ri, të cilin e cilësoi si një hap të rëndësishëm për zhvillimin e zonave rurale dhe përmbushjen e një prej kushteve të procesit të integrimit evropian.

Berisha deklaroi se kryeministri Edi Rama u tërhoq në mënyrë të njëanshme nga puna e përbashkët për reformën territoriale, pasi, sipas tij, kuptoi se propozimet e Partisë Demokratike po mbështeteshin gjatë konsultimeve.

Ai pretendoi se qeveria synon të reduktojë edhe më tej numrin e bashkive, duke e cilësuar këtë si një politikë që, sipas tij, dëmton komunitetet lokale dhe nxit më tej shpopullimin e vendit.

“Dhe pas kësaj antireformë vazhdohet në mënyrën më të papërgjegjshme, më antishqiptare që nga 60 të kalojnë në 40.

Unë duhet të përgëzoj zotin Luçiano Boçi dhe të gjithë anëtarët dhe ekspertët e komisionit, të cilët punuan me një përkushtim të madh për një reformë te re elektorale, e përcaktuar si kusht për integrimin edhe në raportin e tetorit të Komisionit Evropian.

Natyrisht në 14 vite nuk zhbëhen dot ajo boshatisje e madhe që ka ndodhur, ajo braktisje e madhe që ka ndodhur, por një hap i rëndësishëm edhe drejt ripopullimit të zonave të devastuara, drejt ripopullimit të tyre, duhet të jetë edhe reforma territoriale.

Grupi i punës për reformën territoriale me bashkëkryetar Arbër Maznikun, një peng i njohur për shumë vese të tij, kur e them këtë, e them, një njeri që zbaton verbërisht urdhra bashkë me Ervin Demon, dy armiq kryesorë të komuniteteve lokale në Shqipëri me në krye Edi Ramën, dhe punuan, bënë konsulta në mbar vendin, mbeti konsulta në Tiranë për të finalizuar serinë e konsultave.

Ndërkohë që sigurisht grupi punoi për hartën, por atë do ta përfundonte pas konsultave të plota dhe pas ekspertizës ndërkombëtare që do merrnim.

Edi Rama e kuptoi se e ka betejë të humbur.

E kuptoi se reforma territoriale ka ngjallur një pakënaqësi të madhe dhe se kudo që shkuan në konsulta, u mbështetën sugjerimet dhe qëndrimet e përfaqësuesve të PD.

U tërhoq në mënyrë të njëanshme, të padenjë, paraqiti në parlament një raport që nuk u paraqit në komision, që nuk mund të paraqitej kurrë në parlament, dhe e publikoi atë në të cilin tregon se në krimin e tij monstruoz kundër shqiptarëve nuk ndalet, do të heqë edhe 15 bashki të tjera, të reduktojë numrin e bashkive në vendin më malor të Evropës.

Në vendin që 80 përqind të sipërfaqes e ka male dhe kodra, ta përqendrojë në pëllëmbën e tij të zezë të dorës vetëm për qëllime shpopullimi, për qëllimi pasurimi, etj”, tha Berisha.

Ish-ministri i Shëndetësisë, Ilir Beqaj, është liruar nga burgu dhe do të vijojë masën e sigurisë “arrest në shtëpi”.

Vendimi është marrë nga gjykata pas shqyrtimit të kërkesës së Beqajt për shuarjen e masës “arrest në burg”, me argumentin se janë tejkaluar afatet e paraburgimit.

Beqaj ndodhej në masën e sigurisë “arrest në burg” në kuadër të hetimeve për dosjen e SASPAC, ndërsa tashmë do të qëndrojë në masën më të lehtë të sigurisë, “arrest në shtëpi”.

Kryeministri Edi Rama e cilësoi ditë historike për Forcat e Armatosura, duke theksuar se Shqipëria po hyn në një fazë të re të industrisë së mbrojtjes dhe partneriteteve strategjike.

Ai njoftoi krijimin e një baze të re logjistike në shërbim të kompanive dhe emergjencave, si edhe hapjen e Ministrisë së Mbrojtjes për turizmin.

Sipas Ramës, sot 30 vende i drejtohen Shqipërisë për të siguruar mjete të prodhuara në vend.

“Edhe ne vetë kemi qenë më pak të ditur dhe jo mjaftueshmërisht të guximshëm, dhe këtu e kam fjalën për bazën e re të logjistikës, e cila do të jetë një kompani në shërbim të të gjitha kompanive të vendit. Do të jetë patjetër në funksion të emergjencave. Kjo është një gjë e jashtëzakonshme.

Një tjetër gjë e jashtëzakonshme është hapja e Ministrisë së Mbrojtjes për turizmin. Këto partneritete janë rruga jonë e re, do të bëjmë partneritet të tjera në fusha të tjera. Është një ditë e bukur dhe një ditë historike të Forcave tona të Armatosura.

Kjo është shfaqja e parë dhe do të ketë të tjera, që të shikojnë se si po ngjitet Shqipëria në këtë aspekt. 30 vende i drejtohen sot Shqipërisë për të marrë mjete të prodhuara po këtu, falë vizionit, kurajës dhe vullnetit tonë”, tha Rama.

Punonjës të administratës së Bashkisë Klos kanë protestuar kundër propozimit për riorganizimin territorial që parashikon shkrirjen e kësaj bashkie, duke bojkotuar punën.

Sipas raportimeve, administrata vendore kundërshton përfshirjen e Klosit në procesin e reformës administrativo-territoriale dhe kërkon rishikimin e vendimit.

Protestuesit kanë deklaruar se aksioni do të vijojë deri në marrjen e një vendimi tjetër nga institucionet përgjegjëse.

“Kemi tepër të drejtë. Bashkia Klos duhet të funksionojë. Do të jetë më keq. Ata mund të kenë menduar se do të jetë për më mirë, por ne nuk kemi fare shpresë”, u shpreh një nhga banorët e zonës.

“Jam kundër këtij projekti për ndarjen e bashkive. Kjo është loja që bëjnë të dyja partitë bashkë”, tha një tjetër banor.

Reagime të ngjashme janë paralajmëruar edhe në bashkitë Belsh dhe Prrenjas, të cilat gjithashtu pritet të përfshihen në procesin e riorganizimit sipas propozimit të mazhorancës.

Një ditë më parë, protesta u zhvilluan edhe në Poliçan, ku disa qytetarë të lidhur me Partinë Socialiste dogjën teserat e anëtarësisë, ndërsa kreu i PS-së në këtë qytet dha dorëheqjen përpara protestuesve.

Një zyrtar i lartë i Hamasit tha se grupi palestinez nuk do të ndërmarrë asnjë hap drejt çarmatimit përpara se forcat izraelite të tërhiqen nga Rripi i Gazës.

Ghazi Hamad, një anëtar i delegacionit negociues të Hamasit, tha se çështja e çarmatimit është e lidhur me tërheqjen e Izraelit nga Gaza dhe rindërtimin e territorit. Hamad tha se Izraeli nuk do të kishte asnjë rol në procesin e çarmatimit, i cili në vend të kësaj do të kryhet nga një komitet kombëtar palestinez.

Ai theksoi se Hamasi nuk do të zbatojë asnjë masë çarmatimi nëse Izraeli fillimisht nuk përmbush detyrimet e tij sipas marrëveshjes. Hamad i përshkroi negociatat si “të vështira”, duke thënë se Hamasi u përpoq të siguronte rezultatin më të mirë të mundshëm duke mbetur i përkushtuar për të mbrojtur të drejtat e popullit palestinez.

Ai falënderoi gjithashtu Egjiptin, Katarin dhe Turqinë për përpjekjet e tyre ndërmjetësuese për të ndihmuar arritjen e marrëveshjes.

Vërejtjet e Hamadit erdhën pasi presidenti i SHBA-së, Donald Trump njoftoi se ishte arritur marrëveshje për çarmatimin e plotë të Hamasit dhe grupeve të tjera të armatosura në Gaza, me forcat izraelite të vendosura të tërhiqen në faza ndërsa procesi ecën përpara.

Hamasi ka pranuar një marrëveshje për çarmatimin e plotë të tij dhe të të gjitha grupeve të tjera të armatosura në Rripin e Gazës.

Presidenti amerikan, Donald Trump njoftoi se, pas përfundimit të këtij procesi, forcat izraelite do të tërhiqen nga territori palestinez.

Trump e cilësoi marrëveshjen si një “hap historik” drejt paqes dhe sigurisë, duke bërë të ditur se zbatimi i saj do të zhvillohet në faza të mirëpërcaktuara.

Sipas tij, pas përfundimit të çarmatimit, një Forcë Ndërkombëtare e Stabilizimit, së bashku me një forcë të re policore palestineze, do të marrë përgjegjësinë për sigurinë në Gaza.

Sipas planit, Hamasi dhe fraksionet e tjera palestineze do t’ia dorëzojnë armët një komiteti kombëtar palestinez, ndërsa procesi do të monitorohet nga një mekanizëm ndërkombëtar verifikimi. Çarmatimi do të lidhet drejtpërdrejt me tërheqjen graduale të ushtrisë izraelite nga Gaza.

Megjithatë, zyrtarët izraelitë mbeten skeptikë nëse Hamasi do ta zbatojë marrëveshjen, ndërsa përfaqësues të lëvizjes palestineze kanë theksuar se nuk do të ndërmarrin hapa për çarmatimin derisa Izraeli të nisë tërheqjen nga Gaza dhe të respektojë detyrimet e marrëveshjes.

Trump falënderoi Egjiptin, Katarin dhe Turqinë për ndërmjetësimin e bisedimeve, duke thënë se marrëveshja përbën një pikë kthese në zbatimin e planit të tij 20-pikësh për paqen në Gaza.

Dashi
Nëse do të veproni në mënyrë të pamenduar, nuk do të arrini rezultatet e dëshiruara. Mos tregoni karakterin tuaj stoik dhe të qëndrueshëm gjatë kësaj dite pasi nuk do të jetë zgjedhja më e mirë që do të bëni. Tregoni anën tuaj të ndjeshme dhe bujare. Mundohuni që në mbrëmje të vizitoni disa nga vendet që ju pëlqejnë më shumë.

Demi
Yjet rekomandojnë të dëgjoni zërin tuaj të brendshëm nëse doni të veproni në mënyrë praktike. Intuita do t’ju tregojë se cilat janë veprimet e duhura që duhet të bëni. Mund të ftoheni në një darkë familjare, e cila do t’ju ngrejë humorin.

Binjakët
Në vend që të ndërroni mënyrën tuaj të të jetuarit, ndërroni mënyrën se si ju i shikoni dhe i mendoni gjërat, nëse doni që gjithçka të shkojë sipas planit tuaj dhe mos i shikoni përherë të tjerët si të jenë armiq për ju. Keni aftësi shumë të mira të komunikimit ndaj shfrytëzojini ato.

Gaforrja
Do të jeni të gatshëm për të kaluar një ditë të mrekullueshme. Do të keni mbështetjen e të tjerëve dhe fati do të jetë në anën tuaj. Gjatë orëve të ditës do të tregoni vetëbesim ndërsa në mbrëmje do të jeni tepër romantikë. Shumë prej jush do të kenë ëndrra dhe dëshirë të madhe për të zgjeruar horizontin.

Luani
Mos u mundoni të bisedoni e dialogoni me shumë persona sot. Nën disa kushte të caktuara, komunikimi do të jetë thuajse i pamundur për ju. Mundohuni të kuptoni të tjerët dhe mënyrën e tyre të të vepruarit. Besoni në intuitë dhe mos bëni përherë atë që ju thotë mendja.

Virgjëresha
Gjithçka sot do të varet nga mënyra juaj e të komunikuarit dhe aftësitë diplomatike. Nuk do të mund të bëni progres pa ndihmën e partnerit apo të një interlokutori. Nëse jeni beqar, këshillohet ta kaloni këtë ditë në praninë e miqve. Ata që janë në një marrëdhënie, duhet të përpiqen që të gjejnë një mënyrë për të balancuar raportin.

Peshorja
Do ta keni shumë të vështirë për të aplikuar energjitë tuaja gjatë kësaj dite. Mundohuni të “stakoni” mendjen duke u qetësuar dhe duke mos ndërmarrë asnjë nismë. Dëgjoni ato çfarë do t’ju sugjerojnë dhe zbatoni në realitet atë që mendja juaj ju thotë.

Akrepi
Do të keni nevojë për të krijuar kontakt emocional me personat që ju i doni. Mund të keni shumë pyetje, të cilat nuk do të marrin përgjigje menjëherë. Dyshimet tuja mund të ngelin të tilla nëse nuk i ndani ato me të tjerët, të cilët mund t’ju japin një përgjigje. Komunikimi do të jetë çelësi i çdo problemi.

Shigjetari
Sot do të ndiheni të pasigurt. Gjithçka rreth jush do të jetë e paqartë, por duke u munduar të bëni zgjedhjet e duhura dhe të veproni siç ju dini, do të mund të qetësoni veten tuaj në pjesën e dytë të ditës. Në mbrëmje priten surpriza të këndshme.

Bricjapi
Mos u fshihni nga bota. Tregoni më shumë interes për jetën apo aktivitetet e personave që ju rrethojnë. Kjo do të jetë një ditë shumë e mirë për të komunikuar apo për të rilidhur kontaktet me disa persona. Aftësia për të zgjedhur fjalët e duhura do t’ju ndihmojë që të bini në sy e të viheni re lehtë.

Ujori
Për ju do të jetë çdo gjë tërësisht e mundur sot. Ambicja juaj do të rritet gjatë ditës. Dëshirat tuaja do të bëhen realitet dhe disa persona do t’ju kenë në qendër të vëmendjes. Gjatë kësaj dite do të keni mundësi të rrisni të ardhurat tuaja.

Peshqit
Më në fund, mendimet dhe dëshirat tuaja do të përputhen me njëra-tjetrën. Do të thoni atë që do të mendoni dhe do të mendoni atë që do të thoni. Mos humbisni kohën duke u marrë me gjëra boshe por përcaktoni qëllimet tuaja për këtë muaj të ri që sapo ka nisur.

Qytetarë të Poliçanit kanë protestuar këtë të enjte kundër kundër projektit për shkrirjen e bashkisë së tyre në kuadër të Reformës Territoriale 2.0. Banorët këmbëngulin se Poliçani duhet të vijojë të funksionojë si bashki më vete dhe kundërshtojnë përfshirjen e tij në Bashkinë e Beratit.

Ndërkohë, kryetari i Partisë Socialiste në Poliçan, Erjon Zylyftari, deklaroi para qytetarëve se vendimi për prekjen e bashkisë përbën “një padrejtësi dhe një turp të madh” dhe dha dorëheqje publike nga ky funksion.

Në shenjë proteste dhe pakënaqësie, disa qytetarë dogjën në shesh teserat e anëtarësisë së Partisë Socialiste, ndërsa në pankarta shkruheshin fjalët: “Fëmijët na i larguat, tani doni të na fshini nga harta”.

Kundër këtij propozimi ka shprehur rezerva edhe kryebashkiaku i Poliçanit, i cili është shprehur se shkrirja e bashkive të vogla do të sjellë shpopullimin e qyteteve.

Në përfundim të tubimit, banorët firmosën një peticion, përmes të cilit kërkojnë që Bashkia e Poliçanit të mos përfshihet në ndryshimet e propozuara nga Reforma Territoriale.

Sipas draftit për Reformën Territoriale 2.0, të dorëzuar në Kuvend nga Partia Socialiste, Bashkia e Poliçanit parashikohet të shkrihet dhe t’i bashkohet Bashkisë së Beratit. Ky ndryshim është pjesë e planit për uljen e numrit të bashkive në Shqipëri nga 61 në 46.

Kryeministri Edi Rama ka deklaruar se Partia Socialiste nuk do të largohet nga qeverisja për shkak të protestave, duke theksuar se mandati i saj buron nga vota e qytetarëve dhe shumica parlamentare.

Duke iu përgjigjur pyetjes se përse kërkon të vazhdojë të qeverisë edhe pas 13 vitesh në pushtet, Rama tha se në demokraci askush nuk e trashëgon apo e dorëzon pushtetin sipas dëshirës, por vetëm sipas vullnetit të popullit

“Një parti politike as e trashëgon timonin e pushtetit, as ka të drejtë ta lëshojë rrugës, sepse disa të tjerë duan ta ngasin vetë makinën e pushtetit. PS ushtron pushtetin për aq kohë sa populli ia ka dhënë dhe për aq kohë sa ka votat në Kuvend”, u shpreh ai.

Kryeministri theksoi se as ai vetë nuk ka të drejtë të vendosë se kush duhet të jetë në qeveri apo në opozitë, pasi këtë e përcaktojnë vetëm qytetarët me votë.

Rama komentoi edhe thirrjet për dorëheqjen e tij, duke thënë se nuk mund të largohet nga detyra vetëm sepse “një pakicë thërret në kor.

“‘Rama jepe dorëheqjen’, ajo këngë mua më pëlqen dhe më energjizon. Por të largohesh nga detyra pse një pakicë thërret në kor, është vetëm braktisje e një përgjegjësie të madhe”, deklaroi ai.

Në përfundim, kreu i qeverisë tha se misioni i Partisë Socialiste do të vazhdojë deri në realizimin e objektivit të anëtarësimit të Shqipërisë në Bashkimin Evropian.

“Misioni ynë do të vazhdojë deri në vendosjen e flamurit të Skënderbeut dhe Ismail Qemalit në oborrin e Europës së bashkuar”, u shpreh Rama.

Partia Socialiste ka depozituar në Kuvend draftin për reformën e re administrativo-territoriale, duke e paraqitur atë vetëm me firmat e deputetëve socialistë anëtarë të komisionit të posaçëm, pasi nuk u arrit konsensus me Partinë Demokratike.

Sipas projektligjit, propozohet reduktimi i numrit të bashkive nga 61 në 46. Drafti parashikon gjithashtu një strukturë të re me 71 qytete dhe 387 njësi administrative. Në dokument bëhet një ndarje mes bashkive dhe qyteteve, duke i trajtuar ato si kategori të veçanta.

Ndryshimet nuk prekin ndarjen në qarqe, duke shmangur kështu nevojën për ndërhyrje në Kushtetutë. Reforma parashikon krijimin e 13 bashkive të reja përmes bashkimit të bashkive ekzistuese. Në veri, Puka do të bashkohet me Fushë-Arrëzin, ndërsa Klosi me Matin.

Në Shqipërinë e Mesme, Rrogozhina do të bashkohet me Kavajën, ndërsa Rinasi do t’i kalojë Tiranës. Në Jug, Dimali dhe Poliçani do t’i bashkohen Bashkisë Berat. Patosi do të shkrihet me Fierin, Divjaka me Lushnjën, Selenica me Vlorën, Këlcyra me Përmetin, Maliqi me Korçën, Memaliaj me Tepelenën, Libohova me Gjirokastrën, ndërsa Cërriku dhe Belshi do të bashkohen me Elbasanin. Gjithashtu, Përrenjasi do të bashkohet me Librazhdin.

Drafti i depozituar do t’u dërgohet bashkive dhe këshillave bashkiakë, të cilët kanë një afat prej 60 ditësh për të dhënë opinionet e tyre. Pas përfundimit të këtij procesi konsultimi, projektligji pritet të shqyrtohet në komisionet parlamentare dhe më pas të votohet në Kuvend gjatë sesionit të ri parlamentar, në muajin tetor.

Aktualisht, reforma mbështetet vetëm nga Partia Socialiste dhe Partia Socialdemokrate. Partia Demokratike ka kundërshtuar uljen e numrit të bashkive, duke propozuar ruajtjen ose shtimin e tyre.

Drejtuesi i SPAK, Klodjan Braho, deklaroi se autoritetet shqiptare kishin informacion për vendndodhjen e Ermal Beqirit dhe se arrestimi i tij në Francë nuk ishte rastësi.

“Prokuroria në çdo rast merr vendimin e gjykatës, ia çon organit që ka për detyrë ekzekutimin. Nuk ka qenë veprim i rastësishëm. Grupi hetimor prej disa javësh ka qenë në kontakt me autoritetet franceze. Ka pasur informacion. Ai ka qenë i lokalizuar prej disa javësh. Nuk ka qenë qëllimi vetëm tek arrestimi, por edhe tek veprime të tjera hetimore. Në ditët në vijim do të keni informacion zyrtar. Kaq mund të ndaj sot”, tha Braho në një bashkëbisedim me gazetarët, përcjell A2 CNN.

Braho shtoi se SPAK do të kërkojë sekuestrimin e avionëve të Beqirajt. “Do keni një njoftim. Ne kemi kërkuar të sekuestrohen jo vetëm ato, por edhe pasuri të tjera”, u shpreh ai.

Drejtësia shqiptare ka nisur zyrtarisht procedurat për ekstradimin e biznesmenit Ermal Beqiraj, i arrestuar të shtunën në Francë. 44-vjeçari raportohet se është vendosur në paraburgim. Madje, të mërkurën ai ka dalë para Gjykatës Penale të Amiens, ku i është komunikuar zyrtarisht kërkimi ndërkombëtar, në funksion të procedurave për ekstradimin drejt Shqipërisë.

Brenda 40 ditëve, praktika e arrestit duhet t’u përcillet autoriteteve franceze. Nëse jepet pëlqimi, kthimi në atdhe do të realizohet brenda pak ditësh; në të kundërt, procedurat do të jenë më të gjata, shkruan A2 CNN.

Beqiraj u ndal pasi fluturoi në lartësi të ulët me një avion të lehtë mbi centralin bërthamor të Penly. Pas sinjalizimit, Forcat Ajrore e shoqëruan deri në aeroportin e Albert, ku u ndalua nga policia për t’u marrë në pyetje.

Në dëshminë e tij, ai deklaroi se nuk kishte kryer veprime të qëllimshme dhe se, në atë moment, ishte duke folur në telefon me nënën e tij. Pas vendosjes së një gjobe prej 7 mijë eurosh, biznesmeni u la i lirë, por u mbajt nën vëzhgim policor. Pas konstatimit se Shqipëria e kishte shpallur në kërkim, efektivët e ndaluan sërish në banesë, duke njoftuar edhe autoritetet në Tiranë.

Beqiraj u shpall në kërkim nga SPAK më 21 dhjetor 2025, gjatë hetimeve për tenderët e AKSHI-t. Dyshimet lidhen me veprimtarinë e kompanisë që ai zotëron, “Soft & Solution”.

Kryeprokurori i SPAK, Klodian Braho, ka zhvilluar një takim informues me gazetarët, ku ka folur për numrin e procedimeve aktive të institucionit.

Braho bëri të ditur se viti 2026 ka nisur me një numër të lartë çështjesh në hetim, duke theksuar se një pjesë e konsiderueshme e tyre janë rezultat i hetimeve të nisura nga vetë prokurorët e SPAK, siç raporton Anila Hoxha.

“Ajo që doja të ndaja është volumi. Viti 2026 ka nisur me 616 procedime aktive. Nuk dua të bëj krahasim se si ka punuar prokuroria më parë dhe si punon tani”, u shpreh ai.

Sipas Brahos, më shumë se gjysma e procedimeve aktive nuk kanë nisur nga kallëzime apo referime të ardhura nga jashtë institucionit, por nga hetime proaktive të ndërmarra nga SPAK.

“Më shumë se gjysma nuk kanë ardhur nga kallëzimet apo referimet e jashtme, por nga hetimet tona proaktive. Për gjashtë muajt e fundit kemi hetuar 16 zyrtarë të lartë”, tha kryeprokurori.

Pjesë nga deklarata:

3. ECURIA E ÇËSHTJEVE TË PRAPAMBETURA TË VITEVE 2019–2021

3.1. Krahasimi i së njëjtës periudhë të viteve 2025 dhe 2026 tregon një përshpejtim të ndjeshëm të trajtimit të çështjeve të prapambetura të regjistruara gjatë viteve 2019–2021. Gjatë periudhës 1 janar–15 korrik 2025, nga 145 çështje aktive u përfunduan 12, me një normë të përgjithshme zgjidhshmërie prej 8,27%. Në të njëjtën periudhë të vitit 2026, nga 108 çështje aktive u përfunduan 63 procedime penale, me një normë zgjidhshmërie prej 58,3%.

3.2. Në terma absolute, gjatë vitit 2026 janë përfunduar 51 çështje më shumë se gjatë së njëjtës periudhë të vitit 2025, ose mbi pesë herë më shumë. Norma e përgjithshme e zgjidhshmërisë është rritur me rreth 50 pikë përqindje, nga 8,27% në 58,3%, pavarësisht se krahasimi përfshin të njëjtën kohë raportimi.

3.3. Përmirësimi më i madh konstatohet te çështjet e vitit 2019. Deri më 15 korrik 2025 ishin përfunduar vetëm 2 nga 35 çështje, me normë zgjidhshmërie 5,71%, ndërsa deri më 15 korrik 2026 janë përfunduar 24 nga 26 çështje, ose 92,3% e stokut të fillim vitit. Në proces kanë mbetur vetëm 2 çështje të këtij viti.

3.4. Edhe për çështjet e vitit 2020 rezultati është dukshëm më i lartë. Norma e zgjidhshmërisë është rritur nga 10,2% në vitin 2025 në 78,9% në vitin 2026. Nga 38 çështje aktive në fillim të vitit 2026 janë përfunduar 30 dhe kanë mbetur në proces vetëm 8 çështje.

3.5. Për çështjet e vitit 2021 është shënuar gjithashtu progres, por me ritëm më të kufizuar. Norma e zgjidhshmërisë është rritur nga 8,19% në 20,5%, ndërsa janë përfunduar 9 nga 44 çështje aktive. Megjithatë, 35 çështjet e vitit 2021 që mbeten në proces përfaqësojnë 77,8% të të gjithë stokut të mbetur të viteve 2019–2021.

3.6. Në përfundim, të dhënat tregojnë se gjatë vitit 2026 puna është përqendruar me rezultat të dukshëm në reduktimin e stokut më të vjetër, veçanërisht të çështjeve të viteve 2019 dhe 2020. Sfida kryesore për pjesën e mbetur të vitit është përshpejtimi i trajtimit të çështjeve të vitit 2021.

4. PROCEDIMET ME ZYRTARË TË NIVELIT TË LARTË

4.1. Gjatë periudhës 1 janar–15 korrik 2026, SPAK ka hetuar 13 procedime penale që përfshijnë 16 zyrtarë/ish-zyrtarë të nivelit të lartë dhe drejtues institucionesh.

4.2. Pjesën më të madhe të personave të përfshirë e përbëjnë kryetarët ose ish-kryetarët e bashkive dhe drejtuesit e institucioneve qendrore. Këto dy kategori përfaqësojnë së bashku 10 nga 16 personat, ose 62.5% të totalit.

Avokati Ben Brandon, i cili ushtron profesionin në Londër, qartësoi sot publikisht se së bashku me kolegun e tij, po ashtu britanik, përfaqëson kryebashkiakun e Tiranës, Erion Veliaj.

Ai tha se janë përfaqësuesit ligjorë ndërkombëtarë të Veliajt dhe se e kuptojnë që kjo është një çështje me rëndësi të madhe për Shqipërinë. Sipas tij, ata ndodhen në vend për të asistuar Veliajn në aplikimin e tij drejtuar Gjykatës Evropiane të të Drejtave të Njeriut në Strasburg.

“Ne jemi përfaqësuesit ligjorë ndërkombëtarë të zotit Veliaj. E kuptojmë që kjo është një çështje me rëndësi të madhe për vendin tuaj. Jemi këtu për ta asistuar zotin Veliaj në aplikimin e tij në Gjykatën Evropiane të të Drejtave të Njeriut në Strasburg”,- tha avokati britanik.

Brandon u shpreh se dy ditët e fundit i kanë kaluar në ambientet e paraburgimit në Durrës duke punuar për përgatitjen e aplikimit dhe se do të rikthehen në fillim të shtatorit.

Ai theksoi se që nga ndalimi i Veliajt, së bashku me përfaqësuesit ligjorë në Shqipëri dhe Shtetet e Bashkuara të Amerikës, kanë kërkuar vazhdimisht ta takojnë klientin e tyre, por të gjitha kërkesat janë refuzuar në mënyrë të përsëritur.

Sipas tij, vetëm pas një ndryshimi në vendimmarrjen e gjyqtarëve në Tiranë, atyre iu dha mundësia ta takonin Veliajn pas 14 muajsh kërkesash të refuzuara.

“Për më shumë se 14 muaj na është mohuar e drejta për të takuar klientin tonë. Kjo është e papranueshme. Nuk bëhet fjalë për dëshirën tonë për ta takuar, por për të drejtën e zotit Veliaj që të përfaqësohet nga avokatët e zgjedhur prej tij”,- tha avakati Brandon.

Brandon e cilësoi të papranueshëm mohimin e aksesit të përfaqësuesve ligjorë të zgjedhur nga Veliaj për më shumë se 14 muaj. Ai tha se arsyet e dhëna për moslejimin e kontaktit me mbrojtësit e zgjedhur mbeten të paqarta dhe konfuze.

Ai shtoi se Gjykata Evropiane e të Drejtave të Njeriut në Strasburg e ka bërë të qartë se, kur bëhet fjalë për heqjen e lirisë së një personi, autoritetet shqiptare duhet ta trajtojnë çështjen sa më shpejt që të jetë e mundur.

Sipas avokatit, përveç ndikimit që ndalimi ka te vetë Veliaj dhe familja e tij, ai prek edhe qytetarët e Tiranës që e kanë zgjedhur për të qeverisur në nivel vendor.

“Ne mendojmë se ndalimi i tij është i panevojshëm dhe joproporcional. Ai ndikon jo vetëm te zoti Veliaj dhe familja e tij, por edhe te qytetarët e Tiranës që e kanë zgjedhur. Masa duhet të marrë fund menjëherë”,- tha avokati Brandon.

Ministri i Mbrojtjes, Ermal Nufi, e cilësoi të papranueshëm vendimin e Partisë Demokratike për të dërguar në Kushtetuese marrëveshjen e Shqipërisë me SHBA për blerjen e pajisjeve ushtarake.

Nufi tha se nuk duhet të ketë kah politik kur flitet për çështje të sigurisë kombëtare: “Qëndrimet e PD janë të papranueshme në raport me këtë marrëveshje. Siguria kombëtare nuk është çështje debati politik. Ky nuk është sinjal i mirë, të atakohet një marrëveshje që financon mbrojtjen është e papranueshme. Nuk duhet të këtë krah politik, mesazhi që çojmë është shumë i gabuar. Raporti jonë me SHBA, tregon se Shqipëria është aleat i besueshëm”.

Ministri shtoi “nuk është në shkelje të Kushtetutës mënyra si është diskutuar”.

“Anëtarët e Komisionit të Ekonomisë dhe Sigurisë kanë pasur mundësi ta lexojnë në Kuvend. I është dhënë koha e mjaftueshme pas miratimit të procedurës së përshpejtuar që të shqyrtohej, të lexohej dhe ajo marrëveshje që është lexuar atë ditë, do ishte e njëjta edhe po të kishte kaluar ai afati që pretendon PD. Marrëveshja monitorohet rreptësisht nga SHBA”, tha Nufi.

Një ngjarje tragjike është regjistruar në fshatin Domen të Postribës në Shkodër, ku një nënë dhe dy fëmijët e saj të mitur kanë humbur jetën pasi banesa e tyre u përfshi nga zjarri.

Sipas policisë ngjarja ka ndodhur rreth orës 13:10, në fshatin Domen, Shkodër. “Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje. Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë”, tha policia.

Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.

Partia Demokratike ka çuar në Gjykatë Kushtetuese marrëveshjen konfidenciale me SHBA për kredinë 302 mln dollarë për blerjen e pajisjeve ushtarake.

“Nëse mazhoranca do këmbëngulte grupi i PD do t’ia nënshtronte atë kontrollit të kushtetueses. Ky paralajmërimin nuk ishte për të bërë politikë. Ajo ishte përpjekja e fundit për të ndalur shumicën që mos të përfshinte edhe marrëdhëniet më të rëndësishme strategjike me SHBA, në një procedurë antikushtetuese. Kërkuam respektimin e afateve kushtetuese, të drejtën e deputetëve për tu njohur me atë që do të votonin.

Opozita e ka bërë të qartë se e mbështet në parim këtë marrëveshje se i shërben interesit strategjik të Shqipërisë për të modernizuar FA dhe për të përmbushur detyrimet që burojnë nga anëtarësimi i Shqipërisë në NATO. Duhet të ishte model i respektimit të kushtetutës, transparencës dhe debatit parlamentar”, tha Bardhi.

Shtatë shkeljet që rendit Partia Demokratike

Shkelja e parë: Deputetëve iu mohua e drejta kushtetuese për t’u njohur me marrëveshjen përpara votimit. Kushtetuta dhe Rregullorja e Kuvendit detyrojnë Kryetarin e Kuvendit që, menjëherë pas depozitimit të projektligjit, t’u shpërndajë deputetëve projektligjin, tekstin e marrëveshjes dhe relacionin shoqërues. Kjo procedurë garanton që deputetët të kenë kohën e nevojshme për ta shqyrtuar marrëveshjen, për t’u konsultuar, për të paraqitur amendamente dhe për të vendosur me përgjegjësi se si do të votojnë.

Shkelja e dytë: Deputetëve iu mohua e drejta kushtetuese për të kontrolluar mënyrën e përdorimit të fondeve publike. Kushtetuta dhe Rregullorja e Kuvendit detyrojnë që projektligjet me efekte financiare të shoqërohen me raportin që përligj shpenzimet financiare. Ky raport u mundëson deputetëve të vlerësojnë ndikimin e projektligjit në Buxhetin e Shtetit dhe të ushtrojnë funksionin e tyre kushtetues të kontrollit mbi administrimin e financave publike. Në këtë rast, raporti që përligjte shpenzimet financiare nuk iu vu në dispozicion deputetëve.

Shkelja e tretë: Deputetëve iu mohua e drejta për të ushtruar lirisht funksionin e tyre parlamentar, përmes debatit parlamentar, paraqitjes së amendamenteve dhe votimit të informuar. Pikërisht për të garantuar ushtrimin efektiv të këtyre të drejtave, Rregullorja e Kuvendit parashikon që rendi i ditës të bëhet publik jo më vonë se dy ditë përpara seancës plenare. Në rastin e kësaj marrëveshjeje, kjo nuk ndodhi. Kryetari i Kuvendit njoftoi ndryshimin e rendit të ditës të hënën dhe, po atë ditë, maxhoranca shqyrtoi dhe miratoi marrëveshjen, duke zhvlerësuar afatin ligjor prej 48 orësh të njoftimit të rendit të ditës së seancës, i cili është përcaktuar si mekanizëm që garanton këto të drejta të deputetëve. Edhe Gjykata Kushtetuese ka arsyetuar se mosrespektimi i afatit dyditor për rendin e ditës cenon parimin e demokracisë përfaqësuese.

Shkelja e katërt: Kjo lidhet me një afat tjetër shumë të rëndësishëm, i përcaktuar shprehimisht në Kushtetutë dhe i interpretuar qartë nga Gjykata Kushtetuese, kur ajo rrëzoi mënyrën sesi Kuvendi miratoi Rregulloren e funksionimit të tij. Një rast identik me mënyrën sesi u miratua marrëveshja me SHBA të hënën. Edhe praktika e ndjekur për këtë marrëveshje, njësoj si praktika e shpallur antikushtetuese për Rregulloren e Kuvendit, u zhvillua me procedurë të përshpejtuar brenda 24 orëve. Në vendimin që duhet të ishte detyrues për Parlamentin, Gjykata Kushtetuese arsyetoi në muajin shkurt se mosrespektimi i afatit minimal njëjavor cenon sërish parimin e demokracisë përfaqësuese, duke u mohuar deputetëve të drejtat e tyre kushtetuese.

Shkelja e pestë: Marrëveshja u trajtua sikur Shqipëria të ndodhej në një situatë të jashtëzakonshme, me nevojë dhe urgjencë për hyrjen e menjëhershme në fuqi të ligjit. Në fakt, nuk ekzistonte asnjë nga këto kushte. Vetë qeveria e rrëzon pretendimin për urgjencë. Marrëveshja u miratua prej saj në parim më 19 qershor dhe u nënshkrua më 22 qershor. Këshilli i Ministrave kishte më shumë se një muaj kohë për ta paraqitur projektligjin sipas procedurës së zakonshme parlamentare, por zgjodhi ta mbante një muaj në sirtar dhe, për arsye që i di vetëm Edi Rama, ta sillte në Parlament vetëm në ditën e fundit të punimeve të tij. Në këto kushte, nuk mund të flitet për një urgjencë objektive, por për një urgjencë artificiale, të krijuar nga vetë qeveria. Po ashtu, Shqipëria nuk ndodhej në një situatë që të justifikonte nevojën urgjente për t’u pajisur me pajisje ushtarake, pasi nuk përballej me ndonjë agresion të armatosur apo kërcënim të jashtëm.

Shkelja e gjashtë: 1/5 e Deputetët kanë të drejtë që të venë në lëvizje Gjykatën Kushtetutese për të kontrolluar një marrëveshje përpara ratifikimit të saj. Duke e sjell dhe miratuar marrëveshjen brenda një dite, procedura parlamentare praktikisht e ka zhveshur pakicën parlamentare nga ushtrimi i përgjegjësisë së saj për të ushtruar kontrollin e kushtetutshmërisë së marrëveshjes në kohë, për të vënë në lëvizje Gjykatës Kushtetuese nëse cmonte vetëm përpara ratifikimit, si dhe praktikisht ka zhveshur vetë Gjykatën Kushtetuese nga kompetenca për të vlerësuar kushtetutshmërinë e marrëveshjes.

Shkelja e shtatë: Qeveria ka pamundësuar hyrjen në fuqi të Marrëveshjes së Huasë me SHBA-të. Duke e shpallur marrëveshjen sekrete, ajo ka pamundësuar botimin e saj në Fletoren Zyrtare. Por Kushtetuta përcakton qartë se një marrëveshje ndërkombëtare e ratifikuar me ligj bëhet pjesë e sistemit të brendshëm juridik vetëm pasi botohet në Fletoren Zyrtare. Në këto kushte, mënyra se si është trajtuar kjo marrëveshje krijon një papajtueshmëri të drejtpërdrejtë me Kushtetutën, pasi një marrëveshje që nuk botohet nuk mund të hyjë në fuqi dhe as të bëhet pjesë e sistemit juridik të Republikës së Shqipërisë.