Gjykata e Durrësit, pas një seance gati 4-orëshe, ka vendosur që nga 8 punonjësit e burgut të Durrësit, të ndaluar nga policia pas arratisjes së të paraburgosurit Altin Ndoci nga ambientet e spitalit, të lihen në burg 3 prej tyre, ndërsa për pesë të tjerët janë vendosur masat e sigurimit: arrest shtëpie dhe detyrim paraqitjeje.

Ndaj tyre është ngritur akuza për shpërdorim detyre, e kryer në bashkëpunim, si pasojë e së cilës nuk u arrit të parandalohej arratisja e të arrestuarit, i cili akuzohet për një sërë ngjarjesh të rënda.

Sakaq, i arratisuri Altin Ndoci vijon të jetë ende në arrati.

1. A.Çu-Akuzuar për Nenin 248 dhe 25 të Kodit Penal-për të cilin kërkohet “Arrest me burg”
   2. A.Çe- Akuzuar për Nenin 248 dhe 25 të Kodit Penal-për të cilin kërkohet “Detyrim për t’u paraqitur në policinë gjyqëore”
   3. D.P- Akuzuar për Nenin 248 dhe 25 të Kodit Penal-për të cilin kërkohet “Arrest me burg”
   4. D.S Akuzuar për Nenin 248 dhe 25 të Kodit Penal-për të cilin kërkohet “Arrest me burg”
   5. F.B Akuzuar për Nenin 248 dhe 25 të Kodit Penal-për të cilin kërkohet “Arrest me burg”
   6. P.M Akuzuar për Nenin 248 dhe 25 të Kodit Penal-për të cilin kërkohet ““Detyrim për t’u paraqitur në policinë gjyqëore”
   7. S.F Akuzuar për Nenin 248 dhe 25 të Kodit Penal-për të cilin kërkohet “Arrest me burg”
   8. V.U Akuzuar për Nenin 248 dhe 25 të Kodit Penal-për të cilën nga Prokuroria kërkohet “Arrest me burg”

Kryeministri Edi Rama u ka vënë kusht kryebashkiakëve socialistë se një mundësi rikandidimi për të drejtuar sërish bashkitë në zgjedhjet vendore të 2027-ës do të varet nga targeti që do të vendosë qeveria për paketën e maleve. Rama tha se deri më fund të mandatit të tretë, duhet t’i hapet rruga 1 mijë investimeve në 61 bashki përmes paketës së maleve.

Rama tha se secila bashki do të jetë një target sipas madhësisë e potencialeve, psh deri në 5, 10 apo 15 investime. Kryebashkiakët i kritikoi sërish përse ende nuk kanë përcaktuar hartat e zonave prioritare, duke u thënë se nuk po bëjnë shkencë.“Jo të gjitha bashkitë e kanë kryer fazën e parë, është e papranueshme, cili duhet të jetë objektivi ynë. Nuk e di a e patë, por në momentin kur paketa e maleve u shpall ditën e parë kishte 700 e kusur interesime nga shqiptarë jashtë atdheut, është investim i sigurt për të tërhequr kursimet e shqiptarëve jashtë dhe shqiptarët jashtë që të kthehen. Si ka mundësi që s’ka mbaruar faza e parë. Ca është kjo shkencë e madhe për të përcaktuar hartën ku do bëhet ky zhvillim. Dikush mund të thotë kam gjithë bashkinë prioritare, hajde mirupafshim. Ca shkence bëni se nuk e kuptoj. Megjithatë i kam kërkuar drejtores së agjencisë kombëtare të planifikimit që të jetë në dispozicion të secilës bashki për hartat për çfarëdo qoftë në aspektin e asistencës teknike. Target për çdo bashki. Ambicia jonë duhet të jetë 1 mijë investime nga kjo paketë, dhe po t’i ndash në territor në 60 bashki nuk janë shumë, i kam kërkuar ministrit të përcaktojë se sa investime duhet të jenë futur në proces kur secili prej jush do të pretendojë të rikandidojë. S’do ketë rikandimin nëse s’do jetë arritur targeti i këtij projekti, dikush 10, dikush 5, sikush 7, dikush 15, sipas madhësisë e potencialeve, por 1 mijë investime nëse marrim një shifër më modesten të mundshme për secilin nga këto investime, më të ulëtën të mundshme, prej 50 mijë eurosh, po marrim që godina është aty dhe duhet vetëm një modifikim, llogariteni se çfarë i ndodhe ekonomisë me këtë injeksion në 3 vite. Sepse në vitin e fundit të mandatit duhet ë hapen dyert e 1 mijë investimeve, fokusoheni dhe mëreni shumë seriozisht”, tha Rama.

Kryeministri Edi Rama u ka bërë kritika kryebashkiakëve, në takimin e zhvilluar në Golem.

Rama u shpreh se bashkitë duhet të kalojnë në një fazë tjetër dhe ta shohin territorin me një qasje sipërmarrëse.

Sipas kreut të qeverisë, bashkitë presin fonde nga buxheti i shtetit dhe kjo nuk mund të vazhdojë.“Deri dje kemi dhënë shumë asete falas, janë dhënë dhe janë lënë rrugëve në të shkuarën, asete që nuk numërohen.

Nuk janë përkthyer në investime serioze, janë dhënë pafundësi tokash për zhvillim. Kjo gjë ka ndaluar përfundimisht. Ne nuk japim më asnjë metër katror tokë në rast se një ndërtues ka 95% të pronës dhe një pjesë është pronë shtetërore. Nuk ka më.

Për çdo metër katror ku pronar është shteti, kemi kushtëzuar pjesëmarrjen si pronar. I vetmi motiv për të dhënë tokë me një kontratë simbolike, 1 euro, është hoteleria. Çdo gjë tjetër është, merr pjesën që kërkon dhe paguaj kokërr më kokërr, atë që i jep privatit. Bashkitë mund të marrin rol të rëndësishëm, zhvillime me përfitim. Pa harruar dhe përfitmin social, për ato familje që kanë nevojë për strehim.

Po bëjmë reformë dhe do kemi agjenci ku planifikimi, strehimi do jenë bashkë, do jetë në dispozicion të Pushtetit Vendor. Ky proces do jetë i hapur për të gjithë. Duhet iniciativë, duht pare çdo pjesë e territorin me një qasje sipërmarrëse, për të ardhurat e bashkisë. Nuk mund të rrini dhe të prisni nga buxheti i shtetit. Duhet të kaloni në fazë tjetër.”, theksoi ai.

Kryeministri Edi Rama në takimin me kryebashkiakët lajmëroi ngritjen e një flote të dedikuar për mirëmbajtjen dhe pastrimin e infrastrukturës kulluese, ndërsa po komentonte situatën me përmbytjen.
Rama tha se kjo flotë do të realizohet përmes një fondi prej 20 mln eurosh që vendit tonë i është vënë në dispozicion nga Emiratet e Bashkuara Arabe.

Rama tha se kjo flotë mund të përqendrojë më shumë forca diku ku ka një situatë emergjence dhe bashkitë do ndihen më të gatshme për të përballuar emergjencën.

“Një tjetër element që ndikon është niveli i rezistencës së infrastrukturës mbrojtëse, kanale, hidrovore. Është rritur në mënyrë domethënëse në 10 vitet e  fundit, por analiza e bërë edhe nga kjo emergjencë tregon se ka pika ku rezistenca është më e dobët. Për këtë arsye duhet të vendosim me shumë saktësi piketat për të forcuar më tej infrastrukturën mbrojtëse dhe nga ana tjetër për të adresuar ato aspekte që kanë të bëjnë me fuqizimin e ndërveprimit mes pushtetit vendos dhe institucioneve qendrore. Një nga gjërat që e ka propozuar ministri Demo dhe që ka gjet mbështetjen tonë është që me një fond të siguruar nga miqtë tanë të Emirateve Arabe prej 20 mln euro në mbështetje të zhvillimit rural, të blejmë një sasi domethënëse mjetesh që të vendosen në shërbim të kullimit, pastrimit kanaleve kulluese kryesore dhe që të funksionojnë sipas nevojave të bashkive. Kjo flotë mund të përqendrojë më shumë forca diku ku ka një situatë emergjence dhe bashkitë do ndihen më të gatshme për të përballuar emergjencën dhe në ditët e punës normale do jetë flotë e shtuar për të gjitha bashkitë sipas sasisë së kanaleve për tu pastruar dhe mirëmbajtur, sipas nevojës për të adresuar edhe problemin e argjinaturave”, tha Rama.

Policia e Tiranës ka finalizuar me sukses operacionin policor të koduar “Cargo 1”, të zhvilluar nga Seksioni për Hetimin e Narkotikëve, në kuadër të goditjes së veprimtarive kriminale në fushën e lëndëve narkotike.

Si rezultat i këtij operacioni, u arrestua në flagrancë shtetasi E. K., 45 vjeç, banues në Tiranë. Ai u kap në një parkim në afërsi të rrethrrotullimit të Tegut, ku shërbimet e Policisë i gjetën një pako me lëndë të dyshuar narkotike kokainë, e cila dyshohet se mbahej me qëllim shitjen në sasi në zona të ndryshme të kryeqytetit.

Gjatë veprimeve procedurale dhe kontrollit në banesën e 45-vjeçarit, policia gjeti dhe sekuestroi gjithashtu një armë gjahu dhe një armë sportive. Në total, u sekuestruan 1 kilogram e 39.4 gramë lëndë e dyshuar narkotike kokainë, një motomjet, një aparat celular, si dhe dy armët.

Operacioni u zhvillua në kuadër të një procedimi penal të ndjekur me metoda proaktive, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë.

Presidenti i Shteteve të Bashkuara, Donald Trump, ka falur ish-guvernatoren e Porto Rikos, Wanda Vázquez Garced, e cila ishte akuzuar në një çështje federale për korrupsion, bëri të ditur Departamenti i Drejtësisë.

Zyra e Prokurorit të Faljeve në Departamentin e Drejtësisë përditësoi listën zyrtare të faljeve presidenciale për të përfshirë një falje për Vázquez, e cila mban datën e së enjtes. Një zyrtar i Shtëpisë së Bardhë konfirmoi të premten se presidenti Trump kishte vendosur ta falte atë.

“I gjithë ky rast është një shembull i ndjekjes penale politike”, tha zyrtari i Shtëpisë së Bardhë, duke iu referuar akuzave ndaj Vázquez, e cila u arrestua në gusht të vitit 2022 nën dyshimin për marrje ryshfeti në lidhje me financimin e fushatës së saj për guvernatore në vitin 2020.

Sipas raportimeve, Trump fali gjithashtu dy të pandehur të tjerë në të njëjtin rast, Julio Martín Herrera Velutini dhe Mark Rossini.

Që nga rikthimi në detyrë vitin e kaluar, Trump ka dhënë një numër të madh faljesh presidenciale, shumë prej tyre për persona të dënuar për krime dhe për aleatë politikë, duke nxitur debate të gjera publike dhe politike.

Më shumë se 3,000 persona kanë humbur jetën gjatë protestave mbarëkombëtare në Iran, thanë aktivistë për të drejtat e njeriut, ndërsa u raportua një “rritje shumë e lehtë” e aktivitetit në internet pas një bllokade tetëditore.

Grupi me seli në SHBA, HRANA, deklaroi se ka verifikuar 3,090 viktima, përfshirë 2,885 protestues, ndërkohë që banorët thanë se goditja e autoriteteve duket se i ka frenuar përkohësisht protestat. Mediat shtetërore iraniane raportuan gjithashtu për arrestime të reja.

Protestat shpërthyen më 28 dhjetor për shkak të vështirësive ekonomike dhe u shndërruan në demonstrata të gjera që kërkonin fundin e sundimit klerikal në Republikën Islamike, duke kulmuar me dhunë masive në fundjavën e kaluar. Sipas grupeve opozitare dhe një zyrtari iranian, më shumë se 2,000 persona u vranë në trazirat më të rënda të brendshme që nga Revolucioni Islamik i vitit 1979.

Presidenti amerikan Donald Trump, i cili kishte kërcënuar me “masa shumë të forta” nëse Irani do të ekzekutonte protestues, deklaroi se udhëheqësit iranianë kishin anuluar varje masive.

Autoritetet iraniane nuk kishin njoftuar më parë për plane të tilla ekzekutimesh dhe as nuk kanë konfirmuar anulimin e tyre.

Kryeministri Edi Rama do të zhvillojë sot një takim me kryebashkiakët në Golem. Në fokus të takimit i cili pritet të mbahet rreth orës 11:30 do të jenë problematikat me të cilat përballen bashkitë, por edhe sfidat që duhen çuar para.

Kjo mbledhje e Ramës me të parët e bashkive vjen një ditë pas takimit me grupin e PS, ku kreu i qeverisë paralajmëroi ndryshime kushtetuese brenda këtij mandati.

Një fokus në takim pritet ta marrë edhe paketa e maleve që ka lançuar Partia Socialiste. Në një takim të zhvilluar në tetor me kryebashkiakët Rama adresoi kritika shumicës se bashkive se nuk i janë përgjigjur paketës së maleve, duke mos identifikuar zonat prioritare per zhvillim.

Disa oficerë policie janë plagosur pas dhunës në një protestë jashtë ambasadës iraniane në Londër.

Përleshjet sollën disa arrestime, sipas Policisë Metropolitane, teksa drejt policëve u hodhën sende nga protestuesit.

Katër persona u dërguan në spital. Policia tha se disa nga punonjësit e saj kishin pësuar lëndime, me pamjet në mediat sociale që treguan se edhe protestuesit u lënduan në demonstratat e së premtes.

Në një deklaratë në X, Policia Metropolitane u shpreh se një protestues kishte arritur të ngjitej në ambasadën iraniane dhe të hiqte flamurin e saj.

Protestat nisën më 28 dhjetor për shkak të pakënaqësive me krizën ekonomike, zhvlerësimin e monedhës kombëtare dhe krizës energjetike. Protestat më masive deri më tani janë regjistruar më 8 janar.

Veprimet kanë përfshirë edhe thirrje në mbështetje të udhëheqësit të Iranit para revolucionit, shahut, djali i të cilit, Reza Pahlavi, ka bërë thirrje për protesta të mëtejshme.

Demonstratat kanë ‘rinovuar’ gjithashtu përballjen midis Iranit dhe SHBA-së.

Shtetet e Bashkuara kanë shprehur mbështetje për protestuesit iranianë, me presidentin amerikan, Donald Trump, që ka paralajmëruar autoritetet në Teheran se Uashingtoni do të ndërhyjë nëse Irani vret protestues.

Ditën e Shtunë vendi ynë do të ndikohet nga kushte atmosferike të qëndrueshme.

Moti parashikohet i kthjellët në pjesën më të madhe të territorit ndërsa në relievet malore në lindje mot me vranësira mesatare deri të dendura si dhe intervale të herëpashershme me diell.

Mjegull /mjegullinë përgjatë zonave luginore në orët e mëngjesit e të mbrëmjes.

Era do të fryjë me drejtim verilindje– lindje, me shpejtësi mesatare 6 m/s, përgjatë vijës bregdetare dhe zonat luginore era me shpejtësi deri në 14 m/s..

Deti – Valëzimi forcës 1-2 ballë.

Dashi
Dikush tjetër është gati të ecë përpara me një ide që ju intereson. Merrni inkurajimin që merrni nga njerëzit përreth jush. Konsensusi është të ecni përpara. Hidhuni në vagon dhe lehtësoni këtë veprim konstruktiv.
Demi
Ki kujdes që të mos shikosh drejt punës për të gjetur përmbushjen thellësisht kuptimplote që shpreson. Mund të jesh duke ushtruar shumë presion mbi punën tënde për të përmbushur këtë nevojë. Gjej rrugë të tjera për të mbështetur qëllimet e tua shpirtërore. Mbaje punën të ndarë.
Binjakët
Energjia e sotme po të jep vetëbesimin për të arritur çdo gjë. Afirmo veten në çfarëdo mënyre që është e nevojshme. Me siguri do të arrish rezultatet e dëshiruara me shumë pak rezistencë. Shkurt, do të arrish çdo gjë që vendos në mendje.
Gaforrja
Dikush në vendin e punës ka të ngjarë të fillojë një grindje me ju sot. Veprimet e tij ose të saj janë jashtëzakonisht të papjekura. Qëndroni të fortë në pozicionin tuaj pa përdorur taktika fëmijërore. Le të jetë natyra juaj e fortë dhe e besueshme një shembull për të tjerët.
Luani
Sot është një ditë e mirë për të marrë një rrezik. Mblidhni guximin tuaj të brendshëm dhe zbatojeni atë për qëllimin tuaj përfundimtar në karrierë. Tendenca juaj është të shpërndaheni shumë dhe të përhapeni shumë. Në vend të kësaj, duhet të përqendroheni në një qëllim dhe t’i përmbaheni atij.
Virgjëresha
Dilni jashtë zonës suaj të sigurisë. Kjo mund të nënkuptojë t’i drejtoheni dikujt për ndihmë me të cilin normalisht keni frikë të flisni. Kjo gjithashtu mund të nënkuptojë aplikimin për një punë që e mendoni si diçka të vështirë për ju. Shkoni përtej dhe do të keni sukses.
Peshorja
Pavarësisht se sa shumë mund të ankoheni për punën tuaj, për njerëzit me të cilët punoni dhe/ose për punëdhënësit tuaj, jini mirënjohës që keni çfarëdo lloj punësimi. Nëse nuk jeni i punësuar në këtë kohë, kini besim. Do të gjeni një punë të re shumë shpejt. Jini optimistë.
Akrepi
Bëj çmos për t’i bërë një nder dikujt tjetër sot. Tendenca jote e natyrshme mund të jetë ta vendosësh veten mbi të gjithë të tjerët, por sot nuk është koha për të pasur një qëndrim të tillë. Në vend të kësaj, duhet t’i ofrosh një dorë ndihme një kolegu pune.
Shigjetari
Çështjet në vendin e punës do të arrijnë një kulm të vështirë. Në vend të një mjedisi bashkëpunues, ka të ngjarë të hyni në një zonë lufte. Jini vigjilentë dhe përpiquni të mos lejoni që komentet e ashpra të njerëzve t’ju ndikojnë në një nivel personal.
Bricjapi
Tendenca juaj sot do të jetë të veproni pa menduar mirë më parë. Lëvizjet tuaja do të jenë të nxituara dhe të pallogaritura. Kjo me siguri mund të çojë në vështirësi më vonë. Kini kujdes me premtimet tuaja. Jeni në një terren të paqëndrueshëm. Vazhdoni me kujdes.
Ujori
Ndihu i lirë të marrësh rolin e pionierit. Lëviz me guxim në territor të panjohur. Vepro me besim në vend të frikës dhe do të mbështetesh dhe shpërblehesh për përpjekjet e tua. Nëse dikujt i duhet një ide e re dhe inovative, atë e ke ti.
Peshqit

Do të hasni në konflikt me dikë në vendin e punës. Sigurohuni që t’i afroheni këtij personi drejtpërdrejt dhe t’i zgjidhni gjërat ballë për ballë. Thashethemet për problemet me të tjerët vetëm sa do ta përkeqësojnë problemin dhe do t’ju bëjnë të dukeni keq.

Duke gjykuar nga të dhënat e fundit të inteligjencës ukrainase, Rusia po përgatit sulme të reja masive ndaj Ukrainës, tha sot Presidenti ukrainas Volodymyr Zelensky.

“Po flasim sinqerisht me partnerët tanë për raketat dhe sistemet e mbrojtjes ajrore që na nevojiten kaq shumë.” Furnizimi nuk është i mjaftueshëm. Po përpiqemi të përshpejtojmë dhe është e rëndësishme që partnerët tanë të na dëgjojnë. Shumë gjëra po bëhen tani në nivelin e Ministrisë së Mbrojtjes së Ukrainës”, tha Zelensky gjatë fjalimit të tij të rregullt në mbrëmje, raporton Ukrinform.

Ai u bëri thirrje qytetarëve të Ukrainës që të jenë të vëmendshëm dhe të dëgjojnë paralajmërimet për sulme ajrore. Sipas tij, qeveria po punon me kompanitë e energjisë dhe partnerët për të pasur më shumë pajisje dhe më shumë rezerva.

Presidenti i Ukrainës, Volodymyr Zelensky, tha sot se delegacioni ukrainas është duke udhëtuar drejt Shteteve të Bashkuara të Amerikës për të diskutuar garancitë e sigurisë dhe një paketë masash për të forcuar përparimin e vendit.

Në të njëjtën kohë, ai shprehu shpresën se dokumentet mbi këto çështje mund të nënshkruhen në margjinat e Forumit Ekonomik Botëror në Davos javën e ardhshme.

Në një konferencë për shtyp në Kiev, Zelensky tha gjithashtu se delegacioni ukrainas shpreson të marrë sqarime nga SHBA-të mbi qëndrimin e Rusisë ndaj përpjekjeve diplomatike të mbështetura nga Amerika për t’i dhënë fund luftës.

Të hënën, duke njoftuar takimin, Zelensky tha se dëgjoi raportin e detajuar të ekipit negociator mbi kontaktet me palën amerikane dhe urdhëroi finalizimin e dokumentit mbi garancitë e sigurisë për Ukrainën.

Presidenti i Shteteve të Bashkuara të Amerikës, Donald Trump, ka kërcënuar se do të vendosë tarifa ndaj vendeve që nuk e mbështesin planin e tij për marrjen nën kontroll të Groenlandës

“Nëse vendet nuk bien dakord me çështjen e Groenlandës, mund t’u vendos tarifa, sepse na duhet Groenlanda për sigurinë kombëtare”, ka deklaruar Trump gjatë një tryeze të rrumbullakët në Shtëpinë e Bardhë.

Trump ka përsëritur se SHBA-ja “absolutisht duhet” ta marrë Groenlandën, duke shtuar presionin ndaj Danimarkës, së cilës ishulli i përket zyrtarisht.

Deklarata e tij vjen pas një takimi të mbajtur të mërkurën në Shtëpinë e Bardhë, ku morën pjesë ministri i Jashtëm i Danimarkës, Lars Lëke Rasmussen, ministrja e Jashtme e Grenlandës, Vivian Moxfeldt, sekretari amerikan i Shtetit, Marco Rubio, si dhe zëvendëspresidenti i SHBA-së, JD Vance.

Danimarka e ka hedhur poshtë kategorikisht idenë e Trumpit, duke theksuar se Groenlanda nuk është në shitje.

Groenlanda është territor autonom brenda Mbretërisë së Danimarkës, me qeveri dhe parlament të vetin, ndërsa zyrtarët danezë dhe groenlandezë kanë theksuar vazhdimisht se vendimet për të ardhmen e ishullit mund të merren vetëm nga banorët e tij – të cilët sipas sondazheve janë kundër që SHBA-ja ta marrë kontrollin.

Forcat e sigurisë së Iranit raportohet se kanë prani të madhe në rrugët e Iranit, pas më shumë se dy javësh protesta që po zbehen dhe pas një shtypjeje të ashpër që ka lënë të vdekur mijëra iranianë dhe teksa qytetarët në Republikën Islamike po përballen me bllokim të internetit.

Raportimet duket se sugjerojnë që protestat masive, si dhe shtypja brutale nga autoritetet, duket se janë fashitur.

“Burimet tona të pavarura kanë konfirmuar prani të ashpër të ushtrisë dhe personelit të sigurisë dhe qytete dhe qyteza ku janë mbajtur më herët protesta, por edhe në disa lokacione ku nuk ka pasur demonstrata të mëdha”, tha grupi për të drejtat e njeriut, Hengaw, me seli në Norvegji.

Autoritetet iraniane kanë kryer një nga shtypjet më të dhunshme ndonjëherë, pasi njerëz në mbarë vendin dolën në rrugë në protesta antiqeveritare, të cilat shihen si një nga sfidat më të mëdha ndaj sundimit klerikal që nga Revolucioni Islamik i vitit 1979.

Me një bllokadë pothuajse të plotë të internetit që ka hyrë në ditën e tetë, sipas organizatës monitoruese NetBlocks, tensionet mbeten të larta dhe informacioni është i pakët. NetBlocks theksoi se ndërprerja e internetit po zgjat më shumë se bllokada që ishte aplikuar gjatë protestave të vitit 2019.

“Në vitin 2019, vetëm pasi u rikthye lidhja me internetin u bë e ditur shkalla brutale e shtypjes”, tha kjo organizatë.

Organizatat për të drejtat e njeriut thonë se gjithnjë e më shumë ka prova për vrasje masive të protestuesve nga forcat e sigurisë së Iranit, pasi demonstratat mbarëkombëtare u përshkallëzuan më 8 janar.

Monitoruesi i pavarur i të drejtave të njeriut me seli në Shtetet e Bashkuara, HRANA, tha se sipas të dhënave të tij të konfirmuara dhe të verifikuara, më 15 janar numri i protestuesve të vdekur kishte arritur në 2.677 protestues, ndërsa mbi 19.000 të tjerë ishin arrestuar. Organizata Iran Human Rights, me seli në Norvegji, tha se sipas hulumtimit që ka bërë, të paktën 3.428 protestues janë vrarë.

Ndërkaq, Human Rights Watch raportoi se, duke filluar nga 8 janari, “forcat e sigurisë e intensifikuan shtypjen vdekjeprurëse në mënyrë të koordinuar… duke rezultuar në vrasje dhe plagosje në shkallë të gjerë të protestuesve dhe kalimtarëve në mbarë vendin”.

Organizata shtoi se kufizimet e ashpra në komunikim kanë kufizuar mundësinë e verifikimit në mënyrë të pavarur të shkallës së plotë të mizorive.

Shumë organizata kanë deklaruar se numri real i viktimave ka të ngjarë të jetë disa herë më i lartë se shifrat e raportuara deri më tani.

Kryetari i Partisë Demokratike, Sali Berisha, ka zhvilluar një takim me kryetarët e degëve të PD-së në të gjithë vendin.

Ky takim kishte në fokus përgatitjet që PD po bën për protestën e 24 janarit. Gjatë fjalës së tij, Berisha tha se ky vit do të jetë viti i rrëzimit të kryeministrit Edi Rama nga pushteti.

Teksa e cilësoi Ramën si një demon të pushtetit, Berisha shtoi se PD arriti t’i faktojë botës lidhjet e qeverisë së tij me krimin e organizuar.

Pjesë nga fjala e Berishës:

Ky takim, kjo mbledhje ka dy qëllime kryesore të një rëndësie shumë të madhe. Jemi mbledhur sot për përgatitjet që duhet të bëjmë për datën 24 janar. Për secilin prej jush, për secilin prej jush, për çdo anëtar dhe anëtare të Partisë Demokratike, për çdo opozitare dhe opozitar, duhet të ketë të qartë se ky është viti i provës së madhe, ky është viti i sfidës më të madhe që kemi patur ndonjëherë në jetën tonë politike, ky është viti më përcaktues për të ardhmen tonë dhe të ardhmen e Shqipërisë.

Ne nisim këtë vit pasi në një betejë të pabarabartë, në një betejë të vështirë, ne kemi dalë, ja kemi dalur të paraqesim me sukses para shqiptarëve dhe komunitetit ndërkombëtar të vërtetat dramatike të narko-shtetit, të diktaturës autoritare apo autokracisë elektorale të Edi Ramës.

Nuk ka qenë një gjë e thjeshtë, ka qenë një gjë shumë e vështirë për faktin se siç e dini, propaganda koprolalike që ai ka ndërtuar në vend duke vendosur në kontroll mbi 90% të mediave kundrejt pagesave, kundrejt ryshfeteve, për të mashtruar qytetarët shqiptarë dhe për të glorifikuar të keqen, për të mbrojtur krimin, vjedhjen, drogën dhe farsën elektorale, po atë mashtrim ai u ka ndërmarrë, duhet thënë gjithashtu, jo pa sukses në komunitetin ndërkombëtar.

Me lobimin e tij dhjetëra, qindra miliona euro në zyrtarë të ndryshëm të llojit McGonigal, Mogherini, Coldea e të tjerë, e të tjerë, lista e tyre sigurisht shumë e gjatë dhe ne nuk e dimë, por këta i marrim vesh se i nxjerrin aksidentet.

Ai ka bërë gjithçka, ka krijuar një mburojë rreth aktivitetit të tij kriminale si drejtues, patron i organizatës kriminale shtetërore më të rrezikshme të Europës, që është qeveria e tij. Ne arritëm në shtatë rezoluta ndërkombëtare në një hark kohor 14 mujor, të miratuara dhe të firmuara nga të gjitha partitë e spektrit politik tonë në Europë, në Shtetet e Bashkuara dhe në mbarë botën.

Arritëm të paraqesim me vërtetësi tiparet e shëmtuara kryesore të narko-diktaturës së Edi Ramës, diktaturës autoritare të tij. Arritëm t’u faktojmë botës se ky demon pushteti ka të përqëndruara në duart e tij në mënyrë antikushtetuese dhe anti-ligjore pushtete më shumë se diktatori i fundit komunist në Shqipëri.

Se ky demon pushteti kontrollon në çdo qelizë, nëpërmjet lidhjeve me krimin dhe drogën, pushtetin në Shqipëri. Arritëm të faktojmë se ky është një armik i egër i pluralizmit që përdor Dumanët e tij kundër pluralizmit politik në Shqipëri, përdor Dumanët e tij si liçencë për krime të shëmtuara elektorale.

Arritëm t’u faktojmë të tjerëve lidhjet e tij me Sinaloan e Meksikës, me grupe të tjera trafikantësh në Shqipëri, në Europë dhe në botë.

Angazhimi në një betejë kundër plastikës është një fokus i mazhorancës socialiste. Në fjalën e tij përmbyllëse në mbledhjen e grupit parlamentar, Rama tha se kjo mund të arrihet vetëm me vetëdijësim dhe e gjithë PS do të angazhohet.

“Kjo nuk bëhet me polici, kjo nuk bëhet me inspektime, kjo nuk bëhet me gjoba, kjo bëhet me vetëdijësim. Partia Socialiste do të angazhohet e gjitha në një betejë qytetare dhe vullnetare kundër plastikës, kundër shisheve plastike, kundër qeseve plastike. Një betejë shumëdimensionale sepse duhet ta bëjmë”, tha Rama.

Gjithashtu, në Asamblenë e ardhshme të PS që mbahet në pranverë, do të nisë fushata e re e anëtarësimeve në parti. Duke ironizuar kundërshtarët, Rama tha se ndërsa ata merren me humbjen, PS sheh drejt fitores së radhës duke cituar zgjedhjet e 2027.

“Paralelisht me këtë, në Ansamblenë e ardhshme do të lançojmë edhe fushatën e re të anëtarësimeve në Partinë Socialiste që do të jetë fushata e pranverës. Historikisht ndodh kjo, kur të tjerët merren me humbjen e shkuar, ne merremi me fitoren e radhës. Kemi zgjedhjet në 2027 dhe nëse gjërat do të vazhdojnë kështu dhe nëse ata vazhdojnë të besojnë që ne do të biem nga shiu, nga bora apo nga proceset e drejtësisë, rruga e të cilave është hapur prej nesh dhe garantohet prej nesh, ata le të jetojnë me këtë shpresë se në 2027 do të habiten kur të mbeten dhe pa ato 5-6 bashki që i kanë sot”, tha Rama.

Kryeministri Edi Rama kërkoi rritje të aktivitetit parlamentar me ato të vendeve të BE-së, përfshirë këtu jo vetëm kryetarin e Kuvendit Niko Peleshin, por dhe deputetët.

Rama tha se parlamenti merret peng nga opozita nëpërmjet termit “procedurë” duke vënë në dukje numrin e orëve që merr në dispozicion. Rama tha se nuk po kërkon ulje të orëve për opozitën, por të mos lejohet pengmarrja e Kuvendit dhe e publikut.

Ndër të tjera, Rama foli dhe për reformim të shërbimit në administratën e Kuvendit, për rritje të cilësisë dhe shtim të stafit me qëllim shpërndarjen e volumit të punës.

“Dua t’i referohem të konkluzioneve lidhur me domosdoshmërinë e  rritjes së aktivitetit diplomatik parlamentar gjë që do duhet të jetë në fokusin e kryetarit dhe jo vetëm tek, por tek të gjithë deputetët të përfshirë në grupet e miqësisë me parlamenteve të BE-së.

Besoj që është e qartë që ky proces kërkon edhe një administratë, një shërbim administrativ të kuvendit më cilësor. Kemi folur për reformën e brendshme prej disa vitesh ,janë bërë disa hapa, por një administrate e cila numëron rreth 350 vetë nga të cilët rreth 300 janë nën punës civilë, është goxha e madhe ne numër ndërkohë që barra e punës mbështetëse për komisionet, për deputetët, për kryetarin e kuvendit bie padyshim mbi një numër shumët ë vogël sesa ai i përgjithshmi.

Nëse për arsye që i dimë që lidhen me sigurinë juridike të atyre që janë at, do duhen forca të reja, duhet të shtojmë forca të reja. Ekspertizë në funksion të komisioneve për pikërisht për çështjet që lidhen me negociatat. Duhet ta ritheksoj që në ndarjen e mandateve në kuvend, diferenca është e madhe, në ndarjen e orëve të fjalës në Kuvend, po të shikosh duket ikur jemi në një parlament 1 me 49. Orët e vëna në dispozicion për opozitën janë anomalish shumë më tepër sesa orët që opozitat parlamentare në parlamentet e BE. Nuk po them ti ulim orët opozitës, me ketë them që duhet të shikojmë sesi do të ndërpriten orët e marra me forcë, me abuzim. Në shkeljet ë plotë të etikës parlamentare duke përdorur procedurën për të marrë peng publikun për 1 ose 2 orë kur fillon kuvendi, dhe për të pushuar sallën e parlamentit duke i vendosur deputetët e shumicës,  në pozitën e tyre që janë aty si spektatorë të një teatri balte.

Në asnjë parlament demokratik në asnjë parlament të BE nuk i lejohet asnjë force politike. Rregullorja e parlamenti nuk është e shkruar në gurë, bazuar tek praktikat e Be, duhet ndërhyrë menjëherë që fjala procedurë të mos jetë e barabartë për fjalën pengmarrje”, tha Rama.

Kryeministri Edi Rama synon që mazhoranca socialiste brenda këtij mandati të miratojë një reformë të re kushtetuese.

Pas mbledhjes së grupit të PS, Rama tha se duhet të ngrihet grupi i pune, duke ritheksuar edhe njëherë propozimin e tij për uljen e numrit të deputetëve në Kuvend nga 140 në 100.

“Duhet të mendohet edhe ngritja e një grupi nismëtar për ndryshimet kushtetuese. Kemi shtruar nevojën që Kuvendi i Shqipërisë të zvogëlohet në numër, kemi kuvend me 140 vetë, fare mirë mund të kemi kuvend me 100 vetë. Ka dhe aspekte të thera që duhen zgjedhur nga njerëzit që dinë se çfarë shohin, lexojnë, thonë, kur vjen fjala te kushtetuta e Shqipërisë duhet ngritur një grup që pastaj të hapë një proces, është shumë më tepër se një reformë zgjedhore, kërkon shumë më tepër hapësirë angazhim, burime. Ambicia do jetë duhet të jetë që në fund të mandatit të kalojmë edhe një reformë kushtetuese”, tha Rama.

Rusia ka shprehur mbështetje për Danimarkën lidhur me statusin e Grenlandës, duke deklaruar se e konsideron ishullin si territor danez.

Kremlini theksoi gjithashtu se situata e sigurisë rreth Grenlandës është “e jashtëzakonshme” nga këndvështrimi i së drejtës ndërkombëtare, raportoi agjencia Reuters.

Sipas agjencisë, Moska ka deklaruar më herët këtë javë se është e papranueshme që Perëndimi të vazhdojë të pretendojë se Rusia dhe Kina përbëjnë kërcënim për Grenlandën.

Autoritetet ruse shtuan se kriza rreth këtij territori nxjerr në pah standardet e dyfishta të fuqive perëndimore, të cilat, sipas tyre, shpesh paraqiten si moralisht superiore.

E më herët gjatë ditës, Kirill Dmitriev, i dërguari special i presidentit Vladimir Putin për investime dhe bashkëpunim ekonomik, bëri shaka duke sugjeruar se Grenlanda mund të bëhet shteti i 51-të i Shteteve të Bashkuara.

Një grup të burgosurish shqiptarë, irlandezë, çekë, rumunë dhe gjermanë, të akuzuar për një komplot për vrasjen e ish-Presidentit të Venezuelës, Nicolas Maduro janë liruar nga burgu.

Lajmin e bën të ditur media çeke, e cila njofton edhe lirimin e Jan Darmovzal, për të cilin diplomacia e Pragës kishte kërkuar ndihmë edhe nga SHBA për ta liruar.

“Pas disa javësh negociatash intensive, kemi arritur lirimin e Jan Darmovzal nga burgu në Venezuelë,” deklaroi ministri i jashtëm çek Petr Macinka të premten në mëngjes.

“Sot, në orët e para të mëngjesit, rreth orës 4:00 (sipas kohës së Pragës), ai u lirua së bashku me një grup të burgosurish nga Irlanda, Rumania, Gjermania, Shqipëria, Ukraina dhe Holanda. Ne kemi dërguar një avion që tashmë ndodhet në ajër, ndaj falënderoj gjithashtu ministrin e Mbrojtjes, Jaromír Zůna, i cili gjithashtu qëndroi zgjuar gjithë natën me ne për ta organizuar këtë, dhe tani do t’i sjellim në shtëpi të gjithë të burgosurit e liruar.”

Autoritetet venezueliane e arrestuan Darmovzalin në shtator të vitit 2024, duke pretenduar se ai planifikonte të merrte pjesë në një komplot për të vrarë Maduron dhe për të rrëzuar qeverinë. Sipas diplomacisë çeke, këto pretendime ishin të pabazuara. Edhe OJQ-ja Foro Penal theksoi se ndalimi i shtetasit çek kishte motive politike.

“Nga 25 dhjetori deri më 1 janar kemi konfirmuar lirimin e 117 të burgosurve politikë dhe, që nga 8 janari, edhe 84 të tjerë, për një total prej 201 të liruarish,” shtoi Foro Penal, duke bërë të ditur se rreth 800 persona vazhdojnë të mbahen pas hekurave në Venezuelë për shkak të bindjeve të tyre politike.