Kompania e implanteve në tru e Elon Musk, Neuralink, do të fillojë “prodhimin me vëllim të lartë” të pajisjeve të ndërfaqes tru-kompjuter dhe do të kalojë në një procedurë kirurgjikale tërësisht të automatizuar në vitin 2026, njoftoi Musk.
Implanti është projektuar për të ndihmuar njerëzit me probleme shëndetësore si dëmtimi i palcës kurrizore.
Pacienti i parë e ka përdorur atë për të luajtur videolojëra, për të shfletuar internetin dhe për të postuar në rrjete sociale.
Kompania filloi provat te njerëzit të implantit të saj të trurit në vitin 2024, pasi adresoi shqetësimet për sigurinë të ngritura nga Administrata Amerikane e Ushqimit dhe Barnave, e cila fillimisht e kishte refuzuar kërkesën e saj në vitin 2022.
Neuralink tha në shtator se 12 persona në mbarë botën me paralizë të rëndë kanë marrë implantet e saj në tru dhe po i përdorin ato për të kontrolluar mjetet digjitale dhe fizike përmes mendimit.
Gjithashtu siguroi 650 milionë dollarë në një raund financimi në qershor./E.T
Deputeti dhe kryetari i Partisë Mundësia, Agron Shehaj, ka bërë një thirrje publike për të gjithë shqiptarët që jetojnë jashtë vendit, duke i ftuar të firmosin një peticion online në mbrojtje të drejtësisë dhe luftës kundër korrupsionit.
Sipas Shehajt, nëse drejtësia goditet, Shqipëria rrezikon të humbasë një shans historik për ndërtimin e një shteti të së drejtës dhe për garantimin e një të ardhmeje europiane për qytetarët e saj.
“Të gjithë ata shqiptarë që nuk kanë mundësinë të na bashkohen fizikisht, sepse jetojnë jashtë vendit, tani mund të firmosin peticionin online në mbrojtje të drejtësisë.
Na duhen 100 mijë firma!
www.mundesia.al/me-drejtesine
Sot, çdo shqiptar duhet të zgjedhë:
Ose të mbështesë drejtësinë në luftën kundër korrupsionit, kundër çdo politikani apo zyrtari “të paprekshëm”, ish apo aktualisht në detyrë, që është pasuruar vetë, ka pasuruar familjarët apo miqtë e tij duke vjedhur qytetarët e një prej vendeve më të varfra në Europë;
Ose, me heshtjen dhe mosveprimin e tij, të mbajë anën e të korruptuarve, të lejojë kapjen e drejtësisë dhe ta rikthejë Shqipërinë në modelin e dështuar dhe korruptiv të 35 viteve të shkuara.
Nëse drejtësia goditet, Shqipëria rrezikon të humbasë një shans historik për të ndërtuar një shtet të së drejtës dhe për të siguruar një të ardhme europiane për qytetarët e saj”, shprehet Shehaj. /E.T
Me nisjen e vitit 2026, Shqipëria ka hyrë zyrtarisht në një fazë të re kufizimi të përdorimit të parasë fizike, në kuadër të masave kundër ekonomisë informale dhe parasë së padeklaruar.
Nga 1 janari 2026, ka hyrë në fuqi paketa ligjore që vendos tavan për pagesat cash, si për qytetarët ashtu edhe për bizneset.
Sipas ligjit, individët nuk mund të kryejnë pagesa me para në dorë mbi 500 mijë lekë, ndërsa për bizneset, transaksionet cash mes kompanive janë të kufizuara në 100 mijë lekë.
Çdo pagesë mbi këto vlera duhet të kryhet përmes bankave ose mjeteve elektronike.
Ligji parashikon gjithashtu që bizneset të pajisen me terminal POS, me afate të përcaktuara sipas sektorëve, si pjesë e përpjekjeve për të nxitur pagesat dixhitale dhe për të ulur përdorimin e parasë fizike.
Megjithatë, pavarësisht këtyre masave, të dhënat tregojnë një realitet tjetër. Paraja jashtë sistemit bankar vijon të rritet ndjeshëm. Në nëntor 2025, ajo arriti në 467.4 miliardë lekë, nga 405.9 miliardë lekë që ishte një vit më parë, duke shënuar një rritje vjetore prej mbi 15 për qind.
Në vite, tendenca ka qenë në rritje të vazhdueshme: Në nëntor 2023, paraja jashtë bankave ishte 391.9 miliardë lekë, në nëntor 2024 arriti në 405.9 miliardë, ndërsa në 2025 shënoi një rritje të fortë.
Ekspertët e shohin këtë si një tregues të informalitetit të lartë dhe përdorimit ende masiv të cash-it në ekonomi. Sfidë mbetet tashmë zbatimi efektiv i ligjit dhe rikthimi i këtyre fondeve brenda sistemit bankar, për të garantuar më shumë transparencë dhe kontroll financiar./E.T
Interesi për Nike Tech Fleece u rrit ndjeshëm pasi imazhi i presidentit venezuelian Nicolas Maduro i veshur me veshjen e famshme qarkulloi gjerësisht në rrjete sociale.
Fotografia u bë shpejt virale, duke i nxitur përdoruesit në të gjithë botën të kërkonin më shumë informacion rreth veshjeve të paraqitura në imazh.
Të dhënat e trendit të kërkimit tregojnë një rritje të qartë të pyetjeve që lidhen me Nike Tech Fleece menjëherë pasi imazhi fitoi vëmendje në internet.
Përpara këtij momenti, interesi për linjën kishte mbetur relativisht i qëndrueshëm, i nxitur kryesisht nga fansat e hershëm dhe jo nga vëmendja e re ose me bazë të gjerë.
Rritja e papritur sugjeron që imazhi viral veproi si katalizator, duke e shtyrë produktin përsëri në qendër të vëmendjes.
Momentet virale mund ta zhvendosin vëmendjen brenda natës, shpesh duke i çuar trendet e kërkimit në drejtime që askush nuk i pret.
Këtë herë, nuk ishte vetëm politika – zhurma ringjalli edhe interesin për vetë Nike Tech Fleece. /ET
45 mijë familje gjermane dhe mbi 2000 biznese mbetën pa energji elektrike dhe ngrohje, fundjavën e parë të vitit 2026, pas një sulmi zjarrvënieje në rrjetin energjitik të Berlinit. Përgjegjësinë për sulmin e mori grupi i majtë radikal Vulkangruppe, i cili në një tekst të gjatë të shpërndarë online deklaroi se synimi ishte “t’u pritej energjia klasave sunduese”.
Grupi e justifikoi aktin si “veprim në interes publik”, duke e lidhur me krizën klimatike, përdorimin e lëndëve djegëse fosile dhe konsumin e madh të energjisë nga qendrat e të dhënave për inteligjencën artificiale.
Sulmi ndodhi në orët e para të së shtunës, pranë një ure mbi kanalin Teltow, në jugperëndim të kryeqytetit gjerman, ku u dëmtuan disa kabllo të tensionit të lartë pranë centralit të energjisë në Lichterfelde.
Në deklaratë, militantët pretendojnë se teknologjia dhe kompanitë e mëdha po krijojnë një shoqëri gjithnjë e më të kontrolluar dhe se shoqëria po shkon drejt një të ardhmeje ku “njerëzit do të ulen para ekraneve të ndritshme, ndërsa do të vdesin nga uria dhe etja”. Ata kërkuan ndjesë për banorët me të ardhura të ulëta që u prekën nga ndërprerja e energjisë, por shtuan se “keqardhja është e kufizuar” për zonat e pasura të qytetit.
Autoritetet gjermane kanë nisur hetime për terrorizëm dhe sabotazh të infrastrukturës kritike. Kryetari i Bashkisë së Berlinit, Kai Wegner, e cilësoi sulmin si “politikisht të motivuar” dhe paralajmëroi se akte të tilla rrezikojnë drejtpërdrejt jetën e qytetarëve, veçanërisht të të moshuarve dhe pacientëve në spitale.
Ndërprerja e energjisë ka shkaktuar probleme të shumta: rrjetet celulare ranë përkohësisht, policia përdori altoparlantë për të informuar qytetarët, linja hekurudhore u ndërprenë dhe shumë shkolla rrezikojnë të shtyjnë rikthimin e nxënësve pas pushimeve. Riparimet po ecin me vështirësi për shkak të motit të ftohtë dhe borës, ndërsa disa zona mund të mbeten pa energji deri më 8 janar.
Sulmi ka ndezur shqetësimet për sigurinë e infrastrukturës energjetike në Gjermani. Fillimisht u përfol edhe për sabotazh të huaj, kryesisht nga Rusia, por fakti që vetë grupi radikal e mori sulmin për sipër nënkupton se rrjeti energjetik është shndërruar në një objektiv të ri të ekstremizmit ideologjik./E.T
Ndeshja e Premier Ligës mes Fulhem dhe Liverpul në “Craven Cottage” është shtyrë për disa minuta. Shkak është bërë një incident mjekësor në tribuna që kërkoi ndërhyrjen e shpejtë të stafit mjekësor. Për këtë arsye, ora e fillimit të takimit u zhvendos në 16:15.
Të dy klubet shprehën shqetësim dhe mbështetje për personin e prekur. Stafi i stadiumit koordinon aktualisht situatën për të garantuar sigurinë e tifozëve të tjerë. Fulham ka bërë thirrje për qetësi dhe respekt ndaj individit dhe familjes së tij.
Liverpul gjithashtu u kërkoi tifozëve të ruajnë distancën dhe të lejojnë ekipin mjekësor të punojë pa pengesa./E.T
Partia Demokratika do t’i rikthehet protestave sic e kishte lajmëruar kreu i saj, Sali Berisha.
Në një postim në facebook, kryetari i grupit parlamentar të PD, Gazment Bardhi ka njoftuar se Foltore e PD do të organizohet më 5 janar ora 18:00 para Kryeministrisë.
“Vendos qytetari, jo pushteti! E hënë, datë 5 Janar, ora 18:00, përballë Kryeministrisë”, shkruan Bardhi./E.T
Koha kur një euro kushtonte 120 lekë apo edhe 130 lekë duket tepër e largët, madje dhe e pabesueshme kur shikon vlerën që ka monedha evropiane aktualisht.
Brenda 1 dekade monedha evropiane është zhvlerësuar me gati 30%, nga 137.65 lekë që këmbehej në dhjetor të vitit 2015, muajin e kaluar e mbyllim duke u këmbyer me vetëm 96.54 lekë. Kjo ishte vlera më e ulët e regjistruar ndonjëherë, jo vetëm në raport me vitet e kaluara, por edhe në krahasim me të gjithë muajit e tjerë të 2025-ës.
Referuar kursit zyrtar të Bankës së Shqipërisë, një euro në 2025-ën është këmbyer me rreth 2% më pak se në 2024-ën, dhe i njëjti trend i luhatur pritet të vijojë edhe përgjatë vitit 2026.
A do të kthehet përsëri euro në vlerat e para 2 ose 3 viteve? Për këtë përgjigje nuk japin as institucionet dhe as ekspertët pasi varet nga sasia e valutës në treg, por të gjithë po e cilësojnë këtë nivel këmbimi si ‘normaliteti i ri’.
“Kursi edhe mund të evitohet në qoftë se neve do të kishim shtrëngesa”, tha në një intervistë për Report TV në ditët e fundit të dhjetorit, zëvendësguvernatorja e parë e Bankës së Shqipërisë Luljeta Minxhozi, e cila shton se “procesi i dixhitalizimit dhe shpejtësia e kryerjes së pagesave do ta mënjanojë efektin negativ që kishte kursi i këmbimit në planet e biznesit”.
Banka e Shqipërisë thotë se zhvlerësimi i monedhave të huaja ka ardhur prej fluksit të lartë të valutave që ka hyrë në vend prej turizmit, investimeve të huaja dhe remitancave, kurse ekspertët e kanë lidhur edhe me paranë informale, që vjen kryesisht nga burime informale.
Për të frenuar një rënie edhe më të fortë të euros në vitin që vjen, Banka e Shqipërisë do të rrisë blerjet e valutës në tregun e brendshëm. Nga 350 milionë euro që ishte sasia e domosdoshme e rezervës valutore për këtë vit, do të rritet në 450 milionë euro në vitin 2026.
Vetëm për të shmangur një zhvlerësim më të thellë të euros vjet, guvernatori deklaroi në vjeshtën e 2025-ës, se deri në shtator ishin tërhequr nga tregu gati 800 milionë euro. Por edhe për këto ndërhyrje ka pasur rezerva, sidomos nga FMN e cila në mbyllje të misionit vjet tha se “kursi duhet të lihet i lirë”.
Për shkak të shtimit të blerjeve të euros në treg nga Banka e Shqipërisë, për të frenuar një tkurrje edhe më të fortë, pra për të mos rënë më poshtë se 96 lekë, rezerva valutore ka arritur në shifra të tjera rekord. Në fund të nëntorit 2025 rezerva valutore raporton banka ka arritur në 7 miliardë euro, me rritje prej 800 milionë euro krahasuar me 2024-ën.
Tkurrja e fortë e dollarit
Jo vetëm monedha evropiane, por edhe dollari amerikan përkundër nga sa pritej në nisje të 2025-ës se politika e Donald Trump do ti forconte pozitat e dollarit, ndodhi e kundërta. Nëse në dhjetor të vitit 2024, dollari këmbehej me 93.89 lekë, në dhjetor të vitit që lamë pas zbriti në 82 lekë, pra një zhvlerësim prej gati 12% në një vit.
Kurse po ta krahasojmë dhjetorin e 2015-ën, zhvlerësimi i monedhës amerikane është me rreth 44.2 lekë më. Pra në 2015-ën një dollar kushtonte mesatarisht 126.64 lekë, ndërsa muajin e kaluar zbriti në 82.42 lekë, niveli më i ulët ndonjëherë.
Humbësit dhe fituesit e kursit të këmbimit
Humbësit më të mëdhenj të tkurrjes së euros/dollarit janë eksportuesit që i kanë shpenzimet në lekë dhe të ardhurat në euro ose dollar, dhe kur bëjnë këmbimin reduktohet ndjeshëm vlera.
Po ashtu humbasin edhe familjet që marrin remitanca, pasi për të njëjtën dërgesë që i kanë dërguar emigrantët vjet marrin më pak lekë këtë vit. Nëse në 2024-ën për një dërgesë 1000 euro merrnin 98 mijë lekë, në 2025-ën ky këmbim ka zbritur në 96 mijë lekë. E njëjtë është humbja edhe për të ata individë që të ardhurat i kanë në valutë.
Po kështu humbet buxheti i shtetit, fiton më pak para nga të importet, pasi për shkak të zhvlerësimit të valutave mblidhen më pak para nga TVSH-ja në doganë dhe nga akciza.
Ndërsa efektet pozitive të këtij zhvlerësimi janë ndjerë kryesisht në uljen e borxhit të marrë në valutë, pasi këstet e kthimit të tij janë bërë më të lira. Po ashtu përfitojnë importuesit, pasi ata blejnë në valutë dhe shesin në lekë./E.T
Kanë kaluar 20 vjet që kur Bugatti filloi të ndërtonte vetura të reja, duke lansuar Veyron 16.4 me 1,000 kuaj fuqi në vitin 2005.
I aftë të arrijë 400 km/h me motorin e tij W-16 8.0 litra me katër turbo, Veyron ripërcaktoi atë që ishte e mundur në një automjet prodhimi.
Tani, një veturë e veçantë nga Bugatti thuhet se do të nderojë hiperveturën origjinale.
Është krijimi i radhës nga Programme Solitaire i kompanisë, i cili supozohet se do të debutojë më 22 janar.
Modeli i vetëm do t’i bëjë homazh shasisë me numër 001.
Ajo do të vazhdojë të përdorë platformën W-16 të Bugatti, duke përdorur versionin më të fundit të motorit W-16, i cili mund të prodhojë deri në 1,800 kuaj fuqi.
Bugatti tha se planifikon të ndërtojë vetëm dy automjete në vit sipas Solitaire.
Kompania e hipermakinave të nivelit të lartë, ashtu si të tjerat, ka zgjeruar programet e saj të personalizimit dhe të njëhershme vitet e fundit, duke u dhënë klientëve mënyra të reja për të shpenzuar edhe më shumë para. /E.T
Për të tretën ditë radhazi, qarkullimi në aksin e rrugës kombëtare Prrenjas–Librazhd–Elbasan–Tuneli i Krrabës–Tiranë vijon të jetë tejet i mbingarkuar, duke sjellë kaos dhe vonesa të shumta për mijëra drejtues mjetesh. Situata problematike po përsëritet edhe këtë fundjavë, ndërsa fluksi i lartë i automjeteve në të dy kahet e rrugës e ka bërë thuajse të pamundur normalizimin e trafikut.
Burime nga terreni bëjnë me dije se, pavarësisht pranisë së shtuar të forcave të Policisë Rrugore, disiplinimi i qarkullimit mbetet i vështirë për shkak të numrit të madh të automjeteve dhe kushteve të amortizuara të infrastrukturës në disa segmente ku janë kryer punime për zgjerimin e saj , pjesë e Koridorit Tetë. Në disa segmente kyçe, trafiku ecën me ndalesa të shpeshta, duke krijuar radhë të gjata dhe nervozizëm tek drejtuesit e mjeteve.
Problematikat rëndohen edhe më tej nga gjendja e rëndë e rrugës në zona të caktuara, veçanërisht te Kthesat e Murrashit dhe Kthesat e Dragostunjës, ku segmentet në zgjerim janë me gropa të shumta dhe të rrezikshme për përdoruesit e rrugës. Këto dëmtime jo vetëm që ngadalësojnë qarkullimin, por përbëjnë edhe rrezik serioz për sigurinë rrugore./E.T
22% e emigrantëve kthehen në Shqipëri. Të dhënat e fundit të anketës së emigracionit të INSTAT tregojnë se afro 109 mijë shqiptarë janë kthyer gjatë 12 viteve të fundit. Shumica e shqiptarëve të kthyer janë mbi 35 vjeç. Konkretisht mbi 60% i përkasin grupmoshës 35 vjeç e sipër, 29 % të grupmoshës 25-34 vjeç dhe vetëm 9 % të të kthyerve janë midis 15-24 vjeç.
Një indikacion i rëndësishëm i emigrantëve të kthyer janë edhe ata të moshuar që dalin në pension. Afro 1/3 e personave të kthyer 65 vjeç ose më të vjetër, duke treguar se shumë prej tyre kthehen pas periudhave të gjata jashtë vendit, ndonjëherë pas daljes në pension.
Nisur nga të dhënat zyrtare migrantët kthehen në një moshë mesatare më të re krahasuar me popullsinë jo-migrante, duke kontribuar në një ulje të plakjes së popullsisë në vend.
Ekspertët e Bankës Botërore prej kohësh rekomandojnë përdorimin e emigrantëve si një nxitës të fuqishëm i zhvillimit të Shqipërisë.
Kthimi i emigrantëve mund të shërbejë për krijimin e vendeve të punës, investimet dhe zhvillimin e kapitalit njerëzor, duke e pozicionuar atë si një katalizator për prosperitet afatgjatë. Kjo pasi emigrantët e kthyer janë më të përqendruar në mesin e familjeve dhe kanë siguruar me të ardhura më të larta gjatë punës së tyre jashtë Shqipërisë./E.T
Faqja e specializuar e statistikave “Transfermarkt” ka publikuar listën e portierëve që kanë ruajtur në më shumë ndeshje portën e paprekur në vitin 2025.
Janë marrë në konsideratë 15 kampionatet më të rëndësishme të kontinentit, ndeshjen në të gjitha kompeticionet si dhe ndeshjet ndërkombëtare.
Këtë renditje të veçantë e kryeson Trubin i Benfikës me 26 ndeshje pa pësuar gol në 61 sfida të zhvilluara. Më pas vijnë Donnarumma dhe Kobel.
Në vendin e 4-t në këtë renditje të veçantë është portieri i kombëtares shqiptare dhe AEK-ut të Athinës, Thomas Strakosha, që ka ruajtur portën të paprekur në 22 ndeshje nga 44 takime të luajtura gjatë vitit 2025./E.T
Vijon fluksi i lartë i shqiptarëve që po kthehen drejt Greqisë pas festave të fundvitit. Të shumtë janë ata emigrantë të cilët po presin në tokën neutrale për të kaluar drejt doganës greke, e më pas drejt vendit fqinj, aty ku jetojnë e punojnë.
Dogana greke po punon me 2 sportele në hyrje dhe 2 në dalje, ndërsa pala shqiptare po punon me 4 sportele në dalje dhe 2 në hyrje.
Në këtë të fundit, nuk paraqiten radhë pavarësisht fluksit të lartë, pasi po punohet me kapacitetet maksimale, ndryshe nga homologët grekë.
Vetëm gjatë ditëve të para të Janarit, nëpërmjet pikës së kalimit kufitar të Kapshticës kanë dalë më tepër se 20.000 shtetas, ndërsa fluks ka patur edhe në pikën e kalimit kufitar të Qafë Thanës, ku kanë dalë rreth 8.000 shtetas./e.t
Pesë mjekë të rinj u janë bashkuar ekipt të QSUNT , duke plotësuar nevojat dhe duke forcuar më tej shërbimet shëndetësore për qytetarët.
Ministria e Shëndetësisë dhe Mbrojtjes Sociale vlerësoi sot përkushtimin, energjinë dhe humanizmin e mjekëve të rinj në shërbim të çdo pacienti.
“Mjekët e rinj i shërbejnë jetës aty ku ajo ka më shumë nevojë, në vendin e tyre, për njerëzit e tyre. Daniela, Besjana, Ada, Henri dhe Enejda e nisin vitin 2026 si pjesë e ekipit të QSUNT, duke sjellë përkushtim, energji dhe humanizëm në shërbim të çdo pacienti”, thuhet në njoftimin për shtyp të Ministrisë së Shëndetësisë dhe Mbrojtjes Sociale./e.t
Në fund të dhjetorit, Nicolas Maduro e refuzoi një ultimatum nga Presidenti i SHBA-së Donald Trump për të lënë detyrën dhe për të shkuar në mërgim në Turqi. Ishte New York Times që raportoi këtë lajm, duke cituar disa burime amerikane dhe venezueliane të përfshira në bisedimet e tranzicionit.
Turqia u bën thirrje Shteteve të Bashkuara dhe të gjitha palëve të përfshira të tregojnë qetësi dhe përmbajtje në zhvillimet e fundit në lidhje me sulmin e SHBA-së në Venezuelë dhe arrestimin e Presidentit Nicolas Maduro. Duke pritur fjalët e Presidentit Recep Tayyip Erdogan, i cili njoftoi një bisedë telefonike me homologun e tij amerikan Donald Trump për nesër, Ministria e Jashtme turke lëshoi një deklaratë.
“Turqia po monitoron nga afër zhvillimet në Venezuelë dhe u bën thirrje palëve të tregojnë qetësi dhe përmbajtje, të cilat janë thelbësore për të parandaluar që situata aktuale të çojë në pasoja negative për stabilitetin rajonal dhe ndërkombëtar”, thuhet në deklaratë. “Turqia është e gatshme të luajë rolin e saj dhe të ofrojë mbështetje konstruktive në zgjidhjen e krizës.”
Erdogan Në vitet e fundit ai ka mbajtur marrëdhënie të shkëlqyera me Nicolas Maduron, deri në atë pikë sa Turqia u diskutua edhe si një destinacion i mundshëm për presidentin venezuelian në rast të mërgimit./e.t
Rei Manaj kërkon me çdo kusht të largohet nga Sharjah në Emiratet e Bashkuara Arabe dhe për të bërë të mundur këtë, do të udhëtojë personalisht drejt Turqisë për të folur me klubin ku shpreson të vazhdojë karrierën e tij.
Sulmuesi ka kontaktuar drejtuesit e Sivaspor, edhe pse ky i fundit gjendet në kategorinë e dytë turke, duke shpresuar që të gjejë dyert e hapura për një kthim të mundshëm pasi u shit nga ky i fundit për 2 milionë euro gjatë verës me destinacion Sharjah, ku firmosi për dy vite.
Por pas pak muajsh dhe vetëm 6 golash të shënuar në 16 ndeshje, Manaj synon të bëjë prapakthehu. Meqë nuk do të jetë shumë e thjeshtë të realizohet kjo lëvizje, mediat turke raportojnë se sulmuesi pritet këtë javë në Turqi për bisedime me klubin, në mënyrë që t’i bindë ta pranojnë përsëri në radhët e tyre dhe për të gjetur një formulë transferimi që mund të kënaqë të gjithë palët. Kjo, pasi aktualisht Sivaspor nuk është në gjendje të paguajë për kalimin e tij./e.t
Gjatë protestës së organizuar mesditën e sotme përpara kryeministrisë, mbështetës të Lapaj i vendosën çadra për një “qëndrim më komod” gjatë natës në protestën pa ndalim të nisur nga Adriatik Lapaj që më datë 8 dhjetor.
Këto çadra, pas përfundimit të protestës, janë hequr nga policia, duke nxitur dhe përplasje të dhunshme të aktivistëve dhe anëtarëve të “Shqipëria Bëhet” me efektivët e policisë./e.t
Pas gati një jave, situata e furnizimit me ujë të pijshëm në Vlore po shkon drejt normalizimit të plote. Autoritet e Kujdesit Shëndetësor konfirmojnë se pas analizave fiziko-kimike, uji është brenda parametrave të lejuar, ndërsa pritet edhe përgjigjja e analizave mikrobiologjike.
Analizat e kryera deri më tani nga ekspertët e epidemiologjisë në Vlorë kanë dhënë dritën jeshile për cilësinë e ujit të pijshëm. Sipas Shefit të Epidemiologjisë, Agron Bashllari, të gjithë treguesit fiziko-kimikë kanë rezultuar brenda standardeve të kërkuara.
Aktualisht, laboratorët po përpunojnë kampionet për analizat mikrobiologjike, të cilat do të vulosin përfundimisht sigurinë e plotë të ujit për konsumatorët. Pavarësisht kësaj pritjeje, institucionet konfirmojnë se situata është tërësisht normale dhe pa rreziqe për shëndetin e popullatës.
“Analizat fiziko-kimike janë në rregull, ndërsa pritet përfundimi i analizave mikrobiologjike… situata paraqitet normale dhe uji është brenda parametrave të lejuar”, tha Agron Bashllari, Shef i Epidemiologjisë, Vlorë.
Procesi i monitorimi nisi pas një ndërprerjeje pesë-ditore të furnizimit në qytetin bregdetar. Gjatë ditëve të krizës, qytetarët u furnizuan përmes autoboteve.
Edhe gjatë kësaj periudhe janë ushtruar kontrolle të vazhdueshme për të parandaluar çdo problematikë epidemiologjike deri në rikthimin e plotë të shërbimit nga Ujësjellësi i Vlorës./e.t
Droni RQ-170 Sentinel, i njohur edhe si “Bisha e Kandaharit”, thuhet se ishte i përfshirë në Operacionin Absolute Resolve, misionin amerikan që çoi në kapjen e Nicolás Maduro.
Disa media ushtarake dhe ndërkombëtare po e raportojnë këtë. Midis tyre është edhe ABC News australiane, e cila publikoi pamje të verifikuara të ndara nga një gjurmues OSINT (Open Source Intelligence) që tregon një RQ-170 duke u kthyer në Porto Riko pasi mbështeti misionin. Droni RQ-170 Sentinel është një avion i pilotuar nga distanca i prodhuar nga Lockheed Martin./e.t
Ajo është një nga figurat më të fuqishme dhe më të errëta të regjimit venezuelian. Cilia Flores, bashkëshortja e Nicolas Maduro-s dhe e njohur nga presidenti si “luftëtarja e parë” e Venezuelës, akuzohet nga prokurorët amerikanë si pjesë kyçe e një rrjeti shtetëror që garantonte mbrojtje për trafikun ndërkombëtar të drogës, kundrejt pagesave marramendëse.E lindur në vitin 1956 në Tinaquillo, në Venezuelën qendrore, Flores u rrit në lagje punëtore të Karakasit perëndimor. Juriste me specializim në të drejtën e punës dhe penale, ajo u përfshi herët në lëvizjen e Hugo Chavez, duke i ofruar mbështetje ligjore pas grushtit të dështuar të shtetit në vitin 1992. Pikërisht atëherë u njoh me Nicolas Maduro-n, me të cilin ndërtoi një aleancë politike dhe personale që zgjati mbi tre dekada.
Karriera e saj politike u ngjit shpejt: deputete në vitin 2000 dhe 2005, ndërsa në vitin 2006 u bë gruaja e parë që drejtoi parlamentin venezuelian. Mandati i saj u shoqërua me polemika, nga kufizimi i mediave deri te akuzat për nepotizëm. Më pas shërbeu si drejtuesе e lartë e Partisë Socialiste të Bashkuar të Venezuelës dhe, në vitin 2012, u emërua Prokurore e Përgjithshme nga vetë Hugo Chavez, duke qenë pjesë e rrethit të tij më të ngushtë deri në fund të jetës.
Por sipas aktakuzave amerikane, pas fasadës politike fshihej një rol shumë më i errët. Prokurorët në SHBA pretendojnë se në vitin 2007 Cilia Flores ka marrë qindra mijëra dollarë ryshfet për të ndërmjetësuar një takim mes një trafikanti të madh droge dhe Nestor Reverol Torres, atëherë kreu i Zyrës Kombëtare Kundër Drogës në Venezuelë.
Skema, sipas hetimeve, ishte e qartë:
100 mijë dollarë për çdo fluturim me kokainë, që do të kalonte lirshëm hapësirën ajrore të Venezuelës.
Një pjesë e këtyre parave dyshohet se përfundonte direkt tek Flores, në këmbim të mbrojtjes institucionale për kartelet.
Reverol Torres u akuzua në vitin 2015 në Nju Jork për krime të rënda të lidhura me narkotikët dhe sot është në arrati. Hetimet amerikane e përshkruajnë Cilia Flores si hallkë lidhëse mes pushtetit politik dhe trafikut të drogës, duke garantuar mburojë shtetërore për avionët e ngarkuar me kokainë.
Emri i saj u bë publik në shkallë ndërkombëtare po në vitin 2015, kur dy nipërit e saj u arrestuan në SHBA dhe u dënuan për komplot për trafik droge. Ata u liruan vetëm në vitin 2022, pas një shkëmbimi të burgosurish mes Uashingtonit dhe Karakasit, çka rriti edhe më shumë dyshimet për peshën reale të Flores brenda regjimit.
Tashmë, teksa pritet të përballet zyrtarisht me drejtësinë amerikane në New York, një gjë është e qartë edhe për mbështetësit, edhe për kritikët:
Cilia Flores është e pandashme nga pushteti i Nicolas Maduro-s dhe, sipas SHBA-së, një nga figurat kyçe të një sistemi që ka bashkëpunuar ngushtë me kartelet e drogës – pikërisht ato që Presidenti Donald Trump i ka shpallur luftë të hapur./e.t
Login
