Negociatat që synojnë t’i japin fund luftës ruse në Ukrainë po prodhojnë sinjale progresi, por sfida të mëdha mbeten në rrugën drejt një ujdie përfundimtare. Kështu u shpreh zëdhënësi i Kremlinit, Dmitri Peskov, këtë të hënë.

Sipas tij, bisedimet mes të dërguarve të Ukrainës, Rusisë dhe SHBA-së ditët e fundit në Abu Dabi ishin konstruktive dhe një raund i ri negociatash planifikohet javën e ardhshme. Edhe pse nuk pati arritje të rëndësishme, Peskov theksoi se vetë fakti që këto kontakte kanë nisur në mënyrë konstruktive është pozitiv.

Zyrtarët kanë zbuluar pak detaje nga bisedimet e mbajtura të premten dhe të shtunën, të cilat janë pjesë e përpjekjeve njëvjeçare të administratës Trump për t’i çuar palët drejt një marrëveshjeje paqeje dhe për t’i dhënë fund luftës katërvjeçare.

Nga ana tjetër, presidenti Volodimir Zelenski ka deklaruar se një dokument me garancitë e sigurisë për Ukrainën është plotësisht gati dhe se Kievi po pret kohën dhe vendin e duhur për ta firmosur.
“Për ne, garancitë e sigurisë janë para së gjithash garanci sigurie nga Shtetet e Bashkuara. Dokumenti është 100% gati dhe ne po presim që partnerët tanë të konfirmojnë datën dhe vendin e nënshkrimit. Dokumenti do të dërgohet më pas për ratifikim në Kongresin e SHBA-së dhe në parlamentin ukrainas”, tha Zelenski, shkruan A2 CNN.

Ai shtoi se mes palëve mbeten dallime thelbësore, kryesisht mbi çështjen territoriale. Sipas tij, Moska po bën gjithçka të mundur për të detyruar Ukrainën të largohet nga pjesë të rajoneve lindore që ende nuk i kontrollon, ndërsa Kievi nuk është tërhequr nga qëndrimi se integriteti territorial nuk duhet të cënohet.

“Këto janë pozicione thellësisht të ndryshme. Amerikanët po përpiqen të gjejnë një kompromis”, tha Zelenski, duke shtuar se të gjitha palët duhet të përgatiten për kompromis, përfshirë edhe SHBA-në.

Sipas një zyrtari amerikan të cituar nga mediat, negociatorët do të kthehen të dielën në Emiratet e Bashkuara Arabe për raunde të tjera bisedimesh. Në takimet e fundjavës, u diskutua për çështje ushtarake dhe ekonomike, si dhe për mundësinë e një armëpushimi përpara një ujdie gjithëpërfshirëse.

Ish-ministri i Drejtësisë, Enkelejd Alibeaj, është shprehur se kryedemokrati Sali Berisha nuk ka asnjë lloj problemi personal me gjyqtaren Irena Gjoka.

Komentet Alibeaj i bëri në studion e emisionit ‘Off the Record’ ku tha se fisi i Irena Gjokës, me mbiemër Maneku, e kanë pritur Sali Berishën në Patos, gjatë kohës së lideri i opozitës së asaj kohe nuk hynte dot në jug të vendit, në vitet 1997-1999.

Po ashtu Alibeaj tha se pas viteve 1997, kur PS kishte kapur sistemin gjyqësor, Irena Gjoka shihej si delja e zezë në Gjykatën e Fierit, pasi sipas tij, ishte e vetmja gjyqtare e djathtë.

“Në 1997, pas 1997, Sali Berisha e kishte shumë të vështirë që të depërtonte në jug. Në 1999 ka qenë në Vlorë, pas revolucionit komunist të 1997-ës. A e dini ju kush e ka pritur në Patos për herë të parë dhe kush kanë qenë flamurtarët e PD-së së Patosit? Fisi Maneku. Dhe Irena, një nga 7 mbiemrat e ka Maneku.

Dhe unë kur kam qenë ministër i Drejtësisë kam pasur një problem me këtë zonjë. Por ama e vërteta është e vërtetë. Nga 1997 dhe më vonë, në Gjykatën e Fierit ishte vetëm një gjyqtare që quhej e djathtë. Ju e dini se ç’ndodhi pas 1997-ës me Petron. Morën edhe sistemin e drejtësisë se kështu ndodh gjithmonë. E vetmja që shihej si dele e zezë ishte Irena Maneku, sepse ishte e djathtë.

Këtë e them për një gjë fare të thjeshtë. Aludimi është se kjo gjyqtare na paska një problem personal me Sali Berishën. Përkundrazi, ajo s’ka problem. Të paktën e shkuara e saj apo e famijes së saj ka qenë djathtas”, tha mes të tjerash Alibeaj.

Nikoll Lesi, i ftuar në emisionin “Të Paekspozuarit” në MCN TV, “parashikoi” se fati i Ervin Salianjit do të jetë si i shumë eksponentëve të PD ndër vite, që Berisha i ka nxjerrë si grupe armiqësore duke i zhdukur nga partia.

Lesi tha se PD nuk mund të vijë në pushtet dhe do ta ketë fundin, kur edhe Berisha të ketë fundin e tij biologjik.

Biseda në studio: 

Nikoll Lesi: Kështu ka bërë doktori që në 1992. Nxirrte grupet armiqësore. Madje edhe Azem Hajdarin e përjashtuan nga PD njëherë. Kështu ka punuar pastaj me grupe të tjera armiqësore. Pra Salianji do të përfundojë si fati i gjithë grupeve armiqësore. Këtë metodë ka, nuk pranon doktori. Ai kur tha është vetëpërjashtuar, nuk ka vetëpërjashtim…

Ergys Mërtiri: Por sot Berisha nuk është ai që ka qenë, pjesa më e madhe e elektoratit të tij janë të dëshpëruar. Berisha tani duhet të përballet me një të vërtetë, që një pjesë e madhe e votuesit të PD do ndryshim.

Nikoll Lesi: Doktori ikën bashkë me PD-në në botën tejtër, se doktori vdes 105 vjet, por doktori e merr PD-në me vete andej, nuk e lëshon PD-në doktori.

Ergys Mërtiri: Po, por kjo do të krijojë krisje të madhe aty, do ta katandisë partinë në kioskë.

Nikoll Lesi: Fakti që kandidon në prill dhe fiton, shkon deri 86 vjeç, e me rradhë. Për mua kështu ndodh, PD vdes me doktorin.

Andi Tela: Derisa doktori thotë jam misionar, dhe do kandidoj prapë, atje do të jetë në krye të PD-së. Salianji nëse do të bëjë luftë dhe është në gjendje të krijojë një grup njerëzish, le ta bëjë, çështje force është kjo.

Në emisionin “3D” të moderuar nga gazetari Alban Dudushi, avokati Redi Ramaj foli gjerësisht për nismën e re të shoqërisë civile të quajtur “Forumi i Dialogut Politik”, duke e prezantuar si një hap të rëndësishëm për lehtësimin e komunikimit mes partive opozitare dhe për krijimin e një platforme të përbashkët veprimi.

Ai theksoi se ky forum synon të ndërmjetësojë brenda kampit opozitar dhe të ofrojë një alternativë funksionale për qytetarët, pa u shndërruar në parti politike, por duke kontribuar në forcimin e demokracisë dhe rikthimin e shpresës tek shoqëria.

“Forumin e Dialogut Politik”, një nismë që synon të lehtësojë komunikimin dhe bashkëpunimin mes partive opozitare. Kemi vendosur të ndërmarrim një nismë publike për lehtësimin e dialogut mes partive të opozitës, rakordimin e qëndrimeve dhe vendosjen e një bashkëpunimi të pranueshëm mes tyre” tha ai.

Ramaj nënvizoi se qëllimi i forumit është krijimi i një opozite normale dhe funksionale, e cila të ofrojë një alternativë të besueshme për qytetarët.

“Qëllimi ynë është që për të pasur një shtet normal, me një opozitë normale dhe funksionale, duhet të kemi qeverisje të mirë dhe në shërbim të qytetarit. Përveç qeverisë, duhet të kemi edhe një alternativë që në të ardhmen të vijë në pushtet duke bërë rotacionin normal. Në këto momente shohim që opozita shqiptare, kjo që është aktuale apo dhe grupimet e tjera që mund të krijohen në të ardhmen, nuk e kanë forcën që t’i japin mesazh qytetarit se janë shpresa dhe alternativa e ardhshme për Shqipërinë” tha ai, duke shtuar se apatia dhe demoralizimi i tepërt i qytetarëve është një rrezik për demokracinë.

Sipas tij, Forumi i Dialogut Politik nuk ka synim të shndërrohet në parti politike, por të shërbejë si ndërmjetës mes kampit opozitar dhe shoqërisë civile.

“Ne kërkojmë që të gjitha këto qëndrime të kthehen në platformë të veprimit opozitar që i vijnë mirë gjithë partive politike opozitare” u shpreh Ramaj.

Në fund, ai riktheu vëmendjen te protesta e opozitës, duke theksuar se është pro protestave si një e drejtë legjitime në demokraci, por kundër çdo forme dhune ekstreme.

“Çdo protestë është legjitime në demokraci, por unë nuk pajtohem me veprime dhune ekstreme në asnjë lloj rasti.”

Enkelejd Alibeaj, nga “Djathtas 1912”, ka sqaruar arsyet pse nuk mori pjesë në protestën e thirrur nga Sali Berisha të shtunën, duke e cilësuar atë jo si protestë qytetare, por si një miting të pastër partiak. I ftuar në emisionin “Off the Record” Alibeaj u shpreh se aktiviteti tregoi një element të qartë: Partia Demokratike mbetet një forcë e madhe financiare.

Sipas tij, protesta ishte e pabesueshme politikisht, pasi dy ditë më parë e njëjta forcë politike kishte votuar bashkë me mazhorancën për disa vendime kyçe, përfshirë reformën zgjedhore dhe përfaqësimin e Shqipërisë në Bordin e Paqes. “Si mund të kërkosh rrëzimin e kryeministrit kur pak ditë më parë ke votuar bashkë me të?”, pyeti Alibeaj.

Ai ironizoi premtimet e përsëritura të opozitës për “kilometrin e fundit” të Ramës, duke thënë se sipas këtyre premtimeve, kryeministri “ka rënë” disa herë që prej vitit 2022. Alibeaj theksoi se protestat masive nuk e rrëzojnë qeverinë dhe se kjo e fundit nuk pati as impakt publik, as ndërkombëtar.

Sipas tij, protesta shërbeu më shumë për të konsoliduar autoritetin e Berishës brenda PD-së dhe për të neutralizuar lëvizjet e brendshme kritike.

Botuesi i Koha Jonë, Nikoll Lesi, i ftuar në emisionin “Të Paekspozuarit” në MCN TV, deklaroi se protesta e opozitës nuk e rrezikon aspak mazhorancën, ndërkohë që tregoi një bisedë me një militant të PD-së i cili kishte ardhur me furgon në protestë për të rrëzuar Ramën, siç premtoi Berisha, por u zhgënjye.

“Po nuk ka takat doktori… Duhet të qëndronte ditë-natë në shesh, por prapë me Saliun nuk bashkohet e gjithë opozita. Jam 100% dakord me atë që tha Murrizi, por mund të shtoj, PD dhe Berisha ka disa muaj apo vite, që thonë kjo është protesta e fundit që rrëzon Ramën. Vijnë militantët, njoh të ndryshëm. Njëri më tha këtë rradhë ka mbaraur Rama. Pas mitingut, më tha pagova fugonin, pagova militantët dhe tani nuk vij më. Zhgënjehen njerëzit. Po të ketë lidership të besueshëm opozita, edhe unë dal në protestë, se i thonë katër mandte mazhoranca. Por ka një opozitë, që doktori mban Ramën në pushtet.

Me këtë mënyrë, të djegë dhe të bëjë cfarë të dojë… Në kohën e Bashës ka patur protestë më të madhe PD-ja, ishte edhe më afër pushtetit dhe nuk fitoi dot. Me doktor Berishën, që e ka bërë historinë e vet, nuk vjen në pushtet PD. Kryetari i ri i PD duhet të jetë kandidati për kryeministër. Me PD dhe me Berishën, e mund dot Ramën? Jo. Duhet front i ri”, tha ndër të tjera Lesi.

Anëtari i Këshillit Kombëtar të Partisë Demokratike, Lisandër Hoxha, ka akuzuar kryeministrin Edi Rama, duke e cilësuar vizitën e tij në Izrael si një përpjekje për të ushtruar presion mbi SPAK-un. I ftuar në emisionin “Off the Record” nga Andrea Danglli, Hoxha tha se Rama po e shfrytëzon politikën e jashtme për interes personal, duke u vetëparaqitur si “lider global”, ndërkohë që Shqipëria, sipas tij, mbetet vendi më i varfër dhe më i korruptuar në Europë.

Sipas Hoxhës, kjo “shitje” publike e Ramës si faktor ndërkombëtar synon të dërgojë mesazhe frikësuese drejt drejtësisë. “Është një tentativë për t’i thënë SPAK-ut: kujdes me mua, unë jam i paprekshëm”, u shpreh ai, duke shtuar se “të gjitha rrugët e korrupsionit çojnë te Rama”.

Hoxha akuzoi kryeministrin për lidhje me grupe kriminale dhe kartele droge, duke përmendur raste të sanksionuara nga SHBA, si dhe përdorimin e parave për të ndikuar mediat dhe opinionin publik. Ai deklaroi se Rama nuk mund ta “lajë fytyrën” me vizita apo forume ndërkombëtare, përballë skandaleve të korrupsionit, vjedhjes së zgjedhjeve, aferave me tenderë, inceneratorëve dhe varfërimit të qytetarëve.

“Hallin e shqiptarëve nuk e mbulon as Izraeli, as bordi i paqes”, përfundoi Hoxha.

Ushtria izraelite thotë se ka rikuperuar trupin e pengut të fundit në Gaza, duke hapur rrugën për fazën e ardhshme të planit të paqes të presidentit amerikan Donald Trump.

Izraeli ka qenë duke kërkuar për Rreshterin e Parë Ran Gvili që nga fillimi i armëpushimit me Hamasin në tetor. Kryeministri Benjamin Netanyahu e quajti kthimin e trupit të Gvilit “një arritje të jashtëzakonshme”.

Ushtria izraelite filloi kërkimin në një varrezë për Gvilin të dielën në mëngjes. Krahu i armatosur i Hamasit tha se u kishte dhënë ndërmjetësve “të gjitha detajet dhe informacionin” mbi vendndodhjen e tij.

Zyra e Netanyahut tha se Izraeli do të rihapte pikën kryesore kufitare të Gazës me Egjiptin sapo operacioni për gjetjen dhe kthimin e Gvilit të përfundonte.

Kryeministri përshëndeti kthimin e trupit të Gvilit, duke thënë: “Ne premtuam, dhe unë premtova t’i sjellim të gjithë mbrapsht. I sollëm të gjithë, deri tek i fundit.”

Ushtria izraelite tha se sqarimi i inteligjencës ekzistuese gjatë fundjavës kishte mundësuar kërkimin në varrezën pranë qytetit të Gazës. Një zyrtar ushtarak tha se varreza “ndodhej në zonën e Linjës së Verdhë”, kufiri i territorit ende të kontrolluar nga forcat izraelite sipas marrëveshjes së armëpushimit.

Hamasi tha se kishte “informuar vazhdimisht ndërmjetësit me informacionin e nevojshëm, gjë që çoi në rikuperimin e trupit”.

Zëdhënësi Hazem Qassem tha se zbulimi “konfirmon angazhimin e Hamasit ndaj të gjitha kërkesave të marrëveshjes së armëpushimit”.

Në Izrael, Itzik Gvili, babai i pengut, i dha lamtumirën emocionale djalit të tij para arkivolit.

“Ti kishe mundësinë të qëndroje në shtëpi, por më the: ‘Baba, nuk do t’i lë shokët e mi të luftojnë vetëm.’ Ti dole, dhe duhet të shohësh nderin që ke këtu, të gjithë njerëzit që të sollën. E gjithë policia është këtu me ty, e gjithë ushtria është këtu me ty, i gjithë kombi është këtu me ty. Jam krenar për ty, biri im,” tha Itzik Gvili.

Motra e Gvilit, Shira, më herët i tha Forumit të Pengjeve dhe Familjeve të Zhdukura: “Ndjej një lehtësim të jashtëzakonshëm. Jam e lehtësuar. Jam e trishtuar. Jam shumë e trishtuar që përfundoi kështu, por duhej të përfundonte në një moment. Jam e lumtur që po kthehet në shtëpi.”

Rikuperimi i Gvilit mund t’i sjellë mbyllje familjes së tij dhe më në fund i jep fund agonisë së pengjeve të Izraelit pas 843 ditësh. Po ashtu hap rrugën për përparim të mëtejshëm në marrëveshjen e armëpushimit në Gaza. Izraeli kishte rezistuar të ecte përpara derisa Gvili të gjendej.

Faza e dytë pritet të përfshijë rindërtimin dhe çmilitarizimin e plotë të Gazës, përfshirë çarmatimin e Hamasit dhe grupeve të tjera palestineze. Plani gjithashtu parashikon vendosjen e një Force Ndërkombëtare të Stabilizimit (ISF) dhe tërheqjen graduale të forcave izraelite nga Gaza.

Avokati Idajet Beqiri ka lëshuar akuza ndaj Partisë Demokratike dhe liderit të saj, Sali Berisha, gjatë analizës së situatës politike në emisionin “3D” në RTSH. Duke komentuar protestën e fundit, Beqiri e cilësoi aksionin opozitar si një “film i vjetër i parë që nga viti ’91”, që sipas tij, bëhet vetëm për të mbrojtur Berishën nga drejtësia.

Avokati hodhi poshtë pretendimet e opozitës për mbështetje popullore, duke u ndalur te numrat dhe mënyra e organizimit.

“Këto nuk janë protesta qytetare. Tirana ka 1 milion e 200 mijë banorë, në protestë ishin 3 mijë persona të mbledhur nga të gjitha anët me pagesë,” deklaroi Beqiri.

Ai shkoi më tej duke pretenduar se disponon prova nga përvoja e tij si avokat: “Kam mbrojtur njerëz në procese gjyqësore që kanë marrë pjesë në protesta dhe kam dëshmi që janë paguar.”

Sipas Beqirit, shkaku i vërtetë i “përshkallëzimit politik” nuk është keqqeverisja, por avancimi i hetimeve për dy dosjet të bujshme.

“Nuk janë protesta qytetare, këto janë protesta për të mbrojtur Sali Berishën. Po përfundon ’21 Janari’, pas tij është ‘Gërdeci’. I ka ardhur ora, s’ka ku të shkojë,” tha ai, duke shtuar se opozita aktuale e ka lënë vendin pa alternativë.

Në debatin mbi krizën politike, Beqiri bëri një krahasim mes situatës së sotme dhe asaj kur Berisha ishte në pushtet.

“Kriza qëndron në kokat e sëmura. Qenka krizë Tuneli i Llogarasë dhe nuk qenka ’21 Janari’ ku u vranë njerëz, apo ‘Gërdeci’ ku u dogjën njerëz gjallë?” tha avokati.

Në mbyllje, ai kujtoi se pavarësisht dhunës me molotovë, qeveria nuk bie, ndërsa kujtoi se më 21 janar, kur nuk kishte as molotovë e as flakadanë, protestuesit u vranë në Bulevard.

“Të tremb vota e popullit, jo ato 3 mijë veta,” përfundoi Beqiri.

Një zjarr ka rënë në një banesë private në lagjen “Loni Dhamo”, ku jetonin dy persona. Si pasojë e flakëve, banesa është përfshirë pothuajse tërësisht nga zjarri, ndërsa rrezikohet edhe një tjetër banesë ngjitur.

Në vendngjarje ndodhen forcat zjarrfikëse dhe policia, të cilat po punojnë për shuarjen e flakëve dhe për izolimin e zonës. Dyshohet se shkak i zjarrit mund të ketë qenë një shkëndijë elektrike. Për arsye sigurie, energjia elektrike në zonë është ndërprerë.

Si pasojë e tymit, një vajzë 12-vjeçare është dërguar në spital me shenja asfiksie, por ndodhet jashtë rrezikut për jetën.

“Brenda gjashtëmujorit të parë ju siguroj që do mbyllen disa kapituj”. Kështu u shpreh ambasadori i Shqipërisë në Bashkimin Europian, Ferit Hoxha, gjatë një interviste në Klan News me gazetarin Besard Jacaj. Ai u shpreh se kjo vjen si pjesë e një plani që është dakordësuar me Komisionin Europian.

“Jo vetëm presim mbylljen e ndonjë kapitulli, por presim mbylljen e një numri të konsiderueshëm kapitujsh. Ne kemi një plan pune. Ne nuk po ecim as qorrazi dhe as me dëshirën tonë. Ne po ecim me një plan pune që kemi dakordësuar me KE-në dhe aty janë të përfshirë edhe afatet që mendojmë se janë realistë për mbylljen e kapitujve”, tha Hoxha.

“Gjithmonë në këtë proces do jenë tre komponentë të rëndësishëm, është gjithë pala shqiptare me aktorët e saj, është gjithë Komisioni Europian që negocion në emër të BE-së dhe vendet anëtare që vlerësojnë dhe marrin vendimin”, shtoi ai.

Por a ka ndryshuar qëndrimi i Bashkimit Europian për Shqipërinë në lidhje me planin për zgjerimin? Ambasadori Hoxha tha se asgjë nuk ka ndryshuar, por tashmë jemi në proces pas hapjes së të gjithë grupkapitujve.

“Tani kemi kaluar në procesin tjetër. Ne jemi në një proces që është i veçantë dhe specifik me metodologjinë e re të zgjerimit që ka të bëjë me atë që quhet piketat e ndërmjetme. Ato janë 24 kërkesa specifike të përcaktuara në Konferencën e Dytë Ndërqeveritare që është mbajtur kur është hapur grupkapitulli i parë dhe gjatë së cilës Shqipëria ka marrë një numër angazhimesh. Këto angazhime duhet të plotësohen në mënyrë që pasi të quhen të plotësuara kënaqshëm dhe kjo do verifikohet nga KE dhe vendet anëtare, atëherë Shqipëria do të fillojë të mbyllë kapitujt. Pra është një etapë e ndërmjetme, jashtëzakonisht e rëndësishme, i cili është duke u bërë”, tha ambasadori.

Ai bëri me dije se gjatë muajit shkurt në Shqipëri do të vijë një delegacion i veçantë i Komisionit për Marrëdhëniet me Jashtë të PE-së. Sipas Hoxhës, ky delegacion do të takohet me aktorët politikë shqiptarë brenda dhe jashtë parlamentit, me qeverinë si dhe institucionet e tjera për të parë se ku ndodhet Shqipëria në ecurinë e procesit dhe çfarë duhet bërë në vijim.

Ish-deputeti i PD-së, Myslim Murrizi, në një lidhje me emisionin “Të Paekspozuarit” në MCN TV, u shpreh skeptik ndaj protestës kombëtare të PD-së të mbajtur të shtunën e kaluar. Duke iu referuar votës në parlament të enjten e kaluar ku Rama u votua edhe nga PD si përfaqësues i Shqipërisë në Bordin e Paqes së prezantuar nga president Trump, Murrizi tha se nuk u shpreh se nuk mundesh të votosh Ramën të enjten dhe të shtunën të kërkosh rrëzimin e tij.

“Edhe protesta lidhet me rëndësinë e individëve që mbajnë fjalën në protestë. Nuk duhet të thuhet ashtu, jam kundër kësaj thënie që bie Rama. Nëse ngremë pritshmërinë dhe pastaj bëhet dy orë fjalime dhe çerek ore protestë, pastaj militantët shkojnë në shtëpi, dhe do t’i ftosh në 20 shkurt, që hajde se jemi afruar edhe 67 metra nga kilometri i fundit. Nuk është serioze me një forcë politike që ka qeverisur Shqipërinë.

Me retorikën, “hajde ta hedhim në Lanë, ta kërrejmë”, nuk di të jetë rrëzuar ndonjë qeveri nga protestat shumë më të mëdha se këto.

Opozita ka mision të protestojë për të rreshtuar dhe unifikuar faktorin opozitar.

Sa kohë që ka valle pogonishte dhe mbyllet me çifteteli, ka edhe regji se kush do të flasë…

Ndoshta besojnë se rrëzimi i qeverisë vjen nga faktori ndërkomëbtar, por them se vjen nga shqiptarët duke ndërgjegjësuar edhe faktorin ndërkomëbtar. Nuk besoj se voton as Trumpi as Meloni dhe as Macroni, për të rrëzuar Ramën.

Kjo protestë, ishte tentativë për të ndezur zjarr në një ferrë të lagur. Ti i jep votën Ramës të enjten dhe më fton mua ta rrëzoj të shtunën. I jep votën Ramës që të jetë përfaqësues i të gjithë faktorit politik në Shqipëri. Pastaj do vi puna të votojnë prapë, pranda j them se ishte zjarr që u tentua të ndizen në një ferrë të lagur. Mendoj se do të kishte më shumë protestues po të mos e votonte Ramën opozita si pëfaqësues në Bordin e Paqes”- tha Murrizi.

Analisti politik Roland Bejko, i ftuar në emisionin “Real Story” në ABC Neës, ka komentuar zhvillimet e fundit në kampin opozitar.

Sipas Bejkos, narrativa e ndërtuar rreth heqjes së statusit “non grata” dhe paralelizmat mes kryeministrit Edi Rama dhe figurave ndërkombëtare si Maduro, rriti artificialisht shpresat e militantëve, por nuk u përkthye në rezultate konkrete.

Ai theksoi se ngjarje të shpejta në arenën ndërkombëtare, si përfshirja e Ramës në Bordin e Paqes dhe kontaktet me figura të administratës Trump, kanë forcuar pozitën e kryeministrit, ndërsa Berisha, sipas tij, ndonëse shfaqet i irrituar, ka interes që Rama të dalë i fortë politikisht.

“Berisha e kishte pritshmërinë shumë të lartë, iu krijua ideja me arrestimin e Maduros, edhe Edi Rama ishte një Maduro, filluan të besonin Ramaduro. Këtë fabule filluan që ta besonin vërtet. Këta e rritën jashtëzakonisht shumë pritshmërinë në raport me militantët. Doli Belind Këlliçi për të helmuar militantët se Sali Berishës i është hequr ‘non grata’, asnjëra prej tyre nuk ndodhi.

Ndodhën disa gjëra të shpejta, siç ishte Bordi i Paqes ku Rama do jetë krah vetë Trump dhe elementi i dytë ishte ardhja e Ivanka Trump në Shqipëri dhe më pas i dhanë votën Ramës për Bordin. Berisha bën vërtet si i inatosur, Berisha është i kënaqur që Rama shkoi te Trump sepse Rama atje do të japë imazhin që Rama është shumë afër amerikanëve dhe do t bjerë pak ndikimi mbi SPAK për Ramën dhe veten, se hallin e kanë të përbashkët. Pse Berishës i intereson Rama e fortë?! Sepse Rama tha që do bëjë ndryshime kushtetuese, do i japë Senatin dhe Senati është imunitet”, tha Bejko.

Ish-deputeti i Partisë Socialiste, Petro Koçi, e ka cilësuar vizitën e kryeministrit Edi Rama në Izrael si një zhvillim me rëndësi të veçantë gjeopolitike, duke theksuar se ajo shkon përtej marrëdhënieve dypalëshe Shqipëri-Izrael. I ftuar në emisionin “Off the Record” nga Andrea Danglli, Koçi u shpreh se kjo vizitë ka impakt të drejtpërdrejtë edhe në Shtetet e Bashkuara të Amerikës dhe lidhet me zhvillimet e fundit në arenën ndërkombëtare.

Sipas tij, vizita vjen pas krijimit të Bordit të Paqes në Davos, ku Shqipëria ishte e ftuar zyrtarisht, si dhe pas përfshirjes së Kosovës. Koçi e interpretoi këtë si një vëmendje të shtuar të SHBA-së ndaj shqiptarëve në tërësi dhe jo thjesht ndaj një pjese të tyre në rajon, duke e quajtur një “riaktivizim të kontratës strategjike” mes Uashingtonit dhe shqiptarëve.

Ai theksoi se mesazhet e Ramës në Knesset janë në të njëjtën linjë me këtë politikë aktive të jashtme, e cila, sipas tij, nuk shërben vetëm për reputacionin moral të Shqipërisë, por lidhet drejtpërdrejt me interesat kombëtare. Koçi nënvizoi gjithashtu marrëdhëniet historike mes shqiptarëve dhe hebrenjve, si dhe investimin personal të Ramës në iniciativa që lidhen me këtë trashëgimi.

Pak ditë më parë, sipas njoftimit të policisë së Lezhës, në qytetin e Rrëshenit u përfshi nga flakët një makinë.

Kjo makinë rezultoi të ishte në pronësi të gruas së ish-drejtorit të burgut të Reçit në Shkodër, Andrea Përbasha.

Në një lidhje live ditën e sotme për emisionin ‘Breaking me Dafinën’ në Top News, Përbasha ka treguar se ndryshe nga njoftimi i policë i cili deklaronte se shkak i zjarrit ishte një shkëndijë elektrike, ai tha se ka në dispozicion videot e kamerave të sigurisë që tregojnë për një zjarrvënie të qëllimshme.

Ish-drejtori i burgut ka treguar momentin kur personi i dyshuar i hedh benzinë makinë dhe më pas largohet duke u shprehur se mund ta ketë bërë për arsye hakmarrje, që nuk pretendon të kenë lidhje me punën e tij si ish-drejtori i burgut të Reçit.

“Është shumë e thjeshtë, sepse unë kam në dispozicion kamerat dhe personin që i vuri flakën makinës dhe largohet në drejtim poshtë një kanali. Unë i kam videot të gjitha. Policia tha që është shkëndijë elektrike, por makina kishte 48 orë pa ndezur. Policia i ka vetë videot, se përse nuk i kanë dhënë informacionet e sakta nuk e di. Bashkë me ata unë kam lëvizur nëpër kamera, i kam parë edhe në mënyrë private, kam parë edhe personin që hedh shishen e benzinës te makina dhe largohet, madje madje e merr shishen me vete dhe jam më se i sigurt që ka qenë një njeri shumë i vogël, një ordiner.

Unë mendoj që kjo ngjarje ka ndodhur nga njerëz shumë të vegjël, mendoj që janë njerëz të vegjël në mendje dhe mendoj që kjo është një hakmarrje shumë e vogël për të më bërë dëm në ekonomi, nuk e çoj më larg intuitën time. Shumë gjëra nuk mund të përjashtohen, sepse nuk është e thjeshtë që të kesh punuar te burgu i Reçit, shqiptarë jemi, mund të ketë edhe hatërmbetje nga ana e burgut, por nuk e çoj mendjen atje. Unë mendoj që policia e shtetit është afër, por më afër jam unë, sepse po e ndjek çështjen”, u shpreh Përbasha.

Ai shtoi se dhe vetë fëmijët e tij e kishin parë këtë skenë të cilën nuk e kishin përjetuar aspak mirë, ndërsa i bëri thirrje policisë për identifikimin e autorit, i cili sipas tij u plagos në momentin e zjarrvenie.

“Që të dilte tamam në pah, policia e shtetit duhet të konsultohet me të gjithë spitalet e Shqipërisë, sepse personi është plagosur, ne e kemi gjetur edhe shishen. Unë e shumëzoj me zero këtë veprim që ka ndodhur. Fëmijët e mi e panë gjithë skenën dhe ishte diçka e vështirë. Arsyeja pse jam i papunë tani e dinë vetëm dy njerëz”, tha Përbasha.

Nga Fatos Çoçoli

Duartrokitjet vlerësuese në Parlamentin e Izraelit, të quajtur Kneset, nuk janë të zakonshme, sidomos kur në foltore ngjitet një kryeministër i një vendi të vogël ballkanik. Ato nuk jepen për kortezi diplomatike dhe as për formalitete protokollare. Duartrokitjet për Edi Ramën sot ishin politike, morale dhe historike. Dhe pikërisht për këto arsye kishin peshë.

Kneseti ka dëgjuar me dhjetëra fjalime liderësh botërorë. Shumica e tyre janë të mbushura me formula standarde, fraza të sigurta dhe fjalë të zbrazëta. Rama zgjodhi të mos lexojë një tekst steril diplomatik, por të flasë me gjuhë njerëzore dhe politike njëkohësisht.

Ai nuk u përpoq të kënaqte sallën me fraza të gatshme. Ai i foli asaj me sinqeritet. Dhe Kneseti e dallon menjëherë sinqeritetin nga diplomacia mekanike.

Rama nuk foli nga pozita e fuqisë, por nga pozita e drejtësisë historike. Ai solli në Kneset një të vërtetë që Izraeli e njeh mirë: se Shqipëria ishte i vetmi vend në Europë ku hebrenjtë jo vetëm u mbrojtën, por u shtuan gjatë Holokaustit!

Kjo histori nuk u përdor për vetëlavdërim, por për të treguar se ekzistojnë kombe që, edhe në errësirën totale, zgjodhën anën e njeriut. Ky mesazh rezonoi fuqishëm në një parlament që e ka kujtesën historike si shtyllë identiteti.

Kur Rama foli për Besën shqiptare, ai nuk prezantoi një folklor ekzotik ballkanik. Ai shpjegoi një kod moral që i shpëtoi jetë hebrenjve. Për një shtet të ndërtuar mbi kujtesën e mbijetesës, ky koncept është thellësisht i kuptueshëm. Besa u kuptua jo si fjalë, por si veprim. Dhe kur morali shndërrohet në veprim historik, ai fiton respekt universal.

Kryeministri i Shqipërisë nuk relativizoi tragjedinë, nuk e instrumentalizoi dhimbjen dhe nuk foli me tone të ftohta. Ai e pranoi peshën e historisë hebraike me respekt dhe empati të sinqertë. Në Kneset, ku kujtesa e Holokaustit nuk është retorikë, por identitet, kjo qasje u vlerësua menjëherë. Respekti prodhon respekt. Në atë sallë Shqipëria u paraqit si aleate morale, jo si përfituese politike. Rama nuk kërkoi asgjë. Nuk kërkoi favore, nuk kërkoi mbështetje, nuk kërkoi kredi politike. Ai ofroi diçka shumë më të rrallë: një histori besnikërie njerëzore.

Për Izraelin, aleatët që flasin vetëm kur u leverdis janë të shumtë. Miqtë që flasin edhe kur nuk kanë detyrim politik janë të paktë. Shqipëria sot u pozicionua në kategorinë e dytë. Në një kohë polarizimi ekstrem ndërkombëtar, Rama nuk përdori gjuhë përçarëse. Ai ndërtoi një urë midis dy kombeve, përmes kujtesës, respektit dhe vlerave. Kjo gjuhë bashkuese është e rrallë në politikën globale dhe pikërisht për këtë u duartrokit. Sepse Kneseti pa autenticitet, jo teatër politik

Duartrokitjet erdhën sepse fjalimi ishte autentik. Nuk u perceptua si performancë për publikun e Izraelit dhe Shqipërisë, por si akt i ndershëm përballë një Parlamenti që nuk toleron teatralitetin bosh. Autenticiteti është valuta më e fortë në politikë dhe Rama e kishte atë sot.

Kneseti e duartrokiti Edi Ramën sepse ai nuk foli si politikan i zakonshëm, por si përfaqësues i një kombi që e ka provuar veten në momentet më të errëta të historisë.

Duartrokitjet nuk ishin për fjalët e bukura, por për peshën morale që ato mbartnin. Dhe në një sallë ku historia nuk harrohet kurrë, kjo peshë nuk kalon pa u njohur.

Në një kohë tensionesh të thella në Lindjen e Mesme, ku fjala peshon po aq sa arma, Rama zgjodhi të flasë jo si një lider i vogël që kërkon mbijetesë diplomatike, por si përfaqësues i një kombi që e ka shkruar historinë e vet me dinjitet njerëzor. Kneseti nuk dëgjoi thjesht kryeministrin e Shqipërisë.

Dëgjoi zërin e një vendi që, edhe kur ishte i varfër dhe i pushtuar, nuk negocioi kurrë me humanizmin. Dhe ia doli të ishte vendi i vetëm i pushtuar nga nazistët në botë, ku numri i hebrenjve pas Luftës së Dytë Botërore ishte më i madh se sa në fillim të saj. Kjo nuk është legjendë folklorike, por fakt historik i njohur ndërkombëtarisht.

Përtej simbolikës, fjalimi kishte edhe peshë strategjike. Ai forcoi marrëdhëniet shqiptaro-izraelite në një moment kyç, duke rritur profilin ndërkombëtar të Shqipërisë, konsoliduar partneritetin politik dhe diplomatik me Izraelin, forcuar imazhin e Shqipërisë si vend i besueshëm në skenën globale dhe dhe pozicionuar Tiranën si zë racional në debate të ndjeshme ndërkombëtare.

Policia e Shtetit, përmes Interpol Tiranës, ka finalizuar me sukses pjesëmarrjen në megaoperacionin ndërkombëtar “Liberterra III”, një nga goditjet më të mëdha të koordinuara kundër trafikimit të qenieve njerëzore dhe emigracionit të paligjshëm.

Operacioni u shtri në 119 shtete dhe u drejtua nga autoritetet britanike.

Bilanci në Shqipëri, 27 në pranga dhe sekuestrime

Në territorin shqiptar, operacioni angazhoi 476 specialistë nga Policia Kriminale, Kufiri dhe Migracioni, si dhe Interpoli. Rezultatet e këtij aksioni të gjerë ishin konkrete:

Goditja e 2 grupeve kriminale aktive në trafikun e qenieve njerëzore;

Arrestimi i 27 personave të dyshuar si organizatorë apo transportues;

Sekuestrimi i 6 automjeteve dhe rreth 20,000 eurove cash, të përfituara nga aktiviteti kriminal;

Identifikimi dhe trajtimi i 94 emigrantëve të parregullt dhe shpëtimi i 3 viktimave të trafikut njerëzor.

Zyrtarë të lartë të Policisë së Shtetit bënë me dije se përfaqësues të Interpol Tiranës ishin prezentë në Qendrën Operacionale në Kent, Angli, për të koordinuar shkëmbimin e informacionit në kohë reale me partnerët ndërkombëtarë.

Përmasat globale, mbi 3700 të arrestuar

Sipas njoftimit të policisë, “Liberterra III” konsiderohet si një sukses historik në luftën kundër krimit të organizuar ndërkombëtar.

Operacioni u organizua nga Home Office i Mbretërisë së Bashkuar dhe Agjencia Kombëtare e Krimit (NCA), me mbështetjen e BE-së, INTERPOL-it, FRONTEX-it, si dhe agjencive ligjzbatuese nga SHBA dhe Kanada.

Në total, operacioni angazhoi 14,000 oficerë policie në mbarë botën, duke sjellë si rezultat:

3,744 të arrestuar në nivel global;

4,414 viktima të trafikut njerëzor të shpëtuara;

Identifikimi i rreth 13,000 emigrantëve të paligjshëm;

Goditja e mbi 1,800 rasteve të trafikimit për shfrytëzim seksual, punë të detyruar apo kriminalitet të detyruar.

Interpol Tirana konfirmoi se bashkëpunimi do të vijojë për të finalizuar hetime të tjera të nisura gjatë këtij operacioni, duke mbajtur nën presion grupet kriminale që operojnë në rrugët e Ballkanit dhe më gjerë.

Nga Mero Baze

Një javë më parë SPAK organizoi një operacion surprizë te një kullë në qendër të Tiranës, ku në bashkëpunim me një emision investigativ italian zbuloi një call center që zhvaste qytetarë evropianë, kryesisht italianë.
Shumat që përfitoheshin janë marramendëse.

I pari që reagoi ishte Sali Berisha, duke deklaruar se pas call center-it fshihet motra e Taulant Ballës. Dhe pas kësaj teknologjia e demonizimit e përhapi lajmin në çdo portal të kontrolluar prej tij. Lajmet janë ende online, pavarësisht betejës ligjore që ka nisur e dëmtuara.

Ndërkohë hetimet e prokurorisë zbuluan se pas call center-it gjenden tre tropojanë, të cilët janë pjesë e enturazhit të njeriut kryesor të Sali Berishës.

Pas asaj nuk ka më asnjë koment as nga Berisha, as nga ata që “gjetën” pistën e motrës së Taulant Ballës.

Që ka gjetur motrën e Taulant Ballës kuptohet pse e ka bërë, pasi Taulant Ballën e ka akuzuesin e tij te dosja “Partizani” dhe çdo gjë që ndodh kërkon ta lidhë me të. Nuk i ndërhyjmë në inatin e tij.

Por interesante është që opozita, e cila nuk lë fantazi pa zhvilluar në raste të tilla, ka kyçur gojën dhe nuk flet më asgjë për call center-in në qendër të Tiranës, as për atë njeriun që menaxhonte ruajtjen e saj dhe heqjen e materialeve brenda natës. Tani bën sikur nuk ka ndodhur fare, ndërkohë që tre vëllezërit tropojanë në kërkim nuk janë kapur ende.

E njëjta teknologji baltosjeje ishte edhe në rastin e Ballukut; në dosjen e saj kishte boll episode joetike të cilat mund t’i shijonin, por në fakt Berishës i shijonte të shpikte se ajo ka 300 apartamente dhe kjo është në dosje. Në fakt as në dosje, as në terren nuk ekzistojnë, por tanimë janë bërë pjesë e fjalorit politik të Berishës dhe njerëzve që flasin në emër të drejtësisë në Shqipëri.

Kjo praktikë nuk merr dot fund duke i bërë moral Berishës. Kjo është një praktikë e cila po zë vend në kulturën politike në Shqipëri edhe falë SPAK-ut, i cili e ka përdorur disa herë mekanizmin e gjyqeve popullore kur ka akuza të dobëta dhe kërkon t’i justifikojë represionet me populizëm.

Dhe kjo tani u kthye në traditë.
Sa herë dikush është në hall, shpik diçka në emër të SPAK-ut dhe baltos palën tjetër me idenë që këto janë çështje në hetim.

Në disa raste SPAK ka reaguar, siç ishte rasti i Gazmend Bardhit një vit më parë, dhe nuk ka pranuar që të hidhet baltë mbi të.

Është mirë që, ashtu siç ka krijuar kulturën e gjyqeve popullore, të krijojë edhe kulturën e keqpërdorimit të emrit të SPAK-ut për llogari politike.

Do të mjaftonin këto dy raste, të cilat kthehen pastaj në mite popullore, për të kuptuar se SPAK po kthehet në një institucion që po përdoret për të justifikuar shpifjet e politikës dhe luftërat e pista politike kundër njëri-tjetrit.

Dhe kjo pastaj e kthen atë nga një pushtet gjyqësor në një aktor politik që, në vend të zbardhë të vërteta kriminale, i mbulon ato me shpifje politike.

Pasditen e sotme Partia Demokratike ka organizuar Foltoren e radhës para Kryeministisë, ku të pranishëm ishin disa dhjetëra qytetarë.

Në Foltore nuk mori pjesë kryedemokrati Sali Berisha, i cili ndodhet në Strasburg, ku pritet të zhvillojë edhe disa takime.

I pranishëm ishte deputeti Belind Këlliçi, i cili në fjalën e tij ka dënuar aktin e policisë që hodhi në drejtim të protestuesve, gaz lotsjellës, i cili sipas opozitës pretendohet se ishte i skaduar.

“Historia ka treguar se kur pushteti godet qytetarët e saj, i ka hyrë frika në palcë. Goditjet dhe mbi minorenet, janë vendime politike drejtpërdrejt nga bunkeri i Surrelit”, tha Këlliçi duke shtuar se dhuna ka qenë programi i këtij sekti që kur erdhën në pushtet.

“Doktori ka shkuar për të përfaqësuar Shqipërinë në një takim të rëndësishëm ditën e nesërme. Një fakt të rëndësishëm historik që nuk e mohon dot as Edi Rama, Shqipërinë e anëtarësoi në KE, PD në 13 korrik 1995.

Sado që baltosin, shpifin paguajnë nga paratë e inceneratorëve, faktet janë kokëforta, çdo arritje në integrimin europian, është meritë e PD-së dhe Sali Berishës.

Protesta ishte e jashtëzakonshme dhe e tronditi pushtetin. Faleminderit 19 djemëve që kaluan natën në qeli. Ata janë guximtarë. Nesër në 10:30 të na bashkohemi në dhomën penale në Gjykatës së Tiranës për të bërë të mundur lirimin e këtyre djemve. Dy netë më parë narkoshteti dëshmoi se është më i dobët se kurrë.

I ka hyrë frika në palcë, çarja e madhe ka filluar. Frika me metoda mafioze është kthyer mbrapsht. Nuk janë thjeshtë reagime policore, por janë vendime politike drejtpërdrejt nga bunkeri i Surrelit. Një pushtet kriminal nuk përdor dhunën vetëm për shpërndarje, por edhe për të qetësuar veten. Dhuna ka qenë programi i sektit që kur erdhën në pushtet”, tha mes të tjerash Këlliçi.

Lista e re e Barnave që rimbursohen nga Fondi i Sigurimit të Detyrueshëm të Kujdesit Shëndetësor përshin afro 1366 barna, prej të cilëve 211 spitalore.

Drejtori i FSDKSH-së, Arti Papajani në një intervistë për RTSH-në sqaron se nevoja për të mbuluar një spektër më të gjerë të diagnozave e ka shtuar numrin e barnave në listë.

“Lista e barnave është një sistem i integruar që balancon kujdesin e pacientëve me standardet e mbrojtjes së kujdesit shëndetësor, një proces që ndryshon vazhdimisht dhe që ka në qëllim zgjerimin e barnave të reja dhe plotësimin e nevojave të qytetarëve. Aktualisht në listën e barnave që funksionojnë janë 1366 barna nga të cilat 211 janë barna spitalore”, tha Papajani.

Për Papajanin, rastet e mosmarrjes nga qytetarët e barnave nga lista e rimbursueshme në farmaci janë të rralla.

“Kjo mund të vijë nga dy faktorë, e para që edhe farmacitë duhet të përditësohen në lidhje me sistemin ose mund të ketë keqinformime dhe veprime nga ana e mjekëve të familjes të cilët nuk janë familjarizuar me barnat e reja apo me çmimet e reja”, theksoi ai.

Papajani thekson se procesi i kontrollit vijon si një procedurë normale administrative, që asesi nuk ka qëllim të ndëshkojë farmacitë, por të garantojë transparencë.

“Nuk është ndërprerë ndonjë kontratë në lidhje me ato që nuk kanë të bëjnë me procedura të identifikimit të drejtpërdrejtë të fiktivitetit. Farmacitë duhet të vijojnë punën normalisht, mbeten këto kontrata në fuqi sikurse kanë qenë dhe të pacënuara deri më tani”, nënvizoi Papajani.

Hartimi dhe miratimi i listës së barnave që rimbursohen nga Fondi i Sigurimit të Detyrueshëm të Kujdesit Shëndetësor dhe masa e mbulimit të çmimit të tyre përfshin nevojat reale të pacientëve, bazuar dhe në përparësitë reale që vetë shërbimet universitare kanë.