“Korsitë e reja të autostradës Tiranë – Durrës, në segmentin që nis pas kthesës së Kamzës dhe përfundon te mbikalimi i Rinasit parashikohet të hapen për qarkullimin e automjeteve brenda muajit janar”. Gjithçka u bë me dije nga përgjegjësi i Manaxhimit të Kontratave, pranë Autoritetit Rrugor Shqiptar Gëzim Noni, i cili ishte i ftuar në emisionin “Inside News”, në TV SCAN.

“Si kontrata pritet të hapen për qarkullim të lirshëm të automjeteve shumë shpejt, pavarësisht se njëra prej tyre e ka afatin deri në maj të këtij viti që sapo ka filluar dhe tjetra e ka në shtator të këtij viti. Por, për qarkullimin do të jenë të hapura shumë më përpara. Kuptohet duke bërë pjesën tjetër të përfundimit të punimeve, që nuk lidhen me trafikun. Nuk dua t’ju rrit pritshmëritë njerëzve, pasi janë sensitivë te kjo, por ne pretendojmë që brenda muajit që jemi të ndodhë kjo gjë. Sigurisht që do të varet shumë nga koha sepse një mot i ftohtë nuk e favorizon shtresën e asfaltit të fundit që ka ngelur sepse duke qenë me një trashësi relativisht të vogël është e ndjeshme ndaj temperaturave dhe lagështirës nëse do të kemi”, – tha Noni.

Noni foli edhe për fazën e tretë të punimeve, që përfshin ndërtimin e nyjes që lidh rrugën e Laknasit me autostradën e zgjeruar, një zonë e karakterizuar nga zhvillim i lartë industrial dhe urban.

“Aktualisht që po flasim ka hyrë në zbatim edhe faza e tretë e këtij segmenti, i cili ka një pjesë të punimeve që duhet të përfshiheshin tek 2 të parat dhe vazhdimin deri tek ura e Limuthit, që shkon më tutje se dy lotet e para. Kontrata e tretë është nënshkruar gjatë 3-mujorit të fundit të vitit 2025 kështu që është në fillimet e veta, por që shpresojmë që brenda vitit që jemi do të kemi rezultate konkrete të saj”, – u shpreh Noni.

Ndërkaq, hapja për qarkullim e segmentit nga kthesa e Kamzës, deri në mbikalimin e Rinasit pritet të sjellë një përmirësim të trafikut, që në këtë zonë është tejet problematik.

“Në këtë drejtim presim shumë sepse është pjesa që është dalja kryesore e Tiranës në drejtim të veriut dhe veriperëndimit. Dalja e saj korrespondon me degëzimin e Rinasit, korrespondon me lidhjen e autostradës Thumanë – Kashar, një aks shumë i rëndësishëm i vënë në qarkullim kohët e fundit, vazhdimin për në Durrës dhe këtu bëhet një ndarje e trafikut, që del nga Tirana, që degëzohet të paktën në tre drejtime”, – tha Noni.

Pas përfundimit, autostrada do të ketë 8 korsi në total, nga 4 në secilin drejtim, ndërsa shpejtësia e lejuar do të variojë nga 90 -140 km në orë.

Reshjet e borës në Malin e Dajtit e ka bërë këtë fundjavë destinacion mjaft të kërkuar këtë të dielë për qytetarët e Tiranës, por jo vetëm.

Kërkesa e lartë për ta vizituar atë ka dhënë efekte të menjëhershme edhe në trafik, ku disa akse të kryeqytetit kanë qenë tërësisht të bllokuara.

Pamjet me radhë kilometrike të automjeteve i përkasin rrugës Xhanfize Keko, për të vijuar me rrethrrotullimin pranë Institutit të Shëndetit Publik, rrugën “Sotir Çaci” e “Shefqet Kuka”, që të lidhin me zonën e Dajtit.

Kaos në lëvizjen e automjeteve pati dhe në rrugën “Myslym Keta”, që të lidh me rrugën e Arbrit, ku makinave iu desh më shumë se 1 orë për të përshkruar disa kilometra.

Bllokimi i këtyre segmenteve rrugore shkaktoi radhë kilometrike edhe në Unazën e Madhe dhe hyrjet/daljet e saj, ku pjesa më e madhe e automjeteve kishin drejtim nga Mali i Dajtit.

Nga Roland Lami

Mora shkas nga një postim i gazetarit të njohur Mustafa Nano që shumë ndryshe nga të tjerë nuk përton disa të verteta ti thotë troç dhe te njerëz që në jo pak raste i ka mbështetur hapur. Thelbi i postimit të tij lidhej me tezën qendrore që mbahet si postulat në shkollat e lidershipit, ajo që në politikë nuk ka rendësi vetëm si të hysh por më e rëndësishme është si të dalësh prej saj. Atëhere ku të gjithë besojnë se ti je më i fortë pikërisht në atë moment duhet të dish si të ikësh. Pra, sot Edi Rama është njeriu më i fuqishëm por njëkohësisht me kredibilitet të shpartalluar qeverisës siç është po ashtu ekuivalenti i tij në opozitë, Sali Berisha. Njeriu më i pushtetshëm në opozitë por me kredibilitet të rënie të lirë brenda dhe jashtë partisë. Si mundet këta dy lider të kapërcejnë traditët paramoderne shqiptare të mos dorëheqjes apo egon e sëmurë për miklim të përjetshëm pushteti në momentet kur ata nuk kanë rival?

Paradoks por ja që ky është momenti më i volitshëm pasi ndodhesh në pikën kritike që mund të mbahesh mend si reformator ala Fatos Nano për shkak se di ku ikën ose të degradosh në lider që urrejtja ndaj teje të duket kompliment krahasuar me energjinë negative që turmat janë të gatshëm të shkarkoj ndaj teje, të ngjashme me atë që u kanë bërë jo pak liderve autokrat në lindjen e mesme nëse e shikon pushtetin si përjetësi. Si ndodh metamorfoza e pushtetit që behet pjesë e ekzistencës tënde?

Pushteti ka një prirje të rrezikshme pasi e shtyn njeriun të besojë se është më shumë se njeri. Në fillim është mision, pastaj bëhet zakon dhe në fund shndërrohet në pjesë e pandashme e unit të tij/ saj. Hannah Arendt do të thoshte se pushteti ekziston vetëm sa kohë pranohet nga të tjerët, por lideri që qëndron shumë gjatë fillon ta harrojë këtë të vërtetë elementare. Ai e ngatërron pushtetin me forcën dhe duartrokitjen me legjitimitetin, duke besuar se largimi i tij do të ishte një boshllëk i pakapërcyeshëm.

Erich Fromm e quan këtë fazë “frikë nga liria”, ankthin që ndjen individi kur duhet të jetojë pa rolin që e mbron nga vetvetja. Largimi nga pushteti nuk është thjesht humbje zgjedhjesh, por rrezik zhdukjeje. Një formë narcisizmi politik ku uni lidhet aq fort me karrigen, sa çdo kritikë përjetohet si sulm ndaj ekzistencës personale. Prandaj pushteti në mendësinë e këtyre liderve duhet të mbrohet me çdo çmim, edhe kur çmimi është shumë i lartë, shkatërrimi i asaj që dikur u ndërtua me shumë mund.

Kjo frikë e liderit për të mos ndërprerë përjetësinë e pushtetit reflektohet drejtpërdrejt në parti. Ajo pushon së qeni organizëm dhe shndërrohet në zgjatim të vullnetit të një njeriu. Garat bëhen formale, mendimi ndryshe etiketohet si tradhti, ndërsa besnikëria merr vlerë më shumë se aftësia. Max Weber paralajmëronte se karizma, nëse nuk institucionalizohet, kthehet në autoritarizëm personal. Aty ku lideri nuk pranon të ikë, institucioni mbetet i përjetshëm vetëm në emër, por i vdekur në përmbajtje.

Ironia është se ikja kërkon më shumë forcë sesa qëndrimi. Jo pak lider që kanë mbetur në historiografi si burra shteti e kanë kuptuar herët se tirania nuk fillon nga ambicia, por nga paaftësia për të sunduar veten. Të dish të largohesh do të thotë të pranosh kufirin, të pranosh se pushteti është rol dhe substancë egoje. Lideri i vërtetë është ai që përgatit pasardhësin dhe e bën veten të panevojshëm jo e kundërta.

Historia, në fund, është e pamëshirshme, por e drejtë. Ajo nuk i mban mend liderët për mënyrën si hynë në pushtet, por për çastin kur refuzuan të largohen. Disa e gjejnë guximin për të bërë një hap prapa dhe për të nisur një jetë tjetër, më të qetë, më njerëzore. Të tjerët mbeten të mbyllur brenda pushtetit deri në fund, duke e kthyer atë nga mjet në burg. Dhe aty, pa pasur më nevojë për gjykime politike, flet vetëm karakteri.

Ministri i Jashtëm kubanez, Bruno Rodriguez në një postim në platformën X ka deklaruar se Kuba nuk ka marrë kompensim për shërbimet e sigurisë që i ka ofruar ndonjë vendi tjetër.

Ai shtoi se Kuba ka të drejtë të importojë karburant nga çdo vend që është i gatshëm ta eksportojë atë. Rodriguez akuzoi Shtetet e Bashkuara për shfaqjen e sjelljes kriminale që kërcënon paqen botërore.

Presidenti i SHBA-së, Donald Trump, tha të dielën se Kuba duhet të arrijë një marrëveshje me Shtetet e Bashkuara, duke paralajmëruar se vendi nuk do të marrë më naftë apo para.

“Kuba nuk merr, dhe as nuk ka marrë ndonjëherë, kompensim monetar ose material për shërbimet e sigurisë të ofruara për ndonjë vend.

Ndryshe nga SHBA-të, ne nuk kemi një qeveri që angazhohet në aktivitete mercenare, shantazh ose shtrëngim ushtarak kundër shteteve të tjera.

Si çdo vend, Kuba ka të drejtën absolute për të importuar karburant nga ato tregje që janë të gatshme ta eksportojnë atë dhe që ushtrojnë të drejtën e tyre për të zhvilluar marrëdhëniet e tyre tregtare pa ndërhyrje ose nënshtrim ndaj masave të njëanshme shtrënguese të vendosura nga SHBA-të.

Ligji dhe drejtësia janë në anën e Kubës. SHBA me sjellje kriminale dhe të pakontrolluar kërcënon paqen dhe sigurinë, jo vetëm në Kubë dhe në këtë hemisferë, por në të gjithë botën”, shkruan ai.

Kryetari i Partisë Demokratike, Sali Berisha, ka reaguar në rrjete sociale në mbështetje të revolucionit demokratik të opozitës dhe popullit iranian, pas protestave që kanë ‘shpërthyer’ në gjithë vendin.

Në mesazhin e tij, Berisha shprehet se revolucioni iranian po ecën drejt fitores vendimtare, ndërsa diktatura e Ajetullahëve obskurantistë ndodhet në grahmat e fundit.

Ai dënon ashpër masakrat dhe barbaritë e regjimit ndaj kryengritësve paqësorë dhe thekson se vetëm në 24 orët e fundit janë regjistruar mbi 2 mijë martirë të rënë nga breshëritë e falangave të zeza të pushtetit të krimit.

“Duke mbështetur plotësisht revolucionin e opozitës dhe popullit iranian, dënoj me forcën më të madhe barbaritë e regjimit ndaj qytetarëve trima që luftojnë të pamposhtur për lirinë dhe dinjitetin e vendit dhe kombit të tyre.

Rroftë Irani i lirë dhe demokrat! Vdekje Ajetollahëve!”, shkruan Berisha në reagimin e tij.

Reagimi i plotë i Berishës:

Revolucioni iranian drejt fitores vendimtare.

Diktatura e Ajetullahëve obskurantistë në grahmat e fundit!

Miq, revolucioni demokratik i opozitës iraniane në pragun e triumfit, fitores përfundimtare.

Masakra dhe barbaritë e papara të regjimit ndaj kryengritësve paqësorë të pamposhtur.

Në 24 orët e fundit, revolucioni për Iranin e lirë dhe demokratik numëron mbi 2 mijë martirë të rënë nga breshëritë e falangave të zeza të pushtetit të krimit.

Duke mbështetur plotësisht revolucionin e opozitës dhe popullit iranian, dënoj me forcën më të madhe barbaritë e regjimit ndaj qytetarëve trima që luftojnë të pamposhtur për lirinë dhe dinjitetin e vendit dhe kombit të tyre!

Rroftë Irani i lirë dhe demokrat!

Vdekje Ajetullahëve!

Çfarë do të thotë sot të jetosh me dinjitet? Përse ndryshimet politike në Shqipëri shpesh bllokohen, ose reduktohen në emra individësh dhe jo në projekte? Si arriti një vend që nuk plotësonte asnjë nga kushtet “klasike” për revolucion në fund të Luftës së Dytë Botërore, të mbartte peshën e plotë të diktaturës së proletariatit dhe më pas atë të një kapitalizmi periferik?

Këto janë disa nga pyetjet në qendër të bisedës me shkrimtaren, filozofen dhe akademiken Lea Ypi në episodin e ri të Apostrof Podcast. Ato janë gjithashtu pyetje që strukturojnë librin e saj më të fundit, “Të Poshtëruar”, duke vijuar analizimin e dilemave të ngritura fillimisht tek “Të Lirë”: Si formësohen, deformohen e hera-herës edhe thyhen jetët private të njerëzve nga sisteme politike që e paraqesin veten si të pashmangshme?

Biseda nis me diskutimin se sa ndryshe priten librat e Ypit jashtë dhe në Shqipëri. Për lexuesin ndërkombëtar, ata shërbejnë shpesh si prezantim me një vend dikur të izoluar dhe pak të njohur, një mënyrë për ta kuptuar Shqipërinë përmes historisë dhe memuaristikës. Për lexuesin shqiptar, nga ana tjetër, përvoja është më shqetësuese. Librat e Ypit kanë rizgjuar kujtime – personale dhe kolektive – të fjetura prej kohësh, ndërsa kanë shqetësuar kompromiset e brishta të bëra nga shumëkush me të shkuarën. Ypi thekson se për të, të shkruarit për anëtarë të familjes me identitetet e tyre reale nuk është çështje rrëfimi por filozofie: një mënyrë për të ekzaminuar pikëpyetjet politike universale përmes përvojës së jetuar dhe jo përmes teorive abstrakte.

Nga këtu, biseda zhvendoset drejt një dileme historike që duket se ende përndjek politikën shqiptare. Si arriti regjimi i dikurshëm komunist të konsolidonte pushtetin e tij në një shoqëri kryesisht rurale dhe analfabete, pa një bazë industriale dhe pa një klasë punëtore të organizuar ? Sipas Ypit, mungesa e kushteve materiale, siç përshkruhet nga teoria klasike e marksiszmit, na ndihmon të kuptojmë përse diktatura e proletariatit që u vendos pas luftës u shenjua nga kontradikta të thella, dhunë dhe deformime shoqërore.

Megjithatë, Ypi argumenton se ajo trashëgimi nuk u zhduk me rënien e regjimit, por vazhdoi të riformësojë mënyrën se si shqiptarët e shohin vetë politikën. Sot, thotë ajo, debati publik mbetet tejet i personalizuar në emra të përveçëm liderësh partiakë dhe jo i përqendruar në ide apo programme. Njëkohësisht, diskursi neoliberal duket se ka zënë vend, duke i shndërruar dështimet strukturore në faje individuale. Suksesi moralizohet si meritë personale, ndërsa varfëria dhe përjashtii trajtohen si të meta apo gabime individuale. Në një peizazh të tillë, çdo lloj përgjegjësie kolektive bëhet thuajse e pamundur, ndërsa njerëzin bëhen gjithnjë e më dyshues ndaj ideve të solidaritetit.

Kjo shpjegon jo vetëm krizën e politikës shqiptare, por edhe një krizë më të gjerë të së majtës. Edhe teksa kapitalizmi, globalizmi dhe demokracitë e konsoliduara liberale shfaqin shenja se ndodhen në vështirësi, leximet e majta të këtyre konflikteve e kanë të vështirë që të dominojnë narrativën. Përkundrazi, duket se shpjegime të thjeshtuara rreth përplasjeve kulturore, apo emigracionit, janë shpesh më efektive se sa kritikat strukturore ndaj pushtetit dhe pabarazisë. /TEMA/

Pas një operacioni njëmujor, të zhvilluar nga Drejtoria e Policisë Vlorë, nën drejtimin e Prokuroria Vlorë, është finalizuar zbulimi i një ambienti të përshtatur për kultivimin e bimëve narkotike në qytetin e Sarandës.

Ambienti ndodhej në rrugën Butrinti, në zonën e njohur si “Turizmi”, dhe ishte përshtatur brenda një apartamenti pallati, ku ishin instaluar llamba ndriçimi për kultivimin e bimëve narkotike, si dhe aparatura të tjera.

Gjatë operacionit është kapur në flagrancë një shtetas nga Tirana, i cili kujdesej për kultivimin e bimëve narkotike. Janë sekuestruar bime narkotike në proces mbjellje dhe tharjeje.

Personat janë shoqëruar në DVP Vlorë.

Ende ka tym në rrënojat që la pas zjarri i mbrëmjes së 8 janarit në magazinat në tregun industrial ish-Uzina Dinamo, në rrugën “5 Maji” në Tiranë. Gjithçka e shkrumbuar dhe dëmi miliona euro.

Këtë të diele të 11 janarit, vendin e tregtarëve e kanë zënë fadroma dhe punonjësit e zjarrfikëseve që janë ende në vendngjarje.Zjarri, nisi në një magazinë, dhe u përhap më tej me shpejtësi në të gjithë Kapanonin B, duke bërë që brenda 3 orëve të shkrumbonte atë, dhe të depërtonte edhe tek Kapanoni A.

Ky është korridori që ndante 2 kapanonet. Ndoshta siç thonë tregtarët jashtë kamerave zjarri nuk do ta kishte shkatërruar siç ndodhi kapanonin A nëse korridori ndërmjet 2 kapanoneve nuk do të ishte i mbushur me mallra.

Flitet për rreth 100 biznese të prekura, malli i të cilave u kthye në shkrumb e hi, në gati 10 mijë metra katror sipërfaqe që tanimë janë kthyer në gërmadhë masive hiri. Një shkëndijë elektrike, në njërin prej kapanoneve, ishte zanafilla e flakëve masive sipas policisë.

Zjarri masiv u shfaq rreth orës 19:00 të së enjtes. U deshën vetëm pak minuta që të përfshinte sipërfaqe të tëra të magazinave. Në vendngjarje, përveç zjarrfikësve të Tiranës mbërritën edhe ato të Kamzës, Vorës dhe Elbasanit, të cilat luftuan për orë me radhë për vënien në kontroll.

Dinamo SHA, është shoqëri aksionere prej vitit 1995. E ndërtuar fillimisht në vitet 60’, dhe është privatizuar pjesë-pjesë në vitet 90. Fillimisht në vitin 1995 u blenë aksionet e ish ndërmarrjes shtetërore të prodhimit të miellit në Tiranë, dhe më pas në 1999 u morën edhe aksionet e ish ndërmarrjes shtetërore “Uzina Dinamo”.

Sot aksioneri më i madh i kësaj shoqërie është Roland Hysa, me 55.8% të aksioneve, por bashkë me bashkëshorten e tij dhe 2 fëmijët kanë në total 75.8% të aksioneve të SHA-së. Ndërsa 13.3% të kuotave i ka ende shtetit, përmes Ministrisë së Ekonomisë. Në total në këtë shoqëri sipas të dhënave në pasqyrat financiare të saj për vitin 2024, janë 122 aksionerë, dhe kapitali 168,842,000 lekë. (1.6 mln euro). /shqiptarja.com/

Presidenti amerikan Donald Trump paralajmëroi sot Kubën se duhet të arrijë një marrëveshje me Shtetet e Bashkuara, përndryshe vendi ishullor nuk do të marrë më naftë apo mbështetje financiare nga Venezuela.

“NUK DO TË KETË MË NAFTË APO PARA QË SHKOJNË NË KUBË – ZERO! E këshilloj fuqimisht që të bëjnë një marrëveshje, PARA SE TË JETË SHUMË VONË,” shkroi Trump në platformën e tij të rrjeteve sociale, Truth Social.

Sipas presidentit amerikan, Kuba ka mbijetuar për disa vite falë sasive të mëdha të naftës dhe parave që vinin nga Venezuela. Ai theksoi se Venezuela është furnizuesi kryesor i naftës për Kubën, por pas arrestimit të Nicolás Maduro nga forcat amerikane, Trump ushtroi presion ndaj presidentes së përkohshme të Venezuelës, Delcy Rodríguez, që nafta venezuelane të dërgohej drejt Shteteve të Bashkuara.

Ndërkohë, shërbimet amerikane të inteligjencës paraqesin një tablo të zymtë të situatës ekonomike dhe politike në Kubë. Megjithatë, sipas një raportimi të Reuters, vlerësimet e tyre nuk mbështesin plotësisht parashikimin e Trump se regjimi kuban është “gati të shembet”. Lajmi citoi tre burime të njohura me vlerësimet konfidenciale.

Sipas qëndrimit të CIA-s, sektorë kyç të ekonomisë kubane, si bujqësia dhe turizmi, ndodhen nën presion të madh për shkak të ndërprerjeve të shpeshta të energjisë elektrike, sanksioneve tregtare dhe problemeve të tjera strukturore.

Humbja e mundshme e importeve të naftës dhe mbështetjes së mëtejshme nga Venezuela, një aleat i ngushtë i Kubës prej dekadash, mund të përbëjë një goditje serioze për regjimin që drejton vendin që nga revolucioni i udhëhequr nga Fidel Castro në vitin 1959.

Për Kubën, ndërprerja e furnizimit me naftë venezuelane do të kishte pasoja të rënda. Nga janari deri në nëntor të vitit të kaluar, Venezuela dërgonte mesatarisht rreth 27 mijë fuçi naftë në ditë në ishull, duke mbuluar afërsisht 50% të mungesës së naftës së Kubës, sipas të dhënave detare dhe dokumenteve të kompanisë shtetërore venezuelane të naftës, PDVSA.

Kërkimet për gjetjen e trupit të 30-vjeçarit Jurgen Karaj vijojnë edhe këtë të diel.

22 efektivë të Forcave të Armatosura dhe polumbarët e regjimentit të operacioneve special vijojnë kërkimet për të riun që dyshohet se u mor nga rrjedha e lumit Mat pas një aksidenti me makinë.

Me ndihmën e dronëve dhe pajisjeve të specializuara, terreni po kontrollohet, nga ura e Darsës në Klos deri në bashkinë e Matit.

Aksidenti u regjistrua në orët e para të së shtunës, ku automjeti tip audi në të cilën udhëtonin dy të rinj doli nga rruga dhe ra në ujë.

Drejtuesi 24-vjeçar Andi Losha ka arritur të dalë nga makina dhe ka shpëtuar, por fati nuk ishte me 30-vjeçarin Jurgen Karaj, të cilin e mori rrjedha e përroit.

Policia arrestoi një ditë më parë 24-vjeçarin Losha, pasi u largua nga vendngjarja dhe nuk i dha ndihmë pasagjerit të tij.

Pas arrestimit, 24-vjeçari iu nënshtrua testit të alkoolit, nga i cili rezultoi se e drejtonte mjetin në gjendje të dehur.

Thomas Strakosha nuk fshihet, përkundrazi. Ai e thotë me krenari se është një shqiptar nga Himara. I lindur dhe rritur në Athinë, ai pranon se shumë shqiptarë e fshehin origjinën e tyre.

“Takoj shpesh fëmijë në Akademinë e AEK. Ata vijnë më takojnë dhe më thonë se janë shqiptar. Kjo më bën krenar. Unë e respektoj Greqinë, origjina ime është nga Himara dhe unë jam krenar që jam shqiptar”, tha për Athletico.gr portieri kuqezi.

Në podcastin ku mori pjesë u fol edhe për të atin, Fotaq Strakoshën, në gjurmët e të cilit po ecën edhe Thomasi 30-vjeçar.

Hapat e parë ai i hodhi te APOEL (në Nicosia) për të vazhduar te Panionios (në Athinë) dhe Lazio (në Romë).

Pikërisht te kryeqytetasit në Apenine, Strakosha debutoi si profesionist. Pas 9 viteve në Serie A, u transferua te Brentford në Angli. U kthye në vendlindje në vitin 2024 ku firmosi për AEK në Athinë, aty ku luan edhe sot.

Aktualisht, Thomas Strakosha është një ndër 5 portierët më të suksesshëm në 15 kampionatet kryesore. Ai e ka ruajtur portën të paprekur në 22 ndeshje në të gjitha kompeticionet në vitin kalendarik 2025 dhe fillimin e 2026.

Brenda 5 viteve, tekstet shkollore do të ndryshojnë në përgjigje të kritereve për anëtarësimin në bashkimin europian.

Programet e reja mësimore janë miratuar nga Ministria e Arsimit, do të shërbejnë si udhëzues për hartuesit apo mësuesit për përditësimin e kurrikulave në kohë të ndryshme për nivele shkollore. Ekspertët sugjerojnë që në këtë fazë, ndryshimet të jenë në përputhje me realitetin e nxënësve shqiptarë.

“Ato ndryshime kurrikulare që vijnë me rekomandimin e BE-së, të mos jenë thjesht një përshtatje me tekstet që vendet europiane kanë, mos të jenë thjesht një kopje të sistemeve të tyre, por ne mendoj se i kemi të gjitha burimet njerëzore dhe intelektuale për të krijuar një sistem tonin shqiptar”, tha Irsa Ruçi- eksperte arsimi.

Dokumentet orientojnë arsimtarët të përfshijnë internetin në procesin shkollor, si edhe zhvillimin e njohurive të nxënësve me ndihmën e inteligjencës artificiale. Përdorimi i teknologjisë këshillohet edhe në lëndën e gjuhës shqipe, i cili thuhet se do të shërbejë si mjet mbështetës për të përmirësuar cilësinë e të nxënit, për të rritur motivimin e nxënësve dhe për të zgjeruar burimet e të nxënit përtej tekstit shkollor.

“Është e rëndësishme të shkojmë drejt dixhitalizimit, mësimi të jetë interaktiv dhe jo të mbetet vetëm përcjellës informacioni. Edukimi politik, fetar, ndaj ekstremizmit apo dhunës, si informacion i shtuar është shumë i dobishëm në kohën ku jetojmë. Ajo që të rinjtë përvetësojnë nga ambjentet shoqërore të integruara me kurrikulat mësimore aq më shumë do të ndihen më të mbrojtur”, tha Irsa Ruçi- eksperte arsimi.

Programi i përditësuar i gjuhës shqipe nuk ka me prioritet vetëm përdorimin e saktë të gjuhës nga ana gramatikore, por të fitohen aftësi për të përdorur gjuhën në situata të ndryshme komunikimi.

“Gjuha shqipe duhet studiuar si një shkencë më vete, pastaj pjesa komunikative se si përkthehet në marrëdhëniet njerëzore të ketë një fokus tjetër. Duhet të kemi vëmendjen te gjuha shqipe si një strukturë që mban identitetin në këmbë. Para se të komunikojnë shqipen, duhet ta kuptojnë atë”, tha Irsa Ruçi, eksperte arsimi.

Me rëndësi në reformën kurrikulare shihet qasja socio-emocionale në mësimdhënie, zhvillimi i empatisë dhe ndërtimi i një identiteti qytetar të vetëdijshëm te nxënësit.

Nga Enver Robelli

Konrad Adenauer, kancelar legjendar gjerman, i cili pas horrorit nazist e integroi Gjermaninë Perëndimore në strukturat euro-atlantike, mendohet të ketë përshkruar me tri fjalë shkallët e armiqësisë në betejat politike. Sipas tij, ekzistojnë tre lloje armiqsh: armiku i thjeshtë, armiku i përbetuar dhe kolegu i partisë. Domethënë: më të rrezikshëm se armiqtë e jashtëm, janë ata të brendshmit, brendapartiakët. Këta janë të paparashikueshëm, ata të jashtmit kryesisht janë të parashikueshëm.

Në këtë kontekst, m’u kujtua Kongresi i Partisë Socialdemokrate të Gjermanisë (SPD) në Mannheim në vitin 1995. Kryetari i Partisë Rudolf Scharping kandidonte edhe për një mandat. Nuk ishte i popullarizuar. Partia kishte humbur zgjedhjet kundër Helmut Kohlit më 1994. Scharping shkoi në Kongres i bindur në fitore. Kundërkandidat zyrtar nuk kishte. Por para se të fillonte Kongresi, kryeminstri i landit Saarland, Oskar Lafontaine, e njoftoi Scharpingun se e kishte ndërmend të kandidonte. Scharping doli në foltore, tregoi se kishte një kundërkandidat. Ai quhej Oskar Lafontaine. Pasoi një habi e madhe në sallë, shoqëruar edhe me duatrokitje nga përkrahësit e Lafontaine. Fjalimi i Scharpingut nuk pati efekt të madh. Lafontaine, një popullist i talentuar, ndezi sallën. Nisi votimi. Dhe siç ishte paralajmëruar nga duartrokitjet, fitoi Lafontaine. Scharping pranoi humbjen, u ankua se rivali i tij i kishte shkaktuar shumë plagë, por tha se tani duhet të punonin bashkë sepse kishin një detyrë më të madhe se ata vetë.

Ish-kancelari Helmut Schmidt ishte duke shkuar me veturë në Kongresin e partisë së tij, kur dëgjoi në radio për zgjedhjen e Lafontaine, me të cilin ndante një përbuzje të dyanshme. Schmidt doli nga autostrada dhe u kthye në shtëpi.

Lafontaine e ngjalli partinë, sidomos me premtimet e tij për t’u kthyer te agjenda më e majtë. Më 1998 SPD (bashkë me të Gjelbrit) e rrëzoi Helmut Kohlin nga pushteti, pas 16 vitesh. Lafontaine u bë ministër financash në qeverinë e kancelarit Gerhard Schröder. Pak ditë para se NATO të fillonte bombardimin e Serbisë, Lafontaine tha dorëheqje (edhe për shkak se kundërshtonte ndërhyrjen, por s’pajtohej edhe me politikat ekonomike të qeverisë të cilat, sipas tij, nuk ishin mjaft të majta). Lafontaine vazhdoi rrugëtimin në partinë pasardhëse të komunistëve gjermanolindorë (Die Linke), në fund iku edhe nga aty dhe përfundoi në një parti të themeluar nga gruaja e tij, e njohur për qëndrime mirëkuptuese ndaj Kremlinit. Fatmirësisht, në zgjedhjet e fundit kjo parti (BSW) nuk arriti të hyjë në parlamentin gjerman.

PS. Se për pak harrova: ish-kancelari Schröder përfundoi si argat i Putinit, i cili me miliardat e tij nga gazi e nafta arriti të fusë në xhep edhe politikanë konservatorë. Nën kancelaren Merkel u ndërtua gazsjellësi Nord Stream, përkundër protestave amerikane dhe të europiano-lindorëve.

Sulmuesi i Kombëtares shqiptare, Myrto Uzuni njoftoi pak ditë më parë se i është futur biznesit. Vetë futbollisti e tregoi diçka të tillë në rrjetet sociale, duke bërë të ditur se ka blerë një hotel në Palasë të Vlorës, emrin së cilit do t’ia vendosë “Uzuni Hotel”.

Të shumta kanë qenë kritikat dhe reagimet në lidhje me këtë lajm të “rrufeshëm” dhe të papritur. Shumë prej komentuesve dhe opinioni i gjerë publik janë shprehur se sulmuesi i Shqipërisë dhe Austin FC në SHBA po “pastron” lekët e tjetërkujt, të ardhura të cilat nuk janë të tijat.

REAGIMI

Jam një futbollist që të gjitha të ardhurat e mia i investoj në Shqipëri. Kam pasur mundësi të investoj edhe në Spanjë, por zgjodha Shqipërinë sepse e dua vendin tim. Ndoshta nuk jeni mësuar që futbollistët të investojnë, por unë besoj tek e ardhmja e vendit tim dhe dua të kontribuoj këtu. Pres që njerëzit të ndajnë dashurinë dhe mbështetjen për këtë vendim, sepse çdo investim që bëj është për Shqipërinë.

Akuzat dhe shpifjet për pastrim parash janë të pavërteta. Paratë e mia janë të deklaruara dhe nuk kanë asnjë lidhje me ‘paga mesatare’ – paga ime është publike dhe e njohur. Nuk kam nevojë të pastroj lekët e askujt. Respekt dhe dashuri për të gjithë! Myrto Uzuni

Tre persona janë arrestuar nga policia e Tiranës, ndërsa dy të tjerë u shpallën në kërkim, pasi përmes mashtrimi i morën shumën prej 40 mijë eurosh një 55-vjeçari.

Ngjarja ka ndodhur në rrethrrotullimin e Rinasit, ndërsa policia thotë se autorët komunikuan përmes një aplikacioni dhe u prezantuan si persona të njohur.

Katër nga të autorët janë shtetasit Krenar Toromeni, Ilia Gjini, Artur Lecini dhe Elton Rrushi.

Ndërkohë në vijim, gjatë kontrollit të banesës së shtetasit Artur Lecini ku është gjetur dhe shtetasi Elton Rrushi, është zbuluar një ambient i përshtatur me pajisje elektrike, për kultivim të bimëve narkotike.

“Në kuadër të operacionit, shërbimet e Policisë kanë gjetur e sekuestruar dhjetëra bimë Cannabisi, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5”, thotë policia.

Njoftimi:

Tiranë/Finalizohet operacioni policor i koduar “Skema”.

I morën një shtetasi, te rrethrrotullimi i Rinasit, 40 000 euro, duke e mashtruar nëpërmjet komunikimeve në një aplikacion se ishin të njohur të tij, identifikohen 5 shtetas, vihen në pranga 3 prej tyre, shpallen në kërkim 2 të tjerë.

Zbulohet një ambient (dhomë banese) i përshtatur nga njëri prej të arrestuarve, me pajisje elektrike, për kultivim të bimëve narkotike.

Arrestohet për moskallëzim të krimit, 1 shtetas që u gjet në këtë ambient.

Sekuestrohen dhjetëra bimë Cannabisi, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5” me të cilin 5 shtetasit janë larguar pasi morën shumën e eurove.

Sektori për Hetimin e Krimit Ekonomik dhe Financiar, në bashkëpunim me Sektorin e Forcës së Posacme Operacionale në DVP Tiranë, Komisariatet e Policisë të Kavajës dhe Divjakës, pas administrimit të kallëzimit nga një 55-vjeçar, se ishte mashtruar nga disa shtetas të panjohur prej tij, organizuan dhe finalizuan operacionin policor të koduar “Skema”, në kuadër të të cilit u identifikuan dhe u vunë në pranga shtetasit:

-K. T., 36 vjeç, banues në Divjakë, I. Gj., 24 vjeç, banues në Divjakë, A. L., 39 vjeç dhe E. Rr., 38 vjeç, banues në Kavajë. Si dhe u shpallën në kërkim shtetasit E. B., 34 vjeç dhe L. M., 35 vjeç.

Shtetasit K. T, I. Gj, A. L, E. B dhe L. M, në bashkëpunim me njëri-tjetrin, në anë të mashtrimit duke iu prezantuar si i njohuri i tij, i kanë marrë shumë prej 40.000 euro një 55-vjeçari.

Në vijim, gjatë kontrollit të banesës së shtetasit A. L, ku është gjetur dhe shtetasi E. Rr, është zbuluar një ambient i përshtatur me pajisje elektrike, për kultivim të bimëve narkotike.

Në kuadër të operacionit, shërbimet e Policisë kanë gjetur e sekuestruar dhjetëra bimë Cannabisi, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5”.

Punohet për kapjen e 2 shtetasve të shpallur në kërkim dhe dokumentimin e plotë të rastit.

Në Tiranë u zhvillua Kupa “Ambasadori” në pingpong, një aktivitet sportiv për grupmoshat deri në 25 vjeç, ku morën pjesë rreth 50 sportistë nga klube të ndryshme të vendit, të ndarë në dy kategori konkurrimi, shkruan “ATSH”.

Në kategorinë deri në 15 vjeç, fituese për vajza u shpall Ana Kokoneshi e Elbasanit, ndërsa për meshkuj triumfoi Etjen Qoshja i Tiranës.

Ndërkohë, në kategorinë deri në 25 vjeç, titullin kampione për vajza e fitoi Samanta Agolli e Teutës, ndërsa për meshkuj u shpall fitues Kejdi Kalaja i Tiranës.

Aktiviteti u ndoq nga afër nga ambasadorja e Republikës Popullore të Kinës në Tiranë, Pang Chunxue, presidenti i Komitetit Olimpik Kombëtar Shqiptar, Fidel Ylli, si edhe presidenti i Federatës Shqiptare të Pingpongut, Krenar Dila.

Kupa “Ambasadori” synon promovimin e pingpongut në vend dhe evidentimin e talenteve të reja, duke kontribuar në zhvillimin e mëtejshëm të sportit dhe bashkëpunimit ndërkombëtar.

Altin Meçaj, banues në Vjosë, emigrant në Gjermani , është bërë prehë e një sulmi të dhunshëm mbrëmjen e djeshme rreth orës 23:00, pasi ka bërë një koment në mesenger, një bashkëfshatareje, motra e një punonjësi policie të zonës.

Ai rrëfen momentet e tmerrit, ndërsa kërkon drejtësi.

“Mbrëmë në orën 11 të natës kam arritur në shtëpi. Kur isha te lokali i fshatit më kishte ardhur një mesazh kërcënues për një “like”. Mesazhi më erdhi nga një bashkëfshatari im që ai sot është komandant me forcat RENEA në Fier. Like i bëra motrës së tij në Facebook. Në 11 që kam arritur në shtëpi, janë fikur dritat vetëm të shtëpisë time dhe unë jam thirrur në emër që të dal jashtë. Porta e madhe me portën e shtëpisë janë në një distancë prej 50-60 metra.

Ai ishte tek porta e shtëpisë, jo tek porta e madhe. Unë dola se mendova se ishte vëllai. Mesazhi thoshte që nuk e di se me kë je mpleksur. Unë dal në derë dhe aty më qëllon direkt dhe më përsërit ato të mesazhit. Ishin të paktën 3 persona. Më kanë qëlluar pa mëshirë dhe më kanë rrëzuar përtokë pa ndjenja. Nëse unë jam gabim për një like apo koment ka dhe falje. Port ë arrijë deri në këtë gjendje sat ë më bëjë mua për spital. Qëlluan edhe babanë, sapo doli jashtë.

Unë kam punuar në shtëpinë e tyre, kemi pasur marrëdhënie të mira. Fredi Astrit Lamaj e ka emrin. Më that ë njëjtat gjëra si në mesazh. Unë kam rënë pa ndjenja dhe kur u përmenda e ash veten në ambulancë. Unë kërkoj që kjo mos përsëritet më dhe dua të drejtën time, më është shkelur prona.

Telefoni im është marrë me vete, unë atë telefon nuk e gjej. Sot ka vajtur edhe policia atje po e kërkon, por nuk po e gjen. E logjikshme është që e kanë marrë këta”, tha Altin Meçaj

Ndërkohë , babai i tij 80- vjeçar, Ylli Meçaj tregon se si e ka gjetur të birin të mbuluar me gjak dhe pa ndjenja, ndërsa thekson se kurrë më parë në fshat nuk kanë patur kontradita me askënd.

Ata apelojnë njëzëri për drejtësi.

Kryetari i Partisë Demokratike Sali Berisha, me anë të një postimi në rrjetet sociale sot në 11 janar 2026, shprehet se kryeministri Edi Rama sulmon drejtësinë, me synimin e vetëm, që të mbrojë veten e tij.

Berisha shprehet se Rama nuk pranon verdiktin e drejtësisë për çështjen Balluku dhe se tenton të mbyllë hetimet, me “83 mandatet e krimit”.

Të dashur miq, në monologun e tij të neveritshëm, Ramaduro sot nuk foli për hallin e dhjetëra mijëra qytetarëve që nga Gjirokastra në Shkodër kanë banesat të përmbytura. Me këtë, ai mirë bëri, sepse përveç motit, shkak tjetër madhor i gjendjes së tyre të vështirë është vetë ai dhe ministrat e tij që, të pangopur, kanë vjedhur fondet e investimeve në infrastrukturën mbrojtëse nga përmbytjet.

Por Ramaduro foli për menderen e tij.

Ai, si peng i Lubisë, pasi ka bllokuar nëpërmjet 83 mandateve të tij të krimit heqjen e imunitetit dhe arrestimin e saj, përsëri sulmoi sot drejtësinë e tij, e cila sipas tij “nuk është as e paanshme dhe as cilësore”.

Me këto akuza, Ramaduro dëshmon se ai nuk pranon dhe nuk do të pranojë vendimet e prokurorëve dhe gjyqtarëve, meqë sipas tij ata nuk janë të paanshëm dhe janë injorantë, jo cilësorë!

Me këtë qëndrim, Rama sërish pranon fajësinë e tij dhe ky qëndrim është një apel për çdo shqiptar të ngrihet për largimin e tij nga pushteti, një ditë e më pare”, shkruan Berisha.

Po sot, në Podcastin e tij “Flasim”, kryeministri Edi Rama, ndër të tjera foli edhe për faktin që duhet të kemi një drejtësi më cilësore.

“Siç e kam thënë na duhet një reflektim i madh, serioz dhe largpamës mbi politikën penale në Shqipëri, sepse duhet të adresojmë problematika të mprehta, por njëkohësisht të mbrojmë pavarësinë, të nxisim paanësinë dhe të rrisim cilësinë e drejtësisë në këtë vend, ku kemi më në fund një drejtësi të pavarur, falë lidershipit të Partisë Socialiste të Shqipërisë dhe mbështetjes bipartizane të popullit shqiptar, po nuk kemi ende as një drejtësi të paanshme e as një drejtësi cilësore. Nuk është e lehtë, por unë nuk i jam përkushtuar politikës për të bërë gjëra të lehta apo për t’i marrë lehtë gjërat e rënda. Përkundrazi”, tha kreu i qeverisë.

Ai ka qenë në mërgim për gati 50 vjet. Babai i tij – shahu i Iranit – ishte aq i urryer sa miliona njerëz dolën në rrugë në vitin 1979, duke e detyruar të largohej nga pushteti. Megjithatë, Princi i Kurorës së Iranit, Reza Pahlavi, po përpiqet të pozicionohet si një lojtar në të ardhmen e vendit të tij.

Pahlavi me sukses nxiti protestuesit në rrugë të enjten në mbrëmje në një përshkallëzim masiv të protestave që përfshinë Iranin. Fillimisht të nxitura nga ekonomia e dobët e Republikës Islamike, demonstratat janë bërë një sfidë serioze për teokracinë e saj, të goditura nga vite protestash mbarëkombëtare dhe një luftë 12-ditore në qershor të nisur nga Izraeli, e cila pa SHBA-në të bombardonte vendet e pasurimit bërthamor.

Ajo që nuk dihet është se sa mbështetje të vërtetë ka në atdheun e tij 65-vjeçari Pahlavi, i cili është në mërgim në SHBA. A duan protestuesit një kthim të Fronit të Pallua, siç njihej mbretërimi i babait të tij? Apo protestuesit thjesht kërkojnë diçka që nuk është teokracia shiite e Iranit?

Pahlavi bëri thirrje, të ritransmetuara nga kanalet satelitore të lajmeve në gjuhën perse dhe faqet e internetit jashtë vendit, që iranianët të ktheheshin në rrugë.

“Gjatë dekadës së fundit, lëvizja protestuese dhe komuniteti disident i Iranit ka qenë gjithnjë e më nacionaliste në ton dhe tenor”, tha Behnam Ben Taleblu, një ekspert i Iranit me Fondacionin për Mbrojtjen e Demokracive me seli në Uashington, i cili përballet me sanksione nga Teherani, shkruan A2 CNN.

“Bota sot mbështet revolucionin tuaj kombëtar dhe admiron guximin tuaj. Në veçanti, Presidenti Trump, si udhëheqës i botës së lirë, e ka vëzhguar nga afër trimërinë tuaj të papërshkrueshme dhe ka deklaruar se është gati t’ju ndihmojë. Mos i braktisni rrugët. Zemra ime është me ju. E di që së shpejti do të jem pranë jush. Më kanë mbërritur raporte të besueshme që tregojnë se Republika Islamike po përballet me një mungesë të madhe mercenarësh për t’u përballur me miliona njerëz në rrugë, dhe deri më tani shumë forca të armatosura dhe të sigurisë kanë lënë vendet e tyre të punës ose nuk kanë iu bindur urdhrave për të shtypur popullin.”

Reza Phalavi, Djali në ekzil i Shahut të Iranit

Profili i Pahlavi-t u rrit përsëri gjatë mandatit të parë të Presidentit Donald Trump. Megjithatë, Trump dhe udhëheqës të tjerë botërorë kanë hezituar ta pranojnë atë, duke pasur parasysh shumë histori paralajmëruese në Lindjen e Mesme dhe gjetkë se qeveritë perëndimore i kanë besuar të mërguarve që janë larguar prej kohësh nga atdheu i tyre. Media shtetërore iraniane, e cila për vite me radhë e tallte Pahlavi-n si të shkëputur nga realiteti dhe të korruptuar, fajësoi “elementët terroristë monarkistë” për demonstratat e së enjtes në mbrëmje, gjatë të cilave u dogjën automjete dhe u sulmuan kioskat e policies. I lindur më 31 tetor 1960, Pahlavi jetoi në një botë të artë luksi si princi i kurorës së Shah Mohammad Reza Pahlavi.

Mohammed Reza e kishte trashëguar fronin nga babai i tij, një oficer ushtrie që mori pushtetin me mbështetjen e britanikëve.

Sundimi i Mohammed Rezas u çimentua nga një grusht shteti i vitit 1953 i mbështetur nga CIA, dhe ai bashkëpunoi ngushtë me amerikanët, të cilët i shitën sundimtarit autokratik armë me vlerë miliarda dollarë dhe spiunuan Bashkimin Sovjetik nga Irani. I riu Pahlavi u shkollua në Shkollën me të njëjtin emër Reza Pahlavi, e ngritur brenda mureve të Pallatit Niavaran në Teheranin verior. Një biograf i babait të tij vuri në dukje se princi i kurorës dikur luajti muzikë rock në pallat gjatë një vizite në Teheran të Presidentit të atëhershëm të SHBA-së, Jimmy Carter.

Pahlavi u përpoq të fitonte ndikim jashtë vendit. Në vitin 1986, gazeta The Ëashington Post raportoi se CIA u furnizoi aleatëve të princit “një transmetues televiziv në miniaturë për një transmetim klandestin 11-minutësh” në Iran nga Pahlavi, i cili piratoi sinjalin e dy stacioneve në Republikën Islamike. “Do të kthehem dhe së bashku do të hapim rrugën për lumturinë dhe prosperitetin e kombit përmes lirisë”, thuhet se tha Pahlavi në transmetim.

Kjo nuk ndodhi. Pahlavi jetoi kryesisht jashtë vendit në Shtetet e Bashkuara në Los Angeles dhe Ëashington, D.C., ndërsa nëna e tij, Shahbanu Farah Pahlavi, jetonte në Paris. Qarqet e monarkistëve iranianë të flaktë në mërgim kanë reklamuar prej kohësh ëndrrat e dinastisë Pahlavi që të kthehet në pushtet. Por Pahlavi është penguar në fitimin e një mbështetjeje më të gjerë nga një numër faktorësh: kujtimet e hidhura të sundimit të babait të tij; perceptimi se ai dhe familja e tij janë të shkëputur nga atdheu i tyre; dhe represioni brenda Iranit që synon të heshtë çdo ndjenjë opozitare. Në të njëjtën kohë, brezat e rinj në Iran të lindur dekada pas përfundimit të sundimit të shahut janë rritur nën një përvojë të ndryshme; kufizime sociale dhe shtypje brutale nga Republika Islamike dhe trazira ekonomike nën sanksionet ndërkombëtare, korrupsionin dhe keqmenaxhimin.

Ministria e Mbrojtjes njofton se për shkak të reshjeve intensive të shiut dhe dëborës gjatë orëve të fundit, një pjesë e madhe e territorit të vendit është përfshirë nga problematika hidrologjike dhe infrastrukturore, duke bërë të nevojshëm edhe shkarkimin e hidrocentralit të Fierzës, si masë parandaluese për menaxhimin e prurjeve të shtuara ujore.

Sipas njoftimit zyrtar, reshjet intensive të shiut dhe dëborës gjatë orëve të fundit kanë përfshirë një pjesë të madhe të territorit të vendit, duke krijuar problematika të natyrës hidrologjike dhe infrastrukturore në disa qarqe. Situata paraqitet më problematike në qarqet Shkodër, Durrës, Dibër, Berat, Fier, Korçë dhe Gjirokastër, ndërsa në qarqet e tjera problematikat janë më të kufizuara dhe të menaxhueshme.

Në Qarkun Shkodër, rritja e nivelit të lumenjve Drin, Kir dhe Bunë ka sjellë shtim të prezencës së ujit në zonat e Obotit dhe Dajçit, si dhe përmbytje të tokave bujqësore në zonën Urrelat–Shirq. Sipas njoftimit, aksi rrugor që lidh fshatin Obot me rrugën kryesore është i pakalueshëm për mjetet e ulëta, ndërsa nuk raportohen përmbytje banesash dhe argjinaturat, kanalet kulluese, shkarkuesit dhe diga e rezervuarit të Shkodrës vijojnë të jenë funksionale.

Në Qarkun Durrës, situata po shkon drejt përmirësimit në zonat e përmbytura të Sukthit dhe Katundit të Ri, por ende raportohet prani uji në rreth 1800 hektarë tokë bujqësore dhe në disa banesa në zona të veçanta të Kënetës dhe Shkozetit. Autoritetet kanë ndërhyrë për lirimin e akseve rrugore dhe funksionalizimin e shkarkuesve, me qëllim shmangien e përkeqësimit të situatës.

Ndërkohë, në Qarkun Dibër, reshjet e dëborës kanë shkaktuar bllokime rrugësh dhe ndërprerje të energjisë elektrike në disa zona. Qarkullimi në akset kryesore po mbahet nën kontroll, ndërsa në rrugët rurale po punohet për hapjen e tyre. Po ashtu, vijon operacioni i kërkimit për një shtetas të humbur, me angazhimin e forcave të specializuara.

Situatë problematike raportohet edhe në Qarkun Berat, ku rritja e prurjeve të lumenjve Osum dhe Devoll ka sjellë përmbytje të tokave bujqësore, prezencë uji në disa banesa dhe objekte publike, si dhe evakuimin e disa familjeve për arsye sigurie. Ministria bën me dije se situata po menaxhohet nga strukturat vendore me mbështetjen e forcave të emergjencës.

Në Qarkun Fier, lumenjtë Seman dhe Shkumbin kanë dalë nga shtrati në disa zona, duke përmbytur sipërfaqe të konsiderueshme toke bujqësore dhe duke prekur disa banesa. Strukturat e bashkive janë në gatishmëri të plotë dhe po vlerësojnë nevojën për masa shtesë.

Në qarqet Korçë dhe Gjirokastër, problematikat lidhen kryesisht me rrëshqitje dherash, dëmtime infrastrukturore, bllokime rrugësh dhe evakuime të kufizuara të disa familjeve në zona me rrezik. “Puna në terren vijon për hapjen e akseve rrugore dhe eliminimin e rrezikut për banorët”, thekson Ministria e Mbrojtjes.

Në këtë situatë, Forcat e Armatosura janë angazhuar në disa qarqe të vendit me efektivë dhe mjete të specializuara për ndërhyrje emergjente, lirimin e rrugëve të bllokuara, evakuimin e banorëve dhe mbështetjen e autoriteteve.

Ministria e Mbrojtjes u bën thirrje qytetarëve të zonave të prekura të tregojnë kujdes maksimal, të shmangin zonat me rrezik përmbytjeje apo rrëshqitjeje dhe të ndjekin udhëzimet e institucioneve përgjegjëse, ndërsa situata vijon të monitorohet në mënyrë të vazhdueshme.